美國股市再因分析員睇淡金融公司盈利而下跌，市場擔心衰退會令消費者的壞帳惡化，UBS話美國失業率會增加，影響美國第三大信用咭公司American Express盈利，道指跌１０８點，跌幅０．９％，跌到１２６３５點。美股回落，但大陸股市應在阿爺大力托市而處於反彈中，要看港股如果回吐，又會不會打回原型，就知道大市有無支持力了。

　　網友Yuki日前問了一個問題，挺有意思，可以一談。她問：「The situation now is difficult to handle. When stock prices ｄ ｒｏｐ, there is no bottom can be seen. They can keep falling for many days. However, whenever there is rebound, it is strong. If chasing when seeing rebound, the stock prices fall drastically again because the rise usually cannot last long, maybe just one or one and a half day only. You advise we should hold longer when we buy now, however, how can we handle the psychological problem that we hold it longer, but turning from profit to loss, and even have to cut loss later?」（意譯如下：近來股市的情況比較難搞，股價跌時好像無底一樣，不斷跌好多日。但反彈時又很強，若你去追貨，佢又會再跌得好急，因為反彈都不持久。你建議我們買了貨揸長少少，但我們怎能克服心理壓力揸得長呢？當眼看由賺轉蝕好難忍，而且將來可能還要止蝕？）
　　
上月２２日的跌市係好急好深的跌市，你過去有無見過一日跌２０００點，過一日又彈２０００點的股市？這種波動蘊含極大風險，唔止波動本身難忍，而且大波動背後的確不能排除反彈完再急插的風險。
　　
去年２月的跌市和８月的跌市，相對跌得比較輕鬆，雖然兩次跌市都有美國次按爆煲的背景，但那時次按未爆得咁深，危險無咁大。你今天問我，美國經濟係唔係一定救得番，美股係唔係一定無股災，我只能夠話：「一定唔可以話一定無股災」。雖然我自己估計美國出股災的機會仍然略細（意即道指一日１０％、２０％的急跌），估計約一兩成機會吧，但萬一出現，港股即使前一日跌咗２０００點，跟住都可以一日跌５０００點。機會雖然不大，但風險的確存在。
　　
Yuki話個市好惡頂，其實只是講今次較深度下跌的餘震，已經相當難頂，先是大市跌，跟住大市彈完再回，再到大陸股市下跌雪災深化，紅色股再深度下跌，好似一浪一浪咁來。投機者如在起跑線搶起跑的跑手，過早搶出，隨時出局。過早入市撈貨，大市有排未跌完，自然可能要先止蝕。
　　
Yuki問我叫人「忍吓啦，揸長少少啦」，但現實上好難忍。我通常咁講時，都是估計最大的一浪已過或好快過，通常大浪未到時，我都會叫你先止蝕，但若你無止蝕，手上股份跌了三、四成，但大浪已過，我唔想你沽個底價，就會叫你忍吓，叫你忍的當兒，我有一個判斷（可能係錯），估計你唔使忍太耐。但現實生活中，好像上個月最後十日那種風浪，的確難忍。
　　
當然，揸長少少有些估計，你要自己諗諗啱唔啱，第一，係我估大市未係股災，而馬上爆股災的機會較細（比如只有一兩成），所以才應該忍，而非不問價去沽。第二，你個人財務狀況忍得到，唔等錢使。第三，即使咁不幸爆股災，你買的股票的生意唔至於受太致命的影響，例如國航（７５３），若有股災佢可能跌番落３元，但佢作為中國最主要的航空公司地位不變，生意也不致於有太大打擊。但例如國壽（２６２８），佢的人壽保險生意可能影響不大，但投資就可能有驚人虧損，所以兩間公司面對萬一出現的股災時，情況會不一樣，所以你也要分析一下自己所揸的股票，出現最壞情況時會點樣。作了理性分析之後，個人都會定啲。

陸羽仁

　　鼠年開始，祝願各位網友理性投資，鼠年大賺。
過年時和一個做生意的朋友傾偈，佢非常看淡後市，覺得美國會大衰退，香港和大陸都會受到很大影響，所以他做高檔消費品生意的策略是大減價促銷，賣得就賣，由於香港過年前後市道不差，他又減價，所以生意非常之好，但由於減價關係，利錢就唔係賺得咁深了。

