美股彈咗三日咁耐，終於有像樣下跌，昨日因為銀行盈利前景欠佳，加上耐用品訂單超預期下跌，道指跌１０９點，跌幅０．９％，跌到１２４２２點。

花旗集團跌得最傷，昨日跌１．３７美元，跌幅５．９％，跌到２２．０５美元， 因為Oppenheimer & Co的Meredith Whitney將花旗的全年業績預測，由每股賺０．７５美元，減到蝕０．１５美元，皆因估計佢要為槓桿借貸和CDO再減值１３１億美元，估計花旗第一季的虧損將會大於早前估計的４倍，每股虧損１．１５美元，而早前只估計第一季虧損０．２８元。

　　美股銀行股第一季業績差已是意料中事，問題是市場有多大反應。受美股下跌影響，日股今早開市早段下跌１７１點，跌幅１．４％，又要睇吓港股今日究竟係跟美股插，還是頂得吓。

　　港股低迷，內地投資港股的QDII產品（合資格境內投資者機制的產品）開始跌到清盤線，民生銀行係第一個踩中地雷的機構，旗下投資香港的基金在上周因為跌到虧損50%的底線，被逼清盤，內地的「基民」欲哭無淚。

　　內地基民反應如此大，主要因為要清盤，若論跌幅，跌５０％雖然唔少，但若果內地基民唔係買QDII基金，走去買A股，好多都跌到５０％，內地稱之為「腰斬」（我估因為無咗一半，好似被人攔腰斬一刀咁樣），例如內地最大的中石油A股，去年１１月５日上市首日３４元人民幣，如今１８元，跌咗４７％，接近腰斬。

　　所以QDII最痛是有清盤的止蝕安排，輸到一半真係要斬，等如逼股民承認輸大錢的現實，而且斬了倉無得再望翻身，感覺差到極;不過斬倉有壞處亦有好處，斬了無咗希望，但斬了不用再跌，如果斬倉後遇上熊市，唔斬的話可能跌８成、９成，到時就會慶幸早早被人斬了倉啦。

　　民生銀行呢隻斬倉QDII，主要投資「霸菱香港中國基金」，呢隻基金主要在港投資大陸的地産及金融類股份，其實過去係皇牌基金，成績亮麗， 截至2007年7月31日，霸菱香港中國基金5年的累計回報爲509.9%，3年的累計回報爲298.3%，1年的累計回報爲127.7%，全部都超過100％增長，如今跌一半，即係跌番一年前的水位而矣。

　　所以內地股民買QDII，而那隻QDII又主要投資在香港的紅色股，其實和在內地買A股差唔得太遠，唔係投資在不同貨色，只是投資在兩地股市差價收窄上，如果A股和H股市道同樣咁好，而A股相對H股的溢價收窄，投資在這些QDII的基金就有著數，如現在大市下跌，而H股和A股的跌幅同步，投資在QDII和直接投資內地的股票沒有差別。

　　QDII基金輸到清盤，實質對港股影響不大，有的只是心理影響，因為無論是QDII也好，其他海外基金也好，投資港股都要輸，輸到咁上下就要斬貨，應付贖回，再輸得甘啲隨時要清盤，呢件事早已發生緊，所以港股呢一排跌得咁勁。QDII未成氣候，多佢地一個沽貨，都唔係特別多矣。
陸羽仁

　　  　 美股美元繼續跌，唔知呢一浪反彈係唔係已經玩完，雖然消費開支大於預期，但金融股和科技股的盈利估計會大幅放緩，砌低股市，道指收市跌１２０點，跌幅１％，收報１２３０２點。日股早段跌８３點，今日香港期指結算，估計今日大市還有支持力，過埋今日唔敢包。

　　美元的反彈勢頭亦不能持續，今個星期是２００６年１月以來美元最大跌幅的１週，今早美元兌歐羅跌到１．５８，兌日圓是９９．５３。市場估計美元兌歐元短期內會試１．６的新低位。美元持續走弱，正考驗美國以外六大工業國的耐性，相信美元再跌下去，只有美國自己唔想七大工業國入市支持美元匯價。
　　長和系主席李嘉誠昨天開業績記者會時，再度評論股市、樓市，他對股市仍係淡友，但對樓市係好友，值得大家研究吓。

　　過去幾個月，李超人睇淡美股港股，李四叔睇好港股，以目前計，李超人暫時領先，但港股跌到今天，他仍然睇淡，佢昨日咁樣講美股、港股：「以過去歷史以及今日的政治及經濟趨勢來看，今日在美國發生的次按問題不是一朝一夕可以解決，引來的問題頗多。過去十年，美國經濟平均增幅約為百分之三，但今年將低於這個數，而踏入第二季，美國經濟可能出現負增長。由於美國的購買力在全球相當大，樓市損害購買力，香港經濟會受影響。雖然香港以金融及服務業為主，出口美國比重較細，但美國旅客來港旅遊亦可能減少。」

