美國的世界充斥著壞消息，金融股因為憂慮經濟衰退會令盈利大幅倒退，帶頭下跌，道指跌１５３點，跌幅１．３％，跌至１１７４０點，是２００６年以來的新低。

　　美股的壞消息多的是，市場傳聞次按主要包銷商貝爾斯登週轉困難，搞到佢股價大跌。雷曼兄第宣布全球裁員５％，即１４００人，雖然節省了開支，但市場仍然當壞消息。巨型對沖基凱雷基金因為銀行追債，現金緊絀，傳聞要大沽股票補孖展。專作槓桿收購的百仕通基金宣佈第四季盈利跌８９％，因為信貸市場「溶化」，今年將缺資金作槓桿收購。在美股大跌及眾多壞消息影響下，今早亞洲市場尚算平靜，日股早段跌幅少於１００點，大家見美股連續三日急跌，似乎在等佢反彈，唔想跌太多。

　　我一直認為，港股主要受外圍帶動，或者可以講，外資大戶順著外圍股市的大勢來炒港股，而外圍主要跟美股，近年外資對大陸股市興趣愈來愈濃，所以大陸股市的走勢間接對港股亦有影響。要睇未來一兩個月股市走勢，主要睇美股，其次睇大陸股市，本地公司業績並無左右大市的作用。美股走勢暫時如早前所料，在減息潮中反覆向下，到４、５月減息招數用老，又遇上壞消息的高峰，唔能夠睇好，所以唯一未知的是大陸股市，而人大政協開會就是窺探今年大政策的好機會。

　　現時大陸樓市放緩，股市亦跌到近４０００點的中低位，大陸管理層可以視為宏調已經足夠，差唔多要停手；但換一個角度，又可以視為宏調未必能控制通脹，要維持大力度宏調。中央用何種角度看待目前的局勢，起碼決定了未來一兩個月內的短期政策，若認為宏調已夠，會利好股市；若認為宏調未夠，就利淡大市；兩會傳出領導人的訊息，係覺得宏調未夠，所以大市短期內仍是「有反彈，難大炒」。

　　你地可能唔知內地可以用幾大力去宏調，在一個專制制度，若有心做一件事，可以集中力量好快咁做。舉兩個例子你地就明，一個係銀行貸款，另一個係勞動法。

內地認定通脹的源頭是需求性的，主要是資金流竄搞到經濟過熱，所以要出大力去控制透過銀行體系流出的資金，去年大陸銀行股炒得熱火朝天時我都講過，大陸加吓息加吓存款準備金唔係咁大問題，但出到行政手段控制貸款，那就是來真料的時候。到去年底中央開始大力用行政手段控制貸款，到今年初，阿爺要將今年銀行貸款控制在去年的規模，並定出每季可借出金額的額度，銀行一借夠就要停手，唔可以再借錢出街，最誇張的是好多銀行今年第一季的額度，在今年新曆年第一日開工已用完，即係第一季餘下的日子，銀行無大錢可借，要等第二季有新額度才可以再借。

　　一個有搞大陸樓的香港發展商對我講，一間香港大銀行的阿頭事先提醒他，「今年大陸對借錢控制得好緊，若你要向我大陸的分行借錢，最好早三個月同我講，等我事先安排好，否則臨時通知我一定無錢借俾你，唔係我唔夠朋友，唔係你信用唔好，係我根本無額度可以借俾你，你要自己執生啦。」而大陸銀行的高層有好多老友，銀行高層事先通哂水俾老聽，叫哂佢地在每季第一日排定隊等借錢，所以才有第一日就借清的現象。

　　咁o既環境，第一個死就死靠借貸運作的內房公司及其他借重債的企業，第二個先至死銀行。靠借錢運作的內房股，若搵唔到新水源，就會乾塘，所以預計有一些實力不夠的內房公司，有倒閉的危機，國營公司可以靠阿爺最後支持，但民營企業就只能靠自己。而銀行有錢都無法借出街，盈利自然受影響，若這個政策持續，今年全年銀行貸款出街不可以多過去年，加上投資收益又比去年少，咁內銀股業績有會唔會倒退呢？

　　既然人大政協傳出管理層繼續宏調的訊息，唔可以寄望一兩個月內就變，所以大陸股市短期內仍然是「有反彈，無大升」的格局。
（明天續談勞動法等問題）
陸羽仁

  　美國聯儲局灌水救市，谷到美股道指大力反彈４１６點，升幅高達３．６％，回升至１２１５６點，是五年以來最大單日升幅，今日暫停講大陸經濟，先講講美國聯儲局如何救市。
聯儲局公開市場委員會開了特別會議，一致通過聯儲局借出２０００億美元，以每個月定期拍賣方式，讓主要的銀行和金融機構提出息價，直接向中央銀行借貸，聯儲局特別容許金融機構以AAA級的按揭證券抵押貸款，聯儲局同時和歐洲、英倫銀行、瑞士央行和加拿大央行商定類似計劃，各地央行向市場投放４５０億美元。

