美股杜指周四受油價大瀉和通用電氣（GE）被調低評級的拖累大跌219點。周五油價雖然繼續下跌至2004年4月以來新低，不過白宮宣佈從7,000億美元的救市基金撥出174億美元貸款予汽車製造業，避免即時陷入破產危機。投資者借機炒上，杜指開市即急跳至全日最高的8,787點，大升182點。杜指快上亦快落，投資者即食即吐，杜指在中午12:00已打回原形。之後穩守在上日收市的8,605點上方窄幅橫行，至下午3:10才告失守，略微下跌。杜指收市報8,579點，下跌26點或0.3%；標普500指數及納指則微微上升，標普500指數報888點，升3點或0.3%；納指漲12點或0.8%，報1,564點。杜指全日最高8,787點，最低8,550點。美股交投暢旺，紐約證交所成交大升至24.2億股，比上日增加逾75%。

布殊在上周宣佈撥出共174億美元貸款拯救通用汽車（GM）及佳士拿（Chrysler），令兩大汽車製造商暫時擺脫破產的厄運。貸款分兩期撥出，134億即時貸出，其餘40億則留待明年二月發放。受利好消息影響，通用汽車（GM）狂飆逾兩成二至4.49美元，成為杜指的最大贏家。另外，在美國宣佈拯救計劃之後，加拿大第政府第二天亦宣佈撥出共40億加幣，分兩年貸予加拿大的通用汽車及佳士拿。

納指上升則全賴甲骨文（Oracle）和生產黑莓的Research In Motion的盈利符合預期，甲骨文及RIM分別上升7%至17.78美元和11.4%至42.83美元。比較上周，納指上升了1.4%，跑贏標普500指數的0.6%。而杜指則下跌0.7%。

股市最近有不錯的表現，從10月時的最低位反彈已有超過45%升幅，有不少人覺得大市已見底，問我係唔係入市嘅時機，我唔係好想直接回答係或唔係，不過可以畀大家睇睇市場上有眼光、有份量的金融界鉅子，對經濟嘅睇法，作為參考。上周五，大摩亞太區主席羅奇（Stephen Roach ）接受彭博電視訪問，對全球經濟發展，就有咁嘅睇法。羅奇睇市目光奇準，喺一年前已準確地預測美國將陷入衰退。他在訪問時表示經濟正處於嚴重的衰退當中。而衰退將延續至2010年才會有輕微的復甦。現在才衹是衰退的初步階段，深度階段還未到。包括亞洲在內，全球正面對經濟的急促下滑，而中國更是首次遇到經濟不景的情況，被打個措手不及，因而正應用一切可用的手段去刺激經濟，日本除了減息外，近期更宣佈會動用近2,230億日元去救市。不過，經濟下滑仍未有剎止的跡象。

美政府正在做的是嘗試接收市場唔掂的剩餘部份，就如最近拯救美汽車工業一樣，但這種做法衹是‘過渡性貸款’，並不能推動市場運作的持久藥方。加上長期的輸血，政府正出現貧血的症狀。政府近期採取的零息政策，好大機會步日本後塵。陷入長期衰退。羅奇又表示，美國人經過三十多年的過度消費，令經濟過度膨脹。當祗有美國人改變消費模式，加強儲蓄，再投入國家的基本建設上，才可扭轉現在的劣勢，但這當然不是短時間可以做得到的了。羅奇最後回答彭博說，經濟要在2010年才會有輕微復甦現象。羅奇對經濟前景睇法悲觀，所以大家入市前都要諗多諗，唔好太樂觀嘞。

陸羽仁

美國市場憂慮今年節日購物旺季表現將為近40年最差，加上一系列公司盈利預警的打擊下，美股昨日走勢早段反覆偏軟，杜指早段升過22點後在上日收市附近窄幅橫行，截至下午1:10，杜指仍勉強守於接近上日收市的8,559點，微跌20點。但在缺乏承接力的情況下，杜指調頭大幅下滑，下瀉近190點至8,372點才喘定，尾市最後的30分鐘強力反彈近150點收市。

杜指收市報8,520點，下跌59點或0.7%；標普500指數報872點，挫16點或1.8%；納指跌32點或2%，報1,532點。杜指全日最高8,601點，最低8,372點。臨近聖誕，交投比較淡靜，紐約證交所成交12.2億股，衹有上日的50%。

美股最弱的一環為金融類股份，整體下跌了4%，拖低大市。美銀（Bankof America）下跌 2%至13.53美元；富國銀行（Wells Fargo）下挫6.4%至27.49美元；花旗集團(Citigroup) 下挫 3.9%至6.75美元。

瑞信分析員ChristopherCeraso昨日表示，美國政府向通用汽車提供拯救資金之後，通用汽車需按照政府要求重組，其現有股權可能大幅減少，甚至有可能被完全「清除」，股票價值將因此大幅下降，不利其持股人，遂將通用汽車的目標價從2美元下調至1美元，同時將評級從「中立」下調至「跑輸大市」。通用汽車股價暴跌21.6%，收報3.52美元。福特汽車則下挫12.2%，報2.59美元.



網友小仙女早兩日講起散戶投資瓣瓣唔掂，呢個題材可以講嚇。佢咁話：「不知從何開始。我覺得做香港人真不易，我地努力賺錢，投資股票、樓、外滙、基金，每隔幾年，就有一次危機，走得快還好，走得慢，大閘蟹通街都是，大閘蟹不表示佢哋不會投資，而是長線投資一樣今次會心灰，就如滙控，收埋息，計落都要虧本。」

「我最想知是，前二年，人民幣升值，好多人好遲才去買，但買了不久，佢又話貶值，於是急急賣貨。但賣到咁上下，現在又到美元貶值，香港人又要急急去買外幣防身，但早段時間，外幣又跌好多，啲人又賣了，現在又買回，咁，來來去去，是否得個吉。」

「今次金、股、滙、樓、基金，我地都中伏，美元再貶，港元都會一樣，, 我地餘下的血汗錢. ，真是左一巴、右一巴，給投資失誤而令到資金越來越少。不如你提議嚇我哋，要怎樣才可走出這投資困境呢? 餘下來應要投資什麼比較穩健呢? 謝謝。」

