發新話題
打印

[轉貼] 陸羽仁 --- 贏粒廠 輸間廠(2)(2007/6/28)


[轉貼] 陸羽仁 --- 贏粒廠 輸間廠(2)(2007/6/28)


港股臨近期指結算插一插,期指低見21600點,尾市略反彈,今日結算日。對好友來說,大市回吐絕對係好事,放慢少少升,升完又回吓,可以將升勢延續,繼續係嗰句,即使見大市回吐,都唔好做淡。

  繼續講講昨日講開的「贏粒糖,輸間廠」的話題。輸間廠好多人試過,網友路斯伯的經驗是買入一隻細股新確(1063),在2.3元時買了12000股,2.8萬元,其後一路跌,1.5元,1元,0.7元,後來供股裂口低開造0.3元,最後路斯伯在0.4元沽出,得番4800元,只得個零頭。

  不過路斯伯的情況不是最慘痛,我有個朋友買隻雞股,花了五萬元,後來跌到阿媽都唔認得,跟住又合併又供股,供股完又供股,最後剩下來的股份只值132元,呢隻雞股最近又喪屍翻生狂升了,但朋友的股份只值千幾元。

  講番路斯伯的個案,陸羽仁明知故問,路斯伯自命膽少,為什麼敢輸不敢贏呢?為什麼在輸的時候,見到股份不斷下跌,仍然敢死守唔走呢?

  我認為表面看「敢輸」的行為,其實同樣源於一種怕死的心態,買股中了招,死到臨頭,大部份人唔想勇敢面對,最好的方法是無眼睇,我昨天講過大多數散戶是「膽少身痕型」,身痕想炒,膽少怕輸,買股中了招,輸到埋身,初時好緊張,四圍問人點算好,跟住無行動,隻股係咁跌,搞幾搞就想逃避,唔想再去睇,到過幾個月睇番轉頭,已經錯過了跌一成、兩成、三成、四成....等止蝕時機,得番零頭,止唔止蝕都無分別,結果就摣到尾。

  要防止自己「輸間廠」,亦有炒作心法,要「避免高追,切勿溝淡,硬手止蝕」。對少部份好貼市、幾專業的散戶來說,聞風追貨,是搵快錢的好方法。但大多數散戶幾唔貼市,例如返工唔睇得機,只能在早上或隔夜落盤或早上、中午預先落盤者,好難聞風追貨,股票升完一兩日,報紙寫到開巷,才去追貨,好易中伏,一中伏就陷入被動中,專業散戶上午追完貨下午都沽咗貨,你睇股價圖,連續兩三日幾枝大陽燭急升上來,到那時才買,這種股票雖然不排除會再升,但回吐的機會同樣大,所以避開已大幅急升的股票,想買都等回吐時買,是脫離陷阱的第一步。

  好了,即使唔係高追,但都可能睇錯,你睇大市回吐已經回得夠,怎料買完繼續大跌,怎麼辦?你睇一隻股票有勢向上,點知買完就向下,怎麼辦?好多人買股見佢跌,第一個反應係唔信,會加注購淡,以拉低平均成本,低位買貨當然有好多例外情況,包括本來已設定分注買入,每低5%1注,同臨場溝貨不同;又例如你識睇隻股票基本價值,愈低愈買(咁就要睇你對自己的分析有幾大信心);但好多散戶心態唔係咁,佢地見隻股買完下跌,入市再買,最簡單的心理是溝貨,拉低成本,這是堅持自己錯誤的行為(睇唔啱位入市就係一種錯誤),關鍵心理係「唔信隻嘢會跌」。記往不要溝貨,你買五隻股,一隻下跌,四隻上升,big deal?(好大件事?)你唔信邪,在下跌股份上加一倍注碼,假設你資金有限,沽其他股份攞錢來買下跌股,隻下跌股就由佔你組合20%變成40%,佢繼續跌你好大鑊。

  跌得多唔對路,就要硬手止蝕。有人話炒股定一成止蝕,就經常要止蝕,唔掂。我寫文就話「硬守止蝕」,係對90%對股市認識相當有限的散戶的建議,防止佢地「輸間廠」,對其他10%懂得分析大市,分得開好股和雞股的散戶來講,不一定要硬守止蝕,請你把自己分類,對號入座。自認買股係幼稚園、小學生、中學生的要硬守止蝕,自認大學生不一定要止蝕,分唔清自己屬於邊類,睇唔清股份走勢,止蝕時咪沽一半留一半攞。如上述的投資組合,本來有20%係止蝕本貨,走一半,變成只有10%係蝕本貨,風險下降。電盈(0008)是最經典的例子,香港電訊本來係大藍籌,俾盈科買了,可以先炒上28元,再跌到低位得0.8元,0.9元(5合1前的價錢),買藍籌唔止蝕,竟然可以得番個零頭。買藍籌都要止蝕,你買的三、四、五、六線的股票,就更加要明白止蝕的重要,細股波幅大,你可以把止蝕位放在20%,甚至更多,但如果有個高人話俾你聽跌30%都唔駛止蝕,又唔理你買乜股,我既唔知呢個係乜高人,亦可以話佢最後會害死90%散戶。

  你可能話如果止蝕完又再升又點算?如果經常止蝕輸錢又點算?說到底,止蝕是防止有重大損失的手法,買保險要付保險費,你唔想有代價又想迴避風險,有無咁著數呀?炒隻雞股,止蝕完佢上番佢,你睇定再炒同一隻股,即使價位高啲,但安全啲,又係一個新交易,你又係另一條好漢了。

  說到底你要慎擇入市位及入市方式,入市入得好,好少要止蝕,入市方法不好,經常要止蝕,要透過改善入市方式,減少止蝕的機會,要防止染病,而唔係有病食藥嫌佢苦。你或許會留意,陸羽仁在今年3月跌市後睇大市睇得樂觀,但睇位入市買股依然保守,唔到價買唔到就算,吼過第二次,吼過第二隻,有錢唔怕無嘢買,你們天天問咁多股,你驚無股買?入市位入得靚,入市後大市/個別股票好快向上,你買股就進入安全期,遠離止蝕位,可以放心坐吓貨。

  炒股要止蝕的時候,下手要狠,不能手軟。買股可以手軟,打靶不能手軟。改善自己入市的EQ,不要人云亦云,揀好位入市,唔對路就止蝕,我就唔信你會「再輸間」廠啦。

陸羽仁

TOP


thx~ 有齊成set睇~

TOP

發新話題
©2001-2009 3Talks.com, All Rights Reserved. 免責聲明及版權聲明

重要聲明:本討論區是以即時上載留言的方式運作,3Talks.com對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,用戶不應信賴內容,並應自行判斷內容之真實性。於有關情形下,用戶應尋求專業意見(如涉及私人、買賣、醫療、法律或投資等問題)。由於討論區是受到「即時留言」運作方式所規限,故不能完全監察所有即時留言,若讀者發現有留言出現問題,請聯絡我們。3Talks.com有權刪除任何留言及拒絕任何人士留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。