美股都算神奇，特別係隻房利美，呢隻美國最大按揭證券公司在美股開市前公布首季業績，虧損２１．９億美元（１７０．８億港元），令道指期貨在場外跌５０幾點。美股開市後，房利美股價早段跌過７．３％，但後來佢宣布會集資６０億美元（４６８億港元）充實資本，加上監管機構話若佢成功集資，會放鬆其監管規定，房利美股價又急彈８．９％。道指一度跌超過１００點，但最後升番５１點收市，收報１３０２０點。

  　我講了幾天Old rich的智慧，有贊成有反對的意見，我基本上兩種意見都同意。你可能會話：「咁都得？咁縮骨？」因為贊成和反對的角度不同，所以可以兩種意見都同意。

例如網友蛋散股友話：「陸Sir:你近日講買樓，我另有看法。萬科王石說四十歲才買樓，雖然極端，但年輕人應將資源放在事業和知識積累上。香港現今樓價，三成首期要六十到九十萬。能夠儲到這筆錢，都是對自我有紀律約束的人。不會亂消費。但買樓，經紀佣金，厘印，裝修，每月管理費，花錢更多。起不到儲錢的目的，如果投資收租，實質回報少於4%。如果望升值，十年能否再升值一倍，我好有保留。你認為還可升多少？只有準備結婚，生仔的一群人，沒有辦法被迫做房奴。過往買樓，買鋪後，香港經濟相對高速發展，人工上漲快，資產跟升。現在香港，單靠金融。未來香港？你有何看法？」

蛋散話「年輕人應將資源放在事業和知識積累上」，這是我一向對年青人講的大原則，但最重要的「資源」是時間和心力，不一定是俾錢上course，好似上網睇陸羽仁的網誌，就係完全免費（只是講笑！）

你睇咗我講幾日買樓，應該知道我長線唔係對香港樓市好睇好，相反地我認為在成熟經濟樓市只有緩慢增長才合理，只計租金收益，一年少於４％實質回報，計埋可能升值，年平均數也不能太多。所以買香港樓只是一個投資的「笨方法」。我講來講去只是一個三段論，凡人炒股出出入入會得個桔，好多人係凡人，所以好多人炒股最後最知點解都係得個桔，由此推論出叫大家唔好將自住樓沽咗去炒股。

而所謂得得個桔的定義，就係炒咗３、５年，中間贏過又輸過，最後唔輸就偷笑。網友yy太講咗佢０５年無買北京樓買咗港股得個桔的經歷，都幾慘情（http://www.hkheadline.com/blog/reply_blog_express.asp?f=8FCBZ8W59K70017&id=105071），我可以肯定咁講，２０年之後，yy太會發覺兩者的差別更大。至於網友均兒的經歷，更有黑色幽默的味道，佢買親股都衰，好股食少少就放咗，壞股如電盈（００００８）就長揸，大家有無覺得這種狀況似曾相識，佢咪叫做「贏粒糖輸間廠」囉，均兒你唔係例外，係典型，好多散戶好似你咁，不過佢地無講啫，市場上有１００種誘惑，會令你做出「贏粒糖輸間廠」的典型行為，如果沒有散戶的層層白骨，又點襯托得起股市中極少數大戶的仗仗功成。

網友牛腩貓咪問起：「陸sir, 剛剛先睇你個blog內容, 原來『勇於承認錯誤,精於從錯誤中學習』的性格,是一種「相反性格」. 我真是不知道呀! 我以為個個人都自自然然, 會從錯誤中學習. 輪到我不明, 大家不是錯誤中學習, 是如何學習呢?」

陸羽仁的答案係：「大部份人都無學習」。我見到小女兒犯錯，同佢講解吓佢犯錯的原因，佢最典型的答案係「知啦！知啦！」即係叫我唔好再講，佢唔想聽，佢覺得錯咗好淤，唔想面對；我會不嫌其煩咁同佢講，阿爸一世人領略人成功的最大秘訣，就係勇於認錯及從錯誤中學習，好多人都知呢個道理，但唔會做，因為大部人都有ego（自我），克服唔到認錯的無面感覺，所以用各種方法迴避面對錯誤。不幸地，股民唔認真面對自己在股市中犯的錯誤，結果係不斷輸錢。

講咗咁多只係想話，好多人炒咗好耐股，但仍然唔識炒股，攞住大筆錢去炒股時，就係唔知點解得個桔，如果係咁，可能買港樓一年有７％的回報，都好過「得個桔」吧！如果你自信和凡人不同，有超能的意志，能克服恐懼與貪婪，當然是炒股（不是指長線投資）好過買樓啦，港樓如港男一樣，以１０、２０年的角度看，競爭力開始逐步下降了，而港股就吸納了紅色成份，維持一定的競爭力。所以我話買樓好，或者起碼係唔好隨意沽咗自住樓去炒股，其實主要針對兩類人，第一，係大駛的年青人，買樓可以逼佢儲錢，第二，唔識炒股又好喜歡炒的人，咁樣可以令佢最後執番個橙，唔使得個爛桔。這是笨方法，只啱笨人用。

陸羽仁

　　美股急插，道指跌２０６點，一棍就跌落１２８１４點，險守１２８００關口，呢一浪回吐可能試穿１２８００大關。

　　美股似乎唔係俾大陸和香港的跌市影響，因為美股早段還微升，美國市場跌得最急的是金融股，皆因市場憂慮投資銀行的新披露規定會影響其盈利；另外亦有擔心美國通脹升溫，未來美國要加息而非減息。

　　美元要加息的猜測亦令美元急升，在亞洲市歐元兌美元跌至１．５３４３，美元兌日圓升至１０４．８，但油價仍衝高位，上到１２３美元一桶，令金價唔至於跌得太多，報８６８美元一安士。

　　先講股市，幾個市場都係以「無名腫毒」的形式大幅回吐，港股昨日大跌的原因未明，首先排除的原因是跟A股跌，因為香港H股跌得快過A股；一般相信是中國銀行一名研究員的報告倡議人民幣一次性貶值，令到人民幣不交收遠匯急跌，影響了外資的信心；另一「理由」是市場傳聞有兩名中國證監會的前高層被調查，令人擔心有大量A、H股牽連在內。

　　大陸股市急跌的「原因」被認為是平安保險的１０００億元集資大計將會復活；而美國股市大跌的「原因」就是投行的新披露規定。

　　老實講，聽完這些「原因」，我都覺得理由未夠充份，特別話A股跌因為平保集資復活，更加係攞來講，平保集資要阿爺審批，而家無人信阿爺要隊低個市，又點會俾平保上馬大集資？

