歐亞股市上日受亞爺的四萬億元救市方案刺激，全面報捷，但美股就唔係幾靚仔，初段亦跟隨外圍造好，杜指開市即急升逾200點至全日最高的9,160點，隨後受高盛、Google等大公司業績滑波的拖累，抵消了中國經濟刺激計畫的利好影響，大市調頭回落，之後繼續尋底至全日最低的8,760點。尾市回抽，收回逾100點失地，杜指收市報8,871點，下跌73點，跌幅0.8%；標普500報919點，下滑12點，升幅1.3%%；納指則下挫30點，收報1,617點，跌幅1.9%。

中國的救市方案以基建為主，帶領美國的工業用商品類股份逆市向上，包括美國鋁業（Alcoa Inc.）、經營銅及黃金的Freeport-McMoRan Copper & Gold Inc. 、能源公司.Consol Energy Inc. 均有2到5%的升幅，Peabody Energy Corp. 能源公司大升逾9%。

不過美國自己的內需認真差，受金融危機影響，美國國內汽車銷量10月份下降32％，創出17年來月度銷量最低，其中通用汽車10月銷量大跌45％，公司宣告其現金消耗正在加速，將於2009年初便不敷應用。各大行紛紛降低其評級，德意志銀行將通的投資類別由「持有」降低為「沽出」，並將目標價設為「零」，即係話估通用會執笠，通用汽車股價狂瀉23%，成為杜指的跌市火車頭，相關的汽配製造商，如全球最大的汽車安全部件生產商TRW Automotive 集團及全球第二大的汽車座椅生產商Lear Corp. 亦受波及，分別大挫12%及20%。

講起執笠真係有間嘢執，美國第二大消費電子產品零售商CircuitCity昨天宣佈，已經向公司所在地法庭申請了破產保護，同時將關閉155家連鎖商店、與其餘566家美國零售店就租約問題進行重新談判，並考慮重組業務的各種方案。

金融股亦醜樣，英國巴克萊銀行（Barclays Plc）分析員指高盛集團第四季將會出現每股2.5美元的虧損。這是高盛自1999年上市的首次錄得虧損，分析公佈後，股價急挫8.7%。高盛剛在上周裁員3200人。

房利美收歸國有之後仍未搞掂，公佈第三季度業績，公司淨虧損290億美元，合每股虧損13美元，比去年同期高逾20倍，創歷史新低。同時,新任CEO Herbert Allison將該公司資產價值削減至少214億美元，並表示明年可能需要聯邦資金救助。

另一間被美國財政部接管咗的AIG公佈第三財季淨虧損244.7億美元，合每股虧損9.05美元; ，而去年同期實現淨利潤30.9億美元，每股收益1.19美元。由於與政府達成一項可減輕利息負擔的新協定，以取代最初的1230億美元的援助計畫，股價曾升逾兩成，收市漲8%。

有些朋友希望我唔好寫得咁多美國的市況，可能覺得睇到悶。我都係忍唔住手寫，皆因我日日睇住美股，過去邊類美股有郁動，港股同類股份都會跟升或跟跌，而家美國一日出現的新聞，比過去一年發生的大事還要多，例如高盛第四季將會虧損，這是公司99年上市以來的首次，過去出現這種新聞，可以做足一個星期頭條，而家又點忍心唔寫番一兩段。

最後再講吓阿爺救市大計，我覺得佢呢招係得o既，我一直估阿爺會出招，但一怕佢唔夠快，二怕佢出手唔夠重，結果見到這個4萬億大計，又快又重手，所以增強了對中國經濟的信心。但這種信心是很宏觀的信心，不一定等如股市會見底大升，但只要大陸經濟頂得住，阿爺唔使急急自救，可以幫手頂吓香港，咁香港衰極都有限。你試諗吓如果阿爺明年GDP增長得5、6%，內地一團亂，香港就有排都未跌完。

短線而言，香港股市受「列強」左右大局，你發生一劑好嘢，大市未來二十日會點，就要睇吓列強的劇本，如果佢本來炒緊反彈，劇本係上月政府勢兇夾狼要查空倉，我就反手炒高先，咁大陸4萬億救市就會借來一用，反反覆覆都炒番上去。但如果列強今個月的劇本係反彈見高回落，咁就唔理你4萬億救市也好，10萬億救市也好，一句「遠水不能救近火」，轉個頭就踩番你落去。唔好意思，講得比較反智，但實情的確如此。

後記:陸羽仁未來一星期外出公幹，網誌繼續寫，但對網友的提問就未必能準時一一回覆，請諒。


陸羽仁

  　美股受多家大企業慘不忍睹的季度業績報告影響，加上原油價格跌穿每桶60美元，市場憂慮經濟前景繼續惡化，美股連續第二天受挫。杜指開市即大幅下滑近300點，之後在低位爭持。下午，美政府宣佈房貸管理機構正聯合房利美、房地美對房貸專案條款進行修訂，防止更多的住房止贖情況發生，受這一利好因素推動，大市從低位反彈，但支持乏力。杜指收市報8,694點，下跌177點，跌幅2%；標普500指數報899點，下跌20點或2.2%；納指收市報1,581點，下跌36點，跌幅2.2%。紐約證交所成交約12億股，較三個月的日平均量低16%。

　　杜指30隻成份股除了輝瑞制藥(Pfizer) 逆市微升1% 外，其他股票全面下挫，最大跌幅為通用汽車，收市勁插13%，創65年以來新低！

　　其餘主要挨沽的股份為金融、能源和原材料類股份，高盛降低人壽保險業評級，並建議沽出保誠、Lincoln National Corp. 、Principal Financial Group Inc. 及 Hartford等多家公司股票，金融類相關指數下滑2.4%；由於全球需求放緩，原油價格下滑至每桶59.33美元，早段更跌低至58.32美元，創19個月以來的新低。標普500的40家能源公司全面下跌，能源類及原材料類股份分別下挫3.1%及4.2%。另外，美國鋁業(Alcoa Inc.) 被大行降低評級，股價大跌逾7%！

　　瑞信集團（Credit Suisse AG）表示全球已發展經濟正步向1945年以來最壞的經濟衰退，並將標普500在明年中的指數預測，從1,200點降低至1,050點。

　　昨日見到S2000的一段留言，雖然已經答咗，但係都想再講講，S2000係自己個名後加咗句「特大檸樂一杯呀唔該」，用這種方法來自殘，相信多多少少都同佢揸住啲蟹貨有關。

