美國開始進入減息預期的週期中，昨美國聯邦儲備局主席伯南克明示，聯儲局可能進一步減息，並採取更多重大措施（ready to take substantive additional action as needed），去支持經濟增長，防範經濟下滑。

伯南克出席一個論壇時承認，近期的數據顯示，今年的經濟展望轉差；樓市下滑、信貸緊縮和能源價格高企，都會對消費構成壓力，所以可能要進一步減息（may well be necessary）。

　　伯仔作為聯儲局主席，講話應該比較隱晦，佢講「採取更多重大措施」，本已足夠暗示會減息，但他直接講可能要進一步減息，更屬超常舉動，顯示佢都有啲心急，怕唔先出口術，等到月底會期時才減息，恐怕股市再大幅下滑。

伯仔講完之後，大部份都估聯儲局公開市場委員會月底議息時，可能減息多達半厘。美元在清楚的減息預期中，明顯走軟。

美股聽完伯仔講嘢亦顯著反彈，道指上升１１７點，升到１２８５３點的水平。美股大升的另一個原因是最大按揭商Countrywide 正和美銀商討合併，令其股價勁升５１％，升到７．７５美元，在Countrywide昨日反彈前，佢今個星期已累計跌了３９％，到佢昨日勁彈，亦帶動金融股全線向上。

美股重上１２８００點以上水平，若能守穩一兩日，已確認美股已見這個月的底部，要尋底又等下個月。美股上次減息時衝上１３７００點的水平，去唔番前高位１４０００點，由於１２月減息當日未有減息０．５厘，市場有少少失望，在減息日開始見頂回落。今次減息０．５厘應無走雞，無驚也無喜，也要小心美股到月底減息後，又是反彈小浪的浪頂，到下月又再尋底。

美股走勢幾弱，我有少少懷疑今次反彈上唔上得到１３７００點，可能只去到１３５００點左右，形成一個一浪低於一浪的走勢，跟著減息週期，反覆向下調整。

港股近日走勢較飄，基本上是在２６７００點和２７６００點上落，若美股不再向下，只要大陸唔公布太壞消息，今個月大幅破位下跌的機會正減少中，從「投資的我」角度，今個月至今調整未夠深，未有胃口入市。但從「投機的我」的角度，這一兩個星期內不宜看得太淡。

陸羽仁

　　美股熊味好重，重到連一向不以經濟為標榜的民主黨候選人奧巴馬都話有７００幾億美元的救市大計，可見經濟衰退已經成為美國人擔心的頭號問題。

　　我呢一排主要留意美股，雖然港股走勢和美股有少少分離，但我怕美股會爆烈性下跌，若係咁樣，港股唔會頂得住，會大幅調整。唔知大家記唔記得，去年２月２７日大陸股市大跌，美股跟住個日就大跌５００幾點，接著就觸發港股一個深度調整，我就怕美股出現這種大跌市。

　　不過近日美股雖然樣衰，上週五道指又大跌２４６點，不過總算暫未出現爆裂性下跌（咁講要掂吓木頭先至好講落去），所以暫時未到恐慌的地步。

　　其實過去一個幾月美股暴跌一啲都唔奇，因為次按風波不止影響金融機構，還波及就業等實體經濟環節，結果令各類消費股大跌，這就如火山爆發一樣，震波一環一環擴散開去；不過火山爆發的核心尚未穩定，餘震不絕，未來金融機構公布業績，又會再顯示次按的影響。到目前為止，美股唔算跌得多，都算跌得少了，而且暫時唔叫做跌得太急，仲跌得比較有秩序，仲可以叫做不幸中之大幸。

　　美國銀行體系仍要施手術搶救，未來幾日銀行公布業績將是壞消息的高峰，金融機構想方設法去控制壞消息的影響，搵人入股，將壞消息變成好消息，將是不二法寶。據英國《金融時報》報道，花旗集團估計要撇帳２００億美元（１５６０億港元！）現時部署一個１４０億美元的集資計劃，主要對象是中國的國家投資公司和科威特投資局，另外少部份會拿出公眾發售。估計花旗的新CEO　Vikram Pandit會減少派息四成，去改善花旗的財務狀況。



　　這已是花旗第二次大幅撇帳和尋求注資，銀行若大幅撇帳，淨資產急劇減少，公司投資評級馬上降，後果十分嚴重。花旗在１１月大撇帳時曾發換股票據向阿布札比投資局集資７５億美元，但今次撇得更多，亦集資更多。

　　而投資銀行美林亦計劃第二次集資４０億美元，科威特投資局相信是接貨的主要對象，估計會在本週中公布。

　　踏入１月下半個月，這幾日將是金融機構公布業績的高峰期，估計只有JPMorgan Chase業績見得人，可以避過次按危機，市場預料它每股有０．９３美元盈利，比去年同期跌１４％。其他銀行和投行的業績都係爆鑊多，若果它們能同時公布巨型集資計劃，找到主權投資公司入股，預料會大減負面氣氛。而近月尾則開始有好消息，除了減息之外，到１月２８日，美國總統布殊將公布國情諮文，隨時包含一個千億美元救市大計，今日聯儲局主席伯南克將和民主黨眾議院領袖佩洛西會面，預計伯南克將會做說客，痛陳美國經濟之險，希望民主黨不要搞局。

