美股道指周五升番６６點，定番少少，但今期港股不穩定因素唔係美股，係阿爺，阿爺打擊偷渡北水的行動，真係打到有少少恐慌。
　　一向唱好的李四叔也出來警示風險，叫散戶小心市場波動，又唔同意「何賭王」話恒指年底見４萬點之說，不過李四叔仍然估年底恒指有３萬點，明年初見３萬２、３萬３點。李四叔的評論愈來愈貼市，呢一兩日有少少北風吹吓，就叫大家著衫。
　　阿爺呢個不穩定因素如何發展，尚待觀察，正如我在《頭條日報》專欄所講，最近中央台將黑匯天后被捕的舊聞翻炒，都係配合溫總上次叫港股直通車放慢的口徑。咁啱溫總現時又出訪新加坡，香港傳媒自然追到貼，睇吓溫總再有無辣招出籠，不過今早聽新聞，報導溫總講打擊地下錢莊，話只係想控制資金非法流動，以免影響香港股市大幅波動。佢又唔係好讚成深圳銀行限制存戶每日提現金不得超過３萬元，話主要應該教育市民，唔好用這些行政措施。
總的來說，溫總的最新口徑尚算溫和。溫總話唔想搞到港股「大幅波動」，其實和他們睇內地股市的角度一樣，他們想內地股市平穩向上，不要大幅波動，即係話唔好唔升，又唔好升得太顛，但現實中股市好多時都無咁理想。

不過講番港股，從溫總上次講港股直通車開始，己調整了４０００點以上，都算對阿爺都有所交待；話得說回來，如果港股跌得太急，跌８０００點、１萬點，搞到人人鬧溫總，也非阿爺所欲，所以若港股真係太生性跌得過急，我又信阿爺會講番兩句，又話「港股直通車尚在研究中」，出口術幫你頂一頂噃。唯一難搞啲就係阿爺出宏調招數搞內地股市時，港股跟住跌，咁就好難出口術了，不過若大陸股市跌得過急，阿爺一樣痛。

宏觀點看，如果香港的跌市源於美國或大陸的股災，咁香港的牛市亦可能隨即被斬頭；若跌市只源於阿爺的政策陳述，或者行政措施，咁樣就跌極都有個譜，不致失重急墮。

假設今次港股跌市是調整而非股災，咁就有數計，恒指由８月１７日低位１９３８０點，升上１０月３０日高位３１９５８點，合共升了１２５７８點，小調整跌升幅三分之一，跌４１９２點，應跌到２７７６６點，如今已一度低過此點數；若中調整跌升幅一半，跌６２８９點，會跌到２５６６９點，都算幾深的調整。若大調整跌升幅三分之二，要跌８３８５點，要跌到２３５７３點，一般唔會跌到咁深，除非再有重大壞消息配合。

陸羽仁

　　港股被中美兩個大隻佬挾住來跌，大陸覺得收夠籌先收口，又到美國嚟玩，美股昨日在高盛調低美國最大銀行花旗銀行預測帶動下，拖低大市，道指跌２１８點，收１２９５８點，正正式式跌穿１３０００點，展開其深度尋底之旅，朝向８月１６日的低位１２８４５點進發。
高盛話花旗銀行未來兩季要為信貸市場虧損作１５０億美元的撥備，大家都知高盛自己都有包銷發債，對信貸市場暸如指掌，佢咁講得花旗，雖不中亦不遠矣。高盛同時調低對大摩和美林的盈利預測，同樣道理，高盛自己做投資銀行，計投行盤數自然好精。高盛的預測一出，花旗就跌至４年低位，亦大幅拖低美股。

美股仲有一個現象值得關注，就係所謂Dow Theory（道氏理論），視道琼斯的運輸平均指數係牛市或熊市的一個指標，如今道琼斯運輸指數已連跌４日到去年１０月的低位，如果道琼斯運輸指數和道琼斯工業平均指數（即係我哋平日講的道指）同時跌穿低位，就係熊市來臨的指標。如今運輸指數先穿，而道指仲有１１３點就要破８月１６日之底，睇嚟都好有機會矣。

美股差我地就諗起利息，早兩日還有一兩個聯儲局理事走出來講１２底聯儲局再議息時不會再減息，但高盛即刻整單調低花旗盈利預測俾你嘆吓，而家市場似乎估計到時會再減息。美元兌日圓跌了１．１％，而美國國債價格亦升到２００５年的新高，預示市場認為美國要再減息，所以美元跌價，亦有不少人搶買定息的國債。