S2000問「以下的股票我應否等市況平靜後溝淡:

1. 882 買入價 8.35元，少量

2.386 買入價 10.38元，少量

3.410 、3377 上市價購入，各少量

4.998 買入價5.3 元，中量

5.1083 買入價4.1元，少量

6.2727 買入價5 元，中量

還是待2628 939到低位時買入守幾年好?因為若溝淡後蟹況可以早些鬆綁...但若買2628 939..投資價值又好似大d...可否給我意見嗎?以上蟹貨應選那幾隻溝淡??」

　　我對「溝淡」一詞有好大反應，因為呢個係非常容易學的錯誤觀念。１０元買入隻股，跌到５元唔係止蝕，再買大一倍，平均成本係７．５元，好似拉低咗成本，其實買大咗，隻股再跌再溝，結果買大咗３、４倍，自然係愈溝愈淡。

　　　　溝淡方法易學，條數易計，而且在牛市中，你買錯唔止蝕，仲去溝淡，如果個市好牛，大市反覆都向上，隻股跌完升番上去，你買大咗唔單止唔使輸，仲會賺多咗，你會覺得「溝淡」呢個方法好幫得手。但喺熊市又如何？大市的走勢和牛市相反，反覆向下，你買錯唔走，仲要加注溝淡，就會愈買愈多，不能自拔。

　　我聽過一個股壇老叔父講過一句好粗俗的說話：「女可以溝，股唔好溝」，佢見過好多有莊家的股票，股價一級一級咁落，引人一段段去溝貨，結果十個溝十個衰。叔父話，散戶第一次想溝貨的價位，反而係應該止蝕的價位。所以大家以後買股，買入後下跌，一想溝的時候，就去斬倉，又睇吓點。叔父話呢啲叫做「同黑仔對賭」，散戶成日要溝貨，皆因買入的時機不好，後知後覺，去買的時候，已經是小浪頂，所以黑仔係有內在原因。按這一個邏輯，本應會溝貨時去斬倉，就係同自己呢個黑仔對賭。

　　但S2000可能會話，而家情況有少少唔同，大市都跌到咁殘，我只係想低位撈吓貨啫，唔使咁大反應。如果係咁，就應該忘記了昨日的我，當日買的股票蟹哂，今日亦唔應該記住，要買貨唔一定要買佢地。又舉中信銀行（００９９８）為例，S2000在５．３元買入，時間應該係去年尾，已跌了一浸去買，可能係覺得佢平，可能佢回得比其他內銀股深，所以揀佢，唔係因為佢最強。當日買股的理由，如今已不存在，而家遍地平貨，你問o既建行（００９３９），市盈率１３．７倍，雖然比信行的１２．５倍略高，但建行息率有４．５厘，信行息率只有２厘，可能係信行比較細，無咁多水，有錢都留番來做生意，自然唔可以好似建行咁派較高股息。以這兩隻揀，都係建行好啲噃。

　　在股市低迷時，唔係唔可以買股，但唔一定要買番倉底輸過錢的蟹貨，要重新睇過有乜股好買。特別係當年買咗新上市的股票，牛市時垃圾股都炒，新股唔一定係好股，而家有錢買股都未必需要再買佢地。

　　好多時買番同一隻股溝淡，多少想拉低平均成本，讓自己個倉快啲上番水面，但想達到同一個目標，另外買其他好股都可以，你而家要做的事，係搵出有無其他股份，好過你手持的蟹貨，買那些股，可以跑贏你手上的蟹股。淡市時間多，可以睇清楚研究清楚才入市，大家做吓功課先啦。

陸羽仁

  　受美國最大的電子產品零售連鎖百思買（Best Buy）發表利淡言論刺激，加上財長保爾森表示財政部已經放棄買進問題抵押資產的計劃，將救市焦點放到個人信貸市場上面，市場預期經濟惡化、信貸危機仍在擴大，加劇了股市跌勢。杜指跟隨外圍跌勢，低開低走，承接乏力，跌幅每下愈況，以接近全日最低位收市。杜指收市報8,283點，大跌411點，跌幅4.7%；標普500報852點，下挫47點，跌幅5.2%；納指跌至五年新低，收市報1,499點，下跌82點，跌幅5.2%。紐約證交所成交約15億股。美股已是連續第三天下挫，而且跌幅不斷擴大。

　　繼全美第二大的Circuit City申請破產保護後，Best Buy的CEO Brian Dunn昨表示「對消費者來說，這是42年以來最艱難的，他們在支出方面有了極大的變化，我們亦不能倖免」 ，利淡言論令投資者憂慮零售市場更趨惡化，Best Buy備受沽壓，收市大跌8%。不過歸根究底，保爾森話美政府表示停止購買金融機構的問題資產，對美股影響最大，花旗銀行及標普500金融指數下挫至12年以來新低，美國銀行（Bank of America）下挫9%， 花旗及美國運通（American Express）均勁跌逾10%。

　　商品市場亦唔掂，NYMEX原油期貨收市跌3.18美元，報每桶56.15美元，為07年1月以來低點。而Comex金屬期貨交易市場12月黃金期貨價格下跌了14.50美元，收報每盎司718.30美元，過去兩日金價共跌了28.2美元。標普500能源類股份勁插7.3%，而原材料及電子通訊類股份亦下跌6.4%及5.1%，Exxon 及Chevron下滑5.1%及8.5％。

　　　　昨日叫網友S2000無謂溝貨，要買從新考慮過有乜股好買，背後有一個理念，就係買股要經過理性分析，唔好感性行事，溝貨的人有一種心態，認為「我在邊處跌低，就要在邊處爬番起身」，呢種諗法多少有點「死牛一便頸」的心態，唔肯認輸，但買股死牛一便頸，不屈不撓，好可能會死得好慘。

　　我叫大家理性分析，這裏可以提供一條自問自答的清單俾大家。

1.
首先問呢間公司會唔會執笠呢？在金融海嘯之前，我問呢個問題，可能大家都會覺得我咁問好誇張，但雷曼執咗之後，乜都有可能發生，呢個問題不能不問。不少工業股、內房股從高位跌了九成幾，股價得番個零頭，就正在反映這種執笠風險，收入轉差，債高難捱，可以搞瓜間公司。市場經常傳一些公司唔掂的消息，例如某內房股欠債太多頂唔順，某紙業股好水緊賤賣資產救急，這些消息會令股價愈插愈低，股價跌得多銀行更唔信佢，形成一個惡性循環。