大家應該知道，次按危機令整個債券市場癱瘓，不止次按債券無人要，連其他優質的按揭證券及企業債券都無人要，出現所謂信貸緊縮的問題，人人唔敢借錢俾其他人，怕出現系統性危機時，幾好信用的借款人都還唔到錢。信貸不斷縮，就如黑洞一樣，把所有東西吸進去，有價值的投資產品都跌價跌不完。

聯儲局的措施就係想打斷這個惡性循環，你唔借我借，容許以優質按揭證券做借款抵押品，等如讓擁有大量優質按揭證券的金融機構，可以較易直接從央行那裏借到錢,唔使在銀行同業市場拆借。去年１２月聯儲局已推出大型的注資計劃，但效果有限，今次擴展到可以用按揭證券抵押，都算做比較大手筆。

聯儲局此舉等如間接買那些按揭證券，因為銀行以此抵押向央行借錢，它們還唔到錢時央行就擁有這些證券，等如聯儲局變相入市買按證。有市場人士話不如再直接一點，由聯儲局直接入市大量收購按證，不過聯儲局話咁樣就直接干預市場價格，不如用現在建議的方法。

　　救市方案一出，按證價格即升，最大按揭公司房利美擔保的按揭債券，相對於十年期美國國庫券的息差，由原來的２．２８厘，收窄到２．１２厘，而正常時期只有１．３８厘。

　　聯儲局的大救市措施降低市場對月中減息幅度的預期，從利率期貨市場交易顯示，現時只有２％交易者相信聯儲局會減息１厘，相信減０．７５厘的亦只有７６％，由早前差不多有１００％相信會減息０．７５厘或以上，下滑了２０多個百份點。不過綜合而言，減息０．７５厘的機會仍然相當大。這種局面對香港較有利，因為美國減息太多香港都跟唔到，聯儲局出其他招數若果有效，香港會更受惠。

　　美股早前上衝１２７０００點關口不破，幾日大跌了１０００點，如今在低位反彈，跌得多自然彈得多，要先看能否企穩在１２３００點樓上，若能企穩應再衝１２７００點。聯儲局救市加上美股大升，亞洲股市反應良好，日股早段升３００點，港股應有像樣反彈，先向２４０００點進發，但升近２５０００點時，阻力又到，港股短期應該是維持一個上落市格局，現時在谷底反彈中。

陸羽仁

美國聯儲局出招後，美股昨日反覆偏軟，道指早段曾上升超過百點，但後來因金融股走勢疲弱，道指跌４６點收場，收報１２１１０點，在大升４００點之後回吐幾十點，也在合理範圍之中。不過美元走勢仍弱，油價上過１１０美元的高位，日圓稍軟後又回頭，做番１０１．５的高位，顯示匯市信心仍然未定。日圓強日股跌，日股早段跌超過２００點，港股也有點回吐壓力。

不過講起市弱，大陸市場都幾弱，上證綜指昨日跌近４０００點大關，收報４０７０點，在多國央行聯手救市、全球股市大升之日，唯獨A股大跌，由於金融、地産兩大權重板塊的聯手下插，上證綜指又再試低位。

正如我在週一時所講，人大政協兩會透露出宏調不會放鬆的訊息，對內房股和內銀股是重大利淡訊號，加上２月通脹數字高企，令市場擔心好快又要加息，令大陸股市偏弱，美國唔得，大陸又唔得，香港兩大靠山都唔多掂，港股因而上升缺油，又係一種「有反彈，難大升」的格局。

其實今天開始，大陸宏調沒有鬆手，效果也初步浮現，雖然２月通脹數字因雪災而創８．７％的新高，但貨幣供應已見回落，反映貨幣流通量的2月末廣義貨幣餘額M2同比增長17.5％，增幅比上月末低1.5個百分點，比2007年末高0.7個百分點；M1同比增長19.2％，增幅分別比上月末和上年末低1.5和1.9個百分點。貨幣供應在減少中。

不過大陸領導層汲取了去年的教訓，改變了一點作風，今年宏調偏硬。通脹飊升影響民生，令大陸人生起懷念朱總理的心情，話朱鎔基當年宏調夠手硬，雖然股市無得炒，但起碼買嘢唔會貴。但如今溫總唔夠手硬，物價係咁升，搞到股市都跌，咁就無樣好了。出現這種情緒，乖乖不得了，唔控制通脹，做領導都無運行。

要控制通脹，除了要控制貨幣供應外，也要打擊需求的源頭，要控制地方政府以GDP為綱大搞建設的心理，控制樓市過熱令建築相關的物料如鋼材、水泥等生產原料大漲，控制低增值的加工出口業等等，總之GDP過高，這些東西唔搞好過搞。

以新勞動法實施令廣東１萬間加工廠可能倒閉為例，廠主嘈到拆天，陸羽仁一直觀察管理層會否讓步，過去的慣技是有反對就妥協一吓，暫緩執行或減輕力度，但今次卻寸步不讓，硬手執行。