　　我認為三地股市急跌，原因好簡單，就係近期升得太多太急，一次調整期待已久（英文講long overdue），你睇大陸A股一個星期左右從低位反彈２５％，港股上個月升咗１０％，美股從上月初低位１２３００點升到１３０００點樓上，亦升了６％，特別是美國金融股在次按風暴最壞時間已過的預期下，升得更急，升得多之後，自然等機會調整一下。

　　若然我估計正確，這些只屬「健康調整」，不至於大插，三地自然是大陸的回調幅度較深，上證綜指若守不住３５００點，就要試３３００點；港股應以中等幅度調整，有機試穿２５０００點，但只要美股唔大插，港股都未必會落得太低。至於美股，１２８００點應有支持，若穿１２８００點，下一關１２６００點會好硬，不易跌破。

　　反而美元的走勢值得注意，美元開始出現減息週期完結、未來會加息的預期，令６月２５日再減息的機會急降，若當日唔再減息，起碼確認減息週期完結。歐洲經濟唔好，看來歐元要減息，匯價可能再落，所以歐元兌美元急插，小心美元有一浪反彈，直至６月底確認不再減息為止。所以這一個月好難炒外幣，買入後升少少唔食糊可能會被套住，亦不能盲目期望人民幣會不斷升值，從中央增加香港人民幣交收這些動作，已顯示他正給香港人訊息，唔好一窩蜂換人民幣博升值，小心人民幣會回吐。
陸羽仁

　　美股跌後反彈，沃爾瑪和新聞集團的業務達到市場預期的上限，加上商品股在金價、油價上升時有支持，美股道指升５２點，升幅０．４％，升到１２８６６點。

　　母親節快到，網友sexyphone一段留言，令我感受殊深，佢話：「政府賣地, 係西貢成8千蚊一呎, 我同亞媽講, 嘩好貴, 不過我都想住呢D地方, 亞媽話, "你有機會o架! 我就冇啦, 想住大D地方都冇機會啦, 你讀到書, 又搵到錢, 咪有機會囉" , 老豆亞媽用哂D錢係我身上, 幾十年仲係一家四口住係細屋.... 食完飯, 我返房關上門, 哭了......我已經好努力, 但係想令屋企人生活好d 都做唔到...亞媽呢一句, 唔知點解對我咁有信心, 但係我就更加唔開心, 出o黎做事先知, "讀到書" (佢眼中係u grad), 唔係一定搵到錢...我都唔知我係亞媽有生之年, 可以俾到幾多o野佢....」

　　網友們見sexyphone咁激動，好言安慰，sexyphone再留言：「 yy太, 袋鼠, soho, flower姐：thx, 我都明白你地意思, 好多嘢都唔駛好多錢都可以令身邊o既人開心, 母親節我地會簡簡單單食個dinner。可能係亞媽簡單咁講一句, 反而令我覺得佢都想生活好d..... 但係無機會啦..... (yy太, 我細個住木屋, 有兩層, 細個試過瞓瞓吓喺二樓碌咗落一樓, 起咗個大瘤, .....細個食飯一家人用一張2x2.5呎細摺枱食, 細佬一手按落張細摺枱, 反起哂d碗碟跌哂落地下, 細佬個人跟住跌落地, 個頭流好多血, 結果連咗5針..... 佢好頑皮,又試個差d俾附近貨車車死.....老豆其實係真正男子漢, 點辛苦都最後供上樓, 又供我同細佬入大學)」

「諗返起, 只係有少少upset，自己做唔到太多...我都想俾心機工作, ....., 我而家份工好stable, 我相信出面o既人都會想做我份工, 人工、 bonus、升職機會都好ok, 但係做o野我就一d興趣都冇, 又發揮唔到.....想轉field, 又冇其他experience, 所以努力進修.....好complicated....takes time and effort。投資, 可能係我唯一興趣同出路, 好一句十年人事幾翻新, 我會努力!」

Sexyphone，你係後生仔，經驗未夠，仲未完全明白老人家的心態，聽阿媽o既話有少少捉錯用神，等我呢個過來人話你知。你阿媽講到你喊嗰句話，講「你有機會o架! 我就冇啦, 想住大D地方都冇機會啦, 你讀到書, 又搵到錢, 咪有機會囉" 」佢唔係真係話佢好想住大屋，係講嚟安慰你，希望你唔好因為暫時住唔到大屋而唔開心啫，同佢想住乜嘢屋，關係唔大。

古人有句話：「樹欲靜而風不息，子欲養而親不在」，你唔好覺得呢兩句話老土，你唔等到你阿爸阿媽過哂身，加埋自己做咗人地阿爸阿媽，你都唔會真正真白呢兩句話的意思。我剛出來做嘢，每次出埠公幹，回港都會打電話俾阿爸阿媽報平安，順便講埋幾時回家食飯。而家無需要再打了，有時公幹回港，在機場經過公共電話旁邊，一絲絲失落感就湧上心頭，才記起當年連手提電話也未有，係用公共電話打番屋企，通訊科技進步了，但和爸媽的距離，已經變成無限咁遠。

如果講到回報爸媽，錢根本唔係關鍵，以為錢可以搞得掂就大錯特錯，錢唔係萬能o既（當然好無錢又真係萬萬不能，你一隻死狗咁，失咗業，日日同爸媽度水，佢地當然唔會開心），你發咗達，買間大屋俾阿爸阿媽，跟住一個月都唔返屋企一次，佢肯定更唔開心。佢地想見到仔女，想同仔女一齊，想見到佢地成功，所以你返去見佢多啲，唔好自怨自艾，令佢覺得你好成功，咁就已經１００分o架啦！百分之九十九爸媽的願望，就是如此簡單，講起上來好易滿足，但偏偏好多仔女就係滿足唔到，返多兩次屋企食飯都唔想，成日想出街同班friend玩。爸媽經常見你唔到，都幾傷心o架。

我阿媽覺得飲湯好重要，次次用大湯碗裝一大碗俾我飲，當時真係唔想飲咁多。不過１０年之後，阿媽變成癡呆老人，將成包毫子倒落去煲湯，那時才驀然驚覺，想飲阿媽一碗湯都唔係咁易啦！

講番Sexyphone你自己，大學畢業，份工又穩定，在爸媽眼中根本就係佢地想像到最理想的結果，真係唔好俾佢覺得你唔鐘意份工，為乜要令老人家擔心？佢地見到你時，你開開心心，佢地好易感染到你的快樂，見到個仔女工作生活愉快，家庭美滿，老人家就別無他求了，大屋？根本唔係佢哋杯茶。