2. 當一家公司可能執時，你買入佢就要作total loss 的預準備，一般唔好買，即使要買都唔好瞓身去買。我都打算等大市再狂跌時買吓呢啲執笠股，為自己搞個小型執笠股基金，買番三、五隻執笠股，預咗咁黑三、五隻瓜哂自己都唔肉痛，博佢只有少量損傷，例如一隻死咗另外四隻捱得過，咁就有不俗回報，呢啲項目較啱「投機的我」的口味。（風險聲明：這是超高風險行為，只宜極小注，輸清唔好話我教你，如果你係細路，就一定要有大人陪同先至好做呢啲高危動作）最後一提，國企執笠的機會較細。


3.
問吓間公司再大跌的機會有幾大？本來呢個問題好難答，但咁嘅市股價PE仍高時，例如仲有１８、１９倍以上的市盈率，就真係唔平。大家應該記得，國壽３０元時，好多朋友問我好唔好買，有人話好股唔怕買，我就話熊市貴股唔好買。我腦海中殘留了記憶，國壽２００７年１月上A股當日，香港H股炒上高位是２８．８元，我當時覺得呢個價錢已經都好貴，無理由一年幾之後市道咁波動３０元係平。你唔識揀平貴，就揀一啲大行業跌到殘的股票，碧斯話買美股買航空股和金融股就係咁意思。記住已經大跌的股份還可以大跌，不過只要唔會執，跌幅無那些新跌股咁大而矣。

4.
睇吓問公司的行業是在改善中還是惡化中？就係我地經常講壞消息反映咗未。美國金融股壞消息都出咗六六七七，但消費股就剛開始，零售的前景滯後於金融，所以消費股仲有得跌，又例如航空股，經濟衰退會令航空業最賺錢的生意大減，例如客運係賺頭等客、賺商務客，這些生意跌得好快，但回來也會好快，而油價大跌卻令航空公司成本得以改善，開始有番少少正面因素。


5.
睇吓間公司係唔係有價值的公司。套用股神巴菲特的標準，要揀行業龍頭，最好有啲壟斷地位，股價跌到殘，但公司仍有相當賺錢能力。上面講的小型執笠股基金只是玩吓嘢的搞作，我真正想借呢次金融海嘯建立一個好股投資組合，以低價購入一些有價值的股份長揸。在呢啲大風浪中，買股一啲都唔使急，可以用半年時間等機會，但若果你最後一股都無買，我估５年後你會極度後悔。（也是風險聲明：記住我唔係叫大家今天飛身入市，用三個月至半年時間等機會，慢慢買。）

未完待續。

陸羽仁

美股走勢有如坐過山車，受到9月份貿易逆低於預期影響，杜指稍微高開後在8,200至8,400點之間窄幅波動。中午，勞工部公佈一周首次申領失業救濟人數創7年新高，受不利消息刺激，沽盤湧現，大市一瀉如注，杜指一度失守8000點關口，杜指低見7,965點；標普500指數更跌至五年半以來的低位。午後，原油價格暴漲3.7%至每桶58.24美元，刺激能源股份被趁低吸納，杜指自底部強勁反彈，飆升911點至全日最高位。在最後的三小時內，杜指由下跌近4%變成上升逾7%！挾倉補倉現象至為明顯。杜指收市報8,835點，大漲553點，升幅6.7%；標普500報911點，上揚59點，升幅6.9%；納指上升98點，市報1,597點，升幅6.5%。紐約證交所成交近20億股，為上月16日以來交易最多的一天。

近期，原油價格接連暴跌，能源公司的股價均受到沉重打壓，下挫至有史以來的最低水準。美國政府公佈由於減產原因，原油供應增加細過預期，油價急升，市場趁低吸納油股，帶動大市強力反彈！標普500能源類股份大漲11%，遠遠跑贏其他類別股份的4%。推動大市的最大動力來自Exxon和Chevron，分別飆升9.4%及13%。

從技術分析睇，杜指自上月27日以來，這是第二次下試8,000點，雙底的建立已形成一堵很強的防線，下試不破，隨即引發強勁反彈，算是一個不錯的利好走勢，相信大市在短期內會在8,000與9,700這個區間波動。至於會否在第三次試底下破，下破的話走向如何，則仍有待觀察。

昨日講到要買股唔好諗住溝淡，而係要當一個全新的投資，從新去審視買呢隻股的合理性，講到底，係一個態度問題，係一個方法問題。

網友元華咁問，「是否一股都不可以溝? 大如 1仔, 5仔 都唔好溝?」我

o既答案好簡單，係，一股都唔好溝，但係如果諗清楚佢係好股，在熊市你都想去買，你可以當一個新交易來買。舉個例子大家易啲明。

　　就用元華的例子，講吓匯控（００００５），你１４０元買咗一手匯控，問９０元買多一手溝吓得唔得，如果唔得，跌到７０元可以溝啦啩。我建議大家用另一種態度去思考同一個問題，如果我而家有幾萬銀，可以買一手匯控，到底匯控係唔係好股，買唔買得過？有無其他股份好過匯控？

　　人好受經驗影響，過住買一隻股成功，就想像以後買呢隻股都會成功，匯控就係一個例子，有一個中環茶友好反對人買匯控，話匯控今時唔同住日，唔好以舊時的經驗睇今日的情況。匯控是一間管理良好的公司，但管理良好唔一定等如唔會犯錯，幾年前投資美國做按揭生意，回頭看好明顯就係一個錯誤，而呢個錯誤當日亦造就了我們對匯控某種良好感覺。

睇匯控可以好宏觀咁去睇，匯豐由一間立足香港的銀行，隨住香港經濟壯大而壯大，跟住衝出香港，首先收購英國業務，遷冊去倫敦，變成一間以英國為總部的銀行，再收購美國業務，形成香港、英國、美國業務三足鼎立的局面。公司壯大某一程度時，要求佢每年盈利仲有１０幾、２０％咁增長，基本上唔太現實，但部份垮國公司就透過併購達成呢個目標，匯控亦屬如此，近年收購美國業務，初時都有好大貢獻，但炸彈潛藏其中，搞到自己一身蟻。匯控呢身蟻搞完未呢？我唔係幾知，美國似乎仲有手尾，根住又要歐洲爆煲，匯控都唔似咁快走出困境，未來成敗要看是否要為歐洲業務作巨額撥備。

