昨日港股一插近１３００點，整個亞洲股市都因為道指的場外期貨急跌而下插；亞洲市結朿到歐洲市，全部跟跌，以德國DAX指數跌７．２％最厲害，倫敦股市因為有政府宣布擔保北石條債券數，北石股價急升５成，叫做氣氛好啲，都跌５．５％；始作俑者美國因為馬丁路德金假期而休市，只能睇住個道指場外期貨價，都跌了４００、５００點。

　　　　全球股市係咁跌，大摩的MSCI全球股票指數亦錄得５年以來最大跌幅，股市大跌引發連鎖效應，日圓再升，做１０５．８日圓，從事套息交易的對沖基金又要拆倉，炒得勁如黃金等商品急回，黃金現價８５６美元，油價亦因為擔心經濟衰退而急回，紐約二月份期油跌到８８美元一桶。所有投資產品皆跌，只有一樣東西上升，就係美債，投資者迴避風險把資金泊入短期債券，二年期美國國庫券升到１０２元，令債息跌至２．１％，投資者情願唔要回報，只求安全。從美國國債券期貨成交的數據顯示，市場估計聯儲局減息０．７５厘的機會，已經高達７５％。

　　歐洲跌得咁甘，今早亞洲開市再跌，日經指數曾跌超過６００點，跌幅約４．６％，之後跌幅略回順。到香港開市，又係爆大鑊的格局，昨日收２３８００點，距離２５０天線２３５００點只是３００點左右，好易一攻而破，直試２３０００點關口。

　　環球股市跌得咁甘，英國政府都投降，同意高盛的建議，由政府擔保北石銀行的債券，這種企業失敗由政府承擔的手法不尋常，但事急馬行田，英國政府也得無奈接受。

　　陸羽仁就好有興趣知道美國財長保爾森和聯儲局主席伯南克而家做緊乜？美國星期一無市，若美國政府什麼都不做，到今晚美國時間星期二早上一開市，道指好易一跌就跌５００點以上，直插向１１５００點，咁都唔緊要，再咁跌吓跌吓就失控，跌得太急就救唔番。伯南克有無放水救市的措施？負責和民主黨就救市方案講數的保爾森，又能否取得民主黨首肯，若這一切只有否定答案，咁危機就會急促擴大。

　　在正常的日子，這種政治性的危機完全可控，因為不同黨派只係做戲攞彩，玩兩玩就埋位做嘢。但今年是選舉年，民主黨會覺得一放生咗共和黨總統布殊，俾佢搞番掂個經濟，就對自己選情好不利，所以會堅持到最後一刻。而聯儲局也會有子彈亦不發，因為聯儲局若先行減息救番起個市，都好難再叫民主黨人就範。不知大家有無注意，民主黨消息人士對記者話，要３０至５０日才會和政府談好救市方案，保爾森和伯南克自然唔想等咁耐啦，最好在１月２８日布殊公布國情諮文前就有分曉，所以壓力就集中在這天，傾唔掂就玩完啦。

　　這是一個占士甸式衝崖遊戲，兩個人各自揸住跑車衝向懸崖，邊個先停就輸，所以兩個車手都會盡量捱到懸崖邊，弄不好兩個人都會跌落山崖，弄到粉身碎骨，政治比經濟更兇險。我們作為觀眾，只能夠等。

　　你問我股市有無災，我話目前仍未算，因為跌得未夠勁，若美國政客玩出火搞唔到救市方案出籠，就好難講嘞。到美股一日跌１０００幾、２０００點時，你想話係唔係股災都唔得。

　　至於網友如何自處，基本是要求心安，關鍵係控制風險，風險控制咗，自然唔會驚到瞓唔著，以瞓得著覺來決定自己買賣的方向。首先唔好借錢買股，因為唔對路時，人家會逼你斬倉，唔到你控制，買高風險的期指或沽期權亦係一樣，結果唔係你能話到事。其次若是成手蟹貨者，亦唔好再溝，有時黑起上來，愈溝愈慘。第三是無貨想買貨者，最好量力而為，股票係相對便宜，最好分注買，亦要你有力守，若萬一發生股災跌到１５０００點坐幾年都唔驚，唔等錢使，先至好買。第四是為自己留後路，有錢唔好買盡，又或者同時買少少認沽輪做對沖（要預咗呢一筆會輸清，這筆保險費就加進買貨成本裏吧）。第五，信自己，有懷疑唔好買。第六，成手蟹貨風險太高者可能要減部份倉控制風險，或買少少認沽輪對沖。冷靜思考自己的持倉和市況，才作買賣的決定。

陸羽仁

　　美國佬一如所料地出招救市，聯儲局在美股開市前開緊急會議，決定減息０，７５厘，目標隔夜借貨利率聯邦基金利率由４．２５厘減到３．５厘，銀行同央行借錢的貼現率同時減０，７５厘，這是聯儲局自２００１年９１１事件以來首次臨時開會減基本利率，去年８月１７日聯儲局臨時開會也只是減貼現率０．５厘，無減基本利率。

　　臨時減息在美股開市前約一小時宣佈，美股開市還低開，道指開市跌４６４點，但早上１１點已開始殺上，結果全日在１２０００點上下浮沉，收市跌１２８點，報１１９７１點，雖然是道指近年首次收市跌穿１２０００點，但在事前估計會大跌的恐懼下，跌百幾點真係要開香檳慶祝了。

