歐洲央行議息後維持利率不變，並發表了害怕通脹及睇淡歐洲經濟的言論，歐元在議息前急升上１．５９，但歐洲央行開腔後又急滑至１．５７，這些過去一個月的波幅，在幾個鐘頭內出現，可見現在金融市場之險。

美股昨日有反彈，道指一度升１２０多點，收市升５４點，報１２５８１點，升幅０．５％。政府公布上周新申領失業救濟人數少於預期，已令市場氣氛改善，而分析員估計英特爾盈利有增長及會回購更多股票，令科技股受到追捧。美股正處於一個上落市，牛皮待變。

仍然想再講吓溝淡和止蝕的話題，網友Ton Ton講起自己和朋友炒股中伏的經驗，「小弟完全明白，如果唔係有陸Sir同金兄同向師兄師姐教止蝕，我估我去年的Proft已還返俾個巿。如果唔識止蝕，好似去年高位$4入的2345，半年已經唔見咗55%，仲有其他如998等，如果無各位教我止蝕，我已經死得好慘了，現在能打和，都係托大家的洪福！再次再次感謝各位！」　

「我有一位新識的朋友，她在去年$10入了中海集運 (2866)呢排叫做升返D都無咗70%，要上返佢買入價，隻股要升233%，真係....」

「最經典都係利記(637)，我同個朋友一齊係$3左右買入，佢好不幸無睇陸Sir個Blog（我有叫佢睇，但佢好似無理我），我自己在$2.x止蝕了，自覺好傷，好痛，因為第一次係一個無能力控制的範圍內唔見一大筆錢（有D似個我好多年前，存了一兩年錢先買到第一部數碼相機俾人偷咗的感覺，真係坐咗係到成個鐘唔知點算，個心好痛好痛!），但大半年後，我覺得自己賺了，因為我朋友當日用成富身３０幾萬買的637，係無分注分散同止蝕的情況下，佢半年唔見左23萬身家，對一個打工仔來說，已是佢一生的存蓄...我估就算係股神，要用佢淨低個7萬在大半年內變返30萬，都應該無咩可能...如果佢今日先沽，就算佢要有能力用其他股票每年賺返20%，佢都仲要用八年先可以Cover佢係八個月唔見咗的錢。八年先打和，個仔或女都小學快畢業．．．所以，如果仲係覺得止蝕唔重要的網友，請先問問自己，如果半年內蝕咗的50%，有無能力係返用半年時間去賺返100%，如果無，煩請記住：止蝕。」

「這是小弟一年來學到的總結，我知到自己好白痴，用一年時間所學到咁少野，但希望新來這個Blog的朋友，得到這個止蝕的祝福。」

Ton Ton一啲都唔白痴，一年學到咁多嘢，夠用一世。溝淡和止蝕係兩個相反的行動，大部份散戶買股輸錢，唔單止唔止蝕，仲要溝淡，令蝕上加蝕；真正要學是忍住唔溝，先睇定環境，再唔對路，就忍痛打靶。

人性的缺點是堅持己見，覺得自己啱哂，要錯係社會的錯。好似甘泉航空結業，主席李卓民話甘泉一心想以租機方式營運，但對手強烈反對，所以最後只能斥巨資買機，加上油價急升，最後頂唔順結業。睇完李生的總結，甘泉結業係對手的錯，油價的錯，但做一盤生意唔去考慮對手的回應，唔考慮經營環境的可能變化，又係邊個錯呢？

普通人買股都係咁，聽冧巴買入一隻股後，如果市勢突然走樣，隻股急跌，多數唔覺得自己睇錯，只覺得是環境的問題，隻股好快會升番（不暪大家，到今天陸羽仁買股後股價跌，第一個反應都係咁，要回過頭來，用理性控制自己的情緒，才可以比較抽離分析當時隻股或大市面對的問題）。

Ton ton提到的利記，係新上市年幾的股票，無太多上市往績可稽，大家都唔知主事人的手法，去年７月２０日收市後突然發盈警，話０７年上半年的業績，將會顯著下滑，主要面對內地對手激烈競爭。到７月２３日再開市，利記由上日收市價３．２２元，開市時裂口急跌到２．４５元，收市彈番上２．６２元，單日跌咗１８．６％。

我當時俾大家的建議都係叫大家走避，話若唔再反彈，唔沽哂都要沽一半。這些單日急跌，若有幕後人維持秩序，跌完可以無事，跌完彈番上去再慢慢派貨，但利記往後的情況一日比一日差，７月２４日收２．５元，２５日收２．２元，咁樣一段段落，已經係「送院途中證實死亡」格局，唔似有人頂番上去，就算有人頂都係頂住派貨，我記得那時有網友問我好唔好再買溝貨，我話千祈唔好溝，應該要沽，唔捨得沽哂都沽一半，再唔對路沽埋啲貨尾。

其實以利記當時的形態，正路無得救，只能望佢背後有莊家，他們未出貨才救到小股東，因為莊家未出貨要托番高出貨，但若無這種莊家存在，早前炒到咁高，一盈警就注定要大跌收場。

大家要明白散戶和大戶的分別，大戶如正經的基金，買利記一隻中小型股，只佔佢組合１００份之１，突然見到盈警，最合理的做法是洗倉沽清，因為他們入貨價低，即斬仲有盈利，即使要輸，若輸１０％，只是整個組合減值１０００份之１，必然會好狼咁下刀去斬。

你做散戶就唔同，可能八、九成注碼放一隻股身上，買入蝕一兩成，等如成副身家減值一兩成，好痛，好唔想呢件事發生，只能用主觀願望蓋過理智，期望佢無事，唔想止蝕，只想加注溝淡，望吹番番來，問題是呢隻股累你輸錢，股價跌開有條路，點解你咁有信心再買會升番？我就話唔理買乜股，你買完佢跌，一定有原因，跌開再跌的機會大過反向回升（這就是順勢），要加注都唔好加係輸緊錢的股上，要加注合埋眼掟飛鏢落報紙的股價圖上，求其搵一隻來買，買完上升的機會，可能大過你再買手頭上跌緊的股票。要避免好似Ton Ton朋友咁買一隻股唔見七成身家，唯一的方法係唔溝、止蝕，唔見七成身家，可能十年投資加儲錢先至搵得番，白白浪費了十年光陰，人有幾多個十年？由此可知一個錯誤投資決定，代價有多大。

