美股道指上周五升１３４點，主要是微軟等公司的盈利預測樂觀。如今環球匯市和商品市場已在大炒美國減息，歐元升到１．４４，油價亦大升，升到內地油站唔想賣油，這種局面對中海油、中石油有利，對中石化不利。

港股升穿３００００點之後，今日又會隨美股抽升，李四叔估恒指聖誕後上３３０００點，股神睇股，愈睇愈高。唔信會升的股民，如果手上無貨，甚至開始想沽，網友「自資之明」留咗段咁樣o既說話：「啲錢係銀行會咬人，我最近想玩期貨...我現有6w....想沽空恆指小期貨．．．．大概有4000點彈藥可以挨價，股市計8000點為底，升到30400點，接近4倍(4x8000點=32000點)，過往記錄2至3倍就爆，加埋市場好似信心受壓，有一觸即發之勢，暴跌1W點之幻想時常出現….啊…」

在牛市中，買跌難炒，在顛牛市中，買跌更是難上加難，唔係唔會跌，係你唔易中。即使我們做一個假設，暴跌必將來臨，但問題是那一天才到呢？會唔會升到沽空者頂唔順才跌呢？股市升得多，大跌唔出奇，可能明天跌，也可能升到４００００點才跌，邊個知？逆市沽空的風險就在這裏。

在大升市當中，我經常問經紀張「散戶指數」，問吓佢愛炒的散戶做緊乜？特別是炒期指的散戶做乜嘢多？過住呢個散戶指數都幾準，由升市之初到中段，如果一早睇錯邊做淡的散戶，沽了期指，不但不會平倉，更加會加注溝淡，希望最後一跌快啲來臨，讓他把早前輸的錢一舉「吹」回來，他們一路沽期指，心中一路大叫跌跌跌。如果我見到散戶淡倉仍多時，就會較放心買貨，因為期指兩邊有對手，散戶沽得多，即係大戶揸得多，大戶係好友，特別是過去期指走勢主導大市，大戶做滿期指好倉，嗰市亦好難跌。最近這個「散戶指數」唔太準，因為流入的北水太多，狂買現貨，倒過來頂住期指，不過無論如何，散戶指數仍有參考價值，當好多散戶認為大市要暴跌，個市反而仲有一段安全期。

「自資之明」講起沽細碼期指，又使我想起年中一段往事，話說６月恒指抽上２２０００點左右時，經紀張有個客想沽細期，問我點睇，我當時話全年仲睇好，沽期指要小心，唔買都唔好沽呀。後來經紀張把意見轉告那個客戶，那個客無理，照沽，沽空一張細期後，大市上過２３０００幾點，但７月尾開始回落，到８月更因次按問題而大跌，經紀張個客當時贏大錢，我問經紀張個客平倉未，經紀張話個客無平倉，話估計大市起碼要見１８０００點，不但無平倉，還在２００００點加了注沽多一張。我之前叫佢唔好沽，結果佢中我唔中，當時更加唔敢俾咁多意見，但心中暗暗為他擔心。

結果大家都知，個市在８月過後好似食咗藥咁，大幅挾番上，經紀張個客見個市升番到２４０００點、２５０００點時「唔信鏡」，又沽多兩張溝淡，前後追加兩次，沽一張變咗沽４張，結果輸到喊，終於在恒指３００００點時打靶，夾埋４張細期指輸足２８０００點。陸羽仁心諗，但經紀張呢個客，在２２０００點時沽第一張細期，結果愈買愈大輸足２８０００點，多過原先第一張的２２０００點總數。

股市升得多會跌，暴升之後隨時暴跌，港股這兩個月急升穿３００００點，升得太急應該調整，但經兩浪小調整之後，股市立刻炒上兼破高位，短期走勢是向上而非向下，而家沽空風險極大。最近期指加了按金，每張大期指按金由１２萬幾加到１５萬幾，港交所加按金，好可能是看到好倉或淡倉其中一邊（甚至是兩邊），倉位集中在少數人手裏，倉位集中風險增加，所以加按金。無論倉位集中的是好倉或淡倉，都顯市後市風高浪急，可以暴升亦可暴跌，總之不會平靜。

強如索羅斯，走去沽空科技股，科技股終於暴跌，但大跌前尾段的暴升，已足夠把索羅斯挾到輸大錢。沽空期指，風險無限，散戶若非有超凡功力，真係唔好落水。

陸羽仁

　　昨日聽一個股壇大孖沙講，而家好似地下有錢執咁，隨街都會踢到舊錢，他炒股三十幾年，未曾遇過，７元買新世界，升到２２元沽，一變三，以為好醒，諗住跌完係啲再買番，點知升到２８元，連佢都話自己老襯。


　　咁o既市，只要你肯炒，十個有九個有斬獲，另外一個係例外，網友小羊係其中一個，佢o既經驗咁，「你好我是一個股票市場初哥(以前都是媽咪幫我投資) 之前細價股抄時收到同事仔消息去買隻毫子股, 心想可以賺到幾仟已經好開心, 怎料股價一路跌, 我太驚所以在最低位走了, 因為怕再跌下去, 後來又上番去但我已經賣了, 所以心很想賺回失去的, 於錯誤私決定下高追了維達(3331)上市後幾天在7.1元追了貨, 以後幾日不斷徘徊6.9元, 但我沒有作出止蝕行動, 反而再於5元溝了貨平均價6.4元. 現在維達股價試過跌破4元, 我作出止蝕又會輸很多, 我可以怎麼辦呢？」


