雖然英特爾首季業績好過預期，但美國政府公佈的3月份零售銷售數字和一系列經濟數據都出奇的疲弱，總統奧巴馬的講話無乜料到，加上高盛批股，金融股受壓，拖累美股走弱，結束了三日的升勢。杜指開市插水117點，失守8000點大關，之後跌幅收窄，杜指重上8000點樓上，但支持乏力，大市再度尋底，下跌至7900點邊緣才喘定。杜指午後在低位反覆爭持，最後以接近全日最低位收市。

杜指收市報7920點，跌138點或1.7%，上日收市位8058點已經係全日最高位，最低7902點；標普500指數報842點，跌17點或2%；納指挫28點或1.7%，報1626點。紐約證交所成交17.5億股。杜指期貨最新報7884點，比現貨低水36點。

拖累大市的元兇係金融類股份。高盛季度業績好過預期，但並唔係客觀經營環境改善所致，令人無甚欣慰，加上高盛以折讓5.5%的123美元批股集資50億美元，投資者紛紛以沽售回應，高盛大跌近一成二，收報115.11美元。高盛批股集資50億美元，係佢從政府的TARP計劃借款100億美元的一半，加上高盛的自有資金，已足夠償還政府的借款，還錢後可以唔受政府限制發花紅，不過奧巴馬政府有少少擔心部份銀行還錢後，能夠還錢的銀行和唔可以還錢的銀行分成兩等，而無力還錢的銀行會受狙擊，所以可能唔會咁輕易接受高盛還錢。

投資者看到高盛集資為還政府貸款的一面，我認為另一面也值得關注，高盛、大摩、美林係美國三大證券行，佢地睇市自有一手，大行批自己的股份出街，值得特別留神，高盛批股是否意味佢認為現在已離頂不遠呢? 若佢認為仲有水位，點解唔等高啲才出貨，而係趁住公布季度業績好消息時就馬上出貨呢?若佢認為一個星期後批股作價可以高10美元一股，我估佢就唔會今日批股。
如果美國政府唔俾高盛即時還款，高盛仍然咁急批股，更顯示佢認為股價已離頂不遠。

高盛股價1年高峰是去年5月時的203美元，去年11月的低位是49美元，之後的跌浪低位未穿去年11月低位，有少少一浪高於一浪的味道，呢一浪反彈咗咗好多，批股價123美元，已比低位升了1倍幾，現價批股並唔失禮，若有一浪回軟，高盛跌番落70、80美元一啲都唔奇，到時即使政府願接受還款，高盛都未必能搵夠客批到股出街。金融界高人睇市，自有一套，想當年私募基金黑石上市，我已經話佢地的主事人全部係高手，佢地沽得貨，個市都差唔多啦，唔知今次高盛批股又係唔係咁呢?

高盛批股拖累其他金融股受累下挫，摩根大通大跌8.9%至30.7美元；美國運通挫9.9%至18.43美元；而美銀亦跌8.4%，收報10.09美元；花旗集團則逆市上升5.5%，收報4.01美元，成為表現最好的杜指成份股。匯控在美國的ADR股價亦受累下跌，收報54.81元，比香港收市價低1.5%；中移動亦下跌，收報69.52元，比香港收市價低0.4%。而ADR按比例調整的恒指係15402點，比香港低178點。

美國數據唔靚，商務部公佈3月零售銷售下跌1.1%，遠低過市場預期的增長0.2%，而上月係增長0.3%，市場本來預計3月零售會繼續改善，但結果卻非如此。按年比則下跌了9.4%。各個環節的銷售都有下跌，其中汽車跌2.3%、電子類下跌5.9%，衣服也下跌1.8%。上周，國際購物中心協會（International Councilof Shopping Centers）公佈的資料則顯示3月的零售較去年下跌了2.1%，低過市場的預期。專營女士服裝的Talbots宣佈今季虧損比上季大一倍，低過市場預期，服價大跌兩成半至3.37美元。

其他數據方面，勞工部公佈3月生產者物價指數（PPI）下跌1.2%，遠差過市場預測的維持不變，按年比下跌了3.5%；係自1950年以來最大的跌幅；能源價格下跌5.5%，而食物價格也下跌了0.7%。Janney Montgomery Scott的首席經濟師Guy Lebas表示，「3月份的數據未足以叫我們重新考慮最壞情況已終結的預期，但這些數字卻提醒我們，衰退以後的路可能比衰退的時候更難捱。」

英特爾的業績卻優於預期，佢宣佈今年首季賺了6.47億美元，每股盈利11美仙，遠勝市場預估的3美仙。但按年比卻下跌55%。營業額達到71億美元，亦較市場預測的多了1億美元，反映公司健康情況的邊際利潤達45.6%，也比預期的43.5%好。英特爾CEO Paul Otellini有參考價值，佢話從去年第四季到今年第一季庫存水準明顯下滑，從庫存修正和需求水準調整角度來看，開始見到正常季節性現象，相信行業已過了最壞時期，但預期市場將持續疲軟一段日子。佢又話由於經濟及市場存在太多不明朗因素，難以準確預測下季的表現，相信第二季業務情況與第一季相近。英特爾昨日收報16.01美元，微升0.2%。


陸羽仁

       英特爾及其它科技股走弱，但聯儲局發表的褐皮書(The Beige Book) 指出房屋銷售和零售業都有復甦跡象，牽動投資者對經濟前景漸露曙光的樂觀情緒，杜指早段跌過50點後即反覆回升，在一浪比一浪高的反覆推進下，杜指以接近全日最高位收市，差不多收復上日的失地，重上8000點上方。

        杜指收市報8030點，漲109點或1.4%，全日最高8041點，最低7870點；標普500指數報852點，升11點或1.3%；納指則微升1點，報1627點。紐約證交所交投轉淡，成交只有14.8億股。杜指期貨最新報7975點，升91點，比現貨低水55點。

        反映美國經濟大方向的褐皮書(The Beige Book) 劃出一幅略有復甦的圖畫，美國經濟在3月和4月初雖仍疲弱，但收縮的幅度放緩，令人憧憬衰退接近結束。褐皮書總結12個地區的情況，話有5個地區的下跌幅度放緩，部份見到經濟活動開始在低位喘定。另外還有一些類似經濟見底的訊號: 下跌速度放慢、製造業在底部反彈、部份地區的零售有輕微改善、地產成交好過預期。

        其他數據亦有回暖徵象，美國全國住宅建築商協會(National Association of Home Builders) 指建築信心指數已有見底回升的跡象，但講緊嘅指數係由3月時的9升到4月的14，實際上係低得嚇人。而截至4月8日，互惠基金有110億美元的淨流入，遠高過3月11日時的淨流出235億美元，亦較三個星期平均的100億為高，顯示投資者回復一啲信心，夠膽去買基金。另一個好消息係信用卡違約數量在經歷幾個月持續惡化後，有小幅上升，顯示部分消費者帳單支付能力企穩。較差的數據就包括: 製造業卻持續疲弱，生產以年度計算下跌了20%，跌至1998年水準，工業生產比較2007年12月下滑13.3%，係二次世界大戰時的最大跌幅。美國經濟幾似現時的天氣，有點乍暖還寒的感覺。