被問及現在是否撈貨買股的時候，李超人話「不敢亂說，只可以說今日的恒生指數跟去年相比，仍高出一成半。基本因素方面，今日全世界經濟氣候，都較去年這個時候差．．．．總之，股票及市盈率太高都要好小心。至於內地股市，最重要是量力而為及市盈率不要太高，企業賺錢能力好，以及有能力派息很重要。」

　　李超人係撈底王，過去很多次在大跌市時成功撈底買平貨，例如八十年代收購加拿大赫斯基石油公司，都係好低位入市，但買入後都捱咗幾年。李超人的收購策略，不是不撈底，而是忍住不在跌市第一轉撈底，等到第三、四轉才撈，佢話港股而家基本因素比去年初差，但股價和去年初差不多，認為仲有得跌。聽完李超人的忠告，大家在近２３０００點都係唔撈好過撈。

　　李超人看淡港股，卻看好香港樓市，話美國樓價跌，但美國的樓市與香港完全不同，他看好香港樓市是因為香港政府是最大業主，要靠政府提供土地競投，如供應平衡，樓價很難跌。這是供求問題，現在香港的需求不少，例如首都兩千個單位涉及超過一百億元可在一日多時間內售罄，證明購買力依然存在。樓市不會太差，尤其在利息趨低的時候。

　　李超人是地產發展商，好少有睇淡樓市的時候。不過陸羽仁就覺得，若港股有再大跌之險，樓市好難大好，事實上最近一兩個月樓市軟番，和股市大插有關，對兩種市場看法比較近會合理一些，若對樓市看好，倒過來對港股看法不應太淡，可能估計港股還有一插，但插完下半年會好番。

　　無論如何，買股要順勢，李超人今年頭三個月估中，可能都會中多一、兩個月，近程睇淡少少無壞。
陸羽仁

　　
  　美國正醖釀金融大改革和拯救樓市兩大動作，美國財長保爾森將在香港時間今晚發表金融改革大計，預料會引發激辯，未知市場有何反應。

　　美聯社事先爆料，講述保爾森的改革大綱，主旨是擴大監管機構權力，以監管金融機構和日益複雜的金融衍生產品。美聯社指保爾森將建議擴大聯儲局權力去監管金融機構，特別是聯儲局提供借貸援助後，將有更大權力查核其帳目。另外又會合併證券和期貨市場的監管機構，成立超級監管機構。

　　不過保爾森的方案未公布，已受到抨擊，《紐約時報》報導，民主黨議員質疑保爾森的計劃不夠徹底，未有大力加強規範導致今次金融危機的禍根：投資銀行，民主黨國會領袖正在草擬法案，加強規管投資銀行推出「信貸違約掉期」等新衍生工具，民主黨將提出遠比保爾森主張為嚴的規管措施。

　　保爾森的大計若要實現，單是立法便要有好長時間，不是一時三刻可以實現，表面觀之，布殊政府雖然落任在即，但都想在任內收拾好次級按揭這個殘局，恢復市場的信心，並盡洗脫自己的汚名。現時信貸市場的緊縮，並不是資金不足，相反地由於聯儲局大力放水，資金來源充足，信貸緊縮的成因是信心不足，市場不相信這次危機能根本解決，所以金融機構未敢借錢出街，若政府提出新的監管方案，能令市場有信心金融體制能重上正常軌道，將有助恢復信心。

　　不過恐怕這只是布殊政府的一廂情願，對手民主黨正從一個陰謀的角度去理解整件事，質疑保爾森提出加強監管方案，實質上是消減外界對監管投資銀行的壓力，變相保護投行。

　　眾議院金融服務委員會主席、民主黨議員法蘭克（Barney Frank）爆料，話花旗集團前主席曾向他直言，銀行的競爭對手是投資銀行，由於投行獲准在較高負債、較低資本準備金的規範下營運，這令到花旗一類的商業銀行處於下風，導致他們要借助成立「結構投資工具」（SIV）這類不受銀行法規監管的子公司，迴避繁雜的規管限制，藉此出售按揭債券產品。所以民主黨就建議嚴格規管投行，要它們像一般商業銀行一樣，遵守同一套嚴格的資本準備金及查帳規則。看來保爾森提出改革後，又會翻出一場新的政治角力，所以未必對市場有正面作用。

　　另一個蠢蠢欲動的領域是美國政府如何救樓市，據《華盛頓郵報》報道，美國政府正釀醖支持樓市的方案，方向是要求銀行先為可能斷供的業主重組債務，削減他們的還款，以換取由政府擔保他們的貸款。