利記唔算最雞的股票，現價仲有０．６６元，如果你買的是莊家概念股，可能１毫子都無。講利記的例子，不是想挖大家的傷疤，而是希望大家可以在錯誤中學習。我自己就係咁，做運動時大腦無嘢做，就經常把自己投資的錯誤重溫，希望可以學番一招兩式，想像若再遇上同樣處境如何回應，起碼將來唔會犯相同錯誤。記住，錯誤是最好的老師，它教的東西，可以令你一生銘記。

陸羽仁

美股大幅回吐，要看今次美股調整會否再創新低，而港股在這一浪調整有無抗跌力，亦要小心觀察。

有網友問是否因為我覺得大市會調整才一再講溝淡的話題，其實這個問題太重要，值得一講再講。網友古九寒的例子又可以證明。

古九寒話：「陸sir,今日睇完你個blog真係非常感觸, 我也好想係度講吓我的故事......上年10月港股狂升, 幾乎每日都創新高, 而且全民皆股, 好有股災前夕的味道, 當時我看見自己今年的投資已經有唔錯的回報(大約賺左5-6萬), 所以決定唔玩, 清倉走人! 但其後個市繼續上升, 升穿3萬點後又試3萬2, 身邊的朋友繼續賺大錢, 而「亞洲股神」和「澳門賭王」又日日唱好! 心裡自然十分後悔, 結果忍唔住所以再度入市掃貨! 我分別係$47入左1手國壽+$17.5 入左1手中石油......(錯1: 當時好有信心, 因為自己後生, 未輸過! 唔知高追原來可以好大獲!)」

「跟住後來溫總話要停車, 個市即插, 但係我無去止蝕, 而且仲選擇去溝淡! 我再係$45入多2手國壽+$14.5 入左1手中石油! 跟住個市繼續插, 我開始有d驚, 但係依然唔肯認衰, 係$42入多2手國壽, 平均價$44.2......(錯2: 唔止蝕, 仲玩溝淡! 依家先知死!)」

「到左就快Christmas, 隻國壽並無起色, 而且跌到得$39, 隻中石油得番$13……當時我真係好唔開心, 臨年尾先咁大獲! 當日咁橋睇咗陸sir你個blog先知道止蝕咁重要, 所以即日清倉走人, 蝕左成5-6萬, 入哂肉......(錯3: 早d睇陸sir個blog, 早d止蝕, 就唔會攪到咁既田地!)」

「今時今日兩隻股票雖然都反彈番唔少, 但如果當日我唔走依家可以要蝕10幾萬, 真係”You jump, I jump!” 唯一好彩便是我這兩年賺果啲都可以剛剛夠蝕, 就當自己發咗場夢啦!」

古先生（佢個名太似粗口，改吓好啲）的情況，太過典型，他首先遇到的問題是過早看淡，我在接近３００００點時答過一些問題，當時有網友問，個市咁高，炒唔炒好，我那時大概咁講，用細細注炒吓唔拘，知道自己炒就得啦，一唔對路就閃，若果炒開股清哂貨，個市繼續升，見人日日贏錢，一定忍唔住，最後喺高位撲番入去仲衰。古先生的情況就是如此，太早離場，見到人贏錢，好難忍，結果撲番落火海，大部份股民都有賭性，所以在股市大熱時完全離場，未必係最好方法。

佢溝淡的情況，亦係典型，最初唔係輸得咁多，係溝淡溝到自己輸大好多，你睇佢開始在４７元買咗１手國壽，１７．５元買１手中石油，雖然接近摸頂，但勝在買得少，如果一跌就走人，輸得好有限。但佢不斷溝淡，在４５元買多２手國壽，在４２元再買２手，１手變５手，即使輸的幅度一樣，都放大５倍。而中石油也在１４．５元多買１手，合共２手，輸錢亦放大２倍。溝淡表面上睇可以拉低成本，但最大的弊處是將投入的注碼不斷放大，小風險變大風險。

以古先生的例子，若佢在溝淡時唔去溝，改為止蝕，把國壽和中石油沽清，可能只係輸幾千元，即使佢見大市跌到２７０００點時，以為見底，再買，唔對路再斬，可能只係輸１萬，而唔係好似而家咁輸５、６萬。

我唔知點解，好多名咀都叫人溝淡，可能過得一、兩年之後，隻股真係可以去番溝淡價，佢會話溝淡成功，但佢無講你已損失一、兩年的機會成本，以古先生的例子，若高位一早止了蝕，可以吼低位買番貨，跌落低位時大把子彈買，加上輸錢又唔多，一個小浪就可以把止蝕輸的１萬元賺番來。再者，一、兩年當中，可以發生的事情太多，溝淡完死守，股票跌到地底泥咁價錢時，可能頂唔住日日跌的壓力，可能覺得明天會股災，頂唔順壓力就把股票賤賣，等唔到翻身的日子。又或者等等吓有用錢需要，例如要結婚、要買樓，結果又要在低位套現。所以股票跌價去溝淡，愈溝愈大，要等一段長時間才回到家鄉，將自己陷入完全被動中，認真唔著數。

大市升跌都有個勢，你買股之後即輸，慎防大市或個股已轉勢，中石油係最典型的例子，好易見到佢A股一上市就轉勢，大戶借人人有好高期望的時機沽貨。我經常講，股市係大戶和散戶對賭，你一開始輸錢，就可能陷入了和大戶對賭的局中，要想法脫身，而唔係再賭大啲，買了轉勢股去溝淡，愈賭愈大，多多都唔夠死。

古先生的狀況仍然OK，佢只係將上一年賺的錢輸掉，保住本金，成績已一錯，可以低位再累積股票再來過。贏錢時加注，輸錢時減注，都係炒股的ABC原則了。無論從眼光、手氣、走勢等任何角度去睇，輸錢時都唔好加注，輸開有條路，唔可以靠加注吹番番來。


陸羽仁

美股繼續跌，美國第四大銀行美聯銀行 (Wachovia)公布第一季錄得意外虧損，減少派息，並計畫配股集資約70億美元，以強化資本，令其股價急跌，跌幅為7年以來最大。另外，高盛證券則估計，較多企業將公布令人失望的業績，將壓低未來幾個星期股市指數。

