發新話題
打印

[轉貼] 陸羽仁 blog (5天更新)(更新至8月7日)


避險與爭勝(4) (2007/8/30)


美股認真搞鬼,前晚大跌280點,昨晚又大升番247點,差不多等如之前無跌過,只係玩咗一日啫。昨晚美股大升的原因係市場對9月減息的期望上升,睇落都好鬼搞笑,早一日美國市場用一個聯儲局舊議息紀錄(即並非臨時減息那次的會議紀錄)話儲局要員認擔心通脹,如今又話減息預期增加,而且早一日因為美林降低金融機構評級的憂慮,又唔知點解突然一掃而空,講好聽啲可以話美國市場人心脆弱,講唔好聽啲就係俾大戶玩哂。

美股早一日大跌,帶動港股急回,昨日一度跌到22686點,比前收市價23363點,跌了677點,比上一日造出的高位23750點,更跌了1064點,波幅很大,按我講有波幅就有人賺錢的道理(大戶經常賺波幅,而不是賺方向),昨日又有人搵水了。昨日由最多跌677點,到最後只跌343點,當中有好大購買力買番上來,有人話好淡爭持,亦有人話神又係佢鬼又係佢,我覺得後者亦有可能,大市市底強,都唔等到結算日,大戶可以早兩日高位沽了貨,昨日低位時平倉兼開下月好倉,低價開倉都幾爽。記住大戶成個亞洲都係咁做,你睇起上來好似全世界都係咁,好合理,唯一的漏洞是點解次次都係近期指結算才來個大波動呢?

  我話大戶犀利,炒股難玩,惹起網友回應,Miumiu咁講:

「我好敬重陸sir, 但我想就你對Top Gun回應, 講一個全職炒家的故事.。我學習投資只有兩,三年時間. 我曾幫一些專家(不是財經界)工作. 好不幸, d所謂專家(當然唔係全部) , 其實都係濫竽充數, 大話滿天飛(所以我唔會盲目信專家講既野). 於是, 我諗, 如果將自已的前途交在這些人的手裡, 等於自殺. 加上, 遇過金融風暴, 於是, 我決定命運要掌握自己手, 而去學投資(唔係炒家, 但陰差陽錯成咗半個炒家.).

我身邊所有的人都話投資=賭博, 一定輸. 總揾一百個理由話千祈唔好學, 不勞而獲, 絕對不應沾手. 我的看法是你不學投資, 不等於你不會有財務危機, '負資產'的故事, 大家都聽好多吧! 真的是全香港人都炒樓嗎? 相反, 我認為應該積極去面對.

亦有好多人話, 做炒家賺錢係唔可能, 不要試!
但我認為做人唔應該抱著咁既心態, 相反, 我會想辦法去克服困難. 事實有不少人做得到, '唔得, 做不到'只係無能的借口.


結果呢? 由於學懂理財及投資(但不是炒買), 令我由負資產到擁有數百萬. 有人話, 我無經歷過股災, 其實我的測市方法, 在過去3次大跌, 都預測得到當日會大跌, 跌幅接近一千點. 而最近一次大跌, 我亦高位買put, 低位買貨. 雖然, 我唔知將來會唔會high, 但我相信透過風險管理及資金運用, 投資不一定係輸的。所以, 世上無難事, 只盼有心人.
Top Gun
加油吧!


Miumiu有少少把投資和投機撈亂咗,佢的經驗似乎話學好投資回報好大,此點我絕對同意,這也是我寫網誌講投資的主因。但你話投機容易,我就認真唔同意,即使有人撲出來話佢自己投機好幾好,我都只會回應一句「孤證不立」。好似話吸煙危害健康,你就話唔係呀,鄧小平當年吸煙吸到煙接煙,咪又可以活到八十幾歲!我的回應是凡事必有例外,正如話十賭九輸,你就係嗰個第十個,跟住話賭錢好好一樣,我都唔會同意。

  散戶投機,手法如同賭博,一般沒有避險心態,個勢順時贏到笑,個勢唔順時一Q清袋,在大升市中,賭三年贏三年,但第四年來一個大跌市,就會連本金都輸埋,賭得大,仲會欠人一身債。你攞10萬去賭,手風順時可能賭賭吓變20萬、40萬,你就會心好雄,賭好大,愈有錢愈易借錢,借到突去賭,無避險之心,難逃最後一跌。

  MiuMiu兩三年股齡,這幾年都係波動向上的大升市,高沽低揸,自然感覺良好,但唔怕得罪講句,你都未見過股災,未經過大考驗,未試過你啲工夫仔得唔得,捱得過股災,先好講自己識投資投機。

  好似8月17日恒指跌到19386點那天,確實有點災味,那種跌市由全球經濟核心美國開始,弄不好可以跌出一天暴挫3000點、4000點的巨災,你唔好話唔兇險。一般人見跌市去撈,又或者跌穿250天線就入市,博命揸,今天回想,在8月17日低位撈貨自然係叻仔,但如果跌出股災又會點結局呢?

  我有個老友,在8月17日最低位入市,揸10張恒指價外認購期權,同時揸5張價外的認沽期權,呢種人就識炒啦,第一,佢預咗買呢15張期權的錢會輸清,擺明係賭,作了充足的心理準備,第二,大市最後大升,佢固然賺到笑,股市若跌出股災,佢一樣大賺,雖然佢當日傾向睇好,亦買埋自己睇錯那一邊,你估買股實睇得準o架!(再再再三警告,我唔係叫大家學炒期權,只係想用此例子說明,腦有兩邊,唔好只用一邊腦諗嘢)

  遠的股災不說,光說97年亞洲金融風暴,恒指由近17000點,跌到5800點,如果不是政府入市,跌到4000點都有之,成份股市值跌到4分1都唔夠,投資者都要死。

  千祈唔好以為我話有股災,叫你唔買,誰知道股災那天來,或者兩三年後才到,股市已經炒了10轉8轉,現時大市有勢向上,總之睇住自己枱戲,控制住風險,每天可以投資,每天可以炒股,我只係想講,全職炒股壓力太大,不易成功,當然亦會有人成功,但卻要有超凡的努力,好高EQ,才有機會到岸。


