發新話題
打印

[轉貼] 陸羽仁~贏粒糖 輸間廠(3)(2007/6/29)


[轉貼] 陸羽仁~贏粒糖 輸間廠(3)(2007/6/29)


  講兩講這個「贏粒糖,輸間廠」的題目,觸發很多網友回應,講出自己買股的失敗經驗,其實這些失敗經驗極其寶貴,唔失敗過唔會成功,唔輸過錢唔識贏錢,陸羽仁開blog講嘢,你地多睇完就算,唔會上心,亦好難上心,要自己輸過,瀨過嘢,才會上心,交學費唔緊要,最緊係輸咗錢交咗學費,最後學到嘢。

  網友toto買股輸錢後,有此感慨話:「原來陸sir D 心法好蝦人用,  知道 同 實踐 原來係兩回事嚟架,  (可惜自己嘅領悟層面只係 “know” , 唔係 “get到”), 最抵死係嘅係我仲成日暗地裏笑D blog 友嘅留言,  問埋哂D乜鬼嘢止賺、止蝕問題,  陸sir 同 金曹師兄D答案咪又來來去去嗰幾招心法, 我第一日睇網誌就學識啦!偏偏自己又犯同樣嘅錯, 真係低打! (呢個世界真係無free   lunch ,始終都要教學費,不過都有得著嘅…)

  你地都有返過學上過堂,覺得好悶哩,除了老師教得唔好之外,亦因為返學時太後生,好多嘢都無經驗,自然聽唔入耳。好啦,買股關乎自己荷包,你地都好有興趣學習,但睇完明唔明,明咗用唔用得到,係兩回事。我講啲嘢,聽落好易,做落好難,點解?因為要跟住做,違反人性囉!人性有太多弱點啦,自以為是,錯咗唔認,想發達,怕輸錢,唔敢面對現實,數十日都未數得哂,大戶就係睇住人性的弱點來食你o既。要在股場炒股贏錢,就係要做違反人性o既事,其中一樣就係止蝕要快要狠。

  網友sillyc講起他買文化傳信(0343)的慘劇,大家應該重溫,佢話「大概在前前年聽人講343文化傳信遲D會同IBM合作到時一定升到1元,已經從0.1幾升到最高0.72,報紙又見成日有佢的報導,當時回返0.4幾, 我想仲有 0.5水位賺喎(以為實賺梗),即刻用晒當時的成副身家在0.49買咗60000股,過咗幾日真係升咗0.5幾,又過幾日又升到0.6,我想今次好啦,股票戶口顯示多咗幾千蚊,不過又過幾日跌番0.5幾,我覺得一定會升番,咪等吓,不過佢一路陰陰吓又跌到0.4,我都沒cut loss,心想沒理由會跌一定會升,繼續等,跟著仲戒咗日日去睇,點知再去睇時,己經跌到0.28-0.3﹐呢個時候我開始懷疑佢升唔番,但是又唔甘心放咗佢﹐即刻沒咗一半身家,又心想佢唔會再跌到0.1掛,點知佢就真係跌到0.07,在呢個時候我信佢可能真係會跌到0.01,所以在佢回升小小時0.09,嗱嗱聲放走佢,幾慘烈。而家仲嘔血,又見佢升到0.24。」

Sillyc 再講另一單盲毛買股事件。「就在我放晒成副身家係343度,佢又陰陰跌沒眼睇的時候,我又蓄咗幾千元,跟住就開始身痕又心痕,睇見417謝瑞麟突然升咗好多,報紙又日日吹咁謝瑞麟轉虧為盈,提早申請撤銷破產令之類好消息,我心想今次應該OK啦,謝瑞麟有好多分店,珠光寶氣有實在的價值喎,至於謝瑞麟點解之前會攪到破產就一於好少理。」  

