黃金時間 靈性事件
黃金時間為一匹中班配售馬, 隸屬郭靈華馬房, 早熟兼成績不俗, 本來前景秀麗, 但在一場三班賽事中, 直路高速衝刺期間嚴重內出血, 馬匹已經漸漸慢下來, 雖然腳步浮浮, 左右腳出到亂晒籠, 但仍堅持直至騎師彭瑪安全落馬後, 一秒不夠已經立即倒地, 死亦不想同歸於盡, 靈性至此, 好馬之極

勝驥, 鴻駒 錯馬事件
勝驥為4班老馬, 成績一向普通, 鴻駒為2班自購馬, 質素寄以厚望, 兩駒俱為隸屬屈雅達馬房, 當日勝驥跑早場, 結果馬房把鴻駒當勝驥去跑4班賽, 結果輸了, 3甲不入, 直到鴻駒尾場出賽時, 才發現跑錯馬, 鴻駒當然勒令退出, 鴻駒是場係一匹有飛半冷馬, 其實馬迷都算好運, 4班都跑唔贏, 跑2班輸9硬啦, 有飛都死

驍驥 不死之謎
驍驥為一匹垃圾六班馬, 係一場沙地夜賽中, 出閘不久即拋下騎師, 倒地不起, 賽事完結後, 獸醫準備叫人拉起帆布, 打針人道毀滅佢, 當帆布拉起, 一切準備就緖, 驍驥好似知道咁, 竟然立即彈起, 仲好鬼精神咁起幾野飛腳, 結果佢唔使死, 正如驃叔話齋, 好馬死得快, d衰馬永遠都死唔去

風調雨順 未跑先贏事件
風調雨順本為1班高價馬, 隸屬老摩馬房, 年老後落至5,6班, 係一場低班賽事中, 佢未入閘, 司閘員已經按掣開閘, 其他馬應聲彈出, 司閘員當然知道瀨左野, 立即按賽事終止, 可憐多匹馬已經高速跑了600-800米, 但竟然要再跑, 馬迷當然醒目, 風調雨順立即瘋狂落飛, 結果都贏唔到, 只跑第2, 馬會當然又大受抨擊啦

興勝, 精驥 單挑事件
興勝為10歲老馬, 告東尼策騎, 精驥為4歲當打馬, 劉伯恩策騎, 係一場中班賽中, 只得呢兩匹馬出賽, 單打獨鬥, 結果當然告仔贏啦, 興勝先領放, 直路初段落後, last打返上黎贏短馬頭, 精彩

奇兵 忠心事件:
奇兵為一匹低價配售馬, 初初出賽跑到一無是處, 跑至第3, 4場左右, 開竅後贏了6場, 由4班一路贏至1班中游, 仲曾經以140磅頂磅贏馬, 但其實馬匹實力不算太高, 只係鬥心強橫, 所以多數都係以短距離勝出賽事, 在生平最後一戰中, 係一場一班大賽(唔記得咩大賽), 因為奇兵實力並不超卓, 所以只係一匹半冷馬, 好多人仲認為佢根本唔夠班, 結果佢直路負隅頑抗, 明知輸左, 仍奮力向前, 全因佢鬥心太強而害死自己, 最後佢力拚下跑第2, 一過終點, 胡活士已經即刻拉停, 跳下馬攬住奇兵痛哭, 因為奇兵已經嚴重流鼻血(其實係內出血), 倒地奄奄一息, 草地亦染紅了, 獸醫決定替奇兵人道毀滅, 拉起帆布, 胡活士才依依不捨地離開, 佢係我見既第一位, 亦係唯一一位, 會為馬匹流淚既騎師


福馬 自殺慘劇
呢單野係聽老一輩馬迷講的, 並非我親眼目睹, 福馬為一匹70年代初既馬王, 曾經贏過打比, 遮打盃等大賽, 所以出親都熱過火屎, 聽老一輩馬迷講, 買佢place好過收息, 結果係一場一班賽中, 佢又係大熱門, 有一馬迷訓晒成副身家去買佢place, 福馬賽前狀態極佳, 質素超群, 真係無win都有place, 結果賽事初段走勢良好, 上山一段徐徐發力上前, 理應輕勝, 但福馬落山時, 無端端外閃, 仲自己猛力撞埋馬場外圍幅石屎牆, 當場斃命, 奇事............馬王都會自殺, 但可能仲多馬迷陪葬呢!!!


海霸

海霸為低班短途馬, 非常出名, 前速飛快, 有第一班既前速, 但第九班既後勁, 氣量只得800米左右, 每次出跑馬地975米, 就大熱門, 佢每次出閘就狂放, 領先成10幾個馬位入直路, 但最後100零米就係度 "冷" 過終點, 買左佢會緊張, 究竟佢可唔可以捱到終點呢? 有時 "冷" 到, 有時 "冷" 唔到, 好搞笑, 但佢一出 1235米賽事, 就即刻99倍, 結果最後直路, 係任過唔嬲, 基本上騎師落地自己去跑都可能快過佢, 當然次次1235米都入直路領先10馬位, 過終點時反輸20馬位以上, 當時d馬迷形容d人有頭威, 無尾陣, 總會話 "你成隻海霸咁"

興龍

興龍為一匹頂班長途自購好馬, 隸屬王兆旦馬房, 但佢實在太長途好馬啦, 跑2400米都會嫌短, 跑2000米留下, 根本又係睇少隻, 冷到唔使買, 當年所有大賽都係跑1800米, 董驃都話引入呢隻馬唔知做乜春, 呢隻馬應該去跑4000米, 甚至跑跳欄, 幸好興龍都贏左4-5場香港最長途賽事 2450米, 唔使晒左隻馬

香港本地產馬

呢單, 純粹聽董驃講ge, 香港n年前, 有一隻雌馬叫 棉亞棉棉亞,  初運來港時, 出左幾場, 仲好似贏過馬, 之後竟然發覺隻馬女, 原來有 "涵", 馬主呢暈真係買大送細, 隻馬女當然唔再跑, 好有心機運去大嶼山安胎生仔, 結果真係生左隻馬仔, 可惜香港既土壤同氣候唔適合, 隻馬仔未能養壯, 不能做出賽馬, 但個馬老母就運返跑馬地繼續跑, 仲贏多幾場先退役添!!!!

馬王拉車

仲有一單, 又係聽老一輩馬迷講, 戰時有一隻馬王級既馬, 叫做 "九龍" or  "五龍"(我唔記得左), 打仗時竟然俾人攞左去 拉車, 哈哈哈, 打完仗後, 又俾馬主搵得返佢, 然後再跑, 都繼續贏大賽喎!!!

自殺撞牆死的馬應是根州童。