　　美國熊市的味道濃郁，尚幸未有暴跌，在未來的歲月，港股雖然要捱，只要不成災就無問題。

陸羽仁

  　 美國這隻大水牛正在抬上手術台急救中，雖然成功搶救被視為好消息，但其本質應該是壞的，例如傳聞中的花旗急救方案除了包括超過１００億美元的集資計劃，還有裁員２萬人的打算，當中有６５００人來自投資銀行部門，這一班資本主義的市場嬌子，正承受著自己有份參與製造的金融和地產風暴的惡果。

另一個會被視為好消息的壞事，就是越來越多人估計月底聯儲局月底議息時會減息０．７５厘，從美國國債期貨走勢顯示，市場相信有高達４８％的機會減息０．７５厘，在１月１１日聯儲局主席伯南克講話前，無有人相信會減息０．７５厘。雖然現時市場主流還是相信減息０．５厘機會較大。

在大幅減息的預期下，美元繼續走軟，今早亞洲市交易早段，歐元兌美元報１．４８７，美元兌日圓報１０８．０９日圓，險守１０８關口，黃金亦升到顛，做９０８美元。

美股開始產生手術將會成功的憧憬，道指昨日升１７１點，升幅１．４％，道指升到１２７７８點，主要因為IBM的業績優於預期，由經常業務產生的季度每股盈利２．８美元，高於市場預期，IBM股價大升５．４％，帶動美股向上，因為市場擔心次按風暴將全面影響各大企業的第四季盈利，但IBM做得好，令人感覺好多非金融、地產類的公司其實唔係做得咁差。

正在急救的花旗都有得升，股價升０．５美元，收報２９．０６美元，升１．７％，市場開始有人炒銀行股見底，甚至美股整體見底。例如Credit Suisse 就把美股的看法轉為「增持」，認為聯儲局表現出推動經濟的承諾，美股應有支持。

　　最近港股走勢唔太跟美股，好易令人產生港股唔使理美股的錯覺，其實港股大方向暫時走唔開美股，但論基本因素，美國唔掂會大幅減息，對本地的樓市極其利好，所以即使地產股炒過籠還是繼續炒，地產股大升就沖淡咗其他股票的跌幅。論炒作因素，港股走勢咁飄，亦有人為成份，例如昨日美股大跌港股還要高開，就相當玩嘢，不排除有期指好友借此減慢跌勢。所以美股若未脫險，港股亦好難大幅炒上。

　　不過跌到咁上下，就有人開始炒見底，Credit Suisse就係呢類，美國金融股上週五在大跌市中不跌，亦見撈底客的手影。IBM業績好，也令人覺得聯想（０９９２）應該都唔錯（其實IBM出售個人電腦業務予聯想後，它已脫離個人電腦行業，所以兩間公司的業績不可直接比較），令散戶想在此時追入聯想。

在急跌市中跌到咁上下想入貨，就如跑步比賽起跑前評判的號令槍將發未發時，運動員想搶先衝出的心態，既考判斷，也考運氣；運動員太快搶出要重新起跑，三犯就要出局，撈底買股也一樣，搶先入貨者博自己撈到最低，但有時搶得太快，就會中招，買完再跌，一樣要斬。所以我的建議是若是中線投資者，即使想撈底，也不要一注瞓身，否則估唔中會幾傷，況且１月跌完反彈之後，２月隨時再跌，唔駛太急。

陸羽仁

　　　美股大跌後企穩，JP摩根公布季度盈利跌３４％，差過市場預期，要為按揭投資作１３億美元撥備，不過金融銀行股反彈，抵銷了油股下跌的影響，道指跌３４點，收１２４６６點，雖穿１２５００點，但這一浪美股抵受花旗公布這種１８０億美元大撇備的衝擊，而家的跌幅都唔算過份了。

　　昨日港股大跌１３００點，絕大部份有貨在手的網友，當然無哂心機，去年全年的利潤可能抹去大半，高位追貨更要入肉，在跌市中，止了蝕的朋友會慶幸，不過若我在在旺市回吐時叫你止蝕，止蝕完再升，可能要捱罵，可知市道絕對影響人的心理與觀感。

　　在大家對股市前景疑惑之際，我又找了高手朋友求教，怎樣看待如今的市況。高手分析大市，他在今年初已認為頭一季必有一跌，係一月定二月大跌唔知，跌市應有去年８．１７那種規模，即是整個地區皆跌，匯市亦大亂，日圓抽升令對沖基金拆倉，總之出現大龍鳯那種跌法，才是像樣的跌市。昨天的大跌，就有咁樣的氣氛啦。