陸羽仁
本帖最近評分記錄

TOP


避險與爭勝(5) (2007/8/31)


  陸羽仁這幾篇文章的題目是「避險與爭勝」,散戶經常講的問題是「爭勝」,講自己炒股贏幾多幾多錢,完全無提「避險」,一遇風浪,就中重鎚。我記得幾個月前都有不少網友留言,話自己阿媽大炒雞股,賺幾多幾多錢,提起都好無癮,如今雞股暫時瞓直,買了雞股走唔切的阿媽,如今當然無咁風光。大家要記得,今次恒指由上浪高位23500點跌下來,只跌了4100點,跌幅17%,都係好濕碎,試想吓若有一個大跌30%、40%的跌浪出現時,就完全唔係這回事,不會跌完一個月唔夠就升,隨時跌完一靜靜幾年,亂炒唔識死的股民,結局會好慘。

  炒股至緊要「最後」可以贏錢,這個所謂「最後」,不是人生的最後,而是經歷股災之後,要求最後贏錢,唔係曾經擁有。

  舉一個例,人人都睇過亞洲電視,佢最近三十年都換過唔少老闆,你話邊個老闆最得?我就話係邱德根,好多人甚至唔記得老邱曾是亞視老闆,據說呢三十年,亞視咁多個老闆,只有佢一個人賺過一、兩年錢,其他人完全係長蝕,而老邱之所以能賺錢,主要是一個慳字,好多人彈佢孤寒,但不幸地,只有這個孤寒老闆能賺錢,亦可見呢行生意難做。其他老闆都係掟錢燒一燒煙花,結果頂唔順求去。

  炒股亦係咁,要經常賺錢,最後賺錢,不是曾經風光。股場要曾經擁有,話都無咁易,只是順住勢炒,低吸而不高追,要賺錢唔太難,而家興炒北水自由行,你就等佢回一回時,揀隻無升咁多o既股票,買落去等吓,不難有收穫,問題是你最後走唔走得到。好多朋友喜愛問冧巴,叫投資專家俾冧巴佢,我唔太喜歡講冧巴,因為唔知你攞咗個冧巴點用,明明係炒,跌落嚟要止蝕,或者曾經升過急跌時要止賺,你跌落嚟唔止蝕止賺,黃金冧巴都死。

  炒股一陰一陽,陽的一面,順勢炒作,唔算太難,咁都唔識只是幼稚園生。陰的一面,迴避風險,非常困難,難在要迴避風險同時有高回報,做得好就大學畢業。就以8月的市況為例,假設有個股民7月在23500點高位入了貨,跌下來郁都唔郁,結果嗰市坐完過山車上番去,佢一碌木咁,唔駛輸,結果仲可以好威咁同人講,你睇你睇,炒股要鎮定,淡定有錢剩,夠鎮定就可以贏大錢。

陸羽仁就話,呢種人遲早輸死佢,若果你啲股票低價回來,想做長線投資者,見到跌市唔走,都算合理,但高價買股跌市應該先止蝕,等到個市略定就鬥快買番(若果未跌定可能要再止蝕),手揸貴貨咁樣渡過波動浪,才是既避險又爭勝的手法。咁樣一止蝕又追入,隨時唔見一、兩成的水位,這就是你避險的機會成本,俾完這些避險成本還可以贏錢,甚至贏大錢的人,才算是真高手。結果真高手今年到如今的回報,可能只得2成,上述的「一碌木」,回報有4成,不能單以一時一刻的結果論輸贏。既然避險成本高,捱得過風浪,高手就會坐貨,博有更大回報,唔會升少少就沽。

買股票最簡單的避險方式,就是投資不投機,學股神巴菲特,平價買好股。不過正如我今日在頭條日報專欄所講,開放北水自由行後,香港股市會更大陸化,炒得更顛,波動更大,香港人要習慣買貴股的日子,你唔想買貴股,可能無乜得揀。或者那些好股係郁得好慢好慢的股票,你見人哋買股票日日升,你買隻股好似隻龜咁樣,非常另類,常人遇到咁o既情況,唔易頂得順。

要投機,都有好多方式避險,大基金會採用分散投資的方式,只要你將組合主要部份買了些好穩陣的股票,其餘才去炒,就可以降低風險(當然也會降低回報)。

  買炒股,無論係紅色股或雞股,要迴避風險,除了嚴守止蝕外,高位沽部份貨取回成本,係避險的基本手法,你而家買隻雞股,每股1角,等佢升到2角時,你沽一半,取回成本,往後跌到零都唔關你事,在喪升時把部份錢抽走,就是避險的基本方法。

  所有避險行為,例如止蝕,例如高位部份減持,都要增加你的成本,或者令你賺少咗,但這是保命絕招,可以令你長玩長有。我們站在股市巨變的前沿,怕風險,唔敢買,三幾個月後,你可能會覺得錯過很多;唔識死,瞓身買,不避險,三幾年後,你可能發現自己已一無所有。記往,股市是巨大的財富轉移機器,幾百年不斷運轉,不斷把弱者手上的財富,轉到強者手裏,所以貧者愈貧,富者愈富。




陸羽仁

TOP


避險與爭勝(6) (2007/9/3)


   美國連總統都走出來救樓市,證明咗老美o既樓市好大鑊,不過短期內救市有刺激股市之效,係股市的好消息,這個消息公布後,已消除了市場擔心美國政府和聯儲局遇上危機唔識反應的憂慮,減低了港股短期內面對美市崩潰的危機。

  講咗咁多好嘢,要大家留心「好消息盡出」這個問題,陸羽仁星期五收市後和中環茶友傾偈,大家都認為薯仔總統救市是好事,但大家也同意港股由上月期指結算前一日的低位22686點升到上週五收市的23984點,已升了1298點,唔係唔可以再升,但這只是月頭,日日咁升400點、500點,到月尾豈不是要升到27000點,當然無咁誇啦,所以升到咁上下會抖吓氣,回吓絕對唔奇。

  再講「避險與爭勝」的話題,網友提了好多有意思的問題,例如Sisi就話,她自從2005年開始買賣股票,自問EQ不高,因此是用多餘錢來買賣一些穩陣的股票,其實原本是想作為長線投資的,可惜最後都是受不了賺錢的誘惑,多數沽出獲利變成投機買賣。

  另一網友twohitsix就咁講:「我自己八月本來只係有些少損失,但由於EQ不足,輸左的想快D追番,結果就賭方向,仲要賭大左兼輸埋. 今年頭七個月我賺六成, 而家要拿番哂出來.變番同年頭一樣..... 我成日一輸多左,心急,就又做錯事輸更多.有咩方法可以減少或避免?

