美股又插，皆因油庫存高令人擔經濟會跌衰退，加上一個製造業報告的數字差過預期，令道指大跌１４２點，跌番落１２２８４點，日股早段亦跌２００幾點，看來港股亦要再受壓。

延續細價股的話題，早兩日網友鳯陽花鼓問起，炒細價股會炒到幾時炒完，其實我真係唔識答，可以炒番一頭半個月，可以炒兩日就炒完，完全係好隨意，你買細價股只能自己執生。

你可能追問點解咁隨意呢？或者我可以咁樣去分析。股市內有幾十個莊家，有大有細，佢地幾時做嘢，除咗佢地自己知之外，其他人好難預先知，但通常（記住只是通常，唔係一定）一年都會炒番一轉大大地，炒完派貨搵番的使費，唔係人地今年邊有錢開銷。

個別細股會有自己的炒作計劃，通常係一些剛賣盤的新鮮貨，新老闆要炒番一轉，就比較大動作，又改名，又轉行，搞完炒到好高，總之動作多多。但市場上更多是一大堆半生不死的舊炒股，佢地通常都炒完高位派哂貨，跌到一個地底泥價錢，有些還在一轉、兩轉地供股收貨，也有一些已收夠貨，貨源已歸番邊，等候時機當無事再炒過。

炒細價股的時機，不能太差，也不能太好。股市氣氛太差，炒高都無人夠膽跟，炒來都無用。股市氣氛太好，巨股升得太勁，佢地啲窩輪幾十巴仙咁升，亦無散戶有興趣炒細股，去年８月後就係咁o既環境，傳出港股直通車的消息後，紅色巨股炒個不亦樂乎，亦無人有興趣炒細股，所以去年下半年細股完全無得炒。以如今的市況論，略嫌氣氛太差，不過是否無得炒，就要莊家自己先至知，佢地掃高股價後，好易睇到有無人跟，如果炒極都唔係有好多街外散戶跟，就知道氣候未到，炒來也無用。如何判斷市況，如何估計散戶的熱情，莊家自有睇市的專業知識。

前兩日由宏通暴升帶動細價股炒一炒的氣氛，情況可能係咁，又用夢想號巴士的例子來解釋一下，過去幾十架夢想號巴士都泊埋一邊，因為市面淡靜，細路仔都唔多一個，所以開巴士來都無用，不過突然有架巴士開車，仲大大聲叫細路上車，又唔知點解忽然湧出一班細路來搭車，其他巴士見人地咁好生意，心諗其實市況唔係想像咁差，於是亦唔執輸，也開架車試吓。

你問呢次架車幾時停，我答唔到你，除咗架架巴士都屬唔同公司有唔同開車手法之外，也要睇大圍氣氛如何，假如巴士打幾個圈都上唔到一兩個客，大圍氣氛好弱，巴士司機會覺得開車都無用，咁好快就會停車，唔係玩得好耐。

呢件事情相當吊詭，你以為關鍵時巴士司機點諗，想問佢幾時想停車，其實主角係你自己及一眾細路，停車與開車，主要睇細路多唔多，主要睇細路夠唔夠傻。你要有心理準備，若細路唔夠，每分鐘都可能會停車。

假設架車無停，你下一個問題係架巴士會開幾耐先至拐細路去賣？我亦都話同細路多少及大圍氣氛有關。市場靜的時候，開幾個站接到三幾個細路都收工啦，送去劏咗就算，就好似０５、０６年時，細股炒高幾成，就已經派貨派唔切，唔會炒得太顛去得太盡，司機怕開得太遠，好多細路叻到玩完就落車，去到尾站得番小貓三兩隻，佢就殺埋細路都唔夠找油錢條數；但去年頭炒到顛時，細價股炒高１０倍、８倍亦比比皆是。點解去年頭炒得咁勁，因為大市開始熱度高，細價股就搶先炒，正如有架夢想號巴士愈開上客愈多，唔止吸引到本地細路，亦有好多大陸細路過關來香港搭車，而且大陸細路更大膽，有得玩遠一遠都跟你去，死都唔落車，架夢想號巴士自然有咁遠開咁遠，盡量殺多啲客仔啦。

　　你睇得呢啲夢想號巴士多，你會好化，太陽之下無新事，但天真的小朋友卻源源不絕，一批被人拐走，又有另一批湧出來，都幾妙。坐幾個站識落車的細路，其實唔係咁多，否則呢啲夢想號巴士就唔會開到成行成市，而家高通脹，成本咁高，若然無辦法拐走大量細路，你估佢又會唔會開車俾你白玩呢？
陸羽仁

講開細價股炒作，網友們就講到股評人作為導遊領隊的問題，阿Sam的評論都幾值得深思。


阿Sam話，「我又舉一個例,引用陸sir的(夢想號巴士),分析員可作為導遊領隊,帶領小朋友上巴士遊玩.在眾多的導遊領隊中,總有一些好的導遊領隊能帶小朋友到總站迪士尼樂園、海洋公園遊玩.問題就是出在這裡.小朋友是天真的,咁好玩必引來另一大群好傻的小朋友上真正的夢想號巴士總站遊覽.既然總站已到達,理應勸他們下車,無謂再冒超高風險,帶他們上月球,火星.結果月球火星就去唔到. 一大群小朋友就送到維修廠房,眼光光看著巴士維修,進退不得。」

