標題: [轉貼] 陸羽仁 blog (5天更新)(更新至8月7日) [打印本頁]

---

作者: szeyuen77    時間: 2007-7-3 01:00 PM     標題: [轉貼] 陸羽仁 blog (5天更新)(更新至8月7日)

贏粒糖　輸間廠（４）

講起止蝕，有網友問起止蝕了好股可能有好大損失，值得深入研究。


　　網友亞K講起佢止蝕了中海油（２８８３）和A５０基金（２８２３）的故事。亞K說：「再想問問止蝕問題,(雖然陸sir都講得很清楚),回顧本人組合,雖然3月之後,密食當3番,由負20%至負5%,發現組合仍負數,可能原因如下。


1.在3月大跌市時,我有4手A５０基金（２８２３），平均成本１１８，當時太害怕，跌完再跌，在１０６，１０％止蝕，而Ａ５０，現價１６８附近！
２．有８０００股中海油（２８８３），買入價５．７，在４．９止蝕１５％，現價７．９！
３．　１０８３百江燃氣，４元買入，３.6止蝕１０％．放出後最高升至4.4
４．當然仲有１７９德昌，同２８６金匡　（差不多３０％止蝕）．這２隻我明白，德仔基本因數改變，無得好講，買金匡，擺明炒股，跌落來，跟本走唔切，食得咸魚要抵得渴．
我想問的是，Ａ50，同中海油田，其實當時止蝕是否正確決定？當然現在升，是事後孔明，但面對突然期來的大趺市，即使如你所說，不在早上爭著賣出，睇定小小，在反彈位才沽，都是要蝕．但蝕少些。
我知道１０％止蝕是買保險，買保險當然要付代價．但可否說在Ａ50，同中海油田輸錢，是時不與我。好想透過檢討有進步，避免再犯。」


　　亞K話止蝕如買保險一樣，陸羽仁絕對同意，不過我相信大家未睇透止蝕的真正作用。你旅行買１００元旅行保險，結果平安回程，你唔會話我最後無死，真係蝕咗俾保險公司。你可以即刻駁我，話我如果買咗２．４萬元咁貴o既保險，落飛機發覺自己無死時，真係會好揼心。


　　我在講亞K的例子，單計他的８０００股中海油，在４．９元止了蝕，如今７．８９元，無咗２．４萬元，當然肉痛。不過我可以話俾亞K聽，假設時光可以倒流，成件事再發生一次，佢在２月底３月初的跌市時再問我，我一樣叫佢止蝕。


　　止蝕係要防止風險，嚴重點講，係防止「輸間廠」的風險，風險之為風險，就係可能發生，但不一定會發生，唔好以話嗰市結果無股災，就話當日無風險。點解我話時光倒流都會叫佢止蝕，因為佢買的雖然算好股，但入股價不便宜，防守力弱，所以在當時的情況下不能不止蝕。


　　我經常叫大家買股要低吸，唔好高追（極短線炒股例外，買股炒即日鮮食幾個價位走人，當然要順勢高追），從亞K買中海油（５．７元入）及A５０基金（１１８元入）的入貨價估計，佢係在今年１月升市後高位追貨。從今日的角度，佢當時買這兩隻股票的價錢相當便宜，但以當日的股價睇就幾貴，因為中海油去年長期在４元上下浮游，到去年１２月２１日才開始抽升，而A５０也是在去年１１月底從８０元的水平起步急上，所以亞K買這兩隻股票雖是好股，但入貨價中高，抗跌能力較弱。如果佢係３．８元買中海油，５０元買A５０基金，在２月、３月跌市中，就有條件睇長線，不一定要止賺出貨，這就是止賺和止蝕的心理分別，止賺可以慢慢想，止蝕無得諗，下手一定要狠，錯過了止蝕價位，可能要在更低位止蝕。


　　遇上跌市時，先問自己手上是否好股，有無長線投資價值；若是好股，再問入貨價夠不夠平，抗跌能力強不強。若是好股，入貨價又夠平，那就不怕長揸，有時出出入入太多唔係幾好，沽咗未必夠膽買番。但若果是雞股，又或者係好股但入貨價貴，就無幾多選擇，唯有止蝕。


　　你可以問好股唔止蝕怕乜？陸羽仁怕貴買好股坐艇６、７年。中移動（０９４１）係好股，你在２０００年科網股熱潮時，在８０元買了它，要等到今年才見家鄉，更不用講在２０００年買入「以為係好股」的電盈（０００８）了。


　　今年２月的跌市開始來頭很猛，大陸在２月２７日急跌後，美股道指當日跟跌了５００點，這是我最擔心的時候，道指跌５００點唔係嘢少，如果接著不斷大跌，隨時有一個全球股災，遇到這種市況，前景未明，要避一避鋒頭，最宜趁反彈時止蝕，沽咗啲雞股或貴貨，就安全少少啦。若最後美股出現２０００年科技泡沫爆破式的跌市，都唔駛上身。


　　亞K止蝕唔係問題，問題係佢止蝕完後來無買番，所以止完蝕第一個問題，就係問幾時可以買番。以３月的跌市論，美股跌無耐就反彈，雖然那些對沖基金套利交易還在不斷拆倉，但港股３月初段有點自己單獨跌的味道，特別是３月５日大跌７７７點，更有少少無厘頭，就令人有挾淡倉的感覺，陸羽仁就是從那時開始，留意再入市的機會，當時低位是１８６００點，後來３月中過後都第二次再試一試這個低位，結果跌不穿，大市跟著反彈回１９０００點樓上，這就是止了蝕後，第一個補貨時機。


　　你可以質疑，陸羽仁而家事後孔明講得口響，如果當時在１９０００幾點追貨，追完再跌穿１８０００點又如何？人睇市總會睇錯，止蝕完追番貨，大市再破位急跌，追錯了，再跌，就要再止蝕，再止蝕完之後，睇定再入市。


　　記往，止蝕了好股，首要是尋找再入市的時機，不是止蝕完就無眼睇。好多人止蝕完一隻股就唔想睇，怕佢升，怕止蝕錯了，怕瘀，這種心態最唔要得，買股不要怕瘀，４．９元沽了中海油，５元、５個幾好多機會買番，高的買番唔緊要，又係一個新交易，上一個交易止蝕，是為了控制手持股份大跌的風險，新一個交易高一點買番，又博將來再上高位，完全唔應該有心魔。
　　
有啲人高位買貨，跌市唔止蝕，過一排嗰市跌完再炒過，隻股升到更高，就覺得唔止蝕好啱，這種人叫做「一舖清袋格」。而家個市愈炒愈高，隻隻雞股都番生，你在創業板都搵唔到仙股，若你認為死揸股票永遠是對的，這一刻一定啱，但要小心將來俾人一舖清袋。要記著「好景不常」這四隻字，股市不會永遠咁好。
　　
止蝕無錯，錯在高位追貨搞到自己要止蝕，錯在止蝕完無眼睇好股都無買番。唔止蝕遇上大跌市，成副身家可以無哂，到時恨錯難返。
陸羽仁

[ 本帖最後由 szeyuen77 於 2009-8-8 01:44 AM 編輯 ]

---

作者: szeyuen77    時間: 2007-7-4 01:35 AM     標題: [轉貼]陸羽仁 - 金融High Tea——提早開車？(2007年7月3日)

轉貼者註：我覺得呢篇文章不錯, 預測下半年的股海狀況.雖然未必準,但總覺得能夠領略一二,就能避免在股海成為蟹民.
P.S. 我的賬面所有股票都脫離了蟹民行列了, 2380中國電力終於升番上,半年前4.3以上的價位.下半年入市,都要睇清楚,以免又返回蟹民行列.


陸羽仁 - 金融High Tea——提早開車？(2007年7月3日)

　　港股放回歸假期無市，內地股市則照開，上海及深圳股市個別發展，滬綜指收市報3836點，上升0.4%，深成指下跌71點，跌幅0.5%，收市報 12475點，兩市成交額共計1364億人民幣，比上周五大幅減近兩成，歐洲股市普遍亦偏軟，原因同英國出現汽車襲擊浪潮同英國今個星期議息，好有可能再調高利率。

　　今日開波，股市正式進入下半年交易，上半年港股表現，單睇指數表現一般，不算太過突出，但睇真紅籌國企同股仔炒味濃郁，尤其接近六月份，先是大批死鰦幾年的細價股翻生，變成喪屍周圍跳，而且股價愈跳愈高，跟進半年結前指數大力谷高，講真散戶搵食唔算難，若然無斬獲者只能怨自己炒藝不精。

　　 上半年搵唔到錢之散戶，其中有兩大類，一類是年初跟炒「五行三保」，最後忘記及時跳車之散戶，前事不忘，後事之師，「五行三保」先食住工行上市的威勢，跟住外資炒國壽（2628）[股價及相關新聞] 回歸，在A股掛牌前把壽仔推到去二十六元高位，當散戶個個睇A股掛牌升五成，隨時見四十元之際，大戶就開始玩№狂沽，來一個反高潮結果，結果不但壽仔升勢告終，連其他大陸金融股一樣，年初狂掃工行（1398）[股價及相關新聞] 、中行（3988）[股價及相關新聞] 以及壽險股者全部坐艇，心雄買輪者仲慘，個個輸時間值輸到鯔街，最後難逃打靶收場，等唔到六月份「六行三保」翻炒的第二個春天。

　　炒紅籌回歸可以好快

　　 下半年，紅籌回歸是必炒概念之一，陸羽仁成日諗，大戶會不會照辦煮碗，在中石油（857）[股價及相關新聞] 、中移動（941）[股價及相關新聞] 幾隻巨企身上重施故技呢？傳統上，五窮六絕七翻身，今年沒有應驗，但坊間的名嘴，現在普遍唱淡七月份大市，認為大戶可能會放一放手，等個市跌一跌先。

　　 從炒賣角度，六月大市上升，七月份的確沒有再谷的理由，唯一要考慮的，是大戶會不會偷步先炒巨企回歸。上個星期四，恒指衝上兩萬二差一點收市，當時陸羽仁曾懷疑，大戶是否心急到提早開車？之後，港股假前埋單跌番百幾點，但高位待變的格局就仍然未變。

　　現時講緊回歸之紅籌，無論中移動同中石油都係巨無霸級數，中移動是內地最大流動網絡商，過去幾年上客數字持續強勁增長，以二十幾倍市盈率計，放在內地A股市場，仍然有足夠水位向上炒，外資如果要偷步炒上，對個市整體氣氛同指數，影響都可以好大，現在好多人仍然睇今年個市高位見兩萬三點，除了話個市睇幾多，另一個問題係幾時到，會係先高後低，抑或係先低後高。茶友話，如果個市要炒紅籌巨企回歸，未來一、兩個月可以好快殺上，跟住夾高指數，然後再散埋水，前前後後兩個月已經得，當然以上只係一個假設，說明個市唔一定係按分析家估計的常理發展。

　　 中央上半年大力調控股市，六月份A股實際已開始調整，茶友話，單睇指數深滬兩地仲係相當硬淨，但若睇埋曾炒到飛沙走石的三四線，好多都跌鰦四、五成，加上成交減少，所以內地股市點走，會對下半年港股影響好直接。

　　另一類上半年無錢賺、甚至蝕錢之散戶，乃係新股股民，今年上半年新股缺乏重點，掛牌後升幅大大收窄，雖然如此，但如果只抽不買，最多只係賺少鱓，問題係好多散戶以為世界係唔會變，去年炒新股見搵到食，今年又照舊，但今年幾隻比較重磅的新股，都係一掛牌就見鰦高價，股民高追就中晒招。

　　今年捧新股無肉食

　　中環茶友話，去年新股有得炒，原因之一是上市股份，好多都屬於巨型國企，這類股份雖然集資額大，但因為在行內屬於龍頭企業，對基金比較吸引，同時發股訂價較為克己，基金就算招股時買唔夠，在二手市場再入貨都仲有得諗，但上半年招股的公司，好多屬於民企，這類公司賣股所得都入老闆數，所以訂價要得好盡，上市已經無力再升，基金招股時不想要太多貨，既然坐盤有限，掛牌後表現點都不會太肉緊，股價載浮載沉一輪，靠班老散塘水滾塘魚，慢慢就會沉寂下來。

　　 茶友話，近日大批新股蜂擁而上，個別被人唱得好熱，但睇落都係無辦法逃離上半年的溫吞水現象，好似隻地產股合景（1813）[股價及相關新聞] ，招股前炒富豪效應，但假前暗盤掛牌升幅好溫和，而且散戶中籤率高，掛牌日若然有利可圖，相信好多老散都會計數。

　　 另一隻正在招股的「中國和黃」復星（656）[股價及相關新聞] ，又係另一隻受傳媒熱捧的新股，有茶友話，買內地股最驚聽到甚麼「中國XX」或者「上海XX」，正如去年工行、中行上市，又話會變中國礇豐，結果引到成班投資者鯔身捧場，好彩個市夠旺先無爆鑊，但結果表現亦不外如是。

　　 老友話，復星過去增長係好強勁，但過去強勁不等如將來強勁，更不等如盲目追捧實有覑數，正如長實（001）[股價及相關新聞] 七二年上市，投資者飛身認購，長遠梗係大賺特賺啦，問題係如果一開始就去到盡借「行」孖展買貨，怕且一早就被股市大浪淘汰鰦出局啦。

　　復星只宜打繯生波

　　復星被譽為「中國和黃」，又有一批「大孖沙」捧場，茶友話坦白講，所謂中國和黃，即係綜合企業股，綜合企業股無錯最叻係和黃，但唔係隻隻都做到和黃，正如美國總統係美國人，但唔係美國人做到美國總統，綜合企業有無成功呢？除了和黃，美國的通用都係綜合企業，這類股份最考管理層能力，對分析員來說，要跟這類公司同向客戶作出推介絕不容易，理由是業務焦點不清晰，不同睇好地產買新鴻基（016）[股價及相關新聞] 、睇好銀行買礇豐（005）[股價及相關新聞] 或恒生（011）[股價及相關新聞] 。

　　 至於復星管理層自詡能力高，揚言自己可以當成是管理費最平的私募基金咁炒，可能開記者會之時，百仕通股價仲未破底，所以復星管理層先會咁講，不過，以現時該股之「墟軃」情況，就算首日掛牌表現同百仕通看齊，入飛散戶都係無水食。

　　茶友淋完一輪冷水，咁係咪叫大家不要買呢？茶友話，炒股有時不能太清醒，既然現在大家捧到復星咁高，他不反對跟風下注，但對於落重孖展和掛牌後高追，他則認為可免則免，尤其復星未掛牌先加價，吸引力再打折扣，就算中到籤，分頭同水位都有限，只係適宜當打繯生波參與。

　　陸羽仁

[ 本帖最後由 szeyuen77 於 2007-7-4 01:40 AM 編輯 ]

---

作者: szeyuen77    時間: 2007-7-4 04:28 PM     標題: 開車市(2007/7/4)

轉貼者註：大概是下半年的一個預測. 大概和天氣報告差不多吧, 趨勢而已.


大市昨天無情情又搶高近４００點，月頭已經係咁，炒味相當濃，上週假期前都有點覺得大市有點開車格局，估不到月頭咁快就炒。

　　網友阿Ray問起，「有茶友朋友話現在好多人睇今年個市高位見兩萬三點. 但是他覺得只有兩個可能性: 1）個市overshoot（超過）兩萬三點好多，或者，2)個市唔到兩萬三點」，問陸羽仁點睇。

　　其實２３０００點作為大市今年的目標，並不是一個太進取的目標，去年底恒指收１９９６４點，若今年高位是２３０００點，升幅１５％。但恒指今年１月已抽高，日中高位曾見２０９７１點，其後急回，以高位和高位比，２３０００點比年初高位高２０２９點，高９．７％，即係話年初上完高位回吐完，再上o既高位比年初高位升１０％都唔夠。

　　可以看看去年的例子，若以去年６月１３日大跌市浪底１５２４３點，和今年１月這一個的浪頂２０９７１點比較，更是大升５７２８點，升幅３７．５％；以今年３月５日大跌市的浪底１８６６４點作起點，如要有去年至今年初這一個升市浪的３７．５％升幅，恒指要升到２５６６３點！

　　我不希望計出這個２５６６３點的數字，令你覺得這就是恒指今年高位的目標，我亦相信略為保守的網友看到這裏，已經媽聲四起，話陸羽仁亂嗡恒指目標，妖言惑眾，誤導讀者網友，所以我再重申一次，２５６６３點不是恒指的目標。我經常講，過去的走勢可以參考，但歷不會簡單重覆，不能盲信過去的走勢。

　　回到阿Ray的問題，恒指已處於２２１５１點的高位，距離２３０００點不足１０００點，以現在的眼光去看，恒指今年升穿２３０００點的機會增加，所以我估係overshoot，問題是略overshoot,　還是多多overshoot。

　　我雖然有講恒指要上２３０００點這些目標點數，但其實我主要睇的是走勢，而非點數，我會以走勢指導我的行動，決定在股市的投資是去還是留。

　　若以今年的升市和去年的升市比，今年升市起步升得急很多，去年由１０月起步，１０月升７８１點，１１月升６３６點，１２月升１００４點，這三月升幅最高。但今次上月一升就升了１１３８點，最後上月收在２１７７２點，不止起步升得多，而且喺幾日好急咁升，又無大幅回吐，走勢去得幾急。

　　這種走勢有兩種可能，第一，今次是一個快而急的升市，可能借這個月中移動上A股和月底匯豐公布業績，急促抽上，快上快回，玩埋下個月就玩完，只是一個三個月的升市。

　　第二，今次大市的升幅比想像中大，如今只是起步，升吓回吓，但會升四至五個月，恒指會升到２４０００點樓上。

　　陸羽仁目前不知那個答案，會觀察走勢去確認，我較關心走勢，多於指數，不會盲目定一個目標，以為一定會到。
網友twohitsix問到，「我也有Ray兄差不多(但相反角度)的問題，如果我係大戶，我會先在月頭壓低指數價，等散戶以為21700高位唔安全，再慢慢係低位(21000-21400)收貨。點解大戶要花咁大力，在月頭就夾高成400點呢？如果今日好多人見美國升市而跟入，咁成本咪大左又收唔夠貨？」
這就關乎我所講o既「開車市」，大市在開車之前，大戶會玩上落市，打打底，大市在２００００點至２１０００點之間游走，好多時波幅都有８００點，甚至近１０００點，其實這時股市未想升，所以有一、兩次都係月中推高，月底回吐，大戶高沽低揸期指，賺吓波幅。
但一到「開車市」，就是兩回事，股市不是在區域波動，而是波動向上，你看上月大市抽高後，回落不深，只是在６月２７日日中見過低位２１５６２點，可以話見吓２１５００點，但當日已經急彈；到６月２９日假期前又見過２１７６８點，但放完假又急彈，這種市況叫做大漲小回，大市一級一級咁炒上，走勢圖好靚，係典型o既一浪高於一浪，若確認這種走勢，回落８００點、９００點那種大雨天將幾難出現，回落４００點、５００點都係好似樣的調整，亦不會維持太長時間。但不要誤會這種市況不會回吐，升得多回吐些少好正常，不過回吐都係守住啲大位，因為大戶首先打著引擎，令它有向上動力，唔會咁易把引擎熄掉，挫傷老散的信心，否則要引傻仔再開車亦有困難。

在這種市況，高唔高追（或追同類落後股），只能是網友自己決定，陸羽仁的分析你信六成就好了，要按自己的性格和接受風險程度，定出自己的投資策略。記住唔好沽空，有貨也不要太急一手沽清。

陸羽仁


[ 本帖最後由 szeyuen77 於 2007-7-4 04:32 PM 編輯 ]

---

作者: szeyuen77    時間: 2007-7-5 09:45 AM     標題: 對沖(2007年7月5日)

昨天講起在大市處於高位時，唔敢買股票，可以同時買入認購輪和認沽輪，博大市先升後跌謀利，今日再詳細解說之。

　　你知我唔鐘意叫人買輪，主要原因有兩個，第一，窩輪只宜短炒，長揸無著數，但大多數散戶買了窩輪唔識走，睇錯固然輸，睇中都會輸。第二，窩輪發行數目太多太濫，窩輪一過了「新鮮期」，街客好少，只有發行商開價，而它們又開出好差的價錢，散戶想沽就要蝕好多差價，非常唔公平，窩輪流通量不足和濫發有關，港交所要負責。
　　
　　所以我叫人買輪，係例外而非常態。同時買入認購輪和認沽輪，其實和一個買賣期權策略有關，叫做「買入馬鞍式期權」，我以恒指期權做例子，條數易計啲。馬鞍是兩頭高，中間低，馬鞍式期權指兩個價外不同方向的期權，假設期指現價　２２２００點，買入一個行使價比低１０００點、在２１２００點行使的認沽期權，本月底到期，期權金１００點，再買入一個比期指高１０００點的２３２００點行使的認購期權，期權金８０點。這樣同時買入一個價外認購和一個價外認沽期權，就是賭在期權到期日（本月底），期指的結算價走出２１２００和２３２００點兩極之外，由於兩邊的期權金的成本合共１８０點，即使結算日期指走出這個範圍，但如超出不夠１８０點，就仍然要輸錢。即係話，如果期指升，到結算要升到２３２００點加１８０點，即２３３８０點以上，才有錢賺。如果期指跌，到結算就要跌到２１２００點減１８０點，即２１０２０點以下，才有錢賺。
　　
　　所以買入價外馬鞍式期權，係估大市／或個股大幅波動，大幅升或跌超出正常範圍，換言之，係賭大波幅。相反地，如果你做期權沽家，沽出一套馬鞍式期權，就係估大市正常波動，不會超出上下１０００點的範圍，到期時就可以把期權金殺清。
　　
　　這裏有一個附加策略，要守到到期日結算點數超出上下１０００點，機會不太大，若你持有馬鞍式期權，可以中途出貨，例如買入後期指向上，升了幾百點，２３２００點的認購期權，期權金由１００點升到１８０點，你可以先沽出這個認購期權，就把上下兩個期權的本金一次收回（或再沽高幾點收埋交易成本），你變成淨揸一個２１２００點的認沽期權，如果你咁好彩，升完之後大跌，這個認沽期權就可獲利。

　　買入一套馬鞍式期權都有風險，主要危險是大市牛皮，上落不大，期指到期時在２１２００點和２３２００點中間結算，你兩邊的期權皆無行使價值，期權金就會輸清。

　　買恒指期權一個月就到期，時間非常短，買入馬鞍式期權要贏錢的機會幾細，因為要在一個月內升或跌１２００點（加埋成本）並不容易，買價外的馬鞍式期權好易輸清。但窩輪年期較長，所以就可以係一個替代方案。

　　你在大市升上２３０００點，同時買入略價外的恒指認購輪及恒指認沽輪，若大市升到２４０００點、甚至２５０００點時，可以先沽認購輪食糊，然後等跌。另一個可能是你一買就大跌，認購輪無用，但認沽輪價值就大升。

　　你可能會問，陸羽仁講得咁複雜，你聽完都係半桶水，為乜要咁搞？同時購入認購和認沽輪的人，可能睇大市在那一兩個月就會見頂急跌，但如果買單邊買認沽輪，又怕大市再急升會輸錢，所以買入這個馬鞍式套餐，即使睇錯，買完再大升，都有認購輪可以幫補吓。

　　不過陸羽仁認為，買入馬鞍式認購輪和認沽輪，始終係高難動作，如果你連上邊這篇文都睇唔明，就可以放棄咪做，因為唔識做夾硬做，到位唔識走，可能睇中大波動也會輸錢。

　　所以最王道的方法，就係覺得大市升得差唔多時，逐步減貨，或者定止賺位減貨，減貨之後，就等大跌市揸番（除非確認是大型股災，那麼就不用心急入市）。再唔係就買少少認沽輪對沖，但那筆錢要預咗輸哂，要預期手上持有的現貨唔沽，升幅足夠抵銷買認沽輪輸的錢有餘（投注數量一定唔多），否則買入太多認沽工具，就等如賭單邊跌市了。

陸羽仁

---

作者: szeyuen77    時間: 2007-7-6 09:23 PM     標題: 高追(2007年7月6日)

轉貼者註：昨天已經沽出了中國電力 (2380). 呢個時候就唔係好敢高追.唔知各位大大有無人諗住高追呢?


大市守在２２５００點樓上，未有像樣回吐，甚有在２２０００點上整固打底的感覺，上海A股跌５．２％，大市「正常」應該跌多的，但昨日由升轉為少升就算交差，未知今日會否回多少少。

　　在這種市況，有貨和無貨的心境很不同。若無貨在手，或者貨不夠，就會好想股市大幅回吐，讓他們可以追番啲貨。若有貨在手，進取者當然會愈睇愈高，保守者就驚跌市就到，時時想跳車。

　　可以講吓追貨，早兩日有網友問起而家買貨，算唔算高位追貨。老老實實，大市在２２０００點，點計都係貴，而家追貨，特別係追熱門股，當然係買緊貴貨，買貨要知貴也。

　　高追當然不如低吸好，這是阿媽係女人的道理，問題有無平貨可買，要買平貨，只有兩個可能，第一是大市急回，落番一兩場大雨，咁就熱門股都會平番啲（到時散戶亦唔敢買）。第二是買落後股，人升佢唔升嗰種，博將來追番落後，炒番一轉。

　　先講第一種可能，要大市急回，即係回落８００點到１０００點咁 o既大調整，在這種「開車市」中，無咁易出現，出現時若回得急，亦可能係跌市的開始。第二種可能係買落後股，不過買落後股都有買落後股o既風險。

　　講起落後股，好自然就諗起匯豐（０００５）或者和黃（００１３），我同一班中環茶友傾偈，講起匯豐月底公布業績，唔知有無得借勢炒一轉，大市向上，點講匯豐都會升一升；但有一個老友就非常反對，話匯豐的確落後，但即使升升得幾多？升到１５２元已經創新高，升一成都唔夠，你買熱門股中移動（０９４１）、中石油（０８５７）或者中海油（０８８３），借住上A股之勢，再升一成絕對唔奇，佢話旺市要追熱門股，唔係敲泠，因為要升熱門股升先，但跌起上來泠門股一樣會跌。

　　老友講法有道理，所以敲冷買匯豐，亦只宜穩陣派去做，如果你成日驚跌市明天就到，但手上完全無貨又好想買股票，買了匯豐咁唔好彩遇上跌市，都輸你唔死o既。

　　講來講去指向一個方向，升市要買股，平嘢無好，要買就買貴嘢，陸羽仁成日叫人唔好高追，咁就唯有收工齋睇？

　　我唔敢叫人高追，咁講實俾網友鬧，只能描述一下高追面對的風險與機會。大市在２２０００點樓上，升和跌的幅度相若，即係話升多１０００點又得，跌１０００點亦得，值博率變得一般，只是一個一博一的遊戲。高追當然係博大市再升，走一轉。進入「開車市」之後，升市好多時來得好急，有時更會升到你唔信。情況會係咁，大市開車後，先來一輪急抽，跟著就整固，整固一輪之後，又會再抽第二轉，甚至第三轉，到升到高位衝極都衝唔穿，上上落落，來一個雙頂，甚至三頂，就要小心大市急回了。

　　在大市升第一轉時，會殺你一個措手不及，好多人拒絕相信，覺得已見頂，又或者相信未見頂，但深信會深度調整，所以繼續不入市，但整固完升第二轉時，樂觀情緒開始蔓延，好多人開始信，反而在那時更高位追貨的人更多，這就是我講愈高愈多人追的現象。

　　高位追貨的危險，第一是買時已是摸頂，一買完就回，然後坐艇到尾。第二是買時已是中高點，買完升了一兩個浪，但無食糊，結果又坐艇。所以我奉勸高位追貨的朋友，要抱「高買高賣」心態，貴股係買來沽o既，唔係買來坐o既，買了貴股，馬上要度吓甚麼時機可以出貨，例如買中移動，等佢上A股之日，唔沽哂都起碼沽一半，換另一隻排緊隊上A股o既股票。在旺市買股，是一個朴傻瓜的遊戲，明知自己買貴貨，買入只係想在更貴時賣俾人，如果猶猶豫豫，有糊唔食，睇埋報紙聽埋專家講嗰的基本因素，係咁坐貨，唔知自己入價好高，咁就輸哂都未天光。

　　你一日未沽貴貨，你仲係接貨嗰個傻瓜，你在２元買了中石油（０８５７），即使佢升到好顛，唔沽絕對無壞，可以長揸一二十年。但如果你在１２元買中石油，有咁上下利潤就要食吓糊，起碼都定番個止賺位保住利潤，唔好扮長線坐到尾呀。

陸羽仁

---

作者: szeyuen77    時間: 2007-7-9 09:41 PM     標題: 高追（２）(2007年7月9 日)

上周五大市又升近３００點，回吐只在當日上午就完成，充份顯示大市的強勢，這種「開車市」一年一次，發生時不能以常理猜度之，例如平時升一兩日會調整，佢就無像樣調整，平時升１０００點會回吐番７００、８００點，佢而家升１０００點回吐２００點又再升，炒上格局相當明顯，雖然不能排除佢會回吐，但就唔係跌１０００點個種。
　　
順帶一提，若大市升上高位，跌１０００點反而唔好去撈貨，大市未上高位只玩上落市時，我成日叫人雨天購物，你千萬不要一本通書睇到老，等大市升到２３０００點、甚至２４０００點時，一輪急跌，你又來一個雨天購物。大市到而家２２５００點，已進入高位，大家的心態要改變，若少量回吐，還可以購物短炒，若大幅回吐，例如跌１０００點過外，隨時就是大調整的開始，那些時候應該是追沽而不是撈底，你一撈可能就中招，大市若急跌１０００點後，可以再跌２０００點o架。

　　你可能會覺得好複雜，話點解有時可以雨天購物，仲話大市愈跌愈好，可以買貨；有時就話雨天就要走避，小心大雨落落吓變紅色暴雨。背後的關鍵是對大市走勢的分析，要以此分析指導買賣策略，要分析大市向上還是向下，大市向上時，特別是未處於高位時，要逢低吸納；到大市開始上高位時，小跌可買，大跌要沽；到大市在高位牛皮一段時間，就要小心已在派貨，應減倉而不是建倉，一見急跌要沽而不是要追。

　　陸羽仁又講番嗰句，唔贊成「炒股唔炒市」的講法，散戶迴避睇市，盲目炒股，可以輸得好慘，最慘係在派貨時入市，今年一月的國壽事件，就令不少人中伏，買入國壽者輸足半年，要到而家才翻身。

　　你可能會問，大市難睇，可能睇錯，點辦。大市的確難睇，例如有網友問我會炒多幾耐，我只能答一個短升市可以只升三個月，一個普通的升市可以炒五個月（更長的不想預估），若這次只是一個短升市，到下個月已升夠三個月，玩埋下個月可以玩完，但普通一點的升市，玩五個月可以玩到１０月。大家應該記得我講過，不應只睇時間，甚至不應只睇點數，要睇上升的速度加點數加時間，判斷這個「開車市」玩得幾耐。

　　大市走勢既然難睇，就可能會睇錯，例如我話急跌（不是慢跌）１０００點就應該沽唔應該撈底，睇錯的代價係急跌時無買，我按錯警鐘，大市急跌完１０００點又好神奇咁炒番上去，升番２０００點，證明我錯，你的代價只是無買，無贏，不等如輸。

　　大家應該記得，在大市早兩三個月跌近２００００點時，我叫人兩天購物，有網友問話我咁係唔係叫人高追，問唔能夠入賭場無買無輸錢當蝕底咗，當時我寫了網誌回應，在當時的水位去追，我以今年的市況計，認為未算高追；同一個手法，而你現在去買股，就叫做高追。我以值博率計，以今年的市況，在２０３００點買貨，再跌１０００點再去番１９３００點，都跌得好深，但升３０００點亦唔奇，可以去到２３３００點，所以當時買係以１０００點輸面博３０００點贏面，有值博率，唔多算賭錢。但以而家的市況去講，升１０００點和跌１０００點的機會一樣大，值博率一般，高追股票，要抱走短線的心態，不能太貪了。


陸羽仁

---

作者: szeyuen77    時間: 2007-7-10 09:09 PM     標題: 偏見(2007年7月10日)

轉貼者註：可能真的如陸羽仁咁講, 睇下期指結算先知道, 今個升浪會升幾耐.


大市連創新高，無論想高追或高沽的朋友，都會關心股市的走勢，人總會受自己的行動偏見左右，我希望大家能排除偏見，泠靜看待股市的升跌，定出投資略。

唔知大家有無這種經驗，若果自己睇好揸重貨，股市愈升就愈樂觀，天天計一計自己賺幾多錢，愈賺愈多，心諗賺錢咁易，早知買多的，到出糧時有多啲錢，再買，買到嗰市跌都唔收手，見回落再加注，如果開始蝕錢就溝貨，睇著之前創的高位，成日諗住跌完好快又上高位，結果當然得過諗字，在跌市中揸到成手貨。

另一種情況剛好相反，自己睇淡大市，覺得個市已經好高，唔敢去買，一開始升，急急清貨，跟住等跌，但等吓又急升，等吓又急升，跟住俾隔籬左右的朋友親人笑，話你太騰雞，太早出貨。本來俾人笑吓無所謂，但俾人笑完，初則死頂，繼而想轉軚，車前倒後一兩個月，立定心腸再入市，結果真係黑到極，一買又即跌。

這其實是受自己持倉影響，產生偏見。人人都係先對市況有個判斷，才決定如何持倉，假設你認為２１０００點已經好高，在２１０００點沽清貨，結果睇住個市乾升，自己好唔高興，一般人比較重視判斷的對錯，我認為判斷對錯固然重要，但作了判斷後產生的偏見更重要，人一形成偏見，就會堅持一段時間，結果就出現好多上述的情況，既誤了買入或沽出的時機，亦帶來下一階段的投資惡果。

所以我的建議是炒股要舖舖清（投資就要睇好長線），不能受自己的持倉方向影響，好客觀咁睇現時的局勢，按不斷變化的形勢，修正自己的看法。

我早前講到這個升市如果短一點升三個月，玩理下個月玩完，普通一點的升市升五個月（再長就唔敢估計了），可以玩到１０月。後來網友阿Ray問「請問你覺得有什麼利好因素可以支持個市玩到１０月? 又有什麼利淡因素可以導致一月個後玩完?」

我並不是看普通的利好利淡因素，自己較多看資金流向和大戶部署。個市要升時，對所有利淡因素好似無哂反應咁，例如上個月美股再受債息上升和兩個對沖基金出事影響而下跌，道指有一日跌過１４０多點，另一日又跌過１８０多點，但港股要升，對這些重大利淡因素都反應輕微。又例如內地股市早排單個跌過５．２　％　，港股亦是回落少少就算交差。

資金流向仍然對港股有利，我早前已講過，炒大市的大鱷醒目錢一早已在今年３月１９００００點時反手撈貨，但當時基金大笨象因客戶續回還在不斷撤退，到５月時都未撤退完。到上個月港元同業拆息回落，代表資金回流時，大鱷一句開車，推郁大市，基金紛紛追貨，我本來預計基金錢在７月回流，結果在６月下旬已大幅回流。

雖然不能排除大市升兩三個月就急回的可能性，但似乎又回得快了少少，試想大鱷做的期指和現貨的倉位都好大，要轉身不易，而且他們好不容易才部署好這些一年一度的搞作，自然要去得盡啲，食得深啲，才夠味道，太急回頭，一則轉身困難，二則食水唔夠深，所以機會細少少。

去年５月跌市後，好快反彈，跟著７、８、９月都在對上一轉的高位１７０００點左右上落，到去年１０月才開車，一直升到第四個月，即今年１月上到近２１０００點的高位，升了３０００多點，跟著牛皮，在升市開始的第五個月，即今年２月開始急促回落。今次６月開始升市，若升四個月升到９月，到１０月就是第五月，前後預鬆少少，由９月開始，９、１０、１１三個月，都係危險期。係唔係咁，睇吓今個月期指結算時的走勢，會有一點眉目。

陸羽仁

[ 本帖最後由 szeyuen77 於 2007-7-10 09:15 PM 編輯 ]

---

作者: szeyuen77    時間: 2007-7-11 10:12 PM     標題: 高沽(1)(2007年7月11日)

轉貼者評：一講高沽, 今天個市就調整lu...


早前講的２３０００點目標，話咁快就差不多到，好多網友手持的股票天天在創新高，個個都問好唔好沽貨，或者什麼位沽貨，看來人人都想「高沽」。


在經濟急促發展的初階段，買入股票死揸，經常有大收穫，但香港已是成熟股市，股票唔應該一枝箭咁升個不停。愈來愈多有幾十年投資經驗的老雀講，香港的股票上到高位要沽吓，以匯豐（０００５）為例，老雀話佢一年升一轉，如果到高位唔沽吓，低啲買番，賺番１０元、８元差價，一年死坐到尾，可能都只係升得雞碎咁多。

人人都想在股市最高位沽，陸羽仁就無咁叻而家話到俾你聽股市最高位在那一個點數，或者一隻股最高位在那一個價位，所以即使對大市有一些估計，但不能純靠估計，也要運用一下策略。

沽貨首先要明白沽貨的風險，第一，沽完貨之後隻股繼續大升，個心好痛，如果再升得幾個月，到時忍唔住去追番，更有摸頂之險。第二，沽完貨即使過一排大市跌了，但你在跌市又無膽揸番，錯過了好股，長線更揼心。

投資／投機市場永遠充滿風險，網友要在股海生存，就要識得控制風險。相信大家都記得我過去講過，網友問股，我不應盲目去答，應該如睇中醫那樣，多多少少要先看你的情況，才好建議投資決定，或者我可以把網友的投資分幾個類型（主要從入股價及投資性格區分）。

第一是保守型，例如你低價買入好股，問我沽唔沽，比方說２元買了中石油（０８５７），問我好唔好沽，我反問你是否進取，你答話你都算穩陣保守，我就建議你不一定要沽。中石油呢個浪或者可以升上１４元高位，又或者遇到大調整可以跌落８元、９元，遇上股災話唔定會見番４、５元。但你入貨價夠平，大風浪都唔怕，這種股份可以長揸。你可能會問，乜唔係在高位沽貨，等佢跌到８、９元揸番？我話唔係唔得，但跌到咁時你又未必敢買啫，高沽要防錯過好股。

第二是中等型，入股價唔高唔低，性格又想炒又怕輸，例如９元、１０元入了中石油，而家１２．４元，有一定水位，想沽，又怕沽完即升。現價已有三成利潤，以中石油這種巨企，已算相當不錯，這種人／這種入貨價我會建議定止賺位，例如以現價低５％止賺，即在１１．８元止賺，或止賺一半貨。

為什麼定止賺位，並把止賺位不斷推高？背後的理念是隻股或大市已經到價，但股價或大市到價後多數不會停在那裏，一係唔到，一係過籠，用推高止賺位的方式，係讓你不要錯過「超常的升幅」。以一般大股的升幅為例，會波浪向上，你定現價低５％、甚至１０％為止賺位，佢回一回，震一震，好易就觸及你的止賺位，你就要止賺離場，但試想它出現一個超常的急升，在圖表上幾枝大陽燭一枝箭咁向上，你遇上咁o既大時代，買中咁好的股份，如果只是定出目標價，一到價就沽清，沽清完佢三幾日再大升兩三成，你會超級揼心。例如你認為中石油１２元到價，到位沽清，點知佢過三日就炒上１４元（只是舉例），你會非常非常唔開心。所以定止賺位，不斷推高，可以令你在急升市中賺得較盡。但若果隻股不是升得好急，你被佢震走都無話可說。
　
第三是進取型，若你是在這兩、三個星期高位追了貨，例如中石油，你在大半個月前在１１元追了貨，如今有１３％利潤在手，話多唔多，話少唔少，問我點辦？我反而會建議你見股價再搶高時先沽一部份貨獲吓利先，再留一部份睇睇。原因是你入貨價高，防守力較弱，只宜高買高賣地短炒，有糊唔食少少，罪大惡極。這一陣子追買窩輪當然亦屬此類，買得高唔緊要，識得沽就得啦，我唔反對人入賭場，但要識得睇時候行番出來，記住自己只是灰姑娘，不是真公主，到時到候唔行番出來，打回原型兼輸突就無癮頭。

大市近２３０００點，風險日增，無限風光在險峰，股價天天創新高，最開心亦是這種時候。好多人會先沽賺錢貨，留番啲藥水股，又或者沽走平價買入的好股，留番啲貴買的雞股，我建議的手法剛好相反，超平價入的好股，揸吓唔妨，高價追入的貴貨，反而要識走位，好多時係遲入o既貨先走也說不定。


講咗咁耐高沽，唔想誤導你而家一定要沽，個個人的風險胃納不同，接受到風險，就可以博更高價。

陸羽仁

---

作者: szeyuen77    時間: 2007-7-12 08:44 PM     標題: 高沽2 (2007年7月12日)

每個人買股票都想在最低位買，在最高位沽，現實上究竟有多少人做到？通常沽股票若不是沽早了，就是沽遲了（長揸不用沽者就無這個問題）。所以我們要求自己做到「高沽天王」，似乎有點高估自己了。

　　我以前好像講過一個故事，有個老友可以說是買樓天王，睇樓市睇得好準，八十年代開始買樓，每次都把握到好時機，賺了不少，到９５年買入豪宅，看中９７年回歸會有個炒作市，到９７年春天，經紀天天打電話來叫他放樓，佢都好精，開了一個天價，比同類單位貴了兩成，叫經紀唔到價唔好再打電話來了，後來過兩個月，經紀晚上十點幾來電，話有個客到價，當時啲人買過千萬o既樓，連樓都唔睇，想即刻簽約落訂買。老友話我出街要很夜才回家，明天再算吧，經紀話唔好，我在你大堂等你回來，結果一個女經紀等到半夜３點，朋友回家見個經紀咁有誠意，又連他開出的天價都到價，於是就簽約高價出貨。

朋友在９７年中以天價高沽貴樓，本可寫下完美結局，不過那時的樓市實在太顛，他賣樓兩個月後，見樓市仲係咁升，忍唔住在９７年７月又在第二區買入舊一點較為落後的豪宅，來一招反手撈貨追落後。當時董伯伯的八萬五政策已出籠，朋友也不看好樓市，但他覺得尾段仲可以升一轉，他只是短炒博升多兩成左右就出貨，結果大家都知，在９７年１０月股市暴跌，樓市也同時急跌，朋友即刻扮蟹。

呢個老友都算叻仔，識得毒蛇咬手，壯士斷臂，到９８年初，樓市略反彈，佢就立刻沽貨離場，結果出貨價比購入價只跌了１５％，算做執番身彩，如果他唔沽，間樓低潮時比他的購入價跌多過一半，他算做及時斬倉止蝕避過大跌市。　

老友賽後檢討，除了話自己反手撈貨衰貪心之外，也歸究自己都係沽得早，若沽遲兩三個月，賣樓價錢未必可以沽高好多，但沽遲啲，跟住好快就跌市，或許就可以避過往後再高追。

講呢個故事，係想話俾大家聽，唔好望自己可以在最高位沽貨，因為你以為自己在最高位出貨，結果沽完再升，發覺高處未算高，又可能忍唔住去追貨。最高位沽，最低位揸，只是夢想，極難做到。要求自己這樣，可能等到底都無沽，亦可能沽完發覺唔係最高會去追揸買番。

但呢個故事亦有另一教訓，最好捱到升市尾段才沽，以減低再入市的誘惑，等最高價和等升到尾好似幾類似，如果只是等時間，只需要拖慢少少沽。特別係沽股票，不似沽樓咁要一次出貨，沽股票可以分段出貨，慢慢出貨，務求令自己手上有貨，有份玩這個瘋狂派對，就可以減少自己再入場的誘因。

正如我昨日講，如果你在２１０００點樓上追了貨，入貨價中等，防守力不夠強，就要考慮高位出貨。舉一個例，若果你認為大市升到２３０００點都到價，升到２４０００點好高，升到２５０００點超貴，你有熱門股在手，當然可以以大市指數為指標，分三注沽，２３０００點時先沽一注，然後２４０００點再沽，２５０００點把炒貨沽清，若果真係有係升到２５０００點，平均在２４０００點出貨，都唔係好失禮。不過指數不是唯一指標，假如你問如果大市升唔到咁高點辦，我就認為除咗點數，仲睇時間，除咗時間，仲睇市勢。如果升咗幾個月都在２３０００點上下游水，愈拖愈長，即使唔到第二注的出貨價，都不妨再出貨。又或者你睇時勢去到高位雙頂不破，甚至三頂不破，走勢唔靚仔，成個派貨格，咁樣即使大市指數目標未到，都不妨大手出貨。

老實講，升市不估頂，網友見高位減啲貨唔怕，但我有少少怕網友們一早清哂貨，話唔埋最後嚟一個瘋狂大派對，清哂貨無份玩，咁就無癮，留番部份貨，睇吓最後開大抑或開細都好呀。（最後提一句，長線投資平價買好股，不一定要在高位出貨）。

陸羽仁

---

作者: loching    時間: 2007-7-13 11:33 AM

thx your sharing

---

作者: szeyuen77    時間: 2007-7-14 12:39 AM     標題: 期指賭局(2007年7月13日)

轉貼者：可能這是期指的歷史吧.


陸羽仁經常以期指來談論大市，皆因期指是大戶炒作股市的主戰場。透過期指交易，可以看到大戶的手影，他們就如股市的神一樣，造好大市時，陽光普照，萬物欣欣向榮，百毒不侵，好像早兩日美股大跌，日圓急升，港股跌一跌又立即大反彈；但大戶要造淡大市時，股市就陰霾密佈，就如沙漠一樣，寸草不生。你千萬不要以為只炒本地莊家股，可以不看大市，其實莊家也是睇住大市做人，市況好時，造高股價事半功倍，市況差時，花大資本也頂不高股價，所以莊家也是跟大市做人，在市底好時才會順勢而炒。

　　如今透過期指交易觀察大市，比以住難得多，這裏要講講一個歷史。經過１９９８年金融風暴後，改革期指市場，期指由過去人手交易，在２０００年開始變成電子交易，按道理電子交易更現代化，更有效率，而理論上政府經過金融風暴之後，明白了外資大戶經常操控期指市場，不應該做出有利外資的遊戲規則，但不知怎地，期指變成電子交易後，交易方法現代化之後，對大戶更有利，令他們更容易隱藏自己的交易身份。

　　以前期指是用人手交易，方法是各間經紀行在美銀中心的舊期交所交易大堂派出市代表，用人手喊價，如經紀行甲接到客戶期指買盤，想揸１００張期指，買入價２２８５０點，經紀行甲的期交所出市代表就在交易大堂，喊出叫價指數的最後兩個字，即大喊「５０！」，想沽期指的對手就會應價，例如經紀行乙的客戶想沽１０張２２８５０點的期指，它的出市代表就會講「５０，１０張」，那時就有１０張期指成交。當經紀行甲揸夠１００張期指後，他就停口不叫價。

　　就種交易手法極為傳統，但那間經紀行買、那間經紀行賣，一目了然，那時稍有規模的經紀行都派專人在期交所，把期指的成交情況現場向自己經紀行報告，經紀行多數會在公司內部廣播出來，讓每一個經紀和在場的大客戶不斷聽到期指的成交情況，知道那間經紀行買，那間行沽。

　　既然交易情況如此透明，外資大行要做大單嘢時，例如自己要重手揸期指，當然不能全部由自己經紀行的出市代表去做，所以有時亦會把買賣盤射俾本地經紀行，列如要買１００００張期指，就會拆成１０間本地行每間幫佢買１０００張，這樣一來，雖然表面可以隱藏身份，但知道外資大行動作的人也不少，造就搵食機會。那時幾間活躍期指市場的華資行盤房經紀，放工行埋一齊，把幾間行的情報夾一夾，就夾大戶的動向，例如個個都收到某美資大行揸期指的盤，夾吓料就知道美資大行揸重期指，強烈睇好，他們跟住美資大行買期指的方向去炒，無住而不利。所以當時亦有一班經紀咁樣炒期指發達，唔係佢地叻，係佢地間接收到外資大行的動向。雖說外資大行落的盤，不知最終客戶是誰，但市場老手懷疑，幾間活躍期指市場的美資大行，根本不是代客成交，他們大手買賣期指，就是外資大行本身的坐盤交易。

　　２０００年期指交易電子化，本來正常不過，亦令交易更有效率，很難想像現時每日幾萬張期指成交，還可以用過去人手喊價這種方式完成。不過期指交易電子化後，同時不顯示買賣雙方的身份，這和現時股票電子化交易的方式不同，因為股票電子交易還可以看到買賣雙方的經紀，期指電子交易不顯示買賣者身份的做法，顯然是外資大行的要求，當時華資行也反對，但結果當然是鬼佬把聲大，最後接受了外資行的建議，電子交易不再顯示買賣雙方身份，這樣一來，外資行要重手落盤時，也不再需要假手於人，可以直接在電子交易平台上進行。我早前講過本地經紀行期指盤房中人的夾料生涯，亦到此為此，無得再靠追踪外資大行的期指交易搵食。
　　
講咗咁耐故仔，除咗想大家知道歷史之外，係想說明外資大戶買賣期指的
行動，早已證明可以左右大市。所以我地猜度外資大戶的期指倉位，即使只係靠估，都絕對係判斷大市走向的重要因素。

　　現時見到大市升跌時，好多人會以基本因素來作解釋，若果這些評論人員對大戶的操作全無了解，你真係信佢一成都死。叫你講你都識講，見到個市跌時，可以話受美國跌市、日圓走勢影響，見到個市回升時，又話美股大反彈，這些影響己經消化，總之阿媽就係女人啦。

陸羽仁

[ 本帖最後由 szeyuen77 於 2007-7-14 12:41 AM 編輯 ]

---

作者: loching    時間: 2007-7-14 01:05 PM

thx your post

---

作者: szeyuen77    時間: 2007-7-16 10:43 PM     標題: 期指賭局(２)(2007年7月16日)

轉貼者註：續上週期指之分析論.