大市在兩種情緒中拉鋸，睇好派逢低吸納，睇淡派怕在反彈高位摸頂，一見回吐就閃，暫時仍然係睇好派領先，昨日金融股是美股大市提供主要支撐力量，美國運通大漲近12%至20.62美元，摩根大通升6.1%至32.56美元；美銀亦升3.5%至10.44美元；上一日升咗的花旗集團則逆市跌1%，收報3.97美元。港股在美國的ADR上升，滙控升到56.53元，比香港高2.8%，中移動收73.92元，比香港高1%，以ADR計恒指係15901點，比香港高231點。

        若講未來大市的壓力，主要是美國聯儲局和相關監管機構對19家大型銀行進行的「壓力測試」，而家話會先公布壓力測試的規則，這個被稱為「白皮書」的測試規章會於兩周內，在「測試」結果公佈前發放。是項對銀行的「壓力測試」結果將於5月公佈，但公佈結果的程式細節仍在討論中，因為公開銀行資料會曝露弱勢銀行的弱項，同時增強強勢銀行的信心，做成「強者越強、弱者越弱」的問題。美國政府可能會鼓勵19家銀行各自發表自已的「測試」結果。

        調研公司Sandler O’Neill Partners L.P. 的總裁Scott Siefers 話：「在路徑（測試銀行的過程）上有越多的路標和指示牌，有助消除投資者的疑慮。」而家美國政府想先公布測試的規則，就係做緊這種公布指示牌的工作。

        這個由聯儲局、貨幣審計署、聯邦存款保險公司(FDIC) 和儲蓄機構監理局(Office of Thrift Supervision) 共同策劃的銀行「壓力測試」主要係針對本地19家大型銀行在未來兩年內，是否有足夠資本應付經濟收縮、失業率高企和房價持續下跌的惡劣情況。不過，由於公佈推出「壓力測試」之後的經濟環境持續惡化，當局將測試的底線由原來的2009年經濟收縮2%、失業率8.4%；2010年增長2.1%失業率8.8%，降低至一的個較差的預測：2009年經濟收縮3.3%、失業率8.9%；2010年收縮0.5%失業率10.3%。

短期大市仍然玩緊向上炒，遠少少要睇兩樣嘢，第一，美國經濟真係見底抑或只是反彈，第二，股市升得多會調整，要看調整時大市下探到什麼水位。

陸羽仁

美國銀行昨日公佈業績，賺錢好過預期，但實質業務卻明顯疲弱，粉碎了投資者近期對銀行業好轉的憧憬，引發金融股拋售潮，美股昨日重挫，杜指跌幅更係2月10日以來最大，而且走勢異常肉酸，低走低收，杜指開市下插167點，跌穿8000點大關，其後在低位橫行，跌幅逐步擴大，最後以全日最低位收市。
杜指收市報7842點，大跌290點或3.6%，全日最高8131點，最低7840點；標普500指數報832點，跌37點或4.3%；納指下挫65點或3.9%，報1608點。紐約證交所交17.6億股。杜指期貨最新報7810點，比現貨低水32點。
杜指30隻成份股全線下跌，拖累大市的元兇係金融類股份。美國銀行昨日公佈首季業績，雖然賺了42.5億美元，超出分析師的預期，但盈利主要來自一次性的專案收益，包括出售中國建設銀行股權帶來的19億美元收入,以及信用息差走闊帶來的22億美元相關增益。而同期的呆壞賬撥備由上季的85億美元大幅增加至134億美元；貸款違約比率由上年的1.25%和上季的2.36%跳升至2.85%；信用卡貸款損失亦由5.2%大增至8.6%，數據顯示美銀的核心業務有明顯走弱的趨勢，其CEO劉易斯（Kenneth Lewis）亦表示「我們正面對由經濟疲弱和不斷上升的失業率造成的信貸惡化的極端困境。」而美銀的財務長Joe Price昨日更表示，信貸狀況還在惡化，該行在經濟下滑中抗爭了七個季度並「預計還需要抗爭幾個季度」。美銀股價昨日重創，大瀉兩成四至8.02美元。成為杜指的跌市冠軍。其他金融股亦受累下挫，摩根大通下挫10.7%至29.69美元，富國銀行勁跌16%至17美元；分別升2.9%至4.93美元及0.6%至11.88美元；花旗集團亦下插近兩成至2.94美元。另外，奧巴馬的首席經濟顧問撒默欺（Larry Summers）表示政府將加強監管信用卡的濫用，亦令美國運通勁跌13%至18.98美元。


匯控在美國的ADR股價亦跟隨造好受累大跌，收報51.85元，比香港收市價低5.6%7.8%；中移動則收報71.06元，比香港收市低4.4%。而ADR按比例調整的恒指係15005點，比香港低746點。


經過昨日大插，跌幅如此急勁，市場開始考慮大市是否喺上日造的8131點見頂，所以跟著這一兩日的走勢，異常重要，若大市上唔番8131點，證明係近期熊市反彈的頂點，往後將會有頗大幅度的調整。


昨日講到「投資的我」的策略，大家可能覺得平淡無味，有時投資的確好平淡，好似《神鵰俠侶》中楊過用的玄鐵重劍一樣，鈍劍無鋒，大巧不工，睇落啲招式認真唔好睇。


　　大家或者喜歡睇吓花拳繡腿，我又可以借楊過用過那把君子劍，舞幾招俾大家睇睇。大戶阿Ray提到他的手法，剛可借來一用，佢話每年都希望把組合清貨，新一年又重新開始，我會稱這種手法為「半人半獸」方法，一半投資，一半投機，爭取組合一年之表現優於大市，呢種手法會比純短炒揸長啲，但又會比揸長線短啲，總之一年內了結。


　　阿Ray的做法是在跌到咁上下分三注買入，升到咁上吓分三注沽出，例如升到１４５００點開始沽一注，１５０００點沽第二注，１５５００點沽第三注，平均價１５０００點沽清。如果平均價１３０００點入，１５０００點沽，都有２０００點利潤在手（上述情況純屬創作）。這種分段出入市法，就好似舞起把君子劍，有一定招式，一般股民唔係咁易把握，但如有一定的功力，學到似模似樣，都可以行走江湖啦。試想一年如果走到兩個浪，執番４０００點，作為一個組合管理人，都算唔錯啦。


　　如果你持有一個「半人半獸組合」，清貨後個市再升，問我睇算，我會答除非你好確定個市大轉勢向上，由熊轉牛，否則老大都唔好再入市啦，你在１５７５０點再入市，中線而言，個市升多１０００點和跌２０００點的機會同樣咁大，即係買入值博率唔高，唔值得翻轉頭大舉入市。佢現時唯一可以做的事，除了買賣吓期權之外，就係作一、兩日的短炒，定位止蝕，甚至做即日鮮過下手癮，總之不宜大注，以免大市一回，就連早前賺咗的老本都輸埋。


