美股大瀉，一間肯薩斯州銀行倒閉，加上市場擔心債券相關虧損會令美國最大保險公司AIG受累，杜指急挫２４１點，跌幅２．１％，跌到１１３８６點，把早兩日的升幅完全抹掉；港股昨日大升７１２點，今日將面對壓力。金融市場動蕩，亦令資金大量流向債市，令債價上升、收益率跌，美國１０年期國庫券收益率大升０．０９厘，升到３．７８厘。

AIG股價大跌５．５％，Credit Suisse分析員Thomas Gallagher 本來估計AIG 第３季每股有盈利０．１３美元，昨日大幅調低至每股虧損０．８６美元，因為最近信貸市場惡化，會令AIG要為債券相關投資作更多撇備。

肯薩斯州的細銀行Columbian Bank被州銀行專員及聯邦政府存款監管機構關閉，此銀行有７．５億美元資產。 現時聯邦政府手上有問題的銀行名單共有９０間，在今年第１季就增長了１８％。現時去估那一間銀行是最後一間倒閉的銀行，變得全無意義，因為隨時有銀行唔掂。

美國第４大證券行雷曼兄弟早前因韓國發展銀行有意收購而大升，昨日因收購可能告吹而大跌６．６％。美國金融市場變得非常脆弱，隨時因利好和利淡消息大幅波動。RBC Capital Markets 的債券策略師 T.J. Marta的比喻幾搞笑，佢話「現時美國金融市場的情況，係我有生以來看過最長的一套恐怖片。」問題是呢套恐怖片唔知幾時播得完。

呢個熊市有排未玩完，對股民影響很大，一般人以為熊市無乜大不了，都係上上落落，股票照炒。事實並非如此，熊市和牛市有好大分別，陸羽仁會一連幾天告訴大家熊市的特點。基本原則係「熊市只適宜投機者去玩，不適合投資者」。

　　一般散戶分兩種，第一種是「投資的我」，呢種人不喜歡炒出炒入，只想買股長揸。另一種是「投機的我」，經常進出，賺短期波幅。以「投資的我」而言，買入股票長揸，如果遇上牛市，就好易贏錢。剛結朿這次牛市，恒指由０６年頭約１５０００點起步，升了一段，到０６年中一度跌番近１５０００點的水平不破，之後就扶搖直上，到０７年１０月升到近３２０００點的高位，「投資的我」在０６年頭至０７年中買股票，揸住唔放，回落都唔放，直到０７年１０月，全部都會賺錢，總之識買股票就會贏，買入一線龍頭大股固然贏得多，買入二線股輪流炒亦都執唔少，買入四、五線的雞股如果有莊家炒作，更加係成倍成倍咁升，所以一句總結，牛市總體趨勢反覆向上時，「投資的我」盲目買，盲目揸，都會贏錢。

　　但同一個邏輯，在熊市之中就好災難，因為熊市的走勢是反覆向下，「投資的我」在任何一點買入股票，揸住唔放，當大市向下時，股票也向下，所以就會不斷會輸錢，係牛市同一個邏輯的相反，盲目買，盲目揸，在熊市任一個位入市都會輸錢。

　　你可能會話，我係長線投資者，唔驚，頂多就揸長線，揸佢５年、１０年同佢鬥命長，咁講本來都啱，但有兩種情況令長揸都好唔掂，第一是愈買愈多；第二是你買嗰隻股票在熊市過後可以翻身，買著一沉不起的股票，喊都無謂。

　　先講愈買愈多，散戶遇到個市不斷跌，股票愈來愈平，若有閒錢在手，好多人不單止唔放，仲會加注，就係我所講的「溝淡」，假設你在高位１０元買１隻股票，買了１萬股，跌到５元再買１萬股，再跌到２．５元再買１萬股，３萬股平均價５．８３元，成本１７．５萬元，最後隻股跌到１元時，你夾埋輸咗１５萬元，如果揸住原來的１萬股唔賣唔賣，唔加注溝淡，只係輸９萬元，可見在熊市溝淡的禍害，會把股民在熊市買股的災難不斷擴大。

　　另一個問題係熊市揸股，要隻股在災難後見到家鄉至得，你高位買著隻電盈（００００８），佢由高位２８元，跌到低位５合１，現價４．８元，等如合併前０．９６元，得番少少渣。同股唔同命，如果在２０００年高位４０元買了中移動（００９４１），雖然在２００３年跌到低位１４元，但最後番上來，現價仍有９４．３元，呢啲股買貴咗無所謂，最後會見家鄉，但係有啲股買貴咗，可能好耐、甚至永遠不能上岸。