　　在跌市中永遠有人問跌夠未，愈跌得多，愈跌得急，你會愈覺得它未跌夠，所以現在有人問會否再跌到２３５００點。高手問的問題卻是，現在究竟是一個股災的開始，還是一次調整的尾聲。若是股災，港股可能要跌到１５０００點，若是調整結束，即使假設低位是２３５００點，距離現價也只是１０００點，差不太遠。歷史上香港的股災，多是由外圍引發，主要由美股暴跌造成，只有８３年的香港前途談判跌市和８９年六四事件引發的大跌市是例外。高手話外圍暫未成大災，大陸股市反彈，美股跌得尚有秩序，是反覆慢跌而非急跌，唔係太似股災，外圍無災香港好難有災，所以今次大跌較像一個股市調整的尾聲。

　　佢認為呢個月股市走勢咁飄，主要是持有大量淡倉的大戶造成，因為美股的走勢十分正路，但港股卻曾出現眾多古怪走勢，相信是大戶把持大市造成的感覺。若有大戶炒跌，急插亦十分合理，要留意他們何時食糊，如何在大跌中退場，要在低位買番貨。因為大市插低到咁上下，會逼出大量的斬倉盤、止蝕盤，自然有好人幫佢地接貨了。

　　高手話，沽貨唔好望沽到頂位，買貨唔好望撈到最低位，能夠做到通常都有點運氣，買股票主要唔係靠運氣，假設現在離底不遠，今年的投資便應在這些水平逐步建倉。今次插得幾深，可能短期底部已現或好快出現，反彈後下月即使有調整，也未必會深過這次的跌市，是否如此，月底會較清楚。

　　高手身體力行，昨天跌過１０００點時開始大手入市，買入目標持倉量的三分之二，然後等候這一兩天買埋佢。我問佢驚唔驚自己睇錯，佢話驚，跟住講咗個故事。

　　高手話，年紀稍長的網友，應該睇過周潤發一部名片叫《英雄本色》，劇中主角Mark 哥去酒樓尋仇，預先在走廊多個花盆中放了手槍，他進退都靠這些手槍殺敵保命。高手對大市形成一個看法後，會按看法去投資／投注，但會假設自己可能看錯，會為自己留一條後路，就如Mark哥事先放在花盤中的手槍一樣，放番一兩枝槍，關鍵時候攞番出來，救自己一命。

　　由於高手炒作衍生工具，佢會用五對一的比例做好淡倉，假設睇錯，股市再大跌，呢五份一的淡倉可以追番佢大部份的投資，唔會死哂，這就是對沖。你聽完會嘩一聲，散戶買貨點可以咁做，佢話散戶有幾個方法，為自己留後路，第一，分段入市，第二，唔好瞓身博盡，借錢買貨不宜，第三，買少少價外的認沽輪對沖，要知道輪商食價好深，非常搵笨，所以只能買「少少」，這些錢如保險金，預咗輸清。

　　陸羽仁補一句，在２４５００點買股票，比在３００００點樓上買安全，散戶現時買貨要捱那種週身中刀的感覺，但現在唔買等大市高升等感覺良好時才買，其實風險更大。不過現時買貨，買入後隨時再跌，嗰種感覺的確唔好受。

陸羽仁

　　美國大水牛急救手術仍在進行中，手術室紅燈仍然亮起，在美國政府公布一個１５００億美元（１１７００億港元）的救市大計的前夕，美股道指大跌３０６點，跌幅２．５％，跌至１２１５９點，距離１２０００點大關只是一步之遙。

    　昨日美股沒有特別驚人的利淡消息，但市場相信衰退快將來臨，就把美股推低，主要由艾克森美孚、美國銀行和通用電器領跌。美林公布第四季業績，蝕９８．３億美元（下同），每股蝕１２元，遠比分析員估計的４．８２元為多，結果美林股價急跌，每股股跌５．６４元，跌到４９．４５元，跌幅１０％，第四季業績奇差也令美林去年全年業績見紅。

　　不過陸羽仁又有一個理論，認為美股大跌和布殊政府的救市大計有關。伯南克昨日在美國眾議院預算委員會打開口牌，話一個１５００億美元的救市大計有助舒緩經濟危機，佢甚至透露政府的救市大計的具體方向，話要有總值６００億至７００億美元的臨時措施在２００９年初推出，就會對今年下半年的經濟有重大效果。

　　傳聞中的救市計劃包對每個美股納稅人個人作８００美元的退稅，及對家庭作１６００美元的退稅，又會對企業作出某些減稅措施。

　　伯南克雖然無講救市計劃的內容，但卻在國會內大談不同救市措施的效果，他認為措施要分散才有效，減稅要減低下階層的稅，因為他們比有錢人更快使錢，而２００１年的退稅成功催谷經濟及防止深度衰退。談到企業稅時，他認為針對企業軟件及設備的稅務優惠，比直接減利得稅有效。他又認為把共和黨在２００１年及２００３年的削減利息稅措施，化為永久措施，短線有助提振金融市場的信心。佢又話這些救市計劃「要具體可見，不是做門面工夫」。另外伯南克又重提聯儲局預備好在利率上做出「重大行動」，對抗衰退。