結果道指跌２３點，跌幅０．２％，跌到１２３０２點，美股走勢加埋高盛的預測，未來一段日子還是調整市，想買貨除了要數子彈之外，亦唔使太心急，慢慢來。

網友Ray問起，「陸先生你話輸錢時加注風險大，你又怎看贏錢時加注的風險?」我認為這個世界充滿風險，投資固然有風險，不投資也有風險，因為通脹咁高，收雞碎咁多息，一年４％、５％通脹，持有財產的購買力不斷按此比例下降，唔投資都有貶值風險。

講番投資，贏錢時加注，風險會細過輸錢時溝淡加注。我有一個理論，存在就是合理，一般人輸錢時，會覺得「無理由，明明睇住佢．．．．」，有一百個藉口去否定自己輸錢的事實。我就話，既然賭錢呢個事實已經存在，已包含了各種合理理由，例如你睇錯市，例如你無估到大市或個股走到咁上下會轉向，又例如你已踩入一個大戶的佈局中。輸錢的理由已包含在事實中，問題是你無興趣發掘而矣。

一般人輸錢時不止蝕，主要怕黑仔到極，一止蝕完佢就升番，現實上的確有此可能，機會甚至有一半或以上，隻股可能係一次短度回調，回調完會向番上，所以你斬完倉佢會升。但有另一半機會佢係轉咗勢，開始反覆向下，你唔走，低處未算低。雖然買股輸錢時，隻股係短期調整或轉勢下跌兩種機會都有，但後者的風險太大，唯有止蝕走避。

再講到贏錢時加注，當然也有風險。買股票要搭啱車，你上車後架車馬上火速向前行，你就賺大錢，上車前你唔確定邊架車會開，上咗車試過至知，但上車後肯向前行的車，已比唔郁的車好，已比唔郁的車大機會行落去。贏錢時加注的風險係加完注佢就回頭，假設你順勢買股，隻股回頭是轉勢，順勢發展的日子，被轉勢的日子多，所以出現轉勢的機會，唔係無，本來已略少於順勢發展的日子（這只是講順勢買股，逆勢博反彈的人是例外，因為他來是逆勢買，隻股順住跌勢要再跌，所以買完再跌的機會較大）。

贏錢時加注的另一個好處，是你有較多空間去守，假設你２６元買了國壽（２６２８），跌時不買，若升到２８元才加注，平均價２７元，你已有１元的利潤空間在手，若以一成止蝕，跌到２４．３元才止蝕，和現價的距離較大，有較大空間防守，可以減少止蝕的機會，避免正常回調少少就要斬倉。

《The New Market Wizards》一書講到一個成功的期權炒家Victor Sperandeo，佢年青時喜歡研究如何賭啤牌，主要技巧是管理賠率，他記牌，然後分析每一舖牌的賠率對自己有無利，有利時賭，無利時不賭，這樣就可以輸少贏多，長賭有著數。 形勢對自己有利時加注，不利時減注，也有少少似Victor Sperandeo的理論（雖然他對如何分析賠率還有深入見解），贏面大一些。

贏錢時谷大，多少有「投機的我」的味道，不似投資行為，但作為投機者，若買１０舖贏７舖，輸３舖，輸時輸有限，贏時贏多一點，長賭已可以取勝。

陸羽仁

  　　美股反彈，地區銀行的業績優於預期，加上油價上升推高能源股，令美股在三日內首次上升，道指升６０點，升幅０．５％，收報１２３６２點。

　　而英特爾公布第一季業績好過市場預期，在美國市場放緩時，該公司的銷售持續增長，上季銷售增加１７％，令分析員跌哂眼鏡，英特爾股價亦大升８％。

　　其實早前美國鋁業及美聯銀行等公司公布了壞業績，也有「貢獻」，因為它們的業績降低了市場對公司業績的預期，據彭博的調查，現時分析員平均估計美國標普５００公司首季業績下跌１２．３％，而年初時仍估計會增長４．８％，近期美鋁等公佈的壞業績，更令分析員調低預測。既然期望低了，失望的機會亦降低，那麼公司公布普通差的業績，亦不會令市場意外而推低股市。

　　另外美股公布生產消費指數，升１．１％，主要反映油價上升因素，生產消費指數是消費物價指數的前奏，生產價貴，意味將來售價也貴，數字令人相信美國通脹會開始上升，美國再減息幅度有限，利率期貨數據顯示相信今個月聯儲局會減息０．５厘的人數，又跌到３０多％，消息令美元反彈，在亞洲市兌歐元從低位１．５９，回升至１．５７９，兌日圓亦升上１０１．７的水平，資金有流入美國的初步跡象。

昨日講到贏就谷，輸錢唔好谷的道理，網友ray提問，第一，如何管理贏錢時加注的風險？第二，如何決定贏錢時加幾多注？第三，如何分辨「分注買入」和「贏錢時加注」的概念，兩者可否共用？第四，若他已按分批買入入夠貨，如贏錢再加注，會否入得太多，風險太大？第五，是否有些時候「贏錢時加注」會好大風險？


我覺得要還原基本步，首先分開「投資的我」和「投機的我」，我經常講的「分注買入」，慢慢買，主要是針對「投資的我」；而「贏時谷」，就更適合「投機的我」的順勢炒買貨策略。「投資的我」對風險的容忍度有限，不追求大收穫，先要降低風險，賺少啲唔緊要，最好唔輸，所以他的入市策略應該比較保守。分注買入係將普通人睇啱就一注買哂的方法，改為分注買，減少一買即輸的風險。舉個例，今年年初，我話大市上半年應該在２３０００點至３００００點中間炒波幅，當時指數是２７６００點，向下空間大過向上好多，當時買貨風險較大，假如你係一個較進取的「投資的我」，信我所講，只能等低位才建倉，要先定一個等大市跌下來時買貨的策略，可以分三注，在２４０００點買第一注，２３０００點買第二注，２２０００點買第三注，三注買齊平均價２３０００點。

好了，若你自命係保守之人，年過４０，唔想太冒險，又可以咁做，將第一注買入價定在２３０００點，第二注２２０００點，第三注２１０００點，平均價２２０００點。第一注入場的價位愈低，安全度愈高，當然另一方面，亦有買唔到或買唔齊貨的風險。但我就話，既然自命保守之人，假設你三注只買到一注，亦無所謂，見到佢升上去唔追亦無拘，最緊要唔輸錢，有得贏，其餘兩注買唔到股，攞去存人民幣都得。你諗吓，假設你買得一注，股市升咗上去，最後這一注有２０％回報，其餘兩注存人民幣，收息加升值有５％回報，加埋整個組合有１０％回報，以低風險組合來講，咁o既回報好唔錯啦。