至於你自己想轉行，若立定決心，想轉早轉，工作也好，投資也好，時間係最大的本錢，趁青春打好基礎，否則很難有所成。

對不起，講了太多和投資無關的事，最後都講少少啦。網友ho話：「陸sir:

你答牛腩兄個句："當你自覺睇市好準，天下無敵時，就要小心，短期內和自己看法相反的走勢正撲過來。"真係至理明言。 我昨晚回應yy太的買樓故事時, 好想加一句"塞翁失馬, 焉知非福, 塞翁得馬, 焉知非禍", 不過又驚好似好說教, 經歷愈多, 愈明白這句說話的真諦, 古人真係有智慧! 」

Ho又講：「好似舊年十月尾時，個個以為自已勁過畢菲特, 陸sir的勸告都充耳不聞, 不知熊為何物, 直到股災發生, 終於讓我們這群"股市新生代"知道股票一跌可以好大鑊, 雖然都交唔少學費, 但好慶幸這個預演來得早, 亦去得快, 大家尚有翻身機會。」

正如我早前同sexyphone所講，你地係後生仔，經驗未夠，我講啲嘢，我自己見過試過領過嘢，才知道世界是這樣。１９７３年我１０歲８歲時，就見住股市由１７００點跌落１００幾點，見到阿爸買股中招，知道股票可以變廢紙（係股票，唔係窩輪，窩輪就更易啦），１９７３年頭，香港環頭環尾充滿股神，結果咪．．．我自己買股，都試過中到唔中，連贏８個月，大贏特贏，有天下無敵的感覺，跟住就．．．

呢個世界，好多嘢都不斷循環，老豆養仔、仔養仔；美國發完達，戰後到日本發，後來又到亞洲四小龍，而家又到中國、印度，世界輪流轉，繁榮有時，衰退有時，股市樓市亦係一樣，要睇住大循環，小循環嚟做人，試多幾次，衰多幾次，你地就識o架啦。

陸羽仁

　　今日的股市真係好壞消息大鬥法，好消息係美股升，滙豐（００００５）美國業績優於預期；而壞消息就係大陸４月通脹奇高，人民銀行加存款預備金率，而四川大地震死亡人數８７００人，保險股、川渝股都會受壓。

　　美股昨日大升，皆因零售股有優於預期的業績，而最大債保商MBIA話自己有充足資金無需再集資，利好零售股和金融股，道指升１３０點，升幅１％，升番上１２８７６點。香港假前道指係１２８６６點，後來一日跌一日升番，差不多原地踏步，對香港屬中性。

滙豐的消息較正面，集團旗下的美國滙豐融資首季業績比市場預期為佳，美國滙豐首季只需為次按貸款減值３２億美元（２５０億港元），而滙豐美國仍能保持盈利，不致見紅，好過市場預計，由於滙豐亞太區業務強勁，只要美國唔好太衰，首季整體業績就容易有良好增長。滙豐在美國預託證券收市價折合為１３５．１５元，比香港升２．２％。

若無大陸因素，受滙豐消息刺激，港股今日應有可觀反彈，不過大陸的消息亦唔係幾靚仔，四川大地震，死亡人數近萬，上海交易所以未能聯絡四川和重慶公司負責人為理由，叫４５間川、渝公司停牌，直至它們發通告解釋地震影響為止，但這些公司如有在香港上市，今日仍然繼續買賣，上交所此舉明顯係怕四川重慶股大跌，所以搵個藉口跌佢地牌而矣。估計地震對四川或重慶的公路或廠房受損的公司，影響較大。除了四川和重慶公司外，財險這類保險公司恐會被人插一插，而交通、鐵路建設和水泥股會受惠。

不過地震影響只屬短期，大陸真正利淡的消息是通脹高企和人行加存款預備金，內地４月份通脹高達８．５％，近１２年高位，今年２月雪災高峰時是８．７％，３月輕微回落到８．３％，但４月又再上，去番８．５％，情況有點失控。

奇就奇在內地股市昨天對此數字反應不大，昨日數據公布後，市場反而穩定下來，上證綜指收報３６２６點，微升１３點。不過人行在收市後宣布加存款準備金率０．５％，至１６．５％，這是央行今年第４次加存款準備金率，要求銀行提高存款準備金，即是減少它們能借錢出街的比例，變相收緊銀根，截止今年３月底的數字，單是加準備金已有凍結資金２１００億元人民幣的效果。

高人話，大約兩個月前，阿爺仍然估計到４月時，通脹有機會顯著回落（我估起碼係見到６％或以下，才叫「顯著」），所以溫總理在人大開會期間，才會作出全年通脹４．８％的估計，但現時４月通脹再上高位，未有回落之勢，形勢都幾嚴峻。現在再來一次大地震，災後重建，應會推高水泥等建材價格，亦不利控制通脹。

　　面對內地的高通脹，對內地股市不容太樂觀，估計銀根仍會大力收緊，對內房股不利，至於被控制價格的行業，如成品油和電力等，就要望天打掛，看阿爺有幾多補貼了。


陸羽仁

　　美股昨日上落波動１１次，好壞消息紛呈，商務部公布零售銷售數據，扣除汽車類後有０．５％增長，遠佳於市場預期，美國可能進入停止減息的週期，但沃爾瑪的盈利預測又向下調整，加深市場疑慮，美股道指一度跌穿１２８００點關口，收市跌４４點，收報１２８３２點，看來１２８００點都有頗大支持，一跌穿好快就上番，目前正在１２８００點的上下水平整固。

早幾日講Old rich的投資教誨，網友均兒有一個回應，我好想再討論一下，佢話：「再次多謝陸si教誨，我知我係較蠢那類型，甚至陸sir你教咗我咁耐，我仍然蒙查查，就算你診我的病話係炒熱門股，但我都唔知點改善，係蠢得沒藥醫那種。」

「我13蚊買電盈衰咗，不知悔改，又在48元買中移動，跟住27元斬咗；0.9毫去買奧瑪仕，依家得幾仙，十合一後都沒9毫，輸左9成幾，重輸埋941依家的升幅，嘿嘿!真係一隻蠢極的大蠢豬。」

「其實好似我咁蠢的人，根本就係適合買樓那種，我都唔適合炒股，我好贊成陸sir對買樓的恴見，唔同意蛋散股友的四十歲才買樓理論.，我有朋友好年輕做生意，做做吓生意失敗咗，依家四十幾歲了，學佢話齋，無瓦遮頭，這時他感到好悲哀，成日話以前樓價咁平時唔識得買幾層樓，依家樓價咁貴真係買唔落手。」