新勞動法要僱主為臨時工交足勞動保障，好多工廠一直大量依靠臨時工方式減輕福利開支，如今全部要買勞保，一個等如一個臨時工加一倍人工，工廠自然頂唔順，廣東１萬間廠倒閉，對經濟的影響不言而喻，但大陸高官形容為陣痛，要頂過去，他們睇到新制的好處。第一，現時講「以民為本」，新勞動法保障工人，自可收買人心。第二，現時預計今年GDP增長為８％，實際隨時有１０％，這是扣減通脹的實質增長，加埋起碼４．８％的通脹，有近１５％的高速名義增長，自然唔怕工廠倒閉減慢一些增長。第三，大量加工業增加人民幣升值壓力，商務部部長陳德銘表示，自05年人民幣匯率改革至今，人民幣匯價已經上升超過16%，以中國外匯儲備平均１４０００億美元計（現時其實超過１５０００億美元），由８算以上跌下來，唔見１６％，等如唔見咗差不多１８０００億元人民幣，由於加工廠增值少，數額大，做成的外貿順差令美國逼人民幣升值，升值損失點收稅都補唔番。你諗吓一問廠出口１００元，老闆賺５至７元，但唔上市的工廠走稅走得好厲害，交唔到１元稅，但中國要為這些出口加工業承受很大的人民升值壓力，覺得唔化算。第四．廠佬賺錢之後，又在內地炒作，增大熱錢流動和通脹。

所以大陸引刀成一快，借勞動法殺一批工廠，香港人利用大陸廉價勞工廉價土地開廠賺錢的好日子，一去不復返。但一時間殺咁多廠，又會對原料等需求有短暫的壓抑，對相關行業不利。

簡單總結，內地一日未把通脹扯落來，仍會硬手宏調，以通脹慣性在年頭高慢慢落的走勢，大力宏調的日子，起碼還要維持一兩個月，股民又要捱了。

陸羽仁

　　美股風雲變幻，昨晚早段受凱雷風暴和亞洲股市暴跌影響，道指一度跌超過２００點，跌穿埋１１９００點，但後來評級機構標準普爾話次按的撥備接近尾聲，但投資者憧憬金融機構快將停止為次按撥備，美股反彈，結果道指收１２１４５點，倒升３５點，上下波幅２００多點。
　　日圓升破１００的大關口，見過９９點幾的高位後，日本官員紛紛出來出口術話關注日圓急升影響日本及全球經濟，絃外之音是再升時會出手干預，日圓也從高位稍稍回落，亞洲市早段去番１０１，日股亦反彈，早段升１２４點。
標普過去輕視了次按債券的危險性，希望佢今次唔係過早報喜，標普在報告中話，次按相關證的撥備將會升到２８５０億美元，高於佢自己兩月前估計的２６５０億美元，現時已被銀行等金融機構撥備並公布的數額有１５００億美元。不過彭博統計已公布的次按撥備有１８８０億美元，比標普數字高一點，若標普估計的撥備總數正確，尚有９７０億美元的撥備未公布。標普話呢一季仲有好多困難，但未來將沒有這麼多次按問題了。

到底這是災難的尾聲，這是另一個災難的開始，人在局中，不易看得清。凱雷資本這個大型基金爆煲，令人聯想到９８年的對沖基金長期資本爆鑊，兩者做交易的對象不同，方法亦有少少類似。

凱雷資本基金在２００６年成立，原有基金持有人出資加上市集資，共籌得６．７億美元本金，但它原本卻有高達２２０億美元的總資產，另外２１３億是從１２間債權銀行借回來，即係用１元本金，做３２元生意，槓桿大到嚇死人。凱雷之所以可以用這種超高槓桿的方式運作，主要因為它主要投資在美國兩大房貸機構房利美（Fannie Mae） 與房地美（Freddie Mac）所發行的有房產抵押擔保的債券，而這些債券都是AAA等級，又變相有政府擔保，傳統上被視為安全的投資，所以就贏得銀行的信任，借到盡俾佢。

凱雷用最大的借貸槓桿，投資在「最保險」的資產上，主要係賺息差，它收取那些按揭債券的利息，只要借貸利息比收取的債券利息低，就可以賺到息差。條數好易計，６．７億美元本金，借２１３億，如果可以賺到１厘息差，就１年賺２．１億美元，本金６．７億，有３０幾％的回報，即使只有０．５厘息差，都有１５％以上回報，雖知低風險投資有６％以上的回報已經算好好，若果有１５％，簡直係超人，股神巴菲特的巴郡都只係每年有大約２０％回報，你就知道尋求低高險、高於１０％回報的困難，但凱雷透過簡簡單單賺息差就做得到。

