美股靠穩，公司業績好壞參半，道指升１點，收報１２６２０點，輝瑞藥廠受遺傳工程藥物競爭影響，收入減少；Google首季業績增長３０％，好過市場預期；美林證券首季虧損１９．６億美元，包括了６５億美元撇帳，同時裁減３０００個職位，但美林的撥備和虧損少於市場預期，刺激股價上升。港股短期後市要睇大陸股市走勢。

早前有不少網友問到「投資的我」使唔使止蝕，可以研究一下。先看看網友大老闆的經歷，佢話：「我都學陸sir 咁分開『投機』同『投資』的我, 『投資』的我就買大股長揸, 『投機』就抽新股。」



　「『投機』方面, 我之前抽落好多新股, 好似中煤、合景泰富、波司登、復星等。中煤係升到$22蚊到放咗, 其他都好跟足陸sir平時教, 佢地一跌穿招股價我就放。只係冇高位放, 但係投機抽新股方面都冇輸錢, 仲因為中煤賺左。」

「反而係『投資』方面想同陸sir傾下。我選擇左中國人壽作為對象。首先, 我睇好它長線的前景, 投資d錢係閒錢, 唔介意守好耐。不過我係國壽由5x幾蚊跌到去$40就買左, 因為我得一注錢, 做唔到分注買入。雖然我長線睇好加閒錢買, 唔介意守。但係見到佢一路跌到去曾經$25蚊到, 我都不其然要想當時是否要「止蝕」? 當然, 最理想的當然係有幾注錢, 係30蚊又入一注, 係25蚊又入一注。但係, 我得一注錢$40蚊就撲左入去, 雖然唔介意守, 不過亦都想睇吓係今次事件有冇咩地方可以學習到。」

「另外, 一個問題是作為小市民想做長期投資, 應該點樣選擇公司。可能這個係一個好簡單的問題, 但係點樣確保長期投資的公司唔會好似 “enron”, 貝爾斯登咁一炮冇咗? 係唔係長期投資都應該要分散買幾間？」

網友大老闆的個案值得研究，先講兩句投機，投機要進出，炒新股不一定要坐一世，特別是在大市好熱時買新股，更難長坐，買入若升上高位，見從高位回吐１０％，都可以沽啦。因為散戶的資金有限，你炒新股，即使呢隻回落了１０％後你沽咗佢再升，你錯過了這隻股尾段的升幅，唔緊要，只要大市仲升，睇定啲你都可以用套現回來的錢炒其他新股，所以投機炒股，唔係一揸到尾，升得多似轉勢時要沽。不過你雖然高位沽得中煤一隻，但起碼守到跌穿招股價即走的原則，都係守紀律之人，具備一定炒股的心理質素。

講番「投資的我」使唔使止蝕，這個問題若抽空來問，比較難答，若睇得書多又唔消化之人，一時巴菲特上身，好易答話「好股愈跌愈平，愈平愈買，唔單止唔使止蝕，仲要增持」。若你有巴菲特之能，呢個講法一定啱，問題你睇股票的基本價值，又有無巴菲特咁叻？以大老闆的例子，４０元的國壽，巴菲特唔止唔去買，有貨仲一定會沽添。大家記唔記得，國壽大概２０元左右時，傳過巴菲特入股，後來佢否認咗，我當時心諗，巴菲特只買超級大減價的好股，點會在２０元買國壽，你睇佢想買美國的債保公司的出價，就係道佢要價有幾辣。

所以講具體例子較易答，即使你抱投資心態，如果買入價唔係「非常平」，就唔好唔止蝕，大家未必如巴菲特那樣，識得計公司無限年期現金流的折現價（這就是所謂公司股價的合理價值），去計出現價比現金流折現價是否有好大折讓，所以我用咗一個好主觀的方式去講，叫做「非常平」，唔識計價值，都可以用主觀鏡睇吓。

分三種情況，第一是「相當貴」，現在國壽的一年低位２３．３元，高位５３．８元，就用呢條數計，如果個市炒到熱火朝天，身邊人人都講股，大股一年升咗一倍有多，跟住從高位回落１０％，例如國壽去番到４８元的時候，這種叫做「相當貴」，貴買好股等如炒，無論你的心態是否想投資，以那種價錢買股都等如炒股，所以在「相當貴」時買股，一唔對路要斬清。或者應該咁講，嗰種時候，「投資的我」根本不應該入市，股價高位回落１０％，正係持貨的投資者止賺的時候，唔係入場的時候。

第二種情況是股價「中中哋」，唔高唔低，國壽跌到４０元時，這就是網友大老闆買股時，國壽從高位跌了３５％，單睇這個數字，都幾多了，但再睇４０元比同年低位，尚高了７２％，又唔算跌得夠多，回吐升幅一半的情況比比較是，所以當時國壽的情況，唔算「非常平」。

若果你唔係在「非常平」的價位買股，買完再跌，就要積極考慮止唔止蝕。我建議一個縮骨方法，諗唔掂，唔沽哂都沽一半（大老闆得一手難以執行，但都可以買番少少國壽沽輪對沖，若隻股反升，就要預咗這筆買沽輪對沖的保險金會輸哂）。如果我係大老闆，在１月睇住國壽張股價圖，見佢守咗兩個月守住４０元個位，跟住在１月初開始穿４０元這個大位向下插，就一定會止蝕走人。

大老闆講的情況唔難答，有一種情況難答啲，就係在股價「非常平」時買入又如何？假如你在３月中大市插低時，在大跌當日以２５元的低位買到國壽，假設買完在４月再插，咁又止唔止蝕好呢？用番我上邊的講法，２５元距離一年低位２３．３元已經好，所以應該算「非常平」，但又係唔係唔使止蝕呢？

我只能咁講，若無大熊市出現，２５元入國壽應該都OK，若美國有大熊市到來，觸發全球性衰退，世界末日咁款，不能排除國壽仲會大跌，畢竟幾年前國壽上市之初，長期在５、６元左右浮沉，邊個敢寫包單永遠不會再出現這種價錢。當然，講到咁誇張，好似有少少唔負責任，所以合理分析係，估吓隻股最差會唔會清盤（就係大老闆問的安龍和貝爾斯登的例子），另外假設如果大市出現股災佢跌到地底泥價錢時，呢隻股守幾年上唔上得番來？再問自己等唔等錢使，可唔可以守幾年？如果全面答案都係正面，就未必一定要止蝕，但要明白咁做都有風險，只不過風險發生機會較細，萬一出現自己接受得到。