睇市當然重要，但睇自己的定位更重要，首先定咗自己個位究竟係投機者、投資者、定係「半人半獸」的炒作者，各有唔同策略，搞錯定位，盲目揸沽，進退失據。


如果要沽的話，策略又如何呢？策略可以有兩個。一個係分段沽，將資金分成三注，每升高一級，如15000點，沽一注；15500點，再沽一注，16000點時再沽一注。另一個係以小注試市，例如升見16000點，沽少少試市，輸1000點就走人，咁就確保唔會輸入肉也。

陸羽仁

雖然財長蓋特納日前唱好銀行業，但大摩公佈首季業績蝕咗5.78億美元，係連續第二季虧損並且大幅削減派息，重燃投資者對銀行業和更廣泛經濟的擔憂。好彩有蘋果、Scandisk 波音飛機等重磅股因業績好過預期，頂住大市，杜指早段表現反覆，先跌後升，兩次上破8000點關口，但都未能企穩。金融股在最後一小時沽壓加劇，杜指插水逾160點，收市由升轉跌。

杜指收市報7887點，跌83點或1%，全日最高8045點，最低7868點；標普500指數報844點，挫7點或0.8%；納指則跑贏大市，微升2點，報1646點。紐約證交所成交17.7億股，上漲股和下跌股數比例約為8比7，顯示大市缺乏明顯方向。杜指期貨最新報7810點，比現貨低水77點。

銀行嘅「壓力測試」結果即將揭曉，市場對銀行業動靜，漸趨敏感。蓋特納上日對銀行的正面言論紓緩投資者對銀行前景的憂慮，刺激銀行股強力反彈，帶動大市上升，大摩昨日布出的首季業績差過市場預期，又大幅削股息81%至5美仙，遠低過市場預估的每股9美仙，投資者由喜轉悲，銀行股又再捱沽，拖累大市。KBW銀行股指數BKX跌4.9%。摩根士丹利下挫9%至22.44美元，摩根大通跌1.9%至31.9美元，富國銀行跌3.4%至18.18美元，美銀跌5.7%至8.26美元，係跌幅最大的杜指成份股。花旗集團則逆市上升0.3%至3.25美元，

美國預托證券方面，匯控收報51.46元，比香港收市價高0.4%；中移動收報69.19元，比香港收市價高0.9%。而ADR港比指數14955點，比香港高76點。

最近樓市反彈，好多想買樓的朋友開始忍唔住，不停咁問我好唔好買樓，我想這些朋友本來都覺得係跌市，但最近被樓市和股市反彈的氣氛感染了，就想追價入市買樓。



我經常講，投資除咗睇大市分析之外，亦要睇自己屬於乜嘢人，有兩類人比較適合買樓，第一類人叫做「大花筒型」，佢地賺幾多使幾多，一年去四、五次旅行，去東京多過去深圳，唔夠錢碌卡碌夠，幾萬蚊人工仲要借稅貸，呢類人適宜買樓，即使入市時機不太好，佢都除笨有精；因為買樓後每月要供款，係強逼儲錢的行為，既然呢類人唔供樓啲錢一樣會使哂，不如強逼儲嚇錢，老來至少有間樓。



第二類是「炒炒嚇型」，呢類人啲錢唔係使哂，係輸哂，佢地好鐘意炒股，但經常輸錢，唔知點解賺幾多都經常清袋，佢地亦適宜買樓，理由和上面一樣，買樓強逼儲錢，好過炒股輸清。



好了，如果你唔係上面那兩類人，就可以正常地分析嚇樓市，睇嚇適唔適合入市，我唔講炒樓，只講買樓自住或長線投資。兩個例子可以講講，我有兩個朋友，一個男朋友在９０年代初買咗間九龍地鐵沿線屋村樓，３０００元一呎入市，間樓６００呎多啲，買入價１８０幾萬。９７年升到高峰，造過７０００元呎，間樓值４００幾萬，個朋友無賣。９７年回歸後，是年１０月亞洲金融風暴爆發，香港樓價一下子跌了三、四成，到９８年初樓市反彈，朋友想趁機出貨，問我好唔好，我話唔沽就笨啦，結果佢以５０００元一呎左右作價沽咗，賣咗３００萬多啲，當時好多人唔明佢點解高峰唔沽回落先至沽，不過等多半年大家就明啦，因為佢沽完之後，樓價反彈後好快又大跌兩成，佢都算沽咗個好價。呢個故事教訓我哋，樓市大跌之後第一浸反彈，通常都唔係咁快見咗底。



講完男朋友，又講個女朋友，佢同樣對嗰個九龍樓村有興趣，在９７年金融風暴時一直忍，忍了一年多，到９８年底、９９年初開始忍唔住，她快要結婚，有實際需要想入市。那個屋村當時的樓價已進一步跌到４０００元一呎，她想買的樓，樓價大約２５０萬，佢問我點睇，我話跌咗咁多，樓價雖然唔算平，但亦唔算貴，不過唔能夠排除有再跌的風險，我問她買咗樓頂唔頂順樓價再跌，佢一口咬定話「頂得順」，又話快要結婚，唔買樓要租樓住，好煩。我就話你頂得順再跌都可以買嘅。

結果佢買完之後，遇上科網潮，樓市炒咗一轉，佢買間樓都一度升過一成，但佢自住當然無賣，但好景不常，科網潮爆煲後樓市再插，到２００３年沙士殺到，佢個屋村樓價跌到３０００元一呎，間樓跌到２００萬邊沿，嗰朋友開始牙痛咁聲，有少少怪我當時唔阻止佢買樓，話「早知係咁我就租樓住啦」。呢個故事教訓咗我，跌市時教人買樓真係要小心，樓市一係唔跌，跌起上來，跌勢又唔係係咁易止得住。(明天續談樓市現況)

陸羽仁

美國多家巨企公布嘅業績都好過預期，3月耐用品訂單和新屋銷售都下跌，但跌幅細過預期，引發投資者對經濟週期可能已觸底的期望，市場情緒樂觀，雖然聯儲局公佈銀行「壓力測試」初步結果唔係咁正面，但未能抑壓美股升勢。杜指上週五開市即重上8000點，之後反覆上升，尾市才略為回順。

杜指收高119點或1.5%，報8076點；標普500指數升14點或1.7%，報866點； 納指大漲42點或2.55%，報1694點。杜指期貨最新報7960點，比現貨低水116點。

美國運通和微軟係推動杜指上漲的最大功臣，兩家巨企都係因為大力削減營運成本，業績優於市場預期而大受追捧。美國運通股價暴升近21%至25.30美元；微軟則上揚10.5%至20.91美元。

聯儲局上週五公佈市場期待已久的19間大型銀行「壓力測試」的初步報告，表示受測試的銀行需要持有較監管要求的資本水準高「很多」的資本, 才能抵禦假設的經濟惡化，但消息並未影響投資者的樂觀情緒。KBW銀行類指數BKX升2.9%，除了花旗集團微跌0.3%至3.19美元外；摩根大通升0.5%至33.38美元，美銀漲3.2%至9.1美元，富國銀行升6.5%至21.4美元。