　　陸羽仁早兩日在《頭條日報》專欄都講過，呢次金、股、匯、樓樣樣唔掂，的確唔係幾正常，當日講散戶可能被逼投機，而家想講講投資。一般散戶，特別是年少氣盛的後生仔，往往想一注投資就賺大錢，最好一Q發達，一朝脫貧，所以他們的目標是在最低位買貨，最高位沽貨，只夢想達到目標時的興奮，沒有想過如何控制風險，所以往往高位沒有沽貨，反而會加注；或者咁幸運高位沽咗貨，跌咗少少又驚死蝕底立刻買番，結果就俾大跌市套牢。小仙女話佢買匯控，可能佢唔係炒炒嚇的老散，但總的來說散戶難免隨波逐流，因為佢地只隨著市場感覺走，沒有對投資對象作最簡單的基本因素分析。

我前日在《頭條日報》專欄提到航運業大亨講波羅的海乾貨指數的問題，過去指數反映運費，但今天指數已經變成一種炒作的衍生工具，它在過去只是一面鏡，如今己變成了事物的主體，所以投行甚至要訂船期，收乾現貨（船期）的供應，以推高指數，試想在經濟暢旺，船期緊張時，投行再買起船期，自然可以把本來已經好高的波羅的海乾貨指數穀到天咁高。假設你睇住波羅的海乾貨指數去投資航運股，後果可想而知。

　　記得在航運股在高位回落之際，我見到李超人開始沽航運股，就向大家示警，這是危險訊號，因為李超人在全球各地營運大量貨櫃碼碼，自然知道航運業的榮枯，他都賺夠要沽航運股時，恐怕航運業的基本因素已轉壞，大家要執生啦。

這其實是一個簡單的道理，投資要睇股份的價值，即係睇基本因素，在牛市時如果基本因素開始轉壞，就要沽貨離場，唔好期望自己係最高位元沽貨，在高位跌番２０、３０％，都可以沽，因為那些價位都係好貴。你可能會問，我係長線投資者，唔想出出入入。以匯控為例，你如果唔出入，就要忍受佢試低位，早兩年個市好好時匯控已經見到一個現象，只是上上落落，沒有大升，個市升佢突破唔到，微穿１４０就回，出現一種長期弱勢，而呢種弱勢的底因是金融業的基本因素轉壞，匯控已經好過同業，但佢走唔出大趨勢。有些長線投資者唔理升跌，但如果你唔想見到持有的股票不斷跌，就要在佢跌穿位時止賺／止蝕。

　　至於「投資的我」沽完貨要買番貨，亦要睇基本因素，唔好盲目睇圖表就話牛市要來臨。我認為熊市未都完，何來牛市？拉遠啲講嚇樓市，以炒得最勁的豪宅為例，山頂樓好多過咗３萬元一呎，論租金計高峰時只有１、２厘收益，低得可憐，註定唔掂。在１０月後一輪急插，而家在反彈中，都要２萬幾元一呎，我就話未跌夠啦，樓市在第一浪急插後，先有反彈，把市場上一大批實客（如自住者或長線投資者）吸走，才會出現第二輪下跌，第二輪跌得更急，因為市場上的實力買家部份已入市又套牢，其他人即使未買都唔敢入市，加上租金又跌，樓價若未跌得夠，租金收益仍然唔吸引。豪宅唔掂，二三線樓都唔會好，所以樓市離底尚遠。

　　股市亦係一樣，雖然話「人地恐懼時我要貪婪」，但都要配合基本因素入市，唔好跟氣氛入市，有部份人雖然自命係「投資的我」，買入股票好少進出，但佢地心態係投資者，手法係投機者，跟氣氛入市唔係投機係乜？你只要睇嚇經濟的基本因素，就知道環球經濟無咁快好，正如大摩亞太區主席羅奇所講，而家係全球市場貧血，最快都要到２０１０年才微弱好轉，所以唔好俾市場氣氛滾咗你，以為會馬上好。

　　分析經濟係睇關鍵的基本因素，經濟唔好，股市唔會好。所以在經濟基本因素有好轉的苗頭前，「投資的我」要忍手，要買就叫「投機的我」去買好了。所以我俾小仙女的答案，如果唔係炒，暫時忍嚇手。

陸羽仁

美股上週五(二十六日)復市。由於大部份的投資者仍在休假中，交投十分淡靜。杜指全日在不足80點之間窄幅波動，上午早段升上全日最高的8,533點，上升65點後，即緩步向下。至下午1:00，杜指跌至接近上日收市的8,467點已有買盤支持，午後重回早上的最高點，尾市略為回軟。

杜指收市報8,516點，上升47點或0.6%，全日最高8,533點，最低8,462點；標普500指數報873點，升5點或0.5%；納指升5點或0.4%，報1,530點。紐約證交所成交衹有5.2億股，衹有全年日平均的三份之一。時近歲末，交投淡靜，睇嚟好友都會出少少力，頂高啲去結算。

通用汽車擁有49%股權的通用汽車金融服務公司(GMAC) 在聖誕前夕獲美國聯儲局批准，變身為銀行控股公司，為通用汽車打開緊急融資金大門。據CreditSights Inc的分析員Richard Hofmann話，GMAC成為銀行之後，可以獲得聯儲局的TARP救市基金達63億美元的撥款。受利好消息刺激，通用汽車股價大漲，最高升過23%報4美元。收市略為回順，報3.66美元，亦大升近13%。成為杜指上升的最大動力。GMAC去年為超過35%的購買通用汽車的車主提供貸款。

非洲最大產油國尼日利亞宣佈一月份的油類產品價格降價每桶45美分至1.2美元。上週五紐約期油收市報每桶37.71美元，上升6.7%。艾克森美孚和雪佛龍股價收報77.19美元，上升1.9%和73.35美元，升1.1%。

以色列空襲加沙地帶造成285人死亡，中東地區持續緊張，促使避險資金流入商品市場，紐約期油最新報每桶38.69美元，比上週五紐約收市再升2.6%。黃金、白金、銀、銅和鋁價格上漲，黃金更升至每安士889.7美元的近期高位。美匯指數則下跌0.4%至81.4。

　　時近年尾，各方都為股市埋單計數，據大陸銀河證券的統計資料顯示，金融海嘯的爆發衝擊全球股市，截至2008年12月23日，全球股市市值為31.25萬億美元，今年以來下跌48.6%。不過大陸A股市場卻不幸成為了受影響最大、下調幅度最深的股票市場，截至2008年12月23日，滬深300指數今年以來下跌了64.2%，位居全球主要股指跌幅榜首位。