　　散戶可能買錯衰股，可能控制唔到自己不斷買股溝淡的隱憂，話熊市買股充滿風險，並不為過，所以「投資的我」在熊市最好忍手，少買為妙。

陸羽仁

        美股在大跌後反彈，油價回升至116美元，令能源股向上，加上分析員估計房利美和房地美有足夠資金維持到年底，杜指升26點，升到11412點。

        德國商業信心指數下跌，令市場相信美元較安全，美元兌歐元再上高位，美元指數升穿77，美國靠累死其他國家受惠。


　　昨日講到熊市只宜投機，不宜投資，那麼甚麼時候才適合投資呢？答案是熊市結朿後，牛市開始的初階段。

       可能你馬上會問：「熊市結朿，牛市開始初，係唔係咁易分得清呀？」我話的確不易分得清，但你不要好準咁在熊市最低位撈到底，不用買到最平的股票，即使錯過了熊市最底部，牛市已開始，已反彈一段才去買，都唔係咁緊要，因為仲有好長時期慢慢揸，慢慢食。

       舉中移動（００９４１）的例子可以說明。２０００年科網股爆破後，到２００３年沙士時股市跌到低潮，中移動在０３年第２季跌到１４個幾的低位，即使你好鈍，在０３年沙士時完全唔敢買股，到０４年股市明顯跌到定，熊去牛來的跡象已相當明顯，你可以輕易在０４年用２０幾元的價錢買到中移動，之後佢逐年上升，到去年１０月最高升到１６０元，假設在０４年以２５元買股，３年間最高變了６．４倍。



我講過熊市的主要特徵是一浪低於一浪，每次下跌，又跌穿上一浪下跌的低位。而牛市的特徵剛剛相反，係一浪高於一浪，每次上升，又會升穿上一浪的浪頂。套落去睇０３年的中移動，佢在第２季初見過１４個幾的低位後，之後再跌，都未穿過、甚至未接近過呢個低位，所以睇完０３年全年中移動的走勢後，不難確定佢已離開熊市。０４年中移動股價還上下浮沉，未出現顯著升勢，到０５年開始一步步上升，進一浪高於一浪的走勢，明顯進入熊市。即係話你即使在０４年都未想買中移動，到０５年見佢開始升時才買，仍然可以在３０元以下買到貨。
人人都想在１４元最低位買到中移動，在１６０元最高位放，但咁高難的動作，在１００個人中，有９９個做唔到，所以唔好對自己要求咁高。假如２０幾元買到中移動，１３０元、１４０元放得到，都好叻o架啦，降低要求，做得成功的機會大啲。想買入１４元的中移動，只能在低位去撈底，唔係唔得，要知道在熊市急跌中咁做，也要冒不低的風險，即使買入好股，還可能要跌幾成，要自己頂得順至好。

有個美資大戶同我講，話而家的股市不用心急去追，關鍵係美股未見底，港股長遠走勢離唔開美股，所以港股亦未見底。佢話美國至少要公布一兩季GDP負增長，才有希望見底，所以現在離底還有一段時間，想買股唔使急。呢個大戶亦用０３年沙士做例子，話佢見香港樓市在０３年跌到殘，到０４年跌定開始反彈之後，他才在香港買豪宅，至今回報可觀，他話等到熊市清楚結朿後才入市都未遲。

現時港股不斷穿底，符合哂熊市特徵，反彈又上唔番高位,，未似已到熊市終結時，投資的我，等吓先啦。

陸羽仁

　美股第二日反彈，7月耐用品訂單意外地上升1.3%,比估計的零增長為高，刺激股市向上；油價再升2美元，令能源股上升；其他按揭金融公司成功發債，亦令分析員估計房利美和房地美盈利會增加，杜指升89點，升至11502點，升幅0.8%，繼續反彈走勢。


　　昨日講到熊市不宜投資，可能惹起「價值投資者」的質疑，話只要睇啱股票價值，何懼愈跌愈買。

　　「愈跌愈買」的講法，源於股神巴菲特，話佢計啱股價的內在價值，如果發覺股價比內在價值有明顯折讓，就可入貨，入貨後如果再跌，佢會愈跌愈買。

　　又舉中移動（００９４１）做例子，唔好講內在價值咁複雜，講番簡單一些的數字。中移動現價市盈率１６倍，息率２．２厘，以過往在牛市的標準，這種數字簡直係抵買，我地又應該點樣睇１6倍市盈率的中移動呢？

　　中移動剛公布中期純利308億元人民幣，升51%，超過市場預期，問題是中移動能否全年保持這種高盈利增長，若能維持，故然抵買。睇市盈率有兩點要留意，第一是市場評價有主觀成份，第二是中移動能否維持現有的盈利增長，兩點亦互有相關。市場可以接受到幾多倍市盈率，係一個主觀感覺，以較誇張的大陸市場為例，６０００點時，好多股票的市盈率去到５０幾、６０倍。如今跌到２０００幾點，公司市盈率就回到２０幾倍。有些盈利較穩健的公司，可能在６０００點時和在２０００幾點時盈利情況都無改變，但市場接受到o既股價就有天壤之別，這就是市場的主觀成份。「市場先生」有時出好貴價錢買一隻股票，有時出好平價錢買同一隻股票。