港股升穿２３０００點，升到你唔信，早前港股還是在美股跌、大陸股跌的情況下獨升，如今美股破高，港股更加升得有道理，造就環球散戶，把錢投入基金，回流包括香港在內的亞洲高增長市場，大戶要炒上就唔係咁犯本了。

陸羽仁經常講期指，只係想講一個簡單的事實：「有實力超強的大戶在炒作期指及大市」。這個事實雖然簡單，但就可以否定另一些大家普遍相信的東西，不要以為香港的大市是因為經濟基本因素隨機形成，不要以為大市的好倉淡倉是隨機分散在大戶和散戶手中。這樣亦會導致一個簡單的結論：不要隨波逐流，見好睇好，見淡睇淡。

炒作期指的外資大戶，如巨龍潛伏在水中，你要觀察巨龍的動向，來判斷大市的安全程度。當好多人見到陽光普照，水波不興時，好放心去游水時，最後可能成巨龍的午餐；當你見到傾盤大雨，無人游時，可能是最安全的時候，因為食物不多，巨龍都潛番水底瞓覺了。講得幾講，你可能會有一個相反理論，咁樣逢係落雨去游水咪得囉？呢種道理大方向幾啱，但你都要有判斷力，唔能夠盲目咁做，有時下傾盤大雨之後就一場黑雨，亦唔以話一見無人游水就去游，無人游水只是出現一個機會，落唔落水還要判斷。

網友Kevin問「其實我睇左好耐都唔明點樣可以係期指睇大戶動向.......期指最多都係高水低水...好似近日咁, 早一兩日低水, 今日又高水....今日高水即係買既人多...但係又點知係大戶買定散戶買?」

我相信Kevin的問題，亦是多數網友的問題。我的答案是的確好難睇，但係點都要用個腦去諗，諗錯唔緊要，但在諗的過程，就會有很多發現。

今日講多兩句你所講的期指高低水，如果恒指２３１００點，期指２３１５０點，呢５０點的「高水」怎樣來的？期指高低水的形成，主要源於市場的購買力，大部份朋友應該讀過中學的經濟學，產品的價格，由供應和需求決定，供應少、需求大，價格就會升；供應多、需求少，價格就會跌。但大家不要忘記，期指只是衍生工具，其價值本應依附在恒生指數之上，點價衍生產品會貴過基本產品？

期指高於現貨，當然有少少是衍生工具的價值，因為它可以以少控大，有槓桿效應，但當它高水增多時，就反映它的需求強勁。假如我係基金，見到恒指升，一時間買唔切現貨，可以先搶入期指，等買夠現貨才沽番啲期指出去（其實這也是一種對沖）；期指和現貨有互相替代的關係，如果期指高水，按理大戶也可以全部買現貨，不用付貴點價錢（即高水的部份）來買期指。所以期指高水，可能是一種市況急轉，大戶買唔切現貨，所以先搶期指。如果持續高水，至少代表購買力很強。如果在月底轉倉時下月高水很多，更代表有炒作期指的大戶在轉大量好倉。

你可能會問，為何轉倉時高水一定是大戶造成，為什麼不可能是散戶做成？陸羽仁有一個假定，市場中充斥著另一種食差價的大戶，他們專門睇著市場不同衍生產品的差價搵食，若差價是由散戶自然買賣形成，好快會有食差價的盤投入，差價好快會被拉平。但如果差價是大戶在大量造好倉造成，大戶倉位大，要轉倉難免如此，他們也不怕俾你食差價，例如高水１００點，等如送１００點俾淡友，你話有無咁好死？到轉倉完成後，一下抽高幾百點，咁就什麼仇也報清了。

最後講多一句，在大市急轉時，如急升或急跌時，係最難睇市的時候，如今就是這種市況，你分唔清大戶在期指市場想點，都好正常啫。

陸羽仁

---

作者: szeyuen77    時間: 2007-7-17 11:29 PM     標題: 期指賭局（３） (2007/7/17)

美股杜指再升４３點，升到１３９５０點，距離１４０００點大關又是一步之遙，今次看來有機會破關，但在美股期指市場，淡友數量增加，看來美股走上高位後，亦有回吐壓力。至於港股也是破２３０００點關口後回吐，期指好友話，早點回吐也好，調整幾日，到月底又可以炒上。

昨天講到期指高低水如何反映大戶的動向，網友亦有疑問，「三心兩意」問道：「其實一直都不太明白期指，知道它與點數有關，如果做好倉，恒生指數高過好倉的價位就贏錢。在文章說道："所以期指高水，可能是一種市況急轉，大戶買唔切現貨，所以先搶期指。"大戶買唔切現貨，就買期指，難道期指可以換成現貨?」

「曾聽說過，如果期指一直高水，會拖著恒生指數上，相反低水也是一樣。但不太明白其理由。」

陸羽仁相信部份網友可能亦未明白期指的基本運作，期指是恒生指數的衍生工具，試想像一下，期指就像一隻大窩輪那樣，每個月的月底到期（期指結算日是每個月最後一個交易日前一日），到那天就按恒指每５分鐘的平均價，由早計到晚，取其平均數，定出當月期指的結算點數，那個月的期指就以此結算價結算。期指這隻大窩輪每月結算，而下月的期指，又變成另一個下月底到期的新窩輪。

舉一個例，你在月中以２２５００點買入一張期指（做了好倉），到月底結算日當天，恒指開市時是２３０００點，但一直上升，到下午炒到２３１００點，到收市時是２３２００點，當日升了２００點，但期指是以當日恒指每５分鐘的平均價計算結算價，所以計出來的結算價可能是２３１００點，而非當日收市的２３２００點。好了，你以２２５００點買入一張期指，在２３１００點結算，未計使費賺價６００點，每點５０元，即賺了３００００大元（舉例就舉一個賺錢的例子吧，現實上買期指唔係咁易賺錢），輸贏雙方以現金對數。

　　所以期指和恒指在月底結算時，價值會「匯合」，期指雖然不能換成恒指，但最後期指會以恒指價結算，所以買賣期指，在某個意義上來說是買賣現貨的替代品。

　　你可能會問既然兩者會「匯合」，為何有高低水，正如我所講，高低水是供求形成，當買入的倉位好大好強或好急時，期指就會出現明顯高水（４０點、５０點或以上），當沽出期指的倉位好大好強或好急時，期指就會出現明顯低水，當然有時因為恒指成份股在那個月要除息，單計除息都要低水幾十點。若是市場買賣形成的高低水，就表示走向一個方向的力度好強，我經常講，大手買賣得期指，那些人都不是傻仔，無理由現貨平啲唔買現貨，要走去買貴啲的期指，所以期指出現明顯的高低水時，跟著正股很大機會都會朝同一個方向走，慢慢把高低水幅度拉番近，所以正股走勢只是晚一點發生而矣，這就是所謂「期指高低水扯著正股走」。

早前講過，我會先判斷大戶在期指的盤路，即是他們是好倉底還是淡倉底，然後從大市和期指的走勢，印證自己的看法有無錯，如果覺得看法是對，下一步就留意大戶到什麼位會食糊，然後把大倉的方向倒轉。這個觀察過程，充滿了假設，估中七成都好叻，不過估中七成都受用不盡，因為睇住大戶的大倉方向做嘢，無往而不利。

網友twohitsix問道：「你在回覆Ray時謂"至於估大戶期指倉位，主要不是聽消息，而是觀察散戶的心態和盤路，就是大戶盤路的相反倒影，再看期指的走勢去印證。"

1.
陸sir你分析市況的第一步(or切入點)係咪先"觀察散戶的心態和盤路"?

2.
2.如何"觀察散戶的心態和盤路"？

3.
3.如果"應升唔升"同"應跌唔跌"係睇盤路的一種，咁星期五美國升市，今日港股應升唔升，再加上期指高水收窄左，可唔可以認為係市況由好轉淡的信號？」

　　陸羽仁認為大戶造好造淡，唔會咁易俾你睇到，而且經常和群眾情緒相反，我會：１．先觀察假定大戶倉位的方向。２．以散戶的心態和盤路印證，至於如何觀察散戶心態，容易不過，你自己和身邊的朋友已是最好的對象。你問自己，今天驚唔驚，敢唔敢買？你話驚，就係大市仲未牛到底，到好多股狂升，牛到你唔信的時候，人人唔驚，你就應該驚。相反也是這樣，今年３月１９０００點時，我見大家咁驚，叫人分注買貨都唔敢，就諗吓可能都跌到差唔多矣。３．要假定大戶入貨出貨的時間和點數，再用期指走勢、散戶盤路、市場消息去引證（市場消息作用最細）。「應升唔升」係一種訊號，但單一訊號不夠，要結合基本分析，看好多訊號同時出現，才可確認一種走勢。

陸羽仁

---

作者: szeyuen77    時間: 2007-7-19 01:09 AM     標題: 期指賭局(4)(2007/7/18)

今日想講講期指「轉倉」，這是期指這種衍生產品吸引大戶炒作的關鍵。

陸羽仁相信絕大部份網友係散戶，無大戶的煩惱，大戶手上持倉量大，如何可以在高位出貨，沽個靚價，的確係頭痛問題。在散戶的眼中，只要以市價盤沽貨，不限價，一般情況下一定沽得到，但試想像你手上有１０００億股票，你可以點沽呢？

大家記唔記得，９８年政府入市，買了１０００億股票，最後沽部份貨出街，也不是直接掛牌出貨，而是用盈富基金的方式出貨，盈富當時搞了IPO，以新股上市的形式賣貨，這種方式的好處是吸引了好多平時不買股票的散戶入市，等如吸了新客買貨。如果政府不是以盈富的方式沽貨，而是直接在市場沽，相信沽低１０００點也未必可以沽清幾百億的貨。

睇完呢個例子，你就會明白，大戶即使睇大市，在低位買了大量股票，但到高位要清貨時，這麼大量的沽盤掟落市場，都會把股市掟散，即使大戶最後能夠清貨，但沽貨價低了１０００點，你話幾無癮，如果佢地從低位買貨，股市升了２５００點，但沽貨時又平均沽低１０００點，那麼大量利潤就會在沽貨過程中流失。

所以真正的大戶，只能在市道好好的時候出貨，所以就有「大戶出貨，愈沽愈高」之說。香港股市歷史最經典的高位出貨，是１９８７年長實（０００１）批股１００億，那時的１００億，可能等如而家的５００億、甚至１０００億的感覺，長實就在市場最旺時批股集資１００億，一完成交易，美股就因為電腦程式買賣觸發大沽盤，出現股災，香港也跟著市，但長實已經過海係神仙。

大戶沽貨除了要揀時機外，揀投資工具亦都好重要，期指就係一種最好的工具，大戶可以神不知鬼不覺地大舉沽貨，就裏要講到期指轉倉的特性。

正如上文講到，期指就如一隻每個月月底到期的巨型窩輪一樣，每個月底結算，下個月的期指，又等如一隻一個月到期的新窩輪。那麼如果我一路睇好，想一路摣期指好倉，可以怎樣做？就是到月底時把本月的期指好倉，轉為下月期指好倉。可以用番昨天舉的例子解一解。

假設你在本月中以２２５００點買入一張期指（做了好倉），到月底結算日，結算價是２３１００點。好了，你玩到這時收手，以２２５００點買入價計，在２３１００點結算，未計使費賺價６００點，每點５０元，即賺了３００００元。但你可以決定唔食糊住，繼續賭下去，把好倉轉到下個月，方法有兩個，１，到差不多結算時，提前賣番本月的期指好倉出去，再買番下個月的期指好倉。２，本月的期指好倉由得它自動平倉，然後再買番下月的期指好倉。

假設在到期日上午，本月期指現價２３０８０點，下個月期指２３１３０點，你用第１個方法，沽本月期指，摣下月期指，這樣就轉了倉。你也可以用第２個方法，不理本月期指，任由它按結算價自動平倉，齋買下月期指，即是同樣在上午以２３１３０點買下月期指，如果最後結算價更高，當然有著數，如果最後結算價低了，就要輸少少，這樣做有點賭眼光的成份。

或許有網友睇完都唔知兩個方法有何分別，又用窩輪的例子，舉例你買隻恒指認購輪七月底到期，隻輪就快老死，但你繼續睇好，想繼續持有恒指認購輪，你可以先沽快到期的窩輪，即時轉買一份新的後一階段才到期的恒指認購輪。你亦可以任由現在七月到期的窩輪到期結算，齋買一份新認購輪，期指轉倉的道理亦復如此。

這個期指月底「自動平倉」機制，對大戶極之有利，明天續談。

陸羽仁

---

作者: szeyuen77    時間: 2007-7-20 01:24 AM     標題: 期指賭局（５）( 2007/7/19 )

　　美股昨日回吐，道指最多跌了過百點，不過最後只跌５３點。大陸數據押後到明天公布，市場估計有宏調措施出籠，港股仍有調整壓力，特別是國企指數更是焦點，若回吐較多時，或許是短炒吸貨的機會。

　　昨日講到期指到月底「自動平倉」，是大戶愛好炒作期指的關鍵。

　　試想幾個大大戶本來睇好大市，合共揸咗１０００億元的股票，佢地覺得個市升得差唔多，想沽貨平倉，但係點沽呢１０００億股票出街呢？千萬不要以為我呢個例子誇張，期指市場經常有十幾萬張未平倉合約，以一張期指現價計２３０００點，每點５０元，代表１１５萬元貨值。如果期指市場的持倉狀況傾斜，幾個大大戶夾埋揸咗１０萬張期指，即係代表１１５０億元的貨值，你話犀唔犀利？

　　揸住價值１１５０億元的股票好難清貨，但揸住同等價值的１０萬張期指，想清貨話咁易，只要持倉者到月底時不轉倉，由得本月期指自動平倉，就可以神不知鬼不覺地把背後等同價值過千億的倉位沽掉！

　　你可能有一個問題，若大大戶夾埋有１０萬張期指好倉不轉倉，那麼下個月又有誰來做好倉呢？理論上做好倉人數大幅減少，就會出現供求問題，市場自然調整，下月的期指就會低水，以反映沽期指人多，買期指人少的需求現實。

　　更有甚者，是大大戶若對大市由睇好改為睇淡，他們不單會讓本月期指的好倉自動平掉，多數同時會反手做下月期指的淡倉，所以下月期指大好友消失，變成了大淡友，沽期指的一方需求大，就會出現大低水。不過低水低得多時（例如有百幾點），又會吸引一些套戥盤入場，沽現貨買期指食差價，令低水不至於太過份。當然大戶亦可以在月中市場不留意時不斷吸納下月期指淡倉，不用等到月底才一次過做，以減少低水的幅度。

　　當然，我是把局面高度簡化，大大戶又買期指，又買現貨，他們會挑選最旺時暗手出貨，例如又買又沽，先把現貨倉位大量減低，同時暗手累積下個月期指淡倉，然後到月底本月期指平倉時才一舉食糊。正如早前所講，大戶會在氣氛好好時出貨，散戶才會好開心咁接貨。

　　總而言之，這個期指賭局吸引大戶的地方，除了槓桿大之外（以１０萬張期指計，用６０幾億按金可操控過１０００億的貨值），亦是每月自動平倉的安排，絕對有利大戶可以把大倉位自動出貨。

所以在大升時市，要留意市勢到高位會唔會無力向上，若果見好消息都無力升時，小心大戶正在暗暗出貨。到月底期指轉倉時，又要留心高水低水的情況，猜度一下大戶究竟係維持好倉，定係話反手做了淡倉。

陸羽仁

[ 本帖最後由 szeyuen77 於 2007-7-20 01:26 AM 編輯 ]

---

作者: szeyuen77    時間: 2007-7-20 01:27 AM     標題: 口水多 (2007/7/20)

港股好強橫，又彈番上２３０００點樓上，咁o既市做淡唔著數，不排除近月底又再抽高，我見部份網友話自己沽了期指，奉勸他們要定位止蝕。

講咗咁多日期指，係時候講一講其他話題，今日想講講「旁觀者口水多」。

　　早兩日見網友阿K和Ty留言，都提到買股之後，老公意見多多。阿Ty咁樣講：「亞K，看到你和老公的情況,我也有共鳴,當初我買股票是他叫我去學買的,話增值喎,但我們本來就一點都不懂,之後就只有我自己一個摸索,他到現在也沒有學過,又時常意見多多,又馬後炮,我長線投資,放低就不理,他見到升了又哦我,叫我趁高賣了,說紙上富貴,不如賣了賺錢好過,但我不是貼市的人,試過在$5.5賣了隻中石油,跟住一路升到$10,買唔返,我激到死呀,現在他也是經常意見多多,我都覺得好困擾,所以好明白你的感受。」

　　大家都知道，打麻雀有句話：「旁觀者不得o依牙鬆槓」。人地打麻雀你喺旁邊睇，評彈好容易，但人家身在局中，受環境制肘，唔係咁易作決定。




　　買股都係一樣，其實那些好多口的旁觀者亦無分男女，唔一定係老公，係老婆都得，總之佢自己就唔買，叫你買，你買完佢就做旁觀者，評論家，左彈右彈，總之搞到操盤者好唔開心。


　　旁觀者意見多多（好多時我地自己都會做這種旁觀者），其實源於一樣心理，就係以為好多事情都好容易做。我個女得幾歲，但係都有一句口頭禪，經常話「我都知．．．」佢知少少就話「我都知」，但我地大人何嘗唔係咁？我地都經常知少少，扮代表。

　　唔做過唔知難，投資亦都係一樣，表面上睇，低價買吓，高價沽吓，賺錢易過食菜。但你一落場就知，低價時唔敢買，高價時也唔敢沽；低價買了，怕一買又再急跌，吃了眼前虧；高價沽了，怕一沽又再急升，錯過後了後段的大幅上升。

　　而家大市在上升中，最流行的「早知」就是「我以前都話過買乜買乜，你又無買，你睇升幾多．．．」如果你沽了貨，個市再升，又會聽到「我都話左仲有得升，你又咁快沽．．．」

　　我經常叫大家落場買股，叫大家在錯誤中學習，學習如何睇大市走勢，如何選擇出入市位，如何分辨不同股份，如何按自己投資或投機的要求來選股，唔做過唔錯過唔會識，你自己試過，一定比站在旁邊口水多多的老婆或老公強。

　　遇上這些自己唔買又意見多多的老公或老婆，當然唔值得因為買股搞到家嘈屋閉，最好的方法是叫他／她也落場，你買一份，佢買一份，看看３、５年後，誰的組合回報高，此所謂「講多無謂，行動最實際」。當佢落場之後，好快就會發覺佢自己之前的好多意見，只是紙上談兵，到實戰時就不是那回事，明白「講就天下無敵，做就有心無力」這個人類通病，佢就懂得收口了。

陸羽仁

---

作者: loching    時間: 2007-7-23 04:15 AM

great effort, thx

---

作者: szeyuen77    時間: 2007-7-23 11:18 PM     標題: 控制風險( 2007/7/23)

　　我經常講，投資致富的重點不是講冧巴，不是有一個神奇冧巴就可以幫你發達，投資致富係講方法，要有正確的方法，才可以一步一步一步致富（我寫了三個「一步」，即係話唔止一步，唔會一夜間發達）。

　　利記（０６３７）發盈警，今天股價自然有大壓力，網友「常在股」十分驚恐，因為他借了大錢買股。

　　常在股話：「我唔夠膽同阿媽講,我之前借左佢十皮炒股,又同銀行借左八皮.我係3.5楂左好多利記,因為未及一成止蝕(應該係100日線樓下),所以我仲守緊.巳家睇來會去到2.8,預左蝕十皮.我睇佢盤數同以為家吓個價係市場錯價先大手入,點知俾人昆左。以前炒股真係未試過咁驚,因為注碼有限.真係估唔到.原來大部份人都係唔識睇數同揀股.我巳家真係好驚,點算????個個都話會沽,又美國插水,中國加息,,,,港股上個星期巳經無乜力,真係一堪想像星期一的沽壓!!!!!!!!!!!!!」

　　「我唔係講笑,穿3,我就蝕100K.每月要還8K咭數..由昨日開始,而經無晒心机,死氣沉沉...第一隻令我蝕大錢的股票..」

「其實我覺得市場早就知道637的壞消息，所以股價被人狂沽,從3.75到3.15.....初時以為大戶收貨,原來係有人先知先覺,又做左一次傻仔．我估應該守得住3.otherwise頭條見....」

陸羽仁對常在股最簡單的建議是最老土的兩句話，「留得青山在，那怕無柴燒」。唔見１０皮唔係好大件事，唔見２０皮都唔駛死人。將欠數一分為二，欠阿媽你分５年、１０年還番俾佢，坦白同佢講，佢會原諒你；欠銀行咭數，大不了破產，雖然我極唔鼓勵人咁做，但你２５歲人，破了產４年後又是一條好漢，可以重新做人。

對常在股的利記出貨策略，亦係唔好開市第一分鐘沽，但跌到咁上下有反彈時，就是把握機會出貨（至少沽一部份），希望可以高一點退場，你借錢炒股，根本無空間守，如果佢彈完再跌，你仲大鑊。

對其他揸利記的朋友來說，首先要睇這隻股票的本質，公司發了盈警，不能再假設它是好股或大戶震倉，就算係震倉，你都被逼俾佢震走，無得陪佢玩。我的建議是搵位走，揸得重者要走快少少，揸得少可以分段睇位博反彈才沽。（不過若果多人博反彈沽貨，佢都未必可以彈到好高）

常在股你只有２５歲，買股難免衝動，要把這次輸錢看作寶貴經驗，將來受用不盡。你犯哂散戶所有毛病，包括：

一．                買股過份集中。好多散戶都以為「好股難尋」，所以一信了一個冧巴，就瞓身，其實在大牛市中，「好股」隨街都係，最緊要分散投資，分散風險。買１０隻股，中７隻，輸３隻，夾埋都有大錢贏，如果太集中，重注買了輸嗰隻，就好慘。

二．                唔識賭唔好借錢去賭。如果你係索羅斯，唔怕借錢，雖然佢都有破產的機會，但債大不倒，銀行驚過佢。你唔同，你一唔掂，銀行立刻逼倉。你係一個後生仔，股場經驗不多，唔好意思講句，好易俾人食，借錢去博，唔著數。

　　最後建議各利記投資者，今天按自己的情況，冷靜處事，持貨太重者要減倉，佢跌完將來升上４元都唔關你事，你而家首先要控制虧損。

陸羽仁

---

作者: szeyuen77    時間: 2007-7-24 11:03 PM     標題: 控制風險（２）(2007/7/24)

網友「常在股」借錢買利記出現問題，我們只能如「電車男」的網友那樣，為他打氣，希望他能自己解決自己的難題，走出困局。

今天想再講講借錢買股的問題，早兩日網友們已有熱烈討論。好多人反對借錢買股，例如網友牛腩貓咪話：「買股長遠來看, 目標要長期勝利. 大牛市賺錢容易, 如果你買入後, 改為熊市, 保證你雙重打擊.
另外,當你的心態改為容易賺錢, 會加大借款, 最後......你能做到借款而且長期勝利？」

網友Twohitsix亦都話：「借錢買股都要睇你自己借唔借得起。本身只有一注錢，借夠1倍來買，好聽講叫集中火力，唔好聽係賭大細，就算係穩陣如匯豐，都有落難時。借錢買股，逆市心理上那種徬徨，最易令你做錯決定。(重未計利息令你賺少好多呢個point)如果有人只係focus on中短線的number，再借錢買入，咁真係同睇報紙買冇分別。」

不過網友魚蛋就唔太同意，「睇到很多關於借款投資/投機的回覆, 我覺得大家不應太注重"借款"這兩字, 借款者應注意是"利息"及還款能力. 信用咭太高息了。牛腩貓咪, 你會覺得那些借日圓到其他國家投資/投機的大戶是絕對錯誤或蠢材呢？」

陸羽仁或許就從做「利差交易」的對沖基金講起。對沖基金大多靠借錢擴大注碼，有贏有輸，有對沖基金贏大錢，亦有對沖基金輸大錢，做利差交易的對沖基金運作好簡單，日圓借貸利息２厘，高息貨幣如紐元存款利息７厘，假設兩種貨幣的匯價不變，借日圓換紐元就穩賺５厘息差，近年紐幣匯價向上，做這種交易變成又賺息又賺價。既然這５厘息差咁易賺，對沖基金自然會有咁盡借咁盡去做。假設佢借到９成（借唔借到９成要看基金的size與牙力），有１０億美元本金，就可以借９０億，夾埋做夠１００億，１０億時賺５％利息，借大咗就等如可以賺５０％。你諗吓坐喺度唔駛諗就有５０％回報，係唔係食菜咁食？如果紐元兌日圓匯價升５％，５厘息差加５％升值，加埋借貸，豈不是一年賺１倍！

　不過咁好賺自然有風險，假設日圓升值５％，已足夠令利差化為烏有，如果升值１０％、２０％，借咁大去做利差交易就大大鑊！但點解咁多對沖基金仲係唔怕風險起勢咁做，理由好簡單，第一，這是唔駛用腦都好有機會做到５０％回報的生意，而且做幾大都有得做，市場深度夠，可以無限量咁去做。第二，對沖基金經理分紅兩成，基金一年賺２０億美金，佢地可以分４億美金，博到兩三年，已經分到１０億過外，可以退休去加勒比海嘆世界矣，佢地係玩緊「他人的錢」（OPM），博到一舖就可以上岸，博唔到，係對沖基金的投資者唔好彩，對沖基金經理唔使賠。就係因為咁o既分紅結構，令對沖基金經理一定借到盡，博到盡。

　但係一換番一個私人投資的環境，你借錢去投資，那些錢並非「他人的錢」，而是「你借的錢」，你賭輸咗要還，唔係對沖基金咁拍吓屁股可以走，整個處境完全唔同。

　你借人的錢去賭，若借銀行咭數，利息２０％以上，賺埋都未必夠俾息。而且借錢炒股表面上睇可以把槓桿擴大，贏可以贏多好多，但呢句話o既反面係輸亦會輸多好多，你食得咸魚抵得渴，賭得大要自己受得起至好去賭。一賭就輸固然惡頂，借錢去賭一賭就贏也不一定係好事，我見啲賭仔十個有八九個贏錢都離唔到場，最後多數輸番哂。

　賭仔要贏錢離場，要有超凡定力，我唔知你有無，所以只能好大路咁去講，唔好借人錢去賭，你估實贏o既咩！唔借到咁大去炒股，係控制風險的最基本方法，自己o既錢，點輸都輸得起。

陸羽仁　

---

作者: italyitaly    時間: 2007-7-25 12:19 AM

留番部份貨，睇吓最後開大抑或開細都好呀  <--- 認同! XXD

---

作者: szeyuen77    時間: 2007-7-25 11:46 PM     標題: 控制風險（３）(2007/7/25 )

　　 美股道指大跌２２６點，皆因次級按揭問題惡化，令財務機構受累，美國樓市唔好，連帶賣油漆的杜邦化工股價都大跌，亞洲股市今早開市全線跌，港股升咗咁多日，睇嚟都要跌番少少交吓功課。近排發現不少散戶做了淡倉唔認輸，見股市升溝淡追沽，其實這是高風險行為，大戶要食散戶，自然會挾淡倉挾到底，挾到你投降為止，我又係嗰句，見個市調整都唔好做淡，唔好沽空，這句話我由２１８００點講起，講到今日仲係咁講，咁o既市隨時升到你唔信的水平，做淡好易輸死。如果大戶做淡，美股咁跌法，港股可以跌１０００點、２０００點，但若大戶持續做好，美股跌都未必理，港股可能調整吓又上路。


繼續講講利記事件帶來的教訓，我話買股票要控制風險，你唔輸過錢，或者起碼見人輸過大錢，唔會識控制風險，控制風險的方法有好多，止蝕／止賺係一種方法，分散投資係另一種方法。

　　控制風險有代價，例如止蝕，你執行一成止蝕的規則，好多時止蝕完等一陣就升，你又會好後悔，認為早知死守唔止蝕，就可以見家鄉；你唔知道如果死守，一次成功，兩次成功，到第三次中招，都可以成副身家唔見一大截，電盈的例子，相信好多人都瀨過嘢。

　　不過今日想講多幾句分散投資，網友買利記（０６３７）中招，好多都係過份集中買死一隻股。集中買一隻股，中o既時候好中，唔中o既時候好唔中，有人話股神巴菲特都話唔駛睇咁多股，集中睇一兩隻就夠。我相信你有巴菲特咁　o既功架時，買兩隻股都嫌多，買一隻就得架啦，既然識得揀股，低價買中好股的機會極高，又使乜買咁多隻股呢？不過大家要記住，我地未到巴菲特的水平，所以分散少少，買三到五隻股，風險亦會分散一點。

　　舉個例你會明白，例如你把注碼分成三份，買三隻股，假設市道一般，你選股的技法與運氣亦一般，揀三隻股一隻升，一隻跌，一隻唔郁。跌那隻一成止了蝕，等如整個組合損失了３．３％，升那隻你唔好一升就走，食到盡啲，幾個月賺到三成，等如整合１０％，減番輸個３．３％，你淨賺６．７％，你一年走到兩三轉，在普通的市道，一年都有機會賺番１０幾％。

　　好似而家的市道，雞犬皆升，買三隻股升兩隻絕對唔奇，升亦可以升４０％、５０％，只要控制輸那隻的虧損，夾埋合共賺３０％、４０％，不難做到。

　　大基金和小散戶買股票的方法最大的不同，是小散戶追求短時間的最高回報，而從不考慮風險。但大基金首要控制風險，它情願唔賺咁多，唔博咁盡，而不想組合輸錢，要長線有不斷贏錢兼跑贏大市的住績。

　　假設你有３０萬，再借４０萬，一注單Q買利記，３．５元入貨，博佢升５０％升到５．２５元，你可以賺３５萬，即係賺本金的一倍，聽落好和味，但發生的機會有多大呢？首先，利記升到咁高的機會有多少？假設有５０％，但問題是你到高位能否成功沽貨，人通常係咁，到高位又再睇高些，最後見佢跌番落來又唔順氣，唔想沽，結果眼白白睇住佢打回原型都有，買股曾經升過但一股都沽唔到，亦大有人在，假設成功高位沽貨機會只有５０％，即係股價升到咁高又沽到貨，只有２５％機，四舖中一舖。

　　倒過頭來，衰起上來，假設利記唔知點解急跌，跌穿兩元，你的本金就會輸清，又假設出現這個情況的機會為１０％。你要諗諗，２５％機會本金升一倍，１０％機會輸清，博唔博得過呢？

我就唔會博，有兩個原因，第一，這是錢搵錢的社會，若不幸輸清，無哂本金就無得錢搵錢，要好辛苦儲過才可以重新開始，機會成本太大。第二，就算呢舖俾你博中２５％機會升咗一倍，你下次一定連本帶利去博，又會唔會輸番哂俾佢呢？如果長賭必輸，咁樣賭咁大為乜啫。

說到底，散戶愛借到盡去賭，就係一種想一朝發達的心理，但現實中舖舖瞓身博盡最後能上岸者萬中無一，但細細膽賺少啲積小勝成大勝者，十個人之中，都有一兩個能做到，聰明仔揀捷徑，結果可能永遠唔到岸，蠢蠢地行慢啲，結果可能更快上岸。記住交學費唔緊要，輸錢唔緊要，最緊要學到嘢，學到幾多就睇你自己識唔識反省啦。炒股最寶貴的是經驗，輸錢唔好逃避，要面對錯誤，從中學習，終必有所成。

陸羽仁

---

作者: szeyuen77    時間: 2007-7-26 10:13 PM     標題: 控制風險（４）( 2007/7/26)

利記（６３７）昨日再急跌，收報２．２元，跌得好甘，佢從上周五造３．２元，自週末發出盈警後，至今下跌３０％，好多網友話自己唔知點解會輸錢。

網友阿May話，「For 637 my own problem is did not follow the 10% cut lost golden rule. But how to handle 10% cut lost
and 震倉? I lost quick a lot( for me ) on 637,
I really want to know what mistakes I made . Can any one help me. Maybe we can learn together from 637. 如果637 是炒股，输了没話好说，但637 是不明不白地輸！」（阿May大意係話買利記沒有遵守一成止蝕，但不知應該止蝕還是當它震倉，想從利記的錯誤中學習）


另一網友mochacha亦話：「May, I am feeling the same. But I think some older bro and older sis are right... if thinking buying a 實業股 won't be as dangerous as 炒股... that is a very wrong concepts... I learned by mistake.. but I really want to learn more.. can 陸sir write a post explaining a bit? Thanks a lot!!」（Mochacha大意係話與阿May的看法一樣，如果以為買實業股無買炒股咁危險，係錯誤的想法，但他想陸羽仁解一解為何會出現這種錯誤）

陸羽仁而家做事後孔明，講好多嘢都唔公允，例如話利記係去年上市的新股，有做靚盤數上市的可能；又或者佢係貿易公司，有經營風險等等；這一切在當時都可能啱，可能唔啱，我現在唔想再多講，反而想講一些控制風險的基本原則。睇錯股唔緊要，我都會睇錯，問題係如何控制睇錯的風險。

以阿May的個案講，佢最大問題係跌過１０％止蝕位無止蝕，而佢無止蝕　o既原因係因為利記係實業股唔係炒股，佢覺得安全，見利記下跌只覺得係震倉，無止蝕。

首先應該講，實業股的確比炒股安全，以利記為例，從今年一月低位到五月高位，只係升咗４４％，唔算暴升。所以跌得雖然甘，但係亦未算暴跌，因為買炒股暴跌起上來，可以跌９成幾，甚至停埋牌渣都無，所以順帶提一提，買炒股風險好高，要嚴守嚴守嚴守止蝕。

不過實業股雖然叫做安全少少，但買隻利記，若摸頂入市，都無咗４成幾，咪話唔傷，所以我的第一個建議，係買實業股都要守止蝕，打靶唔手軟。可能你會問，股神巴菲特話如果係好股價錢又平，可以越跌越買，見跌唔應該止蝕，應該增持。

陸羽仁不妨告訴大家，在現時香港的股市，我都無乜邊隻股我好有信心愈跌愈買，大陸銀行股唔係，大陸保險股唔係，中移動（０９４１）唔係，甚至匯豐（０００５）都要諗過，以中移動為例，現價９３．２５元，或者４０元時我可以話愈跌愈買，但９３．２５元我買咗中移動都會硬守一成止蝕。又或者國壽，現價３２．７５元，佢１２元時我都夠膽話愈跌愈買，而家當然唔敢。

這些幾千億、萬幾億市值的大股，容易睇過細股，睇大股都唔敢話愈跌愈買，何況細股。我自問無巴菲特之能，所以買股作長線投資時，也會定一成止蝕，這種就涉及第二個建議，既然止蝕一定要執行，就要盡量防止自己陷入止蝕的處境，所以我的長線投資，極少高追，只會低吸（短炒反而會追貨），甚至分段定低價入貨，入齊貨都比第一注的價錢低７％至１０％，以減少要止蝕的機會。但衰起上來一定止蝕，所以我買股最關心是初段，買完跌了份外留神，只有等到升到入貨價１０％以上，才算到達安全水平，到時以入貨價為止蝕，好大機會守到，買這隻股才算安全著陸。

對１％的股市高手來話，假若他的投資夠分散，的確可以不止蝕，但對９９％股市老散來說，止蝕是避險的不二法門，買股唔止蝕，就如無著避彈衣行入以色列的西岸或加沙的戰區一樣，都有三幾成機會中彈身亡。

若果做到以上幾點，部份人高位買了利記，可能已止蝕離場，又有部份人分段入市，可能未入齊三注，減少了損失，若再加上早兩日講的分散投資，就可以把虧損控制在小範圍，買十隻輸一隻，都唔會好入肉。當然亦有好唔好彩的網友，重注在３．５元買利記，之前未到一成止蝕，周一一開市就蝕多過兩成，點搞都走唔到，唯一可講是周一已過一成止蝕，當日趁略反彈即打靶，打得早會輸少的。

最後要一提的是阿May混淆了概念，她既認為利記是實業股，可以不守一成止蝕，但見佢下跌時又懷疑係震倉，其實講得震倉，就係話幕後有莊家，以插低股價震倉收貨，但若然有莊家，你就唔可以當佢係不用止蝕的實業股，兩個概念有少少矛盾。

陸羽仁

---

作者: szeyuen77    時間: 2007-7-27 08:48 PM     標題: 驟雨( 2007/7/27)

美股周三跌完，昨日再跌，解釋係澳洲有兩隻對沖基金又因為次按貨款出事，結果歐洲股市大跌完，美國開始又跌....股民都好擔心個市會借勢大插。
網友s2000話買hsbc，撞正美股下跌，擔心會「百佳」，聽到呢個講法，陸羽仁都好奇怪，皆因現在買得匯豐，點睇都屬於穩陣派，雖然話匯豐即刻係美國跌1、2個%，但同其他股到興烚烚的股仔比，佢已經駛入避風塘啦!
Kathleen提過，匯控月底公布業績，但陸羽仁留意到按過去經驗，十年有九年都會偷步炒上，今年竟然例外，事前好多大行股匯控中期因為有出售倫敦總部，帶來一次大筆收益，令上半年有靚靚增長，股價一樣郁都唔郁，跟住中東大戶幫手出口術，話支持分拆亞洲業務，都一樣好似拉牛上樹，現在謎底揭開，証明醒目資金又走在消息之前，不過，中東班豪客購物，應該做足功夫，咁都被人過一戙，証明股市幾時都係一山還有一山高。

「Larry:睇黎聽日真係重唔落返一次大雨??是否應先減持股票呢???唉......灰......會較像正常調整定係大跌市(1000,2000點)??」呢個問題，相信係好多股民都想知答案，陸羽仁覺得，今次呢場係驟雨，來得會好急，雨勢會好大，如果你話跌1000,2000點係大跌市，無人可以排除這個機會，正如早前講，大市上兩萬三，再上兩萬五的機會，肯定細過落返兩萬一，但要補充一句係，近日個市其實一早應該調整，但幾次回落幅度，都比「應該」出現的跌幅為低，呢個水平大戶沽貨，仍然係啖啖肉，所以個市跌成點，要睇資金係唔係會大量回防美國。

有網友一早留意到近日出現日圓強，美股跌的情況，現在睇番有人話係carry trade倉，同呢個現象一齊發生口既係所謂flight for quality，即係資金由高風險資產流向穩陣的優質資產。今次觸發跌市的，係兩隻澳洲次按基金，這些基金借平錢追求高回報，結果損手，呢個情形同以往每次對沖基金出事的模式都一樣，對沖基金要賺到盡，投資經理一如亡命車手衝向懸崖，邊個最早停車就邊個輸，直至最後有人跌落懸崖，早前美國有次按基金出事，跟住到澳洲，但他們都只係二打六的散仔，同以前LTCM相差好遠，相信未必能夠令到美國聯邦儲備局減息挽救，係環境未曾穩定下，傳統大基金會流向國庫券等穩陣資產，即係話驟雨未必會好快停晒。

昨晚大跌市，陸羽仁接到老友電話，話覺得好開心，因為終於有機會令大家冷靜，等公司班員工有番小小意識，明白個市不會日日升，記得做好自己份工。
而家個市同以前唔同，以前港股只受美股影響，但現在中美兩國因素，幾乎已平分秋色，大陸經濟好勁，紅籌下個月又準備回歸，都係次按負面因素以外的利好刺激，可以任大戶用來舞高弄低大市。根據過去經驗，逢親跌市，又係大戶同散戶對著幹的日子，陸羽仁最怕聽到的，就係散戶唔識驚，若然今日大家去茶餐廳飲下午茶，又或者俾擦鞋仔擦鞋個陣，聽到佢教你博反彈，咁你就要加倍小心，反之就可以放心小小囉!

陸羽仁

---

作者: szeyuen77    時間: 2007-7-27 08:49 PM     標題: 驟雨2 (2007/7/27)

今日場雨都幾「甘」，恒指先插低，中午反彈，下午歐洲開市，大戶又係期指郁手，指數再插過，經紀張打電話來，話下午去茶餐廳飲咖啡提神，真係聽到有伙記話要掃貨，心諗今次唔通真係弊家伙？所以急急打個電話交流下後市點睇。

陸羽仁話，呢場驟雨由美國引起，所以下午時段的交易參考價價特別高，照目前睇，外圍形勢仲未定。未來幾日，最有可能出現三個情況，第一個係個市反彈，仲破埋上次高位23,500添，若然係咁唔使講個市都好掂啦;第二個情況係反彈雖然出現，但無力突破，形成雙頂再跌，呢個機會都不能排除，第三個當然唔使講，就係直碌落去啦，若然出現第三個情況，就同今年二月份日圓回升時，觸動套息交易時差唔多，但當時拆倉情況唔嚴重，今次程度係點，就要睇外圍。

三個走勢有不同啟示外，大家要留意短期兩個因素，一係日本議息結果;二係匯豐月底公布業績，好可能兩個因素明朗前，大戶會偷步做，到形勢明朗，就反手掉轉做。

股壇新手Tracy問，「3988（中國銀行）呢隻股，點解佢明明係銀行股，又係大銀行，點解ｄ股價硬係升唔上？我應唔應該長搾？定係應該趁「落雨」ｏ既時候入返ｄ貨呢？」3988跑得慢，係因為上市幾隻國有大銀行中，佢持有外匯比較多，在人仔升值下會特別吃虧，陸羽仁從來不贊成貪平買落後股，反之跌市應該係「清理門戶」，趁低買強勢股之時，至於邊係強勢股，係跌市後個兩三日就較易睇到。

另外有好多網友議論隻聯洲急跌，呢單同鈞濠被廉署查有關，但詳情係點，似乎無清楚交待，而家公司訊息發布，真係好似好混亂，呢點有關方面要注意!



陸羽仁

---

作者: szeyuen77    時間: 2007-7-30 08:42 AM     標題: 揸重貨最好減倉 (2007/7/29)

上周五大市急跌６７０點，走勢極肉酸，網友們憂心仲仲，急問各種策略，我可以講一種基本策略，就是要用各種方法去「控制風險」。

　　這種市況的最大風險，就是大跌不是調整的完結，而是調整的開始，美股道指週五再跌２０８點，按理走勢頗唔靚仔，記得今年二月底也是期指結算前開始急跌，由２０８００點跌到２０２００點左右，但結算後過了幾天，在三月五日大跌至１８６００點，即係第一波跌完後，第二波仍然再跌１６００點。

　　
　　我早前講過八月唔係咁淡，大戶可能仍在做好倉，但美股和美元大幅波動，不能排除大戶順風轉舵轉了淡倉，具體情況要睇埋期指結算，現在所以只能贈大家四個字：「審慎為上」。

　　一般人傾向得到大市的準確預測，而唔睇自己投資的情況，我就認為大市難測，對預測不可盡信，要按自己的持倉情況，定出投資策略。

  　從短炒來說，大市急跌這麼多，裂口這麼大，好多人會想去博反彈，我就建議不要在現階段撈底博反彈，因為反彈的機會固然有，甚至可以在反彈完之後再上高位，但在２２５００點這種水平，在大市剛急跌時，博反彈是極高風險的行徑，大市可反彈１０００點，但亦可以再跌１０００點，賭博成份甚重，博反彈不見得勝算特高，所以不博為宜，錢係賺唔哂o既，要博可以在按安全的環境下博。換句話說，而家要博唔係唔得，而係預咗博唔中有可能會輸清。

　　從長線投資而言，我覺得要看自己倉位多過睇大市，如果自己成手係貨，同自己手頭上無乜貨，處境分別好大，若果手頭上無乜貨，這種人本來已看淡大市，早已沽貨（甚至這個浪都無入市），問題是應否把手上僅餘的貨尾沽清，如果已經在２３０００點樓上把大部份貨沽了離場，其實也不用心急把餘下少少貨尾沽清，在大市急回時你已佔了上風，也無需一股不留，萬一自己睇錯，大市回吐後再上高位，留番少少貨，投資一下自己可能出現的錯誤，也有好處。

　　不過更多人可能不是股太少，而是股太多，在旺市中成手貨，遇上這種市況要小心，若本來已睇好者，見大市急回，好易堅持自己的意見，認為大市無事，不但不執行止蝕規距，還要加注，這樣做風險極高。我倒建議如果已經成手貨，要酌量減持，若已觸及止蝕位者，更要硬手打靶，不能心軟，亦都係嗰句，要投資自己的錯誤，若果睇錯，大市繼續急跌，唔減貨損失會好大，減少少貨，可以降低風險。沽了部份貨後，若大市跌完大升，但你減貨後仍有不少貨在手，唔會無得賺，只是賺少啲而矣。股票幾十年長玩長有，在大波動時控制風險，保存實力，是長期成功的要素。

　　無論如何，在２２５００點這種高位，即使大市急回，我亦唔會建議大家雨天購物，怕大雨後有黑雨。你可能會問，現時無買，若錯過了升市點算？我就話如果跌完無事，睇定的再買，當然會賺少啲，但安全的噃，安全啲永遠無壞唧，有時保險金唔能夠唔交。

陸羽仁

---

作者: szeyuen77    時間: 2007-7-31 11:29 PM     標題: 睇定埋位 (2007/7/31)

　　美股道指反彈９２點，日股開市微升，日圓兌美元匯價略回軟至近１１９圓的水平，環球股市有喘定跡象。港股昨日在結算日下半段升勢轉強，這是少少利好跡象，後市要觀察港股走勢在頭半個月會否穩定下來；而匯豐（０００５）業績比預期理想，有利大市反彈。

　　可以再講講昨日的市況，陸羽仁最怕在期指結算日大市被人頂住、甚至頂高，因為大市頂住，意味好友頂住大市自然結算平好倉，若出現這種市況，一過下晝三點就開始跌，因為期指是以結算日每五分鐘平均價結算，如果好友頂到三點，已差不多可以造到較高的期指結算價，就不用再大力頂，所以結算日三點後才跌，意味大市有點人為頂高結算的味道，這樣大戶的好倉可能已自動平倉，下月不再做好。

　　但昨天走勢剛好相反，反而有少少壓住的味道，大市早段略彈，壓到三點後大市走勢再向好，可能有大戶想壓低期指結算價，壓到三點多就放手，股市自然上彈，這種走勢即使不算利好，起碼不利淡，壓住結算價的目的是低位平倉，自然是平淡倉，可能意味有大戶上月抽高期指後急插食吓細糊，期指上月高位曾見２３５００點以上，但結算價只有２２６１８點，有成９００點水位，小注做淡都幾好肉，不過這些錢就唔到散戶可以賺啦。

　　雖說大市走勢好番少少，但仍要看外圍美股和日圓穩定了沒有，如果外圍穩定了，而港股在本月頭十天都反彈向好的話，就可能已走出危機，但如今仍未能排除大市仍有再急跌的可能，穩陣派只能繼續觀望，當然賭博型就可以博大霧。

　　近日有不少屬穩陣型的網友問渣打（２８８８），渣打昨收２５１元，在大波動時我一定叫你唔好買，但穩定番啲買唔買就係見人見智，無論如何大市已在高位，可能高處未算高，但在這種水平入眞，和２０８元買渣打有很大分別，如果入只能是投機買入，嚴守一成止蝕。

　　我昨天叫持貨太重者要減啲貨，雖然大市反彈，甚至未來有機會脫離危險，但你千祈唔好怪我，正如我買人壽保險，結果今年無死，都唔會怪個經紀o架。如果你揸重貨，見到個市急跌，點都係減的貨安全的。揸重貨者，見到市跌一的都唔郁，又唔減貨又唔對沖，結果個市升番，唔等如佢啱，只係佢好彩啫。記住三次狼來了的故事，一次當無事，兩次當無事，第三次就嚟料，我建議穩陣派的策略是次次狼來了都避一避好啲，肯定無事時才走番轉頭，睇定先至埋位。

　　我對已對早前已減貨者亦有建議，遲啲覺得個市跌定，又睇好後市，可以補番啲貨，若果有隻股１０元沽左，跌定時１１元買番都唔拘，嗰１元當做保險費。另一個做法是買少少認購輪，咁做預咗啲輪會輸哂，但若大市真係咁好彩再大升，就唔會錯過升幅。我一般唔建議人買輪，但做對沖式買輪係例外，總之量力而為。

　　當然，若果賭性強一點的網友，亦可能心郁郁想入市，而家入市我估是１．５比１的機會，前者是睇好，後者是睇淡，睇好一方機會高少少，但想低價撈博市升，亦要做足安全準備，因為睇淡一方仍有相當成數，所以入貨後若發現睇錯，要硬守一成止蝕跳車。

　　另外，我記得網友阿Ray問過同時買認購輪和認沽輪的策略，問幾時買好，我話若想咁做，現時的市況都幾啱，因為現時仍屬波動市，未來兩三個月，恒指升２０００點和跌２０００點的機會都有，好淡兩邊的窩輪同時買，等如買入一套馬鞍式期權，賭大市波動。買入馬鞍式期權（亦等如同時買認購輪和認沽輪），最怕遇上牛皮市，如果大市牛皮，在結算日前窄幅波動，結果認購和認沽的行駛價都唔到，就會輸清，要大市大波動才有機會贏，這種大波動市就快來臨，大家等睇好戲。

陸羽仁

---

作者: szeyuen77    時間: 2007-8-1 10:16 PM     標題: 期指賭局（６）( 2007/8/1)

　　港股在期指結算日後被大力挾升，不過美股早一日升完到昨日就跌，道指跌１４６點，主要受一家按揭公司American Home Mortgage Investment Corp.宣佈要出售資產拖累，可見外圍情況未明朗。

　　港股除了看外圍，亦要看我們的期指市場，昨日是結算後首個交易日，是期指賭局的活生生教材，昨日期指大升４９０點，坦白講升得幾離譜，同前幾日跌的時候一樣；期指結算日前後的動向，最能反映大戶的倉位。正如我昨日所講，上月期指結算日（本週二）大戶一直壓住大市壓到三點幾，似壓低位平淡倉，之後市況自然反彈。到結算後翌日（昨日），若論「正常」情況，大市上一日已反彈，昨日再彈多百幾點都可以抖抖，但大市不但無抖，還在下午繼續抽高，要大升近５００點收場，好友挾高股市的手法都幾狼死，由此推算，部份期指大戶上月中借高位平了部份期指好倉，轉行做淡，到月底借外圍隊低大市平淡倉，但他們同時做了本月的期指好倉，所以都唔俾大市抖氣，一過結算就大力挾上（這只是陸羽仁的分析，信六成好啦）。

　　若果分析正確，大戶是好倉底，即使美股跌，只要唔係股災，個市調整吓好正常，但大戶唔會俾個市散。

　　大戶上月呢招，叫做「挾完好倉挾淡倉」。先講好倉，大戶睇好，你跟佢搵食做好倉，或者買認購期權，佢一下帶你遊大西洋，令個市由月頭２２０００點升到上月２５日（上周三）的２３５００高位，升咗１５００點，你揸好倉當然開心到不得了，但之後突然回頭，反手做淡，兩日後在上月２７日（上周五）就大力插低，最低見２２４１６點，跟往做好的好友大部份要打靶，你唔打靶跟到結算，都係得２２６１８點，早前跟住大戶做好高追的人，大部份要輸錢離場。

　　再講淡倉，股市大升當然有散戶做期指淡倉，上週五股市大幅調整，理論上做淡者應可賺錢，但試想大市上週五最低時從高位回落超過１０００點，做淡者有幾百點利潤在手，絕大多數咬住唔放，等這個更大的跌市來臨，好多人會轉本月淡倉，唔會咁快平倉。好啦，大市一過完結算就大升，淡友的利潤大部份化為烏有，追沽者甚至要蝕，大戶一挾起大市，又逼淡友平倉。

　　期指大戶玩的不是估大市的遊戲（一般散戶會咁睇，估吓大市幾時到頂，去沽空），大戶玩的是偷睇答案的遊戲，佢睇住成個市的期指好倉淡倉，然後用大資金去挾倉，佢如果佢做咗大量好倉，要食糊時就把股市大幅挾高，高到你唔信，高到你忍唔住痛要打靶，佢要逼散戶接佢的貨，讓佢平哂大量好倉，轉埋做淡倉，這個過程做淡友會相當痛苦，大部份人係輸少少唔投降，要輸好多才逼到要投降。如果大戶做咗淡倉，就殺倉殺到阿媽都唔認得，殺到你投降為止。

　　陸羽仁可能睇錯，記住要自己分析，睇住自己的倉位，決定買賣策略，控制風險，我只能提供幾個建議，第一，見個市回落都唔好做淡，除你EQ奇高，身手極快，否則這些錢唔易賺。第二，做唔做好自己決定，在２３０００點這種高位，我唔會再叫大家雨天購物，要買貨只能是「投機性買入」，明知係短炒，定好一成止蝕，贏輸都心甘命抵。第三，若在上周五沽了貨者，酌情投機性補貨時，都要跟番止蝕位。