　　今年以來，在香港恒指都算跌得多，跌幅為48.8％，但仍比滬深300指數跌幅少了15.4個百分點。美國標準普爾500指數跌幅41.2％，納斯達克指數跌幅42.6％。美國顯然是風眼中心，但股市跌幅亦只有四成左右，從好的一面看它是成熟市場，所以跌幅較新興市場少。從壞的一面看，美股可能未跌夠，小心明年再跌多10至20%才試到底。

但即使是以新興市場計，大陸A股市場的跌幅也更大，截至2008年12月23日，今年以來MSCI新興市場指數跌幅為47.8%。

股指的大跌意味著市盈率(PE)大降，據銀河證券統計，大陸滬深300指數的市盈率已由最高點的53倍跌至目前的14.4倍，以PE計已跌至1995年以來的最低水平。環顧世界股市的PE，美國納斯達克綜合指數、標普500指數和杜指數的市盈率分別為19.4倍、12倍和13.4倍。亞洲的日經225指數和香港恒生指數的市盈率分別為17倍和10.5倍。

大陸股市14.4倍PE，香港恒指10.5倍PE，和美國杜指的13.4倍比較，不相伯仲，按理美國是成熟市場，市場平靜時PE要比新興市場高，因為它的公司盈利較穩定，所以投資者願意出高一點的PE去買它股票，當然熱炒的新興市場又是另一回事。如今杜指亦只是13.4倍PE，馬上出現一個問題，除非香港和大陸股票的風險明顯低於美股，否則國際投資者為何不把錢拿去買美股呢?

目前各地股市的PE皆偏離歷史平均，無論是大陸股，還是香港股、歐洲股，PE值都遠低於歷史平均水平，除了美國以外，多數國家的偏離度都在40%以上。滬深300指數的當前PE低於歷史平均值50%，PB(市價帳面值比率)低於平均水平41%。

銀河證券測算的滬深300指數09年PE水平將會低於了美國杜指、納指、以及日本日經平均指數。銀河證券認為考慮到中國整體經濟和企業盈利增長的速度遠高於歐美各國，從相對估值的角度來看，A股的市盈率水平是比較低的。

　　不過我覺得股市講供求，供應多需求弱是股市最大的死因，大陸在2007年股市旺場時大量推出新股集資，加上數以萬億計的非流通法人股大量解凍，變得可以流通，令股民急急掟貨走避。A股在2007年的IPO募資達到創記錄的4470億元人民幣，中國石油、工商銀行等巨無霸公司登陸A股市場，一上市就狂升，但跌下來也以它們為主力，單計這批代碼以“601”開頭的股票共有42隻，成為了大陸最主要的權重股，在2008年之前上市的36隻“601”股票中，也是下跌主力，當中有6成跌幅超過大市。這36隻“601”股票今年初市值合計14.9萬億元人民幣，至今已損失了10萬億元市值，市值損失咁多，認真得人驚。這些權重股高位上市，大市下跌它們沒有抗跌力，至少是股市表面的死因。

    呢個世界有句話叫賤物鬥窮人，股票貴一貴時都可以去搶，但佢跌到好平時，唔等如不可再跌，因為股民唔止無膽買，仲可能係無錢買。所以如何保留實力，等有機會時執平貨，也是一門學問。

陸羽仁

美股昨日交投仍然淡靜，反覆低收。受中東局勢不隱，油價上升和陶氏化工併購失敗應響，杜指雖然在開市頭幾分鐘錄得正數，最高升過15點，但隨即調頭回落，指數拾級而下，至下午1:30, 杜指跌至全日最低的8,364點才喘定，最多下跌了逾150點，之後反彈回升，跌幅續漸收窄，收回大部份失地。但最後未能重返8,500點樓上。

杜指收市報8,484點，下跌32點或0.4%，全日最高8,531點，最低8,364點；標普500指數報869點，微3點或0.4%；納指跌19點或1.3%，報1,510點。紐約證交所交投靜淡, 成交8.8億股。

科威特受全球經濟衰退惡化影響，撤出與陶氏化工的合資企業，取消購買其90億美元的塑膠部門，令投資者擔心陶氏化工可能無法完成收購羅門哈斯化工公司(Rohm & Haas)。7月時陶氏同意以約153億美元收購Rohm & Haas，為本年最大併購計劃之一。受不利消息影響，陶氏及Rohm & Haas股價均大瀉，分別大跌19%報15.32美元和16%報53.34美元。標普及穆迪在收市後更將陶氏化工的投資評級降低。

以色列連續第三天轟炸了由哈馬斯控制的加沙地帶，已造成307人死亡，全球憂慮以色列有可能入侵該地區，中東局勢緊張升溫，加上美元疲軟、中國趁油價低殘，擴充戰略石油儲備等因素下.令油價一度勁升至每桶42美元上方，收市報40.02美元，上升6%。油價上升推動能源股上漲，艾克森美孚和雪佛龍成為杜指30隻成份股中5隻可逆市上升的藍籌股，艾克森美孚和雪佛龍收報78.02美元，上升1.1%和71.55美元，升1.7%，抑制了大市的跌勢。

　　2008年將盡，2009年好快就到，投資者要好好檢討自己的處境，分析好形勢，為來年作好部署。

    　網友們有些關於來年投資的提問，可以一併睇睇，網友dai dai問:「陸sir:
港股已離10月低位10676相差4、5千點，而更有技術分析指2009年上望21500，您對睇淡嘅決心有否動搖？需否作更改或作兩手準備？請覆，謝謝！」



　另一網友dogmanstar問:「陸sir你好, 看了你的專欄有一段時間, 我是第一次回應的想請教你,我之前用margin在HSI二萬幾點炒燶咗, 係穿二萬點到萬四點之間開始減磅. 到HSI 10676 個時唔敢再買賣.
揸到而家再係14000 - 16000 之間開始再減磅.現在已傷亡慘重。現在股票佔我總資產仲有成36%, 我應該點好, 現持有大部份是中資國企, 如857, 883, 941, 390, 410, 2628, 2600, 1398, 3988. 我應該再減持定唔好攪佢住?謝謝。」

    　表面上睇兩個問題風馬牛不相及，點解我要放埋一齊講呢? 且聽我慢慢道來。股民買股票，會相信成功之道是作準確之預測，然後在最低位買，在最高位沽，我會叫估得咁準的人叫「估神」，若然次次咁準，必定如有神助，但呢個世界有無「估神」呢?唔係無，而係好難長期都咁準，我之前都講過，有個鬼仔搞咗個技術分析模型，在87年成功預測美股大跌，佢一舉成名，變咗揸盤人，但最後無估中過，結果都幾潦到，所以唔係唔估，而係唔可以完全靠估，以為自己實估得中，按自己的估計博到盡。相反地，關鍵是要控制自己估錯時的風險。