網友bdroom問分注買入和溝淡的分別，其實我答過佢，佢可能睇唔到，分注買入係一個較保守的買股票方式，可以減少止蝕的機會，假設你有１０萬元身家，買攞其中５萬元買股票，按我上面講的方式，分三注買入，用哂５萬元買完之後，股價再跌，你就唔好再攞錢出來買，因為隨意再買，想降低成本，超出原來買股的預算，那種做法叫做溝淡，用以上的例子，好多人用完５萬去買，買完再跌，用埋其餘５萬買埋佢，跌完再跌，出糧有１萬又買，本來買埋５萬，結果買到１０幾萬都唔收手，成副身家咪好易一舖清？記住「黑開有條路」，黑完可以再黑。分注買入後見到股價跌，要考慮止唔止蝕，唔係加注。

講咗咁耐未答到阿Ray的問題，我主要想講，要將「投資的我」和「投機的我」分開，「投資的我」搵價值股，或搵好股等平價時才買，不能避免在大市下跌時或比較淡靜時去買股，跌緊去買，多少有點逆勢，和順勢炒並不相同。分注去買係一種防守式進攻，並非炒作心法，買夠貨，升咗上去，也未必一定要大量加注，要控制風險，唔好讓組合太集中一隻股份。「贏就谷」是一個炒作策略，考慮點完全不同，明天再續。

陸羽仁

　　美股大升，因為英特爾、摩根大通及Wells Fargo 皆有優於預期的業績或好消息公布，英特爾話經濟疲弱並未影響其銷售，摩根大通行政總裁Jamie Dimon 話信貸危機快到尾聲，該公司發優先股集６０億美元亦出台，而美國西岸最大銀行 Wells Fargo 話雖然加州樓價下跌，其虧損有限。

在各種好消息刺激下，道指大升２５６點，升幅２．１％，升番到１２６１９點，又升番去早前的牛皮波動位，市場人士話今次升市升得幾全面，各類股份皆有上升。另外，期油價格在紐約交易時段升上１１５．２１美元一桶，因為上週美國燃油庫存意外大跌。

港股在本周一因為美股大跌２００多點，由高位２４６００點插下來，現價２３８７８點，未知今次美股突然回頭倒升２００幾點，又會不會推港股上番高位。

　　昨天講到「分注買入」，平買價值股是「投資的我」的手法，今天再講「投機的我」的「贏就谷」手法。網友阿Ray問「分注買入」和「贏錢時加注」的概念可否共用，我覺得唔係幾得，因為係兩個唔係好同的概念。

　　網友新友一號講起一隻炒股，問可否分注等佢下跌時買入，用這種手法買炒股，智者不為，唔係話分注買乜股都得，分注向下買主要是睇到股份跌近合理價值，覺得再跌都有限，所以才分注向下買，定得個價低啲，有少少似巴菲特講愈跌愈抵買的概念，只為避開一買就跌的痛楚期，你唔怕跌，對自己的分析有信心，一注買哂亦得。

但你分注向下買一隻炒股，咁樣做好易死人，因為炒股升和跌幅度都好大，只能順勢去炒，你逆勢去接，多多錢都唔夠。因為一隻１元的炒股，你定１元買一注，０．９元買第二注，０．８元買第三注，以為咁樣已經好平，但炒股的真正價值遠比現價低很多，佢一係唔大跌，萬一大跌就一瀉如注，１元跌到０．１元都得，分注去向下買的風險就在於此。

　　「投機的我」買股宜順勢，係分注向上買，唔係分注向下買，只會在順勢時追，一回頭就斬。我以前都引述過Edwin Lefevre 的《股市炒手回憶錄》，此書主要講述大炒家Jesse Livermore的事跡，書中講述佢順勢買股的手法，佢想買一隻股，在１１０元先買了２０００股，買完回吐即走，如果買完升到１１１元，初步證明他睇中走勢，他會再在１１１元買第二注２０００股；如果隻股再升，例如升到１１４元，他會再買第三注２０００股，這時持股已初步足夠，平均成本１１１．７５元，現價１１４元，有一定利潤在手。他會繼續觀察，知道股份上升後會調整，他想看調整後的走勢，假如它調整到１１２．２５元，然後又再上，慢慢上番１１３．７５元，就確認上升之勢。他會再放一個「市價盤」去買４０００股，如果好易用１１３．７５元買齊，他就會覺得唔對路，因為太易買到咁多貨，證明有太盤想出貨，他就會沽貨走避。若果只能以１１４元、１１５元那些高價才買到，就證明隻股無乜人想沽，愈升愈有。大炒手話：「我從來不想買得太便宜，也不想買得太容易。」

　　雖然我地無大炒家咁多錢去大手買入左右大市，但炒作講求順勢，隻股若有起步上升之勢，短期內會順勢滑行，你要分注向下買，等如去捕捉一個向下走勢，一係隻股只係小幅回調你買唔到，一係買齊股時隻股上升走勢已扭轉，隻股已轉勢向下，起碼短期走勢是如此，所以次次向下分注買到炒股都輸大鑊。所以大炒手睇啱一隻股，小注試盤，唔升唔加注，一回頭就打靶，充滿了「贏就谷、輸就縮」的智慧。請大家不要介意我翻炒我以前寫過的大炒手買股方法，因為這是展示炒作之法的最佳例子。

　　試想想大炒手可能有１００注在手，睇啱一隻股先落自己財產１％買第一注，贏就加注，輸就止蝕，買齊一隻股可能只佔佢組合總值的５％、６％，隻股有勢不斷升，佢會坐落去，升到咁上回頭時，下穿止賺位，佢就走人。佢根本就係不斷跟踪不同股份，大量地進出，下注輸少贏多，總計就是贏。

　　我希望用今日的例子，可以答到阿Ray的問題，因為「贏就谷」，係一種順勢而炒的炒作手法，唔係投資手法，在股份上升時追貨，入貨價會較貴，唔一定可以長揸，適當時要走，所以「投資的我」，在贏錢時加注加得太多，若大手加注時已在高位，的確有風險。