　　小羊係比較黑的新手散戶，錯事第一件是買毫子股，細價股上一浪炒完大部份未再郁，所以高位買咗細價股無止蝕者大部份仍坐緊艇。診斷斷係細價股、炒股唔係唔可以買，但買咗一定要止蝕，唔對跌就斬，唔係會好慘。
第二件錯是係追新股穿位唔止蝕，據統計咁旺o既市都有四成新股跌破招股價，所以買新股、即使是買了有質素的股份，都要止蝕。新股有雞股，有好股，新股的雞股唔在講，一跌永遠起唔番，唔止蝕永不翻身。新股的好股，一上市升完都係有收貨期，收乾貨才會郁，例如招金（１８１８），幕後人都收貨收咗大半年，要等一個華資大戶頂唔順沽貨出貨，幕後人才發功炒上。又例如錦江，同一個包銷商，又有概念，股價一直唔郁，到郁就要留意。又例如中信銀行，上市後毫無表現，昨日隨大市抽升，唔知係開車定係彈一彈，亦可注意。總之一句講哂，買咗新股，即使認定係好股，都要止蝕，情願沽咗長期留意，等佢突破再追入。

小羊第三件錯事係溝淡，買股唔順，應該減持唔係溝淡，贏要谷，輸要縮，唔係輸時走去谷。炒股大戶炒落唔順手時，輸不單縮，輸時要反手，好似索羅斯９８年狂沽港股遇上政府入市，沽唔落就反手造好，執番少少，不過此一著太高難度，散戶好難學，總之記住唔對路唔係溝淡買多一倍，唔完全打靶至少都減番一半貨。

　　小羊做足三件錯事，所以在有金執的市況都賺唔到錢。面對咁o既局面，小羊更要小心，你連一般小老鼠的感覺都沒有，旺市賺唔到錢，無利潤墊底，小心下跌時輸入肉。
　　今天講了十中之一輸錢嗰個，明天可以講吓另外嗰九個會點樣賺到笑。
陸羽仁

  　期指狂炒高頂住結算，有點今年６月feel，一路推高，風高浪急，但亦風光無限。美國減息期近，如只減０．２５厘，又無乜好說話講，小心大市先行回吐再炒。


　　　昨日講旺市十個炒九個賺錢，惹起一些回應及問題，不妨講講。早上已有老友講起，陸羽仁你咁講，即係勸人去賭。亦有老友講起另一些旺市輸錢的故事，他有個朋友做醫生，一年前突然同佢講，炒股好順手，想唔行醫轉行全職炒作，老友心諗咁浪費，做醫生頭頭尾尾加埋實習和讀專科差唔多讀咗１０年書，咁就放棄，真係讀書無用囉。不過最近老友再見番呢個醫生朋友，醫生垂頭喪氣咁講，炒細股炒到唔係幾掂，輸咗大錢，好彩無放棄做醫生。老友心諗咁戲劇性都有，又話全職炒股，跟住又縮沙，呢個醫生叻仔一名，讀書時中英數科科都咁勁，估唔到個市咁旺，咁叻仔都話炒股唔掂。


　　朋友唔係好識炒股，問我點解會咁，我話做醫生一年都有２００萬收入，一年前佢個醫生朋友講得唔行醫去全職炒股，應該都搵到唔少，例如揸住２００、３００萬本金去炒細價股，炒到有８００萬、１０００萬市值o既貨都唔奇。人會把一時的收入，視作永恒，醫生哥哥會諗，我一年炒股賺６００萬、８００萬，咁仲使日日睇症咁辛苦，不如全職炒啦。不過，細價股在今年８月大調整跌了下來後，未上番過去，醫生哥哥原本值１０００萬的細價股組合，隨時得番２００、３００萬，打回原型甚至倒輸，所以咪無得轉行囉。旺市炒唔中邊，或者睇中升或跌但買唔中股票，亦都可能中招。


　　昨日講到要止蝕及唔好溝淡，引發一些問題，網友bonnie問係唔係一定要一成止蝕，佢話假設佢３．６元買了錦江酒店（２００６），認為是好股，打算長揸六個月、一年，但佢股價已跌穿一成止蝕位，又係唔係要止蝕呢？有時好難作決定。
我可以咁講，「投機的我」一定要止蝕，你諗住炒股，勢色唔對唔止蝕好戇居。買股一買就跌，睇錯股，或睇錯入股時機，通常衰開有條路，起碼會衰一段時間，投機唔止蝕好易愈陷愈深，最慘係遇到沽貨對手係大戶，有意裝你，你唔止蝕就中伏。

咁「投資的我」又點呢？我認為主要看你對目標股票有多大認識，若認識好深，知道佢的價值，甚至可以準確估到目標股票的盈利，的確可以唔止蝕，股神巴菲特話睇中超值好股，買完即跌，佢會愈跌愈買。例如中原老細施永青去買對手美聯物業（１２００）的股票，全行兩大地產代理，已經做咗全行七、八成生意，如果施永青睇住自己盤數，上半年賺３億，發過豬頭炳，自然唔怕撲入去買美聯，因為他估到對手條數都唔差太遠，即使買完大市調整美聯股價跌，施生亦唔怕再買，因為佢知道哂對方的底牌（只是舉例假設，並非敍述事實）。

問題是好多人對上市公司的了解只是半桶水，估估吓，所以即使是投資，睇錯亦最好止蝕，即使買入對象是好公司，也可以候低買過，除非買入的注碼好細。

以錦江為例，現在只是尋底股，唔知有無人炒升唔升，想投資可以分注買，若想買１０萬元，先買２萬５，睇吓點，其餘３注見佢升再追入。又或者一注都唔入，日日去齋睇，睇到佢升先至追。以bonnie的例子，如果她把所有注碼在３．６元買入，我係佢如果重注會先止蝕。買股最怕輸，長線投資也要揀啱位入，最好一入即升，脫離止蝕位就有機長揸。