    　投資股市當然要對市場大勢有個基本判斷，要睇走勢，要知道而家係牛市還是熊市，牛市走勢一級級向上，熊市走勢一級級向下，知道大方向，買股(或沽股)無住而不利。如果大方向轉咗都唔知，就會話「跌到21000點係跌無可跌」(呢個世界邊有話股市到咗乜嘢位係跌無可跌)，又或者話「未離場唔算輸」，呢啲說話「好有散戶 feel」，要戒。

    　先答Dai dai的問題，單係睇圖，港股的確有啲向上的走勢，但受制於15000點高少少的水位，未能上破確認升勢。港股長線走勢不能脫離美股，杜指炒上落市的走勢比港股更明顯，向上不能上破兼企定在9000點樓上，向下在8000點又有支持，在1000點之間炒上落，今只是橫行待變，以美股的走勢論，更未能確認已經見底向上。技術走勢要配合基本因素分析，美國經濟亦未見底，好難話股市三個月前的一跌已是熊市的終結。

    　不過我做人的態度是信市場，唔信自己，如果未來見到美股一級級上，突破完9000點，再上10000點，一級級咁向上，就出現一種牛市徵象，若經濟數字亦配合，到時我會隨時轉軚。正如今年5月美股一度出現調整已見底的假象，那時恒指約26000點，我都未放棄牛市的假設，但到6月大市一級級落，美股敗象已呈，到7月已確認是熊市，那時港股還有23000點左右，反手造淡，還有大把水位。唔好堅持自己預存的假設，要由市場的走勢來證明你的假設是對是錯，若然是對，繼續加注; 若然走勢和自己的假設背馳，而且背馳得愈來愈厲害，就要轉軚斬纜，若是炒手，更加要反手做番突。要控制自己睇錯市的風險，才是長炒長有之道。

    　我目前的假設無變，大市之升只是熊市的反彈，股市不能插個不停，大戶係由股市波動中賺錢，造淡又食你，造好又食你，佢食完就走，跟住就反手。這些人為波動就造成走勢的陷阱，令人迷惑。

   　 除了分析大市走勢，更重要是分析自己的處境，睇住自己的環境來控制風,險，爭取長線取勝。講到處境，當然係dogmanstar借孖展炒大咗俾人咬住這種處境最差，明天續談。

陸羽仁

美股在大除夕前送畀投資者一個唔錯的派對禮物。三大主要指數都有顯著的升幅。雖然公佈的消費者信心指數強差人意，跌幅差過預期，但在通用金融服務公司（GMAC）終於獲得財政部撥款資助的利好消息刺激下，市場投資氣氛熱烈，杜指開市即衝破8,500點關口，見8,548點，隨後反覆向上。中午12:00，杜指升至8,637點，上升153點後窄幅橫行。下午3:10，升幅略為收窄至84點。尾市再度重拾升軌，以接近全日最高位收市。。

杜指收市報8,668點，上升184點或2.2%，全日最高8,675點，最低8,487點；標普500指數報891點，升21點或2.4%；納指升40點或2.7%，報1,550點。紐約證交所成交9.5億股。

美財政部週一晚公佈，從問題資產救助計畫(Troubled Asset Relief Program, 或TARP) 基金中撥款共60億美元拯救剛成功變身為銀行控股公司的通用金融。其中包括50億美元購買通用金融的優先股和10億美元貸款予通用汽車，助其貸款予銀根緊拙的買車人士。此舉不但將通用金融從破產危機中拯救出來，亦進一步改善了通用汽車（GM）和佳士拿汽車（Chrysler）的財政狀況。GMAC的兩大股東為佔51%的佳士拿母公司Cerberus Capital Management和49%的通用汽車。通用金融主要業務為向買車人士和經銷商發放貸款。通用汽車昨收報3.8美元，升5.6%；而褔特汽車則升3.2%，收報2.29美元。

另外，因科威特決定取消同陶氏化學的合資計畫，令陶氏化工收購其競爭對手羅門哈斯化工公司(Rohm & Haas)的交易面臨困難。陶氏化工及羅門哈斯化工股價在周一暴跌逾16%。昨日，據金融時報報導，陶氏化工可能動用130億美元的過橋貸款或重議價格，試圖拯救這個規模達150億美元的並購交易。消息令陶氏化工和羅門哈斯化工收回一點失地，股價分別上升1.5%至15.55美元和 11.9%至59.7美元。

　　昨天講走勢，今天講處境，有些時候，睇番自己處境，比睇走勢更加重要，睇走勢唔一定中，睇自己處境就一定中。

　　處境愈差，自由愈少，這是最關鍵原則。假如我啲股票在23,000點以上走哂，賺咗錢喺手，而家揸住100萬現金等買貨，咁就自由度好高。又假如你好似網友Dogmanstar，在兩萬幾點借孖展炒燶咗，成手蟹貨，俾人咬住唔放，處境當然好唔同。

Dogmanstar無話俾我聽佢借咗幾多孖錢，而家還咗錢未，無話俾我聽佢幾多收入，無話俾我聽佢份工有無危機，但單憑孖展兩個字，我嘅既感覺就唔係幾好。借孖展買股票從性質講肯定係炒股，老土啲再講，炒股係要止蝕鮁，假設你25,000點買，跌一成唔止蝕，跌到兩成都要斬清，即係跌到20,000點無論如何要清貨離場，無得守，唔係「一日唔離場未算輸」，而係「一日唔離場可以愈輸愈大」。Dogmanstar講跌穿20,000點開始減啲磅，跌到低位在14,000點至16,000點再減啲，賽後檢討，佢減得唔夠狠，穿20,000點時應一刀斬清。

借孖展買股票，啲股票不斷跌，你就不斷要補孖展按金，等如不斷泵新錢落去頂，好傷，要脫離這種狀況，唯有盡快離場。Dogmanstar話佢「現在已傷亡慘重，現時股票佔他總資產仲有成36%, 我應該點好, 現持有大部份是中資國企, 如857, 883, 941, 390, 410, 2628,2600, 1398, 3988. 我應該再減持定唔好攪佢住?」

