美國股市盤整後又反彈，但臨近尾市時升幅縮細。美股開市前公佈的通脹升幅和緩，消除了市場對高通脹可能壓抑消費開支的擔憂，推動金融股和消費股上揚。第二大按揭證券公司房地美的虧損少於預期，也減少了市場對信貸緊縮的憂慮。道指由早段過１００點的升幅，到尾市收窄到升６６點，升幅０．５％，升到１２８９８點。

在電視看到溫總理和地震孤兒的對話，令人落淚，這麼年幼的孩子就失去了雙親，她們還有漫長的人生道路要走，誰來教養她們，誰去給她們家庭的愛？政府可以減輕傷痛，但是不能取代父母啊！中國人壽（２６２８）宣布，國壽慈善基金會負責地震遺孤的養育費用，直至１８歲為止，若能為他們尋找到寄養家庭，讓他們在正常家庭環境中長大，可能更佳。

談到教養小孩，看到網友均兒為女兒買A５０中國基金（０２８２３）的事，更覺要在孩子買股票之初，教導他們正確的觀念，否則唔覺意養成他們一種爛炒的個性，咁就唔買股好過買股了。

均兒想個女學習投資，就俾８０００元同佢買A５０基金，昨日的情況係咁：「我今日幫個女買2823，見臨收市2823都要掃上去。我個女今日打咗兩次電話問股票升唔升，我話升咗２毫，即今日賺100元，哈！個女問一個月會唔會賺1000元哦？我反而唔知點才能正確教個女，佢咁細個買股票到底對不對？」

問題唔係個女細去買股票好唔好，而係能否自細教佢對投資有正確觀念。若果教錯佢，愈早做就愈壞；如果教啱佢，就愈早做愈好。我而家唔太希望你個女買股太快贏太多錢，否則佢覺得賭股票賺錢太易，大個一定變成一個爛賭鬼。

均兒個女問啲問題唔係無道理，用８０００元買股票，一日就賺１００元，一個月賺１０００元有乜咁出奇，佢會咁計數，賺１０日咪有１０００元囉。所以你第一個要教佢的概念，係「股票可升可跌」，唔係一定日日升，升完會跌。如果一個月賺１０００元，個個月係咁，１年賺１２０００元，以８０００元本金計，即係升咗１．５倍，你要話俾佢聽，邊有咁易賺咁多錢，若果咁易，就無人去打工，個個去炒股啦！

你要教佢第二個概念係「長線投資」，乜嘢叫長線，無３、５年唔叫長線，你細路仔大把青春，更加可揸１０年、２０年。股票長線升抑或跌，主要睇間公司賺唔賺錢，公司年年賺錢，年年派息，隻股票自然跟住賺錢幅度升，賺得多，升得多，公司盈利增力２０％，理論上股價亦可以升咁多，唔好期望公司股價升得快過盈利增長好多。若果出現盈利升得少，股價升得多的情況，呢啲叫做「乾炒牛河」，升得無道理，短期就得，長期無可能。

　　A５０係一隻指數基金，揸住５０隻大陸大公司的股票，你買呢隻基金，等如投資咗５０隻大陸股票，隻基金升唔升，關鍵係睇這５０間大陸公司賺唔賺錢，睇大陸經濟好唔好。所以想隻股升，就要望大陸經濟好，望呢５０間公司做得好。所以細路仔買呢隻基金揸２０年，係望大陸經濟快高長大，一年經濟增長８％，呢５０間公司的盈利增長１０％以上，股價和盈利增長同步，咁就有運行。以「７２律」計，若股價一年升１０％，７．２年就可以番一番，A５０現價１８．３４元，７．２年後會升到３６．７元，１４．４年後會升到７３．４元，２１．６年後會升到１４６．７元。即係今日放低８０００元買股，２１．６年後會變成　６．４萬元。若果呢５０問公司的盈利平均年增長多過１０％，股價的升幅將會更大。小朋友將來錢多點，投入的本金多一點，長線的收益就大一點，呢啲叫做「錢生錢」，但小朋友有多餘錢食哂使哂，就無法錢生錢了。

　　第三個概念叫「低買高沽」，唔識高沽唔緊要，最緊要識低買，唔好貴買。A５０現價只能說不平不貴，不能說太便宜，３年前大陸股市未郁，上證綜指１０００點時，A５０只是６、７元一股（如今已１拆５，即當日未分拆前３０、３５元一股），如今上證綜指３６００點，A５０是１８．３４元一股，但最高峰去過２８．９元，現價中中地，由於不是買得太低，有下跌風險。記住教細路買股，先要計跌，才計升，股價跌落去自己承受得了，才好買股。要告訴孩子１８元買A５０，跌到８、９元都唔奇，但長線可以上番去，唔好一買股就諗住會發達，發達之前可能先仆一仆先。

　　長揸股票一般唔沽，但若果股市升得太顛時，沽少少都無妨，用上面的計法，假設A５０背後５０間公司的平均年盈利增長只有１０％，但股市狂炒，A５０升到３６元，甚至７３元，即係話公司股價提前反映７年、甚至１４年的盈利表現，當然可以沽貨。（記住上面的數字只屬假設，若公司盈利以２０％、甚至３０％的平均速度增長，又是另一堆數字）。背後的道理是公司股價升得太顛，大大脫離基本因素反映的合理股價時，沽貨亦無壞。２０００年時的電盈（００００８），就出現咁情況，你點計都計唔出佢值３０００億市值，唯一合理的行動係沽。

　　第四個概念叫「股價不為真」，股票市場每天出現的股價，唔好當真，十分虛妄，係一群瘋狂的人用瘋狂的方法定出來，股價唔係太昻貴，就係太便宜，如一隻百厭小狗，主人拖住佢行，但佢永無聽主人話慢慢行，唔係走得太快，就係走得太慢，所以長線投資者不用天天看股價，要看的只是經濟大勢和公司的基本因素。

　　小朋友最重要的事情是學習和遊戲，不是炒股。家長要把投資當作遊戲，教導他們正確的投資觀念，當可一生受用。

陸羽仁

　　美股又升，由於晶片全球需求上升，刺激晶片股價，而油股相對油價亦顯得便宜，油股又升，道指全日向上，升９４點，升幅０．７％，升上１２９９２點，而標普５００指數升上１４２３點，創出４個月的高位，看來道指亦將要衝高。

