世界金融市場昨晚認真精彩，首先上演一幕日圓狂升潮，在套息交易拆倉影響下，日圓昨日本已急升，到美國市時段更美元兌日圓更跳崖式下跌，日圓一度升上１１２的年內新高，相信日圓一升穿１１５水平後，觸發大量套息交易止蝕盤斬倉，把日圓急促推升，因為日圓升到一定程度，對沖基金計埋賺息差都要蝕時，就被逼斬倉，形成美元兌日圓跳崖急跌，當時成個商品及金屬市場都大混亂，金、銀、銅、油價都跌，市場恐慌觸發炒商品的對沖基金也要急急平倉。

　　美股當時亦相當大鑊，道指最多跌過３４４點，不過尾市又神奇反彈，之前受創最深的金融股反彈最多，美國第五大證券行Bear Stearns獲得新資金，股價大力反彈１３％，結果道指無事收場，只是微跌１５點，而標普５００指數更升４點。

　　美股回穩利好亞洲市場，但日股開市仍跌２００點以上，因為日圓急升，對出口商影響很大，出口股帶頭急跌。

　　以日圓利差交易拆倉為例，按傳統智慧，經過昨日美元跳崖式下跳，已觸發大量平倉盤，要沽都沽了，後市應趨向穩定，但近日金融市場跌到出「災味」，無人講得實日圓會否再升，不過今早美元已反彈近１１４日圓水平。

　　呢次搞到出災，相信美資大行和聯儲局都有跌眼鏡，初時美資大行自己成手次按貨，本來唔信次按爆得成，聯儲局亦認為無事，大家有共識。後來出現信心危機，令次按證券價格急跌，美資大行知道唔掂，但聯儲局到今天仍然話無事，依然企硬，無格老當年咁手鬆隨時放水，所以好多人估美國會突然減息，但睇聯儲局的態度，機會不大。

　　講番香港，陸羽仁建議大家做做功課，睇番自己的組合，諗吓自己想點，再定行止。現時的市況仍極之波動，大上大落，風險不低。

　　如果自認係投資者，係羔羊，恒指破了２１０００點的大位，雖然蓄勢反彈，不過後市係點無人知，第一個動作是檢視風險，要問自己接受到輸幾多錢，再做風險測試，問吓如果彈完再跌２０００點，自己頂唔頂得順，會唔會吊頸，有問題就要撤退，要早早減持唔係增持。

　　如果問完睇完，發覺自己再跌頂得順（生理上及心理上），不想沽貨，這也無妨，但要保留的主要是你有認識的優質股，舉一個例，中移動（０９４１），出完業績，你估佢全年每股可賺４元，２０倍PE可值８０元，理論上現價可吸，唔係要沽。但你要問兩個問題，第一要問目標股份投資收益多不多（是不是靠炒A股有此盈利），第二是假設衰起上來股市再大跌，高增長好股也只值１５倍PE，不排除佢可以跌到６０元，若你仍然話頂得順，想長揸，就可以分段小注買吓，如果覺得唔啱路，就唔好買啦。一句話，而家買股，要預咗佢再跌幾鑊，預咗要長揸，你頂得順至好買。

　　如果自問是投機者，係老鼠，我只能話買任何嘢要嚴守一成止蝕，因為個市有災味，住後大升大跌的可能都有，無人敢話無事一定升。

　　不過炒作除了炒方向之外，亦可以炒波幅，網友fisherman8850話早前聽了我的建議，買了一個馬鞍式窩輪組合，昨日計數有３０％利潤。其實未來都是大上大落市，兩三個月內，急升２０００點和急跌２０００點的機會都有，維持現水平唔郁的機會反而較細，而家又係買馬鞍式窩輪組合的時候，個市波動，期權溢價高，但窩輪溢價低，揀上下都略價外的認購輪和認沽輪（唔好揀會打靶的牛熊證），同時買入同種的認購輪和認沽輪，博在下一步大波動後平倉賺錢。炒輪有風險，買入馬鞍式窩輪組合，風險係個市係現價點咗穴唔郁，咁窩輪就會不繼咁輸時間值，唔對路亦要止蝕。記住，睇唔明或者唔想炒者，就唔好學了。

後記：同意網友阿K的意見，無炒過輪者，價內價外都唔識分，唔學好過學，而且窩輪不能長揸，咁上下賺蝕都要走，新仔唔識去死守，隨時輸死。

陸羽仁

　　唔知係唔係大鱷輸咗錢要搵番小小使用，所以港股今日上演一幕血流成河。港股期指開市升１００點左右引人買，跟著就插，插穿２００００點重要心理關口後，上午已經跌穿１９８３０點的２５０平均線。

　　中午日圓再升上１１２，日股尾市急插，由跌３％變為跌５％，跌成８００點。港股下午兩點半一開市就低開幾百點，１９５００都守唔到，穿埋１９４００點，最多跌１２００點，所有散戶面色大變，炒即日鮮博反彈者輸得最慘，全線打靶。

　　不過下午港股最後一跌時，美股S&P指數期貨其實升緊，歐洲開市多數都微升，但港股仲要插埋最後一轉，盡殺博反彈的好倉，然後才大反彈，有少少人為食你糊的味道，最慘是不少散戶在二點幾被經紀行追孖展，唯有不問價斬倉，血流成河，呢吓「最後一跌」踩死好多人，死哂人個市才急彈。