Sisitwohitsix的情況表面看完全不同,Sisi較長線,但買了股票一升就好心急賣掉,投資變投機;Twohitsix炒作味濃一點,贏得唔輸得,一輸就做錯事。但兩者都充斥著散戶最流行的心理,根源在一種想「高沽低揸賺到盡」的心態,盲信自己的眼光。

陸羽仁唔信自己的眼光,只相信大戶的眼光,靠觀察大戶和散戶的互動,猜度大戶炒作的方向,雖然模模糊糊,甚至發現有時大戶也控制不了,或者不同大戶有時會打架,但大體上觀察大戶行為,總比自己「睇市」好。原因好簡單,因為在投機的市場上,大戶永遠和散戶在對賭,大戶會做出各種股市「行情」來迷惑散戶。

有人話去澳門啲細賭場賭錢,埋枱觀察吓那邊注碼大,跟著細細注買注碼細的一邊,贏面會大啲,因為賭場有方法專殺有大錢那一邊。賭場係唔係有機關我唔知,股市就真係有機關,大戶永遠睇住散戶啲注碼落注。

我咁講究竟同SisiTwohitsix的問題有何關係?關係在於外資大戶這幾年借住全球資金泛濫和大陸把大量優質國企放到香港上市之勢,大力炒作港股,造出一個大波動向上的股市,一級一級咁將氣球吹大,直至最後的爆破。所以股市升到咁上下會大幅調整,但調整完好快又無事,早前的高位就變成後市的支持位,一級級推上,今年年初高位是21000點,後來變成支持位(上月「意外」穿破,不過在當天已差不多復元),接著上浪高位23000點,又會變成支持位,繼續往上推。

在這個吹氣球的遊戲中,股票很快就穿越基本價值,所以散戶如Sisi即使不是想炒作,到某個價位判斷股價已過高,例如25元的國壽(2628)已經太貴,將之沽出,好快就後悔。氣球吹得愈大,已沽貨的投資者愈揼心。

在這個大波動向上的市況中,股市的短期調整細浪,專殺散戶,例如8月一跌,即使初時不是大戶導演出來,但跌到咁上下大戶定一定神,睇吓自己個倉,如果仍是好倉底,佢不會炒上,反而可能先大力插低,破哂所有位,震走哂所有散戶,食哂你啲好倉,他們才輕鬆造上,跌到你唔信,升亦升到你唔信,到你信o既時候,佢又會再震你一震。

所以Twohitsix你搭啱大戶之車時,自己就變股神,有時佢靜雞落咗車行咗對頭線開車你都唔知,佢就壓到你變柿餅,人總係信自己,早兩日還自覺係股神,逆勢剛開始到時,自然無咁快認自己係股蟻,普通人多數會選擇不相信,甚至朝自己原本投注的方向加注溝淡,咁就死得好快,要擇選逆勢時即時轉軚否定自己,要好高EQ才可以做到。

陸羽仁面對咁強的對手,常懷謙恭之心,首先唔信自己對經濟的基本分析,以及對股票基本價值的判斷(若果信基本價值,在21000點以上都好難揀到好嘢買,唔係無,係好少,可以離場唔買股)。作為投資者,知道這一趟車的大方向,直至大方向改變之前,基本唔落車,通常大崩潰有大崩潰的樣子,見到苖頭先至走;當然亦可以高位減持,但不用清倉。作為投機者,就要坐順風車,比普通散戶走前半步,佢未睇好時你睇好,到佢睇到好好時你就避一避,我經常咁講,散戶打唔低大戶,散戶只可以打低散戶,你和一般散戶的想法做法完全一致,你都做梗太平山下的老襯了。

炒股者以後每當發覺自己係股神,贏好多錢時,肯定那時已是災難的前夕,你唔係股神,大戶才是股神,所以覺得自己係股神時,一係減啲貨,一係抽番五分一資金出來做相反方向,你原本做開好就轉少少錢做淡,做開淡就轉少少錢做好,唔駛等兩個月,多數有收穫,投資少少錢去估自己睇錯,就是避險最好的方法。


陸羽仁

TOP


避險與爭勝(7) (2007/9/4)


  股市常變,昨天還是你的朋友,今天就變成你的敵人,大部份人炒股長線輸錢(投資例外),就是因為他們並不明白這個敵人的性質,還以為自己很了解它。

  陸羽仁說話誇張,其實只是一種語言技巧,或者可以說是語不驚人死不休吧,例如昨天話「面對咁強的對手,常懷謙恭之心,首先唔信自己對經濟的基本分析,以及對股票基本價值的判斷」、「若果信基本價值,在21000點以上都好難揀到好嘢買,唔係無,係好少,可以離場唔買股」,

但陸羽仁講了這些誇張的話,卻搞到網友不明所以,網友水滴石穿話「陸老師今天說“唔信自己對股票基本價值的判斷”,我就迷惑了。」

這些話原本的意思只是想告訴大家現時大市,炒味轉濃,慢慢偏離基本價值,容易炒股,好難投資。嚴格一點說,價值投資者21000點樓上都不一定要離場,但要揀到好股就很困難,你看股神巴菲特近年手持大筆現金,好少買嘢,最近跌市才揀番少少貨,就知環球股市平貨不多。我話「不信自己對經濟的基本分析」,其實意思並非真係「不信」,只是要懷疑,第一懷疑分析可能錯,第二要懷疑即使分析啱,例如估計經濟走勢不利,但股市中短線未必跟這個經濟大勢走,可能會走相反,例如美國次按好大鑊,假設聯儲局減息,股市可能會升,但美國樓市若不可救藥,可能明年又再爆煲。所以請網友們對陸羽仁誇張的話,放在整個段落結構中去理解。