　　有網友提到買「牛熊同體」的問題（即同時買牛證及熊證），問係唔係等如買「馬鞍式期權組合」，當中涉及一些投機的概念，值得一談。

　　衍生工具的源起，是作為實貨生產者、交易者、投資者的對沖工具，麵包商人預期小麥會漲價，令麵粉價升，所以事先買入小麥期貨，以對沖將來麵粉價升推高成本的風險。但後來搞吓搞吓，搞出金融工具的期貨、期權，例如指數期貨，好多人只是單邊買入，炒作一個方向，完全沒有對沖的意義，變成純粹的投機。

　　我經常講，投機唔緊要，要知道自己在投機，知道投機等如在賭博，用正確的方法去投機，並且控制注碼，小注怡情，並無大壞，你去澳門入賭場，一般人唔會攞全副身家５萬、１０萬去賭一舖，但如果你唔知自己係賭，攞全副身家買窩輪，好容易一舖賭身家。

例如講睇市，好多人賭一個方向，估個市升定跌，贏時全贏，輸者輸清，所以熱切討論買牛仔定買熊仔（即買牛證及熊證），考眼光，賭一舖。

你叫我估今個月大市到期指結算前的走向，我會咁估，現時係大波動的前夕格局，呢個月唔似會好牛皮咁完結，意味著指數不是停在現水平完結，可能有大波動在後頭，唔係大升就係大跌。一般人的反應會話，咁講咗等如無講，咁即係升定跌啫？問呢個問題的人唔係專業炒家，炒家首先要決定有無波動，無波動，好多嘢都無得炒，有波動，單係波幅已經可以炒（炒波幅方法容後談）。

但你再追問我點估呢個月大市方向，我會估向上突破，命中機會約７０％，即係有３０％機會估錯，估錯時大市下挫或唔升。如果係咁，假如我係投機者，除咗全線睇好買認購期權之外，又可唔可以同時買番少少認沽期權來對沖風險呢？

假設我本來想買１０張２６０００點的認購期權，期權金是２９８點一張（每點５０元），即係話結算時，期指結算價要升到２６２９８點（２６０００點加２９８點），才可收回成本，要升到呢個水位以上，才可以有錢賺。但我都係相信自己只有７０％機會命中，另外３０％機會錯，可能牛皮市，即使有升都不能升到２６２９８點咁高，或者係跌市，咁又可唔可以同時買少少認沽期權來對沖風險呢？如果我買番２張２５０００點的認沽期權，期權金３５２點，即係話期指結算時，期指插到２４６４８點以下，這些認沽期權就有得賺，可以補番少少買認購期權的損失。如果把呢兩張買保險的認沽期權期權金加起來，共付７０４點，將呢筆「保險金」計入原先買認購期權的成本內，１０張認購期權，等如每張多付７０．４點的保險金，加埋原先每張２９８點的期權金，加埋保險費的成本是３６８．４點，即係期指在２６３６８．４點樓上結算，才可以賺錢。假設大市走勢愈來愈對辦，朝向我估的向好走勢，我認為最後估中的機會上升到９０％，那時可以沽出作對沖的２張認沽期權，收番少少渣，減少對沖成本。

買輪的原理和買期權一樣，所以話「牛熊同體」，同時買牛輪和熊輪，不一定係等量，除了買自己估計走勢的窩輪外，亦可以買少少自己估的走勢相反的窩輪，作為對沖。記住這些衍生工具時間值天天耗損，睇一段一唔啱方向，要馬上斬倉走人。

另一個可能係純炒波動，不炒方向，以期權為例，上述提到的「馬鞍式期權組合」，就係同時買入同一月份相同行使價的認購期權和認沽期權，例如你同時買入５月結算２５２００點的認購期權和認沽期權，認購期權的期權金是７０４點，認沽期權的期權金是４２２點，同時買一份認購一份認沽合共付出１１２６點，你要賭期指將有大波動，一係大幅向上走，一係大幅向下走，向上期指結算價要在２６３２６點以上（２５２００點加１１２６點），才有錢賺。向下期指結算價要在２４０７４點以下（２５２００點減１１２６點），才有錢賺。

另有一個類似的方法是買入「勒束式組合」，即買入相同月份但較高行使價的認購期權及較低行使價認沽期權。它和馬鞍式組合不同之處，它不是買入同一認購價的認購和認沽，是買入兩邊都價外的期權，例如買入２６０００點行使價的認購期權，期權金是２９８點，同時買入２５０００點的認沽期權，期權金係３５２點，兩邊共付出６５０點的期權金，即係話如果期指升，結算時要升到２６６５０點樓上（２６０００點加６５０點），才有錢賺，如果跌，要跌到２４３５０點樓下，才有錢賺。

買入「馬鞍式期權組合」或「勒束式期權組合」，亦都係牛熊同體，而且不賭走勢，只賭波幅，買入這些組合對大市走勢的看法中性，但估計有大波幅，所以才這樣下注，若果大市波幅不如他的想像，以上述的例子，期指在２４３５０點至２６６５０點中間結算，買入勒束式組合就會輸清。所以倒過來說，如果你賭波動不大，就要做沽家，沽出馬鞍式或勒束式組合。

你睇完我講上面一大堆東西，或者睇唔明，或者覺得自己不會炒得咁複雜，但我想話你知，窩輪和期權的原理一樣，如果你唔明期權的運作，亦都唔會明窩輪的運作，咁樣最好唔好炒輪，否則你買窩輪睇錯方向固然會輸錢，睇中方向亦贏唔到錢，皆因你未明它的運作原理。

另外，炒作大市方向，只係眾多炒作方式的一種，你亦可以炒方向之餘買保險，亦可以不炒方向，只炒有波動或無波動。炒作世界，要求極高水平的操作，普通人無咁既時間和智力，貿然參與炒作，交學費者多，好難贏錢。

陸羽仁

我寫「炒波幅」的網誌，真正目的不是想教大家去炒波幅，相反地，係想嚇怕大家，讓大家唔好亂咁去炒波幅，至少唔好覺得炒波幅好易贏，其實大部份人想追逐大市的波幅，炒來炒去，經常進出，好易得個桔，其至手上個桔會愈玩愈細。

我在文中說「炒波幅方法容後談」，其實文中的後段已談了，講了一種專業的方法，我可以再總結一下，股市有方向，升或跌，你可以買方向；但股市亦有波幅，經常上上落落，你可以不買方向買波幅，甚麼叫買波幅，就係賭大市的波幅大或波幅細，你估波幅大，就可以如上文那樣，買入一個「馬鞍式期權組合」，或買入一個「勒束式期權組合」，因為估計大市會大幅向上或向下波動，當最後如你所願，大幅波動，即使計入買入雙邊期權的成本，你還有錢賺。倒過來，如果估計大市波動較細，就應該反過來做沽家，沽出「馬鞍式期權組合」，或沽出「勒束式期權組合」，因為估計大市只會輕微波動，例如在１０００點的水位上下行走，只要最後波動不超出你上下沽期權的範圍，就可以上下期權金都殺哂。