　　要求美國政府入市救樓市的呼聲愈來愈大，在聯儲局借出３００億美元支持貝爾斯登後，民主黨兩大總統候選人希拉莉和奧巴瑪都有批評，話用咁多錢去救投資銀行，不如用這些錢去救有困難的業主仲好。

　　《華盛頓郵報》披露救樓市方案的特點，不是銀行削債那部份，而是政府包底那部份，由於政府包底，舉例包底貸款額７成，即係話債券化了的貸款，跌價３成就會見底，因為餘款由政府包起，這樣可以加快為各種按揭證券尋底，但政府就等如間接干預了整個樓市，托住佢唔俾佢調整下去。

　　先不論這種方法是否社會主義，或者長遠有無效果，我關心的是成事機會有多大，若有一定機會，而金融機構又同意的話，一定會力促成事，若然如此，恐怕美市升完又會插吓，大家都知插低股市是減少救市方案阻力的最佳方法。


陸羽仁

　　  　美國財長保爾森公布改革金融監管的大計，一如事前所料，擴大聯儲局的權力，監管銀行以外的機構，可以向它們索取一切關乎金融穩定的資料，另外又合併證券及期貨兩個監管委員會，保爾森的建議雖有擴大聯儲局的監管權力，但實際上並無對投資銀行等機構設下太嚴的限制。

　　雖然各方對保爾森的建設諸多批評，又話佢無效，又話佢有排未立到法，但市場似乎比較受落，美股連跌４日後終於首次回升，受惠於油價下跌、商業活動增加及市場認為保爾森的大計有利防止金融危機，道指升番４６點，升０．４％，升到１２２６２點。陸羽仁開頭有少少擔心保爾森的計劃不受歡迎迎，會成為市場沽貨的借口，目前看來美股可能未反彈夠，所以不跌反升。日本股市早段上升１８３點。

　　商品及匯市仍然七國咁亂，美元又有少少反彈，油價又急挫，紐約期油每桶急跌３．８％至１０１．５８美元一桶，話有跡象顯示美國原油庫存將會增加，所以油價急跌。而黃金早一兩日仲做緊９３０幾美元一安士，如今又跌番去９１７美元。

雖然歐元略回到１．５７７的水平，但歐洲仍然鬼殺咁嘈，話歐元高企會影影響經濟，外匯交易員未來兩個幾禮拜將無覺好瞓，因為七大工業國將在４月１８日開會，信貸緊縮危機和美元急跌都係七大工業國會議的主要議題。美國大減息救市和美元急促弱化，搞到天下大亂，油價急升，全球通脹，跟著就是糧價急漲，再搞下去無錢的國家就會大量餓死人，這是美國制造出來的人禍。

歐洲國家會在七大工業國開會前一個星期，先開會統一立場。相信除了美國外，無一個國家希望美元如此弱勢，問題是七大工業國會唔會傾出具體措施挽救美元，如果結論只是表個態話希望美元強勢，咁就無料到，但若有具體措施，不排除美元有一輪反彈。

而家傳聞兩個方向，一個是七大工業聯手干預匯市，推番高美元，９０年代試過一次，搞到匯市天翻地覆，問題是美國想唔想咁做，如果佢仲想享受一段低美元的好處，以刺激出口和旅遊業，借此救一救美國疲弱的經濟，佢就會阻住地球轉，反對干預。

　　另一個方向是由歐洲央行和英倫銀行聯手減息救市，美國已注資７０００億美元進入市場，但如泥牛入海一樣，市場信心不足，信貸緊縮持續，美國再減息的空間有限，放水亦唔放得咁多，所以歐洲接力出招都好正常。如今英國的銀行盛傳英倫銀行和歐洲央行會聯手減息，此舉可以推番低歐元和英磅，問題是會刺激通脹，歐洲通脹數字高企，減息的阻力好大，不過要在幣值太高和通脹增加兩害之間取其一，歐洲可能會選擇通脹，因為幣值太高會帶來衰退，一觸發衰退，到時想救都救唔切。

　　不要以為外匯市場的波動，和股市無關，若七大工業國同意大規模的干預匯市，而行動又收到效果，對美國股市有利，因為市場憧憬美元見底時，就會有資金流入美國買美債和美股，因為美元已大幅貶值，計及貶值因素令美國資產變得吸引。不過如今講一切都言之過早，但的確要小心留意匯市變化，今個月仍然係大波動的月份。

陸羽仁

　　美股終於來一個像樣反彈，瑞銀公布首季大蝕９２８億港元，但佢後來宣佈集資１１５４億港元去充實資產，一直被傳有事的雷曼兄弟亦集資３１２億港元，佢地的集資惹起市場憧憬金融公司撇帳集資已到底部，觸發股市大升。

