港股上周四、上周五走勢好唔靚仔，已證明有強手在近３００００點的位大手出貨，這印證了較早前一個估計，唔好簡單地以為這次反彈又可以如過去那樣一舉穿高位（３１９００點），由於上次高位被大陸資金推高了，所以今次彈到咁上下會回，但回吐勢頭仍甚急，散戶唔識走高追了創新高的熱股，好易被套窂。

　　美股上周五無大變動，但經濟數據不錯，減低了本周二美國聯儲局減息０．５厘的希望，減息０．２５厘已成定局，由於大幅減息機會渺茫，美元亦在反彈，油價又急回，周二的各種減息效應提早反映出來。

　　講番投資組合，網友Elle想分散到不同的資產類別，但Patrick就話太多不同資產難掌握，都係集中買港股，但分散買不同股票以降低風險，其實兩個人講的話都啱。理論上Elle啱啲，因為若可以全世界咁去搵不同資產類別分散投資，按道理風險可以較平均分散，好多有錢人都係咁做，問題是一般人資金較少，又沒有時間研究，要分散不同資產、不同市場投資有一定困難，所以又會產生Patrick的想法，集中買港股，分散買藍籌和高增長股，都有少少分散風險的效果。

　　陸羽仁有幾點觀察：

第一，以長線一、二十年計，買樓買股，升值會比買債券、貨幣、黃金多。

第二，分散市場投資不易，投資海外資產，較難積極管理，所以投資海外以房地產這些不動產好一些，因為不用經常進出，揀較低位入市，揸佢五年十年，博有多點回報。


第三，集中投資一個市場，例如買港股，好易由投資變炒股。

第四，散戶知識不足去炒股，大市好時短線有高回報，但花無百日好，股市好幾年又會變差，小心長線會輸番突。

　　所以陸羽仁的結論是如果你把所有資產放在香港股市，你要有高EQ和自制力，否則長線未必好過放在銀行。

　　網友myself有個回應，我想和大家分享一下，他這樣說：「小弟真的很喜歡看陸sir的文章，看陸sir的兩本書和blog，看自己，看看網友，越看越了解自己之餘，亦從心裡佩服人家真的有一套，不論是投資或投機，新手、高手就是不同，股票賺錢低買高賣，看似簡單，人家背後真的下了不少功夫，買賣技巧可以學習，心態上的不同更能分出高低。」

「新手有通病，人從畢業到工作有錢，便會開始買股票，心態上要說服自己，我們都是平凡的大多數，有大多數人新鮮人通病，有一般人的弱點，一個人的病唔係通病，一大群人的才是通病，買股有通病會輸錢，投機市場，零和遊戲，100個有通病的人，每人輸1萬，人家高手就賺你100萬，香港有通病的散戶又點止100個，每人又點止輸1萬，有咁大筆錢，自然會吸引有心人(大鱷)來搵食，還記得陸sir引股場老手說，太平山下最多是什麼人嗎？」

「高手入市，低位分段建倉，買保險，有計劃去賺，更有計劃去輸，出入有度，一套『長賭必勝』的手法，由於方法正確，有輸有賺，把次數拉長總的是賺。散戶單天至尊，死煲一隻股，反彈差不多到接近上次歷史新高，才入市「博反彈」，有賺有輸，方法錯誤，甚至係冇方法，有賺有輸，把次數拉長總的就是輸，重是輸到要離場。新手沽得最盡時，高手開始分段入貨，新手好樂觀去追貨時，往往高手就開始分段出貨，不知道是否對著幹，但這種現象的確經常出現，難怪人家說股場是財富轉移的地方，財富由弱手轉到強手，最終是富者越富。」

「買股賺錢，唔可以好科學去分析，記得小弟讀大學，在實驗室做生化實驗，要研究甲對乙的影響時，會把其它所有外在因素保持相同，只會改變甲，去看甲對乙的影響，得出結果後，再重複幾次，看是否得出相同結果，這叫科學。股市不同，一來唔可能把其它因素控制不變，亦不可能把單一事件，作不同試驗，聯儲局唔可能話試下減0.25%，唔得就時光倒流，試下減夠半里睇下點，股場天天在變，更莫說加入了個人心理原素，更難去掌握。」

「投資相對上可以減少不確定性，做隻羊在高原食草，投機便不能避開不確定性，做鼠有做鼠的性格，要有策略去保護自己。」

　　從網友myself的回應，看到他開始明白股市運作的原理，明白散戶炒股為何這樣難長線賺錢。

　　所以網友說希望組合每年有１０％回報，我估有一萬個方法可以達到這個目標，但亦有２萬個可能你不但達不到這個目標，而且還要輸錢。我在頭條日報的專欄都舉過這樣的例子，買賣中銀香港（２３８８）的股票，在跌近１８元時買，到２２元時沽，過去一年有４次這樣的機會，你做足４次不是有１０％回報，而是有８０％至１００％的回報，但講就易，做就唔易，因為正常人買股，低位不想買，高位不願沽，明知有一個方法，都好難執行得到。所以組合若以股票投資為主，想要每年平均１０％的升幅，談何容易，這等如好市時有１０多、２０％的升幅，以備跌市時的虧損。

　　而那２萬個令你不能達到投資目標的錯誤，主要不是大市走勢，而是自己的心魔，你無高手之能，就要學低手的方法，低手是要嚴格的方法規範自己，定出清楚的投資目標，按目標設計出組合，若組合不需進出，就要抗拒誘惑，死都唔沽。若組合需要進出，就嚴格按紀律進出，不要被自己的臨場判斷所左右，食夠就要走。記住，真正的高手萬中無一，但平庸的人成千上萬，你不要打敗高手，只要比成千上萬的庸手稍稍聰明一點、稍稍守紀律一點，就可以出線，你不是要打敗高手，你只要打敗庸手。

陸羽仁

   　　美股在聯儲局議息前夕，又來一彈，道指升１０１點，主要是房屋銷售合約數據理想，市場亦好像不太擔心瑞銀因為次按撥備而發出的盈警。港股跌咗三日，美股上升，今日應有像樣一彈，但調整未似咁快完。