假如我係Dogmanstar，我就會再減貨，唔走哂都走一半，盡量保留現金，等低位有能力去買番貨，咁至有得博。佢現在沽貨的風險係股市從此步入牛市，現在的水位已是低位，變咗在低位離場。我唔講走勢分析，假設大市從現水位上升機會有5成，下跌機會有5成，即係55波(這只是假設)，Dogmanstar要問吓自己，萬一估錯咗，大市唔再升反而跌，自己整個財政狀況頂唔頂得順，要唔要補孖展，份工有無問題，老婆會唔會媽叉…….有時呢啲問題只有你自己能答，關鍵是評估風險有幾大，自己頂唔頂得順。在這種百年不遇的金融海嘯，都係細膽少少好。

同一個關於大市的問題，對唔同人可能有好唔同嘅答案，如果那個網友係在高位沽咗貨，有100萬現金在手，好驚大市從此步入牛市，自己買唔到貨，我就話你唔怕買番10%、20%貨，即使大市再跌，買貴咗少少無所謂，你仲有80%、90%現金可以慢慢買平貨。呢位網友要控制手上完全無貨的風險，唔係借孖展揸住成手蟹貨的風險。



股場險惡，唔好以為自己一定啱，要假設自己會錯，諗吓如果自己錯會點，睇住自己的處境，睇錯咗頂唔頂得順，控制風險，股市開到你同我死嗰日都有得開，日日都有得炒，記住要保住條命仔，長炒長有喎。

後記:2008年將過，2009年又到，祝大家09年EQ大大提升，唔再做大鱷點心。網誌在假期後再續。

陸羽仁

總結2008年最後交易日，除了內地A股持續偏軟，主要的市場都造好。港股恆指半日市，上升152點，報14,387；歐洲三大指數均有所斬獲，而美國杜指亦上升108點，報8776點。今日係2009年第一個交易日，但好多投資者仍在放長假，預計交投仍會較淡靜。

踏入2009年的第一天，美國兩個特大的銀行拼購亦正式完成。美國銀行(Bank ofAmerica Corp.) 和股神巴菲特持有的富國銀行(WellsFargo)昨晚分別宣佈已完成收購美林(MerrillLynch & Co.) 和美聯銀行（Wachovia Corporation）的股權。前者總計194美元；而後者則為127億美元。美林股東將以每股普通股換取0.8595股美銀的普通股，美銀週三收市報14.08美元；而美聯銀行股東則以每股普通股換取0.1991股富國銀行的普通股。富國銀行週三收報29.48美元。據報導，美林和美聯銀行仍會沿用其銀行名字繼續經營。

合拼後，美銀已成為全美最大銀行，擁有全球最大的財富管理業務，管理的客戶資產達到兩萬億美元。美銀並表示透過減少重複的人員、設備以及市場營運開支，到2012年銀行的稅前支出可以節省達70億美元。而富國銀行的資產亦增至1.4萬億美元。

紐約原油價格在2008年最後一天意外地勁升14%，收報每桶44.6美元。但全年計下跌了54%，若與7月時的最高位則下跌了69%。全球大宗商品經紀商MFGlobal副總裁Kilduff接受CNBC訪問時話，由於燃油及汽油合約平倉和地緣政治糾紛逼使油價回升。


　上次講完買股無止蝕的困難處境，網友dogmanstar後來有此回應，「陸sir, 您真係講得好啱，我o既處景真係俾人咬住咗，而家盡量高位反彈就減持，管理番風險 (之前以為自己有管理風險其實無)。輸錢因嬴錢起，我而家痛定思痛想慢慢為資產增值。您講得啱，唔好去估個市...但我仲有36%資產係股. 而家真係唔知點處理. 跌到甘殘...想再沽等09年再入番, 但又驚沽左出年續升(因已葬士斷臂，沽左好多啦) 死渣又驚錯失沽貨套現機會．．．．．」

　　後來dogmanstar再覆「陸sir, 您篇"走勢與處境" 真係俾我好多啟示，我已反覆讀左幾次。尢其係您講到處境愈差，自由愈少...好講到我知我既處境．．．我的 margin 已清晒, 但cashflow 都好tight, 我諗我會再係 HSI14000-15000 減持一部份，保住條命仔先。」

　　我反覆講dogmanstar面對的處境，希望無咁o既問題的網友唔好覺得我煩。我好似老師咁，一班有好多學生，有些前進啲，有啲落後啲，有時講多兩句俾落後的學生聽（即係唔識止蝕的學生），希望佢追番上。


Dogmanstar話叫佢唔好去估個市，或者應該咁講，係自己身處股市困境時，唔好依賴大市按自己意願轉好，去帶自己出困境，自己有倉在手，特別是有「死倉」在手，睇市特別唔客觀，所以唔好盡信自己對大市的分析。

　　佢問起「驚沽咗０９年續升」，我又講吓故事，我有個朋友都係炒界高手，佢有一次炒期權做咗好倉走勢唔對辦，月尾結算的日子愈來愈近，若即時斬倉可以執番４０％本金左右，佢當時年少氣盛唔肯斬倉，死揸到尾，在結算日前一晚美股突然大升２００幾點，結果恒指在結算日升咗７００點，佢之前的虧損，竟然俾佢「吹」番番來，由輸１０００萬，變成結果倒贏７０萬，雖然贏得唔多，都算經典之作，佢當時到處同人講呢個經歷。當然，失而復得的確好精彩，呢個故事到呢步驗證咗唔斬倉有時真係可以等得到o既。

　　不過呢個朋友的故事未完，佢嗰個月執番身彩無事，下個月繼續賭，又係揸期權做好倉，結果去到月中大市又回，佢又俾人咬住，人係受經驗影響的動物，佢上個月死坐坐得番，呢個月又係唔肯斬倉，唔單止唔止蝕，仲要傾巢而出去加注，因為愈近月底期權愈平，佢不止蝕反而去增持，係期望最後唔止吹番啲虧損，仲想倒頭贏錢，結果就無咁幸運啦，呢個月恒指一跌跌到尾，佢一Q輸清，將１０００幾萬炒作資金全部輸哂，一個炒手又要重零開始，你話打擊幾大。

　　呢個故事有幾個寓意。第一，當時個市跌勢開始形成，在頭一個月結算最後一日跟美股炒番起，唔單止係美股的因素，相信市場上亦有期指大戶的好倉未清哂，大戶借勢炒番高一日半日平倉，所以大市先至升咁多，但大戶在這個月平了好倉後，在下個月已轉手造淡倉了，大戶來去無踪，佢o既行為唔係咁易估到。