再講番「避險與爭勝」這個話題,有些散戶過勇,遇到危險唔識走,亦有些散戶過份小心,未遇到危險就走先,除了人性的貪婪與恐懼之外,還有一些錯誤觀念,影響了投資方法。

散戶除了經常問冧巴之外,最喜歡問目標價,背後的心態,就係想高沽低揸,當散戶知道目標價後,就如學生考試偷睇到答案一樣,用目標價去計算現價買入可以獲利多少。

我就話目標價全無意義,舉一個例,你係我老友,在中移動(0941)跌到80元時想入貨,問我目標價幾多,我話若果你唔怕股價再跌,可以買吓,目標價90元左右吧。你計一計,有12.5%潛在升幅,可以入貨,結果真係如有神助,買完捱咗三幾日,就開始升,升到90元,就到價,結果沽之,沽完見佢升到104元,當然後悔啦,心中會想「這個傻佬啲目標價都唔準o既」。

呢個老友就唔明白答你o既人的心態,講股份建議的人,首先唔想自己錯,講一隻股份的目標價,達唔到就係錯,過籠唔算錯,所以講目標價通常會講得保守一點,確保自己唔錯。

另外一點更重要,一隻股的合理價錢,和它現實的價錢,通常會有好大偏差,你當然可以睇股票的基本價值來決定買唔買,但現在的股市好多股買唔落手,又可以舉中移動做例子,在大跌市8月17日早上,我係咁寫中移動,「中移動出完業績,你估佢全年每股可賺4元,20倍PE可值80元,理論上現價可吸,唔係要沽。但你要問兩個問題,第一要問目標股份投資收益多不多(是不是靠炒A股有此盈利),第二是假設衰起上來股市再大跌,高增長好股也只值15倍PE,不排除佢可以跌到60元,若你仍然話頂得順,想長揸,就可以分段小注買吓,如果覺得頂唔順,就唔好買啦。」

結果在大跌市當日,中移動最低跌過75.6元,即使佢今天升到104元,我從一個價值投資者的角度看,看法仍然無變,70幾、80元的中移動,價錢OK啦,可以買吓,但並非超筍價,跌到70元買會安全少少,雖然此浪無見這個價。大市炒向上,中移動是重要指數股,加上北水自由行,中移動特別啱炒,所以股價越炒越高,從一個價值投資角度,覺得90元的中移動經已「到價」,但你沽了貨仍會後悔,因為大市炒上,中移動要偏離基本價值,不合理的可以更不合理。

去番我的基本命題,散戶攞個目標價,想低揸高沽,最好一買就升,一沽就跌,沽完都唔想隻股有好日子,世界有無咁理想呢?更有甚者還想捕捉股票每一個升跌浪,升到咁上下就游吓水,低位再撈番,炒波幅股可以咁,但若果真係買中好股,游游吓好容易游走咗。所以唔好期望自己可以買到最平價,沽到最高價,真正對應方法是這樣,首先分清自己是投資的我還是投機的我,若是投資的我,方法是「絕少買賣」,盡量減少出入市,死揸,不到個別股票的基本因素或大市有重大改變時,不會離場,盡量捱過波動(那些波動有時是人造波浪),就會有大收穫。

若是投機的我,方法是「順勢而炒」,唔使太信目標價位,亦唔好混雜太多基本分析,否則明明炒緊股會當自己係投資,例如估計公司會公布好業績,就應該偷步炒,而唔係見到好業績才入市,見到好業績入市是價值投資者做的,炒家不會做。投機的我要判斷大戶倉位基本方向,搭一兩轉順風車,食夠高位減持一部份,或者定止賺位,到位走人,唔好太貪,否則小心偷金不成,最後成為大鱷點心。

陸羽仁

TOP


避險與爭勝(8)(2007/9/5)


美股道指又升91點,港股開市似會抽一抽,近幾日港股升起上來無乜力,網友唔係好明,其實月頭大戶不發功,所以股市游緊自由式,有北水買吓咪升的,美股好又升吓,不過你見到400點、500點的升市,就是大戶發力的日子,他一發力,又會觸發更多市場的盤路跟風入市,反方向亦然。

有網友轉貼內地報章《第一財經》講中國鋁業(2600)挾淡倉事件,和估計的情況相近,中鋁一隻市值800幾億的股票,在8月27日可以一日升32%,8月28日又一度再升23%,簡直係挾倉挾到阿媽都唔認得,所有淡倉都要計數投降,報道講的勝方之一是一個係私募基金,我估輸錢的應該是對沖基金,多數係一個鬼打鬼的局面。一直有一批對沖基金覺得紅色股太貴,不同基金在沽空不同的H股,今次他們借貨沽空中鋁,俾人數到貨,可能本來也是幾大基金揸重貨,見到不斷有人來借貨沽空,幾個夾一夾數,就知道借咗幾多貨出街,仲有幾多可以沽貨,等對方沽得七七八八,數清可以再沽的街貨不多時,就借北水自由行的利好消息,幾家大戶一起全力掃上,兩日升50%以上,任何唔想跳樓的對手都要投降了。

事後看中鋁挾倉事件,可以當故仔咁睇,但也可以作為一個個案,研究投資的我或投機的我如何應對這種局面。

股市惡毒兇險,高手過招,你走埋去玩,好易被他們的劍風掃兩掃都掃死。散戶見中鋁係咁狂升,第一個問題係好唔好去追貨,事後看來,你唔知背景,貿貿然去追貨,風險真係高得好緊要。

其實可以從不同角度睇這個題,首先要看你是投機者還是投資者,同時要看你手上有貨還是無貨。先假設你當時無貨,究竟好唔好買貨呢?投資者當然諗都唔應該諗,記得在8月27日急升後,陸羽仁在頭條日報專欄提到中鋁,話一日升32%的股份,任何有理性的長線投資者如退休基金,互惠基金都不會買貨。換了投機者的角度,有句話叫「寧買當頭起」,這不正正是要搶貨的時候嗎?不過即使是投機,除非係睇幾個價位就走人的極短線投機者,否則見到咁o既喪升股都好難掂,一兩日升咗咁多,再升水位有限,挾倉味咁濃,正路挾完倉會回,短線炒作的風險都極高,炒唔過。