好多人都講，buy and hold（買入長期持有），可以係一個災難，只要的買入的時機不對，價錢太貴，就會中重招。用上述的方法去判斷止唔止蝕，若入貨價唔係咁平，唔對路時唔沽哂都沽番一半，相信都可以在大部份情況下，幫到大家。同樣道理，即使是長線投資者，股市升到好顛時，沽番一半貨出街，又有何妨？

陸羽仁

　　　　美股反彈２２８點，日股今早升２００點，升幅１．５％，對港股應有點刺激作用，唯一拉力是A股，大陸股市跌近３０００點大關，管理層都有點緊張，其中一個壓力是所謂「大小非」出台（即大量和小量持股的非流通股開始解禁出售），中國證監會為減少非流通股減持的壓力，提出「限售股轉讓意見」，要求在大宗交易的系統裏轉讓，並加強訊息披露，此舉令「大非」出售透明化，市場人士認為可減少捕風捉影，這是中國證監會的救市招數，應有助市場回穩。
　　上週講到止蝕，惹起網友回嚮，還想再清楚說明。網友木子說：「陸 sir 今早的話﹐算是說對我心了。其實在最近這升浪前﹐還在二﹑三月吧﹐哪時很多好股的價位都掉到接近陸sir 今天所說“非常平”的情況了。而且市況波動﹐每每兩三天就有10%過外的跌幅。哪時有些人還死抱著止蝕﹗止蝕﹗止蝕﹗的炒作方式。結果無端端的把一些實力股在低位放跑了﹐還虧了錢。多冤﹗」
「我不是說好股就不會像當年的8號仔﹐但這情況到底多嗎﹖我想統計一下﹐問問有那些網友﹐在前陣子把匯豐﹑中移動等大股止蝕的﹖出來說說自己的感受。止蝕後﹐得來的錢都怎用了﹖」

陸羽仁舉出不同的例子講止蝕，就是想大家有一個立體的感覺，讓大家可以確立一些規則，去管理自己的股票戶口，而不是盲目去估計後市走向，造了轉體３６０度的高難度動作而不自知。

我建議大家還原基本步，主要看兩個方面，第一分清是「投資」還是「投機」，第二是看自己倉位大小，判斷自己暴露在多大風險中。我認為分清這些理念，按規則去投資，比去估大市明天的走向更重要，你即使估中如今大市係熊市第１．５期反彈的第３次回調的第５隻腳（我亂講你唔好信），若是買股的方法唔啱，估中都可以輸大錢。

我叫大家分清是「投資的我」還是「投機的我」，我講了一百遍，還是會再講。在股市在３００００點時，我見到有些好朋友在狂炒，私下會叫佢小心啲，但有個朋友的反應好有趣，「佢會話我知o架啦，我炒吓啫，唔對路會走o架。」聽佢咁講，佢講明係投機，又話自己識做，我又唔係佢老豆，當然不應再枉作醜人，我的確不知道狂牛最後衝到邊個位會停，最後幾日衝多５０００點都唔奇，在旺市又點可以逼人唔買股呢？

不過一個浪跌下來，那個講「我知啦」的朋友一股都無止蝕，跌到２０５００點那日問我點算，我心諗「我點知點算」，唯有做社工安慰吓佢，叫佢坐吓貨先，話可能明天會更好之類。我想佢當日口講「我知啦」，其實一啲都唔知；口講「唔對路會走」，其實完全無諗過會止蝕；人在酒色財氣中，我叫佢抽身而出，佢講乜嘢都只係應酬吓我而矣。

所以投機一定要止蝕，投資看情況決定止唔止蝕。你檢討一吓買入股票的真正價值，簡單到睇市盈率都得，檢討一下自己組合暴露在多大風險下，如果如木子所講買入匯豐（００００５）和中移動（００９４１），唔係話佢地暴跌完唔會再暴跌，而係話即使股災到來，股市再大插，過幾年佢地的股價都有望見家鄉，而自己組合持貨又唔係咁多，又唔一定要在大插時止蝕。股市大插的日子，往往是長線投資者買貨的時候。

人人情況不同，處理手法可以有好大差別，所以我好奇怪，為何一些股市名咀，可以聽到一些老人家買股坐咗艇打電話上電台時，可以叫佢唔怕再溝淡，如果老人家成副身家買咗隻股，跌咗一半，你仲叫佢溝，實升o架？唔升老人家頂唔順點算？

所以木子的長線投資可以唔斬倉，牛腩貓咪短炒唔斬唔得，阿Ray話想揸外匯掛鈎票據我好反對，但佢再講可能只佔佢組合極少部份，我又覺得無問題，各人情況、各隻股票的狀況千差萬別，不能一概而論。還原基本步，搞清楚投資和投機的手法，按紀律行事，可以確保輸少贏多。

陸羽仁

美股偏軟，主要係美銀公布業績唔靚仔，因為要撥備６０．１億美元，首季業績跌７７％，差過預期。不過其他公司業績理想，花旗調高蘋果電腦估計盈利，對科技股有支持，道指微跌２４點，跌幅０．２％，收１２８２５點，美股在金融股差勁時展現少少抗跌力。港股ADR價有調整，日股早段又跌百幾點，港股又進入調整格局。

　　昨日講緊止蝕，網友平凡人提到中化化肥（００２９７）事件，也是一個好例子，中化化肥上周四開始急跌，由當時７．０５元，累積跌到昨日收５．２９元，三個交易日夾埋跌了２５％，在中化化肥急跌之時，市場唔知乜事，平凡人睇到上周四晚中央電視台二台經濟半小時節目，講到今年以來化肥價格大漲，過去一年漲了１００％，化肥是種地的主要成本，農民很苦，因爲他們所種的糧食成本主要是化肥。國家為控制化肥價格，準備徵收化肥出口特別關稅100%，節目又點名批評中化化肥。
據平凡人引述，中央台二台訪問了化肥專家、全國政協常委武四海，他說中國只有10家公司擁有進口化肥的權利，但今年的進口化肥只有中化和中農兩個公司得到進口的合約，其他8個公司談判失敗。中化化肥與外方簽約2008年的買價是人民幣（下同）1900元一噸，而在國内賣給農民是4000元一噸。中央台二台指稱中化化肥囤積進口鉀肥500萬噸，說的是100億元的利潤。

中化化肥昨天發了一個通告，表示不明股價跌因，公司亦沒有回應中央台二台的批評，所以我哋唔知有關批評是否準確，但中央媒體咁樣批判一家企業囤積居奇，亦足夠令投資者走避了。