　　道指升３９１點，升幅３．２％，升到１２６５４點，升幅係７０年以來第二季開始的最大升幅。而歐洲股市亦向好，瑞銀升了１２．３％，是兩星期內最大升幅，但過去１２月瑞銀已經跌咗５５％。

　　正如我在頭條日報專欄所講，港股昨日走勢古惑，下午一插震走散戶，似乎大戶已預知美股的大反彈，震走你自己食，這裏就牽涉到我想講的「相反訊息」。

　　上週五期指結算日，出現一個美股跌港股唔跌的現象，當天早上網友牛腩貓咪好激動，一開市就話無理由港股唔跌，港股一定跌，後來我覆咗佢一段說話：「你上週五有一句話違反了你平常相信的信念，你早上開市時話無理由美股跌港股會升，你平常相信『一切盡在報價單中』，所以我認為你唔應該話『一定』，亦唔應該話『無理由』，出現這些無理由的事情，本身已是重大提示，要特別留意，其實在結算前一日已試過美國跌港股升，上週四市前美股跌１０９點，但當日港股不跌反升４７點，當時已是第一個提示，港股短期和美股背馳，到上週五係第二次背馳，當佢第一次『無理由』地升時，你跟佢走，可以追番１０００點番來，要從這些事件中學習。」

　　希望牛腩貓咪唔好介意我攞佢做例子，在他身上發生的事，在我年青時亦試過好多次，我交咗好多學費才學到嘢，例如明明自己好叻估中美股走勢，早一日買咗港股，早上睇新聞見到自己估中，美股如預期大升２００點，到港股開市坐定定等食糊，以為會升５００點、６００點，點知升得３００幾點就回，當時自己會好慶，大叫有無搞錯，跟住會作好多解釋出來，話淡友好離譜，自己睇錯美股，就壓住港股大市唔俾佢升。人在好慶的時候，會做好慶的行動，我認為大戶壓住住大市，我就買多啲，睇你壓得幾耐，結果自然好悲涼，港股和美股背馳，人升佢唔升，到人跌之時，佢跌得仲勁，我唔信鏡，就輸多好多錢。

　　後來我大個啲，就發現唔會只係自己咁叻估到美股，外資大戶點會估唔到，但美股大升而港股跟唔足時，就係大戶借好消息派貨時，所以一開始升唔夠，預示未來會跌更多。背後的道理好簡單，當好消息出現時，正常是上升，若果唔升，或升唔夠，即係有人沽貨，和牌面走勢做相反事情的通常係大戶，大戶沽貨，散戶接貨，就預示大市向下，反之亦然。

　　呢個大市在上周期指結算前一兩天已經是美股跌港股唔跌，到期指結算日更明顯，已經是超過一次出現相反訊息，就預示大市會向上。上周五要問的問題是，究意大戶只要是推高期指結算，還是結算後還要走一段，當天行情已有答案，若只是頂結算，頂到３點已可以放軟少少手腳，那麼下月期指就會低過即月結算的期指，但當天下午愈升愈有，就預示反彈浪未完，結果收市下月期指比即月結算期指高３００點，顯示睇好的人好多，不單睇到結算，否則不應花咁重彈藥買重下月期指。

　　還有是睇大陸市的相反走勢，A股暴跌，但H股背馳，這還不止，連A５０基金（２８２３）都有少少跟唔足大陸市跌幅，即係話外資睇大陸市好過大陸人，外資唔係傻仔，係睇到外圍在反彈中，認為大陸市跌到咁上下，應該受外圍氣氛影響而反彈。

　　用同樣的相反理論，美股昨日升３９１點，港股今日唔升１０００點都要升８００點，有這些升幅，才叫正常，假如只升４００點，你就要小心，大戶可能好短癮，已在派貨，如果升得正常，後面還有空間再上。

　　唔好信自己，信市場，市場會告訴你，呢一浪反彈有無力，會幾快完。正常走勢是月頭彈，月中回，月尾再上，但月頭去到邊，月中回得幾深，將有助大家判斷大市見底未。
陸羽仁

　　　　美股反彈兩日後回軟，聯儲局主席伯南克講話，預告美國上半年經濟可能收縮，不過市場反應尚算溫和，道指一度跌９０幾點，最後跌４５點收場，跌幅０．４％，在升完３９１點的第二日回吐４５點，暫時唔算多。日股早段亦只是微跌。
　　美國公布的數據時好時壞，但伯南克的估計比較權威，他出席眾議院經濟委員會時認為，美國上半年新屋銷售、就業和消費都會惡化，所以上半年經濟可能下沉，「現在看來上半年的GDP可能不會增長太多，甚至可能輕微衰退。」伯南克又解釋聯儲局如不借錢救貝爾斯登，佢就會申請清盤，但伯南克估計無第二間投資銀行會出事要聯儲局再去救。
美國去年第四季GDP增長０．６％，而分析員估計第一季增長將下降至０．２％，不過伯南克話可能上半年可能輕微收縮，令人壞疑第一季可能係負數，或許他是先行放風，讓市場消化壞消息。