做得大基金阿頭，全部計數好叻，但市場風險有時高到令人意外，用一般數學模型計唔到，凱雷資本投資在房利美和房地美的低風險債券上，但次按風暴愈演愈烈，令到債市近乎停頓，不止企業債券賣唔去，即使低風險的債券也受到影響，投資者要買債券，都走去買美國國庫券就算，唔想買其他債券，即使係房利美、房地美的債券，都一樣跌價，債跌息升，意味著投資者要更求高的風險溢價（即係收高啲息），才願意買國庫券以外的低風險債券。兩個月前時房利美的債券相對十年期的美國國庫券息差只係１．３８厘（已比平靜時為高），但早幾日聯儲局放水救市方案出來之前，息差升至２．２８厘，救市方案出台後，息差亦只係收窄到２．１２厘，息差拉得咁闊，可見房利美債券價格跌得幾急。

房利美、房地美債券不斷跌價，銀行攞住呢啲債券抵押凱雷資本的巨額借貸，就不斷追孖展，上周五追凱雷４億美元孖展，凱雷資本的母公司凱雷集團諗過自己注資去救，凱雷集團的三位創始人康威（William E. Conway）、魯賓斯坦（David M. Rubenstein）和德艾聶羅（Daniel D. Aniello）共持有１５％凱雷資本股權，但凱雷資本的本金只有６億幾，凱雷幾個大股東佔股比例只得１５％，又值唔值得注咁多錢去救，若救佢主要係救凱雷的商譽，但無人知債市幾時好番，注完４億，衰起上來，過一個月又追４億孖展，點救？凱雷同銀行傾亦好難傾，因為凱雷的抵押品有價，銀行唔願削債，又唔願俾你拖遲，因為咁大間基金唔掂，最後條數亂起上來，有人偷錢走，銀行借出的債務，可能由現在唔見一成，將來變成無咗一半，所以銀行會覺得都係引刀成一快，比較安全。

９８年長期資本對沖基金爆煲，佢做的交易性質都和凱雷有少少類似，長期資本主要買俄羅斯的國家債券，又係大借貸，食息差，本來國債都比較安全，但在亞洲金融風暴影響下，俄羅斯貨幣幣值大跌，俄羅斯覺得跌到離譜，要還外債蝕到阿媽都唔認得，一怒又下宣佈暫停償付國債，長期資本手持的俄國國債那一刻變成垃圾債券，長期資本結果爆煲收場，這一役由於太多美國銀行中招，而且本金損失太大（凱雷的債權銀行能收回大部份本金，因為房利美的債券有價，當年的俄羅斯國債可能跌價跌到得番兩三成），當時的聯儲局主席格林斯潘拉埋所有銀行開會，最後等如大家注資令長期資本有一個和平結局，美國政府驚覺亞洲金融風暴燒到美國，入市干預，亦寫下亞洲金融風暴的完結篇章。

呢個故事教訓我們，任何投資都有風險，長期資本對沖基金的創辦人之一，就是權威的期權計價模式Black-Scholes Model創始人那個阿Scholes，阿 Scholes因此獲得諾貝爾獎，但他將理論用於實際時，結果孭鑊收場。有時出現系統問題，幾叻計數都無用。唯望凱雷事件就如長期資本事件那樣，預示一次風暴的終局。

陸羽仁

　　美國大病發作，聯儲局連番急救，上周五爆出第五大證券行貝爾斯登週轉不靈要聯儲局打救的消息，美股道指一度跌３００幾點，最後跌１９０幾點收場，美國政府諸公顯然想在今日亞洲市場開市前再急救，阻斷跌市的鏈條在亞洲再急促惡化，結果就出現JP摩根快速敲定以每股２美元的低價以換股方式全面收購貝爾斯登，以及聯儲局再開特別會議先減貼現率０．２５厘（央行借錢俾銀行的利率）。

　　聯儲局出位行動層出不窮，可知美國由次按導致的信貸危機正急劇深化，上周五聯儲局破天荒借錢俾貝爾斯登這間非銀行機構週轉後，惹來抨擊政府干預市場，但財長保爾森反駁話，決策者要做一切要做的事情，去防止金融市場動蕩損害經濟，「我們將穩定金融系統的要求，當作第一優先的焦點。」保爾森的講話，既證明了美國金融體系的穩定，正面臨嚴重挑戰，又顯示美國政府真係乜都做得出去托住大市不崩潰。

　　JP摩根入股貝爾斯登的交易，自然是由美國政府一力促成，如今JP摩根係以每股２美元的賤價收購，總作價２．７億美元（即２１億港元），呢個價錢賤過好多香港的大型莊家股。貝爾斯登上周五暴跌完仍是每股３０美元，上周四收市每股仲值５７美元，一年高位是１５９．３６美元，如今２美元的收購作價，係一個執笠價。