用番我昨日問的四個問題，第一匯控應該唔會執笠，第二佢再大跌的機會不能排除，因為唔知歐洲下一步要撇帳多少，第三是公司所在幾個地區的業務還在惡化中，歐洲唔好，香港又下滑。第四係由於其歐洲業務有潛在危險，所以不能確認佢o既投資價值。

經常有朋友問我好唔好買匯控，我最簡單的答案係貴就唔好買，現價亦未算好抵買。假如我在１４０元買咗匯控，而家見佢８０幾元，我首先會話唔溝貨，然後從新考慮而家有錢買乜好？例如買匯控好，還是買吓招行（３９６８）或者H股指數基金（０２８２８）好呢？以招行為例，現價１２個幾元，睇起來仲係有空位跌，如果跌穿１０元可以考慮，但即使以現價計，招行７倍幾PE，息率２．５厘，匯控PE也是７倍幾，息率８．８厘，兩者PE接近，匯控派息優勝，但我覺得匯控來年不易維持現在盈利，長線的增長除非美國撇帳可以作大額回撥，否則美國和歐洲的衰退會大大約朿匯控的盈利增長，現在的息率非常吸引，但係唔係可以維持現時派息也是一個問題。但中國４萬億救市，放寬銀行借貸，大陸GDP應可保８％，招行主要業務在大陸，未來經營環境會好過匯控，適合大把青春的後生仔女，佢地收少啲息唔怕，最緊要長線有增長；但過了退休年齡的網友可能要靠食息過活，匯控派息較高就其特別賣點。

所以我唔敢包匯控不會雨過天清，若歐洲無事佢會幾OK，但目前睇歐洲有問題的機會唔細，這就是風險了。

散戶注碼有限，要細心思量如何下注，唔買指數股買個股，就係希望佢跑贏大事，但你有錢唔諗清楚，只去溝手上有的蟹貨，又係唔係聰明的行為呢？

陸羽仁

G20國首腦齊集華盛頓舉行經濟峰會，共商如何應付當前世界面臨的金融和經濟問題，會議一如所料無乜實質料到，只講大原則無講具體措施。

呢20個國家佔全球經濟總量90%、人口75%，所以唔可以話佢地唔重要。20國首腦開會時分析了危機的根源，指出市場過度追逐高收益，缺乏風險評估和履行相應責任，而經濟結構不完善，導致風險過度，最終引發嚴重的市場混亂。講完危機成因，G20峰會都達成一啲共識，會後發表了《華盛頓聲明》，宣佈制定了五項相應的中、長期行動計畫。包括一、提高金融市場透明度和完善問責制；二、加強金融機制的監管；三、促進金融市場完整性；四、強化國際合作；以及五、改革國際金融機構，其中主要包括擴大新興經濟體在國際金融框架內的發言權。

峰會當日，20國領導人都承諾採取財政、貨幣等刺激經濟增長的政策措施。與此同時，各國領導人承諾2009年不會設置任何新的貿易壁壘、新的出口限制或採取不符合世貿組織規定的刺激出口措施等。

美國總統布殊話，新興經濟體必須有更大的話語權，使得他們對國際金融機制有更大的貢獻。新興經濟體國家領導人則認為，在召開專門商討經濟議題的峰會時，20國集團會議應取代8國集團會議。

20國集團同意於2009年4月30日之前再次舉行會議，審議其今次會議決定的落實情況。據分析師稱，此次呼籲對全球金融行業進行監督和檢查，表明全球各國領導人都希望未來的拓展行動能夠更加順利進行，但是20國集團並未作出刺激經濟增長的具體承諾，此舉會令部分投資者失望。紐約High Frequency Economics公司的首席經濟師威恩伯格（Carl Weinberg）就表示：「G20的決議並非處理當前問題的強力行動聲明，因為各國並未有協調削減稅收和利率的明確承諾和措施，在週末的會議之後，市場可能會更加疲軟。」

呢次20國峰會未達成具體行動有潛在病因，首先係發起人美國總統布殊，已經成為跛腳鴨，提不出有力措施，即使想夾硬來，也唔擔保能夠落實，自然形成他的保守心態，唔想推得太盡自己無面。另外如中國、巴西等發展中國家又希望在國際事務上有更大話語權，例如以G20組織取代G7組織，發達國家也不願馬上接受。

最搞鬼的係市場對G20開會的反應，呢次會議不但對市場無刺激，仲有少少走向相反方向，例如日圓走勢，日圓兌歐元從紐約上日收市的122.39圓，今早升到121.26圓，日圓兌美元亦由上日收的97.14圓，升到今早的96.57圓。市場對G20開會的結果失望，估計全球經濟會衰較長時間，對沖基金沽日圓買高息貨幣的套息交易的風險增大，部份套息交易平倉，因而推高日圓。

美國經濟衰退加深，G20開會又無料到，今候任美國總統奧巴馬有啲心急，他在接受六十分鐘時事雜誌節目訪問時話，財長保爾森將來會對其7,000億美元救市計劃的成效感到失望，方案的效果會差過保爾森的估計，皆因方案未能將焦點放在業主放棄贖回物業的問題上。他認為應該安排銀行與業主之間的協商，讓業主能保留自已的房屋。

奧巴馬又希望政府能救助通用汽車等三大汽車廠，讓它們免於倒閉。在這一點上他和布殊政府有嚴重分歧，布殊政府已攞出不惜讓車廠倒閉的姿態，不想用納稅人的錢去救汽車工業，共和黨參議院領袖已表明支持此一立場，看來三大車廠倒閉已逼在眉睫。既然爛攤子要民主黨的奧巴馬來接，共和黨都唔怕大講自由市場主義，唱吓高調了。

在這種形勢下，美股短期仍有壓力，特別是三大車廠若果真係爆，都會幾得人驚，按道理奧巴馬唔會俾佢爆，問題是如何在這個過渡期頂得住三大車廠唔會爆了。

陸羽仁

華盛頓召開的G20會議未有達成應付全球經濟衰退的具體措施，日本跟隨英國、德國和整個歐元區加入全球經濟衰退大軍，加上美國第二大銀行花旗集團宣佈將裁減五萬二千名員工，遠高於市場預期，投資者憂慮全球經濟加速下滑。美股走勢大幅波動，杜指早段先跌後升，最高曾升逾70點，隨即調頭反覆回落至全日接近最低位收市。杜指收市報8,274點，下挫224點，跌幅2.6%；標普500報851點，下跌23點，跌2.6幅6.9%；納指下跌2.3%，報1,482點，創五年以來新低。紐約證交所成交近13億股，較三個月的日平均減少12%。標普500成份股中的24個行業全部下跌。