假設你有貨在手,咁又沽唔沽好呢?同樣要分投資者或投機者,從一個投資者的角度,雖然升得誇張,明顯透支了一段時期的升幅,但忍得的話最好還是不沽,你不明白佢o既升因,或許不是挾倉,而是有真實的利好因素,當時無法判斷,如果貪快錢沽了,或許中鋁真是見了短期高位,但誰知道三個月後的事呢?貨源集中咗,或者佢下一浪更高呢,浪頂好難估,除非你見到市場或個股有重大改變,否則笨笨地揸吓更好。我見好多叻仔叻女揸住A50基金(2823)游水,游游吓隻股游咗出大西洋,唔理你,所以長線投資者要盡量減少出入,即使見自己的股票現價升到唔合理的水平,都可以變得更唔合理,要持有到盡量長的時間。順帶澄清一點,我話要大家習慣大陸式的40倍、50倍市盈率的貴股,並唔係話叫你去買,買唔買你自己諗,但若你選擇去買這些貴股,只能當作投機,萬勿當作投資。

若果係持貨的投機者當時見到中鋁狂升又應該點做呢?策略和投資者完全不同,投機者應該沽貨,可以高位分段減持,見狂升又沽一半,再狂升再沽一半;又或者沽貨至取回成本,有剩才揸長啲睇吓;亦可以定止賺位,跌到止賺位清貨。投機講週轉,唔係鬥命長,同一筆資金,一個月賺10%,好過一年賺50%,投機資金有水位就要食,唔食哂都食一部份,錯過獲利機會,鎖死資金,機會成本好大。而且投機好多是係高買高賣,只能食一段,短炒買得平,都可以睇長少少,愈買得貴,防守的空間有限,就愈加要走得快。

 睇完上面的分析,就知道投資和投機的取態好唔同,買股要避險,首先要搞清楚自己想做乜,最忌方法錯配,你主觀上覺得自己是投資者,但事實上卻專門高追貴股,或者專買雞股,做哂投機者的行為,而且有糊唔識食,結果就會扮蟹。明明係一夜情,卻想與對方長相廝守,你天唔天真啲呀?有些人連自己搞緊一夜情都唔知,就更加糊塗之極矣。

陸羽仁

TOP


避險與爭勝(9) (2007/9/6)


  美股道指跌143點,主要受房屋銷售數據不理想影響,對上月二手樓簽約指數跌12%,比預期跌2%,證明樓市大鑊,令到美國地產股急跌,搞到美股急回。好多朋友問次按有無事,其實次按觸發的金融問題(例如商業票據市場停頓,企業只能用極高息發票據借錢)尚在急救中,估計唔掂可以用減息搞掂,目前減息機會不低,所以股市反彈,但美國樓市大大鑊,還在反覆爆發,減息應該都頂唔住,明年會更大鑊,所以次按和樓市好似樹幹和樹根,而家由樹根爛起,短線而言,執好樹幹又搞到棵樹幾靚仔,但中線而言,救到樹幹救唔到樹根。

  日圓又升,今朝兌美元升到115日圓邊位,高息貨幣下跌,又一輪套息交易拆倉潮,看來港股要受一受壓了。

  我見好多網友的回應,都和群眾心理有關,所以今日想講講「走快群眾半步」的話題。首是假設投機市場(唔係投資市場)係一個屠場,群眾咩咩聲行入去,隻隻劏哂肚打橫行出來,見到咁情況,結論好似好簡單,做群眾相反之事咪得囉。

  事實當然唔係咁簡單,股市引人入勝之事,通常會延續一段時間,引夠老襯落水,然後才走向反面,正如個市開始升,群眾半信半疑小注落場,你立刻走去沽空佢,輸死你都未天光,因為要引夠大批傻仔落叠,走勢自然要深度發展,你太早走去做相反之事,好易被走勢挾死。

  所以我的理論係要比「群眾走快半步」,個個買股,升到你唔信時,投機的你就要走,唔走哂都走緊一部份。個個沽貨,跌到你唔信時,投機的你亦不妨買啲,小注試盤,試啱有賺價在手才落大注追貨。

  網友非常道話香港人動西方手術,事實上大部份香港人和大陸股民一樣,只會隨波逐流,不動任何手術。要做到一感覺個市唔對路即動手術,十個人中無一個人做到,做得到,手術動得快,比一般散戶保留更多實力,到個市跌到阿媽都唔認得時,就有水頭吸貨。

  估計羊群的情緒極為重要,這就是我經常講的「散戶指數」,網友Panda123話陸羽仁網誌可以做指標,回應數量多時股市就熱,反之就冷,我認為這不是太理想的指標,因為網友的回應和波動有關,大升大跌時問題最多,比股市狂熱時更多,所以頂多只能作半個股市熱度指標。

  群眾情緒是最大的投資陷阱,若果跟住大圍情緒走,唔識抽離,最後的終點站只是屠房,所以不能不跟住群眾行一段,也不能跟住群眾行到尾,行到咁上下就要離隊,跟住人行是爭勝行為,識得落走是避險策略,至於那裏是「尾站」,本來幾難判斷,但又用番我早兩日講的原則,當你揸住成手股票,見佢哋起勢升,升過不停,覺得好過番工好多,認為自己就係股神,那時候就係那一浪的尾站。大家都睇過過年過節燒煙花,你想知道幾時完,唔使睇錶,突然間大量燒花放上天,燒過不完,響聲不絕,就係最後一爆啦,記住我講這個燒煙花效應,唔升到咁,點引到最後一班、也是最大一班老襯接貨呢!

