熊出沒注意(6)(2008/7/17)
美股終於有較像樣反彈,Wells Fargo業績好過預期,帶動金融股大反彈,加上油價連續第二日下跌,略為舒緩市場對通脹的恐懼,道指大升276點,升幅2.5%,升到11239點。
陸羽仁身在美國,看到電視轉播聯儲局主席伯南克出席美國國會委員會會議時,情況慘不忍睹,簡直被議員圍攻,有議員質問佢,政府要禁止銀行借房貸俾無能力還款的人,這件一早應該做的事,為何要明年底才會立法實施,伯南克支吾以對,要會議主持為他解圍,提醒議員伯南克在06年才上任。
美國的情況是一個亂字,頗有97年香港金融風暴的影子,證明美國個鑊都唔細,美國第九大按揭銀行IndyMac Bank擠提後被政府接管,個名加了聯邦兩個字,再開門營業,美國存戶照樣湧去提錢,可能覺得「聯邦」兩個字信唔過(在香港這兩個字只是酒樓名稱,無乜公信力,但美國人過去對呢兩個字信到十足),當人民唔信政府有能力解決經濟問題時,政府就好難靠出口術、拍心口就當無事。房利美和房地美股價跌得太甘,美國證監會仲話要研究臨時改變遊戲規則,唔俾人就咁易沽空房利美和房地美等金融股,美股跌到要搬埋龍門,都幾大鑊。
聯儲局一個月前還暗示通脹風險開始高於經濟危機風險,令人覺得今年內會加息0.75厘;如今聯儲局主席伯南克在國會上已改口,話美國經濟困難重重,無咁快復甦,而家已經無人信美國今年會加息,美元弱番哂,在匯市買入美元者或者可以集體訴訟告聯儲局長訛騙。早前美國吹話就快加息,香港銀行搶先加新造按揭利息,被佢地加咗息的客戶,唔知可唔可以示威叫「回水」。我估伯南克一個月前係真誠相信美國經濟開始無事,點知咁就瀨嘢。但經此一役,以後仲搵鬼信伯南克咩。
網友Indy睇完我昨日引述佢o既意見後,再有此回應:「多謝你給我們的追加課程。其實我那日用到『小道消息』字眼,主要是指你的中環茶友話有猶太大戶造了大淡倉之言。至於你提到的「熊出沒注意」分析,我是初步明白,但我據我有限經驗,體會不到一浪低於一浪的程度去到哪裡。現在我都正在被熊市懲罰,即沽的話損失兩三萬元,不沽的話又不知未來如何。」
「我的盤算是等奧運市好番D才沽,不知對不對。但我依家都識驚,怕未到奧運,個市再插多20%才肯升返少少。陸SIR你講熊市係揀買好股長期持有的好機會,令我開始往這方面想。」
我見到Indy的回應,再看伯南克的講話,感慨更多。我在5月尾開始話有外資沽緊紅色股,到6月初發現猶太大戶沽油、沽股雙邊齊沽,到6月中話沽紅色股的大戶不單無平倉仲加沽。這些的確是小道消息,只可參考,唔可以盡信。但不要講5月,即使6月初,恒指還有24000點,到而家唔見咗3000點,證明這些小道消息都有少少參考價值。伯南克在6月仲話美國經濟無事,點知一個月後就爆出房利美和房地美的大鑊,如今唔止衰到要改口重新估過經濟,真係信「小道消息」,好過信伯南克的「大路消息」。
我係咁寫文講熊市,網友輝NSX有此回應,佢話:「陸 sir: 點睇你都還是靠嚇, 但嚇得好~~ 謝謝。」
其實我主要想講股市的大走勢,當中難免有少少靠嚇成份,但只是想令大家知道風險,也唔想講到大家見股就沽。買股有長、中、短線。我講的走勢,主要講長線,講緊至少6個月到一年(這是就住大家的注意力水平,我自己的長線係講3、5年),比較啱「投資的我」聽,在熊市搵對象投資,和在牛市不同。但長線啱的東西,中、短線又唔一定啱。我靠嚇的對象,主要是長線投資者。
以中線計,美股相當超跌,而家有啲恐慌,政府控制唔住會再急滑,但市場情緒略為穩定下來後,先炒一炒又唔奇,這種反彈可以維持一個月,甚至再長少少。所以好多朋友問我呢隻股好唔好買,那隻好唔好買,如果你係一個中線「投機的我」,買入紅色股,睇一兩個月,以10%止蝕,博一個20%反彈,都有數計。又例如我昨日講港交所(00388),我只係話佢長線有隱憂,但以中短線計,佢跌得多反彈時,彈10、20元又唔出奇。但你要記住,入市博反彈,要明白咁弱o既市況隨時跌多10%,可能一日就插到,但若果你唔預咗止蝕,唔好去博反彈。呢啲市炒股唔止蝕,萬一美股滑吓滑出一個急跌,都會好傷。
當然仲有睇一日半日的超短線,部份玩牛熊證的網友就係呢類,好多時只憑感覺,好似前日跌得咁勁,買入牛證博反彈,但昨日開市插穿埋21000點,買咗貼價21000點回收的牛證就打哂靶,短線客睇一兩日的波動,就算大市今日跟美股反彈,如果昨日牛證被人打了靶,就真係喊都無謂。
陸羽仁