　　網友少帥轉貼一個散戶Pandamanman自白炒期指輸到喊的故事，好有警世作用，值得一書。 Pandamanman話「２００７年炒期指和國期十賭九輸，最近幾個月已無沾手。但上周五一件事令我陷入深淵，當日下午兩點多開市對盤時, 偶然發現１月期指的AO價對盤時竟然比12 月期指低水百幾點, 當時12 月期指對緊298XX點,
１月期指對緊29718點, 本打算踫踫運氣, 嘗試掛29720點買入１月期指, 最後, １月期指AO盤成交價29887點, 當然買唔入, 我便叫朋友幫我取消有關買盤, 點知下晝開市後期指急瀉, 我朋友無端端通知我話個盤成左, 因為朋友開市後唔記得取消, 　我立時一呆, 都唔知點算, 當時29720點買入後, 佢通知我時已跌左近100點, 做緊29621點, 我本住係朋友關係, 便隨口一聲說睇一睇先啦, 因如果朋友要報「錯誤交易」, 會俾個上司丙, 點知這一刻的心軟, 為我帶來一生不能承受的痛, 短短一個下晝, 期指插水超過700點, 我輕率的一句唔記得取消, 我哪一刻的心軟, 就為我輸掉幾個月人工。」

　　　　Pandamanman話：「幾年間幸幸苦苦儲來一點兒錢, 數星期前與家人落訂買樓, 剛落完大訂, 月尾前就要搵按揭上會, 我宜家搞單咁既野, 我真係唔知點算, 以往輸的, 比這次大鑊幾倍, 我都未試過輸到喊, 但這次我哭了, 我輸得不甘心, 我再無本錢守下去, 這次我輸左自信, 輸左對朋友的信任, 輸左對自己的尊重.....

我內心的自責不時令我萌生自殺的念頭, 但想深一層, 我有幾件事一定要先處理好, 否則死左累及家人, 是一種更不負責任的行為。希望我對身邊人的一點關懷, 可讓我支撐下去, 否則, 就讓這篇自白成為我的遺書了。」

　　陸羽仁希望Pandamanman能支持下去，最最最老土那一句：「留得青山在，那怕無柴燒」。現代版是「留得條命在，那怕無錢炒」，最緊要是保住條命，汲取教訓，以後唔好再輸啲無謂錢。

　　Pandamanman輸到喊的故事，有幾個教訓，散戶絕對要學：

第一，唔好賭期指。期指是大槓桿、高風險的衍生工具，散戶往往是和大戶對賭，大戶唔止睇通大市，仲操控大市，你同佢賭，死十個當五雙。睇Pandamanman識得哂啲術語，根本係賭慣期指之人，賭到慣，輸到慣，最簡單的方法就是戒賭，避開這種產品。

第二，輸錢要止蝕。唔好理乜原因買錯，錯咗要認，輸錢要企定，即時應變斬倉，就是上策。即時決定唔到，２９７２０點買咗期指，唔想在當時２９６２１點平倉，想睇一睇，都應該定一個下方止蝕位，例如２９５２０點打靶，頂多輸２００點，輸１萬銀，都叫做有個譜；經紀電話有錄音，第一次聽錯都得，第二次叫佢止蝕，佢唔可以唔同你止蝕。Pandamanman的問題主要唔係買錯，而係無止蝕，買錯頂多讓他輸１００點（即時止蝕）或２００點（遠價止蝕），後來輸７００點（或更多），大部份係無止蝕所導致。所以一確認買錯貨，最好立刻止蝕。

第三，炒股要有虧損預備。Pandamanman的故事或他的心態，有點不合還輯。他無講在什麼位止蝕，我估頂多１０００點，每點５０元，即係輸咗５萬元，賭得期指，就要預咗輸１０００點、２０００點，而家個市上落咁大，你上午揸咗期指過中午，下午開市裂口低開１０００點，一啲都唔出奇，若你揸過夜，就隨時２０００點都有得輸，都唔好講出現一晚跌５０００點、６０００點的股災了。Pandamanman輸１０００點想自殺，若故事情節無錯，他賭期指時完全無風險意識，無預自己輸１０００點以上，心態極度危險。

　　股海無義，人間有情，但溫情過後，再踏足股海，就十分殘酷，無人幫到你，要緊記自己輸到喊的教訓，唔好再死人尋舊路了。

陸羽仁

　　美國聯儲局決定減聯邦基金利率０．２５厘（銀行之間拆借的利息）至４．２５厘，同時調低貼現率０．２５厘（銀行向央行貼現的利率）至４．７５厘，市場原先希望有更大減幅，特別是希望貼現率減０．５厘，消息一出，極為失望，股市大跌，債價上升。

道指急跌２９４點，跌幅2.1％，跌至１３４３２點，其中金融股受創最深，例如摩根士丹利股價急跌８．１％，大市氣氛轉壞。而債券價格急升，對利率最敏感的兩年期國庫券價格抽升後，收益率跌０．２５厘至２．９２厘。

美股美債的價變化，隱含雙重意義，表面看是對減息太少的失望，深層看亦有對經濟衰退的關注，怕減唔夠貼現率，銀根鬆得唔夠，解決唔到次按問題，而家市場係覺得聯儲局落藥過輕。

儲局今次是以九比一決定減息０．２５厘，並非一致決定，波士頓儲備銀行主席Eric Rosengren投了反對票，他贊成減息０．５厘。聯儲局會後聲明取消了上次那句「 risks of slower growth and faster inflation were roughly balanced」（增長放慢和通脹加快的風險大致平衡）；不知儲局是確認經濟衰退的風險增加，還是連減幾次息後開始擔心通脹風險。

不過陸羽仁分析，聯儲局正採取擠牙膏的手法，每次減０．２５厘，不斷減息，以營造市場的期望，阻止信心下滑，以解決次按危機。因為聯儲局決定減０．５厘本無難度，現時咁減無人會批評佢減得過多，但一減減０．５厘，市場開心過後，就會更增經濟衰退的疑慮；而且一下子減得太多，刺激起通脹，若次按問題再惡化時，減息救市的空間會減少。

所以聯儲局下次在１月２９日至３０日議息時，再減０．２５厘的機會亦相當大，不過未來一個多月，美股又要再坐坐過山車，到１月初時，不排除又會插深啲，營造氣氛挾聯儲局再減息。