　　最後反彈亦係Deep V或咁上，可以話一挾就上，反映沿線有大量淡倉，一直等食糊，見到穿１９４００點後彈上來，亦急急止賺平倉，所以上來亦上得好易，大市從最低位計最多跌了４１００點，一日亦跌了１２００點，淡倉獲利已深，一彈亦觸發好多平倉盤。結果現貨恒指最後跌２８８點收場，以２０３８３點收市，收回今日大部份跌市失地，從低位反彈了過１０００點。期指收２０１８７點，低水２００點。

　　不過個市穿埋２５０天線，技術走勢極差，未來即使再反彈，恐怕仍有反覆，各位網友要量力而為，買又好，沽又好，都唔好博到咁盡啦。

陸羽仁

　　美國聯儲局出手減貼現率救市，美股大反彈，今早亞洲市場普遍反彈，日股彈升５００點以上，升超過３％，日圓匯價亦初步穩定下來，做１１４．３日圓左右，看來風暴會先定一定，港股會有像樣反彈。

　　網友們最關心的問題是港股是否已經見底，甚至可否瞓身入貨。我諗「瞓身」兩個字一定要戒，我星期五聽到不少散戶，甚至大散戶被人斬倉，斬到喊，真係喊嗰種，有人借兩三成錢孖展（本來唔算多）買雞股要斬首，有些有錢o既大散戶做了結構產品，同樣要補孖展，即時補唔到就斬，隨後個市彈番都唔佢事矣。

　　次按危機比想像中大，主要是大家估唔到那些次按CDO，有「AAA」評級，竟然會騙人到這個地步（見今天頭條日報專欄），原來評信貸級機構也是幫兇，而家發現評級機構穆迪，在０２年至０６年間，為這些次按CDO評級，總共獲利３０億美元（２３４億港元），這生意佔其母公司利潤４４％，你就知這是一個什麼遊戲。既然是如此騙人的遊戲，不同於一般危機，其深度好難見底，因為它會令好多本來不想冒險的機構投資者落叠，影響之廣泛會照乎人合理之想像範圍。

　　美聯儲減貼現率利息後，市場初步穩定，但次按呢鑊唔會咁快完，對債市和美國金融市場的影響，肯定大過９８年長期資本對沖基金爆破。所以呢一次跌市不同今年３月那一次跌市，那次雖有次按問題，但主要衰日圓套息交易拆倉，當時日圓拆倉交易一定下來，住後港股就係一條直路，我怕今次可能係一條彎路，住後仍有風險。

　　未來有幾個可能，第一，美股又無事，港股又無事，立刻照炒過。第二，美股好傷，要養傷，但港股無事，自行炒上。第三，美股鑊未完，彈完再尋底，港股亦彈完再回吐，也要養傷一排。

　　我希望港股無事，但無絕對信心，正如早前所言，主宰股市的環球大鱷亦受重創，它們回過頭來，想在亞洲搵點使用，要搵食，就要大波動，大力推升和大力再插低都有可能，令市場走勢更難測。

　　所以我只我作一個「量力而為」的建議，想買股的朋友要量力而為，不應瞓身。第一，本身已好重貨者，唔好瞓身加注，不要輸咗錢希望一注贏番，財不入急門，無咁易翻身。第二，另一種極端，本身早已清貨者，由於大市的確有可能已見了底，不妨酌情加注，但也不要一注推出枱面，分注買入優質股，安全啲，唔好博撈最低位了。第三，中等人家，手上都有唔少貨，可以小注怡情，追番少少貨。

　　若你又想買貨又怕痛，有一著「買一半」的技術，係穩陣老師父教我，適合穩陣網民參詳。假設你有１０萬元，覺得股市見底，通常就會一注瞓身，把１０萬一注買哂一兩隻股，萬一買完後不幸股市再跌，你就唔知斬唔斬好。老師父話一般股民興一注買哂，特別在氣氛好時買（或者似而家氣氛開始轉好），好易短期摸頂，所以他會分兩注（分三注亦可），假如睇中了中移動，佢今日造８５元，先買一半，另一半跌低１０％（即７６．５）才買，如果咁「幸運」買到，即股市再大跌，你的平均價都低５％。如果咁不幸買唔到，你都買了一半平貨，唔應抱怨，散戶面對的情況，經常是有股無錢買，不是有錢無股買，你有餘錢，將來還有大把投資機會。

後記：阿爺在中午出手，話放寬試點讓大陸人買港股，本來在天津濱海試點，每人上限５萬美元，但如今改為不設上限，阿爺托市訊息明顯，外資蜂擁入市，大市升幅加倍，估計次按危機仍有餘波，但阿爺出埋手，確認大市早前已見底，可以把這條反彈彎路拉得直一點吧！



陸羽仁

　　美股道指升４２點，市場相信聯儲局會控制次按危機，看來減息已初步穩住環球股市。港股再升多的，回到２２０００點樓上，就好似無事發生過，不過中間的起伏波動，已殺死幾許股民，當中有些殺人事件，值得提出來等大家參詳參詳。