陸羽仁

---

作者: szeyuen77    時間: 2007-8-1 10:17 PM     標題: 執行紀律 (2007/8/1)

　　港股午後跌勢再轉急，恒指跌過１０８６點，不但把早兩日反彈的點數一掃而空，還跌近２２０００點關口，其後略反彈，收市跌７２９點，又是一個「狼來了」的故事。

　　今次港股跌浪又係由美股期貨下跌和日圓套息交易拆倉所觸發，美股標普期貨一度跌過２％，而日圓又升到１１６點幾的水平，外圍風高浪急，整個亞洲都在跌。本地沽盤中，不乏基金盤出貨，而且集中沽紅色巨股，想必是這些貨色獲利較深，所以基金先行獲利離場。

　　若論外圍環境，和今年三月跌市時有的類似，那時日圓也是跌到１１６，不過那次港股從高位２１０００點跌下來一段，最後一日才因日圓套息交易一輪急跌，埋單共跌了２４００點，大市調整了１１％，如果今次跌幅相同，港股由２３５００點高位，要跌１１％o既話，要跌到２０９００點。不過那次是反幅急跌，最後尋底日才跌７７７點，但今次港股一開波就急跌，但從高位只跌了１３００點左右，若要跟那次的跌幅，仲有排未跌夠。

　　若論外圍環境，港股絕對有條件跌多２０００點，但大戶當無事照炒番上去亦得，又係五五波之局。

　　由於恒指跌幅已摧毁了早前反彈之勢，後市走勢難測，所以大家無論對後市點睇，都要控制風險，特別是早前大市升上高位時追貨者，如果已到一成止蝕位，無辦法唔打靶。執行紀律是保命良方，即使佢係震倉，都焗住要俾佢震走，到止蝕位打了靶，可以博低位買過，到位唔打靶，蝕到入肉，將來有好股都無錢執。

　　若要沽貨，都係先沽弱股、貴股，反而優質股、低位入的好股，就唔一定咁急沽。至於撈貨，風險幾高，要賭性好強至好做，亦要嚴守止蝕也。

陸羽仁

---

作者: szeyuen77    時間: 2007-8-2 11:32 PM     標題: 風險管理 (2007/8/2)

　　經過昨日大跌後，美股先行穩定下來，道指收市升１５０點，不過係最後２０分鐘才抽升，有少少人為味道，大金融股如大摩和花旗，昨日最低跌過２％以上，收市卻倒升近１％。美股挾上，當然有利亞太區股市，但次按風波和日圓拆倉潮都有手尾，今天即使反彈，這幾日內後市仍十分波動。

　　今日港股還要睇睇日圓匯價和美股期指走向，昨晚日圓匯價回落到１１８點幾的水平，現時仍在這些水位，若日圓再升破１１８，見１１７，港股又有壓力，反之就應有較佳反彈。通常這些大波動市發生後，無咁快會完，小心三幾日內還有餘震，但只要餘震不大過早前的震力，港股能守住２２０００點，後市仍可睇好，由於本月下旬有幾間大陸銀行公布業績，預料皆會公布靚數，對本月下旬股市有點支持。

　　在這種大調整市中，散戶面對著各種問題，有揸重貨者蝕入肉，唔知沽唔沽好，怕一沽就大反彈。亦有手上好少貨者想撈底，唔知買唔買好，怕一買又再急跌。散戶通常想尋求一種對大市的判斷，想確切知道大市跌定未，如果偷睇到答案，知道大市已跌定，有貨當然唔沽，無貨當然要撈。

　　我就話判斷大市走向固然重要，但執行本身買賣紀律更重要，守住買賣紀律，長玩勝出機會好大，不守買賣紀律，不做風險管理，短線雖然可能夠運賺多的，但長玩下去好易一舖清袋。

　　好似昨日個市，下午一開市跌１０００點時，本來係最好玩的時候，單一跌１０００點，跌到咁誇，「應該」會反彈，記住我講應該這兩個字有括號，我昨日在波動得好大時寫了篇網誌，叫大家執行紀律，就是想叫大家按紀律行事，唔好按情緒行事。

　　乜嘢叫做按情緒行事？例如你買了隻認購輪，跌咗３０％，老早應該打靶啦，仲使問。但人會按情緒行事，第一唔捨得打靶，第二覺得跌咁多好快會反彈，所以坐住唔沽。又舉一個相反例子，假設你在７月２６日歷史高位９３．９５元買了中移動（０９４１），昨日見到跌４％咁多，驚起上來，就想立刻沽。雖然你高追，但一成止蝕位在８４．５６元，雖然跌咗好多，但仲有得守吓，點解要即沽呢？又例如你是長線投資者，在４０元買咗中移動，昨日見大市跌，怕股災急急沽，隻股從高位都未回落一成，要止賺都未到，使乜咁急沽呢？正如我經講，若心上有的是平價的好股，根本不應急急沽，要沽只是沽貴股和藥水股。

　　後市可能升，可能跌，若果升，中移動可以再上新高，你在大跌市日未到一成止蝕位就俾人震走咗，無計。假若大市跌，若果真係大調整，反彈完可以跌多１０００點、２０００點，你買咗輪無走，拖得幾拖，可能渣都無。

　　你又可以同我拗，高位買咗中移動認購輪，昨日無斬倉，如果大市反彈後無事發生，再上高位，隻輪不單唔使輸，仲贏大錢，止咗蝕就好戇居？網友小潘話，有朋友靠炒股買咗海景樓，靠炒股發達o既人唔係無，只不過好少可以發到尾，舖舖賭大，一元博兩元，兩元博４元，最後好易中招。

　　舉一個例你易啲明，好似窩輪發行商，佢發認購輪，同時會買入一部份正股作對沖（Delta hedging），若不幸地隻正隻一路升，發行商會一路增持正股增加對沖。你可以問，為什麼它要對沖，佢可以唔對沖，可以坐盤同買輪者對賭，隻正股升完可以跌番，佢唔對沖就可以賺哂，對沖就算唔輸，都會賺少咗，對沖來做乜？機構發輪計好條數，做好對沖，係做生意（或者可以叫投資），佢唔使買中方向，只要方向錯輸得少，方向中同正股牛皮都食哂你，發行商長玩就會贏，佢唔執行紀律，唔對沖，係賭錢，只係同買輪者對賭，人地咁大間機構，使鬼去賭咩！有時大機構控制唔住員工賭大錢，就大大鑊，例如霸菱的神奇小子，又例如百富勤賭債券，為咁大間公司帶來滅頂之災，何況一個散戶？做好風險管理，可以長玩長有。

　　套用同一道理，你也可以問止蝕來做乜，明明見佢跌成千點後，「一定會」反彈，若到止蝕位被逼要沽，咁咪好笨，有時笨的都要做，以免出現萬一的情況，俾人一Q清袋。

　　昨日跌１０００點時，的確有反彈之雞可執，但若你已經成手貨，到止蝕位唔沽，萬一短暫反彈完再大跌，咁你點算？假設出現股災的機會少到５％，但不幸地出現時，你又會幾傷呢？

　　又反過來說，咁昨天市況又可否撈底呢？正如我早前所講，在大波動市中，上落好快，風險幾高，只宜賭性較強者去做，買入要守止蝕，睇位做人。但自問穩陣者，就算手上好少貨想買貨，等多幾天，等大市穩定啲，就算買貴少少，雖然笨啲，但唔使食驚風散。

陸羽仁

---

作者: szeyuen77    時間: 2007-8-3 10:24 PM     標題: 風險管理（２）(2007/8/3)

　　美股道指又升１００點，美元兌日圓重上１１９圓樓上，雖然次按風波仍然在金融機構蔓延，尚幸未有巨大崩潰出現，中重招的暫時只是玩次按的對沖基金及德國的小型銀行，若次按風受控，港股將有一輪反彈。

　　股市之波動，應從昨日如過山車的市況可知，下跌的動力就是我所講的餘震，基金在第一日跌市沽唔切貨，為應付贖回要再吐，基金沽壓抵銷了大市昨日「應有」的反彈，不過亦有好友接貨，除了散戶外，應有大戶落場，似是傳統基金對期指大戶的格局。這種股市風高浪急，股市反彈後，亦要小心再試一試低位，才完成這一浪的調整。

　　這種市況買要擇優而買，要買強勢股而非弱勢股，因為要捱得往可能再出現的餘震衝擊，才能守住不用止蝕，膽汁少者亦可多觀望一點時間。

　　網友DL和Pasu提到德發集團（０９２８），昨日是勁跌股，急跌３３％，由前日收市１．５元跌到昨日收市價１元，單日唔見３３％。 Pasu的個案值得研究，佢話：「我在1.4-1.6玩928 賺到幾轉, 最後見佢爆上去, 又在1.66 買一半貨(越高買越少)之後見佢連跌幾日, 我諗係大市跌順便震倉, 基金應付贖回清細價股云云. 因為從佢年報黎睇, 928 發展情勢十分好. 一直都check唔到佢出咩新聞etc, 點知佢真係有事。在1.34我再買一注（陸羽仁估應該是昨日的事）, 低見1.18出現支持, 而NAV係1.0x, 以製衣股來說, 真係平爆, 一定係沽過龍, 我再買一注. 之後發覺佢可以跌到落1蚊, 而d基金真係不計價拋貨. 果時已經係15:49, 我開始再check大利市機既新聞, 唔見! 問個broker check, 佢都唔見, 佢淨係同我講要相信價位(佢係走勢派, 價升買升, 價跌信跌cut loss)! 然後我突然諗到應該search港交所, 發現在accounting issue, 已經係15:55既事了。」

　　最後Pasu查到德發的通造，係延遲出年報，因為核數師有保留意見，要研究聯營公司Sino　Legend的帳目是否符合香港會計準則，Pasu話「跌到1蚊, 成33%, 已經係年幾前既價, 嚴重性有如主席俾人捉去ICAC去查咁大鑊. 就當佢冇收購mudd業務齋做製衣, 1蚊都唔會貴(不計出問題的MUDD聯營業務, 經常性業務及GROSS PROFIT也有個位數字進步). 核數師保留意見, 唔代表做假數, 根據公告, 聯營公司數是已根據US GAAP審核了的.」

　　陸羽仁對德發業務唔多了解，但按昨天德發的通告睇，德發聯營公司Sino Legend的帳目已按美國會計準則經過審核，但德發的核數師要從Sino Legend的美國核數師取得資料，才能確定這個公司的帳目是否符合香港會計準則。

　　德發事件睇落好離奇，如果只按德發通造咁講，Sino Legend的帳目已通過美國核數師審核，只是兩地會計標準的問題，按理不會出大件事。不過整件事離奇在於德發早前已公布至０７年３月的全年業績，為何核數師不是在全年核數時已發覺問題，要等到做年報才知呢？其次講到「核數師有保留意見」咁大件事，但源於一個技術問題，似乎唔係幾合邏輯，而且如果只是很易解決的技術小事，公司應可叫核數師將就一下，就算要表示延發年數，亦唔使咁快講清楚核數師可能有保留意見，只表示等待子公司核數師提供資料，應可暫時過關，要搞到講核數師可能有保留意見，一係講唔掂核數師，一係講唔掂港交所，所以才要出通告露底。

　　更大問題是德發昨晚８點２２分才發通告，但隻股昨日已經跌到阿媽都唔認得，究竟邊個咁叻得風氣之先，識得事先沽貨，港交所和證監會應該查一查。德發在今年２月和４月供批了１．８億股，批股價１．０９元，當時接貨者見唔對路，自然會急急沽貨止蝕。整件事的發生可能是倒過來的，德發帳目不能過核數師，但消息漏了出街，戲院失火人人爭住沽，到跌了３３％，港交所自然會打電話問公司有無任何需要披露的股價敏感資料，這樣才把通告逼出來。

　　講番Pasu個案，之前買無得講，昨日見股份無端端急跌，查唔到有通告，不但無止蝕，仲撲入去買，在１．３４元和１．１８元買了兩注，才是最大敗筆。在股份價格不明原因急跌時，除非你睇清楚門路，否則唔好假設自己叻過沽家，你話「NAV係1.0x, 以製衣股來說, 真係平爆, 一定係沽過龍」，基於這種分析加注，其實人人有貨在手，見到隻股跌時，第一個反應係唔想接受現實，唔想認自己錯，想話係市場錯，咁就叫做俾情緒控制理智。

自己揸住隻股暴跌，第一個反應該先止蝕，唔斬哂斬一半，控制虧損，留番半條人命再睇，佢升番上去最好，最後可能補得到，唔使輸，咁樣俾人打一鑊，唔輸已經偷笑，唔好望贏。最唔好彩沽完再跌，沽咗一半，就輸少一半。退一萬步講，你真係想買，都唔好係情況不明下買，要買等第二日睇完通告才買，假設公司出了事，第二天可能停牌，甚至永久停賽，邊個知？急跌時即日去撈，風險大過賭大細，因為你係同強過你的對手對賭，人地知嘢你唔知，咁賭唔係幾公平。

事到如今，Pasu最好見股份反彈酌情減磅，起碼先把昨日追的貨打靶，才謀後計吧。這個個案其他股民也可借鏡，股份不明原因急跌時，有貨在手，應止蝕而不是追貨，嚴守紀律，絕不溝淡，才是炒股長線生存之道。

陸羽仁

---

作者: szeyuen77    時間: 2007-8-6 09:19 PM     標題: 中線投資 (2007/8/6)

　　美股大跌２８０點，日圓今早又見１１７．４的高位，來一個雙鬼拍門，港股自然要捱插，如果一插插穿２２０００點，收市都比上次跌市低很多，這一浪就低過上一浪，市底仍弱，好友無力。反而如果急插後能反彈，收市收在上次低位之上，有壞消息都唔係跌咁多，就顯示大市可能已消化壞消息，渡過短期的低位。

　　在這種預期的跌市中，好多人的問題係「沽唔沽」，我認為若入貨價不貴，又未觸及止蝕位者，不用心急出貨，散戶太密出出入入，走在大市之後，好多時買股得個做字，網友阿K便是一個例子。

　　亞K咁話：「陸sir,
我估你可以用我的例子，作為散户”食粒糖”的教材．我看完Charlie網誌的"短炒成本高",我真的有很大感觸,不吐不快.原來自己為證券行打工.

「我從9/06開始買賣股票,到今個月為止,交易了70個交易. 由06年的0604深圳控股開始,2.82買入,2.9賣出,中石化4.73入,4.77出,152深圳國際,0.47入0.55出. 工行IPO，在3.54加注，3.58賣出. 222閩信集團, 炒了幾次賺幾毫子,2.6賣出.07年,17新世界發展,17.74入,18.48出,308中旅 ,炒左1次1元,4,5次4毫仔波幅,902華能6.5,6.71出,168青島啤12.5,12.68出,694首都機場 ,7.39入,7.49出.358江銅,9元入,9.24出,1898中煤能源,7.6入,7.76出.1133哈動9.16入,9.42出, 103首長寶佳0.72入,0.73出, 116同生生,6.35入,6.49出, 2088西王糖,3.95入,4元出,190香港建設,1.47入,1.54出.仲有其他,賺的差價多小小,粒糖大小小的,唔打啦.

　　「我得出一些總結:

1.
新手開始時選股OK,06年尾,07年頭仍炒H炒,於是我買H炒,反而近3個月,開始識小小,扮代表,學人去睇業績,買唔熱炒股,之後走去捉大户動向,買雞股,賺2隻,輸3隻,好在賺的2隻cover到輸3隻,不過637同2000,又令我負數.

2.
上半年做緊”密食當3番”

3.
有些交易,股票行賺的錢仲多過我,我而家都唔明,點解當時扣手續費,有百幾元賺都賣.我估可能是以為自己入貨價貴,賺左先算,想游水,再低小小買番,點知買唔番, 唔知股票的真正價值

4.
如果,我求其留番幾隻,我現在的利潤應至小有2倍,唉.

5.
原來自己為證券行打工.」

　　陸羽仁睇完阿K的經驗，又印證我一個睇法，股民學買股，人人的問題都不同，不能一概而論。有人太過狼，所以要教佢認識「貪婪」兩字之害（借到盡炒股就有此問題）；有人太細膽，就要教佢「恐懼」同樣有害（阿K或者有咁問題）；最慘是有些新入場的散戶，同時有「貪婪」和「恐懼」，平時「贏粒糖」就走，到一些可能令他輸大錢的環境，卻受市場氣氛影響，唔想止蝕，唔識得走，結果就輸間廠。

　　阿K還要留意一個背景，這是一個大牛市，佢話如果佢無咁密出入，利潤至少有２倍；換一個角度講，如果唔係咁樣一個大牛市，你咁密出入，結果可能仲要輸錢。

　　據阿K自己之總結，佢話可能入貨價貴，可能係想游水，所以才咁密出入。我認為入貨價貴是其中一個關鍵，散戶通常係「跟人買」，特別是騰雞之人，聽人講起某隻股份，初時唔信，要見股票升先信，但隻股隨時短期已到一個小浪頂，例如報紙或雜誌推介一隻股份，即使係好股，但一推介一大批讀者去買，半個交易日可以搶貴哂，只果唔係炒股，搶完過兩日就回吐，你買了見跌幾個巴仙，心裏已經好唔舒服，捱番一兩個月，隻股又開始有番少少升勢，一上番你入貨價樓上，你到岸已經想沽，所以好多時賺少少就想走。如何選擇第一個入市位，都有好深的學問，如果入市位選得好，買股不用捱價，或能改善投資心理，有較大定力長揸。

　　另一個唔好的心態是「游水」，或者陸羽仁有時都會講到「游水」，教壞了網友，其實游水只是炒作者所為，稍有投資心態者，都不應去游水，好多時游水而能買番的股，都不是會大升的股票，真正的大升股，可能一游水就游出大西洋，追唔番。真正可以游水者，可能只是一些Range股，它的價位只是在區間波動，你睇個兩年圖好易睇得到，如果是一隻向上股而不是range股，游水往往會失掉好股。

　　我覺得阿K首先要改善自己的心理，發掘好股，分段去吸，務求入貨價不貴，要守有得守，然後揸長一點，平均半年以上，不到止蝕位不出貨，試試有無大一點的收穫。

陸羽仁

---

作者: szeyuen77    時間: 2007-8-8 12:04 AM     標題: 中線投資（２） (2007/8/7)

　　美股道指大反彈２８６點，又收復番上周五的失地，真係俾佢玩死，唔知港股又可唔可以收復部份昨日的失地呢？不過日股先升後回，無乜力水。

　　講話要揀時候，個市升到火紅火綠時，我講買股時要控制風險，你會聽唔入耳，那時最多人講係「唔知邊個炒雞股發咗達」，到而家跌到甘甘地時，講買股控制風險之法，你會比較啱聽。

　　昨日阿K提到買股經常賺少少就要走，今日可以再探討這個話題，今日再講講一個「中線投資」的概念。經常有網友問我一些新股好唔好長揸，在２３０００點時，我的標準答案是「２３０００點時買的新股難言長揸，總之唔跌穿買入的上市價就揸吓啦，一穿就打靶」。

　　這個「標準答案」背後有些假設，第一，這種市道上市的股票，價錢幾貴，就算係好股，都係貴買好股，有一定風險。第二，既然係貴買股票，就要控制風險，若不幸跌下來就要止蝕。若你誤以為好股可以有理無理去長揸，話得「長揸」，股價跌下當然唔會止蝕，仲可能扮哂股神巴菲特咁愈跌愈買，衰起上來，可以非常PK。

　　買新股又好，普通股票又好，我就非常關心買入的價位，我買股之後，第一樣要知幾時脫離危險期。乜嘢叫「危險期」？就係新買入股票後可能要止蝕的時期。我話一般買股我會守一成止蝕，只有極少數我好清楚佢底細的好股是例外，更加絕少愈跌愈買，我唔係巴菲特，就算買好股，如果開頭定一個數，例如５０萬元，假設不幸地買夠貨後即跌，通常諗o既唔係溝淡，而係駛唔駛止蝕，少數例外的好股，買入即跌，會選擇唔郁，唔買唔賣；多數比較普通的股票，若買入後就跌，跌到一成止蝕位時，唔沽哂都會先沽一半，以減風險。

　　所以買股之後，最好隻股無幾耐就升番幾個巴仙，升夠１０個巴仙最好，遠離止蝕價，就為之脫離危險，到隻股升到１０巴仙以上時，就可以把止蝕價推上購入價，如果唔跌到買入價唔使沽，在一般情況下已經幾安全（大跌市例外），咁樣就叫做脫離危險期，雖然未敢話長線，都可以把這隻股份放入中線投資類別，可以睇長少少。當你的組合買蝕本貨止蝕沽掉，把賺錢貨留下來睇長少少，就慢慢可以形成一個純賺錢的組合，不止可以賺番止蝕貨的成本，組合還可以有正回報，並在調整的市道中有抗跌力。

　　舉中移動（０９４１）為例，兩個月前上一個調整浪時，大市跌到２０３００點左近，中移動跌近７０元，我當時話雨天購物，中移動係選擇之一。你話７０元的中移動，雖然唔貴，但唔算好平，假設你在７１元買入，一成止蝕６４元，有一定的安全度，但係又唔敢話絕對安全，有值博率。假設你當時買入，買入之後無跌穿過７０元，升到７８元之後，就可以用購入價７１元為止蝕位，不到不沽，當中移動升穿７８元，你這個投資中線有得守，雖然未敢話一定可以揸長線。

　　好啦，後來中移動最高升到９０幾元，比購入價有三成以上升幅，你陸羽仁又話唔好游水，咁而家又跌番落來，如今８６元，應唔應該走呢？

　　我就話第一睇你係投資定投機，若是投資，我仍然認為可以用購入價為止蝕位，不到位不用沽。第二，睇你對後市的看法，若是全面睇淡，可以考慮定止賺位，到位酌量減貨，若果對後市仍然睇好，唔到止蝕位唔好走。

　　以阿K的例子，就係出入太密，若吼中一隻好股，有一定利潤在手，在跌市中走唔走，的確好考工夫。走，可以鎖定利潤，萬一再跌２０００點，都唔關自己事。唔走，可以博大市再上高位，經過調整後，大市可以試更高位，再升２０００點亦有之，走咗以後的可能升幅就唔關自己事。

　　陸羽仁遇到咁o既環境，若買了好股有一定利潤在手，有排未到止蝕位，會選擇唔走，博一博，但會嚴守止蝕位。作中線投資時，若能捱過一個調整浪，往後風光更好，捱唔捱得過除了睇大市，睇你自己的入市位外，亦要睇你的EQ了。




陸羽仁

---

作者: szeyuen77    時間: 2007-8-8 08:53 PM     標題: 中線投資（３）( 2007/8/8 )

　　今次雞股來一次小股災，情況和今年三月的跌市相似，不過今次好多雞股升得更高，跌落嚟更恐怖。昨日大市雖然應升不應，十分樣衰，不過單睇指數都仲唔算好嚇人，但近觀細價股的跌幅，一日跌兩三成等閒事，可謂死得人多，若在早幾日一成止蝕，仲有得走，但等到昨日才沽就有少少人踩人，沽得到都好易唔見２０％、３０％，我成日話一成止蝕和手揸重倉者要減貨，就係怕這樣的一天。

　在雨天講多兩句跌市的問題。阿K「贏粒糖」的故事，還有一個危險版，不能不和大家講講。不少網友對阿K故事的回應，很有共鳴，不少人都是新股民，都是在這幾年加入股市，工夫未練好，遇上大升市，好多人都贏錢，如今的抱怨只是「贏粒糖」，只是贏得唔夠多，唔係輸大錢，但我也必需敬告各位，花無百日好，每天都要小心大跌市最終到來。新手入市未夠兩三年者，小心贏粒糖最後走唔切，遇上大跌市時輸間廠。

　　這幾年的升市，不純粹是０３年後本地沙士反彈所導致，光是反彈，彈到０５年，彈到１９０００點破高位已差不多，不會大幅升穿２００００點。這幾年的大牛市，真正原因是全球資金氾濫，加上中國經濟崛起及國企私有化所致。資金泛濫，在全球尋找投資機會，中國崛起加上把大量龍頭國企上市，吸引大量外資追逐，造就這個前所未有的升市。

　　股市有升就有跌，有大升就有暴跌，升得愈多，跌得愈深，似乎是不變的地深吸力定律。股壇老兵見得多，股場新秀未見過，新手在最後一跌來臨時，未必識得走避。

　　你可能會問，最後一跌幾時來？陸羽仁只能話，無人知，可能係今年、明年、後年，咁早無謂估。我並唔係話覺得而家就係大跌市開始，但提醒大家每一天都可能係大跌市的前夕（愈係大升市時愈危）。

　　你可能話，既然係咁，如今沽清股票，即使是平價買的好股，亦全面出貨，唔買股咪無風險？係，不過若果你選擇了「唔買」，將來不幸股市跌完再升時，千萬不要那時才買，唔買就要唔買到底，等最後一跌，可能要等幾年，都幾考EQ o架。

　　我就話唔駛唔買股票，守紀律買賣，一樣可以控制風險。舉個例，你問今浪係唔係大跌市的開始？我可以話目前暫時未係好似，但如果個市真係跌穿２１０００點，中線投資固然好多到一成止蝕位，到時要打靶，即使長線投資亦要考慮好將仍有利潤的股票部份止賺，因為２１０００點的確係今年一月上一浪的浪頂，又成為今浪的起步點，若跌穿起步點，恐怕再要深度尋底，隨時係跌市開始，總之睇住大市走勢做人。

　　目前跌吓跌吓，不少中線投資都快到止蝕位，好多網友到位會好猶疑，我就建議大家到止蝕位，都係打靶就算，明天升１０００點和跌１０００點的機會一樣咁大時，最佳決定是按紀律行事，以免咁唔好彩遇到大跌市走唔切。止完蝕預咗佢會升番，到時睇定再買，又當係一個新買賣了。




陸羽仁

---

作者: szeyuen77    時間: 2007-8-9 08:14 AM     標題: 順風車 (2007/8/9)

　　股市大起大落，扣人心絃，本週二一場細價股災，昨日又回升６２８點，左一巴又一巴，殺完好友再殺淡友。


　　股市一抽升，已經回到接近上月期指結算時的起步點，指數股逐步收復失地，不過好多細價股急彈後依然重傷，散戶早前高位買細價股仍然輸入肉。

　　這裏想起週二細價股災後我與朋友的一段對話。話說當日收市後，朋友甲打電話來講起細價股災，我和他有此對話。

　　陸：今日細價股災情嚴重，聽經紀張講，跌得急時，有些散戶不問價出貨，有些人甚至唔知自乜有幾多貨，唔記得乜位入，都係咁叫經紀張去沽，搞到經紀張一褲都係，幫客查貨都查唔切，真係誇張到極。

朋友甲：你咁講即係話散戶止蝕唔啱？

陸：（見朋友甲咁大反應，難道他昨天也不問價出貨？都係唔好刺激佢啦）唔係，唔係，我只係要搞清楚自己的成本價，如果唔使輸錢不一定要走，但輸錢止蝕永無唔啱，我只不過話散戶通常輸一成錢時唔沽，等到輸好甘時才「焗沽」啫。

朋友甲：你都無答我，咁今日沽貨止蝕啱唔啱啫？

陸：止蝕無錯o既，你唔止蝕點知佢會唔會再跌多一千點啫，但下次記得早啲執行止蝕啦。

朋友甲言語間露出憤憤不平的語氣，當然是被當日的市勢所逼成，面對這種「沽又死唔沽又死」的困局，的確相當無奈。今日再講番這段對話，只係想再提提大家，今次跌浪係一個活生生教材，有幾點經驗都值得大家記取，輸錢就當交學費。

第一，             投資無投機咁好搵，但亦無投機咁高風險，你買大價股唔買細價股，好難短期發大達，但跌落來無咁傷，買大價股如果不是太高追貨，未到止蝕位，隨時守住唔使郁，大市波動過後，可能根本無事發生。但買了雞股，如今可能仍然好傷，唔見咗三、四成等閒事。所以唔好羨慕「阿媽」炒雞股賺錢多，佢地都係搵命博。大市最深調整比高位都只係跌了１５００點左右，濕濕碎，若果咁o既小跌都輸到你好傷，小心將來終極一跌時一舖清袋。炒雞股記住雞咁腳，避完風頭，無事又可以行番埋去。

第二，             執行止蝕好重要，若買雞股在下跌之初執行紀律一成止蝕，可以避過週二那一波，還保留資金有機會執平貨。初時無執行止蝕好被動，到大跌之時，出現人踩人的慘況，正正是沽又死唔沽又死，你問我點辦，我亦唔識答，叫你守怕你輸清，但已跌到咁深，叫你沽又怕一沽又彈。

第三，             大戶依然左右大局，港股此跌，表面是由跟美股下跌開始，但跌到咁上下，美股升２００幾點可以唔跟，跟住又可以急彈６００點，又係大戶玩哂，炒期指的大戶遇上大力沽貨的傳統基金，期指大戶不但無輸錢，仍然操控大局。

　　散戶從來唔係做莊，只係閒家，不能硬頸，只能跟炒，大市露出穩定的勢頭，又到擇優吸納的時候，見人地開車時，咪跟風搭吓順風車囉。




陸羽仁

---

作者: szeyuen77    時間: 2007-8-11 11:32 PM     標題: 歐洲風暴 (2007/8/10)

　　港股剛開始穩定，又遇上一場歐洲風暴，昨晚美股愈跌愈多，道指收市跌３８２點，睇怕香港今日又要落一場雨。

　　正如早前所講，今次外圍的衝擊比三月那次日圓套息交易拆倉潮大得多，港股暫時都算跌得少了，歐洲昨日的狀況頗具驚嚇性，BNP三個基金出事，搞到要暫停贖回，觸發外資調走和金融機構恐慌，銀行亦唔敢借錢，歐洲央行的目標利率是４厘，銀行拆息急升到４．７厘，搞到歐洲央行要大量注資入銀行體系，拉低利息，歐洲央行的大動作，令市場擔心背後有大鑊，歐洲央行才會如此行事，自然再觸發市場恐慌。

　　BNP早前講過，自己的次按風險有限，話口未完，旗下基金就出問題，令人覺得金融機構的披露並不可靠，所以唯有用腳投票，調走資金，相信歐洲央行一係睇到大規模走資潮，一係睇到銀行大恐慌，或者兩者皆有，銀行怕風險不願借錢出來，這樣銀根就會急促收緊，金融危機即現，所以歐洲央行立即放水救市，注入等值１．０２萬億港元的資金，承諾無限量以４厘拆出資金，實行重招救市。

　　次按風波雖有危險，但中央銀行可以透過放水或減息來救市，所以理論上比較簡單可以控制風波蔓延，不過美國聯儲局局長伯南克表現較消極，例如放水入銀行體系，遠比歐洲為少，今次嚮應歐洲央行行動，放入等值１８７２億港元的資金，已經叫做比較手筆。金融界分析伯南克的心態，是非到好必要的時候不想介入，唔好益咗嗰啲大炒特炒的基金佬。

　　你看美國金錢泛濫，在伯南克的眼中，無論貪高息大買次按的對沖基金、借日圓做套息交易的對沖基金、以至用好大槓桿借錢收購的私募基金，過去幾年都肥到漏油，伯南克會認為，無理由你借錢大炒作搵了水，出事又要聯儲局埋單，等如幫你繼續搵水。所以伯南克會任由對沖基金爆吓，非要到影響金融體系時才會出手。伯南克上任至今，已顯露其放水幫助市場的積極性，低於上一任的格林斯潘。這樣一來，就會增加次按爆煲的風險（因為聯儲局不積極去救），股市亦會更波動。

　　不過話得說回來，美國股市又急跌，有少少燶味，甚至可能影響經濟，又唔到伯南克唔救，除了放水之外，他最簡單的招數就係減息，所以相信聯儲局十月會減息的市場人士愈來愈多。

　　在這種局勢下，次按風波仍未完結，相信市場仍會極之波動，升得太急唔好追，跌到殘時不妨買少少好股；若到位止蝕要執行，唔好心存僥倖；低吸時要揀優質股，打靶時先打垃圾股／弱勢股。總之股市風高浪急，會大升大跌，賭性強的可以博，膽汁少者只能量力而為，唔好太博啦。

陸羽仁

---

作者: szeyuen77    時間: 2007-8-14 12:48 AM     標題: 央行拆彈 (2007/8/13)

　　上週歐洲中央銀行注萬億巨資入銀行體系救市，各國央行陸續注資，大家都估債市有大鑊跟尾，加州風險管理機構Institutional
Risk
Analytics就估計，有２５００億至３０００億美元的債務抵押債券(CDO)面臨貶值，即係話有超過２萬億這類型的債券會跌價，難免有續回潮，如果各國央行唔放水，相信個鑊就會爆啦。

　　其實當日當BNP宣佈旗下三隻基金唔掂時，都有爆爆地的味道，當時各種投資市場都出現混亂，樣樣都跌，股票跌，黃金跌，商品跌，油價跌，日圓套息交易拆倉，只有美國國庫券一味升，這樣現象道理好簡單，市場預期大風暴來臨，加上銀行短期唔會肯借錢，所以不單揸了CDO債券的基金要沽貨（當時乏人問津），揸股票、揸商品的基金都要先沽貨，因為他們估計市場會大動蕩，到時若有大批客戶要贖回，若基金手上無現金應付贖回，就會爆煲，所以要焗沽，攞到錢就買美國國債避難。

　　中環茶友話日圓套息交易照計和次按無關係，按理資金避難入美國國債，美元應該強，日圓唔應該升，但當日日圓套息交易一樣大拆倉，挾到日圓急抽，你可以話這種現象也叫全球化，一樣產品跌，引發投資者恐慌，樣樣產品遭秧，做日圓套息交易的對沖基金都要避險。

　　好多朋友問次按係乜，為乜影響咁大。次按係美國的次級樓宇按揭，借錢買樓者還款能力較差者，要付高一點利息借錢買樓，美國的房貸公司借錢後，把按揭債券化，包裝成定質投資產品，賣給投資者，投資者貪高息，就會買入長揸。如果一個基金買入次按，沽出美國國債，就連總體利息升跌的風險都抵銷埋（因為已沽空美國國債），好似可以好穩陣咁賺取次按和國債之間的息差，基金當然不是只賺二、三厘息差，佢把資金借大１０倍，就有２０％、３０％年回報，唔駛用腦，年年收錢。不過美國樓市轉弱，美國次按的業主拋低鎖匙走人不續供愈來愈多，次按爛帳比例愈來愈高，次按債券價格大跌，結果就出現次按危機。

　　歷史不斷重覆，今次次按風暴，和美國８０年代的垃圾債券危機及１９９８年對沖基金長期資本爆煲，都有少少類似。８０年代美國垃圾債券大王Michael
Milken專門包銷無評級的企業債券，搞出一個垃圾債券的市場，他亦捲入龐大內幕交易案，垃圾債券終於因為炒得太厲害而爆煲（Den
of
Thieves一書對Michael
Milken炒作垃圾債券手法有詳盡描寫）。

　　而對沖基金長期資本就因為炒作俄羅斯債券賺取息差，最後俄國在金融風暴中出現不還債風險，就逼死長期資本。

　　每逢出現這些危機，必然觸發恐慌，跟住就有沽售潮，市場不問價出貨，銀行亦落雨收遮，不單不再放貸，還要收回貸款，一沽一挾，好大的基金都頂唔順。

　　在這種危機中，市場資金緊缺，人人都頂唔順，而且愈來愈恐慌，投資者不問價出貨，好快就有災情。穩定市場最佳方法是央行放水，這是最有效方法，因為大量資金湧入市場，銀行首先不用急著收債，好快就要放錢出街，因為市場穩定後，銀行還不放貸，就要日日蝕息。而市場一穩定，早前不問價沽貨者，因為沽平咗，就有好大動機反手撈貨，買貨人多，市場就會反彈。

　　央行要拆彈，先來大放水，唔夠力仲可以進一步減息，通常可以穩定危機，這種行動的副作用反而在經濟方面，假設美聯儲減息，但經濟其實未泠，一減息就觸發投資和消費，結果就引發通脤。

　　央行大出手之後，市場雖然仍波動，但大膽的投資者已會入市博大霧，但穩陣的散戶只能量力而為，因為風波未定，隨時還有餘震也。不過央行出手，亦往往是跌市的尾聲，若手上有早期買入的平貨，忍到今天，若不再急跌，就唔好而家驚過籠去沽，小心賤買資產呀！
  
陸羽仁

---

作者: szeyuen77    時間: 2007-8-14 11:19 PM     標題: 巨鱷、大象與獅子王 (2007/8/14)

      　歐、美、日、加、澳五個中央銀行再向市場放水，舒緩銀根，合共再注資近６０００億港元的資金，灌水浮球，歐美市場逐步穩定，美股回穩，一度上升，後尾市回落，道指微跌３點收場，美股和港股一樣，處於養傷階段。

網友阿Tom有個問題好有意思，他問：「陸Sir,　早晨，你說：『央行要拆彈，先來大放水，唔夠力仲可以進一步減息，通常可以穩定危機，這種行動的副作用反而在經濟方面，假設美聯儲減息，但經濟其實未泠，一減息就觸發投資和消費，結果就引發通脤。』難道經濟永遠不會衰退？」

　　阿Tom咁問，自然隱含不同意見，或者佢懷疑央行干預有無效，或者質疑央行這種事事干預的合理性，總之有啲懷疑。

　　先講「難道經濟永不會衰退這個問題」。美國經濟，近年的確沒有經歷較大衰退，遠的不講，近的如９８年的亞洲金融風暴，２０００年科網泡沫爆破，２００１年的９１１恐怖襲擊，美國股市雖然一度大幅下跌，但好快又回穩，即使２０００年科技股爆破令股市受創較深，但實體經濟也只是略為回順，跟著又回復升軌，談不上衰退。這一切和美國聯儲局放水救市有絕大關係。

　　美國是「萬水之源」，中東的油元，中國的經濟增長收益，形成全球的遊資，其實這些錢大部份源自美國，你看美國人口佔全球二十分之一，但用電量卻佔全球四分之一，就知道這個國度如何消費，就明白她為何不參加控制廢氣排放的「京都議定書」。美國巨額的消費和投資，支撐著全球經濟，只要美國聯儲局肯放水，美國經濟只會感冒，發燒都唔發吓。美國可以透過聯儲局借錢、減息、和政府增加開支放水。美國政府赤字高企，政府叫聯儲局發鈔，只用美國國債抵押就可以，即係話美國政府只要願意付約５厘利息，就可發鈔應付赤字，但利息也可以發鈔支付，所以美國政府的赤字只是數字遊戲，執政黨經常唔理。

　　在格老當聯儲局主席的年代，積極干預市場，延續繁榮，所以美國經濟只會傷風感冒，並無大病，至於咁樣好唔好就唔知啦。你睇美國樓市自９４年一直升到而家，才開始回落，就知道美國干預的利害。當然有一個理論話干預得多一直頂住，到真係跌時會跌得好甘，但另一個理論話真係跌時再頂，也只是有調整無大跌，睇吓你信邊個。

　　有時市場的大象、鱷魚和獅子王都幾難分，今次次按危機，不少大金融機構都中重招，聞說一間大行的基金客就輸掉３０００億美金，有些大行又係大象，亦做鱷魚，但同時和獅子十分老友，你都知美國大行和政府及聯儲局關係有幾深，聞說美國大行上星期就積極遊說聯儲局放水干預，結果真的成事。明白這重關係，就知道政府為何要積極干預，延續繁榮，你知大行都唔想自己蝕太多錢啦。

　　不過獅子王入市係唔係永遠止得咳，無人說得清，例如美國樓市，就有人話進入衰退期，減息都好難救得番。又例如經濟，如果聯儲局減息後，通脤加劇，甚至出現滯脤，就真係減息又死唔減息又死了。

陸羽仁

---

作者: szeyuen77    時間: 2007-8-15 09:43 PM     標題: 餘震不絕 (2007/8/15)

　　美股略穩定後又再跌，昨日道指跌 207.點，跌幅1.6％，跌到 13,028.點，這是４月以來的低位，隨時穿13000點。今次美股下跌是受沃爾瑪次季業績不理想拖累，亦擔憂次按危機繼續蔓延，沃爾瑪次季賺２４１億港元，差過預期，要調低全年盈利預測。另外家居修飾零售商家得寶上季盈利亦倒退１５％，營業額更是４年來首次下跌，是一個側面反映美國樓市唔掂。市場開始擔心樓市回軟和次按危機影響消費。

　　國際投資者目前未完全知道次按危機的深度，所以非常非常審慎，你睇高盛股價就知，高盛昨日就跌了７．７５美元，一日跌了４．４％，跌到１６９．７５美元，又跌穿１７０美元，咁大隻股，一日跌４．４％，都幾厲害。睇完高盛股價，你就會覺得匯豐其實幾硬淨，雖然人地大升時佢無升，但人地大跌時佢亦無大跌。既然美股仲震緊，港股今日又要大力插一插了。

  　　中環茶友話，外圍現在人心好弱，你睇外匯市場就知，目前是一片亂局，美元兌大部份貨幣都轉強，只有兌日圓轉弱。早前市場睇淡美元，所以有好多美元空倉，但次按風波觸發金融混亂，不少基金沽了各種類型資產，有錢無地方放，就湧入美國買吓最安全的美國國債，所以令美金有支持，短暫迥光反照，變得稍稍強勢。

　　但美元兌日圓獨弱，今日又見過１１７．４日圓低位，日圓上升只有一個理由，就係對沖基金套息交易拆倉，你睇高息貨幣如澳紙、紐紙甚至英鎊都走弱，就知道套息交易在不斷拆倉，要沽高息貨幣買入日圓。中環茶友估澳紙、紐紙仲要試低少少才跌到定。

　　今浪次按危機的風眼已過，但後面的風仲好大，要等一些時間才會穩定，市場擔心如Bear Stearn這等受重創的金融機構唔知頂唔頂得順，所以風繼續吹，小心風尾都吹到你頭暈。恒指呢個月已經有三棍插下來，隨時又來多一大棍。

　　美股跌得多，港股已經叫做跌得無咁多，皆港股有紅色因素撐住。內地A股還在創新高，上海A股指數已破５０００點，上海綜指都衝向５０００點，這個紅色因素還頂住港股，所以外資對香港又不致睇得太淡。不過A股破５０００點，加上上月內地通脤又上到５．６％的高位，宏調措施又快來，A股可能都要抖抖氣了。




陸羽仁

---

作者: szeyuen77    時間: 2007-8-16 07:17 PM     標題: 執行紀律 (2007/8/16)

  　美股道指再挫１６７點，跌幅１．３％，收報１２８６１點，今年的升幅差不多消耗淨盡，的確是弱過藥煲，今次下跌皆因美林指美國最大的按揭公司Countrywide Financial Corp.處於「無力償債」狀態，即係話佢就嚟破產，皆因它的債主逼它低價賤賣按揭資產，受到Countrywide Financial Corp.可能進入破產保護狀態的消息影響，美股由早段上升變下跌，再插一棍。
　　
　　次按危機繼續令對沖基金急急為日圓套息交易拆倉，日圓早上曾升上１１６．２日圓的高位，而紐元亦一度跌穿０．７美仙，外匯市場仍然動蕩。

究竟今次美國的次按危機會否爆至不可收拾，人人看法不同，不過美國聯儲局成員、聖路易斯聯邦儲備銀行主席 William Poole就話，無跡象顯示次按危機影響美國實體經濟，所以無需要因此而考慮緊急減息。他估計事件令金融業虧損1200億美元至1500億美元（9360億至11700億港元），唔算太大件事，暗示聯儲局不應減息救金融界。William Poole是聯儲局放水救市後第一個公開講話的聯儲局成員，睇嚟聯儲局短期內減息的機會不大。

　　即使次按風暴只帶來中期調整，美國的大象和大鱷都好傷，全球最賺錢證券行高盛股價昨日再4.85美元，跌到164.9美元，再跌2.8%。高盛旗下的對沖基金Global Equity Opportunities這個月就損失14億美元資產值，即係唔見咗109億港元，搞到要免收手續費，吸引資金投資這隻對沖基金。

　　在對沖基金這種大鱷都受重創的年代，你夠唔夠膽跟佢搵食，就要睇你的膽色了。

今日港股難免再插一棍，直撲向２１０００點這個好淡臨界點，如果認為次按未影響實體經濟，主要是一個信心問題，後市仍可睇好，如果認為次按會爆至一發不可收拾，後市就要轉行睇淡。

　　陸羽仁再建議大家執行紀律，到止蝕位的股票要忍痛打靶。這可以有不同情況。第一，早前在２３０００點樓上高追的股票，如今好多都到一成止蝕，講得叫做高追，打靶不要手軟。第二，在２２０００點左右博撈底的股票，部份未到止蝕位，可以守一守，到位都係要打靶，執行紀律無辦法，打完靶預咗佢反彈，但你又點知反彈完佢升定跌呢？打了靶保留現金，謀定而後動都無壞。第三種情況最壞，成手蟹貨，仲係雞股，隨時蝕４、５成，打靶又死唔打靶又死。要注意雞股在大跌市多數頂住，等跌定後又會住下放，若雞股跌得不深，應該把握機會止蝕，但跌得好深就無乜嘢好做，唔等錢使唯有同佢鬥命長。

　　止蝕永遠無錯，如果股份剛到一成止蝕位，唔沽哂都沽番一半，留番啲現金係手，等個市定啲再算。

陸羽仁

---

作者: szeyuen77    時間: 2007-8-18 01:42 AM     標題: 避險與博矇 (2007/8/17)

　　世界金融市場昨晚認真精彩，首先上演一幕日圓狂升潮，在套息交易拆倉影響下，日圓昨日本已急升，到美國市時段更美元兌日圓更跳崖式下跌，日圓一度升上１１２的年內新高，相信日圓一升穿１１５水平後，觸發大量套息交易止蝕盤斬倉，把日圓急促推升，因為日圓升到一定程度，對沖基金計埋賺息差都要蝕時，就被逼斬倉，形成美元兌日圓跳崖急跌，當時成個商品及金屬市場都大混亂，金、銀、銅、油價都跌，市場恐慌觸發炒商品的對沖基金也要急急平倉。

　　美股當時亦相當大鑊，道指最多跌過３４４點，不過尾市又神奇反彈，之前受創最深的金融股反彈最多，美國第五大證券行Bear Stearns獲得新資金，股價大力反彈１３％，結果道指無事收場，只是微跌１５點，而標普５００指數更升４點。

　　美股回穩利好亞洲市場，但日股開市仍跌２００點以上，因為日圓急升，對出口商影響很大，出口股帶頭急跌。

　　以日圓利差交易拆倉為例，按傳統智慧，經過昨日美元跳崖式下跳，已觸發大量平倉盤，要沽都沽了，後市應趨向穩定，但近日金融市場跌到出「災味」，無人講得實日圓會否再升，不過今早美元已反彈近１１４日圓水平。

　　呢次搞到出災，相信美資大行和聯儲局都有跌眼鏡，初時美資大行自己成手次按貨，本來唔信次按爆得成，聯儲局亦認為無事，大家有共識。後來出現信心危機，令次按證券價格急跌，美資大行知道唔掂，但聯儲局到今天仍然話無事，依然企硬，無格老當年咁手鬆隨時放水，所以好多人估美國會突然減息，但睇聯儲局的態度，機會不大。

　　講番香港，陸羽仁建議大家做做功課，睇番自己的組合，諗吓自己想點，再定行止。現時的市況仍極之波動，大上大落，風險不低。

　　如果自認係投資者，係羔羊，恒指破了２１０００點的大位，雖然蓄勢反彈，不過後市係點無人知，第一個動作是檢視風險，要問自己接受到輸幾多錢，再做風險測試，問吓如果彈完再跌２０００點，自己頂唔頂得順，會唔會吊頸，有問題就要撤退，要早早減持唔係增持。

　　如果問完睇完，發覺自己再跌頂得順（生理上及心理上），不想沽貨，這也無妨，但要保留的主要是你有認識的優質股，舉一個例，中移動（０９４１），出完業績，你估佢全年每股可賺４元，２０倍PE可值８０元，理論上現價可吸，唔係要沽。但你要問兩個問題，第一要問目標股份投資收益多不多（是不是靠炒A股有此盈利），第二是假設衰起上來股市再大跌，高增長好股也只值１５倍PE，不排除佢可以跌到６０元，若你仍然話頂得順，想長揸，就可以分段小注買吓，如果覺得唔啱路，就唔好買啦。一句話，而家買股，要預咗佢再跌幾鑊，預咗要長揸，你頂得順至好買。

　　如果自問是投機者，係老鼠，我只能話買任何嘢要嚴守一成止蝕，因為個市有災味，住後大升大跌的可能都有，無人敢話無事一定升。

　　不過炒作除了炒方向之外，亦可以炒波幅，網友fisherman8850話早前聽了我的建議，買了一個馬鞍式窩輪組合，昨日計數有３０％利潤。其實未來都是大上大落市，兩三個月內，急升２０００點和急跌２０００點的機會都有，維持現水平唔郁的機會反而較細，而家又係買馬鞍式窩輪組合的時候，個市波動，期權溢價高，但窩輪溢價低，揀上下都略價外的認購輪和認沽輪（唔好揀會打靶的牛熊證），同時買入同種的認購輪和認沽輪，博在下一步大波動後平倉賺錢。炒輪有風險，買入馬鞍式窩輪組合，風險係個市係現價點咗穴唔郁，咁窩輪就會不繼咁輸時間值，唔對路亦要止蝕。記住，睇唔明或者唔想炒者，就唔好學了。

後記：同意網友阿K的意見，無炒過輪者，價內價外都唔識分，唔學好過學，而且窩輪不能長揸，咁上下賺蝕都要走，新仔唔識去死守，隨時輸死。

陸羽仁

---

作者: szeyuen77    時間: 2007-8-18 01:43 AM     標題: 血流成河 (2007/8/17)

　　唔知係唔係大鱷輸咗錢要搵番小小使用，所以港股今日上演一幕血流成河。港股期指開市升１００點左右引人買，跟著就插，插穿２００００點重要心理關口後，上午已經跌穿１９８３０點的２５０平均線。

　　中午日圓再升上１１２，日股尾市急插，由跌３％變為跌５％，跌成８００點。港股下午兩點半一開市就低開幾百點，１９５００都守唔到，穿埋１９４００點，最多跌１２００點，所有散戶面色大變，炒即日鮮博反彈者輸得最慘，全線打靶。

　　不過下午港股最後一跌時，美股S&P指數期貨其實升緊，歐洲開市多數都微升，但港股仲要插埋最後一轉，盡殺博反彈的好倉，然後才大反彈，有少少人為食你糊的味道，最慘是不少散戶在二點幾被經紀行追孖展，唯有不問價斬倉，血流成河，呢吓「最後一跌」踩死好多人，死哂人個市才急彈。

　　最後反彈亦係Deep V或咁上，可以話一挾就上，反映沿線有大量淡倉，一直等食糊，見到穿１９４００點後彈上來，亦急急止賺平倉，所以上來亦上得好易，大市從最低位計最多跌了４１００點，一日亦跌了１２００點，淡倉獲利已深，一彈亦觸發好多平倉盤。結果現貨恒指最後跌２８８點收場，以２０３８３點收市，收回今日大部份跌市失地，從低位反彈了過１０００點。期指收２０１８７點，低水２００點。