港股昨日偷步炒減息急彈７２５點，升到２９２２６點，升幅超過５００點，挾死唔少淡友，不過這次像樣反彈又形成一個陷阱，引人追貨，追了貨遇上美股急回，好可能又要坐艇。

陸羽仁估今個月都係在２８０００點至３００００點玩上落市居多，減完息要繼續一浪調整，跌到咁上下，到近月尾基金年結時可能推番高少少，大家要有心理預備係上落市，高位唔好追貨，特別係本地地產股及本地銀行股，小心佢地短期已見咗高位，要回一回氣才會再上。


陸羽仁

美國聯儲局及其他四家中央銀行推出聯手救市計劃，變相注資入銀行體系，以緩解銀行間的借貸危機。消息一出曾推高道指２７０多點，不過之後美股回軟，收市只升４１點，坐住過山車上落。

今次美國聯儲局和歐洲央行等央行出招，主要針對銀行同業市場信心不足的問題，近期歐洲銀行同業拆息長期高企，銀行不是無錢，而是互不信任，不知借貸對手受次按危機影響多深，怕借了錢對手執笠收唔番，有錢的銀行都唔想借錢出街，搞到銀行同業間的銀根已很緊張，同業拆息高企，再進一步幅射出去，企業好難借錢，商業票據市場大受影響。

如今聯儲局等的救市措施，主要不是針對隔夜錢，而是大約一個月左右的中期貸款，方法是由這些央行定期拍賣例如２８日期的貸款，等如銀行怕風險唔想借錢俾其他銀行，就等央行來借出去。其實聯儲局已連番減了銀行向它借錢的貼現率，但銀行向它借錢的動機還不夠強，透過這種定期拍賣貸款的形式，就等如一定有固定金額的錢流向市場，銀行只要付合理利息，不用擔心借唔到錢。而聯儲局就冒上了這些銀行可能不能還債的風險。不過現實上銀行爆煲，主要是週轉問題，央行走出來提供週轉資金，銀行應該不會爆煲。

聯儲局話這個計劃上周已和其他央行傾好，並不是見到減息後美股大跌才想出來，只是等歐洲開市才公布，所以才沒有在減息時一併公布。不過由於次按危機未過，銀行股表現仍差，花旗就跌了４點幾巴仙，我們仍在風眼中，並不是雨過天青，風平浪靜，正如金管局任總所講，金融市場仍然波動也。

網友Coco問起一個問題，值得一再研究，他說：「對不起!那邊的網友提醒我;今年4月你就說了國内是小泡沫.7月調整以後,你說國内已經沒泡沫了.也許我每天閲讀太多各家各派的文章,所以有時候會記不清楚誰說過什麽了.」

陸羽仁天天評論股市，或許有些話講得不清楚，惹起大家誤會，先行請罪。上證綜指６０００點時有泡沫，今天５１００點也有泡沫，這樣不會含糊。我想大家先要問一個問題，什麼是股市的泡沫？甚至拉闊一點，什麼是資本市場的泡沫？我想泡沫的本義是投資產品的市值，脫離了它的基本因素，一個地區的經濟基本因素是它的經濟增長，通常以GDP增長來代表，一隻股票的基本因素是它的盈利，通常以市盈率來表述，一個房產的基本因素是它的租金收益，通常以租金收益率為表述。你問我一幅名畫的基本因素是什麼，我暫時未答到你，或許如黃金一樣，除了它的抽象欣賞價值外，它們有相對於其他資產的相對值。

香港是成熟經濟，股票高於２０倍市盈率，已有泡沫；房地產租金收益率低於３厘，亦有泡沫，舉一個例，有間山頂house３０００呎，４萬元一呎，樓價１．２億，租金２４０萬一年，租金收益率２厘，我覺得有泡，若升到６萬元一呎，樓價１．８億，租金加唔到，租金收益率１．３厘，泡沫更大，若租金維持不變，以直式計算，要７６．９年才會收回買入價成本，大部份人等到死都收唔番本，當然，你可以有租金不斷上升的憧憬。

講番股票，我主要睇基本因素，就是公司的盈利及其增長，其次亦看股價上升的速度。睇市盈率較易理解，若盈利增長速度快，可以忍受高一點的市盈率，所以高增長國家的股票，略多於３０倍市盈率都尚在可接受範圍，但高於此數，泡沫開始湧現。另一個因素是股價上升的速度，若股價上升過速，就是那個斟酒理論，斟得太急，自然起泡，好像月前阿Ray在恒指急升穿３００００點時問我點睇，我就話個幾月內從低位１９３８０點起計，升咗１００００點以上，單講速度，升得咁急都起泡，好難唔調整，否則過多一個月咪要升到４００００點？升得急是一過輔助因素，幫我們留意到泡沫的湧現。

大陸股市現價約４０多倍的市盈率，很難說它沒有泡沫。大陸股市４月時急升穿４０００點，５月回落到大約３５００點，之後到７月回升，升番穿４０００點，之後反覆向上。恐怕Coco的朋友記錯了，我無話「７月調整後國內已經無泡沫了」，不過在答問題時應該有答過調整後見大陸股市回升，可以買吓。或許我應該得更清楚，應該可以「投機性吸納」。從價值投資者的角度，內地股市升穿４０００點，開始起泡，市盈率３０多倍，開始好難揀得落手。但從投機者的角度，大陸股市在５月調整後，到７月再升穿前一次高位４０００點，擺明是一個炒上格局，所以咪可以「投機吸納」。

我講港股也是一樣，今年２月升穿２１０００點、７月升穿２３０００點、１０月升穿３００００點，我都講過愈炒愈貴，提示大家唔好追，但調整過後，我又會話唔怕買吓，我講「買吓」，主要是「投機吸納」，追入要守止蝕。其實我對港股的基本價值睇法沒有變，升穿２３０００點之後，逐步起泡，開始偏離基本價值，「投資的我無乜貨揀得落手」這句話，我估自己都講咗幾十次了。

股市有泡，泡沫最長可以湧兩三年，在泡沫中感覺會十分愉快，不過泡沫爆破後又極其痛苦，分清楚自己投資抑或投機，定清楚買股的策略，是控制風險的最佳方法。投機炒股，只能貴買貴賣，較難長揸。