由於抵押貸款相關的複合型債券和風險債券投資失利，花旗集團去年虧損超過200億美元。有分析師表示，2010年之前花旗都不太可能獲利。花旗集團宣佈至明年年初前將裁減15%的員工，共52,000人，比上月公佈的人數多一倍。消息帶動金融股下瀉。花旗集團收市挫6.6%，報8.89美元。杜指中跌幅最大的則是美國鋁業，瑞銀集團(UBS)指由於鋁金屬市場不穩定，將美國鋁業降低至沽出，股價勁挫11%！

杜指30隻成份股衹有3隻逆市上升，其中最顯著的是通用汽車，受惠於美政府承諾注資250億美元緩解汽車業困境，股價上揚5.7%。

值得留意的是，杜指繼上周下試8,000點不破，再度迫近8,000點大關，若走勢持續，已經係自10月27日以來第三次試底。若一旦失守，杜指將會出現更大的下滑空間，大市危矣。要密切留意美股近期走勢。

因全球經濟增長放緩，油輸出國組織(OPEC)週一調降明年全球原油需求的預估，將進一步減產以穩定油價。並預計2008年全球石油日需求增幅將下調26萬-29萬桶；2009年則下調27萬-49萬桶。 OPEC在10月決定從11月1日起每日減產150萬桶，但仍未遏止油價跌勢。該組織將於11月29日在開羅、12月17日在阿爾及利亞舉行非常規會議，為進一步減產鋪平道路。美國原油期貨收低2.09美元，報54.95美元。COMEX-12月期金GCZ8結算價收低0.5美元，報每盎司742.00美元。

據路透社引述，美國證券交易委員會（Securities and Exchange Commission）以“內幕交易”起訴達拉斯Mavericks棒球隊及NBA小牛隊老闆Mark Cuban 。報導指Cuban於2004年1月在得知互聯網搜索引擎Mamma.com將通過私募股權方式籌募資金後，拋售該公司股票，減少了七十五萬美元的損失。SEC執法部門副主任Scott W. Friestad在一份聲明中稱：“個人利用獲得的內部情報在市場中圖利是極不公平的。”

網友元華早前講起月供的問題，令我想再回應一吓。佢話月供要俾手續費，要成５０元一個月，供一千幾百元一個月都唔夠一手股票，點解唔在大跌時買一手股票呢？佢仲計咗條數，話每月５０元，２０年等如１．２萬元，差啲都夠買一手招行（０３９６８）了。

投資講方法，方法有上、中、下策，搵到上策，行之有效，長線就可以贏錢；搞錯咗行咗下策，長買長輸，炒股３０年，都可以係光棍一條。再講吓乜嘢係下策，下策就係隨波逐流，大市最熱時去買，最冷時去沽，個市熱到爆錶時才去開始買，到大市開始跌落來時，唔止唔走，打開收音機問吓主持，主持話可以溝一注，就去溝夠兩注，愈溝愈多，不能自拔，這就是典型散戶，到這些典型散戶連床下底的一注都攞埋出來買股溝貨，個市都繼續跌，佢地無哂癮無眼睇，甚至忍痛沽清啲貨唔再買股票時，就係股市到底的時候。

散戶有太多心理弱點，要克服散戶的心理弱點，就要同散戶對著幹，做散戶唔做的事，甚至做佢地（即係自己）相反的事，就有機會贏錢。講起月供，肯定不是上策，頂多只是中策，月供有好多壞處，例如手續費貴，一個月５０元，如果你供２０００元，已經是２．５％，等如你要俾人抽水２．５％。又例如呢個方法在大市好大市淡時都買，好市時嫌佢買貴貨，淡市時貨平嫌佢買得少。月供當然唔夠在旺市時出清貨，在見底時撈貨咁大快人心啦。

不過，世事並無咁完美，邊有個個咁叻高賣低買，月供呢個中策，主要用來克服部份散戶的某些嚴重毛病。散戶毛病數一日都數唔哂，第一，用哂無錢剩。好多人、特別係後生仔，會餐搵餐食餐餐清，賺幾多使幾多，雖然佢都知儲錢投資係好，但有錢通常使哂，最後有１萬幾千都去埋日本用埋至算。月供主要針對這類人，逼佢地儲錢，你唔儲錢，２０年後可以１毫子都無；你肯去月供，每月供２０００元，一年２．４萬，１０年２４萬，２０年供都供咗４８萬，呢條數未計收息，未計股票會增長，合理點去計埋收息與增長，２０年加埋派息股票變４倍一的都唔奇，你就有２００萬股票，雖然真係要俾１．２萬元手續費，呢１．２萬就算逼自己儲錢的成本吧。

第二，胡亂出入市。股民受情緒主宰行事，信自己的感覺，信專家分析，在大牛市中，人人都係股神，散戶易瞓身，受那種我明天就變千萬富翁的感覺吸引，在市愈旺買得愈多。到市場逆轉時，散戶又易受另一種情緒影響，就係輸錢想博番的感覺，總覺得賭多一舖就可以贏番突，股評家叫人溝淡就食正就種心態，所以甚有市場。總之言之，散戶隨住自己的感覺走，好易走走吓走到懸崖邊，憑著自己的判斷行事，住住是最差的判斷，所以月供就規定你好市時又供，唔好市時又供，要按規定的方法入市，總好過散戶自行判斷，揀最差的時機出入市。

第三，淡市難克服恐懼。散戶在市場升到顛時最勇，但在大市跌到傻時最驚，如果在牛市要克服貪婪，在熊市就要克服恐懼。經常都有網友問我，好唔好等大市反彈時先沽貨，等低位先買番。我嘅答案大多含含糊糊，講到咁做都得，但係又唔係好鼓勵大家咁做，我而家可以解吓原因。從短期走勢而言，在呢啲反彈市，都睇到佢彈極有限，在熊市的反彈市，你都唔可以期望太高，所以短線而言，的確係等彈高沽咗貨先，等跌多一、兩成買番最化算，如果成功走兩三轉，持貨成本隨時減低三、四成，但咁做講就易，做就難。你在反彈「高位」沽貨，沽完佢再彈，你可能忍唔住又買番，咁就游一轉水愈游愈貴。又或者沽完真係跌，但跌落去個市氣氛愈來愈差，你根本無意欲買，心理被恐懼感控制，可能就係咁離開咗個市場。但月供可以逼你在低價時去買，而且同樣供一筆錢，在市淡時可以買更多貨，在市旺時買少啲貨，就有市淡加注，市旺減注的效果。

