美股反彈兩日後回軟，聯儲局主席伯南克講話，預告美國上半年經濟可能收縮，不過市場反應尚算溫和，道指一度跌９０幾點，最後跌４５點收場，跌幅０．４％，在升完３９１點的第二日回吐４５點，暫時唔算多。日股早段亦只是微跌。
　　美國公布的數據時好時壞，但伯南克的估計比較權威，他出席眾議院經濟委員會時認為，美國上半年新屋銷售、就業和消費都會惡化，所以上半年經濟可能下沉，「現在看來上半年的GDP可能不會增長太多，甚至可能輕微衰退。」伯南克又解釋聯儲局如不借錢救貝爾斯登，佢就會申請清盤，但伯南克估計無第二間投資銀行會出事要聯儲局再去救。
美國去年第四季GDP增長０．６％，而分析員估計第一季增長將下降至０．２％，不過伯南克話可能上半年可能輕微收縮，令人壞疑第一季可能係負數，或許他是先行放風，讓市場消化壞消息。

國際貨幣基金會同樣調低美國今年經濟增長預測，由原先在１月時估計全年增長１．５％，調低到只有０．５％增長。由國際貨幣基金會的估計推算，它可能預想美國上半年是經濟收縮，若上半年收縮０．５％，下年增長１％，平均就是０．５％的增長幅。國際貨幣基金會更估計有２５％機會出現全球性衰退。

昨日講到相反訊息，提到早排美股跌港股唔跌的例子，其實睇得宏觀啲，美國出現壞消息，但市場反應唔太壞，也可以視為一種相反訊息，顯示市場氣氛在改善中。如果在上月水深火熱的日子，伯南克話美國經濟上半年可能收縮，國際貨幣基金會又大幅調美國經濟增長預測，美股跌１００點唔算多，跌２００點唔出奇，但昨日美股反應溫和，這就是一種相反訊號，顯示市場恐慌情緒正在減退，對壞消息唔至於有過激反應。

再看利率期貨市場的情況，聯儲局本月底再議息，按利率期貨的成交價推算，前一日仲有２４％的交易員估計會減息０．５厘，昨日卻跌到只有１２％人相信會減咁多，大家唔好忘記，在美股早一日大升３９１點之前，仲有５成幾人相信會減０．５厘，如今顯示市場信心在改善中，大部份人相信只會減０．２５厘。即使伯南克對經濟增長吹淡風，都無人信月底需要大減息。（當然不能排除啲大阿哥會再插吓個市逼聯儲局減多啲）

見到呢種情況，一般評論家會媽媽聲，話美國佬講哂，同一種訊息，話佢壞又得，話唔係好壞亦得。這是一種情緒反應，但冷靜一想，另一個解讀係市場開始對壞消息表露抗跌力，係跌市中的一種相反訊號，顯示股市可能慢慢見底。

話美股快將見底，係一種假設，這種假設需要驗證，亦唔等如話佢未來唔會跌。而驗證的方法，正正係等佢跌既時候再睇吓，例如等第一季GDP數字出籠，看市場有何反應，假設數字係差，但市場反應不大，跌得唔多，就係進一步的相反訊息，確認了快將見底的假設。假如情況不是如此，屆時美股又插得好深，就等如否定假設，一切要從新觀察。

你聽完我講，就會明白分析市場係一個動態過程，既不要盲信自己早一兩個月前的對股市點數的估計，亦要不時收集市場和消息的互動消息，引證假設。觀察市況買股不用快人太多，快人一兩日，富貴萬千年。

陸羽仁

後記：明天清明假期，小休一天，下星期再見。

　　今日在頭條日報講到炒股專家的「獨得之秘」，其實人人炒股都有些心得，問題是這些心得能唔能經得起時間考驗，你用這些心得炒股，係贏多定係輸多。

　　最多人用的炒股方法是「聽貼士炒股」，你唔好話呢種方法唔得，在股市是大牛市時，一直反覆向上，你肯買都會贏，加上所有貼士股都向上炒，所以在牛市時呢種方法看來好得，但自從去年１１月大市開始向下調整時，散戶就會發覺「聽貼士炒股」開始唔得，買得大輸得大。所以任何炒股方式，都要經得起時間考驗，唔係試一次OK，就可以瞓身落去，唔係炒幾個月股搵到錢之人，就係股神。炒股的方法要試過旺市得，淡市又得，才是好方法。

　　撞彩都有一半機會中，股市唔係升就係跌，而家唔同以前，以前只可以買好的一方，唔可以買淡的一方，而家有好多買淡的工具，買好買淡都很容易，所以睇好睇淡都有接近一半機會睇中（因為仲有第三個可能係「唔郁」，唔郁的市況會消耗衍生工具的時間值；若你買股票而不是衍生工具，揸住唔郁就沒有時間值的耗損，只會損失放同樣一筆錢入銀行收息的機會成本，不過為簡化討論，暫時唔講「唔郁」的市況），你可以放飛鏢掟埋個靶度，睇吓去掟中好的一方抑或淡的一方，就可以獲得一個接近一半命中率的意見。

　　假如你睇中睇錯機會各有一半，有１００元本金，睇錯市時輸１０％，睇中時贏２０％，賭完兩舖，假設正好是一輸一贏，就變成１０８元，回報率８％，再賭兩舖，又係一贏一輸，１０８元就變成１１６元，回報率１６％，就當你一年賭４舖，有咁o既戰果，都相當唔錯了。

　　這個例子只想說明，就算你買股票無獨得之秘，只要能掌握「輸少贏多」這個方法，根本就已經是投資的一大秘訣。好多人炒股只想１元博１０元，無想過控制輸錢和爭取贏錢同樣重要，若能控制輸錢，長炒好易贏，唔使搵到能升１０倍的股份。