網友T的問題也類似，佢問溝淡，他認為對於弱勢股，這做法故然是上上之策。咁對於比較強勢嘅股又如何？若果唔係摸頂，大市又向好，手頭資金又容許，溝淡會否比減持好？

這樣又回到上面的問題，第一，你要識分「強勢股」，關鍵可能係實力股而非強勢股，強勢股可能只是呢期興炒作的股份的代名詞，我就話可以唔止蝕的股份一定係實力股，盈利升幅較理想，問題是新股民識唔識分盈利好壞的股票呢？如果唔識分，買咗熱炒雞股，愈溝愈死。其次，你話大市向好，又有錢，是否溝淡比減持好？的而且確，大市向好，跌完又升突，令盲目死坐貨的人獲益，咁就要睇吓股市係唔係永遠係咁，若無信心永遠係咁，相信音樂終有一日會停，咁都係唔溝好過溝了。

記住，遵守紀律要付出代價，在大牛市中，要止蝕又唔溝淡的股民，搵錢一定少過盲目死揸兼見低就溝淡的人，但遵守紀律的得著係防範風險，萬一大浪到來時，都唔會一Q俾人打沉。

陸羽仁

　港元脫鈎的傳聞，由市場傳吓傳吓，變成顧問公司的報告，言之鐅鐅話金管局任總向中央的溫總提過，想港元和美元脫鈎，變成和一籃子貨幣掛鈎。消息炒到港元好熱，搞到金管局昨日要向市場沽出七十八億港紙，為港元升值潮降溫。

　　美元弱化的趨勢的確影響深遠，港元和美元掛鈎，美國因為經濟弱財赤高、貿赤高，才令美元轉弱，但香港經濟強勁，本來港元應該升值，香港應該加息唔係減息，但因為要跟住美國，港元跟著美元走，人為地貶了值，香港變成實質負利率，會令香港的資產看起來更便宜，不但會令香港經濟過熱，泡沫升溫，亦會有輸入性通脹。所以有經濟學者和銀行家都叫政府研究吓港元是否應該和美元脫鈎。
　　這些討論每逢在港、美經濟走勢背駞時就會出現，一啲都唔出奇，出奇在今次脫鈎的消息傳得實在，而且港元升到要金管局入市干預，就有少少唔尋常，頗有點炒升值的味道。
　　今次由一間顧問公司爆料話任總上京和溫總談過港元問題，顧問公司叫Medley Global Adivisors(MGA) ，是大炒家索羅斯的前僱員Richard Medley在９７年成立，由於索羅斯名頭太嚮，一聽到佢個大名，即使係佢的徒子徒孫，亦令人生起很多聯想。
MGA出咗這份報告，令外資流入香港更火上加油，搞到金管局昨日要再入市沽港元，我最關心的是有無人炒港元。現實上起碼有兩種可能， MGA所說真有其事，港元升得有道理， 另一個可能是MGA所說並無其事，但卻可掀起一輪炒風。

這一排港元持續強勁，外界一直以為是資金流入炒股，如今突然增加一個炒港元的可能，若有炒家，到底在炒緊乜冬冬？

現實上港元和美元脫鈎的可能性極低，退一萬步講，即使任總咁身痕向中央提出，中央也不會同意，阿爺正進行金融大改革，改革期間最怕出亂子，香港在中國金融的大前線，是中國金融的對外窗口，中央部份金融改革又在香港作試點，你而家去放開聯系匯率，萬一搞出大混亂，會唔會影響埋中央的金融改革呢？

這個道理我諗得到，炒家也諗得到，既然港元脫鈎的機會好細，咁炒港元又為乜呢？大家應該記得９７、９８年的金融風暴，當時索羅斯的量子基金和外號野狼的另一個對沖基金，以「雙途進攻」的策略狙擊香港，他們既在匯市沽港紙，亦在股市沽期指，金管局要捍衛港元，就要大力挾高利息，以增加借貸沽港元的利息成本，結果把銀行同業拆息最高挾上３００厘，咁高息搞到股市大跌，炒家沽了期指，就食到應一應。

如果而家有炒家放出港元將脫鈎會升值的消息，並大手買入港紙，此舉風險極低，成本有限，因為港元匯價有上下方保證，買「錯」港元升值，跌下來也輸很少，但假如炒家同時大手揸了期指，一犬吠影，百犬吠聲，外國好多投資者會把錢投到香港，大買港股，因為港紙一旦和美元脫鈎，在現今情況，港元升三成都唔奇，在這個預期下，港股變咗打６５折，等如２００００點多一啲，在外國投資者看來又有得博噃。我話港股食哂類固醇，住後唔知可以炒乜，無想到仍然可以炒港元升值，這豈不是當年「雙途進攻」的反轉版，當日炒家沽港紙沽期指，今日揸港紙揸期指，挾高港元炒一轉。

上述只是陸羽仁的臆測，信五成就好了，但如見港元持續被人挾在高位，金管局要不斷入市，港元脫鈎之說又澄而不清，就要小心港股在大炒升值概念，引鬼佬投資者落水了。

陸羽仁

美股道指昨晚狂跌３６２點，跌幅２．６％，主要原因是金融股大跌，因為證券界估計美國最大銀行花旗集團資金短缺，將會減少派息，Credit Suisse 調低花旗的評級，搞到好多金融股出現五年以來最大的跌幅。

聯儲局減息０．２５厘和市場的預期一致，美股在高位本應回吐，但早一日美股不但無回吐，還要升１３７點，不過應該發生的事始終會發生，美股昨日終於大跌，嘔突早一日的升幅，看來美股即使跌完反彈，都會有一浪調整。

美股咁跌，亦應觸發港股有較像樣的調整了，港股在周二期指結算日曾經挾上３１９００點關，人為味道強烈，過完結算就如失去力托的無型之手那樣，自由浮動，昨日遇上美股大升，也是應回吐未回吐，但也是向上乏力，今日開始應被美股觸發一浪較深的調整。

昨日和中環茶友講起陸東哥哥的投資建議，話港股明年合理價是２８０００點，所以調整３０００點、４０００點才合理，有茶友睇得更淡，話今年應該調得更低，起碼去番２５０００點，陸羽仁睇完港元的炒作情況之後，開始有少少保留，認為調整都未必去到咁低。