即使中化下跌後，市價仍達３６９億元，今年３月底公布業績，去年盈利６．６億（現價市盈率４７倍），但公司公布業績時指業績倒退主要是衍生金融工具價值的變化所致，剔除這個因素，純利有１２．９億，同比增長４３％。中化是中國化肥業內大戶，盈利增長又快，所以能支持高市盈率。今年年初，大行對中化未來前景都比較看好，例如花旗集團曾經預期鉀肥價格上調１７％，將中化化肥０８及０９年度盈利預測，分別調升１０％及１２％，估計兩年度之純利料達２０﹒３８億元及２５﹒９３億元，花旗當時將中化化肥目標價，由６﹒７元調高至７﹒６元，並給予其「持有」投資評級。所以中化在３月底公布業績後，核心業務增長符合預期，股價又上番７元樓上的高位。

阿爺要嚴控通脹，糧食價格是主要控制的對象，農民投訴化肥價太貴，找化肥專家問一問，專家話中化囤積進口化肥謀巨利，結果可想而知。投資者一聞到味，自然走避。

今日的題材仍是講止蝕，上星期四中化跌６％，當晚中央台節目出街，星期五中化再跌１０％，假設不少中化的股東不知道中央台的節目批評中化，財經評論員還說中化急跌是中國徵１００％化肥出口稅所致，若你是中化股東，應否止蝕？

如果我係中化股東，如果買中化主要為炒業績的投機心態，遇上這些無名腫毒，唔知點解無情情急跌，一定會止蝕，因為呢個世界咁多知情人士，佢地大手沽得，一定有理由，隻股短期都無運行，急跌完或會反彈，不過亦好難大升，亦有大戶出唔齊貨會等反彈再沽，所以小心反彈完再牛皮向下。

如果我係抱投資心態買中化的股東，見佢去年純利６．６億，剔除金融投資純利１２．９億，增長４３％，大行原來估佢０８年純利２０．３８億元，但在中央可能會出手嚴控化肥價格的前題下，仲有無可能有咁大純利增長呢？唔確定。中央唔干預，４０億純利都唔奇，中央干預，２０億未必做得到。中化當然可以靠母公司注入資產來增加純利，但股價下跌集資力弱，母公司是否願意調低價格注資也成疑問。中化純利增長有很大不確定性，長線投資者唔沽哂都應該沽一半，換番第二隻前景較穩定的股票可能好啲。若早前低位買入，另可以從一個角度考慮，若跌到成本價全數止蝕，不到成本價守吓。

我用這個例子想去說明，在股價不明原因急跌下，股東大多數要嚴厲執行止蝕，止蝕完隻股升番唔奇，因為跌得過份隨時有反彈，揸重貨者亦可能會出來頂吓，你要預咗有這件事發生，但止蝕係防止坐艇坐到大西洋的最好方法，留得資金在，那怕無股炒。

陸羽仁

美股顯著回吐，因為油價創新高和科技、醫療及消費類股份業績未如理想，令人憂慮次按危機的影響會由金融類股份擴散到各行各業，道指跌１０４點，跌０．８％，跌到１２７２０點，是最近一週以來最大跌幅。要睇吓港股在美股回吐時，有多大抗跌力。

　　呢一轉美國公司公布的業績未如理想，晶片製造商德州儀器因為電話公司訂單減少，股價大跌。醫療保險公司UnitedHealth Group 因為僱主購醫保減少，股價跌近１０％。Coach Inc.因為銷售手袋要增加折扣，影響盈利。總之間間公司都有點負面東西，美股難免受壓。

　　美元還在反覆偏軟中，油價升到近１２０美元一桶，早前有證券行預計會升到１５０美元，雖然人人都話升到這個水平無一個國家頂得順，但從炒作角度，都唔係無可能挾到這個水平。

　　美元兌歐元又創新低，曾經跌穿１．６美元，在亞洲市早段造１．５９７３美元，主要係歐洲央行維持利率不變，而美國在月底又好可能再減息，支持歐元匯價。按美國利率期貨的交易價顯示，８２％交易員估計美國聯儲局月底會減息０．２５厘，其餘估計會維持利率不變。

　　歐元在４月已升了１．２％，而今年至今更升了９．５％。歐洲央行正在進退維谷，本想降低４％的主要借貨利率，但３月歐洲通脹升至１６年高位３．６％，減息又怕刺激通脹，唔減息造成高匯價，又怕會步美國後塵陷入衰退，歐洲挾在兩難之中，歐元係咁升，而家匯商沽美國減息後，歐元短線會炒上１．６５美元的高位。

　　美元兌日圓匯價暫時還企到吓，在亞洲市早段兌１０３．０９日圓。高盛本來估日本央行今季會減息，但最近已放棄此看法；市場開始估計日本央行下週發表經濟展望報告時，甚至會暗示中長線日圓會加息。現時的情況和六個月前的估計比較，日本的經濟增長低過預期，通脹增長快過預期，但日本央行多數會採取一種觀望態度，利率暫時不升不降，而非調頭減息，而日圓利息長期過低導致的不正常現象，長線還需糾正。

　　另外，加拿大央行宣布減息半厘，受美國次按危機影響，加拿大經濟有放緩跡象，加拿大央行減息回應。

　　美元大跌，油價大升的循環還在繼續，搞到全世界匯市、商品市場立立亂，網友阿Ray問我，美國經濟的危機是否還在深化中？他亦問到我早前話識一個金融猛人睇美國樓市可能衰到０９年，但金融市場今年４、５月等埋銀行第一季業績，就會可能會見底，唔知佢而家點睇？

　　美國次按危機對金融市場的影響，短線有少少舒緩跡象，至少不是在擴大中。對美國後市有兩種看法，睇經濟的人傾向睇得淡啲，認為美國仲有一排衰，但睇金融的人傾向睇好少少，頗有偷步入市的味道，例如我所講的金融猛人，還是維持當時的看法，美國銀行業績未有太大驚嚇，而家等埋第一季經濟數據出籠，若數據一如所料地壞，不是出人意表地壞，他預計金融市場會延展一段較長的反彈浪，之後再牛皮觀望信貸市場的走向。我就加一句，香港要睇埋大陸，如果大陸市不斷大跌，會拖住港股，反而若大陸市觸底反彈，港股就有第二個引擎，未來有機反覆向上。
陸羽仁

　　　　美股道指昨日升４２點，升番上１２７６３點，但今天的焦點恐怕不是美股，而是大陸股市，阿爺昨日黃昏宣布減股票交易印花稅，由０．３％減到０．１％，即係打回去年５月３０日加印花稅前的原型，從新玩過。