　　伯南克未議息就打開口牌講減息來已經夠奇，佢仲做埋政府嗰份工，為求向國會推銷政府的救市大計，事先披露今年才公布的救市大計方向，就更奇上加奇，內裏自有文章。

　　執政共和黨是赤字減稅派，在野民主黨是平衡預算的加稅派，傳聞民主黨希拉莉上台後還計劃加稅。所以布殊這個行將落任的政府，如果提出大幅減稅的措施，跨越呢屆政府的任期，民主黨控制的國會那能支持呢？

　　這一陣子伯南克經常會見民主黨國會要員，相信是為共和黨政府作說客，遊說民主黨接納減稅救市大計。美國政府事先把方案吹出街，是讓人民看到甜頭，讓民主黨更難反對。在方案推出前夕美股大跌，更增民主黨人的壓力，若堅持反對，搞到美股股災，恐怕今年１１月大選都無望矣，所以他們要決定，究竟係冒住被人民鬧的風險反對方案，還是忍痛接受一個城下之盟。

　　經濟混雜政治，其風險可知，萬一民主黨人拼死反對，美股的確有進一步大插之險，共和黨隨時借此送大熱的民主黨候選人希拉莉上路。若民主黨讓步，忍痛鬆手放布殊政府一馬，股市又可以當無事發生。

　　講番港股，美股大跌，港股自然受壓，散戶仍然要有心理預備，繼續坐過山車了。

陸羽仁

　　昨日港股一插近１３００點，整個亞洲股市都因為道指的場外期貨急跌而下插；亞洲市結朿到歐洲市，全部跟跌，以德國DAX指數跌７．２％最厲害，倫敦股市因為有政府宣布擔保北石條債券數，北石股價急升５成，叫做氣氛好啲，都跌５．５％；始作俑者美國因為馬丁路德金假期而休市，只能睇住個道指場外期貨價，都跌了４００、５００點。

　　　　全球股市係咁跌，大摩的MSCI全球股票指數亦錄得５年以來最大跌幅，股市大跌引發連鎖效應，日圓再升，做１０５．８日圓，從事套息交易的對沖基金又要拆倉，炒得勁如黃金等商品急回，黃金現價８５６美元，油價亦因為擔心經濟衰退而急回，紐約二月份期油跌到８８美元一桶。所有投資產品皆跌，只有一樣東西上升，就係美債，投資者迴避風險把資金泊入短期債券，二年期美國國庫券升到１０２元，令債息跌至２．１％，投資者情願唔要回報，只求安全。從美國國債券期貨成交的數據顯示，市場估計聯儲局減息０．７５厘的機會，已經高達７５％。

　　歐洲跌得咁甘，今早亞洲開市再跌，日經指數曾跌超過６００點，跌幅約４．６％，之後跌幅略回順。到香港開市，又係爆大鑊的格局，昨日收２３８００點，距離２５０天線２３５００點只是３００點左右，好易一攻而破，直試２３０００點關口。

　　環球股市跌得咁甘，英國政府都投降，同意高盛的建議，由政府擔保北石銀行的債券，這種企業失敗由政府承擔的手法不尋常，但事急馬行田，英國政府也得無奈接受。

　　陸羽仁就好有興趣知道美國財長保爾森和聯儲局主席伯南克而家做緊乜？美國星期一無市，若美國政府什麼都不做，到今晚美國時間星期二早上一開市，道指好易一跌就跌５００點以上，直插向１１５００點，咁都唔緊要，再咁跌吓跌吓就失控，跌得太急就救唔番。伯南克有無放水救市的措施？負責和民主黨就救市方案講數的保爾森，又能否取得民主黨首肯，若這一切只有否定答案，咁危機就會急促擴大。

　　在正常的日子，這種政治性的危機完全可控，因為不同黨派只係做戲攞彩，玩兩玩就埋位做嘢。但今年是選舉年，民主黨會覺得一放生咗共和黨總統布殊，俾佢搞番掂個經濟，就對自己選情好不利，所以會堅持到最後一刻。而聯儲局也會有子彈亦不發，因為聯儲局若先行減息救番起個市，都好難再叫民主黨人就範。不知大家有無注意，民主黨消息人士對記者話，要３０至５０日才會和政府談好救市方案，保爾森和伯南克自然唔想等咁耐啦，最好在１月２８日布殊公布國情諮文前就有分曉，所以壓力就集中在這天，傾唔掂就玩完啦。

　　這是一個占士甸式衝崖遊戲，兩個人各自揸住跑車衝向懸崖，邊個先停就輸，所以兩個車手都會盡量捱到懸崖邊，弄不好兩個人都會跌落山崖，弄到粉身碎骨，政治比經濟更兇險。我們作為觀眾，只能夠等。