國際貨幣基金會同樣調低美國今年經濟增長預測，由原先在１月時估計全年增長１．５％，調低到只有０．５％增長。由國際貨幣基金會的估計推算，它可能預想美國上半年是經濟收縮，若上半年收縮０．５％，下年增長１％，平均就是０．５％的增長幅。國際貨幣基金會更估計有２５％機會出現全球性衰退。

昨日講到相反訊息，提到早排美股跌港股唔跌的例子，其實睇得宏觀啲，美國出現壞消息，但市場反應唔太壞，也可以視為一種相反訊息，顯示市場氣氛在改善中。如果在上月水深火熱的日子，伯南克話美國經濟上半年可能收縮，國際貨幣基金會又大幅調美國經濟增長預測，美股跌１００點唔算多，跌２００點唔出奇，但昨日美股反應溫和，這就是一種相反訊號，顯示市場恐慌情緒正在減退，對壞消息唔至於有過激反應。

再看利率期貨市場的情況，聯儲局本月底再議息，按利率期貨的成交價推算，前一日仲有２４％的交易員估計會減息０．５厘，昨日卻跌到只有１２％人相信會減咁多，大家唔好忘記，在美股早一日大升３９１點之前，仲有５成幾人相信會減０．５厘，如今顯示市場信心在改善中，大部份人相信只會減０．２５厘。即使伯南克對經濟增長吹淡風，都無人信月底需要大減息。（當然不能排除啲大阿哥會再插吓個市逼聯儲局減多啲）

見到呢種情況，一般評論家會媽媽聲，話美國佬講哂，同一種訊息，話佢壞又得，話唔係好壞亦得。這是一種情緒反應，但冷靜一想，另一個解讀係市場開始對壞消息表露抗跌力，係跌市中的一種相反訊號，顯示股市可能慢慢見底。

話美股快將見底，係一種假設，這種假設需要驗證，亦唔等如話佢未來唔會跌。而驗證的方法，正正係等佢跌既時候再睇吓，例如等第一季GDP數字出籠，看市場有何反應，假設數字係差，但市場反應不大，跌得唔多，就係進一步的相反訊息，確認了快將見底的假設。假如情況不是如此，屆時美股又插得好深，就等如否定假設，一切要從新觀察。

你聽完我講，就會明白分析市場係一個動態過程，既不要盲信自己早一兩個月前的對股市點數的估計，亦要不時收集市場和消息的互動消息，引證假設。觀察市況買股不用快人太多，快人一兩日，富貴萬千年。

陸羽仁

後記：明天清明假期，小休一天，下星期再見。

　　今日在頭條日報講到炒股專家的「獨得之秘」，其實人人炒股都有些心得，問題是這些心得能唔能經得起時間考驗，你用這些心得炒股，係贏多定係輸多。

　　最多人用的炒股方法是「聽貼士炒股」，你唔好話呢種方法唔得，在股市是大牛市時，一直反覆向上，你肯買都會贏，加上所有貼士股都向上炒，所以在牛市時呢種方法看來好得，但自從去年１１月大市開始向下調整時，散戶就會發覺「聽貼士炒股」開始唔得，買得大輸得大。所以任何炒股方式，都要經得起時間考驗，唔係試一次OK，就可以瞓身落去，唔係炒幾個月股搵到錢之人，就係股神。炒股的方法要試過旺市得，淡市又得，才是好方法。

　　撞彩都有一半機會中，股市唔係升就係跌，而家唔同以前，以前只可以買好的一方，唔可以買淡的一方，而家有好多買淡的工具，買好買淡都很容易，所以睇好睇淡都有接近一半機會睇中（因為仲有第三個可能係「唔郁」，唔郁的市況會消耗衍生工具的時間值；若你買股票而不是衍生工具，揸住唔郁就沒有時間值的耗損，只會損失放同樣一筆錢入銀行收息的機會成本，不過為簡化討論，暫時唔講「唔郁」的市況），你可以放飛鏢掟埋個靶度，睇吓去掟中好的一方抑或淡的一方，就可以獲得一個接近一半命中率的意見。

　　假如你睇中睇錯機會各有一半，有１００元本金，睇錯市時輸１０％，睇中時贏２０％，賭完兩舖，假設正好是一輸一贏，就變成１０８元，回報率８％，再賭兩舖，又係一贏一輸，１０８元就變成１１６元，回報率１６％，就當你一年賭４舖，有咁o既戰果，都相當唔錯了。