美國預托證券方面，匯控亦跟隨大市造好，收報54.58元，比香港收市價高3.6%；中移動則重上70元上方，收報70.28元，比香港收市價高1.7%。而ADR港比指數係15616點，比香港高357點。

美國國家經濟顧問委員會主席薩默斯(Lawrence Summers) 昨日在霍士新聞內話，預計今年美國就業率會明顯上升，而經濟仍會維持收縮一段時間。當製造商重建廢置了的庫存，而消費者更換他們的舊車嘅時候，經濟才會重拾升軌。佢話奧巴馬政府正在建造一條通往經濟擴展的路徑，但即使最激進的計劃，見效需時，他預計至少要6個月以上。

上回講樓市的基本因素，話而家好過９８年，但全球經濟的大環境，又差過９７、９８年。

先講香港樓市好的一面，有兩大因素。第一，樓市的泡沫沒有９７年時那麼大，尤記得９７之前，如果從回歸前１０幾年講起，香港人一直擔心大陸收番香港後，香港會失去自由，怕大陸主政後在港拉人封舖，將民主派拉哂去坐監，香港人唔止無得批評政府，甚至連出入境的自由都無埋。但隨著９７臨近，又好似無事發生，所以接近９７年時開始熱炒回歸概念，股市樓市都炒到飛起。當時樓市的泡沫愈吹愈大，還有一個附加的心理因素，那些年頭雖然政治極其動蕩，但樓市卻反覆向上，買樓買貴了，坐一兩年又翻本有利，搞到大家都好大膽，深信樓唔怕炒。我最記得９７年有一日有個朋友來電，話深井青馬大橋景觀的樓，炒到１００００元一呎，我心諗深井的交通唔係咁方便，咁都炒到１００００元一呎，呢個波吹到咁大，都好快爆啦（自此之後即使樓市再升，那裏的二手樓好似都未超過５０００元一呎）。

睇番香港今次個樓市升浪，除了山頂豪宅之外（或者其他港島山腳甚至新界自稱豪宅的新樓盤），其他二手樓唔算太喪炒，普通８００呎以下的市區用家盤，大概最多只去到９７樓價的七成，升市時的熱度都無９７那個大浪那麼厲害，或者香港人在９７年金融風暴成身負資產燒過手指後，買樓始終唔敢去得咁盡。你睇亞洲其他地區，例如經常和香港比較的新加坡，呢一浪樓市泡沫吹到好大，新加坡樓市結構本來和香港不同，新加坡政府起的公屋又大又靚，吃掉了大半私人市場，所以新加坡樓市可以十幾年都無乜得炒，但呢個浪新加坡政府決定開賭場後，掀起了一個投機大泡泡，樓價短時期急升５成有多，出現近年難得一見的炒作潮，但也沒想到泡沫爆得那麼快，升得多，跌得急。所以香港樓市過去幾年炒得唔太喪，負資產沒有９７時那機多，卻同時減少了下跌時的空間。

第二大因素是超低利息減輕了買樓供樓的負擔。９８年亞洲洲金融風暴愈爆愈大，香港政府為捍衛港元匯價，唯有大力抽高利息，增加沽空港元投機者的成本，最高有一日曾把港元隔夜拆息抽高到３００厘，這就如自己食毒藥去毒老虎一樣，食到內傷，供樓者要捱貴息，苦不堪言，若炒家持有三幾間樓，捱幾捱就頂唔順。當年係等到俄羅斯出現債券危機，搞到美國對沖基金「長期資本基金」出事，美國聯儲局急急減息救市，香港才可以抖氣出生天。　　　

但今次係全球金融海嘯，一開始就從美國爆起，她不再如上次亞洲金融風暴那樣隔岸觀火，而係一開始就減息放水救市，大家都知在聯系匯率下，港息跟美息，所以香港跟住美國減息，香港未爆大鑊時，卻享受到減息好處，更拖慢了樓市爆破，美國最後減息到零厘，香港亦減到好深。今天銀行利息完全唔高，同９８年有好大差別，如今你用與香港銀行同業拆息掛釣的按揭計劃，供樓利息可以低至１厘以下，炒家要守都易些去守，如果投資者租間樓出去收到４、５厘息，借貸成本２、３厘，供樓仲可以食息差，投資者持有一間有息差可食的樓宇，只要唔等錢使，都唔係好大動機去賣樓。

　　    講了樓市那麼多好的一面，可以解釋到這一兩個月樓市的反彈，問題是樓市見底未呢？我恐怕樓市無咁快見了底，首先，外圍金融海嘯未見底，在這個大環境約朿下，香港經濟和樓市都好難快過外圍見底。其次是樓市是較長週期的投資市場，起動、衰落、轉勢都會慢過股市，樓市升了５、６年，跌番１、２年亦好正常，而家似乎未跌得夠。

陸羽仁

市場擔憂豬流感擴散，進一步打擊經濟, 加上投資者對即將公佈的銀行「壓力測試」結果仍抱有不確定性，抹去了通用汽車重組方案帶來的提振效應。美股昨日走勢反覆偏軟，杜指早段插水近70點，在8000點關口反彈，中午掉頭再跌，午後曾一度跌穿8000點，但馬上被收復。杜指午後在8000點上方爭持至收市。

杜指收市報8025點，跌51點或0.6%，全日最高8123點，最低7987點；標普500指數報858點，跌9點或1%；納指跌15點或0.9%，報1679點。紐約證交所交投淡靜，成交縮減至14億股。杜指期貨最新報7983點，比現貨低水42點。

如果話香港豬流感市跌得少，美國市跌得仲少，例如昨日美股開市前幾大航空股AMR、 Delta、Continental只係跌８％左右，但在美國交易的東航和南航就跌２０％。今次豬流感由墨西哥爆起，對正美國加州，無論旅客或黑工，墨西哥和美國交住頻繁，所以加州都相當恐慌；中國遠在千里，受影響應比美國少，但美國航空股跌得少過大陸航空股，又真係唔係幾對路。夾硬去解釋，可以話中國有爆過沙士的經驗，所以對豬流感特別敏感，又或者美國人對自己有信心，覺得自己乜事都無（又幾似２００２年尾中國剛爆沙士時的反應喎，中國當時亦話「無事，無事」）。

　　    如今世界各國都對豬流感嚴陣以待，世界銀行估計，若爆發一場全球流感潮，可以令全GDP跌５％，損失高達３萬億美元。以２００３年爆發的沙士為例，雖然主要在東南亞爆發，維持時期頗短，但已令區內損失０．６％的GDP。

　　    豬流感的經濟影響在擴散中，主要對旅遊相關行業產生負面影響，若豬流感在美國擴散，美國流入和流出的旅客大受影響時，對本來已弱水的的旅遊、航空業有致命打擊。目前第一波先打擊美國的豬肉出口，６個國家已宣布禁止美國部份地區的豬肉入口，即使目前並無確實證據顯示進食豬肉有可能染病。美國商務部發表聲明反駁，「話外國禁止美國豬肉或其他產品入口，並非建基於科學證據，會無端阻礙了貿易」。在疫症擴散時，各國政府採取一些斷然措施阻止病毒流入自己國家，實在無可厚非，美國現時的反應，亦和２００２年時中國的反應一模一樣，由此可見，無論那個國家，在自己國家出現疫症爆發的苖頭時，都會傾向低調處理，以免影響本國經濟。