陸羽仁

　　五大央行救市觸發信心危機，搞到亞洲股市和歐洲股市大跌，英國股市跌３％，巴黎股市跌２．７％，美國股市喘定，道指微升４４點，升幅０．３％。

　　五大央行救市的措施唔係無效，係有效，歐美銀行同業拆息都回落，美國三個月同業拆息回落到５厘樓下，報４．９９厘，係３個月內首次跌低到５厘樓下水平，反映市場認為五大央行的行動，將有助舒緩銀行同業間的資金緊張，勇一點的銀行就提出出手放貸，導致息率回落。

　　但昨日由環球股市的反應，卻是一個危險訊號，顯示信心非常詭弱，一有風吹草動，市場就跌。

　　陸羽仁昨日再找高手請教，問吓佢點睇呢個波動市。大家應該記得，高手一早話佢會在３００００點先減一半在低位購入的投機倉，結果他在１２月７日大市衝到２９９６２點時，衝３００００萬不破，他先沽一半倉位獲利，當日他估計３００００點應一衝而破，他想把止賺位放在３００００點，希望再食深的，怎料衝３００００點不破，他認為大市在美股造好的前題下升幅有限，連續兩日如此，有派貨味道，感覺不好，先減半倉。

　　當時他認為大市仍有機會向好，再等，到１２月１１日聯儲局議息前夕突然抽升，但並無利好消息，他估計聯儲局減息０．５厘的機會極細，挾淡倉的味道好濃，所以在２９２００點高位再放四分之一貨，剩番四分一貨，他認為這個月炒減息的浪應已走完，但剩下這四分一貨是投資自己看錯的，所以沒有清倉，但他同時做了等值四分一倉位的淡倉，表面看是好淡平衡，其實他部份倉位是衍生工具，所以近似持有一個馬鞍式組合，大市大幅向上或向下，他都會有收穫（有一定難度，散戶不要模倣）。

　　大家要留意的是高手在減息日開始，對本月的走勢已不再是睇好的態度，是中性略偏淡了，他認為只要調整不穿２８０００點，這個月還是上落市，中段插吓，到月底又好番少少，但不能期望太高了。而本月過後，怕下月初又會再插。

　　不過最近兩日的局勢開始令他擔心，第一是五大央行一齊出手，非比尋常，問題的根源是歐美的銀行同業互不信任極其嚴重，怕交易對手中了次按重招，所以不敢拆借資金出街，他們都是行家，有此懷疑，自有根據，恐怕銀行業仲有次按大炸彈未爆。第二是內地宏調措施比想像中嚴厲，阿爺未完全出手，市場已好驚，恐怕來年大陸銀行都要勒緊衫袖不能放錢出街。

　　這兩件事在股市反應出來，大陸股市沒有想像中的持續反彈，早前的反彈似假復甦，好快又回到尋底格局。而外圍股市又因救市措施再急跌，２８０００點太輕易失手，雖然好可能是急跌觸發的止蝕盤，高手有點擔心調整唔使等到下月又再開始，他的策略是等反彈將最後四分一好倉清空，變成一個淨持淡倉格局，又等下月美股下跌挾聯儲局再減息。


　　我問他擔不擔心沽貨後變成淡倉，錯過下半月可能出現較大反彈的機會。他認為時間太短，風險略高，不能抱大大希望，上番３００００點有難度，放到下月初睇，２８００００點左右的下跌空間和上升空間接近，值博率有限，少食多覺瞓，以控制風險為上策。他觀察期指高低水走勢，變番高水好少少，即係話月中過後有機上番高啲，但若轉長期低水，恐怕會變為跌市。

　　陸羽仁唔贊成散戶沽空，但想追貨要小心。月頭追貨只為短炒，過咗減息已消耗大部份向上炒的動力，大陸唔啱feel，就連紅色股都唔升，只炒基金佬月底粉飾窗櫥，幅度好有限，所以唔好死牛一便頸，記住自己在炒股，月頭追貨，唔等如而家又追，市跌了都唔好咁急追，因為我相信由而家到下月中，會有比現價更平的入貨機會，想入都可以等等，風險不低，錯過了亦無需可惜。

　陸羽仁

　　股市愈高，搵食愈難，這是千古不變的道理，在年幾前恒指１７０００點的時候，我講過投資組合，那時感覺很輕鬆，我記得當時大約係咁講，買股從買匯豐（０００５）開始，匯豐變成一隻上落股的趨勢幾明顯，所以當時我話想賺多少少，買匯豐不妨進出一下，一年收息加賺差價，１０％回報不難達到；要求高一點，就在組合中加一半紅色巨股，隨時有１０幾、２０％回報；若想博得盡啲，全部買紅色嘢，一年２０％回報有可能。

　　其實設計投資組合，有一個重要原則，就係要先考慮自己能承受多少風險，即係你能承受多大損失，這個原則比考慮自己想得到多少回報更重要；在現實生活裏，風險和回報成正比，想要高回報，就要冒高風險。

　　一年多前講投資組合時，沒有太多強調風險，不是風險不重要，而是那時的市況風險相對不高，稍加留意即可。但到今時今日，恒指已處於２７０００點的水平，雖然高處未算高，但不能不叫大家更加要重視風險。

　　如果是公司去投資買股票，一定要年年計數，控制風險的要求更高，私人投資寬鬆一些，可以唔年年以市價計現值，但買股票即使忍得佢跌，亦要佢將來有機會上得番入貨價才可接受，舉一個例，如果我今日１３３．６元買匯豐，雖然明知佢有次按問題，明知佢美國業務較多，但估佢衰起上來大跌，跌穿埋１００元，過幾年佢都會上番１３３．６元，唔會好似美國嗰間安然，或者英國間霸菱咁樣，從地球上消失，假設買完匯豐衰足５年，５年後股價跌完升番上１３３．６元，計番每年收的４厘息，咁今回報仍有４厘（記住這不是對匯豐的投資建議），咁樣都叫做相對安全。

　　若先從安全的投資組合、或者組合的安全部份開始，就要想想那一些是比較安全的股份，遇上股災都跌唔死的股份，讓這些股份成為組合的一部份，賺取比較微薄的回報，但卻可以換來安全，投資這些股票會拉低組合的整體回報率，但同時會降低風險率。