　　這個例子只想說明，就算你買股票無獨得之秘，只要能掌握「輸少贏多」這個方法，根本就已經是投資的一大秘訣。好多人炒股只想１元博１０元，無想過控制輸錢和爭取贏錢同樣重要，若能控制輸錢，長炒好易贏，唔使搵到能升１０倍的股份。

　　當然，睇錯時要輸１０％很容易，因為只要你捨得去斬倉就多數能做到，但要在睇中時賺２０％唔係咁易，因為唔一定可以搵到對象，升２０％始終唔簡單。

　　這裏講兩種散戶經常做的事情，「順炒」與「撈底」，順炒是指大市已成勢後，順住炒一段，撈底是指大市成勢後，博走勢已到盡頭，炒一個相反方向，博大市回頭。我覺得「投機的我」最好順炒，不應撈底，因為投機只是炒一次短炒，跟一段走勢，順勢炒易過逆勢炒。正如我在頭條日報講那個在１２６元買匯豐的朋友，雖然她說自己是長線投資者，但到今天我仍然不知道她在買股票當天，究意是在投機還是投資，若是投機，見匯豐跌緊，要追沽而非撈底。

　　但「投資的我」又另計，因為這種人買股一心諗住好長線，所以最緊要買得平，最好揀暴跌的日子入貨，若隻股已跌到咁上下，再來一個１０００點以上的大跌市，就有機會是短線的浪底，可以入吓貨。若我的朋友真是一個長線投資者，買匯豐或許無錯，錯只錯在入得太快，一手入哂，個價入得唔靚。

　　講番本來的題目，若是「投機的我」，見到股份成勢時追入，博一個２０％升值唔係無機會，若回調就要定好止蝕位跳車，有利潤時才去博。

　　大家可以做個測試，如果你過去用這個「輸少贏多」的策略，會不會比你現在的做法，有更大收穫呢？
陸羽仁

　　美股牛皮，早段曾受金融機構獲注資的消息刺激，一度上升，但尾段又開始憂累公司首季業績不理想，結果道指只升３點，收報１２６１２點。

市場傳聞美國最大的儲貸公司Washington Mutual正在和私暮基金TPG商議，由TPG牽頭的財團注資入股５０億美元（３９０億港元）。Washington Mutual深受次按風暴打擊，早前公布３０億美元（２３４億港元）的壞帳撥備，過去一年內股價大跌７４％（至昨日之前），不過昨日傳出獲注資的消息，股價大升２９％，股價波動之大，令人戶舌。

Washington Mutual的消息令人憧憬信貸市場開始放鬆，所以私暮基金如TPG才可以獲得資金進行大額交易，所以金融股做好。

美股現時是好消息和壞消息交雜出現，美股收市後到美國鋁業公布業績，它是第一間公布首季業績的大公司，開出來的業績並不理想，由於能源成本上升、美元疲弱和金融產品價格回軟，美國鋁業首季盈利大跌５４％，超出市場預期。

　　美鋁季度純利跌到３億美元，或每股盈利０．３７美元，而一年前同期則有６．６億美元純利，即每股０．７５美元，跌幅顯著。而分析員平均估計美鋁首季每股賺０．５美元，所以現時公布的０．３７美元令人失望。美鋁面對其他對手的壓力，所以在成本高企的環境下，仍要賣廉價的產品維持銷售。美鋁業績唔掂，大陸的金屬股、特別是鋁業股有點壓力。

　　據彭博的統計，分析員估計美國公司首季業績平均下跌１１％，美鋁行先死先，公布出令市場失望的消息，所以對其他公司唔好抱太高期望，高成本，低需求，在在侵蝕公司的盈利。

　　美股道指升到１２６００點就打橫行咗幾日，這種走勢過住少見，不過牛皮市照計唔維持得耐，跟住唔係升就係跌，要推上股市，要有重大利好消息支持，例如併購消息，微軟收購雅虎仍然膠著，要睇TPG入股Washington Mutual幾快有結果，若無併購消息，未來主導的消息就係企業業績和經濟數據，向下的拉力不少。


　　港股唔能夠長期脫離美股走勢，食粥食飯，還看美國的業績風雲。


陸羽仁

　　　　美國陸續泌出壞消息，聯儲局３月１８日的議息會議紀錄顯示，儲局成員擔心美國經濟在上半年會收縮，部份人更認為「經濟長期及嚴重下滑」，儲局成員又發現樓市並無跡象見底。

　　美國最大的貸儲公司Washington Mutual發盈警，表示首季會虧損１１億美元（８５．８億港元），所以要削減９３％的派息，公司同時宣布私暮基金TPG的７０億美元（５４６億港元）入股計劃，其中１．８億股只是以每股８．７５美元賣出，比昨日收市價大折讓３３％，另有價值５５億美元是可換股債券。Washington Mutual的股價正式係「一啖沙糖一啖屎」，早一日急升２９％，昨日又因為虧損數字和大減派息，跌番１０％。