第二，若佢在頭一個月中後段斬倉，輸６００萬，執番４００萬本金，由於呢個月輸咗一半身家有多，下個月佢o既注碼一定會大縮，再輸都唔會輸好多啦。再者由於頭一個月做好倉輸了錢，佢下個月都唔會再造好倉，應可避過最後一刧，最後還有３００、４００萬在手。

第三，事實上佢在頭一個月做好倉結果吹番番來，佢就繼續造好，埋下了一個月輸清的禍根。

我經常講，炒股要贏錢，主要係贏手法，唔純粹係贏睇市，以dogmanstar的例子，如果０９大市無風無浪一直升番上去，佢死揸最後吹番大部份本金番來，佢又會覺得其實死揸都無壞，以後炒股更加唔會止蝕，盲信一日未沽一日未算輸，最後就會一舖輸清。學壞師，贏一次半次係無用o既。

換一個角度，如果dogmanstar再減持到自己舒服的水平（未必要一股都沽清），有現金在手，假設真係睇錯，０９年牛市開始，大市開炒番向上，你有錢唔驚無股炒，如果個市咁好，係一輪輪咁炒，係一個個行業咁炒，你到時去搭順風車，亦唔驚無車坐。

牛去熊來，熊去牛來，一百年都係咁，估得中當然好，但最大問題是估唔中會點，要控制估唔中時的風險，才是長炒長有之道。

陸羽仁

上星期五2009年第一個交易日，除了內地因假期休市外，亞太區、歐洲以及美股都送了投資者一份很不錯的新年禮物。港股尤其厲害，勁升655點，收報15,043點，重上15,000點樓上。

當晚美股三大指數表現也不俗，雖然公佈的供應管理協會生產指數（The Institute of Supply Management manufacturing index）下跌至32.5，乃28年以來新低，不過，市場似乎已做好心理準備，而「新年新希望」效應令投資氣氛變得高昂。杜指在上週五開市後首30分鐘有點反覆，最低見過8,761點，微跌16點後即反彈，隨後穩步上揚，直升至接近全日最高點收市。杜指收市突破9.000點大關，報9,034點，大升258點或2.9%，係接近兩個月以來的高位。去年，杜指首個交易日下跌了221點。而今年則係歷來新年首交易日升幅最高的第二大，第一大是2003年，當日杜指上升266點。標普500指數報932點，升29點或3.2%；納指升55點或3.5%，報1,632點。正如所料，紐約證交所交投淡靜，全日衹有10.5億股易手。

美股上周一片好景，但今週又要面對嚴峻的挑戰，在這個週末，勞工部將會公佈非農業職位數字以及失業率，而汽車製造商今晚亦會公佈的12份汽車銷售報告，據CNBC的Phil LeBeau表示，市場傳聞數據將會非常差，全年的銷售會跌至1000萬部以下，投資者可能又要做好坐過山車的準備。

杜指期貨最新報8940點，跌18點，比現貨低水94點。商品期貨全線上升。包括鋁、銅及銀都有約2%的升幅。而黃金亦有輕微上升，最新報每安士883.6美元，較上日升0.5%。

以色列軍隊上週六越過以巴境捉拿哈馬斯武裝份子，中東局勢更形緊張，以及尼日利亞的嫩貝(Nembe) 油田受襲擊而減產，推動油價上升，紐約NYMEX原油最新報每桶47.87美元，比上日收市升1.53元或3.3%。

美國聯儲局成員、三藩市聯邦儲備銀行主席尤愛倫(Janet Yellen)的講話值得注意，佢在三藩市發表演說，話美國經濟正經歷一次急促收縮，失業率註定要上升，佢認為美國經濟面臨嚴峻危險，會在未來一段時間停滯不前。在未來幾年，通漲率低於理想水平的機會很大，而聯儲局在未來要堅定地推高通脹，政府要用各種財政政策刺激去阻止衰退。

艾愛倫的發言顯示聯儲局內有愈來愈多委員支持刺激經濟的新措施。不過她亦表示，聯儲局以資產負債表支持經濟的手法，亦面臨新挑戰，因為並無先例去指導聯儲局作何種水平的干預。
她認為，聯儲局要在適當時機中止它的特別借貸計劃，因為很多干預手法都是新鮮做法，無直接方法可以衡量其效果，所以聯儲局要有「退場」措施，當這些緊急措施不太需要時，聯儲局就要及時中止。自2007年底次按危機開始惡化後，伯南克推出共2萬億美元的借貸計劃，如今借貸市場開始穩定，艾愛倫就提醒聯儲局要收收掣。

從聯儲局這些要員的講話，可以看到美國的金融危機確有穩定下來的趨勢,但他們對美國經濟的看法卻甚悲觀，例如艾愛倫講有一段時間停滯(stagnating for an extended period of time)、未來幾年都會低通脹等等，都唔係講緊三幾個月就會無事，似係一個L型的估計。做生意的朋友，要做作長期過冬的預備。

陸羽仁

雖然亞太區、歐洲股市普遍造好，油價續升，但美股週二未能承接升勢，杜指開市20分鐘已下滑117點，報8,918點，跌回9,000點下方。隨後即反彈上9,010點，在9,000點附近約70點間窄幅爭持。下午2:00，杜指嘗試突破昨日的收市位，未能成功後調頭大幅滑落143點正全日最低的8,892點才喘定; 尾市反彈，但始終未能跨越9,000點關口。

杜指收市報8,953點，下跌82點或0.9%，全日最高9,034點，最低8,892點；標普500指數報927點，跌4點或0.5%；納指微跌4點或0.3%，報1,628點。紐約證交所成交回升13.2億股。

在「新年新希望」效應下，美股09年首個交易日氣勢如虹，大漲258點，但樂觀氣氛沒能維持多久，就給疲弱的經濟數據打破，投資者又要面對現實。上月可說是汽車製造業的嚴冬，各大汽車公司除了Subaru有輕微的0.1%升幅外，其餘世界各地的公司銷售都下跌。其中以美國佳士拿汽車（Chrysler）最為慘烈，較去年同期大跌53%！而豐田汽車（Toyota Motor）、本田汽車（Honda Motor）、福特汽車和（Ford Motor）及通用汽車（General Motor）均齊齊下跌逾三成，美國、日本車廠齊齊衰，至於德國的汽車製造商Daimler也錄得23.5%的跌幅，而旗下的平治汽車(Mercedes) 亦下跌了32%。若以全年銷量計算的話，跌幅最大的是通用汽車，跌了23%，難怪差不多要執笠; 相反較好的是本田，亦跌了逾8%。