　　可能公司本身能否維持盈利增長更加重要，以中移動為例，市場俾１６倍市盈率買一隻股票，表面看投資要１6年咁長時間先至收得番，主要是假設呢間公司是高增長股，盈利每年會顯著增長，未來幾年盈利升得幾升，會拉番低市盈率，令投資不要１6年咁長就收得番。問題的關鍵是公司盈利在經濟放緩時，能否維持高速增長呢？若盈利一倒退，呢個「高增長」的故事就破壞哂，即係市盈率因盈利下降而上升（盈利下降，股價唔變，市盈率就會上升），唔止１6年才可收回投資，所以遇到盈利下跌，市場失望時，股價會馬上下跌。故然中移動中期盈利理想，股價有一定支持，剩下的問題就只係睇大市走向喇。

　　我估一般散戶唔係咁易計到股份的內在價值，亦唔係咁易具體估計到公司未來幾年的盈利，但大體上都可以睇到邊類股份危險啲，第一類是盈利可能受投資市場影響者，例如保險股，佢地好多收益來自投資，A股大跌，令它們投資收益大減，甚至投資部份要蝕入肉，所以我有點怕這類股份。第二類是股價仍然太貴的好股，例如早前未急跌前的中移動，又例如現時的招商銀行（０３９６８）。

　　總括而言，若「投資的我」並不十分熟悉投資那隻股票的盈利情況，特別是無把握它在股市大跌、經濟增長放緩時能否保時盈利增長，就好難話「愈跌愈買」，只能等熊市跌得較深時，等那些股份跌到殘、跌到爛賤時，才慢慢入市去買。在熊市中，寧願買貴，唔好買得太早。見到股市反彈，亦唔好心急去追。

陸羽仁

　美股上周中段急升，到周五回落，在戴爾電腦業績不理想等消息影響下，杜指急跌１７１點，收報１１５４３點，美股又一次衝高回落，１１７８０點的頂部堅不可破，暫時還是在上落波動。

颶風 Gustav吹到美國海岸，採油作業全部停產，油價回升，１０月期油今早在澳洲市升１．５２美元，升１．３％，升到１１６．９８美元一桶。美元亦回軟，兌日圓跌番到一周低位，今早在東京市造１０８．２１圓，比上周紐約收市價１０８．８圓回軟。歐元兌美元亦由紐約市的１．４６７３，跌到１．４６９７。整而言，美元呢一浪回升兌歐元最強，早前歐元升得過份，而家歐洲面對減息救經濟的壓力，所以歐元未能止瀉。

　　講番股市，美股在美元仍強的走勢下，仍在反彈浪高位附近波動，但港股卻已遠離這一浪在７月底造出的浪頂２３３６９點，後來在上周四期指結算日又造出一個小浪頂２１５４６點，恐怕又成為一個小浪高位，短期內難以上破，形成這個反彈浪完美的一級級向下走勢。港股比美股更早從反彈浪頂回落，主要因為以中移動（００９４１）為首的紅色股走勢極弱，上周反彈也是炒中移動業績，一到上周四出業績時，就玩好消息出貨，等你以為上周四是期指結算日大戶會炒埋呢一日，點知佢早一日已出咗貨，等你以為結算日有得升，就俾人抽水啦。
　　連續幾日講熊市，主要想為大家再淋吓冷水，令大家對熊市多點體認，知道熊市無咁快完，牛市無咁快會來。熊市有不同的下跌型態，有不同的成因，你想估佢幾快會完，就要明白佢下跌的型態和成因。

　　今日先講跌市的型態。最典型的熊市型態是以急插式下跌開始，我地會叫嗰啲跌市做股災，股市一日跌３０％，盲o既都知道係熊市，近年美國最典型的股災是１９８７年１０月的跌市，而香港最典型的股災係１９９７年１０月的金融風暴跌市。８７年美國股拖累港股亦大跌，當時的財政司翟克誠在半夜３點俾聯交所主席李福兆叫醒，話要停市４天，李福兆話要停市是希望港股可避過美國股市，翟克誠未瞓醒就同意咗，結果港股停完市開番，仲大鑊，將累積幾日的跌幅一次過反映，美股大插完大反彈，反彈完再插，港股睇完人地場戲的悲劇結局才開市，就連反彈都無得彈，因為明知係悲劇結局，就無人咁蠢去撈底，停市令香股跌得更慘，跌到香港一個華資大戶賭輸期指輸到想唔找數，要港府逼佢找數；後來港府亦全面整頓聯交所，李福兆難逃牢獄之災。

　　美國在８７年出現一日跌３０％的股災後，美國政府就成立救市小組，防止股災式跌市再出現，結果過去２１年美國股市真係有大跌，好少出現股災，而２００１年９１１事件差唔多要出股災，都俾美國政府成功大放水扭轉跌市。香港無咁好彩，８７年之後１０年，到９７年又出現股災，呢次股災源於亞洲金融風暴，但香港係主要衝擊對象，大炒家在股市和匯市雙途進攻，想同時衝低股市和港元匯價，特區政府新丁上場，就要接受嚴格考驗，頂到港元匯價就頂唔到股市，恒指在９７年１０月１７０００點，直插到１００００點，開始時又係一日跌１０００點、２０００點咁樣下插，跌到９８年初牛皮一輪，到年中又插落５８００點，最後政府睇通個局，入市干預股市收場。