　　今次港股之跌，甚至整個亞洲、歐洲之跌，都係從星期一美股場外指數期貨急跌開始，時近月底聯儲局議息之日，在星期一美國馬丁路德金假期無市之時，由成交比較薄弱的場外美股指數期貨下跌開始，其跌因的確惹人懷疑。在這些成交薄弱的場外市場，要做低美股指數期貨話都無咁易，跟住就在亞洲大手沽貨，自然可以沽出個大跌浪，因為跌到咁上下，基金都會恐慌拋售，以應付客戶的可能贖回要求，而大量的衍生工具持有人因股價下跌後接貨要斬倉，會觸發連番急跌。

　　到亞洲股市和歐洲股市出現連跌兩日的惡浪，美國大跌市的壓力已逼在眉睫，美國若唔在星期二開市前出招救市，就會出災，結果一如所料，聯儲局出招，昨日陸羽仁寫文時已講，聯儲局主席伯南克和財長保爾森要出招放水了，當時還未知港股昨日還要再跌多２０００點兼無反彈，到看到昨日香港的市況，美國出招救市就變成理所當然，所以最後見到鬼佬電視台報導聯儲局臨時開會減息，猛咁話驚奇，我就唔知有乜咁驚奇。

　　鬼佬大戶力插亞洲股，主要目的應該是逼美國政客做嘢救自己，因為間間美資大行都水深火熱，所以唔好意思啦，大力隊低亞洲股市，逼人做嘢，至於在香港等亞洲股市順手撈一筆，這只是甜品，應該不是正餐。網友們可能話佢地衰格，唔沽自己股市沽人地股市，不過話番轉頭，佢地沽美股唔係唔得，但如果要沽到港股咁大龍鳯，製造咁大驚嚇效果，港股兩日跌３５００點，道指起碼要跌番１０００點先有同樣效果，你話美國咁弱o既氣氛，道指跌１０００點，跌開有條路，恐怕佢會一瀉如注，金融大戶都驚自己玩出火，插完想頂都頂唔住，所以唔敢係自己屋企玩，唯有喺人哋屋企放火，然後大大聲聲話風高物燥，要防火也。

　　咁呢次環球股市做出咁大驚嚇，結果又得到啲乜家伙呢？表面上看只是聯儲局減息０．７５厘，好似大家都預咗，其實內裏有一重意義，就係聯儲局隨時在會期以外，以超常手段大幅減息，而家美國利率３．２５厘，誇張起來仲可以減多２厘，所以你去沽美股沽得太厲害，就有俾人突然減息挾倉的風險，所以聯儲局的超常舉措制約了淡友的行動空間，即係聯儲唔係一定要等到會期才可減息。今次減０，７５厘唔夠，若股市再大跌，過兩日佢可以失驚無神再減０．７５厘，用減息大力放水，打到淡友手軟。

　　呢一跌還有一重影響，就係逼美國民主黨就範，盡快接受執政共和黨的救市方案，負責和民主黨談判的財長保爾森話，救市方案「必須盡快推出」，而白宮發言人Dana Perino更表示，不排除救市方案比原定的１５００億美元更大。

　　我可以扮吓保爾森同民主黨講話：「你睇，只係傳吓話美國經濟唔掂，亞洲股市好似香港就跌到阿媽都唔認得，如果你地唔快快趣趣同意救市方案，只係減息唔夠力頂，美股若出現亞洲股市同樣的急跌，一日跌１０％、２０％唔出奇，到時你哋要想想如何向選民交待。」有呢次亞洲跌市做樣辦，的確可以增加保爾森的談判籌碼，保爾森以前係高盛主席，自然深懂股市的玩法。

　　美股「奇跡地」V型反彈，小跌收場，港股跌咗咁多自然會反彈，好多網友關心熊市是否已經來臨，我也維持過去的看法，美國熊市早已來臨，港股的熊市未確認出現，因為熊市的特點是股市見高回落，然後一級一級咁向下；去年港股９、１０月的升市由於有港股直通車消息的人為刺激，一下子搶高到３２０００點的水平，但港股直通車的消息被暫時否定後，港股要回歸自然，我早已說過，港股是大波動上落市，但炒作區間要逐步下移，去番比較正常水平，再定去向，目前的走勢未確認熊市來臨。

　　有網友問是否股災，我話股災唔止跌咁少，跌到１５０００點一啲都唔奇，但我判斷目前出現股災的機會都只係有一、兩成，風險主要係美國市救唔到兼且大急跌，我在早兩日話港股未滑入股災中，主要原因係睇住美國市，因為美國當時利息係４．２５厘，利息未算好低，美國連番減息大放水的招數未用盡，照計無咁快來股災，因為一有災味，美國佬就會連番減息救市，到減到咁上下無得減無可減，或者通脹大颷升形成一個減又死唔減又死的兩難題前，美國佬有招未出盡，所以無咁快有股災。

　　港股呢一轉插得咁勁，好大機會短浪見底，一兩個月的後市要看美國有無災，若美國弄出比較像樣的救市方案，不排除可以軟著陸，若美國因為政治鬥爭搞到救市方案唔湯唔水，再減一兩次息都救唔起個市，就要小心。

