[轉貼]陸羽仁~ 炒落後 散貨時 2007年6月26日
炒落後 散貨時 2007/6/26 上午 09:41:37大市急升，回吐有限，網友問起何時才炒落後，例如銀行股和地產股，何時炒到匯豐，我估落後股不是不會炒，但炒到落後股就要小心，通常炒落後就是大戶散貨的時候。
大市的炒風正在波浪式蔓延，大H股未炒完，略為回吐，大紅籌又接力上，這一浪炒紅色股為主，炒作的主要是我一直講的「回歸A股」概念，現時傳聞中移動（０９４１）可能快到下月就上A股，所以港股就向這個方向衝刺。
本地藍籌股唔當炒，特別係地產股，主要受加息陰影響，美股跌就因為次級按揭風波又再浮現，利息有上升壓力，美國利息唔減，香港亦無得減息，樓市失去上升推力。再加上股市炒得勁，不少炒作資金炒股唔炒樓，樓無人炒，減少一半以上的買家。地產發展商亦回歸現實，早前高價搶地，如今各大發展商似有默契，密密手勾地，但投地時又不高價去搶，呢次這幅地由這個發展商投得，其他發展商投唔到唔緊要，又再勾地；發展商以合理價投地，起時又打扮成豪宅賣個天價，增加獲厚利機會，低價投地對發展商本是好事，不過市民見勾地價不高，二手樓價亦無得升，短線對地產市道感覺更負面。
銀行股相對中性少少，不過地產成交普通旺，本地銀行生意亦唔會賺得太緊要，因為樓按是銀行穩定的大生意，樓按不火爆，銀行執水無咁勁。而巨型銀行如匯豐主要睇吓美國次按風波點搞和美國巨型銀行的股價走向，這些因素未明，匯豐暫時亦未大好，唔回吐都偷笑。有時睇股市都幾好笑，早前如果出現美國次按的風波，又話搞到貝爾斯登兩個對沖基金唔掂，港股都恐怕要跌１０００點，再加上阿爺股市又話跌幾百點，港股又可以跌多５００點，但如今港股要升時，又唔跟美股，又唔跟大陸A股，港股堅得咁緊要，如果你話完全睇基本因素，話唔係資金炒作，我就唔係好信啦。
如果前題係資金炒作，炒起上來都會一浪一浪咁炒，到紅色股炒到上天花板咁高時，仲有分析員出來唱更高的價錢，例如中移動炒到上１００元時，就有人話佢值１２０元，理由可以話係３G面世，可以係電訊業重組，甚至可以係奧運，總之有理由。
不過炒起中移動班友，見中移動A股上市炒到顛後，就知道中移動再往上走的空間有限，甚至如今年１月那樣，國壽A股面世時，就是H股短期見頂之日。炒到咁上下，幕後的資金就派貨走人，到時就會慢慢離開紅色股。
大戶倉位大，走人時一定係好熱的時候，而且從一種股票中撤退，又會炒吓其他落後的股票，既引人跟風炒作，又在自己轉期指淡倉位前，維持期指的熱度，等轉哂淡倉時，才會「等跌」，等候推低大市的消息和時機到，然後一手推低股市。
匯豐佔恒指比重大，頂高匯豐，係頂住恒指的最佳工具，而炒作資金由紅色股轉向落後的地產股時，炒作落後股，點著藍燈籠時，大家就要小心了。
陸羽仁 thx for posting
頁:
[1]