　　美股面對連串壞消息，都叫做企得住，道指收市跌３５點，跌幅０．３％，收１２５７６點，繼續罕有地在１２６００點左右牛皮無大上落，暫時有少少抗跌力，但真正考驗要等下星期金融股公布首季業績才來。

　　Washington Mutual的市值有１００億美元，都如此波動，可知股市的波動性可以殺死人，早前我在頭條日報專欄講到朋友在１２６元買匯豐（０００５）一度坐艇的故事，網友Bdroom問過我一個問題：「你個朋友買匯豐的例子，既然佢諗住長揸，想在2月大市再插時溝淡，為何不行呢?雖則話輸完錢切忌溝(我贊同的) ，但佢係富婆，成件事唔可以睇成係買多啲儲多啲貨咩?(你話好股進入「投資的我」射程時應在大插時買，買入後預佢再跌ma)。如果你個朋友原本買得唔多，又可否在這情況下溝吓呢?」

　　我見匯豐升番，都特登將曾經叫佢唔好溝淡的意見講出來，係特別想提醒大家，溝淡係一個壞習慣，唔好做。若睇我朋友的例子，如果佢在１１０元溝一倍貨，平均成本１１８元，而家賺到一成，咁豈不是證明溝貨係啱，叫佢唔溝係錯？

　　呢個只係事後孔明咁去睇，你一定啱，但在匯豐跌到１１０元那一天，誰可保證它不會跌到９０元、８０元、７０元？即使以「投資的我」的角度，匯豐在１１０元時，我也無信心話可以放膽買，理由好簡單，若信貸緊縮深化，誰可以告訴我匯豐的美國業務要再虧蝕多少？若無準確數字，即使你本來無匯豐，在大跌市當天，買少少唔拘，唔好買太多，若要大手買，可能買另一隻重磅指數股中移動（０９４１）穩陣啲。匯豐過去係穩陣股，但暴露在次按危機下，風險增加，只能當是一隻風險度一般的大股，唔係可以愈跌愈買的上佳對象，你唔知佢個底，點樣愈跌愈買呢？

　　電盈（０００８）的教訓好深，我見過好多人愈溝愈淡，有個朋友平時買股好穩陣，只買藍籌，在２０元唔知信乜大行報告走去買電盈，升到２８元無沽，後來隻股開始回落，跌到１５元再買，１０元再買，５元再買（現價是５合１，等如當年１元），佢不斷買的理由只得一個，「電盈係大股，無理由跌咁多，唔怕溝」，結果就將原來少少的虧損，放大成為全副身家投入的巨大傷口。

　　普通人買股票，並無計劃，買開股票，若賺錢更會將整筆錢一路叠上去，甚至不斷將人工投入加注，全副身家買股票。假若我朋友今次溝匯豐溝得咁成功，賺番突，佢又會將本金和利潤再攞去買，下一次遇到類似情況，一定會溝，買匯豐溝得咁好，買其他股也可以溝，溝得三、五次，上得山多終遇虎，最後溝中一隻潛水股，一舖就清袋，不但會將前幾次溝貨賺到的錢輸番哂，還會把後來投入的新資金輸埋，這就是散戶的宿命。不良的買股習慣，係散戶身上的癌細胞，最後都會害到佢命都無。一次溝淡成功，令你盲目相信這種錯誤方法，最後只能是一舖清袋。

　　買一隻股輸錢時，形勢不利於你，正確方法是減注而唔係加注，睇定再來，在高位減了注，才有子彈在低位等跌定時追貨，你在較高位止了蝕，等跌定後股價開始回升時去追，肯定比一路跌一路溝貨安全，收穫可能更多。另一方面，買股輸錢，要檢討買入的時機和方法，學到嘢，避免再錯，下次買股贏錢機會就會增加，炒股唔係買一舖，係一生一世的事。

炒股不能只看一次成敗，用壞方法炒股，長賭必輸，用好方法炒股，長炒必贏。

陸羽仁

　　 　　美股慢慢步入調整期，道指昨日跌４９點，跌到１２５２７點，跌幅０．４％，美股一度跌超過１００點，尾段收復部份失地，美股唔算跌得厲害，下跌的主因是UPS話生意開始放慢，令市場擔憂公司首季業績。

　　聯儲局官員話要開始考慮減息以外的其他方法，舒緩信貸市場的緊張，例如由財政部發債吸納市場資金，再由聯儲局直接借出資金予金融機構，此舉等如以政府信用作擔保，幫助市場資金融通，市場對此消息無大反應。