　　消息出來之後，有評論員話政策無用，因為股民買股票主要睇升唔升，唔介意俾幾多印花稅。陸羽仁竊以為評論者未了解中國國情，亦未明中國股市的運作邏輯，雖然中央出減印花的重招，不是寫包單一定救得起股市，但話佢無用就有少少輕視阿爺的有形之手在大陸股市的作用。

　　大陸股市在去年旺市時成交大量增加，政府又加印花稅，搞到過去一年國家印花稅收入超過２０００億人民幣（下同），而股市的派息總額亦不及此數，股民整體俾稅多過收息，形成所謂「負收益」，本身已經唔係好健康。

　　更重要的是大陸是一個發展中的股市，股民炒心理多過炒基本因素，股市氣氛好的時候極好，７０、８０倍市盈率的股票搶住買，壞的時候特壞，２０、３０倍市盈率的股票無人吼，所以股市升跌的關鍵是股民對股市前景睇好或睇淡的心理。

　　而股民的好、淡心理，很多時是源於他們理解政府的政策，而非基於經濟或上市公司盈利前景的估計，近二十年大陸的主要跌市，都和政策有關，９３年是宏觀調控，９７年是股改將令大量法人股投入市場（就是現在實現了的非流通股分階段自由買賣，即所謂「大小非」減持），股民觀察政府的政策不利股市，特別是股市已炒高時，認為政府要砌低個市，就一窩蜂沽貨，造成跌市。到２０００年之後中國經濟漸入好景，企業盈利不斷上升，但內地股市有好長一段時間還是一潭死水，上證綜指在１０００點上下浮沉，證明在中國股市，即使經濟好，公司盈利好，也和股市上升無必然關係，股民等待一些政府的刺激股市的舉措，或許０５年１月２４日政府把印花稅由０．２％下調到０．１％，已是政府明示希望股市向好的舉措，但大陸股市亦要等到０５年年底才起步急升。

　　大陸股市今浪下跌，亦是源於政府的宏調政策，本來預計無咁大力，但見到通脹愈升愈高，政府愈出愈大力，已令股民心驚；本來預計雪災政府會鬆一鬆手，怎知政府無鬆手，更令股民膽震。從政府政策上來說，去年阿爺回應通脹初升時反應太慢，放虎出山，所以今年要加力補救，但股民見到政府宏調愈來愈大力，開始掟貨，跌穿４０００點後愈跌愈多，股民就不問價沽，慢慢形成惡性循環，打破了股民向好的心態，最後變得只有外資、社保基金和中金公司在接貨，若非這些大戶接貨，大陸股市肯定跌得更勁。

　　阿爺不想股市升得太顛，但也不想股市暴跌，因為大跌市既是社會不穩定的因素，亦會進一步拖到整個內需和經濟慢下來，阿爺雖然不想經濟過熱，但也不想打過籠搞到經濟太冷，所以股市跌穿４０００點時，已跌到阿爺的心防，密謀做嘢救市。

　　知情高人透露，在大陸股市４０００點時，減印花稅的方案已準備就緒，但當時怕太早推出，股市未跌夠，推完無用，股市再瀉，就無重招救市，所以一直隱而不發，觀察大市的底部在何方，外資在３５００點樓下大量湧入建倉，阿爺自然看在眼裏，在周日先推出限制「大小非」減持的救市方案，但大市未止跌，到本周二跌穿３０００點時，大市單日ｖ型反彈，中央見到時機已至，就一舉推出減印花稅方案。

　　阿爺連番出手，要救市的姿態極度明顯，主要是讓股民重拾信心，中央雖要宏調，但唔想打死股市，期望可以挽回股民的信心，相信股市先可在３４００點至３８００點穩定下來。如今還要看的是下月中公布的４月中國CPI數字，如果顯著回落，證明通脹受控，中央的宏調措施可以稍稍放輕，相信大陸股市有機重上升軌。

　　港股方面，昨天又出現和美股下跌背馳的情況，加上升穿２５０００點這個長期反彈的重大阻力位，這些可視為轉勢的訊號，只要美國不爆大鑊，港股有機會回到一個反覆向好的格局，當然要觀察回吐的幅度，每次回吐以不穿大位為宜。未來的走勢雖然不是一帆風順，但有機反覆向上，可趁升到咁上下回吐時，追一點紅色股也。
陸羽仁

　　　　股市回復少少生氣，令人對樓市前景都睇番好啲啲，週末聽銀行界老友講，呢幾個月豪宅無運行，但中小型單位市道唔太差，都維持到一定的二手成交，唔係一個跌市，你計埋去年第４季本地樓市急升的因素，呢一兩個月樓市微微落，只能算是急升之後的整固而矣。

　　網友elainejeffy問我好唔好賣樓等跌市，佢話：「陸sir，有一個問題我諗咗好耐都唔知點好，希望你可以俾d意見。我而家有一層樓放緊，帳面大概有60-70萬利潤，不過放左之後要租返一層。由於低利息期既關係，租屋會貴過現時供樓，如果每月供款還本金既錢當作儲存既話，租樓一個月就要俾多5千蚊出黎，即係一年會俾多6萬蚊。問題就係...
1)
如果股市現在係熊二期既話，熊三出現既時候我怕會拖低樓市，浪費咗今次高沽遲吓低買既機會。

2)
但係如今上証綜指3千點大陸政府高調救市，如果上証守得住3千點，那恆指破2萬既機率會唔會好細呢?

3)
如今樓市中線前景好似幾樂觀，人工加，租金加，通脹升，低息，負利率，地產商惜貨而賣，建築緊既樓宇又下降緊，即係供應少咗，需求多咗。就咁睇樓市又好似仲有得升吓啵，就算唔升都唔洗咁快賣住啵。期望你既回覆，各位師兄都可以俾d意見，謝謝。」

elainejeffy這種賣樓等跌市的心態，在股民、以至業主心中非常普遍，或者我可以分幾個層次答。

第一，散戶買樓長線賺錢容易過買股。Peter Lynch都講過呢個道理，話佢見過好多美國人買樓賺錢，較少人買股賺錢，買樓者多數隨著收入增加，細樓換大樓，最後到退休時有一間價值極高的大屋，累積大筆財富。我話呢個道理在香港一樣好啱，好多人打一世工，最後剩下來唯一的財產就係一間樓，或者做一種小生意，幾十年後生意好似無乜錢賺，但賺咗間舖，咁都已經好叻，因為出租舖都足夠養老有餘。樓是不動產，較難沽出，逼人做較長線的投資，無咁易在跌市或「疑似跌市」中沽出，揸住間樓守得過低潮，最後大市反覆向上，就有數以倍計的利潤。但若你買了股票，想沽出十分容易，一個電話就搞掂，你好易受貪婪和恐懼所左右，見到少少利潤想走，或者一有跌市即閃，但跌到底時你又未必敢去買番。散戶投資出出入入，住往掌握唔到好時機，不如唔出入好過。另外，普通人比較大駛，賺幾多駛幾多，買樓之後要供，逼你儲錢，逼你死坐，逼你長線投資，對散戶較有利。