聽完朋友講他做生意的策略，總覺得有點不對勁，表面看美國經濟的確有風險，若然大衰退的確會影響到香港，他講的理由似乎有道理，到底他的問題在那裏？回心一想，終於明白我的擔心，係因為他太瞓身。

我接著問他一個問題，如果美國唔係衰得咁交關，無出現股災，咁對你的生意有多大影響呢？他沉默片刻，答道：「我本來無想過這個問題，只覺得美國次按危機好大，但如果美國無股災，只係略為衰退，咁我就會好被動，因為我的策略是清貨，盡量唔補貨，等三、四月大跌市，如果大跌市我會食得好應，等跌完可以執平貨，但如果無大跌市，我基本上無貨可賣，就會錯過第二季開始的生意，而且到睇定個市無事才補貨，恐怕都要五、六月才可以再落單，那時訂貨又遲補貨又急，入貨價肯定貴，咁我今年全年計唔蝕都偷笑了。」

我就話：「我唔想太影響你的決定，因為美國的確有機會股災，大炒家索羅斯就日日唱淡，話美國會爆大鑊，所以你原來的決定有可能啱。我只係想講，今年環球金融市場非常波動，但美國睇市最叻的女股神科恩，命中率都只係得六成幾，所以人人睇市都可能唔中，當然包括我同你，所以要為自己留一條後路，投資自己的錯誤，萬一睇錯無咁傷。咁做等如買保險，要犯本，睇中會贏少啲，但萬一睇錯時保任自己死唔去，你都咁多身家，無謂太瞓身。記住呀，我叫你穩陣啲買吓保險，但係結果你睇中賺少咗唔好怪我呀。」

朋友都好精，馬上反問我一個問題：「如果我係睇好而唔係睇淡，如果我話美國無事，我會睇盡買貨睇好，咁又會點睇呢？」佢係測試緊我對大市的睇法。

我就答：「你都好精靈，識得咁問，如果你瞓身睇好，我估我都會同你講同一番話，叫你唔好去咁盡，以股票計，而家跌得比較多，恒指２３０００點，部份股票開始有吸納價值，但如果你要借到盡去買，我都會叫你留吓手，慎防睇錯，慎防美國萬一爆大鑊。」

對話就此結朿，我相信這個朋友仍然睇淡，但也會下番啲注做保險，例如訂番少少貨，或者唔沽咁盡，萬一市道唔係咁差時，可以有啲貨賣吓。

我估今年係大波動年，例如平常有一成機會大升，一成機會大跌，其餘八成機會是温和地升跌，今年恐怕有兩三成機會大升，亦有兩三成機會大跌，波動會好大，網友們可以睇好或睇淡，但我的一句忠告，唔去好得太盡，留一線好啲。

　陸羽仁

  　美股昨日略為反彈，道指在石油股帶動下升５７點，收報１２２４０點，日股開市，亦輕升５０點，不過港股走勢極弱，怕只是有反彈，難大升。
　　昨日見到港股成交唔多係咁插，中環茶友中的走勢派大搖其頭，話論走勢港股弱得好緊要，直情弱過美股。雖然話外圍其他股市都跌，但好多股市未放完假無市，港股在假期前已跌了１３００點，在假期後又跌８００幾點，夾埋跌了２０００點過外，２３０００點大關輕易失守，反彈完之後，短期後市都要睇低一線。
　　亦有茶友好陰謀咁睇，叫大家小心大戶動向，港股兩三次反彈上２５０００點上下，都未能企穩，好快又碌番落來，似派貨多過似打底，最怕上月大跌後等反彈的好倉，已經在２５０００點附近派得七七八八，若然係咁，呢個月後月都係易跌難升，升一日跌兩日，呢啲係退步市，唔係進步市。
　　論香港和外圍的重大消息，呢個月內也不利造好，美國下月中再議息，議息前個市會反覆向下走，直到真係確定會減息，通常都係議息前一兩個星期。另外本地銀行股會陸續公布業績，睇嚟都要為次按作更大撥備，金管局已經打開口牌，話本地銀行應該汲取外國銀行的教訓，外國銀行為次按撥備不足，就要不斷撥備，所以本地銀行應為次按作更深撥備，一步到位。
渣打集團(2888)[股價及相關新聞] 身先士卒，宣布旗下結構性投資工具（SIV）Whistlejacket的資產淨值已下降50%，其證券託管人BNY Corporate Trustee將指定接管人進行管理。渣打在晚上近１１點發布消息，那時倫敦仍未收市，結果渣打在倫敦股市下跌３％，都未算打擊太大。本地銀行如中銀香港（２３８８）都有次按，可能要作較大撥備，不可不防。