我估計我寫這些東西，有一半以上的網友睇唔明，我寫來嚇吓大家，睇唔明就唔好亂做。你可能話，從無買期權，你唔使嚇我。我就話，你同時買入價外的牛證和價外的熊證，就等如買入一個勒束式的期權組合，如果你唔怕佢o既原理，你又點炒呢？

窩輪等如期權，但期權不但可以做買家，也可以做沽家（沽家有無限風險，散戶不應輕易嘗試），但散戶在窩輪交易中只可以做買家，沽家只可以是發行窩輪的輪商，唔好以為你買了認沽輪就做咗窩輪沽家，你只是買入一個認沽期權而矣，仍然是買家。

我見不少網友話佢牛熊同體，即是同時買入認購輪和認沽輪，我就話咁樣等如買入「馬鞍式期權」或「勒束式期權」，如上面所講，做這些期權的買家，你應該係估計大市會大波動，一係大波動向上，一係大波動向下，如果唔係咁，你好難賺錢。

但現實中我覺得散戶話做牛熊同體，背後原因可能只係睇唔準大市的方向，唔知大市想升定想跌，又唔知佢波幅大細，只係唔知佢想點，所以同時買牛證同熊證，並唔係估佢有大波幅才去買；不明原理去買衍生工具，胡亂去賭，短線可能贏可能輸，但長線必輸。為何短線可能贏？若果踫啱（不是散戶估中）真係有大波幅，同時買牛熊證就會贏，這種叫做「棍中」；為何長線必輸，你都唔係用理性的態度去炒，長線點可以鬥得贏發行商？俾你贏一次，兩次，最後你都會輸番哂。

當然散戶也可以話，我唔係賭得咁高章，只係炒吓上落，同時買入牛證和熊證，股市跌先沽熊證，到升番又沽牛證，賺少少差價而矣。但窩輪和期權都有時間值，少少差價都唔易賺，反應一唔夠快，就會錯過沽貨時機，唔係咁易兩邊賺，衰起上來可以兩邊都沽唔切。作為窩輪買家，第一好難長揸（除非做對沖），第二若買入後大市發展唔符合原先所作的理性假設，就要馬上離場。用上面的例子，同時買入價外的牛證和熊證，等如買入勒束式期權，賭緊有大波幅，如果過十日八日大市仍然無乜波動，唔係太對路，就要馬上清倉離場。

若果你矇查查同時揸入牛證和熊證，原因只是你不明大市走向，都月底大市仍然唔上唔落，牛牛皮皮，狀況和你原先買入的狀況接近，你兩邊都無沽，同時可能沒有太多危險的感覺，你根本唔知道牛皮市就係殺死勒束式期權的最差市況！呢啲就叫做唔識炒就亂炒啦，窩輪有時間值，期近結算的窩輪時間值減值的感覺愈快，你唔覺意坐佢十日、八日，可能已唔見２０、３０％，你更加唔想走，最後就可能輸清收場。

窩輪如期權，背後的理論好深奧，你唔明最好少賭。若然想再賭，用一個「結果決定」的方式檢討一下，過去炒窩炒咁耐，唔理你用乜方法乜理念，先計一計累積有無賺錢，如果累積有賺，可以繼續炒，如果累積要輸錢，證明你未到家，就少賭為妙。低價買入好股，唔揸長都揸佢三、幾個月，可能較易贏錢也。

陸羽仁

我相信大部份在股市短炒的朋友，都在捕捉大市或個別股票的短波幅，希望走一轉，賺點錢。

我經常話炒波幅難賺錢，早兩日的命題是「你對炒作的工具理解咁少，點可以利用佢嚟賺錢呢？」你唔了解窩輪背後期權運作的原理，的確好難炒輪賺錢。

今日再講另一個題材：對手，對手太強時，你好難賺錢。你唔知你炒緊波幅時，好多時同緊大戶、大鱷做對手，你當然輸多贏少啦，因為大戶就係製造這些短線波幅來搵食，你入去想搵嘢食，自己就變成人地的食物。

賭錢也好，賭股票也好，賭任何嘢輸錢，輸兩樣嘢，第一輸抽水，如果開賭檔者抽水，呢個抽水者一定贏，四個人在一間士多租枱打麻雀，士多抽水，士多永遠贏。第二輸對手，據職業賭徒統計，在拉斯維加斯賭場的賭枱，七個人在同一張枱賭百家樂，大約有２個係職業賭徒，２個係半職業，仲有３個係遊客，對手有強弱，在呢個環境，當然多數係遊客輸。

以賭馬為例，以前先由政府抽稅和馬會抽水，兩者先抽去３０％（而家政府改為抽馬會利得稅，複雜少少），餘下的７０％才是彩池，即係未賭先輸３０％抽水，然後賭客中有大量職業賭博集團在香港馬場搵食，結果是散戶賭客和職業集團爭逐餘下７０％的彩池，等如細路仔同空手道黑帶五段打交，結果可想而知，職業集團在被人抽水３０％的前題下仍能贏錢，散戶賭客的處理當然惡劣到極。

股市抽水不多，印花稅和經紀佣都有限，賭股票主要輸對手，股市對手超強，全地球最高智慧的生物都集中在股市內，你去炒波幅，就係同佢地做對手。

網友均兒提到她和大陸妹妹炒A股的經驗，就是一個活生生的例子。均兒咁話：「人的運氣可遇不可求，即話貪心求勝多數輸收埸。（去年）我自己有一個預感，估人民幣會升值，如果當時我存定期一年好似係4.27厘，即一年20萬有8仟幾元利息，加上升值，一年的回報真係好和味。但係我貪心，心想放喺銀行不如買地A股，幾年后又可以再翻倍哦。跟住就向鄉下個妹妹學大智慧，又飛回去借咗鄉下個哥哥的戶口，分散買左三隻A股，中國人壽601628平均價係56元（人民幣，下同），佔60%，中鐵601390平均價10.6元，佔30%，廣深鐵路601333平均價9元，佔１0%。當時我覺得組合好靚，10%廣深用來短炒，佢平時好呆，但正值過年前春運期，期望佢炒一波，結果美夢好快變惡夢，春運碰上大雪災，我係大陸股市5000點時買落的A股，好像吃咗瀉藥，一瀉不止。其實我個妹妹炒波段好叻，破咗5000點佢叫我止蝕，我係都唔制，重同佢講道理，話我要長線，好像巴菲特咁。我妹罵我神經病，破咗4000時，我個妹日日打電話來吵，我一於泰山壓頂不彎腰，不理她。結果還是不停的跌，此時己跌到我心慌慌。」