　　股票而家幾便宜，只要量力而為，買吓唔怕，守住止蝕，照計都唔死去。

後記：昨日問高手有乜部署，高手話個市跌得幾恐怖，超乎他的想象，但見到個市跌２０００點時，佢就大手入貨，話揸一日睇吓都好，除了因為估美國佬會出招外，他還有一個奇怪理由，話港股咁歷史性一日跌２０００點以上，一定要買啲貨，贏又好輸又好，將來老咗有故仔可以同兒孫講咁話，去年的８月１７日，他亦大手買貨，感覺和昨天一樣，好驚。

陸羽仁

美國股市昨日先插後急彈，早段因為美國銀行第四季業績跌９５％，遠差過預期，加上蘋果電腦和摩托羅拉預期業績會受經濟回落影響，道指曾經跌過３００幾點，尾段傳出政府同銀行研究出招挽救債券保險公司，道指在金融股帶動下急促反彈，結果收報１２２７０點，大升２９８點，升幅２．５％，上下波幅有６００幾點，坐哂過山車。

美銀因為次按要撥備５３億美元，要發６０億美元的可換股優先股集資，但股價照升８．５％，金融股以JPMorgan升得最厲害，大升１２％。市場開始預期金融股最壞的情況過去，有人認為現價跌到吸引水平。

其實睇番早兩日亞洲股市大跌和美國跟著的連番救市措施，令我愈來愈相信這是有計劃跌市，因為美國已有連串措施跟尾。

第一，救債券保險公司。好多人唔知美國的債券保險公司正在爆大鑊，它們在倒閉的邊沿，由於次按債券爆煲，向債券保險公司索賠的數字急增，債券保險公司的財務狀況急促惡化，美國第二大債券保險公司Ambac Financial　這個月剛被評級公司Fitch Ratings降低其AAA評級，其對手美國最大的債券保險公司 MBIA Inc 也等住降級，債券保險公司爆煲是美國下一浪金融危險風眼，連保險公司都瓜埋，勢必觸發連鎖反應，但昨日傳出消息，美國的保險專員正和紐約的銀行磋商，向MBIA Inc等提供信貸，協助MBIA Inc保持評級，保住它做保險的２萬億美元債券仍然有保險公司支持，否則保險公司冧埋，這些無保險的債券實行等掟出街大賤賣。

政府救債券保險公司的消息一出街，華爾街金融股也勁彈，特別兩隻最受惠的債券保險股更升得誇張，已被降評級的Ambac 狂升 72％， MBIA 也有升 33％。

第二，減息有下文。聯儲局臨時減息０．７５厘，你都咪話無壓力，消息出街之後雖然好多人叫好，也有人彈。有學者風格的摩根士丹利亞太區主席羅奇話美國聯儲局而家咁減息法，係營運這個世界最大經濟體的「危險、魯莽和不負責任的做法」，在泡沫爆破時用減息去支持，會鼓勵投資者將來冒更大風險。而歐洲的央行亦媽媽聲，英倫銀行更出口批評，照示歐洲央行和英倫銀行仍怕通脹，無意跟美國減息，美國減息歐洲唔減，美元弱化，令美國出口到歐洲更有優勢，歐洲股市又無息減又怕衰退，自然大跌，德國股市跌４．８％，法國跌４．３％，英國跌２．３％。

可見若無早前亞洲股市急跌的壓力，聯儲局唔易大幅減息。由於聯儲局已擺明重視增長多於通脹，係一個明顯策略改變，而家好多人估聯儲局在１月３０日議息時會再減息，期貨交易顯示有８０％機會聯儲局到時會再減息０．５厘，令利率跌到３厘（若如此加埋臨時減息共減１．２５厘），在一星期前，係無人估聯儲局會減息減到低於３．５厘（即係唔會減多過０．７５厘）。在減息預期下，自然支持股市反彈。

   　第三，民主黨態度軟化。布殊一直希望在野民主黨支持他的救市大計，到亞洲股市急跌後，佢就約國會兩黨領袖見面，話「我們可以找到共同立場，採取足夠大規模而有效的措施，提振一個規模龐大的經濟。」民主黨國會領袖的態度亦好軟，參議院民主黨領袖哈雷內德話美國經濟正滑向衰退，他希望國會能到2月中旬時已通過一份財政刺激組合方案，「我會希望很快拿出點東西來」，佢講到急過布殊。而民主黨衆議院領袖佩洛西亦話，刺激經濟的法案，「是亟待處理的緊急事務。」看來布殊應可以取得民主黨支持救市方案。