大家都記得，８月１６日美國大跌後，挾住港股跌出一個８月１７日的大跌市，如今美股又試底，亦造就港股再大幅尋底。

港股昨收２７４６０點，隨時一插又插１０００點，去番２６５００點的水位，正式破埋本月早前造出的２６９００點的低位。正如昨日所講，如果跌深少少跌到升幅一半，就會去到２５７００點，咁o既點數跌起上來一兩日就到。

美股步向熊市，美國唯一保命之法是減息再減息，逼住美元走弱，逼住港元走低，逼出香港的負利率、通脹與資產泡沫，對本地樓市特別有利，地產發展商都預計明年係好市，在這大環境下，只要美國股市和大陸股市不出現股災，港股明年利好。若無貨在手者，大跌市試低位，就是「投機性吸納」的時機。

這裏有幾個註腳：

第一，        無貨，少貨，或高位大量減持者可以吸納，唔等如成手貨者可以吸納，我見還有好多網友成手在紅色股高位時買的蟹貨，跌一成無止蝕，問我而家點辦，這些朋友可能還要止蝕，一定不可以吸納，千萬唔好諗去買吓貨溝淡吓，做錯了只能減貨，不能加貨，雖然話港股正在試底，無人擔保唔會睇錯，萬一佢進一步大跌之後就牛皮，你佢溝貨就輸上加輸。

第二，

叫得做「投機性吸納」，即係話睇基本因素好多股仍然貴，唔啱投資者玩。

第三，        買貨要分段買，唔好一注買哂，假如預佢跌到升幅一半去到２５７００點，點知最後竟然跌到升幅三分之二跌到２３０００點，甚至更低，若早前一注買哂，都要食驚風散。所以分注未必買到最平貨，但就會安全少少。

陸羽仁

　　美股道指升５１點，早段曾傳聯儲局會減息，美股升得更高，後來證實所謂聯儲局會議紀錄的「好消息」，原來是儲局上次議息時已感受到樓市下滑和次按引發的金融衝擊的嚴重性，恐怕會影響經濟，這種論調預示聯儲局十二月底議息時可能會再減息。另外聯儲局也調低美國明年經濟增長的預測，又係同一個方向的訊息，既然美國經濟都受樓市和次按影響而放慢，聯儲局都唔駛擔心減息會刺激通脹，應該擔心的係通縮而唔係通脹，再減息的機會增加。

　　不過港股在外圍唔多靚仔，美國ADR匯豐收１３２．２４元，應計及除息結果，而中移動ADR價亦跌１．６％至１３２．８２元，以這些價位睇，港股開市都要先回一回。

　　好多朋友問乜價位入市，如果我話昨日最低價２６４０４點都幾好呀，可以入部份貨o架啦，恐怕你會講句粗口，話「鬼唔知阿媽係女人咩」。

　　我有個老友管理投資組合，係一個炒手，投機技巧高明，今年回報以倍計。呢個炒界高人昨日上午低位都買咗唔少貨，但未一注入哂，留咗少少力以防還有一插。我代大家去訪問吓佢。

陸：你昨日上午入市，你認為大市見咗底呀？
高人：邊個估得到大市幾市見底，但「離底不遠」就可以大約感覺到。我在１３日上周期二穿２７０００點後入咗第一注，昨日再穿２７０００點，在２６５００點入了第二注，下午一開市彈番７００點後，等佢回落追咗第三注。仲有啲錢可以候低再買。在２６０００幾點買貨，我估最衰跌到２３０００點都可以停啩，下跌空間３０００多點，上望中線有６０００點以上升幅，２博１，都有得博o既。

陸：點解唔等低啲先至買？
高人：等低啲好處是平啲，壞處是買唔到貨，有時唔好去到咁盡。我有個老友在０３年沙士後覺得樓市見底，後來見數碼港貝沙灣開售，好想買番間樓，揸車去睇樓，駛入去時突然湧出一班地產代理，老友差點撞親那些代理，老友被嚇咗一嚇，結果就唔買，最後貝沙灣升到成萬元一呎，我老友話呢一嚇累佢唔見咗６００萬、７００萬。我就話佢當時見個市咁差，本來已心大心細，嚇一嚇只係乘機唔買。我話你知，在跌市買嘢，要戰勝恐懼，有「周身中刀」的感覺，記住唔係「周身刀」，係「周身中刀」，跌到咁上下深才考慮入市，買o既時候好多人覺得會跌多２０００點、３０００點，你買都買得好唔舒服，好驚，就差唔多啦，結果就算再跌，一般都唔會跌得咁深。