　　當然，睇錯時要輸１０％很容易，因為只要你捨得去斬倉就多數能做到，但要在睇中時賺２０％唔係咁易，因為唔一定可以搵到對象，升２０％始終唔簡單。

　　這裏講兩種散戶經常做的事情，「順炒」與「撈底」，順炒是指大市已成勢後，順住炒一段，撈底是指大市成勢後，博走勢已到盡頭，炒一個相反方向，博大市回頭。我覺得「投機的我」最好順炒，不應撈底，因為投機只是炒一次短炒，跟一段走勢，順勢炒易過逆勢炒。正如我在頭條日報講那個在１２６元買匯豐的朋友，雖然她說自己是長線投資者，但到今天我仍然不知道她在買股票當天，究意是在投機還是投資，若是投機，見匯豐跌緊，要追沽而非撈底。

　　但「投資的我」又另計，因為這種人買股一心諗住好長線，所以最緊要買得平，最好揀暴跌的日子入貨，若隻股已跌到咁上下，再來一個１０００點以上的大跌市，就有機會是短線的浪底，可以入吓貨。若我的朋友真是一個長線投資者，買匯豐或許無錯，錯只錯在入得太快，一手入哂，個價入得唔靚。

　　講番本來的題目，若是「投機的我」，見到股份成勢時追入，博一個２０％升值唔係無機會，若回調就要定好止蝕位跳車，有利潤時才去博。

　　大家可以做個測試，如果你過去用這個「輸少贏多」的策略，會不會比你現在的做法，有更大收穫呢？
陸羽仁

　　美股牛皮，早段曾受金融機構獲注資的消息刺激，一度上升，但尾段又開始憂累公司首季業績不理想，結果道指只升３點，收報１２６１２點。

市場傳聞美國最大的儲貸公司Washington Mutual正在和私暮基金TPG商議，由TPG牽頭的財團注資入股５０億美元（３９０億港元）。Washington Mutual深受次按風暴打擊，早前公布３０億美元（２３４億港元）的壞帳撥備，過去一年內股價大跌７４％（至昨日之前），不過昨日傳出獲注資的消息，股價大升２９％，股價波動之大，令人戶舌。

Washington Mutual的消息令人憧憬信貸市場開始放鬆，所以私暮基金如TPG才可以獲得資金進行大額交易，所以金融股做好。

美股現時是好消息和壞消息交雜出現，美股收市後到美國鋁業公布業績，它是第一間公布首季業績的大公司，開出來的業績並不理想，由於能源成本上升、美元疲弱和金融產品價格回軟，美國鋁業首季盈利大跌５４％，超出市場預期。

　　美鋁季度純利跌到３億美元，或每股盈利０．３７美元，而一年前同期則有６．６億美元純利，即每股０．７５美元，跌幅顯著。而分析員平均估計美鋁首季每股賺０．５美元，所以現時公布的０．３７美元令人失望。美鋁面對其他對手的壓力，所以在成本高企的環境下，仍要賣廉價的產品維持銷售。美鋁業績唔掂，大陸的金屬股、特別是鋁業股有點壓力。

　　據彭博的統計，分析員估計美國公司首季業績平均下跌１１％，美鋁行先死先，公布出令市場失望的消息，所以對其他公司唔好抱太高期望，高成本，低需求，在在侵蝕公司的盈利。

　　美股道指升到１２６００點就打橫行咗幾日，這種走勢過住少見，不過牛皮市照計唔維持得耐，跟住唔係升就係跌，要推上股市，要有重大利好消息支持，例如併購消息，微軟收購雅虎仍然膠著，要睇TPG入股Washington Mutual幾快有結果，若無併購消息，未來主導的消息就係企業業績和經濟數據，向下的拉力不少。


　　港股唔能夠長期脫離美股走勢，食粥食飯，還看美國的業績風雲。


陸羽仁

　　　　美國陸續泌出壞消息，聯儲局３月１８日的議息會議紀錄顯示，儲局成員擔心美國經濟在上半年會收縮，部份人更認為「經濟長期及嚴重下滑」，儲局成員又發現樓市並無跡象見底。

　　美國最大的貸儲公司Washington Mutual發盈警，表示首季會虧損１１億美元（８５．８億港元），所以要削減９３％的派息，公司同時宣布私暮基金TPG的７０億美元（５４６億港元）入股計劃，其中１．８億股只是以每股８．７５美元賣出，比昨日收市價大折讓３３％，另有價值５５億美元是可換股債券。Washington Mutual的股價正式係「一啖沙糖一啖屎」，早一日急升２９％，昨日又因為虧損數字和大減派息，跌番１０％。

　　美股面對連串壞消息，都叫做企得住，道指收市跌３５點，跌幅０．３％，收１２５７６點，繼續罕有地在１２６００點左右牛皮無大上落，暫時有少少抗跌力，但真正考驗要等下星期金融股公布首季業績才來。

　　Washington Mutual的市值有１００億美元，都如此波動，可知股市的波動性可以殺死人，早前我在頭條日報專欄講到朋友在１２６元買匯豐（０００５）一度坐艇的故事，網友Bdroom問過我一個問題：「你個朋友買匯豐的例子，既然佢諗住長揸，想在2月大市再插時溝淡，為何不行呢?雖則話輸完錢切忌溝(我贊同的) ，但佢係富婆，成件事唔可以睇成係買多啲儲多啲貨咩?(你話好股進入「投資的我」射程時應在大插時買，買入後預佢再跌ma)。如果你個朋友原本買得唔多，又可否在這情況下溝吓呢?」

　　我見匯豐升番，都特登將曾經叫佢唔好溝淡的意見講出來，係特別想提醒大家，溝淡係一個壞習慣，唔好做。若睇我朋友的例子，如果佢在１１０元溝一倍貨，平均成本１１８元，而家賺到一成，咁豈不是證明溝貨係啱，叫佢唔溝係錯？