阿Sam呢個例子係講碧桂園（２００７），講導遊之前不妨講吓隻股票，碧桂園上市時只有０６年業績，純利１５．２億元人民幣（下同），若果這間公司未來維持一個溫利增長的業績，即使以２０倍市盈率計，市值也只值３００億，但碧桂園去年９月股價高峰期時市值超過２０００億，製造了一個神話。

碧桂園在去年９月公布中期業績，把公司的股價推上高峰，碧桂園０７年上半年實現銷售收入60.3億元，較去年同期增長48%﹔純利達14.2億元，同比大漲164.3%，淨利潤率為23.6%。內地傳媒將碧桂園和大陸地產股王萬科比較，去年上半年同期萬科銷售收入為110.1億元，較06年增長66.4%﹔純利為16.7億元，同比增長31.3%，淨利潤率約為15.2%。從銷售收入計，萬科仍比碧桂園大得多，但去年上半年萬科只比碧桂園賺多2.5億，顯示碧桂園的利錢深很多。

碧桂園公布的０７年上半年業績，已近０６年全年盈利，令人相信其０７年全年盈利將比上年倍增，股價一路急抽，當時有內地傳媒這樣形容，「截至9月4日收盤，碧桂園的市值約為2094億元，萬科的總市值約為2237億元。碧桂園在上市僅4個多月后，與行業標桿企業的差距進一步縮小了。」

我們看碧桂園這樣在四線縣城賣平價樓的公司，股價竟然追得上大陸龍頭地產公司萬科，覺得很不合理，但碧桂園當時既銷概念，又有炒供求的味道，它賣的營運概念是「低價快速銷售」，和萬科這種成熟地產公司的運作模式很不一樣，而碧桂園公布出巨額的中期盈利，令人相信這是大陸地產業高增長的模式。再者，碧桂園上市後，貨源比較集中，要炒起亦相當容易。

但你睇碧桂園股價，在９月２１日創了１４．１８元後，已開始回軟，到１０月底股市高峰，佢都上唔番高峰，最高上到１１月１日的１３．３２元，都破唔到高位。

如果講「導遊」的問題，見到隻股有得炒，叫人炒吓，本來無所謂，亦好難話到站就叫你落車，架夢想號巴士到咗海洋公園，都可能再去迪士尼，如果在很開心時叫人落車，佢繼續好開心咁開下去，聽咗你建議落車的細路可能會罵你。但到架巴士司機變臉後，你就真係要提醒啲細路要執生。論股價走勢，碧桂園在１１月初後急回，弱勢已成，要斬。其次大陸對地產宏調，特別針對搶了好多土儲的地產公司，碧桂園首當其衝，導遊見到唔對路，都要話一話俾班搭車的細路聽。陸羽仁記得在去年底叫人唔好掂大陸地產股，後來這批股反彈（碧桂園彈番上１０元樓上），我仲俾人鬧，覺得我唱衰佢地，但我當時諗，見到有危機，好醜都要提醒一下。

陸羽仁

　　美股昨日出現本月以來最大的反彈，道指急升１８９點，升上１２５７０點的水平，升幅１．５％，主要受評級公司標準普爾宣布維持最大債券保險公司MBIA Inc 的 AAA評級。消息令 MBIA Inc股價大升２０％，亦令一眾金融股急抽。 MBIA Inc及第二大債保公司Ambac Financial Group Inc合共擔保１．２萬億美元的債券，若兩大債保公司被大降評級，佢地擔保的債券大跌價，美國金融隨時陷入融化性的崩潰，如今MBIA Inc保住評級，金融界就有抖一啖大氣的感覺，雖然未到脫險，但都可以鬆一鬆。


　　MBIA Inc要保住評級，背後當然做咗大量工夫，大家應該記得，早前我寫的「巴菲特盛宴」，就係講股神巴菲特提出要出資５０億美元，吃掉債保公司最安全的市政府債券生意，而股神對和次按有關的CDO債券保險業務卻無興趣，當時股神已經話有一間債保公司拒絕他的建議，現在看來，請股神食檸檬的好可能就是MBIA Inc，因為佢自己如今提出一個類似的重組建議。
MBIA提出一籃子的方案，包括停止派息，並決定在未來六個月不再擔保那些備受質疑的資產扺押證券，又計劃在未來五年內將這些有問題的業務和穩健的市政府債券業務分離，MBIA的行政總裁Jay Brown又話，他對早前已公布的帳目有些問題，暗示資產的貼現價值估得過低。佢又話他們正在盡全力恢復公司的穩定，但估計未來一段日子仍會波動。

MBIA這一輪搞作，事先自然和評級機構標準普爾有緊密溝通，所以標普亦宣布不再檢討MBIA的AAA評級，但維持它在「負面觀察」，「不再檢討」意味著短期內標普無意降低 MBIA的評級，「維持負面觀察」意味著將來若再有檢討，郁動評級都是向下而非向上。標普又話第二大債保商Ambac Financial正在研究集資，所以會俾多點時間它避免降級。