陸：講衰啲如果買完發現錯咗又點？
高人：第一要知乜嘢叫錯。買齊之後，如今再往下調整，真係跌到２３０００點、２４０００點，都未必叫做錯，可以捱吓，但買完之後，有一天美股一跌跌２０００點，港股必然大瀉，我等佢略彈必定清倉。又或者大陸股市一日跌１５００點，我都會咁做，美股或本地出現股災，香港隨時見災，就證明自己睇錯，沽完仲可以反手造淡。

陸：你認為炒股最緊要係乜？
高人：最緊要係心理質素，要戰勝貪婪和恐懼，我在過３００００點H股升得最顛時，減持了部份股份（沒有沽清，以防睇錯），這是戰勝貪婪，沽了貨跌下來才有錢有機會執平貨。在大跌市時要有技巧買貨，是戰勝恐懼，我炒股二十年，但在那些日子買貨，依然心驚，但低揸當然好過高追啦。


陸羽仁

　　昨晚外圍金融市場繼續混亂，美元弱勢，日圓急升，對沖基金忙於拆倉，美國受次按困擾再急跌，道指跌２１１點，跌到１２７９９點的低位，港股今日開市再會插一插。
　　大摩昨日建議客戶沽售第三大發咭機構美國運通，令運通股價跌至１４個月的低位，而JPMorgan亦指全美第二大電子產品連鎖Circuit City Stores Inc.,難尋業務買家，導致該公司跌至四年低位，美國股市在次按陰霾籠罩。
美國經濟的確係衰，大行亦盡情唱衰，看來旨在叫聯儲局減息。若果經濟好股市高，美國仲邊有得減息，而家係經濟差股市創低位，聯儲局１２月底唔減息唔得。

其實全球金融市場已睇到這個大勢，預期美元會再因美國減息而走弱，預先作出回應，所以油價上升、黃金反彈、日圓及主要貨幣向上，做日圓套息交易者拆倉，因而影響高息貨幣下跌。這個全球大混亂由美國可能減息觸發，按今年３月和８月經驗，照計玩一輪會停，不過玩緊的時候會幾恐怖。

過好少見這種全球金融大混亂，今年已有三次，當然令人擔心，會不會震震吓就崩潰，震震吓美國就股災。不過表面觀之，美股的熊仔雖然已經到來，但係最經典死撐的方式，就是連番減息救市，現在才剛剛開始，到救極都救唔掂時，又或者減息引發惡性通脹時，才會瓜柴，目前還會玩吓。

若美國大崩潰的機會暫時唔係好高，咁香港亦只係調整市而非股災，問題只是幾時才跌完，按過去經驗，這些對沖基金拆倉潮時是高峰，３月試過一次，８月試過２次，呢次在日圓升穿１１０時和昨日見１０８點幾時，拆了兩次，照計日圓若見１０６應該都差唔多，所以未來日圓再升應該試多一次頂部就ok。

港股比高位跌幅５５００點，比高位跌１７％，若和美股和日股相比，已經唔錯，特別是日股已見全年低位，而港股要見全年低位要穿２００００點。

在大跌市時，個別優質股日中都會跌到好低的位置，甚至已近全年低位，高位已減貨手上有餘錢的朋友，不妨揀好股定些低價釣吓魚，或者俾你釣到低位也未可知。

陸羽仁

　　   　美國感恩節無市，亞洲股市自由炒，又睇吓今日港股再玩唔玩試底。
　　美國股市熊樣十足，網友Jack有此一問：「陸Sir:有重要問題問啊!!現在大市日日跌,為什麼各大行及大富豪不約而同還看好港股,誇口說大市可重上30000至40000點呢?而事實是美國經濟衰退,影響全世界經濟,開始步入熊市階段矣...而港股反覆向下,陰陰跌,世人皆不信是熊市,然而,熊市是不是已不經不覺地來臨了呢?」

　　這的確是好問題，美國樓市急滑，經濟面臨衰退，美股道指早前因減息而衝破１４０００點的高位，回落後又再上高位，當日我已經估美股係雙頂，跟住會回，原因好簡單，美國樓市崩潰，金融市場又被樓市衍生的次按搞到風聲鶴淚，變咗樓市、金融市場齊香，你話邊度有運行，話佢唔係熊市你都唔好信，所以衝上高位，只是減息的短期刺激，好似個白粉道友打完針咁，突然好興奮咁起身行得走得，仲走去跑步，你千祈唔好以為佢真係得。