　　呢個只係事後孔明咁去睇，你一定啱，但在匯豐跌到１１０元那一天，誰可保證它不會跌到９０元、８０元、７０元？即使以「投資的我」的角度，匯豐在１１０元時，我也無信心話可以放膽買，理由好簡單，若信貸緊縮深化，誰可以告訴我匯豐的美國業務要再虧蝕多少？若無準確數字，即使你本來無匯豐，在大跌市當天，買少少唔拘，唔好買太多，若要大手買，可能買另一隻重磅指數股中移動（０９４１）穩陣啲。匯豐過去係穩陣股，但暴露在次按危機下，風險增加，只能當是一隻風險度一般的大股，唔係可以愈跌愈買的上佳對象，你唔知佢個底，點樣愈跌愈買呢？

　　電盈（０００８）的教訓好深，我見過好多人愈溝愈淡，有個朋友平時買股好穩陣，只買藍籌，在２０元唔知信乜大行報告走去買電盈，升到２８元無沽，後來隻股開始回落，跌到１５元再買，１０元再買，５元再買（現價是５合１，等如當年１元），佢不斷買的理由只得一個，「電盈係大股，無理由跌咁多，唔怕溝」，結果就將原來少少的虧損，放大成為全副身家投入的巨大傷口。

　　普通人買股票，並無計劃，買開股票，若賺錢更會將整筆錢一路叠上去，甚至不斷將人工投入加注，全副身家買股票。假若我朋友今次溝匯豐溝得咁成功，賺番突，佢又會將本金和利潤再攞去買，下一次遇到類似情況，一定會溝，買匯豐溝得咁好，買其他股也可以溝，溝得三、五次，上得山多終遇虎，最後溝中一隻潛水股，一舖就清袋，不但會將前幾次溝貨賺到的錢輸番哂，還會把後來投入的新資金輸埋，這就是散戶的宿命。不良的買股習慣，係散戶身上的癌細胞，最後都會害到佢命都無。一次溝淡成功，令你盲目相信這種錯誤方法，最後只能是一舖清袋。

　　買一隻股輸錢時，形勢不利於你，正確方法是減注而唔係加注，睇定再來，在高位減了注，才有子彈在低位等跌定時追貨，你在較高位止了蝕，等跌定後股價開始回升時去追，肯定比一路跌一路溝貨安全，收穫可能更多。另一方面，買股輸錢，要檢討買入的時機和方法，學到嘢，避免再錯，下次買股贏錢機會就會增加，炒股唔係買一舖，係一生一世的事。

炒股不能只看一次成敗，用壞方法炒股，長賭必輸，用好方法炒股，長炒必贏。

陸羽仁

　　 　　美股慢慢步入調整期，道指昨日跌４９點，跌到１２５２７點，跌幅０．４％，美股一度跌超過１００點，尾段收復部份失地，美股唔算跌得厲害，下跌的主因是UPS話生意開始放慢，令市場擔憂公司首季業績。

　　聯儲局官員話要開始考慮減息以外的其他方法，舒緩信貸市場的緊張，例如由財政部發債吸納市場資金，再由聯儲局直接借出資金予金融機構，此舉等如以政府信用作擔保，幫助市場資金融通，市場對此消息無大反應。

　　　昨日講到溝淡係散戶大忌，網友平凡人的故事，值得大家記取，他說：「陸SIR這個溝淡的故事是對的。我也記得陸SIR講過，他的文章是針對絕大多數散戶而寫的。其實我認爲．投資/投機是一門生意，不是每個人的性格和心智都能做老闆的，所以才會在這個世界上打工仔多老闆少。按比例，10000個打工仔裏面才能出1個成功的老闆。所以，陸SIR建議大多數的散戶別溝貨是正確的。」
「本人的例子就有溝貨成功和失敗的例子，在2007年，我全年投資/投機的80%利潤大部份來自于1171，1088，1898三只煤炭股，每逢插市我就買貨或者溝貨。所以2007年的投機成績非常漂亮。可是，臨尾就香了一次在2866中海集運，我從9.00開始買，一路溝到5.80元才投降。這就是我說的一個人的心智強弱對投機很重要。（當然，如果當時陸SIR那篇講李超人看市道的文章早4個月寫出來的話，我就會在7.00走人。）」

「如果，我當時繼續溝，那麽就會到後來的2.80元，那就輸得很慘，起碼會把我的3只煤炭股賺囘來的利潤輸掉50%以上。但是，我在5.80就打靶不玩了，逃過一劫。」

中海集運昨日收３．４１元，平凡人能在５．８元打靶，的確是避過了一刧，早前３月１８日的低位更是２．４４元，高位買貨揸到而家，真係喊都無謂。

其實這隻股票我好早都有留意，但好少講，因為覺得佢雖然唔係細股，但炒味幾濃，隻股由去年初３月起步，當時仍然係１．８元，到８月炒上５元，９月尾是６元，短短半年，１．８元變６元，升了２倍有多，炒到卜卜脆。我唔係太想講這些股，因為有一個兩難，若果我話佢炒緊，不妨走一轉，你咁黑仔一上車就關門打狗，股價即插，你會怨我一世。問心講我想話佢炒味濃，叫你地唔好買，但咁講等如唱衰佢，網友聽完我講唔去買，第二個見佢急升，就會當我係仇人，你問我，我見佢升到６元，都已經覺得相當貴，但只能少講為妙。

結果亦係咁，佢１０月初仲係６元，以為佢貴，點知佢１０月２４日炒上的高位係１１．６元，１個月內再升多一倍，你話激唔激，股票炒到最後，等如燒煙花，日日咁升，會引到好多人落叠。如果我６元叫你唔好買，升到１１．６元嗰日，如果你知道邊個係陸羽仁，喺街見到佢，會唔會想攞把刀劈佢呢？