兩大債保商仍未脫險，但獲得寶貴的抖氣機會，作出部署避免降級。有金融猛人對陸羽仁講，英國都將北石銀行國有化，但美國卻任由債保公司危機坐大，按理早早應該由國家負擔債保公司條數，就可以防止危機擴大，但執政共和黨內有核心人物極反對企業失敗由政府填數，所以政府遲遲不想行動，才拖出現在的危機，希望債保公司的集資自救及自我拆骨行動，可以重建市場信心。

美股大升，日股早段反應溫和，只升５０幾點，升幅０．４％，但大家唔好忘記，日股昨日升了４００幾點，所以今日唔升太多亦唔奇。港股昨日人升佢唔升，十分樣衰，其中一個原因是受大陸股市大跌影響，A股怕企業大集資，昨日大跌４％，但管理層出口術反對企業集資集得太狼，上海A股今日早段反彈２％。外圍氣氛改善，照計港股都會彈一彈。

陸羽仁

美國的消費者信心指數跌至五年低位，兼有信心危機，令美股早段下跌，但IBM公布１５０億美元的巨型回購股份計劃，顯示佢覺得自己股價跌得過份，消息刺了美股，加上商品價格高企有利商品股，道指收市升了１１４點，升幅０，９％，升至１２６８４點，美股仍在反彈情緒中，朝向１３０００點的目標進發，港股近期跟不上美股，到底係大陸股唔掂拖住，還是想壓住令期指低啲結算，睇埋呢兩日就知。

美元又跌，兌歐元跌到１．５的歷史低位，兌日圓是１０７．２日圓，日圓上升料會壓住日股表現。

近期港股力水唔太夠，搞到大家無心機，好好地討論問題也可以擦出火花，證明大家心情唔好，但市靜也正好是大家溫吓功課的時候，早前講到股評人是股海的「導遊」，網友們批評有些「導遊」不負責任，陸羽仁也可以講講做「導遊」的經驗與困難。

　　網友yy太提到以前買東寧輸清光，陸羽仁口痕痕話可惜當年唔識得大家，否則可以令大家輸少啲。就以東寧做一個例子，你當年問我，我要答你亦唔易，假設你在東寧剛起步炒時問我，我對隻股了解不深，多數會答你「隻股有炒味，若買入要嚴守止蝕」，這是我對炒股的標準答案，我唔會叫人唔買，阻人發達的事我唔會做，亦唔想做；你一般咁問我細價股炒唔炒得過，我會答「你無經驗少掂為妙，否則好易輸清」；但當你拿一個冧巴來問我時，我就會答「若買入要嚴守止蝕」這是個標準答案，否則若我叫你唔買，隻股可以由２仙升到２元，升１００倍都得，若我叫你唔好買，我會怪足我一兩年（第三年隻股多數散咗啦），俾你鬧兩年都無癮啦。

　　但你在細股炒到好高好顛狂時問我，特別你問我好唔好沽，我又會俾另一個答案，我會話「錢賺唔哂o既，唔沽哂都沽一半，收番啲本先啦。」當日東寧不及明珠興業炒得咁喪，記得明珠炒到最高時，成交量高過匯豐（０００５），那時匯豐通常是最大成交的股份，我有一陣子見到明珠成交大過匯豐，每日成交有４、５億元時，我記得自己睇住個大利是機同班老友講，明珠搞到成交大過匯豐，搞到咁離譜，又睇吓佢幾時爆煲，結果在半年內就玩完。有個老友本來揸重貨，仲覺得佢咁大成交證明好掂，但聽完我講驚起上來，沽咗三分一，就執番身彩，輸少當贏。

　　一隻炒股每日有４、５億成交，當然有９０％以上成交係人工造出來，係幕後人左手交右手的交易，佢地將成交造到咁大，無非想人相信，隻股炒到咁高物有所值，不過將一隻炒股作到咁大，就好似一個雜技表演員將十個橙不斷拋上半空，不斷拋不斷接，拋三個橙容易，拋十個橙自然玩唔得耐，遲早玩完。

　　我見到佢拋緊十個橙時，被人問起自然有信心叫你沽少少唔怕，我叫你沽一半攞番啲本，再升又沽吓，咁答法最穩陣，因為佢幾時死我講唔清，或者仲有半年玩，而且雞股死亡之前，住住炒到好顛，幾日再抽高一倍都得，引人落搭，殺埋最後一浸，若我今日叫你沽清，後日佢升咗一倍，你嗰種難過心情，不言而喻，忍唔住開口問候我兩句亦唔奇，我俾人問候就無癮啦。所以我好少公開叫人一股沽清，要清貨只能是自己的抉擇，關埋門對老友講話或者會坦白啲。所以如果時光倒流，大家又有緣網上相見，我知yy 太揸了東寧，若炒得顛時起碼會建議佢沽番一半，或許沽得太早，總之會有錢落袋。若果佢係高位摸頂揸，一見佢開始急跌，我一定會叫佢止蝕唔好手軟，過去無論大股細，大如中石油，細如利記，一見急回，我會叫大家立即斬，至少有番啲渣。

股海導遊唔易做，股市壯旺時，夢想號巴士一架架係咁開，傻仔一批批湧出來，當然有導遊食咗人家茶禮，專滾細路上車，但即使導遊係真心誠意，佢自己都未必睇得咁準，分得清好車與賊車，即使睇得準，細路仔又未必咁聽話呢！