「我未結婚時就買咗政府居屋自供，結婚時就想換大屋，結果換吓換吓變成炒樓，當時都好過癮,成日唔返工周圍睇樓，好彩負資產來到時，我只係有一個未賣出的單位係手，出租後幾乎唔使點供，之後享盡樓價升時那種喜悅。因為我炒過樓，喺02、03年又俾我趁勢以好平的價錢買咗一個居屋同一個商舖，依家吃盡升幅，那種滿足感，真係好enjoy。所以要趁後生買樓，人生第一投資就係要為自己建立一個幸福的小窩為首要，唔係老時會覺得好失敗。」

陸羽仁特別想再講均兒的個案，佢話自己買股時係蠢到無藥醫，點解佢「咁蠢o既人」，買樓又唔似買股咁差呢？

　　首先講入市時機。股民買股票會嚴選入市時機，但不幸地，現實中大部份人挑選的時機都唔係好時機，股市愈熱，股民感覺愈好，愈多新股民入市，到股市熱爆時，就係大量平日唔買股的人入市買股的時候，因為佢地「聽人講」買股票賺了大錢（又係「聽人講」），抱著唔買就笨的心態，投入股海；本來已有買股者，更會調動大筆資金入市。大家可能唔覺，股市愈熱，就愈多人買報紙睇股經搵貼士，財經報紙大銷特銷，香港兩份財經報紙，都係喺股災年創刊，信報在１９７３年創刊，經仔日報在１９８７年創刊，結果兩年都有股災，呢個唔係巧合，係有內在原因，股市大旺，對財經報刊需求熱爆，才有財經報紙出世。

　　我同啲中環茶友講笑，幸好去年只是有財經週刊面世，無新財經報紙，否則一定有大股災，所以邊個老闆想搞份財經報紙時，最好忍忍手，先去沽吓期指，一定有斬獲，賺番筆等個市跌到殘才搞財經報都未遲。講番轉頭，好多人平時唔買股，等到股市大熱才去買，無論買好股、壞股，都好易接火捧。Old rich的智慧是，長線投資，等個市靜時才去買，唔好等個市旺時去搶。若均兒不是在旺市買股，至少可以避過在科網潮買電盈，和在濠賭股潮買奧瑪仕。呢個故事教訓我地，散戶揀買股時機，好易揀親都錯。

　　買樓唔同，好多人唔係揀時機，而係睇自己的需要，可能係打工之後開始有個錢，想買間樓同屋企人搬開住，可能係結婚一定要買樓，至少有一半人買樓自住不講時機，咁反而好，咁就唔會在最旺時才入市。

　　再講出貨時機。散戶買樓，特別是買樓自住者，多數長揸不放，咁就可以享受資產長線隨經濟增長而升值的好處。買樓自住者要捕捉市況而放樓，改為租屋住，感覺好煩，大部份人唔會咁做，反而幫咗你，起碼逼你坐貨１０年８載。假設你好似股神巴菲特咁叻，在１元多買了中石油，佢升到３、４元時，絕大部份人會放咗，會覺得升咗兩倍，賺夠仲唔走？沽完大市真係回，隻股真係跌，你更加覺得自己天下無敵，睇市奇準，四圍同人講，結果就無買番。

買樓坐貨１０年好易，買股坐貨１０年好難，升市時會沽，跌市又會沽。好似均兒咁，在科網潮貴買４８元的中移動，跌到２７元斬咗，你唔可以話佢沽得好差，因為中移動後來跌到１０幾元，問題是均兒沒有買番，卻改行去買奧瑪仕，輸上加輸。如果佢在９７年樓市高峰時買咗問太古城海景樓自住，後來樓市急跌，樓價無咗一半有多，但如果佢供得起，好可能會死坐落佢，無咁易在低位沽貨。更加唔會低沽太古城海景樓，走去換間佐敦道縮水商場舖，買樓唔會咁，買股會咁，這裏又涉及第三個問題，好樓壞樓較易分，好股壞股難分。

最後想講炒樓易知，炒股難辨。均兒話自己炒過樓，幸好在跌市前放了大部份，所以唔死得。我估除了她有運外，係因為炒樓者有自知之明，手揸３、４間樓，係人都知道自己係炒樓，所以較易在高位減持，唔會死坐貴貨。但好奇怪，用同樣的錢在旺市買了大批股票，好多人都會話自己係「投資」，唔係「投機」，炒股而不自知，想長揸，咁就死梗。

我唔係想叫大家一定要去買樓，香港經濟已趨成熟，買樓無過去咁好，我只想話俾大家聽，這些例子告訴我們，大部份人買股的手法，係會送佢上路，唔係送佢到彼岸。簡單到在市靜時平買好股長揸，好多人都做唔到。

陸羽仁

美國股市盤整後又反彈，但臨近尾市時升幅縮細。美股開市前公佈的通脹升幅和緩，消除了市場對高通脹可能壓抑消費開支的擔憂，推動金融股和消費股上揚。第二大按揭證券公司房地美的虧損少於預期，也減少了市場對信貸緊縮的憂慮。道指由早段過１００點的升幅，到尾市收窄到升６６點，升幅０．５％，升到１２８９８點。

在電視看到溫總理和地震孤兒的對話，令人落淚，這麼年幼的孩子就失去了雙親，她們還有漫長的人生道路要走，誰來教養她們，誰去給她們家庭的愛？政府可以減輕傷痛，但是不能取代父母啊！中國人壽（２６２８）宣布，國壽慈善基金會負責地震遺孤的養育費用，直至１８歲為止，若能為他們尋找到寄養家庭，讓他們在正常家庭環境中長大，可能更佳。

談到教養小孩，看到網友均兒為女兒買A５０中國基金（０２８２３）的事，更覺要在孩子買股票之初，教導他們正確的觀念，否則唔覺意養成他們一種爛炒的個性，咁就唔買股好過買股了。

均兒想個女學習投資，就俾８０００元同佢買A５０基金，昨日的情況係咁：「我今日幫個女買2823，見臨收市2823都要掃上去。我個女今日打咗兩次電話問股票升唔升，我話升咗２毫，即今日賺100元，哈！個女問一個月會唔會賺1000元哦？我反而唔知點才能正確教個女，佢咁細個買股票到底對不對？」