但若是投機就不同，根本唔贏就唔應該買咁大，唔贏就唔好加注。你可以比較這個手法和輸錢溝淡的分別，你原定用５萬元買股，輸錢再加５萬溝淡，加埋平均輸三成，等如輸３萬；若你贏錢才加注，想投資５萬都係先用１．６萬試吓盤，唔對路輸一成馬上走，你只係輸緊１６００元。買咗１．６萬元對路，才加第２注１．６萬，再有得升才最後１．８萬，買係買得貴，但係在升勢中買，跟佢順勢走一段，貴買貴賣，食夠走人，這才是炒股之術，可能輸三、四次１５００元，但敲中一隻執番１、２萬，就有淨肉。

所以我俾阿Ray的建議是將組合分成不同的部份，投機有投機的手法，投資有投資的手法，投機要週轉快，投資要坐得較長，各有不同的避險方式，唔好撈亂咗。我平時講分注向下買，主要針對聲稱自己係投資者的網友，叫他們買指數股或大股，等那些股份跌到近價值線才買，那些股份跌到好甘時，再跌的風險有限，分注是降低買完即跌的風險。而炒股卻應該唔升唔買，順勢追一段中短程，手法不同也。

陸羽仁

  　美股靠穩，公司業績好壞參半，道指升１點，收報１２６２０點，輝瑞藥廠受遺傳工程藥物競爭影響，收入減少；Google首季業績增長３０％，好過市場預期；美林證券首季虧損１９．６億美元，包括了６５億美元撇帳，同時裁減３０００個職位，但美林的撥備和虧損少於市場預期，刺激股價上升。港股短期後市要睇大陸股市走勢。

早前有不少網友問到「投資的我」使唔使止蝕，可以研究一下。先看看網友大老闆的經歷，佢話：「我都學陸sir 咁分開『投機』同『投資』的我, 『投資』的我就買大股長揸, 『投機』就抽新股。」



　「『投機』方面, 我之前抽落好多新股, 好似中煤、合景泰富、波司登、復星等。中煤係升到$22蚊到放咗, 其他都好跟足陸sir平時教, 佢地一跌穿招股價我就放。只係冇高位放, 但係投機抽新股方面都冇輸錢, 仲因為中煤賺左。」

「反而係『投資』方面想同陸sir傾下。我選擇左中國人壽作為對象。首先, 我睇好它長線的前景, 投資d錢係閒錢, 唔介意守好耐。不過我係國壽由5x幾蚊跌到去$40就買左, 因為我得一注錢, 做唔到分注買入。雖然我長線睇好加閒錢買, 唔介意守。但係見到佢一路跌到去曾經$25蚊到, 我都不其然要想當時是否要「止蝕」? 當然, 最理想的當然係有幾注錢, 係30蚊又入一注, 係25蚊又入一注。但係, 我得一注錢$40蚊就撲左入去, 雖然唔介意守, 不過亦都想睇吓係今次事件有冇咩地方可以學習到。」

「另外, 一個問題是作為小市民想做長期投資, 應該點樣選擇公司。可能這個係一個好簡單的問題, 但係點樣確保長期投資的公司唔會好似 “enron”, 貝爾斯登咁一炮冇咗? 係唔係長期投資都應該要分散買幾間？」

網友大老闆的個案值得研究，先講兩句投機，投機要進出，炒新股不一定要坐一世，特別是在大市好熱時買新股，更難長坐，買入若升上高位，見從高位回吐１０％，都可以沽啦。因為散戶的資金有限，你炒新股，即使呢隻回落了１０％後你沽咗佢再升，你錯過了這隻股尾段的升幅，唔緊要，只要大市仲升，睇定啲你都可以用套現回來的錢炒其他新股，所以投機炒股，唔係一揸到尾，升得多似轉勢時要沽。不過你雖然高位沽得中煤一隻，但起碼守到跌穿招股價即走的原則，都係守紀律之人，具備一定炒股的心理質素。

講番「投資的我」使唔使止蝕，這個問題若抽空來問，比較難答，若睇得書多又唔消化之人，一時巴菲特上身，好易答話「好股愈跌愈平，愈平愈買，唔單止唔使止蝕，仲要增持」。若你有巴菲特之能，呢個講法一定啱，問題你睇股票的基本價值，又有無巴菲特咁叻？以大老闆的例子，４０元的國壽，巴菲特唔止唔去買，有貨仲一定會沽添。大家記唔記得，國壽大概２０元左右時，傳過巴菲特入股，後來佢否認咗，我當時心諗，巴菲特只買超級大減價的好股，點會在２０元買國壽，你睇佢想買美國的債保公司的出價，就係道佢要價有幾辣。

所以講具體例子較易答，即使你抱投資心態，如果買入價唔係「非常平」，就唔好唔止蝕，大家未必如巴菲特那樣，識得計公司無限年期現金流的折現價（這就是所謂公司股價的合理價值），去計出現價比現金流折現價是否有好大折讓，所以我用咗一個好主觀的方式去講，叫做「非常平」，唔識計價值，都可以用主觀鏡睇吓。

分三種情況，第一是「相當貴」，現在國壽的一年低位２３．３元，高位５３．８元，就用呢條數計，如果個市炒到熱火朝天，身邊人人都講股，大股一年升咗一倍有多，跟住從高位回落１０％，例如國壽去番到４８元的時候，這種叫做「相當貴」，貴買好股等如炒，無論你的心態是否想投資，以那種價錢買股都等如炒股，所以在「相當貴」時買股，一唔對路要斬清。或者應該咁講，嗰種時候，「投資的我」根本不應該入市，股價高位回落１０％，正係持貨的投資者止賺的時候，唔係入場的時候。

第二種情況是股價「中中哋」，唔高唔低，國壽跌到４０元時，這就是網友大老闆買股時，國壽從高位跌了３５％，單睇這個數字，都幾多了，但再睇４０元比同年低位，尚高了７２％，又唔算跌得夠多，回吐升幅一半的情況比比較是，所以當時國壽的情況，唔算「非常平」。