　　上星期五下午開市一插入１９３８０點時，已把不少股民坑殺。第一種，炒雞股低價打靶。由於當日嗰市跌得太嚇人，好多已從高跌咗一半的雞股，再跌多一半，即係等於高位跌了７５％，嚇到股戶被逼打靶，亦有按了股票借了幾成錢，再急跌時要補倉，補唔到就打靶，有經紀話有個師奶客唔見咗百幾萬，急到喊，都無人幫到佢。

　　呢個故事教訓我地：雞股風險高。我記得股市最風光時，好多網友話自己阿媽點炒點炒賺幾多，教極佢都唔聽；到股市急跌後，大家應明白雞股風險好大，炒得雞股，食得咸魚要抵得渴。

　　我經常講炒股要一成止蝕，網友話雞股一開始跌就跌兩三成，過哂止蝕位，止唔到蝕。事後去看，即使過咗止蝕位忍痛打靶，都好過死守。因為開始唔止蝕，最怕後來遇上大跌市，被人／被市場逼到要止蝕，輸得少時唔止蝕，輸得多時被逼止蝕。早早止蝕，想再炒雞股，而家還有大把機會撈平貨。

　　第二種是炒期指被逼斬倉，散戶炒期指輸多贏少，在三月後開展升浪時，好多散戶做淡，一路輸，輸到２３０００點才開始打靶，到跌下來又好多人沿線撈底做好倉，到星期五那種市況，左一巴右一巴，一插下去將所有好倉殺清，無人忍到痛不斷補孖展唔平倉。到股市急彈，又將一眾跟沽者殺哂，咁波動既市，炒期指輸多贏少，呢次真係輸到人喊。

　　呢個故事講了個老生常談的道理，期指唔易炒，咁波動o既市更難炒。

第三種死法是做了結構產品打了靶，市面上好多投資結構產品以高息為包裝，例如ELI，Accumulator之類（唔知佢係乜的讀者亦不用深究），在２３０００點樓上，個市有少少敗象時，都湧咗一大批產品出街，上週五好多做了這些產品的客戶打靶，有些人因為要補孖展補唔到被逼斬，更多係好怕要孭上身夾硬平倉。試想買個Accumulator有長到兩年期，日日接貨，如果隻嘢急插到比接貨價低一、兩成，持貨者諗起要接貨兩年，當年腳軟，唯有止蝕平倉，你要在上星期五咁波動的市況平倉，自然只能用好賤的價格，大出血平倉。

　　好多人做這些產品是貪高息，例如年息２０厘，和兩隻紅色股掛鈎，以做時的８５％股價接貨，我在２３０００點的時候，見這些產品的利息突然抽升，已經叫好多朋友唔好做，話風險好大。

　　做這些產品等如沽出認沽期權，我o既理論係做期權沽家，只能夠在平靜市做，不能在可能波動的市況去做。見到期權金大升（等如那些結構產品的利息），即係話引申波幅好勁，風險當然好高，所以見到期權金高時，一般散戶會被吸引去沽，其實應該去買，大波動市，買期權者隨時扑中，你去沽就好大鑊。呢個故事教訓我們，不要在波動市貪高息或高期權金，走去沽期權或買結構產品。

陸羽仁

轉貼者註：看來今天陸羽仁要來個言不驚人誓不休.


　　陸羽仁跟中環茶友傾偈，大家都對這種狂升急跌的市況嘖嘖稱奇，話這幾天每天１０００點以上的升跌幅度固然是９８年金融風暴之後所未見，特別是「波子機式」彈來彈去每天１０００點上下波動，更是前所未有，好像昨天早狂升到２２７００點時，好友狂呼慶祝，到下午打回原型，又到淡友發圍，好友、淡友都曾經中獎，若未平倉，最後誰是勝利者，有誰說得清。

　　陸羽仁認叻，話自己一直估是大波動市，講過好幾次升２０００點和跌２０００點都有可能，之後多次大幅波動。茶友們紛紛柴台，話如果唔炒波動，估中都無獎。

  　陸羽仁被茶友激發，唯有逼出幾個觀點：

第一，在這種大波動市，走勢分析並不可靠，論走勢上週五恒指一舉跌穿１９７３０點這個２５０天平均線位，急插向下，大市走勢劣極，論走勢要試１８０００點，怎知卻大反彈。反彈彈到跌幅一半，到２１８００點應有阻力，但在昨天上午卻一舉升穿阻力位。昨日升穿阻力一舉破上月期指結算時的２２７００點，股市應該大好，但卻即時調頭急落。股市昨日升１０００點後單日轉向，按走勢應該大壞，但按近日股市唔跟走勢的運作方式，又好難有看淡的結論。一句話，信走勢去炒作，死得人多。

第二，大波動的成因是次按危機這種拉跌力量，和聯儲局救市及大陸資金自由行這些拉升力量的角力；是跌市累積的淡倉和潛藏好倉的較量；各方在跌市後、特別在阿爺公布資金自由行後，要調整策略急促變陣。