不過中海集運跌亦跌得好急，佢一個大斜波咁抽上，又一個大斜波咁插落，幕後人係高手，可能在升跌那半個月已在高位派哂貨，隻股在１１月中在９元上落咗一段，大戶要出埋貨尾都大把機會，我估佢出貨的大位，可能就係平凡人開始買貨的９元那個短暫上落位，你去買，佢就派埋俾你。

平常人睇股價，睇高價唔睇低價，睇中海集運，主要睇佢１個月前高位造過１１．６元，無睇佢半年前由低位１．８元起步，由１１．６元跌到９元，跌咗２２％，你會覺得佢跌咗好多，其實你想深一層，如果１１．６元個位係假o既，你就會明白遊戲點玩。我建議大家以後睇位睇完高位，睇埋低位，對隻股就有立體的認識，知道大戶乜嘢位出貨可以有暴利。

李超人係叻人，佢出貨的手法靚絕，我相信佢唔係幕後人，但見到幕後人炒到顛時，佢無出貨，佢係等回頭時才出貨，佢可能覺６、７元都已經幾貴，但唔知人地想炒到乜田地，就睇吓戲，到見隻股急回時，佢就大手出貨，這種手法亦等如是推高止賺位之法。股票喪升時，你唔知佢會升到邊，但一開始回吐時止賺，往往就係出貨的靚絕時機。

我都係睇到李超人都出埋貨，隻股敗象畢呈，才敢出來講兩句，阻唔到平凡人溝貨，幫唔到佢在７元清貨，或許可以幫佢在５．８元止蝕，佢已經好叻，因為５．８元，差不多係隻股最後一浪大升前在９月底的價位，此價比半年前的起步價還升了兩倍，所以平凡人算有不錯EQ，可以在這些「高位」（不是低位）引刀成一快。

普通散戶買股，對隻股票的基本價值，炒作動向，好難有深入的了解，在股份下跌時溝貨，好易成為大戶派貨的接貨對象，所以都係唔溝好過溝了。

陸羽仁

歐洲央行議息後維持利率不變，並發表了害怕通脹及睇淡歐洲經濟的言論，歐元在議息前急升上１．５９，但歐洲央行開腔後又急滑至１．５７，這些過去一個月的波幅，在幾個鐘頭內出現，可見現在金融市場之險。

美股昨日有反彈，道指一度升１２０多點，收市升５４點，報１２５８１點，升幅０．５％。政府公布上周新申領失業救濟人數少於預期，已令市場氣氛改善，而分析員估計英特爾盈利有增長及會回購更多股票，令科技股受到追捧。美股正處於一個上落市，牛皮待變。

仍然想再講吓溝淡和止蝕的話題，網友Ton Ton講起自己和朋友炒股中伏的經驗，「小弟完全明白，如果唔係有陸Sir同金兄同向師兄師姐教止蝕，我估我去年的Proft已還返俾個巿。如果唔識止蝕，好似去年高位$4入的2345，半年已經唔見咗55%，仲有其他如998等，如果無各位教我止蝕，我已經死得好慘了，現在能打和，都係托大家的洪福！再次再次感謝各位！」　

「我有一位新識的朋友，她在去年$10入了中海集運 (2866)呢排叫做升返D都無咗70%，要上返佢買入價，隻股要升233%，真係....」

「最經典都係利記(637)，我同個朋友一齊係$3左右買入，佢好不幸無睇陸Sir個Blog（我有叫佢睇，但佢好似無理我），我自己在$2.x止蝕了，自覺好傷，好痛，因為第一次係一個無能力控制的範圍內唔見一大筆錢（有D似個我好多年前，存了一兩年錢先買到第一部數碼相機俾人偷咗的感覺，真係坐咗係到成個鐘唔知點算，個心好痛好痛!），但大半年後，我覺得自己賺了，因為我朋友當日用成富身３０幾萬買的637，係無分注分散同止蝕的情況下，佢半年唔見左23萬身家，對一個打工仔來說，已是佢一生的存蓄...我估就算係股神，要用佢淨低個7萬在大半年內變返30萬，都應該無咩可能...如果佢今日先沽，就算佢要有能力用其他股票每年賺返20%，佢都仲要用八年先可以Cover佢係八個月唔見咗的錢。八年先打和，個仔或女都小學快畢業．．．所以，如果仲係覺得止蝕唔重要的網友，請先問問自己，如果半年內蝕咗的50%，有無能力係返用半年時間去賺返100%，如果無，煩請記住：止蝕。」

「這是小弟一年來學到的總結，我知到自己好白痴，用一年時間所學到咁少野，但希望新來這個Blog的朋友，得到這個止蝕的祝福。」

Ton Ton一啲都唔白痴，一年學到咁多嘢，夠用一世。溝淡和止蝕係兩個相反的行動，大部份散戶買股輸錢，唔單止唔止蝕，仲要溝淡，令蝕上加蝕；真正要學是忍住唔溝，先睇定環境，再唔對路，就忍痛打靶。

人性的缺點是堅持己見，覺得自己啱哂，要錯係社會的錯。好似甘泉航空結業，主席李卓民話甘泉一心想以租機方式營運，但對手強烈反對，所以最後只能斥巨資買機，加上油價急升，最後頂唔順結業。睇完李生的總結，甘泉結業係對手的錯，油價的錯，但做一盤生意唔去考慮對手的回應，唔考慮經營環境的可能變化，又係邊個錯呢？