貝爾斯登的行政總裁 Alan Schwartz上任三、四個月，可說是短命CEO，佢係去年７月貝爾斯登旗下兩隻對沖基金出事後，新升上去的「救亡份子」，他在上星期初仍然話公司無事無事，信咗佢無沽貝爾斯登的股東，幾日內持股價值得番３０份１，股票之為物，就是如此虛幻，而且貝爾斯登股東換入JP摩根的股票後，即使死坐下去亦好難見家鄉，因為風暴過後，JP摩根股票亦好難升番３０倍（如果在貝爾斯登１年高位每股１５９元買入者，更加要升８０倍才見家鄉，可能呢一世都見唔到了）。不過貝爾斯登唔賣盤亦唔得，佢上週後期被客戶擠提，有１７０億美元資金被客戶拿走，而債權人亦不願意再向佢放貸，面臨嚴重的倒閉危險，所以不賤賣就是玩完。

貝爾斯登賣盤由政府一力促成，JP摩根指交易所需的融資由聯儲局提供，包括支持貝爾斯登的３００億美元「不太流動的資產」。

聯儲局的另一招是在會期間減貼現率０．２５厘，去年８月在亞洲股市大跌後，聯儲局亦曾特別開會減貼現率，今次是故技重施，估唔到仲有兩日聯儲局就開會，佢都等唔到，要在會期前先減貼現率。今次儲局唔止減息，並公布金融機構向央行貼現的新安排，包括借錢貼現期由３０日延長到９０日，並容許一系列銀行資產可以貼現。聯儲局此一安排，是以最方便、最便宜的方法，讓銀行獲得９０日的資金，以消除銀行同業間的緊張信貸狀況，即係叫銀行唔使驚，聯儲局好易借平錢俾大家，你夠膽放貸，就好易賺錢。

聯儲局臨時減貼現率的行動，令美元再急插，兌日圓曾見９６．５８圓，後略回軟至９７圓，兌歐元亦跌至１．５８水平，黃金則急升上１０２８美元。日圓急升日股中招，日經指數早段跌近４００點，跌幅３．１％，港股今日都係要受壓了。

陸羽仁

全球金融一團亂，美國投資銀行貝爾斯登出事，美元急跌，搞到各國貨幣亂和金融哂籠，英國銀行同業市場無人敢借錢出街，搞到英倫銀行要緊急放水舒緩同業市場緊張，英國已有北石銀行出事在前，銀行界怕整多單，累死自己，唔敢再借錢俾人。英國市場忖測英倫銀行要大力減息救市，英鎊急回，現價兌美元做１．９９８。

係亞洲市韓國貨幣都唔係好掂，韓睘今年以來急跌，至今已跌了９．５％，在美元急潮中，韓睘並不是如日圓那樣兌美元急升，因為市場擔心銀行會出問題，加上資金撤離韓國，所以韓睘急跌。韓國官員稱聲如果幣值再跌，政府會入市干預。

美元急跌後喘定，兌歐元和日圓保持平穩，市場亦傳聞歐盟國家短期內會開會，關注歐元急升的情況，會作出「口頭干預」咁話，歐元升幅亦受約朿。美元急跌之被，資金流入日圓和歐元區，既炒作日圓和歐元升值，亦避開混亂的美元市場，但韓睘和英鎊的走勢似乎是一個警示，美國經濟死到直，下一步就係累街坊，日圓和歐元升到最後一段，升幅會好急，會升到好精彩，一日升幾個巴仙都得，但最後又會升到爆，特別係日本經濟咁依賴出口，完全睇唔到日圓不斷急升，對日本經濟有何效益。

美國在急跌後昨晚終喘定，最後道指升２１點，收１１９７２點，唔好睇少呢２１點升幅，因為美股初段急跌，最多跌過１９４點，有好多製造業的壞消息公布，但最後都抽番上來，美股在升和跌之中，上落２７次，可知好淡爭持幾激烈。受美股和美元企穩的消息刺激，日股今日早段升１２０點。

今次以每股２美元的賤價收購貝爾斯登的摩根大通，成為最大贏家，股價上升１０％，升到４０．３美元。而貝爾斯登的股東就成為大輸家，貝爾斯登股價急跌８４％，跌到４．８１美元。

昨日同中環茶友講起貝爾斯登股東中重鎚的問題，大家最有興趣討論的是，為何他們在上周五股價急跌時唔跳車，上周四貝爾斯登股價還有５７美元，但上周五收市股價已插至３０美元，不過事後孔明去睇，這仍是一個高價，如果貝爾斯登股東在上周五跳了車，雖然輸大錢，如今還要劏雞還神，因為沽到個好價。

茶友話，人的心理就咁，見到隻股急跌４成幾，覺得跌咗好多，當時已宣布聯儲局借錢俾貝爾斯登頂住２８日的消息，股東就會從好處想，期望最後找到一個好買家，可以帶佢地出紅海。可惜最後的確找到一個好買家，但係咁急搵人，佢只係願意以一個奴隸價去收購，將班人帶出咗紅海後就送去做一世奴隸。