陸羽仁

TOP


避險與爭勝(10) (2007/9/7)


  寫了這麼多篇「避險與爭勝」,是時候來個總結。寫這些文章的緣起,其實源自8月17日Deep V日早上一篇叫「避險與博矇」的文章,當日覺得大市跌到20000幾點時,已到臨界點,如無特大壞消息逼爆大市,應該跌到差不多了,所以寫了這篇文,警示風險之餘,亦提吓大家可以雞仔注博吓矇。

  其後大市果然反彈,但反彈速度亦出乎自己意料之外,原本預計兩個月才發生的事,在十幾日就發生了。再想寫「避險與爭勝」的文章時,其實目標已變為主要想講避險。在跌市之後,又有兩個老生常談的總結,第一,如果炒作的朋友,在跌市之初一跌到一成止蝕位即打靶,保留實力,之後就有機會執到平貨。第二,今次跌市復元得比三月跌市更快,一年已試了兩次,急促調整,急促復元,試得三幾次,散戶對跌市就完全無防備心,即使明知自己做投機的我,見到跌市只是死守,博佢一個月後無事發生,最後出現終極一跌時,就會全軍覆殁。

  陸羽仁覺得,在升市中,順市而炒,各方聽的貼士都信一半,跟炒吓,走一轉,要「爭勝」不難,市旺時冧巴滿天飛,隻隻升幾成,難就難在要「避險」,特別是要求有避險成本下仍能有較可觀的回報。

  股神巴菲特講過,投資第一個原則是要不輸,而第二個原則就是要堅持第一個原則。所以如何令自己不輸,少輸,最最重要。

  為了達成不輸的目標,首先要分開「投資的我」及「投機的我」,兩者不能錯配,錯配了,特別是以投資的心態去投機,必定死人。

  舉個例,網友Cecila讀緊書,第一次買股,買了隻富士康(2038)的窩輪9578,我見她打簡體字,不知是否內地朋友來香港讀大學,要知道買股和讀書一樣要交學費,我有少少擔心你今次要交學費。新手買窩輪的原因好簡單,資金有限,又不滿足於正股一兩成的可能升幅,於是買輪想把升幅擴大,但買的時候好少諗買輪跌幅也同時擴大,買股第一律是「未諗贏先諗輸」,買輪更要預咗輸清。富士康在去年底創了27.7元的高位後,其後大市不斷創新高,但富士康跟唔到大市,未再創過高位,現價20.85元,股價長期在20元至25元的區間走動。

  Cecila買的富士康輪現價0.04元,佢話在8月初買,我估佢買入價0.05元左右,跌幅約兩成。這隻輪年底12月31日到期,行使價30.08元,比起富士康的現價20.85元,是極價外輪,再觀察富士康弱於大市的走勢,年底要到行使價的機會不算高。換言之,Cecila若持貨到尾,窩輪有機會變成廢紙,一毫子都輸清。所以Cecila買輪的原因雖然可以理解,但此行為客觀上已令她變成投機者,投機買輪,要定止蝕,一成止蝕價太窄,定三成止蝕都得,但一定要止蝕,否則正股牛皮向下,時間值耗損,價外輪可以跌價跌得好快。炒輪要快,快來快走,千祈唔好話想「長揸」守吓,一唔對路就打靶,要炒換隻波動大一點的H股輪,仲有得博吓。好多人買輪當投資,心態錯配輸死人。

  知道自己是「投資的我」還是「投機的我」之後,就要選不同對象投資,正如基金都有不同的風險度,退休基金只選穩陣投資,互惠基金一般亦不會太進取,對沖基金和私募基金比較博命,要知道高回報同高風險係同義詞,你買互惠基金,一般不期望佢一年升五成升一倍,但也不希望它大幅輸錢。但買對沖基金你就期望佢有三、四成回報,也要知道佢衰起上來會摺埋。

  按自己的風險胃納,決定投資和投機的比例。投資主要平買好股,揸長線,少進出,只要買入的股票進入上升軌,一般可以唔睇唔理。投機順勢而炒,嚴守止蝕,唔好扮專家,扮睇基本因素,買隻雞股仲講一大輪基本分析,一隻空殼炒到十幾億市值,開始跌市時唔想認輸止蝕,還說它有什麼煤礦鐵礦業務,死守唔走,結果真係會死咗,買咗雞股買咗輪唔對路時沽不足惜,呢隻唔得,炒過第二隻,最緊要週轉快,多贏少輸,而唔係要長揸做人世。

  股市步向高位,高處未算高,唔炒會手痕,亂炒會傷身,遲炒不如早炒,早炒早著,累積番少少本錢,將來跌起上來,還有些利潤可頂,最怕那種又想炒又怕痛的心態,遲遲疑疑,結果就等到股市最熱,最高位時接貨。要時時有避險之心,緊要過你睇啱大市方向。

陸羽仁

TOP


政治性收購 (2007/9/10)


   港府上週五罕有入市,用了24億元,購入1572萬股港交所股份,令港府的持股量由4.4%升至5.88%,平均買入價約155.4元,在港府強力買盤帶動下,港交所當日走勢淩厲,收報158元,而政府入市佔港交所當日成交六成左右。政府大手買入港交所,如何影響港交所後市,深受關注。

  相信有留意港交所股價的股民,見到港交所炒到158元,自然會大嘆走寶,在半個月前8月17日港股deep V試底日,港交所最低見過100元,若當日撈底,現在已有近六成回報,以一隻巨股這麼短時間就有如此大的升幅,除了因為港股波動大之外,亦見港交所的吸引力。

  有一個中環茶友一年多前和老外芬佬談起港交所,茶友認為港交所70、80元已貼近外國交易所股價水平,已經「到價」,不過老外芬佬唔係咁睇,話大陸市場憧憬無限,大陸交易所股份未上市,要買大陸概念的交易所,唯有港交所,所以值得買。茶友話鬼佬買港交所其實係炒概念,唔係具體計盈利計市盈率,所以港交所股價可以升到無譜。

  港府在高位入市買港交所,等如為港交所股價打氣,但也令識計數的中環茶友們嘖嘖稱奇。市民見政府155元還去買港交所,好可能會跟風,話政府知道內幕,155元都去買,自然係睇到好高,所以唔怕跟跟。
  不過據陸羽仁收到的風聲,政府買港交所的行為是政治性而非財經性,即係話政府並不是從買股投資增值的角度買港交所。