普通人買股都係咁，聽冧巴買入一隻股後，如果市勢突然走樣，隻股急跌，多數唔覺得自己睇錯，只覺得是環境的問題，隻股好快會升番（不暪大家，到今天陸羽仁買股後股價跌，第一個反應都係咁，要回過頭來，用理性控制自己的情緒，才可以比較抽離分析當時隻股或大市面對的問題）。

Ton ton提到的利記，係新上市年幾的股票，無太多上市往績可稽，大家都唔知主事人的手法，去年７月２０日收市後突然發盈警，話０７年上半年的業績，將會顯著下滑，主要面對內地對手激烈競爭。到７月２３日再開市，利記由上日收市價３．２２元，開市時裂口急跌到２．４５元，收市彈番上２．６２元，單日跌咗１８．６％。

我當時俾大家的建議都係叫大家走避，話若唔再反彈，唔沽哂都要沽一半。這些單日急跌，若有幕後人維持秩序，跌完可以無事，跌完彈番上去再慢慢派貨，但利記往後的情況一日比一日差，７月２４日收２．５元，２５日收２．２元，咁樣一段段落，已經係「送院途中證實死亡」格局，唔似有人頂番上去，就算有人頂都係頂住派貨，我記得那時有網友問我好唔好再買溝貨，我話千祈唔好溝，應該要沽，唔捨得沽哂都沽一半，再唔對路沽埋啲貨尾。

其實以利記當時的形態，正路無得救，只能望佢背後有莊家，他們未出貨才救到小股東，因為莊家未出貨要托番高出貨，但若無這種莊家存在，早前炒到咁高，一盈警就注定要大跌收場。

大家要明白散戶和大戶的分別，大戶如正經的基金，買利記一隻中小型股，只佔佢組合１００份之１，突然見到盈警，最合理的做法是洗倉沽清，因為他們入貨價低，即斬仲有盈利，即使要輸，若輸１０％，只是整個組合減值１０００份之１，必然會好狼咁下刀去斬。

你做散戶就唔同，可能八、九成注碼放一隻股身上，買入蝕一兩成，等如成副身家減值一兩成，好痛，好唔想呢件事發生，只能用主觀願望蓋過理智，期望佢無事，唔想止蝕，只想加注溝淡，望吹番番來，問題是呢隻股累你輸錢，股價跌開有條路，點解你咁有信心再買會升番？我就話唔理買乜股，你買完佢跌，一定有原因，跌開再跌的機會大過反向回升（這就是順勢），要加注都唔好加係輸緊錢的股上，要加注合埋眼掟飛鏢落報紙的股價圖上，求其搵一隻來買，買完上升的機會，可能大過你再買手頭上跌緊的股票。要避免好似Ton Ton朋友咁買一隻股唔見七成身家，唯一的方法係唔溝、止蝕，唔見七成身家，可能十年投資加儲錢先至搵得番，白白浪費了十年光陰，人有幾多個十年？由此可知一個錯誤投資決定，代價有多大。

利記唔算最雞的股票，現價仲有０．６６元，如果你買的是莊家概念股，可能１毫子都無。講利記的例子，不是想挖大家的傷疤，而是希望大家可以在錯誤中學習。我自己就係咁，做運動時大腦無嘢做，就經常把自己投資的錯誤重溫，希望可以學番一招兩式，想像若再遇上同樣處境如何回應，起碼將來唔會犯相同錯誤。記住，錯誤是最好的老師，它教的東西，可以令你一生銘記。

陸羽仁

美股大幅回吐，要看今次美股調整會否再創新低，而港股在這一浪調整有無抗跌力，亦要小心觀察。

有網友問是否因為我覺得大市會調整才一再講溝淡的話題，其實這個問題太重要，值得一講再講。網友古九寒的例子又可以證明。

古九寒話：「陸sir,今日睇完你個blog真係非常感觸, 我也好想係度講吓我的故事......上年10月港股狂升, 幾乎每日都創新高, 而且全民皆股, 好有股災前夕的味道, 當時我看見自己今年的投資已經有唔錯的回報(大約賺左5-6萬), 所以決定唔玩, 清倉走人! 但其後個市繼續上升, 升穿3萬點後又試3萬2, 身邊的朋友繼續賺大錢, 而「亞洲股神」和「澳門賭王」又日日唱好! 心裡自然十分後悔, 結果忍唔住所以再度入市掃貨! 我分別係$47入左1手國壽+$17.5 入左1手中石油......(錯1: 當時好有信心, 因為自己後生, 未輸過! 唔知高追原來可以好大獲!)」

「跟住後來溫總話要停車, 個市即插, 但係我無去止蝕, 而且仲選擇去溝淡! 我再係$45入多2手國壽+$14.5 入左1手中石油! 跟住個市繼續插, 我開始有d驚, 但係依然唔肯認衰, 係$42入多2手國壽, 平均價$44.2......(錯2: 唔止蝕, 仲玩溝淡! 依家先知死!)」

「到左就快Christmas, 隻國壽並無起色, 而且跌到得$39, 隻中石油得番$13……當時我真係好唔開心, 臨年尾先咁大獲! 當日咁橋睇咗陸sir你個blog先知道止蝕咁重要, 所以即日清倉走人, 蝕左成5-6萬, 入哂肉......(錯3: 早d睇陸sir個blog, 早d止蝕, 就唔會攪到咁既田地!)」

「今時今日兩隻股票雖然都反彈番唔少, 但如果當日我唔走依家可以要蝕10幾萬, 真係”You jump, I jump!” 唯一好彩便是我這兩年賺果啲都可以剛剛夠蝕, 就當自己發咗場夢啦!」

