美股大跌，油價急升，北韓拆毁核反應堆冷卻塔，國際局勢正在急促變化中。美股昨日勁跌，道指急挫３５８點，跌幅３％，跌到１１４５３點，是２００６年９月以來的新低位，亦跌穿了３月中的低位，論走勢差到極。

高盛對呢一浪跌勢好有貢獻，佢建議沽售美國最大的汽車製造商通用汽車，令通用股價出現３年來最大跌幅。高盛又話全美最大銀行花旗銀行第二季可能有超過８０億美元撇帳，要減少派息，將花旗評級由「吸引」降為中性，並加入確信沽售名單，令花旗股價急跌１．１８美元，跌幅６．３％，跌到１７．６７美元，是９８年以來的低位，整個銀行業指數都拉到１０年新低。

高盛亦估計美國第三大證券商美林第二季要虧損，由原先估計０８年全年股有８美仙盈利，改為每股虧損３．５５美元，美林股價跌２．４１美元，至３３．０５美元。高盛今次一次過唱衰美國最大的汽車製造商、最大的銀行、和繼佢自己和大摩之外第三大證商，有報告都一齊出，真係好似驚美股唔死咁話。

彭博訪問咗個芬佬，佢係Key 私人銀行的投資策略部主管Bruce McCain, 佢話「好多投資者都唔敢落水，因為見到鯊魚仲係水中游，而家估計的銀行撇帳潮差過任何人能估計的。」

道指本月已跌９．４％，是自１９３０年大蕭條以來最差的６月，當年跌了１８％，標普５００指數成份股公司第一季盈利平均跌１８％，彭博統計分析員估計企業本季盈利會跌８．９％。

美股、油價和美元都唔知邊樣觸發邊樣，都係朝壞方向發展，油價急升，８月期油大升４．３％，升上１４０美元的歷史高位，因為利比亞話會減產。而在油價急升時美元亦急回，在美國市跌到１０６．６２日圓，在亞洲市美元略彈，早上造１０６．８７日圓，歐元兌美元亦升到１．５７４５美元（亞洲市早上報價）的水平，歐元和日圓都處於６月中美元大反彈以來的高位。

油市反覆上高位，除了利比亞減產之外，也和中東局勢緊張有關，北韓見勢色唔對，也加快拆除核設施，今日會炸毁核反應堆泠卻塔，北韓此舉明顯取悅到美國，布殊馬上宣布計劃把北韓從恐怖主義國家名單中剔除，並局部解除對北韓的經濟制裁。北韓可能睇到美國隨時向伊朗動武，所以快閃，以免誤傷無辜。

陸羽仁早前講過，話美國有猶太大戶大力揸石油，沽美股，炒油價影響經濟之餘，亦炒戰爭風險。近期也見到外資大戶在香港沽期指，沽盈富基金和沽紅色股，佢地沽得你，就預咗你再跌，港股前景，的確有山雨欲來風滿樓之嘆。

陸羽仁

　　美股道指上周五再跌１０６點，跌到１１３４６點，期油升上１４２．９美元一桶，令油股上升，美股初段走勢向可，但尾段就進一步腳軟，大跌後不單無力彈，仲要再插。


美股呢次插落來，並不如３月那次大災難式下跌，那次證券行貝爾斯登差不多要倒閉，聯儲局急救，配合摩根大通收購，美股就係咁企番穩。但今次下跌並無這些金融災難事故，大行唱唱吓股市就插咗落來，表面睇似無名腫毒，但從外資在港大手沽貨的行動反映，它們都係有備而來。

　　在這種市況，有人問好唔好買貨，有人問要不要斬纜全線離場。美股從高位跌了近２０％，企近牛熊分界線，若進一步滑落又會觸發沽浪，若是極短炒，短期內都係炒跌易少少。至於長線投資者，唔係唔可以等機會落注，但都要做好面對跌市的心理準備，所以都係最好還原基本步，睇番公司的價值才去投資。

　　上次講過股神巴菲特點樣計數，去計一間公司的內在價值，要在公司股價相對內在價值有明顯折讓才去投資。好似佢早前出價收購美國的債保公司，只收購人地啲好生意，出價低到極，就係想用極高的折讓價買好的生意，食大茶飯。

　　我今日想講股神買股的一個概念，是從企業前景的角度去投資，佢並唔係買股，係買一盤生意。在巴菲特的觀念中，普通股民聽從經紀的建議，今日買隻股，期望佢明天就升，但巴菲特認為這種想法不切實際，佢買股係超長線，買股就係想做公司的股東，若果係好公司，佢做１００％股東都唔拘，而且係超長線，股價升２５％佢都唔走，直到佢覺得基本因素變咗才會走。所以巴菲特買股，要諗兩個問題，第一，從企業前景出發，呢間公司係唔係可以長期投資的好公司，第二，現價是否夠平，股價比公司的內在價值有好高的折讓。