第三，陸羽仁靠估，本月的大波動未完，到臨近期指結算（如果不是更早的話），又會大幅波動，走向本月結算的終極方向。

第四，股市未來幾個月的中期波幅更大，是上下３５００點以上的幅度，如果升，會升穿２５２００點，如果跌，會見１８２００點的水平，睇好睇淡，還有好深水位。睇好的理論是大市經過五輪急跌，經歷兩個成交過千點的跌市，要估的沽得八八九九，打好個底，再向上拉升時，一定會大幅超過上次高位２３５００點。看跌的理論是大市急跌後，一度反彈３０００多點，差不多再上高位，若再下跌破位，應要再深度尋底了。總而言之，股市在現水平上下１０００點牛皮的機會頗細。

陸羽仁自己略為睇好，主要是阿爺公布的資金自由行，雖然只是試點，長遠好大件事，讓大陸人不限量來香港買股票，有拉近A、H股差價的作用，A股炒得火熱時當然無人來港炒股，A股一靜少少，內地資金就湧落來炒。

　　　若果我係外資大戶，在這種形勢下，較難做淡，一則大市已調整，二則若隊到咁上下，阿爺又再擴大資金自由行的幅度，好易被佢挾死，所以昨日早市港股一度喪升，我估有沽空H股的對沖基金，要急急入市補貨，驚被人一Q清袋，所以買得咁狼忙。

這些大波動市，也是搵錢的好機會，愛好炒作者可以炒波動搵食，但炒單邊者好易中招，衰起上來一天之內被人左一巴右一巴打兩巴，這幾日手風唔順者，最好暫時作壁上觀，唔炒好過。炒期指、沽期權更隨時輸身家。

這些波動市亦對不愛炒作的投資者不利，在波動中好易上錯車，例如你睇好，昨日見個市狂升追貨，一追就坐艇。這種市況，極端考驗人類的EQ，直覺感覺，如果你EQ夠好，持貨沒有在大波浪中被震走，將會有不俗收穫。

陸羽仁

　　美股道指升１４５點，外圍進一步穩定，利好港股。恒指昨天大升６００點，不過昨日亦是近期略為穩定的升市，因為它不是一抽狂升那種，而是一級一級咁升，升百幾點又回百幾點，一步步向上，是近期首次見到比較「實淨」的升市，一路向上一路回吐，大把時間俾人沽貨，既然有咁充足的沽貨機會都可以升，購買力好強，理論上股市升完可以回吐，網友可以趁回吐吸貨。

　　從窩輪發行商的行為亦可看到一些啟示。港股波動幅度大，發行商做多錯多，所以拉濶差價，根本唔想你買輪，同時發行商是淨買入，回購街貨較多，散家原本持有認購證不少見大市反彈便平倉，怕大市回吐，開新倉也是買認沽證多一點，也是博大市升得多會回，散戶睇得短，發行商睇得長，你同散戶做相反方向之事，成功機會較大。

　　自從大陸公布「資金自由行」之後，港股市底增強，唯一只餘外圍風險，美國股市久不久亦炒聯儲局減息的消息，部份網友生起不少疑問，就係個市好聯儲局才減息，為何減息係好消息？難道央行能醫百病，把任何衰退都搞番掂？

　　我經常講，美國是萬水之源，是全球資金供應的主要來源，如今全球資金泛濫，和美國關係至大，美國國民胡亂花錢購物，出口國就賺大錢，美國政府胡亂花錢打仗，石油出口國和軍火商亦大蒙其利。不過美國都幾古惑，胡亂使錢之後，除了狂印電腦軟件賺錢之外，還把垃圾級的次按包裝起來，貼上一個「AAA」的評級，賣給歐洲和亞洲，又把花出去的錢吸回來。美國濫花錢按理會造成全球通脤，但中國、印度、解禁的歐洲釋放出大量廉價的勞動力，它們可以用低價賣貨和賣服務給美國，把通脤壓力舒緩，這造成過住幾年高增長低通脤的好環境。

　　一個種金融產品出事，按理只應影響從事有關交易的人士和公司，但正如我在週一的頭條專欄所講，次按包裝出來的產品，由於欺騙性太大，吸引了好多穩陣投資者入市，亦透過對沖基金把問題幅射到銀行體系，所以次按危機爆煲，即時令銀行水乾，金融體系一缺水，再幅射成信心危機，一間銀行唔敢借錢俾人，問間都唔敢借，這就叫做信貸緊縮，股災通常由此而起。雖知金融市場經常存在欺詐，水乾時，欺詐行為就浮現出來，遮唔住，好似炸彈咁連環引爆。

　　這時央行的角色就十分重要，央行放水，流入銀行體系，水一多，搶錢的人減少，慢慢攬住錢唔放者都開始放心，放番錢出來，信心危機過去，市場就回復正常。只要次按危機不向外爆發，只係買次按者才中招，對環球股市的影響就有限。水多時，欺詐事情又會被遮蓋，唔會有咁多公司或基金爆煲。

　　早前市場最擔心聯儲局主席伯南克不願減息，大家都怕他新官上任太學院派，堅持要美國核心通脤降到２％以下，才可減息，若果他堅持如此，在次按爆到七彩時也不減息，通脤數字通常會滯後，到他看到１點幾％的通脤時，可能經濟已經開始衰退。危機不斷深化到不可挽回的地步，股市自然會爆煲，港股跌到１７０００點都未夠。