　　第二，買樓有槓桿。你買一間２００萬元的樓，放低三成６０萬首期，借１４０萬，即係用６０萬去做２００萬的投資，有非常大的槓桿，你買股票除非借孖展或炒衍生工具（如窩輪），否則沒有這麼大的槓桿；但你買股票用槓桿去炒風險很大，股票一跌，證券行會要求你補倉，你補唔到就斬倉，好易把本金輸清。你買樓遇上跌市，即使變成負資產，只要你定期供樓，銀行不會咁身痕走去斬你倉，所以買樓有一個較「安全」的槓桿。反觀賺錢時，若買股不用槓桿，買樓買股相比，你攞６０萬去買樓，樓價升三成你賺６０萬，但攞６０萬去買股，股票升三成你賺１８萬，條數差好遠。

　　第三，要捕捉最高點出貨、最低點入市好難。你想高價沽樓，低位買番，唔係咁易，歷史上香港樓市最易捉的高位係９７年，我識部份人在那時都沽了樓，但好多係「符碌」所致，係政治上唔睇好香港，想移民調走資產之類，才去沽樓。而有些沽了樓者見９８年跌到咁上下，又去追番，最後都係輸。在一般情況下，樓市的頂部唔係咁易睇到，elainejeffy現在以為是「熊三」要到走去沽樓，衰起上來只是在中間位沽咗，樓市不跌再升，間樓兩三年再升多６０、７０萬，你仲要每月俾多５０００元租樓，一出一入，條數好惡計。買咗樓揸長線唔係唔可以沽，如果你嗰間係自住樓，最好去到你認為好離譜的高價才去沽，「離譜」兩個字，同「升咗」、「賺咗」唔同，而家中小型住宅，好多和９７年高峰價仲低三成以上，未到離譜、升到顛的地步。

　　第四，若非出現elainejeffy講的大熊市，我又未睇到樓價會大跌。利息又低，市民供樓承受力充足，香港政府唔肯定期賣地，地產發展商又怕蝕底唔願放低大筆按金去鈎地，土地供應不足，發展商十分惜貨，咁環境樓市不易大跌，你睇elainejeffy的例子就知，供完每月要貼５０００元去租樓，咁倒掛係吸引人買樓唔係沽樓，雖然低息唔會永遠持續，說不定明年就開始加息，但到美國加息時，經濟環境又改善，人們也未必怕加息了。

　　所以簡單去講，elainejeffy想而家高沽等樓市跌吓去低買，係一種出入的心態，並不是對待長線投資的應有態度，散戶睇市不如大戶，自己以為睇到市場的高低點去出入，好易就放咗好的投資。到發覺睇錯時，更可能用套現的錢去追樓追股，在高位追入風險更大，所以我建議elainejeffy都係坐吓貨啦，「坐看雲起時」吧。
陸羽仁

　　  　期指結算前夕，美股道指略回，跌２０點，收報１２８７１點，睇嚟港股結算上落幅度未必太大。


　　昨日講起「沽樓等跌市」的風險，睇完網友的回應，我恐怕網友誤會我講今年樓市一定升，其實我在講持有樓宇是一個長線投資，要有較長線的看法，起碼也是兩三年的事，主要不是講短炒作的起伏，短線樓市上落的分析，只是作為一個次要的參考。


網友Sun的回應很有意思，值得大家細讀，佢話：「我想回應陸Sir"沽樓等跌市"之看法，我覺得如果自問自已炒股票是敵不過"貪婪和恐懼", 則陸Sir的觀點頗正確, 可是, 如果你能不犯陸Sir所講的兩大錯誤---1」 炒股時的"貪婪和恐懼", 及 2」沒有儲錢的自制力, 要靠供樓強迫---那麼, 我認為套樓等買股是好主意。舉一例子, 我友人最近以$530萬沽了2001年以$330萬買入的一手盤, 升值60%, 似乎比買股好, 但他持貨7年, 實際是每年回報率只有7%, 還是因為去年九月急升才有這每年7%的成績, 如果以07年九月價去計, 算他持貨6年, 根據當時同類盤的成交價, 只有$310萬, 每年回報率只有5%。可是, 假如你在2002年"不幸地"以一個不靚的價, $95元買了飽受次按困擾的匯豐, 現價我算它$130元, 每年回報率也有7%, 而且, 匯豐股息有4-5厘, 是完全入袋的, 而租金回報雖然也可說有4-5厘, 但郤未扣除放租的成本("全包"費用, 維修, 買樓及放租佣金, 稅項), 而風險(租不出, 租霸, 兇案)亦高於買大藍籌股票。我只是以買了表現欠佳的匯豐作例子, 如果你買的是巨型國企如中石油, 中移動, 至今回報數以倍計, 買樓又豈能及? 當然, 如果閣下敵不過陸Sir所說的"貪婪和恐懼", 那麼你持有匯豐, 很可能早已低位憤而沽貨, 而持有樓宇, 則縱使SAR時期都可能會"焗"你持貨。」

陸羽仁在某意義上同意阿Sun的意見，雖然表面看佢無計買樓的槓桿，若計埋槓桿，買３３０萬元的樓只需三成即９９萬元的首期，７年賺２００萬，以本金計回報率是２０２％。但阿Sun講得對，如果唔係計匯豐，係計中移動或中石油，買股票回報又會高好多。

我相信大家都記得，我話自己寫文係從眾，用八二分，社會上有兩成係叻仔，有八成係凡人，叻仔唔使教，只要教凡人，所以我寫文好多時係針對嗰八成凡人，唔係寫俾兩成叻仔睇。而現實上那兩成叻仔中，可能有１０％有超高的心理素質，可以完全戰勝貪婪和恐懼，成為大富大貴之人，這也是小量白手出身靠博起家的富豪發跡歷程。不過股市亦專收叻仔，也有大量叻仔埋骨於股海中，部份人曾一度風光，但結果衰收尾，或許這種大起大落，就係好賭者的人生樂趣。