我唔係建議人月供，我認為這只是一個中策，但單係一個中策，已經可以克服好多散戶的毛病。人人用的方法唔同，如果你係一個大花筒，又易受人影響，買賣都好衝動，低位買貨都坐唔住，升少少又會走咗，咁月供又不失為一個好方法。反過來說，如果信自己有自制能力，平時可以儲錢，可以忍到在大淡市才買貨，買完唔怕守，升少少又無咁易走，咁就唔好月供咁笨啦，等低啲再大手買入啦。

陸羽仁

美股經過兩天跌市後，昨日終於有買盤撈底，杜指開市即反覆向上，上午11點過後升至全日最高點的8,478點，但受建築商信心指數(homebuilder confidence index)下跌至歷史新低影響，杜指調頭回落至全日最低的8,105點。尾市3點後由能源及科技股的帶動動，重拾升軌。在最後的一小時止跌回升。杜指收市報8,425點，上升151點，升幅1.8%；標普500報859點，上升8點或1%；納指微升1點，報1,483點。

        惠普(HP) 第四季盈利高於市場預期，反映HP能夠抵禦經濟危機。股價飆升14%，帶領標普500科技板塊上揚1.9%。Yahoo繼上月裁員1,500人後，CEO楊致遠成為第1,501名被裁員工，他的下台亦打開了微軟收購Yahoo的大門，股價備受追棒，股價上升8.7%。而昨天最大的贏家為能源類股份，標普500能源類板塊上漲3.3%，遠遠跑贏大市，Exxon及Chervon均上漲4%。

         美國財長保爾森和聯儲局主席伯南克昨天上眾議院金融服務委員會解話，被議員圍毆，保爾森堅持政府的救市計劃並不是要為經濟困難者提供止痛藥，與希望政府大力救助業主和三大車廠的國會議員火星撞地球。

         保爾森話，救市計劃的目標不是去刺激經濟，或是令經濟復甦，只是去穩定金融市場及恢復信貸流通。主持會議的金融服務委員會主席法蘭克(Barney Frank,)在答問環節打斷保爾森，話救市法案「清楚到不得了」，亦有幫助減少住房被銀行收回的目的。

         但保爾森回應話，金融市場面臨的壓力將持續數月，加上11月10日美國國會授權政府向美國國際集團AIG再注資400億美元，到目前為止，7000億美元的救助資金至少有2900億美元已經在計畫之列了。保爾森話，「我將不會尋求啟動新的項目，除非他們是必須的。我想保存火力和靈活性，因為在政府換屆後依然需要大量資金。」。這暗示，布殊政府在未來2個月已經不大可能再有大動作了。

        美國議員主要逼政府做兩件事，第一係接受聯邦存款保險局主席貝兒(Sheila Bair)的建議，動用大量資金為業主擔保按揭。第二係動用大量資金救助三大汽車公司，而不是依賴早前已通過的對汽車業250億美元的貸款計劃。美股近期持續弱勢，反覆向下，相信就係因為現政府不願出重手救助業主和汽車業，市場怕危機會續繼爆。

         如何緩解佔美國國民生產總值10%的汽車業仍是市場近日焦點。今年９月，美國國會批准為陷入困境的汽車業提供250億美元節能研發貸款，旨在提高汽車節能水準，提升美國汽車的國際競爭力，這也可以是搵一個藉口借錢俾汽車業的方案。

　　但是，由於美國汽銷量急降，美國汽車業三巨頭通用、福特和佳士拿虧損快速加劇，三間公司最近分別提出申請，希望美國政府從7000億美元的金融救援資金中拿出一部分救助汽車業。民主黨提出議案將使汽車業的援助款項在原有的250億美元基礎上再增加250億美元。但議案遭到白宮強烈反對。白宮發言人Dana Perino在周一晚表示，民主黨議員的方案未能要求汽車生產商痛下決心、進行必要的重組以維持生計，救市計劃的錢還要用來穩定金融系統並鼓勵銀行發放新貸款以促進經濟增長。白宮稱民主黨不會贏得足夠的支持票來擴大或將將汽車業納入財政部7,000億美元的救市計畫的範圍。不過白宮表示， 早前經批准的工廠改造貸款250億美元，應該盡快到位。

　　美國汽車業三巨頭的CEO於昨日出席美國眾議院金融服務委員會近日將就如何救助汽車業舉行的聽證會，解釋其援助訴求。福特CEO在接受CNBC訪問時說，通用汽車申請破產將導致清盤而非重組，而汽車企業之間有著很密切關係，某家公司倒閉將會波及其他企業，掀起倒閉潮，對整個經濟打擊非常大。

奧巴馬１６日晚在美國哥倫比亞廣播公司電視臺的“６０分鐘”節目中接受訪談時呼籲，在目前情況下，政府需要確保支援美國汽車產業。佢話:「目前的環境下，汽車工業崩潰對於美國經濟將是一場災難。在經濟正常運行情況下，允許通用汽車公司申請破產，然後重組，並使其營運逐漸正常，或許是一個解決問題的辦法。但在目前這種複雜的經濟環境下，這是行不通的」。他希望在未來一星期內，政府和國會圍為汽車工業提供救助展開討論。並建議救助以「過渡性融資」的形式進行。

德銀的分析員估計，若美國汽車業在2009年第1季倒閉，美國汽車生產會下降30至35%，會令美國GDP下跌4%，失業率會急增到8至8.5%。

共和黨正和來屆民主黨政府抬槓，對救助汽車業的興趣不濃，奧巴馬未上任已經要受重大考驗，在這種爭持形勢下，美股都好難睇好了。

陸羽仁

正如早前預測的情況一樣，美國困死在營救汽車業的難題上，通用、福特、佳士拿三個汽車業巨頭向政府求救遭白宮強烈反彈，投資者憂慮汽車企業倒閉將引發更大規模裁員潮，進一步打擊經濟，加上公佈的消費物價指數及新屋建造均跌至歷史新低，聯儲局會議紀錄又反映委員認為經濟收縮將延續至明年中，市場悲觀情緒瀰漫，沽盤湧現。美股三大指數均跌至2003年以來新低，杜指大跌427點收場。