　　香港股市做咗美國政治的配角，幫美國政府和聯儲局掃除救市的障礙。有人話，美國大行炒燶了輸了大錢，就搵政府出手，聯儲局狂印錢救市。政治就係咁，講實力，唔係講口水。

　　昨日經紀張話擔心美股會再跌，我就話炒炒反彈先啦，唔使驚噃，美股同港股，係同一個老細o架！

陸羽仁

　　美國執政共和黨終於就救市方案和在野民主黨達成協議，推出龐大的退稅計劃刺激消費，美股道指再升１０８點，升到１２３７８點的水平。
　　陸羽仁一直認為，呢個星期以香港為首的全球股市急插，為的就是挾到民主黨接受布殊政府提出的救市方案，以及為聯儲局更快更大幅減息掃除障礙，大家都知道，美國財長保爾森是前高盛主席，金融和政治如何交叉去玩，佢點會唔知，今次馬上爭取到民主黨同意救市方案，我可以用美式足球的「達陣」取分去形容。至於期間包括香港在內的亞洲、歐洲股民如何因為股市暴跌損手流血，就只能以「一仗功成萬骨枯」去形容，加上死的主要不是美國股民，佢地當然唔覺得入肉。
　　今次救市方案由保爾森和民主黨國會議長佩洛西和共和黨國會領袖貝南共同宣佈，好有兩黨聯合救市的味道，之前大家點狗咬狗骨就無人知啦。
雖然兩黨口講如何照窮人，但救市方案的重點其實係刺激消費，最主要部份係向１．２億個家庭退稅，個人最高可得６００美元的退稅，夫婦退稅最高有１２００美元，再加每個孩子３００美元。美國人生得仔多，一個家庭３、４個仔女等閒事，以三個孩子的家庭計，每個家庭無端端最多收２４００美元（即１８７２０港元），都唔係細數目。財長保爾森話，最快可在國會通過方案兩個月後，就把退稅支票寄出，即係預計美國人５月可以收到退稅，保爾森形容此舉係「一條快線」。

美國人有錢收，自然會感覺良好，以他們有錢即使的性格，一有錢就會花掉，退稅等如政府向消費市場大量注資，這筆錢在５月就會注入市場，等如１、２個月後，美國消費市場就會熱起來，因為不少美國人預期收到退稅，可能提早碌卡消費，好多退稅促銷活動會馬上推出。

救市方案亦會鼓勵公司作設備投資，小公司過去買設備有１１．２萬美元扣稅上限，將會倍增，大公司買設備的扣稅限額亦會增加。美國稅重，所以仍有錢賺的公司，就會利用這些「稅務假期」大買設備，馬上可以少交稅款，反正買設備又可以分期，對現金開支增長不大，但即時卻有現金的稅務得益。

方案亦有救樓市內容，政府會放寛房利美公司等按揭證券公司購買按揭的上限，由過去每個貸款的上限為４２萬美元（３２５萬港元），放寛到７３萬美元（５６９萬港元），此舉可以減低貴價樓的融資壓力。

布殊政府這個萬億港元的救市方案，能否把正在下滑的美國經濟托住，尚要觀察，但政府這樣大力放水入市場，加上大幅減息，有利提振信心，樓市可能唔係咁易救得起，但可刺激個人和公司的消費，令經濟加番少少熱度。

美股對救市方案反應良好，再加上最大的國防股Lockheed Martin,及辦公室機器生產商Xerox 公布盈利皆是市場預測的上限，所以道指升番上１２３７８點水平，加埋前日升的２９９點，兩日加埋升番４０９點，都算有反彈力，看來美股短期趨向穩定，仍在一個反彈市中，但不要對反彈期望太高，我看這一浪反彈不易升穿１３０００點。

既然美股短線會穩一穩，我估港股短期內都會穩番，至少減低大幅下滑的風險，可以繼續炒吓反彈市。

陸羽仁

　　　　上周五道指跌１７１點，今早日股跌２００點，港股開市有點壓力，不過咁波動又咁人為的股市，插１０００點，升１０００點，可能只是５分鐘的事，世人對股市上落所賦予的解釋，只是瞎子摸象而矣。


　　世界上有好多聰明人，表面上最多聰明人做投資銀行家，實際上更多聰明人做政客，投資銀行家打生打死追逐巨利，政客唔駛點做噴吓口水就令巨利轉移。君不見美國的銀行家、投資銀行家發揮佢地無限的創意，把錢借給毫無還款能力的次按業主後，還把這些貸款包裝成證券，由於這些次按證券評級低無人買，又把它們包裝成為CDO，把少量次按證券加上大量優質的AAA級債券紥埋一齊，整件CDO出來，又變成AAA級了，再把這些化了裝的CDO賣到全世界。咁搞法自然會出事，出事後又叫政客大減息放水救市。這些漲跌循環週而復始，唔知點解，普通人的財富郤不斷被人轉移走了。美國而家告緊各大投資銀行包銷按揭公司的股票時欺詐，不過呢啲官司，最後多數係和解收場，投資銀行賠錢就可以了事，舞又照跳。


　　最妙的是美國人使大咗、玩大咗、整爆咗、累咗街坊，跟住狂放水救市，你仲要多謝佢。好似你鄰居養咗條惡狗洛威拿，無端端走入你屋企打爛哂你啲嘢，鄰居最後來把惡狗洛威拿拖走，你仲要千多謝萬多謝，仲話好彩得佢拖走條狗，條洛威拿先至無攞你命。至於鄰居捉狗時順手牽羊，把你屋企的財物拿走，你都無法追究了。