　　既然股神喜歡買平貨，佢自然會在市況好靜，甚至市況有危險時去買股，咁樣同而家的情況有少少類似。以股神看企業前景的角度，佢會代入公司管理層的角度去思考，去諗公司生意的前景，以佢想收購的債券保險公司為例，債保公司股價跌到殘，但股神並唔係想買哂佢地成盤生意，只係想買較安全的城市官方機構債券保險那部份，而非次按債券保險那部份，換句話講，股神對次按債券保險那部份係唔係咁安全，無十足信心，但城市官方機構債保就無大風險，而家因為次按令債市唔掂，唔理好債還是壞債，價格都大跌，但股神相信次按危機總會過去，過去之後債市就回復正常，那時的城市官方機構債券保險，又變成好像無風險那樣的生意，呢盤生意絕對有得做，所以而家去收購，係黃金機會。不過股神盤數算得太盡，暫時都未有大型債保公司願意接受。

　　引用股神睇一盤生的觀念，而家「投資的我」想買股，有幾重思考，第一，從想買入的公司生意角度出發，加上近期高油價、高通脹的因素，若大市持續跌，到底那盤生意是否可持續，受衝擊有多大？舉一個例，中移動（００９４１）現價１０４．４元，PE２２．５倍，現價仍有點貴，中移動０７年盈利８７０億元人民幣，增長３２％，０６年增長２３．３％，０５年增長２８．３％，雖然０８年未必能維持０７年的３２％盈利增長率，但即使是宏調加高通脹，中移動維持一定的盈利增長，應該不難，以投資一盤生意來講，前景應該可以。現價仍略貴，若跌多啲PE拉到２０倍以下，係唔係有得諗？第二，如果諗唔清楚，不如暫不投資。第三，升市時追落後，跌市時買大股。我見好多網友仲問一些二、三線的股票，在上升時，升勢會一波一波咁擴散，所以買完大股，會追二、三線的落後股，但在跌市時，龍頭大股都跌到比較平，「投資的我」就無謂再買那些股票了。當然「投機的我」另計，二、三線股票上落波幅較龍頭股大，你博大霧就是另一回事了。

陸羽仁

　美股昨晚玩過山車，道指兩度試１１２００點的低位，跌多過１５０點，但最後一個Deep V咁上番，收報１１３８２點，倒升３２點，有少少想試底咁o既感覺。


　　個市腳非常腳軟，平時炒開股的朋友，輸到想斬纜，平時唔炒開的朋友，開始想入市，到底呢種股市，應該買股還是沽股呢？

　　上周和一個做生意的朋友吃飯，佢太太趁空檔問我而家好唔好買股，我知道呢位「乜太」係穩陣之人，平時好少炒股，過去一年會專門開股票戶口買了一轉港交所（００３８８），買入後等股價急升就沽了，而家問我好唔好買匯豐（００００５）？佢由一個好簡單的問題開始，問我買股係唔係睇市盈率呢？

　　　　我知「乜太」咁問，係覺得匯豐PE低，想買匯豐，我話PE的確係一個有用的參考資料，特別係大股，比較難人為咁將盈利造大，所以睇佢地啲市盈率較有參考價值（因為４、５線股的盈利有水份，即使市盈率低都未必反映真實情況）。匯豐現價１２０．９元，PE只係９．４倍，息率有５．８厘，數字真係幾靚；另一隻龍頭大股中移動（００９４１）現價１０４．８元，PE就高好多，有２１．１倍，息率２％（其實中移動都開始有合理息率），兩隻比較，當然係匯豐價錢平啲。

　　「乜太」話佢唔係好信大陸股，成日覺得佢地啲帳目有啲水份。我話要將紅色巨股的管理水平和匯豐比較，當然無得比，但紅色巨股如中移動有近乎壟斷的市場份額，在內地有４億個手提電話用戶，呢個壟斷地位，再加上過住盈利高速增長，若能保持增長速度，就在一定程度上彌補了管理上的不足。

　　「乜太」好有求學精神，問如果市盈率並不是衡量股份可唔可以買的主要標準，咁又有乜標準呢？我就用番早兩日講到股神巴菲特點睇一盤生意的方式，話可以睇公司的內在價值，睇吓公司股價相對於內在價值有無較大折讓；至於如何計算公司的內在價值，就係睇吓公司未來的盈利總和的折現值，我又舉了股神做波子機生意的例子。

　　在這些場合講如何計算公司的內在價值，我都唔預期「乜太」會明，我就咁講，假設你要計未來１０年匯豐的純利，如果佢一年維持到１０至２０％盈利增長，９．４倍PE，點計都係抵買。問題係佢能否保持一年１０至２０％盈利增長？甚至點保證佢盈利唔會大跌？這樣首先要問未來一兩年世界經濟會否大衰退？第二，可能係更重要的問題係匯豐的美國業務會唔會再爆大鑊，把匯豐拖下泥潭。匯豐已為次按業務撥備１００幾億美元，究意是撥到差唔多，還是要再撥多幾百億美元，會係兩個好唔同的故事，匯豐跌現價９．４倍PE，就係反映緊次按業務的風險。我叫「乜太」首先作一個判斷，估吓匯豐的次按業務會唔會再爆杰嘢，就可以判斷匯豐抵唔抵買。

　　「乜太」話佢相信匯豐次按業務即使還要撥備，應該唔會融化性下跌，佢咁講等如已作了結論，認為匯豐可以係投資對象。我話跟住落去的問題只係幾時買。我見「乜太」係穩陣派，我嚇吓佢先，話你買完匯豐佢可能會再大跌，弄不好搞出個熊市，匯豐見番７０元、８０元，可能要守幾年噃？「乜太」話唔怕，佢有長揸的心理準備。我就咁講，既然你唔驚熊市，手上又無股票，唔怕買吓，就分三注，現價買一注，跌到１１０買多一注，跌到１００元買埋第三注。分注買夠貨，如果再跌，都唔好再買，即使經濟衰退，匯豐衰兩三年，只要佢o既次按業務唔會融化性下跌，匯豐跌一、兩年，又會上番你o既買入價樓上，你都收咗兩年息了。