　　若熊市以股災式下插開始，熊市好快確認，股民想唔接受都唔得。但若熊市以慢跌開始，熊市遲遲未確認，到確認了亦有好多人唔信，溫水煑蛙，殺傷力亦可以好大。以美股為例，若股市直線下插，死得人多，對金融體系衝擊尤大，隨時頂唔順，因為大銀行快速崩潰，就會出現金融巨災。所以美國政府有救市小組，出術頂吓股市，令股市跌吓又彈，股吓又彈，無出現股災式下跌，好處是把痛楚減輕，好似一個人捱打，１日被人連打１０鑊，可能頂唔頂死咗，但１０鑊分開１０日去打，可能又易頂好多，不過卻把痛苦延長了。政府已經俾機會你走，你夠醒目早發現，跌得幾跌就減倉，就可以把痛苦實質地減少，正如你俾人打兩三日，打了兩三鑊就閃咗，就好好多，你坐係度俾人打夠１０鑊，可能唔死，但都會好慘。

　　好多網友期望終極一跌會來臨，其實有個假設，認為股市跌完終極一跌就見咗底，但我有少少擔心呢種溫水煑蛙式跌市，其實無乜終極一跌，港股已經到咗一級級落的地步，跌２０００點、３０００點，又彈番你１０００幾點，上上落落，彈完再跌，有排都未跌完，當然跌得深時，波幅點數會減少，但都會繼續這種退三步進一步半的型態，還有相當一段時間要捱落去。
陸羽仁

　 美國勞動節假期無市，但國際金融市場卻風起雲湧，颶風Gustav登陸美國後減弱，離岸鑽油設施估計沒有受到重大損害，令油價急跌，１０月期油一度跌穿１１０美元一桶，結果昨日跌了４．０８美元，今日在亞洲市早段造１１１．４美元一桶。
油價下跌令美元再抽升，歐元兌美元今早跌到１．４５５７美元，是２月１４日以來的高位；英磅兌美元亦跌至１．７８６３美元，是０６年４月以來的低位。澳元兌美元跌到８４．６９美仙，是去年９月以來低位，市場估計澳洲今日會將目標利率減０．２５厘至７厘。

唯獨是日圓叫做頂得吓，佢由昨日的１０８．１４圓，升上今早的１０７．８９圓，日圓上升相信和首相福田康夫昨天請辭有關，福田做了一年就要執包袱，主要因為經濟唔好民望下跌。

昨日港股跌３００幾點（１．６％）唔算好多，南韓就中重鎚，外資睇淡南韓圜而撤資，南韓股匯昨日大挫，韓圜兌美元一度跌百分之３．２％，跌穿１美元兌１１００圜的大關，跌到近４年新低位，韓圜上月已跌了７．６％，如今是跌完再跌；南韓股市昨日更大跌百分之４．１％，韓股今年至今已跌了２５％，國際投資者今年以來勁拋售韓股達新高紀錄的２２０億美元，其他亞洲貨幣也受影響全綫下跌。

　　外資撤走的表面原因是經濟放緩和物價高企，但不能排除正有資金狙擊韓圜，其實今年以來韓圜一直走弱，即使美元弱勢時已經如此，如今美元反彈，韓圜更弱；匯價轉弱，更加深韓國的輸入性通脹，原來已有的問題進一步惡化。
南韓政府面對股匯齊插的局面，一方面提出刺激經濟和股市計劃，另一方面入市干預匯價。南韓政府為重振經濟，昨日公布未來五年減稅逾１９０億美元，並叫退休基金入市買股票，不過這些措施睇落有少少治標唔治本。南韓政府和財金官員昨日緊急開會，副財長Kim Dong Soo話，市場擔心南韓９月有金融風暴，顯然是誇大了，韓國政府會密切注視市場情況，會有堅定措施，去反制韓圜的過度下跌，叫投資者唔好過度反應咁話。

按陸羽仁的經驗，當一個國家的財金官員要不斷解釋本國貨幣無問題時，就係那種貨幣出問題的時候，而那些國家的本能反應除咗出吓口術之外，就係入市干預匯價。南韓央行為支持韓圜，近期已不斷入市拋美元買韓圜，令南韓截至７月底的４個月內，外匯儲備減少１６７億美元，至２４７５億美元，即係外儲減少了６．３％，但都未見顯著成效。

不過市場睇死南韓央行干預匯市的能力有限，外間流傳該國的外匯儲備中有多達５００億美元資產是美國的房利美、房地美和其他機構的債券，這些債券價格下跌，流通性減弱，將削弱南韓套現去穩定韓圜的力量。包括Pictet和Aberdeen在內的基金均表示，南韓無力控制通脹，７月通脹率達百分之５．６％，為接近十年新高，勢將加深該國經濟困境，預期韓圜匯價會繼續下滑。