問題唔係個女細去買股票好唔好，而係能否自細教佢對投資有正確觀念。若果教錯佢，愈早做就愈壞；如果教啱佢，就愈早做愈好。我而家唔太希望你個女買股太快贏太多錢，否則佢覺得賭股票賺錢太易，大個一定變成一個爛賭鬼。

均兒個女問啲問題唔係無道理，用８０００元買股票，一日就賺１００元，一個月賺１０００元有乜咁出奇，佢會咁計數，賺１０日咪有１０００元囉。所以你第一個要教佢的概念，係「股票可升可跌」，唔係一定日日升，升完會跌。如果一個月賺１０００元，個個月係咁，１年賺１２０００元，以８０００元本金計，即係升咗１．５倍，你要話俾佢聽，邊有咁易賺咁多錢，若果咁易，就無人去打工，個個去炒股啦！

你要教佢第二個概念係「長線投資」，乜嘢叫長線，無３、５年唔叫長線，你細路仔大把青春，更加可揸１０年、２０年。股票長線升抑或跌，主要睇間公司賺唔賺錢，公司年年賺錢，年年派息，隻股票自然跟住賺錢幅度升，賺得多，升得多，公司盈利增力２０％，理論上股價亦可以升咁多，唔好期望公司股價升得快過盈利增長好多。若果出現盈利升得少，股價升得多的情況，呢啲叫做「乾炒牛河」，升得無道理，短期就得，長期無可能。

　　A５０係一隻指數基金，揸住５０隻大陸大公司的股票，你買呢隻基金，等如投資咗５０隻大陸股票，隻基金升唔升，關鍵係睇這５０間大陸公司賺唔賺錢，睇大陸經濟好唔好。所以想隻股升，就要望大陸經濟好，望呢５０間公司做得好。所以細路仔買呢隻基金揸２０年，係望大陸經濟快高長大，一年經濟增長８％，呢５０間公司的盈利增長１０％以上，股價和盈利增長同步，咁就有運行。以「７２律」計，若股價一年升１０％，７．２年就可以番一番，A５０現價１８．３４元，７．２年後會升到３６．７元，１４．４年後會升到７３．４元，２１．６年後會升到１４６．７元。即係今日放低８０００元買股，２１．６年後會變成　６．４萬元。若果呢５０問公司的盈利平均年增長多過１０％，股價的升幅將會更大。小朋友將來錢多點，投入的本金多一點，長線的收益就大一點，呢啲叫做「錢生錢」，但小朋友有多餘錢食哂使哂，就無法錢生錢了。

　　第三個概念叫「低買高沽」，唔識高沽唔緊要，最緊要識低買，唔好貴買。A５０現價只能說不平不貴，不能說太便宜，３年前大陸股市未郁，上證綜指１０００點時，A５０只是６、７元一股（如今已１拆５，即當日未分拆前３０、３５元一股），如今上證綜指３６００點，A５０是１８．３４元一股，但最高峰去過２８．９元，現價中中地，由於不是買得太低，有下跌風險。記住教細路買股，先要計跌，才計升，股價跌落去自己承受得了，才好買股。要告訴孩子１８元買A５０，跌到８、９元都唔奇，但長線可以上番去，唔好一買股就諗住會發達，發達之前可能先仆一仆先。

　　長揸股票一般唔沽，但若果股市升得太顛時，沽少少都無妨，用上面的計法，假設A５０背後５０間公司的平均年盈利增長只有１０％，但股市狂炒，A５０升到３６元，甚至７３元，即係話公司股價提前反映７年、甚至１４年的盈利表現，當然可以沽貨。（記住上面的數字只屬假設，若公司盈利以２０％、甚至３０％的平均速度增長，又是另一堆數字）。背後的道理是公司股價升得太顛，大大脫離基本因素反映的合理股價時，沽貨亦無壞。２０００年時的電盈（００００８），就出現咁情況，你點計都計唔出佢值３０００億市值，唯一合理的行動係沽。

　　第四個概念叫「股價不為真」，股票市場每天出現的股價，唔好當真，十分虛妄，係一群瘋狂的人用瘋狂的方法定出來，股價唔係太昻貴，就係太便宜，如一隻百厭小狗，主人拖住佢行，但佢永無聽主人話慢慢行，唔係走得太快，就係走得太慢，所以長線投資者不用天天看股價，要看的只是經濟大勢和公司的基本因素。

　　小朋友最重要的事情是學習和遊戲，不是炒股。家長要把投資當作遊戲，教導他們正確的投資觀念，當可一生受用。

陸羽仁

　　美股又升，由於晶片全球需求上升，刺激晶片股價，而油股相對油價亦顯得便宜，油股又升，道指全日向上，升９４點，升幅０．７％，升上１２９９２點，而標普５００指數升上１４２３點，創出４個月的高位，看來道指亦將要衝高。

　　有網友提到買「牛熊同體」的問題（即同時買牛證及熊證），問係唔係等如買「馬鞍式期權組合」，當中涉及一些投機的概念，值得一談。

　　衍生工具的源起，是作為實貨生產者、交易者、投資者的對沖工具，麵包商人預期小麥會漲價，令麵粉價升，所以事先買入小麥期貨，以對沖將來麵粉價升推高成本的風險。但後來搞吓搞吓，搞出金融工具的期貨、期權，例如指數期貨，好多人只是單邊買入，炒作一個方向，完全沒有對沖的意義，變成純粹的投機。

　　我經常講，投機唔緊要，要知道自己在投機，知道投機等如在賭博，用正確的方法去投機，並且控制注碼，小注怡情，並無大壞，你去澳門入賭場，一般人唔會攞全副身家５萬、１０萬去賭一舖，但如果你唔知自己係賭，攞全副身家買窩輪，好容易一舖賭身家。

例如講睇市，好多人賭一個方向，估個市升定跌，贏時全贏，輸者輸清，所以熱切討論買牛仔定買熊仔（即買牛證及熊證），考眼光，賭一舖。

你叫我估今個月大市到期指結算前的走向，我會咁估，現時係大波動的前夕格局，呢個月唔似會好牛皮咁完結，意味著指數不是停在現水平完結，可能有大波動在後頭，唔係大升就係大跌。一般人的反應會話，咁講咗等如無講，咁即係升定跌啫？問呢個問題的人唔係專業炒家，炒家首先要決定有無波動，無波動，好多嘢都無得炒，有波動，單係波幅已經可以炒（炒波幅方法容後談）。

但你再追問我點估呢個月大市方向，我會估向上突破，命中機會約７０％，即係有３０％機會估錯，估錯時大市下挫或唔升。如果係咁，假如我係投機者，除咗全線睇好買認購期權之外，又可唔可以同時買番少少認沽期權來對沖風險呢？