　　講開匯豐，可以順便講吓一啲概念，網友CCB話匯豐太貴，想買中銀香港（０２３８８），我估CCB搞錯咗少少概念，匯豐１２０．９元一股，唔等如佢貴過中銀香港２０．６５元一股，股份平貴，係相對於佢o既賺錢能力，計賺錢能力，最合理當然係計佢內在價值，但簡單點睇市盈率和派息率都睇到少少，匯豐市盈率９．４倍，息率５．８厘，相對於中銀香港市盈率１４．１倍，息率４．４厘，當然係中銀香港貴過匯豐，以市盈率中銀香港計仲貴好多。匯豐之所以平過中銀香港咁多，因為中銀香港業務集中在香港，比較穩陣，而匯豐有三分一業務在美國，那些業務唔止殘廢，仲怕佢燒上匯豐身上，所以匯豐股價先至會咁平。

　　以「乜太」這種隱陣派為例，佢唔喺跌市唔買股，雖難保買完唔會再插，但最後要守番上去亦唔難，做這種「投資的我」，唔會高位買股，見低位可以慢慢吸，買股方法笨笨地，但輸錢機會較細，長線較易贏錢。



陸羽仁

　　油價急升令美股再插，道指大跌１６６點，跌幅１．５％，跌至１１２１５點，按美國市場通用標準，美股正式踏入熊市。

　　油價高漲令汽車股、航空股受累，美國最大汽車製造商通用汽車插得最勁，美林將其評級由「買入」改至「差於大市」，因為有破產之險。通用汽車股價昨日跌１．７７美元，大跌１５％，跌至９．９８美元，是自１９５４年９月以來最低的價位。美林話通用汽車遇上１５年以來最差的汽車市場，可能要集資１５０億美元解困。

美股去年１０月９日走上１４１６４點的高位，通用股價從那時至今跌了７４％。而花旗、AIG、美國銀行等金融大股的股價亦從去年１０月至今跌了５０％，因為次按爆煲，已令金融機構撥備了４０００億美元。

按美國股市的傳統計算方式，從高位下跌２０％，就算進入熊市，以道指在年１０月9日１４１６４點的高位計，跌至１１３１２點就踏入熊市，昨日已正式進入這種市況。自１９６２年開始，以波幅無咁大的現代股市計，美股共經歷１１次熊市，平均維持３２２日，跌幅２９％，其中最長的是１９７３年跌市（也是石油危機，就是香港第一次大跌市），自７３年１月跌至７４年１２月，共跌了６９４日，跌幅４５％。１９７３年美股爆煲前，香港股市正經歷第一次大牛市，恒指升到１７００點，爆煲後最低位只有１００多點，當時港股跌了９成！

　　話美股進入熊市，散戶馬上會有一堆問題，我不妨虛擬一下，自問自答。第一個問題係呢個熊市假設係唔係真呢？或者佢只係再跌多一兩個月的短命熊市又如何？我的策略是信市場，唔好信自己，美股而家個勢的確係滑落去，股市個頂和個底都好難估，一般睇市都係順勢睇，直至佢個勢改變為止。

舉一個例，我去加拿大多倫多公幹，走的時候朋友開車送我走，在機場沿路搵國泰航空的入口，朋友甲一早話知道是那裏，仲話１００％肯定，結果駛埋去發覺係錯o既，然後朋友乙又話佢知，不過佢學精咗，只係話７０％肯定，結果愈駛愈埋愈發覺唔係。朋友丙又話知，離遠指住一個入口，但只係話多於５０％機會，愈駛得近，發覺愈似，機會增加到７０％、８０％，最後駛到入口前，發覺係１００％證明是國泰的入口。呢個例子說明，不要太信自己事前的判斷，要不斷吸收市場的訊息，去確定或否認自己的看法。以美股為例，早前的反彈很像樣，我俾自己的指標係若回落至１２５００點時，唔好急穿，否則可能轉勢，後來發覺美股急挫跌穿１２５００點後，無乜支持，反彈又無力，就確認美股走勢明顯轉淡，如今出現美股傳統的熊市訊號，就更加不能睇好了。

第二個問題是即使美國係熊市，香港和大陸未必係熊市啩？我就話唔好信呢種脫鈎理論，大陸和其他新興國家，亦仰賴對美出口，其經濟未強到可以脫離美國運行，況且今次美股大跌係源於高油價引發高通脹的恐懼，全世界都受累，唔好信中國和香港股市可以獨善其身。而且過去港股基本上是美股同步，只是波幅略大，近年的例外是去年８月大陸話開放港股直通車，港股大幅攀升，才偏離了美股走勢，其餘大多數的時候，港股和美股同步前進或後退。所以如果美股踏入熊市，港股都可能要進入熊市。