但其餘八成凡人買股，絕大多數時候敵不過貪婪和恐懼，買股多數騰騰雞雞，貴時追，平時沽，長期埋單計數，買股賺賺蝕蝕得過桔，所以我就話不如買樓啦，主要都唔係睇樓市而家的大勢（以中小型樓計，現時樓價不高不低，以經濟發展和匯價計屬合理水平），而係睇大多數人投資的能力和習慣，持有樓宇係一個笨方法，讓大多數的凡人，可以較易達到彼岸。

　　若果你唔知自己係叻仔定係凡人，例如日前問問題的elainejeffy，可以睇吓自己過去買股的住績，計清楚條數，睇吓咁多年買股賺多定蝕多，累積回報有多少，咪知自己係邊類人。若無買股經驗，或者輸多贏少，或都贏埋平均一年都無１０％平均回報，咁樣就當自係凡人好啦。記住要計過去咁耐「累積」數字，唔好只計贏唔計輸，同埋要將本金鈎出來，你不斷把人工投入去炒股，累積的錢只係本金，唔係贏錢。若計完往績將自己分類成叻仔，就可以多炒作，若是凡人，就多投資，買樓係一個笨笨地的長線投資方法。
這裏想再講講yy太留言，佢話：「你今天之blog道出了好多小生意人(好彩的)的心聲 "經營幾十年,生意賺不了多少, 但買了一店舖出租可以養老."我會好好計劃看時機買入工商單位. 我都好想買地舖,但而家太貴了.因為可能十來年後, 我埋單計數, 可能都是供了物業養老!做生意是三更貧, 五更富的人生呀！而您對樓及股之取捨, 正正是yy生及我放棄了2005買大陸樓, 買了港股但投資方法不好, 而打回原形的景況. 如果早2-3年識您,我地的歷史,會改寫, 但現在都未為晚.。多謝陸sir花這麼多時間寫blog. 您真的幫了好多人. 感謝。」

放一個長線角度看１０年以上，一個地方的股市和樓市，會和當地的經濟發展同步，但短期１、２年看，股市和樓市、特別是股市，就如用狗帶拖著的頑皮小狗一樣，不是跑過籠向前，就是跑太慢落後。大陸經濟未來十年還會每年以７％以上增長，只要不是在太貴時買股買樓，死揸十年會有大收穫，未來的大陸，就如過去９７前２０年的香港那樣，仍處於高增長期。香港現在的經濟已比較成熟，未來增長較慢，每年有３％、４％已不錯了，所以買樓買股要睇啱時機（買紅色股的角度不一樣），但yy太若做生意能自己供得起舖，在香港買舖也不錯，自用無放租的煩惱，而且商舖少折舊，１０、２０年過後，供滿間舖，將來靠收租也可以達到財務自由了，但要靠炒股１０年、２０年達到財務自由，難度大好多。所以對凡人來說，炒股只是小注怡情吧！

陸羽仁

　　美元再開展一輪反彈，令到石油、黃金及各類商品價格急回，亦刺激美股向上，在科技股和銀行股帶動下，道指升１８９點，升幅１．５％，升到１３０１０點，升穿１３０００點的水位，是今年１月以來的高位。反映科技股的納斯特克指數亦大升２．８％，升上２４８０點。

　　美國勞工部昨日公布上週首申領失業救濟金的人數，升至３８００００，高於市場預期，但美股卻因為美元反彈而向上，比較落後的金融股和科技股最被看好，英特爾升４．６％，美國第一大銀行花旗集團升４．２％，美國第三大證券行美林升５．１％，這些大股動輒升４、５％，大追落後。

　　美元急劇反彈，在今早亞洲市歐元兌美元匯價為１．５４６４美元，而美元兌日圓則造１０４．６３圓，美元兌歐元的匯價升上５週的高位。奇就奇在早一日聯儲局議息之後，匯市無大反應，由於聯儲局的聲明比較含糊，市場對美元是否會減息還是意見分歧，債券期貨的交易甚至顯示６月底再減息的機會上升，但一日之後，匯市又好像突然瞓醒一樣，對美國衰退的憂慮開始減少，估計美國減息的週期或會停止，資金又突然湧入去買美元。

　　匯市這種遲一日的反應，的確奇特，中環茶友話，估計有兩個原因，第一，聯儲局的聲明較模糊，唔知佢係唔係想停止減息，但聯儲局咁多個理事，總有人可以向他們探到料，假設儲局諸公傾向唔再減息，消息慢慢泌出街，就有好多人在匯市追美元。第二，美國連續七次減息，無論如何都近尾聲，最多俾佢在６月底減多一次，都應該要停，而美國首季經濟和企業表現都唔算差得驚人，更令人憧憬最壞的情況已經過去，所以美元始終要反覆向上。

　　美元一彈，各種商品都急插，油價急跌至１１２美元一桶，金價更跌至８５１美元一安士，從高位１０３０美元跌到而家，３個月已跌了１７％，跌幅驚人。由於過去借美元沽空炒外幣和商品的錢太易賺，每一段都累積了大量倉位，所以美元一反彈，這些殺倉盤都會好勁，所以一係唔跌，跌起上來會好得人驚，若有揸外匯和商品的朋友要執生，最好定好止蝕，希望佢唔到止蝕位，但一到必須嚴格執行去斬倉，不能讓虧損擴大，否則可以蝕你好多錢。

　　我估美元這一個反彈浪未完，這一浪要完結或有一個顯著回吐，係要等好消息真正出現時，假如６月２５日聯儲局議息時決定不再減息，顯示減息週期完結，此消息出現時，美元必再勁升，那時才是美元好友借好消息出貨的時候。
　　美元上升係美股上升的真正基礎，因為美元回升除了對美息的預期外，亦反映市場不再憂累美國經濟大衰退，市場對美元回復信心時，美股亦顯得吸引，因為外資調錢入美國買美股，即使股價升，如果匯價跌，外國投資者都得不償失，但美元若有像樣反彈，美股又向好，買美股便有賺價和賺匯水的雙重好處。估計今次道指有望挑戰一下１３５００點的水平。

　　若然假設美股會反覆向上，港股亦會跟這個大方向，中線也是反覆向上格，雖說近２６０００點向上空間不似太大，但大勢仍然係反覆向上，要逆市而炒做淡友，難度幾高，雖然我估計月頭港股仍然會搵位回吐，但不要期望回吐的幅度太深。可先觀察今天港股跟美股彈幾多，就知道大戶想一路向上炒，還是月頭放軟手腳，中段過後再推上了。
陸羽仁