不過關注焦點還在匯豐（０００５），佢在下月初公布業績，只能假設佢無乜好嘢，因為若果佢唔為美國次按業績再作較大撥備，又會俾人隊撥備不足；若作重大撥備，自然不是好消息。英國人營運銀行不如美國那樣大刀闊斧，如果由美國人營運，可能已經換了兩次CEO，但匯豐的CEO紀勤仍然未郁，佢在任內爆鑊，雖說投資美國次按業務係前朝開始，但佢自然好難大刀闊斧落刀，但落刀唔夠狼，股價反覆跌，咁樣就會不斷俾投資者施壓。睇嚟匯豐一日未換管理層，無大刀闊斧出手，股價仍會處於弱勢。

所以在匯豐公布業績前一兩個星期，匯豐股價好可能繼續俾人插，到公司真係公布咗壞消息之後，短期壞消息出咗，反而股價會好番啲。匯豐佔恒指比重仍多，升跌左右大市，所以大笨象呢個月會係大市拖力，唔係拉力。

陸羽仁

　　         債券市場惡劣到離譜，惹起股神巴菲特出手執平貨，股神的巴郡公司提出建議，出５０億美元支持幾大債券保險公司非次按類債券的保險，並分享那些業務的權益，股神的建議惹起憧憬，美股顯著反彈。道指升１３３點，升到１２３７３點，升幅１．１％，但納斯達克指數受大陸最大搜尋公司百度可能盈利不前的消息影響，微跌０．０２點，收２３２０點。日股早段受美股刺激，升１５０點，看來港股會追隨反彈。


　　要明白股神搞邊科，首先要知道出問題的債券保險公司做乜，美國最大的債保公司MBIA Inc.及其較細的對手 Ambac Financial Group Inc等債保公司，合共為２．４萬億美元的債券提供保險。
MBIA在１９７４年開始為市政府債券提供保險，後來愈做愈大，業務擴展，它和對 Ambac 及 FGIC 等，做的保險生意慢慢超愈市政府債券，亦為一些打包債券CDO(collateralized debt obligations)提供保險，這些打包債券有次按證券的成分，結果債保公司也深深陷入次按風波中，次按債券大跌價，也大大拖累其他如市政府層面的債券，令債保公司被索償的風險大增。

市場開始擔心債保公司不能應付索償，他們將喪失AAA的評級，最大債保公司MBIA Inc股價.由去年至今跌了８０％，而Ambac更跌了８８％。如果兩大債保公司被降評級，他們的財政能力大大削弱，他們擔保的２．４萬億美元債券同樣會失去AAA的評級，那些市政府的醫院、學校發的債券失去AAA評級後，現在已發行了的債券會大跌價，將來只能以極高昻的利息去發債，整個債市會大混亂。

股神巴菲特就在這時出手，他是保險業的老行尊，他旗下的巴郡公司向主要債保公司提出建議，由巴郡出資５０億美元，承擔起總值８０００億美元的市政府級債券的風險，巴郡就向每間債保公司收取４５億美元的費用，若債保公司接受，等如巴郡出資５０億美元，就進佔３３％債券保險市場，分享市政府債券這塊風險較低的肥肉。但巴郡的建議不包括和次按有關的高風險債券。

從股神的角度，債保公司的業務包括高風險及低風險類別，但次按風波出現的金融風暴，也影響到低風險的市政府債券，他在這時出手，出資５０億美元，只擔保低風險的債券，既可活化債市，又可以小博大，輸哂輸５０億，贏可以進佔三分一個債保市場，而且仲係最好肉的部份。

從三間債保公司來說，巴菲特的建議如雞肋，因為接受要放走最好的肥肉生意，只餘會蝕入肉的次按債券保險生意，但不接受自己整間公司又有可能垮掉，接受又死，唔接受又死，已有一家債保公司表態不接受。

股神的建議，對我們有幾重意義，第一，他出手救債市，若成事可以舒解目前次按風暴最嚴重的危機，並活化債市。第二，行動對美股有利，起碼有人願意出招，美國陷入不見底衰退的機會減少。第三，股神是價值投資者，他在這時入市開餐，揀一些本質不壞、只是受市場氣氛影響而大平賣的投資，我們又可否偷偷師呢？

陸羽仁

註：情人節, 大家一齊浪漫下la.祝情人節快樂.