若果你唔係在「非常平」的價位買股，買完再跌，就要積極考慮止唔止蝕。我建議一個縮骨方法，諗唔掂，唔沽哂都沽一半（大老闆得一手難以執行，但都可以買番少少國壽沽輪對沖，若隻股反升，就要預咗這筆買沽輪對沖的保險金會輸哂）。如果我係大老闆，在１月睇住國壽張股價圖，見佢守咗兩個月守住４０元個位，跟住在１月初開始穿４０元這個大位向下插，就一定會止蝕走人。

大老闆講的情況唔難答，有一種情況難答啲，就係在股價「非常平」時買入又如何？假如你在３月中大市插低時，在大跌當日以２５元的低位買到國壽，假設買完在４月再插，咁又止唔止蝕好呢？用番我上邊的講法，２５元距離一年低位２３．３元已經好，所以應該算「非常平」，但又係唔係唔使止蝕呢？

我只能咁講，若無大熊市出現，２５元入國壽應該都OK，若美國有大熊市到來，觸發全球性衰退，世界末日咁款，不能排除國壽仲會大跌，畢竟幾年前國壽上市之初，長期在５、６元左右浮沉，邊個敢寫包單永遠不會再出現這種價錢。當然，講到咁誇張，好似有少少唔負責任，所以合理分析係，估吓隻股最差會唔會清盤（就係大老闆問的安龍和貝爾斯登的例子），另外假設如果大市出現股災佢跌到地底泥價錢時，呢隻股守幾年上唔上得番來？再問自己等唔等錢使，可唔可以守幾年？如果全面答案都係正面，就未必一定要止蝕，但要明白咁做都有風險，只不過風險發生機會較細，萬一出現自己接受得到。

好多人都講，buy and hold（買入長期持有），可以係一個災難，只要的買入的時機不對，價錢太貴，就會中重招。用上述的方法去判斷止唔止蝕，若入貨價唔係咁平，唔對路時唔沽哂都沽番一半，相信都可以在大部份情況下，幫到大家。同樣道理，即使是長線投資者，股市升到好顛時，沽番一半貨出街，又有何妨？

陸羽仁

　　　　美股反彈２２８點，日股今早升２００點，升幅１．５％，對港股應有點刺激作用，唯一拉力是A股，大陸股市跌近３０００點大關，管理層都有點緊張，其中一個壓力是所謂「大小非」出台（即大量和小量持股的非流通股開始解禁出售），中國證監會為減少非流通股減持的壓力，提出「限售股轉讓意見」，要求在大宗交易的系統裏轉讓，並加強訊息披露，此舉令「大非」出售透明化，市場人士認為可減少捕風捉影，這是中國證監會的救市招數，應有助市場回穩。
　　上週講到止蝕，惹起網友回嚮，還想再清楚說明。網友木子說：「陸 sir 今早的話﹐算是說對我心了。其實在最近這升浪前﹐還在二﹑三月吧﹐哪時很多好股的價位都掉到接近陸sir 今天所說“非常平”的情況了。而且市況波動﹐每每兩三天就有10%過外的跌幅。哪時有些人還死抱著止蝕﹗止蝕﹗止蝕﹗的炒作方式。結果無端端的把一些實力股在低位放跑了﹐還虧了錢。多冤﹗」
「我不是說好股就不會像當年的8號仔﹐但這情況到底多嗎﹖我想統計一下﹐問問有那些網友﹐在前陣子把匯豐﹑中移動等大股止蝕的﹖出來說說自己的感受。止蝕後﹐得來的錢都怎用了﹖」

陸羽仁舉出不同的例子講止蝕，就是想大家有一個立體的感覺，讓大家可以確立一些規則，去管理自己的股票戶口，而不是盲目去估計後市走向，造了轉體３６０度的高難度動作而不自知。

我建議大家還原基本步，主要看兩個方面，第一分清是「投資」還是「投機」，第二是看自己倉位大小，判斷自己暴露在多大風險中。我認為分清這些理念，按規則去投資，比去估大市明天的走向更重要，你即使估中如今大市係熊市第１．５期反彈的第３次回調的第５隻腳（我亂講你唔好信），若是買股的方法唔啱，估中都可以輸大錢。

我叫大家分清是「投資的我」還是「投機的我」，我講了一百遍，還是會再講。在股市在３００００點時，我見到有些好朋友在狂炒，私下會叫佢小心啲，但有個朋友的反應好有趣，「佢會話我知o架啦，我炒吓啫，唔對路會走o架。」聽佢咁講，佢講明係投機，又話自己識做，我又唔係佢老豆，當然不應再枉作醜人，我的確不知道狂牛最後衝到邊個位會停，最後幾日衝多５０００點都唔奇，在旺市又點可以逼人唔買股呢？

不過一個浪跌下來，那個講「我知啦」的朋友一股都無止蝕，跌到２０５００點那日問我點算，我心諗「我點知點算」，唯有做社工安慰吓佢，叫佢坐吓貨先，話可能明天會更好之類。我想佢當日口講「我知啦」，其實一啲都唔知；口講「唔對路會走」，其實完全無諗過會止蝕；人在酒色財氣中，我叫佢抽身而出，佢講乜嘢都只係應酬吓我而矣。

所以投機一定要止蝕，投資看情況決定止唔止蝕。你檢討一吓買入股票的真正價值，簡單到睇市盈率都得，檢討一下自己組合暴露在多大風險下，如果如木子所講買入匯豐（００００５）和中移動（００９４１），唔係話佢地暴跌完唔會再暴跌，而係話即使股災到來，股市再大插，過幾年佢地的股價都有望見家鄉，而自己組合持貨又唔係咁多，又唔一定要在大插時止蝕。股市大插的日子，往往是長線投資者買貨的時候。

人人情況不同，處理手法可以有好大差別，所以我好奇怪，為何一些股市名咀，可以聽到一些老人家買股坐咗艇打電話上電台時，可以叫佢唔怕再溝淡，如果老人家成副身家買咗隻股，跌咗一半，你仲叫佢溝，實升o架？唔升老人家頂唔順點算？

所以木子的長線投資可以唔斬倉，牛腩貓咪短炒唔斬唔得，阿Ray話想揸外匯掛鈎票據我好反對，但佢再講可能只佔佢組合極少部份，我又覺得無問題，各人情況、各隻股票的狀況千差萬別，不能一概而論。還原基本步，搞清楚投資和投機的手法，按紀律行事，可以確保輸少贏多。