　　　昨日講到溝淡係散戶大忌，網友平凡人的故事，值得大家記取，他說：「陸SIR這個溝淡的故事是對的。我也記得陸SIR講過，他的文章是針對絕大多數散戶而寫的。其實我認爲．投資/投機是一門生意，不是每個人的性格和心智都能做老闆的，所以才會在這個世界上打工仔多老闆少。按比例，10000個打工仔裏面才能出1個成功的老闆。所以，陸SIR建議大多數的散戶別溝貨是正確的。」
「本人的例子就有溝貨成功和失敗的例子，在2007年，我全年投資/投機的80%利潤大部份來自于1171，1088，1898三只煤炭股，每逢插市我就買貨或者溝貨。所以2007年的投機成績非常漂亮。可是，臨尾就香了一次在2866中海集運，我從9.00開始買，一路溝到5.80元才投降。這就是我說的一個人的心智強弱對投機很重要。（當然，如果當時陸SIR那篇講李超人看市道的文章早4個月寫出來的話，我就會在7.00走人。）」

「如果，我當時繼續溝，那麽就會到後來的2.80元，那就輸得很慘，起碼會把我的3只煤炭股賺囘來的利潤輸掉50%以上。但是，我在5.80就打靶不玩了，逃過一劫。」

中海集運昨日收３．４１元，平凡人能在５．８元打靶，的確是避過了一刧，早前３月１８日的低位更是２．４４元，高位買貨揸到而家，真係喊都無謂。

其實這隻股票我好早都有留意，但好少講，因為覺得佢雖然唔係細股，但炒味幾濃，隻股由去年初３月起步，當時仍然係１．８元，到８月炒上５元，９月尾是６元，短短半年，１．８元變６元，升了２倍有多，炒到卜卜脆。我唔係太想講這些股，因為有一個兩難，若果我話佢炒緊，不妨走一轉，你咁黑仔一上車就關門打狗，股價即插，你會怨我一世。問心講我想話佢炒味濃，叫你地唔好買，但咁講等如唱衰佢，網友聽完我講唔去買，第二個見佢急升，就會當我係仇人，你問我，我見佢升到６元，都已經覺得相當貴，但只能少講為妙。

結果亦係咁，佢１０月初仲係６元，以為佢貴，點知佢１０月２４日炒上的高位係１１．６元，１個月內再升多一倍，你話激唔激，股票炒到最後，等如燒煙花，日日咁升，會引到好多人落叠。如果我６元叫你唔好買，升到１１．６元嗰日，如果你知道邊個係陸羽仁，喺街見到佢，會唔會想攞把刀劈佢呢？

不過中海集運跌亦跌得好急，佢一個大斜波咁抽上，又一個大斜波咁插落，幕後人係高手，可能在升跌那半個月已在高位派哂貨，隻股在１１月中在９元上落咗一段，大戶要出埋貨尾都大把機會，我估佢出貨的大位，可能就係平凡人開始買貨的９元那個短暫上落位，你去買，佢就派埋俾你。

平常人睇股價，睇高價唔睇低價，睇中海集運，主要睇佢１個月前高位造過１１．６元，無睇佢半年前由低位１．８元起步，由１１．６元跌到９元，跌咗２２％，你會覺得佢跌咗好多，其實你想深一層，如果１１．６元個位係假o既，你就會明白遊戲點玩。我建議大家以後睇位睇完高位，睇埋低位，對隻股就有立體的認識，知道大戶乜嘢位出貨可以有暴利。

李超人係叻人，佢出貨的手法靚絕，我相信佢唔係幕後人，但見到幕後人炒到顛時，佢無出貨，佢係等回頭時才出貨，佢可能覺６、７元都已經幾貴，但唔知人地想炒到乜田地，就睇吓戲，到見隻股急回時，佢就大手出貨，這種手法亦等如是推高止賺位之法。股票喪升時，你唔知佢會升到邊，但一開始回吐時止賺，往往就係出貨的靚絕時機。

我都係睇到李超人都出埋貨，隻股敗象畢呈，才敢出來講兩句，阻唔到平凡人溝貨，幫唔到佢在７元清貨，或許可以幫佢在５．８元止蝕，佢已經好叻，因為５．８元，差不多係隻股最後一浪大升前在９月底的價位，此價比半年前的起步價還升了兩倍，所以平凡人算有不錯EQ，可以在這些「高位」（不是低位）引刀成一快。

普通散戶買股，對隻股票的基本價值，炒作動向，好難有深入的了解，在股份下跌時溝貨，好易成為大戶派貨的接貨對象，所以都係唔溝好過溝了。

陸羽仁