　　網友S2000話香港好似ATM機（銀行自動櫃員機）咁俾人提款，我就絕對贊同，人地拖住條惡狗，你地可以點出聲，出聲隨時命都無，港股上周二俾人隊到落２１７０９點，而家升番上２５０００點，大家高興都來不及，賠錢送賊，還要千多謝萬多謝。
網友idoglife講起：「1980年，美國商業銀行的優惠利率高達21厘。當時西方各國被滯漲所困擾。列根提出重振國威的口號，結果贏得美國人的心，入主白宮。美國也不再視凱恩斯主義為靈丹妙藥，以『鬆財政，緊貨幣』的方針，刺激經濟。在國家利益的前提下，各國各懷打算，一場難解難分的經濟政策戰就此展開，叩開了80年代的大門。今日，因次按引發的信貨危機，有沒有其他下文，我不肯定。但在國家利益的前提下，大家會出甚麼招，就要拭目以待了。陸sir,您點睇呀？」

這場次按風暴無咁快完，香港對樓市大跌最有經驗，當然唔可以三幾日就搞掂，不過美國好過香港，在大風暴是可以唔怕赤字大派錢，可以自己決定大減息，香港無咁o既自由。香港在９８年金融風暴時，被對沖基金挾住來玩，被逼大力挾高利息捍衛港元，搞到隔夜息高到３００厘，經濟差仲要捱超高息。後來到２００２年，香港經濟再轉差，當時的財爺阿松蠢就蠢在經濟差時仲要大力減開支，不過他也是在國際貨幣基金會和世界銀行的壓力下，要香港平衡預算，才被逼落雨收遮。睇番而家的美國，點解佢落雨又可以開遮，經濟唔好赤字高都可以大增赤字派錢救市呢？又唔見國際貨幣基金會和世界銀行出來批評吓美國？

妙又妙在另一單新聞同時發生，世界銀行前行長沃爾科威茨因為把女友安插入世銀工作，爆出醜聞，搞到要下台。沃爾科威茨出任世銀行長前曾任美國國防部副部長，出事之後，最近美國又整咗個國際安全顧問委員會主席俾佢做，既然美國隨時安排黃金降落傘俾這些國際金融機構的巨公，佢地對美國好啲亦都正常。

美國而家似乎用緊「鬆財政，又鬆貨幣」的政策，一字記之曰「派錢」，所以美國狂減息，狂退稅救經濟，只要佢忍得美元下跌，這個狂印美鈔的行動可以做到好得人驚，到時歐元升值，人民幣升值，中國和歐洲出口減慢，你地持有的美元儲備下跌，就真係唔關美國佬事。中國持有１．４萬億美元外匯儲備，人民幣每升值１０％，中國唔見咗１．１萬億人民幣，等如中國損出這筆錢幫美國救市，美國仲要彈你人民升值得唔夠快，乜唔係自招貶值嗰個俾人彈咩？以中國１３億人口計，唔見１．１萬億，即係每個中國人平均捐了８４０元人民幣出來，最窮的２億農民一年收入都係差唔多，即係等如２億人一年白做去救美國．．．．．．

美國利息仍然大把水位可減時，所以我唔敢話美國次按問題救唔番，現時美國利息３．５厘，減多２．５厘，減到剩番１厘都可以，而且美國亦可以狂加赤字派錢救市。直到這些招數用盡前，美國想爆災亦唔係咁易。不過在未來歲月裏，股市的風浪難免，我亦唔敢講呢個月的大浪，今年唔會再發生。

陸羽仁

　　美股未來幾日有兩件大事，第一件事是香港時間今晚美國總統布殊公布國情諮文，第二件事是由３０日開始美國聯儲局將會議息，特別是利息走向，將左右大市。.

美國商務部昨日公布新屋銷售數字跌到１２年低位，令月尾再減息的憧憬增加，帶動股市向上，道指大幅回升１７６點，升幅１．５％，升番上１２３８３點的水平，收復早一日跌１７１點的失地，反彈幅度和早一日的跌幅相當接近。而日股早段亦升超過３００點以上，港股今天應有反彈。

按美債期貨的成交價推算，有８６％交易員相信聯儲局將會再減息０．５厘，比上周五的７０％人相信會減息０．５厘明顯上升，再早一個星期根本無人相信聯儲局會減完再減息。陸羽仁覺得，交易員真金白銀去買債券期貨，唔係只噴口水，空穴來風，未必無因，看來月底聯儲局很大機會會再減息，問題是減０．２５厘還是０．５厘。

更離奇的是布殊部份國情諮文的內容，竟然由白宮提早一日放出街，據白宮提供布殊講話的撮要本，他會告訴美國人，雖然短期內經濟可能放慢，但要對美國經濟增長維持信心，「我們的經濟正在不穩定的時期，很多家庭擔心經濟前景，但長遠來說，美國人會對經濟增長有信心」。

　　布殊又會提醒眾議院，要加快審議１５００億美元的救市方案，盡快通過方案。「我們有很多未完成的工作，美國人期望我們把它做好。」

　　如果只看這些已放出街的內容，似乎只是碎料，沒有太多新意，但白宮罕有地預先放料，自然有其動機，估計原因有兩個，第一，布殊想唱好經濟和股市，所以事先爆一些唱好的內容，一單新聞分兩日出，維持一定的熱度，並谷一谷股市。第二，國情諮文包括催促國會盡快為救市方案立法，事先公開既給民主黨增加一點壓力，期望他們在國情諮文公布後，馬上對救市方案立法作積極回應。