　　但要找這些股票，並不容易，記得網友myself講過自輸錢的例子，佢咁講：「小弟有賺少少、輸多多既經驗。之前輸過在電盈(8)、有線寬頻(1097)、中芯(981)，全部輸超過50%，輸大錢，因為炒股唔識止蝕，以為投資股票梗係要長線架啦，果時心諗：「畢菲特都係長揸賺大錢啦！短期波幅唔使理，我係長線投資者！」，結果真係好長線，電盈揸7年(輸8成)，有線揸6年(輸9成)，中芯好的，揸2年輸6成。當你買入隻股，得番2成錢，你就會覺得沽都無謂，真係可以好長線咁持有o架。自己唔了解隻股，高價買錯股唔肯認，用投資的心態去投機，真係抵輸！」

　　你睇番Myself買的股票，雖然都曾經係熱門股，但唔可以話係純炒股，有線剛上市時前景好亮麗，中芯上市後跌咗一半時好多人都話見底，電盈更加唔使講，由２８元高位跌下來（曾經５合１，以現價計是１４０元），跌落來時每一段都有人話好抵好抵。這三隻股，都有可能永遠上唔番myself買的股價，派息又唔係多，若組合搵了這些股票做膽，都會幾慘。

　　Myself話自己「用投資的心態去投機」，的確無錯，他不是想去買純炒股，只是在價位好高、炒味幾濃時買「實業股」，結果可能比買炒股更慘，因為買炒股你懂得止蝕，買有大生意做緊的公司，你對佢有信心，覺得跌咗會升番，就不會去止蝕。

　　網友按基本因素睇公司，但對那些行業的情況不太了解，如電盈和有線，在最亮麗的時候，就是他們開始失去壟斷或近似壟斷地位的時候。當年電盈前身香港電訊接受港府賠錢幾十億，提早結朿國際通訊（IDD）的專營權，早已進入戰國時代，當時的母公司英國大東睇透呢個局，所以才願意把生金蛋的鵝高價賣給小小超。

　　而有線寬頻做有線電視雖不是專營，但其他其個競爭者放棄經營，搞到有線在一個階段享有等同專營的地位，但由於不是真正專營，政府隨時可以再發牌，地位本已脆弱，生意一好賺就易吸引對手入局；後來電盈和城市電訊睇到法律漏洞，用電訊網做收費電視，連有線電視牌費都唔使俾，電盈一開始推出Now TV，有視電視的惡性競爭時代馬上開始，有線寬頻就無運行，股票死得。而中芯則是台灣同業在內地的移殖體，上市時沒有經營往績，即使上市後一段時間，它能否長期在行業生根，仍未清淅，風險更大。散戶唔係做這些行業的生意，即使想研究基本因素，都只睇到目前的數字，好難睇得通行業的大勢變化，所以好易入錯貨。

　　所以要為穩健組合搵隻股責倉，並不容易，過去可以搵匯豐，而家匯豐因次按問題風險上升，可能也不是低風險的選擇了。

（明天續談低風險股）


陸羽仁

　美股又插，道指昨日再大跌１７２點，跌幅１．３％，跌至１３１６７點，表面看無甚特別原因，只是能源股怕美國衰退帶頭下跌。美股下跌的時間比想像中快咗少少，速度亦急，又會拖住港股向下。

　　好多朋友問港股跌到乜位見底，上月２２日的２５８６２點顯然不是底，所以唔好咁快去撈底。若大陸股市無重大利好消息，港股大方向跟美股，道指在下次聯儲局議息期前（即明年１月３０日），又會再試短期低位１２８００點，未見到道指跌到這些水平，唔好估港股見底，正路估道指在１月初會試低位，如果唔係更加早o既話，所以在此之前，唔好估恒指已見底。明年第一季估計恒指會在２３０００點至３００００點間炒作，炒作區間下移，回到較「正常」的水位，基本上是外資大戶玩慣的巨型波幅。會唔見２３０００點，先要看呢個月穿唔穿上月低位２５８６２點，如輕易跌穿，已確認一個月比一個月低的走勢，下個月有機會試低位，如果今個月唔穿上月低位，未來的低位可以睇高少少。若果未來一兩個月真係不幸跌到２３０００點、甚至跌穿時，就要看是暴跌式穿位還是插插吓穿位，才能判定是否股災。

　　來這裏看文章的朋友，心態千百樣，有些好短炒，有些極長揸，但現時的市況，雖然不能排除有反彈，但明年初美股試底的壓力又至，除非好短炒，唔係好難博。

　　昨日講到低風險投資，最多人會諗的是在低位買強勢股票，但這也是最難做到的事情。股市指數愈高，低風險的投資機會愈少，但指數回落後，低風險的投資機會增多，在３００００點買股票的風險很高，只能投機短炒，若果真係跌到２３０００點，會安全啲，萬一跌到２１０００點，更加安全，但跌到這些水平時，你的感覺會覺得好唔安全，好唔敢買，反而在３００００點你會放心買。股民的習慣係咁，愈低風險，愈唔敢買。

　　你可能會問，若未來一，兩個月真係跌到２３０００點的時候，怎知不是股災呢？股災來時有個樣。遠的不說，８７股災，９７股災，２０００年科技股之災，有些特點，第一，主要是外來因素，好多時是美股成災所帶動，當然今天香港也要留意大陸股有無災。第二，股災的跌幅一來就好驚人，以港股計，一開始一日就跌一、兩成，甚至可以一日跌三成，比較少是慢跌，以現時恒指的點數計，一日要跌三千點、五千點，見到咁既跌幅就應該股災到，無得唔走。


