[轉貼]陸羽仁 --- 高追小心 (2007/6/20)
港股在周一假前突然裂口抽高，有貨者心中暗笑，無貨者心急想追貨，今天想講講追貨的問題。大家都知道我喜歡雨天購物，在一個多星期前還寫了篇「又到落雨天」，大談雨天購物的好處，因為可以買到平貨。我不喜歡在晴天人逼逼時候買嘢，當人人都出來購物時，攤販見咁好生意，叫價都會企硬，想講價都無空間。
股市就如街市，我好怕在裂口大升或大跌的市道順市追貨，因為裂口開得咁大，多少有點人為因素，升跌５００點以上，就明顯可以在期指市場殺倉，例如上周五有散戶做了期指淡倉過夜，到今個星期一急升到５００點時，他若不想抬錢去補倉，就要被逼斬倉，假設大戶有好倉在手，推升到這些斬倉位，逼對手打靶，摣番期指平倉，大戶就可以沽期指平掉手上的本月好倉，大戶這種手法，就叫做挾倉，散戶財力有限，一挾倉就只能投降。
當然，另一個可能性是大市真係咁好，若然係咁，大市第一日勁升５００點之後，第二日還會再升１００幾、２００點跟尾，才把短期購買力耗盡。至於是「挾倉」還是「真好」，睇埋今日就知。
大市升完自然會回吐，若是「挾倉」，回吐會深的，若是「真好」，回吐會淺的。不過話得說回來，即使是挾倉，大市向好的方向亦幾明顯，這種市道不能睇淡，只是大戶挾倉平這個月期指好倉，表示他們本月已收夠籌，等大市回番的，他們又會開下月期指好倉。
我話唔喜歡高追，就是無論是那個情況，短線高追都可能會吃虧。假設周一升得咁急係「挾倉」，大市可能會回落到２１０００至２１２００點的水位，甚至在日中交易試穿２１０００點，若能等到這些時候買貨，價錢都平的啦。
另一個可能是「真好」，大市升多２００點，不過之後都應該回吐，例如跌番２００點，去番現水平，你睇定的再買，都唔貴得過今日好多。
高追的危險是一買即回，心理上很不好受，你可能話如果我睇好見２３０００點，買貴少少都唔怕，問題是大市回吐時又像模像樣，你高位追貨衰起上來又跌番１０％以上，到時你話止唔蝕好呢？我成日話要堅持１０％止蝕，如果你入貨價唔靚，買親都要止蝕，咁都幾頭痕。
當然，大市牛氣好盛，若果真係有較像樣回吐，你又信大市會再升，就要在這個月抓緊機會買貨，我估計大市要麼不升，若果升起上來，下月升勢會轉急，到時的股票就會貴到追唔落手矣。
陸羽仁
P.S. 我覺得陸羽仁分析得幾好.今天早上開市升得好地地,中午便回吐了.幸好無高追,否則就要坐艇了.
最奇怪的事, 工商銀行最後不升反跌. current HS index is too high, quite dangerous
頁:
[1]