我在跌市時講這些癈話，唔係想大家同情股海導遊的困難，而係想大家有一個立體思維，將來股市再炒起，炒到狂熱時，知所進退，這些話在跌市時可以講，在大升市時才講，大家就好難聽得入耳了。

陸羽仁

　　在預算案公布前，和幾個中環茶友傾起，今年預算案大派錢，個市會否因為預算案而狂炒？大家都覺得會炒吓，未至於狂，不能期望有太持續性的影響，即係話炒完一兩日地產股後，即使後市續升，主要都唔係因為預算案而炒；若股市要跌，預算案都托唔住。
網友白穗禮問：「陸羽仁話: "至於股市，不知從那年開始，愈來愈國際化，受預算案的影響較少，不能期望有太持續影響。"影響較少已經升6百幾點, 咁以前(maybe 十幾年前)公佈預算案前咪升得好勁?」

白穗禮講得啱，那些年代每年炒兩鑊重要政策文件，一個係財爺的預算案，一個係督爺施政報告，預算案和經濟關係大啲，可炒性亦高，施政報告多數和大政策有關，可以影響一個大行業的盛衰，所以會炒一些行業概念。但炒友主要的著眼點都係睇住樓市。

遠的不說，即使在九十年代，預算案對股市都好重要。當時的大股如匯豐，主要活動仍在香港（雖然已開始投資英國），香港經濟好，匯豐就升，左右大市。另外一大板塊是地產股，地產股本身佔恒指比重已大，加上匯豐和恒生等銀行股生意亦和樓市有很大相關，地產好，股市搶先炒起，地產唔好，股市亦帶頭回落。預算案通常會講到經濟前景，提到土地供應，甚至直接涉及樓市的評述，大家就猜度這些評述的微言大義，估計對樓市利好利淡，然後決定點樣炒。

記得樓價在９０年代初升得太顛，政府在９３年推出七成按揭等打擊炒樓措施，樓市回一回，但督爺肥彭後來年年大派錢大減稅，經濟好，市民收入多，政府又派水，自然利好樓市，結果樓市在９５年又炒過。

如果講到最經典的影響樓市政策，莫過於９７年董伯伯第一份施政報告，提出大量增加土地供應的八萬五措施，記得當年９月施政報告公布後，大家都唔信八萬五有效，唔知驚照炒，到１０月開始爆金融風暴，才漸漸聞到燶味。

今日預算案對股市的影響今非昔比，不是話股市唔會因為預算案升跌，而係話本地經濟對股市影響較少。如果十幾年前出一個昨天那樣大派４００幾億的預算案，股市可以因此炒番一兩個月，升一兩成都可以，因為大派錢利好本地經濟，已經可以成為今年的炒作主題。但如今港股無論恒指的成份或炒作的資金，已十分國際化，大股如匯豐，只有三分一業務在香港，香港好佢普通好；而一系列紅色股，更和本地經濟全無關係，所以預算案好而國企指數升６００幾點，按道理有點無厘頭，只是借勢炒作。所以預算案利好本地經濟，對股市的刺激唔係咁廣泛。

港股淡咗一排，預算案是事先張揚的好消息，借勢炒一炒唔出奇，但好難靠預算案長期炒。但不要誤會我話港股一定衰，又唔係咁講，而家港股主要睇外圍，美股仍在反彈中，大陸股市亦跌唔少隨時可以彈，若外圍好，港股亦可以跟彈，但同本地經濟關係唔太大。

陸羽仁

美股道指上周五大跌３１５點，亞洲股市全線報跌，日本仔股市特別腳軟，早段跌５１１點，跌幅３．７６％，又唔怪得日股跌咁多，美元急跌，日圓升至１０３．２的水平，你諗吓日本出口股掂唔掂，韓股跌得最厲害的也是如三星那樣的出口股。我本來估日圓呢一浪高位係１０３，點知一講就到，恐怕要再試高一些。

港股插就會插，但目前最大不穩定因素是匯豐(0005)今日將公布業績，英國泰晤士報報道，預期匯豐全年盈利約為240億美元(約1,872億港元)，即較上個財政年度同期的157.9億美元，大增82.1億美元或52%，遠高市場估計的介乎149至199億美元。但報道沒有披露數據來源。我估英國權威報紙報道匯豐消息，都有好接近匯豐的消息來源，若果泰晤士報唔係收到堅料，好易寫完即刻錯，應該唔敢寫；換一個角度講，接近匯豐人士放料俾泰晤士報亦好正常，這是他們祖家最權威的報紙，唔買好吓佢，出完業績俾佢隊就唔係幾好啦。

匯豐若有２４０億美元盈利，的確遠優於市場預期，餘下的問題是多少盈利來自非經常性項目，若很多來自非經常項目，就沒有持續性，只能看作為粉飾盈利的行動，利好股價的作用有限。若超乎估計盈利主要來自經常項目，如是者都好可能係亞洲業務，咁就真係比較利好。

不過泰晤士報講完匯豐業績之後，呢一兩日都係繼續講匯豐次按業務的問題，話匯豐內部己開始檢視出問題的美國銀行業務，而將會披露去年為次按業務撥備110億美元 (約858億港元)。