　　第三個問題係若港股有機會跟美股入熊市，咁股民有乜策略呢？陸羽仁認為，既然有機會係熊市，就要有熊市的策略，以美股計，熊市平均跌２９％，跌３２２日，即係按平均計，美股要跌到１００５６點，要跌至今年９月，若長過平均，跌幅和下跌時間會更多。港股大體會跟美股，除非油價快速回落，或者大陸通脹快速放緩，否則都係跟大圍居多，即係仲有得跌，下一個位睇２００００點。港股去年初在２００００點左右起步，３月的低位在日中見過１９３８０點，跌穿２００００點係好淡分界，若跌穿埋呢個大位，港股都要見熊了。

　　所以股票的買賣策略，應該以「仲未跌完」做假設，直到情況改變為止。有人可能會問應唔應該斬哂啲貨，我都係那一句，要睇你自己的情況，要有再跌的心理準備，若成手貨，無乜現金，新入o既貨，跌幅較少者就最好斬緊一啲，留番少少現金好啲，那怕是大市今天已見低，明天就回升，你都難去享受，因為你身子太弱。若是好多現金，貨好少，要看你揸乜貨，如果係龍頭大股，不一定要清貨，但雞貨就最好定位止蝕啦。

　　倒過來若踏入熊市可唔可以買貨呢？我估主要睇你股多還是錢多，熊市係「投資的我」慢慢買股的好時機，若果手上無乜貨，好多錢，也不一定唔可以買，但千萬不要急，因為睇嚟仲有得跌吓。買股要買龍頭大股，要知道佢會唔會執笠，會唔盈利大縮然後升唔番上去，通用汽車有執笠的危險，所以股價會跌到１９５４年以來的低位；電盈（００００８）的盈利縮咗升唔番上去，所以會從２８元跌到１元（５合１前的價錢）。從會唔會執笠呢個度，紅色巨股有國家照，會安全少少，你９５元買了中移動，假設熊市來，佢跌到６０元，但至少唔會執，佢o既盈利衰極也有個譜，三兩年後上番９５元的機會都不少，跌市買這種股票就穩陣少少。

陸羽仁

　　美股在放國慶假前得半日市，油價再上新高１４６美元，支持油股股價，美國就業數據唔算太差，亦有利市場氣氛，結果道指反彈７３點收場，收報１１２８８點。

　　歐洲央行昨日一如所料決定加息０．２５厘，但加完息後，歐洲央行總裁特里謝話佢對未來利息去向「無偏見」，市場解讀為歐洲央行並未展開一個加息週期，由於歐洲經濟前景唔好，加呢次息係為咗控制通脹，可能加完呢次就算，唔會再加。特里謝的評價一出，歐元應聲下挫，兌美元立即跌穿１．５８大關，直衝一週低位１．５６７９，今早略彈至１．５７０６。美元兌日圓亦強番少少，今早造１０６．６７圓。美國經濟係唔得，但佢透過弱美元把衰退輸出，歐洲、日本經濟亦唔好，攬住一齊死，所以美元跌到咁上下就反彈。

　　昨日講到個「熊」字，就嚇親大家，其實對呢個字唔駛咁驚，要以平常心面對，真係要驚的只係成手貨坐滿倉兼且做哂蟹者，呢啲朋友首先要做一樣嘢，唔好再買，因為你無條件再買。但如果你的組合七、八成係現金，就一啲都唔駛驚，只要持有的股票係龍頭大股，總有翻身的一天。熊市對於錢多貨少的人係好事，因為平貨會愈來愈多，可以慢慢揀，唔使咁心急落注。

　　昨日和一個做生意的朋友吃飯，又講起美股，我一提起個熊字，佢又係差唔多噴飯咁款，可見時下朋友對「熊」的認識唔夠多，所以我不妨講多啲。昨日講到美股自１９６２年起有１１次熊市，但規模比較大，影響比較深的主要有７３年的石油危機跌市，８７年程式賣盤觸發的跌市，以及２０００年的科技股泡沫爆破，其餘的熊市，好多都比較短暫。

　　我記得短期的跌市如９１１，聯儲局大減息救市，跌完三個月又無事。記得當時有一間美國大證券行宣佈裁員３０００人，過三個月局勢定番股市反彈上高位，佢又請番３０００人，由此可見美資公司的「靈活性」。

　　香港的熊市，７３年、８７年、２０００年都和美股一樣，但再加８２年因香港前途談判帶出的跌市，８９年因六四事件帶出的大跌市，和９７年開始的亞洲金融風暴跌市，這三次跌市為本地因素所導致。

　　我對７３年跌市印象最深，因為那次炒得好狂，亦跌到好深，我那時是１０歲、８歲的小孩，因為爸爸有炒股，天天聽收音機的股票報價，所以我細細個就知道乜嘢叫上市、供股、批股。７３年頭港股炒到顛狂，由１月的９００點，炒到３月升上１７００點，然後爆煲，事後發現，美股在當年１月已經開始跌，但當時資訊不發達，相信除了英資的大孖沙有留意世界股市行情之外，本地人根本無留意美股跌緊，照樣在兩個月內把股市在高位再炒高一倍，結果是年３月恒指由１７００點急挫，第一波直線跌至３００多點，反彈後再跌，跌至１００幾點呆咗收場，即係股市跌咗９成，那時睇住爸爸聽股市行情時的表情，心中只有兩個字：「大鑊」。

