食正360昂坪
食正360昂坪記憶中，半世人同大嶼山曾經叫做扯上過關係，是小學時代的畢業旅行團，之後？我諗去台灣，仲多過去大嶼山。
繼迪士尼之後，輪到耗資10億港幣的昂坪360——雖然，試搭又話有故障，半天吊足三粒鐘，開幕日期臨埋門脫腳成為全城焦點。之不過，講句公道話，我都試搭過，廿幾分鐘就由東涌地鐵直上大佛腳下，慳成粒鐘，又確實好方便喎！吸收經驗寧缺勿亂，，等多陣囉，等你賺埋時間plan清楚行程添。
山長水遠入到大嶼山，辣完昂坪市集、景點餐廳、紀念品店、睇埋大佛，都係玩得半日，無理由唔順個便遊多轉，再食埋餐飯咁先划算。
昂坪市集餐廳選擇唔多，我亦預要同自由行逼餐死！想有啖好食，仲有大嶼山必到五大熱點：東涌、大澳、長沙、貝澳同梅窩，要新要型要地道要鑊氣……OK OK，有關心妍Jade帶你行一轉，揀，仲等咩呀！東涌醫肚就腳
剛開張的Aviator，就地鐵站旁的東堤灣畔，行去纜車站，唔使兩分鐘，超方便。
以前就腳的搵食地點，只有東薈城，選擇不外乎酒樓、快餐等連鎖店貨色，Aviator肯定超晒班︰英式酒吧餐廳格局、桌球設備、半露天座位，Jade都讚估佢唔到咁開揚舒服。
餐廳的加拿大大廚曾於本地及海外酒店、蘇豪區餐廳任職。所以，供應酒吧例牌小食之外，還有多款水準不俗的主菜。打算歎完午餐先上昂坪的話，平日可試午市半自助餐，只不過$68起；週末的烤肉半自助餐，亦只係$98，幾抵食。再唔係，半露天位最摸住杯底，磨到晚飯睇波直落都唔錯。
近水樓台，纜車開幕之後，呢度肯定旺場逼爆。
Aviator
地址：東堤灣畔美東街2號16號鋪
電話：2403 6816
營業時間：12nn-2am
（食物last order 11:30pm）
朱古力咖啡
若嫌晨早玩完，口痕，想high個tea先出番市區，東堤灣畔隔籬，於東薈城新鮮開業的Moccato型格cafe，鋪仔細細，簡單有型。Jade鍾意佢夠relaxing，唔少人都好似Jade一樣，被放滿多款精緻甜點的玻璃櫃吸引住視線，忍不住找個位置坐。
輕食為主，朱古力當主角︰朱古力咖啡、十多款朱古力甜品、朱古力冬甩，甜度有輕有濃，香氣縈繞不散。Jade話一定要試黑白朱古力咖啡，唔太甜，香濃幼滑。怕咖啡苦口，但又無朱古力不歡的嘴刁一族，即係佢，晒！
Moccato
地址：東涌文東路51號諾富特東薈城酒店2樓
電話：3602 8838
營業時間：8am-8pm
長沙純樸有機菜
大嶼山，點只得鹹魚和腐乳，仲有新鮮農村菜呢！大江南北睇落簡簡單單無乜特別，其實餐廳七成食材都係自家種植，店後三萬畝農地專種有機植物，細微至果醬，她亦用有機士多啤梨原粒做成，味道鮮甜而且啖啖果肉，麵包都食多兩塊呀！
咪受店名誤導，其實餐廳除中菜，仲有泰菜，及植根長沙的英國廚主理正宗西菜，如原隻羊仔腩，外皮脆到似乳豬，諗起都仲識流口水。
大江南北
地址：長沙下村40號地下
電話：2980 2233
營業時間：週五至一11am-8pm
交通：東涌巴士站乘3、3M或A35
南非廚坐鎮
長沙沙灘仲有一間罕有超正餐廳，叫The Stoep，唔只有無敵海景陪食，仲可以食到南非籍廚師Dolla家鄉手藝。同一樣的免治牛肉飯，Dolla用鐵板「喳喳」聲上，在香料醃過免治牛肉上，鋪多層加有杏仁粒的煎蛋。無錯，即係加蛋，但Dolla再個快焗，令蛋中混有肉香，仲惹味！嘻嘻，我唔覺唔覺食到洗碟！
The Stoep
地址：長沙下村32號
電話：2980 2699
營業時間：11am-10pm（週一休息，公眾假期除外）
貝澳外國風情畫
上晝睇完大佛、參透完仙景，下晝，我建議於沙灘旁吃一頓地中海菜，然後行十步踏出水清沙幼的海灘，跟老外BB玩水，打沙灘排球，或者俾每粒鐘百零蚊去學潛水，身體力行去領略做人真諦。
向貝澳出發，地點鎖定陽光滿瀉的Ooh La La!。先天對正沙灘，再加餐廳內的園林裝修，營造出濃烈歐陸情懷。至於菜式，大路扒類，Greek Salad都有齊，再加不另收費渾然天成relax到震外國風情畫，我俾凸一百零一分！
Ooh La La!