  現時《證券及期貨條例》已規定,任何人未得財政司司長批准,不能持有超過5%港交所股份,政府這次增持到5.88%,便成為唯一一個持股超過5%的股東,雞雞地都係單一最大股東。雖然港府持股量細,其他外資合起來肯定多過港府,但金管局發言人講明,希望政府在股東會議上提供意見,並在重大事件中投票。過去政府為表示中立,未必會投票,如今則表明會投票,話明會扮演更積極的股東角色。

  現時港交所董事會中,政府委任包括港交所行政總裁周文耀在內的七名董事,股東選出董事有六名,按道理政府已有足夠控制。不過隨著港交所股價愈升愈高,港交所管理層的利益亦突顯出來,是否會對政府的建議言聽計從,也是一個問題。

  中國證監會研究中心在今年二月發表報告,指港交所有可能被外資收購,香港要未雨綢繆,顯示中央對這個問題也開始關注。雖然法例限了港交所單一股東未得政府批准不能持股5%或以上,但集合十幾個持股5%以下的基金提出收購,邏輯上仍有可能;政府增持股份到5.88%,雖然未能在股權比例上阻止他人收購,但已擺出一個姿態,港府不希望外資控制港交所,如果有意收購者只基於經濟動機,在「取易不取難」的原則下,可以嚇退部份想打港交所主意的人。

  港府高官私下講,港府購入港交所股份的原因,主要想逹成港府《十一五規劃綱領》的三項目標,包括建立中港兩地交易所的交叉買賣平台,建立交易之間戰略性聯繫,以及內地交易所將以港交所作為首選合作夥伴。

  換句話講,香港想同內地交易所合作,想港交所可以買賣A股,上交所、深交所可以買賣港股,但阿爺對香港講,你間交易所唔係太受你控制,隨時會被外資收購埋,大陸交易所同你合作得咁深,若你一夜間被人買起,我咪好煩?所以香港想同內地加強合作,先要搞好自己個後花園。

  從股民角度,唔好見到政府入股,就以為港交所好抵,合埋眼都可以追入作長線投資,香港有機會長線加強和內地交易所合作,對港交所絕對係好事,但一時三刻未能成事,不過港府咁大動作入市,必然會再引到外資買繼續炒吓概念,而且大市續升成交大,港交所可以再炒上,但記住在咁樣o既市道追入港交所,係炒作而非投資也。

陸羽仁

TOP


政治性收購(2) (2007/9/11)



一隻港交所(0388)玩轉大市,昨日港股受港交所勁升帶動,亦有北水見低吸貨,所以結果無事發生,應跌唔跌。

北水雖多,在外資的眼中,只是散兵遊勇,他們不少是在中銀開了戶排隊等自由行政策落來的資金,其性質如炒業績的游資,估計見好消息在前面,偷步炒一炒,執幾百點、1000點,無大志。不過北水阻住外資做嘢,假如我係鬼佬,就會變招,一係等你吸到無哂力時,隊你一鑊,一係順住你個勢,月中發力做上去,總唔之千萬不要對北水寄望太大,佢地唔係阿爺啲的錢,只係大陸有錢人和國企的私房錢。

講番港交所,政府入市買股,的確惹起好多人媽叉。不少港交所捧場客,見佢升得高沽咗,你政府在155元入市,搞到隻股升到近200元,沽早咗者自然會好慶。又有股民等跌市吸貨,政府入市炒高隻港交所,搞到個市跌唔落,又媽。這些媽叉有其道理,可以理解,最難理解為何外資都走出來媽。

有外資代言人大力批評,話港交所要同內地交易所合作,港府都無需增持,因為港股中國色彩咁重,無人敢得罪大陸。他直指政府增持係想影響交易所6個選舉董事的選舉。又話政府咁多錢應該走去派福利減稅云云。

這番話如果出自一個大學講師之口,大家都會覺好正常合理,但如果出自一個外資代言人之口,就覺得有少少身份錯置,因為若外資只是一個港交所的被動持股人,港府咁傻,咁高位仲去買入港交所股份,推高股價,持股大戶高興都來不及,點會去媽,千萬不要以為他們咁有原則,不義之財不去貪,合理行為應該大聲讚好,叫政府再增持先至係。

小股民無論喜歡政府買港交所也好,不喜歡也好,要明白政府行為的動機,才可避免做錯投資決定。

陸羽仁查探得知,港府公布增持港交所至5.88%,經過一番心理爭持,因為法例沒有規限港府持股5%要公布,所以她可以選擇一直不公布,暗手增持,但最後她決定公布,皆因在這個高透明度的社會,如果增持而不公布,雖然合法,但那一天被人發現了,又會被人媽叉到暈。

好了,政府決定增持過5%就要自行公布,聞說她開始時還是低調地慢慢吸貨,即是話由4.4%增至5%時買的0.6%,即600萬股左右,只係慢慢買。到上週五政府買貨超過5%這個臨界點,政府打算收市後就要公布,最後就急急買多0.88%,這900多萬股就是當日掃貨,就是因為政府掃貨掃得急,港交所當日就被政府掃高10元,政府公布買入平均價155.4元,當日收市是158元,由於政府早前已有較平的貨底,換言之政府當日是買到尾,見高位照掃,才會掃出155.4元這樣高的平均價。

正如我所講,政府是「政治性入市」,並不是以投資回報為主要考慮,所以也不怕買貴貨。牌面看,增持到5.88%,唔咸唔淡,按理應再增持,才有較大的影響力。但陸羽仁觀察股市主要看入市者的行為,政府在上周五「盡買」,超過5%時無停,盡掃到5.88%,這行為顯示,她短期內不會再買,如果想再買,當日過5%之後不用咁急掃貨,所以憧憬港府短期再入市炒起港交所,小心希望落空。

港府入市的背後的假設,是港交所日漸失控,港交所主要由13個董事組成董事局,政府委任6個,股東選出6個,再加政府委任的行政總裁,表面上政府控制7個董事。6個競舉董事每次改選3個,上次選舉外資推舉人選大獲全勝,明年又要改選,結果可想而知。