　　 　美股又升，今次受幾個消息帶動，道指升１７８點，升幅１．５％，升到１２５５２點，美股今次第三日上升，前兩日港股跟升乏力，每次升到６００點、７００點就回頭，結果得番２００、３００點升幅，睇吓今次有無新招。

　　美股再升有幾個因素，第一是一月零售數據出奇地理想，一月零售有0．3%增長，原來估要跌，而上月也跌0.4%，今次零售數字還有正數，主要受汽車、衣服和汽油的銷售帶動，零售數字上升舒緩了市場對衰退的憂慮。

　　不過早段公布零售數字時道指也只是升５０幾點，美股其實累積了一些樂趣觀情緒，才有後勁再升，最大的半導體生產商Applied Materials Inc急升，推動納指抽上，再加上油股如Exxon Mobil Corp又升，皆因商務部話油站加價不單沒有減少汽油銷售，銷售維持上升，有利油股。

　　美國信貸緊縮持續，不過股市卻有點樂觀空氣，市場又開始討論下月中聯儲要再減息的問題。美林有數據顯示聯儲局上月減息１．２５厘後，信貸市場並未舒緩，大型借貸仍然困難，公司借貸要付出的利息比以住還要高。有投資級別的美國公司債券收益率（等同利息）由１月２１日的２．２４厘，升至２月１２日的２．３７厘。而高風險、高收益的債券比國庫債券的利息溢價再升０．２５厘。美林的數據顯示大減息後信貸市場的利率未有降低，所以市場估計３月中聯儲局要再減息。

　　信貸緊縮持續，但消費市場企得住，股市氣氛向好，或許如聖路易聯邦儲備銀行主席William Poole 在周一所講，「現在賭美國可以避開衰退，是最佳的賭注」（ the best bet is the U.S. will avoid a recession）。所以好多自命睇得通個局的人，都開始入場下注，碧斯係一個，巴菲特係另一個。

　　昨日講到巴菲特的盛宴，網友Diskie問，「巴郡出資５０億美元，承擔起總值８０００億美元的市政府級債券的風險，巴郡就向每間債保公司收取４５億美元的費用，係唔係巴郡最多蝕5０億美元,但有機會贏三分一個債保市場 ??」

　　係，巴郡出價之低，低到你唔信。這就是股神的投資風格，他要投資內在價值遠高於價格的項目，還要控制風險，佢放５０億美元，輸哂就係咁多，贏可以有兩三倍的回報，而且一係唔贏，一贏一兩年就收成，而且佢一直做保險生意，咁樣可以借機變成市政府債券保險市場的大哥，有財力買起現在的市場霸主。

　　你問點解５０億美元可以擔保８０００億美元的債券，因為那些發債的市政府、醫院、學校都有穩定收入，償付利息和本金的能力其實好高，債券爛尾的機會不大，如果千份之一爛尾，只係要賠８億。而家債市除了次按債券之外，其餘主要是信心問題，過去買債券者，唔知這些發債機構有無因為次按投資大受損失，所以唔理好醜，現時都唔敢再買企業和市政府機構的債券，令到本來信用良好的機構都發唔到債，但這種信貸危機會死人，因為那些信用良好的公司和機構，過去長期靠定期發債取得運作資金，發債不成，資金鏈條斷開，就如銀行擠提一樣，可以把好公司、好機構夾死。

　　股神的雞肋建議，對市場的意義是：至少有人肯出價買嘢。一開始這種運作，市場的信心和活力可以慢慢恢復（早前的微軟收購雅虎建議也有類似作用），投資者就會慢慢入場了。
陸羽仁

　　　　美股升完三日，終於回落，聯儲局主席伯南克到國會講解美國經濟前景，透露美國信貸緊縮仍未改善，暗示下月１８日可能再減息，伯南克講話令市場擔心信貸緊縮的影響可能擴散到金融業以外，令上升已久的華爾街股市馬上回吐，特別是金融股跌幅較大，道指跌１７５點，跌幅１．４％，收報１２３７６點。日股早段跌２００點以上，差不多消耗了昨日升幅的一半。　
昨日是伯南克罕有地和財長保爾森和美國證監會主席Christopher Cox三巨頭一起出席參議院銀行委員會的聽證會，這是９１１事件以來的首次，可見他們亦很重視向國會解說美國面對的經濟問題。我地可以睇睇伯南克講咗乜嘢令美股下跌。