　　不過個市穿埋２５０天線，技術走勢極差，未來即使再反彈，恐怕仍有反覆，各位網友要量力而為，買又好，沽又好，都唔好博到咁盡啦。

陸羽仁

---

作者: szeyuen77    時間: 2007-8-20 10:27 PM     標題: 一條彎路 (2007/8/20)

　　美國聯儲局出手減貼現率救市，美股大反彈，今早亞洲市場普遍反彈，日股彈升５００點以上，升超過３％，日圓匯價亦初步穩定下來，做１１４．３日圓左右，看來風暴會先定一定，港股會有像樣反彈。

　　網友們最關心的問題是港股是否已經見底，甚至可否瞓身入貨。我諗「瞓身」兩個字一定要戒，我星期五聽到不少散戶，甚至大散戶被人斬倉，斬到喊，真係喊嗰種，有人借兩三成錢孖展（本來唔算多）買雞股要斬首，有些有錢o既大散戶做了結構產品，同樣要補孖展，即時補唔到就斬，隨後個市彈番都唔佢事矣。

　　次按危機比想像中大，主要是大家估唔到那些次按CDO，有「AAA」評級，竟然會騙人到這個地步（見今天頭條日報專欄），原來評信貸級機構也是幫兇，而家發現評級機構穆迪，在０２年至０６年間，為這些次按CDO評級，總共獲利３０億美元（２３４億港元），這生意佔其母公司利潤４４％，你就知這是一個什麼遊戲。既然是如此騙人的遊戲，不同於一般危機，其深度好難見底，因為它會令好多本來不想冒險的機構投資者落叠，影響之廣泛會照乎人合理之想像範圍。

　　美聯儲減貼現率利息後，市場初步穩定，但次按呢鑊唔會咁快完，對債市和美國金融市場的影響，肯定大過９８年長期資本對沖基金爆破。所以呢一次跌市不同今年３月那一次跌市，那次雖有次按問題，但主要衰日圓套息交易拆倉，當時日圓拆倉交易一定下來，住後港股就係一條直路，我怕今次可能係一條彎路，住後仍有風險。

　　未來有幾個可能，第一，美股又無事，港股又無事，立刻照炒過。第二，美股好傷，要養傷，但港股無事，自行炒上。第三，美股鑊未完，彈完再尋底，港股亦彈完再回吐，也要養傷一排。

　　我希望港股無事，但無絕對信心，正如早前所言，主宰股市的環球大鱷亦受重創，它們回過頭來，想在亞洲搵點使用，要搵食，就要大波動，大力推升和大力再插低都有可能，令市場走勢更難測。

　　所以我只我作一個「量力而為」的建議，想買股的朋友要量力而為，不應瞓身。第一，本身已好重貨者，唔好瞓身加注，不要輸咗錢希望一注贏番，財不入急門，無咁易翻身。第二，另一種極端，本身早已清貨者，由於大市的確有可能已見了底，不妨酌情加注，但也不要一注推出枱面，分注買入優質股，安全啲，唔好博撈最低位了。第三，中等人家，手上都有唔少貨，可以小注怡情，追番少少貨。

　　若你又想買貨又怕痛，有一著「買一半」的技術，係穩陣老師父教我，適合穩陣網民參詳。假設你有１０萬元，覺得股市見底，通常就會一注瞓身，把１０萬一注買哂一兩隻股，萬一買完後不幸股市再跌，你就唔知斬唔斬好。老師父話一般股民興一注買哂，特別在氣氛好時買（或者似而家氣氛開始轉好），好易短期摸頂，所以他會分兩注（分三注亦可），假如睇中了中移動，佢今日造８５元，先買一半，另一半跌低１０％（即７６．５）才買，如果咁「幸運」買到，即股市再大跌，你的平均價都低５％。如果咁不幸買唔到，你都買了一半平貨，唔應抱怨，散戶面對的情況，經常是有股無錢買，不是有錢無股買，你有餘錢，將來還有大把投資機會。

後記：阿爺在中午出手，話放寬試點讓大陸人買港股，本來在天津濱海試點，每人上限５萬美元，但如今改為不設上限，阿爺托市訊息明顯，外資蜂擁入市，大市升幅加倍，估計次按危機仍有餘波，但阿爺出埋手，確認大市早前已見底，可以把這條反彈彎路拉得直一點吧！



陸羽仁

---

作者: szeyuen77    時間: 2007-8-21 11:04 PM     標題: 股海殺人事件 (2007/8/21)

　　美股道指升４２點，市場相信聯儲局會控制次按危機，看來減息已初步穩住環球股市。港股再升多的，回到２２０００點樓上，就好似無事發生過，不過中間的起伏波動，已殺死幾許股民，當中有些殺人事件，值得提出來等大家參詳參詳。

　　上星期五下午開市一插入１９３８０點時，已把不少股民坑殺。第一種，炒雞股低價打靶。由於當日嗰市跌得太嚇人，好多已從高跌咗一半的雞股，再跌多一半，即係等於高位跌了７５％，嚇到股戶被逼打靶，亦有按了股票借了幾成錢，再急跌時要補倉，補唔到就打靶，有經紀話有個師奶客唔見咗百幾萬，急到喊，都無人幫到佢。

　　呢個故事教訓我地：雞股風險高。我記得股市最風光時，好多網友話自己阿媽點炒點炒賺幾多，教極佢都唔聽；到股市急跌後，大家應明白雞股風險好大，炒得雞股，食得咸魚要抵得渴。

　　我經常講炒股要一成止蝕，網友話雞股一開始跌就跌兩三成，過哂止蝕位，止唔到蝕。事後去看，即使過咗止蝕位忍痛打靶，都好過死守。因為開始唔止蝕，最怕後來遇上大跌市，被人／被市場逼到要止蝕，輸得少時唔止蝕，輸得多時被逼止蝕。早早止蝕，想再炒雞股，而家還有大把機會撈平貨。

　　第二種是炒期指被逼斬倉，散戶炒期指輸多贏少，在三月後開展升浪時，好多散戶做淡，一路輸，輸到２３０００點才開始打靶，到跌下來又好多人沿線撈底做好倉，到星期五那種市況，左一巴右一巴，一插下去將所有好倉殺清，無人忍到痛不斷補孖展唔平倉。到股市急彈，又將一眾跟沽者殺哂，咁波動既市，炒期指輸多贏少，呢次真係輸到人喊。

　　呢個故事講了個老生常談的道理，期指唔易炒，咁波動o既市更難炒。

第三種死法是做了結構產品打了靶，市面上好多投資結構產品以高息為包裝，例如ELI，Accumulator之類（唔知佢係乜的讀者亦不用深究），在２３０００點樓上，個市有少少敗象時，都湧咗一大批產品出街，上週五好多做了這些產品的客戶打靶，有些人因為要補孖展補唔到被逼斬，更多係好怕要孭上身夾硬平倉。試想買個Accumulator有長到兩年期，日日接貨，如果隻嘢急插到比接貨價低一、兩成，持貨者諗起要接貨兩年，當年腳軟，唯有止蝕平倉，你要在上星期五咁波動的市況平倉，自然只能用好賤的價格，大出血平倉。

　　好多人做這些產品是貪高息，例如年息２０厘，和兩隻紅色股掛鈎，以做時的８５％股價接貨，我在２３０００點的時候，見這些產品的利息突然抽升，已經叫好多朋友唔好做，話風險好大。

　　做這些產品等如沽出認沽期權，我o既理論係做期權沽家，只能夠在平靜市做，不能在可能波動的市況去做。見到期權金大升（等如那些結構產品的利息），即係話引申波幅好勁，風險當然好高，所以見到期權金高時，一般散戶會被吸引去沽，其實應該去買，大波動市，買期權者隨時扑中，你去沽就好大鑊。呢個故事教訓我們，不要在波動市貪高息或高期權金，走去沽期權或買結構產品。

陸羽仁

---

作者: szeyuen77    時間: 2007-8-22 08:38 PM     標題: 大波動 (2007/8/22)

轉貼者註：看來今天陸羽仁要來個言不驚人誓不休.


　　陸羽仁跟中環茶友傾偈，大家都對這種狂升急跌的市況嘖嘖稱奇，話這幾天每天１０００點以上的升跌幅度固然是９８年金融風暴之後所未見，特別是「波子機式」彈來彈去每天１０００點上下波動，更是前所未有，好像昨天早狂升到２２７００點時，好友狂呼慶祝，到下午打回原型，又到淡友發圍，好友、淡友都曾經中獎，若未平倉，最後誰是勝利者，有誰說得清。

　　陸羽仁認叻，話自己一直估是大波動市，講過好幾次升２０００點和跌２０００點都有可能，之後多次大幅波動。茶友們紛紛柴台，話如果唔炒波動，估中都無獎。

  　陸羽仁被茶友激發，唯有逼出幾個觀點：

第一，在這種大波動市，走勢分析並不可靠，論走勢上週五恒指一舉跌穿１９７３０點這個２５０天平均線位，急插向下，大市走勢劣極，論走勢要試１８０００點，怎知卻大反彈。反彈彈到跌幅一半，到２１８００點應有阻力，但在昨天上午卻一舉升穿阻力位。昨日升穿阻力一舉破上月期指結算時的２２７００點，股市應該大好，但卻即時調頭急落。股市昨日升１０００點後單日轉向，按走勢應該大壞，但按近日股市唔跟走勢的運作方式，又好難有看淡的結論。一句話，信走勢去炒作，死得人多。

第二，大波動的成因是次按危機這種拉跌力量，和聯儲局救市及大陸資金自由行這些拉升力量的角力；是跌市累積的淡倉和潛藏好倉的較量；各方在跌市後、特別在阿爺公布資金自由行後，要調整策略急促變陣。

第三，陸羽仁靠估，本月的大波動未完，到臨近期指結算（如果不是更早的話），又會大幅波動，走向本月結算的終極方向。

第四，股市未來幾個月的中期波幅更大，是上下３５００點以上的幅度，如果升，會升穿２５２００點，如果跌，會見１８２００點的水平，睇好睇淡，還有好深水位。睇好的理論是大市經過五輪急跌，經歷兩個成交過千點的跌市，要估的沽得八八九九，打好個底，再向上拉升時，一定會大幅超過上次高位２３５００點。看跌的理論是大市急跌後，一度反彈３０００多點，差不多再上高位，若再下跌破位，應要再深度尋底了。總而言之，股市在現水平上下１０００點牛皮的機會頗細。

陸羽仁自己略為睇好，主要是阿爺公布的資金自由行，雖然只是試點，長遠好大件事，讓大陸人不限量來香港買股票，有拉近A、H股差價的作用，A股炒得火熱時當然無人來港炒股，A股一靜少少，內地資金就湧落來炒。

　　　若果我係外資大戶，在這種形勢下，較難做淡，一則大市已調整，二則若隊到咁上下，阿爺又再擴大資金自由行的幅度，好易被佢挾死，所以昨日早市港股一度喪升，我估有沽空H股的對沖基金，要急急入市補貨，驚被人一Q清袋，所以買得咁狼忙。

這些大波動市，也是搵錢的好機會，愛好炒作者可以炒波動搵食，但炒單邊者好易中招，衰起上來一天之內被人左一巴右一巴打兩巴，這幾日手風唔順者，最好暫時作壁上觀，唔炒好過。炒期指、沽期權更隨時輸身家。

這些波動市亦對不愛炒作的投資者不利，在波動中好易上錯車，例如你睇好，昨日見個市狂升追貨，一追就坐艇。這種市況，極端考驗人類的EQ，直覺感覺，如果你EQ夠好，持貨沒有在大波浪中被震走，將會有不俗收穫。

陸羽仁

---

作者: szeyuen77    時間: 2007-8-23 08:52 PM     標題: 落後股尋寶 (2007/8/23)

　　美股道指升１４５點，外圍進一步穩定，利好港股。恒指昨天大升６００點，不過昨日亦是近期略為穩定的升市，因為它不是一抽狂升那種，而是一級一級咁升，升百幾點又回百幾點，一步步向上，是近期首次見到比較「實淨」的升市，一路向上一路回吐，大把時間俾人沽貨，既然有咁充足的沽貨機會都可以升，購買力好強，理論上股市升完可以回吐，網友可以趁回吐吸貨。

　　從窩輪發行商的行為亦可看到一些啟示。港股波動幅度大，發行商做多錯多，所以拉濶差價，根本唔想你買輪，同時發行商是淨買入，回購街貨較多，散家原本持有認購證不少見大市反彈便平倉，怕大市回吐，開新倉也是買認沽證多一點，也是博大市升得多會回，散戶睇得短，發行商睇得長，你同散戶做相反方向之事，成功機會較大。

　　自從大陸公布「資金自由行」之後，港股市底增強，唯一只餘外圍風險，美國股市久不久亦炒聯儲局減息的消息，部份網友生起不少疑問，就係個市好聯儲局才減息，為何減息係好消息？難道央行能醫百病，把任何衰退都搞番掂？

　　我經常講，美國是萬水之源，是全球資金供應的主要來源，如今全球資金泛濫，和美國關係至大，美國國民胡亂花錢購物，出口國就賺大錢，美國政府胡亂花錢打仗，石油出口國和軍火商亦大蒙其利。不過美國都幾古惑，胡亂使錢之後，除了狂印電腦軟件賺錢之外，還把垃圾級的次按包裝起來，貼上一個「AAA」的評級，賣給歐洲和亞洲，又把花出去的錢吸回來。美國濫花錢按理會造成全球通脤，但中國、印度、解禁的歐洲釋放出大量廉價的勞動力，它們可以用低價賣貨和賣服務給美國，把通脤壓力舒緩，這造成過住幾年高增長低通脤的好環境。

　　一個種金融產品出事，按理只應影響從事有關交易的人士和公司，但正如我在週一的頭條專欄所講，次按包裝出來的產品，由於欺騙性太大，吸引了好多穩陣投資者入市，亦透過對沖基金把問題幅射到銀行體系，所以次按危機爆煲，即時令銀行水乾，金融體系一缺水，再幅射成信心危機，一間銀行唔敢借錢俾人，問間都唔敢借，這就叫做信貸緊縮，股災通常由此而起。雖知金融市場經常存在欺詐，水乾時，欺詐行為就浮現出來，遮唔住，好似炸彈咁連環引爆。

　　這時央行的角色就十分重要，央行放水，流入銀行體系，水一多，搶錢的人減少，慢慢攬住錢唔放者都開始放心，放番錢出來，信心危機過去，市場就回復正常。只要次按危機不向外爆發，只係買次按者才中招，對環球股市的影響就有限。水多時，欺詐事情又會被遮蓋，唔會有咁多公司或基金爆煲。

　　早前市場最擔心聯儲局主席伯南克不願減息，大家都怕他新官上任太學院派，堅持要美國核心通脤降到２％以下，才可減息，若果他堅持如此，在次按爆到七彩時也不減息，通脤數字通常會滯後，到他看到１點幾％的通脤時，可能經濟已經開始衰退。危機不斷深化到不可挽回的地步，股市自然會爆煲，港股跌到１７０００點都未夠。

後來法國BNP旗下基金出事後，美國跟隨歐洲央行放水救市，但聯儲局當時放水是收取較貴利息，舒緩銀行資金緊張作用有限，關鍵要減息，聽金融猛人講，伯南克看到上周五港股和日股的跌勢（日股當日跌５％），怕市場崩潰，最後才決定臨時減銀行向聯儲局借錢的貼現率利息，消息一出，市場相信伯仔會救市，初步回復信心，可見股市升跌，有時還在關鍵人物一念之間。

　　次按的問題根源還在美國樓市，若聯儲局下一步在９月削減聯邦基金利率（銀行間拆借的利率），就會拖低按揭息率，一次唔得，減夠幾次，當可舒緩美國樓市的跌勢，約朿了次按爆鑊的速度，當次按是慢慢爆而不是急爆時，其衝擊可以較易被市場吸收掉，如買了次按的機構，分段撥備，就可以吸收了次按帶來的虧損，所以即使金融機構因次按受損的新聞仍時有所聞，但只要市場相信金融市場將無信貸緊縮，危機就可逐步過去。

後記：期指一開市就升７００幾點，好誇張，領先股好難追，小心高追中伏，但可吼領先行業內落後股，若距高位仍有一定跌幅者，可以尋吓寶，補些貨。




陸羽仁

---

作者: szeyuen77    時間: 2007-8-25 12:33 AM     標題: 險中求勝 (2007/8/24)

網友yuki問了一系問題，其中大部份本來都是我想講的入市時要思考的問題，可以綜合講講。

她問：「Luk Sir:The liquidity injection is up to USD172.5億 last night. Do you think the recent crisis is still very serious?

Do you think we can still take the strategy as before, i.e. buying non-leading stocks and holding them? The risk concerned is when great correction occurs, even they have not rebound yet, and they will also fall drastically with the market.

Seeing the small priced stock being active again. Do you think it is time to make short term strategy to speculate them?

Do you think being a 好友 in long term always win? When the market performs well, the central banks do nothing to prevent it being too hot, except the Chinese one. However, when there is serious downturn, the central banks use all measures to help build up the public’s confidence.

I do know the mechanism of straddle and strangle and under what circumstance investors should use it. However, I think there are implementation problems. The cost of using option or futures is too high. If use calls and puts, the effect would be affected on the choice of warrants. Sometimes, the issuers may quote the bid and ask price too wide, the premium may be too expensive to make the strategy not profitable. Can you further explain how to choose the suitable warrant to give a better return, apart from similar expiry date, the conversion price?

You give us an example some days again, i.e. 19800 put and 23400 call which is 1800 points from 21600. That means we need the HSI goes up or down more than 1800 to make it profitable. I am wondering why we don’t us small difference, say 1000 instead of 1800 to make the strategy more easily profitable?」（對不懂英文的朋友，我暫不翻譯，住下會逐一重覆問題）

網友如果是投資者（不是投機者），會被近日的股市嚇親，初時不信嗰市會升得咁快，繼而抱怨，再感無奈，最後會相信，但會怨句信得太遲，甚至衰起上來一開始信佢去入市，佢又回吐，即時中一棍。

投資者會比較遲疑，投機者會搶先，大市初定，炒作香港大市的大戶，便搶先入市，次次都係咁，你未睇定時，佢已把大市搶高，今次所不同的是他們手法更狼，目前已搶過上月期指結算時大市的水平（２２７００點），更令我懷疑佢地大量好倉主力未平倉，所以外圍局勢初定，佢立刻全面發難，根本唔俾淡友有任何機會反攻。

你問外圍大勢，仍在刧後穩定中，所以美國聯儲局仍在放水中，但大勢已趨穩，日本央行決定不加息，日圓一度跌番去１１７水平，套息交易又在日圓高位開倉（紐元現價０．７１７美仙左右，８．２５厘息，半年中期投資有吸引力），次按的問題本質其實好嚴重，商業票據市場目前仍然死咗，但在聯儲局發功放水下，應該又可以把問題冧住，等個鑊慢慢爆。大市當然有風險，目前去買，是險中求勝。

你問好友是否長勝，從一個三、五十年的角度，在一個增長中的經濟，做好友，買佢嗰股市整體向上，道理似乎啱。但從一個兩、三年投資的角度，雖然一跌央行就會干預，但資金泛濫到咁上下，資產泡沫吹到咁上下，就有一爆，那種爆法係央行都頂唔到，二０００年科網潮爆破，就是一例，你高位２８元買了電盈（０００８），現價撇除股份五合一的效應，１元都唔夠，你話好友一定贏，又唔係噃，當然要睇你乜位入，買乜股。

在次按危機和大陸資金自由行一好一淡消息影響下，兩個都係巨大的利好或利淡消息，我傾向睇好港股後市，認為要對港股、甚至香港整個投資市場再評價（我會在周一頭條日報專欄再論述）。

短期紅色指數股超買，高追有風險，但大把股票好落後，好多二、三線的股票，例如二、三線大陸地產股，若大市向好，它們還有好多水位。Yuki問追這種落後股，雖然升咗唔多，但若果再大跌時，會唔會都跌好多。我認為你首先要對大市中線（三到五個月）有個看法，若睇好，可以追；若睇淡，認為港股未跌完，當然唔好追。

至於雞股，道理亦一樣，雖然我唔會叫人買雞股，但若你有買開雞股，低位放咗，好多而家只是升番少少，未大郁，但如果大市向好，過兩三個月，莊家又會再炒過，所以也是睇大市，買唔買就要你自己判斷了。

另外有關馬鞍式窩輪的策略，下星期一再談。

陸羽仁

---

作者: szeyuen77    時間: 2007-8-28 12:37 AM     標題: 避險與爭勝 (2007/8/27)

　　美股道指上週五又升１４０幾點，港股今日有機會搶上高位，甚至挑戰２３５００點高位，不過升咗咁多，又近期指結算，如果買指數股，高追小心中伏。

　　散戶投資股票，通常只有一個目標：爭取勝利，投資前先問自己想贏多少多少，所以買股必問目標價，然後計吓由買入價到目標價，可以贏幾多，發覺有幾成潛在升幅，正！買之哉，等收錢。

　　散戶這種心態，等如你有兩隻眼，不過只用一隻眼來睇嘢，所以睇唔出層次感，立體感，只睇到平面，只睇到買股票的正面，即係贏錢的一面，睇不到股票的背面，即係輸錢的一面。

　　我今日寫這篇文，是從網友常在股的一個問題引起，佢講：『唔好理隻股會唔會最跌,合理就買.低又唔夠膽買,高又唔願沽.成日話長線投資,好股點解要止蝕.』

　　常在股這個問題，表面看十分合理，「好股無需止蝕」，而且要愈跌愈買，正正係股神巴菲特的名言，所以買了好股當然不用止蝕。

　但你有留意陸羽仁平日答網友的問題，好少提「好股無需止蝕」這種說法，網友Reactor答常在股的答案，已說出我的潛在憂慮，Reactor咁答：

「常在股：好股係可以唔便止蝕，但有三個先決條件:1. 真係識得分邊隻係好股。2. 你的好股係平價時入貨。3. 萬一好股的基本因素有變時，識得鬆人。」　

　　Reactor講的是標準答案，股神買股，首先佢識計數，知道什麼是好股，其次佢在好股價錢平時買，最後係佢買入「好股」後，發覺貨不對辦，識得走人。我擔心大部份散戶既不識得分什麼是好股，多數係聽人講，而且即使係咁啱搵到好股，都係在好多人講時、即係好熱門時買，你話邊會買到好價錢，貴買好股，亦不是安枕無憂。我有這麼多擔心，自然唔想答你話「好股無需止蝕」，甚至叫你愈平愈買，除了極少數極少數的例外，這些例外除了公司本身條件極好之外，還有極優良之管理，這一點紅色巨股仲有排學，你看中國銀行（３９８８）有近８００億港元的次按，在次按風暴中，竟然可以唔講，到公佈中期業績要披露時，亦只作出數目有限的撥備，就可以知道「管理」這一門學問，紅色巨企還在學習中。

再講番常在股的意見，佢講出咁o既意見，我估有個背景，港股最近最低跌到１９３８０點，然後奇蹟升番近４０００點，你揸住股票，就好像一瞬間經歷了地獄與天堂，在事過境遷之後，作一個事後孔明，回頭再看，有股票當然唔好咁笨去沽，其實更應該在低位大手買，一買完幾日就富貴，唔買就笨。

時光倒流到大跌市之日（８月１７日），這些說話就唔似而家咁易講，在風暴中的確幾高風險，當日開市２０７６１點計，我當時話那種市況升２０００點和跌２０００點的可能性都好大，結果當日最低就跌了１３７５點，至今就升了２１６０點，其波動性和當時預計好接近。

如果聯儲局主席伯南克當日無減貼現率，如果其後阿爺無出「北水自由行」政策，你估會點，即使有大戶炒作，到是炒高還是炒低，無人知，這些政策何時出台，都是在美國和中國官方機構高層人士的一念之間。我估若兩地政府無出手，若恒指還在２００００點上下浮沈（不要說它還再大跌），大家講的話題就不是「好股唔怕長揸」，而是「為何不早點止蝕」。

買股票不能只看賺錢的一面，要看兩面，要看可能輸錢的一面，要想方設法控制風險，否則無論你賺幾多都好，都好易俾人一Q清袋。市面上有好多股神遊戲，假如我參加這些遊戲，我就會嘢嘢賭到盡，賭輪賭雞股，有咁大賭咁大，博贏幾舖就變股神贏獎金，博唔到都無壞，反正係遊戲，輸咗唔入肉。但現實投資不是股神遊戲，你博贏幾舖，可能一舖輸突，控制風險，極其重要。


陸羽仁

---

作者: szeyuen77    時間: 2007-8-28 10:59 PM     標題: 避險與爭勝（２） (2007/8/28)

　　我在這裏寫文章，看的人數以萬計，從初入市的新仔，到入市３０、４０年的老雀都有，早前更有自稱９歲的小朋友話係網友，人人水平唔同，經驗唔同，自制力唔同，風險胃納唔同，要寫一篇文章啱哂所有人的程度，實在有好大困難。我有時講投資，有時寫炒作，有時有些好意念，的確忍唔住寫出來，但寫完就好後悔，或許可以從Top Gun的回應講起。

　　Top　Gun之前問過我一些馬鞍式期權的事，我前一日咁答佢：「期權唔啱新仔玩，你都係唔好學啦，千祈唔好同人講，話我教你炒期權，期權也好，窩輪也好，只宜好有經驗的炒家去玩。」我印象中Top Gun話過自己係新仔，我心諗都唔知呢個新仔幾多歲，思想成熟未，如果唔好彩教咗佢炒，佢有事唔識得走，咁咪好大鑊，所以就咁答。

　　後來Top Gun再回應。佢話：「陸Sir :原本好期待你嘅回覆，但今朝睇完好唔開心，唔知係咪自己問嘅問題好蠢，啲概念攪錯哂，所以你都費事再詳細解釋，只係話 : “期權唔啱新仔玩，你都係唔好學啦，千祈唔好同人講，話我教你炒期權，期權也好，窩輪也好，只宜好有經驗的炒家去玩”。我都唔知自己問錯乜嘢令你下如此結論? 明明之前仲聽你講平左先前嘅鞍輪並重新買入組合，舊組合嬴左錢，新組合暫時亦只係平手，但你又突然叫我唔好玩喇…….

初時唔諗住再問你嘢住，自己檢討下先，但係你嘅回覆不斷在我腦海裡，老實講對我信心打擊真係好大，我實在瞓唔著，唯有起身開機，寫下嘢，抒發一下，如有得罪，請多包函。

無錯我知你出發點係好，見我呢個新仔不自量力，唔想我撞大板，但係我真係好比心機去學，呢8個月我睇左二十幾本書，每日由朝到晚都係股票，努力去揾啱自己嘅方向。我三十幾歲人，做木材做左十幾年，高峯時做到部門經理，其后公司結業，就自己開公司做，做左幾年，但從去年開始供應短缺，今年連貨都無，根本無生意做。木材行業式微，揾其它工又高不成，低不就。攞住十零萬，但每个月要供樓要生活，希望盡自己能力，可以在股市殺出一條血路。呢8个月輸過嬴過，各种唔同嘅方式都試下，唔明就睇書，而家主要都係用技術分析炒細價股及窩輪，嚴守止蝕，但呢條血路點殺出來好呢?



P.S : 我原先叫做fisherman8850無出息的漢子」

　　一切都從８月１７日轉角市早上我寫的一篇叫「避險與博矇」的文章開始。我講講當時寫文章的心態，早一日８月１６日恒指收２０６７２點，走勢極差，外圍亦極波動，那日看來都係大跌市的日子，但大市跌到那些水平，再跌一些，當時估會試穿２００００點，從高位回落３５００點，應該跌到夠，是趁低吸納的時候。不過若外圍再出大事，股市若再穿位，就可能是一日跌２０００、３０００點的股災了。散戶只買升或跌，我從來都知道可以炒波動，所以忍唔住在篇文提到，好炒作者可以買馬靶式組合，炒吓大波幅。

　　寫完篇文好快就後悔，第一唔想教人炒作，怕將你地由綿羊變成老鼠，怕你地唔夠精乖，最後變埋死老鼠。跟著見到網友阿K話佢掛咗成日牌都買唔到，結果單邊買咗Put輪，我心諗個市單日轉向，從低位升咗成１０００點上來，點解仲變咗揸單邊Put？如果佢初次做老鼠，仲係我教o既，揸住put輪唔識走，我就罪過甚大。更明白有些我以為好簡單的事情，你們無經驗去做，好易中招。

　　不過事後回看，若那天買了一個馬鞍式窩輪組合，揸到今天，的確可以賺錢，我睇番那日的窩輪價位，假設買了２１０００點的價外認購輪，同時買了１９２００點的價外認沽輪，認購輪０．１元變了０．３元，認沽輪由０．１３元跌到得番０．０２４元，一加一減，仍有收穫。我當日判斷若果股市最後無大事，可能等２個月，大市會上番２３０００點，亦想不到大市可以顛到即月創新高。

　（再再再警告：買馬靶式組合都係投機行為，只適合在大波動市，若市況轉靜，在你買的上下幅度中間牛皮，最後結算時不到上下位，你的投資就會輸清，不想做老鼠的人不要去做，去做者也量力而為，小注怡情，下那一注時，想清楚這一注輸清都唔後悔，才好下注）

　　回頭再講我為何這樣答Top Gun，大市仍在發顛中，大上大落，可能延續至９月初段，之後會慢慢平靜下來，既然大市走向平靜，若買入馬鞍式組合，在轉趨平靜的市道唔識食糊或止蝕，好易輸清，所以我開始要提示風險，特別因為Top Gun改過名，我不知他是曾經買馬鞍式組合賺過錢的fisherman8850，所以更加唔鼓勵佢去試。

　　不過看完Top Gun的留言，我仍然建議他要慎作投資。我經常講，炒股考EQ多過IQ，當人人講「爭勝」時，成功者要識得「避險」，唔同人有不同心智與條件，但你正識不利，想在股市博番，難免失諸浮燥，冒進有餘，小心不足，有句老話叫「財不入急門」，就是講這種心理狀態，愈心急想贏，愈可能輸，你炒股搵錢供樓開飯，有礙炒股時泠靜從事，有時好衰，偏偏係用多餘錢炒股、氣定神閒之人，愈能抽離，愈易贏錢。Top Gun要自己考慮自己的處境，你炒不炒，怎樣炒，只能自己決定了。

　　補答Top Gun當日問的問題，你問在跌市時我曾經講過上下３５００點，向上望２５２００點，向下望１８２００點，為何幅度咁大，同時以現價計，向上２５００點（他在上周六問，以昨日價計只有１６００點）向下有４５００點（以昨價計５４００點）？

　　Top Gun你的觀念有少少錯誤，用一種固定的觀念看股市。股市係死o既，人係生o既，不是我早幾個星期咁講，而家又係咁，我講的時候無北水自由行，大市亦未穩定，若好似你問的方向，應該單邊買Put，但現實中我就唔建議你咁做，股市跌定了，向上的走勢大過向下，波幅會慢慢收窄。想做馬靶式窩輪，要在當下判斷後市短期內會否大波動，不是以幾星期前的判斷來看今天的市況。你問我，我看今天的市況，我就估國指仍會有大波動，可以升得太急回得也急，但未來中線也可以再大幅炒上，國指波幅，好有機會大過恒指也。

陸羽仁

---

作者: szeyuen77    時間: 2007-8-29 09:02 PM     標題: 避險與爭勝（３） (2007/8/29)

　　過去兩日港股炒到顛狂，昨天國企首先上演高位回落的高追殺人事件，陸羽仁見未到結算就破哂新高，一直好擔心期指結算前有事，結果昨晚美股道指大跌２８０點，跌２．１％，將過去一星美股期的升幅掃清，日股開市跌近４００點，看來港股臨結算又要殺一殺好倉了。

　　有時環球金融市場都好「妙」，衰起上來一齊衰，除了美股大跌外，日圓又升上１１４日圓的水平，都成為利淡因素。美股昨日一跌，主要是因為美林降低花旗、雷曼、貝爾斯登等金融機構的評級，話次按會影響他們的盈利咁話，評級由買入降到中性。次按會大幅影響美國金融巨企的盈利，似乎唔係新聞，陸羽仁上個星期在報紙專欄已不斷講，唔係話自己叻，只係想話美國市場後知後覺到這個地步，的確實惹人懷疑，而且美林一個報告，無甚新觀點，唔知點解可以有咁大影響。另外又話聯儲局８月７日的議息會議紀錄顯示，儲局不相信通脤放緩，問題是這並非８月１６日臨時減息會議的紀錄，參考價值亦成疑。

　　千祈唔好以為陸羽仁係好友，所以唔信壞消息，我只係唔信表面解釋跌市的原因，在亞洲市場臨近結算時，美國大行放出壞消息，美股帶頭大插，可以估到亞洲幾大市場日本、香港、新加坡都會跟跌，若有大戶在這些市場高位沽了貨，呢個月結算咪可以先收割囉！

　　我成日話，大戶係唔會輸錢o既，意思唔係話佢地無失利的時候，而係話佢失利時好快就會在散戶身上搵番錢追番。如果本月中次按危機爆得咁深非他們所願，不受他們控制，令他們受損的話，跟手一下就推上創新高的位置，恐怕就是他們控制的結果了。

　　期指明日結算，如今的市道是任佢舞，你都記得我在上週初風暴初定時已講過，睇盤路貨源盡入強手，後市由他們話事。

　　我對一星期內大市的估計，維持早兩日的看法，估計會在２２０００點至２３５００點中間遊走（你信六成好啦），事實上短期收市高位是前日（８月２７日）的２３５７７點，微穿了２３５００點，昨日（８月２８日）日中造過２３７５０點的新高，但只是曇花一現，收市已回到２３３６３點的低位，今日就要插一插了。

　　網友Top Gun講到想做全職炒家，我心中唔太讚成，並非因為Top Gun自已的問題，我見佢講嘢有紋有路，睇書都睇出一點心得。我睇淡這個「全職炒股」行業，主要係對手問題，散戶的對手實在係太強啦，全世界最最最聰明的人，就在金融業，他們就是金融業鉅子。

有人講個笑話，話政治家最聰明，因為他們唔使做嘢，講吓嘢吹吓水，已經享盡榮華富貴。不過金融家更聰明，因為他們控制政治家，他們控制一切。

　　你跳落去全職炒股，不知不覺間就同全世界最聰明的人鬥法，好多人炒股先睇股市走勢，陸羽仁炒股先看對手，要知道自己跟誰對賭，他們想造什麼走勢。如果你炒大市，就係跟全世界最聰明的人在對賭，未賭先輸一大半。

　　我不妨告大家一點經驗，炒股有時中，有時唔中，當你炒得中時，初則自鳴得意，再中得深啲，照鏡都想笑，再再中得深的，覺得自己簡直係股神，心中對自己講一個字：「勁」。

　　不過按我o既經驗，當你中得咁緊要時，好易又走到反面，轉眼又把你的利潤吃掉一大半，我稱之為「打荷包」，未試過勁中的朋友，不知這種感覺，已得之物，又從你手上搶走，其激氣可想而知。所以每當我勁中之時，覺得自己「簡直係股神」時，我就會提醒自己，要投資自己的錯誤，買一買相反的東西，或者做做保險，結果發現投資自己的錯誤，屢有收獲。開始問自己，點解次次都係咁，結果就發現市場裏有「大阿哥」，佢主宰一切，專吃散戶，你全職同佢炒，好難贏，唯有炒股作娛樂，小注怡情，輸光唔緊要，咁就識得逃避風險，反而較易「鱷口偷金」。

陸羽仁

---

作者: szeyuen77    時間: 2007-8-30 11:11 PM     標題: 避險與爭勝（４） (2007/8/30)

美股認真搞鬼，前晚大跌２８０點，昨晚又大升番２４７點，差不多等如之前無跌過，只係玩咗一日啫。昨晚美股大升的原因係市場對９月減息的期望上升，睇落都好鬼搞笑，早一日美國市場用一個聯儲局舊議息紀錄（即並非臨時減息那次的會議紀錄）話儲局要員認擔心通脹，如今又話減息預期增加，而且早一日因為美林降低金融機構評級的憂慮，又唔知點解突然一掃而空，講好聽啲可以話美國市場人心脆弱，講唔好聽啲就係俾大戶玩哂。

美股早一日大跌，帶動港股急回，昨日一度跌到２２６８６點，比前收市價２３３６３點，跌了６７７點，比上一日造出的高位２３７５０點，更跌了１０６４點，波幅很大，按我講有波幅就有人賺錢的道理（大戶經常賺波幅，而不是賺方向），昨日又有人搵水了。昨日由最多跌６７７點，到最後只跌３４３點，當中有好大購買力買番上來，有人話好淡爭持，亦有人話神又係佢鬼又係佢，我覺得後者亦有可能，大市市底強，都唔等到結算日，大戶可以早兩日高位沽了貨，昨日低位時平倉兼開下月好倉，低價開倉都幾爽。記住大戶成個亞洲都係咁做，你睇起上來好似全世界都係咁，好合理，唯一的漏洞是點解次次都係近期指結算才來個大波動呢?

　　我話大戶犀利，炒股難玩，惹起網友回應，Miumiu咁講：

「我好敬重陸sir, 但我想就你對Top Gun回應, 講一個全職炒家的故事.。我學習投資只有兩,三年時間. 我曾幫一些專家(不是財經界)工作. 好不幸, 有d所謂專家(當然唔係全部) , 其實都係濫竽充數, 大話滿天飛(所以我唔會盲目信專家講既野). 於是, 我諗, 如果將自已的前途交在這些人的手裡, 等於自殺. 加上, 遇過金融風暴, 於是, 我決定命運要掌握自己手, 而去學投資(唔係炒家, 但陰差陽錯成咗半個炒家.).

我身邊所有的人都話投資=賭博, 一定輸. 總揾一百個理由話千祈唔好學, 不勞而獲, 絕對不應沾手. 我的看法是你不學投資, 不等於你不會有財務危機, '負資產'的故事, 大家都聽好多吧! 真的是全香港人都炒樓嗎? 相反, 我認為應該積極去面對.

亦有好多人話, 做炒家賺錢係唔可能, 不要試!
但我認為做人唔應該抱著咁既心態, 相反, 我會想辦法去克服困難. 事實有不少人做得到, '唔得, 做不到'只係無能的借口.

結果呢? 由於學懂理財及投資(但不是炒買), 令我由負資產到擁有數百萬. 有人話, 我無經歷過股災, 其實我的測市方法, 在過去3次大跌, 都預測得到當日會大跌, 跌幅接近一千點. 而最近一次大跌, 我亦高位買put, 低位買貨. 雖然, 我唔知將來會唔會high野, 但我相信透過風險管理及資金運用, 投資不一定係輸的。所以, 世上無難事, 只盼有心人.
Top Gun 加油吧!」

Miumiu有少少把投資和投機撈亂咗，佢的經驗似乎話學好投資回報好大，此點我絕對同意，這也是我寫網誌講投資的主因。但你話投機容易，我就認真唔同意，即使有人撲出來話佢自己投機好幾好，我都只會回應一句「孤證不立」。好似話吸煙危害健康，你就話唔係呀，鄧小平當年吸煙吸到煙接煙，咪又可以活到八十幾歲！我的回應是凡事必有例外，正如話十賭九輸，你就係嗰個第十個，跟住話賭錢好好一樣，我都唔會同意。

　　散戶投機，手法如同賭博，一般沒有避險心態，個勢順時贏到笑，個勢唔順時一Q清袋，在大升市中，賭三年贏三年，但第四年來一個大跌市，就會連本金都輸埋，賭得大，仲會欠人一身債。你攞１０萬去賭，手風順時可能賭賭吓變２０萬、４０萬，你就會心好雄，賭好大，愈有錢愈易借錢，借到突去賭，無避險之心，難逃最後一跌。

　　MiuMiu兩三年股齡，這幾年都係波動向上的大升市，高沽低揸，自然感覺良好，但唔怕得罪講句，你都未見過股災，未經過大考驗，未試過你啲工夫仔得唔得，捱得過股災，先好講自己識投資投機。

　　好似８月１７日恒指跌到１９３８６點那天，確實有點災味，那種跌市由全球經濟核心美國開始，弄不好可以跌出一天暴挫３０００點、４０００點的巨災，你唔好話唔兇險。一般人見跌市去撈，又或者跌穿２５０天線就入市，博命揸，今天回想，在８月１７日低位撈貨自然係叻仔，但如果跌出股災又會點結局呢？

　　我有個老友，在８月１７日最低位入市，揸１０張恒指價外認購期權，同時揸５張價外的認沽期權，呢種人就識炒啦，第一，佢預咗買呢１５張期權的錢會輸清，擺明係賭，作了充足的心理準備，第二，大市最後大升，佢固然賺到笑，股市若跌出股災，佢一樣大賺，雖然佢當日傾向睇好，亦買埋自己睇錯那一邊，你估買股實睇得準o架！（再再再三警告，我唔係叫大家學炒期權，只係想用此例子說明，腦有兩邊，唔好只用一邊腦諗嘢）

　　遠的股災不說，光說９７年亞洲金融風暴，恒指由近１７０００點，跌到５８００點，如果不是政府入市，跌到４０００點都有之，成份股市值跌到４分１都唔夠，投資者都要死。

　　千祈唔好以為我話有股災，叫你唔買，誰知道股災那天來，或者兩三年後才到，股市已經炒了１０轉８轉，現時大市有勢向上，總之睇住自己枱戲，控制住風險，每天可以投資，每天可以炒股，我只係想講，全職炒股壓力太大，不易成功，當然亦會有人成功，但卻要有超凡的努力，好高EQ，才有機會到岸。


陸羽仁

---

作者: szeyuen77    時間: 2007-9-1 12:43 AM     標題: 避險與爭勝（５） (2007/8/31)

　　陸羽仁這幾篇文章的題目是「避險與爭勝」，散戶經常講的問題是「爭勝」，講自己炒股贏幾多幾多錢，完全無提「避險」，一遇風浪，就中重鎚。我記得幾個月前都有不少網友留言，話自己阿媽大炒雞股，賺幾多幾多錢，提起都好無癮，如今雞股暫時瞓直，買了雞股走唔切的阿媽，如今當然無咁風光。大家要記得，今次恒指由上浪高位２３５００點跌下來，只跌了４１００點，跌幅１７％，都係好濕碎，試想吓若有一個大跌３０％、４０％的跌浪出現時，就完全唔係這回事，不會跌完一個月唔夠就升，隨時跌完一靜靜幾年，亂炒唔識死的股民，結局會好慘。

　　炒股至緊要「最後」可以贏錢，這個所謂「最後」，不是人生的最後，而是經歷股災之後，要求最後贏錢，唔係曾經擁有。

　　舉一個例，人人都睇過亞洲電視，佢最近三十年都換過唔少老闆，你話邊個老闆最得？我就話係邱德根，好多人甚至唔記得老邱曾是亞視老闆，據說呢三十年，亞視咁多個老闆，只有佢一個人賺過一、兩年錢，其他人完全係長蝕，而老邱之所以能賺錢，主要是一個慳字，好多人彈佢孤寒，但不幸地，只有這個孤寒老闆能賺錢，亦可見呢行生意難做。其他老闆都係掟錢燒一燒煙花，結果頂唔順求去。

　　炒股亦係咁，要經常賺錢，最後賺錢，不是曾經風光。股場要曾經擁有，話都無咁易，只是順住勢炒，低吸而不高追，要賺錢唔太難，而家興炒北水自由行，你就等佢回一回時，揀隻無升咁多o既股票，買落去等吓，不難有收穫，問題是你最後走唔走得到。好多朋友喜愛問冧巴，叫投資專家俾冧巴佢，我唔太喜歡講冧巴，因為唔知你攞咗個冧巴點用，明明係炒，跌落嚟要止蝕，或者曾經升過急跌時要止賺，你跌落嚟唔止蝕止賺，黃金冧巴都死。

　　炒股一陰一陽，陽的一面，順勢炒作，唔算太難，咁都唔識只是幼稚園生。陰的一面，迴避風險，非常困難，難在要迴避風險同時有高回報，做得好就大學畢業。就以８月的市況為例，假設有個股民７月在２３５００點高位入了貨，跌下來郁都唔郁，結果嗰市坐完過山車上番去，佢一碌木咁，唔駛輸，結果仲可以好威咁同人講，你睇你睇，炒股要鎮定，淡定有錢剩，夠鎮定就可以贏大錢。

陸羽仁就話，呢種人遲早輸死佢，若果你啲股票低價回來，想做長線投資者，見到跌市唔走，都算合理，但高價買股跌市應該先止蝕，等到個市略定就鬥快買番（若果未跌定可能要再止蝕），手揸貴貨咁樣渡過波動浪，才是既避險又爭勝的手法。咁樣一止蝕又追入，隨時唔見一、兩成的水位，這就是你避險的機會成本，俾完這些避險成本還可以贏錢，甚至贏大錢的人，才算是真高手。結果真高手今年到如今的回報，可能只得２成，上述的「一碌木」，回報有４成，不能單以一時一刻的結果論輸贏。既然避險成本高，捱得過風浪，高手就會坐貨，博有更大回報，唔會升少少就沽。

買股票最簡單的避險方式，就是投資不投機，學股神巴菲特，平價買好股。不過正如我今日在頭條日報專欄所講，開放北水自由行後，香港股市會更大陸化，炒得更顛，波動更大，香港人要習慣買貴股的日子，你唔想買貴股，可能無乜得揀。或者那些好股係郁得好慢好慢的股票，你見人哋買股票日日升，你買隻股好似隻龜咁樣，非常另類，常人遇到咁o既情況，唔易頂得順。

要投機，都有好多方式避險，大基金會採用分散投資的方式，只要你將組合主要部份買了些好穩陣的股票，其餘才去炒，就可以降低風險（當然也會降低回報）。

　　買炒股，無論係紅色股或雞股，要迴避風險，除了嚴守止蝕外，高位沽部份貨取回成本，係避險的基本手法，你而家買隻雞股，每股１角，等佢升到２角時，你沽一半，取回成本，往後跌到零都唔關你事，在喪升時把部份錢抽走，就是避險的基本方法。

　　所有避險行為，例如止蝕，例如高位部份減持，都要增加你的成本，或者令你賺少咗，但這是保命絕招，可以令你長玩長有。我們站在股市巨變的前沿，怕風險，唔敢買，三幾個月後，你可能會覺得錯過很多；唔識死，瞓身買，不避險，三幾年後，你可能發現自己已一無所有。記往，股市是巨大的財富轉移機器，幾百年不斷運轉，不斷把弱者手上的財富，轉到強者手裏，所以貧者愈貧，富者愈富。




陸羽仁

---

作者: szeyuen77    時間: 2007-9-3 11:24 PM     標題: 避險與爭勝（６） (2007/9/3)

  　美國連總統都走出來救樓市，證明咗老美o既樓市好大鑊，不過短期內救市有刺激股市之效，係股市的好消息，這個消息公布後，已消除了市場擔心美國政府和聯儲局遇上危機唔識反應的憂慮，減低了港股短期內面對美市崩潰的危機。

　　講咗咁多好嘢，要大家留心「好消息盡出」這個問題，陸羽仁星期五收市後和中環茶友傾偈，大家都認為薯仔總統救市是好事，但大家也同意港股由上月期指結算前一日的低位２２６８６點升到上週五收市的２３９８４點，已升了１２９８點，唔係唔可以再升，但這只是月頭，日日咁升４００點、５００點，到月尾豈不是要升到２７０００點，當然無咁誇啦，所以升到咁上下會抖吓氣，回吓絕對唔奇。

　　再講「避險與爭勝」的話題，網友提了好多有意思的問題，例如Sisi就話，她自從2005年開始買賣股票，自問EQ不高，因此是用多餘錢來買賣一些穩陣的股票，其實原本是想作為長線投資的，可惜最後都是受不了賺錢的誘惑，多數沽出獲利變成投機買賣。

　　另一網友twohitsix就咁講：「我自己八月本來只係有些少損失,但由於EQ不足,輸左的想快D追番,結果就賭方向,仲要賭大左兼輸埋. 今年頭七個月我賺六成, 而家要拿番哂出來.變番同年頭一樣．．．．． 我成日一輸多左,心急,就又做錯事輸更多.有咩方法可以減少或避免?」

Sisi和twohitsix的情況表面看完全不同，Sisi較長線，但買了股票一升就好心急賣掉，投資變投機；Twohitsix炒作味濃一點，贏得唔輸得，一輸就做錯事。但兩者都充斥著散戶最流行的心理，根源在一種想「高沽低揸賺到盡」的心態，盲信自己的眼光。

陸羽仁唔信自己的眼光，只相信大戶的眼光，靠觀察大戶和散戶的互動，猜度大戶炒作的方向，雖然模模糊糊，甚至發現有時大戶也控制不了，或者不同大戶有時會打架，但大體上觀察大戶行為，總比自己「睇市」好。原因好簡單，因為在投機的市場上，大戶永遠和散戶在對賭，大戶會做出各種股市「行情」來迷惑散戶。

有人話去澳門啲細賭場賭錢，埋枱觀察吓那邊注碼大，跟著細細注買注碼細的一邊，贏面會大啲，因為賭場有方法專殺有大錢那一邊。賭場係唔係有機關我唔知，股市就真係有機關，大戶永遠睇住散戶啲注碼落注。

我咁講究竟同Sisi及Twohitsix的問題有何關係？關係在於外資大戶這幾年借住全球資金泛濫和大陸把大量優質國企放到香港上市之勢，大力炒作港股，造出一個大波動向上的股市，一級一級咁將氣球吹大，直至最後的爆破。所以股市升到咁上下會大幅調整，但調整完好快又無事，早前的高位就變成後市的支持位，一級級推上，今年年初高位是２１０００點，後來變成支持位（上月「意外」穿破，不過在當天已差不多復元），接著上浪高位２３０００點，又會變成支持位，繼續往上推。

在這個吹氣球的遊戲中，股票很快就穿越基本價值，所以散戶如Sisi即使不是想炒作，到某個價位判斷股價已過高，例如２５元的國壽（２６２８）已經太貴，將之沽出，好快就後悔。氣球吹得愈大，已沽貨的投資者愈揼心。

在這個大波動向上的市況中，股市的短期調整細浪，專殺散戶，例如８月一跌，即使初時不是大戶導演出來，但跌到咁上下大戶定一定神，睇吓自己個倉，如果仍是好倉底，佢不會炒上，反而可能先大力插低，破哂所有位，震走哂所有散戶，食哂你啲好倉，他們才輕鬆造上，跌到你唔信，升亦升到你唔信，到你信o既時候，佢又會再震你一震。

所以Twohitsix你搭啱大戶之車時，自己就變股神，有時佢靜雞落咗車行咗對頭線開車你都唔知，佢就壓到你變柿餅，人總係信自己，早兩日還自覺係股神，逆勢剛開始到時，自然無咁快認自己係股蟻，普通人多數會選擇不相信，甚至朝自己原本投注的方向加注溝淡，咁就死得好快，要擇選逆勢時即時轉軚否定自己，要好高EQ才可以做到。