你話政府者控制7個董事,即使餘數全落入外資之手,都使唔駛咁驚呀?試想一個情況,如果香港同大陸傾掂,香港股市和內地股市深度合作,例如兩地股票交叉買賣,港交所可以買賣A股,上交所可以買賣港股,兩地股市慢慢變成二而為一。

有一天外資選出的董事突然拿來一個建議,話紐約交易所提出和港交所合併,提出現價高一倍的收購條件,你估有股權利益的行政總裁會不會心動,即使他是政府委任,又會否接受對方建議,搞出一個倒轉7比6的局面,同意港交所接受紐交所的收購?如果香港交易所意外地被外國交易所收購,大陸的股份全數在這個港交所上市,阿爺就會十分被動,完全暴露於金融風險之中。

陸羽仁講話天馬行空,但只要上述情況有1%機會出現,香港想和內地加深股市合作,都有極大困難,阿爺無必要冒這種風險,如非必要之事,有風險就唔好做,答案簡單之極。所以香港要和內地股市深度合作,先要掃乾淨自己個後花園。

港府增持後只持有港交所5.88%,照理並不足夠,沒有15%或以上,好難確保選出自己友做董事,所以長線不能排除港府會再增持,但增持不一定要在市場吸納,政府要港交所發新股俾佢都得,總之有好多方法。港府現時的持股量止唔到咳,但已向外資擺出一個姿態,香港唔會被外資控制港交所,若外資的投資「非政治性」,只是為了投資增值,遇上政府擺明車馬做對手,一般不會再搞落去,因為投資搵錢,講求週轉快,若和政府鬥法,曠日持久,入咗股唔上唔落(好似領匯咁),損失好多機會成本,就要選擇打退堂鼓;不過話說回來,如果對手嚇唔走,必有大圖謀,政府就更加要小心了。

陸羽仁

TOP


政治性收購(3) (2007/9/12 )


  美股道指升180點,主要是企業如通用汽車聲稱需求仍然強勁(唱好?),以及市場預期聯儲局下週二會減息,而且一減就減半厘,唔係四分一厘。照計香港紅色股在阿爺調控陰影下仍會軟軟地,但炒減息的浪潮又開始湧至,睇吓邊股力量大,我就估炒減息的力度會愈來愈大。

  美國這個次按危機大大鑊,如果聯儲局唔減息,這個月要推出市場以千億美元計的商業票據,唔知點賣,所以如果唔減息,就真係好壞o既消息。

  再講吓港府增持港交所。陸羽仁暫時唔係覺得政府增持到5.88%好得,因為無番10零個巴仙,都唔可以保證選出一個董事,所以政府增持暫時只是姿態,不能確保有實效。不過西方報紙及其代言人就開始媽到七彩,又媽得過份咗少少。

  好似《華爾街日報》登了一篇名為「香港除牌」的文章,指港交所日漸成為全球主要的金融中心,但港府突然增持港交所,與全球交易所私有化趨勢背道而馳,批評此傷對香港做成傷害,要將香港除牌咁話。

    老外的雙重標準嚴重到咁o既地步,真係忍唔住要講番兩句,紐約交易所、納斯特克交易所私有化呢個大趨勢大得咁緊要,的確值得學習。不過大家想像一下,如果明天工商銀行(1398)提雙倍價錢,全面收購紐交所或納斯特克交易所,你估又買唔買得成呢?當然買唔成啦,到時就會話共產黨想控制美國交易所啦!

  好啦,你話我詭辯,因為工行唔係私人公司。我又改一改,由和黃(0013)提出收購又如何?結果都係一樣,同樣話你和黃等如中國控制的公司,唔可以控制美國的交易所。過去和黃去美國買碼頭,已經被美國議員話過佢係中國控制的公司,結果買唔成。所以西方「私有化」的交易所,只係對有限對象開放。

  所以老外一句「私有化」,講落好好聽,但好似交易所這種重要公司,都係由幾個主要的金融巨頭控制,這些金融資本,最後只是幾大集團,在全球搵食,你一阻住佢,佢就話你干預市場,最好中門大開,任佢提款。

  中國是由專制的政黨控制國家,西方就係由一小撮金融巨頭操控的國家,他們主宰經濟、政治,控制埋政府,佢地投注政治,唔係揀一邊,係買全骰,以美國為例,總統選舉臨近,金融巨頭對共和黨候選人又捐錢,對民主黨又捐,唔止捐俾希拉莉,亦捐埋俾佢對手,你話有錢幾好,買嘢唔使傷腦筋揀一邊,邊邊都買,實中。

  美國政府干預市場之多,在次按一役表露無遺,而且全世界政府都係咁,早就唔做嘢,要搞到好大劑先至有反應(例如港府為何不在港交所上市時先增持至有顯著多數股權,要到今日才搞?)美國監管當局過去任由金融機構把劣質次按包裝成AAA級的「債務抵押證券」(CDO)賣出去,任由評級機構把它們評上最高級別,到如今出事後,炒一兩個CEO或部門主管頂罪就草草了事,這又怎能算是良好監管?如今在次按爆煲之時,更放寬監管準則去救市,讓金融機構可以繼續借錢俾次按業主,還要提醒四大核數師行監管準則已放寬,對金融機構查數時可以鬆手,這種干預不正正損害著美國金融業良好監管的核心價值,為何不見《華爾街日報》對此大張撻伐?

  千萬不要以為上述這些分析,對投資不重要,這些才是最重要的東西,你要搞清楚理念,才知道你炒股、炒大市時,誰是你的對手,這些對手有幾強,這些對手如何行事。明白大概念,投資時無住而不利。




陸羽仁

TOP

發新話題
©2001-2009 3Talks.com, All Rights Reserved. 免責聲明及版權聲明

重要聲明:本討論區是以即時上載留言的方式運作,3Talks.com對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,用戶不應信賴內容,並應自行判斷內容之真實性。於有關情形下,用戶應尋求專業意見(如涉及私人、買賣、醫療、法律或投資等問題)。由於討論區是受到「即時留言」運作方式所規限,故不能完全監察所有即時留言,若讀者發現有留言出現問題,請聯絡我們。3Talks.com有權刪除任何留言及拒絕任何人士留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。