古先生（佢個名太似粗口，改吓好啲）的情況，太過典型，他首先遇到的問題是過早看淡，我在接近３００００點時答過一些問題，當時有網友問，個市咁高，炒唔炒好，我那時大概咁講，用細細注炒吓唔拘，知道自己炒就得啦，一唔對路就閃，若果炒開股清哂貨，個市繼續升，見人日日贏錢，一定忍唔住，最後喺高位撲番入去仲衰。古先生的情況就是如此，太早離場，見到人贏錢，好難忍，結果撲番落火海，大部份股民都有賭性，所以在股市大熱時完全離場，未必係最好方法。

佢溝淡的情況，亦係典型，最初唔係輸得咁多，係溝淡溝到自己輸大好多，你睇佢開始在４７元買咗１手國壽，１７．５元買１手中石油，雖然接近摸頂，但勝在買得少，如果一跌就走人，輸得好有限。但佢不斷溝淡，在４５元買多２手國壽，在４２元再買２手，１手變５手，即使輸的幅度一樣，都放大５倍。而中石油也在１４．５元多買１手，合共２手，輸錢亦放大２倍。溝淡表面上睇可以拉低成本，但最大的弊處是將投入的注碼不斷放大，小風險變大風險。

以古先生的例子，若佢在溝淡時唔去溝，改為止蝕，把國壽和中石油沽清，可能只係輸幾千元，即使佢見大市跌到２７０００點時，以為見底，再買，唔對路再斬，可能只係輸１萬，而唔係好似而家咁輸５、６萬。

我唔知點解，好多名咀都叫人溝淡，可能過得一、兩年之後，隻股真係可以去番溝淡價，佢會話溝淡成功，但佢無講你已損失一、兩年的機會成本，以古先生的例子，若高位一早止了蝕，可以吼低位買番貨，跌落低位時大把子彈買，加上輸錢又唔多，一個小浪就可以把止蝕輸的１萬元賺番來。再者，一、兩年當中，可以發生的事情太多，溝淡完死守，股票跌到地底泥咁價錢時，可能頂唔住日日跌的壓力，可能覺得明天會股災，頂唔順壓力就把股票賤賣，等唔到翻身的日子。又或者等等吓有用錢需要，例如要結婚、要買樓，結果又要在低位套現。所以股票跌價去溝淡，愈溝愈大，要等一段長時間才回到家鄉，將自己陷入完全被動中，認真唔著數。

大市升跌都有個勢，你買股之後即輸，慎防大市或個股已轉勢，中石油係最典型的例子，好易見到佢A股一上市就轉勢，大戶借人人有好高期望的時機沽貨。我經常講，股市係大戶和散戶對賭，你一開始輸錢，就可能陷入了和大戶對賭的局中，要想法脫身，而唔係再賭大啲，買了轉勢股去溝淡，愈賭愈大，多多都唔夠死。

古先生的狀況仍然OK，佢只係將上一年賺的錢輸掉，保住本金，成績已一錯，可以低位再累積股票再來過。贏錢時加注，輸錢時減注，都係炒股的ABC原則了。無論從眼光、手氣、走勢等任何角度去睇，輸錢時都唔好加注，輸開有條路，唔可以靠加注吹番番來。


陸羽仁

美股繼續跌，美國第四大銀行美聯銀行 (Wachovia)公布第一季錄得意外虧損，減少派息，並計畫配股集資約70億美元，以強化資本，令其股價急跌，跌幅為7年以來最大。另外，高盛證券則估計，較多企業將公布令人失望的業績，將壓低未來幾個星期股市指數。

結果道指跌２３點，跌幅０．２％，跌到１２３０２點，美股走勢加埋高盛的預測，未來一段日子還是調整市，想買貨除了要數子彈之外，亦唔使太心急，慢慢來。

網友Ray問起，「陸先生你話輸錢時加注風險大，你又怎看贏錢時加注的風險?」我認為這個世界充滿風險，投資固然有風險，不投資也有風險，因為通脹咁高，收雞碎咁多息，一年４％、５％通脹，持有財產的購買力不斷按此比例下降，唔投資都有貶值風險。

講番投資，贏錢時加注，風險會細過輸錢時溝淡加注。我有一個理論，存在就是合理，一般人輸錢時，會覺得「無理由，明明睇住佢．．．．」，有一百個藉口去否定自己輸錢的事實。我就話，既然賭錢呢個事實已經存在，已包含了各種合理理由，例如你睇錯市，例如你無估到大市或個股走到咁上下會轉向，又例如你已踩入一個大戶的佈局中。輸錢的理由已包含在事實中，問題是你無興趣發掘而矣。

一般人輸錢時不止蝕，主要怕黑仔到極，一止蝕完佢就升番，現實上的確有此可能，機會甚至有一半或以上，隻股可能係一次短度回調，回調完會向番上，所以你斬完倉佢會升。但有另一半機會佢係轉咗勢，開始反覆向下，你唔走，低處未算低。雖然買股輸錢時，隻股係短期調整或轉勢下跌兩種機會都有，但後者的風險太大，唯有止蝕走避。

再講到贏錢時加注，當然也有風險。買股票要搭啱車，你上車後架車馬上火速向前行，你就賺大錢，上車前你唔確定邊架車會開，上咗車試過至知，但上車後肯向前行的車，已比唔郁的車好，已比唔郁的車大機會行落去。贏錢時加注的風險係加完注佢就回頭，假設你順勢買股，隻股回頭是轉勢，順勢發展的日子，被轉勢的日子多，所以出現轉勢的機會，唔係無，本來已略少於順勢發展的日子（這只是講順勢買股，逆勢博反彈的人是例外，因為他來是逆勢買，隻股順住跌勢要再跌，所以買完再跌的機會較大）。

贏錢時加注的另一個好處，是你有較多空間去守，假設你２６元買了國壽（２６２８），跌時不買，若升到２８元才加注，平均價２７元，你已有１元的利潤空間在手，若以一成止蝕，跌到２４．３元才止蝕，和現價的距離較大，有較大空間防守，可以減少止蝕的機會，避免正常回調少少就要斬倉。