　　美國政客吹風出術，藉此唱好唱淡，絕對係專家，今次似乎有意營造一個好氣氛，期望把美股從谷底托番起。

　　谷高美股亦同時令美元有支持，日圓走勢回軟，雖然交易員預期美國會再減息，但美股反彈帶動亞洲股市造好，令交易員更能忍受風險，敢於惜日圓去投資其他較高息貨幣，日圓兌美元現價１０６．８８日圓，兌歐元為１５７．９４日圓，交易員估計資金會沽日圓，估計日圓兌美元今日會跌到１０７．９日圓，兌歐元會跌到１５９．２５。

　　美股和匯市的走勢，預示市場漸趨穩定，已消化美元再減息高達０．５厘的影響，預期美股會靠穩，美元亦會略為反彈。港股近期指結算，這兩日要睇大戶點借美國市場的消息搵食了。


陸羽仁

　　美股持續向好，道指再升９６點，升０．８％，升到１２４８０點的水平，繼續反彈，等候減息。昨日主要是上月耐用品訂單升５．２％，舒緩市場對衰退的憂慮，加上紐約保險專員表示希望盡快完成拯救債券保險公司，令它們免於被降低評級，令金融股上升，致使美股延續升勢。
　　恒基主席李四叔再發言講股市，引人深思。四叔昨日會見傳媒時，謙稱自己不是「名牌股神」，只是「冒牌股神」，希望以後大家不要再稱呼他為股神，真正股神是一早沽了中石油（０８５７）的巴菲特。　　
李四叔自謿完之後，更讚一讚李嘉誠。事緣四叔有買航運股，例如中遠控股，他在該股升上高位沒有沽出，但誠哥則於一兩個月前力沽航運股，李兆基豎起手指稱讚，直言：「李嘉誠沽售航運股的做法好嘢！」不過，李兆基自己至今仍持有航運股，相信長線投資，可以獲得不俗的回報。　

無論如何，李四叔的氣量值得讚賞，他已是這樣成功的人士，要踩自己，讚其他人，實在唔係咁易。昨天是四叔捐助浸會大學的中國研究中心的日子，他一直是股市好友，但近日恒指咁跌法，他自然也預計了記者一定會問他股市的問題。李四叔縮骨一點可以不出來，搵個仔出來主持儀式就算，免得被人抽後腳，但他堅持要出來，這也要有相當氣量。

四叔話，講股票講多咗之後，成日俾人問，搞到他無覺好瞓，所以今後要少講。但他昨日仍對今年上半年股市走勢作預測，相信第一季恒生指數會升上２７０００點至３００００點；第二季則較淡，宜守不宜攻，可能調整向下，但具體指數未有預測。他認為上周恒指跌至２２０００點，屬跌過籠，在這個水平可以吸納。

股神唔易做，的確是鐵一般的事實，炒股從來有兩派，一派睇基本價值，以巴菲特為代表，一派睇短期走勢，是一般股評家經常做之事。股市短期走勢難測，因為太多人為因素，但基本價值有數計，所以價值派睇好一隻股票，買入後可以兩三年仍然無表現，因為股價經常偏離其基本價值，唔係平咗，就係貴咗，但有價值的股票始終會被人發現，到人人都發現時，隻股開始有表現，就可以追回差價，甚至升突好多，所以要做價值派的股神，要比做測市的股神易好多。

回想去年８月跌市後的升市，有跌後反彈的因素，也有港股直通車的刺激，就把股市推向難以想像的高峰。正如好多人這樣形容股市升跌，就是一群瘋狂的人，做瘋狂的事，把股市推向瘋狂的方向。在股市向好的時候，一味看好的人就是股神；在股市向淡的時候，一味看跌的人就是股神，這種股神你同我都可以做，邏輯上有一半機會中；我可以同大家講，呢個世界無股神，股民買股票，要信自己，要自己去分析，再按自己的情況和承受力，訂立投資策略，去控制風險。其他人講的話，不可盡信。

在去年１０月股市升過３００００點後，已經無人願意看淡，因為看淡會被人鬧。而本來已經看好者，就會看得更好，所以李四叔在記者不斷追問吓，加上市場樂觀情緒推波助瀾，就只能把恒指的目標價不斷往上推，也有不少人提出所謂「藍天估計」，話恒指最高可以升到４００００點以上咁話。恒指「最後」會否升上４００００點，天曉得，或者明日有港股直通車，後日港股一日升萬幾點升到４００００點都講唔定（不過發生的機會接近零），但若果我們在去年１０月相信股市快將升到４００００點這個「目標價」，然後瞓身買股，跌落來不識止蝕，後果必然大鑊。

買股票好難講目標價，目標價不同合理價，合理價是按公司賺錢能力給多公司在當年的股價評級，例如我話去年以恒指成份股的賺錢能力計，大市去到２７０００點都去得好盡，不等如股市不會升越這個點數，股市好的時候，經常超越合理價，但升穿合理價後，股票／股市的炒作味開始濃，那時只能由「投機的我」去操作，嚴守止蝕最重要。股評人在股市已經升到顛時，再講出好高的目標價，客觀上會減低聽眾對風險的防範心，以為買股好安全，見到風險都不識走避，咁就弊傢伙了。