　　當然，即使在真正的低位撈貨，還是分注入較好，一邊入一邊判斷有無大災難在前面，而且撈完亦要認真睇睇使唔使止蝕，若到位止蝕，可以先打靶，低位再買。

　　低位買股始終有一定風險，但風險與回報亦成比例，如果真是在低位買到龍頭強勢股，一年兩三成回報不難達到，但由於低買龍頭股不易做到，或者不易把握到好價位，所以控制這種投資風險的最好方法，還是控制注碼，例如以一個４０歲以下的「青年投資者」計（香港的傑出青年參賽標準好似係４０歲以下，所以這個年齡之下視為青年），這樣低買高賣的高風險投資，可以佔一半，年紀愈輕，比例可以愈高。控制較高險部份投資的比例，等如主動把自己降級，我覺得陸運會可以分初級組、中級組、低級組，買股票亦一樣，新仔投資，應該參加低級組，風險少啲，回報亦都少啲，但好多新仔一入市就加入高級組的遊戲，不只買熱門股，仲炒窩輪、炒期指、炒期權，和高手作賽，風險之高可想而知。

當你自己覺得技巧純熟，時常可以捕捉到時機，低買高沽，即使是６０、７０歲，就１００％買哂熱門股都唔拘，自認有高級組的身手，不妨玩高級組的遊戲。不過我可以咁講，低買高賣是所有買股人的目標，但多數人做唔到，有時做到只因為大市好，或者那時好運而矣，所以控制這些投資的比例，自願降低比賽組別，犧牲一點回報，就是控制風險的最佳方法。

而組合另外一半，可以買平價優質股，也可以投資一些穩健收息股，明天續談。

陸羽仁

歐洲央行對市場進行史無前例的大放水行動，向銀行投放３４８６億歐元（即３９１１７億港元）兩星期貸款，利息４．２１厘，行動一出，立即大幅推低歐洲的兩星期銀行同業貸款拆息半厘，至４．４５厘，震動世界。

歐洲央行借出３９１１７億港元，這真正是天文數字，據說這數字比歐洲央行原先估計多出一倍，顯示市場多麼渴求資金。英倫銀行亦按早前公布的計劃向市場投放第一筆三個月貸款，而美國聯儲局亦於昨日投放第一筆一個月貸款。

歐洲央行驚人地放水，究竟是把災難結朿，還是把災難拖長，暫時還是一個未解的謎，但市場反應審慎，歐洲兩星期銀行同業拆息急跌，比６月時只高０．０９厘，即係頗接近正常水平，但較長期的貸款利息仍處於高位；歐洲股市反應溫和，多數只是微升，一方面受央行注資行動刺激，同時亦擔心次按問題觸發的資金危機未解決。美股道指亦受刺激，上升６５點，升幅０．５％，升至１３２３２點的水平，美股彈吓，相信港股亦會彈吓。

今天繼續討論投資組合當中的穩定股，網友亞K早前問過投資合問題，值得一書，她問道：「陸sir, 07年將過去了, 我想很多網友,都像我一樣, 正去思想來年的投資方向,　自已定下的是15%年回報, 之前你在第一本書,講及用匯豐（０００５）來變通, 上2星期開始,你建議用中銀香港（２３８８）炒18元至22元的波幅,　亦可買入領匯（０８２３）,可否講多小小,實則的運用與操作.與佔比重, 又與其他大籃籌國企如何配合 。另外, 投機做老鼠, 除了要心態上要打敗庸手外, 來年,你認為有那類股份炒作的值博率比較高．．．．．

「估計08的股市,波動比07可能更大更深, 投資或投機要獲利已不是像06年那樣,　盲毛求其選中一隻渣吓渣吓就取勝,　所以對選股與投資的心態要求更高。　陸sir,可否有空就為我們作個導修課, 去迎接08的來臨，　謝謝。

羊加鼠 亞K」

亞K對回報的要求不算太高，只希望有１５％，我將組合拆成兩半，一半買穩定股，希望有１０％回報，另一半增長部份，希望有２０％回報，兩部份拉平均就有１５％。先從買穩定股爭取１０％的回報開始講。

　　我要求穩定股能經大風浪，即使明天發生股災，穩定股股價大跌一半，但３、５年後，穩定股還能升番到買入價以上有突，這些股不會從地球上消失，講到消失呢個問題，不要以為我講得好誇張，好多公司的確消失咗，例如安然、霸菱、國際商業信託銀行、百富勤．．．部份係上市公司，做著佢哋的股東絕對痛苦；有些股份未消失，但股價跌到無影，例如電盈（０００８），只有高峰期的３％，股東之痛，比處死更難受。買穩定股就要避開公司消失或接近消失的風險。

過去我選的穩定股是匯豐，主要因為匯豐有較良好的管理，即使股市升跌，最後佢都好易企番起身。不過次按一役，匯豐的表現的確令人失望，業務擴展去美國，但沒有能力控制美國公司繼續亂搞，終於出事，要比較長時間受害，並蒙受較大的風險。過去我會好有信心話匯豐點跌都跌唔穿１００元，但現在唔夠膽咁講，匯豐失去穩定股的特性。（你想賭佢渡過次按危機，可以等佢再大跌後才買入，賭佢過一兩年復甦，但這是買增長股的買法，不是買穩定股的買法）。

退而求其次，穩定金融股我會選中銀香港（２３８８），穩定的房託股可選領匯（０８２３）或越秀房產基金（０４０５）。開宗明義要講，這些是穩定股，並非增長股，自問選股精明的網友，諗也不用諗這些股票，它們是超慢股，不合愛增長者的口味，但他們是穩定股，有幾個特點：

第一，        股價上落較少，升得少，自然跌得少，佢地無升過１０倍，自然唔應該跌到得番３％，即使遇上大跌市，它們的跌幅應該較少。中銀香港在０４年至０６年主要在１５元水平上下浮沉，到０６年中開始有升幅，但過去兩年主要在１８元至２２元中間上落，若在近１８元買入，下跌空間相對較少。領匯在今年３月炒過上２０元，但大部份時間在１５元至１９元間上落，若等跌市在１６元左右買入，下跌風險亦有限。越秀的波幅更窄，年初也炒過上３．３元，但主要在３元至３．２元上落，好多時近３．１元浮沉，若近３元買入，風險有限。