「其實我不是很緊，相信最多守返兩年又可以見返家鄉，但鄉下人唔同，話我回去炒股票輸大錢。我個妹愛面子又唔抵得，日日吵到我頭痛，話現在一定是底部了叫我回去補貨，把成本拉低，於是上個月八號風球那天我匯了二萬元回去，但我叫個妹買招商銀行。這次好好彩，那個星期一30元邊買到招銀，第二日即刻降印花稅，我幾開心呀。係QQ見到妹，我重未開口，佢即刻話：我放了，32.5元放了。我當時哦到出唔到聲，唉！佢話有大小非，會再跌，我叫佢再跌也買招銀，結果她又在34元買，32元放，這次波幅輸咗，跟住又系31元多買入，話這次不會輸哦，因為這次我話由佢做主，費事佢來吵我。」

「炒波段30元買32元放，贏。34元買32元放，輸。再31.5買以後未知。如果30元買唔放依家都係32元。想返如果當時存人民幣唔知幾好，或者喺珠海買層樓重好過，但喺人身歷其境時，你根本唔知以後形勢變化會點，人係沒早知，如果有早知，早已富可敵國了。」

均兒和佢個妹係兩種典型，均兒高位買貨死揸，佢個妹妹出出入入炒波幅，兩個炒股都有不同的死法。以均兒的例子，高位買，急插唔止蝕，會輸到入肉，長線投資者唔應該喺高位買貨，倒轉來講，喺高位買貨唔可以話自己係長線投資者死揸唔放。

不過均兒的妹妹更是典型中的典型，這是最爛炒的型態，也是經常炒作散戶中的最大族群，他們自以為是老手，短買短放，出出入入，時贏時輸，花了半生時間在股市，叻少少啲一場白做，無乜贏輸，差少少的經常出血，但輸極都唔怕。這種散戶只有在大升市時才能賺錢，好似去年９月、１０月的市況，由於股市急促向上，散戶盲目入市短炒都經常有水執，所以這種市況，也是散戶最「牛」的時候。但你要問，若散戶日日贏錢，咁邊個輸錢呢？

正如我所謂，股市有大戶，他們是散戶的對手，香港有外資，大陸也有大戶，傳說大陸有間大保險公司，預知宏調就快殺到，在大陸股市５０００點、６０００點時做了「空軍一號」，大手沽貨，最後獲鉅利，當大陸散戶大買特買時，就係同呢類空軍一號對賭，大陸的市場最受政策影響，大戶掌政策走向，財雄勢大，散戶和他們賭，結果可想而知。散戶平時炒波幅，炒上落，每次俾大戶抽少少水，積少成多，計埋已經輸唔少。到股市大升時，散戶博命落注，更是一舖俾大戶抽大水，輸身家。

你想炒股賺錢，就要照吓鏡，睇吓自己有無咁o既智慧和EQ，唔係去打贏大戶，而係跟佢車邊，殘殺其他散戶，食番少少餸頭餸尾。

陸羽仁

美股跌完再急跌，昨日因為聯儲局公布早前議息會議紀錄，顯示聯儲局不會再減息，加上油價再急升，令人擔心通脹上升，影響經濟增長，道指再急跌２２７點，跌幅１．８％，收報１２６０１點，險守１２６００點大關，看來港股又要先捱一捱沽了。

我早兩日講到，「你想炒股賺錢，就要照吓鏡，睇吓自己有無咁o既智慧和EQ，唔係去打贏大戶，而係跟佢車邊，殘殺其他散戶，食番少少餸頭餸尾。」
  
呢句說話引起不少迴嚮，經紀張炒股三十年，都算有啲斬獲，佢話自己贏錢時經常講，「睇吓我幾掂，連大戶都砌低呀！」直至到睇完我篇文，先知道自己贏錢時，只係砌低散戶，唔係砌低大戶。
  
我笑經紀張，「你玩咗幾十年都唔知？當局者迷啦。你邊可以砌低大戶呀，你睇美國排頭位的大行，季季賺大錢，直至最近才衰在自己製作兼推銷的次按證券手上；你睇美國排頭位的對沖基金，亦係年年執大水，大戶絕大部份時間贏大錢，要輸都係散戶輸，有一個散戶贏，就有更多散戶輸。你入賭場賭錢，咁好彩贏錢走，唔係賭場輸俾你，係其他散客輸俾你，賭場經營幾十年，你賭一舖可以好好彩贏到佢，賭１００舖賭場已經差唔多贏梗，宏觀啲講，賭場一定係最後勝利者，你偶然賭幾舖贏吓，都係贏到隔籬嗰個賭客啫。」
　　
散戶入場炒股，第一個心態就應該知自已渺小，知道對手巨大，但偏偏好多散戶唔知，將自己放到好大，以為自己經常睇得啱。著名投資人彼得林治(Peter Lynch)在《One Up on Wall Street》一書中，亦講到股市投資者常犯毛病，就係相信自己對股票的直覺，覺得自己有感知股票升跌的秘技，他們有時會強烈覺得某隻股票會升，但事實正好相反，買入之後無幾耐隻股就跌。這並不是因為股民特別愚蠢，而是因為他們感知那些令股市升跌的訊息時，已經太遲，那些訊息已充份、甚至過份擴散，到他們按訊息買入時，已是水尾，甚至是相反走勢的開始（P.81）。
　　
　　網友mocha早兩日問的一個問題，亦反映了投資者的自我過大，佢問：「陸 Sir：網龍 8288 公佈零八年第一季業績，收益明顯比對上兩季下跌，所以股價應聲下跌，但跟據其業績報告，網龍將於五月低納入 MSCI 中國指數成份股，而且，今年第二季將會陸續有多款新 game 推出巿場，預計帶來滿意收益。」

「現在，我所考慮既問題是：
1. 季度業績報告只是輕輕一句說五月低會納入 MSCI 中國指數成份股，可信性有幾多呢？
2. 由於早前我對網龍滿有信心，可惜，呢一季出現不理想業績，不過仍處於盈利階段，令我相當矛盾，若然沽貨離場，便等如承認睇錯巿，唔能夠過自己心魔一關。
3. 還是，我應該學習股神巴菲特一樣，價值投資，因為我仍深信中國網絡遊戲巿場仍有無限增長潛力。」
  
