17- 01- 2007
　天水圍接近內地邊境，兩地的網絡經常出現重疊覆蓋的問題。有居民在區內使用手提電話時，發現經常無法接通，若然內地的電訊網絡信號蓋過香港，手機會自動變漫遊，就算將手提飛線至固網電話，也一樣會「中招」。最離譜是，電訊公司明知有這情況，仍照收漫遊價，居民向電訊管理局投訴又不受理，原因是在天水圍出現的過界信號合乎標準。文、圖：麥少玲

　家住天水圍嘉湖山莊的黃小姐，知道天水圍區的手提電話接收不佳，會間歇無法接收，為免與親友失去聯絡，她在手機設定「無信息」功能，即每當未能接收香港網絡，所有來電會自動轉駁到家中的固網電話。
電訊公司稱是用戶問題

　去年10月，她收到手提電話帳單顯示，有一分鐘通話時間是以中國漫遊收費計算，由於當時她沒有離開香港，她與電訊公司職員理論，職員估計是她的電話接收不佳，自動飛線往固網電話期間，國內的信號強於本港，故就算已轉駁至固網電話，也被當作漫遊收費計算。

　黃小姐說：「呢個情況我完全唔知，我已經飛線返屋企，咁都當漫遊計，好彩只係收咗12.22元，佢哋話豁免唔使我畀。」以後每當黃小姐在天水圍使用手機，她也會額外留意。可是，去年11月她又中招，帳單內有二十三分鐘是中國漫遊費用，共281元，她再向職員了解，職員堅稱這是黃小姐的問題，要她繳付。她說：「我唔想拗，只好畀咗呢200幾蚊算數，當我唔好彩。」
堅稱無離港 心有不甘

　詎料，去年12月的帳單又有三十分鐘是漫遊通話，共收366.6元，一次又一次在香港變漫遊收費，黃小姐感到無奈及不滿。她說：「嗰段時間我受傷喺屋企休養，好肯定所有電話往來都喺香港，有醫生紙為證，希望電訊公司酌情免收。但佢哋一於少理，我忍無可忍，反問點解之前十幾蚊可以豁免，係咪少錢就唔使畀，多錢就逼人畀！況且依家擺明係佢哋網絡唔夠大陸信息強，佢哋應該加強網絡接收，冇理由要用戶喺香港畀漫遊價，好唔甘心。」

　為此，黃小姐向電訊管理局反映，有職員表示知道天水圍區部分地點一直存在有可能接收漫遊的情況。她說：「佢哋知道我問呢樣嘢，就話佢哋個網頁都有寫出嚟，淨係叫人留意就算，之後話唔受理我嘅投訴。」黃小姐更因而換來一肚氣。

咁都得?!