假設我本來想買１０張２６０００點的認購期權，期權金是２９８點一張（每點５０元），即係話結算時，期指結算價要升到２６２９８點（２６０００點加２９８點），才可收回成本，要升到呢個水位以上，才可以有錢賺。但我都係相信自己只有７０％機會命中，另外３０％機會錯，可能牛皮市，即使有升都不能升到２６２９８點咁高，或者係跌市，咁又可唔可以同時買少少認沽期權來對沖風險呢？如果我買番２張２５０００點的認沽期權，期權金３５２點，即係話期指結算時，期指插到２４６４８點以下，這些認沽期權就有得賺，可以補番少少買認購期權的損失。如果把呢兩張買保險的認沽期權期權金加起來，共付７０４點，將呢筆「保險金」計入原先買認購期權的成本內，１０張認購期權，等如每張多付７０．４點的保險金，加埋原先每張２９８點的期權金，加埋保險費的成本是３６８．４點，即係期指在２６３６８．４點樓上結算，才可以賺錢。假設大市走勢愈來愈對辦，朝向我估的向好走勢，我認為最後估中的機會上升到９０％，那時可以沽出作對沖的２張認沽期權，收番少少渣，減少對沖成本。

買輪的原理和買期權一樣，所以話「牛熊同體」，同時買牛輪和熊輪，不一定係等量，除了買自己估計走勢的窩輪外，亦可以買少少自己估的走勢相反的窩輪，作為對沖。記住這些衍生工具時間值天天耗損，睇一段一唔啱方向，要馬上斬倉走人。

另一個可能係純炒波動，不炒方向，以期權為例，上述提到的「馬鞍式期權組合」，就係同時買入同一月份相同行使價的認購期權和認沽期權，例如你同時買入５月結算２５２００點的認購期權和認沽期權，認購期權的期權金是７０４點，認沽期權的期權金是４２２點，同時買一份認購一份認沽合共付出１１２６點，你要賭期指將有大波動，一係大幅向上走，一係大幅向下走，向上期指結算價要在２６３２６點以上（２５２００點加１１２６點），才有錢賺。向下期指結算價要在２４０７４點以下（２５２００點減１１２６點），才有錢賺。

另有一個類似的方法是買入「勒束式組合」，即買入相同月份但較高行使價的認購期權及較低行使價認沽期權。它和馬鞍式組合不同之處，它不是買入同一認購價的認購和認沽，是買入兩邊都價外的期權，例如買入２６０００點行使價的認購期權，期權金是２９８點，同時買入２５０００點的認沽期權，期權金係３５２點，兩邊共付出６５０點的期權金，即係話如果期指升，結算時要升到２６６５０點樓上（２６０００點加６５０點），才有錢賺，如果跌，要跌到２４３５０點樓下，才有錢賺。

買入「馬鞍式期權組合」或「勒束式期權組合」，亦都係牛熊同體，而且不賭走勢，只賭波幅，買入這些組合對大市走勢的看法中性，但估計有大波幅，所以才這樣下注，若果大市波幅不如他的想像，以上述的例子，期指在２４３５０點至２６６５０點中間結算，買入勒束式組合就會輸清。所以倒過來說，如果你賭波動不大，就要做沽家，沽出馬鞍式或勒束式組合。

你睇完我講上面一大堆東西，或者睇唔明，或者覺得自己不會炒得咁複雜，但我想話你知，窩輪和期權的原理一樣，如果你唔明期權的運作，亦都唔會明窩輪的運作，咁樣最好唔好炒輪，否則你買窩輪睇錯方向固然會輸錢，睇中方向亦贏唔到錢，皆因你未明它的運作原理。

另外，炒作大市方向，只係眾多炒作方式的一種，你亦可以炒方向之餘買保險，亦可以不炒方向，只炒有波動或無波動。炒作世界，要求極高水平的操作，普通人無咁既時間和智力，貿然參與炒作，交學費者多，好難贏錢。

陸羽仁

我寫「炒波幅」的網誌，真正目的不是想教大家去炒波幅，相反地，係想嚇怕大家，讓大家唔好亂咁去炒波幅，至少唔好覺得炒波幅好易贏，其實大部份人想追逐大市的波幅，炒來炒去，經常進出，好易得個桔，其至手上個桔會愈玩愈細。

我在文中說「炒波幅方法容後談」，其實文中的後段已談了，講了一種專業的方法，我可以再總結一下，股市有方向，升或跌，你可以買方向；但股市亦有波幅，經常上上落落，你可以不買方向買波幅，甚麼叫買波幅，就係賭大市的波幅大或波幅細，你估波幅大，就可以如上文那樣，買入一個「馬鞍式期權組合」，或買入一個「勒束式期權組合」，因為估計大市會大幅向上或向下波動，當最後如你所願，大幅波動，即使計入買入雙邊期權的成本，你還有錢賺。倒過來，如果估計大市波動較細，就應該反過來做沽家，沽出「馬鞍式期權組合」，或沽出「勒束式期權組合」，因為估計大市只會輕微波動，例如在１０００點的水位上下行走，只要最後波動不超出你上下沽期權的範圍，就可以上下期權金都殺哂。

我估計我寫這些東西，有一半以上的網友睇唔明，我寫來嚇吓大家，睇唔明就唔好亂做。你可能話，從無買期權，你唔使嚇我。我就話，你同時買入價外的牛證和價外的熊證，就等如買入一個勒束式的期權組合，如果你唔怕佢o既原理，你又點炒呢？

窩輪等如期權，但期權不但可以做買家，也可以做沽家（沽家有無限風險，散戶不應輕易嘗試），但散戶在窩輪交易中只可以做買家，沽家只可以是發行窩輪的輪商，唔好以為你買了認沽輪就做咗窩輪沽家，你只是買入一個認沽期權而矣，仍然是買家。

我見不少網友話佢牛熊同體，即是同時買入認購輪和認沽輪，我就話咁樣等如買入「馬鞍式期權」或「勒束式期權」，如上面所講，做這些期權的買家，你應該係估計大市會大波動，一係大波動向上，一係大波動向下，如果唔係咁，你好難賺錢。

但現實中我覺得散戶話做牛熊同體，背後原因可能只係睇唔準大市的方向，唔知大市想升定想跌，又唔知佢波幅大細，只係唔知佢想點，所以同時買牛證同熊證，並唔係估佢有大波幅才去買；不明原理去買衍生工具，胡亂去賭，短線可能贏可能輸，但長線必輸。為何短線可能贏？若果踫啱（不是散戶估中）真係有大波幅，同時買牛熊證就會贏，這種叫做「棍中」；為何長線必輸，你都唔係用理性的態度去炒，長線點可以鬥得贏發行商？俾你贏一次，兩次，最後你都會輸番哂。