　　你問我股市有無災，我話目前仍未算，因為跌得未夠勁，若美國政客玩出火搞唔到救市方案出籠，就好難講嘞。到美股一日跌１０００幾、２０００點時，你想話係唔係股災都唔得。

　　至於網友如何自處，基本是要求心安，關鍵係控制風險，風險控制咗，自然唔會驚到瞓唔著，以瞓得著覺來決定自己買賣的方向。首先唔好借錢買股，因為唔對路時，人家會逼你斬倉，唔到你控制，買高風險的期指或沽期權亦係一樣，結果唔係你能話到事。其次若是成手蟹貨者，亦唔好再溝，有時黑起上來，愈溝愈慘。第三是無貨想買貨者，最好量力而為，股票係相對便宜，最好分注買，亦要你有力守，若萬一發生股災跌到１５０００點坐幾年都唔驚，唔等錢使，先至好買。第四是為自己留後路，有錢唔好買盡，又或者同時買少少認沽輪做對沖（要預咗呢一筆會輸清，這筆保險費就加進買貨成本裏吧）。第五，信自己，有懷疑唔好買。第六，成手蟹貨風險太高者可能要減部份倉控制風險，或買少少認沽輪對沖。冷靜思考自己的持倉和市況，才作買賣的決定。

陸羽仁

　　美國佬一如所料地出招救市，聯儲局在美股開市前開緊急會議，決定減息０，７５厘，目標隔夜借貨利率聯邦基金利率由４．２５厘減到３．５厘，銀行同央行借錢的貼現率同時減０，７５厘，這是聯儲局自２００１年９１１事件以來首次臨時開會減基本利率，去年８月１７日聯儲局臨時開會也只是減貼現率０．５厘，無減基本利率。

　　臨時減息在美股開市前約一小時宣佈，美股開市還低開，道指開市跌４６４點，但早上１１點已開始殺上，結果全日在１２０００點上下浮沉，收市跌１２８點，報１１９７１點，雖然是道指近年首次收市跌穿１２０００點，但在事前估計會大跌的恐懼下，跌百幾點真係要開香檳慶祝了。

　　今次港股之跌，甚至整個亞洲、歐洲之跌，都係從星期一美股場外指數期貨急跌開始，時近月底聯儲局議息之日，在星期一美國馬丁路德金假期無市之時，由成交比較薄弱的場外美股指數期貨下跌開始，其跌因的確惹人懷疑。在這些成交薄弱的場外市場，要做低美股指數期貨話都無咁易，跟住就在亞洲大手沽貨，自然可以沽出個大跌浪，因為跌到咁上下，基金都會恐慌拋售，以應付客戶的可能贖回要求，而大量的衍生工具持有人因股價下跌後接貨要斬倉，會觸發連番急跌。

　　到亞洲股市和歐洲股市出現連跌兩日的惡浪，美國大跌市的壓力已逼在眉睫，美國若唔在星期二開市前出招救市，就會出災，結果一如所料，聯儲局出招，昨日陸羽仁寫文時已講，聯儲局主席伯南克和財長保爾森要出招放水了，當時還未知港股昨日還要再跌多２０００點兼無反彈，到看到昨日香港的市況，美國出招救市就變成理所當然，所以最後見到鬼佬電視台報導聯儲局臨時開會減息，猛咁話驚奇，我就唔知有乜咁驚奇。

　　鬼佬大戶力插亞洲股，主要目的應該是逼美國政客做嘢救自己，因為間間美資大行都水深火熱，所以唔好意思啦，大力隊低亞洲股市，逼人做嘢，至於在香港等亞洲股市順手撈一筆，這只是甜品，應該不是正餐。網友們可能話佢地衰格，唔沽自己股市沽人地股市，不過話番轉頭，佢地沽美股唔係唔得，但如果要沽到港股咁大龍鳯，製造咁大驚嚇效果，港股兩日跌３５００點，道指起碼要跌番１０００點先有同樣效果，你話美國咁弱o既氣氛，道指跌１０００點，跌開有條路，恐怕佢會一瀉如注，金融大戶都驚自己玩出火，插完想頂都頂唔住，所以唔敢係自己屋企玩，唯有喺人哋屋企放火，然後大大聲聲話風高物燥，要防火也。

　　咁呢次環球股市做出咁大驚嚇，結果又得到啲乜家伙呢？表面上看只是聯儲局減息０．７５厘，好似大家都預咗，其實內裏有一重意義，就係聯儲局隨時在會期以外，以超常手段大幅減息，而家美國利率３．２５厘，誇張起來仲可以減多２厘，所以你去沽美股沽得太厲害，就有俾人突然減息挾倉的風險，所以聯儲局的超常舉措制約了淡友的行動空間，即係聯儲唔係一定要等到會期才可減息。今次減０，７５厘唔夠，若股市再大跌，過兩日佢可以失驚無神再減０．７５厘，用減息大力放水，打到淡友手軟。

　　呢一跌還有一重影響，就係逼美國民主黨就範，盡快接受執政共和黨的救市方案，負責和民主黨談判的財長保爾森話，救市方案「必須盡快推出」，而白宮發言人Dana Perino更表示，不排除救市方案比原定的１５００億美元更大。

　　我可以扮吓保爾森同民主黨講話：「你睇，只係傳吓話美國經濟唔掂，亞洲股市好似香港就跌到阿媽都唔認得，如果你地唔快快趣趣同意救市方案，只係減息唔夠力頂，美股若出現亞洲股市同樣的急跌，一日跌１０％、２０％唔出奇，到時你哋要想想如何向選民交待。」有呢次亞洲跌市做樣辦，的確可以增加保爾森的談判籌碼，保爾森以前係高盛主席，自然深懂股市的玩法。