　　那時個鑊不單在股市發生，還在實體經濟發生，當年股災源於中東戰事和石油危機，美國幫以色列打仗，令中東產油國抵制美國，石油禁運，油價大升，全球經濟蕭條，我家是開舖頭做出口貿易的小生意，記得７４年年底媽媽告訴我，今年全年只做了一單生意，納空租頂了一年，舖頭由兩三個伙記，裁到最後一個不剩，差唔多要執笠。呢個故事教訓我，石油危機殺傷力幾大。



　　不過那時港股只是一個第三世界亂炒的股市，才會跌九成，以港股而家的成熟度，跌４、５成都好驚人，唔會跌九成，唔使咁驚。其實去年如果阿爺任由股市炒上，不去調控，大陸股市升到１萬點都唔奇，升到１萬點的大陸股市，爆起上來，真係會跌９成，跌到１０００幾點一啲都唔奇。但大陸控住股市，升到６２００點就止步，反而好啲，跌起上來無咁傷。

　　我講７３年大股災的經驗，唔係想嚇大家港股會跌九成，只想告訴大家，熊市有跌得多，有跌得少，香港股市無７３年時咁顛，唔會爆到那個地步。知道熊市殺到，只是一種態度。在去年的大市中，盲目買股也會贏。在去年頭今年初的上落市中，走走波幅都唔太難。在熊市中，暫時都係易跌難升的格局，買股的睇法就要好長線，唔可以寄望短期會好好景，買股預咗要跌深啲，要諗吓呢隻股再大跌後，會唔會執笠，過幾年生意和股價上唔上得番來。對一些跌得未夠深的股票，更要多點戒心，小心佢追跌幅，平保（０２３１８）和招行（０３９６８）就有咁o既味道。

陸羽仁

上周五美國無市，所以今早亞洲市都係炒自由式，日股早段微跌２０幾點，暫時似係牛皮市格局。

呢個星期都有些大事，美國聯儲局主席伯南克有兩個場合出來講話，財長保爾森又會在星期四現身，市場關注佢地講話如何預示美元後向。八國峰會在日本北海道開鑼，會前美、日領袖見記者，美國總統布殊講到美國經濟，相當無精打彩，承認經濟仍然疲弱，而第二季數字則未知，美、日領袖會晤時，並無傾過匯價問題。八國峰會今天上午會討論到油價和美國次按危機，明天午餐時將會討論全球經濟，雖然一般都對八國峰會不存厚望，但都要睇住大國領袖點講經濟、油價和美元匯價。

美元弱勢影響經濟，在不同國家亦產生不的問題，在部份亞洲國家，已觸發對該國經濟及高通脹的憂累，搞到佢地的匯價急挫，亞洲貨幣今年跌得最勁是泰銖，跌了１１．７％，其次是韓睘，跌了１０．２％，本來跌得最勁的應該是越南盾，因為越南通脹２０幾％，股市大插水，但越南控制了匯價，官方匯價反映不出越南盾的真正幣值。泰銖和韓睘急跌，令這些國家的入口貨更貴，加劇了他們的通脹。

南韓６月通脹率５．５％，連續八個月超出政府的目標，韓國忍唔住出手干預，南韓央行今早發表聲明，話佢地關注韓睘過份下跌，話如市場太過失衡，會採取果斷行動。南韓央行擺出干預市場的態勢，韓睘應聲反彈，今早升１．１％，升到每美元１０３８睘的水平。１０年前的金融風暴陰影仍在，當日泰國和韓國用了大部份外匯儲備也不能挺住匯價，結果合共向國際貨幣基金會借了１０００億美元救命。如今泰國和南韓的匯價走弱，若干預仍不收效，可能顯示又有大炒家炒作它們的貨幣頂唔順通脹，會大幅貶值，又是１０年前金融風暴的翻版。

若一個國家的經濟強勁，在美元弱勢未扭轉之前，幣值應該是上升而非下跌，以阿拉伯國家為例，阿拉伯聯合酋長國正遊說鄰國把貨幣與美元脫鈎，以遏止通脹。阿聯酋呼籲波斯合作委員會其餘五個成員(沙特阿拉伯、卡塔爾、科威特、巴林和阿曼)國重新考慮貨幣政策。六國成員國之中，科威特去年５月已與美元脫鈎，包括阿聯酋在內的其餘五國貨幣均與美元掛鈎。

國家經濟強時，面對美元貶值，自己貨幣應該升值，上述的阿拉伯國家產油，油價急升令他們經濟大好，貨幣自然應該升值，但它們的貨幣匯價和美元匯價掛鈎，人為壓住匯價，由於匯價跟美元跌，這些國家購買美元區以外的外國貨品，貨價大升，就加劇了通脹，所以應對之策是和美元脫鈎，讓本國幣值自然提升，輸入性通脹就可減緩。炒家要炒這些國家的貸，可以沽美元買入這些國家貨幣，炒佢脫鈎大升值。

新加坡的情況亦類似，由於開放賭業，經濟預期良好，樓價急升，資金湧入，坡紙和美元掛鈎，壓住匯價不升，輸入性通脹大增，新加坡政府唯有調高坡元兌美元的匯價，以遏止輸入性通脹。