昨日韓圜和韓股大跌，但港股相對平靜，市場一般相信，亞洲金融風暴不會重臨，這種論調主要有幾個理據，第一，好像９７年時那種巨型對沖基金減少了，現時市面大多體積較細的對沖基金，對一個國家貨幣的衝擊力有限。第二，亞洲國家經過那次風暴，防範心加強了，最絕一招是如馬來西亞那實施外匯管制，限制資金進出，增加了狙擊者的風險。第三，亞洲過去幾年不如９０年代金融風暴前那樣成為投資熱點，無升咁急，自然無咁多泡沫，跌起上來亦無跌得咁多。第四，現時世界金融市場單是炒商品已炒到不亦樂乎，國際大炒家無乜需要炒一個國家的貨幣。

不過陸羽仁對這些觀點半信半疑，韓國經濟唔係特別差，通脹率和經濟增長率在亞洲區內是只一般水平，但韓圜跌得特別厲害，明顯因為有人插佢，韓國經濟唔大唔細，資金自由進出，匯價自由浮動，若俾人睇死佢嗰２０００幾億美元外匯儲備流動性不高，即係防御能力有限，插韓圜搵快錢一啲都唔奇，加上韓圜咁跌法，令通脹更厲害，進一步危及實體經濟，又再增加匯價下跌的理由，政府的措施似乎唔係有好多止跌能力。

我記得９７年７月泰銖出事，香港金管局借錢俾泰國救市，當時市場普遍反應係泰國衰唔關香港事，結果金融風暴好快就燒到香港。今次南韓出事唔好當唔關自己事，要密切留意佢發展，若韓圜出現災難性下跌，其他亞洲地區好難獨善其身。

陸羽仁

美股無大上落，杜指升１５點，升幅０．１％，升到１１５３２點，美元強勁支持美股。油價無大上落，１０月期油紐約收１０９．４９美元一桶，微升０．１４美元。

美國經濟前景明顯唔好，問題是股市如何回應，美國第二大互惠基金Vanguard Group Inc.的負責人John Bogle話，美國經濟困難的前景是非常、非常、非常清楚地擺在前面，但很難預估美股如何去迎接或者去消化這種困難的形勢。

美國聯儲局公布經濟調查報告「褐皮書」，話上月大部份美國地區的商業活動放緩，同時所有１２個聯邦儲備銀行地區都話因為商品價格上升，有加價壓力，不過由於出現總體招聘放緩的趨勢，令工資增幅溫和。由於金融危機和樓市疲弱，消費疲軟。

褐皮書展示一幅滯脹的圖畫，經濟停滯，物價上升，人民兩頭受壓，又搵唔到錢，又受到加價的生活壓力。聯儲局兩個星期後開會議息，雖然聯儲局會議紀錄顯示上次已經有三個聯儲備銀行的主席建議加息遏抑通脹，但估計聯儲局９月議息多數會維推利率不變，直到１２月。

早兩日講分析熊市除咗睇佢下跌的形態外，亦要睇佢o既成因，今次由美國爆煲觸發的全球熊市，有深層的經濟原因，所以唔係咁易過去。有時大跌市是純政治性，例如２００１年美國９１１事件觸發的美國跌市，或者１９８９年中國六四事件觸發的香港跌市，政治性的跌市通常會較短暫，觸發跌市的政治問題解決後，股市好快又會重上升軌。有時跌市是純粹金融性的，股市炒過籠就要調整，但調整雖急，若未影響實體經濟，又會恢復得好快，１９８７年美國的股災，就因為升得太顛，最後因電腦程式買賣觸發跌市，但股市暴跌對實體經濟衝擊不是太大，結果一年多之後，到１９８９年美股又再上高位。

但今浪美股的熊市，卻是由實體經濟出問題開始，表面看股市面對最大的問題是次按危機和油價急升的壓力，但要理出一個源頭，應該是美國樓市下滑開始，美國樓市自１９９４年開始上升，升了１３年，升出一個大泡泡，到２００７年才開始下滑，本來樓市下滑已經大鑊，更由於美國人發明了大量有次級按揭成份的債券，樓市一爆，就觸發債市爆煲，債市爆煲，就令信貸緊縮；美國政府為了救市，就再大力放水大力減息救市，令本來已疲弱的美元急跌，再觸發商品和油價的大升浪，這個升浪當然有中國和印度的需求襯托，但真正觸發因是美元的弱勢，令全球的炒作資金轉去炒油炒商品；油價和商品價格大升，再推高全球通脹，結果就在需求減弱，通脹急升後，引發一次全球性的衰退。

這種跌市涉及最深層的經濟基本因素，各種因素盤根錯節，唔係咁易拆解得到。今年５月時，一度展現一個復甦的假象，當時美國的信貸市場開始有放鬆跡象，當時估算如果美國樓市在今年１２月左右到底，信貸緊縮開始舒緩，跌市可能較快地過去。但結果事與願違，到７月美國兩大按揭證券公司房利美和房地美再爆鑊，金融危機進一步深化，同時歐洲和亞洲亦開始被美國拖垮，出現滯脹之象，紛紛步向衰退，由於好多美國大公司依賴歐、亞，特別係亞洲市場支撐盈利，到亞洲一衰，再拖美國公司盈利，他們唯有以裁員節支來回應，就會加大調整的深度。如今看來，這次全球性的衰退，還有一段路要走。