　　我對網龍無深入研究，我唔知網龍得唔得，只想講講Mocha的心態一定唔得。佢嗰句「若然沽貨離場，便等如承認自己錯誤，唔能夠過自己心魔一關。」我真係要勸Mocha一句，如果唔想沽貨離場的原因係唔想承認錯誤，你以後都唔好買股啦，買股以自己為中心，死十次都未夠，不如月供盈富基金算啦。你呢種唔認錯的心態，一葉障目，一塊樹葉就遮住你睇全世界，要戒。

　　陸羽仁認為，自己的觀點，睇啱時有價值，睇錯時一啲價值都無，假設自己七成睇啱，三成睇錯，睇啱時堅持，要賺多啲，睇錯時半點都不用堅持，轉得快，好世界，要即刻認錯，要即刻斬，甚至反手做，咁就輸可以輸得少，贏得多輸得少，最後加加埋埋就會贏。人的Ego（自我）一個仙都唔值，唔值得堅持。
  
　　但在現實生活裏，問誰能做到？結果大多數人只係「輸就谷，贏就縮」，輸時堅持己見，錯上加錯，見跌溝淡，接到成手貨。贏時就騰騰雞雞，因為平時唔係贏咁多，唔敢去贏，只想保持這個寶貴的勝出經驗，四圍同人分享，所以贏少少就離場，錯過食大茶飯的機會。

　　好多散戶想在股市炒炒吓搵食，但現實上，先輸方法，再輸對手，三輸EQ，無大戶的EQ，點扯住大戶的衫尾搵食呀？

陸羽仁

　　美股道指上周五再跌１４５點，跌幅１．２％，連１２５００點都穿埋，今早日股開市都唔靚仔，日經指數早段跌２５７點，跌幅１．８％。港股今日明顯受壓，特別係受大陸電訊業重組影響的中移動，有可能會進一步拖低大市。

國家工業和資訊化部、發改委和財政部聯合發佈通告，進一步披露電訊業重組詳情，將國內五大電信運營商合併爲三家，照此計劃，國內電信市場將形成中國移動、中國電信和中國聯通三足鼎立的新格局。

上述各部委在通告中表示，此次電信改革旨在形成適度、健康的市場競爭格局，防止壟斷和過度競爭及重復建設。官方公佈的重組計劃，就是陸羽仁早前講過的「五合三」方案，過去只經營固網的中國電信收購中國聯通的CDMA網的資産和用戶，首次涉足流動電話業務，中國衛通的基礎電信業務並入中國電信。中國聯通則與中國網通合併，而過去經營固網的網通亦透過與聯通合併及取得３G牌照，踏足流動電話市場。而現時的流動電話霸主中移動的母公司中移動集團，將會收購鐵通。

除了運營商內部的調整，3G牌照的歸屬也一直備受關注。三大部委在通告中指出，將在電信重組後發放3張3G牌照，支援形成3家擁有全國性網路資源、實力與規模相對接近、具有全業務經營能力和較強競爭力的運營商。

要明白收購的影響，首先要明白現時中國電訊業的格局，現時是中移動一家獨大，主要因為它壟斷了前景最好的移動電話業務，它使用的是GSM歐洲制式，是世界上最流行的形式，電話機款式多，價錢較便宜，競爭力極強。目前中移動的競爭對手是聯通的CDMA，這種美國制式的電話，全球使用不廣泛，令電話機選擇較少，據說機種選擇只是GSM的１０份之１，而且價錢較貴，令聯通的CDMA生意唔生唔死，對中移動缺乏競爭。

而固網市場就由網通和中國電信一南一北地分割，由於大陸電訊業是跳躍式發展，好多地區移動電話和固網同時發展，有些家庭未有固網電話已有移動電話，令固網市場成為一塊豬頭骨，食之無味，棄之可惜，兩間公司前景大受限制，唯有力爭寬頻市場，令這個市場爭到頭崩額裂，舖網成本大，生意利錢不高。

由於出現中移動一公司獨大的局面，其他電訊公司無法競爭，所以阿爺就借３G出台的機會，重組電訊業。將現有５間公司合組為３大集團，最後３大集團都可以有３G經營牌照，希望在新平台之上競爭。

三大集團各有所得。首先是聯通和網通，聯通賣走經營不好的CDMA業務，套取現金做３G，它將會獲得最好的歐洲製式３G牌照，這種製式將會有最多話機選擇，有一定的競爭優勢，唯一的牽制是阿爺要先發展內地制式的３G業務，所以聯通和網通的３G推出時間最快也要明年，在這個組合中，最有利的網通，它是由固網公司，一下子跳到經營歐洲制式的３G。

中國電信也是由固網商一下子跳到流動電話業務，它是先做CDMA，再做３G，雖然話CDMA係豬頭骨業務，但中國電信有錢但沒有做流動電話業務經驗，先實習一下也不壞，但未來它獲得的3G牌很可能是美式，這一點在３G競爭上較弱，但中國電信錢較多，打通一條流動電話業務給它，長遠就有生機。

中移動表面上受損最大，因為一下子多了兩個較強的移動電話對手，在３G平台上競爭，中移動的３G是國產制式，技術上不太成熟，但阿爺先讓中移動的國產３G出台，讓它有半年至１年的優勢，先搶市場。

目前大陸電訊業重組，短期內是一個亂局，對三大集團的實質影響未明，長遠來說，中移動應該仍有機會維持一哥地位，其他兩大集團仍不易挑戰其地位，但未來內地電訊市場的收費會受壓，壟斷性收益肯定會減少了。

陸羽仁

　　散戶去賭錢，去炒股，永遠都在想一些必勝術，但你可能不知道，這些必勝術已經經過千千萬萬人研究過，答案是單個個人去賭場賭錢，係沒有必勝術，必贏的是機率佔優的賭場，然後會贏的也是玩機率的賭博集團，賭博集團係在機率缺陷下，仍然能在賭場（及馬場）嬴錢。

　　網友Kanas112去澳門，佢平時無賭錢，首次賭就嘗試找一些「方法」，他玩骰寶，用的方法是留意過去３、４舖沒有開的結果，然後去買，例如過去４舖開細，就買大，一舖唔中，加注再買，買到贏為止，他認為自己有機率優勢，因為開了４舖細之後，連開５舖、甚至６舖細的機率已經很小。