有網友問起，為什麼一講完炒港元，港元匯價就回，是否資金已經撤走。陸羽仁追查一下那個所謂任總見溫總建議脫釣的事，原來完屬虛構，並無此事，但炒港元的是聰明錢，搞得出咁露骨的炒作，作得出咁具體的古仔，必有所圖，無咁易走。金管局入市沽港元，自然效果是港元匯價回吐，跟住拆息就落，這是預期結果，但唔等如炒港元的錢走咗，真正問題是港元炒作是否自此停止，抑或過一段時間就來，我就估無咁快會停。

投資睇長線，投機睇３個月中期走勢，要確定方向，才可以定短期策略，港股升近３２０００點，中期走勢都唔易睇，到底３１９００點是這幾年升市的浪頂，往後股市要大插一直跌落去，抑或這仍然只是小浪之頂，回吐後還會更上層樓呢？若港元有這種炒作，我估住後還會上高位，這是中期方向。

不過中期方向朝上，唔等如短期股市唔會回吐，港股升咗咁多，回吐也是極合理之事，遇上美股大幅調整，港股調整的排頭也不會弱，應會插深啲，不用太心急一注入貨，若有無型之手操控大市向上，通常在月頭會失重下墮，到月底又會上番，有錢買嘢炒作都不用太心急也。

陸羽仁

　　溫總出來為港股直通車下註腳，講到差唔多要炒車咁滯，等如為港股淋泠水，今日少不免要插吓。

　　溫總為何要在這時出來講話，值得參詳，大家應該記得，上星期外資炒港元升值炒得很厲害時，突有個索羅斯徒孫開的顧問公司，出咗份顧問報告，話金管局任總研究過港元和美元脫鈎，仲話佢上京同溫總討論過，不過溫總反對，陸羽仁查過係流料，你估呢段炒港元的新聞溫總又睇唔睇到呢？

　　溫總當然知道，他知道在烏茲別克一定會遇上香港記者（香港電子傳媒次次領導人外訪都會跟），他要準備答記者問，當然第一條問題就係估記者會問任志剛有無見向他建議港元要和美元脫鈎（可惜記者無問！！）然後自然會聯想一下這些炒作港元者所為何事，溫總咁聰明，自然會想到既然所謂他見任總談港元脫鈎的消息既然是流料，放料者當然不會預咗港元會脫鈎，放流料炒作，當然是為了炒港股了，所以溫總這番有關直通車的講話，十分貼近時事，專門針對外資炒作而來。

　　外資借炒港元脫鈎炒港股，既要搵信這個故事的老外接貨，同時也盯緊隨著港股直通車下來的祖國同胞，打算叫華洋傻仔一齊接貨，港股真係高處未算高。溫總唔理你如何滾鬼佬，只關心祖國同胞，他眼見洋炒家這樣喪炒港股想搵祖國同胞派貨，心諗我放港股直通車下來，到時內地股民在３００００萬幾點、甚至４００００萬點的高位接了貴貨，將來大跌之後，怨我點算，說到底是中國政府在高位放開直通車俾大陸人炒港股，不能說政府無責任。所以溫總就出一招：拖。

　　溫總講出港股直通車有三、四個問題，總之問題多多，唔似一下子可以解決，所以大家唔好期望直通車咁快開車，等如叫鬼佬唔好借我呢個消息來炒，此舉既可為港股降溫，亦可免內地人在港股高位下來大舉入貨接火棒。

　　香港人見港股直通車唔開住，難免會鬧阿爺出爾反爾，８月中外匯管理局公布有關政策時的確草率，未和中國銀監會、中國證監會等其他部門協調，但如今那些技術問題應可解決，但其後出現兩大變化，第一是港股急速炒高，第二是連港元都借埋來炒，溫總見到這些巨變，都不能不變變招了。

　　溫總同炒作大市的鬼佬博奕，未知外資大戶有何反應。我地不妨借索羅斯個腦來諗吓嘢。

　　索羅斯在《Soros on Soros》(《索羅斯論索羅斯》一書中談到看錯市的問題，索羅斯話他承認他會看錯，所以他很警覺，經常反覆求證。作者追問可能只是發生一些不對勁的事情，但很快又回到他預想的軌道上，他怎知自己是否看錯市？索羅斯話，當期望和實際有差距時，他不會即時沽貨離場，他們重新檢視自己的假設，然後嘗試看看什麼地方出了問題，他會修正他的假設，他會發現一些特別的事情在發生影響，他不會坐視不理那個差異，但會批判性地檢視，最後可能不是賣掉股票，而是加注（頁１２）。
　
　如果外資大戶單是炒港股內地因素，炒到２萬幾３點點應可收工，內地A股炒到幾顛都好，都也可以和H股無直接關係，因為兩地分隔，內地股民好難炒H股，不過QDII打開第一個缺口，港股直通車更是開大口，讓內地資金炒港股，有了這些機制，理論上不會A股炒上天，H股郁都唔郁，兩地股市會拉近，港股更會跟大陸股炒，可以炒到天咁高。假設大戶是衝著這些開水喉的機制而來，認為A股一日未爆，都會大力扯著港股向上，內地巨量資金湧港，會大大炒起港股，他們在這個假設下來炒港股，再放點港元會脫鈎走強的消息，把港股的期望吹大再吹大。

　　如今溫總出來降溫，但不是全面剎車，港股直通車只是緩開，不是永遠不開，再者QDII仍會繼續，只是有調控地放水而矣，內地股市和港股的連繫鏈條未斬斷。牌面觀之，假如阿爺話港股直通車永久不開，QDII又立刻叫停，又或者A股開始暴跌，炒高港股的假設就不再有效，大戶應該反手造淡。但現時阿爺放水只是減慢不是停車熄匙，外資大戶又好難話反手造淡噃。總括而言，港股炒得高要抖吓氣，大戶見你想個市跌，咪順勢插吓順下你意，但外資大戶未需要掟股離場。