陸羽仁面對咁強的對手，常懷謙恭之心，首先唔信自己對經濟的基本分析，以及對股票基本價值的判斷（若果信基本價值，在２１０００點以上都好難揀到好嘢買，唔係無，係好少，可以離場唔買股）。作為投資者，知道這一趟車的大方向，直至大方向改變之前，基本唔落車，通常大崩潰有大崩潰的樣子，見到苖頭先至走；當然亦可以高位減持，但不用清倉。作為投機者，就要坐順風車，比普通散戶走前半步，佢未睇好時你睇好，到佢睇到好好時你就避一避，我經常咁講，散戶打唔低大戶，散戶只可以打低散戶，你和一般散戶的想法做法完全一致，你都做梗太平山下的老襯了。

炒股者以後每當發覺自己係股神，贏好多錢時，肯定那時已是災難的前夕，你唔係股神，大戶才是股神，所以覺得自己係股神時，一係減啲貨，一係抽番五分一資金出來做相反方向，你原本做開好就轉少少錢做淡，做開淡就轉少少錢做好，唔駛等兩個月，多數有收穫，投資少少錢去估自己睇錯，就是避險最好的方法。


陸羽仁

---

作者: szeyuen77    時間: 2007-9-4 11:31 PM     標題: 避險與爭勝（７） (2007/9/4)

　　股市常變，昨天還是你的朋友，今天就變成你的敵人，大部份人炒股長線輸錢（投資例外），就是因為他們並不明白這個敵人的性質，還以為自己很了解它。

　　陸羽仁說話誇張，其實只是一種語言技巧，或者可以說是語不驚人死不休吧，例如昨天話「面對咁強的對手，常懷謙恭之心，首先唔信自己對經濟的基本分析，以及對股票基本價值的判斷」、「若果信基本價值，在２１０００點以上都好難揀到好嘢買，唔係無，係好少，可以離場唔買股」，

但陸羽仁講了這些誇張的話，卻搞到網友不明所以，網友水滴石穿話「陸老師今天說“唔信自己對股票基本價值的判斷”，我就迷惑了。」

這些話原本的意思只是想告訴大家現時大市，炒味轉濃，慢慢偏離基本價值，容易炒股，好難投資。嚴格一點說，價值投資者２１０００點樓上都不一定要離場，但要揀到好股就很困難，你看股神巴菲特近年手持大筆現金，好少買嘢，最近跌市才揀番少少貨，就知環球股市平貨不多。我話「不信自己對經濟的基本分析」，其實意思並非真係「不信」，只是要懷疑，第一懷疑分析可能錯，第二要懷疑即使分析啱，例如估計經濟走勢不利，但股市中短線未必跟這個經濟大勢走，可能會走相反，例如美國次按好大鑊，假設聯儲局減息，股市可能會升，但美國樓市若不可救藥，可能明年又再爆煲。所以請網友們對陸羽仁誇張的話，放在整個段落結構中去理解。

再講番「避險與爭勝」這個話題，有些散戶過勇，遇到危險唔識走，亦有些散戶過份小心，未遇到危險就走先，除了人性的貪婪與恐懼之外，還有一些錯誤觀念，影響了投資方法。

散戶除了經常問冧巴之外，最喜歡問目標價，背後的心態，就係想高沽低揸，當散戶知道目標價後，就如學生考試偷睇到答案一樣，用目標價去計算現價買入可以獲利多少。

我就話目標價全無意義，舉一個例，你係我老友，在中移動（０９４１）跌到８０元時想入貨，問我目標價幾多，我話若果你唔怕股價再跌，可以買吓，目標價９０元左右吧。你計一計，有１２．５％潛在升幅，可以入貨，結果真係如有神助，買完捱咗三幾日，就開始升，升到９０元，就到價，結果沽之，沽完見佢升到１０４元，當然後悔啦，心中會想「這個傻佬啲目標價都唔準o既」。

呢個老友就唔明白答你o既人的心態，講股份建議的人，首先唔想自己錯，講一隻股份的目標價，達唔到就係錯，過籠唔算錯，所以講目標價通常會講得保守一點，確保自己唔錯。

另外一點更重要，一隻股的合理價錢，和它現實的價錢，通常會有好大偏差，你當然可以睇股票的基本價值來決定買唔買，但現在的股市好多股買唔落手，又可以舉中移動做例子，在大跌市８月１７日早上，我係咁寫中移動，「中移動出完業績，你估佢全年每股可賺４元，２０倍PE可值８０元，理論上現價可吸，唔係要沽。但你要問兩個問題，第一要問目標股份投資收益多不多（是不是靠炒A股有此盈利），第二是假設衰起上來股市再大跌，高增長好股也只值１５倍PE，不排除佢可以跌到６０元，若你仍然話頂得順，想長揸，就可以分段小注買吓，如果覺得頂唔順，就唔好買啦。」

結果在大跌市當日，中移動最低跌過７５．６元，即使佢今天升到１０４元，我從一個價值投資者的角度看，看法仍然無變，７０幾、８０元的中移動，價錢OK啦，可以買吓，但並非超筍價，跌到７０元買會安全少少，雖然此浪無見這個價。大市炒向上，中移動是重要指數股，加上北水自由行，中移動特別啱炒，所以股價越炒越高，從一個價值投資角度，覺得９０元的中移動經已「到價」，但你沽了貨仍會後悔，因為大市炒上，中移動要偏離基本價值，不合理的可以更不合理。

去番我的基本命題，散戶攞個目標價，想低揸高沽，最好一買就升，一沽就跌，沽完都唔想隻股有好日子，世界有無咁理想呢？更有甚者還想捕捉股票每一個升跌浪，升到咁上下就游吓水，低位再撈番，炒波幅股可以咁，但若果真係買中好股，游游吓好容易游走咗。所以唔好期望自己可以買到最平價，沽到最高價，真正對應方法是這樣，首先分清自己是投資的我還是投機的我，若是投資的我，方法是「絕少買賣」，盡量減少出入市，死揸，不到個別股票的基本因素或大市有重大改變時，不會離場，盡量捱過波動（那些波動有時是人造波浪），就會有大收穫。

若是投機的我，方法是「順勢而炒」，唔使太信目標價位，亦唔好混雜太多基本分析，否則明明炒緊股會當自己係投資，例如估計公司會公布好業績，就應該偷步炒，而唔係見到好業績才入市，見到好業績入市是價值投資者做的，炒家不會做。投機的我要判斷大戶倉位基本方向，搭一兩轉順風車，食夠高位減持一部份，或者定止賺位，到位走人，唔好太貪，否則小心偷金不成，最後成為大鱷點心。

陸羽仁

---

作者: szeyuen77    時間: 2007-9-5 11:24 PM     標題: 避險與爭勝（８）(2007/9/5)

美股道指又升９１點，港股開市似會抽一抽，近幾日港股升起上來無乜力，網友唔係好明，其實月頭大戶不發功，所以股市游緊自由式，有北水買吓咪升的，美股好又升吓，不過你見到４００點、５００點的升市，就是大戶發力的日子，他一發力，又會觸發更多市場的盤路跟風入市，反方向亦然。

有網友轉貼內地報章《第一財經》講中國鋁業（２６００）挾淡倉事件，和估計的情況相近，中鋁一隻市值８００幾億的股票，在８月２７日可以一日升３２％，８月２８日又一度再升２３％，簡直係挾倉挾到阿媽都唔認得，所有淡倉都要計數投降，報道講的勝方之一是一個係私募基金，我估輸錢的應該是對沖基金，多數係一個鬼打鬼的局面。一直有一批對沖基金覺得紅色股太貴，不同基金在沽空不同的H股，今次他們借貨沽空中鋁，俾人數到貨，可能本來也是幾大基金揸重貨，見到不斷有人來借貨沽空，幾個夾一夾數，就知道借咗幾多貨出街，仲有幾多可以沽貨，等對方沽得七七八八，數清可以再沽的街貨不多時，就借北水自由行的利好消息，幾家大戶一起全力掃上，兩日升５０％以上，任何唔想跳樓的對手都要投降了。

事後看中鋁挾倉事件，可以當故仔咁睇，但也可以作為一個個案，研究投資的我或投機的我如何應對這種局面。

股市惡毒兇險，高手過招，你走埋去玩，好易被他們的劍風掃兩掃都掃死。散戶見中鋁係咁狂升，第一個問題係好唔好去追貨，事後看來，你唔知背景，貿貿然去追貨，風險真係高得好緊要。

其實可以從不同角度睇這個題，首先要看你是投機者還是投資者，同時要看你手上有貨還是無貨。先假設你當時無貨，究竟好唔好買貨呢？投資者當然諗都唔應該諗，記得在８月２７日急升後，陸羽仁在頭條日報專欄提到中鋁，話一日升３２％的股份，任何有理性的長線投資者如退休基金，互惠基金都不會買貨。換了投機者的角度，有句話叫「寧買當頭起」，這不正正是要搶貨的時候嗎？不過即使是投機，除非係睇幾個價位就走人的極短線投機者，否則見到咁o既喪升股都好難掂，一兩日升咗咁多，再升水位有限，挾倉味咁濃，正路挾完倉會回，短線炒作的風險都極高，炒唔過。

假設你有貨在手，咁又沽唔沽好呢？同樣要分投資者或投機者，從一個投資者的角度，雖然升得誇張，明顯透支了一段時期的升幅，但忍得的話最好還是不沽，你不明白佢o既升因，或許不是挾倉，而是有真實的利好因素，當時無法判斷，如果貪快錢沽了，或許中鋁真是見了短期高位，但誰知道三個月後的事呢？貨源集中咗，或者佢下一浪更高呢，浪頂好難估，除非你見到市場或個股有重大改變，否則笨笨地揸吓更好。我見好多叻仔叻女揸住A50基金（２８２３）游水，游游吓隻股游咗出大西洋，唔理你，所以長線投資者要盡量減少出入，即使見自己的股票現價升到唔合理的水平，都可以變得更唔合理，要持有到盡量長的時間。順帶澄清一點，我話要大家習慣大陸式的４０倍、５０倍市盈率的貴股，並唔係話叫你去買，買唔買你自己諗，但若你選擇去買這些貴股，只能當作投機，萬勿當作投資。

若果係持貨的投機者當時見到中鋁狂升又應該點做呢？策略和投資者完全不同，投機者應該沽貨，可以高位分段減持，見狂升又沽一半，再狂升再沽一半；又或者沽貨至取回成本，有剩才揸長啲睇吓；亦可以定止賺位，跌到止賺位清貨。投機講週轉，唔係鬥命長，同一筆資金，一個月賺１０％，好過一年賺５０％，投機資金有水位就要食，唔食哂都食一部份，錯過獲利機會，鎖死資金，機會成本好大。而且投機好多是係高買高賣，只能食一段，短炒買得平，都可以睇長少少，愈買得貴，防守的空間有限，就愈加要走得快。

　睇完上面的分析，就知道投資和投機的取態好唔同，買股要避險，首先要搞清楚自己想做乜，最忌方法錯配，你主觀上覺得自己是投資者，但事實上卻專門高追貴股，或者專買雞股，做哂投機者的行為，而且有糊唔識食，結果就會扮蟹。明明係一夜情，卻想與對方長相廝守，你天唔天真啲呀？有些人連自己搞緊一夜情都唔知，就更加糊塗之極矣。

陸羽仁

---

作者: szeyuen77    時間: 2007-9-6 10:57 PM     標題: 避險與爭勝（９） (2007/9/6)

　　美股道指跌１４３點，主要受房屋銷售數據不理想影響，對上月二手樓簽約指數跌１２％，比預期跌２％，證明樓市大鑊，令到美國地產股急跌，搞到美股急回。好多朋友問次按有無事，其實次按觸發的金融問題（例如商業票據市場停頓，企業只能用極高息發票據借錢）尚在急救中，估計唔掂可以用減息搞掂，目前減息機會不低，所以股市反彈，但美國樓市大大鑊，還在反覆爆發，減息應該都頂唔住，明年會更大鑊，所以次按和樓市好似樹幹和樹根，而家由樹根爛起，短線而言，執好樹幹又搞到棵樹幾靚仔，但中線而言，救到樹幹救唔到樹根。

　　日圓又升，今朝兌美元升到１１５日圓邊位，高息貨幣下跌，又一輪套息交易拆倉潮，看來港股要受一受壓了。

　　我見好多網友的回應，都和群眾心理有關，所以今日想講講「走快群眾半步」的話題。首是假設投機市場（唔係投資市場）係一個屠場，群眾咩咩聲行入去，隻隻劏哂肚打橫行出來，見到咁情況，結論好似好簡單，做群眾相反之事咪得囉。

　　事實當然唔係咁簡單，股市引人入勝之事，通常會延續一段時間，引夠老襯落水，然後才走向反面，正如個市開始升，群眾半信半疑小注落場，你立刻走去沽空佢，輸死你都未天光，因為要引夠大批傻仔落叠，走勢自然要深度發展，你太早走去做相反之事，好易被走勢挾死。

　　所以我的理論係要比「群眾走快半步」，個個買股，升到你唔信時，投機的你就要走，唔走哂都走緊一部份。個個沽貨，跌到你唔信時，投機的你亦不妨買啲，小注試盤，試啱有賺價在手才落大注追貨。

　　網友非常道話香港人動西方手術，事實上大部份香港人和大陸股民一樣，只會隨波逐流，不動任何手術。要做到一感覺個市唔對路即動手術，十個人中無一個人做到，做得到，手術動得快，比一般散戶保留更多實力，到個市跌到阿媽都唔認得時，就有水頭吸貨。

　　估計羊群的情緒極為重要，這就是我經常講的「散戶指數」，網友Panda123話陸羽仁網誌可以做指標，回應數量多時股市就熱，反之就冷，我認為這不是太理想的指標，因為網友的回應和波動有關，大升大跌時問題最多，比股市狂熱時更多，所以頂多只能作半個股市熱度指標。

　　群眾情緒是最大的投資陷阱，若果跟住大圍情緒走，唔識抽離，最後的終點站只是屠房，所以不能不跟住群眾行一段，也不能跟住群眾行到尾，行到咁上下就要離隊，跟住人行是爭勝行為，識得落走是避險策略，至於那裏是「尾站」，本來幾難判斷，但又用番我早兩日講的原則，當你揸住成手股票，見佢哋起勢升，升過不停，覺得好過番工好多，認為自己就係股神，那時候就係那一浪的尾站。大家都睇過過年過節燒煙花，你想知道幾時完，唔使睇錶，突然間大量燒花放上天，燒過不完，響聲不絕，就係最後一爆啦，記住我講這個燒煙花效應，唔升到咁，點引到最後一班、也是最大一班老襯接貨呢！

陸羽仁

---

作者: szeyuen77    時間: 2007-9-7 11:47 PM     標題: 避險與爭勝（１０） (2007/9/7)

　　寫了這麼多篇「避險與爭勝」，是時候來個總結。寫這些文章的緣起，其實源自８月１７日Deep V日早上一篇叫「避險與博矇」的文章，當日覺得大市跌到２００００幾點時，已到臨界點，如無特大壞消息逼爆大市，應該跌到差不多了，所以寫了這篇文，警示風險之餘，亦提吓大家可以雞仔注博吓矇。

　　其後大市果然反彈，但反彈速度亦出乎自己意料之外，原本預計兩個月才發生的事，在十幾日就發生了。再想寫「避險與爭勝」的文章時，其實目標已變為主要想講避險。在跌市之後，又有兩個老生常談的總結，第一，如果炒作的朋友，在跌市之初一跌到一成止蝕位即打靶，保留實力，之後就有機會執到平貨。第二，今次跌市復元得比三月跌市更快，一年已試了兩次，急促調整，急促復元，試得三幾次，散戶對跌市就完全無防備心，即使明知自己做投機的我，見到跌市只是死守，博佢一個月後無事發生，最後出現終極一跌時，就會全軍覆殁。

　　陸羽仁覺得，在升市中，順市而炒，各方聽的貼士都信一半，跟炒吓，走一轉，要「爭勝」不難，市旺時冧巴滿天飛，隻隻升幾成，難就難在要「避險」，特別是要求有避險成本下仍能有較可觀的回報。

　　股神巴菲特講過，投資第一個原則是要不輸，而第二個原則就是要堅持第一個原則。所以如何令自己不輸，少輸，最最重要。

　　為了達成不輸的目標，首先要分開「投資的我」及「投機的我」，兩者不能錯配，錯配了，特別是以投資的心態去投機，必定死人。

　　舉個例，網友Cecila讀緊書，第一次買股，買了隻富士康（２０３８）的窩輪９５７８，我見她打簡體字，不知是否內地朋友來香港讀大學，要知道買股和讀書一樣要交學費，我有少少擔心你今次要交學費。新手買窩輪的原因好簡單，資金有限，又不滿足於正股一兩成的可能升幅，於是買輪想把升幅擴大，但買的時候好少諗買輪跌幅也同時擴大，買股第一律是「未諗贏先諗輸」，買輪更要預咗輸清。富士康在去年底創了２７．７元的高位後，其後大市不斷創新高，但富士康跟唔到大市，未再創過高位，現價２０．８５元，股價長期在２０元至２５元的區間走動。

　　Cecila買的富士康輪現價０．０４元，佢話在８月初買，我估佢買入價０．０５元左右，跌幅約兩成。這隻輪年底１２月３１日到期，行使價３０．０８元，比起富士康的現價２０．８５元，是極價外輪，再觀察富士康弱於大市的走勢，年底要到行使價的機會不算高。換言之，Cecila若持貨到尾，窩輪有機會變成廢紙，一毫子都輸清。所以Cecila買輪的原因雖然可以理解，但此行為客觀上已令她變成投機者，投機買輪，要定止蝕，一成止蝕價太窄，定三成止蝕都得，但一定要止蝕，否則正股牛皮向下，時間值耗損，價外輪可以跌價跌得好快。炒輪要快，快來快走，千祈唔好話想「長揸」守吓，一唔對路就打靶，要炒換隻波動大一點的H股輪，仲有得博吓。好多人買輪當投資，心態錯配輸死人。

　　知道自己是「投資的我」還是「投機的我」之後，就要選不同對象投資，正如基金都有不同的風險度，退休基金只選穩陣投資，互惠基金一般亦不會太進取，對沖基金和私募基金比較博命，要知道高回報同高風險係同義詞，你買互惠基金，一般不期望佢一年升五成升一倍，但也不希望它大幅輸錢。但買對沖基金你就期望佢有三、四成回報，也要知道佢衰起上來會摺埋。

　　按自己的風險胃納，決定投資和投機的比例。投資主要平買好股，揸長線，少進出，只要買入的股票進入上升軌，一般可以唔睇唔理。投機順勢而炒，嚴守止蝕，唔好扮專家，扮睇基本因素，買隻雞股仲講一大輪基本分析，一隻空殼炒到十幾億市值，開始跌市時唔想認輸止蝕，還說它有什麼煤礦鐵礦業務，死守唔走，結果真係會死咗，買咗雞股買咗輪唔對路時沽不足惜，呢隻唔得，炒過第二隻，最緊要週轉快，多贏少輸，而唔係要長揸做人世。

　　股市步向高位，高處未算高，唔炒會手痕，亂炒會傷身，遲炒不如早炒，早炒早著，累積番少少本錢，將來跌起上來，還有些利潤可頂，最怕那種又想炒又怕痛的心態，遲遲疑疑，結果就等到股市最熱，最高位時接貨。要時時有避險之心，緊要過你睇啱大市方向。

陸羽仁

---

作者: szeyuen77    時間: 2007-9-11 12:30 AM     標題: 政治性收購 (2007/9/10)

  　港府上週五罕有入市，用了２４億元，購入１５７２萬股港交所股份，令港府的持股量由４．４％升至５．８８％，平均買入價約１５５．４元，在港府強力買盤帶動下，港交所當日走勢淩厲，收報１５８元，而政府入市佔港交所當日成交六成左右。政府大手買入港交所，如何影響港交所後市，深受關注。

　　相信有留意港交所股價的股民，見到港交所炒到１５８元，自然會大嘆走寶，在半個月前８月１７日港股deep V試底日，港交所最低見過１００元，若當日撈底，現在已有近六成回報，以一隻巨股這麼短時間就有如此大的升幅，除了因為港股波動大之外，亦見港交所的吸引力。

　　有一個中環茶友一年多前和老外芬佬談起港交所，茶友認為港交所７０、８０元已貼近外國交易所股價水平，已經「到價」，不過老外芬佬唔係咁睇，話大陸市場憧憬無限，大陸交易所股份未上市，要買大陸概念的交易所，唯有港交所，所以值得買。茶友話鬼佬買港交所其實係炒概念，唔係具體計盈利計市盈率，所以港交所股價可以升到無譜。

　　港府在高位入市買港交所，等如為港交所股價打氣，但也令識計數的中環茶友們嘖嘖稱奇。市民見政府１５５元還去買港交所，好可能會跟風，話政府知道內幕，１５５元都去買，自然係睇到好高，所以唔怕跟跟。
　　不過據陸羽仁收到的風聲，政府買港交所的行為是政治性而非財經性，即係話政府並不是從買股投資增值的角度買港交所。

　　現時《證券及期貨條例》已規定，任何人未得財政司司長批准，不能持有超過５％港交所股份，政府這次增持到５．８８％，便成為唯一一個持股超過５％的股東，雞雞地都係單一最大股東。雖然港府持股量細，其他外資合起來肯定多過港府，但金管局發言人講明，希望政府在股東會議上提供意見，並在重大事件中投票。過去政府為表示中立，未必會投票，如今則表明會投票，話明會扮演更積極的股東角色。

　　現時港交所董事會中，政府委任包括港交所行政總裁周文耀在內的七名董事，股東選出董事有六名，按道理政府已有足夠控制。不過隨著港交所股價愈升愈高，港交所管理層的利益亦突顯出來，是否會對政府的建議言聽計從，也是一個問題。

　　中國證監會研究中心在今年二月發表報告，指港交所有可能被外資收購，香港要未雨綢繆，顯示中央對這個問題也開始關注。雖然法例限了港交所單一股東未得政府批准不能持股５％或以上，但集合十幾個持股５％以下的基金提出收購，邏輯上仍有可能；政府增持股份到５．８８％，雖然未能在股權比例上阻止他人收購，但已擺出一個姿態，港府不希望外資控制港交所，如果有意收購者只基於經濟動機，在「取易不取難」的原則下，可以嚇退部份想打港交所主意的人。

　　港府高官私下講，港府購入港交所股份的原因，主要想逹成港府《十一五規劃綱領》的三項目標，包括建立中港兩地交易所的交叉買賣平台，建立交易之間戰略性聯繫，以及內地交易所將以港交所作為首選合作夥伴。

　　換句話講，香港想同內地交易所合作，想港交所可以買賣A股，上交所、深交所可以買賣港股，但阿爺對香港講，你間交易所唔係太受你控制，隨時會被外資收購埋，大陸交易所同你合作得咁深，若你一夜間被人買起，我咪好煩？所以香港想同內地加強合作，先要搞好自己個後花園。

　　從股民角度，唔好見到政府入股，就以為港交所好抵，合埋眼都可以追入作長線投資，香港有機會長線加強和內地交易所合作，對港交所絕對係好事，但一時三刻未能成事，不過港府咁大動作入市，必然會再引到外資買繼續炒吓概念，而且大市續升成交大，港交所可以再炒上，但記住在咁樣o既市道追入港交所，係炒作而非投資也。

陸羽仁

---

作者: szeyuen77    時間: 2007-9-12 01:00 AM     標題: 政治性收購（２） (2007/9/11)


一隻港交所（０３８８）玩轉大市，昨日港股受港交所勁升帶動，亦有北水見低吸貨，所以結果無事發生，應跌唔跌。

北水雖多，在外資的眼中，只是散兵遊勇，他們不少是在中銀開了戶排隊等自由行政策落來的資金，其性質如炒業績的游資，估計見好消息在前面，偷步炒一炒，執幾百點、１０００點，無大志。不過北水阻住外資做嘢，假如我係鬼佬，就會變招，一係等你吸到無哂力時，隊你一鑊，一係順住你個勢，月中發力做上去，總唔之千萬不要對北水寄望太大，佢地唔係阿爺啲的錢，只係大陸有錢人和國企的私房錢。

講番港交所，政府入市買股，的確惹起好多人媽叉。不少港交所捧場客，見佢升得高沽咗，你政府在１５５元入市，搞到隻股升到近２００元，沽早咗者自然會好慶。又有股民等跌市吸貨，政府入市炒高隻港交所，搞到個市跌唔落，又媽。這些媽叉有其道理，可以理解，最難理解為何外資都走出來媽。

有外資代言人大力批評，話港交所要同內地交易所合作，港府都無需增持，因為港股中國色彩咁重，無人敢得罪大陸。他直指政府增持係想影響交易所６個選舉董事的選舉。又話政府咁多錢應該走去派福利減稅云云。

這番話如果出自一個大學講師之口，大家都會覺好正常合理，但如果出自一個外資代言人之口，就覺得有少少身份錯置，因為若外資只是一個港交所的被動持股人，港府咁傻，咁高位仲去買入港交所股份，推高股價，持股大戶高興都來不及，點會去媽，千萬不要以為他們咁有原則，不義之財不去貪，合理行為應該大聲讚好，叫政府再增持先至係。

小股民無論喜歡政府買港交所也好，不喜歡也好，要明白政府行為的動機，才可避免做錯投資決定。

陸羽仁查探得知，港府公布增持港交所至５．８８％，經過一番心理爭持，因為法例沒有規限港府持股５％要公布，所以她可以選擇一直不公布，暗手增持，但最後她決定公布，皆因在這個高透明度的社會，如果增持而不公布，雖然合法，但那一天被人發現了，又會被人媽叉到暈。

好了，政府決定增持過５％就要自行公布，聞說她開始時還是低調地慢慢吸貨，即是話由４．４％增至５％時買的０．６％，即６００萬股左右，只係慢慢買。到上週五政府買貨超過５％這個臨界點，政府打算收市後就要公布，最後就急急買多０．８８％，這９００多萬股就是當日掃貨，就是因為政府掃貨掃得急，港交所當日就被政府掃高１０元，政府公布買入平均價１５５．４元，當日收市是１５８元，由於政府早前已有較平的貨底，換言之政府當日是買到尾，見高位照掃，才會掃出１５５．４元這樣高的平均價。

正如我所講，政府是「政治性入市」，並不是以投資回報為主要考慮，所以也不怕買貴貨。牌面看，增持到５．８８％，唔咸唔淡，按理應再增持，才有較大的影響力。但陸羽仁觀察股市主要看入市者的行為，政府在上周五「盡買」，超過５％時無停，盡掃到５．８８％，這行為顯示，她短期內不會再買，如果想再買，當日過５％之後不用咁急掃貨，所以憧憬港府短期再入市炒起港交所，小心希望落空。

港府入市的背後的假設，是港交所日漸失控，港交所主要由１３個董事組成董事局，政府委任６個，股東選出６個，再加政府委任的行政總裁，表面上政府控制７個董事。６個競舉董事每次改選３個，上次選舉外資推舉人選大獲全勝，明年又要改選，結果可想而知。

你話政府者控制７個董事，即使餘數全落入外資之手，都使唔駛咁驚呀？試想一個情況，如果香港同大陸傾掂，香港股市和內地股市深度合作，例如兩地股票交叉買賣，港交所可以買賣A股，上交所可以買賣港股，兩地股市慢慢變成二而為一。

有一天外資選出的董事突然拿來一個建議，話紐約交易所提出和港交所合併，提出現價高一倍的收購條件，你估有股權利益的行政總裁會不會心動，即使他是政府委任，又會否接受對方建議，搞出一個倒轉７比６的局面，同意港交所接受紐交所的收購？如果香港交易所意外地被外國交易所收購，大陸的股份全數在這個港交所上市，阿爺就會十分被動，完全暴露於金融風險之中。

陸羽仁講話天馬行空，但只要上述情況有１％機會出現，香港想和內地加深股市合作，都有極大困難，阿爺無必要冒這種風險，如非必要之事，有風險就唔好做，答案簡單之極。所以香港要和內地股市深度合作，先要掃乾淨自己個後花園。

港府增持後只持有港交所５．８８％，照理並不足夠，沒有１５％或以上，好難確保選出自己友做董事，所以長線不能排除港府會再增持，但增持不一定要在市場吸納，政府要港交所發新股俾佢都得，總之有好多方法。港府現時的持股量止唔到咳，但已向外資擺出一個姿態，香港唔會被外資控制港交所，若外資的投資「非政治性」，只是為了投資增值，遇上政府擺明車馬做對手，一般不會再搞落去，因為投資搵錢，講求週轉快，若和政府鬥法，曠日持久，入咗股唔上唔落（好似領匯咁），損失好多機會成本，就要選擇打退堂鼓；不過話說回來，如果對手嚇唔走，必有大圖謀，政府就更加要小心了。

陸羽仁

---

作者: szeyuen77    時間: 2007-9-12 11:44 PM     標題: 政治性收購（３） (2007/9/12 )

　　美股道指升１８０點，主要是企業如通用汽車聲稱需求仍然強勁（唱好？），以及市場預期聯儲局下週二會減息，而且一減就減半厘，唔係四分一厘。照計香港紅色股在阿爺調控陰影下仍會軟軟地，但炒減息的浪潮又開始湧至，睇吓邊股力量大，我就估炒減息的力度會愈來愈大。

　　美國這個次按危機大大鑊，如果聯儲局唔減息，這個月要推出市場以千億美元計的商業票據，唔知點賣，所以如果唔減息，就真係好壞o既消息。

　　再講吓港府增持港交所。陸羽仁暫時唔係覺得政府增持到５．８８％好得，因為無番１０零個巴仙，都唔可以保證選出一個董事，所以政府增持暫時只是姿態，不能確保有實效。不過西方報紙及其代言人就開始媽到七彩，又媽得過份咗少少。

　　好似《華爾街日報》登了一篇名為「香港除牌」的文章，指港交所日漸成為全球主要的金融中心，但港府突然增持港交所，與全球交易所私有化趨勢背道而馳，批評此傷對香港做成傷害，要將香港除牌咁話。

　　　　老外的雙重標準嚴重到咁o既地步，真係忍唔住要講番兩句，紐約交易所、納斯特克交易所私有化呢個大趨勢大得咁緊要，的確值得學習。不過大家想像一下，如果明天工商銀行（１３９８）提雙倍價錢，全面收購紐交所或納斯特克交易所，你估又買唔買得成呢？當然買唔成啦，到時就會話共產黨想控制美國交易所啦！

　　好啦，你話我詭辯，因為工行唔係私人公司。我又改一改，由和黃（００１３）提出收購又如何？結果都係一樣，同樣話你和黃等如中國控制的公司，唔可以控制美國的交易所。過去和黃去美國買碼頭，已經被美國議員話過佢係中國控制的公司，結果買唔成。所以西方「私有化」的交易所，只係對有限對象開放。

　　所以老外一句「私有化」，講落好好聽，但好似交易所這種重要公司，都係由幾個主要的金融巨頭控制，這些金融資本，最後只是幾大集團，在全球搵食，你一阻住佢，佢就話你干預市場，最好中門大開，任佢提款。

　　中國是由專制的政黨控制國家，西方就係由一小撮金融巨頭操控的國家，他們主宰經濟、政治，控制埋政府，佢地投注政治，唔係揀一邊，係買全骰，以美國為例，總統選舉臨近，金融巨頭對共和黨候選人又捐錢，對民主黨又捐，唔止捐俾希拉莉，亦捐埋俾佢對手，你話有錢幾好，買嘢唔使傷腦筋揀一邊，邊邊都買，實中。

　　美國政府干預市場之多，在次按一役表露無遺，而且全世界政府都係咁，早就唔做嘢，要搞到好大劑先至有反應（例如港府為何不在港交所上市時先增持至有顯著多數股權，要到今日才搞？）美國監管當局過去任由金融機構把劣質次按包裝成AAA級的「債務抵押證券」（CDO）賣出去，任由評級機構把它們評上最高級別，到如今出事後，炒一兩個CEO或部門主管頂罪就草草了事，這又怎能算是良好監管？如今在次按爆煲之時，更放寬監管準則去救市，讓金融機構可以繼續借錢俾次按業主，還要提醒四大核數師行監管準則已放寬，對金融機構查數時可以鬆手，這種干預不正正損害著美國金融業良好監管的核心價值，為何不見《華爾街日報》對此大張撻伐？

　　千萬不要以為上述這些分析，對投資不重要，這些才是最重要的東西，你要搞清楚理念，才知道你炒股、炒大市時，誰是你的對手，這些對手有幾強，這些對手如何行事。明白大概念，投資時無住而不利。




陸羽仁

---

作者: szeyuen77    時間: 2007-9-13 09:30 PM     標題: 避險與爭勝（１１） (2007/9/13)

美股大升後牛皮，昨日道指微跌１６點，由而家到下週二，港股和美股進入炒減息的日子，然後睇吓伯南克開大定開細，開大，減夠半厘，如果香港起碼跟到減四分一厘，大市就維持上炒格局；若果開細，只減四分一厘或唔減，後市就有較大回吐壓力。當然港股還要睇睇阿爺會否星期五收市後又出招。

早前打算寫完的「避險與爭勝篇」，因為網友的問題，寫吓續篇，我話美國次按和樓市的問題如海嘯一樣，還有大災難在後頭，如今只是大海嘯前的退潮，你去海灘執蜆執蝦要小心。網友yuki問，海嘯來得咁急咁快，到時有無足夠時俾我地睇到佢來之前的訊息號呢？

　　網友benny的回應好好，大家可以睇睇：

「 Yuki: 呢排我都一路諗緊你講既問題，睇咗陸sir個blog同金曹師兄、其他師兄師姐既回應咁耐，我發覺自己有一個好重要既觀念改變，以前成日想揾到好清晰既指標話比自己聽點做，譬如一隻股升到阿媽都唔認得，應該幾時放？點先可以賺到盡?入市價點先可以做到最平?

　　但漸漸發覺，呢d諗法太理想化，因爲股票市場入面既種種現象，係唔同人既意願不斷互動所產生出黎，由於人心難測，我認識到"摸住石頭過河"既道理。

應用番去你既問題，從一個中線投資既角度，我都好想知道幾時係呢一輪既浪頂，但我諗絶對無可能會有足夠既signals話比我地聽，我自己會睇散戶情緒(因爲大戶係睇住呢樣黎玩)、資金流向、經濟情況(即大環境同大戶做嘢方向既關係)等，但都好片面，因爲遇上突發事件(往往股災就係黐住突發事件)，全部無用。

　　咁退一步講，如果唔能夠賺到盡，不如諗吓點樣"盡量賺到盡"，我諗方法有好多，其中一樣係大家成日講既分段沽、分注買，我覺得非常有用，因爲如果一嘢買哂或沽哂而最後發覺做錯事，個吓心理壓力好鬼大(仲有一d係側邊睇嘢既人既笑罵聲)，分段沽、分注買絶對可以幫到手。

　　至於你話有冇足夠時間俾你走，我諗如果套用上面講既分段沽，時間永遠係夠，只不過睇吓你想賺幾多。」

　　你地睇陸羽仁的文章長啲時間，就會發現我講投資和其他人好唔同。普通人講單面，我會講雙面；普通人一係講升，一係講跌，我會講升完會跌，或者跌完會升；普通人講買股唔分投資與投機，我會講買股前首先要分清自己想做什麼；普通人講估計贏幾多錢，我話要同時估計贏錢和輸錢；普通人用緊散戶的思維，我嘗試追踪大戶的部署（雖然好多時只係估到六成）；普通人靠買中一個方向賺錢，我會講大戶靠人造波動賺錢，你追到佢啲波動搭順風車會賺到啲錢，或者至少唔好輸錢。

　　你想像吓一個鏡頭，你好快樂地在海灘執蜆，隻隻又肥又大，的確是一幅好開心的圖畫；若把鏡頭一路拉濶，升上高空，才會看到遠方有一排排海嘯巨浪湧至，又變成好兇險的場面；一件事是好是壞，視乎你在什麼時空，用什麼角度看。你話咁兇險就最好唔買，等海嘯啦。我就話，咁係唔係最好方法，真係兩睇，我講海嘯，的確係覺得佢有機會來，例如有七成機會，但仍有三成機會佢不來，即使佢來，又點知佢幾時來呢？若你停手唔買股，跟住見個市起勢升，會唔會在更高位忍唔住落場呢？人通常是「眼見為真」，當眼見股市雞犬皆升時，又點忍得住唔落場呢？

股市散仔，買股票天天發夢最低位買最高位沽，例如幾年前以１．５元買中石油（０８５７），問吓目標價，那個時候最樂觀的分析員都係睇３元（他即使睇得好啲，都唔會把目標價講得太高，以防「最後」唔到價跌番落去時你罵他），你見「到價」自然會沽，然後等跌，佢無跌，仲升到無影，你就好揼心。

見到股神巴菲特沽中石油，你地問佢什麼心態。首先，股神買股無定一個目標價，佢會以公司的長線收益，折現成一個現金價值，若股票的市價比估計現金價值低好多時，佢就會買，假設佢當日買中石油時計出來的現金價值係每股４元，當時股票１元多，比估計價值有好大折讓，視為抵買。其次，股神沽股票是覺得基本因素改變，若果係好股，基本因素無變，佢會長揸，所以佢沽中石油係認為基本因素改變了，我地唔知佢認為基本改咗乜，到底是認為中國經濟過熱，會爆，抑或次按好大劑，全球經濟有危機，甚至令油價上升軌終結，唔知，但他應該有他的一套估計。但股神睇得好長線，貨又多，減貨不能減得太快，但佢一定覺得中石油、中國市場、石油市場甚至環球股市有啲問題。

講番散仔，投資唔講，只講投機，有人太貪，有人太細膽，要啱啱好才可以賺到大錢。有蜆唔執，可能是太膽少，假設未來幾個月股市大升，跟住你就會俾人話，聽個乜水陸羽仁講，話有海嘯，浪花都無個，正傻仔，你俾人笑一個月尚可，笑兩三個月就會頂唔順，我又會損失一個讀者。我經常話，預測股災無用，股災最後會來，睇吓幾時，如果股災明年今日到，我今日一年前大講股災，就係講錯，所以有蜆要執，你可能今日執完明日都走咗都話唔定o架。

但係話說回來，執蜆唔緊要，但每天都要有個防範心，一唔對路就閃，若果一直無出事，高位都要食吓糊，要避險和爭勝心兼備。因為執得兩執，你執到成手蜆，就會覺得自己好叻，係股神，我不能夠不提醒大家，包括我在內，大家都係股蟻，外資大戶才是股神，人地住山頂，我地住山腳，實力太懸殊，我不會定死一個指數目標，但大市升上２５０００點樓上風險開始增加，愈高愈危，大家自己執生，海嘯唔會一晚發生，只要你有防範心，唔對路時唔好賴死唔走，就OK。記住贏錢好多時講心態，講紀律，順勢而炒，直至可能轉勢時就要走避（其實炒股同股神沽貨的原理一樣，持貨至可能轉勢時），無人可以做到最低位最高位沽，唔好咁傻咁樣要求自己啦！炒股要有膽去炒，同時要知足食吓糊。




陸羽仁

---

作者: szeyuen77    時間: 2007-9-15 01:31 AM     標題: 避險與爭勝（１２） (2007/9/14)

　　美國最新申領失業救劑人數比預期少，加上大按揭公司取得巨額融資，刺激美股向上，道指升１３３點。港股正經歷一個炒減息潮，不過本地拆息高企，實際上美國減息都唔知香港減唔減得到，不過大家唔理，跟住大盤一起炒，看來港股這個浪會延續到下週二聯儲局議息。

　　這一陣子講到「執蜆」，不妨再講吓執蜆心法。遊客突然見海邊浪退，大呼好嘢，紛紛湧上前執蜆也，但熟水性的漁民覺得唔對路，會離場。你睇股神巴菲特和美國鋁業都沽貨，就知道老行尊都感受到這個廚房的熱度。

　　有網友問中鋁（２６００）現價買唔買得過，你估睇鋁業公司的價值，有幾多人叻得過美國鋁業，佢對鋁價走向、市場榮枯、甚至中國市場的供需，都瞭如指掌，佢都要沽中鋁，而且要忍受較大的折讓，一手沽清，就知佢唔睇好。所以邊個人話中鋁現價可買入作長線投資，即係話自己睇鋁業股叻過美國鋁業，都係一個笑話。不過在兩三個月的短時間內，你覺得美國鋁業睇錯唔奇，因為佢咁大手貨沽出街，都有人接，亦同樣有大投資者看好（多數係基金），而且大折讓沽貨後反彈絕對唔奇，所以短線中鋁可以升一升，證明美鋁沽貨係「錯」，又係嗰句，啱同錯，係唔同時空睇，好唔同。

　　講番執蜆人，你見佢在執蜆的畫面，鏡頭不斷聚焦，直至深入他們的大腦，你會發現不可能有不同的執蜆人可能有不同的想法，大多數人其實無用腦，只是官能反應，有蜆就執，無想過什麼，只覺得很快樂，因為從未試過咁易執到咁多蜆，我相信大多數股民都是如此，見到個嗰市係咁升時，就會把一切擔憂拋諸腦後，你要在海水底下慢慢摸蜆會好驚，隨地有蜆任執時就一啲都唔驚。在２１０００點、２２０００點時你會好驚，升到２５０００點、２６０００點就唔會再驚。我經常講，人做好多傻事，都係用器官思維，唔係用大腦思維，包二奶、包二公的人，就係俾器官控制咗大腦。

　　不過亦有部份執蜆人有用腦，他們明知危險可能在前面，仍然要繼續執，因為現在執一分鐘蜆，可能比以住摸一年蜆還要多，利潤在前，博命都要試一試。這種人明知係賭，但係選擇了同大浪競賽，睇吓浪來得快，還是自己走得快。我想而家入市炒股，應該抱這種心態，千祈唔好盲摸摸咁執蜆，唔知危險。

　　你當然可以選擇有蜆唔執，坐上高地做旁觀者，不過旁觀者有旁觀的風險，你初時見到人執蜆，會笑這些人好冒險，不明情況去博命，但過了幾分鐘，見到人一袋袋蜆咁樣執上來，你就開始有少少揼心，再過幾分鐘無事發生，你就會撲下去執埋一份，愈遲落場，風險愈高。你２３０００點唔入市，到２５０００點忍唔住才入市，你話風險係唔係高啲？若果堅持唔買，到時又出現阿媽話你唔識炒股的經典局面，你要EQ好好，頂得住俾人笑幾個月，等跌市爭取「最後勝利」，普通人唔易做到。

　　股災和海嘯一樣，不可預測，而且住住在你防範心最少，炒得最精彩的日子俏然而至，泠靜執蜆，知足常樂，就是我給大家的錦囊。隨地係蜆任執，執蜆人好快頭腦發熱，要泠靜，知道好境不常。執蜆愈執得多，愈唔知足，愈覺做再執幾執自己就發過李超人，要對抗自己的貪念，要適可而止，到高位分段逐少出貨，落袋才是真錢也。

陸羽仁

---

作者: szeyuen77    時間: 2007-9-17 11:26 PM     標題: 減息一跌 (2007/9/17)

　　週末和中環茶友飲茶灌水打牙骹，講到美股和港股，有些話題大家應該有興趣，可以一寫。

　　大家講到美國減息，話題一是美國減息可能香港唔減，香港銀行同業拆息高企，細銀行借同業短錢，支持自己貸長錢俾客仔（例如按揭），按揭息率不變，拆息高時細銀行要蝕，所以美國減息會舒緩一下，香港暫時未具備減息條件，除非金融局發功，逼銀行減番少少。不過話說回來，當拆息市場平靜番，拆息低番，香港有機會滯後減息，到時香港有機會出現實質負利率，即定期存款利息低過通脹率（估計今年會升到３％），即係逼人投資，否則放在銀行會蝕水。

　　　　香港股市已經過熱，負利率也逼不到多少錢出來，要炒股的早就炒了。但負利率有利樓市，特別一些保守型市民，見利息低企，買樓收租也不用貼多少供款，會增加買樓意欲，輕微利好樓市。

　　為何說「輕微」利好，因為大家都無預樓市會大好，香港樓市，無大炒作唔會好好，只靠用家和投資者，無大量投機者入市，好難大好。而家香港人有錢投機，都去咗炒股，無乜人炒樓，除咗港島豪宅仲叫做有得炒吓，其他物業無炒風，咁就形成「惡性循環」，更吸引唔到資金入市（或者從用家角度，樓市無炒風可以叫「良性循環」）。

　　有錢炒股都唔炒樓，似乎已成為炒作界的共識。剛聽到一個護士長講，她手下有幾個大學畢業生護士，做咗無耐，就辭工唔做，全職炒股去也。護士點講都係一門專業，新入行者放棄有穩定收入的專業，全職炒作，既反映股市有景，亦令人擔心好景不常。

　　講番近期股市，由於港股近日升得厲害，特別是好耐無郁的地產股借減息浪炒上，股市差不多衝到２５０００點，令人覺得減完息會回，甚至偷步炒減息的錢，在減息前已出貨。

　　升得多回吐唔出奇，問題是回吐還是大跌，中環茶友們似乎無人估本月會大跌，結果鬥估本月恒指收乜嘢價，有茶友估２５０００點，有人估略低於２５０００點，賭一餐飯，但賭低於２５０００點的茶友，也不是估有大跌市，佢話大戶咁辛苦砌上２５０００點，回番啲唔奇，不過未到期指結算就放手，任佢跌，等如白做，所以唔似咁快玩完噃。

陸羽仁

---

作者: szeyuen77    時間: 2007-9-19 02:01 AM     標題: X記控投 (2007/9/18)

    　 昨日港股受歐洲股市拖累下跌，結果英國股市收市跌１．８％，隻北石銀行都跌三成幾，英國金融市場仍然樣衰，不過美股都幾硬淨，害死英國後自己唔郁，美股道指只係微跌３９點，牛皮等減息，睇吓港股又可否頂番住。


　　好多朋友無論做人和買股都好亂，目標不清，左右飄移，咁樣做一世都上唔到岸，今日可以講吓控制個人理財和投資的基本心法，網友小潘提到把自己當作一間公司咁經營，我過去都用過此方法，所以不妨講講。

小潘叫阿K唔好炒炒吓時咁講：「唔知你有冇當自己係一間上市公司咁經營?我就會每年定下一個目標，呢個目標係用以往賺既錢作為基本，我唔貪心，可能會set 10- 20%增長目標，有本事就set高一d。呢個增長目標，包括透過節流(雖然辛苦d，不過幾有用)，搵多d兼職，工作上努力，博年中花紅以及投資。每一方面都要做到，不可以過份依賴某一方面收入來源。其實，長遠最後係做到靠投資既錢退休，不過希望是 50歲後能做到，一d都唔貪心掛。

之後，每3個月檢討一次進度(如果投資及收入不是很多，可以半年至檢討一次)，你會知道自己係唔係達標，而增加或保持增加收入既各種方法。(上次因為3個月都冇計數，於是就買錯交行, 沽錯MTR，衰心急)。」

陸羽仁後生時也用過這個方法，我是一個開支永遠追不上收入的人（這是孤寒的代名詞），有一陣子見戶口的錢不斷增加，唔知自己用幾多錢一個月，就專門每次去提款時都記低，月底對數，計出一個月要用多少錢，然後計出每月儲蓄多少（收入減開支）。

　　講理財，首先要講收入和支出的管理，把自己當作一間公司，要成為賺到錢的好公司，就要盈利快速增長，方法不外乎是「增加收入，控制支出」（如果不是減少支出的話），好多後生仔開支大過收入，這種是蝕錢公司，靠借貸渡日，水源一斷，立刻玩完，美國佬係典型，無論佢哋賺幾多錢都好，消費永遠大過收入，最近次按風潮起，華爾街開始炒人，好多人做到投資銀行部門主管，住大屋開靚車，一俾人炒三個月內搵唔番工就跌入地獄，因為平時使大哂，住啲屋永遠超乎自己負擔能力，靠未來可能增加的收入來頂，樓價升咗就加按去旅行，有個中環茶友話我聽，一年前佢參加一個加勒比海豪華郵輪之旅，同船差不多有一半美國客話俾佢知，他們是加按物業攞錢去旅行，使咗先至算，所以次按在美國爆起上來咁大鑊，美國人無論窮或富，都無holding power（持貨力），因為借到突哂。

　　講完開支大，就要講收入少，我經常講，以後生仔計，自己的事業就是人生的最大投資，若事業做得好，可以產生好穩定而大量的正回報，而且會不斷增加，就算你完全唔識投資，但事業做得好好，都可以致富，這就是最傳統的發達方法，個個阿媽都會咁教仔，你乖乖地讀好書，入大學，做乜師物師就得o架啦，陸羽仁阿媽的年代要求更低，求其搵到份「寫字樓工」，有得涼泠氣開工，已經好好啦。咁o既觀念雖然陳舊，但有其道理，做好自己份工，就是人生最大投資。如果你係後生仔，做多份兼職，都可以增加收入，唔一定要靠哂投資。

好啦，點都講吓投資，投資得好，可以增加收入，收入甚至高過你o既本業，若出現咁o既情況，好多後生仔會想轉行全職做投資，覺得搵到食，甚至可以發大達，咁o既路似易實難，因為收入好可能因為個市好，不是自己特別叻，但股市不可能長期係咁升，到走勢逆轉向下炒兼靜過鬼時，全職炒股也不易搵食。後生仔頭幾年好重要，頭五年做得好，在行業內已可拔尖，你大學畢業去咗全職炒股幾年，若無所成，想返番本業唔係咁易，等如跑步讓賽，人地跑咗半個圈，你先至走入再跑一樣，好難追上。

我覺得在一般情況，特別係後生仔，投資只是配菜，不是主菜，但你食呢味配菜，都要講究策略，最基本的策略，係你嗰間「 X記控投有限公司」究竟是藍籌，還是五、六線公司，究竟要穩陣，還是要博命呢？（明天續談）



陸羽仁

---

作者: szeyuen77    時間: 2007-9-20 12:35 AM     標題: 大放水 (2007/9/19)

　　美國聯儲局減息０．５厘，而且係聯邦基金利率（銀行同業隔夜拆借的利率）和貼現率（銀行向央行借錢的利率）同時減，減息力度超乎市場預期，結果美股道指大升３３５點（升幅２．５％），日股早段升超過５００點（３．２％），港股又有一抽。黃金亦急升上７２３美元，美元兌主要貨幣匯價暫時穩定，商業票據溢價回落，減息初步達到穩定金融市場的效果。

金管局任總今朝講，聯儲局減息半厘，顯示儲局認為次按和樓市問題嚴重，大幅減息有助穩定貨幣市場和樓市，但他認為不能視減息為一種趨勢，因為貨幣市場穩定後，聯儲局不一定要繼續減息，至於香港銀行減唔減息，就由銀行自定。

由於國際貨幣市場緊張，加上香港大量新股上市，近期本地銀行同業拆息抽高，所以香港未必會跟美國減息。不過陸羽仁靠估，銀行公會即時決定跟美國減０．５厘的機會微乎其微，但跟減０．２５厘的機會仍然存在，減息有利樓市，銀行可以多做按揭生意，聽聞匯豐、恒生大把水，其他銀行無乜水，所以匯豐、恒生想減息唔奇，因為而家減少少息刺激吓樓市，大量按揭生意湧出來，無水的銀行唔敢太勇去接，就由匯豐恒生食哂。中、小銀行唔想減息住，因為佢地靠在銀行同業市場借番來啲錢放貸，高息令定息的按揭蝕水，如果而家唔減息住，同業市場利率回落，佢地就可以賺番啲錢幫補吓。所以香港減唔減息，睇吓大銀行點玩。