地址：貝澳沙灘
電話：2546 3543
營業時間：週一至五11am-8pm，週六、日及公眾假期9am-10:30pm
交通：東涌巴士站乘3、3M或A35
大澳隱世素菜
如果，唔食齋，就等於無過大嶼山，咁好齋唔好，一定要搵間正宗！搭完巴士，仲要行十分鐘渺無人煙小路，經過荒廢的公園，再兜入小巷，先到達勁僻東方小祇園。
食肆開三十多年，主打家庭式巧手素菜，如素釀生根、粟米豆腐等。因為家庭式手作，阿媽煮法，自然比起出面鬼五馬六所謂素菜，賣相粗糙但不加味精。近年大嶼山對外開放，多行山友，老闆新增肉類菜式，廣開客源，不過，點都唔夠入廚三十年的煮齋經驗，咁殺食囉！
東方小祇園
地址：大澳南涌村9號
電話：2985 5459
營業時間：11am-8pm
交通：東涌巴士站乘11號
7月拉大隊學少林功夫
籌建兩年幾大澳少林武術中心，亦宣布下月開幕。選址大澳公立學校，理民府及漁統署舊址。設施包括足夠百幾人同時練習室外練武場、展覽館、茶藝館及營舍。開放初期，只提供學校、團體每日兩班日營活動，每位$120，可跟少林武術教練永欣師傅學易筋功。仲有導遊帶領遊覽大澳，喂喂喂，好過吽屋企打電腦啦！
梅窩明星撐大牌檔
明星效應永遠都係萬試萬靈。連自命識飲識食谷德昭，都要自己地盤揮筆而書，盛讚福聚來菜式如何那個惹味兼火喉，到梅窩梗要試。
必柯打店鋪招牌椒鹽菜式，雞翼最yummy，表皮夠脆，肉質又嫩，加埋超香口椒鹽配方，隊啤喪掂！我數過，$48有成十三隻，抵食，冒住標瘡危機都要食。
福聚來
地址：梅窩涌口道3號地下
電話：2984 8227
營業時間：11:30am-3pm；6pm-10:30pm （隔週三休息）
交通：東涌巴士站乘3、3M或A35
半日玩盡
廣告事先張揚，話昂坪360會有個美食小天堂，講到咁誇張，本來超期待；但8號試搭當日，四圍裝修火速趕工，沙塵滾滾，都唔知咩葫蘆賣咩藥！結果，全程最吸引，是長達5.7公里的架空纜車，由東涌地鐵旁的纜車站，坐二十至廿五分鐘纜車，直達天壇大佛附近，比搭四十五分鐘巴士，輕鬆好多。
纜車沿途會穿越北大嶼山郊野公園，當東涌站附近，最緊要打醒精神，有海景有機場景，最靚最開揚。之後就只係經過連綿山頭，景觀比海洋公園單調，有時仲大霧到連隔籬架車都睇唔到，都幾悶。行車暢順，亦無海洋公園纜車的「」聲咁嚇人，不過試搭當日，適逢橫風大雨，風大到暈，我坐車內跟住佢左搖右擺，幾乎暈浪。
纜車站旁的昂坪市集，仿古式建築，幾靚。可惜景點只有三個︰「與佛同行」講釋迦牟尼；「靈猴影院」睇三隻靈猴點樣得道，「昂坪茶館」由榮華主理，一味茶茶茶茶茶。Sell禪味，OK，算有gimmick，但好快玩謝，連旅行社都要配合天水圍濕地公園先夠推出一日遊。
價格
昂坪纜車車票：
雙程成人$88小童$45
單程成人$58小童$28
與佛同行靈猴影院：成人$35小童$18
身心啟迪之旅套票：（包來回車票及兩個景點門票）成人$145小童$75；以上為平日價格，特別日子車費貴五至十元
昂坪360開放時間：週一至五10am-6pm；週六及日10am-6:30pm；特別日子9am-6:30pm
有關資料
共112個車廂，每個車廂可載17人（10個坐位及7個站位，坐滿會好逼），每小時單一方向載客量可達3500人。
惡劣天氣可能暫停運作，例如八號風球、黑色暴雨警告、閃電及強風（安全標準為：持續時速90公里的強風或135公里的陣風）等，昂坪市集將會安排免費巴士回東涌。東涌纜車站附近有700個車位。
食肆一覽
百樂酒樓/La Chaumiere/Euro Go Go/Da Dolce Gelato/滿記甜品/蓬萊拉麵屋/仙津台珍珠奶茶/Starbucks/October Fifth Bakery
同場加映
東薈城outlet
經過東涌纜車站，記得順道一遊東薈城，家陣逐漸變晒特賣場，Levi's、adidas、Nike、CK underwear、Le Saunda……十幾間outlet，二折起，唔睇點得。
迪士尼雨天巡遊
落足一個月雨之後，迪士尼由原本落雨取消巡遊的政策，改為推出全新parade「米奇雨天滴答列車」，四個車卡的火車，載住著晒雨褸的米奇米妮，又唱又跳，都幾好笑。 The Stoep 呢間唔知係咪上次電視介紹果間呢...??
見到有南非bbq ,果燒羊扒好正~
頁:
[1]