　　網友Wacko指出，這是典型的賭徒謬誤，以為每一舖的機率是有相關的。無錯，你未賭之前問，連開５舖細的機會率有多大？假設一舖開細的機率為０．５（實際上加埋開全骰真正買中率會略低於０．５），五舖都開細的合共機率是０．０３１２５，即係一百次只有３．１２５次會出現咁結果。但現實上每一舖是獨立的，無論你在連開４舖細之後買細，或者連開４舖細之後買大，機率同樣是０．５，不會話當時買大的機率，優勝過平時的機率。

　　Kanas112話用７００元贏了５０００元，很高興，真正令他贏的是輸時加注手法，但這個手法可以令人一般地贏，但最後輸一舖就輸身家。我聽過一個例子，有個富豪和朋友「鋤大D」，每輸一舖加注雙倍，由於是私人賭局，可以無限加注，點知佢連輸了２０幾舖，輸到過千萬，佢決定放棄，因為再賭落去，真係咁黑輸多１０舖８舖，佢可以成副身家一晚輸哂，賭博之害就是如此。記住最爛賭之人，都唔會覺得自己亂賭，都覺得自己有套方法，問題係嗰套方法唔得而矣。

　　Kanas112，信我啦，你講那個方法我研究過，唔係幾得。在我細細個時，阿媽過年和我們小朋友玩啤牌「三公」（平日不准賭錢，過年例外），我阿媽就係用呢種手法，大烚細，佢輸咗就加注，結果贏哂我地幾個小朋友，不過我大個後就知道呢種手法唔得。你贏一次錢，信咗佢得，愈賭愈多，不能自拔，最後一舖輸獲甘。

　　去賭場賭，證實咗得的賭法是用記牌方式賭２１點，一個集團有７、８個人，大部份是記牌員，有１、２個下注的狙擊手，例如６個人分開６張枱記牌，他們有一套方法，記下出大牌的數目，例如出一隻大牌就加幾多分，出一隻細牌又減幾多分，當餘數大到某一個水平時，就知道大牌出得七七八八，出現機率有利時刻，記牌員會暗中通知狙擊手到那張賭枱去賭，咁賭法都會有贏有輸，但由於機率佔優，長賭必贏，在機率佔優時，賭得愈大，贏得愈多。所以賭場一發現有賭博集團在運作，就馬上把他們記入黑名單，不讓他們再入場。

　　炒股講方法，錯誤的方法，唔會帶你到正確的目的地，散戶炒炒吓，好多時也用了似是而非的方法，上述講賭輸加注的方法，就等如買股輸咗加注溝淡，加注後博佢升番，就可以脫身，問題是溝咗一次得，就次次去溝，終於有一次溝著隻永不超生的雞股，一舖輸身家。

　　我有時聽收音機，聽到一些７０、８０歲阿婆話自己買咗啲熱門股，隻股炒完插咗落去，問主持人名咀點算，名咀就叫佢不妨溝吓，或者個主持人覺得隻股衰一排會再炒過，但係我心諗，你叫阿婆去溝，阿婆光陰有限，會唔會等唔到隻嘢升呢？況且大家見過曾經是大藍籌的電盈（００００８）永不超生，就知道無乜股溝貨一定唔會死。

　　正確方法是買股唔順手時，要減持而非增持，贏錢時加注，輸錢時減注，係最簡單的道理，炒股也好，賭錢也好，要講方法，可惜散戶大多數掌握唔到正確的方法。


陸羽仁

　　油價回落及消費股向上，令美股反彈，道指升６８點，升幅０．６％，升至１２５４８點。美股之前回得太勁，到昨日公布５月消費信心指數跌到５７．２時，雖然高於市場預期，並且是自１９９２年以來的低位，但消費股不跌反升。油價亦因為市場憂慮高油價令消耗減縮而出現４月以來最大單日跌幅，７月期油跌至１２８．３美元一桶，急跌４美元，而期油在上周四曾上１３５．０９美元的新高。油價下跌亦對美股有支持。

有時看著網友的回應，都有點感慨，有源源不絕的新仔湧入股市，一個批輸了，又來一批。網友小丑魚問，市場有１００、幾十個大戶，邊有咁多散戶俾佢食。我也要說明，大戶不一定贏錢，都有大基金炒燶，不過老散的死亡率委實比大戶高得多，你唔使擔心唔夠散戶，散戶多的是，我認識一些超級大散戶係上市公司老闆，佢地做生意、做廠賺好多錢，但係賭期指可以億億聲咁輸，你又信唔信？

至於一般散戶，更多如牛毛，睇吓網友回應就知，佢地以為炒吓波幅好易賺錢，你睇吓啲股票、黃金、外匯、原油，可以係咁升喎，買咗咪好發？佢地只睇到升o既一面，睇唔到波動的一面，睇唔到跌的一面。

瀨嘢例子好多，隨手搵到一兩個，網友ktyi咁話：「小弟係股場新手一名，去年股市大熱先投身股海(火海...？)仲要玩輪。初時真係大賺咗一筆．仲以為搵$咁易咁過癮，一路係咁玩(賭)輪，之後經年頭大插插，卒之倒蝕咗幾萬.....係度睇陸sir睇大家睇得多了，獲益良多，發現自己就係典型老散，唔識收手，其實一d都唔係投機的料子，所以都係做番投資的人算了。」（陸羽仁按：賭錢贏開，無人識得收手）

　　網友股海淘金則是炒期金中伏，佢去年在大跌市低位撈咗中石油（００８５７），低位賺咗一筆，「之後以為自己好叻,學人炒期金...升跌一點780港幣...揸左2張...在黃金升到1005美元/盎司時買升...然後...美國一話減息，黃金就插到984美元/盎司...唉...果時成個人灰哂...依家諗番...其實當時金價見頂已經傳到全市都係...實在係冇理由仲買升既...係小弟身上再一次驗證,人棄我取原則...」（陸羽仁按：摸頂追貨唔緊要，最緊要識斬，唔斬仲大鑊）

　　網友肯講出自己輸錢經驗，肯檢討，已經係成功第一步，衰唔緊要o既，唔好衰第二次，更加唔好以同一個方式衰第三次，第四次．．．．

呢頭見好多半新老散講瀨嘢經驗，嗰頭又見好多新仔撲入股場學炒嘢，想炒波幅咁話（我寫咗咁多篇炒波幅，話俾大家聽波幅唔易炒，唔知點解新仔仲要樂此不疲，問我點炒）。網友Stefinition話阿媽俾２萬元佢，等佢試吓投資，佢想一年有１０％、２０％回報，除了月供之外，想炒吓中海油（００８８３）波幅咁話。