　　香港人對樓市、股市齊齊大跌呢家嘢，最有經濟，香港０７年開始金融風暴，衰足７年到０４年，０５年才真係反彈翻身。大家唔好忘記，香港只係一粒米咁細的地方，有阿爺的自由行和紅色巨股上市打救，灌水浮球，所以搞兩三年就翻身。但美國如果出現樓市和金融市場雙雙出事的熊市，無人能夠，只能自己救自己，好可能會反覆向下。

　　炒股要分長中短線，好多人只關心好短線，即係未來一兩日的走勢。從好短線的角度，美國雖然係熊市，但若聯儲局年底再減息，會頂往股市跌完又彈，短線未必會死。美國一彈，香港又炒，這就解釋了為何大孖沙會睇好香港股市未死得。

　　至於中期來說，美國每次減完息聯儲局都可能話下次無得減，結果搞幾搞就再減。由於美國各巨型金融機構都受次按困擾，例如揸到成手債券出唔到貨，聯儲局減息，由於債券早已定息，就會變得吸引，所以減息絕對有利金融機構的債券去貨。美國的金融巨頭話次按問題要明年第一季才解決，所以未來一兩個月仍是逼聯儲局減息的高峰期。

　　減息是服毒汁止渴的行為，美元已弱，再去減息，美元更弱，結果又刺激油價上升，引發通脹，不過只要美國經濟夠差，短期內通脹也可能漲不起來太多。但長遠來說，美元愈走愈弱，油價愈升愈高，終於可能引發危機。

　　以一個十年的長角度看，美國正走入熊市，中國卻在牛市中，雖然兩地股市走勢短期會有類似走勢，長遠卻慢慢背駞。我話大陸係牛市，而且可能係一個十幾年的長牛市，但大家千萬不要誤會，以為我話大陸股市唔會大跌，大陸股市（加上樓市）大跌一啲都唔奇，你抽離一點看，用一個未來十年的角度，大陸股市在圖表好像一條上下波動好大的斜線，由左至右４５度角向上，升升吓會急跌，急跌完又向上，大陸股市已從高位跌了１０００點，跌近５０００點，跌多１０００點去到近４０００點都唔奇，即使出現「股災」，跌番到２０００點、３０００點，也如巴頓碧斯所講的牛市之中的「波動性熊市」，由於下跌無跌番去起步位（大陸股市由９００點起步），所以只是牛市中的回落而矣。

　　我是中國大好友，認為要每逢大跌就吸納，最好中國股市有股災，跌番到３０００點，就是吸納好機會，只要唔怕守，可以愈跌愈買。

　　港股自從引入大量紅色股作恒指成份股之後，大大地紅色化，可以說變成中國股市的衍生工具，中國水咁多，香港食少少都好發。長遠而言，港股應該要跟大陸股市走了。

　　不過講番現在，千萬不要對阿爺主宰香港股市的力量，有太多聯想，未來十年，還是鬼佬大戶的天下，我想要中國培養出左右大局的基金和投行力量，還有很長很長時間。港股跟大陸走向，和香港股市會否由大陸操控，根本是兩回事。
陸羽仁

  美股道指反彈１８１點，港股應有像樣反彈，但時近結算，彈一日未必等如走勢確定也。
　　
網友idoglife有個留言幾有意思，同大家分享一下，佢話：「My grandson once played a trick on me. He asked, “Grand, when you drive and want to turn right, how do you steer?” “Turn right ...”, I replied. He said those champ would turn 'left' ... because they 'drift'. He said he learnt this from a Japanese cartoon called “??? Initial D” (?right?). He showed me how to do it in the video game. Oh, Jesus, he drove over 200 mph ... and turned the corner ...
This old man value independent thinking. This is perhaps the greatest and most precious thing. And thus we have the 'market' place. If we all think the same ... there will be no more 'market'.

I once read a book called “Secrets of the Millionaire Mind: Mastering the Inner Game of Wealth” by T. Harv Eker. Eker did say something.

I feel like this blog.」

（意譯大意如下：網友idoglife講咗個故事，話佢個孫有日同佢玩，問佢，「阿爺，如果揸車要轉右，咁應該點扭軚。」佢答：「扭軚轉右」。但佢個孫話：「冠軍高手係扭軚轉左喎，因為佢地飄移。」孫仔話佢從卡通片“??? Initial D”（應指頭文字Ｄ）學到呢一招，孫仔用遊戲機示範點樣飄移，嘩，要２００哩高速轉彎。這個老人珍視獨立思考，認為這是最偉大而寶貴的東西，亦因為如此所以我們有市場，如果個個人諗法一樣，就無市場了．．．．他的感覺就如這個網誌一樣。）