第一．        減息前景。伯南克話，聯儲局會適時採取行動，支持經濟增長，並提供保障，以對抗下跌風險。他更說，金融情況或信貸提供的惡化，肯定是一個警號，令我們需要進一步行動。美國一月損失的就業職位，以及樓價、股價下跌和能源價格上升，都會影響消費，聯儲局因而調低經濟增長的預期。

　　解讀：伯南克對短期經濟狀況、特別是信貸情況講得比較負面，令市場相信聯儲局在下月１８日有機會再減息０．５厘。
第二．        緊逼感略降。伯南克不再用１月發言時某些用語，例如「重大進一步行動」、「決策者要極之警覺及彈性」，顯露在聯儲局上月急急減息後，他認為危機沒有那麼大。

解讀：伯南克的語氣排除了３月１８日會期前再臨時減息的可能性。

第三．        信貸與經濟。伯南克話，提供信貸的利息成本愈來愈貴，信貨供應減少，皆約朿經濟增長。這幾個月經濟前景惡化了，經濟下滑的風險增加。但伯南克相信，上半年美國經濟增長雖弱，但仍是正數，他認為上半年是緩慢增長，但下半年當財政和貨幣政策的刺激顯現後，增長將會加快。

　　解讀：伯南克承認早前大減息後，信貨緊縮問題仍然存在，正如我們昨天引述美林的數據，信貸市場仍未舒緩，借錢難的問題未解決，商業債券市場仍然冰泠。但伯南克相信大減息和大救市的措施會有效，可以拉住美國經濟不致陷入衰退。

　　聽完伯南克的講話，可以作此總結，美國經濟危機未過，聯儲局會再減息，但伯南克相信可以頂住唔衰退。

　　一般而言，聽到伯南克暗示會再減息，美股應該反彈，但美股已經大力彈咗三日，所以今次不是借勢彈，而是借勢回吐。我估伯南克講話對香港有樓一族是好消息，若下月美國再減息半厘，香港應該會跟減０．２５厘，既減輕供樓負擔，對樓市亦有少少刺激。而股市就應該跟美股先回一回了。
陸羽仁

　　網友Bigcow問話匯豐（０００５）好抵，但會否再低？我估好多人係匯豐粉絲，早前講到匯豐都有好多人有反應，所以不妨再講吓。

　　過去一年，有個中環茶友經常提醒我，小心匯豐，佢在美國次按的業務係大炸彈，又脫唔到手，匯豐的英國董事會又唔夠大刀闊斧找管理層開刀，所以鬼佬大行對匯豐幾唔睇好，外資大戶要插大市時實搵匯豐來插，隨傳隨到，永無失拖。

　　所以我講匯豐時亦比較小心，對網友問起匯豐時都唔會答得太具體，由於網友的問題多數無講清楚自己係長線或短線，我最怕長線和短線的觀點混淆咗，亂答累死你。不過如今都可以講得具體啲，我認為短線買匯豐唔係幾買得過，你可能即刻有反應，話無理由匯豐無可能反彈，甚至大反彈？我並唔係話匯豐唔可能反彈，如今美國金融股如碧斯所言，有一個１０％、２０％的大反彈，匯豐一定會彈，但我的問題是如果美股彈，港股又彈，匯豐會唔會係最突出的股份呢？

　　香港恒指可以分成三大部份，匯豐佔其一，紅色巨股佔其一，地產股佔其一，三分天下，若美股彈，港股彈，匯豐彈，你估恒指彈唔彈，你估紅色巨股彈唔彈，你估地產股彈唔彈？你要我估，我估若匯豐反彈，恒指的反彈幅度唔會少過匯豐，即係買盈富基金（２８００）都會差唔多，甚至好啲。點解會好啲？如果紅色股或地產股反彈得仲勁，超越匯豐，咁盈富的升幅就會大過匯豐。從一個短炒的角度，匯豐是弱股，唔係唔會彈，雖然跌得多，但反彈未必會多過人。