美股昨日開市即反覆向下，跌幅不斷擴大，尾段 更急插，下滑至全日最低位收市。杜指第三次試底，終於失守8,000點，收市報7,997點，下瀉427點，跌幅5.1%，跌穿近期的收市低位，是10月10日跌市以來首次收於8000點樓下；標普500報807點，下跌53點，跌幅6.1%，全年累積跌幅45%，為1931年以來最差的一年；納指下跌97點或6.5%，報1,386點。紐約證交所成交上升至16億股，較三個月的日平均增加8.6%，跌市成交大，不是好現象，顯示沽貨者仍然積極。

美股走勢極之樣衰，杜指昨收7997點，係收市低位，但尚未是近期低位，因為昨日的日中低位是7987點，而10月10日杜指上次創新低時，日中低位是7882點，比昨日的低位還低105點，不過當日即日從低位大幅反彈了569點，收在8451點，顯示當時還有不少撈底客，但經過這一個多月的下跌，市場已適應了低位，所以昨日尾市大插時亦未見有人撈底，以近全日低位收市，這是非常差的走勢，按理是蓄勢要創新低了。

    若美股要脫離劣勢，今日應要大幅反彈脫離低位，若美股造不出這種反彈，甚至再度下插，那樣美股又要再試新低，杜指未來可能又有500點以上的跌幅。港股受內地股市表現硬淨影響，走勢稍強於美股，但恐怕這也是假象，若美股不斷尋底，港股短期難免又要試底。

標普500隻成份股共493隻下跌，杜指30隻成份股則全軍盡墨。重災區仍是金融類股份，花旗股價勁插23%，跌至13年新低，而摩根大通和美國銀行亦分別大跌11%及14%，花旗大跌皆因它旗下的結構產品投資公司(SIV)買入的資產再從9月底的估值215億美元大幅下降，SIV呢樣脫離銀行帳簿的投資方法，由花旗在1988年發明，旨在避開政府對銀行業的嚴密借貸監管，結果而家累死自己；花旗由於市值急跌，已由全球第一大銀行，跌到美國第四位都保唔住，被U.S. Bancorp最代，成為美國第五大銀行，呢個前一哥而家都好悲涼。

另一隻引人注目的股份係股神巴菲特的巴郡，佢自從公布第三季盈利急降77%後，已經連跌8日，上日已跌穿10萬美元一股，昨日再跌12%，跌了11550美元一股，跌至84000美元(巴郡是超級大價股)，昨日之跌是巴郡23年來最大的跌幅，佢今年至今跌了41%，漸漸追上標普500指數的45%全年跌幅。過去20年巴郡升了17年，在跌市時都有抗跌力，跌得少過指數，呢次就唔係幾得了。

市場分析話巴郡無乜嘢基本因素問題，只是美國經濟有基本問題而矣。我就覺得巴郡的問題比這個分析大。雖然股神係行樓梯底帶安全帽之人，入股公司都揀可換股優先股，先收10厘息，有問題可以唔換股，但你睇佢入股的通用電器和高盛等，從入股至今兩三個月，已經大跌，佢入股高盛時仲有百幾元一股，而家得番50幾元，股價跌了一半，佢入股的公司(特別係通用電器)的倒閉風險正在急升中，因為布殊政府已擺出一個非金融股不一定會救的姿態，所以這些優先股的估值亦已大跌，巴郡的股價正在反映這種風險。

巴郡仍然是AAA評級的公司，但其「違約調期」的約金(即公司債券的保險金)大幅倍升，即係話市場開始注意到巴郡的執笠風險，雖然現在然唔太高，但講巴郡的債券可能還唔到，已經唔係一個笑話，而係一個現實問題，所以入市入得早都有風險o架。

再睇吓美國汽車股，全部係執笠價，焦點股通用汽車下滑9.7%，跌到2.79美元一股，而福特汽車更被洗倉，股價下瀉25%，跌到1.26美元一股，美國人食少一餐早餐，已經可以買一股通用，或者買兩股福特，所以你唔好笑分析員將通用的目標價定為零，都唔係無機會。如何營救瀕臨倒閉的三大汽車廠的爭論仍是市場焦點，由於汽車業佔美國GDP的10%，且涉及包括了供應商、交易商和汽車租賃等超過400萬個就業機會，市場憂慮汽車業一旦崩潰，勞工就業將出現一片混亂，美國經濟將會有可能陷入長期的衰退，投資者均採取觀望態度，打擊市場氣氛，看來解救汽車業方案有眉目前，都好難睇好美股了。

陸羽仁

歐、亞股市下瀉，原油價格因憂慮衰退而持續急跌，美國失業人數攀升，加上政界對拯救汽車業未有共識，美股繼週三跌穿重要支持位8,000點後，昨天繼續急插，杜指大插445點收場，收報7552點。

美股早段觀望汽車業援助方案發展，四個來自汽車製造城市的民主黨和共和黨議員對拯救汽車業方案達成共識，一度令市場憧憬汽車製造業會獲得救而利好股市，杜指早段曾上升逾2%，最高見8,187點，重回8,000點樓上，但隨著民主黨眾議院領袖表示救汽車業方案難獲跨黨派支持，事態發展越不明朗，大市跌頭急插，跌幅不斷擴大，跌至全日低位7506點，最後以近低位7,552點收市，大幅下瀉445點，跌幅5.6%；標普500報752點，下跌54點，跌幅6.7%，創11年新低，為1931年以來最差的一年；納指下跌70點或5.1%，報1,316點。

標普500指數從2007年10月最高位的1,565點下跌到現在的752點，價值已蒸發了6.69萬億美元，比2000年熊市第二期的所蒸發的總資產值的5.76萬億還要多出近1萬億美元。

由於美國、歐洲和日本同時陷入經濟衰退，導致消費疲弱，燃料需求大跌，原油紐約商業交易所(NYMEX)12月份交貨的輕質原油期貨價格大跌7%至每桶50美元樓下，收49.42美元一桶，跌8.7%，這是自2007年1月18日以來首次跌破每桶50美元。與7月11日的每桶147.27美元歷史高點相比,紐約原油期貨價格已經下跌了66%。受油價下滑拖累，油類股份受挨沽，ExxonMobil及Chevron下挫6.7%及8.8%，兩隻油股拖低杜指共89點。而石油服務股份的打擊更驚人， Schlumberger及Transocean均大幅下滑16.3%及 17.3%。