對美國汽車業來說，2008年銷售是自1992年以來最差的一年。據AutoPacific的分析員Stephanie Brinley話，汽車業在2010年可能更加惡劣。她認為「這不是油價問題，也不是信貸問題，而是消費者信心問題，而且更是全球性的。」

通用汽車12月份銷售雖然下跌31%，但卻好過市場預期的下跌41%。所以股價不跌反升1.6%報3.71美元，連帶褔特汽車也造好，報2.58美元，升4.9%。而豐田及本田則下跌1%及2%。

美國經濟咁差，但股市卻仍在近9000點上方徘徊，除了新年效應外，主要是市場對奧巴馬上任及其救市方案有憧憬。全世界都在救市，英國、德國接連出招，奧巴馬更為救市方案不斷加料，加入大幅減公司稅的內容，企圖換取共和黨議員支持。

《華爾街日報》報道，美國候任總統奧巴馬提出的7750億美元刺激經濟方案中，將包括向個人和企業提供高達約3100億美元(逾2.4萬億港元)的減稅，佔刺激方案4成左右，減稅幅度遠超兩黨國會議員的預期。有關消息成為昨日刺激全球股市上揚的動力。

奧巴馬3100億美元的減稅大計，希望能在2011年前「創造或保住」300萬個職位。救市大計中個人減稅部份要用1400億美元，可獲減免的對象包括年收入20萬美元(逾150萬港元)以下的個人，直接向個人減稅500美元或夫婦減稅1000美元的即時減稅。

不過奧巴馬方案最有新意的是企業減稅部份，企業這兩年如果有虧損，過去5年繳交的利得稅可獲退稅來抵扣虧損。另外新聘或續聘員工的企業，這些公司將可獲得一年的稅收減免。

共和黨議員一直強調，刺激經濟計畫應該更依賴大幅減稅而不是擴大政府支出，而奧巴馬卻聽從自己的經濟專家勸告，認為布殊政的減稅或退稅無長遠效果，應著眼於基建投資提供就業以刺激經濟。但人總得向現實低頭，奧巴馬若堅持己見，救市大計難望得到共和黨支持，所以唯有大量增加減稅的內容，減幅隨時誇張過布殊上任頭兩年的減稅額，以換取共和黨的支持。

不過共和黨人會否在通過計劃時再玩一玩奧巴馬，亦未可知。過去在共和黨執政的尾段，國會兩次通過救市方案時，共和黨人都相當獨立，在第一階段投票反對共和黨政府提出的方案，到政府再讓步時才表態支持。今次換了一個民主黨總統，即使救市大計包含減稅內容，首次投票時共和黨人也可以反對，逼使奧巴馬加入更多共和黨支持的主張，才投票支持都未為遲，如今是民主黨人執政，自然係你緊張過佢。

奧巴馬上任及推出救市方案，由於這是預設事件，所以利好因素會提前逐步反映，現時股市就是在炒對好消息的預期。到好消息實現時，股市反而會回吐，所以要看目前還在炒緊好消息時，美股可以炒上到乜嘢位了。

陸羽仁

歐洲三大股市造好，杜指跟隨，美國市場憧憬候任總統奧巴馬的7,750億美元刺激經濟方案和減稅政策會有助挽救經濟，杜指開市即衝破9,000點關口，上升111點至9,064點後，即打回原形，在11:00許再重拾升勢，至下午3:00升至全日最高的9,088點，然後略為回落。

杜指收市報9,015點，上升62點或0.7%；標普500指數報935點，升7點或0.8%；納指漲24點或1.5%，報1,652點。紐約證交所成交與上日差不多，共13.3億股。

美股昨日走勢反覆，上升動力主要來自市場獲悉奧巴馬已向幕僚透露救市總額達到7,750億美元，投資者憧憬計劃好快落實。加上救市計劃中包括了平均每人獲減約500美元的稅務優惠，推動狄士尼、惠普和花旗集團股價均上升逾3.4%。

推拖累大市的力量則來差勁的經濟數據。最新公佈的11月份工業訂單下跌4.6%，跌幅遠超預期的2.3%，繼10月份大跌6%後，再一個月急跌。另外聯儲局12月16日公開市場委員會的議息會議記錄公開，顯示儲局諸公擔心美國經濟會有嚴重危機走向衰退，他們預計第四季度經濟活動嚴重收縮，增長受壓，高失業率將持續到2010年。他們亦擔心會出現通縮，所以曾經討論過訂立通脹目標，以阻止市場產生通縮預期。

另外，全球最大的鋁生產商美國鋁業（Alcoa Inc.）宣佈裁減公司約13%的員工共13000人。美鋁同時減產75萬噸或公司總產能的18%，涉及產值9.5億美元。因為全球經濟衰退，汽車、電器及電網用的輕金屬需求不斷下滑，而鋁金屬價格亦較去年下跌36%。美鋁的行政總裁Klaus Kleinfeld 話，「這是非常時期，需要快速和果斷才能應付現時的經濟不景氣。」市場人士估計，若鋁業需求和價格再下跌，美鋁可能再有裁員減產計劃。

睇住美國大公司咁裁員法，失業率無可能唔高，美鋁裁13%人都怕止唔到血，而家美國大公司一係唔出手，一出手就裁10%以上人手，而且開完一刀唔夠又開一刀，所以候任白宮經濟顧問薩默斯話到今年年底，美國失業率會升到10%，真係好有機會實現，冬季會幾漫長。

嚴冬會死人，繼早前一個法藉基金阿頭因為投資在馬多夫的騙局而割脈自殺後，德國鉅富麥克勒(Adolf Merckle)在本週一晚跳火車軌自殺，被火車撞到散哂，他的家族公司欠下50億歐羅(67億美元)鉅債無法償還，當債權人打算拆散他的公司抵債時，他選擇結朿自己的生命。


Adolf Merckle曾是福布斯全球排名第94位的富豪，身家92億美元(717億港元)，照樣在呢次大風浪中沉船。佢家族經營水泥、藥業和機械生意，佢o既災難源於在2005年收購海德堡水泥公司(HeidelbergCement)，因為呢單收購，令佢家族公司欠下巨債，並將旗下股票按哂俾銀行，導致今日之災，這是一個過度擴張遇上經濟逆境的典型悲劇。