第二，        派息高。越秀房產息率７厘，領匯４．１厘，中銀香港４．３厘，單計收息都幾和味。

第三，        風險可控。三隻股論數字中銀香港的風險最大，因為佢現價PE成１５倍，等佢低一成才買也有１３．８倍PE，淨資產８４６億，現價市值２１３０億，PB２．７倍，亦唔算平，但勝在業務集中香港，唔受次按影響咁多，但香港經濟衰，佢會衰。買房地產信託等如買咗舊房地產，收益主要係租金收益，長線亦博物業升值，租金上升；買越秀房產，等如買大陸地產，佢市值３０億，但資產有３２億，股價仲有少少折讓，佢衰在細，發展有限，而且大陸房地產上市估價去到幾盡，大陸地產跌，佢有資產值下跌風險。領匯市值３６５億，資產值２６８億，股價比資產值有２６％溢價，表面睇唔係咁抵，但勝有物業估值無去到咁盡，所以實質溢價應無咁多。若香港經濟衰，佢啲公屋商場勝在夠Cheap，衰起上來有個譜，但佢班對沖基金股東好難搞，而家搵鬼佬主席兼鬼佬CEO，以夷制夷希望搞得掂。

　　這幾隻股份，遇上股災一樣跌，但股東坐喺度收息，等幾年股價應該可以上番去。買入死揸，收息應有４至７厘回報，若果睇啱收完息仍處高位，直頭游吓水，在高位沽吓，等低位買番，好運可以賺到１０％差價（越秀房產肯定無咁大差價），所以期望買這些笨股責吓倉，要求它們一年有１０％回報，唔係過份，做得好啲，單係買賣佢地，收埋息，一年１５％回報也有可能。毫不進出，揀低價買，收息加幾巴仙增長，拉扯都可能夠１０％。

　　記著這些笨股叻仔唔會買，你想有高回報，千祈唔好買佢哋，唔係買咗一年都唔郁，就番來搵我問，佢地o既最大好處，就係郁得少，只啱笨人買。

陸羽仁

　美國次按危機的壞影響，陸續在金融公司的業績浮現出來，美國第二大證券行摩根士丹利昨日公布第四季業績，大蝕３５．６億美元，遠高於市場預期，而去年同期則賺１９．８億美元，這是大摩８６年上市以來首次公布蝕錢的季度業績。業績咁差自然係衰次按，大摩為次按相關投資有巨額的９４億美元的虧損和撥備，亦遠高於市場所能想像。

不過大摩係投資銀行高手，識得控制投資者情緒，它公布壞業績的同時，亦公布獲得中國國家投資公司注資５０億美元，購入大摩自己的換股票據，息率９厘，換股後中國國投會佔大摩９．９％股權，成為大摩第二大股東。受國投入股的刺激，大摩股價升４．２％，而美股亦好淡爭持，道指微跌２５點。

　　大摩和大量金融巨企一樣，因為次按而錄得巨額虧損，其實至今只有高盛有３２億美元的季度盈利（部份由於它沽空次按產品所致），其餘美林、花旗、貝爾斯登、和瑞銀都為次按作大額撥備。蝕得多跟著就要低價賣股或借錢，貝爾斯登叫了中信證券入股，花旗用１１厘高息發換股票據俾沙地油國，今次輪到大摩向中國國投埋手。大摩今次用９厘高息發換股票據，雖然好過花旗的１１厘息，但９厘絕對唔平。國投用５０億美元投資大摩，坐定收高息，肯定好過早前直接用３０億美元買黑石股份，黑石上市後股價下插，那批貨如今跌了兩成，帳面唔見了６億幾美元。

再講投資組合問題，昨日有網友問陸羽仁，我過去好少提冧巴，為何昨天一講就講了三個冧巴（中銀香港、領匯和越秀房產），我的確係有意講冧巴，這是三個「笨冧巴」。

大家都知我的原則，就係盡量少講冧巴，坊間已經有太多專欄天天講冧巴，多我一個唔多，你要冧巴睇那些專欄五花八門，任揀唔嬲，但好多散戶睇到冧巴就抄，跟足專欄講的目標價買賣，成為冧巴奴隸，自己完全唔懂得分析，炒１０年股，唔夠自己用腦炒一年學到咁多嘢。投資唔可以懶，要自己用腦。

講番我嗰啲「笨冧巴」，其實我的確有意講吓，刺激大家思考一個問題，就係風險問題，估計明年起碼第一、二季投資環境仍然波動，風險增加，究竟自己炒炒吓，好唔好得過買「笨冧巴」呢？

明年有幾高風險，單講次按就夠，大摩的首席財務官Colm Kelleher話，佢地為次按作咁高撥備，是作最壞情況打算（a worst-case scenario），但歷史告訴我們，最壞情況打算通常都不是「最壞」。Kelleher睇法幾悲觀，佢話信貸市場仍然嚴峻，未來要幾季才能回復正常，在幾季內信貸會拖著整個債券業務的後腿。Colm Kelleher的講話值得注意的地方是他說「幾季」，過去美國金融界一直講在明年第一季可望解決次按危機對信貸市場的影響，但Kelleher話要等「幾季」，如今已是１２月，若他的講法正確，明年大半年都在信貨緊縮的陰影下生存，這就是風險所在。

　　我觀察網友們經常談論的是一些熱冧巴，意味著你們仍是處於一種大升市的情緒中，只看熱股，少諗風險，的而且確，過去一年，追熱股「只會買貴，唔會買錯」，買貴咗唔沽捱吓價，轉眼就升番突，但市場會變，投資者的心態亦應該跟著變，若股市由大升市變成上落市（都唔好講變成跌市，美國有機會發生咁o既事），盲目追貨唔止蝕，可能要付出好大代價。

　　合理點講，買笨股可以用較低風險方式取得１０％回報，但買熱股就只能冒更大風險取得２０％或更高回報，由於明年的風險會比今年高，所以買熱股需要更高的技巧，避過風險。

　　最後再講講「笨冧巴」，笨冧巴通常係派高息的穩定股，並非增長股，有網友提到恒生（００１１），這的確是一個由穩定股變成增長股的例外例子，中銀香港（２３８８）有無咁o既機會，唔知，佢雖然攞咗南商個牌話搞大陸生意，但關鍵除咗佢自己有無雄心之外，佢阿媽中國銀行會唔會放手俾佢做，也是未知之數。

　　另外有網友提到國泰航空（０２９３），話佢都係在區間波動，網友要細心研究，國泰既面對油價上漲、區內廉價航空公司威脅及大陸機場爭奪航空貨運的影響，又有兼併了港龍的好處，一減一加比較難睇，但短期油價影響大啲，油價持續高企，國泰好難郁，若油價大跌，可追國泰。