陸羽仁

港股單日瀉１５２６點，創歷來最大單日跌幅，大跌市之後，正常會有反彈，要睇吓今日彈唔彈。

網友twohitsix留言，「陸sir，今日市況跌得比我想像中深，如果我們假設大戶今個月是好倉底，今日的大跌會唔會深左少少呢？上月中28500有承接，同今日直線向下可謂差天共地。今次我都要投你芬佬朋友一票（估恒指會穿28000點），原因是我認為溫總的言論，有好大誘因令到本來在香港炒緊，利潤頗深的地下北水平倉走人。加上政策有真空期，剛剛講完無資金自由行，短期呢樣野都唔會再實現，地下北水與其等明錢來港，不如而家沽貨骨水先了。

我到現在都相信，推恆指由九月24000點直升上32000點的除了外資大戶，更有地下北水。最少係呢幾個月，地下北水係同大戶同行，先至可以有咁強咁直線的升幅。而家溫總唔比人來接火棒，咁會唔會形成一個鬥快沽的局面？上個月中外資大戶發現沽落去沽唔落，今個月會唔會有個風險係想做好，但係北水係咁沽做唔上？或者也可以是好急咁插到好深，逼所有北水吐貨出來，先至再彈上也未可知。請陸sir評論我的想法，謝謝﹗﹗﹗」

我和twohitsix部份感覺一樣，昨日的跌幅比想像中深，原先預計跌１０００點左右，若中段跌超過１０００點都應該反彈番少少收市，但結果上午已跌到阿媽都唔認得，中午心諗到歐洲佬瞓醒沽貨仲大鑊，下午果然急插，到現貨收市都無彈，即日鮮博反彈買期指者全部要打靶，結果期指就以全日低位收市。

大市跌幅比想像中深，自然會增加後市的悲觀感覺，可以羅列一些利好利淡因素，先講淡因，第一，跌幅深，恒指現價２８９４２點，反彈後若再跌，２８０００點的防守空間已經有限，試一試５０天線穿２７０００點的機會上升。第二，跌幅大究竟是正常的基金減持，抑或外資大戶調整炒作策略，還是地下北水撤退？若是後兩者，對後市的影響較大。第三，昨日路透社報導內地同時增加QDII（合資格境內投資者）投資港股的限制，由過QDII基金投資股票那部份不設限，變成為限制投資港股不超過３０％，若此說屬實，不但港股直通車出軌，連QDII投資港股的比例都會大減，北水的水喉明顯關細了。

至於利好因素，主要是李四叔唱好，話跌可以買啲，再跌可以買多啲，你知李股神好有威力，至少可以頂得吓。

陸羽仁昨日話大戶炒作港元兼港股，想食大茶飯，無咁易轉淡，咁大個倉又有現貨又有期指，邊會話轉就轉，我如今仍保持這種分析，但大戶整個倉未轉淡，不等如他們不會玩一玩大插插，插深一點，說到底大市一枝箭咁升上來，信心一失，要跌好易，大戶既可先造一轉期指淡倉，再向下插深啲，食埋向下一輪的波幅，同時借跌市向阿爺施壓，揸重貨的散戶現在都開始媽媽聲媽溫總，跌到２７０００點媽得更大聲，若跌到２５０００點，直情嘈到拆天，那時會有好多意見，話阿爺出爾反爾，做嘢唔規範，唔透明，唔正常，唔合理，嘈得幾嘈，現時高唱以民為本的阿爺，又會鬆吓口鬆吓手，起碼放多啲QDII落來，咪好易再炒過囉。

股市正常調整後高位跌１０％，跌到２８０００點左右都差唔多，唔會跌得太多，但揸旗的大戶點玩唔易估，他們可以當無事，也可以玩大插插，小心小心，總之要按紀律行事。

陸羽仁

　　早前睇講過在大牛市十個買股有九個賺錢，一直無機會寫埋下集，講吓九個贏錢的故事。

　　呢次升市由８月１７日大奇蹟日的１９３８０點升番上來，直剷上１０月３０日的３１９４０點，狂升１２５６０點，從低位計上升６４％，升勢極急，總之由８月中一直到上月底之前，瞓身買就會贏，所以夠膽炒者，十個無九個賺錢，都有八個賺錢。

　　投機如賭錢，如果順風順水，１元變２元，２元變４元，好易變大富翁。我睇報紙雜誌仲講有個小股神今年至今賺４００幾％，即係１元變２元，嘩，真厲害，唔係１變２，係１變５，若果佢年年咁好景，由１０萬元開始炒，第１年變５０萬，第２年變２５０萬，第３年變１２５０萬，第４年變６２５０萬，第５年變３．１２５億！！！都唔好計落去囉，５年已是身家３億的富翁。

　　遇上１０個月賺４００幾％啲人，我o既策略係唔想阻人發達，既然人地條投機方程式咁得，我就唔應該評彈咁多矣。

　　不過我想補充少少，這種十個炒股九個賺的市況，好難長期持續，升幅咁快，
莫講５年，１年連續咁升都唔得了，若失去了這個大市狂升的背景，５年賺３億的故事自然不易實現。

　　不過投機和賭錢亦有不同，賭錢的風險較難控制（因為普通人賭錢好少計數），但投機的風險可以控制，若知道自己在投機，就要認真諗諗應唔應該控制風險。最基本的控制風險措施是限注與止蝕。

　　先講限注，假如我係小股神，同樣以１０萬元開始炒，炒到第２年尾，變咗２５０萬時，股市已經好高，若果沽一半貨，收埋１２５萬，剩番１２５萬繼續炒，同樣升足５年，剩下來炒作的資金都變成１．６億元，雖比一啲都無沽少咗一半，但都有１．６億身家，都唔錯噃。更大機會係股市升完會跌，跌番哂落來時，仲有收埋嗰１２５萬，比原來的本金１０萬多好多，應該都感覺ok。限注，見高位減持，並不是一般賭徒常做的行為，一般人不但不會減倉，而且覺得現在投機得米，就會不斷將新錢投入，例如加按層樓去炒，甚至同好多人借錢去炒，大浪一來，就會一無所有。