對股市而言，牛市會長啲，熊市會短啲，熊市維持一年都好多，維持兩年只是少數，以美股為例，自１９６２年開始，以波幅無咁大的現代股市計，美股共經歷１１次熊市，平均維持３２２日，即係近１１個月，跌幅２９％，其中最長的是１９７３年跌市（也是石油危機），自７３年１月跌至７４年１２月，共跌了６９４日，跌近兩年，跌幅４５％。

而家我地聽到好多說法，話美國出現自１９２９年最大的樓市跌市，英國又話６０年以來面對最大的經濟危機，我們不能期望今個熊市係一個短期跌市，若以７３年的跌市時間計，今次熊市應該從去年杜指在年１０月9日１４１６４點的高位回落起計，跌一年就跌到今年１０月，跌一年半就跌到明年３月，跌兩年就跌到明年９月。我講起呢啲時間，有個中環茶友嘩一聲，話唔係跌咁長呀嘛？我話買股要作最好的預備，最壞的打算，人人都希望熊市今天結朿，但客觀啲去講，要預咗佢仲有排捱。熊市要轉勢，亦要從美國開始。

陸羽仁

美國政府宣佈，從即日起接管陷入困境的美國兩大按揭公司房利美和房地美，市場認為美國政府出手後可以穩定投資信心，消息令美國杜指場外期貨升２００多點，資金亦從日圓區流出，部份可能流向兩房債券，令日圓下跌。

受美國房地産市場泡沫破裂衝擊，房利美和房地美目前陷入全面危機。在過去一年，兩大機構的損失已超過140億美元。美國財政部長保爾森表示，房利美和房地美的問題令金融市場面臨系統性風險，接管這兩大機構是當前保護市場和納稅人的最佳手段。

根據接管方案，美國財政部將向房利美和房地美注資，並收購相關優先股，兩房目前的監管部門——美國聯邦住房金融管理局將出面接管兩家公司，兩房的行政總裁被限令離職，政府相關監管機構接管兩大機構的日常業務，同時任命新領導人。

美國財政部會投入１０億美元，認購兩房的高級優先股及認股證，若認股證全數行使，會令美國財政部最終持有７９．９％兩房股權，財政部的投資會收取１０％股息。財政部將在公開市場收購兩房發行的房貸抵押證券，又會和個別持有大量兩房債券或股權的銀行磋商如何安排。財政部又會通過美聯儲紐約分區銀行向兩房提供特別信貸額度。

美國政府拯救兩房的其中一個條件是兩房大力收縮業務，到２００９年１２月３１日，兩房持有的按揭債券不能超過８５００億美元，以後每年減少１０％，直至持有量下降至２５００億美元。現時兩房雄霸美國按揭債券市場，前聯儲局主席格林斯潘曾建議把兩房分柝為５至１０間公司，美國政府逼兩房降低資產，亦等如逼令它們把市場佔有率降低，令市場更分散。前路易斯安那儲備銀行主席William Poole 話，美國政府救兩房，可以避免按揭市場散哂，財政部的資金會注入兩房一段長時間。

　　美國財長保爾森爲了敲定具體救援方案，在上周五和周六特別約見了包括美國衆議院金融服務委員會主席巴尼-弗蘭克在內的國會要員、聯儲局主席伯南克、兩黨總統候選人以及兩房高級管理人員，結果在週末弄出共識，敲定兩房的接管方案。
兩房是美國政府支持的兩家從事住房抵押貸款融資的機構，被認爲是「大到不能倒」的企業。目前美國12萬億美元的住房抵押貸款中，有42%來自這兩家機構。自從７月兩房出事後，市場一直憂心仲仲，未知事件最後如何解決，如今財政部正式接管兩房，可以消除一些疑慮，亦會令美國房屋按揭的利息略降。

上周五對沖基金負人碧斯預測短期美股會反彈，應該是睇準兩房的拯救方案快將出籠，他在３月美國政府出拯救證券行貝爾斯登時，亦曾成功預測美股反彈；不過炒反彈者都要小心，唔好去得太盡、睇得太高。油組見油價下跌，今個月開會又話減產，商品市場和金融市場還是充滿不穩定因素，小心駛得萬年船。

陸羽仁

  　　美國官員做嘢的確有一手，這次拯救兩大按揭證券公司，等如要接起一個總值５萬億美元（兩房合共持有或保證的房屋貸款總值）的巨型燙手山芋，雖然相當吃力，結果仍然做得好靚，起碼杜指昨晚最終大升２８９點，升幅２．６％，升到１１５１０點，叫做有所交待。

　　美股能夠大升，十分重要，因為這種就「顯示」市場接受政府這個拯救計劃，這樣就給支持計劃的議員一定的彈藥，讓他們較易捍衛撥款在國會通過。我睇美國財長保爾森接受電視訪問時解話的焦點，就係他如何以納稅人的利益作首要考慮，保證政府注入資金用得其所，最後可以收回。

