信貸嚴冬 (2008/1/4)
昨日道指無事,微彈12點,但放咗幾日假的日本仔今日開市,即刻爆大龍鳯,日股早段跌736點,跌幅4.8%(9:43am數字),都跌得幾得人驚,香港新年後兩日加埋跌900點左右,但以正常港股和日股波動的比例計,日股一朝跌得仲多,若日股唔反彈,對港港股有點壓力。
美國經濟數據差,預示衰退可能來臨,令依賴出口美國的日本企業大受影響,加上日圓又因美國減息預期而抽上,更不利出口,對日本是雙重打擊,所以日股反應咁大。
不過睇番歐美信貸市場,就好有嚴冬感覺,昨日已見英國有調查發現,銀行因為同業市場拆借困難,在去年第四季已收緊對公司的放貸,銀行「落雨收遮」的特色顯露無遺,英國經濟開始受打擊,大家都知英國有泡沫,所以有爆泡危機,早前英倫銀行開始減息救市,未來應會再減息,英磅只是靠相對高息維持匯價,再減息後,匯價應會略軟,對有子女在英國讀書的父母是佳音。
美國仲衰,信貸緊縮的危機逐漸深化,昨日講到銀行的「第二隻鞋」,即係衰完次按之後,又開始衰企業的爛帳,話咁快又浮上水面。美國的餐飲連鎖Buffets Inc.開始不能如期支付自己發行的債券利息,顯示公司陷入財政危機, Buffets發行咗2.9億美元的債券,2014年到期,年息12.5厘,本來如期付息就無問題,但佢就連息都付唔到。消息一出,Buffets的債價大跌,按現價計債息等如年息48.7厘(典型的利大本無歸格局)。Buffets受經濟下滑拖累,去年第三季已蝕530萬美元,終至爆發財困。
早前佛羅里達州地產商Tousa Inc.亦無法支付4.9億美元債券的利息,美國衰房地產急跌,Tousa出事較易理解,它的股價已從高位跌了99%,得番啲渣,最後好可能係用Chater 11破產保護令收場。
大家可以想像吓,美國公司連債券利息都支付唔到,自然還唔到錢俾銀行,咁環境會有惡性循環,銀行怕借出的錢收唔番,唔敢再借錢。企業想發債借錢亦無人吼,即使願意付出天價利息,恐怕亦無人敢接。當世界最大銀行花旗的換股票據也要用11厘利息才可以成交時,其他公司都好難發債借錢了。
美國月底才議息,好多銀行和投行在月中就公布第四季業績,恐怕它們都要對壞帳作更大撥備,一則它們無法唔撥備,二則講得恐怖點,就可以挾聯儲局減多啲利息。照目前的情況看,美國經濟嚴冬已至,金融巨企不滿足於聯儲局只減0.25厘息,可能想逼一逼佢減0.5厘息救市了,所以小心月中美股還有大風浪。
陸羽仁