　　    在我寫網誌之時，在墨西哥已有１４９個疑似因豬流感死亡的病例，可見病毒已一定程度擴展了，等如香港沙士爆發初、中期情況，若控制得不好，不但當地的死亡病例會急升，還會因為人流而擴散去其他國家。

　　    睇番美股跌咁少，顯示好友相當強，淡友借豬流感都插唔落去。但以當年沙士的情況去估計，疫症爆發不是一兩天就過去，可能搞一兩個月，小心到５月、６月時才來料。

昨日，美國通用汽車（General Motors）公佈最新的重組方案，包括大規模削減債務，裁員、減少品牌和經銷商。通用汽車新任CEO韓德勝（Fritz Henderson）表示，通用計劃在2010年之前剝離皮蒂亞克（Pontiac）品牌，在2009年之前解決薩博、悍馬和土星三個品牌，僅僅保留雪佛萊、凱迪拉克、別克和GMC集中經營。在削減品牌的同時，通用計劃將旗下商標從2008年的48個減少到2010年的34個。

為精簡公司結構削減成本，通用銷售商將從2008年的6246個減少到2010年的3605個，與通用2月17日提交的重組計劃相較，此次計劃削減的數目增加了500個，並將提早4年完成瘦身。

通用將大舉削減產量，預計在2009年第二季度和第三季度的減產規模將達到19萬輛。零配件廠的數目將從2008年的47家裁減至2010年的34家，至2012年零配件廠將僅僅保留31家。關閉工廠的數目達16家。另外，在2010年之前，將員工從2008年的6.1萬人減少為4萬人，並關閉13家零配件工廠。

為減輕債務，通用向其債權人提出以每1000美元債券換取225股普通股的方式減少共270億美元的無擔保債券。根據通用汽車上週五每股1.69美元的收盤價，置換價格為原債券面值的38%。這遠高於二級市場價格水準，網上交易平臺MarketAxcess顯示，通用汽車債券在二級市場的價格占原債券面值的8.5%至12%。此外，通用還與美國工人工會（UAW）的談判，希望削減約200億美元的債務。通用希望可以減少約440億美元的債務，改善其資產負債表的糟糕狀況。

問題係要有90%的債券持有人同意該置換條款，換股才能執行。如果通用汽車未能獲得足夠的債券持有人參與換股，該公司將申請破產保護。消息發佈後，雖有股東認為通用的債換股方式不公平，但股價逆市飆升逾兩成至2.04美元。

美國預托證券方面，匯控收報52.7元，比香港收市價高1.8%；中移動收報67.66元，比香港收市價高0.6%。而ADR港比指數係14997點，比香港高157點。

陸羽仁

美股都相當好嘢，美國證實首個豬流感死亡個案，加上首季GDP收縮高於預期，都打佢唔死，反而因為聯儲局話經濟收縮步伐已減慢，家庭支出亦漸趨穩定，並承諾繼續其既定的1.75萬億美元購買按揭證券及購買3000億美元國債的刺激經濟方案，令美股大幅造好，杜指開市抽升近100點後反覆向上，在8200點間窄幅橫行，最高升高過240點。午後有消息指佳士拿汽車將於今日宣布破產，杜指尾市升幅收窄。

杜指收市報8186點，漲169點或2.1%，創出近期收市高位，全日最高8258點，亦是近期日中高位，一個上試高位的態勢；標普500指數報874點，升18點或2.2%，月升幅9.5%，係2000年3月以來最高；納指上揚38點或2.3%，報1712點。紐約證交所成交14.8億股。杜指期貨最新報8098點，跌27點，比現貨低水88點。

    　美國政府昨日公布美國今年首季GDP以年率計收縮6.1%，遠高過市場預期的4.9%，略低過去年第四季的收縮6.3%。GDP已經連續三季收縮，係自1975年以來最長嘅收縮期，而最近兩季更是大跌。不過市場焦點卻放在消費者支出方面，消費者支出按年增長2%，反映出美國消費者開始買番啲嘢。另外，上季庫存量以年率計下降了1037億美元，係1947年以來最大跌幅，亦令GDP減少了2.8%。房屋方面的投資連續13個月下降，以年率計下跌了38%，亦係自1980年以來最大跌幅。出口方面下跌了30%，而進口則下滑34.1%，兩者都係近三、四十年以來最大的跌幅，美國進口少了34.1%，這真係驚人數字，無怪乎各出口國都牙痛咁聲了。

證券商Fox-Pitt Kelton Cochran Caronia Waller自2004年以來首次調高銀行評級，刺激銀行股上漲，富國銀行升2.5%至19.97美元，摩根大通升5.2%至34.48美元，美銀漲6.5%至8.68美元，花旗集團上揚8%至3.12美元，係升幅最大的杜指成份股。

匯控在美國預托證券市場跟隨銀行股造好，收報53.1元，比香港收市價高3.5%；中移動收報68.19元，比香港收市價高0.6%。而預託證券ADR港比指數係15316點，比香港高359點。

   　 早兩日講起樓市，今天想來個總結。我提到樓市的基本因素，話而家好過97、98年，主要是樓市下跌前泡沫無咁大，加上利息低供樓負擔能力高; 但全球經濟的大環境，又差過97、98年，主要因為呢次金融海嘯造成以美國為首的「去槓桿化」，財富大量消失，這個過程還未完結。

   　　97年亞洲金融風暴集中在亞洲下跌，美國因為對沖基金在港搵食而受惠，亞洲國家處於捱打狀況，無人幫，由於要頂住急跌的匯價，所以只能加息不能減息;
亞洲國家要向國際基金會求助，國基會力逼求助國的政府減開支，變成落雨收遮的慘局。今次金融海嘯燒的美國、歐洲卜卜脆，佢要減息放水救自己，變相幫埋香港，在這個低息環境下，香港人(除了廠家和出口商)暫時未感受到太大的痛楚，香港樓市的下跌也沒有97年那樣急了。

       今次樓市跌得較慢，如今出現第一波反彈，由於跌得不太多，所以反彈力也是中等。有個財經界高人講，如今樓市的走勢，和97年時大體上一樣，當時97年10月股市樓市大跌，到97年尾開始反彈，到98年2、3月彈上高位，到5月開始跟股市再插。今次樓市是1、2月左右開始反彈，而家開始有點乏力。佢話樓市彈完之後，第二浪若調頭再插，會插得較深。樓市和股市不同，樓市較多長線投資者，所以價位的反應速度不如股市那樣快，股市可以一跌到底，樓市要跌幾跌才到底。



另一個地產界高人就話，香港樓市自03年沙士見底後，一直反彈向上，到2007年開始大升，2008年見，頭尾升了5年幾6年，樓市5年左右一個週期，升完之後，會進入調整週期，跌也要跌1、2年，不是咁快可以全面恢復。他對美國這個金融海嘯甚有戒心，認為是過去30年未見過的大浪，佢自認無經驗，只能加倍小心。