但南韓和泰國的貨幣不升反跌，沽壓何來惹人注視，由於它們的匯價浮動，好易炒，匯價急跌的合理解釋是有大手沽盤，呢啲沽盤好可能是外國的炒盤，炒泰國和南韓經濟呆滯，通脹愈升愈高，最後金融爆煲，匯價大跌。雖然好多人話，１０年前亞洲出現金融風暴，因為這些國家經濟泡沫吹得好漲，加上企業債務錯配，它們做生意賺本國貨幣，借錢借美元，幣值一跌，大量企業無法還錢要倒閉；如今經濟雖有風浪，但如今這些國家經濟泡沫無咁大，債務錯配的情況亦無咁嚴重，所以認為金融風暴不會重現。但細心一樣，當年通脹問題亦無咁嚴重，如今在通脹狂飊下，美元弱勢時，這些國家貨幣還可以企得住，若美元一轉強，這些國家貨幣會不會急挫呢？入去炒作的沽家，又係唔係有備而來呢？

亞幣風潮隱現，和美元關係微妙，唔好太早話亞洲金融風暴一定唔會來，睇住南韓和泰國匯價的走向，應有啟示。

陸羽仁

　　美股昨日假後開市，先嚟一個假反彈，道指升到１１３９９點後就插，１１０點的升幅消失於無形，最低跌穿１１１５０點，高低波幅達２７８點。到３點後道指反彈，最終收報１１２３１點，跌５６點，跌幅０．５％。美國上星期假前反彈７０幾點，但走勢無以為繼，顯示後向都幾弱。

　　油價急回，美國８月期油最多跌５美元，跌穿過１４０美元一桶，最後在美國市仍跌３元多，收報１４１．３７美元，本來利好美股。但雷曼兄弟出報告話，由於會計準則改變，會逼使美國最大的房貸公司房利美要增加４６０億美元資本，房地美要增加２９０億美元資本。兩大房貸公司集資壓力大增，令股價急挫，房利美跌１６％，每股１５．７４美元，是９２年１０月以來最低；房地美更跌１８％，每股１１．９１美元，是９４年１２月以來最低。房貸股急挫令金融股下跌，拖低美股。

　　美股未改熊樣，香港股市和美國不同，沒有一個公認的高位跌２０％就是熊市的準則，所以熊唔熊各有各講，我認為港股大走勢跟美股，若美股入熊市，港股唔易有例外。

　　按美國標準，在１９６２年以後有１１次熊市，但其中只有兩三次是我們講的股災，其餘的只是大跌市。其中災得最勁的是１９７３年、１９８７年，以及２０００年的科技股爆泡，７３年和８７年是典型的股災，因為大市在極短期內急插，而２０００年科技股爆泡就帶來科技股的股災，因為反映美國科技股走勢的納斯特克指數，如今經多年反彈後亦只有２２４３點，當年高位超過５０００點，科技股仍經歷漫長的熊市。

　　如果是７３年和８７年這些股災式的熊市，佢地以急跌開始，中段有明顯反彈，跟住進入熊市第二期再跌，然後進入熊三的死靜期，股民連急都不再焦急，對股票完全死心，成交死寂，熊三都可以有一、兩年。

　　但今次下跌暫時未係咁典型的股災，以美股為例，佢無大插水一日跌５００點、１０００點咁急跌，而係慢慢滑，所以未有無好清淅的熊市階段。美股道指自８７年的大跌市後，都未出現過股災式跌市（不計納指），因為股市一露出下跌苖頭，聯儲局馬上干頂，大量減息，等如大印銀紙，把低廉的資金灌入投資市場，好易就出現灌水浮球的現象，跌得兩跌就企番穩，阻止股市發展成急挫的股災。同樣道理，在股市大升時，升到咁上下，有少少通脹，聯儲局又會加息降溫，阻止股市出現泡沫式大升，無大升，就難有暴跌了。

　　今次美國的次按危機，災難好大，但聯儲局減息的力度亦大，加上美元貶值，有助美國增加出口減少入口，對經濟有一定的支持作用，阻止了美股出現股災式下跌，但美股仍慢慢往下滑，到底佢滑滑吓會滑出一個股災，還是滑吓會停，仍要觀察。

　　散戶入市以買貨為主，較少做淡友，確認股市進入熊市，要改變買股的態度。在牛市時，股市大勢向上，即使有深度調整，只要你夠膽買，佢馬上又彈番上去，過幾個月仲創埋新高，所以股市是獎勵夠膽入市買股的人。但股市進入熊市後，是一浪低於一浪，直至尋到底為止，上次低位２０５００點，今次下跌又可能會跌穿，而且反彈未必好大力，你睇港股成交不斷縮，的確有這種風險，所以如果你用牛市的眼光在熊市中買股，就好易輸錢，熊市係懲罰太大膽搶購股票的人，小心。

陸羽仁

   　美股終於出現較像樣反彈，聯儲局主席伯南克話可以延長對金融機構的緊急借貸到明年，消息對金融股有支持，美股向上，油價急回，８月期油再次大跌

5.3美元，造136.04美元一桶，是６月２６日以來最低；美股大幅上漲，道指大升152點，至11384點，漲幅1.4%。

　　道指今次反彈，是其技術上步入熊市以來首次較像樣反彈，在美國三大指數中，道指和反映科技股的納斯特克指數早已入熊，但標普５００指數係仍未入熊的指數，標普５００的入熊位為１２５２點，昨收１２７３點，在入熊邊沿又走番轉頭。