對愛看日本卡通的朋友來看，飄移不是新事物，但未看過的聽到會覺得好新鮮。Idoglife從飄移中悟到相反行事、思想不同、獨立思考，的確有趣。

剛巧我在週末和女兒講故事，也講到「唔好人云亦云」。我舉一份曾經好威的中產報紙為例，當年它的社長，寫社論擲地有聲，只靠一條：「不要人云亦云」。那是六十年代尾、七十年代初，大陸搞緊文革，社會上還彌蔓著一種崇拜毛澤東的思想，但這張報紙獨排眾議，批評毛澤東的文革，還特別派記者去邊界採訪那時漫山遍野開始湧港的大陸新移民，這種文筆具備遠見，開風氣之先。我個女聽完似懂非懂，我只能再強調一句「不要人云亦云」。

最人逼的地方，未必一定是好地方，任何過熱的東西，我都唔係好鐘意。股市有人買有人賣，一定有兩種意見，買股票從來不應從眾，否則很難賺大錢。

天津發展（０８８２）係一個好例子，金曹覺得論基本因素可以買，牛腩貓咪覺得會向下，要買不如等佢升時才追。你問我邊個啱，我覺得兩個都啱，講走勢津發正向下尋底，當然可能再跌，睇番過去一年股價，低位４．９６元，係去年１２月１１日的日中低位，但年頭好多時大約在６元左右，當時恒指大約２０５００點左右，現價８．１元，高位回落４成，相信若再調整，６元恐怕幾難到，７元唔係無可能。

牛腩貓咪係一個炒手，可以比較貼市，認為而家買貨係買當頭跌，而且要買可以等佢真係見底向上時才追，這個講法唔係錯，但大部份網友日日要返工，好難咁貼市。唔在較低時買，將來多數唔追。所以牛腩的建議，只適合部份比較貼市的網友。

金曹睇基本因素，津發去年５．５億純利，市值８４億（周五收市價８．１元計），PE１４倍幾，估計０７年也有５億純利以上，唔算貴，可吸納。

假如你星期五問我，我會咁講，基本因素同金曹看法接近，再加一句，阿爺有意發展天津，附加了一點政策優惠，但我的建議會縮骨一點，話如果你係穩健投資者，拉闊一點買入價，當時現價８．１元買一注，７．１元買一注，６．１元買一注，第一注一定買到，第三注應該買唔到，就算入齊三注，平均價７．１元，PE１２倍幾，風險都有限，可以守一守。

同一件事，可以有不同看法，你可以選擇信不同的人，最緊要係運用自己的大腦。

陸羽仁

　　匯豐(0005)的全球化策略終於威番次，不過唔係向好那一邊，而係向壞的一邊，昨日匯豐因為要挽救旗下兩間結構投資公司（SIV）免被拆骨，宣布要注資４５０億美元（３５１０億港元，簡直係天文數字）入這兩間公司，高盛亦指匯豐要為壞帳再撥備１２０億美元（９３６億港元），消息一出，連美股都大幅拖低，道指大跌２３７點，美國投資者為了避險，把資金轉投債券市場，連低息都唔理，搞到債價大升。

　　由於市場資金再度緊張，紐約儲備銀行開始放出較長期的回購協議，向市場注資舒銀根，在這個形勢下，美國聯儲局下月１１日減息幾成定局，有８２％外匯交易員估計儲局會減息０．２５厘，有１８％更估佢會減０．５厘。

　　美股大市拖低亞洲市場，日股一開市就急跌２００幾點，看到昨天港股的反彈，都要貢獻番俾匯豐了。

　　匯豐今次衰是結構投資工具公司（Structured investment vehicles），唔好俾個名咁深就嚇親你，這些公司是銀行專門搞來迴避監管的投資公司，由於銀行業受巴塞爾協議規範，對各種資產或借貸都有嚴格要求，所以環球大銀行玩玩吓就玩出新意思，另外成立這些投資公司，令這這些投資走出銀行的帳簿之外，就不受規管。

　　這些投資公司借市場的短錢，投資在一些高回報的次按產品，例如借錢成本２、３厘，投資在次按產品包裝成的CDO有６厘息，就賺兩者的息差，大家一睇這個結構，就知道有借短錢放長錢的結構不對稱問題，但市場平靜時，在市場借短錢容易，大家都唔覺得有乜問題。