我向高人求教自用者在跌市買樓之道，佢話用家等了幾年，早前眼見樓市愈升愈高，好後悔自己過去無入市，所以一般買得比較急，通常入市會入早咗，香港已不是過去那種急促發展的經濟，樓市也不復長升不跌的模樣，過急入市可能在下跌週期的中部入市，會買得較貴。在跌市買樓，不用急，慢慢睇，睇啱開一個顯著低價（我估係比市價低兩成以上的價錢），而家做唔到，等半年1年可能做得到。

陸羽仁

美國政府將銀行「壓力測試」結果公佈時間推遲至本週四午後，令投資者擔心此舉可能代表銀行需求更多資本，令上周五美國金融股受壓，不過，4月消費者信心指數和製造業指數都好過預期，給予投資者經濟復蘇的憧憬，加上能源股造好，頂住大市，杜指走勢反覆，先跌後升，尾段再跌，但在最後的30分鐘抽升近70點，扳回劣勢，以升市結束。

杜指上周五收市報8212點，漲44點或0.5%，全日波幅只有120點；標普500指數報878點，升5點或0.5%；納指微揚2點，報1719點。紐約證交所交投淡靜，成交只有12.9億股。杜指期貨最新報8201點，比現貨低水11點。上周，杜指上升1.7%，標普500指數上漲1.3%，而納指上揚1.5%，納指錄得連續八周上漲，為1999年12月以來最長的升勢。

市場的焦點仍然系銀行股，摩根大通調低美銀、花旗集團、SunTrust、US Bancorp及富國銀行今、明兩年的盈利預測，預計「不斷上升的失業率和下跌的樓價，令信貸持續惡化。」作出預測的摩根大通跌1.6%，美銀和花旗齊跌2.6%，富國銀行挫2%、US Bancorp 跌1.4%，而SunTrust則跌4.4%。

港股在美國預托證券方面，匯控造好，收報55.65元，比香港收市價高1.6%；中移動收報67.92元，比香港收市價高0.9%。而ADR港比指數系15715點，比香港高193點。

美國經濟還在一個反彈的態勢中，上週五公佈的路透/美國密西根大學4月消費者信心指數終值為65.1，高過市場預估的61.9，顯示消費者信心回升，是雷曼兄弟在去年９月倒閉以來，表現最佳的信心指數；而美國供應管理協會(ISM) 則公佈，4月製造業指數為40.1，亦好過預期的38.4。

美國勞工部將於本月8號公佈最新失業率資料，而經濟學家預計4月份失業率會去到8.9%，有60萬人被裁，創25年新高，勞工市場會系最遲複元的經濟環節。加會大BMO Capital Markets首席經濟師 Michael Gregory 話，「經濟衰退將於今年完結，但復蘇過程將會很緩慢，走出衰退的勞工市場卻需要更長的時間。」在勞工市場未能擺脫衰退的時候，消費市場亦難有持續的強勢。他又預計失業率年尾時候會上升至9.5%，明年會在9.7%上下徘徊。好明顯而家美國經濟師預期的復甦，都唔係V型反彈，而係長期比較低度的增長。

最後想再講講香港的樓市，我是「買樓愛好者」，酷愛磚頭，認為樓宇是不動產，唔易郁，所以買樓是逼人儲蓄的最佳方法，不過現實上在香港的確見到不少買樓蝕錢的例子。例如屯門疊茵庭近日又有一宗蝕讓成交，轉讓單位為6座高層D室，面積572方呎，原業主在2001年以166.8萬元購入，呎價2916元，日前以127.7萬元沽出，呎價2233元，帳面虧蝕39.1萬元。科網股熱潮在2000年爆破，呢個業主在2001年買樓，以經唔係高峰，當時壘茵庭是新樓推出，雖然位處偏遠的屯門，但2900元一呎新樓，仲係高層，都唔算貴，但揸了8年，仍要蝕近40萬，帳面蝕24%，都唔係少嘢。

這個案例可以有幾點總結。第一，香港已脫離高速增長的階段，在香港買樓，已經不是合埋眼會贏，非核心地段的樓價只是上上落落。第二，買樓揀地區，如果呢個業主當年不是買屯門樓，而是買港島樓，可能唔使蝕，當然業主很可能負擔不起港島樓，無選擇。在成熟的經濟，貧富懸殊，貧者愈貧，富者愈富，在市區核心地段買樓，保值能力好一點。

    　第三，2001年如果唔買樓買股又點呢? 買166萬的樓，要俾50萬首期，若果在當年想「穩穩陣陣」買股票，多數買匯控，當年匯控股價80元、90元左右，在當年911事件後短期一度跌至70元，假設你80元買咗匯控，當日50萬元，如今有番34萬元。但當日買樓付出50萬元的30%首期，今日得番11萬元，表面看是買股勝。

不過買樓仲有借錢那部份，雖然借錢要還，但供樓逼你每月還，假設這個個案當日借了70%即116萬買樓，供了8年，會否已還了相當大部份的本金呢? 若果真如此，這個業主賣樓後隨時有50、60萬現金在手。但無買樓者亦無儲蓄，有錢使哂，或者炒股輸哂，可能今年手上的現金，不如這個買樓輸足8年的業主。

呢個世界好得意，有些事情睇起上來好笨，但其實都幾精，例如透過買樓儲錢，就是一個好例子。有些事情睇起上來好精，但其實幾笨，例如經常想「睇啱時機」炒炒吓仙股或窩輪，還是輸的人多。我早前已經講過，睇市雖然重要，睇自己的性格更重要，如果自己性格係多多錢都無剩之人，買樓儲錢係最好的方法。現時在香港買樓，未必係最好時機，但自知週身痕無錢剩要逼自己買樓儲錢的人，一兩年內都最好入市。若有些網友身在高增長的地區，例如中國、例如印度，就不用懷疑，樓價跌至較合理水平，就要入市了，不要等一兩年了。

陸羽仁

美國的銀行壓力測驗結果將於今日美股收市後揭盅，媒體昨日透露金融機構所需增加資本金額，銀行整體上所需金額都比市場之前預期的少，刺激銀行股飆升，油價重上去年11月高位，能源股上漲，加上4月美國民間就業人口減少幅度遠低過市場預期，反映經濟已渡過衰退最嚴重時期，美股昨日造好，但在窄幅波動。杜指開市抽升77點後回順，升幅收窄至上日收市位置已見支援，之後反覆攀升至8518點再度回順，尾市再彈，以接近全日最高位收市。

杜指收市報8512點，漲102點或1.2%，全日最高8518點，最低8403點，全日波幅只有115點；標普500指數報920點，升16點或1.7%；納指微升5點或0.3%，報1759點。紐約證交所交投活躍，成交有18.8億股。杜指期貨最新報8471點，比現貨低水41點。

銀行股成為昨日推動大市上升的主要動力。媒體在銀行壓力測驗結果公佈前爆料，話金融機構應付進一步惡化的經濟環境所需資本金額並未如預期那麼多。摩根大通、大摩、高盛、MetLife Inc和美國運通都合格，不需要籌措更多資本，花旗則只需要籌措50億美元，GMAC需要115億美元，而最差的是美銀，需要增加340億美元的資本。不過，據花旗銀行話，美銀有330億美元的優先股在手，只要將優先股轉至普通股，達標完全無問題。