美國的股市大新聞是微軟終於宣布放棄收購雅虎，令這一個期待以久的科技股世紀併購泡湯，微軟要另覓收購對象去和Google競爭，而雅虎就要面對股價暴跌的命運。

微軟初時提出４４６億美元（３４７９億港元）的收購雅虎計劃，但雅虎並不同意，最後微軟提價到５００億美元（３９００億港元），折合每股收購價３３美元，但雅虎老細楊致遠要價每股３７美元，結果談判失敗收場。市場認為雅虎管理層為保住自己份工，犧牲了股東利益。雅虎股價自微軟在２月１日提出收購後，升了４９％，昨日還急升了７％，升到２８．６７美元，因為市場憧憬微軟會再提價，而家微軟放棄收購，分析員估雅虎股價會暴跌２８％。

早兩日講起old rich（舊有富人）的優勢，之後有不少網友回應了，今天可以再討論一下。

老人家有句話：「大富由天，小富由儉」，聽落相當老土，但細思充滿了old rich的智慧，記住這是智慧，不是聰明。

香港這個社會，聰明仔太多，有智慧的人比較少，我又想起一個過去已講過聰明仔的故事，想再講講，呢個故事發生在十幾年前。有一次同朋友在一間高級餐廳食午飯，聽到鄰桌一個聰明仔在教她女友買股之道，女友問他，「我有匯豐，而家派息可以收股票或收利息，你話收乜嘢好？」聰明仔對呢個問題有研究，講咗一輪匯豐以股代息派的股票的計價方式，結論係匯豐計高咗少少派新股的價錢，所以收現金股息可以收多啲錢，最後佢仲加咗一句，攞番啲股息來炒其他細股，回報仲高啦！

我話佢係聰明仔，因為佢數口幾精，連一般人無乜留意的匯豐以股代息的計價方式都有一番見解，但恐怕只是有小聰明，無大智慧，匯豐股東以股代息，係想直接透過收股票作利息，達到複式增長的目標，因為收息數目唔太，收１０００元幾百元，食餐飯買個手袋就無埋，但唔收現金股息，只收股票，等如強逼自己將股息儲起，咁就有利叠利的作用。好似上述聰明仔咁講，拿股息去炒細股，又係死十個當五雙咋噃。

以同一個角度睇買樓，或者收窄少少去講，好唔好將自己的自住樓賣掉去炒股，從微觀角度睇，未必係最聰明的做法，但從宏觀角度講，對大部份無定力的人而言，買樓揸樓供樓可能是最簡單的儲錢方式。

先講微觀角度，有網友問起，話細心計落，過去幾年買樓年回報約７％，升勢主要在去年第４季才出現，所以ROE（即Return on Equity，資本回報率）唔太高；另外雖說買樓有借貸的槓桿，但上市公司自己亦有借貸，所以買股其實已暗藏槓桿了。網友這兩點完全啱，所以從微觀去講，買樓肯定唔係最高回報的投資。我再湊興加把咀，香港經濟在９７年前有２０年高增長期，現在點講都係成熟經濟，唔會增長得太快，樓市長線同經濟增長同步，亦唔好望樓價有過去那種高速增長。

但從宏觀角度講，對大部份無定力的人而言，買樓供樓可能是最簡單的儲錢方式，雖然笨，但有效，因為後生仔有樓在身，要每月供款，你點食點駛都好，都要搵錢供樓，等如逼自己去儲錢，有一類人係「大駛一族」，若然不用供樓，有錢在身唔覺唔覺會駛多啲，將自己樓賣掉，賺咗１００、幾十萬，更加要玩餐飽、狂買嘢慶祝吓，使１０萬、８萬唔奇，咁就將大量可以錢生錢的本金消耗掉。

另一類人是「爛炒一族」，我經常講，你知道自己在投機，有合理的方法去炒，我絕對唔反對人炒股，我所謂「爛炒一族」，係好喜歡炒股，但又唔識炒者。炒股會成癮，慣咗炒股，一有錢就身痕，想去炒一轉，唔懂得選擇時機，唔懂得選擇對象，唔懂得控制注碼，風險大得驚人。你忽然賣樓有１００、幾十萬現金在手，拿去股市博一舖，風險度其實唔比「過大海」去澳門賭錢低。做乜嘢都講經驗，如果你嗰１００萬係炒股賺番來，雖然唔保證你將來可以成功，但起碼都有一點炒股經驗，贏過又輸過，但如果你個１００、幾十萬現金係買樓賺番來，你炒股無經驗、無住績，你又點擔保唔會一大注炒就輸清呢？

炒股要成功，第一要講性格，第二要講性格，第三要講性格，要克服大量人性的弱點，才可以做到，可謂向高難度挑戰，成功機會百中無一。

網友均兒講起：「我總結自己炒股，次次都係買落就跌，跟住守到升少少就走，之後見到股再爆升就好心痛。」這個現象太典型了，甚至好多無心炒股、只有心投資的朋友，都會陷入這種「買親就跌」、甚至「高買低沽」的困局。有無想過唔係自己特別低能，而係股市根本係一個局，會引到一般人由唔想炒變成去炒，甚至炒咗都唔自知（你３００００萬時去入市想投資，就係炒咗股自己都唔知）。現在大市升到２６０００點，你仍然半信半疑，唔知個市得唔得，過一個月升到２８０００點時，你開始覺得個市幾安全，最後升到３００００點時，你反而覺得個市好得，飛身入市，唔知點解愈買愈多，初時仲好似賺到啲，日日計回報計得好開心，點知個市搞搞吓已走完今年的升浪，跟住就吓插，你高位止到蝕要還神，止唔到蝕又接到成手貨，計計吓唔單止無得贏，更加要輸，你就開始唔想再計數了了，跟住又食幾個月驚風散。風水佬騙你１０年、８年，我而家講o既話啱唔啱，睇幾個月就見功夫。

　　股票好蝦人玩，你計２４０００點入貨，２８０００幾點出貨，一年賺２０％，這更是指數的平均數，買中走得快一點的紅色股，一個月可以升３０％、４０％，以咁o既數字同買樓比，買樓、揸樓，當然回報好低。問題是股市利潤來去如風，股市專修理聰明仔，世事就係咁怪，有時長線來睇，笨方法可能比聰明方法，更能到達彼岸。「有錢儲起，長線投資，複利增長」的威力驚人，就是old rich的智慧。

（後記：對年紀３０以下，不在香港、身在中國其他大城市的網友，有能力供樓的話，記住要買樓自住．揀一些在市中心，交通方便，位置／景觀較佳的單位買入長揸，收入增加後，更可以細樓換大樓，２０年後必有所獲。你可能會問，我點解特別同呢班網友講，因為大陸係高增長的經濟，大陸樓價如香港８０年代中的價錢，長線增值能力好過香港樓，不過在偏遠地區的渡假樓卻是例外。）
陸羽仁