呢個故事教訓我們，遇上股份急插時，唔好只寄望佢好快翻身，反而應該做好跳車準備，若前景不明，止蝕係上策，貝爾斯登的情況係一個典型，佢o既股東上周五時都唔知最後有無人買、唔知人地會用乜價錢買，都係跳車為上策了。用我的口頭禪，唔走哂都走一半先啦，貝爾斯登的股東若以上周五收市價走一半，加埋昨日收市價，平均價仲有１７個幾美元，都執翻半身彩了。

股市風高浪急，買唔買股，賣唔賣股，首先考慮是要保住自己條命仔，輸咗唔好太傷身。

陸羽仁

　　美國聯儲局宣布減息０．７５厘，儲局減息加上高盛和雷曼等金融股的季度業績勝預期，美國急升，道指大升４２０點，升上１２３９２點，美元同時急促反彈，造出一個美國好番的格局。

　　美國今次減息有點玄機，一般講的利息是指銀行借貸的聯邦基金利率，今次由３厘減到２．２５厘，減息０．７５厘。另一個較少人提的是央行借錢俾銀行的貼現率，則由３．２５厘減到２．５厘，同樣減０．７５厘。減息０．７５厘，表面看不如市場期望可以減１厘，但減唔到１厘，亦顯示聯儲局有啲擔心減得太多會刺激通脹，同時亦想保留番少少利息水位，讓將來有事時可以有子彈再打。事實上聯儲局公開市場委員會也不是一致通過減息０．７５厘，有兩個委員投票反對，希望減得更少。

　　不過大家唔好忘記，上星期日聯儲局臨時開會，除了通過摩根大通收購貝爾斯登的建議外，亦同時宣布減貼現率０．２５厘，由３．５厘減到３．２５厘，若將這０．２５厘加埋昨天再減的０．７５厘，其實貼現率兩日內合共減了１厘，聯邦基金利率先至係減０．７５厘。聯儲局減多啲貼現率，係減低銀行向央行借錢的成本，令貼現率和聯邦基金利率的息差進一步拉窄到只高０．２５厘，即係話央行盡量開出方便又低息的渠道，鼓勵銀行有需要時向央行借錢，唔使大家驚借唔到錢，更唔敢借出去，令銀行同業市場更水緊。但銀行借錢出街的聯邦基金利率就唔減咁多，只減０．７５厘，顯示聯儲局救經濟之餘，的確怕通脹上得太快。

　　聯儲局的減息行動有助舒緩信貸市場的緊張，最大按揭公司房利美的３０年按揭債券收益率，比十年美國國庫券的息差，在減息後明顯收窄了０．２２厘，息差是１．７６厘，兩星期前高峰時息差衝上２２年高位，有２．３７厘，如今已回落了０．６１厘。

　　美元同時急升，在亞洲市兌日圓升上９９．９３圓，兌歐元升上１．５６６。不過美股的表現更誇張，道指升３．５％，標普５００指數更升４．２％。除了減息的消息外，高盛和雷曼至２月底的季度業績比預期好，亦帶動金融股大升。

　　高盛上一季純利跌到１５．１億美元，前一年同季是３２億美元，但這個數字已優於市場預期約２５％，因為市場原預計佢要作更大撥備，業績公布後，高盛股價大升２４．５７美元，升到１７５．５９美元，急升１６％。雷曼兄弟的情況更誇張，上季業績跌到純利４．９億美元，亦優於市場預期，市場早一日估做最多次按證券包銷的雷曼會步貝爾斯登後塵，出現財困，結果在周二股價大跌１９％，但昨日就急促反彈４６％，升到每股４６．４９美元，沽空雷曼者作了最差的賭博。

　　摩根士丹利出報告話，估計金融股「接近見底」，雖然信貸緊縮當前，銀行比較脆弱，而聯儲局減息只能部份地舒緩壞影響，但風險主要只是在股價中。

　　美股升得咁勁，投行出好業績「配合」央行減息，又有投行出報告唱好，早兩日還似世界末日，如今卻大合奏一片好境，只能理解美國政府和金融業蓄意要回復市場信心，大插之後，要先來一個大反彈，我都希望他們能夠成功。
陸羽仁

股市大浪淘沙，很多人的財富一朝清袋，貝爾斯登高級員工的下場，就是一個好例子。

貝爾斯登賤價每股２美元賣股，不但震驚華爾街，也震驚公司內的高級管理人員，據說貝爾斯登行政總裁施瓦茨在星期日晚，向自己公司高級員工通報售股安排，高管人員無不大驚失色，他們一直以為公司即使要賣盤，都會賣番三數十億美元，公司股價點都值番３０、４０美元，想不到只以２．４億美元總賤價出讓，每股只作價２美元，聽到當然面色都變埋。