　　美股大升，金融股最受惠，升的股票不用講了，講吓乜嘢股票跌。第一批最無厘頭，就係所謂對沖基金愛股，高盛有一個４９隻股票的名單，顯示那些是對沖基金持有最多的股份，例如互聯網搜尋公司Google Inc，昨日就跌５．５％，又例如製造BlackBerry手機的 Research-in-Motion Inc，昨日就跌了４％。對沖基金沽空了金融股，買入這些科技股，美國財政部救兩房挾高了金融股，對沖基金唯有沽出有利潤的科技股，為急升的金融股空倉盤平倉。

　　亦都唔係隻隻金融股都升，美國最大按揭銀行Washington Mutual昨日開市曾大升２０％，後來公布行政總裁Kerry Killinger不能停止有關樓按的虧損，而要將他撤換，結果股價倒跌３．５％收場。美國第四大證券行雷曼兄弟更大鑊，昨日狂跌１３％，跌到１４．１５美元，美林分析員Moszkowski 把雷曼第３季虧損的估計，由每股０．６５美元，大增到每股６．５美元，估計佢要作大規模撇帳。部份金融股可以咁跌法，可知市場信心何其脆弱。

　　不過講跌，當然就唔夠兩房股票跌得咁勁，由於美國政府的方案只救兩房債券唔救股票，令兩房股票權益大量攤薄，加上兩房將來會大縮水，所以股票唔值錢，結果房利美股票昨日大跌９０％到０．７３美元，而房地美就跌８３％到０．８８美元，兩房都變成仙士股，美林更把房利美目標價降至０．５美元，房地美降到０．２５美元，即係話仲有得跌。

　　兩房股價大跌，持有它們普通股和優先股的公司就遭秧，例如第二大按揭銀行Sovereign Bancorp Inc.６月時公布持有共值６億美元以上的兩房股票，昨日股價就跌６．６％。細間少少的公司揸兩房股票跌得仲勁，如Gateway Financial Holdings Inc就急跌２５％。

　　睇完美國政府表演，泠靜下來，就要問究竟災難完未？我睇兩房盤數暴露出來的問題，就覺得美國個鑊唔係咁簡單，美國股民半年前買兩房股票，仲係３０幾、４０美元，如今跌到得番零頭，而且兩房仲衰過貝爾斯登，因為貝爾斯登大跌後，揸佢１０年仲或者有機會翻身，但兩房已被美國政府強令壓縮業務，即係救番都變咗以前二十分一的細公司，股價亦都係「老鼠尾生瘡──大極有限」，你話股東幾慘，但半年前兩房係美國政府支持的巨型按揭公司，當時點都估唔到佢地最後差唔多要執笠。

　　美國財政部救兩房時，亦「順便」有消息人士放料出街，話根據政府委任的財務顧問摩根士丹利話，兩房的會計帳目雖然合法，但卻令它們（特別是房地美）誇大了資產。用普通人明白的語言，即係話兩房作大資產，讓人們以為它們資可抵債，大家應該記得，７月初兩房開始爆鑊時，它們不斷強調自己財務健全，如今證明係搵笨之言。

　　而達拉斯儲備銀行主席、聯儲局公開市場委員會成員Richard Fisher話，在財政部接管兩房前，聯備局的調查員已認為兩房的資產相對負債而言已屬太低。Richard Fisher的說法令人質疑美國政府為何不早點披露有關消息，早作行動。

　　聯儲局成員這個講法，明顯和兩房的聯邦監管機構聯邦房屋財政局口徑不一，因為房屋局總監James Lockhart在７月２３日還說兩房按法例要求有足夠資本，頂多只能說監管條例太寛鬆而矣。記者向財長保爾森追問此事，佢話自己當時無講過兩房資本充足，只係話「監管機構話兩房資本充足」，政府只是在派人入兩間公司調查後，才知它們資本不足夠。在７月２３日仍買入兩房股票的投資者，如今自然大發雷霆，會向政府追究，已有參議員發動國會開聽證會調查此事。

　　兩房可以誇大帳目，美國政府可以等到有解決方案後才披露問題，推而廣之，其他美國金融機構，是否同樣可以出了問題仍側側膞唔認呢？美國金融黑洞，又是否比想像中還要大？美國政府這樣不斷救市，要救到幾時先至救得完呢？

陸羽仁

      美股在政救兩房之後只升咗一日，到昨日就大跌，第四大證券行雷曼兄弟搵人入股失利，股價暴跌，加上油價跌令油股急滑，扯住股市向下，杜指跌280點，跌到11230點。


       標普500指數跌43點，跌到1224點，比杜指仲差少少，更近7月15日的低位，大有試新低之勢，將上日救市的升勢完全洗去，如果在消化救市好消息後這麼快就穿低位，後市都幾差。

       美國股市可以用人心惶惶來形容，雷曼本來和韓國發展銀行洽談入股，但昨日有消息話洽談破裂，市場擔心出現另一件貝爾斯登事件，加上看見兩房股價可以跌到得番個零頭，所以一有風吹草動就人人沽貨，搞到雷曼股價大插水。