當然散戶也可以話，我唔係賭得咁高章，只係炒吓上落，同時買入牛證和熊證，股市跌先沽熊證，到升番又沽牛證，賺少少差價而矣。但窩輪和期權都有時間值，少少差價都唔易賺，反應一唔夠快，就會錯過沽貨時機，唔係咁易兩邊賺，衰起上來可以兩邊都沽唔切。作為窩輪買家，第一好難長揸（除非做對沖），第二若買入後大市發展唔符合原先所作的理性假設，就要馬上離場。用上面的例子，同時買入價外的牛證和熊證，等如買入勒束式期權，賭緊有大波幅，如果過十日八日大市仍然無乜波動，唔係太對路，就要馬上清倉離場。

若果你矇查查同時揸入牛證和熊證，原因只是你不明大市走向，都月底大市仍然唔上唔落，牛牛皮皮，狀況和你原先買入的狀況接近，你兩邊都無沽，同時可能沒有太多危險的感覺，你根本唔知道牛皮市就係殺死勒束式期權的最差市況！呢啲就叫做唔識炒就亂炒啦，窩輪有時間值，期近結算的窩輪時間值減值的感覺愈快，你唔覺意坐佢十日、八日，可能已唔見２０、３０％，你更加唔想走，最後就可能輸清收場。

窩輪如期權，背後的理論好深奧，你唔明最好少賭。若然想再賭，用一個「結果決定」的方式檢討一下，過去炒窩炒咁耐，唔理你用乜方法乜理念，先計一計累積有無賺錢，如果累積有賺，可以繼續炒，如果累積要輸錢，證明你未到家，就少賭為妙。低價買入好股，唔揸長都揸佢三、幾個月，可能較易贏錢也。

陸羽仁

我相信大部份在股市短炒的朋友，都在捕捉大市或個別股票的短波幅，希望走一轉，賺點錢。

我經常話炒波幅難賺錢，早兩日的命題是「你對炒作的工具理解咁少，點可以利用佢嚟賺錢呢？」你唔了解窩輪背後期權運作的原理，的確好難炒輪賺錢。

今日再講另一個題材：對手，對手太強時，你好難賺錢。你唔知你炒緊波幅時，好多時同緊大戶、大鱷做對手，你當然輸多贏少啦，因為大戶就係製造這些短線波幅來搵食，你入去想搵嘢食，自己就變成人地的食物。

賭錢也好，賭股票也好，賭任何嘢輸錢，輸兩樣嘢，第一輸抽水，如果開賭檔者抽水，呢個抽水者一定贏，四個人在一間士多租枱打麻雀，士多抽水，士多永遠贏。第二輸對手，據職業賭徒統計，在拉斯維加斯賭場的賭枱，七個人在同一張枱賭百家樂，大約有２個係職業賭徒，２個係半職業，仲有３個係遊客，對手有強弱，在呢個環境，當然多數係遊客輸。

以賭馬為例，以前先由政府抽稅和馬會抽水，兩者先抽去３０％（而家政府改為抽馬會利得稅，複雜少少），餘下的７０％才是彩池，即係未賭先輸３０％抽水，然後賭客中有大量職業賭博集團在香港馬場搵食，結果是散戶賭客和職業集團爭逐餘下７０％的彩池，等如細路仔同空手道黑帶五段打交，結果可想而知，職業集團在被人抽水３０％的前題下仍能贏錢，散戶賭客的處理當然惡劣到極。

股市抽水不多，印花稅和經紀佣都有限，賭股票主要輸對手，股市對手超強，全地球最高智慧的生物都集中在股市內，你去炒波幅，就係同佢地做對手。

網友均兒提到她和大陸妹妹炒A股的經驗，就是一個活生生的例子。均兒咁話：「人的運氣可遇不可求，即話貪心求勝多數輸收埸。（去年）我自己有一個預感，估人民幣會升值，如果當時我存定期一年好似係4.27厘，即一年20萬有8仟幾元利息，加上升值，一年的回報真係好和味。但係我貪心，心想放喺銀行不如買地A股，幾年后又可以再翻倍哦。跟住就向鄉下個妹妹學大智慧，又飛回去借咗鄉下個哥哥的戶口，分散買左三隻A股，中國人壽601628平均價係56元（人民幣，下同），佔60%，中鐵601390平均價10.6元，佔30%，廣深鐵路601333平均價9元，佔１0%。當時我覺得組合好靚，10%廣深用來短炒，佢平時好呆，但正值過年前春運期，期望佢炒一波，結果美夢好快變惡夢，春運碰上大雪災，我係大陸股市5000點時買落的A股，好像吃咗瀉藥，一瀉不止。其實我個妹妹炒波段好叻，破咗5000點佢叫我止蝕，我係都唔制，重同佢講道理，話我要長線，好像巴菲特咁。我妹罵我神經病，破咗4000時，我個妹日日打電話來吵，我一於泰山壓頂不彎腰，不理她。結果還是不停的跌，此時己跌到我心慌慌。」

「其實我不是很緊，相信最多守返兩年又可以見返家鄉，但鄉下人唔同，話我回去炒股票輸大錢。我個妹愛面子又唔抵得，日日吵到我頭痛，話現在一定是底部了叫我回去補貨，把成本拉低，於是上個月八號風球那天我匯了二萬元回去，但我叫個妹買招商銀行。這次好好彩，那個星期一30元邊買到招銀，第二日即刻降印花稅，我幾開心呀。係QQ見到妹，我重未開口，佢即刻話：我放了，32.5元放了。我當時哦到出唔到聲，唉！佢話有大小非，會再跌，我叫佢再跌也買招銀，結果她又在34元買，32元放，這次波幅輸咗，跟住又系31元多買入，話這次不會輸哦，因為這次我話由佢做主，費事佢來吵我。」

「炒波段30元買32元放，贏。34元買32元放，輸。再31.5買以後未知。如果30元買唔放依家都係32元。想返如果當時存人民幣唔知幾好，或者喺珠海買層樓重好過，但喺人身歷其境時，你根本唔知以後形勢變化會點，人係沒早知，如果有早知，早已富可敵國了。」