　　還有甚者，部份銀行的結構投資公司投資的產品，其實係同系銀行所衍生，例如銀行濫借次級按揭，但借到咁上下會爆額，銀行就將這些垃圾貨加埋高價貨在一起，包裝成投資評級好高的產品（CDO）賣出街，賣完又有額再借錢出街。而這些CDO好多又賣番俾自己同系的結構投資公司，這樣近親繁殖一番，其實就把違規的超額借貸，埋藏在公司帳簿以外的投資公司裏。我唔知匯豐有無咁做，但好多美國銀行就大做這種生意，所以次按爆煲銀行就有大鑊，而且隻鑊比眼見大得多。

　　匯豐今次要狂借４５０億美元去救旗下兩間結構投資公司，相信係市場水緊，再借唔到平價短錢去支持它們的融資結構，若阿媽唔借錢，實行聽執笠，所有結構投資產品就要賤賣出街，匯豐為免蝕得更深，唯有泵水救火。經此一役，就見到匯豐的次按撥備還未見底，如果市場再差，還要再撥備。

　　匯豐十多年前向美國進軍，沒有全力投資亞洲，滿足了這間英國銀行的虛榮（大家唔好咁天真以為佢係Hong Kong Bank），結果證實是離開金山，走入火海。

　　昨日在報上寫了「傻仔買匯豐」之說，惹起網友Sisi的回應，佢話「陸Sir,唔認同日報中“傻仔買匯豐”之說。我自己是一個保守型的投資者，買入匯豐的原因正正是『存錢在銀行，不如買匯豐收息』。每人的投資取向都不盡相同，某人的美食可能是別人的毒藥。因此，祗要找到適合自己的便可。你建議買一隻令人睡得安心的股票，又怎會是傻仔的建議，何必這麽謙虛呢？」

　　炒股票是寧買當頭起，匯豐正在當頭跌中，自然係叻仔不買，加上不少強勢股也回吐不少，所以穩陣投資者也有好多選擇。我仍然維持匯豐可買之說，但只能當佢債券咁買，就當佢年息４、５厘的十年期債券吧，你１２０幾元買了，中間有可能跌到１１０元，但你唔等錢使，摣住唔放，到十年後收番１００％本金的機會都非常之大，這就是債券，十年中債券價格升沉，可以唔理佢。叻仔一定唔買，但「傻仔」有錢存在銀行，而且可能會存十年，咁就不妨買吓匯豐，就係咁咋。匯豐咁樣衰，活躍選股者就唔好揀佢啦。

陸羽仁

  　美國的次按可以用「一褲都係」來形容。美股昨日受花旗搵到沙地油王阿布扎比投資局入股刺激，道指大升２１５點，不過匯豐在美國的預托證券價仍跌１．６７元，收１２９．２３元，跌１．３％，港股仍有壓力。

　　睇番花旗搵油王入股買強制換股票據的交易，可以用「恥辱價」來形容，花旗俾油王特殊條件，願意付１１厘的利息，換取油王入股７５億美元（５８５億港元），這等如垃圾債券的利息，花旗俾１１厘息叫人入股？以花旗現價計，普通股息率已有７厘，估唔到仲要用咁高息引油元入股，一年前恐怕無法想像，但花旗等錢使維持派息及解決次按問題，唯有以高息誘人入股。

　　我要問的問題是，花旗作為全球銀行老大，都要大平賣，咁匯豐（０００５）啲股票又點會賣到好價錢呢？以匯豐現率５．１厘息率計，息厘比花旗亦唔算高，只是實際地反映業務的差距，花旗業務集中在風眼中心的美國，咪要平啲囉。

　　對一些我們過去視之為好股的股票，我們要有正確認識，我們不要以同樣尺度去睇匯豐，匯豐８０年代尾９０年代初之升，主要受惠於香港經濟起飛，９０年代中業務大幅擴散到英國和歐洲，接著受惠於英國的復甦，到９０年代末開始大力投資美國，先是維持良好的盈利增長，同時亦是惡運的開始。平情而論，咁大間銀行，還要維持一年１０％、２０％的盈利增長，唔靠併購唔得，但併購要講市場，講對象，併購啱高增長或復甦中的市場，就可以延續高增長，匯豐選錯地方，選了美國，事後孔明咁講，係跳入火坑。

　　匯豐將在火坑掙扎幾年，未兩三年難望高增長，會有反彈，難望大市，直至看清楚匯豐未來的策略，以及這些策略能否有效執行。買匯豐是買它的管理，英國人管理銀行，較克己及保守，所以比較穩健，所以是退休人士之選，若如幾年前有盈利和股價的高增長，就等如送俾你了。這次爆發次按事件，除了反映匯豐投資美國的策略錯誤之外，也反映匯豐管不住桀驁不馴的美國人，所以就在美國業務出事。