據說貝爾斯登過去一直鼓勵員工持有自己公司股票，除了發購股權俾員工外，員工的部份花紅都係以發股份方式支付，所以員工持股比例高達公司股數的三分之一，有不少人持股價值超過千萬美元。如今貝爾斯登賤價賣盤，員工受雙重打擊，第一，股份輸入肉。員工所有購股權全數變廢紙，因為行使價太高，完全無行使價值。更慘的是過去拿的紅股，拿的時候交了３０幾％的稅，只今只剩下零頭，連稅都輸突哂，好多人一生積蓄就係揸貝爾斯登的股票，如今接近一無所有。

第二，好多員工會打爛飯碗。華爾街在次按風波中本來已經要大裁員，好多間大行都係裁一成、兩成咁裁人，貝爾斯登有１萬４千個員工，傳聞收購者摩根大通計劃把貝爾斯登一半員工裁走。成王敗寇，貝爾斯登落到咁既田地，員工歸入摩根大通旗下，就如降兵一樣，任人宰割。

　　在投資銀行打工本是天之嬌子，但貝爾斯登被裁出來的員工，頓變成一無所有，你話人生幾無常。大家炒股若不幸輸錢，仲有份工打吓，佢地連工都無埋，真係幾日間由天堂跌到落地獄。

　　另一個折翼天使，就係高盛女股神科恩（Abbey Cohen），佢曾經係預測美股最準的人，我也經常用佢舉例，話測市最準的科恩，命中率只有六成幾。高盛宣布，科恩將由高盛首席投資策略員，轉職為高級投資策略員，不再為高盛預測美股走勢。

　　科恩係好大，接佢手做高盛首席策略師的科斯廷（David Kostin）係淡友，他在本周一預期，標普５００指數將在短期內跌１０％至１１６０點，到年底前才升番上１３８０點。（美股暫時大反彈，周二美股在減息後急彈，標普５００指數升４．２％，升到１３３０點，科斯廷暫時未估中，但佢估的全年高位，和現價差唔多）。科斯廷估得啱唔啱仲要時間驗證，但科恩去年１２月預期今年標普５００指數會升到１６７５點，在一片淡市中睇好，就似乎離目標更遠，科恩在淡市維持好友本色，自然中招。

　　從女股神科恩失敗的例子，我們可以悟出一個道理，股市無股神，但在大牛市中，經常睇好者，好易「估中」，所以我們會在大牛市中會將一些大好友稱為股神，因為他們睇好的方向，和股市大趨勢吻合，股市跌幾跌又大升，佢地估錯都好易變番啱。但最難睇係轉勢，股神要經得起股市轉勢的考驗，如果佢地一味看好，好易中招。

　　高盛連全球代言人都換埋，預咗大市要再跌一排才會升，恐怕都預示了美股中短期的走勢。

後記：復活節假期網誌休業幾天，至下周二假後復工，假期大家可讀好書，可以享受好生活。

陸羽仁

　　   美股又來大反彈，摩根大通宣布大幅提高收購貝爾斯登的股價４倍，由每股２美元提高到１０美元，消息令市場憧憬金融股已見底，加上新屋銷售的數據出乎市場預計的理想，道指大升１８７點，升到１２５４８點的水平，日股今早早段亦升１５０多點。而美元就繼續走強，兌日圓上番１００．６９圓的水平，黃金就再插，造９１８美元一安士。
　　
香港放了一個長假，在放假前因為美股急跌，港股在上周四假前的最後一個交易日亦跌了７００幾點，當時美股（上周三收市）道指收１２０９９點，比對昨天收市價，道指在香港假期間共升了４４９點，累積升幅有３．７％。但大陸股市就唔太靚仔，上周四港股假前最後一個交易日，上證綜指收３８０４點，但昨天收３６２６點，累積跌跌１７８點，跌幅４．７％。又睇吓港股今日能否跟美國大反彈。

　　講番摩根大通提高貝爾斯登的收購價，當日兵臨城下，貝爾斯登管理層被逼接受２美元一股的恥辱價，之後就俾人鬧到七彩，話作價太低，亦有貝爾斯登的主要股東聲言要另外提出其他敵意收購的方案。其實唔止貝爾斯登管理層被逼做咗老襯，聯儲局亦係另一條水魚，因為佢借出３００億美元俾貝爾斯登作過渡資金，但低價收購者摩根大通卻一毫子唔使出，同樣被人鬧聯儲局老襯。
　　
今次的新方案照顧各方面的要求，首先係貸款方面，摩根大通自己先借１０億美元出來，然後聯儲局才借２９０億，輸錢時先輸摩根大通的１０億。而收購價亦由２美元升到１０美元，升咗４倍。消息一出，貝爾斯登股價應聲勁彈，由前收市價５．９８美元，急升到１１．２５美元，升幅高達８９％。
　　
其實摩根大通今次提升後的作價，比表面看升得仲多，上個收購方案貝爾斯登的總作價只有３．１億美元，今次提價後總作價是２４億美元，但貝爾斯登的股東只能拿到６０％，即１５億美元，其餘作價只是名義上的安排。摩根大通今次出招另一厲害之處，就是不再需要等貝爾斯登股東通過（主要透過貝爾斯登發新股的反向安排達成交易），所以這個交易方案穿了避彈衣，很大機會成為事實。
　　
摩根大通願意抬價收購貝爾斯登，又再令人憧憬最壞的情況已經過去，又好似見到隧道盡頭的亮光。