陸羽仁

美股偏軟，主要係美銀公布業績唔靚仔，因為要撥備６０．１億美元，首季業績跌７７％，差過預期。不過其他公司業績理想，花旗調高蘋果電腦估計盈利，對科技股有支持，道指微跌２４點，跌幅０．２％，收１２８２５點，美股在金融股差勁時展現少少抗跌力。港股ADR價有調整，日股早段又跌百幾點，港股又進入調整格局。

　　昨日講緊止蝕，網友平凡人提到中化化肥（００２９７）事件，也是一個好例子，中化化肥上周四開始急跌，由當時７．０５元，累積跌到昨日收５．２９元，三個交易日夾埋跌了２５％，在中化化肥急跌之時，市場唔知乜事，平凡人睇到上周四晚中央電視台二台經濟半小時節目，講到今年以來化肥價格大漲，過去一年漲了１００％，化肥是種地的主要成本，農民很苦，因爲他們所種的糧食成本主要是化肥。國家為控制化肥價格，準備徵收化肥出口特別關稅100%，節目又點名批評中化化肥。
據平凡人引述，中央台二台訪問了化肥專家、全國政協常委武四海，他說中國只有10家公司擁有進口化肥的權利，但今年的進口化肥只有中化和中農兩個公司得到進口的合約，其他8個公司談判失敗。中化化肥與外方簽約2008年的買價是人民幣（下同）1900元一噸，而在國内賣給農民是4000元一噸。中央台二台指稱中化化肥囤積進口鉀肥500萬噸，說的是100億元的利潤。

中化化肥昨天發了一個通告，表示不明股價跌因，公司亦沒有回應中央台二台的批評，所以我哋唔知有關批評是否準確，但中央媒體咁樣批判一家企業囤積居奇，亦足夠令投資者走避了。

即使中化下跌後，市價仍達３６９億元，今年３月底公布業績，去年盈利６．６億（現價市盈率４７倍），但公司公布業績時指業績倒退主要是衍生金融工具價值的變化所致，剔除這個因素，純利有１２．９億，同比增長４３％。中化是中國化肥業內大戶，盈利增長又快，所以能支持高市盈率。今年年初，大行對中化未來前景都比較看好，例如花旗集團曾經預期鉀肥價格上調１７％，將中化化肥０８及０９年度盈利預測，分別調升１０％及１２％，估計兩年度之純利料達２０﹒３８億元及２５﹒９３億元，花旗當時將中化化肥目標價，由６﹒７元調高至７﹒６元，並給予其「持有」投資評級。所以中化在３月底公布業績後，核心業務增長符合預期，股價又上番７元樓上的高位。

阿爺要嚴控通脹，糧食價格是主要控制的對象，農民投訴化肥價太貴，找化肥專家問一問，專家話中化囤積進口化肥謀巨利，結果可想而知。投資者一聞到味，自然走避。

今日的題材仍是講止蝕，上星期四中化跌６％，當晚中央台節目出街，星期五中化再跌１０％，假設不少中化的股東不知道中央台的節目批評中化，財經評論員還說中化急跌是中國徵１００％化肥出口稅所致，若你是中化股東，應否止蝕？

如果我係中化股東，如果買中化主要為炒業績的投機心態，遇上這些無名腫毒，唔知點解無情情急跌，一定會止蝕，因為呢個世界咁多知情人士，佢地大手沽得，一定有理由，隻股短期都無運行，急跌完或會反彈，不過亦好難大升，亦有大戶出唔齊貨會等反彈再沽，所以小心反彈完再牛皮向下。

如果我係抱投資心態買中化的股東，見佢去年純利６．６億，剔除金融投資純利１２．９億，增長４３％，大行原來估佢０８年純利２０．３８億元，但在中央可能會出手嚴控化肥價格的前題下，仲有無可能有咁大純利增長呢？唔確定。中央唔干預，４０億純利都唔奇，中央干預，２０億未必做得到。中化當然可以靠母公司注入資產來增加純利，但股價下跌集資力弱，母公司是否願意調低價格注資也成疑問。中化純利增長有很大不確定性，長線投資者唔沽哂都應該沽一半，換番第二隻前景較穩定的股票可能好啲。若早前低位買入，另可以從一個角度考慮，若跌到成本價全數止蝕，不到成本價守吓。

我用這個例子想去說明，在股價不明原因急跌下，股東大多數要嚴厲執行止蝕，止蝕完隻股升番唔奇，因為跌得過份隨時有反彈，揸重貨者亦可能會出來頂吓，你要預咗有這件事發生，但止蝕係防止坐艇坐到大西洋的最好方法，留得資金在，那怕無股炒。

陸羽仁

美股顯著回吐，因為油價創新高和科技、醫療及消費類股份業績未如理想，令人憂慮次按危機的影響會由金融類股份擴散到各行各業，道指跌１０４點，跌０．８％，跌到１２７２０點，是最近一週以來最大跌幅。要睇吓港股在美股回吐時，有多大抗跌力。

　　呢一轉美國公司公布的業績未如理想，晶片製造商德州儀器因為電話公司訂單減少，股價大跌。醫療保險公司UnitedHealth Group 因為僱主購醫保減少，股價跌近１０％。Coach Inc.因為銷售手袋要增加折扣，影響盈利。總之間間公司都有點負面東西，美股難免受壓。

　　美元還在反覆偏軟中，油價升到近１２０美元一桶，早前有證券行預計會升到１５０美元，雖然人人都話升到這個水平無一個國家頂得順，但從炒作角度，都唔係無可能挾到這個水平。

　　美元兌歐元又創新低，曾經跌穿１．６美元，在亞洲市早段造１．５９７３美元，主要係歐洲央行維持利率不變，而美國在月底又好可能再減息，支持歐元匯價。按美國利率期貨的交易價顯示，８２％交易員估計美國聯儲局月底會減息０．２５厘，其餘估計會維持利率不變。

　　歐元在４月已升了１．２％，而今年至今更升了９．５％。歐洲央行正在進退維谷，本想降低４％的主要借貨利率，但３月歐洲通脹升至１６年高位３．６％，減息又怕刺激通脹，唔減息造成高匯價，又怕會步美國後塵陷入衰退，歐洲挾在兩難之中，歐元係咁升，而家匯商沽美國減息後，歐元短線會炒上１．６５美元的高位。