泰晤士報主要針對兩個問題，第一，匯豐如何處決有問題次按業務，第二，匯豐擁有幾多的美國「Alt-A按揭」（Alt-A mortgages是略低於優質按揭的貨款，貨款人或者沒有貸款歷史，或者收入低於優質按揭借款人，這種按揭證券在最近信貸緊縮時也大跌價）。

匯豐在五年前買入美國的HFC 業務，主要做次按，當時購入價１５０億美元（約１１７０億港元），但過去兩年為此業務的撥備已高過購入價。一直批評匯豐對次按處理不善的基金Knight Vinke話，匯豐進入美國次按市場係「災難性的策略錯誤」，若在去年六月次按風波沒有愈演愈烈時早早沽出這些業務，匯豐的股價可以高３２至４８港元。Knight Vinke提出四個方案叫匯豐殺掉美國次按業務。


Knight Vinke最主要的方案是叫匯豐把HFC 推入破產管理（receivership），因為匯豐買入 HFC時，沒有擔保其１５００億美元的債務，雖然這些債務呈現在匯豐的帳上，匯豐撒手不管，除了名譽受損外，她只損失了在HFC的投資及１５０億美元股東資款，但死頂下去的損失將遠大於此數。

第二個方案是叫HFC的債權人一起進行債務重組，將債權變股權，此後HFC變成匯豐的普通子公司，阿媽將不再作特殊財務承擔。第三個方案是匯豐注資１００到１５０億美元入HFC，或者取消其１５０億股東貸款，然後將之賣掉。第四個方案也是向HFC注資，然後分拆上市，將其股份派番俾匯豐股東，讓股東自己決定揸下去還是沽貨。Knight Vinke聲稱所有四個方案若果進行，都會令匯豐的一級資本上升１０％，成為環球銀行中資本最高者。

現時市場太怕次按，陸羽仁睇匯豐業務，不光看數字，也看它有無提出方案解決次按問題，若能壯士斷臂，就對股價有較大刺激，若然唔湯唔水，就要小心即使業績好也只是彈一彈，彈完又要跟大圍，慢慢再插過。但要匯豐承認五年前的投資完全錯誤，如今要引刀成一快，又談何容易。

另外市場也開始關心美國的「Alt-A按揭」，近期歐洲銀行公布業績時，披露的「Alt-A按揭」都出奇地高，要看匯豐這些生意有幾大，若然做得大，也不是好事。

我們睇匯豐業績，就係睇佢幾時見底，若然佢俾唔到個底市場睇，做事唔夠大刀闊斧，就唔能夠有太高期望。

陸羽仁

　　美股昨日急跌後又收復失地，聯儲局主席伯南克呼籲銀行削減房屋借貸人的欠款額，拖累金融股急挫，加上市場憂累經濟衰退影響油價，油股回軟，道指早段一度跌超過２００點，跌到１２０３０點左右，直逼１２０００點大關，不過尾段因為CNBC報導債保公司 Ambac Financial Group Inc.的拯救方案快有眉目，尾市大力反彈，結果道指只跌４５點，收報１２２１３點。美股雖然短期守住１２０００點，或再有反彈，但在聯儲局確認較大幅減息前，恐怕這幾日道指還要再試一試底。

　　伯南克建議銀行削減樓按貸款人欠款額的行動，相當頂癮，值得一書。伯南克昨日在佛羅里達州向銀行家發表演說時，警告美國樓市可能進一步下滑，他認為「政府和私人機構都要做點事，減少不必要的收樓，可以做多一點，必須做多一點．．．．削減房屋貸款人要償還的本金，保留一點資產給貸款人，可能是防止斷供和收樓的有效方法。」

　　伯南克的建議比過去美國政府提出的各種措施走前一大步，亦比聯儲局過去的看法「進取」很多，聯儲局２月２７日向眾議院提交的報告，也只是建議房貸機構採取審慎措施，例如改變按揭條款，延遲還款等，來幫助貸款人。但伯南克今次卻提出削減欠款本金的「激進」措施，被市場理解為聯儲局相信單靠貨幣和財政政策，仍然不能阻止樓市急促下滑，係一個幾負面的消息。

　　伯南克的建議，類似一般銀行對有破產危機的欠款人的「剃頭」削債行為。例如一間公司欠多間銀行總共１００億，現在週轉不靈，無法還款，銀行家和公司談判債務重組，最後同意削減債務，間公司本來資產６０億，欠債１００億，資產負值４０億，銀行同意集體將公司欠債由１００億降至５０億，間公司變番有１０億淨資產（６０億資產減５０億債務），銀行可以把削減的５０億欠債變成公司股份，它們變作股東，讓公司財務回復較健康的狀態，市場把這種削債行為稱為「剃頭」，債務好像頭髮一樣剪短了。

　　伯南克借用此邏輯，心想銀行借１００萬美金人地買樓，間樓跌到值５０萬，貸款人交低鎖匙去如黃鶴，銀行收樓拍賣之後仲要唔見５０萬，如果銀行削債３０萬，引到借貸人繼續捱下去，最後可能會蝕少啲。間間銀行都咁做，恢復對樓市的信心，仲可以有良性循環，防止樓價再下滑。