人黑起上來有條路，熊市買跌都要輸，佢旗下公司沽空大量 Wolfsburg公司(即Volkswagen旗下公司的股票)，賭Volkswagen會玩完，點知由於該公司股權太集中，出現經典的挾淡倉事件，股價被人挾住狂升，Adolf Merckle的公司賭輸了4億歐元，佢本來已經無乜水，諗住賭一舖博番，點知咁都輸埋，現金緊絀，就送了Adolf Merckle上絕路。

我在去年5月後已叫做生意的人小心風險，話呢個浪唔係人咁品，可以輸死好多人，而家睇佢仲會玩多一年或以上，記住生存係最重要，賺錢仲係其次，在一個通縮的世界，啲嘢會愈來愈平，購買力愈來愈高，唔輸已經係贏啦。

陸羽仁

港股插完美股真係跟住插。美股受龍頭企業裁員和調降盈利預測，以及日益惡化的就業形勢打擊，杜指走勢惡劣，開市已跌穿9,000點大關，並於5分鐘內急插158點，之後略為反彈45點已支持乏力，杜指重拾跌勢，一直跌至全日最低的8,720點，接近收市才喘定。

杜指收市報8,770點，大跌245點或2.7%，為去年12月1日以來最大的低幅，09年的升幅亦差不多一鋪清袋。杜指全日最高8,997點，最低8,720點；標普500指數報907點，跌28點或3%；而納指表現最差，跑輸大市，下跌53點或3.2%，報1,599點。紐約證交所成交12.3億股。美股守唔住9000點，看來又會展開一浪向下調整。

「新年效應」隨著時間淡化，市場上壞消息此起彼落，投資者的樂觀情緒備受打擊，終於回歸現實。失業消 息續來，繼美國鋁業(Alcoa Inc.) 昨日宣佈裁員13,000人後，APD企業服務組織(ADP Employer Services) 報告顯示，佢地調查12月份美國職位縮減69.3萬，遠高於預期的49.3萬，為2001年有調查以來的新高，預計勞工部本週五公佈的失業數字會大升。再原油價格受能源部公佈每週庫存上升多過預期的消息影響，加上以色列誤炸加沙的聯合國學校有機會促使提早停火，油價大跌至每桶42.37美元，一日急跌12%，令油股顯著下挫。艾克森美孚和雪佛收報78.25美元，下跌2.6%和73.96美元，跌4.4%。

時代華納和英特爾兩大龍頭企業齊發盈警。時代華納第四季因營運成本大升，預警2008年會有虧損，股價大跌6.3%至10.29美元。美國晶片巨擘英特爾週三對第四季營收發出第二次預警，話個人電腦需求較佢擔心的還要疲弱。英特爾將其第四季營收預估調降至82億美元，11月時該公司已預警第四季收入約為90億美元，10月時曾預計營收為101-109億美元，即係話預測愈調愈低。

Solaris資產管理公司的分析師Tim Ghriskey話，英特爾明顯將進入企業盈利的悲慘期，它是業界領頭羊，它的跌幅將拉低整個行業。 英特爾股價收挫6.05%，觸發市場對科技公司的普遍憂慮，該行業其他公司股票也大幅跳水。費城半導體指數重挫4.9%。分析師話，經濟疲弱之際對個人電腦的需求放緩，不可避免將衝擊個人電腦、晶片和軟體廠商的獲利。他們估計消費者開始轉向購買更便宜的筆記本型電腦。

金融海嘯害死人的消息陸續有來，在德國鉅富麥克勒(Adolf Merckle)瞓火車軌自殺的同一日，波士頓地產拍賣商Steven L. Good在波士頓市郊自己的積架車內吞槍自殺，沒有留下遺書，估計也是不堪生意失敗而自殺。佢係波士頓地產商協會前主席，旗下公司是波士頓最大的拍賣行。Good死時52歲，子承父業，其家族公司過去50年經手做了90億美元的地產成交，咁大間拍賣行，面對一場金融海嘯，一樣頂唔順玩完，呢一浪有好多有錢佬中招也。

講起中招，都未夠印度的科技大王Ramalinga Raju咁誇，佢爆出繼馬多夫事件之後最大的金融醜聞，馬多夫搞的是龐氏騙局，佢搞o既係「安龍騙局」，大家都知安龍曾是全球第二大營業額的公司，後來爆出全部係假帳。呢個Ramalinga Raju的Satyam Computer Services Ltd，係印度其中一間最大資訊科技公司，佢昨日宣布辭去公司主席一職，並承認製造逾10億美元的假賬，公司的資產和盈利全部係假嘢，消息令印度股市發生大地震，SENSEX指數單日大瀉7.3%。

呢個Ramalinga Raju間公司個名叫Satyam，名字的意思係「真實」咁解，呢個故事教訓我地，逢係話自己老實的人，十個有九個都係古惑仔，真係老實人就唔使以「老實」兩字作招牌。

Ramalinga Raju上個月曾經想將私人持有的兩間公司買俾自己的上市公司Satyam Computer，真正的動機唔係想滾上市公司o既錢，而係透過這個安排把504億盧比(10.3億美元)假資金注入上市公司內填數，但股東反對這個收購私人公司行動，Satyam的假帳再遮掩唔到，終於爆煲。

紙包唔住火，Ramalinga Raju向印度交易所寫信自爆，話佢自己的公司Satyam的536億盧比現金和504億盧比銀行存款，其實並不存在。佢公司話經營的毛利率有24%咁高，其實只得3%，公司話營業額有270億盧比，其實只有210億盧比。呢個假局能夠頂得住，全賴老細Raju把自己的股票按俾銀行，借咗123億盧比現金來撐住，玩緊o既係「十個茶煲三個蓋」的遊戲。Raju話呢個假局出現咗好多年，佢就好似騎住一隻老虎咁樣，唔點識樣落地而唔會俾老虎食咗，可能印度人都有「騎虎難下」呢句成語。

Raju營運咁大間科技公司都爆煲，令印度科技業和企業管治聲譽受到重創，一間大公司盤數可以咁假，其他公司仲信唔信得過呢?

唔好淨識笑人，香港有咁o既公司一啲都唔出奇，佢地在好市的時候，唔會爆煲，漫長的熊市好易令做假的公司水落石出，各位老友執生啦。

陸羽仁