　　美股「奇跡地」V型反彈，小跌收場，港股跌咗咁多自然會反彈，好多網友關心熊市是否已經來臨，我也維持過去的看法，美國熊市早已來臨，港股的熊市未確認出現，因為熊市的特點是股市見高回落，然後一級一級咁向下；去年港股９、１０月的升市由於有港股直通車消息的人為刺激，一下子搶高到３２０００點的水平，但港股直通車的消息被暫時否定後，港股要回歸自然，我早已說過，港股是大波動上落市，但炒作區間要逐步下移，去番比較正常水平，再定去向，目前的走勢未確認熊市來臨。

　　有網友問是否股災，我話股災唔止跌咁少，跌到１５０００點一啲都唔奇，但我判斷目前出現股災的機會都只係有一、兩成，風險主要係美國市救唔到兼且大急跌，我在早兩日話港股未滑入股災中，主要原因係睇住美國市，因為美國當時利息係４．２５厘，利息未算好低，美國連番減息大放水的招數未用盡，照計無咁快來股災，因為一有災味，美國佬就會連番減息救市，到減到咁上下無得減無可減，或者通脹大颷升形成一個減又死唔減又死的兩難題前，美國佬有招未出盡，所以無咁快有股災。

　　港股呢一轉插得咁勁，好大機會短浪見底，一兩個月的後市要看美國有無災，若美國弄出比較像樣的救市方案，不排除可以軟著陸，若美國因為政治鬥爭搞到救市方案唔湯唔水，再減一兩次息都救唔起個市，就要小心。

　　股票而家幾便宜，只要量力而為，買吓唔怕，守住止蝕，照計都唔死去。

後記：昨日問高手有乜部署，高手話個市跌得幾恐怖，超乎他的想象，但見到個市跌２０００點時，佢就大手入貨，話揸一日睇吓都好，除了因為估美國佬會出招外，他還有一個奇怪理由，話港股咁歷史性一日跌２０００點以上，一定要買啲貨，贏又好輸又好，將來老咗有故仔可以同兒孫講咁話，去年的８月１７日，他亦大手買貨，感覺和昨天一樣，好驚。

陸羽仁

美國股市昨日先插後急彈，早段因為美國銀行第四季業績跌９５％，遠差過預期，加上蘋果電腦和摩托羅拉預期業績會受經濟回落影響，道指曾經跌過３００幾點，尾段傳出政府同銀行研究出招挽救債券保險公司，道指在金融股帶動下急促反彈，結果收報１２２７０點，大升２９８點，升幅２．５％，上下波幅有６００幾點，坐哂過山車。

美銀因為次按要撥備５３億美元，要發６０億美元的可換股優先股集資，但股價照升８．５％，金融股以JPMorgan升得最厲害，大升１２％。市場開始預期金融股最壞的情況過去，有人認為現價跌到吸引水平。

其實睇番早兩日亞洲股市大跌和美國跟著的連番救市措施，令我愈來愈相信這是有計劃跌市，因為美國已有連串措施跟尾。

第一，救債券保險公司。好多人唔知美國的債券保險公司正在爆大鑊，它們在倒閉的邊沿，由於次按債券爆煲，向債券保險公司索賠的數字急增，債券保險公司的財務狀況急促惡化，美國第二大債券保險公司Ambac Financial　這個月剛被評級公司Fitch Ratings降低其AAA評級，其對手美國最大的債券保險公司 MBIA Inc 也等住降級，債券保險公司爆煲是美國下一浪金融危險風眼，連保險公司都瓜埋，勢必觸發連鎖反應，但昨日傳出消息，美國的保險專員正和紐約的銀行磋商，向MBIA Inc等提供信貸，協助MBIA Inc保持評級，保住它做保險的２萬億美元債券仍然有保險公司支持，否則保險公司冧埋，這些無保險的債券實行等掟出街大賤賣。

政府救債券保險公司的消息一出街，華爾街金融股也勁彈，特別兩隻最受惠的債券保險股更升得誇張，已被降評級的Ambac 狂升 72％， MBIA 也有升 33％。

第二，減息有下文。聯儲局臨時減息０．７５厘，你都咪話無壓力，消息出街之後雖然好多人叫好，也有人彈。有學者風格的摩根士丹利亞太區主席羅奇話美國聯儲局而家咁減息法，係營運這個世界最大經濟體的「危險、魯莽和不負責任的做法」，在泡沫爆破時用減息去支持，會鼓勵投資者將來冒更大風險。而歐洲的央行亦媽媽聲，英倫銀行更出口批評，照示歐洲央行和英倫銀行仍怕通脹，無意跟美國減息，美國減息歐洲唔減，美元弱化，令美國出口到歐洲更有優勢，歐洲股市又無息減又怕衰退，自然大跌，德國股市跌４．８％，法國跌４．３％，英國跌２．３％。