「就係佢0.52時候買咗10000股打算長渣,可是一買就跌,我梗係唔放啦,想住係長期"投資"。佢後來10合1,供股(忘了是10合1先定係供股先),總之手上股數得番1200股,變為碎股,而且股價又陰陰地斷斷續續由5元跌到2元,但是死忠心(以為忠於自已的選擇),又成日想住佢有店舖喎,死唔認輸,想住幾千蚊"投資",應該唔怕掛,真係點知佢可以跌到得0.8,去年謝瑞麟仲犯埋規,董事被拉,停牌拒絕再玩。唉﹗唔好意思各位,借個地方來告白吓自己 D白癡嘢。」

陸羽仁如果在大學講「股票投資101」,就會搵呢Sillyc的個案,同大家上導修課,第一堂導修,第一個問題,就問大家Sillyc究竟衰乜嘢?衰唔緊要,所有人投資都衰過好多次,但要知自己衰乜,下次唔好衰埋同一樣嘢。

  Sillyc同其他幾個幾年前買文化傳信輸錢的朋友,個案都好類似(或者買雞股輸錢的個案其實都大同小異),我稱之為「入籠格」,一買已經行入個老鼠籠,實聽俾人食。大家都係聽人講、睇報紙,唔知乜頭乜路,睇吓以前升過乜價位,聽人講吓乜目標價就入場,高位接貨,好難逃脫「入籠」的命運。

  明知係喪炒的雞股(恐怕你們當時未有「雞股」這個概念),就要分析吓佢處於乜階段,如果正係旭日初升,仲有得博下,已經高位牛皮兼回吐,入去接就隨時接到成手貨。你地成日講報紙貼士,貼士佬推介的不同股票,你要自己研究,如果佢在文傳0.1元升到0.15元時講,你睇隻股票啱啱升,仲有得博,但Sillyc買的時候,文傳已經經過0.1元升到0.72元的階段,回落到0.4幾,然後傳出好消息,有人睇1元,Sillyc當時覺得距離1元仲有0.5元以上的水位,但有無諗過隻嘢已經炒到半殘,升上高位時莊家可能已派了部份貨,回落後一邊再放好消息,一邊慢慢「向下派」,你入場時已經接緊莊家啲貨尾。

  我過唔好高追,表面上看等如要低吸,優質股回落得愈低吸貨愈好,但雞股回得好深,卻不是好事,雞股股價全是人為造成,回落一、兩成尚可,回到四、五成,走勢圖都幾唔靚仔,可能莊家頂唔順,可能莊家自己都出緊貨,你仲撲埋去,如果股份陰陰落,咁派貨的可能性更大。

  你可能話,陸羽仁講到咁複雜,實戰時一般散戶好難分得開,我話唔驚,那時還原基本步,又係要定止蝕,一成止蝕又好,兩成止蝕又好,到位就斬,唔好留情。

  上完導修課,最好實習吓,唔試過,唔輸過錢,對陸羽仁講緊乜唔會太有感覺,如果要輸錢,當然係後生輸好啲,後生輸哂,可以搵過,唔駛怕輸錢,最緊要每次輸錢都明白輸乜,輸多幾次,你就會明白陸羽仁經常講嗰的笨笨地、幾保守、贏錢贏唔盡的投資心法,到底為乜咁做。

陸羽仁

TOP


good topic, thx

TOP


慘痛的教訓、真是值得細細回味、非常之多謝咁寶貴的經驗道理!

TOP

發新話題
©2001-2009 3Talks.com, All Rights Reserved. 免責聲明及版權聲明

重要聲明:本討論區是以即時上載留言的方式運作,3Talks.com對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,用戶不應信賴內容,並應自行判斷內容之真實性。於有關情形下,用戶應尋求專業意見(如涉及私人、買賣、醫療、法律或投資等問題)。由於討論區是受到「即時留言」運作方式所規限,故不能完全監察所有即時留言,若讀者發現有留言出現問題,請聯絡我們。3Talks.com有權刪除任何留言及拒絕任何人士留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。