陸羽仁

　　美國聯儲局一如預期再減息０．５厘，把銀行之間借貸的聯邦基金利率減到３厘，這個「好消息」曾一度刺激美股升１．７％，但後來傳出評級公司Fitch Ratings調低兩大按揭保險公司Ambac Financial Group Inc. 及 MBIA Inc.的評級，在金融股調頭回落的影響下，道指倒跌收場，跌３７點，收報１２４４２點，減息對股市的支持維持不了一天。

　　在聯儲局公布減息至３厘的同一天，美國商務部公布第四季扣除食品和能源計的核心通脹率增長為２．７％，這是聯儲局主要參考的通脹數據，油價和食品價格皆升，所以總體通脹率一定更高。以聯儲局自己把尺去計，它期望到２０１０年核心通脹率增長為１．６％至１．９％，目前的核心通脹率高於聯儲局的理想。雖然聯儲局狂減息的行為已把通脹拋諸腦後，但它在減息聲明中仍說，他們期望未來幾季通脹率會溫和，但仍需小心觀察通脹的發展。

　　美國第四季美國本地生產總值按年計增長０．９％，增長急促放慢，看來今年第一季能否維持正增長也是一個問題，第二季即使有退稅刺激也有可能是負增長。若連續兩季負增長，就是經濟衰退，美國已在衰退邊沿。

　　若果以計及能源和食品的總體通脹率來計，美國現時通脹率應該已超過３％，而利息只是３％，美國已是負利率。照走勢美國經濟增長快將停滯，典型的停滯澎脹情況即將出現。現時聯邦基金利率是３厘，聯儲局尚有減１至１．５厘空間，把利率減至１．５厘的低位，但若瘋狂減息仍然刺激不起經濟，再加上通脹飛升，美國就會步日本後塵，陷入長期的衰退。

　　　減息之後，美股又會進入一個調整的勢頭中，目前有些負面消息開始出台，除了按揭保險公司被降評級外，標準普爾又宣布降低５３４０億美元次按證券及CDO( collateralized debt obligations)的評級，這個舉動將會逼使本來撥備不夠的金融機構再要作更多撥備，瑞銀昨日已公布極差的業績，帶動歐洲股市向下，看來歐洲金融機構要為次按大撇帳仍陸續有來。

　　美股反彈乏力，港股過去兩日已應升不升，除了期指結算的因素外，也顯示大市的上升動力有限，不少人借反彈沽貨。由於大陸受困於雪災，港股短期動力主要來自受惠於減息的地產股和本地銀行股，但不要有過高期望，好的話是炒吓上落市，要向上破２５２００點不易。

　　有人問美國減息香港跟不跟，我話香港銀行多數會跟，跟唔跟足唔知，但因為如匯豐這些大銀行正深受股市的壓力，加上銀行同業市場資金充足，所以會帶頭減息，希望刺激一下氣氛，所以供樓的市民有福了。

後記：高手昨日已經離場，他原來在２４０００點上下建立好倉，並以部份淡倉對沖，後來在１月２２日大跌日再入市掃貨，後入的一批貨在反彈上２５２００點，在大市回頭時止賺，獲利較深。而初時建立的好倉亦在昨日平倉，好倉本有微利，但扣除對沖成本後，獲利不多。我問高手現時離去會否太早，他表示投機要順勢，這一浪港股反彈暫時未有他想像中那麼多，主要是大陸受雪災影響，大勢不就，未能帶起港股如以住地向上偏離美股走勢，變成和美股同步，等到減息就是好消息出貨的時候，雖然股市再升唔出奇，但他是投機者，不是投資者，不會揸太長，唔怕食唔盡，最怕要上身。
陸羽仁

　　  　美股又坐過山車，昨日早段曾跌１．３％，到後段因為最大的按揭保險公司MBIA Inc.行政總裁Gary Dunton話自己公司有足夠資本保持AAA的信貸評級，帶動一眾金融股向上，美股重拾升勢，道指升２０７點，升幅１．７％，升到１２６５０點。

　　這一陣子外圍和香港的股市都極其波動，升市時股民心情好好，跌市時股民心情好差，大家都無乜方向。好友會想，這一個跌浪很快過去，恒指轉眼會升上３萬點樓上。淡友會想，這個跌浪未到底，隨時有股災在後頭。

　　先講股災，主要風險在美國，來源有兩個，係人都知道次按大鑊，但這一鑊若要爆到出股災，第一，要聯儲局及政府無行動去制止災害蔓延。第二，聯儲局及政府行動完都無效，藥石無靈。

　　我在上月話股市係大跌唔係股災，主要因為救市的方法未出重招，貨幣政策未大減息，財政政策未大派錢，若有股災殺到，政府還可出招，應該止得吓咳。結果一如所料，聯儲局兩度減息共１．２５厘，又逼得民主黨同意救市方案，政府出招後，市場暫時舒一口氣，至少相信政府和聯儲局會出重招救市。

　　接著的問題是會否救市無效，藥石無靈呢？而家最幸運或最諷刺的是，聯儲局主席伯南克，根本就是研究大衰退的專家，專門研究政府如何救市，如果連佢都救唔到市，就證明學者都係閉門造車，得個講字。伯南克1979年在麻省理工獲得博士學位，1983年他在史丹福大學經濟學做副教授時，發表經典論文《金融危機之非貨幣因素加劇大蕭條之蔓延》，分析了上世紀１９２９年大股災和隨後的經濟大蕭條根源，他認為債務緊縮和樓價等資產價格大幅下降，是導致大蕭條的主因，而聯儲局沒有及時減息也是幫兇。