可見若無早前亞洲股市急跌的壓力，聯儲局唔易大幅減息。由於聯儲局已擺明重視增長多於通脹，係一個明顯策略改變，而家好多人估聯儲局在１月３０日議息時會再減息，期貨交易顯示有８０％機會聯儲局到時會再減息０．５厘，令利率跌到３厘（若如此加埋臨時減息共減１．２５厘），在一星期前，係無人估聯儲局會減息減到低於３．５厘（即係唔會減多過０．７５厘）。在減息預期下，自然支持股市反彈。

   　第三，民主黨態度軟化。布殊一直希望在野民主黨支持他的救市大計，到亞洲股市急跌後，佢就約國會兩黨領袖見面，話「我們可以找到共同立場，採取足夠大規模而有效的措施，提振一個規模龐大的經濟。」民主黨國會領袖的態度亦好軟，參議院民主黨領袖哈雷內德話美國經濟正滑向衰退，他希望國會能到2月中旬時已通過一份財政刺激組合方案，「我會希望很快拿出點東西來」，佢講到急過布殊。而民主黨衆議院領袖佩洛西亦話，刺激經濟的法案，「是亟待處理的緊急事務。」看來布殊應可以取得民主黨支持救市方案。


　　香港股市做咗美國政治的配角，幫美國政府和聯儲局掃除救市的障礙。有人話，美國大行炒燶了輸了大錢，就搵政府出手，聯儲局狂印錢救市。政治就係咁，講實力，唔係講口水。

　　昨日經紀張話擔心美股會再跌，我就話炒炒反彈先啦，唔使驚噃，美股同港股，係同一個老細o架！

陸羽仁

　　美國執政共和黨終於就救市方案和在野民主黨達成協議，推出龐大的退稅計劃刺激消費，美股道指再升１０８點，升到１２３７８點的水平。
　　陸羽仁一直認為，呢個星期以香港為首的全球股市急插，為的就是挾到民主黨接受布殊政府提出的救市方案，以及為聯儲局更快更大幅減息掃除障礙，大家都知道，美國財長保爾森是前高盛主席，金融和政治如何交叉去玩，佢點會唔知，今次馬上爭取到民主黨同意救市方案，我可以用美式足球的「達陣」取分去形容。至於期間包括香港在內的亞洲、歐洲股民如何因為股市暴跌損手流血，就只能以「一仗功成萬骨枯」去形容，加上死的主要不是美國股民，佢地當然唔覺得入肉。
　　今次救市方案由保爾森和民主黨國會議長佩洛西和共和黨國會領袖貝南共同宣佈，好有兩黨聯合救市的味道，之前大家點狗咬狗骨就無人知啦。
雖然兩黨口講如何照窮人，但救市方案的重點其實係刺激消費，最主要部份係向１．２億個家庭退稅，個人最高可得６００美元的退稅，夫婦退稅最高有１２００美元，再加每個孩子３００美元。美國人生得仔多，一個家庭３、４個仔女等閒事，以三個孩子的家庭計，每個家庭無端端最多收２４００美元（即１８７２０港元），都唔係細數目。財長保爾森話，最快可在國會通過方案兩個月後，就把退稅支票寄出，即係預計美國人５月可以收到退稅，保爾森形容此舉係「一條快線」。

美國人有錢收，自然會感覺良好，以他們有錢即使的性格，一有錢就會花掉，退稅等如政府向消費市場大量注資，這筆錢在５月就會注入市場，等如１、２個月後，美國消費市場就會熱起來，因為不少美國人預期收到退稅，可能提早碌卡消費，好多退稅促銷活動會馬上推出。

救市方案亦會鼓勵公司作設備投資，小公司過去買設備有１１．２萬美元扣稅上限，將會倍增，大公司買設備的扣稅限額亦會增加。美國稅重，所以仍有錢賺的公司，就會利用這些「稅務假期」大買設備，馬上可以少交稅款，反正買設備又可以分期，對現金開支增長不大，但即時卻有現金的稅務得益。

方案亦有救樓市內容，政府會放寛房利美公司等按揭證券公司購買按揭的上限，由過去每個貸款的上限為４２萬美元（３２５萬港元），放寛到７３萬美元（５６９萬港元），此舉可以減低貴價樓的融資壓力。

布殊政府這個萬億港元的救市方案，能否把正在下滑的美國經濟托住，尚要觀察，但政府這樣大力放水入市場，加上大幅減息，有利提振信心，樓市可能唔係咁易救得起，但可刺激個人和公司的消費，令經濟加番少少熱度。

美股對救市方案反應良好，再加上最大的國防股Lockheed Martin,及辦公室機器生產商Xerox 公布盈利皆是市場預測的上限，所以道指升番上１２３７８點水平，加埋前日升的２９９點，兩日加埋升番４０９點，都算有反彈力，看來美股短期趨向穩定，仍在一個反彈市中，但不要對反彈期望太高，我看這一浪反彈不易升穿１３０００點。

既然美股短線會穩一穩，我估港股短期內都會穩番，至少減低大幅下滑的風險，可以繼續炒吓反彈市。

陸羽仁

　　　　上周五道指跌１７１點，今早日股跌２００點，港股開市有點壓力，不過咁波動又咁人為的股市，插１０００點，升１０００點，可能只是５分鐘的事，世人對股市上落所賦予的解釋，只是瞎子摸象而矣。