新仔睡魔托世又話：「陸sir,如果我決定向短炒進攻,咁我如何係茫茫股海選股呢???還是期貨嚟得比較直接呢 ???請陸sir給我一些提示吧~~~~~」

你睇你睇，新仔連期貨係乜都未識，就話想炒啦，點算？！

昨日網友sosgroup咁話：「陸羽仁講物野呀！投資不是賭博， 賭博每一局的勝負機會是不變的， 上一局的勝負和下一局無關。 而投資卻是不停的鐘擺。 短期波動是在趨勢或平均線上的鐘擺， 而長期升跌是有基本面與增長期望間鐘擺。你以為每天開市都是一局全新的賭博嗎?還有賭博每一局都有開始完結, 投資卻沒有. 你可以即日鮮, 亦可以等十年. 幾時完結一局是由投資者自己決定.」


Sosgroup又話：「贏錢時加注，輸錢時減注，不是最簡單的道理，也不是正確的道理。最簡單最正確的道理是：平價時加注，貴價時減注，隻股跌左輸錢時, 唔係應該先看看由何跌? 是基本因素改變? 還是市場情緒? 如果基本因素樂觀而價值便宜的話, 應該加注而不是減注。以大藍籌的電盈（００００８）永不超生的例來否定溝貨, 是學術界的必讀case. 但是有幾多人看過電盈20元的時候 PE幾多? PB幾多? ROE幾多? 借貸比率幾多? 總之股價跌了, 可以是買入的機會, 要看看那股票的基本因素而定, 而非看你之前有沒有貨。」

原則上，我對sosgroup講的話，同意得不能再同意了，這就是巴菲特的價值投資法，以現金流折現的方法，計出一隻股份的現值，然後睇股價，若比折現價有好大折讓，視為抵買，買完之後再跌，愈跌愈買，隻股總有一日升番上來，反映它的真正價值。

問題是，現實裏有幾多散戶懂得計一隻股票的真正價值？唔懂計真正價值，又如何分平、貴呢？我恐怕看我網誌的朋友，十個之中，有九個不懂分辦一隻股票的真正價值，很簡單一個問題，在中國人壽（０２６２８）今個月高位３５．６元買它，便宜嗎？恐怕好多人答唔到。

例如新仔睡魔托世「決定向短炒進攻」，計劃買期貨，你教佢股票跌可以看基本價值，唔一定要沽，買都得，理論上你呢個講法係啱，不過教科書咗少少，對一眾盲摸摸o既股民來講唔係好實用囉，睡魔托世揸咗期指，覺得論基本因素港股值３００００點，結果大市繼續插，佢輸到仆，補唔到倉俾人打埋靶，咁又點計呢？

又舉例說，一個黑社會大佬教一個新入行的古惑仔去劈友，佢會講「唔對路就閃啦！」你話咁講唔科學，應該話：「去到現場，分析吓企喺你對面個對手的實力，睇吓佢好打啲定你好打啲，分析吓我地人多定佢地人多，分析吓佢地士氣高定我定士氣高，然後決定用乜策略。」可惜個古惑仔根本無能力分析，咁搞法俾人劈死十次都未天光。

有時見新仔魚貫咁入股場，一批批咁俾人屠宰，講嘢都唔可以太理性，只能勸得幾多得幾多啦。做股評人，要從良心出發，要從大量對股市認好少的散戶的主觀角度出發，講啲幫到佢地o既話，一啲都唔容易。

陸羽仁　

  　　美股繼續彈，摩根士丹利話期油價格會上１５０美元一桶，令油價反彈重上１３０美元，受油股上漲等刺激，道指尾段上升，收報１２５９４點，升４５點，升幅０．４％。

　　香港爆出輪場大風暴，廉署四出拉人，傳聞拘捕逾２０個經紀，調查窩輪造市。窩輪行業流弊很多，其中之一是谷大成交造市，香港是全球第一大輪市，去年有６３１２隻窩輪發行，現時街外流通的窩輪幾千隻咁多，花多眼亂，散戶唔知點揀，通常就會揀大成交的窩輪去買，你要成交，有無良輪商就造成交俾你睇，搵經紀行夾埋造出大量假成交，引你落叠。

　　證監會在２００５年做的一項調查就發現，有部份經紀特別活躍於窩輪買賣，而這些經紀戶口內的窩輪客，大多是做即日鮮，甚至短至幾秒間的買賣，一日內不斷重覆，證監會就懷疑他們不是真實買賣，而是可能有其他目的。今次廉署一查，恐怕會揭出不少行內臭史。

　　散戶入場炒作，不斷受好多消息誤導，考驗你的EQ，你盲摸摸去買股買輪，一開始就跌入陷阱中，今天可以講吓成交假象，其實無論窩輪或莊家股，都造出成交假象，吸引你落場。

　　先講窩輪，我教大家換腦思維，以輪商的角度出發去思考，發行窩輪的發行商，只要做足對沖，在一般情況下，都是穩賺不賠的生意，和開賭沒有太大分別，主要成本除了請個靚女來做輪后作生招牌之外，就係推廣費用，毛利好高。生意好做就多人做，愈來愈多人做時，難免供過於求，你睇舊年出到６０００幾隻輪，要去貨開始無咁易。

　　散戶揀輪好多時係睇住成交量來買，見到成交多，覺得隻輪流通量好，易走，就會入場，所以輪商從來都有和經紀行夾，搞高成交量，有合法方法，有非法方法，不過競爭犀利時，就當然是愈搞愈出位啦。以住窩輪要有充足的街外需求才會發行，後來都等唔到了，部份發行商安排經紀行接貨，發咗先至算，經紀行可以在掛牌後沽貨，反正發行商做莊又可以接貨，至多到時接番，發行商和經紀行如何對數，外人就不得而知了。

　　若然發行商啲貨只係借經紀行個名頂咗，最後要自己接番，始終無真正將窩輪發到俾街外客，賺唔到街外錢。所以在新輪上牌初段，造大個成交額，搞到個場熱熱鬧鬧就好重要，成交活躍引到老散入場，混亂中就把手上的街放番出街；若然成功出貨，派到八八九九時，都無需要再做嘢，交投就會回落番，成交大減之後，隻輪就好似失寵藝人咁，素顏落街買餸，自然嚇到你腳軟，更加無人吼，成交好快就靜過鬼了，溢價自然大跌，你買咗就貴客自理了。你買認購輪，隻正股升咗，你見隻輪升咁少，覺得唔合理，唔想沽住；若隻正股跌咗，你隻認購輪就急急插，你話咁離譜，跌咁多，又覺得唔合理，又唔沽，所以無論睇啱睇錯，總之你就無沽，結果好易揸張廢紙揸到尾。