後來法國BNP旗下基金出事後，美國跟隨歐洲央行放水救市，但聯儲局當時放水是收取較貴利息，舒緩銀行資金緊張作用有限，關鍵要減息，聽金融猛人講，伯南克看到上周五港股和日股的跌勢（日股當日跌５％），怕市場崩潰，最後才決定臨時減銀行向聯儲局借錢的貼現率利息，消息一出，市場相信伯仔會救市，初步回復信心，可見股市升跌，有時還在關鍵人物一念之間。

　　次按的問題根源還在美國樓市，若聯儲局下一步在９月削減聯邦基金利率（銀行間拆借的利率），就會拖低按揭息率，一次唔得，減夠幾次，當可舒緩美國樓市的跌勢，約朿了次按爆鑊的速度，當次按是慢慢爆而不是急爆時，其衝擊可以較易被市場吸收掉，如買了次按的機構，分段撥備，就可以吸收了次按帶來的虧損，所以即使金融機構因次按受損的新聞仍時有所聞，但只要市場相信金融市場將無信貸緊縮，危機就可逐步過去。

後記：期指一開市就升７００幾點，好誇張，領先股好難追，小心高追中伏，但可吼領先行業內落後股，若距高位仍有一定跌幅者，可以尋吓寶，補些貨。




陸羽仁

網友yuki問了一系問題，其中大部份本來都是我想講的入市時要思考的問題，可以綜合講講。

她問：「Luk Sir:The liquidity injection is up to USD172.5億 last night. Do you think the recent crisis is still very serious?

Do you think we can still take the strategy as before, i.e. buying non-leading stocks and holding them? The risk concerned is when great correction occurs, even they have not rebound yet, and they will also fall drastically with the market.

Seeing the small priced stock being active again. Do you think it is time to make short term strategy to speculate them?

Do you think being a 好友 in long term always win? When the market performs well, the central banks do nothing to prevent it being too hot, except the Chinese one. However, when there is serious downturn, the central banks use all measures to help build up the public’s confidence.

I do know the mechanism of straddle and strangle and under what circumstance investors should use it. However, I think there are implementation problems. The cost of using option or futures is too high. If use calls and puts, the effect would be affected on the choice of warrants. Sometimes, the issuers may quote the bid and ask price too wide, the premium may be too expensive to make the strategy not profitable. Can you further explain how to choose the suitable warrant to give a better return, apart from similar expiry date, the conversion price?

You give us an example some days again, i.e. 19800 put and 23400 call which is 1800 points from 21600. That means we need the HSI goes up or down more than 1800 to make it profitable. I am wondering why we don’t us small difference, say 1000 instead of 1800 to make the strategy more easily profitable?」（對不懂英文的朋友，我暫不翻譯，住下會逐一重覆問題）

網友如果是投資者（不是投機者），會被近日的股市嚇親，初時不信嗰市會升得咁快，繼而抱怨，再感無奈，最後會相信，但會怨句信得太遲，甚至衰起上來一開始信佢去入市，佢又回吐，即時中一棍。

投資者會比較遲疑，投機者會搶先，大市初定，炒作香港大市的大戶，便搶先入市，次次都係咁，你未睇定時，佢已把大市搶高，今次所不同的是他們手法更狼，目前已搶過上月期指結算時大市的水平（２２７００點），更令我懷疑佢地大量好倉主力未平倉，所以外圍局勢初定，佢立刻全面發難，根本唔俾淡友有任何機會反攻。

你問外圍大勢，仍在刧後穩定中，所以美國聯儲局仍在放水中，但大勢已趨穩，日本央行決定不加息，日圓一度跌番去１１７水平，套息交易又在日圓高位開倉（紐元現價０．７１７美仙左右，８．２５厘息，半年中期投資有吸引力），次按的問題本質其實好嚴重，商業票據市場目前仍然死咗，但在聯儲局發功放水下，應該又可以把問題冧住，等個鑊慢慢爆。大市當然有風險，目前去買，是險中求勝。

你問好友是否長勝，從一個三、五十年的角度，在一個增長中的經濟，做好友，買佢嗰股市整體向上，道理似乎啱。但從一個兩、三年投資的角度，雖然一跌央行就會干預，但資金泛濫到咁上下，資產泡沫吹到咁上下，就有一爆，那種爆法係央行都頂唔到，二０００年科網潮爆破，就是一例，你高位２８元買了電盈（０００８），現價撇除股份五合一的效應，１元都唔夠，你話好友一定贏，又唔係噃，當然要睇你乜位入，買乜股。

在次按危機和大陸資金自由行一好一淡消息影響下，兩個都係巨大的利好或利淡消息，我傾向睇好港股後市，認為要對港股、甚至香港整個投資市場再評價（我會在周一頭條日報專欄再論述）。

短期紅色指數股超買，高追有風險，但大把股票好落後，好多二、三線的股票，例如二、三線大陸地產股，若大市向好，它們還有好多水位。Yuki問追這種落後股，雖然升咗唔多，但若果再大跌時，會唔會都跌好多。我認為你首先要對大市中線（三到五個月）有個看法，若睇好，可以追；若睇淡，認為港股未跌完，當然唔好追。