　　世界上有好多聰明人，表面上最多聰明人做投資銀行家，實際上更多聰明人做政客，投資銀行家打生打死追逐巨利，政客唔駛點做噴吓口水就令巨利轉移。君不見美國的銀行家、投資銀行家發揮佢地無限的創意，把錢借給毫無還款能力的次按業主後，還把這些貸款包裝成證券，由於這些次按證券評級低無人買，又把它們包裝成為CDO，把少量次按證券加上大量優質的AAA級債券紥埋一齊，整件CDO出來，又變成AAA級了，再把這些化了裝的CDO賣到全世界。咁搞法自然會出事，出事後又叫政客大減息放水救市。這些漲跌循環週而復始，唔知點解，普通人的財富郤不斷被人轉移走了。美國而家告緊各大投資銀行包銷按揭公司的股票時欺詐，不過呢啲官司，最後多數係和解收場，投資銀行賠錢就可以了事，舞又照跳。


　　最妙的是美國人使大咗、玩大咗、整爆咗、累咗街坊，跟住狂放水救市，你仲要多謝佢。好似你鄰居養咗條惡狗洛威拿，無端端走入你屋企打爛哂你啲嘢，鄰居最後來把惡狗洛威拿拖走，你仲要千多謝萬多謝，仲話好彩得佢拖走條狗，條洛威拿先至無攞你命。至於鄰居捉狗時順手牽羊，把你屋企的財物拿走，你都無法追究了。


　　網友S2000話香港好似ATM機（銀行自動櫃員機）咁俾人提款，我就絕對贊同，人地拖住條惡狗，你地可以點出聲，出聲隨時命都無，港股上周二俾人隊到落２１７０９點，而家升番上２５０００點，大家高興都來不及，賠錢送賊，還要千多謝萬多謝。
網友idoglife講起：「1980年，美國商業銀行的優惠利率高達21厘。當時西方各國被滯漲所困擾。列根提出重振國威的口號，結果贏得美國人的心，入主白宮。美國也不再視凱恩斯主義為靈丹妙藥，以『鬆財政，緊貨幣』的方針，刺激經濟。在國家利益的前提下，各國各懷打算，一場難解難分的經濟政策戰就此展開，叩開了80年代的大門。今日，因次按引發的信貨危機，有沒有其他下文，我不肯定。但在國家利益的前提下，大家會出甚麼招，就要拭目以待了。陸sir,您點睇呀？」

這場次按風暴無咁快完，香港對樓市大跌最有經驗，當然唔可以三幾日就搞掂，不過美國好過香港，在大風暴是可以唔怕赤字大派錢，可以自己決定大減息，香港無咁o既自由。香港在９８年金融風暴時，被對沖基金挾住來玩，被逼大力挾高利息捍衛港元，搞到隔夜息高到３００厘，經濟差仲要捱超高息。後來到２００２年，香港經濟再轉差，當時的財爺阿松蠢就蠢在經濟差時仲要大力減開支，不過他也是在國際貨幣基金會和世界銀行的壓力下，要香港平衡預算，才被逼落雨收遮。睇番而家的美國，點解佢落雨又可以開遮，經濟唔好赤字高都可以大增赤字派錢救市呢？又唔見國際貨幣基金會和世界銀行出來批評吓美國？

妙又妙在另一單新聞同時發生，世界銀行前行長沃爾科威茨因為把女友安插入世銀工作，爆出醜聞，搞到要下台。沃爾科威茨出任世銀行長前曾任美國國防部副部長，出事之後，最近美國又整咗個國際安全顧問委員會主席俾佢做，既然美國隨時安排黃金降落傘俾這些國際金融機構的巨公，佢地對美國好啲亦都正常。

美國而家似乎用緊「鬆財政，又鬆貨幣」的政策，一字記之曰「派錢」，所以美國狂減息，狂退稅救經濟，只要佢忍得美元下跌，這個狂印美鈔的行動可以做到好得人驚，到時歐元升值，人民幣升值，中國和歐洲出口減慢，你地持有的美元儲備下跌，就真係唔關美國佬事。中國持有１．４萬億美元外匯儲備，人民幣每升值１０％，中國唔見咗１．１萬億人民幣，等如中國損出這筆錢幫美國救市，美國仲要彈你人民升值得唔夠快，乜唔係自招貶值嗰個俾人彈咩？以中國１３億人口計，唔見１．１萬億，即係每個中國人平均捐了８４０元人民幣出來，最窮的２億農民一年收入都係差唔多，即係等如２億人一年白做去救美國．．．．．．

美國利息仍然大把水位可減時，所以我唔敢話美國次按問題救唔番，現時美國利息３．５厘，減多２．５厘，減到剩番１厘都可以，而且美國亦可以狂加赤字派錢救市。直到這些招數用盡前，美國想爆災亦唔係咁易。不過在未來歲月裏，股市的風浪難免，我亦唔敢講呢個月的大浪，今年唔會再發生。

陸羽仁