　　　美股昨日早段因有報告顯示房屋市場疲弱，投資者對企業第二季業績感到緊張，股市走勢頗差，但隨後因油價大跌和伯南克話美聯儲可能延長提供銀行業緊急資金期限，股市逐步走高。兩大房貸股在早一日下跌後急彈，房利美和房地美引領金融類股上漲，房利美漲了1.88美元，至17.62美元，漲幅12%。房地美漲1.55美元，至13.46美元，漲幅13%。兩家公司均收復了周一急跌的大部分失地。

　　昨日八國集團開會發聯合聲明，這個花４３億元去開的高峰會無乜料到，只就溫室氣體長期減排目標達成一致，同意把在2050年前將全球溫室氣體排放量減少至少一半的目標作爲「世界整體目標」。八國集團又叫產油國增產，同時叫中國這類國家提高匯率，以減少國際匯價失衡咁話。八國開會的消息對金融市場的影響不大。

　　八國開會無料到，美國要自求多福，自己再出口術救市，聯儲局主席伯南克昨日發表講話穩定金融市場的信心，話聯儲局自今年３月開始，為銀行以外的金融機構（如投資銀行）提供的緊急信貸，可以延長到明年。

　　伯南克話，聯儲局致力維持金融穩定，正考慮多個方法，延長緊急信貸時限係一個方法，這是伯南克首次表示聯儲局可以把緊急貸款延長多久。伯南克提出另一個穩定市場的方法，係設立投資銀行的聯邦破產程序，美國財政部可以在這個程序扮演一個領導角色。伯南克這個建議，旨在消除市場對投資銀行可能倒閉的憂慮，因為有了這個破產程序之後，投行財政一有問題，美國財政部一定會介入解決，等如將今年３月財政部和聯儲局救貝爾斯登的方式正規化。

　　伯南克話會延長緊急貸款，和市場原本估計９月會加息的估計有啲偏離，市場原本估到９月那些緊急貸款陸續到期後，聯儲局會開始比較從緊的貨幣供應政策，會隨即開始加息，如今伯南克話緊急貸款會延長，令人相信加息會推遲，從利率期貨市場成交推算，７４％市場人士估要到年底才會加息０．２５厘。

  　　另外，財長保爾森又出口術挺房貸市場，早兩日美國第一、二大房貸公司房利美和房地美要增加資本的消息傳出後，兩隻股大插水。但保爾森就倒轉來講，話兩大房貸公司增資後，令他們有更多資金注入房貸市場，會有助舒緩美國樓市危機。佢又話美國樓市唔係咁差，數據顯示有一半美國州份第一季樓價仍有增長。保爾森的評論亦刺激兩大樓按公司股價大幅反彈。

　　伯南克和保爾森的講話，有助市場暫時恢復對金融股的信心，美股跌咗咁多，應該會彈一彈，問題係再彈高啲之後，股市會見底向上，還是再反覆向下。未來主要睇美元匯價和油價的走向，美元加息期望推遲，小心對美匯有跌壓力，美元千萬不要回軟，否則油價亦難回落，美元和油價走向，將左右大局。

陸羽仁

　　美股在高官口術下升了一天，昨日又插，在美國最大房屋貸款公司房利美和房地美急跌帶動下，美股將前一天的反彈消耗得干干淨淨，道指大跌２３６點，跌幅２．１％，跌至１１１４７點，標普５００指數跌２９點，跌幅２．３％，跌至１２４４點兩年低位，有三分之一的跌幅是在最後２０分鐘下插造成。

　　今次跌市的元兇是房利美和房地美，早兩日呢兩隻股傳出要增資的消息而大跌，而前天美國財長保爾森又出口術話佢地增資會增加投入樓市的貸款，對樓市有利，令呢兩隻股大反彈，但好景不常，昨日又再大插，因為房利美的利息成本大增，市場憂慮它將按揭證券化的生意好難做。

　　結果房利美大跌２．３１美元，跌１３％，跌到１５．３１美元，是１６年以來的低位；而房地美仲跌得誇，跌了３．２美元，跌幅２４％，跌到１０．２６美元，同樣是１６年來的低位。兩隻房貸股大跌，帶動金融股全線向下，又引出一個大跌市。

　　美股的熊市標準是高位跌２０％就算進入熊市，道指已率先入熊，本來標普５００指數還在熊市邊沿掙扎，其入熊位是１２５２點，昨日收１２４４點，正式入埋熊市，從１９６２年到現在，標普５００指數有８次進入熊市，平指跌幅３３％，平均下跌時間３８２日。標普５００指數幅蓋成份股數量比道指多很多，過去進入熊市的次數比道指少，道指自１９６２年起，有１１次進入熊市，平均跌２９％，平均跌３２２日。由兩個指數進入熊市的差數推算，道指比標普５００指數多三次進入熊市，但那三次都係短暫熊市，所以拉到道指入熊的平均跌幅和時間都少過標普入熊的平均數。換句話說，今次兩大指數都入熊市，應該都是較長的熊市，起碼要參考標普指數入熊的平均數。

　　如今國際的政治經濟情況仍然好亂，我地不如分美國股市、大陸股市和香港股市來睇。美國股市呢一浪下插甚深，一般來說應有一個似樣少少的反彈，若論走勢，道指要繼續跌，都可以先彈番上１１８００點的阻力位，早一日美國官員應該覺得美股跌得夠深，所以出來出口術托市，企圖營造一個像樣反彈，但美股彈得一日就插，底子都幾弱，唔知美國政府仲有無招數可出了。