至於雞股，道理亦一樣，雖然我唔會叫人買雞股，但若你有買開雞股，低位放咗，好多而家只是升番少少，未大郁，但如果大市向好，過兩三個月，莊家又會再炒過，所以也是睇大市，買唔買就要你自己判斷了。

另外有關馬鞍式窩輪的策略，下星期一再談。

陸羽仁

　　美股道指上週五又升１４０幾點，港股今日有機會搶上高位，甚至挑戰２３５００點高位，不過升咗咁多，又近期指結算，如果買指數股，高追小心中伏。

　　散戶投資股票，通常只有一個目標：爭取勝利，投資前先問自己想贏多少多少，所以買股必問目標價，然後計吓由買入價到目標價，可以贏幾多，發覺有幾成潛在升幅，正！買之哉，等收錢。

　　散戶這種心態，等如你有兩隻眼，不過只用一隻眼來睇嘢，所以睇唔出層次感，立體感，只睇到平面，只睇到買股票的正面，即係贏錢的一面，睇不到股票的背面，即係輸錢的一面。

　　我今日寫這篇文，是從網友常在股的一個問題引起，佢講：『唔好理隻股會唔會最跌,合理就買.低又唔夠膽買,高又唔願沽.成日話長線投資,好股點解要止蝕.』

　　常在股這個問題，表面看十分合理，「好股無需止蝕」，而且要愈跌愈買，正正係股神巴菲特的名言，所以買了好股當然不用止蝕。

　但你有留意陸羽仁平日答網友的問題，好少提「好股無需止蝕」這種說法，網友Reactor答常在股的答案，已說出我的潛在憂慮，Reactor咁答：

「常在股：好股係可以唔便止蝕，但有三個先決條件:1. 真係識得分邊隻係好股。2. 你的好股係平價時入貨。3. 萬一好股的基本因素有變時，識得鬆人。」　

　　Reactor講的是標準答案，股神買股，首先佢識計數，知道什麼是好股，其次佢在好股價錢平時買，最後係佢買入「好股」後，發覺貨不對辦，識得走人。我擔心大部份散戶既不識得分什麼是好股，多數係聽人講，而且即使係咁啱搵到好股，都係在好多人講時、即係好熱門時買，你話邊會買到好價錢，貴買好股，亦不是安枕無憂。我有這麼多擔心，自然唔想答你話「好股無需止蝕」，甚至叫你愈平愈買，除了極少數極少數的例外，這些例外除了公司本身條件極好之外，還有極優良之管理，這一點紅色巨股仲有排學，你看中國銀行（３９８８）有近８００億港元的次按，在次按風暴中，竟然可以唔講，到公佈中期業績要披露時，亦只作出數目有限的撥備，就可以知道「管理」這一門學問，紅色巨企還在學習中。

再講番常在股的意見，佢講出咁o既意見，我估有個背景，港股最近最低跌到１９３８０點，然後奇蹟升番近４０００點，你揸住股票，就好像一瞬間經歷了地獄與天堂，在事過境遷之後，作一個事後孔明，回頭再看，有股票當然唔好咁笨去沽，其實更應該在低位大手買，一買完幾日就富貴，唔買就笨。

時光倒流到大跌市之日（８月１７日），這些說話就唔似而家咁易講，在風暴中的確幾高風險，當日開市２０７６１點計，我當時話那種市況升２０００點和跌２０００點的可能性都好大，結果當日最低就跌了１３７５點，至今就升了２１６０點，其波動性和當時預計好接近。

如果聯儲局主席伯南克當日無減貼現率，如果其後阿爺無出「北水自由行」政策，你估會點，即使有大戶炒作，到是炒高還是炒低，無人知，這些政策何時出台，都是在美國和中國官方機構高層人士的一念之間。我估若兩地政府無出手，若恒指還在２００００點上下浮沈（不要說它還再大跌），大家講的話題就不是「好股唔怕長揸」，而是「為何不早點止蝕」。

買股票不能只看賺錢的一面，要看兩面，要看可能輸錢的一面，要想方設法控制風險，否則無論你賺幾多都好，都好易俾人一Q清袋。市面上有好多股神遊戲，假如我參加這些遊戲，我就會嘢嘢賭到盡，賭輪賭雞股，有咁大賭咁大，博贏幾舖就變股神贏獎金，博唔到都無壞，反正係遊戲，輸咗唔入肉。但現實投資不是股神遊戲，你博贏幾舖，可能一舖輸突，控制風險，極其重要。


陸羽仁

　　我在這裏寫文章，看的人數以萬計，從初入市的新仔，到入市３０、４０年的老雀都有，早前更有自稱９歲的小朋友話係網友，人人水平唔同，經驗唔同，自制力唔同，風險胃納唔同，要寫一篇文章啱哂所有人的程度，實在有好大困難。我有時講投資，有時寫炒作，有時有些好意念，的確忍唔住寫出來，但寫完就好後悔，或許可以從Top Gun的回應講起。

　　Top　Gun之前問過我一些馬鞍式期權的事，我前一日咁答佢：「期權唔啱新仔玩，你都係唔好學啦，千祈唔好同人講，話我教你炒期權，期權也好，窩輪也好，只宜好有經驗的炒家去玩。」我印象中Top Gun話過自己係新仔，我心諗都唔知呢個新仔幾多歲，思想成熟未，如果唔好彩教咗佢炒，佢有事唔識得走，咁咪好大鑊，所以就咁答。