金融股股表現強勁，KBW銀行股指數BKX飆升11.5%，標普金融類股指數GSPF攀升8.1%。美銀飆升17.1%至12.69美元，花旗集團勁升16.6%至3.86美元，分別成為杜指成份股的升市的冠、亞軍。摩根大通升6.9%至37.22美元，富國銀行勁升15.6%至26.84美元，花旗集團上揚10.2%至3.24美元，係升幅最大的杜指成份股。

美國ADP報告顯示，4月美國私人企業就業人口減少49.1萬人，降幅低於分析師預估的65萬人，為11月來最小降幅。美國政府將於明天公佈的4月非農就業報告。

匯控在美國預托證券亦跟隨銀行股造好，收報63.78元，比香港收市價高3.6%；中移動收報75.94元，比香港收市價高2.9%。而ADR港比指數係17339點，比香港高505點。

美股表現睇好強勁，但資深交易員話升到如今開始有啲疲態，昨日有好多個好消息，例如銀行業需要注資比預期少，又例如ADP報告顯示私人就業人口降幅少過預期等，都係好消息，但消息出街後市場反應比預期弱，而家好似有好消息已經預咗，要有「好好消息」至得，資深交易員估計美股去到呢啲位，出現少少整固壓力。不過資金流入香港未停，港股的情況可能略優於美股。

     　我昨日講到散戶做明燈，好多時唔係佢地運氣差，而係作為散戶的宿命，佢地資料少、資金少，唔係左右大局的一群，係被人擺佈的一群，好似美國對銀行的壓力測試，各大銀行10日前已被政府通知了測試結果，都唔好講佢地在政府通報前都極有可能有內線掌握哂結果，佢地根本係先睇到答案，搶先落場炒，加上佢地資金又多，蜂擁入市已可觸發升市。散戶在場外貼試題估答案，人地知道哂試題有埋標準答案，散戶點夠人玩?

網友一丁話，看了我講散戶做「明燈」和運氣沒有太大關係，反而和散戶的行事特性好有關係。佢話:「看了你這段好有同感，有個朋友時常都係咁，佢時常都話自己黑仔，運氣唔夠，一買即跌，一放即升..........我同佢講咗好多次，叫佢了解自己的心理狀態同買賣方法，研究去改，但佢到現在都唔聽我講>< 佢信財演多過我.............我發現同佢相反做法時，我的成功率真係好高，但知道個朋友輸又心裡唔舒服.....卻又無能為力，唉。」

唔知大家有無發覺，我地身邊總有一丁講起那種朋友，如果你認為無，咁你就要小心啦，可能你就係嗰個「明燈」啦。有啲明燈衰咗會出聲，但有啲明燈只講贏錢事跡，不講輸錢慘況，所以在朋友之間比較不著痕跡。我仲發現明燈入市通常唔會馬上唔得，而係好似網友「宜家傢私」個老豆咁，通常買完會有幾日得，但係佢又唔走，到大市回頭，佢又死坐，一坐坐到尾。

老實話俾大家知，我過去都有個「明燈」朋友，佢講嘢非常大聲，買股票成日話自己睇中，我估佢買兩次有一次中(因為個市唔係升就係跌)，佢一中就好大聲，話自己點點樣分析得出入市訊號，又「陽燭」、又「通道」、又有朋友爆料俾佢聽之類，聽到旁邊一眾女士用好崇拜的眼神望住佢，佢就好滿足咁不斷講。後來我發覺，這位明燈最口沫橫飛的時日，通常唔使一個星期，佢買啲股票就由得變唔得，我就領悟出要做明燈反面的道理。

後來同一個股壇老叔父講起這些明燈事件，佢解釋話大戶消息靈通、實力強橫，係佢地帶動個市轉勢，唔係跟轉勢入市，散戶面對逆境時，在轉勢之初，會經歷「唔信、死頂、接受、反手」四部曲，開始唔信，例如佢地做咗淡倉，個市跌到好深開始反彈時，佢地通常以為彈一兩日就完；好啦，見到彈得一兩個星期，仲死頂做淡；到彈得好似樣，就開始接受去平倉；到爆哂煙花時，佢地就反手造好，咁啱爆得煙花都係迪士尼散場的時候。明燈入場遲，係致命的原因。

陸羽仁

上周五美國政府公布的4月份失業人數少過市場預期，銀行壓力測試結果亦不如市場估計的差，美國政府成功調控民意渡過壓力測試，油價大升，投資者寄望經濟復甦，杜指開市抽升逾130點，已收復上日失地，之後反覆上升，尾段升幅略為收窄，以接近全日最高位收市。

杜指收市報8575點，漲165點或2%；標普500指數報920點，升22點或2.4%；納指升23點或1.3%，報1739點。紐約證交所交投活躍，成交19億股。杜指期貨最新報8484點，比現貨低水91點。

藍籌股上周漲了4.4%，標普500指數升了5.6%，納指升1.3%。杜指全年跌幅由25.4%收窄至只有2.3%。由三月最低位計，杜到指已上升了31%，標普500指數亦升了37%，越來越多的投資者想鎖定利潤，調整壓力明顯加強，今年一直跑贏大市的納指開始有調整的跡象，上周已落後杜指和標普500指數，錄得1.7%下跌。美股的狀況是金融股、能源股續升，零售股和科技股開始回。

投資者憧憬銀行業最壞時刻可能已過去，銀行雖然測試唔合格，但股價照升。要籌集340億美銀股價升4.9%至14.17美元；花旗集團升5.5%至4.02美元，富國銀行勁升13.8%至28.18美元，摩根大通升10.5%至38.94美元，係杜指成份股的升市冠軍。

匯控在美國預托證券亦跟隨銀行股造好，收報68.51元，比香港收市價高4%；中移動收報77.27元，比香港收市價高1.3%。而ADR港比指數係17854點，比香港高465點。不過亞洲股市今早未有大升，日股早段只是微升20點，升幅0.2%，唔係幾跟得足美股上周五的走勢，可能和美股杜指期貨跌幾十點有關。

美國失業率繼續攀升，政府公布4月份損失了53.9萬個職位，失業率上升8.9%，創了26年以來新高。不過職位的跌幅係自去年10月以來最細嘅，亦好過市場預期的59萬個職位損失和失業率升至9%。自2007年12月起計，美國已損失了570萬個職位。職位有增長的部份只有健康醫療和政府部門。Miller Tabak首席策略師表示，要維持失業率於現有水平，不繼續上升的話，每月就要有新增職位就要12.5萬個，即係話，即使職位數量不繼續收縮，失業率仍以每月0.1個百份點的幅度上升。假設職位損失每月維持20萬個，失業率就會每月攀升0.2%至0.3%，所以失業率去到10%幾乎是肯定嘅，11%亦將為期不遠。以往的兩次經濟衰退，需要三年時間，失業情況才能改善，他預計今次衰退，可能要四至五年失業情況才能復元。