　　昨日仲有一單新聞，當美國官員出完口術，股市反彈，油價大插５．３美元後，伊朗又發招，公布試射了九枚長程和中程導彈，長程導彈射程２０００公里，可以射到以色列的特拉維夫，油市聽到這個「好消息」，即時有反應，油價即彈，但奇怪的是油價一彈又俾人插低，好明顯有好大沽壓，結果在美國市８月期油收１３６．０５美元一桶，只是微升１美仙，有高人懷疑，美國政府正干預油市，大沽石油，壓住個價，唔好俾伊朗玩吓嘢油價就大升。美國政府口術、手術齊出，同揸石油、沽美股的大戶鬥法，後向難料。

　　至於大陸股市，就如我今日專欄所講，阿爺要大力頂住個市迎奧運，唔好俾股市的愁雲慘霧搞到人心不穩，佢直情懷疑有外資大戶要插低大陸股市搞破壞，所以要大力挺。阿爺雖有挺市之心，但外圍咁搞，股市震蕩難免。

　　香港挾在當中，主要睇美國股市走向，若美國政府出完術都頂唔住，後向危險幾大，港股食粥食飯，要先睇美股也。

陸羽仁

美股超跌反彈，道指早段一度升過１２３點，後來升幅回順，收市仍升８１點，升幅０．７％，標普５００指數亦升０．７％，升到１２５３點。

油價彈升５美元，但美股仍在一眾好消息中反彈，聯儲局主席伯南克話會致力維持金融市場穩定，對金融股有少少支持；鋁價升到歷史高位，因為市場估計中國會減產１０％以防供應過剩，刺激鋁價急升，美國鋁業股價急升９．７％，帶動一眾資源股上漲。Dow Chemical Co.以１５４億美元收購 Rohm & Haas Co，重燃企業併購的前景，亦令市場熱度增加，促成美股反彈。

不過油價的走勢的確離奇，伊朗第一日試射九枚導彈，油價唔升，到第二日公布射多一枚導彈，仲懷疑係第一日試射無命中才要補射的導彈，但油價卻大幅上升，在美國市８月期油大升５．６美元一桶，升幅４．１％，升到１４１．５６美元，日中交易最多升過６．０５美元。

雖然話油價大升除了伊朗射彈之外，還因為尼日利亞武裝部隊會在本周中止停火，但市場最大憂慮還在中東局勢。早一日伊朗射彈時油價壓住唔升，高人已經話有大量沽盤隊低油價唔俾佢升，而昨日之升，似乎係人為沽盤撤退，高人懷疑早一日的沽盤來自美國官方，正當美國做緊大龍鳯出口術支持股市、壓低油價時，伊朗靠害公布軍演消息，意圖隊番高油價推番低美股，美國唯有壓住油價先，唔好俾伊朗咁得戚，但官方不能日日干預，股市一定番啲，在油市的沽盤就要暫時撤退。

其實全世界政府干預市場的手法都差唔多，特別在股市護盤的手法更有跡可尋，以美國為例，若股市下插係伴著巨型危機而來，例如今年３月貝爾斯登倒閉危機，美國政府唯有現哂身去干預，由聯儲局直接包底去幫助貝爾斯登的收購者。但好似今次股市咁慢慢插，政府就不會太快出手，只能等佢跌深啲才出洞，出口術兼出手術，希望可以幫市場築底，營造跌夠的氣氛，幫助股市反彈，今次道指已跌到１１１４７點，估計從美國官方的主觀願望，希望呢一個跌浪可以守到１１０００點呢個大位，唔好俾佢跌穿再深度試底，先讓股市彈一彈再算。

不過政府出口術救市，有時頭同尾又唔係好夾得到，例如上月聯儲局主席伯南克和財長保爾森的出口術方向，係想營造強美元，伯南克及其他儲局理事更暗示快將要加息，令市場憧憬美國在９月會加息，所以美元大幅反彈。但早兩日的口術方向係繼續向金融機構提供貸款，延長到明年，此舉和市場估計美國會在９月開始收緊銀根的估計不同，即係話會繼續放縮銀根，所以９月未必會加息，要加都可能等到年底再加，這種傾向有利股市，不利美元。

伯南克講話的第一天，美元仍好似聽到好消息咁，比較堅挺（亦不排除有人為干預），但昨日美元就開始回吐，歐元兌美元上過１．５８的高位。陸羽仁覺得，美國官員開始有點「顧得頭來腳反筋」，護得股市又護唔到美元，不過股市跌得咁急，都係要救股市先。

金融市場最緊要有水，美國大放銀根，股市好難無底大插，所以跌到咁上下又會在放水消息中反彈，雖然無人敢話呢次已見底，彈完再跌的可能性都唔低，但至少唔會愈跌愈急，出現一日跌５００點、７００點的災情。

至於美元，由於加息的期望推遲，暫時又會弱番一弱，但睇美元可以咁睇，美國最遲都要今年底明年初加番息，一接近美國加息週期，美元會走番入一個反覆向上的境地，但未來三幾個月可能仍然係上落市為主，因為兩大主要貨幣歐元和日圓的基本因素亦唔靚仔，特別係歐洲有跟美國轉壞跡象，歐元亦無大升條件。

陸羽仁