       雷曼一日內跌了6.36美元，跌到7.79美元，一日唔見咗近一半，是94年上市以來最大跌幅，已出現恐慌拋售，走向一個執笠價。有分析員再調高雷曼第三季虧損，由原來估每股6.33美元，增至每股7.39美元，每股虧損就快估得高於股價。

       油價跌3.08美元一桶，趺到103.26美元，因為沙地官員的言論，令人相信油組會維持原油產量，油價就大大回軟，而能源股就好似食瀉藥咁大跌，能源指數跌6.4%，能源股好像跌極唔會停一樣。

       中環茶友話，本來能源股跌，其他股份應該會好一點，但好像你又跌，我又跌，不同種類股份一起跌，他相信對冲基金損了手，正大手出貨，再加市場人心極為不穩，一股跌，其他也跟跌，開始有點人踩人的感覺。

       在咁情況下，港股仍是走弱居多，美股若在救市後都守唔住，若向下試底，港股很難獨善其身，小心美股出第三季業績時，又有一輪衝擊。

陸羽仁

美股昨日又坐過山車，杜指一直下插，見過１１０９８點，跌過１．７％，但最後半個鐘頭傳出美國銀行收購第四大證券行雷曼兄弟的消息，金融股大幅反彈，結果杜指倒升１６４點，升１．５％，升到１１４３３點，洗去１７０點的跌幅，都可謂戲劇性。而標普５００指數走勢差過杜指，標普收報１２４９點，但早段的下跌令它一度插到１２１１點，穿７月１５日大跌日的收市價１２１４點，未穿當日低位１２００點，不過走勢都幾唔靚仔，而杜指昨日低位１１０９８點，和７月１５日的收市價１０９６２點尚有距離。

昨日美股上落幅度驚人，按揭銀行Washington Mutual早段曾大跌２５％，市場估計佢第３季要撇備４５億美元，需要大集資填數，但尾段隨金融股反彈，結果倒升２２％。

不過雷曼股價仍然大鑊，早段跌過４８％，尾段反彈後仍要跌４２％收場，單日跌了３．０３美元，收報４．２２美元，今年股價唔見咗９２％，已經去到執笠價，市場似乎認為它會是貝爾斯登的翻版，即使被人收購，都係賤價收購，現有股東隨時得番啲渣。雷曼現價總市值只是２９億美元（２２６億港元），比一些美國地區證券行仲細好多。雷曼兄弟股價再跌吓，就o黎細過我地睇香港報紙廣告成日叫人借錢的「XX兄弟」啦。

今次雷曼爆煲由業績公布開始，佢第３季蝕３９億美元，每股虧損５．９２美元，係佢１５８年歷史以來最大季度虧損，業績一出，華爾街分析員紛紛調低雷曼評級，認為雷曼自稱的應變方法如出售資產和取消派息只屬「虛招」，更擔心評級機構會調低其投資級別，所以紛紛唱淡。

穆迪等評級機構表示將雷曼放入監察名單，正密切注視雷曼的情況，市場認為若其現時的單A評級被調低，甚至調低幾級，情況會好災難性。因為若雷曼的投資級別被調低兩級，佢要攞多４４億美元作為衍生合約的抵押品，而調低級別亦代表借貸成本大升，融資更困難。加上好多金融交易都要看對手的信貨評級才會交易，若雷曼評級被大幅調低，好多生意也做不成。

熟悉情況的人話雷曼的狀況本來無貝爾斯登當時咁壞，雷曼現時仍是很多對沖基金的重要交易商，佢主要出現信心問題，評級機會Fitch Ratings的分析員Eileen Fahey話，佢地都把雷曼放入監察名單，但市場炒作雷曼衰敗，主要不是因為佢流動性不足，而是證券市場的信心問題，睇住佢股價咁樣急插，擔心佢根本無辦法籌到足夠資金去填充資產。

盛傳美國財政府部和聯儲局正和雷曼緊密磋商，協助佢尋求買家，而美國銀行係其中一個最可能的收購者，傳聞今次美國政府將不會出錢支持收購，只會促成其事，最快會在下週一亞洲股市開市前，公布雷曼的收購方案。

美國財政部剛救完房利美和房地美，跟著又要協助救雷曼，真係救到唔停得手，雖然市場好期望救埋呢間就見底，但事實又係唔咪咁呢？好似Washington Mutual呢種急插股，係唔係又排在雷曼之後，會步入困境呢？正如我早前所講，次按愈爆愈深，美國金融經歷「去槓桿化」的過程，好多環節都開始頂唔順，美國政府左貼一塊膠紙，又貼一塊膠紙，又可唔可以頂住呢個大浪呢？如果Fitch Ratings的講法係對，雷曼本來唔係資金不足，但出現信心問題就搞瓜咗佢，咁仲大鑊，美國市場信心咁弱，金融機構逐間插，咁咪好易出事？

股市反彈，大家亦唔好太樂觀，如今是在這一浪下跌的風眼中，未必一時三刻馬上跌完。

陸羽仁