　　網友阿Ray問起我以前講過匯豐的問題，「Some time ago you told us 2 ways of constructing a 增長組合..."第一種方法是淨揸沽匯豐 . 第二種方法是一半做匯豐，一半做其他股份，如今的市道，就是做幾隻國企龍頭巨股."Is the above still valid?
If not, how about replacing 005 with the tracker fund or 2388?」

　　阿Ray問的是我以前講過若要組合回報增加，可以有一種淨揸沽匯豐的策略，高位沽，低位買番，爭取一年股價加派息有１０％以上的回報。我一年多以前這樣講，背後有一個理念，就是匯豐不如一般人想像那樣，長升不跌，只能死揸，我當時認為匯豐的高增長期已過，未來走向未明，所以是一隻大型上落股，一年大約上下走動１０幾％，但股價淨增長可能好少，所以高估低揸，加埋派息才有１０％，高位唔怕沽，唔使駛驚買唔番，所以年幾前佢第一次上１５０元，我已經話唔怕沽（記住這只是針對區間走動的股份而言，若買了強勢的增長股，不宜隨意「游水」）。

　　目前匯豐面對次按的風險，一年內無運行，估計仍然會在區間波動，波動會加劇一點，但波動區應會下移，上方應在１４２元至１４５元之間，下方可能在１２０至１２３左右，不能排除未來幾個月若形勢不好，它會再跌。

　　阿Ray的問題不是問長揸，而是問相對穩陣可炒波動的股份，他問可否用中銀香港（２３８８）或盈富基金（２８００）取代匯豐炒波動，我話這種投資方法，一要對象股份較穩定，減少下跌風險，二要對象股份派息高，波動賺唔到至少賺到派息，所以匯豐開始波動增大，風險增加，的確可用其他股份取代，盈富基金嫌波動太大，中銀香港不錯，另一隻可考慮的是領匯（８２３），記住我講這些股份，並不是投資推介股，因為他們有波幅，升幅不夠，不是長揸之選，但炒吓波動幾好，領匯一年高位２０元，低位１４．２元，現價１６．６４元，在中間位，息率４．２厘，中銀香港一年高位２２．７元，低位１６．７８元，現價１８．５元，息率４．７厘，皆是炒波幅之選。若一年加埋波幅有１０％，唔會差過匯豐，短線一年內穩陣過匯豐。

　　不過長線持有匯豐者，也不需急急在現價沽貨，現在可能在短線的中低位了。
陸羽仁

　　美國減息終於成為定局，聯儲副主席當奴科恩昨日一番言論，令市場相信儲局在下月１１日必會減息，結果美股大升，道指急抽３３１點，升上１３２８９點的水平，是２００３以來最大單日升幅，兩日累計升５００幾點，更是２００２年以來最大兩日升幅。
　　科恩指市場動蕩減少對商業及消費者的信貸，他這種形容方法，令市場相信他看到經濟衰退的危機比一個月前看到的大。而美國連續三個月耐用品訂單下跌，更令市場相信儲局議息時會減息。
過去三星期，美國股市壞消息頻傳，陸羽仁視之為「挾減息行動」，連匯豐都加入這個公布壞消息的行列，但這場大龍鳯雖然做得大，但市場仍擔心儲局未必聽金融巨頭枝笛，不過昨日科恩的言論，首次由儲局中人確認了儲局將會減息的方向，所以股市就大升。現時匯市交易員已１００％估計儲局在１１日會減息，而估佢減息高至０．５厘者，亦由昨日的２％升至８％，但絕大多數人仍然估計會減０．２５厘。

其他市場因素也指向好的一面，由於美國原油庫存高於市場預期，油價急跌近３美元，紐約期油跌近９０美元的近期低位。而美元匯價未受可能減息消息影響，亦因股市信心恢復而反彈，兌日圓重上１１０圓樓上水平。歐洲股市早一晚大多數升２％，而亞洲股市普遍向上，日股早段升３２８點，升２．１%。

港股在美國預托證券亦向好，匯豐升２．２３元，升上１３１．８３元，升幅１．７％，中移動更急升６．８９元，升上１４１．３９元，升幅高達５．１２％，多隻紅色巨股都有４％、５％升幅，看到港股亦要急抽一轉，挾一挾淡倉。

自８月開始，次按愈爆愈大，爆到債市停頓，金融機構受重創，其後每到儲局議息期前大半個月，金融巨頭就自己暴露傷口，讓世人看到它們幾傷，插低股價兼拖低大市，主要挾聯儲減息，因為唯有聯儲局減息放水，舒緩資金緊缺的市場，才可以救到他們。