　　不過陸羽仁卻看到另一種危險，美股道指昨收１２５４８點，比低位反彈超過７５０點，記唔記得在摩根大通宣布收購貝爾斯登時，碧斯預測過道指可以反彈１０００點，而家仲差２５０點就可以到站，即係近１２８００點的水平。記得上次反彈都係去到這種水位就回頭，美股要再向上升穿１３０００點，可能暫時未夠力水。

　　美股反彈已不少，若港股今日再沒有像樣反彈，隨時美股反彈到尾聲，港股都彈唔起；到美股調頭回落時，也不見得港股的支持力特強，港股是龍是蟲，睇埋今日就知。
陸羽仁

美股對壞消息有少少抗跌力，昨日美國公布上新屋銷售數字創新低，加上消費信心指數跌到６４．５，創５年新低，而消費者信心六個展望更跌至４７．９，是１９７３年以來最低，但美股都跌唔落去，道指在上升和下跌之間起伏４０次，最後微跌１６點收場，收報１２５３２點。

　　我昨日早上講起，港股是龍是蟲，當日自有分曉，結果恒指大升１３５６點，期指仲升１６７９點，扭轉近日可憐的蟲相，不過我也不敢太快斷定大市是潛龍，期指臨近好算，好淡還有一鬥，得幾日市，想舞去一邊易過食菜。

　　股市瞬息萬變，可以在幾日內把你變成富翁，又可以在幾日內輸哂你副身家，貝爾斯登主要股東利維斯（Joe Lewis）的故事，都算夠戲劇性，一直想講講他買貝爾斯登的慘痛事件，見昨日有網友提起，今日就寫一寫。

　　利維斯在英國出生，７１歲，做外匯炒家起家，福布斯雜誌估計他有２５億美元身家。去年７月貝爾斯登旗下兩隻對沖基金出事，貝爾斯登股價急插，利維斯就在股價急跌時買入貝爾斯登股份，好快就買到佔貝爾斯登７％的股價，後來再增持到８％以上，平均入貨價１０３．８９美元。

　　貝爾斯登去年高峰時曾造１７１．５１美元一股，第一浪跌到１００美元邊，跌了四成，以這間華爾街第五大投資銀行計，呢個價錢都算大減價了，所以就吸引了利維斯入股。

　　結果大家都知，信貸危機反覆深化，摩根大通公布２美元一股賤價收購貝爾斯登後，貝爾斯登股價跌到４、５美元，利維斯的持股只得番一個零頭，他在貝爾斯登的投資損失高達１２億美元，等如佢唔見咗一半財產，即使如今摩根大通提高收購價到１０美元，令利維斯的幫助亦有限，仍然係一個零頭。

　　利維斯見摩通出２美元的恥辱價，大動肝火，公然反對摩通收購，他更和貝爾斯登前行政總裁James Cayne四出接觸私募基金和主權基金，希望它們可以提出更好的條件來收購貝爾斯登，但如今信貸緊縮，私募基金融資困難，加上貝爾斯登有棘手的次按資產，有水者也不敢貿然出手，利維斯和James Cayne徒嘆奈何。

如今摩通大幅提高收購價，更透過交易安排避開股東批准，看來利維斯反抗都無用，呢一舖俾人食硬。

利維斯都係識計數之人，但今舖仍然輸得好甘，輸錢唔緊要，連面都輸埋，入市撈底撈到一枝火棒，翻身機會極細，到底有乜經驗值得我哋學習呢？

第一．               人人都會睇錯市。利維斯在貝爾斯登１０３元時入市掃貨，顯然輕視了次按風暴帶來信貸緊縮的嚴重性，無估到風暴去到高潮時，大如貝爾斯登，都差不多要執笠。所以我哋瞓身買一隻股前，要問吓自己，如果睇錯市，死唔死得，買一隻股問吓如果佢執笠點算，買大市問吓如果大熊市來臨點算。

第二．               風險要分散。利維斯把一半身家賭在一隻股票內，而且不似和貝爾斯登管理層事先有默契，入股並不是做白武士，只是炒股，在街外掃貨等運到博反彈，似乎狼咗少少。若果利維斯把注碼分散，分別投在美國五大投行的股份上，虧損會少好多，雖然其他金融股當時無貝爾斯登跌得咁多，潛在回報亦少了，但較能控制風險。

第三．               撈底不易為。在大跌市中，要撈底不易，即使識計公司價值者，都會計錯數，而且股市永遠無合理價錢，股票唔係太平就係太貴，所以入市撈底時，最好小注、分注，再加分散投資，唔好一舖博命，唔係好易無命。

陸羽仁