　　美股開始回吐，油價升穿１２０美元一桶，帶來影響消費的恐懼，而微軟宣布放棄收購雅虎，雅虎股價跌１５％，亦影響市場氣氛，道指下跌８８點，跌幅０．８％，跌到１２９６９點，此浪只屬調整，但應該還會回吐得深少少，１２８００點應有支持。
股市升升跌跌，但散戶能否捕捉到這些升跌浪，的確是一大問號，網友均兒的例子十分慘痛，佢話：「 陸sir，我重有更典型你沒留意啫，我在科網股那時就炒股啦，當時90元買左２手和黃，揸到依家，去年沒走到，依家又跌返落來，真系好後悔，都唔知幾時賣股才好，長揸又得個桔。之前買咗光大控股，也係揸咗幾年，6元多賺咗佢幾仟蚊急急走咗，如果揸住光控唔走，而家都有二三佰萬，重使乜炒股，真係沒運。」

「我喺48元買咗中移動，以為佢衰過和黃，跌到27元斬咗佢，去買奧瑪仕，因為前年賭股好好炒，結果做咗接火棒，而家奧瑪仕仲10合１，10合１唔緊要，如果再來個供股，我真係沒眼睇咯~」

「舊年賣咗層樓，賺咗4倍有多，以為樓市點行都夠了啩，千祈唔好再來一次負資產。估個市升完第五波後，都會跌返五浪啩，賣完樓，樓價又再升，而家沒理由又貴價去買返啩?」

「跟住買股票又套死，而家對以前輸過的股票，比如中移動，真係怕怕，明知佢係好股，但我揸佢好幾年，有種恐懼感。股市有時會跌到人神經病，好像大陸A股穿3000點時，有重股係手，日日見住股跌吓又跌，那種見財化水的感覺，好慘哦！」

「你話炒股要成功，第一要講性格，第二要講性格，第三要講性格，我真系好有性格，但係我炒股就好失敗！」

　　網友均兒的個案，令人感嘆，亦正正就是我開始講叫網友唔好而家沽樓買股的原因。散戶炒股經常輸，這叫做「交學費」，問題是交完學費學唔學到嘢，股市這個學堂十分殘酷，如果學唔到嘢，你就永遠不能畢業，永遠都在不斷交學費。
　　如果是爛炒一族，賭到飛到沙走石，輸錢都叫做抵，但均兒又唔太似，起碼佢買好多隻都係大股，只有奧瑪仕一隻細股，佢似投資者多過投機者，但點解又經常輸錢呢？

　　陸羽仁為均兒斷症，佢都係一種典型，叫做「炒咗都唔知型」，第一，佢專買熱門股，表面睇佢有買大股有買細股，但佢買的時候，都係買緊熱門股，在１９９９年、２０００年買電訊股，例如中移動及和黃，在２００６年買豪賭股，例如奧瑪仕，唔理大股或細股，都係在大市炒得熱，而相關股份又係大市焦點時走去買。佢當年買光大控股，或者都在紅籌股追落後炒得熱的時候。

　　熱門股唔係唔買得，但它們如燙手山芋，要貴買貴賣，唔可以揸，一揸就會燒傷手。我經常話「貴買好股等如炒」，你買完大市轉咗勢，你以為自己做緊投資者，跌市唔識止蝕，隨時要坐６、７年，因為好股炒得貴時，已經透支咗４、５年的合理升幅，到大市炒完講番基本因素，睇番PE時，好股跌完都要很多年才會浮番上水面，要等盈利增長追番上當年的股價。均兒在科網潮買了４８元的中移動，２７元沽了，輸了４３％，佢未算在最低沽，０３年沙士時，中移動跌到見過１５元，若在那時沽，更加係輸足６９％！如果均兒買咗電盈（００００８），後果就更悲啦。中移動用咗６年時間，去到０６年才上番４８元以上，而電盈由於盈利能力唔掂，好似永遠都無機會上番高位。

　　記得old rich的智慧嗎？股票又好，樓又好，只能低價買，不要在熱門的市道買（短炒除外），YY太舉的例子，就係話有old rich爸爸媽媽教導的朋友，在０３年沙士時樓市最差時買樓，我相信佢地的爸媽，唔會叫佢地在２０００年買電訊股囉。

　　第二，買得貴，好被動。均兒高價接貨，這就是一切被動的來源。和黃的確因為3G投資失利而好呆，但中移動一啲都唔呆，但均兒買中移動的結果更慘，和黃仲有機會見家鄉，但中移動波動更大，已在低位被殺出；均兒高價買股後，有些如呆坐幾年，有些低位出貨，有些是一升到賺番少少就止賺（如光大控股），這三隻股之中至少有兩隻係得o既（中移動及光控），但佢買得貴，唔輸就偷笑，根本無法享受這些股票最後的發力收成期，所以病變根源仍然是買得貴。
　　以後買股記住，投資者唔好買熱門股，唔好在熱門市道買貨；投機者貴買要貴賣。投資者千祈唔好做咗投機者都唔知。

　　第三，投資者出咗貨莫追貨。我見而家樓市好似未到頂，未係升得「好顛」，就叫大家唔好沽「自住樓」，一則費事你身痕攞大筆錢去炒股，最後輸埋，好似均兒的個案，未有買股成功經驗，賣樓有大筆錢係身的確高危。二則過早賣出長線投資，後來見大市未升完，好可能再追，衰起上來一追就摸頂。我有不少朋友在９７年頭沽了樓，在９７年中追番突買多兩間都有，任何市場升到尾段都如爆煙花一樣，好精彩，你見個市一兩個月升兩三成，點忍得住？為免自己沽咗貨再追，就盡量忍住遲啲才沽貨。

　　我所講「炒股要成功，第一要講性格，第二要講性格，第三要講性格」，係指一種「勇於承認錯誤，精於從錯誤中學習」的性格，這是一種「相反性格」，即係和一般人好唔同的性格。從均兒買股票的住績，佢未具備這種性格，太易跟大圍買熱股接火捧，未有炒股成功的性格，都係少炒為妙。最好做投資者，唔好人云亦云，人顛時你唔好跟住去顛，只能在低位入貨，持貨較長，在股市升得太顛時沽貨，或升到咁上下定止賺位，跌穿止賺位就出貨。聽落容易，做起上來一啲都唔易。
陸羽仁