《The New Market Wizards》一書講到一個成功的期權炒家Victor Sperandeo，佢年青時喜歡研究如何賭啤牌，主要技巧是管理賠率，他記牌，然後分析每一舖牌的賠率對自己有無利，有利時賭，無利時不賭，這樣就可以輸少贏多，長賭有著數。 形勢對自己有利時加注，不利時減注，也有少少似Victor Sperandeo的理論（雖然他對如何分析賠率還有深入見解），贏面大一些。

贏錢時谷大，多少有「投機的我」的味道，不似投資行為，但作為投機者，若買１０舖贏７舖，輸３舖，輸時輸有限，贏時贏多一點，長賭已可以取勝。

陸羽仁

  　　美股反彈，地區銀行的業績優於預期，加上油價上升推高能源股，令美股在三日內首次上升，道指升６０點，升幅０．５％，收報１２３６２點。

　　而英特爾公布第一季業績好過市場預期，在美國市場放緩時，該公司的銷售持續增長，上季銷售增加１７％，令分析員跌哂眼鏡，英特爾股價亦大升８％。

　　其實早前美國鋁業及美聯銀行等公司公布了壞業績，也有「貢獻」，因為它們的業績降低了市場對公司業績的預期，據彭博的調查，現時分析員平均估計美國標普５００公司首季業績下跌１２．３％，而年初時仍估計會增長４．８％，近期美鋁等公佈的壞業績，更令分析員調低預測。既然期望低了，失望的機會亦降低，那麼公司公布普通差的業績，亦不會令市場意外而推低股市。

　　另外美股公布生產消費指數，升１．１％，主要反映油價上升因素，生產消費指數是消費物價指數的前奏，生產價貴，意味將來售價也貴，數字令人相信美國通脹會開始上升，美國再減息幅度有限，利率期貨數據顯示相信今個月聯儲局會減息０．５厘的人數，又跌到３０多％，消息令美元反彈，在亞洲市兌歐元從低位１．５９，回升至１．５７９，兌日圓亦升上１０１．７的水平，資金有流入美國的初步跡象。

昨日講到贏就谷，輸錢唔好谷的道理，網友ray提問，第一，如何管理贏錢時加注的風險？第二，如何決定贏錢時加幾多注？第三，如何分辨「分注買入」和「贏錢時加注」的概念，兩者可否共用？第四，若他已按分批買入入夠貨，如贏錢再加注，會否入得太多，風險太大？第五，是否有些時候「贏錢時加注」會好大風險？


我覺得要還原基本步，首先分開「投資的我」和「投機的我」，我經常講的「分注買入」，慢慢買，主要是針對「投資的我」；而「贏時谷」，就更適合「投機的我」的順勢炒買貨策略。「投資的我」對風險的容忍度有限，不追求大收穫，先要降低風險，賺少啲唔緊要，最好唔輸，所以他的入市策略應該比較保守。分注買入係將普通人睇啱就一注買哂的方法，改為分注買，減少一買即輸的風險。舉個例，今年年初，我話大市上半年應該在２３０００點至３００００點中間炒波幅，當時指數是２７６００點，向下空間大過向上好多，當時買貨風險較大，假如你係一個較進取的「投資的我」，信我所講，只能等低位才建倉，要先定一個等大市跌下來時買貨的策略，可以分三注，在２４０００點買第一注，２３０００點買第二注，２２０００點買第三注，三注買齊平均價２３０００點。

好了，若你自命係保守之人，年過４０，唔想太冒險，又可以咁做，將第一注買入價定在２３０００點，第二注２２０００點，第三注２１０００點，平均價２２０００點。第一注入場的價位愈低，安全度愈高，當然另一方面，亦有買唔到或買唔齊貨的風險。但我就話，既然自命保守之人，假設你三注只買到一注，亦無所謂，見到佢升上去唔追亦無拘，最緊要唔輸錢，有得贏，其餘兩注買唔到股，攞去存人民幣都得。你諗吓，假設你買得一注，股市升咗上去，最後這一注有２０％回報，其餘兩注存人民幣，收息加升值有５％回報，加埋整個組合有１０％回報，以低風險組合來講，咁o既回報好唔錯啦。

網友bdroom問分注買入和溝淡的分別，其實我答過佢，佢可能睇唔到，分注買入係一個較保守的買股票方式，可以減少止蝕的機會，假設你有１０萬元身家，買攞其中５萬元買股票，按我上面講的方式，分三注買入，用哂５萬元買完之後，股價再跌，你就唔好再攞錢出來買，因為隨意再買，想降低成本，超出原來買股的預算，那種做法叫做溝淡，用以上的例子，好多人用完５萬去買，買完再跌，用埋其餘５萬買埋佢，跌完再跌，出糧有１萬又買，本來買埋５萬，結果買到１０幾萬都唔收手，成副身家咪好易一舖清？記住「黑開有條路」，黑完可以再黑。分注買入後見到股價跌，要考慮止唔止蝕，唔係加注。

講咗咁耐未答到阿Ray的問題，我主要想講，要將「投資的我」和「投機的我」分開，「投資的我」搵價值股，或搵好股等平價時才買，不能避免在大市下跌時或比較淡靜時去買股，跌緊去買，多少有點逆勢，和順勢炒並不相同。分注去買係一種防守式進攻，並非炒作心法，買夠貨，升咗上去，也未必一定要大量加注，要控制風險，唔好讓組合太集中一隻股份。「贏就谷」是一個炒作策略，考慮點完全不同，明天再續。