　　呢個道理表面看諗得通，但想落就有問題，假設目前美國有一成房貸人因為樓價跌唔起或唔想供，樓市再差一點有兩三成人係咁，這些樓按變成壞帳，當然對銀行影響好大。你話銀行願意「剃頭」，如果在一個實驗室的環境，本來唔還錢的人係X，剃頭政策出來之後也是X，新政策或者行得通，銀行咁樣會蝕少啲。但現實世界不是實驗室，人和政策互動，原來還唔到錢的人係X，新政策出來後，可能變成１０X，因為可以削債咁著數，自然人人都想削，你供得起樓無得削債，供唔起樓就有得削，自然引到個個人都唔供，供得起都馬上變哂供唔起，逼銀行削債，本來一成人唔供，立刻變到十成。假設銀行要削債三成，全體按揭總額馬上減三成，美國的銀行體系頂唔頂得順？如果削三成債之後，樓市仲再跌，房貸人又開始斷借，銀行又集體再削三成債呀？

　　伯南克係研究對抗衰退的專家，專研１９２９年中央銀行沒有及時放水加深了衰退。但這個專家實際掌舵對抗衰退時，就發覺衰退唔係眼睇咁易對付，所以腦筋急轉彎，就想出好有「創意」的方法，但這些建議是否可行，他似乎未想得透。
　　長期在市場打滾的美國財長保爾森，口徑和伯南克不太一致，他早一日接受訪問時，還在控制市場對樓價急跌的悲觀情緒，他認為擔心樓價跌低過按揭額的憂慮，「差不多過份了」，政府正在適當的事，並取得進展。保爾森話，有些借貸機構明顯見到把一些樓按的本金撇掉（不一定是剃頭，可能把財務處理），比收樓成本少一些；但「我的焦點」在借貸人如果願意繼續供樓，又遇上困難，走出去與人商量一下，去解決問題。以保爾森的講話推算，他只是建議借貸機構靈活地讓還借款人延遲還款，並自己作撥備，而非正式讓借貸人削債。

　　伯南克拋出這些不成熟的建議，予人一種藥石亂投的感覺，令人開始懷疑這個學者，到底有多少實戰經驗，到底對市場有多了解，若美國最後真採取他建議的剃頭措施，或者是無計可施，但結果難免大亂。
陸羽仁

美國股市企番穩，服務業數據OK，加上油價升上１０４美元，有利油股，道指收市升４５點，收１２２５４點。不過債保公司Ambac Financial Group Inc的集資計劃卻令人失望，市場本來期望它集資時可以拉美國啲大銀行落水，集資３０億美元，以補番在次按債券上的虧損，結果佢只公布集資１５億美元的計劃，少咗一半，不符市場預期，令人擔心它能否保住 AAA 的信貸評級，結果Ambac的股價昨日急跌１９％。

講番香港，昨日一批大公司公布業績，我想講吓港交所（０３８８），港交所昨天公布去年全年業績，由於去年下半年股市成交暢旺，純利錄得６１．７億元的破紀錄新高，增長１．５倍，較證券界預期為佳。港交所去年每股盈利５．７８元，以昨天收市價１４１元計算，市盈率降至２４．４倍。去年全年派息５．１９元，息率３．７厘。

港交所業績大升，主要受惠於去年大市成交急增，因為港交所有六成三的收益來自股市成交，去年股市的每天平均成交額為８８１億元，比對上一年升１．６倍，當中以去年１１月最為活躍，每天平均成交額達１３６１億元，港交所只是抽水都抽到笑。港交所另一大收入來源是新股上市，但去年集資總２６７９億元，按年下跌２０％，這也十分正常，因為０６年有中行（３９８８）和工行（１３９８）上市，去年就沒有這些超級巨股上場，集資額自然減少。不過由於大市成交急增，頂得順新股上市收入減少有餘。

好多人問睇完港交所業績，問買唔買得過。我又只能分開「投資的我」和「投機的我」來講。以「投資的我」計，港交所現價仍貴，現價市盈率２４倍，新加坡交易所市盈率只是１５倍。以港交所的主要收入來源睇，主要睇成交，今年頭兩個月大市成交下滑，平均每日成交遠不足１０００億，雖說這個數字仍比去年年頭為高，但去年港股成交是一個持平向上勢頭，但今年卻開始是一個向下走勢，能否扳回向上的走勢，無人說得清。若港股今年全年成交做不到去年平均每日８８１億的水平，大市氣氛相信幾差，亦唔好寄望新股上市收入會好，那麼港交所今年將不能維持去年６１．７億元的純利，增長倒退，自然不值２４倍的市盈率，盈利倒退加市盈率下降，股價還有不少向下空間。所以一切都要看香港大市今年旺唔旺，美國市道咁樣衰，大陸又有惡性通脹，誰可以寫包單今年香港股市一定長旺？

從「投資的我」角度考慮，要計清楚數，有相當大把握，先至好去投資，否則一動不如一靜。如果扮吓股神巴菲特，即使要買亞洲交易所股票，點解唔買平啲的新交所呢？

這裏就講到概念問題，港交所現價貴過新交所，２４倍市盈率對１５倍市盈率，當然唔可以話買港交所的人全部係傻仔，佢地係炒緊概念，主要有三個概念。第一，香港政府會再入市。去年政府在１５０元價位都買緊港交所，話明係策略投資，即係唔講回報，放眼於長線香港與內地的股市合作，政府現時持股略多於５％，做鹽唔咸做醋唔酸，應該要再增持，即使現價唔買，跌到１１０元、１２０元左右都有可能再買，所以港交所股價跌極有個譜。