　　其實笨冧巴有好多，關鍵要選到一些風險較低，抗跌力較強的股票，網友自己或者都精研一兩隻股票，佑道它們經常在較固定區間波動，若自己對這些股票有較深了解，炒吓波幅，炒吓業績，一年進出一兩次，都不難拿到１０幾％的回報，不一定要跟我的「笨冧巴」。

陸羽仁

美國股市在科技股帶動下造好，甲骨文公布的業績優於預期，令人相信經濟放緩無損科技投資，道指微升３８點到１３２４５點，升幅０．３％，但反映科技股的納指就大升３９點，升幅１．５％，升到２６４０點。外圍偏好，有利港股穩定。人行加息幅度溫和，料對股市壓力不至太大。

今日再講組合中的增長部份，目標是有２０％或以上的年回報，同時盡量控制風險。好多人買股自自然然就會採取博高增長的態度，想買到高增長股，最好升番一兩倍以上，但要買中這些股份，除了看眼光、運氣之外，還要看大市。

　碧斯在《Hedgehogging》（對沖基金風雲錄）中，提到三種投資信條，１．成長，２．價值，３．不可知。所謂成長派，就是尋求那些成長型公司，主要指那些處於周期性特徴不大明顯的行業中、利潤良好、居行業領先地位、擁有優秀管理團隊的公司。理想的投資方法是持有這些上升行業中的成長型公司股票，直到行業衰落，賣出的原因不是因為股價升咗，而是因為行業衰落。

碧斯以二十世紀三十年代的投資家羅派斯作為成長派的代表人物，羅斯派這樣定義成長企業，「就是一個盈利已經保持長期增長的企業，在每一輪商業週期中均保持著超通脹的增長速度」。碧斯認為找成長型股票最大的困難是這樣，當投資者清晰可確定一隻成長型股票時，它的成長性多半已在股價中反映，換言之你只是高價買入好公司股票而矣，我們現在去買紅色龍頭股，就是這種情況，有時股價不只反映，係「超反映」。

　另一派是價值派，他們喜歡便宜股票，喜歡表現差的公司，他們認為投資者好多時睇公司的基本因素去選股，但大多數都選錯，價值派買股價低廉的公司，透過低股價作為安全網，反而少犯錯。他們不會愛上公司，當他們買入的差公司開始好轉，股價一直上升，升到超越內在價值時，他們就會把股票沽出。價值派的代表人物當然是股神巴菲特了。

　碧斯話按往績統計，價值派的表現勝過成長派，特別是投資小型價值股者，收穫最豐。不過碧斯講出一個第三派叫做「不可知派」，他就是這一派的信徒，他們不會死守一種投資方式，認為一切都是短暫的，當成長型股票相對便宜，整個經濟環境良好時，他們會投資成長型股票。當價值型股票價格低廉而成長型股票價格高時，他們會選擇價值型股票。有時，他會兩者都做。他們認為聰明的投資者會在價值型和成長型之間靈活切換。碧斯自己是一個不可知論者，但大多數情況下價值投資的收益較高，所以較偏向價值投資。

我自己亦覺得碧斯的「不可知論」較可取。在大牛市中，你去搞價值投資，買隻股半年唔郁，你會比佢悶死，不如追吓成長股算吧。但在一般的市況，搵吓價值股，守佢３、５年，會有可觀收穫。

　　講咗咁耐，想講我們建立組合的增長部份，到底係揀成長股定係價值股？到目前為止，我對明年第一季、甚至第一、二季的投資環境仍有戒心，主要係美國唔係好掂，而中國又宏調未定（起碼明年頭兩個月），所以估計明年初都係一個大型上落市，到明年下半年若外圍情況穩定下來，才有機會重拾升勢。所以明年初仍採取較保守策略，到明年下半年又可以進取一點，但整體應該還是尋找成長股為主，因為在這種市況下，也沒有太多平價的價值股可揀，而且把太多資金投向價值股，如果佢地唔郁，可能會跑輸大市。

　　在成長股中，已沒有絕對便宜的選擇，但可以揀相對便宜的股票。最唔駛用腦的方法，是候低吸納H股指數基金，在國企指數跌穿１５０００點樓下買入，最好近１４０００點，價錢相對合理一點，買入博三成或以上回報，以輸一成半來止蝕，以一成半虧蝕博三成利潤，有一定值博率。

　　當然你可以揀個股，博佢地超越指數，中移動（０９４１）、中海油（０８８３）、中石油（０８５７）、國壽（２６２８）等。這些公司是明顯的行業龍頭，若回落得較深時，有一定的值博率，但壞處是即使下跌後仍然相當貴。

　　做電腦的聯想（０９９２）值得大家研究吓，它是中國個人電腦的一哥，幾年前收購IBM的個人電腦業務後，大大擴展，不過一直在消化蛇吞象的苦果，早兩年相當消化不良，近一年有啲好轉，截至０７年３月的全年盈利１２．６億元，比對上一年大升６２５％（可知之前幾慘），現價市值６０４億，PE４６倍，計PE好貴，但早前剛公布至９月的半年盈利有１３．４億，比對上一年同期升１９８％，半年盈利超越上年全年盈利，若簡單假設全年盈利是半年盈利一倍，至明今３月全年盈利２７億，現價PE２２倍，以盈利高速增長的公司計，有一定的值博率。

　　從聯想過去一年業績來看，顯示消化收購過來的IBM業務有一定成效，雖然面對美國消費市場下滑的風險，但相信整合業務的協同效應還未充份反映，料可抵銷這些影響，它的股價雖不算便，但也粗具成長股的特徵，真正風險是未有持久盈利的往績，還會面對整合業務的波動風險。正因為它有這些風險，所以即使管理不俗，但相對其他龍頭股卻比較便宜。聯想股價波動頗大，在公布業績前多有炒作，只宜低吸，不宜高追，６元以下入貨較安全。

　　提出聯想這個例子，是希望大家研究，不是想大家盲目照跟，說到底成長股有一定風險，要自己研究清楚股份的風險。拋磚引玉，是想大家都思量一下，有無一些成長股我們可以考慮呢？

陸羽仁