　　後來Top Gun再回應。佢話：「陸Sir :原本好期待你嘅回覆，但今朝睇完好唔開心，唔知係咪自己問嘅問題好蠢，啲概念攪錯哂，所以你都費事再詳細解釋，只係話 : “期權唔啱新仔玩，你都係唔好學啦，千祈唔好同人講，話我教你炒期權，期權也好，窩輪也好，只宜好有經驗的炒家去玩”。我都唔知自己問錯乜嘢令你下如此結論? 明明之前仲聽你講平左先前嘅鞍輪並重新買入組合，舊組合嬴左錢，新組合暫時亦只係平手，但你又突然叫我唔好玩喇…….

初時唔諗住再問你嘢住，自己檢討下先，但係你嘅回覆不斷在我腦海裡，老實講對我信心打擊真係好大，我實在瞓唔著，唯有起身開機，寫下嘢，抒發一下，如有得罪，請多包函。

無錯我知你出發點係好，見我呢個新仔不自量力，唔想我撞大板，但係我真係好比心機去學，呢8個月我睇左二十幾本書，每日由朝到晚都係股票，努力去揾啱自己嘅方向。我三十幾歲人，做木材做左十幾年，高峯時做到部門經理，其后公司結業，就自己開公司做，做左幾年，但從去年開始供應短缺，今年連貨都無，根本無生意做。木材行業式微，揾其它工又高不成，低不就。攞住十零萬，但每个月要供樓要生活，希望盡自己能力，可以在股市殺出一條血路。呢8个月輸過嬴過，各种唔同嘅方式都試下，唔明就睇書，而家主要都係用技術分析炒細價股及窩輪，嚴守止蝕，但呢條血路點殺出來好呢?



P.S : 我原先叫做fisherman8850無出息的漢子」

　　一切都從８月１７日轉角市早上我寫的一篇叫「避險與博矇」的文章開始。我講講當時寫文章的心態，早一日８月１６日恒指收２０６７２點，走勢極差，外圍亦極波動，那日看來都係大跌市的日子，但大市跌到那些水平，再跌一些，當時估會試穿２００００點，從高位回落３５００點，應該跌到夠，是趁低吸納的時候。不過若外圍再出大事，股市若再穿位，就可能是一日跌２０００、３０００點的股災了。散戶只買升或跌，我從來都知道可以炒波動，所以忍唔住在篇文提到，好炒作者可以買馬靶式組合，炒吓大波幅。

　　寫完篇文好快就後悔，第一唔想教人炒作，怕將你地由綿羊變成老鼠，怕你地唔夠精乖，最後變埋死老鼠。跟著見到網友阿K話佢掛咗成日牌都買唔到，結果單邊買咗Put輪，我心諗個市單日轉向，從低位升咗成１０００點上來，點解仲變咗揸單邊Put？如果佢初次做老鼠，仲係我教o既，揸住put輪唔識走，我就罪過甚大。更明白有些我以為好簡單的事情，你們無經驗去做，好易中招。

　　不過事後回看，若那天買了一個馬鞍式窩輪組合，揸到今天，的確可以賺錢，我睇番那日的窩輪價位，假設買了２１０００點的價外認購輪，同時買了１９２００點的價外認沽輪，認購輪０．１元變了０．３元，認沽輪由０．１３元跌到得番０．０２４元，一加一減，仍有收穫。我當日判斷若果股市最後無大事，可能等２個月，大市會上番２３０００點，亦想不到大市可以顛到即月創新高。

　（再再再警告：買馬靶式組合都係投機行為，只適合在大波動市，若市況轉靜，在你買的上下幅度中間牛皮，最後結算時不到上下位，你的投資就會輸清，不想做老鼠的人不要去做，去做者也量力而為，小注怡情，下那一注時，想清楚這一注輸清都唔後悔，才好下注）

　　回頭再講我為何這樣答Top Gun，大市仍在發顛中，大上大落，可能延續至９月初段，之後會慢慢平靜下來，既然大市走向平靜，若買入馬鞍式組合，在轉趨平靜的市道唔識食糊或止蝕，好易輸清，所以我開始要提示風險，特別因為Top Gun改過名，我不知他是曾經買馬鞍式組合賺過錢的fisherman8850，所以更加唔鼓勵佢去試。

　　不過看完Top Gun的留言，我仍然建議他要慎作投資。我經常講，炒股考EQ多過IQ，當人人講「爭勝」時，成功者要識得「避險」，唔同人有不同心智與條件，但你正識不利，想在股市博番，難免失諸浮燥，冒進有餘，小心不足，有句老話叫「財不入急門」，就是講這種心理狀態，愈心急想贏，愈可能輸，你炒股搵錢供樓開飯，有礙炒股時泠靜從事，有時好衰，偏偏係用多餘錢炒股、氣定神閒之人，愈能抽離，愈易贏錢。Top Gun要自己考慮自己的處境，你炒不炒，怎樣炒，只能自己決定了。