第二，大陸概念始終有得炒。大陸交易所未上市，現時香港係最多大陸巨股流通的市場，所以港交所已經係一隻大陸交易所的「代替品」（Proxy），好似吸毒者無錢買白粉，食美沙酮頂癮一樣，好過無。再加上港交所成日唱住話想同大陸交易所合作，都會有少少憧憬。

第三，港股直通車的期望。直通車而家唔開，但無話無得開，去年８月講吓要開車，港股成交都大增，若真正通車，自然有得炒。

上述三個概念，你叫股神來計數，由於太多不確定因素，根本計唔到數，所以買唔落手。但從「投機的我」的角度，膽正命平，見到港交所插得深時去博吓，定好止蝕，又是另一個故事。唔好睇港交所咁大隻，你買入後唔知自己炒緊股，以為係投資者，唔對路時仍然去死揸，插下去就會好傷；但你知道自己炒緊股，用１元博佢３元，甚至睇定佢轉勢先至撲入去，又係另一個故仔了。

陸羽仁

　　  　美股繼續新一輪「挾減息」的循環，昨日在一連串壞消息中，在尾段急跌，道指大跌２１４點，跌１．８％，跌到１２０４０點，險守１２０００點大關，只是略高於１月下旬那次大跌市的收市價。以標普５００指數計，美股更已穿１月低位，標普５００指數跌２９點，跌幅２．２％，跌幅大於道指，收１３０４點，也是險守１３００點關口，不過收市價已是１８個月以來的新低。

　　美股尾段急跌恐怕和今日將公布的就業數字有關，市場憂累數字好差，所以早一日沽定先，美元亦因此大跌，在亞洲市兌歐元跌至１．５３水平，兌日圓跌至１０２．５。日股早段跌過４００點。

　　美國昨日的壞消息有一籮，債保公司Ambac Financial Group Inc前一日公布的１５億美元集資計劃，市場不滿集資額太少，公布當日股價已跌咗１９％，昨日再跌１５％。股神巴菲特提出的「豬頭骨」建議，Ambac唔接受，股神唱一唱衰退來臨，Ambac佢自己又提唔出好勁的自救方案，結果就搞到一身蟻，   　美股繼續新一輪「挾減息」的循環，昨日在一連串壞消息中，在尾段急跌，道指大跌２１４點，跌１．８％，跌到１２０４０點，險守１２０００點大關，只是略高於１月下旬那次大跌市的收市價。以標普５００指數計，美股更已穿１月低位，標普５００指數跌２９點，跌幅２．２％，跌幅大於道指，收１３０４點，也是險守１３００點關口，不過收市價已是１８個月以來的新低。

　　美股尾段急跌恐怕今日將公布的就業數字有關，市場憂累數字好差，所以早一日沽定先，美元亦因此大跌，在亞洲市兌歐元跌至１．５３水平，兌日圓跌至１０２．５。

　　美國昨日的壞消息有一籮，債保公司Ambac Financial Group Inc前一日公布的１５億美元集資計劃，市場不滿集資太少，公布當日股價跌咗１９％，昨日再跌１５％。股神巴菲特提出的豬骨建議Ambac唔接受，股神唱一唱衰退來臨，Ambac佢自己又提唔出好勁的自救方案，結果就搞到一身蟻，若再無新資金入，實會被降評級，唔知Ambac最後要唔要向全球首富投降。
美國昨日公布第４季最新的收樓數字佔房貸總數的０．８３％，遠比前一年的０．５４％為高，顯示樓市持續惡化。美國買樓借錢的利息繼續上升，由房貨公司房利美的３０年定息按揭債券比１０年期國庫債券的息差可以顯示出來，息差最近又拉闊了０．１１厘，比國庫券收益率高２．２７厘，是１９８６年以來最大的息差。息差高是風險溢價的反映，顯示市場對樓市有戒心。

　　這一切壞消息都指向本月１８日聯儲局的議息，現時債券期貨交易顯示，高達９６％的交易員相信聯儲局屆時會減息０．７５厘，餘下４％的相信會減０．５厘。高到９６％交易員相信會減到０．７５厘，看來減到此數的機會極大，估中無獎。大約兩個星期前，相信減０．７５厘的人仍然只有２％，你話世界可以變得幾快，一堆壞消息，股市插吓，又減多０．２５厘。再加上聯儲局主席伯南克連叫銀行「剃頭」都講得出口，顯示佢無乜計，大減息即使係帶來滯脹的毒丸，佢都要照吞。

　　不過即使美國減息０．７５厘，香港可以減幾多亦成疑問，減０．２５厘不成問題，可唔可以減到０．５厘就有問題，因為銀行在小額存款已減到差不多無息，大額存款都係唔夠１厘，銀行減得多，在貸款部份要減足，在存款部份減唔足（至少小額存款已減唔足），息差會收窄，即係叫銀行賺少啲，銀行當然唔願意，所以要佢地減０．７５厘可能性極低，減到０．５厘都要還神，美國減息益到香港無想像中咁多。