    美國、甚至香港的經濟基調唔係咁好，但股市繼續炒，股民如何自處，實在是對EQ的艱難考驗。早兩日講到買股手法的問題，我想講講三個網友的回應。

    第一個是又係「宜家傢私」，佢話:「陸sir講得啱, 我地呢d散戶, 錢又唔係多, 風又收唔到, 點同人玩?年初陸sir已經提議不如分段月供(今年12月每月買1注), 不過果陣陸sir話 “咁蠢既方法應該滿足唔到我地哋'”，果陣我都咁諗 ，“如果月供咁點解唔等大跌先一炮過買呢? 月供真係滿足唔到我呢啲睇咗咁耐股票又想用腦既人。”點知個市由年頭升到依家.....我反省一下, 先發覺自己真係應買果陣唔想買, 唔應買果陣(而家)又想買.....」

　　佢又講:「陸sir話買2828基金好, 我以前覺得....基金買晒咁多隻h股, 有部份h股都唔知係咩嚟, 點解唔揀最好果幾隻嚟買呢? 淨係買3968/688/941/291/883...唔係更加'鑽石陣容'咩? 直到依家我最鐘意既3968話可能集資....我先明白....我連揀股都唔識...所以....我決定放棄了, 放棄用腦, 加入月供基金行列....淨係睇下邊個月有一日跌得勁d, 連跌幾日又全日最低位收市先買多一兩手咁大把....我發覺我既智慧大慨只可以做到咁多....」

我對「宜家傢私」的回應是:雖然我都信揀股，我都信可以善揀時機，但若果有相當股齡而過住試過好多次都唔成功的朋友，買股時一定有結構性缺陷，例如太跟市場氣氛出入市，咁不如試吓新手法，例如將9成資金用笨一點的方法投資，將1成資金用自己用開「聰明」的方法投資或投機，直至練好功夫才將大量資金用「聰明」的方法去做，也是一個較穩陣的做法。這肯定不是最好的方法，但可能好過這類朋友過去的手法。

第二個我想引用的是網友qqchen，佢話:「陸 sir 今日篇文章真係好到肉,　身邊總有d呢類朋友,　 我身邊o既朋友係好鍾意問你買呢隻好唔好?　 而家買好唔好?　有時見到佢想買個價錢有啲貴,　就叫佢等等先,　但總係唔聽兼話買貴1個幾毫無所謂,　好股唔怕坐喎，有時見到佢啲貨個價似見頂派貨叫佢走,　佢話未賺夠,　到個價跌左好多,　賺變蝕,　仲要到打靶位,　佢唔打靶不特止,　仲要話最多留番養老,　真吹脹..　而家佢個倉我都無眼睇.　 單係隻410蝕 50%,　 857 更唔洗睇。有時我覺得人o既內心世界真係幾得意,　明明自己已經決定晒嘢,　又要扮搵人商量,　博取共鳴,　其實有啲啲無聊.」

我的回應是散戶要小心面對自己的錯誤，以前有人對美股的分析師做過統計，發覺最叻是前高盛分析師科恩，她測市有6成幾的命中率，已經係最高，被人叫佢做「女股神」，其餘好多分析師只有5成多命中率，同掟個毫子睇開公定開字無分別。但女股神的秘密是做大好友，佢當年有理無理都睇好，在2007年前十年反覆向上的牛市中，女股神經常中，自2008年出現熊市後，女股神先燉冬菇，近期都唔再見佢出來講嘢。所以買股係好容易買錯o既，關鍵係買股睇中時識得贏，買股睇錯時識得控制風險，賺得多唔識走都算啦，但隻股回頭要輸錢時，唔走就笨啦。

第三個我想引用的是網友GNIW的話，佢講:「我係報名做『明燈會』會員.我雖然只有年幾投資經驗,但相信都有資格當小小明燈。我舊年先係美國經濟碩士畢業, 現係紐約一間金融機構服務. 係碩士最後一年期間, 因為功課要做股票分析, 所以建立左人身第一個蚊型投資組合. 三個月回報加本金剛夠錢俾我去畢業旅行.現在諗起都覺得係純為BEGINNER'S LUCK, 因為我係用CAPITAL ASSET PRICING MODEL黎買股票, 唔輸都當偷笑.到現在工作左半年,都有好好少BUDGET,咪又買少少當學野. 到現作工作, 儲到好好好少錢, 加上工作關係成日接觸不同國家的股票買賣(本人公司不作股票買賣,只為中間人). 又買少少花旗@1.70, AIG@0.8,加另兩隻股票快炒玩下. 但花旗我係2.6同AIG係1.35放左 (花旗係我開會的兩小時內時由3個幾跌到2個幾!), 放時我係緊守15%止蝕做鐵守則. 止蝕守則曾救咗我幾次命, 但見到今日呢兩雙股票個價,又真係揼心口點解放得咁早呢!!!」

GNIW又話:「我發覺每次行動都有共同的缺點: 係太保守同怕輸錢. 沒錯, 我係E年幾的投資係無蝕錢, 而且我太多買入的股票都係估值太低而買入.但我往往因對投票波幅的恐懼,以及沒有耐性等待,而過早賣出手頭上的好貨.白白錯過賺取更多回報的機會.所以今日睇完陸SIR有關明燈一談, 覺得我的小小經驗可以俾各前輩們參考, 更希望各前輩們能指引我明路. 另一方面, 我更知道自己對波覆的恐懼係源於現金流不足所致, 所以我更努力唔食唔著,唔買衫唔買手袋,死慳死抵, 望能增加現金流.希望能夠係今年內能建立一個中線的中國股票組合.」

我唔係太同意GNIW對自己的結論，佢唔係「明燈」，佢講緊係另一類問題，佢呢個個案只係賺唔夠而矣，若做事後孔明睇番佢啲交易，買入的股份大升後一度急跌，好似花旗在兩小時內由3個幾跌到2個幾，手上有貨者止賺(其實唔係止蝕)走貨唔係問題，問題只係需唔需要走清而矣，所以我可以作交易手法的建議，止蝕無得講，到價要走就走清，但止賺可以斟酌，例如你1.7美元買花旗，結果要在2.6美元止賺沽貨，賺咗53%，可以唔沽清，只沽貨沽到收回所有成本，留低賺回來那部份貨繼續睇，再定埋個1.7美元入貨價作最後止賺位，到價沽埋，唔到價睇吓，都係另一個方法。

但我更想講的是，你雖然讀經濟、做金融，但仲係後生，見到過大跌市的經驗唔多，未知太跌市之恐怖，所以唔好因為呢次賺少咗，而覺得止蝕無用，以後買股分清止賺和止蝕兩種情況，止蝕係你買入的股票跌穿入貨價，即使你係睇價值入市，但也有睇錯股份大勢的時候，特別買入行業可能已轉勢的股份，股神巴菲特話呢啲等如執煙頭來吸，佢隻巴郡就係咁買入，買入一個夕陽行業的股票，嗰個行業永不翻身，股價可以不斷向下唔上番來，所以不要輕言不止蝕呀。

陸羽仁