　　講番儲局的減息決定，可以用「大放水」來形容，兩種利息一齊減，一減減０．５厘，特別值得注意的是聯儲局８月１８日已將貼現率（銀行向央行借錢的利率）下調０．５厘至５．７５厘，今次再減０．５厘至５．２５厘，即係話一個月內減了１厘貼現率，銀行無水，可以向聯儲局低息借錢應急，這是一個大放水的措施，是一劑重藥。

　　睇完聯儲局的減息行動，可以有幾個結論：第一，美國樓市和信貸市場的確大鑊，再加上看到衍生風暴吹到英國按揭銀行北石差不多執笠，災情嚴重，聯儲局要以超常規的手段救市。第二，大減息短期有助回復信貸市場的信心，有助舒緩緊張的銀根，銀行唔夠錢就以５．２５厘的利率向央行借，多多都有，照計唔使再搶高各地銀行同業的拆息，而家全球金融一體化，英國銀行唔夠錢，就搵當地分行去美國央行借啦，只要有抵押品就可以借，利息又唔係高。第三，大放水能否長線防止美國衰退的效用成疑。

　　有關第三個問題，即美國經濟會否衰退，有幾個可能，第一，最好的情況，伯南克未來連番減息，令美國樓市軟著陸，從根本地解決次按問題，美國經濟避過衰退。第二，最壞的情況，大減息又掀起炒風，善忘的美國佬見股市升番，連自己間樓能否續按的問題也暫時不理，再去大手消費，通脹好急咁升，伯南克想減息都減唔落手，出現最衰的停滯澎脹。第三，中間落墨，把美國樓市頂住，次按危機抖一抖，又暫時緩解商業票據市場的恐慌，等幾個月再爆鑊。

　　陸羽仁有少少傾向第三個結論，即係拖吓拖吓，明年再爆，如果是這樣，短期對亞洲市場最有利，因為美國大減息減少了全球金融大爆鑊的危機，而亞洲又是受次按影響最少的地區，會吸引資金入來短炒，長啲唔識講，一兩個月有得炒吓，睇到明年就無眼睇啦。




陸羽仁

---

作者: szeyuen77    時間: 2007-9-20 11:29 PM     標題: 埋住炸彈 (2007/9/20)


美國股市在大減息後一日繼續升，新屋銷售數據不理想，影響地產股，但其他多種股份在未來可能仍會減息的預期下，再有進帳，結果道指升７６點，收１３８１５點，美股的狀況相當怪，樓市和信貸市場危機極大，但股市卻在聯儲局大放水下急升，衝向高位，道指有機會破一破１４０００點大關。

伯南克放水救大行的行為，終於得到證實，陸羽仁一直講，美國幾大投資銀行為私募基金的槓桿收購包銷了３２００億美元的商業票據，在９月到期，如果信貸市場再唔掂，這些大行就自己啃，仲要大筆撇帳。

昨日大摩公布第三季業績，持續經營業務利潤跌７％至１４．７億美元，每股１．３８美元（一年前是１．５美元，業績倒退），比市場預計的每股盈利１．５５美元為低。大摩的首席財務官Colm Kelleher更表示，信貸市場的問題會持續一兩季，令該行的定息產品交易收入減少，以及要為借貸撇帳９．４億美元。Kelleher話如今信貸市場仲衰過９８年對沖基金長期資本倒閉時的情況。

早一日公布業績的雷曼已為借貸和按揭資產撇帳７億美元。高盛將於一日後公布業績，市傳高盛每股盈利原本有５美元，問題是不知道它要為包銷了的槓桿收購商業票據撇帳多少。

你諗吓，幾間大行把業績拖到伯南克減息之後才公布，伯南克大幅減息，多多錢都願借，舒緩了信貸市場的緊張，這些大行還要作出７億美元、９億美元的撇帳，如果伯南克唔減息，恐怕撇帳額要大幾倍，以大摩季度盈利１４．７億美元計，假設要撇多１０幾億，隨時要見紅，你話大唔大鑊？相信高盛的情況都唔好得好多了。

伯南克要救美資大行出火海，而且是唱高開低的格局，一路話唔做嘢，結果大力做，正如上次８月１８日第一次減貼現率前一日，出身自高盛的美國財長保爾森還出來講，政府不會為企業虧損而行動，其後聯儲局卻開特別會議減了貼現率。伯南克也講過類似的話，說聯儲局不會因為金融機構虧蝕而減息，結果也減了息。

你可以話，伯南克和保爾森不是和大行扯貓尾，只是金融市場惡化才逼到他們採取行動。但亦可以話，大行懂得製造形勢，讓人人都覺得伯南克大幅減息好合理。大行逼伯南克掘一個洞，把炸彈埋入去，炸彈最後爆唔爆唔知，但至少眼前可以頂一頂檔。《華爾街日報》社論大讚伯南克好嘢，話佢終於證明到自己可以果敢行事，走出格林斯潘的陰影。社論寫手咁大聲讚好，唔知佢手上有無要續按的豪宅，又或者有成手股票呢？

正如我在頭條日報專欄所講，如果這一切已在大行掌握之中，他們自然會順手大力炒一炒亞洲股市，反正亞洲無受次按危機影響，更有條件炒高，先發狂炒高，製造更大的泡沫，食一轉先至講。香港人享受減息好處之餘，要明白我們正在吹泡泡。



陸羽仁

---

作者: szeyuen77    時間: 2007-9-22 02:56 PM     標題: X記控股（２） (2007/9/21)

　　聯儲局局長伯南克大力減息救市，揸往成手股、成手樓的美國人拍手讚好之後，慢慢就會發覺好大鑊，因為往後美元轉弱，跟住通脹又來，美國隨時會出現一個停滯脹漲的衰退局面。

　　美元兌主要貨幣都下跌，歐元升穿１．４大關，黃金抽升，最新報７３４美元，同樣升穿了７３０這個主要關口，美股道指收市微跌跌４８點，港股仲有購買力，不過而家唔調整，小心下周結算前回吐。
我們面對這種世界金融劇變的格局，好易無所適從。我叫大家當自己係一間公司，再定投資策略，但最基本的策略，唔係要估啱市況走勢，而係你嗰間「 X記控投有限公司」究竟係屬於藍籌還是二、三線，要穩陣，還是要博命呢？

大家以為買股最怕睇錯市，陸羽仁就話投資策略錯配更大鑊，乜嘢叫做錯配，就是你以為自己係「投資的我」，但實際上郤天天做「投機的我」之事，就叫做錯配，錯配加上睇錯市，就可以把你送上絕路；睇錯市但無錯配，唔會死得去。

　　舉一個例，你話你自己係投資者，唔想投機，但你走去買港交所的窩輪，窩輪是衍生工具，是槓桿很大的產品，買窩輪實際是投機行為，再誇張點講，你本來無錢，見個市咁好，見李四叔話大市長升長有，會見三萬點，心諗市旺港交所實掂，之前無入市，而家好後悔，自己又無乜錢，不如用信用咭透支，攞啲錢去買港交所窩輪啦。經過借錢、買輪兩部曲，投機味重到唔重，但好多人還會稱之為「投資」。

　　投資揸長線，投機快來快去，投資平價買股計啱數可以唔止蝕，投機一定要止蝕，你用投資心態去買港交所窩輪，諗住長揸，以為政府會不斷增持，或者一跌就會入市，咁就死得啦。港交所升到３００元都唔奇，但跌番落１００元樓下亦有機會，買認購輪後，若正股低過行使價，一到期就變廢紙，渣都無，若果你借錢買輪，就會欠下週身債，呢種叫做輸上身。你可能唔會借十幾萬過大海入賭場，但可以借十幾萬去炒輪，其實又有什麼分別呢？

　　所以首先要搞正自己的心態，諗清楚自己想做乜，自己問公司想慢慢做大，還是想一夜擴張，想慢慢做大的公司，壞處是慢，有時睇住人一朝發達，好唔開心，但好處是風險較細。一夜擴張的公司，壞處是風險高，１元博２元，２元博４元，一直博下去，博到會發達，也可能一舖打回原型。好像占士甸和人鬥揸跑車衝向懸崖，距離崖邊最近者勝，既考技術、膽量，亦考EQ，誰可以在高峰時離場，萬中無一。李四叔在２３０００點時睇２５０００點，到２５０００點時睇３００００點，若果有幸到３００００點，佢又可以睇３５０００點，一站比一站風光好，問題是誰可以在爆煲前落車呢？

　　人有好多個面，可以是正職打工做乖仔乖女，同時可以兼職投資，甚至兼職炒作，公司也可以有好多種業務，可以係搞實業公司，可以係投資公司，也可以係投機公司，當然可以幾種事情一齊做，但都會有一個主要方向，到底你間公司，係投資公司還是投機公司呢？

　　千萬不要以為陸羽仁抗拒投機，我只係抗拒唔職投機的人去投機，又或者抗拒唔知自己投機的人去投機。我甚至有少少喜歡投機，鐘意做生意的人，往往要冒風險，看到機會，瞓身一博，以小博大，好多時都和投機類似。

　　上次講到後生仔最主要的投資是投資自己的事業，惹起部份以投機為事業的網友反彈。這裏不妨講講以投機為事業的考慮。當你自願或被逼要全職炒股時，自自然然會成為投機者，因為一般人無咁大本金可以全職投資，靠幾個巴仙回報就可以養活自己，你等如被逼上梁山，天天要炒。當投機成為一種事業，一盤生意，又會還原基本步，要諗點樣可以做到這盤生意經常賺錢，甚至穩定賺錢。

投機變成事業後，第一步追求的目標，做到輸少贏多，從而穩定賺錢，個個月埋單計數，都有正盈餘，否則你三更窮五更富，連輸幾個月，好快就頂唔順要執笠，即係唔可以再靠炒作為職業。

　　有些外資大行，會在行內吸納炒作人員，例如發現本土證券行有出色經紀，就問佢地想唔想轉做全職炒作者，願意轉行者，大行會打本俾那些人去炒，初期幾百萬，無人工，有得賺分成，做得好就會不斷加本錢，大行唔會理那些人用什麼方法炒，總之賺錢就得啦；唔好以為這種職業好正，雖然有人打本俾你去賭，這是嚴厲的淘汱賽，炒得唔好，三兩個月就出局，留得低的人都有一套炒作心法，經得起時間考驗。大行就咁養住一班專業炒家，這批人又和大行自己的公司炒作盤分開運作。

　　所以你想全職炒股，甚至兼職炒股，要先搵到一套方法，這套方法還要經得起時間和不同市況的考驗，而家市旺，你敢盲目做好，多數得，但遇上大跌市又如何？市淡時又如何？若股市大跌後，可能靜一兩年，成交少，股價唔郁，你要諗到方法搵食。全職炒作者會「發明」很多方法，有人追成交，做了電腦軟件，一見股票成交暴升就追入；有人炒業績，找經常公布好業績的公司，在公布前一個星期入，若升了在公布前一天就沽清；有人專炒期權，市旺做揸家，市淡做沽家。

　　總之「X記投機控股公司」的炒作方法可以多種多樣，並無成法，但問題只有一個，你的方法賺唔賺到錢，要長期穩定有錢賺，唔係今日賺，聽日蝕。你細心一想，就知道做投資者在平價時買入好股長揸，比做投機者容易得多，唔怕得罪講句，如果無方法就去投機，以後生仔炒炒吓的心態去全職投機，放長雙眼睇佢地三幾年，真係死十個當五雙o架咋。反過來說，如果能生存下來，穩定賺番三幾萬銀一個月，已是百中選一的強者了。




陸羽仁

---

作者: szeyuen77    時間: 2007-9-24 11:38 PM     標題: X記控股（３） (2007/9/24)

　　美股上週五繼續上，道指升５３點，衝向１４０００點高位，有少少做雙頂之勢，若下月再減息，隨時有假穿雙頂的可能，但美國樓市危機難解，中線不能過份看好美股，美國出現經濟差，股市升的怪象。

　　上星期講起要把自己看成一盤生意，要有長期有盈利，把公司做大，唔好做一間成日蝕本的公司，還要把僅餘的錢胡亂投機。今日再講營運公司的目標。

　　千祈唔好以為定目標好容易，大部份人都無好認真咁為自己這間公司定好目標，只係模模糊糊咁有個想發達的念頭，想做李超人，做李四叔，又唔知點樣可以做得到，唔知點解就在炒作股票，以為這是帶領你發達的捷徑。

　　想發達唔緊要，要定好目標，計吓數，睇吓點樣可以發達，唔係漫無目地炒作就可以發達。陸羽仁問你一個簡單問題，全香港有１００萬人有買股票，活躍炒作的有３０、４０萬，如果個個都發達（以有１０００萬淨資產為發達的定義），香港過１０年、８年隨時勁過美國，你話會唔會？

　　　但在股市泡沫高漲時，股民好易有一個發達的感覺，因為股市一天天在澎漲，這一刻所有買了藍籌股的人，感覺上都賺了錢，但一日未沽出，這只是帳面財富，只有真係有一賣一買，財富才實質轉移，所以一日未沽貨，一日只是心理作用，當然太早沽了貨，泡沫還在成長中，股價將來更貴，沽了貨的人感覺是蝕了，至於一年之後誰賺誰蝕，現在就說不清了。

　　再講番為自己定目標，你想發達，也不妨設定發達的目標，就以搵到１０００萬為例，計吓數，要快，當然要全數投機，假設你有本金１０萬，想５年內搵到１０００萬，你試一年、兩年，如果仲未炒到有２００萬、３００萬，相信你都唔使諗啦，大部份人好快會發現，想炒股變富翁，只係空想。

　　快的方法不成，搵慢一點的方法，記得我講過７２律（以投資回報率數字去除７２，就知道投資要翻一翻所需的時間），若年回報１０％，７年多一點就翻一翻，如果你而家有１００萬儲蓄，７年後變２００萬，１４年後變４００萬，２１年後變８００萬，都好近目標了。如果年回報高一點，速度就快一點。總之２０年後有１０００萬身家，個心都會定啲啩。用這種慢方法，首先要問怎樣有１００萬本金，然後問如何以有穩定的年增長１０％，不會中途輸錢，蝕掉本金。

　　用快方法幾年搵到１０００萬的人，百中無一，用慢方法花２０年搵到１０００萬，百中有十個以上，前者夠精彩，後者相對穩陣，目標和方法，你可以自己揀，亦可以先試試快方法是否成功，若花一兩年發覺自己不是炒作好快發大達的材料，行唔到快線，都最好轉軚行慢線啦，唔係最怕揸任架法拉利碌落山坡渣都無。大家聽落就會發現，我這種講法，與是否全職炒股，一點關係都無，全職炒股可以好博命，亦可以好穩陣，我主要針對又後生，又全職炒，又搵命博的朋友，生命無Take two呀。

　　講番累積致富，最近有個老友送女到英國讀中六，我好搞笑咁對個朋友講，２年預科加３年大學，共要５年，英國學費貴到驚人，每年５０萬都唔夠，５年共要３００萬，又用７２律計，若投資年回報１０％，３００萬７年變６００萬，１４年變１２００萬，我對朋友話，希望你個女讀得成書，將來有成就，否則你唔花錢俾佢讀書，１４年後送１２００萬俾佢，對佢o既人生幫助更大！若佢讀書唔成，浪費了幾年，回來搵唔到好工，一世人都搵唔到１２００萬o架！老友當然媽我媽到七彩，話我市儈。無論如何，這個故事教訓我們，兒女教育是很大的投資（或者係開支），另一方面，識得投資，有穩定的回報，可能比接受專上教育，更令你一生受用不盡。

　　網友Altai和牆頭草都是全職炒股者，從他們的回應看，他們的思想十分成熟，而且都是慢慢摸出一條道路，他們視全職炒作是一盤生意，一種職業，並不是發達捷徑，但剛離開學校年青人，若一畢業就全職炒，心態就不一樣，年青人入世未深（唔好意思我要用這種老嘢的口吻講話，但這確實是我的感覺），特別是做事的經驗少，對世情了解太少，炒股只憑直覺，要成功絕唔容易。

陸羽仁

---

作者: szeyuen77    時間: 2007-9-26 04:00 AM     標題: 抽升何太急 (2007/9/25)

　　今天在頭條日報講起股市升得太急得人驚，可以再一談。

　　好多朋友睇股只睇指數，李股神話睇３００００點，陳股神話睇４００００點，大家就好似睇到路牌咁，按指示去做。不過陸羽仁認為除了睇點數外，還要睇上升的速度與形式，如今股市的問題是以幾唔健康的速度急升。

　　恒指現價２６５５１點，上月３０日期指結算日恒指收２３４８４點，升了３０６７點，上月３１日最後一個交易日恒指收２３９８４點，至今也升了２５６７點，總而言之，一個月升３０００點，速度驚人。以這種速度再升，下月就已經可以升到３００００點了，接著又如何呢？

　　股市上升要時間，時間可以磨平一切生活的傷痕，可以磨平一切非理性的股價。若有半年時間，上市公司報一個新階段的業績，只要盈利大幅增長，就可以把市盈率大幅拉低，把不合理的變回合理。若沒有半年這麼長時間，有兩三個月都好，股市大幅上升之後，回番少少，消化一下，讓無信心要沽貨的人走掉，打好基礎再炒上，升起來就會穩一點，起碼想沽貨的人會少一點，因為後來在高位入市者，沽貨要蝕，多數死抱不沽。若果在一兩個月內急升，上升走勢好急，而且一枝箭咁上，就會有好多獲利貨，一跌下來，獲利深者盲目出貨都有利潤，就會吸引好多基金盤以市價盤掟貨，希望鎖住利潤，所以跌起來會更急。

　　舉一個例，港交所（０３８８），過去長期在７０、８０元上下浮動，今年７月升上１３０元的高位後，造成了一個高原，然後在政府入市後急升，現價２３８．４元，或許再上３００元都講唔定，但一跌起上來，７０、８０元入貨者都可以不問價沽貨，仍有很深利潤，所以急升的股份無險可守，升得太急的股市亦無險可守。

　　炒股如煎魚，通常會慢火煎，慢慢上菜。但如今郤似猛火煎魚，香味攻鼻，陸羽仁就想問，咁猛火好易濃，乜趕住開飯咩？目前見到咁急趕的理由，係大陸的港股直通車快開通，有大筆水湧向香港，再加上１０月美國再議息，有可能再減息，除時有一鑼好消息會出動，難道想跑在好消息之前先炒高，後派貨？

　　大陸股市高，阿爺想靠港股直通行，放走部份資金，輸出一些泡沫，外資大戶睇通你條路，先借你個勢行一段，炒高易過借火，升時食一大轉，跌時又食一大轉，到真正好消息出籠時，就係大戶泌貨的日子了。

後記：明天公眾假期，網誌休業一天，望各位中秋和家人、愛人團聚，忘記金錢，享受佳節。




陸羽仁

---

作者: szeyuen77    時間: 2007-9-27 10:58 PM     標題: X記控股（４） (2007/9/27)

美股道指又升９９點，睇嚟今日期指高位結算無走雞，股市愈升愈高，散戶唔信又升，唔信又再升，升到你信為止。好多人話１０月有股災，如果好多散戶相信如此，買股窒住窒住，恐怕又唔係災得咁易，等你以為無災先至急跌都未遲。

講番點樣搞好自己間「公司」，首先要有本金，無１０萬、８萬本金，較難開始有系統的投資，至於這１０萬、８萬點樣弄回來，當然唔係叫你去借，最好就是從工作收入儲回來。如果工作做得好，恒常有比較大的正現金流流入（即收入減開支還是較大的正數），你呢間投資公司的股本就會不斷擴充。

好了，有了本金，開始投資，首先要設定你的目標，要選擇高速增長，抑或穩定增長。選高速增長，好處是快，壞處是風險高，可以發達，也可以清袋，只宜較年青者選擇，試想你３０、４０歲好辛苦投資加儲蓄搵到２００、３００萬，想用呢筆錢供條化骨龍去外國讀書，或者靠筆錢將來退休養老，你一晚輸清，頂唔頂得順先？若你選擇穩定增長，好處是穩，壞處是慢，在平靜的股市，所有東西都增長得慢，穩健的壞處不明顯，在速動的股市，好多股份都飛快上升，做穩健的投資就顯得很笨，這就是愈來愈多人想放棄匯豐（０００５）的原因。

好多人本來從不去想自己的投資目標，只是隨波逐流，事實上好多應該穩陣、或主觀上只想作穩陣投資的人，走了去做高風險的投資，結果就要付出代價，買電盈（０００８）就是好例子，即使一直有買香港電訊的股民，見到李澤楷入主把電盈變成炒股後，若性好穩健，就應該走避，唔識走就遭秧。又例如以如今的市況，買港交所（０３８８）就一定不能當穩健的投資了。

但如果我強逼你去想清楚投資目標，我估大部份人都唔會選兩個極端，而會話自己係中間派，唔使太穩陣，但又唔想太冒險。呢個答案最易答，問題唔知點去執行，但大部份人其實無執行，只係隨意咁去做。

用一個實例去講吓，網友亞K早幾日有此留言：「 陸ＳＩＲ，“亞Ｋ記控股公司”,勉強都算是一間做乜師物師, 若論本業,都可說是一門穩陣，年年有錢賺的生意,但無奈花費太多,扣除供樓，供養父母，基本消費（之前太大使），交稅，令本金太小． 經過一年炒炒賣賣, 要蝕本，是時間從新檢討業務，可否談談，像我這些高不成低不就的，拉車邊中產，除了減省消費，應怎去投資變成一間藍籌呢，因為印像中在９７股災死得最慘的就是這類人，若大跌市會否也是番版呢?」

從阿K的留言，會見到她有不俗收入，對股票有一定分析能力，但買股票的手法經常在彎角飄移，浮游在投資與炒作之間，這就是問題的關鍵。

　　理清目標好重要，假如你設定自己是一間中度風險公司，市靜時組合目標年回報８至１０％，市旺時１５至２０％，但關鍵想保住不輸錢，希望年年有正回報。你可以把資金分成兩份，投資的部份不少於５０％，投機的部份不多於５０％。投資部份是資本遊戲，當投資回報不高於１０％時，只能靠增大資本，實質上才可以有高點回報，１０萬元１年回報１萬，２０萬元１年回報就有２萬，資本多回報才多。投資部份首要穩陣，要唔輸，少冒風險，最好少進出，投資買大股，大公司一年一次、兩次的業績期，通常就係只升一轉，升幾個巴仙就收工。

　　投機部份不太講究本金，考眼光，捉時機，快人半步，難免要進出，要有合理心態去投機，不要抱「唔認」的心態去投機，咁樣仲弊，鬼鬼祟祟，應炒唔炒，蘇州過後才去追，好易高追衰收尾。

　　所以我給阿K開的藥方是鼓勵她去投機，而不是成日話唔做老鼠，但鼠癮難除，做老鼠唔係壞事，問題是你識唔識做。但投機要限注，正常可用３幾成資金去投機（咁高的市況用１至２成資金就夠了），要輸得起，講得投機，就要預這筆錢可以輸清，若頂唔順，再減些注碼。

　　比較自己公司投資部門和投機部門的業績，旺市一定係投機部門好，但要看它抵禦跌市的能力。反過來旺市亦是考驗投資部門的時候，旺市也不能有太差的投資業績，過早離場，成手現金，就增加最後忍唔住在市頂重新入市的風險，投資部門如何使用閒置現金，做點安全的區間交易，可是很高的學問。

　　假設你間公司年頭設定投資部門回報８％，投機部門回報３０％，年尾就要看看能否做到，有時做不到和大市有關，另一個比較基準是和股市同類股份回報比較，看自己會否跑輸大市。目標不是訂得愈高愈好，目標要和自己的風險胃納相適應。如果要參加股神遊戲，就要把所有本金投放在最高風險的類別，例如狂買窩輪，目標係贏幾倍，若果睇錯輸清虛擬本金，亦無所謂，但在現實的人生裏，你能忍受投機部門輸清本金嗎？若果不能，就要想辦法控制風險了。

　　若你間公司投資和投機部門年年有１５％以上的綜合回報，人生可以無憂，但現實裏不易做到，如今這樣喪升的股市，是變態而非常態。或者好多人盲中中過去兩三年可以做到高回報，要一二十年長期如此，殊非易事，記住股神巴菲特的巴郡，也只有２０％左右的年回報而矣。

陸羽仁

---

作者: szeyuen77    時間: 2007-9-28 11:44 PM     標題: X記控股（５） (2007/9/28)

　　又過了期指結算日，正常來說，在月頭的十日，股市會較平靜，大戶會在月中才發功，推動股市向一個方向發展，不過近日股市都唔太正常，所以唔知可唔可以用正常方式猜度之。

　　在牛氣沖天的股市，有好多新仔入場，犯上各式各樣新仔的毛病，例如網友

佐助的自白，也可以看到新手的無奈，佢咁樣講：「我是新仔,我今年二月尾才開始買股票，好不幸遇上三月五號既恆指大跌市七百七十七點，當時我忍痛將股票全cut loss了，有一段時間唔敢再入股玩，但後來起五月尾六月頭，我又再嘗試起股海找一點點o既利潤，起初都唔錯架  每日低買高賣，一兩日內出貨，真係眼前o既利潤都幾好，十幾萬既本錢，很快我就搵到幾萬蚊。

「但大家仲記唔記得八月十七日o既大跌市?我眼見我自己手上o既股票,幾日就差唔多跌左三分之一，果時真係好擔心  因為記得人地話真正o既大跌市是會無左三分之二，我唔想連本錢都無埋，所以又再起deep V最底cut loss了，這次對我嚟講好傷，我早前贏了o既全部都無埋，同埋lost了大約三萬幾蚊 好唔開心呀!!!

「幸好有幸發現左呢個Blog，每日睇陸sir你無私既教導同埋一班網友o既分享，我仲一口氣就睇完陸sir你果兩本書  得益不少呢。我知道咗咩係價值投資，知道自己一直都係投機，我依家想將資金投入去0005(匯豐) and 2823(A50基金)我想長hold，但0005依家入市係唔係好唔理智呢??定等跌市先入市好呢?現家2823又好貴呀!!!!但又見到恆指日日都創新高，我又好似唔入就會失去好多找錢既機會 ><"陸sir,你認為我應該全hold cash等大跌市先入好，定依家就開始入會好呢?我o既十餘萬係老本，無咩用途，之前係放起銀行收利息o既，希望陸可以覆我啦!!! thz a lot!!! 」

睇完佐助的自白，發現他都算是幾典型新仔，有幾個特徵：

第一，過去投資趨向保守，只把錢放在銀行收息，以往只是一間極保守公司。

第二，一開始入市就不知不覺成為投機者，開咗間投機公司而不自知。

既然開咗投機公司都唔知，自然不懂得投機的策略，犯上「嬴粒糖，輸間廠」的毛病，在中等速度的升市，出出入入，炒股唔識坐，賺錢不多。但跌落來不識一成止蝕，要在調整市跌三成時才止蝕，被逼在deep V之底斬倉。

第三，表面看如果他當日輸三成都唔止蝕，等到今日會幾發。不過若果係唔覺意開咗間投機公司，又唔識死永遠唔止蝕，最後一跌到來時，就會一舖清袋。所以佐助怕死在８月１７日止蝕，看來很笨，但無有怕永不止蝕的人，長線更笨，狂炒而能贏到尾者，萬中無一。

第四，想由投機公司轉番做投資公司，現在似乎太遲，因為在這種大牛市中，便宜貨相當有限，A50基金現價２４８元，距離年多前陸羽仁第一次叫人買時的５０元，已升到近５倍，或者再可以再升到３００元、４００元都講唔定，但跌起上來亦會幾慘，可以炒而不可以投資。現在的市況，狂炒容易投資難，投資公司要先練吓忍功為尚。唔係無好股，但係佢地唔會升，你買咗都好似無買一樣。

　　新仔炒股，註定要交學費，在這種狂升市中，最後恐怕新仔要交很昻貴的學費，才知道股市是什麼一回事。股市是財富轉移之地，富可敵國的金融巨企，一次又一次地在人為的股市波浪中，把財富轉移，吸乾市場的資金，一批又一批的股壇新仔，就如登陸諾曼第的士兵，在無情炮火中犧牲。

　　講多兩句，股市升得咁急，如今已進入速動的升市，快上快落，如果要開投機部去炒，只能快來快去，做吓一日鮮兩日鮮，如果贏到粒大糖，股價一回頭就要走，唔好長期坐貨，和升市初期的要坐吓貨的投機手法相反。你可能會問，咁樣短炒未必賺到錢，我會話咁樣就考你功力了，如果你間公司開咗投機部試過都賺唔到錢，咪停咗佢唔俾佢運作囉；若果賺到錢，咪俾佢細細地玩吓囉；搞公司好簡單，賺錢的部門可以繼續，唔賺錢的部門要摺埋。要抱著跌市隨時到來的心理，才可以入市投機。


陸羽仁

---

作者: szeyuen77    時間: 2007-10-2 10:37 PM     標題: X記控股（６） (2007/10/2)

　　美股道指上日升１９１點，升到１４０８７點，破１４０００點大關，日股開市升１％以上，港股料可高開，再來玩急升。

股市升穿２７０００點後，「投機的我」搵食無在低位咁易，所以我提醒大家要小心，上週五牛腩貓咪有個問題，值得參詳，佢問：「 陸sir,　早晨! 我不明白你篇文中最後一段『如今已進入速動的升市，快上快落，如果要開投機部去炒，只能快來快去，做吓一日鮮兩日鮮，如果贏到粒大糖，股價一回頭就要走，唔好長期坐貨，和升市初期的要坐吓貨的投機手法相反。你可能會問，咁樣短炒未必賺到錢，我會話咁樣就考你功力了，如果你間公司開咗投機部試過都賺唔到錢，咪停咗佢唔俾佢運作囉』

牛腩問「為何要讓新手的投機部要用即日鮮的方法用呢?

1.我看了好幾本投機書籍, 內容都是訪問交易員(投機人仕)成功的心得. 各人有自己的方法, 但使用搶帽子(差額利潤投機行為)成功的例子, 少得可憐.

2. 科斯托蘭尼先生形容用大額金錢, 賺小利這類人仕為"證券玩家". 為何要先嘗試最困難的技機方法?

3. 為何要做猶豫的投資者?是否要新手嘗試貪婪和恐懼感?

JACK D. SCHWAGER提過:在交易所內可以賺錢的方法過千種. 不明, 好不明為何投機部要用最困難的方法? 是有其他用意嗎?」

　　牛腩貓咪的提問好有意思，我講這種近似的「證券玩家」的短炒心態，似乎是好多人講炒股的下策，有需要說明一下。

　　陸羽仁經常講，我寫文章給不同讀者看，炒股程度各有不同，有等如炒股幼稚園生、小學生、中學生、大學生，好難啱哂所有人睇，我傾向從眾，即針對最多人的類別，我估計股市咁熱，好多剛開始炒幾個月、一兩年的炒股中、小學生入市，所以上篇文那段話是講俾他們聽啲。

　　舉一個例子易啲明，網友Rabbit話自有投資有投機，但上一浪跌落來，他的投機部門重創，他揸了三隻股，利記（０６３７）蝕一半，俊和（０７１１）２．４元入，唔見近三成，香港華人（０６５５）２．１９元入，唔見１３％，佢極之肉痛。其實他揸的股份已經唔算最雞嗰種，但跌落來唔識壯士斷臂，所以都幾入肉。



一浪跌完落來大市再創新高，但上次炒的今次未必一定炒，如果你哋買的股票再雞啲，如果真是一個大浪殺到上唔番去，你估後果會點？

　　我上星期五寫那段文，有幾個用意：

第一，好多人唔炒唔舒服，但在這種市道，炒股唔好抱太長線的心態。

第二，炒股要嚴守紀律，好多人有好多原因唔守紀律，最常見原因是因為佢入市的心態係長線的（或者新仔分唔開長短線，以為自己係長線），所以見隻股跌過一成時，就會提出好多基本因素分析，容許自己放「紀律假期」，等一等，隻股就沉咗入深海。所以我提醒大家在不同市道用不同心態，而家要用更短線的心態。我只係怕新仔見個市係咁升，就變成「X記盲目控股公司」，買了任何喪升股見跌下來都死揸唔放，咁就大鑊了。

第三，如果你已是炒股大學生，咁就同平日無分別，你買一隻股，定一成止蝕，佢從無跌過此位，可以唔走。到隻股升咗上去，有兩三成利潤，你定了現價低一成的止賺位，不到不沽，隻股再升，你再推高止賺位，可以食盡利潤，亦和平日無分別，唔使轉做證券玩家，未到止蝕位、止賺位就離場。如果執行紀律是有效方法，升市跌市都啱用。

所以話做一日鮮、兩日鮮，主要是講俾那些新仔聽，我話「股價一回頭就走」，其實係叫新仔執行紀律，假設新仔甚至未識執行止蝕止賺紀律係乜冬冬，但會聽得明一日鮮、兩日鮮，即係話「一唔對路就走」，情願佢地走錯咗，賺少啲，都唔想佢地見到有災難都唔識走。有時股份初初跌時好衰，陰陰地回，唔覺意跌了一兩成，你唔識止蝕，跟著來個急插，夾埋無咗五、六成，就想沽都沽唔落手了。咁o既股市，日日升得咁高興，最後好多新仔會交學費o架。



陸羽仁

---

作者: szeyuen77    時間: 2007-10-3 11:55 PM     標題: X記控股（７） (2007/10/3)

　　今次呢個市，係十年一遇的大升市，上次係九七年的回歸升市，二０００年的科網股升市，都無呢次咁大力。

　　在美元大跌，股市太高的年代，好多朋友已沽貨套了現，有少少唔知買乜好的感覺。或許可以從Yy生Yy太的問題講起，佢地問：「我們收入供”君臨天下”是ok, 但買了”餘錢”這2年就不會太多(現居賣了可套多d現),寄望將來的收入上升及投資的生意回報增加。您說得對其實同買股一般要有好defined 的 strategy. 唔可以買左先算，初初想自己住，告訴自己是好投資，話唔定住幾年, 升30%，見人d樓是貴買貴賣。

　　想想下供好貴, 不如租住比人先，同散户初哥買股一樣，7上8落。不過由第一次看到最近 2 星期西九計劃出左(前後6星期內)，發展商加了多次價足有15-20%，upside好像細好多.係2百幾3百萬差價! 好勁貴。想買都唔敢追，感到好唔抵，但的確有人接。現可能要找低水的其他選擇。

　　其實我們想/會這2年換樓，想自己都enjoy下更好的居住地點/環境，(無純租比人的投資打算，因覺買股靈活好多)，從而住了，長線保值(因買股又不會用這麼大貢捍)。

　　而家是否等股票下跌，雨天才購樓呢?
陸sir, 您看股市雨天，樓市會不會同是雨天呢? 定如地產所講，97情況不再?! 資金由股市流去樓市，大把人(及大陸人)有錢，唔多覺會回呢?
陸sir 是否歷史不會簡單的重複? 經驗不足, 請指點一下。」

　　好多網友睇完之後，可能會覺得Yy生Yy太咁富貴，自己唔係嗰皮，其實佢地問的問題，同其他問題一理相通，大家不妨一起思考一下。我們可以分幾個層次去諗。

　　第一，升市的由來。這個股市上升的大浪，是綜合了美國經濟的弱勢和中國經濟起飛而成，資金由西向東流。中國由一窮二白變小康國家，在市場化的過程中，把大量壟斷性行業公司股份化，拿部份股票到市場發售，中移動（０９４１）、中石油（０８５７）、三大銀行、國壽（２６２８）都是好例子，由於要把大量股票賣出街，阿爺平賣資產益街坊，唔買就走寶，這些股票經過幾年培養，價值慢慢反映出來，再吸引西水東來，造就出買紅色股搵錢的機會。首先不理未來中短期有無跌市，國有化企業私有化的投資機會，過三幾年就會耗盡，有得買要把握。

　　第二，個人的能力。每個人有不同的能力，由於知識和性格的限制，每個人投資往績不同，我不斷講要將自己當成「X記控股公司」，量入為出，投資增產，把細公司做大，讀書叻固然好，讀書唔叻，投資好也是一技之長，有幸生在一個國際金融中心，有幸在國家經濟起飛時投資，成功機會已大大增加。但你要問自己一個問題，市場雖好，你的投資住績如何？若買股票投資住績好好，自然應該繼續買股，若買股住績麻麻地，是否可考慮轉為買樓投資？

　　第三，買樓強逼儲蓄。彼得林治講過，買樓是最好的投資，因為好多人其實唔識買股，但買樓比較容易，細屋換大屋，一間換一間，換得三幾間，就有豐厚財產（物業價值），仲賺埋十幾年的居住。買樓好處除了槓桿大（不過升同跌都咁甘），也不易出售，所以減少身痕升少少就沽貨的風險。陸羽仁加一句，美國人好大使，有錢會使哂，強逼自己供樓，等如強逼儲蓄減少消費，對美國人特別有效，你又係唔係呢類先使未來錢之人呢？

　　第四，買股急促增值。這句話只有這三幾年有效，過去香港經濟以地產為龍頭，股市龍頭也是地產股，股市多數超前樓市半年，股票升得幾升，資金就套出來轉去炒樓，樓市亦炒到飛起。但這一兩年無出現這個現象，主要資金留在股市，樓市主要豪宅有得大升，其他樓郁得唔多，炒唔起。其實樓市和股市的現象一理相通，因為股市不是香港內部因素帶動上升，只是紅色股帶起大市，而樓市亦只升大陸錢會買的豪宅，所以過去兩三年如果唔係買豪宅，買樓好易跑輸買股。

　　講咗咁耐，結論係乜？若果未來樓市好，股市唔會差，好難話出現大股災，樓市照樣好的狀態，所以唔好諗住股市太高，買豪宅避風，若果不幸打風，豪宅亦會中招（無大升的中小型樓另計）。若然無風，股市一樣好搵。新時代唔好記住舊經驗，未必行得通。要追逐急升的資產，就要追逐紅色錢的走向，股和樓都一樣，不過高追回報高，風險也高。

　　所以關鍵睇吓自己問公司的經營住績，若過去在股市搵到大錢，不一定要套股換樓。若過去投資住績麻麻，個人花錢又多，又不妨買間樓，強逼自己儲錢。分析樓市之前，分析自己更重要。至於樓市，豪宅和紅色股一樣，升咗咁多，會大上大落，急促發展的經濟，炒作味濃，波動好大，恐怕香港豪宅會跟紅色錢流而波動。至於無乜點升的中小型樓，特別近地鐵或樓齡新那些，就可以溫和睇好。

陸羽仁

---

作者: superfrancis    時間: 2007-10-4 12:21 AM

support
put more information please

---

作者: szeyuen77    時間: 2007-10-4 11:52 PM     標題: X記控股（８） (2007/10/4)

　　股市如坐過山車式的波動，狂升急回，早幾日每天升幾百點、１０００點，昨日單日高位回落１６００點以上，心臟弱少少都頂唔順，這種市況，拉闊少少看，雖然走勢轉弱，但一兩個月內升或跌３０００點等閒事，散戶要按紀律投機、投資。

　　昨天早上見升到匯豐（０００５），感覺不良，又見高盛出報告話睇匯豐見１６１元，連一直唔郁的大笨象都推介，而且大笨象又一度炒上１５０元樓上，心中不太舒服，人人話大市升係內地同胞放假無嘢做來香港買股，但他們無理由對步履緩慢的大笨象感興趣，頂高大象唔知想做乜。結論係的確有好多大陸客一舊舊錢拿來香港買股，但操控大局的不是內地同胞，而是外資大戶，問題是他們想以何種形式食糊。小心要跌也不一定一條直線咁跌，再抽高才跌都唔奇。

　　大市咁波動，散戶好易不斷做錯事，你們的投機部門，小心「贏粒糖輸間廠」，有些典型值得講講。

　　典型一：短炒變長揸。網友Angus問：「陸sir，請給我意見吧...真係好煩今次...群星(3868)[股價及相關新聞] 我喺它上市時，用AO $10.1的價錢入左6000股。但宜家賬面已經輸咗$10000，我買它其實只是想DAY TRADE。我留意左好幾隻新股，第一日收市價都係高過開市價eg恆鼎,遠洋。所以諗住好放心，一開市升幾亳子就走。而且因為中簽率低只有10%，應該會有人買貨。誰不知沽壓o甘大 ，開市後不久就係o甘跌。大戶唔係有禁售期的咩，點解會有o甘多貨沽出黎的呢?

宜家沽又好唔甘心，怕隻股已經俾人沽到差唔多見底。但唔放又驚會繼續沉落去...我又唔知會唔會貨源歸邊，遲的會有機會升返上去喎，但我見買個的broker牌又唔係咩大行，so真的唔知可以點。」

Angus識得落AO盤，又話自己係炒即日鮮，證明係炒新股的慣匪，咁簡單的事情就唔使再來問我，你AO盤買入，當日一跌到一成止蝕價９．０９元，就應該立即斬倉，唔使等到佢而家只有８．４２元才去斬。你都識講，幾隻新股，恆鼎、遠洋AO盤買入都有升，問題只是呢隻唔升。

我教你點營運你個投機部，要攞條大數，隻隻新股開市AO盤買，假設三隻升一隻跌，食三隻，輸一隻，只要夾埋都有賺就得啦，你呢個投機部門仲係得o既，若果你話唔係噃，食嗰三隻每隻食一兩個巴仙，輸要十個巴仙止蝕，賺埋唔夠蝕，我就話唔係止蝕唔啱，係你呢個AO盤炒新股的方法唔得。

　　時至今日，你好似想把炒即日鮮的投機部變作投資部，咪傻啦，你話怕沽咗隻嘢升，無錯，無人話佢一定唔升，但請問幾時升呢？如果跌到６元之後才升，又或者牛皮半年才升，你又頂唔頂得順呢？問題是你在上市第一日無沽，唔係幾日後沽怕佢遲啲沽完再升。方法唔啱，輸多贏少，投機部門過一年半載都要摺埋啦。

　　典型二：輸錢心有氣。網友時來風買咗利記(０６３７)，一直未止蝕，現在這樣講，「若果執行止蝕將(637)[股價及相關新聞] 立斬，它即反彈那便死得很慘，因它從第一日下跌就從未反彈過.每天還再很多人依然在低求貨,過兩天又止蝕,比我更風「瘋」,還希望鸁錢,我只係唔想在最低位把我的股份送給那個XX主席。」

　　希望你唔介意我咁講，時來風提出的理由很怪，利記跌咗咁耐未彈過，你又點解覺得佢會彈，而且仲會彈到你「好慘」的高度？另外好多人博反彈，如佢哋買入後一成止蝕，又點會慘得過你？我唔係想窒時來風，只是覺得你心中有氣，影響分析。忘記了那個XX主席吧，要炒等機會搵個另一隻去炒好過。投機部門要泠血無情，對自己亦一樣。

　　最後講多句，大波動市，要嚴格執行止蝕的紀律，今天止蝕了，明天再炒過，唔係死守就可以防止被人震走，而係一到止蝕位就止蝕，睇定才上番車，又是一條漢了。

陸羽仁

---

作者: szeyuen77    時間: 2007-10-5 10:27 PM     標題: X記控股（９） (2007/10/5)

　　呢兩日股市回落，股壇老鼠四圍竄，其實大家睇睇自己投機部的業績，就知道自己做老鼠到唔到家。

　　網友Steven羅有奇細個捉魚的故事，發人深省。佢咁講：「今天看完頭條日報的文章，令我記起生活一小事，希望和大家分享。小時候我常到水塘野餐。頑皮的我愛用蝴蝶網捉魚。起初很失敗，因小魚多都不敢游近岸邊，而且一見網影便立即逃掉。但我並無放棄，把麵包投到離岸稍遠，然後耐心地把更多麵包－步－步投近岸邊。到起綱時小魚己一團團的瘋狂圍着誘餌，每每總有收獲。還清楚記得－次，圍觀的看到熱鬧情景嘩言「這才是大鱷」！做「大鱷」的感覺真好哦。」
　　
股市熾熱，好多新股民入場，陸羽仁提醒大家要認清股場的本質，股場是大鱷吃魚毛之地。大鱷佈個局，將魚毛一網打盡，那種快感可以意會而不可以言傳。你盲中中入股場，好快就加入魚毛行列，唔覺意就俾人食埋，這裏不是兒童樂園，不是大戶散戶齊齊玩玩齊齊happy的地方。
　　
我叫你地分開「投資的我」和「投機的我」，就是想話俾大家聽，你要投機，就係同大鱷對賭，其危險不問可知，唔好信一般的感覺，因為大鱷就係食住呢啲感覺，就等如Steve放入水塘的麵包，把你一步步引到他的網中。內幕消息就是這些麵包、目標價亦是麵包、短期走勢也是麵包，你大大啖咬落去，實聽遭秧。
　　
你叫你將自己當做一間公司，就係想你去睇吓自己投資部和投機部的住績，成功的部門加大，失敗的部門縮細，以網友kym的個案為例，佢買股就不太成功。佢話「陸sir大大今期教人開投資部同投機部，話邊個唔得就刪邊個，咁如果兩個都唔妥又點算，係咪買etf好過？今年年頭到而家,我投資部跑輸大市，對上一個月投機部更剛好收平，拉勻慘過淨買2828，更加唔好講2823，o的佣就益晒銀行，連續兩年都係咁。人人都想做老闆，但現實係做生意的，失敗多過成功。個市咁旺都唔能夠好天收埋落雨柴，嚴冬時都唔知點。」
　　
Kym講得啱，咁旺o既市買股都唔成功，淡市、跌市唔知點算。Kym的問題是投資部和投機部都唔太成功。無論如何，Kym都有一樣嘢成功，就係有去檢討，至少知道自己唔成功，你唔好以為我講咗等如無講，好多人炒股幾十年，一路輸錢，但無去計，亦唔知自己唔成功。Kym有自知之明，都係一個好開始。
　　
投資比投機容易，建議睇完自己間公司業績發覺唔係好掂的網友，先減低投機炒作的比例，唔好成日炒，唔好成日出出入入，若自問唔識炒仍要炒，就申請吓新股，定好止蝕，輸極有個譜。擴大投資的比例，耐心等股市大幅回落時才去建倉，建倉之初要守一成止蝕，輸咗搵低啲位再建倉。若能在相對平的價位買入好股，就盡量長揸，希望長線有好點回報。股市風高浪急，投資切忌高追，短炒例外。搞好你間投資公司的業績，旺市淡市都做到年回報１０％以上，咁就可以長炒長有了。

陸羽仁

---

作者: szeyuen77    時間: 2007-10-8 10:04 PM     標題: 羊與鼠 (2007/10/8)

恒指現價２８０００點，若果在一年前講這個價位，人地會以為你傻o既，但如今已是調整後的市況，現在流行講的是３００００點，或者３５０００點的「指標」。

網友小魚毛問：「 陸sir：我都知現時股市超過２７０００點，是一個危險水平，買貨又唔知邊隻抵，沽貨離場又似還有得升，真係兩難。睇落北水自由行一到，會有另一升浪，是否過份樂觀，希望陸sir俾d意見。」

要在股市搵食，要超前，唔係滯後，要快人半步，不是人云亦云，因為主宰大市的大戶，係超前佈局，唔係事後跟風。在剛開始公布北水自由行政策時，港股才２２０００點左右，如今已升了６０００點。在剛公布政策時，陸羽仁講香港將會Ａ股化，港人要習慣大陸股票的４０倍、５０倍PE，你當時搶入去炒仍有所獲。到如今即使唔係升咗七七八八，都升咗六六七七，你仲話「北水自由行一到，會有另一升浪」，可能就遲咗啲嘞。陸羽仁超前咁睇，北水自由行真正開通時，或許會有一升，但那時外資大戶最佳派貨時機，恐怕你買完大市一升，你都唔係咁易享受到那個升浪了。不過如今北水自由行政策拖遲未落實，大戶未派到貨，所以大市又反覆炒上同你磨吓。一個升浪初段好食，升浪中後段難啃，炒到如早，炒股已不能買完放低幾日唔睇了。

網友小潘有一段留言好搞笑，「2823（A50基金）是陸sir第一隻叫我買o既股，但我一早沽左......如果講我對2823既遺憾，我估係一萬年。」我好少叫人買股票，因為既怕負起責任，亦怕你們只是依賴人自己唔用腦（唔用腦是在股市輸錢的主要根源），所以我好少提及冧巴，但一年多前當A50還是５０元時，覺得這隻股有少少似大陸的盈富基金，大陸經濟咁好，股市都未郁，A股只是１３００點，實在抵到爛，所以忍唔住叫大家買，如今大陸A股已經５８００點，A５０自然升咗上太空了。

小潘那一句「如果講我對2823既遺憾，我估係一萬年」，應是抄襲周星駞在西遊記片中的對白，聞說這句咁精警的對白周星駞也是抄來的，周的一個富豪老友，曾經向女友說過這句極其浪漫的絕炒對白，周聽完之後覺得係絕世警句，就抄入片中。

我又想借花敬佛，話而家好多股票已經升咗上太空，或者佢仲會飛出太陽系都唔知，但如你在高位買咗，不幸跌下來又死揸唔放，恐怕３、５年後回頭，又會講番句：「如果講我對呢隻股o既遺憾，我估係一萬年」。你睇２８元買咗電盈的股民，如今的遺憾至少都有７年啦。

在咁高的股市，絕對不能排除股市喪升完可以再喪升，再再喪升，但股票升唔等如股價合理，價錢唔合理的股票，可以投機唔可以投資。買股要分開「投資的我」和「投機的我」，這個觀點我會不斷又不斷的重覆，因為我覺得你地都未係分得好清。投資做綿羊，投機做老鼠，心態好唔同，散戶可以同時做綿羊和老鼠，但唔好買一隻股是抱一種唔羊唔鼠的心態，睇吓結果係點才決定行邊個方向，旺市決定咗做老鼠買一隻股，就要抱偷雞心態，唔對路要走，雖然不一定要好短線，雖然食正方向都可以揸好耐，但心態就要天天觀察，唔對路隨時要閃，無事就行番埋去，唔好怕煩，唔好怕走錯鬼，記往唔識走鬼才會犯大錯。

做老鼠去投機要嚴守止蝕，買中股票升時可以唔好咁快放，但買錯股票跌時一定要在止蝕位投降，如果你話咁樣次次止蝕好易輸哂，我就話你次次要止蝕，入市技術差，入市時機錯，要再練吓才去炒，唔係止蝕呢個原則有問題，覺得一成止蝕位太窄，可以定夠一成半、甚至兩成，但不要放棄止蝕。止蝕原則，將會係大家炒股的救命仙丹。

陸羽仁

---

作者: szeyuen77    時間: 2007-10-10 12:22 AM     標題: 羊與鼠（２） (2007/10/9)

　　   　港股昨日單日轉向回落７００點，有少少派貨味，這種一升就回的現象出現多一兩次，就要小心。本月１８日美國聯儲局又再議息，總有一些外資大戶知我地唔知的事情。

　　買股票要分清自己係羊與鼠，做羊係投資，做鼠係投機，投資註定長線，投機多數短線。不過在現實中，好多散戶都係「羊鼠」，即係羊與鼠的混合版，有鼠之貪，有羊之慢，簡直係地球上最易捕食的肥大物種。羊鼠買股聽人講跟冧巴，完全唔知自己長線或短線，你問佢多數話長線（因為好聽啲，話自己炒股好似唔係幾正經），實際行為好飄忽，時長時短。