　　再講止蝕，以中石油（０８５７）為例，炒佢上A股，１１月１日高位見過２０．０５元，但中石油A股上市雖然暴升到４０幾元，但H股本身已炒完上A概念，再遇上溫總講話，H股反覆下跌，你揸了中石油，有兩個做法，一是止蝕，將來再炒過，另一個是死揸，博將來賺突。

　　以過去這一年的經驗，死揸好OK，以今年頭上A股的國壽（２６２８）為例，１月３日上A股日，H股高位見過２８．８元，跟住回落，若死揸不放，中間在３月見過１８．４元的低位，但如今已是４０多元。

你怎知中石油H股不會像國壽一樣，深度調整後再上高位呢？陸羽仁唔知，唔係無機會咁o既事，但好漢不吃眼前虧，叫得做炒股，唔對路要先閃，等無事才行番埋位。同樣道理，若今年１月頭在２６元、２７元高位投機買入國壽，跌一成先打靶，不要期望自己可以在低位１８．４元入番，但跌完升番上２２元時，隻股牛皮了一段長時間，還有大把機會入，若２５元止蝕沽出，２２元、２３元入番，都唔係好失禮，但中間沽了的一段時間，就避開可能大跌不止的風險。當然，沽了貨亦有入唔番的風險，但叫得做炒，應該會比較機動出入，點都會追到啲貨。

過去大升市時買十有九賺，到如今的調整市時，就唔係盲買一定得，嚴守紀律，順勢而炒，始終是「投機的我」炒股的不二法門。

陸羽仁

　　美股杜指昨晚大跌300多點，港股今日開市就跌超過１０００點，再展開下一浪尋底，如果短期之內唔能夠重上３００００點樓上，又係一個反覆尋底的格局。

       網友Dennis問起外資大戶、地下北水和QDII三種力量如何左右香港股市大局，我始終相信是外資大戶左右大局，問題是他們大炒港元在美元弱勢下會脫鈎或引發通脹及資產泡沫，未似咁快炒完港股，但他們做吓調整波浪唔出奇。地上北水是搶在港股直通車前頭而來，如今港股直通車唔開住，地下北水有可能回流，但也要看內地股市顛唔顛（若顛會回流），以及港股好唔好炒（若好炒點都有部份錢留在香港炒）。而QDII就會形成一條較可見的水源，慢慢而持續地投入港股，特別和內地A股有較大折讓的H股大股。結論是大方向仍向好，但短期不排除再調整。

　　在這種局勢下，股壇老鼠股繼續炒，唔想俾湧上湧落的巨浪湧到一身傷，自然要用足老鼠的求生術。

　　網友高追止蝕人問起中石油，可以用來做一個例子，「陸Sir,尋日（周二）按照你既教導, 將$19.4買既中石油(857)於$17.22放左, 點知今日又升返少少...
其實我係咪應該坐下睇定d先呢?

雖然我買果時係打算玩投機, 止蝕都好正常, 但係呢隻又係一隻好股, 因此係咪應該可以加大個止蝕位? 例如一般股係10%, 好股可以去到15~20%?

繼續引伸呢個point, 係咪應該不同既股都要用不同既策略?
單單係得"投資的我" & "投機的我"好似有D死板...

高追止蝕人 上 」

       網友牛腩貓咪有此註腳：「高追人, 有關止蝕問題好,其實好複雜. 10%,15% & 20%只是數字. 問題是投機入場之前, 要先決定止蝕位, 到了便斬. 如果回升, 便要再研究, 是買入位問題, 定是止蝕位問題. 一定要研究一個自己合適的方法! 陸sir教的只是保命法. 如果在專業投機來說, 不太合適.因為漏洞太多。」



中石油和阿里巴巴（１６８８）一樣，可以做好好的老鼠投機個案，中石油一直炒上A股，先講吓故事。記得上星期有一日，股壇大姐大來電，她的公司在內地有抽中石油A股， 話聽聞有 ２２元人民幣的中石油A股在市場問價， 問我點睇 ， 我即場的反應係有咁o既 就買啦，我估中石油A股開盤價４０元樓上。大姐大問我若果這個暗盤價為真，是否顯示內地投資者擔心股市有問題，我答佢這個暗盤價係流料的機會好大，若然是真，你沽了手上大陸銀行股的A股，用那些錢大手買入中石油A股，就可以撇除大市風險，只是投機中石油上市的升幅（這也是一個控制風險的例子）。結果證明那個消息是假的，大姐大低位買不到暗盤的中石油A股。



還有一個相關消息，聽聞內地正調查一些大基金的經理，傳聞他們預知中石油上A的消息，潛來香港大手買入中石油H股的認購輪獲利。

        所以上星期買中石油，就是在這些背景下買貨，第一，中石油上A股價會好貴，第二，有一批人事先搶入中石油H股或相關衍生工具，借好消息圖利。

        千祈唔好以為我的結論是叫大家要搵多啲內幕就會發達，我有一個假設：「一切盡在市場之中」，所有好壞消息，內幕、外幕炒作，都已經反映在市場股價之中，問題是你買入時做了幾多功課，特別係作咗乜嘢假設，那些假設啱唔啱而矣。

        高追止蝕人話「分開投資的我和投機的我略嫌簡單」，我這個講法的確太簡單，但對股齡無十年的「股場新仔」來說，也實在太重要，你買股唔知自己做緊乜，１９元買入中石油想「投資」，我就話風險太大了，諗第二隻啦。但你話想投機，咁又有得諗，正如好多人上星期問我大市係咁喪升，買中石油炒上A股概念得唔得，我話唔怕買，最緊要守止蝕。