　　若講短線，我其實睇好紅色巨股多啲，因為大陸A股已跌了一段時間，主要是年頭宏調和法人股解凍所致，雖然宏調措施都未出齊，但消息會慢慢消化，而解凍股唔似會在低位狂沽，所以大陸股市都係近底。唔好忘記仲有個港股直通車，呢個措施未死，要出亦可以好快出，而且多數係喺港股便宜時推出，所以紅色巨股好有條件短線跑贏匯豐，若唔識揀股，買匯豐不如買恒生H股基金（２８２８），兩隻去跑，我睇好２８２８多啲。

　　匯豐的問題是美國和歐洲業務，中線而言（講一兩年），頭頂有一把懸劍，就係美國次按危機的幅射未完，壞消息未充份反映，如我今天在頭條日報的專欄提到，美股可能有大反彈，但今年下半年怕佢彈完又嚟料，信用卡的壞帳潮又到，匯豐在美國的次按賣唔到，歐洲業務又怕被美國拖累，所以中線匯豐不能睇好，較好的情況是在大波幅內行走，股價在１００元至１３０元間走動，未有條件向上大突破此波幅太多，若較壞的情況出現，不能排除下半年會下穿波幅試底，買佢小心吃眼前虧。

　　若問好長線匯豐買唔買得過，我會覺得匯豐的基本管理資素良好，若在低位吸，揸五年以上，當係債券咁收息，或者有得諗，又舉一個例，以長線計，若唔買匯豐買恒生H股指數基金，就係買中國經濟仲有十幾年快速增長，紅色巨股的管理唔好，但高速增長可以填補管理缺陷，所以紅色巨股是高風險、高回報的股份。但如果匯豐賣掉美國次按業務，以其優良管理，則是低風險、中回報的股份，如何選擇要自己決定。

　　好多股民愛匯豐，是受佢過去長期高增長所影響，期望這種高增長可以再來，但我要話俾大家知，匯豐下跌前的兩三年的高增長期，主要是收購美國業務而來，但那個收購為她帶來大災難，她在那幾年中國生意（甚至是印度和俄羅斯這些新興地區）還是較便宜時，沒有大手落注，錯過了這個機會，想追都好難追，所以未來匯豐即使醫番好，也不是過去那隻又穩陣又高增長的匯豐了。
陸羽仁

昨晚歐洲股普遍造好，倫敦升２．７５％，法國升１．９％，德國升２％，但美股本在一個回吐氣氛中，無乜力水，結果道指跌２８點收場，收報１２３４８點。

網友mkm早兩日問過一個問題，值得大家參詳吓，佢問：「Luk Sir, 各位師兄師姐，最近在反省﹐究竟是自己EQ問題﹐IQ問題, 定係MQ(mud Q)問題﹐點解自己投資唔掂呢? 自己的組合由+20％變成-10%? 07年底我決定看多點書。首先多謝Luk Sir﹐介紹Hedgehogging。」

其他網友都有類似情況，有少少情緒低落，例如網友阿K話自己止蝕完之後組合輸３０％，要諗吓往後係月供、投資抑或投機。

買股票唔順，一定有問題，所以要搵出問題原因，我覺得原因好簡單，就係股市唔升。港股去年大部份時間十分好景，大部份時間走勢向上，自六月更開始抽升，中間雖有回吐，但回吐完好快又急升，簡直有唔買就笨的感覺。這是典型的大牛市型態。

散戶炒股，絕大多數係買股票，即係做好友，好友在一個牛市中，自然係如魚得水，如果炒得狼者，更會覺得自己係股神，全世界都唔及佢炒股咁叻，亦有好多人連工都唔想返，甚至辭埋職去炒股，覺得炒股好揾好多。我哋的網友太喪炒者較少，因為陸羽仁唔喜歡講冧巴，理論上太喪炒者唔會鐘意睇。但即使是投資者比較保守的網友，手揸股票，都會感覺良好。

換一個情況，好友遇上跌市，而且跌完無馬上彈番，你估感覺會點？就好似大家現在的感覺，感覺好差，因為投資開始變成負數，而且好似行入隊道一樣，未見到盡頭，開始有點唔自己在了。手上揸重貨者會心大心細，心上無貨者也不能再投入熱絡的股市炒過，自己心情唔愉快了。