今趟挾到聯儲局副主席科恩開口，相信唔係匯豐要注資４５０億美元救旗下兩間投資公司，而是花旗要以１１厘高息發換股債，花旗要這樣低股價發換股債，兼且要付驚人高息，相信在美國人心中極其震撼，搞到儲局諸公也動容。

按過去的經驗，市場挾到儲局減息之後，會有一段時間炒作，跟著又再陷入下一個週期，相信短期內港股可以穩定番了。

陸羽仁

港股跟住美股大升１１１１點，４條１，幾好意頭。昨晚美股大升後企定，道指微升２２點，睇嚟消化吓升幅，在下月減息前仍上落偏好。

記得早兩日阿Ray問起，陸羽仁講的高手在跌市入貨時，有「週身中刀」之感，阿Ray問怎樣做得到。

陸羽仁經常和此高手交流，此君操盤不細，類似對沖基金式炒作，今年大豐收，業績以數倍計，我專門請教此「周身中刀」的感覺。

高手認為，散戶跟隨大市氣氛走，當股票熱升時，魚貫入市，感覺良好，甚至一買貨就有小小賺頭，散戶們急著慶祝。高手話，按他的經驗，最怕感覺良好，當他還是散戶時，每次買完股覺得「今次發啦！」跟住多數中招，事後檢討，感覺良好時，多數是水尾。這個升浪上月到咗３００００點後，陸羽仁當時話個市「飛龍在天」，高手亦有同感，咁升法，點升得耐呀，所以清咗大半倉等睇戲。

好啦，到個市跌咗落嚟，高手部署分段吸貨，佢專揀最痛的時刻入場。普通人只睇指數或股票的收市價，但在大跌日的最衰時段，股票或期權的日中價，比收市價不知低幾多，佢最鐘意在這些日子定個低價等人插，好多人高價入市後早應止蝕不止蝕，到大跌日就好驚，叫經紀不問價止蝕，甚至有些大基金都係咁，由於它們入貨入得早，水位好深，亦會不問價止賺，所以在跌市日定個低價，好多時入到day low(日中低價)。

佢最後一批貨是在匯豐在美國大跌日之後那個交易日（１１月２７日）入貨，美股被匯豐拖低２００幾點，人心虛怯，港股一開就跌近１０００點，期指當日低見２６６０１點，高手當天早上有足夠時間入貨。但在大跌時刻入貨，高手都話那個氣氛相當恐怖，當時確有跌多２０００點、３０００點不出奇的感覺。

我問他如何可以捱得住周身中刀的恐懼，佢講幾個原因：

第一，        基於理性分析。港股那時跌咗成個月，１１月２２日插落去都守住２６００４點收市，守住２６０００點大關，外圍無驚人大鑊，所以當日開市跌１０００點，去到２６７３８點，他認為再跌幅度有限，起碼呢個月即使穿２６０００點，都唔會穿太多，而且結算時可能會彈番高小小，所以在２６７３８點入市風險有限，令人驚恐的只是感覺，現實可能的跌幅相當有限，可以用理性分析控制恐懼。

第二，        分注買入。他從來都係分注買貨，月中見恒指穿２７０００點後無大力再向下，他已開始分注逐少買，他認為散戶最大題是想撈到真正的最低點，其實最低點不可測，而且市場環境變化都會影響最低點，所以他會在合理水平分段買，拉開時間段，就是避免一注買錯的最佳方法。

第三，        投注自己的錯誤。高手對１１月市道的估計是先跌後彈，結果證明估計正確，但他的口頭襌是「經常要假設自己會錯」，實際的做法是做一定的對沖，例如他在２６０００幾點買貨，就買番啲極價外的即月認沽期權，話如果明天股災，他可以頂到有突。他也擅長反手，試過到月中發現自己睇錯，原本睇淡，後來唔對路反手造好，亦賺番突，他認為對大市走勢有個假設，要反覆以實際發生的事情驗證，若和估計不同，唔好期望佢變番去自己估的走勢，發現有錯即跟大勢。

　　高手EQ極高，他的交易手法散戶亦好難學，但心理可以學，亦要學習同樣的思維方式入市，就可以減少錯誤。
　　至於後市，我們也有類似看法，早前刺激大市急升的港股直通車暫時停駛，所以未能對港股睇得太好，小心反彈到１１日真正減息後就會回一回，在高位２８５００點至３００００點左右上落，唔係一枝箭咁再創新高。高手的即月期權好倉已食糊，計劃高位減持手上低位掃入的一半持倉，食咗一半糊先。

陸羽仁