均兒和佢個妹係兩種典型，均兒高位買貨死揸，佢個妹妹出出入入炒波幅，兩個炒股都有不同的死法。以均兒的例子，高位買，急插唔止蝕，會輸到入肉，長線投資者唔應該喺高位買貨，倒轉來講，喺高位買貨唔可以話自己係長線投資者死揸唔放。

不過均兒的妹妹更是典型中的典型，這是最爛炒的型態，也是經常炒作散戶中的最大族群，他們自以為是老手，短買短放，出出入入，時贏時輸，花了半生時間在股市，叻少少啲一場白做，無乜贏輸，差少少的經常出血，但輸極都唔怕。這種散戶只有在大升市時才能賺錢，好似去年９月、１０月的市況，由於股市急促向上，散戶盲目入市短炒都經常有水執，所以這種市況，也是散戶最「牛」的時候。但你要問，若散戶日日贏錢，咁邊個輸錢呢？

正如我所謂，股市有大戶，他們是散戶的對手，香港有外資，大陸也有大戶，傳說大陸有間大保險公司，預知宏調就快殺到，在大陸股市５０００點、６０００點時做了「空軍一號」，大手沽貨，最後獲鉅利，當大陸散戶大買特買時，就係同呢類空軍一號對賭，大陸的市場最受政策影響，大戶掌政策走向，財雄勢大，散戶和他們賭，結果可想而知。散戶平時炒波幅，炒上落，每次俾大戶抽少少水，積少成多，計埋已經輸唔少。到股市大升時，散戶博命落注，更是一舖俾大戶抽大水，輸身家。

你想炒股賺錢，就要照吓鏡，睇吓自己有無咁o既智慧和EQ，唔係去打贏大戶，而係跟佢車邊，殘殺其他散戶，食番少少餸頭餸尾。

陸羽仁

美股跌完再急跌，昨日因為聯儲局公布早前議息會議紀錄，顯示聯儲局不會再減息，加上油價再急升，令人擔心通脹上升，影響經濟增長，道指再急跌２２７點，跌幅１．８％，收報１２６０１點，險守１２６００點大關，看來港股又要先捱一捱沽了。

我早兩日講到，「你想炒股賺錢，就要照吓鏡，睇吓自己有無咁o既智慧和EQ，唔係去打贏大戶，而係跟佢車邊，殘殺其他散戶，食番少少餸頭餸尾。」
  
呢句說話引起不少迴嚮，經紀張炒股三十年，都算有啲斬獲，佢話自己贏錢時經常講，「睇吓我幾掂，連大戶都砌低呀！」直至到睇完我篇文，先知道自己贏錢時，只係砌低散戶，唔係砌低大戶。
  
我笑經紀張，「你玩咗幾十年都唔知？當局者迷啦。你邊可以砌低大戶呀，你睇美國排頭位的大行，季季賺大錢，直至最近才衰在自己製作兼推銷的次按證券手上；你睇美國排頭位的對沖基金，亦係年年執大水，大戶絕大部份時間贏大錢，要輸都係散戶輸，有一個散戶贏，就有更多散戶輸。你入賭場賭錢，咁好彩贏錢走，唔係賭場輸俾你，係其他散客輸俾你，賭場經營幾十年，你賭一舖可以好好彩贏到佢，賭１００舖賭場已經差唔多贏梗，宏觀啲講，賭場一定係最後勝利者，你偶然賭幾舖贏吓，都係贏到隔籬嗰個賭客啫。」
　　
散戶入場炒股，第一個心態就應該知自已渺小，知道對手巨大，但偏偏好多散戶唔知，將自己放到好大，以為自己經常睇得啱。著名投資人彼得林治(Peter Lynch)在《One Up on Wall Street》一書中，亦講到股市投資者常犯毛病，就係相信自己對股票的直覺，覺得自己有感知股票升跌的秘技，他們有時會強烈覺得某隻股票會升，但事實正好相反，買入之後無幾耐隻股就跌。這並不是因為股民特別愚蠢，而是因為他們感知那些令股市升跌的訊息時，已經太遲，那些訊息已充份、甚至過份擴散，到他們按訊息買入時，已是水尾，甚至是相反走勢的開始（P.81）。
　　
　　網友mocha早兩日問的一個問題，亦反映了投資者的自我過大，佢問：「陸 Sir：網龍 8288 公佈零八年第一季業績，收益明顯比對上兩季下跌，所以股價應聲下跌，但跟據其業績報告，網龍將於五月低納入 MSCI 中國指數成份股，而且，今年第二季將會陸續有多款新 game 推出巿場，預計帶來滿意收益。」

「現在，我所考慮既問題是：
1. 季度業績報告只是輕輕一句說五月低會納入 MSCI 中國指數成份股，可信性有幾多呢？
2. 由於早前我對網龍滿有信心，可惜，呢一季出現不理想業績，不過仍處於盈利階段，令我相當矛盾，若然沽貨離場，便等如承認睇錯巿，唔能夠過自己心魔一關。
3. 還是，我應該學習股神巴菲特一樣，價值投資，因為我仍深信中國網絡遊戲巿場仍有無限增長潛力。」
  
　　我對網龍無深入研究，我唔知網龍得唔得，只想講講Mocha的心態一定唔得。佢嗰句「若然沽貨離場，便等如承認自己錯誤，唔能夠過自己心魔一關。」我真係要勸Mocha一句，如果唔想沽貨離場的原因係唔想承認錯誤，你以後都唔好買股啦，買股以自己為中心，死十次都未夠，不如月供盈富基金算啦。你呢種唔認錯的心態，一葉障目，一塊樹葉就遮住你睇全世界，要戒。

　　陸羽仁認為，自己的觀點，睇啱時有價值，睇錯時一啲價值都無，假設自己七成睇啱，三成睇錯，睇啱時堅持，要賺多啲，睇錯時半點都不用堅持，轉得快，好世界，要即刻認錯，要即刻斬，甚至反手做，咁就輸可以輸得少，贏得多輸得少，最後加加埋埋就會贏。人的Ego（自我）一個仙都唔值，唔值得堅持。
  
　　但在現實生活裏，問誰能做到？結果大多數人只係「輸就谷，贏就縮」，輸時堅持己見，錯上加錯，見跌溝淡，接到成手貨。贏時就騰騰雞雞，因為平時唔係贏咁多，唔敢去贏，只想保持這個寶貴的勝出經驗，四圍同人分享，所以贏少少就離場，錯過食大茶飯的機會。

　　好多散戶想在股市炒炒吓搵食，但現實上，先輸方法，再輸對手，三輸EQ，無大戶的EQ，點扯住大戶的衫尾搵食呀？

陸羽仁