        我當時見到個市升到有少少得人驚，例如中海集運（２８６６）由上１０月中開始由７元左右急升，好快到１１個幾，炒作買好多股風險好大，炒中石油明知係局，但風險始終有限，因為有Ａ股價托住。



牛腩貓咪話一成止蝕只是保命法，「對專業投機者來說不大合適，漏洞太多」，這句話又啱，不過現實中專業投機者太少，盲盲中的新仔太多，所以我講話只能以偏蓋全，不斷咁重覆叫你一成止蝕啦，其實主要講俾股齡無１０年的新仔聽。

        以專業投機來說，第一不一定要投機中石油，因為之前已抽升，證明大鱷好多，但回報不算吸引。第二即使買了中石油不用等到一成止蝕，因為由上周四到昨天，有太多位可以打靶了。

　　假如我係投機者，在１０月初見中石油在１５元的橫行位抽升，在１８、１９元高位追了中石油，當然係假設中石油上A股要做４０元樓上，博短炒一轉中石油H股見２３、２４元，博短線有２０％利潤，以１０％為止蝕，一博二，都仲可以。中石油今個星期一上A股，其實上星期四、五係最後炒作日，唔會等到週一才炒。上周四中石油在２０元上下浮沉，唔上，作為投機者，見佢唔上，去唔到２２元的價位，怕佢落，可以在上周四先在２０元沽一半保存少量利潤，這是第一個沽貨機會。到上周五大市回吐，中石油隨大市跌到１８個幾，投機者見勢色唔對，應在周五沽埋餘下一半，這一半打平手，前一半有２元左右利潤，賺小利離場，這是第二個沽貨機會。

　　週末溫總講直通車放慢，這種壞消息事前估唔到，但中石油周一上A股時，早段跌過又抽過一抽，仍有第三個機會在１８．３元至１８．５元左右離場，當時沽貨也接近平手離場，並無大壞，這是第三個沽貨機會。（我在《頭條日報》專欄講咗兩次提防中石油上A股就是出貨時）

　　「高追止蝕手」唔好介意我講得咁直接，你沒有在我講的三個退場的機會出貨，你不是專業投機者（有９９％的人都唔係，唔駛驚），但亦無壞，１０％止蝕是保命絕招，有佢無大煩惱。沽完之後見隻嘢升，只是小煩惱。你覺得可能沽錯咗，問好股是否要定１５％止蝕，或２０％止蝕，你在中石油反彈時會咁問，如果佢再跌，恐怕你就會收起問題。我o既答案係無論好股壞股，只要是投機，就要止蝕，你唔鐘意用１０％止蝕，用１５％亦得，炒股無成法，但要事前定好，唔好到時左睇右睇，唔想止蝕，只係想大風吹把自己買o既股票由負數吹番變正數。

　　我估中石油走勢短期反幅向下，原因好簡單，因為中石油A股正反覆尋底，由上市高位４８．６元，跌到昨日收３９．９９元，跌近兩成，同神華A早前的走勢一樣，會拖住H股向下去。研究中石油A股走勢將來或有投機H股的機會，研究吓第一隻回歸的大股國壽A，用咗幾耐喘定然後慢慢向上，又研究吓第二隻上A大股神華A的走勢，就會對中石油A的走勢有啟示，中石油A尋完底向上之時，中石油H股會再炒過。

　　　　每隻股的炒作理由唔同，想做五星級大鼠，在滿佈大鱷的股市偷雞，要做功課，有策略，定假設，發覺股票走勢同假設唔同，例如中石油H股在A股上之前無炒上２２元、２４元，就要轉膞。但假如你１９元買了，見佢跌堅持唔沽，若未來跌番落１５元，等幾個月都唔郁，半年之後才炒番上１９元，你同一筆錢唔見咗半年炒作時間，機會成本大過１０％止蝕的代價。平時炒１０劑中６劑輸４劑夾埋已經可以贏，旺市炒１０劑贏７、８劑都好好搵了。記住，炒股策略好重要過聽消息好多。

陸羽仁

　　美股走勢唔靚仔，前日大跌之後昨日喘定, 道指收市微跌33點，要睇下今日港股大跌後可唔可以反彈。



美國經濟認真唔對路，樓市反覆下滑，幾間美資大行牽頭組織的次按資產救急基金又唔係咁順，另外中國全國人大副委員長成思危話中國應重新考慮外匯儲備係唔係放咁多美元資產，通用等美國大企業業績又唔好，種種消息都指向美國經濟有衰退危機，以及美元有進一步下跌的風險。

　　美國這個局愈來愈難拆，正常計美國上次事先將揚會減息，減完之後美元應有一個像樣反彈，但結果彈都無彈，一路走弱，唔係幾合常情。黃金、油價、多種匯價直撲歷史高位（日圓見１１２點幾圓的高水平，對沖基金拆倉的風險又增加）。記得上月底美國聯儲局減息之後，議息公布暗示往後不再減息，應對美元有點支持，但美元結果都頂唔順，只有兩個可能，第一是美國經濟太差，衰退危險好大，所以市場仍要睇淡美元，第二是市場唔信聯儲局下次不再減息，我估兩個因素同樣發揮作用，所以美元再急跌。

　　我們處於環球金融市場動蕩的時刻，連內地股市都借美股不濟的消息大幅尋底，我地當然不可以假定港股一定無事發生，只能靜觀其變。

在這些動蕩的日子，守紀律更加重要，保住資本，將來有平貨都有命去執。昨日講起五星級大鼠，話大家炒作要炒得有策略，做老鼠都要做高級啲嗰隻，咁樣命都會長啲，今日可以再講講。

網友Coco講咗個「笑話」，話早前買咗中石油（０８５７）短炒，見佢無力上先沽四分之一，到本週一中石油上A股之日，他身在北京，早上想上網沽埋餘下啲貨，點知竟然遇上網絡固障，沽唔到，結果只能在下午低位１８．２元才沽（如今睇番係高位），結果輸了１６００元，認真黑仔。