　　千祈唔好以為羊鼠好易輸錢，在大牛市中，羊鼠都可以好好賺，股市升到顛時，就會有好多人都賺大錢，人人去食魚翅撈飯。點解羊鼠會賺，因為佢地買股之後會盲目揸，揸到有錢賺為止，他們買股後隻股跌落來，不但唔止蝕，仲會去溝淡，結果會揸到成手貨。

　　如果係普通市況，羊鼠亂買股唔易賺錢，因為股票升得咁上下就跌，羊鼠買貨慢幾拍，多數高追，買完一跌落來，又一年半載，羊鼠坐艇的時間挺多。但在大牛市，股市超常地上升，即使大跌後又急促反彈，再上高位，不斷反覆創新高，而且愈升愈急，以羊鼠硬揸到贏錢才沽的性格，即使贏少少就走，都會有得贏。
　　
所以這半年羊鼠是賺是蝕，關鍵不是他們的交易手法，而是他們踫巧買著那些股票，如果他們買紅色股或相關窩輪，好多會賺錢；如果佢地買非紅色的細價股，好多仍坐緊艇，因為這個市狂炒紅色股，細價股未有運行也。

　　既然羊鼠咁掂，做羊鼠就得啦，買紅色股，逢跌必溝，始終有日升番上去，買得大贏得大，似乎是過去一兩年的往績，只要夠勇唔識死，就會賺大錢，問題是這種好日子會否永遠持續下去？若然如此，大家就真係聽李股神咁建議就得，唔使返工啦。

　　既然羊鼠係最肥笨的動物，你想炒股直接做老鼠似乎好啲。不過你試吓做老鼠後，就知道老鼠唔易做，你有驚覺性，唔對路要走，就發覺止蝕代價好貴，為免止蝕，有時賺少少又要走，結果進進出出，好多時只係過桔。

　　我以前都舉過一個例子，大鱷擺隻肥雞出來，就係要引老鼠，而且唔係引一隻老鼠，係要引一群老鼠上釣，擺呢個局，要有一個過程，做老鼠要看透這個過程，食盡一個細浪。大鱷剛擺出肥雞時，其他老鼠唔敢埋去時，你要第一個撲埋去（當然唔對路仍然要閃），得你一隻老鼠，大鱷唔願只係食你一隻就收工，你搶先去食，到大量老鼠跟風走埋嚟時，就係你退場的時候，唔走哂都走一半啦。如果這是才開始行埋去食雞的老鼠，就只能食一啖半啖就走啦。
　　
記得牛腩貓咪問我，食一兩啖咁短線係「證券玩家」的失敗行為，其實我係講緊炒到中後段的行為。做老鼠要有計劃，要食盡一個浪，食夠撤退，下個浪再玩過，所以整體部署當然不是炒即日鮮，兩日鮮。但食到中後段，成街都係老鼠時，如果你那時才埋位，心態要好短線，這不是做老鼠的基本部署，這是因應時勢的短期策略。

　　做羊仔唔使咁精，做老鼠更加要睇通個局，精到無影，初學做老鼠，還要交好多學費，最啱賭性強的人玩，因為他們喜歡向高難度挑戰。
陸羽仁

---

作者: szeyuen77    時間: 2007-10-10 10:29 PM     標題: X記控股（１０） (2007/10/1)

　　美股道指又升１２０點，出現經濟唔好股市泡沫化的怪現象，今日曾特首公布施政報告，減稅有利房地產股，睇嚟港股會再炒一炒。
　　
我叫大家將自己當做一家公司，睇吓自己投機部和投資部的業績，唔好分析股市住，先分析自己，睇吓自己邊瓣做得好，成績好，然後決定住後去向，加大成績好的部份，控制成績差的部份。
　　
網友Jessica 把她的持股和投資／投機的住績公開，問吓意見，想開始炒港交所o既認購輪，問大家好唔好。
　　
睇番Jessica的買賣股票成績，結果不俗，買股票大多是走短線，炒兩三個月就賣，不少都有１０幾、２０幾％回報，炒股成績不俗，基本屬鼠類動物。買中的股份多數係半新股和紅色股，比較敢在跌市中買貨，所以有斬獲。買錯的主要是細價炒作股，香港體檢（３９７）輸３４％，中國消防（８２０１）輸２６％，其餘兩隻大價股富豪信託（１８８１）和中芯（０９８１）雖然輸錢，但輸得唔多。佢好少做羊仔揸得長，唯一例外的是地鐵（００６６）和中行（３９８８），地鐵揸咗７年，賺１６４％，中行揸一年，賺４９％。另外一隻本來有機會揸長少少的大股中移動（０９４１），去年３月７０．６５元買入，但６月在８３．２元時已沽出，並無長揸。
　
　Jessica這種揸兩三個月短炒的老鼠生活過得幾成功，和她的選股及買股時機有關。阿爺把龐大的經濟私有化，造就好多搵錢機會，其中一個就係新股上市，有時大股仲搵得多過細股，因為大股貨量大，要平啲上市，才容易去貨，民企或細股貨量少，所以上市價會貴啲。雖然Jessica捉唔到升得最勁者，也食唔盡升幅，但她比較敢在跌市入貨，所以搵到食。但要記住花無百日好，阿爺而家都開始無咁多好股大平賣，愈賣愈貴，搵食機會減少；如果可以維持一二十年股市咁好環境，Jessica 就可以變巴菲特嘞，因為巴菲特組合年均增長２０％左右，Jessica的組合肯定唔止咁多，問題是這種大牛市可以連續維持幾耐。
　　
Jessica 好少長揸，但佢長揸地鐵和中行的住績不俗，可以慢慢學習長線投資策略。Jessica 炒股輸錢最多的都是細股雞股，以後記住炒這些雞股唔係咁易搵錢，要小心，要回憶一下是在什麼情境下買那兩隻雞股，點解佢哋可以令你輸咁多，以後要避開那些犯錯的行徑。
　　
Jessica過去無買窩輪，而家想炒港交所的認購輪，不外乎兩種心態，她慣咗在低位撈貨，個市唔跌，無乜平貨可撈，有錢無法投資。另外是呢一期興炒大股，好多師奶兵團都炒大股搵到食，Jessica想 買大股又嫌不易有兩三成升幅，自自然然想到買輪擴大賺價。
　　
咁o既升市，我唔敢叫你唔買輪，怕你賺少咗怨我，阻人發達唔係幾好。不過提醒你兩點，第一不熟不做，過去你的投機表現不錯，用類似的方法做，應該還可以有好回報，試新方法有新方法的風險。第二買輪等如買期權，要預咗輸哂，無論你買來炒或買來對沖，時間值天天耗損，你過去買股無輸哂的經驗，我怕你心理準備不足，所以要買也只宜嚴格限注，唔想輸哂要死硬定位止蝕。
　　
揚長避短，就係搞好自己間買股公司的最好方法，搞好自己的投資方式，好過成日去問人攞冧巴。

陸羽仁

---

作者: szeyuen77    時間: 2007-10-11 08:44 PM     標題: X記控股（１１） (2007/10/11)

昨日講Jessica的例子炒得較成功，今日想講一些另外一些例子。

網友叮噹咁講：「我間控股公司有第三個部門, 基金部 (月供同一筆過都有), 我公司成績：１．基金部最好 (結算, 三年月供plan賺42%, 19個月一筆plan賺54%)。２．投資部普通(玩左5個月，今日結算賺24%)。３．投機部好差(玩左5個月，今日結算賺4%, 玩左5個月)。我可能真係唔啱做老鼠，所以好少發言，從以上成績表似乎我要靠人哋(fund佬)先搵到食.」

陸羽仁唔知叮噹投機買乜，但如果佢的組合中有細價股，只賺４％絕不出奇，跑輸大市，皆因一隻細價股輸你幾十個％，可能嬴３隻都補唔番。

再睇網友rayray的例子。佢話：「Mr. Luk，　I am a new comer.
I have lost much money in stock market in the past and now.
I bought #340 at $1.55, today is $1.21.
It has been $2.4 in June (I am so fool not to sell at that time).
Someone told that it will rise next month, i.e. November.
Should I sell it now or hold it?
What do you think about this stock. Is it a bad or good stock?．．．．．．．．． Please help to advise asap.If I sell #340, any other good suggestion for me to gain the lost?」（rayray的大意是他／她是新仔，在股市輸了很多錢，佢在１．５５元時買了中國礦業，升過２．４元無放，而家只有１．２１元（輸２１％），佢問賣唔賣好，佢好想買番第二隻股賺番輸咗啲錢）

Rayray買隻股唔可以稱為細價股，因為如今跌了下來如今仍有７２億市值，但可以話係一隻炒股，借殼變身礦業股，炒上高位，慢慢回番去近一年低位，潮流唔興炒這些股，自然無人花彈藥將佢再炒上去。

睇完這兩個例子，有一個結論，做老鼠投機唔係咁易，特別係新仔無經驗，一買錯股唔識走，輸多贏少，老鼠尾都俾人斬埋，食幾件雞都補唔番。

所以我叫大家將自己當做投資控股公司，有幾個原因：

第一要計數，計自己公司各部門的業績，計總體業績，睇吓自己邊樣得。好似叮噹咁，如今買基金表現好，咪繼續買基金囉，基金可能選股好過你，也可能揸得長些，總之計埋管理費，佢都做得好過你o既投資部，就要接受買基金好過自己買。當然，你要小心而家基金買股都好有炒味，基金買紅色股，買金屬商品，買高增長國家，都在享受美元下跌製造出的泡沫，適當時候減持一部份落吓袋都無壞。

第二要揚長避短，投機唔得，就唔好放咁多錢投機，放多啲錢投資。直至自己試到更好的投機方法，才可以逐漸加注。好似rayray 咁，當日買熱炒的中國礦業，絕對係投機，可能佢當時不自知，無用投機的方法控制虧損。如今受虧所累，好想快快趣趣賺番輸咗o既錢，但財不入急門，買股方法唔啱，未總結好經驗，撲落去再買會唔又再輸呢？

第三投機要守紀律，止蝕係投機無法迴避的紀律。Rayray買完隻股升咗咁多，唔止賺，都要以買入價來止蝕，唔好輸俾佢。一個以錯誤方法買股的投機者，買了衰股可能好衰，買中喪升股好好都講唔定，這就是運氣，Rayray買了中國礦業跌落來死揸唔止蝕，如今輸好多；但如果她買了紅色股，跌落來死揸唔認輸，如今升番上去還有錢贏；但後者是贏運氣，不是贏方法。善炒者不靠運氣，以方法取勝。以Rayray的例子，如果有人今天介紹一隻紅色股俾佢，國指再升１０００點，所有紅色股都得，她買入的紅色股又急升，不過升完又急回，佢一樣死揸唔走，咁又如何呢？所以Rayray先要搞清楚自己是炒股還是投資，炒股要吼好入市位，買了貨要定止蝕，一到位要打靶，買了炒股升咗上去，有番三幾成水位，就算唔沽少少貨，最好都定止賺位，總之唔好輸番俾佢。唔學好基本功，在這種風高浪急的股市中，揀一個冧巴，以買一注獨贏的方式去炒，好易死o架。

陸羽仁

---

作者: szeyuen77    時間: 2007-10-13 12:52 AM     標題: 羊與鼠（３） (2007/10/12)

　　香港股市正經歷一個十年不遇的大牛市，而家仲爆緊煙花，真係目不睱給，再咁升下去，所有淡友都要翻身撲入市。牛市何時結朿，住住只是在結朿後才知道，但散戶如何在這個大牛市中盡量食盡升幅，又要避開最後致命一跌，的確講究一點技巧。


　　有網友話她在１８０００點那個調整浪已經沽清貨，一直無買番，可能她也有少少後悔了，所以最近想買番股票。沽了貨無再入市，等跌但大市無跌，或者跌落來你又唔敢買，跟往又再升番，等得幾等，的確會十分無奈，見到嗰市再升，就會重新入市。這不正正是科斯托蘭尼所說，連猶疑的投資者都會在大牛市再入市的情況嗎？


　　人在局中，有時也不易看得清，牛市泡沫一日未爆，叫人唔好買股，隨時被人喊打，所以都係叫人聰明啲買股最實際。


　　好多股民炒股炒得唔係咁順手時，就唔想再做老鼠，想去做吓綿羊，唔想炒炒吓，想揸吓長線，雖然呢種念頭可能只有三分鐘熱度，到佢啲雞股又炒起時，又唔想做綿羊了，但無論如何，怎樣在旺市做綿羊，都有一番學問。


　　股市咁旺，隻隻強勢股都貴，只有雞股、死股、呆股最平，所以綿羊唔易做，因為無乜好股肯平買，要買唯有買貴股，陸羽仁成日話，貴買好股要坐幾年，咁又點買得落手呢？


　　雖然我叫大家要諗清楚自己係老鼠定綿羊，但有時買一隻股，都可以由鼠變羊，呢種唔係無意識o既唔知自己想做乜，亦唔係短炒輸錢變長揸，而係有意識咁將一些本來作為短炒的股票，合理地變成長揸。


　　以中石油（０８５７）為例，幾年前股神在１個幾買中石油時，任你買，好少人敢跟。好了，中石油大升之後，講幾個價位，今年７月升上１２個幾的短期高位，那時入市買了中石油又如何，大家都知跟著係跌市，８月１７日最低見過９．２２元。若在７月時１２個幾摸頂買入中石油短炒，合理做法是跌一成時止蝕俾番佢，候跌定再買番。

　　大家唔好期望在８月１７日咁叻最低位去買貨，但其後升到９月時，中石油在１１元左右上落一段間，在那時有大把位買，如果你當時問我，１１元左右買中石油長線投資好唔好，我估我會話長線較貴，短炒或者有得諗。假設你在１１元買入中石油炒短線，但見佢一路上，無沽，其實可以短線變長線，想長揸，止蝕位定闊啲，以免一個小調整就震咗出局，例如你在１１元買，唔跌到１１元不沽，就有機會守到一個升浪，或者可以由鼠變羊，把短炒的股份變長揸。

假設升到好高時你想沽貨，若果想做長線的貨，就最好唔好一注沽清，要沽分段沽，若果升到一倍，高位沽一半，攞番成本，餘下的股份已立於不敗之地，就可以長坐。

中移動（０９４１）的情況也類似，今年８月升上９０元樓上高位，其後大跌，８月１７日見過７５．６元，回升後９月在１０５元上下徘徊，現價１３３元。若在１０５元左右買入，就以１０５元止蝕，唔跌到１０５元不沽，若升得太急沽少少收番部份成本，博調整再買過。

所以要由鼠變羊，有時要敢揸長啲，等如用以入袋的利潤再投資。但關鍵要守止蝕，以防真正大跌浪出現時走唔切。買股想做長線，最難就係初段，希望唔使止蝕，等隻股升到比買入價高兩三成以上時，就脫危險期，有機會加入長線組合中。

你睇完中石油、中移動的例子，可能覺得而家講無用，其實有些質素比較好的新股，你在佢新上市時買入，守得就守吓，長線都有收穫，不過又係嗰句，要守止蝕。真係升到你好驚時，又不妨沽一部份取番啲本o既。


陸羽仁

---

作者: szeyuen77    時間: 2007-10-15 11:09 PM     標題: 炒新股 (2007/10/15)

  　好多人炒新股，今日又講幾句新股。部份股民在恒指升上２５０００點後一早清哂啲股票，我話如果無貨又想買貨者，就搵啲新股炒吓，止吓手痕幾好。
　
　我識得一個穩陣投資者，平時跟唔貼市，所以好少炒股，但由於經常有幾百萬放在銀行存定期，被銀行看中，叫佢用孖展認購熱門新股，佢就投入炒新股的行列。他借錢認購，全部炒短線，所有認得的新股在上市第一天就放。最近見到他，問他戰績如何，佢話今年有超過４０％回報，可見新股其實都相當熱。
　
　我當時有幾個感覺，第一，這些炒新股賺大錢的日子，維持兩三年都好犀利，不能永遠持續下去，不過我也不替這個老友擔心，由於他不爛炒，到個市唔得時，佢自然會收手，不會輸突。第二，如果他選擇把部份好股長揸，如今的賺價可能更驚人。不過我想這個老友會咁答，佢對股票無研究，不識分好股壞股，而且賺咁多佢已經好夠，不想冒股市大跌的風險，所以他不斷申請，但一分到股就賣，無股在手，佢亦有佢o既道理。

　　我叫大家無股在手就去認吓新股，係基於以下的思維。第一，股市高，所有熱炒的股票都好貴，但新股會相對平（其實新股絕對價值按平常標準仍然幾貴，所以仍然要止蝕），因為新股要將好大手貨一次過沽出街，價錢無一成以上折讓，好難去貨，而在旺市中攞到新股者，也不急住沽，所以新股不難有一、兩成水位，其實只是把折讓反映番出來。第二，若揀中好股，一上市有四、五成升幅，更有防守水位，有機會變成長揸股。因為即使是好股，它們一上市抽升之後，又會有一段消化期，不會直線向上，大戶要收吓貨先，這樣就拖磨幾個月半年，隻股唔上唔落，中間大市可能已經歷一兩個升浪，到貨源較歸邊時，再發力炒上，追番大市升幅，就出現大升浪，若你捱得過中間的沉悶期，通常有較好收穫。綜合而言，追新股會比追喪升股相對安全少少（記住不是絕對安全）。

　　不過你要記住，在這樣的旺市，仍然有四成新股長期潛水，所以唔好合埋眼買新股，新股有大有細，有好有壞，要買主要揀大行包銷、新股公司夠大（市值起碼三、四十億以上）、最好是中資股或民企股（國企會穩少少），按這三個因素選新股，未必會選到升幅最大的新股，但可避開一上市就大跌的老千新股。大家要記住，新股升唔升，主要受兩個因素影響，第一基本質素好唔好，第二有無人炒。有質素的新股，若未有人炒，都會牛皮一段時間。

　　人人都知靚女好，不過靚女難追，好似近期新鑫好勁，上市前係人都知，這是熱炒的礦股，雖然勁，但仍申請唔易中，大手認亦分得唔多。所以亦有人博半泠，因為炒新股唔一定要揀質素最好，只要有人炒就得，而認購半泠股份會分得較多，若幸運地這些半冷股竟然有一兩成升幅，由於分得多，收穫反而更大。好似上述的穩陣投資者，他的孖展認購新股即日鮮住績，最好成績的竟然是味千拉麵，這隻嘢當時大家唔太睇好，所以他分得多，以為中咗招，點知有升幅，即沽亦執唔少。所以短炒新股的邏輯，和長揸有好大分別。

　　綜合而言，我建議大家無貨唔怕炒吓新股，但唔好買入隻隻都長揸，多數短期走人，只餘少部份長揸，而長揸者住住是較熱門又升得好者，不是愈賺得多愈要走，而是賺得多者升而有水位可守，揸長少少，捱過收貨期，就可能有好表現。永遠以成本價止蝕，就唔怕揸了貴價新股中招了。


陸羽仁

---

作者: szeyuen77    時間: 2007-10-16 10:28 PM     標題: 羊與鼠（４） (2007/10/16)

在森林偏佈食物的年代，做綿羊也不容易，路旁滿布一隻隻肥雞，它會想為乜唔食吓肉，而要走咁遠搵草食？綿羊也有迷途的時候。

網友CSL有此提問：「陸 sir，小弟有些概念唔清晰: 止賺其實係識用於「投機的我」，多過「投資的我」嗎? 在投資部盈利瞬增既時候，要否考慮賣出? 投機變投資經常性發生，但在甚麼條件情況下，會令投資變投機嗎?

之前因為出入太多，所以拼棄了投機好股。大概一年前，分段買入了一些質數好o既股票，至今賬面也很滿意，但增長卻遠超「投資的我」所預期，對套現及長揸向未明。在８ Deep-V 那天，有幾隻我覺得已有相當防守性既股票，卻差不多跌回我的買入價(e.g. 1398買入價3.7元，857買入8.4元)，因此令我對長揸的意義產生些疑問。

現在恒指徘徊 29000點，大家都很相信會有終極一跌又或者熊市的來臨。若然到了那一天，所有股票也跌回自己的過去一兩年的買入價，又或者止蝕10%賣出了。(可能假設太誇張了!)那時候，「投資的我」應會被「投機的我」喪笑一年半載。當然，「投資的我」一向都希望十年後見到工行漲價10倍吧，但中途有否進出的需要，尤其是在從未見識過的大牛市裡，望陸 sir 指點。」

CSL提問最易答的部份，相信就是「『投資的我』無沽貨最後熊市到時，會否被『投機的我』喪笑一年半戴」，我可以好肯定咁講，「投資的我」無沽貨打回原型，總比「投機的我」喪炒唔識走好好多，「投資的我」無贏錢時，「投機的我」會輸身家，佢一定笑唔出o架啦，唔使擔心。所以大跌市到來一定是「投資的我」著數。

講番你個核心問題，「投資的我」在股市喪升時應否沽貨，有網友問這樣是否由羊變鼠。是羊是鼠，源於你的心態，到底你是睇基本因素作長線投資，還是睇走勢短炒，綿羊作長線投資，當遇上喪升市時，沽出股票，不一定是老鼠，可能正因為他／她是綿羊，才會沽貨。

你投資買入一隻股票長揸，以中石油（０８５７）去年發現大油田時，股價才９元多，炒到上１０元又回頭，陸羽仁當時都話呢隻係好嘢，無理由發現咁大個油田都無大升，或許那時已有大戶開始沽。假設你９元多買入，本來想長線，心中想長線投資起碼希望一年增長１０％，７年翻一翻，點知買咗一年，如今中石油已升到１８．７８元，７年目標一年到站，而且見佢一日升１３％咁顛，究竟沽好定唔沽好呢？

你問陸羽仁，我會沽一半，背後係咁心理。第一，七年目標一年達成，股票升得咁顛，雖然可以再顛，但也怕有大調整，沽一半收番成本無壞；再勇少少，唔直接沽，用推高止賺位方法來沽，先定現價低５％為止賺，即１７．８４元，一到位沽一半，唔到位再升時，推高止賺位，又博高少少，亦得。第二，只沽一半，如果放早咗，佢顛起上來再升一倍，仲有一半呀。第三，無人知熊市幾時嚟，但係人都知這個牛市係１０年不遇的大升市，如果升到顛時一股都無沽過，衰起上來跌番落去打回原型，唔係怕俾「投機的我」笑，只係怕俾無買股的枕邊人笑，佢會話你個傻人搞咗幾年，日日睇股經，天天上網睇個乜水陸羽仁廢嗡，到頭來得個桔，唔輸都偷笑，真係無鬼用，嘥哂啲時間。所以高位沽股票還有一個副作用，將來可以講吓，「我係乜嘢高位都沽過貨啦」。

在高位沽出部份貨，客觀上增持了現金，若真有跌浪來臨時，等佢跌定時（記住唔好太心急買），買番啲貨，咁就可以增加回報。高位沽貨的最大危險是股市最後果然調整，但只是調整不是熊市，而調整時你又唔敢買，結果就錯過好股，揸到成手現金。

所以綿羊雖然不是不能進出，但應減少進出，不要抱游水心態去捕捉一個短浪，諗住幾日走一轉，咁多數會把好股沽掉買唔番。但見升得太顛，怕大浪湧過來，走一走都無壞。我並不建議大家一注沽清，若果你經常全線買貨，又好易全線清貨，這種交易手法本身的炒作心態就好強烈，你是經常想捕捉股市短期波動，並非長線投資。加上你沽哂貨攞住成手錢，股市又未即時冧，日日再升，你好易做錯事。

而睇市亦要一步步來，見２７０００、２８０００點股市開始入高位時，首先是長線投資不宜買貨，投機例外，再升到近３００００點時，投資者不但不要買，也唔怕沽部份貨，以取回成本心態沽貨最佳。若沽貨後調整完因為種種原因，來不及買番原有的股票，應向新股埋手，買優質新股，以補充綿羊投資部的持倉。

陸羽仁

---

作者: szeyuen77    時間: 2007-10-17 10:40 PM     標題: 羊與鼠（５） (2007/10/1)

個市一度升近３００００點，升到人都顛，無貨在手、少貨在手者開始唔耐煩，沽了貨者即刻呻笨。睇吓幾個網友的留言，都可以反映這種情緒。

網友Spade Ace講起「羊鼠」賺大錢的情況：「睇完陸sir今日post後有D疑惑，想問吓大家點睇，我一直覺得股票係投資ge地方...可能我心血少吧，所以最近都無入貨...除左IPO，而且仲減持左少少投資ge貨，但睇住身邊隻隻老鼠越食越肥，尤其係o個D標準"羊鼠"...跌市將短抄變長揸o個隻...賺到盤滿砵滿，我減持之後o個隻就開車...e.g 3993, 1393, 1813, 1880，心中很不是味兒，究竟我應該一齊去顛...定係坐埋一邊?我現時仲有IPO 3833,3883,3818,656,410,998 以及1800 @ 9，我手上其實現金佔我總資產八成，有時真係覺得買又死唔買又死 (擺銀行等貶值)。」

網友hardaway仲要叫救命：「 陸sir~ 有d野想請教, 我打算每個月儲5000 蚊買5行(類似月供咁)年期大概2-3年 ,錢我現在就儲左幾個月,但就未落手買~因為覺得好貴(首選939)...現在個市29500 ,唔信唔信又上到來...個問題就黎~ 我唔買~佢又升~我怕我入個時就接哂火棒,雖然月供係可以分散風險,但都唔係唔怕跌,而我年期都係2-3年,2-3年後可能用來結婚或買樓做首期咁... 現在心裡1516 想買又淆底 ,唔買佢又唔回... 如果買左第2個月開始就回 咁都尚可，因為我之後個d月份係可以好平咁入，但如果佢半年後想大回,我可能供用2年係得個桔(同d息) 最慘係我供左1年半後大回....我個時真係會灰左，錢又要用無得等.... 仲要之前手手買入都係貴....現在我感覺到我就來忍唔到手,我知道我都忍唔到手就係大跌之時....但....請求救，另外 3328
3968
939
你最睇好邊隻?? 救我呀~陸sir。」

好有投資經驗的網友牆頭草，亦開始有啲耐煩了：「陸 sir : 你話"如果升到顛時一股都無沽過，衰起上來跌番落去打回原型，唔係怕俾「投機的我」笑，只係怕俾無買股的枕邊人笑，佢會話你個傻人搞咗幾年，日日睇股經，天天上網睇個乜水陸羽仁廢嗡，到頭來得個桔"。但問題是如果現在hold太多現金, 先會俾枕邊人笑話 "都冇落雨, 你就日日擔往把傘".
當然到大跌時, 佢會唔記得講過.我覺得你講的是一般市況下的操作, 現在是非一般市況.
定10%止賺, 好快就被震走. 8.17 前后就好正路地好多人清了倉或減了磅. 好多網友都如是.
講話唔氣頂就呃你啦.高位走 ?? 甚麼是高位, 己冇定義.
真頭痕.」

網友的留言反映群眾心理，當好多較小心的股民都好唔耐煩時，就會再撲入股市，接貨結朿這這升浪。陸羽仁今日在《頭條日報》專欄已經講，而家最賺到錢的係唔怕死的「師奶」（請各師奶不要介意，亦有好多男人有差不多的性格），佢地一見跌就去搶，深信跌完會升番。這些就是我講的羊鼠型人物，甚至係純種老鼠。

記住股市係財富轉移之地，我相信散戶長賭下去，純種老鼠能贏錢的只屬少數，羊鼠由於唔知記做緊乜，比老鼠更差，一個大浪打過來，會死得好慘。你會話陸羽仁你唔好口臭啦，大浪無來噃？我就話這些大浪幾年才來一次，的確不易來，但炒股小心點無壞o既，留得青山在，長炒長有嘛。

好多散戶一注入哂所有貨，又一注清哂所有貨，他們要求自己睇得很準，要賺到盡。真正專業的投資者／投機者，唔需要咁要求自己，買貨分段買，沽貨分段沽。投資者揸貨揸得長啲，最後起碼保持少少持倉好啲，沽貨唔好沽得咁盡，咁樣沽完貨遇到大升市都唔會太痛心。若是投機者，天天有股票可買，即使８．１７沽清所有貨，現在仍然有好多股可炒，特別是注碼少的朋友，專吼新股，搵隻熱門新股申請１０手、２０手，博中１手，中咗就有不俗回報，累積下來都會不錯。注碼大的朋友頭痕少少，但跟風炒短線機會都有，炒影子股也是一個方法，唔驚無股炒，只驚自己無命炒股。

陸羽仁

---

作者: szeyuen77    時間: 2007-10-21 12:58 AM     標題: 斟酒 (2007/10/18)

  　　大市跌完即勁彈，充份顯露牛市的強勢，目前的市況，頗有愈盲目炒愈易賺錢的味道，似乎只要唔驚就會發達。

　　網友阿Ray有個問題好有意思，佢話「以下係您（即陸羽仁）５月個網誌講o既：『好多人問我股市幾時會爆，例如問我邊個月會爆，我自己當然會估，但現在去估當然唔準，因為要估杯啤酒幾時滿瀉，和幾時斟滿和斟酒的速度有關。什麼叫斟滿，就是估計這一年成份股盈利增長能支持合理PE的高水平，這個水平一年比一年高，假設今年的合理高點為２３０００點時，愈接近／或超過這個點數，風險開始上升。什麼叫做速度，就是上升的速度，我而家估係１０月定１１月跌市意思不大，假如６月大市己急升上２２５００點，升得咁急又點可以玩到１０月呢？所以愈升得急，泡沫愈多，距離回吐的時機愈近。』

　　　　阿Ray問我現時怎看斟滿和斟酒的速度？目前升得咁急又可以玩幾耐呢？投資的我又幾時可以出擊呢？

　　阿Ray問問題時是今年５月，那時恒指大約在２０３００點至２０５００點之間，當時剛在３月跌市之後，那次跌市跌到１８６００點，然後彈番上２００００點樓上，那時已接近未跌之前２１０００點的高位，好多人睇淡，覺得升上２１０００點又會爆。

　　當時大市經歷一次主要調整，大家驚魂未定，傾向睇淡，但我當時覺得經過一次大幅調整後，股市應會再創新高，應會破一破２３０００點，心底估計高位約在２５０００點左右（當時自然估唔到今年會見３００００點）。當時這段回應傾向樂觀，主旨是只要大市不是升得太急，還慢慢有得升，不應睇淡，應該睇好。

　　後來８月調整得咁深，非始料所及。唔知阿Ray記唔記得，佢在５月亦問過我對沖基金套息交易幾時再拆倉，我當時的反應是３月剛拆完倉，５月又拆，唔係呀嘛？不過在８月恒指又升上２３０００點時，正似升勢未盡之時，突然再爆次按風波，套息交易又拆倉，結果大市更急插到１８３００點。

　　做一個事後孔明，８月跌市不在大戶部署之中，他們本來要利用一個又一個調整浪賺錢，這次調整來得太快出人意表，大戶無乜水執，所以外圍一穩定下來，港股就挾番上，而且升到突，因為８月跌到落１９３００點時，所有要沽貨的人都沽走了，挾上更不廢力。

　　　　不過真正影響了今年香港股市走勢者，還是阿爺在８月公布要搞資金自由行，雖然政策至今仍未過關，但偷渡錢加QDII（合資格境外投資者機制）的錢已流入香港，炒到顛。港股穿２５０００點後勢如破竹，直衝３００００點。這種點數，超過所有樂觀者在年頭的估計，近一兩個月再調整預測者另計。港股明顯超買，偏離基本因素，變成一個純資金炒作市，就是我早兩日講的「一個炒局」，這種股市不要嘗試用合理PE去分析，否則只會貽笑大方，因為這種高PE根本不合理。但短線而言，超貴PE的股市，當然可以更貴。

　　所以阿Ray以今年５月同一條問題在現在問我，我仍然有類似答案。

１．                不要光看點數，也要看上升速度。今次斟酒的速度快很多，斟滿的時間會短很多。你打開恒指走勢圖，過去兩年都是一個又一個小山谷，比較平穩地上升，但到９月之後，卻似一個大峽谷的懸崖式山坡，急促抽升，若維持這種抽升趨勢兩三個月，好快要見３５０００點、４００００萬（記著記著這不是我的恒指預測，不過升得幾升，話３５０００點都唔夠激，要話４００００點才能刺激眼球了）。斟酒太速，不能持久，再玩一兩個月都好長了。

２．                阿Ray５月提問時，恒指在２０３００點，年頭時恒指也是２００００點，其實５月時恒指剛回到今年的起步位，當時是升市初段。如今問同一個問題，但恒指比年初升了９０００點，就算不在頂位，也在中高位了，所以對市況的看法不應和５月時完全一樣。要留意今年至今升幅，這是大戶的水位所在。水位愈深，夠位食糊，風險愈高。

３．                股市愈早愈顯著調整，升勢愈健康，冷靜一下，明年還有得玩，調整後又會回到上升軌中。若果一直升沒有大調整，急抽完再急抽再再急抽，危險度也愈高，記得１９７３年１月，港股才９００點（已是上一年急升後的點數），但同年３月，兩個月內，恒指已升上１７００點，升了一倍，結果就爆。８．１７的低位是１９３００點，升一倍是３８０００點，若果港股短期內喪升到這些水平，結局不難猜到，最後的爆烈性下跌都好惡頂。所以早調整早著。

４．                在喪升的股市中，頂部好難預計，一兩天升１０００點、２０００點話咁易，誰能估到頂位呢？睇這種股價圖，過一兩日可能已高好多，總之自己訂好策略，調節EQ，知所進退。投機講順勢而行，逆市沽空也要小心，可能未等到跌市，已經被人挾到投降。

５．                至於跌到那些位「投資的我」可以出擊，現時我唔識答，最好等升完之後跌市到來時，觀察吓係邊種跌市，係大調整抑或係股災，首先要分清係乜嘢跌市，才決定乜位買嘢。到時不難睇到，因為兩種跌市跌法都好唔同。

最後補一句，香港咁成熟的經濟，按理不應出現這種咁急的升市，這種股市應該只在發展中國家出現，但大家應該記得，我話過大陸把泡沫輸出到香港，大陸是發展中國國家的股市，我們現在就享受這種泡泡浴了。

後記：明天重陽又小休，星期一見。

陸羽仁

---

作者: szeyuen77    時間: 2007-10-24 12:49 AM     標題: 洋跌市 (2007/10/22)

美股大跌，港股裂口低開少不免，散戶是沽是揸，自然十五十六，除了要分析大市，也要分析自己的倉位。

　　先講美股道指跌３６７點，但除了企業盈利不如理想和股災２０週年，又睇不到更大的利淡的消息。從一個外人角度看美股，股災２０週年固然不應該是跌市理由，而美國樓市不濟，企業盈利受影響，乜唔係一早知o既咩，點解這些消息令會美國這個成熟股市跌咁多呢？

　　美股在大幅減息後破１４０００點做出雙頂，出現我話經濟唔好股市創新高的「怪現象」（其實一啲都唔怪，減息係可以刺激股市短期上升）。美股後向視乎今個月底聯儲局會唔會再減息。

　　大家都知美國的大行有左右財金政策之能，這幾家大行的業績都唔係幾掂，心情唔好，主要係次按問題令商業票據市場受重傷，上月減息後略為舒緩，但債市並無復元，債市唔得，不單令投資銀行大行已包銷的商業票據要上身，還有連串的負面影響。過去一年美國上市公司併購活動頻繁，做中間人的投資銀行大賺特賺，出手的私募基金，背得就有投行支持，用很大的借貸桿槓去資助收購，債市唔掂，私募基金何來有錢收購，投資銀行邊有生意做，所以投行當然想聯儲局再減息，進一步挽救債市危機和開水喉解決市場資金不足。

　　不過上月聯儲局大減息以後，美股因減息而急抽，表面看次按問題好似已經解決（實情係未解決，未解決），不再有進一步減息的理由，外匯市亦估計美國不會再減息，所以美元一度反彈。簡單點講，美股唔插吓，又點「逼」到聯儲局再減息呢？上週五美股大跌後，市場又開始預期聯儲局要再減息，所以美元又開始散散地，今早歐元升上１．４３的高位，日圓又升到１１３．８點（對沖基金唔知會唔會又玩套息交易拆倉），整個市場開始營造減息的壓力。既然美股要玩跌市谷減息，我地都要奉陪了。

　　美國減唔減息，說不定現在已有腹稿，只是我們不知而矣。目前有兩種可能，第一，美國係一個真跌市，經濟唔好要跌番１０００點、甚至２０００點，港股點叻都好，起碼都有一浪大調整。第二，美國只係一個催谷減息市，美股本週會跌，但唔係崩潰性下跌，而美國在下週三聯儲局議息後有望再減息，那樣跌完之後，就會抽番高。

　　所以在跌市之初，不用太驚，股市升得咁高跌吓好正常，睇住個市點跌，再去判定點做。好多人問股災和大調整點分，股災來到時，一跌跌１０％以上，美股８７年一日更跌２２％，港股現價２９４６５點，跌一成要一日跌２９００點，若跌到２０％，更是一日跌５９００點，見到咁o既跌幅，就要識驚。再者，過去１９７３年，１９８７年，１９８９年，１９９７年，２０００年，咁多次股災，只有１９８９年和１９９７年不是全球性股災，８９年是中國六四事件，９７年是亞洲金融風暴（也是亞洲區的），多數一跌起上來全世界一齊跌，你見咁樣全球性o既大龍鳯，都應該識分，知所走避。

　　不過最後再加一句風險管理，你睇吓自己揸貨多唔多，若果揸得爆哂倉，就要小心，無論如何幾時都要守紀律止蝕，假設你在星期五追了貨，今日遇上跌市，一日就到止蝕位，唔理你點分析，都應該止蝕，等一彈就斬，睇定再玩過。咁唔好彩一買就要認輸，可能係運氣唔好，可能係眼光唔好，但止完蝕又係一條好漢。呢期流行做盲俠，點跌都唔沽，最後就可以賺錢，若你買中紅色大股，過去就係咁（買中細股唔止蝕，就由盲俠變死俠了），不過將來係唔係咁就無人知，盲目買股的人贏一年就得，我又未見過盲目買股的人能在股市長勝噃。


陸羽仁

---

作者: szeyuen77    時間: 2007-10-24 12:50 AM     標題: 反彈 (2007/10/23)

　　美股道指反彈４４點，主要是估蘋果電腦業績會好及受貝爾斯登在大陸投資刺激所致。不過美股在大跌３６０多點之後，只反彈４４點，反彈唔夠有力，怕佢彈完要再尋底，要壓住到月底聯儲局議息日。
　　大跌之後通常會反彈，恒指昨日跌了１１００點，中段跌幅一度收窄到跌７００點左右，但結果因為大陸A股腳軟而跌了下去。如果今日反彈超過６０６點，彈番到１０天線以上，並守得住這個位收市，大市有望脫險；若果反彈力水唔足，先彈後彈幅收窄，後市就唔太樂觀；以美股這種彈力，港股唔易彈番上１０天線樓上，固然也要看看阿爺股市有多大刺激。
　　昨日和中環茶友傾起，跌市時好多人望阿爺股市升上去沖喜一下，但係發覺大陸正計劃發射嫦蛾一號探月衛星，暗呼不妙，因為剛開完十七大選出新領導層，大家希望阿爺發吓功托吓市沖喜一下，怎知它竟然搞射衛星沖喜，唔係搞托股市沖喜，認真濕滯。
　　講開又講，中共九人政治常委中，新星李克強接替黃菊的位置，預料會出任常務副總理，管埋金融，睇吓李克強一副冷面殺手模樣，而且佢係胡總愛將，當會繼承胡總的手硬風格，若要調控金融，將有他的一套。
　　講番港股，我經常講，圖表係人造出來的，若好友佔上風，不用三天圖表就回到比較健康的向上走勢。若然大戶想造淡，就唔會俾指數升上去，如今是淡友暫佔上風，因為圖表走勢甚差，要睇吓好友今日如何反攻。
昨日期指持續低水，經常有過百點以上的差幅，就令人比較擔心。大戶可以買賣現貨，可以買賣期指，期指出現低水，即係話沽期指的人要付百多點的溢價，如果一時間低水，可以解釋為有大倉在手的大戶想沽現貨沽唔切，所以先沽期對沖，但期指持續低水成日，就唔應該係有人沽唔切現貨，而係不斷在大手沽期指。昨日現貨不時反彈，顯示有頗強的購買力在低位買貨，但每當期指出現嚇親人的１５０點以上低水時，又拖番現貨落去，怕只怕係北水買現貨，鬼佬沽期指，等你彈得咁上下，又來一插。所以大市要好轉，期指低水的情況亦要改善，如果今日大市顯著反彈，期指又持續高水，就可能脫離危險期。

美股跌又重燃減息希望，令美元走軟，日圓急升到１１３．８水平，對沖基金的套息交易又開始拆倉，若把日圓扯上１１２、１１１的水平，市場又會起恐慌，小心。

炒股要順勢，如今跌到半天吊，跌得未夠深，要買平股未係時候，反而大市衝番上２９０００點樓上兼企穩，再去追也不遲，雖然貴啲，但從炒作角度亦都安全啲，減少一追就要止蝕的機會，寧願買貴，唔好買錯。

陸羽仁

---

作者: szeyuen77    時間: 2007-10-25 12:28 AM     標題: 土牛發威 (2007/10/24)

　大家若不善忘，應會記得大約在一年半載之前，我們看見大陸股市調整，跌不了一兩天，就急促反彈，我叫佢做Deep V調整，那時我們心中還有點笑大陸股市炒得咁顛，跌都唔跌多過兩日，顛得過份，估唔到如今香港也變了這種股市。

　　兩個月前我叫大家適應吓大陸式股市，３０、４０倍PE等閒事，５０、６０倍PE都唔奇，到這種事情真正發生時，我自己都唔係咁適應了，畢竟講是一回事，眼見這種股市又是另一回事。

　　在目前的市況下，大陸人賺錢，散戶賺錢，因為他們逢跌即買；短炒的鬼佬輸錢，機構莊家輸錢，因為他們按傳統規律行事，也因為股市波幅太大；至少目前如此，講幾個月就唔敢包了。中環茶友講起有些炒短線的老外基金最近沽了貨，對港股「牛到唔牛」的走勢大搖其頭。

　　「投資的我」可以有原則，但「投機的我」就唔可以硬頸，只能看風轉舵，順勢而炒，唔好逆勢運作。

　　股市昨日的走勢逆轉了早前的跌勢，首先升穿番早２９０００點的１０日平均線，收市大幅企穩其上，即使這一兩日回吐，如果不再跌穿１０日線，此浪調整話咁快又結朿。另外期指亦已擺脫早一日整天低水的狀況，走番上高水，好友搶攻佔番上風，期指買盤轉強。

　　早兩日頭條日報的專欄用上「土牛遇上洋跌市」的題目，如今初步點算，土牛暫佔上風。港元走勢咁強，大陸水源源而入，陸羽仁特別打幾個電話問吓大陸朋友，攞吓佢地點睇港股的感覺，發覺係睇好居多，好多人唔知幾時都已在香港開咗戶口，買緊港股，實行兩地股市立體聲咁炒，他們認為H股對A股還有差距，有排炒咁話。又話內地錢多得好緊要，正在源源不絕流入香港。

　　陸羽仁唔係想從內地朋友口中攞到港股分析，只係攞一種感覺，得到o既印象係非常睇好港股，從一個側面反映他們看到快有港股直通車政策，個個人都超前過來炒港股，把H股看成為A股互動的市場，聽到陸羽仁都驚驚哋。

　　出現這種鬼佬對北水的局面，股市後向都唔易分析，你知陸羽仁從來覺得鬼佬真係郁起上來好大力，覺得佢地會係最後贏家，但目前情況可能未到最後時刻，亦可以嘗試代入鬼佬角色諗吓嘢。外資大戶在２００００點上下累積了大量好倉，如今升了９０００點，水位充足，本來至少可以玩吓調整，食吓波幅，然後明年再玩過。不過一試吓沽，即刻有北水大軍接貨，唔係點沽得落，硬沽有少少浪費彈藥，最大問題是阿爺的港股直通車政策應出未出，最怕一啟動沽貨，港股直通車政策就殺到，就會中伏。

　　假如我係外資大戶，沽唔落就會調頭再推上，送你一程，既然你逼我賺錢，逼我食深啲，我都唔同你客氣啦。大市彈番上２９０００點樓上，隨時又再炒過。

　　無貨少貨的網友，面對咁o既局面幾無奈，有網友問：「陸sir, 你好! 其實我已經睇左你個blog好耐o架啦, 但是一直都無留言過, 今次我都真係忍唔住要講番兩句!! 小弟行年廿七, 買股票的日子不多, 從前因為爸爸在金融風暴時一次清袋, 所以對股票一直存有戒心, 所以都係近幾年先開始買, 起初也只是買下d銀行股用作投資, 但是一直唔多升, 直至上年才好似坐火箭一樣, 股價狂升, 升當然好開心, 但是一跌就好驚, 所以一大跌市就閃, 等跌定就再入, 如是者出出入入, 直到上月個市好似痴了線一樣, 我就好驚升得越快跌得越急, 所以就沽曬手上d貨! 點知......結果大家當然知道! 個市繼續"痴線", 而我就繼續"痴呆"! 想入市又入唔到, 等佢跌又唔幸跌! 陸sir, 你話我依家應該點算好?」

　　無貨在手的網友，結果都會再入市。我話而家係大陸式顛牛市，升會升到你唔信，跌起上來又會好傷。按我o既講法，在顛牛市中，「投資的我」沒有太多穩健的投資，集中火力認吓新股就算。「投機的我」就順勢而炒，可以跟風炒熱股，例如炒即將上A股的紅色大股，講明係投機，限注，止蝕，係最重要的兩大原則。

　　上述提問的網友，我唔知佢錢多還是錢少，若錢不多，單是認新股都玩到你唔玩。若是錢多，可以拿兩三成出來炒，叫得做炒，預得個市升到顛隨時大跌，總之輸一半自己都頂得順，就可以去炒，限注係限自己可能輸錢的總數。記住咁o既市，炒股唔可以博命，否則隨時無命。




陸羽仁

---

作者: szeyuen77    時間: 2007-10-26 12:24 AM     標題: 巴菲特對羅傑斯 (2007/10/25)

　　港股、A股熱炒，外國重量級投資者都以紅色股為焦點，股神巴菲特認為A股過熱買唔過，但商品大王羅傑斯就話睇淡美元，要盡沽美元資產，要買人民幣資產，認為人民幣十年可以變３倍，甚至４倍。

　　巴菲特話A股貴（H股有３至４成折讓，相信在股神眼中亦不便宜），其實是他一貫的價值投資論，佢睇公司的賺錢能力，要買股價比賺錢能力有深度折讓的公司股票，現在當然買唔落A、H股，所以他會沽中石油（０８５７）。這種分析和我話「投資的我」沒有太多好股可買一樣。「投資的我」講求股份價值，最後主要歸結為公司盈利能力一條，公司盈利能力愈好，股價愈低，愈有投資價值。公司盈利能力相對價錢的最簡單量度標尺，是為市盈率（PE），在公司市盈率３０、４０倍比比皆是的年代，的確沒有好多筍貨好執。

　　股票貴，作為「投資的我」可以唔買，可以沽貨，但好難沽空，因為股價偏貴之後，可以更貴，可以貴一段時間，唔買都會好揼心，唔好話沽空了。

　　投資界有好多猛人，都曾經被貴價股票玩死。好似２０００年科網股狂潮，無論講價值的巴菲特，或是愛投機的索羅斯，都唔睇好。巴菲特唔買科技股，他其實是睇淡，卻謙稱自己唔識科技，所以一股科技股都無買，在那個科技股狂升的年代，他無買科技股，投資自然無表現，被很多美國股民罵他唔識嘢，他也只能啞忍。

　　索羅斯仲弊，他眼見科技股不是超高PE，而是無PE，因為絕大部份科網股未曾賺錢，所以他認為有機會，沽空之，於是就大量沽空科技股，結果就中重招，最後索羅斯要半退出江湖，也是科技股一役沽得太早輸大錢所致，結果科技股終於大跌，可惜索羅斯也等不到那一天。

　　喪升股喪升再喪升的例子實在太多，好像八十年代日股狂潮，日股升到３萬幾點（也是３萬幾？）那時候絕大部份股票過１００倍PE，有些更有２００倍PE，如果你在４０、５０倍PE時沽了日股，後來一年得個睇字，已經夠難受。如果你是沽空了日股，沽完之後再狂升，更會給人一Q 清袋。

　　記著股票的價值可以計，平貴可以貴，貴到那一個價錢會大跌，計不出來。正如計數好叻、炒股好差的牛頓咁講，他計數咁叻，都計不出股票會被一班瘋狂的人推升到哪個地步。

　　巴菲特睇股票的內在價值，在現實世界，股票絕大部份偏離內在價值，唔係平就係貴，巴菲特就係搵股票偏離內在價值而特別便宜的時候去投資，佢買中石油，因為當１元多的中石油股價，只反映內在價值三分之一，有深度折讓，所以他入貨，以股神的計法，我當中石油５元反映當時的合理內在價值，加上油價上升和發現新油田的因素，斷估計１０元已完全反映中石油的內在價值，超過這個價，加上股神認為A股過熱遲早要跌，他沽貨亦十分正常。

　　不過巴菲特睇淡，即使佢睇啱，不等如股票會即跌，股價開始偏離內在價值，愈來愈貴，仲可以貴好多。我昨日和中環茶友傾起股神睇淡A股，我話股神看法超前，經常超前一兩年，所以佢見到股價貴都會忍一陣先至講，忍一陣先至沽，但到他公開睇淡或沽貨時，股價也不即跌，反而會升，因為佢自己都知自己倉位大，唔係在好熱時沽，根本沽唔出，所以股神睇淡後，隨時還可以再炒幾毎個月，甚至更長時間。

　　反而羅傑斯取態較飄忽，他早大半年前曾經講過A股有泡，後來又縮番唔再講。如今睇到美元弱勢，話要將全部資產轉成人民幣，又好似睇番好大陸股市。羅傑斯是炒家出身，講嘢炒味亦濃啲，所以近似「投機的我」，頗有順勢而炒的味道。他的觀點是第一，美元弱勢，而且這是五年十年的長期弱勢，所以要盡沽美元資產。第二，人民幣強勢，也是五年十年的強勢，所以要買人民幣資產。第三，佢無話全部錢去買A股，佢可以只是存人民幣存款，可以買房地產，可以投資實業，可以投資上市前的股票。而炒上市股票的錢，可以只佔少部份。如果你話俾我聽羅傑斯把全部資產買哂而家上市的A股股票，我就唔係好信，我估佢會分散投資，佢雖然長線看好大陸經濟和人民幣，但作為大投資者，佢要估計短期大陸股市或樓市如果大跌，對他的風險有多大，做吓壓力測試，研究如何去，控制、平衡、對沖這些風險。

　　我叫「投機的我」限注去炒，就是散戶控制風險最簡單的方法。你用三成、五成資金去炒，只要唔炒窩輪，研究吓萬一輸一半頂唔頂得順，自己可以決定炒唔炒。炒輪要預輸清，資金只能更少。想做巴菲特或羅傑斯，有得揀噃，甚至精神分裂，一半做巴菲特，一半做羅傑斯都得啫。

陸羽仁

---

作者: szeyuen77    時間: 2007-10-26 11:14 PM     標題: 巴菲特對羅傑斯（２） (2007/10/26)

　　

  　在盲俠都會贏的年代，網友Tonton話佢個朋友聽人講叫佢去買1199（中遠太平洋），點知記錯買咗1919（中國遠洋），咁就升左一倍，記性好啲都死。咁o既市唔夠盲就贏唔到大錢。財經專欄作家面對這種市況，即使十分冷靜，也不能勸人不賭，只能勸人賭得精明。　　

如果好似股神巴菲特那樣，就夠資格勸人唔賭錢了，所以他在大陸說：「中國股市表現非常強勁，當有這麼多人愈來愈醉心炒股，他們應注意是用甚麼價錢去購買，不應興奮過度，因為不同國家的股市總有一天會走到極端，就像美國高科技熱潮。我比較謹慎，當很多人對股市趨之若鶩，報章頭版就刊載股市消息，就是該冷靜的時候。」

　　股神這樣的年紀，有這樣的身家，即使佢唱衰完股市再升，佢都唔怕你鬧佢，普通人叫人唔買股，阻人發達，肯定是罪過。而財經專欄作家叫人買股更是職業病，他天天寫作，若果話睇淡叫人清貨，一股都唔好買，以後仲日日寫乜嘢？衰起上來叫完人清貨，個個市天天升，更加無運行。

　　股神舉了科技股的例子，就係話中國股市有泡沫，遲早爆。市場傳聞他買了國壽（２６２８），他更特意澄清，大家應該記得，開始傳他買國壽時，國壽只是２０多元，他在２０多元時不買，現在５１．２元更加不會買了。他在２０幾元時無買國壽，可見國壽不符股神的入股標準，股神的入股標準是股價相對內在價值有深度折讓，他在１元多入股中石油（０８５７）時，中石油相對他計出的內在價值有６成多的折讓，所以才入貨。如果２０多元的國壽不合股神標準，５１．２元的國壽更不合格，更何況百多元的平安保險了。

　　假設股神講的話是對的，大陸股市在３年內爆泡，我們應該如何自處？我估可以總結出幾條意見。第一，有貨在手，即使作長線投資者，若低價入貨，若見股市再抽升得太顛，不妨沽出部份股票，收回成本，剩下的是無本投資，心安理得。第二，長線投資者若非經嚴格挑選價值特佳股份，現在不要盲目跟風買入紅色大股作「長線投資」，因為現在的股價太高，不宜長線。第三，顛牛市升完可以再升，大股炒唔上，亦可以炒細股，你睇這一兩天細股亦開始郁動，所以永遠有股可炒。炒股無問題，問題是要控制自己的心態，要限注，不要股市愈顛，自己更顛，要知道贏錢只是虛幻，只有輸錢才絕對實在。
　
　網友Shirley問起，「我發覺我的友好們(包括我自己)都對後市感到不安, 對於那些已累積極可觀利潤的愛股想高位獲利但又怕恨錯難返, 以下便是我個人仍持有的股票: 平保 /國壽 /中銀香港 /工行 = 招股至今；中海油 @ around $5.7。　現心大心細想全部沽清(在7月中大市在23,000 點前已沽出部份股份, 五隻中除了中海油已全是0成本)然後安安樂樂等大調整時再買回. 我明白知易行難, 但低買不高沽又好像不大妥當, 陸老師有何高見??