今次跌市和去年３月和８月的跌市有點不同，那兩次跌市一跌完馬上就彈，唔使一兩個月股市已去番跌之前的高位，若頂得住無沽貨，坐完過山車無事又來過。但今次跌市自１１月開始，之後雖有反彈，但反彈完一浪比一浪低，而最近上月一浪急插，插完之後大市反彈亦唔太有力，現時更如我在頭條日報所講，營造一個波幅收窄的三角，氣氛沉悶而低壓。

這種市況有幾個原因，第一，美國次按危機的確好大鑊，股市向下炒易過向上炒，第二，基於炒作因素，以外資為主導的港股，去年８月、９月受港股自由行消息及內地資金沖亂了，升到近３２０００點的高位，到外資重新做主後，股市修正回復常態，所以先要有大調整。第三，內地宏調，經濟和股市向下，更令港股欲振乏力。

但陸羽仁對未來兩個月大市的看法，和碧斯睇美股的看法接近，大市短期還在尋底，近月尾結算更波動，但正蘊釀一浪較大的反彈，這浪可能由美股反彈帶起，可能因港股直通車這類消息帶起。相反地，短期內再恐慌性下跌的機會，正在逐漸減少中。

陸羽仁

昨晚美股起落不大，道指微跌１０點，而亞洲股市低開，主要是憂慮油價重上１００美元一桶會影響運成本及壓低公司盈利，但股市未致有太大波動。美元匯價亦回軟，兌日圓落番去１０８日圓以下，早上報１0７．８日圓。

　　大市好悶，細價股無聲無息炒起，吸引了大家的眼球，市場流傳細價股這次炒作由宏通集團（０９３１）復牌暴升引發，停牌逾１７個月的宏通本週一復牌，一開市股價馬上飆升，最高報０．５３元，最多急飆１３倍。後來略為回吐，昨日收０．４３元，仍然升到好勁。
　　　細價股炒作唔講基本因素，只講供求，從宏通炒作亦可見一斑，宏通是英特爾授權的主要中港代理之一，已公布的業績就真係唔係幾見得人，０６年全年蝕１．８億，核數師德勤對公司帳目有保留，主要針對一筆為數３６００萬元的存貨作的撥備是否合理，公司和核數師傾唔掂數，所以核數師有保留意見。而０７年上半宏通仍蝕１２０萬，簡單點講宏通已公布的業績並不賺錢。
宏通公告，停牌期間向主席兼控股股東簡志堅發行3.58億元零息可換股票據，主要用作抵銷債務，換股價僅0.0386元。若悉數兌換，宏通須發行92.8億新股,令簡氏的持股增由76%至96.5%，而簡氏已向獨立承配人配售1,600萬股，每股0.388元。另外公司指出,去年下半年透過增聘銷售經理，旗下貿易業務已逐漸改善，對前景樂觀。

宏通炒起起不是因為大家估佢業績好，而係貨源集中，大股東現時持股都有７６％，街貨有限。加上配股價高達０．３８８元，一見佢咁高價配股出街都有人接，就知唔簡單，自然易炒起。

宏通現在發行了２３．８億股，若加埋大股東持有的換股債可兌換的股份，未來總股數可能有１１６．６億股，以現時已發行的股數計，宏通總市值已有２３．８億，加埋可能換股的總股數，以現價計潛在市值有５０．７億。唔知宏通業績改善到乜地步，可以支持２３億、甚至５０億市值？

你可以話，大話最怕計數，也可以話，炒股唔睇數睇供求，兩個講法都啱，如果你買一隻炒味濃的股份，我計完一輪數，話佢唔值咁o既價，你無買，第二日再升五成，你第三日就會罷睇我寫的東西。所以我會分成「投機的我」與「投資的我」去講，睇完咁o既數，投資的我自然唔會吼，你地亦唔好問我這類型股票的基本因素，因為睇基本因素就唔應該買。但投機的我唔同，明知有局，落場玩吓，最緊要明白自己係「鱷口偷金」，偷到唔好食咁深，偷唔到唔對路都要閃，嚴守嚴守嚴守止蝕，係炒細價股最重要保命之道。

有些朋友話唔識分邊啲的股票有莊，邊的股票無莊，其實好易分，若價碼細或市值在１０億以下的股票，你去銀行睇吓股票機，若果買方和賣方都掛滿牌的話，九成九都有莊家活動，因為香港有千幾隻股票，若無莊家炒作的股票，即使基本因素良好，成交都好靜，買賣雙方的掛牌都有少，４、５倍PE的股票比比皆是，但亦由於無莊，這些股票長期都唔郁，或者一年只是兩次公布業績時會炒吓。但若細價股買賣雙方都掛滿牌，好熱鬧，就多數有莊家在「搭棚」，造出熱鬧的氣氛。炒這些股，自己執生。