　　睇番而家，美國的病變也是債務緊縮和樓市急跌，而聯儲局雖然曾被批評減息減得太慢，但１月已急急加促減息的步伐，而家就係驗證伯南克理論的時候，到底在經濟有蕭條的苖頭時，聯儲局大幅減息，加上政府的財政政策放水，能否挽狂瀾於既倒？

　　而家美資大行間間都預期今年起碼減息１．７５厘，而家減了１．２５厘，即係起碼仲可以減０．５厘，可以減到２．５厘（我估再減深少少都得），美資大行的普遍結論是大減息加大救市可以大力舒緩經濟的病變，美國只是在第２季和第３季有負增長，之後可以回復正增長。

　　如果是這樣，美股會反覆向下，不會有股災式急挫，港股即使未見底，也不致有大股災。你問我信唔信，我都有六成信心，但唔係有十足信心，要觀察未來一兩個月信貸市場的走勢，會否在大減息後令債市重拾活力，是未來生死的關鍵。基於未有十足信心，所以也不相信港股會V型反彈上３萬點（唯一變數是港股直通車何時開通），目前的策略，見到股市彈得高就要保守啲，若跌到咁上下，又不妨雞啄米或買吓平貨，但買貨就要預咗守長啲矣。


陸羽仁

　　美股跌得多惹來併購，微軟在上周五宣布以４６６億美元（３４７９億港元）向雅虎提出收購，收購價比雅虎前收市價有６２％溢價，消息一公布雅虎股價即彈近五成。在微軟收購消息刺激下，再加上傳聞美國大銀行計劃聯手救債券保險公司，令美股上揚，道指收報１２７４３點，升９２點。

　　微軟和雅虎的對手Google勢力愈來愈大，微軟和雅虎漸有頂唔頂之感，所以併購是聰明之舉，但在市旺之時，大家要求都好高，所以好難成事。微軟透露０６年底曾向雅虎提親，雅虎無興趣，去年又再提，再被雅虎拒絕，到如今才有良好反應。微軟在大市差的情況下，願意以高溢價提出收購，即使雅虎管理層不心動，雅虎股東都心動，聞說交易是敵意交易，但因溢價夠高，都有機會成事。

　　我們對併購消息無大反應，主要看看價錢，睇吓對雅虎和微軟股東有無著數，但美國人視併購為企業增長的原動力，因為美國公司間間都係巨無霸，仲要年年維持雙位數字增長，只有透過併購，但股市太旺時，公司睇自己價值睇得好高，再加上有好多私募基金借到平錢來搶貨，所以併購對象公司大多吊高來賣，併購好難成事。但如今經濟衰退的陰影令公司回歸現實，對收購價的要求降低，併購成事的機會回升。美國人聽到併購就精神，視之為股市利好消息，若未來併購活動多啲，美國股市的氣氛會改善。

　　照美股走勢，會繼續一輪反彈市，而港股跌咗咁多亦會跟著反彈，問題是彈到幾高，以及會否彈完好快就軟番。美股也不是沒有隱憂，第一，下月１８日又再議息，想聯儲局再減息的力量，會在２月底發力，因為若美股欣欣向榮，都無再減息的需要了，所以近議息期都係做低多過做高。第二，救市方案有手尾。布殊政府和民主黨眾議院的大佬傾好，才推出救市方案，但民主黨的參議院大佬卻唔多滿意，批評退稅對經濟的幫助不大，認為不如延長失業救濟，每人派長啲救濟金，此舉同樣要１４００億美元，即係派得救濟金就退唔到稅。參議員按州選出，窮州多過富州，來自窮州的參議員就算出吓口術，都叫做為最低層發吓聲，而家唔知民主黨參議員有幾認真反對，若堅持反對，都幾濕滯。

　　綜合而言，即使美國經濟唔係差得咁緊要，美股彈彈吓都有誘因回落，港股走勢受美股牽動，不可不防。

　　港股基調原本好過美股，負利率本可刺激投資氣氛，但美股下滑，加上大陸雪災又拖住A股向下，港股大跌初段反彈乏力。但隨著美股借併購消息彈番高，港股應有一輪反彈，第一個目標是２５０００點，看看彈上去之後能否守住２５０００點，若能守住此位，對大市可以睇番好一啲。

　　如前所述，港股主要風險在美股，美股如一個重病入院的有錢病人，做完手術推番出來，表面睇都OK，開始醒番，你係一個保險經紀，佢想同你用好貴價錢買份壽險，你要決定賣唔賣俾佢。你夠膽博，佢未醒時你就開單，就可以博到最高價錢，有可能一開完單佢就瓜咗，你就要賠錢，只有富冒險精神的人才會做，就等如在股市跌得最甘時入市。等到個有錢人愈來愈清醒，有講有笑，份保單價錢就開始跌價，保費要收平啲，因為險開始下降，就如現在的股市。你等到佢出埋院去埋打波確定佢無事才肯同佢開單，只能收較平的保費。風險和回報成正比，博唔博只能由自己決定。

陸羽仁