現時心態 (希望老師在分析時有點幫助吧): 我對這年多所賺取之利潤已很滿意, 亦沒打算賺到盡; 反之想休息一下那個滿載numbers & $$$ 的腦袋。若老師感覺我有點精神分裂(也有一點吧, hee hee)也請多多見諒, thank you!」

Shirley，你現在怕跌市，所以想沽清股票求個安樂，不過若果沽完之後它們又大升，恐怕你同樣不安樂。你有三種方法可揀：一，一注沽清，但你無咁好彩一沽完就股災，你要心境超級平和，才能忍受沽完股價再大升之痛，最大問題是要忍住不重新撲下去買過，手持現金，好易手痕。二，見高位沽一半，再見高位再沽一半（邏輯上總會剩番少少貨在手，享受一下顛牛的魔力）。三，沽清現貨，把所得拿一、兩成出來買H股指數的窩輪，若再大升，可以用窩輪享受這一段的升幅，若不升，這一、兩成再博的資金就當佢輸清。方法好多，自己用腦諗吓邊一種適合自己吧。

陸羽仁

---

作者: szeyuen77    時間: 2007-10-30 01:22 AM     標題: 沽空不易為 (2007/10/29)

美股道指上周五升１３４點，主要是微軟等公司的盈利預測樂觀。如今環球匯市和商品市場已在大炒美國減息，歐元升到１．４４，油價亦大升，升到內地油站唔想賣油，這種局面對中海油、中石油有利，對中石化不利。

港股升穿３００００點之後，今日又會隨美股抽升，李四叔估恒指聖誕後上３３０００點，股神睇股，愈睇愈高。唔信會升的股民，如果手上無貨，甚至開始想沽，網友「自資之明」留咗段咁樣o既說話：「啲錢係銀行會咬人，我最近想玩期貨...我現有6w....想沽空恆指小期貨．．．．大概有4000點彈藥可以挨價，股市計8000點為底，升到30400點，接近4倍(4x8000點=32000點)，過往記錄2至3倍就爆，加埋市場好似信心受壓，有一觸即發之勢，暴跌1W點之幻想時常出現….啊…」

在牛市中，買跌難炒，在顛牛市中，買跌更是難上加難，唔係唔會跌，係你唔易中。即使我們做一個假設，暴跌必將來臨，但問題是那一天才到呢？會唔會升到沽空者頂唔順才跌呢？股市升得多，大跌唔出奇，可能明天跌，也可能升到４００００點才跌，邊個知？逆市沽空的風險就在這裏。

在大升市當中，我經常問經紀張「散戶指數」，問吓佢愛炒的散戶做緊乜？特別是炒期指的散戶做乜嘢多？過住呢個散戶指數都幾準，由升市之初到中段，如果一早睇錯邊做淡的散戶，沽了期指，不但不會平倉，更加會加注溝淡，希望最後一跌快啲來臨，讓他把早前輸的錢一舉「吹」回來，他們一路沽期指，心中一路大叫跌跌跌。如果我見到散戶淡倉仍多時，就會較放心買貨，因為期指兩邊有對手，散戶沽得多，即係大戶揸得多，大戶係好友，特別是過去期指走勢主導大市，大戶做滿期指好倉，嗰市亦好難跌。最近這個「散戶指數」唔太準，因為流入的北水太多，狂買現貨，倒過來頂住期指，不過無論如何，散戶指數仍有參考價值，當好多散戶認為大市要暴跌，個市反而仲有一段安全期。

「自資之明」講起沽細碼期指，又使我想起年中一段往事，話說６月恒指抽上２２０００點左右時，經紀張有個客想沽細期，問我點睇，我當時話全年仲睇好，沽期指要小心，唔買都唔好沽呀。後來經紀張把意見轉告那個客戶，那個客無理，照沽，沽空一張細期後，大市上過２３０００幾點，但７月尾開始回落，到８月更因次按問題而大跌，經紀張個客當時贏大錢，我問經紀張個客平倉未，經紀張話個客無平倉，話估計大市起碼要見１８０００點，不但無平倉，還在２００００點加了注沽多一張。我之前叫佢唔好沽，結果佢中我唔中，當時更加唔敢俾咁多意見，但心中暗暗為他擔心。

結果大家都知，個市在８月過後好似食咗藥咁，大幅挾番上，經紀張個客見個市升番到２４０００點、２５０００點時「唔信鏡」，又沽多兩張溝淡，前後追加兩次，沽一張變咗沽４張，結果輸到喊，終於在恒指３００００點時打靶，夾埋４張細期指輸足２８０００點。陸羽仁心諗，但經紀張呢個客，在２２０００點時沽第一張細期，結果愈買愈大輸足２８０００點，多過原先第一張的２２０００點總數。

股市升得多會跌，暴升之後隨時暴跌，港股這兩個月急升穿３００００點，升得太急應該調整，但經兩浪小調整之後，股市立刻炒上兼破高位，短期走勢是向上而非向下，而家沽空風險極大。最近期指加了按金，每張大期指按金由１２萬幾加到１５萬幾，港交所加按金，好可能是看到好倉或淡倉其中一邊（甚至是兩邊），倉位集中在少數人手裏，倉位集中風險增加，所以加按金。無論倉位集中的是好倉或淡倉，都顯市後市風高浪急，可以暴升亦可暴跌，總之不會平靜。

強如索羅斯，走去沽空科技股，科技股終於暴跌，但大跌前尾段的暴升，已足夠把索羅斯挾到輸大錢。沽空期指，風險無限，散戶若非有超凡功力，真係唔好落水。

陸羽仁

---

作者: szeyuen77    時間: 2007-10-30 11:32 PM     標題: 十居其九（１） (2007/10/30)



　　昨日聽一個股壇大孖沙講，而家好似地下有錢執咁，隨街都會踢到舊錢，他炒股三十幾年，未曾遇過，７元買新世界，升到２２元沽，一變三，以為好醒，諗住跌完係啲再買番，點知升到２８元，連佢都話自己老襯。


　　咁o既市，只要你肯炒，十個有九個有斬獲，另外一個係例外，網友小羊係其中一個，佢o既經驗咁，「你好我是一個股票市場初哥(以前都是媽咪幫我投資) 之前細價股抄時收到同事仔消息去買隻毫子股, 心想可以賺到幾仟已經好開心, 怎料股價一路跌, 我太驚所以在最低位走了, 因為怕再跌下去, 後來又上番去但我已經賣了, 所以心很想賺回失去的, 於錯誤私決定下高追了維達(3331)上市後幾天在7.1元追了貨, 以後幾日不斷徘徊6.9元, 但我沒有作出止蝕行動, 反而再於5元溝了貨平均價6.4元. 現在維達股價試過跌破4元, 我作出止蝕又會輸很多, 我可以怎麼辦呢？」


　　小羊係比較黑的新手散戶，錯事第一件是買毫子股，細價股上一浪炒完大部份未再郁，所以高位買咗細價股無止蝕者大部份仍坐緊艇。診斷斷係細價股、炒股唔係唔可以買，但買咗一定要止蝕，唔對跌就斬，唔係會好慘。
第二件錯是係追新股穿位唔止蝕，據統計咁旺o既市都有四成新股跌破招股價，所以買新股、即使是買了有質素的股份，都要止蝕。新股有雞股，有好股，新股的雞股唔在講，一跌永遠起唔番，唔止蝕永不翻身。新股的好股，一上市升完都係有收貨期，收乾貨才會郁，例如招金（１８１８），幕後人都收貨收咗大半年，要等一個華資大戶頂唔順沽貨出貨，幕後人才發功炒上。又例如錦江，同一個包銷商，又有概念，股價一直唔郁，到郁就要留意。又例如中信銀行，上市後毫無表現，昨日隨大市抽升，唔知係開車定係彈一彈，亦可注意。總之一句講哂，買咗新股，即使認定係好股，都要止蝕，情願沽咗長期留意，等佢突破再追入。

小羊第三件錯事係溝淡，買股唔順，應該減持唔係溝淡，贏要谷，輸要縮，唔係輸時走去谷。炒股大戶炒落唔順手時，輸不單縮，輸時要反手，好似索羅斯９８年狂沽港股遇上政府入市，沽唔落就反手造好，執番少少，不過此一著太高難度，散戶好難學，總之記住唔對路唔係溝淡買多一倍，唔完全打靶至少都減番一半貨。

　　小羊做足三件錯事，所以在有金執的市況都賺唔到錢。面對咁o既局面，小羊更要小心，你連一般小老鼠的感覺都沒有，旺市賺唔到錢，無利潤墊底，小心下跌時輸入肉。
　　今天講了十中之一輸錢嗰個，明天可以講吓另外嗰九個會點樣賺到笑。
陸羽仁

---

作者: szeyuen77    時間: 2007-10-31 10:43 PM     標題: 十居其九（２） (2007/10/31)

  　期指狂炒高頂住結算，有點今年６月feel，一路推高，風高浪急，但亦風光無限。美國減息期近，如只減０．２５厘，又無乜好說話講，小心大市先行回吐再炒。


　　　昨日講旺市十個炒九個賺錢，惹起一些回應及問題，不妨講講。早上已有老友講起，陸羽仁你咁講，即係勸人去賭。亦有老友講起另一些旺市輸錢的故事，他有個朋友做醫生，一年前突然同佢講，炒股好順手，想唔行醫轉行全職炒作，老友心諗咁浪費，做醫生頭頭尾尾加埋實習和讀專科差唔多讀咗１０年書，咁就放棄，真係讀書無用囉。不過最近老友再見番呢個醫生朋友，醫生垂頭喪氣咁講，炒細股炒到唔係幾掂，輸咗大錢，好彩無放棄做醫生。老友心諗咁戲劇性都有，又話全職炒股，跟住又縮沙，呢個醫生叻仔一名，讀書時中英數科科都咁勁，估唔到個市咁旺，咁叻仔都話炒股唔掂。


　　朋友唔係好識炒股，問我點解會咁，我話做醫生一年都有２００萬收入，一年前佢個醫生朋友講得唔行醫去全職炒股，應該都搵到唔少，例如揸住２００、３００萬本金去炒細價股，炒到有８００萬、１０００萬市值o既貨都唔奇。人會把一時的收入，視作永恒，醫生哥哥會諗，我一年炒股賺６００萬、８００萬，咁仲使日日睇症咁辛苦，不如全職炒啦。不過，細價股在今年８月大調整跌了下來後，未上番過去，醫生哥哥原本值１０００萬的細價股組合，隨時得番２００、３００萬，打回原型甚至倒輸，所以咪無得轉行囉。旺市炒唔中邊，或者睇中升或跌但買唔中股票，亦都可能中招。


　　昨日講到要止蝕及唔好溝淡，引發一些問題，網友bonnie問係唔係一定要一成止蝕，佢話假設佢３．６元買了錦江酒店（２００６），認為是好股，打算長揸六個月、一年，但佢股價已跌穿一成止蝕位，又係唔係要止蝕呢？有時好難作決定。
我可以咁講，「投機的我」一定要止蝕，你諗住炒股，勢色唔對唔止蝕好戇居。買股一買就跌，睇錯股，或睇錯入股時機，通常衰開有條路，起碼會衰一段時間，投機唔止蝕好易愈陷愈深，最慘係遇到沽貨對手係大戶，有意裝你，你唔止蝕就中伏。

咁「投資的我」又點呢？我認為主要看你對目標股票有多大認識，若認識好深，知道佢的價值，甚至可以準確估到目標股票的盈利，的確可以唔止蝕，股神巴菲特話睇中超值好股，買完即跌，佢會愈跌愈買。例如中原老細施永青去買對手美聯物業（１２００）的股票，全行兩大地產代理，已經做咗全行七、八成生意，如果施永青睇住自己盤數，上半年賺３億，發過豬頭炳，自然唔怕撲入去買美聯，因為他估到對手條數都唔差太遠，即使買完大市調整美聯股價跌，施生亦唔怕再買，因為佢知道哂對方的底牌（只是舉例假設，並非敍述事實）。

問題是好多人對上市公司的了解只是半桶水，估估吓，所以即使是投資，睇錯亦最好止蝕，即使買入對象是好公司，也可以候低買過，除非買入的注碼好細。

以錦江為例，現在只是尋底股，唔知有無人炒升唔升，想投資可以分注買，若想買１０萬元，先買２萬５，睇吓點，其餘３注見佢升再追入。又或者一注都唔入，日日去齋睇，睇到佢升先至追。以bonnie的例子，如果她把所有注碼在３．６元買入，我係佢如果重注會先止蝕。買股最怕輸，長線投資也要揀啱位入，最好一入即升，脫離止蝕位就有機長揸。

網友T的問題也類似，佢問溝淡，他認為對於弱勢股，這做法故然是上上之策。咁對於比較強勢嘅股又如何？若果唔係摸頂，大市又向好，手頭資金又容許，溝淡會否比減持好？

這樣又回到上面的問題，第一，你要識分「強勢股」，關鍵可能係實力股而非強勢股，強勢股可能只是呢期興炒作的股份的代名詞，我就話可以唔止蝕的股份一定係實力股，盈利升幅較理想，問題是新股民識唔識分盈利好壞的股票呢？如果唔識分，買咗熱炒雞股，愈溝愈死。其次，你話大市向好，又有錢，是否溝淡比減持好？的而且確，大市向好，跌完又升突，令盲目死坐貨的人獲益，咁就要睇吓股市係唔係永遠係咁，若無信心永遠係咁，相信音樂終有一日會停，咁都係唔溝好過溝了。

記住，遵守紀律要付出代價，在大牛市中，要止蝕又唔溝淡的股民，搵錢一定少過盲目死揸兼見低就溝淡的人，但遵守紀律的得著係防範風險，萬一大浪到來時，都唔會一Q俾人打沉。

陸羽仁

---

作者: szeyuen77    時間: 2007-11-1 11:53 PM     標題: 炒升值 (2007/11/1)

　港元脫鈎的傳聞，由市場傳吓傳吓，變成顧問公司的報告，言之鐅鐅話金管局任總向中央的溫總提過，想港元和美元脫鈎，變成和一籃子貨幣掛鈎。消息炒到港元好熱，搞到金管局昨日要向市場沽出七十八億港紙，為港元升值潮降溫。

　　美元弱化的趨勢的確影響深遠，港元和美元掛鈎，美國因為經濟弱財赤高、貿赤高，才令美元轉弱，但香港經濟強勁，本來港元應該升值，香港應該加息唔係減息，但因為要跟住美國，港元跟著美元走，人為地貶了值，香港變成實質負利率，會令香港的資產看起來更便宜，不但會令香港經濟過熱，泡沫升溫，亦會有輸入性通脹。所以有經濟學者和銀行家都叫政府研究吓港元是否應該和美元脫鈎。
　　這些討論每逢在港、美經濟走勢背駞時就會出現，一啲都唔出奇，出奇在今次脫鈎的消息傳得實在，而且港元升到要金管局入市干預，就有少少唔尋常，頗有點炒升值的味道。
　　今次由一間顧問公司爆料話任總上京和溫總談過港元問題，顧問公司叫Medley Global Adivisors(MGA) ，是大炒家索羅斯的前僱員Richard Medley在９７年成立，由於索羅斯名頭太嚮，一聽到佢個大名，即使係佢的徒子徒孫，亦令人生起很多聯想。
MGA出咗這份報告，令外資流入香港更火上加油，搞到金管局昨日要再入市沽港元，我最關心的是有無人炒港元。現實上起碼有兩種可能， MGA所說真有其事，港元升得有道理， 另一個可能是MGA所說並無其事，但卻可掀起一輪炒風。

這一排港元持續強勁，外界一直以為是資金流入炒股，如今突然增加一個炒港元的可能，若有炒家，到底在炒緊乜冬冬？

現實上港元和美元脫鈎的可能性極低，退一萬步講，即使任總咁身痕向中央提出，中央也不會同意，阿爺正進行金融大改革，改革期間最怕出亂子，香港在中國金融的大前線，是中國金融的對外窗口，中央部份金融改革又在香港作試點，你而家去放開聯系匯率，萬一搞出大混亂，會唔會影響埋中央的金融改革呢？

這個道理我諗得到，炒家也諗得到，既然港元脫鈎的機會好細，咁炒港元又為乜呢？大家應該記得９７、９８年的金融風暴，當時索羅斯的量子基金和外號野狼的另一個對沖基金，以「雙途進攻」的策略狙擊香港，他們既在匯市沽港紙，亦在股市沽期指，金管局要捍衛港元，就要大力挾高利息，以增加借貸沽港元的利息成本，結果把銀行同業拆息最高挾上３００厘，咁高息搞到股市大跌，炒家沽了期指，就食到應一應。

如果而家有炒家放出港元將脫鈎會升值的消息，並大手買入港紙，此舉風險極低，成本有限，因為港元匯價有上下方保證，買「錯」港元升值，跌下來也輸很少，但假如炒家同時大手揸了期指，一犬吠影，百犬吠聲，外國好多投資者會把錢投到香港，大買港股，因為港紙一旦和美元脫鈎，在現今情況，港元升三成都唔奇，在這個預期下，港股變咗打６５折，等如２００００點多一啲，在外國投資者看來又有得博噃。我話港股食哂類固醇，住後唔知可以炒乜，無想到仍然可以炒港元升值，這豈不是當年「雙途進攻」的反轉版，當日炒家沽港紙沽期指，今日揸港紙揸期指，挾高港元炒一轉。

上述只是陸羽仁的臆測，信五成就好了，但如見港元持續被人挾在高位，金管局要不斷入市，港元脫鈎之說又澄而不清，就要小心港股在大炒升值概念，引鬼佬投資者落水了。

陸羽仁

---

作者: szeyuen77    時間: 2007-11-3 12:12 AM     標題: 炒升值（２） (2007/11/2)

美股道指昨晚狂跌３６２點，跌幅２．６％，主要原因是金融股大跌，因為證券界估計美國最大銀行花旗集團資金短缺，將會減少派息，Credit Suisse 調低花旗的評級，搞到好多金融股出現五年以來最大的跌幅。

聯儲局減息０．２５厘和市場的預期一致，美股在高位本應回吐，但早一日美股不但無回吐，還要升１３７點，不過應該發生的事始終會發生，美股昨日終於大跌，嘔突早一日的升幅，看來美股即使跌完反彈，都會有一浪調整。

美股咁跌，亦應觸發港股有較像樣的調整了，港股在周二期指結算日曾經挾上３１９００點關，人為味道強烈，過完結算就如失去力托的無型之手那樣，自由浮動，昨日遇上美股大升，也是應回吐未回吐，但也是向上乏力，今日開始應被美股觸發一浪較深的調整。

昨日和中環茶友講起陸東哥哥的投資建議，話港股明年合理價是２８０００點，所以調整３０００點、４０００點才合理，有茶友睇得更淡，話今年應該調得更低，起碼去番２５０００點，陸羽仁睇完港元的炒作情況之後，開始有少少保留，認為調整都未必去到咁低。

有網友問起，為什麼一講完炒港元，港元匯價就回，是否資金已經撤走。陸羽仁追查一下那個所謂任總見溫總建議脫釣的事，原來完屬虛構，並無此事，但炒港元的是聰明錢，搞得出咁露骨的炒作，作得出咁具體的古仔，必有所圖，無咁易走。金管局入市沽港元，自然效果是港元匯價回吐，跟住拆息就落，這是預期結果，但唔等如炒港元的錢走咗，真正問題是港元炒作是否自此停止，抑或過一段時間就來，我就估無咁快會停。

投資睇長線，投機睇３個月中期走勢，要確定方向，才可以定短期策略，港股升近３２０００點，中期走勢都唔易睇，到底３１９００點是這幾年升市的浪頂，往後股市要大插一直跌落去，抑或這仍然只是小浪之頂，回吐後還會更上層樓呢？若港元有這種炒作，我估住後還會上高位，這是中期方向。

不過中期方向朝上，唔等如短期股市唔會回吐，港股升咗咁多，回吐也是極合理之事，遇上美股大幅調整，港股調整的排頭也不會弱，應會插深啲，不用太心急一注入貨，若有無型之手操控大市向上，通常在月頭會失重下墮，到月底又會上番，有錢買嘢炒作都不用太心急也。

陸羽仁

---

作者: szeyuen77    時間: 2007-11-6 12:32 AM     標題: 博奕 (2007/11/5)

　　溫總出來為港股直通車下註腳，講到差唔多要炒車咁滯，等如為港股淋泠水，今日少不免要插吓。

　　溫總為何要在這時出來講話，值得參詳，大家應該記得，上星期外資炒港元升值炒得很厲害時，突有個索羅斯徒孫開的顧問公司，出咗份顧問報告，話金管局任總研究過港元和美元脫鈎，仲話佢上京同溫總討論過，不過溫總反對，陸羽仁查過係流料，你估呢段炒港元的新聞溫總又睇唔睇到呢？

　　溫總當然知道，他知道在烏茲別克一定會遇上香港記者（香港電子傳媒次次領導人外訪都會跟），他要準備答記者問，當然第一條問題就係估記者會問任志剛有無見向他建議港元要和美元脫鈎（可惜記者無問！！）然後自然會聯想一下這些炒作港元者所為何事，溫總咁聰明，自然會想到既然所謂他見任總談港元脫鈎的消息既然是流料，放料者當然不會預咗港元會脫鈎，放流料炒作，當然是為了炒港股了，所以溫總這番有關直通車的講話，十分貼近時事，專門針對外資炒作而來。

　　外資借炒港元脫鈎炒港股，既要搵信這個故事的老外接貨，同時也盯緊隨著港股直通車下來的祖國同胞，打算叫華洋傻仔一齊接貨，港股真係高處未算高。溫總唔理你如何滾鬼佬，只關心祖國同胞，他眼見洋炒家這樣喪炒港股想搵祖國同胞派貨，心諗我放港股直通車下來，到時內地股民在３００００萬幾點、甚至４００００萬點的高位接了貴貨，將來大跌之後，怨我點算，說到底是中國政府在高位放開直通車俾大陸人炒港股，不能說政府無責任。所以溫總就出一招：拖。

　　溫總講出港股直通車有三、四個問題，總之問題多多，唔似一下子可以解決，所以大家唔好期望直通車咁快開車，等如叫鬼佬唔好借我呢個消息來炒，此舉既可為港股降溫，亦可免內地人在港股高位下來大舉入貨接火棒。

　　香港人見港股直通車唔開住，難免會鬧阿爺出爾反爾，８月中外匯管理局公布有關政策時的確草率，未和中國銀監會、中國證監會等其他部門協調，但如今那些技術問題應可解決，但其後出現兩大變化，第一是港股急速炒高，第二是連港元都借埋來炒，溫總見到這些巨變，都不能不變變招了。

　　溫總同炒作大市的鬼佬博奕，未知外資大戶有何反應。我地不妨借索羅斯個腦來諗吓嘢。

　　索羅斯在《Soros on Soros》(《索羅斯論索羅斯》一書中談到看錯市的問題，索羅斯話他承認他會看錯，所以他很警覺，經常反覆求證。作者追問可能只是發生一些不對勁的事情，但很快又回到他預想的軌道上，他怎知自己是否看錯市？索羅斯話，當期望和實際有差距時，他不會即時沽貨離場，他們重新檢視自己的假設，然後嘗試看看什麼地方出了問題，他會修正他的假設，他會發現一些特別的事情在發生影響，他不會坐視不理那個差異，但會批判性地檢視，最後可能不是賣掉股票，而是加注（頁１２）。
　
　如果外資大戶單是炒港股內地因素，炒到２萬幾３點點應可收工，內地A股炒到幾顛都好，都也可以和H股無直接關係，因為兩地分隔，內地股民好難炒H股，不過QDII打開第一個缺口，港股直通車更是開大口，讓內地資金炒港股，有了這些機制，理論上不會A股炒上天，H股郁都唔郁，兩地股市會拉近，港股更會跟大陸股炒，可以炒到天咁高。假設大戶是衝著這些開水喉的機制而來，認為A股一日未爆，都會大力扯著港股向上，內地巨量資金湧港，會大大炒起港股，他們在這個假設下來炒港股，再放點港元會脫鈎走強的消息，把港股的期望吹大再吹大。

　　如今溫總出來降溫，但不是全面剎車，港股直通車只是緩開，不是永遠不開，再者QDII仍會繼續，只是有調控地放水而矣，內地股市和港股的連繫鏈條未斬斷。牌面觀之，假如阿爺話港股直通車永久不開，QDII又立刻叫停，又或者A股開始暴跌，炒高港股的假設就不再有效，大戶應該反手造淡。但現時阿爺放水只是減慢不是停車熄匙，外資大戶又好難話反手造淡噃。總括而言，港股炒得高要抖吓氣，大戶見你想個市跌，咪順勢插吓順下你意，但外資大戶未需要掟股離場。

陸羽仁

---

作者: szeyuen77    時間: 2007-11-6 11:46 PM     標題: 博奕（２） (2007/11/6)

港股單日瀉１５２６點，創歷來最大單日跌幅，大跌市之後，正常會有反彈，要睇吓今日彈唔彈。

網友twohitsix留言，「陸sir，今日市況跌得比我想像中深，如果我們假設大戶今個月是好倉底，今日的大跌會唔會深左少少呢？上月中28500有承接，同今日直線向下可謂差天共地。今次我都要投你芬佬朋友一票（估恒指會穿28000點），原因是我認為溫總的言論，有好大誘因令到本來在香港炒緊，利潤頗深的地下北水平倉走人。加上政策有真空期，剛剛講完無資金自由行，短期呢樣野都唔會再實現，地下北水與其等明錢來港，不如而家沽貨骨水先了。

我到現在都相信，推恆指由九月24000點直升上32000點的除了外資大戶，更有地下北水。最少係呢幾個月，地下北水係同大戶同行，先至可以有咁強咁直線的升幅。而家溫總唔比人來接火棒，咁會唔會形成一個鬥快沽的局面？上個月中外資大戶發現沽落去沽唔落，今個月會唔會有個風險係想做好，但係北水係咁沽做唔上？或者也可以是好急咁插到好深，逼所有北水吐貨出來，先至再彈上也未可知。請陸sir評論我的想法，謝謝﹗﹗﹗」

我和twohitsix部份感覺一樣，昨日的跌幅比想像中深，原先預計跌１０００點左右，若中段跌超過１０００點都應該反彈番少少收市，但結果上午已跌到阿媽都唔認得，中午心諗到歐洲佬瞓醒沽貨仲大鑊，下午果然急插，到現貨收市都無彈，即日鮮博反彈買期指者全部要打靶，結果期指就以全日低位收市。

大市跌幅比想像中深，自然會增加後市的悲觀感覺，可以羅列一些利好利淡因素，先講淡因，第一，跌幅深，恒指現價２８９４２點，反彈後若再跌，２８０００點的防守空間已經有限，試一試５０天線穿２７０００點的機會上升。第二，跌幅大究竟是正常的基金減持，抑或外資大戶調整炒作策略，還是地下北水撤退？若是後兩者，對後市的影響較大。第三，昨日路透社報導內地同時增加QDII（合資格境內投資者）投資港股的限制，由過QDII基金投資股票那部份不設限，變成為限制投資港股不超過３０％，若此說屬實，不但港股直通車出軌，連QDII投資港股的比例都會大減，北水的水喉明顯關細了。

至於利好因素，主要是李四叔唱好，話跌可以買啲，再跌可以買多啲，你知李股神好有威力，至少可以頂得吓。

陸羽仁昨日話大戶炒作港元兼港股，想食大茶飯，無咁易轉淡，咁大個倉又有現貨又有期指，邊會話轉就轉，我如今仍保持這種分析，但大戶整個倉未轉淡，不等如他們不會玩一玩大插插，插深一點，說到底大市一枝箭咁升上來，信心一失，要跌好易，大戶既可先造一轉期指淡倉，再向下插深啲，食埋向下一輪的波幅，同時借跌市向阿爺施壓，揸重貨的散戶現在都開始媽媽聲媽溫總，跌到２７０００點媽得更大聲，若跌到２５０００點，直情嘈到拆天，那時會有好多意見，話阿爺出爾反爾，做嘢唔規範，唔透明，唔正常，唔合理，嘈得幾嘈，現時高唱以民為本的阿爺，又會鬆吓口鬆吓手，起碼放多啲QDII落來，咪好易再炒過囉。

股市正常調整後高位跌１０％，跌到２８０００點左右都差唔多，唔會跌得太多，但揸旗的大戶點玩唔易估，他們可以當無事，也可以玩大插插，小心小心，總之要按紀律行事。

陸羽仁

---

作者: szeyuen77    時間: 2007-11-7 11:51 PM     標題: 十居其九(３) (2007/11/7)

　　早前睇講過在大牛市十個買股有九個賺錢，一直無機會寫埋下集，講吓九個贏錢的故事。

　　呢次升市由８月１７日大奇蹟日的１９３８０點升番上來，直剷上１０月３０日的３１９４０點，狂升１２５６０點，從低位計上升６４％，升勢極急，總之由８月中一直到上月底之前，瞓身買就會贏，所以夠膽炒者，十個無九個賺錢，都有八個賺錢。

　　投機如賭錢，如果順風順水，１元變２元，２元變４元，好易變大富翁。我睇報紙雜誌仲講有個小股神今年至今賺４００幾％，即係１元變２元，嘩，真厲害，唔係１變２，係１變５，若果佢年年咁好景，由１０萬元開始炒，第１年變５０萬，第２年變２５０萬，第３年變１２５０萬，第４年變６２５０萬，第５年變３．１２５億！！！都唔好計落去囉，５年已是身家３億的富翁。

　　遇上１０個月賺４００幾％啲人，我o既策略係唔想阻人發達，既然人地條投機方程式咁得，我就唔應該評彈咁多矣。

　　不過我想補充少少，這種十個炒股九個賺的市況，好難長期持續，升幅咁快，
莫講５年，１年連續咁升都唔得了，若失去了這個大市狂升的背景，５年賺３億的故事自然不易實現。

　　不過投機和賭錢亦有不同，賭錢的風險較難控制（因為普通人賭錢好少計數），但投機的風險可以控制，若知道自己在投機，就要認真諗諗應唔應該控制風險。最基本的控制風險措施是限注與止蝕。

　　先講限注，假如我係小股神，同樣以１０萬元開始炒，炒到第２年尾，變咗２５０萬時，股市已經好高，若果沽一半貨，收埋１２５萬，剩番１２５萬繼續炒，同樣升足５年，剩下來炒作的資金都變成１．６億元，雖比一啲都無沽少咗一半，但都有１．６億身家，都唔錯噃。更大機會係股市升完會跌，跌番哂落來時，仲有收埋嗰１２５萬，比原來的本金１０萬多好多，應該都感覺ok。限注，見高位減持，並不是一般賭徒常做的行為，一般人不但不會減倉，而且覺得現在投機得米，就會不斷將新錢投入，例如加按層樓去炒，甚至同好多人借錢去炒，大浪一來，就會一無所有。

　　再講止蝕，以中石油（０８５７）為例，炒佢上A股，１１月１日高位見過２０．０５元，但中石油A股上市雖然暴升到４０幾元，但H股本身已炒完上A概念，再遇上溫總講話，H股反覆下跌，你揸了中石油，有兩個做法，一是止蝕，將來再炒過，另一個是死揸，博將來賺突。

　　以過去這一年的經驗，死揸好OK，以今年頭上A股的國壽（２６２８）為例，１月３日上A股日，H股高位見過２８．８元，跟住回落，若死揸不放，中間在３月見過１８．４元的低位，但如今已是４０多元。

你怎知中石油H股不會像國壽一樣，深度調整後再上高位呢？陸羽仁唔知，唔係無機會咁o既事，但好漢不吃眼前虧，叫得做炒股，唔對路要先閃，等無事才行番埋位。同樣道理，若今年１月頭在２６元、２７元高位投機買入國壽，跌一成先打靶，不要期望自己可以在低位１８．４元入番，但跌完升番上２２元時，隻股牛皮了一段長時間，還有大把機會入，若２５元止蝕沽出，２２元、２３元入番，都唔係好失禮，但中間沽了的一段時間，就避開可能大跌不止的風險。當然，沽了貨亦有入唔番的風險，但叫得做炒，應該會比較機動出入，點都會追到啲貨。

過去大升市時買十有九賺，到如今的調整市時，就唔係盲買一定得，嚴守紀律，順勢而炒，始終是「投機的我」炒股的不二法門。

陸羽仁

---

作者: szeyuen77    時間: 2007-11-8 11:42 PM     標題: 五星級大鼠 (2007/11/8)

　　美股杜指昨晚大跌300多點，港股今日開市就跌超過１０００點，再展開下一浪尋底，如果短期之內唔能夠重上３００００點樓上，又係一個反覆尋底的格局。

       網友Dennis問起外資大戶、地下北水和QDII三種力量如何左右香港股市大局，我始終相信是外資大戶左右大局，問題是他們大炒港元在美元弱勢下會脫鈎或引發通脹及資產泡沫，未似咁快炒完港股，但他們做吓調整波浪唔出奇。地上北水是搶在港股直通車前頭而來，如今港股直通車唔開住，地下北水有可能回流，但也要看內地股市顛唔顛（若顛會回流），以及港股好唔好炒（若好炒點都有部份錢留在香港炒）。而QDII就會形成一條較可見的水源，慢慢而持續地投入港股，特別和內地A股有較大折讓的H股大股。結論是大方向仍向好，但短期不排除再調整。

　　在這種局勢下，股壇老鼠股繼續炒，唔想俾湧上湧落的巨浪湧到一身傷，自然要用足老鼠的求生術。

　　網友高追止蝕人問起中石油，可以用來做一個例子，「陸Sir,尋日（周二）按照你既教導, 將$19.4買既中石油(857)於$17.22放左, 點知今日又升返少少...
其實我係咪應該坐下睇定d先呢?

雖然我買果時係打算玩投機, 止蝕都好正常, 但係呢隻又係一隻好股, 因此係咪應該可以加大個止蝕位? 例如一般股係10%, 好股可以去到15~20%?

繼續引伸呢個point, 係咪應該不同既股都要用不同既策略?
單單係得"投資的我" & "投機的我"好似有D死板...

高追止蝕人 上 」

       網友牛腩貓咪有此註腳：「高追人, 有關止蝕問題好,其實好複雜. 10%,15% & 20%只是數字. 問題是投機入場之前, 要先決定止蝕位, 到了便斬. 如果回升, 便要再研究, 是買入位問題, 定是止蝕位問題. 一定要研究一個自己合適的方法! 陸sir教的只是保命法. 如果在專業投機來說, 不太合適.因為漏洞太多。」



中石油和阿里巴巴（１６８８）一樣，可以做好好的老鼠投機個案，中石油一直炒上A股，先講吓故事。記得上星期有一日，股壇大姐大來電，她的公司在內地有抽中石油A股， 話聽聞有 ２２元人民幣的中石油A股在市場問價， 問我點睇 ， 我即場的反應係有咁o既 就買啦，我估中石油A股開盤價４０元樓上。大姐大問我若果這個暗盤價為真，是否顯示內地投資者擔心股市有問題，我答佢這個暗盤價係流料的機會好大，若然是真，你沽了手上大陸銀行股的A股，用那些錢大手買入中石油A股，就可以撇除大市風險，只是投機中石油上市的升幅（這也是一個控制風險的例子）。結果證明那個消息是假的，大姐大低位買不到暗盤的中石油A股。



還有一個相關消息，聽聞內地正調查一些大基金的經理，傳聞他們預知中石油上A的消息，潛來香港大手買入中石油H股的認購輪獲利。

        所以上星期買中石油，就是在這些背景下買貨，第一，中石油上A股價會好貴，第二，有一批人事先搶入中石油H股或相關衍生工具，借好消息圖利。

        千祈唔好以為我的結論是叫大家要搵多啲內幕就會發達，我有一個假設：「一切盡在市場之中」，所有好壞消息，內幕、外幕炒作，都已經反映在市場股價之中，問題是你買入時做了幾多功課，特別係作咗乜嘢假設，那些假設啱唔啱而矣。

        高追止蝕人話「分開投資的我和投機的我略嫌簡單」，我這個講法的確太簡單，但對股齡無十年的「股場新仔」來說，也實在太重要，你買股唔知自己做緊乜，１９元買入中石油想「投資」，我就話風險太大了，諗第二隻啦。但你話想投機，咁又有得諗，正如好多人上星期問我大市係咁喪升，買中石油炒上A股概念得唔得，我話唔怕買，最緊要守止蝕。

        我當時見到個市升到有少少得人驚，例如中海集運（２８６６）由上１０月中開始由７元左右急升，好快到１１個幾，炒作買好多股風險好大，炒中石油明知係局，但風險始終有限，因為有Ａ股價托住。



牛腩貓咪話一成止蝕只是保命法，「對專業投機者來說不大合適，漏洞太多」，這句話又啱，不過現實中專業投機者太少，盲盲中的新仔太多，所以我講話只能以偏蓋全，不斷咁重覆叫你一成止蝕啦，其實主要講俾股齡無１０年的新仔聽。

        以專業投機來說，第一不一定要投機中石油，因為之前已抽升，證明大鱷好多，但回報不算吸引。第二即使買了中石油不用等到一成止蝕，因為由上周四到昨天，有太多位可以打靶了。

　　假如我係投機者，在１０月初見中石油在１５元的橫行位抽升，在１８、１９元高位追了中石油，當然係假設中石油上A股要做４０元樓上，博短炒一轉中石油H股見２３、２４元，博短線有２０％利潤，以１０％為止蝕，一博二，都仲可以。中石油今個星期一上A股，其實上星期四、五係最後炒作日，唔會等到週一才炒。上周四中石油在２０元上下浮沉，唔上，作為投機者，見佢唔上，去唔到２２元的價位，怕佢落，可以在上周四先在２０元沽一半保存少量利潤，這是第一個沽貨機會。到上周五大市回吐，中石油隨大市跌到１８個幾，投機者見勢色唔對，應在周五沽埋餘下一半，這一半打平手，前一半有２元左右利潤，賺小利離場，這是第二個沽貨機會。

　　週末溫總講直通車放慢，這種壞消息事前估唔到，但中石油周一上A股時，早段跌過又抽過一抽，仍有第三個機會在１８．３元至１８．５元左右離場，當時沽貨也接近平手離場，並無大壞，這是第三個沽貨機會。（我在《頭條日報》專欄講咗兩次提防中石油上A股就是出貨時）

　　「高追止蝕手」唔好介意我講得咁直接，你沒有在我講的三個退場的機會出貨，你不是專業投機者（有９９％的人都唔係，唔駛驚），但亦無壞，１０％止蝕是保命絕招，有佢無大煩惱。沽完之後見隻嘢升，只是小煩惱。你覺得可能沽錯咗，問好股是否要定１５％止蝕，或２０％止蝕，你在中石油反彈時會咁問，如果佢再跌，恐怕你就會收起問題。我o既答案係無論好股壞股，只要是投機，就要止蝕，你唔鐘意用１０％止蝕，用１５％亦得，炒股無成法，但要事前定好，唔好到時左睇右睇，唔想止蝕，只係想大風吹把自己買o既股票由負數吹番變正數。

　　我估中石油走勢短期反幅向下，原因好簡單，因為中石油A股正反覆尋底，由上市高位４８．６元，跌到昨日收３９．９９元，跌近兩成，同神華A早前的走勢一樣，會拖住H股向下去。研究中石油A股走勢將來或有投機H股的機會，研究吓第一隻回歸的大股國壽A，用咗幾耐喘定然後慢慢向上，又研究吓第二隻上A大股神華A的走勢，就會對中石油A的走勢有啟示，中石油A尋完底向上之時，中石油H股會再炒過。

　　　　每隻股的炒作理由唔同，想做五星級大鼠，在滿佈大鱷的股市偷雞，要做功課，有策略，定假設，發覺股票走勢同假設唔同，例如中石油H股在A股上之前無炒上２２元、２４元，就要轉膞。但假如你１９元買了，見佢跌堅持唔沽，若未來跌番落１５元，等幾個月都唔郁，半年之後才炒番上１９元，你同一筆錢唔見咗半年炒作時間，機會成本大過１０％止蝕的代價。平時炒１０劑中６劑輸４劑夾埋已經可以贏，旺市炒１０劑贏７、８劑都好好搵了。記住，炒股策略好重要過聽消息好多。

陸羽仁

---

作者: szeyuen77    時間: 2007-11-9 11:33 PM     標題: 五星級大鼠（２） (2007/11/9)

　　美股走勢唔靚仔，前日大跌之後昨日喘定, 道指收市微跌33點，要睇下今日港股大跌後可唔可以反彈。



美國經濟認真唔對路，樓市反覆下滑，幾間美資大行牽頭組織的次按資產救急基金又唔係咁順，另外中國全國人大副委員長成思危話中國應重新考慮外匯儲備係唔係放咁多美元資產，通用等美國大企業業績又唔好，種種消息都指向美國經濟有衰退危機，以及美元有進一步下跌的風險。

　　美國這個局愈來愈難拆，正常計美國上次事先將揚會減息，減完之後美元應有一個像樣反彈，但結果彈都無彈，一路走弱，唔係幾合常情。黃金、油價、多種匯價直撲歷史高位（日圓見１１２點幾圓的高水平，對沖基金拆倉的風險又增加）。記得上月底美國聯儲局減息之後，議息公布暗示往後不再減息，應對美元有點支持，但美元結果都頂唔順，只有兩個可能，第一是美國經濟太差，衰退危險好大，所以市場仍要睇淡美元，第二是市場唔信聯儲局下次不再減息，我估兩個因素同樣發揮作用，所以美元再急跌。

　　我們處於環球金融市場動蕩的時刻，連內地股市都借美股不濟的消息大幅尋底，我地當然不可以假定港股一定無事發生，只能靜觀其變。

在這些動蕩的日子，守紀律更加重要，保住資本，將來有平貨都有命去執。昨日講起五星級大鼠，話大家炒作要炒得有策略，做老鼠都要做高級啲嗰隻，咁樣命都會長啲，今日可以再講講。

網友Coco講咗個「笑話」，話早前買咗中石油（０８５７）短炒，見佢無力上先沽四分之一，到本週一中石油上A股之日，他身在北京，早上想上網沽埋餘下啲貨，點知竟然遇上網絡固障，沽唔到，結果只能在下午低位１８．２元才沽（如今睇番係高位），結果輸了１６００元，認真黑仔。


Coco唔使咁傷心，我講另一笑話等你開心吓。話說本週二阿里巴巴（１６８８）上市，早上一開市自然好多人想沽，有經紀行代客輸入沽盤，竟然發覺去港交所的線路失靈，無反應，經紀再按多幾吓都無反應，等了一會，部機有番反應，經紀一睇，吓，乜失靈時按那幾吓的沽盤全部做齊，即係做大咗幾倍，咁都得。經紀行見咁o既情況，唯有等隻嘢跌番下去，想同價揸番平番倉，點知隻股下午仲升，只能合埋眼市價追番，一有人追，隻嘢就再抽高，結果呢間經紀行唔見咗千幾兩千萬，據說這單壞機事件令好幾間經紀行中招，阿里巴巴股價更因為這些補倉盤推高。受這些補倉盤誤導高位追入的投資者，唔知可以搵邊個投訴。

這些故事教訓我們，股市永遠有好多估唔到之事，我們只能在資訊不完美的世界下生存，但做好自己的炒股策略，嚴守紀律，始終有著數，你看Coco守紀律沽貨，結果中石油再跌，至少目前不用吃眼前虧。

股市太旺，有好多朋友都係新手買股，不但投機投資不分，炒股策略也定得不合理。例如網友IT問，他在４７元買了兩手國壽（２６２８），想５０元沽，結果跌咗落來，問今個星期有無機上番５０元。

國壽早前炒上５３．８元高位，跟住回落，我估IT是在回到４７元時買入，撈它一撈，但買入後無升番上高位，再跌到現價４５．２５元。我覺最大問題是炒股策略唔太合理，４７元買想５０元沽，博賺３元，唔知有無想過止蝕，若要一成止蝕，可能輸５元，賺錢只賺３元，５元博３元，值博率較低。佢亦可能無想過止蝕，實行股神李四叔上身，總之見低就撈，跌落去實行死坐坐番上去，但他的目標價只是賺３元，升番上去時要沽一定可以沽走，風險和回報同樣不成比例。

我諗現實中IT或者無諗過止蝕，無諗過輸，只諗自己想贏幾多，炒股策略定得不合理，贏只會贏粒廠，輸會輸間廠，雖然國壽係龍頭大股，個市唔大瀉國壽唔會死，但你贏咁少，假設次次想贏幾元，買幾次中番一兩次，但咁唔好彩最後遇上大跌市時，就會輸好多錢。順便答埋你，國壽呢個星期炒番上５０元機會細少少。

跌市想撈貨，除了對大環境要有個判斷之外，亦有不同策略，例如分段吸就是一個策略，網友潛水艇問起「我有小小嘢唔明，溝淡同分注入既分別？溝淡係唔好，分注入係減低風險。如我的上海電氣(2727)在$7.83入，我對此股有信心，打算跌到$6入多一注。那屬於溝淡抑或分注入減低風險？此舉可行嗎？」

  上海電氣股價在８月尾從３．５元左右起步，最高在上月中見過８，５９元，跟著急回，你在７．８３元買，策略係乜，我估你認為佢係好股，但見高急落在跌一成左右追入，但有無諗過佢跌夠未呢？

  你係溝淡定係分注，和你自己的策略好有關，若你有５萬元，諗住投資上電，一早諗定在７．８３元入一注，然後等到６元入齊第二注，這是分注，因為你係有計劃咁按分開的價位入貨（分注價位好唔好遲些再講）；但假如你開始時無諗清，有５萬在７．８３元的水位覺得跌得差唔多就入貨，好啦，現在跌到７．０１元，你中咗招，想平啲再買，唔知邊度又搵多５萬元來入貨，想拉低平均成本，呢啲叫做溝淡。除了主觀的分別，客觀亦有分別，早已定了分注，而家都未入齊，輸起上來都會輸少啲，５萬元買上電，只入了一半２．５萬元，若輸可能只輸這２．５萬元的部份（第二部份見勢色唔對可以唔買）。只是隨機買多啲，見跌又加大注碼一倍，本來買５萬，變咗１０萬，虧損亦擴大好多。

　有句老話叫「贏就谷，輸就縮」，贏時去谷，即使股價回頭，還有開頭贏的賺價頂一頂，輸時去谷，已經唔順手，仲要賭大啲，就會把虧損擴大。

    最後講講潛水艇那個分段入貨價，若是早定的分段價，７．８３元第一注，６元才第二注，即係跌２３％才入第二注，差價拉得太大，兩注平均６．９１元，在６元入得到第二注，已比平均價低１３％，咁你又止唔止蝕，定在乜位止蝕？

   若是分注，合理點計，如分三注，假如第一注要在７．８３元入，第二注約在７．４元入，第三注７元入，平均價７．４１元，一成止蝕６．７元全數打靶，若想放多少少空間，一成半止蝕，在６．２９元要沽清。今日最低見過６．６７元，如以日中交易價計止蝕，已經入齊三注，一成止蝕兼且要打埋靶（好慘），有人以收市價計止蝕，咁都得，但最後止蝕時通常會輸多一點。若計一成半止蝕價６．２９元，暫時未到，不過都有少少危。

　   最後補充一句，上電第一口價７．８３元只是高位低一成，定得不夠深，容易買到，但危險度大，我對此股無甚研究，但睇圖會第一注放在７元或以下，在咁波動o既股市，買已高升回落的股份，入貨價比高位低２０％開始入安全少少。分注入貨，最好入唔齊，唔好望入齊三注，因為入得齊等如跌得深，距離打靶價亦近，有啲危險。你可能會問，分注入唔齊如果升上去咪好唔抵，睇到大市或個股轉勢向上，入唔齊的股份可以市價追入，就算無追，買唔夠升咗，都係快樂難題，股市有過千隻股票，你有錢驚無股炒？

陸羽仁

---

歡迎光臨 3Talks 港人自講討論區 (http://3talks.com/)

Powered by Discuz! 6.1.0