Coco唔使咁傷心，我講另一笑話等你開心吓。話說本週二阿里巴巴（１６８８）上市，早上一開市自然好多人想沽，有經紀行代客輸入沽盤，竟然發覺去港交所的線路失靈，無反應，經紀再按多幾吓都無反應，等了一會，部機有番反應，經紀一睇，吓，乜失靈時按那幾吓的沽盤全部做齊，即係做大咗幾倍，咁都得。經紀行見咁o既情況，唯有等隻嘢跌番下去，想同價揸番平番倉，點知隻股下午仲升，只能合埋眼市價追番，一有人追，隻嘢就再抽高，結果呢間經紀行唔見咗千幾兩千萬，據說這單壞機事件令好幾間經紀行中招，阿里巴巴股價更因為這些補倉盤推高。受這些補倉盤誤導高位追入的投資者，唔知可以搵邊個投訴。

這些故事教訓我們，股市永遠有好多估唔到之事，我們只能在資訊不完美的世界下生存，但做好自己的炒股策略，嚴守紀律，始終有著數，你看Coco守紀律沽貨，結果中石油再跌，至少目前不用吃眼前虧。

股市太旺，有好多朋友都係新手買股，不但投機投資不分，炒股策略也定得不合理。例如網友IT問，他在４７元買了兩手國壽（２６２８），想５０元沽，結果跌咗落來，問今個星期有無機上番５０元。

國壽早前炒上５３．８元高位，跟住回落，我估IT是在回到４７元時買入，撈它一撈，但買入後無升番上高位，再跌到現價４５．２５元。我覺最大問題是炒股策略唔太合理，４７元買想５０元沽，博賺３元，唔知有無想過止蝕，若要一成止蝕，可能輸５元，賺錢只賺３元，５元博３元，值博率較低。佢亦可能無想過止蝕，實行股神李四叔上身，總之見低就撈，跌落去實行死坐坐番上去，但他的目標價只是賺３元，升番上去時要沽一定可以沽走，風險和回報同樣不成比例。

我諗現實中IT或者無諗過止蝕，無諗過輸，只諗自己想贏幾多，炒股策略定得不合理，贏只會贏粒廠，輸會輸間廠，雖然國壽係龍頭大股，個市唔大瀉國壽唔會死，但你贏咁少，假設次次想贏幾元，買幾次中番一兩次，但咁唔好彩最後遇上大跌市時，就會輸好多錢。順便答埋你，國壽呢個星期炒番上５０元機會細少少。

跌市想撈貨，除了對大環境要有個判斷之外，亦有不同策略，例如分段吸就是一個策略，網友潛水艇問起「我有小小嘢唔明，溝淡同分注入既分別？溝淡係唔好，分注入係減低風險。如我的上海電氣(2727)在$7.83入，我對此股有信心，打算跌到$6入多一注。那屬於溝淡抑或分注入減低風險？此舉可行嗎？」

  上海電氣股價在８月尾從３．５元左右起步，最高在上月中見過８，５９元，跟著急回，你在７．８３元買，策略係乜，我估你認為佢係好股，但見高急落在跌一成左右追入，但有無諗過佢跌夠未呢？

  你係溝淡定係分注，和你自己的策略好有關，若你有５萬元，諗住投資上電，一早諗定在７．８３元入一注，然後等到６元入齊第二注，這是分注，因為你係有計劃咁按分開的價位入貨（分注價位好唔好遲些再講）；但假如你開始時無諗清，有５萬在７．８３元的水位覺得跌得差唔多就入貨，好啦，現在跌到７．０１元，你中咗招，想平啲再買，唔知邊度又搵多５萬元來入貨，想拉低平均成本，呢啲叫做溝淡。除了主觀的分別，客觀亦有分別，早已定了分注，而家都未入齊，輸起上來都會輸少啲，５萬元買上電，只入了一半２．５萬元，若輸可能只輸這２．５萬元的部份（第二部份見勢色唔對可以唔買）。只是隨機買多啲，見跌又加大注碼一倍，本來買５萬，變咗１０萬，虧損亦擴大好多。

　有句老話叫「贏就谷，輸就縮」，贏時去谷，即使股價回頭，還有開頭贏的賺價頂一頂，輸時去谷，已經唔順手，仲要賭大啲，就會把虧損擴大。

    最後講講潛水艇那個分段入貨價，若是早定的分段價，７．８３元第一注，６元才第二注，即係跌２３％才入第二注，差價拉得太大，兩注平均６．９１元，在６元入得到第二注，已比平均價低１３％，咁你又止唔止蝕，定在乜位止蝕？

   若是分注，合理點計，如分三注，假如第一注要在７．８３元入，第二注約在７．４元入，第三注７元入，平均價７．４１元，一成止蝕６．７元全數打靶，若想放多少少空間，一成半止蝕，在６．２９元要沽清。今日最低見過６．６７元，如以日中交易價計止蝕，已經入齊三注，一成止蝕兼且要打埋靶（好慘），有人以收市價計止蝕，咁都得，但最後止蝕時通常會輸多一點。若計一成半止蝕價６．２９元，暫時未到，不過都有少少危。

　   最後補充一句，上電第一口價７．８３元只是高位低一成，定得不夠深，容易買到，但危險度大，我對此股無甚研究，但睇圖會第一注放在７元或以下，在咁波動o既股市，買已高升回落的股份，入貨價比高位低２０％開始入安全少少。分注入貨，最好入唔齊，唔好望入齊三注，因為入得齊等如跌得深，距離打靶價亦近，有啲危險。你可能會問，分注入唔齊如果升上去咪好唔抵，睇到大市或個股轉勢向上，入唔齊的股份可以市價追入，就算無追，買唔夠升咗，都係快樂難題，股市有過千隻股票，你有錢驚無股炒？

陸羽仁