陸羽仁

昨日港股跟住日股落，以為美國會死，但美股又無事，美股受惠於惠普業績理想及油股因油價大升而抽高，道指升９０點，升０．７％，升到１２４２７點。日股早段受美股上升及日圓回軟刺激，亦反彈了２００多點。

延續昨天講細價股的話題，昨日和經紀張傾起細價股，他身在市場，好多人話俾佢聽收到堅料呢隻有得炒，嗰隻有得炒，有些冧巴他也會跟吓，由於經紀張是穩陣之人，買得好少，而且有乜唔對路即走，我問佢賺多定蝕多，佢話成日想買到一隻細股可以升１０倍、８倍，可惜從未買中過，好多時賺１０％、２０％都會走，但有個別輸咗唔忿氣死揸，真係可以跌到得番啲渣。我再追問佢夾埋賺定蝕，佢話無計數，但估計加埋坐艇嗰啲，都係打個和。

經紀張身在市場，自己又識的「幫莊」（即莊家的外圍打手），炒細股炒上炒落，都係打個和，可見炒細股唔係眼睇咁易賺錢，所以你地「聽人講」炒細股賺幾多幾多，一定要過濾，好多散戶賺錢時大大聲認叻請埋親戚朋友食飯，輸錢暗啞底無人知，所以你聽到人炒細股搵到水，信住一半先啦。

我同經紀張講，你炒細股最大的問題，就係希望買中一隻股，賺１０倍，甚至１００倍，買１萬，賠１００萬，帶住呢個發達夢去漫遊股海，過程好開心，但結局可能好痛楚，經紀張勝在買得細，所以輸時亦輸得唔多。正如馬會宣傳今期六合彩頭獎６０００萬一樣，結果埋單搵最多錢個嗰係馬會，的確有人中６０００萬頭獎，但輸o既夾埋多過６０００萬好多。

我有一個搭順風車理論，細價股有如一架「夢想號巴士」，佢個牌寫o既總站通常都好吸引，專引細路仔上車，掛個牌去迪士尼樂園、去海洋公園、去睇金魚之類，總之呢期興玩乜嘢佢就話帶你去玩乜嘢，引到一大班小朋友開心上車，甚至見到小朋友傻得緊要，連終點站去邊都唔駛講，搵個大聲公吹水話「總之係好玩」，就滾到大班「好天真好傻」的小朋友上車（天真同傻就係細路仔的特微嘛）。

你睇潮流興礦業，就有一大堆礦業股，興木材就有好多木材股，再講早啲有賭業股，IT股，網股。當然１００件「朱義盛」假貨中，也有一兩件係珠珍，真係可以把生意由細做到大，不過多數人無咁幸運揀中真嘢，甚至真係真貨，但只值１萬元的珍珠鏈用５萬元賣俾你，你買中真貨一樣中招。當然最勁者就連概念都無，齋炒起個價來引你，但股民好天真，以眼見為真，見到成交價就信到十足，飛身撲入。

網友siusiudd話，「我知有好多師奶買細價股，貪細價股平，唔係隻股估值平，而係佢買股票的成本平，呢個真係一個好大o既認知錯誤，但你要解釋俾佢哋聽時，佢地仲要當你''發嗡瘋''。」Siuiudd講得好啱，細路仔上咗o架巴士玩得好高興之時，你要拉佢落車，你係爸爸媽媽佢都要同你死過，有理說不清。

但我話呢架夢想號巴士，最終到總站係要將全班細路拐走去賣。所以我同經紀張講，上唔上車，要考慮自己的定力，一般人定力唔夠，一玩個心就失哂控，唔識落車，就唔上車好過。但你自問定力夠，就當搭順風車，每架車搭一兩個站，幾開心都要落車，明知係賊車，就唔好想搭到尾去迪士尼樂園，我話如果１００架車有１架去到迪士尼，你博唔博呀？定係搭一兩個站玩吓就算？玩細價股只能跟一程走一轉，嚴守止蝕，走咗見到人發達，要恭喜佢，祝佢好運坐到去迪士尼呀。

陸羽仁