　　補答Top Gun當日問的問題，你問在跌市時我曾經講過上下３５００點，向上望２５２００點，向下望１８２００點，為何幅度咁大，同時以現價計，向上２５００點（他在上周六問，以昨日價計只有１６００點）向下有４５００點（以昨價計５４００點）？

　　Top Gun你的觀念有少少錯誤，用一種固定的觀念看股市。股市係死o既，人係生o既，不是我早幾個星期咁講，而家又係咁，我講的時候無北水自由行，大市亦未穩定，若好似你問的方向，應該單邊買Put，但現實中我就唔建議你咁做，股市跌定了，向上的走勢大過向下，波幅會慢慢收窄。想做馬靶式窩輪，要在當下判斷後市短期內會否大波動，不是以幾星期前的判斷來看今天的市況。你問我，我看今天的市況，我就估國指仍會有大波動，可以升得太急回得也急，但未來中線也可以再大幅炒上，國指波幅，好有機會大過恒指也。

陸羽仁

　　過去兩日港股炒到顛狂，昨天國企首先上演高位回落的高追殺人事件，陸羽仁見未到結算就破哂新高，一直好擔心期指結算前有事，結果昨晚美股道指大跌２８０點，跌２．１％，將過去一星美股期的升幅掃清，日股開市跌近４００點，看來港股臨結算又要殺一殺好倉了。

　　有時環球金融市場都好「妙」，衰起上來一齊衰，除了美股大跌外，日圓又升上１１４日圓的水平，都成為利淡因素。美股昨日一跌，主要是因為美林降低花旗、雷曼、貝爾斯登等金融機構的評級，話次按會影響他們的盈利咁話，評級由買入降到中性。次按會大幅影響美國金融巨企的盈利，似乎唔係新聞，陸羽仁上個星期在報紙專欄已不斷講，唔係話自己叻，只係想話美國市場後知後覺到這個地步，的確實惹人懷疑，而且美林一個報告，無甚新觀點，唔知點解可以有咁大影響。另外又話聯儲局８月７日的議息會議紀錄顯示，儲局不相信通脤放緩，問題是這並非８月１６日臨時減息會議的紀錄，參考價值亦成疑。

　　千祈唔好以為陸羽仁係好友，所以唔信壞消息，我只係唔信表面解釋跌市的原因，在亞洲市場臨近結算時，美國大行放出壞消息，美股帶頭大插，可以估到亞洲幾大市場日本、香港、新加坡都會跟跌，若有大戶在這些市場高位沽了貨，呢個月結算咪可以先收割囉！

　　我成日話，大戶係唔會輸錢o既，意思唔係話佢地無失利的時候，而係話佢失利時好快就會在散戶身上搵番錢追番。如果本月中次按危機爆得咁深非他們所願，不受他們控制，令他們受損的話，跟手一下就推上創新高的位置，恐怕就是他們控制的結果了。

　　期指明日結算，如今的市道是任佢舞，你都記得我在上週初風暴初定時已講過，睇盤路貨源盡入強手，後市由他們話事。

　　我對一星期內大市的估計，維持早兩日的看法，估計會在２２０００點至２３５００點中間遊走（你信六成好啦），事實上短期收市高位是前日（８月２７日）的２３５７７點，微穿了２３５００點，昨日（８月２８日）日中造過２３７５０點的新高，但只是曇花一現，收市已回到２３３６３點的低位，今日就要插一插了。

　　網友Top Gun講到想做全職炒家，我心中唔太讚成，並非因為Top Gun自已的問題，我見佢講嘢有紋有路，睇書都睇出一點心得。我睇淡這個「全職炒股」行業，主要係對手問題，散戶的對手實在係太強啦，全世界最最最聰明的人，就在金融業，他們就是金融業鉅子。

有人講個笑話，話政治家最聰明，因為他們唔使做嘢，講吓嘢吹吓水，已經享盡榮華富貴。不過金融家更聰明，因為他們控制政治家，他們控制一切。

　　你跳落去全職炒股，不知不覺間就同全世界最聰明的人鬥法，好多人炒股先睇股市走勢，陸羽仁炒股先看對手，要知道自己跟誰對賭，他們想造什麼走勢。如果你炒大市，就係跟全世界最聰明的人在對賭，未賭先輸一大半。

　　我不妨告大家一點經驗，炒股有時中，有時唔中，當你炒得中時，初則自鳴得意，再中得深啲，照鏡都想笑，再再中得深的，覺得自己簡直係股神，心中對自己講一個字：「勁」。

　　不過按我o既經驗，當你中得咁緊要時，好易又走到反面，轉眼又把你的利潤吃掉一大半，我稱之為「打荷包」，未試過勁中的朋友，不知這種感覺，已得之物，又從你手上搶走，其激氣可想而知。所以每當我勁中之時，覺得自己「簡直係股神」時，我就會提醒自己，要投資自己的錯誤，買一買相反的東西，或者做做保險，結果發現投資自己的錯誤，屢有收獲。開始問自己，點解次次都係咁，結果就發現市場裏有「大阿哥」，佢主宰一切，專吃散戶，你全職同佢炒，好難贏，唯有炒股作娛樂，小注怡情，輸光唔緊要，咁就識得逃避風險，反而較易「鱷口偷金」。

陸羽仁