窩輪咁多，以去年發輪量計，每天有２４隻新輪登場，新輪過幾日就變舊，如果你俾新輪成交活躍的假象吸引，專去追新輪，即係專門買貴輪，窩輪本身已經難賭，貴輪更難賭，係唔係輸多贏少呢？買輪輸錢不關乎你睇市準唔準（散戶當然亦大多睇唔準），主要係整個局對你不利，買成交大的新輪價錢貴，買成交少的老輪沽貨時又任得發行商開低價，散戶被人焗住來砌。

買三、四線股的問題都一樣，你也要換一了莊家的角度去思考問題，莊家低位收哂貨，或者大股東低價批咗大筆便宜股票給他們，他們的目的就是推高價錢散貨，第一步也是做成交，做升幅。香港有千幾隻股票，散戶點去揀，除了睇吓報紙之外，就係睇吓廿大成交榜，廿大上升榜，所以莊家要炒嘢，最好就抽高股價，同場做大成交，每日成交有過千萬元，上哂成交榜、上升榜，散戶睇到覺得係堅嘢，就會落叠。

莊家做成交的方法好簡單，搵幾間相熟經紀行，搵一堆「人頭」，用那些「人頭」的名義做買賣，你見到報價機上隻股買賣雙方都掛滿牌，好墟陷，呢啲叫做「搭棚」，搭好棚慢慢推上，左手交右手，甲經紀行買，乙經紀行賣；可以做到好靚，上３步，又回番１、２步，做出完美的反覆向上圖型，唔係急急推上，證監會要查都好難查。

　　散戶相信自己眼見的東西，見到成交好，股價升，公司又出消息配合，潮流玩賭業佢做賭業，潮流興礦業佢做礦業，甚至叻到做埋盈利俾你睇（不過現時好多莊家股都好懶，連盈利都費事做），有齊增長股的一切特徵，散戶都難扺抗誘惑。

　　而家環頭環尾仲有好多寶藥黨騙阿媽，騙子夾埋自己友演一場戲，騙子買寶賣給自己友甲，自己友甲即場買俾自己友乙，賺咗１倍，在旁的阿婆睇到，馬上去銀行提哂畢生積蓄去買寶藥，諗住賺一筆。如果散戶的阿媽買咗寶藥，佢一定會話：「阿媽做乜你咁蠢，咁都信？」但在股市買了作大成交的窩輪，買了成交量和價位都係假的莊家股，本質和買寶藥有乜分別呢？

　　當局者迷，散戶買了一隻莊家股，睇住佢由５仙升到５毫，你行埋同呢個散戶講，話佢買咗寶藥，話佢俾人騙咗，佢一定問候你全家，質你幾拳都唔奇。股價狂升，係對人類EQ最大的考驗，忍得住手唔買已十中無一，買咗願意沽者亦是十中無一，所以股壇寶藥黨的格經營格言，應該如開賭者講的一句老話：「唔怕你精，唔怕你呆，最怕你唔來！」來了之後，又有幾多個身光頸靚走得番出去呢？

陸羽仁

  　人在股海中，究意是炒股還是投資股票，好多時都講唔清，講講吓就會問到你買的東西究竟真正價值有多少，如何判斷價值，可以研究一下。

網友均兒有此留言：「在而家這種炒風時代，價值的東西往往被炒得毫沒價值，人人都在尋找價值的東西，大戶也在找價值，價值被炒高來賣，價值又何在？

樓宇的值價在於所在地域、設計、材料上，價值也都可以估算到，但大戶手影費加散戶盲炒費你就計唔到了。澳門好多人都有遇到咁的情形，夜晚吃飯時間有人來按鐘，話系香港xx地產的，你層樓依家值几多几多錢，如果賣的話找佢。在此種炒風下價值的東西一夜之間變得不理性，如果你撞啱要結婚要急用，你覺得價吾價值？」

佢又話：「股市好大，好難看到大戶手影，有價值的股票被不合理抛售時，再有價值也都變得毫無價值，股票被炒高時，毫無價值也都變得很價值。因此我覺得股票沒有價值存在，全是人為因素。依家講的係炒股炒股，沒人話買股票，只要話買股票，給人的印象已係炒股，即係一個投機者。不認同的請問炒字點解？買菜一定不會買燶咗，炒菜才會炒燶咗。同樣買股都唔會買燶咗，炒才會炒燶股。問題係已經沒人認為買股票是買，個個都在是炒，有誰是在買股票？」

　　均兒講的問題是資產的市價，好的東西無人吼，價錢跌，也變得毫無價值；壞的東西有人炒，價錢升，就變成很有價值。這個講法完全沒錯，科斯托蘭尼講過，股市如一隻頑皮小狗，牠不是走在主人之前，就是走在主人之後，如果小狗和主人同步，就等如股票反映合理價值的話，股票大部份時間不是這樣，並非太貴，就是太便宜。

　　股票市價經常不反映合理價錢，並不等如合理價錢不存在。我們要判斷一間公司、一間物業的合理價值，要把它看成一盤生意，要看這盤生意賺多少錢，產生多少現金流，就可以看到公司的價值（巴菲特就是將公司無限咁長的現金流貼現，計出「內在價值」），然後比較這個現金收益和市價的比值，就大大約約知道公司現價合唔合理。

　　公司做生意賺錢年年上升，現金流入不斷增加，公司又願意到的現金和股東分享，有不低的派息，我睇公司仍然睇好基本的數字，睇每股盈利的增長，睇市盈率，睇息率。每股盈利增長超過２０％，主要來自經常項目的盈利增長，市盈率低過１５倍，息率超過３厘，都算做比較吸引的公司，若公司管理層有較可信賴的住績，這些公司就值得注意。

　　睇樓更簡單，因為樓宇的收益就是租金收益，若租金穩步上升，租金收益率有５厘，證明市價不算貴，若樓價上升而租金不升，租金收益率會不斷跌，跌到　３厘樓下時，樓價都有少少泡沫了。

　　買入有價值的股票，不等如它明天會郁，好股的股價較平，通常都有原因，好似滙豐受次按威脅，國航、中石化面對油價高企的危險，中移動有市場開放的隱憂，這些公司的盈利備受衝擊，所以股價才插得較深，但若無這樣或那麼的負面因素，它們的股價就不會咁便宜，但有平貨散戶也必肯撈，他們只愛熱股，但若要買價值股，好多時就要冒吓風險，留意吓冷門股，細心分析，燒吓冷灶，說不定有意外收穫呢。　

陸羽仁