　　美元兌日圓匯價暫時還企到吓，在亞洲市早段兌１０３．０９日圓。高盛本來估日本央行今季會減息，但最近已放棄此看法；市場開始估計日本央行下週發表經濟展望報告時，甚至會暗示中長線日圓會加息。現時的情況和六個月前的估計比較，日本的經濟增長低過預期，通脹增長快過預期，但日本央行多數會採取一種觀望態度，利率暫時不升不降，而非調頭減息，而日圓利息長期過低導致的不正常現象，長線還需糾正。

　　另外，加拿大央行宣布減息半厘，受美國次按危機影響，加拿大經濟有放緩跡象，加拿大央行減息回應。

　　美元大跌，油價大升的循環還在繼續，搞到全世界匯市、商品市場立立亂，網友阿Ray問我，美國經濟的危機是否還在深化中？他亦問到我早前話識一個金融猛人睇美國樓市可能衰到０９年，但金融市場今年４、５月等埋銀行第一季業績，就會可能會見底，唔知佢而家點睇？

　　美國次按危機對金融市場的影響，短線有少少舒緩跡象，至少不是在擴大中。對美國後市有兩種看法，睇經濟的人傾向睇得淡啲，認為美國仲有一排衰，但睇金融的人傾向睇好少少，頗有偷步入市的味道，例如我所講的金融猛人，還是維持當時的看法，美國銀行業績未有太大驚嚇，而家等埋第一季經濟數據出籠，若數據一如所料地壞，不是出人意表地壞，他預計金融市場會延展一段較長的反彈浪，之後再牛皮觀望信貸市場的走向。我就加一句，香港要睇埋大陸，如果大陸市不斷大跌，會拖住港股，反而若大陸市觸底反彈，港股就有第二個引擎，未來有機反覆向上。
陸羽仁

　　　　美股道指昨日升４２點，升番上１２７６３點，但今天的焦點恐怕不是美股，而是大陸股市，阿爺昨日黃昏宣布減股票交易印花稅，由０．３％減到０．１％，即係打回去年５月３０日加印花稅前的原型，從新玩過。

　　消息出來之後，有評論員話政策無用，因為股民買股票主要睇升唔升，唔介意俾幾多印花稅。陸羽仁竊以為評論者未了解中國國情，亦未明中國股市的運作邏輯，雖然中央出減印花的重招，不是寫包單一定救得起股市，但話佢無用就有少少輕視阿爺的有形之手在大陸股市的作用。

　　大陸股市在去年旺市時成交大量增加，政府又加印花稅，搞到過去一年國家印花稅收入超過２０００億人民幣（下同），而股市的派息總額亦不及此數，股民整體俾稅多過收息，形成所謂「負收益」，本身已經唔係好健康。

　　更重要的是大陸是一個發展中的股市，股民炒心理多過炒基本因素，股市氣氛好的時候極好，７０、８０倍市盈率的股票搶住買，壞的時候特壞，２０、３０倍市盈率的股票無人吼，所以股市升跌的關鍵是股民對股市前景睇好或睇淡的心理。

　　而股民的好、淡心理，很多時是源於他們理解政府的政策，而非基於經濟或上市公司盈利前景的估計，近二十年大陸的主要跌市，都和政策有關，９３年是宏觀調控，９７年是股改將令大量法人股投入市場（就是現在實現了的非流通股分階段自由買賣，即所謂「大小非」減持），股民觀察政府的政策不利股市，特別是股市已炒高時，認為政府要砌低個市，就一窩蜂沽貨，造成跌市。到２０００年之後中國經濟漸入好景，企業盈利不斷上升，但內地股市有好長一段時間還是一潭死水，上證綜指在１０００點上下浮沉，證明在中國股市，即使經濟好，公司盈利好，也和股市上升無必然關係，股民等待一些政府的刺激股市的舉措，或許０５年１月２４日政府把印花稅由０．２％下調到０．１％，已是政府明示希望股市向好的舉措，但大陸股市亦要等到０５年年底才起步急升。

　　大陸股市今浪下跌，亦是源於政府的宏調政策，本來預計無咁大力，但見到通脹愈升愈高，政府愈出愈大力，已令股民心驚；本來預計雪災政府會鬆一鬆手，怎知政府無鬆手，更令股民膽震。從政府政策上來說，去年阿爺回應通脹初升時反應太慢，放虎出山，所以今年要加力補救，但股民見到政府宏調愈來愈大力，開始掟貨，跌穿４０００點後愈跌愈多，股民就不問價沽，慢慢形成惡性循環，打破了股民向好的心態，最後變得只有外資、社保基金和中金公司在接貨，若非這些大戶接貨，大陸股市肯定跌得更勁。

　　阿爺不想股市升得太顛，但也不想股市暴跌，因為大跌市既是社會不穩定的因素，亦會進一步拖到整個內需和經濟慢下來，阿爺雖然不想經濟過熱，但也不想打過籠搞到經濟太冷，所以股市跌穿４０００點時，已跌到阿爺的心防，密謀做嘢救市。

　　知情高人透露，在大陸股市４０００點時，減印花稅的方案已準備就緒，但當時怕太早推出，股市未跌夠，推完無用，股市再瀉，就無重招救市，所以一直隱而不發，觀察大市的底部在何方，外資在３５００點樓下大量湧入建倉，阿爺自然看在眼裏，在周日先推出限制「大小非」減持的救市方案，但大市未止跌，到本周二跌穿３０００點時，大市單日ｖ型反彈，中央見到時機已至，就一舉推出減印花稅方案。

　　阿爺連番出手，要救市的姿態極度明顯，主要是讓股民重拾信心，中央雖要宏調，但唔想打死股市，期望可以挽回股民的信心，相信股市先可在３４００點至３８００點穩定下來。如今還要看的是下月中公布的４月中國CPI數字，如果顯著回落，證明通脹受控，中央的宏調措施可以稍稍放輕，相信大陸股市有機重上升軌。

　　港股方面，昨天又出現和美股下跌背馳的情況，加上升穿２５０００點這個長期反彈的重大阻力位，這些可視為轉勢的訊號，只要美國不爆大鑊，港股有機會回到一個反覆向好的格局，當然要觀察回吐的幅度，每次回吐以不穿大位為宜。未來的走勢雖然不是一帆風順，但有機反覆向上，可趁升到咁上下回吐時，追一點紅色股也。
陸羽仁