　　以美股計，再插多幾日試一試底，挾到確認減息０．７５厘，就可以定番，近減息日應該又炒吓減息炒股反彈。港股要跟美股行，近排當然要試一試底，等美股和美元定番啲再算。
陸羽仁

  　美股下滑，觸發好多網友問及美國經濟等問題，可以一併論述。
　　好多網友問陸羽仁，早前我講過美國出現股災的機會約兩成，現在是否維持這個看法。我可以再總結目前的睇法，美國經濟的發展一如所料，所以我維持美股再發生股災式急跌機會約兩成的看法，但對中國經濟的估計卻向下調整，這會影響到對港股的看法。

　　先說美國，好多人問美國是否經濟衰退，按美國自己的定義，連續兩季負增長就是衰退，而衰退亦有長衰退和短衰退，如果只是衰兩季就回復正增長，並一直向上，這種衰退沒有大問題，但若果是長期（如一年以上）都係負數，呢種衰退就會好大鑊。

　　目前大家都認為美國經濟第一季好可能係負增長，問題只是第二季的數字，如果退稅在５月推出，應有助於第二季的經濟。美國總統布殊講到出口，呼籲美國人收到退稅之後唔好儲蓄，唔好投資，要拿去消費，實行叫美國人消費救國。暫時估計，美國第二季好可能有番少少正增長，問題是退稅過後，再加上利息減到盡，美國經濟會否再衰過，如果第三季再衰過，美國就會進入一個較漫長的衰退。

　　以美股計，插完呢一轉，到本月１８日減息前後應有反彈，但反彈過後，到４、５月又跌過，因為４月開始又有第一季經濟的初步數字出來，加上公司的第一季業績又公布，衰數字接踵而出，股市當然無運行，屆時一跌無可避免，問題這是否「終極一跌」而矣。若美國在超低息、超弱美元下，經濟在第三季喘定，仍有正增長，美國經濟渡過了最危險的時期，那麼４、５月之一跌就是終極一跌，所以真正開估的時候，可能是下半年１０月看到第三季數字的時候。

　　美股跌係預咗，只怕佢急插，假設道指出現一日跌３０００點的急插，咁就全世界都有股災，暫時看成災的機會都係大約兩成，要睇４、５月出啲數有幾肉酸，以及當中有無大公司出事，如巨型債保公司、房貸機構或大銀行倒閉（小銀行頂唔順已是意料中事），突然爆煲，美國減息後又無招可出，那就是最脆弱的時候。網友Tom問美國會否如日本一樣長期低息，低通漲，低增長。如出現這種情況，即係美國跌完起唔番身，美國人極度大使，是全球經濟的火車頭，如果無咗這個火車頭，中國、印度、俄羅斯等國家又未崛起到取代美國經濟的地步，全球經濟增長勢將放慢，這就是一個美國長期衰退的惡劣狀況。

　　網友日安問，如果現在把人民幣升值及同時把港元與美元脫鈎，會否全世界都得益，因為人民幣升值下相對買入多些入口貨，可以改善美國赤字；至於港元脫鈎升值，香港人口袋裡的錢多了，可以買多些外國貨及投資或資產，促進環球經濟發展。

　　陸羽仁深明美元狂跌，港人睇住幣值貶值之痛，並要捱輸入性通脹之苦。但大家要記住，而家全球經濟仍然以美國為大阿哥，佢有病都係大阿哥，中國及其他國家，有排都唔追得上它，大家只係細美國二十歲的細細佬，只有美國影響我哋生死，我哋好難大力影響到美國。香港和美元脫鈎，港元幣值急升，我們可以享受一時升值之快，出去旅行賣嘢都平番，但跟住貨幣升值對出口、轉口和旅遊業的惡劣影響即刻殺到，香港本來乜嘢都貴，貨幣跟美國貶值，中和了東西貴的感覺，有助多種行業，若貨幣一升，貴價的問題浮現，乜生意都好難做。你去加拿大多倫多、溫哥華睇睇，而家唐餐館都好靜，因為貨幣升值，大量唐人回流香港消費去也，所以幣值問題，唔係一個面，有兩個面，要細心想。
　　人民幣就更加唔可以升值太急，因為中國經濟仍在增長期，有排未到成熟期。陸羽仁聽聞，美國係以反對台獨作為交換條件，逼中國繼續把人民幣升值，中國面對台灣選舉的變局，幾唔願意都好，都要順吓美國意，把人民幣不斷升值。政治相當複雜，特別係國際政治，通常同自己國家經濟利益掛鈎，所以亦有兩個面，要細心睇。

　　一句講哂，有日本八十年代日圓大升值的痛苦經驗在前，有辦你睇，大升值短期谷起一個大泡沫，日股升到３００００幾點，當年PE２００倍的大公司股票比比皆是，最後都是以爆泡收場，睇完日本的經驗就知，人民幣唔升值咁多，有佢的道理，中國人千祈唔好自大，要明白中國經濟相對於美國，仍然係好細，幣值一急升，相對於美國失卻競爭力，二十年都追唔到。八十年代美國經濟相對於日本都弱過，最記得我讀大學時有本書叫《Japan is No. 1》(日本第一)，美國人大讚日本仔威水，要學佢，結果日本威咗幾年，衰足二十幾年。

　　扯得遠了，明天續談大陸的經濟變局。