陸羽仁

　　美股大升，因為英特爾、摩根大通及Wells Fargo 皆有優於預期的業績或好消息公布，英特爾話經濟疲弱並未影響其銷售，摩根大通行政總裁Jamie Dimon 話信貸危機快到尾聲，該公司發優先股集６０億美元亦出台，而美國西岸最大銀行 Wells Fargo 話雖然加州樓價下跌，其虧損有限。

在各種好消息刺激下，道指大升２５６點，升幅２．１％，升番到１２６１９點，又升番去早前的牛皮波動位，市場人士話今次升市升得幾全面，各類股份皆有上升。另外，期油價格在紐約交易時段升上１１５．２１美元一桶，因為上週美國燃油庫存意外大跌。

港股在本周一因為美股大跌２００多點，由高位２４６００點插下來，現價２３８７８點，未知今次美股突然回頭倒升２００幾點，又會不會推港股上番高位。

　　昨天講到「分注買入」，平買價值股是「投資的我」的手法，今天再講「投機的我」的「贏就谷」手法。網友阿Ray問「分注買入」和「贏錢時加注」的概念可否共用，我覺得唔係幾得，因為係兩個唔係好同的概念。

　　網友新友一號講起一隻炒股，問可否分注等佢下跌時買入，用這種手法買炒股，智者不為，唔係話分注買乜股都得，分注向下買主要是睇到股份跌近合理價值，覺得再跌都有限，所以才分注向下買，定得個價低啲，有少少似巴菲特講愈跌愈抵買的概念，只為避開一買就跌的痛楚期，你唔怕跌，對自己的分析有信心，一注買哂亦得。

但你分注向下買一隻炒股，咁樣做好易死人，因為炒股升和跌幅度都好大，只能順勢去炒，你逆勢去接，多多錢都唔夠。因為一隻１元的炒股，你定１元買一注，０．９元買第二注，０．８元買第三注，以為咁樣已經好平，但炒股的真正價值遠比現價低很多，佢一係唔大跌，萬一大跌就一瀉如注，１元跌到０．１元都得，分注去向下買的風險就在於此。

　　「投機的我」買股宜順勢，係分注向上買，唔係分注向下買，只會在順勢時追，一回頭就斬。我以前都引述過Edwin Lefevre 的《股市炒手回憶錄》，此書主要講述大炒家Jesse Livermore的事跡，書中講述佢順勢買股的手法，佢想買一隻股，在１１０元先買了２０００股，買完回吐即走，如果買完升到１１１元，初步證明他睇中走勢，他會再在１１１元買第二注２０００股；如果隻股再升，例如升到１１４元，他會再買第三注２０００股，這時持股已初步足夠，平均成本１１１．７５元，現價１１４元，有一定利潤在手。他會繼續觀察，知道股份上升後會調整，他想看調整後的走勢，假如它調整到１１２．２５元，然後又再上，慢慢上番１１３．７５元，就確認上升之勢。他會再放一個「市價盤」去買４０００股，如果好易用１１３．７５元買齊，他就會覺得唔對路，因為太易買到咁多貨，證明有太盤想出貨，他就會沽貨走避。若果只能以１１４元、１１５元那些高價才買到，就證明隻股無乜人想沽，愈升愈有。大炒手話：「我從來不想買得太便宜，也不想買得太容易。」

　　雖然我地無大炒家咁多錢去大手買入左右大市，但炒作講求順勢，隻股若有起步上升之勢，短期內會順勢滑行，你要分注向下買，等如去捕捉一個向下走勢，一係隻股只係小幅回調你買唔到，一係買齊股時隻股上升走勢已扭轉，隻股已轉勢向下，起碼短期走勢是如此，所以次次向下分注買到炒股都輸大鑊。所以大炒手睇啱一隻股，小注試盤，唔升唔加注，一回頭就打靶，充滿了「贏就谷、輸就縮」的智慧。請大家不要介意我翻炒我以前寫過的大炒手買股方法，因為這是展示炒作之法的最佳例子。

　　試想想大炒手可能有１００注在手，睇啱一隻股先落自己財產１％買第一注，贏就加注，輸就止蝕，買齊一隻股可能只佔佢組合總值的５％、６％，隻股有勢不斷升，佢會坐落去，升到咁上回頭時，下穿止賺位，佢就走人。佢根本就係不斷跟踪不同股份，大量地進出，下注輸少贏多，總計就是贏。

　　我希望用今日的例子，可以答到阿Ray的問題，因為「贏就谷」，係一種順勢而炒的炒作手法，唔係投資手法，在股份上升時追貨，入貨價會較貴，唔一定可以長揸，適當時要走，所以「投資的我」，在贏錢時加注加得太多，若大手加注時已在高位，的確有風險。

但若是投機就不同，根本唔贏就唔應該買咁大，唔贏就唔好加注。你可以比較這個手法和輸錢溝淡的分別，你原定用５萬元買股，輸錢再加５萬溝淡，加埋平均輸三成，等如輸３萬；若你贏錢才加注，想投資５萬都係先用１．６萬試吓盤，唔對路輸一成馬上走，你只係輸緊１６００元。買咗１．６萬元對路，才加第２注１．６萬，再有得升才最後１．８萬，買係買得貴，但係在升勢中買，跟佢順勢走一段，貴買貴賣，食夠走人，這才是炒股之術，可能輸三、四次１５００元，但敲中一隻執番１、２萬，就有淨肉。

所以我俾阿Ray的建議是將組合分成不同的部份，投機有投機的手法，投資有投資的手法，投機要週轉快，投資要坐得較長，各有不同的避險方式，唔好撈亂咗。我平時講分注向下買，主要針對聲稱自己係投資者的網友，叫他們買指數股或大股，等那些股份跌到近價值線才買，那些股份跌到好甘時，再跌的風險有限，分注是降低買完即跌的風險。而炒股卻應該唔升唔買，順勢追一段中短程，手法不同也。

陸羽仁