金融股繼續係下插天王，FBR Capital Markets的分析員米勒(Paul Miller)話，要有1萬億美元先至可以頂番起個金融市場，即係話美國政府的救市資金遠遠未夠。金融股繼續被人質，早前入股花旗做咗老襯的沙地王子Alwaleed bin Talal出口術話會加注花旗，都頂唔係呢隻過氣股王的價錢，花旗繼前日跌23.4%後，昨日再插26.4%，大跌1.69美元，跌到4.71美元一股，市值亦急降到257億美元，即係2005億港元，唔好講中國四大銀行，即使規模較細的商業銀行招商銀行(03968)，市值都有2119億港元，即係話招行市值大過曾經是世界第一的花旗。

花旗呢啲股價，愈跌愈令長線投資者心驚，因為最後可能要美國政府入股打救，例如大手注入2000幾億美元救佢，並換取花旗股票，原有股份就會攤薄到10分之1，真係只值3幾元一股。當然，而家夠膽買的主要是短炒客，入市就博佢短線反彈。花旗自己跌到驚，就建議美國證監會禁止沽空金融股。

   　其他金融股亦跌到殘，高盛再跌5.8%，跌穿上市價53美元，跌到52美元，股神巴菲特個多月前買入高盛的優先股時，高盛股價還有123美元，批股當日最高見過129美元，一個月唔夠唔見咗一半有多。美國而家最大市值的銀行摩根大通亦急插17.8%，跌到23.38美元，是2003年以來的低位。

美股走勢正如昨日所料，破位向下，杜指今次跌穿8000點的大位，並向下急滑，極度樣衰。上次10月3日跌穿10300點的大位時，7日後跌到7882點的低位，跌幅23.5%，如果今次穿大位有同樣跌幅，要跌到6120點! 即使唔好睇得咁誇張，都要先睇吓杜指守唔守得住7000點大關。

不明朗往往是股交市的大敵，而不明朗因表仍繼續環繞著汽車製造業。布殊政府企硬先前的方案，只會從能源基金借250億美元出來俾汽車業應急，唔同意動用7000億美元救市資金去救汽車業，議員亦眾說紛云，美國又快要放感恩節假期，跛腳鴨財長保爾森也不一定如以住地放假都開會研究如何救市，總之留番俾下屆政府去收拾，令拯救汽車業方案難望在短期內獲得通過。

    　美國汽車業真係一個死局，你睇三大,汽車公司首腦坐住私人飛機去華盛,頓遊說，私人飛機飛一程要耗油2萬美元，如改坐航空公司頭等位亦只需837美元，其揮霍可知。唔止老闆係咁，員工亦係咁，汽車業工會盤據，員工人工高福利好，通用工人每小時人工加福利總成本71美元，而日本的Toyota只要47美元，你話通用點夠人爭。汽車業工人退咗休還可享受醫療福利，以通用汽車計，自2005年至今，單是退休員工的醫療已用去310億美元，而家美國汽車工會拒不讓步，唔肯放棄退休員工的醫療，工會主席Ron Gettelfinger話，美國汽車業好需要政府救，讓它們可以繼續承擔78萬退休員工和相關人士的醫療責任咁話。睇完呢啲數字，呢啲作風，就知美國汽車業生了癌症，真係救又死唔救又死，唔係一時三刻可以解決，咁搞法個市仲未爆完鑊也。

陸羽仁

美股杜指上週五終於在兩天累積下近900點後揾到支持，杜指整日在7,600點窄幅爭持，最後一小時急彈，一口氣重上8,000點樓上。杜指收市報8,046點，上漲494點，升幅6.5%；杜指三十隻成份股除了花旗集團和摩根大通逆市下挫外，所有股票均全面上揚，升勢最淩厲的是美國鋁業，大升23%。

花旗週五繼續狂瀉兩成至3.77美元，全年累積跌幅87.5%，而上周便下瀉近60%。而家花旗正和美國財政部和聯儲局正商議尋求拯救方案，以挽救公司渡過難關，有關人士週末還在開會，預計救花旗的方案最快會在美國時間今日公布。

花旗總資產有1.23萬億美元，問題是當中4000億美元資產有毒，佢的CEO賓迪(Vikram Pandit)在5月時曾承諾在3年內處理掉這筆資產，當中包括按揭、債券、汽車貸款、企業貸款等，但而家未處理好就毒發。美國財長保爾森的7000億美元救市計劃，原本重點係從金融機構買走有毒資產，但自從佢跟咗英國直接入股金融機構後，近日宣布不再買金融機構毒資產。花旗的投資者眼見公司無法清理這些毒債，就急急沽之，今花旗加速病發，所以今次政府救花旗的方向，又是從買入或擔保它的毒資產開始。

傳聞而家美國政府救花旗的方案，就係先處理掉4000億資產中最毒的1000億至2000億，那些資產可能仍放在花旗，但政府會承諾擔保超過某數額之上的損失，即係由政府包底，花旗輸極都有一個清淅的數目，可以一筆過撇掉，而政府可能同時注資充實花旗資產。

美股跌了不少，若救花旗方案落實，或可延續一吓反彈，但要注意美國救完兩房，又救AIG，到今日又要再救花旗，政府救金融巨企對美股的刺激會愈來愈少，大家不會期望政府救完花旗就雨過天青，美股穿位向下的走勢未改，只是大跌中的短期反彈而矣。

市場另一個焦點是候任美國總統奧巴馬的財金班子和經濟政策。奧巴馬在民主黨每週例行電台講話中說，「還須採取更多措施幫助人們重回工作崗位,並使經濟恢復運轉」，他正和民主黨議員著手研究另外一個大規模的刺激經濟方案，並會在2009年1月20日總統就職典禮上提交國會通過。方案內容大概包括教育、基建和綠色能源工程等。奧巴馬表示，預計計劃在兩年內可以拯救和創造250萬個職位。至於計劃的詳細內容和涉及的金額則未有公佈，但相信總額會遠比奧巴馬在競選時提出的1,750億美元的刺激經濟計劃為高。民主黨議員Chuck Schumer表示，總數預計會達到5000億至7000億美元。不過，對於這個方案，布殊卻持反對意見，認為不該在剛批核的7,000美元救市計劃上再加多一個。

至於稅制方面，民主黨眾議院議長貝洛西表示，計劃包括了減免中產階層的稅務。因為不少經濟學家表示在經濟不景的時候不宜加稅，奧巴馬在競選時提出增加徵收富有人士稅項的建議，將會重新予以考慮，富有人士稅率有望保留至明年不變。在美國政府交接中的兩個月，金融市場會相當動蕩。

陸羽仁