尋找價值(3)(2009/2/9)
上週五美國公布1月非農就業人口跌幅為1974年來最大,失業率攀升至7.6%,不過,投資者對將於稍後在參議院投票的刺激經濟方案寄予厚望,樂觀情緒未受壞數據的影響,美股連續兩天收高,杜指升勢淩厲,開市即穩步上升至接近8,300點才略為回順,之後在高位徘徊至收市。杜指及標普500指數均上升2.7%,杜指收報8,281點,漲218點;標普500指數報869點,升23點;納指上揚45點或2.9%,報1,592點。紐約證交所交投活躍,成交16.1億股,遠高於去年日平均的14.9億股。杜指期貨最新報8,254點,比現貨低水27點。
投資者期望美國政府的刺激經濟方案和銀行業拯救計畫將提振受困的經濟,支撐銀行的資產負債表,且促進借貸。標準普爾金融類股指數上揚8.1%,銀行股指數BKX暴漲約12%,帶動美股上升。花旗集團和摩根大通漲逾11%及13%,而之前投資人擔心美國銀行可能被國有化,股價跌至1984年以來最低,美銀上週五大反彈,飆升逾26%至6.13美元,美國的銀行股好似香港的股仔咁被人炒上炒落。科技股表現突出,蘋果上揚3.4%,報99.72美元,而Blackberry手機生產商Research In Motion亦升4.2%,報59.17美元。
美國勞工部上週五公佈,美國1月非農就業人口減少59.8萬人,高於市場預計的52.5萬,減少幅度為1974年12月以來最大;1月份失業率為7.6%,高於預估的7.5%,係1992年9月以來最高,當時亦係7.6%。美國遇上百年一遇的金融海嘯,失業率朝向10%大關進發,且看總統奧巴馬的救市大計,能否拉得住飛升的失業率。
上週五晚間,美國國會參議院民主黨與共和黨主要議員的誇黨派小組,就奧巴馬提出的刺激經濟計畫的核心內容,達成了協議,主調是救市資金總額縮減至7,800億美元,較眾議院1月28日通過的8,190億美元的版本少了390億美元,亦遠少於參議院過去幾天來一直在辯論的9,370億美元的版本,民主黨人同意縮細救市計劃的規模,以換取共和黨關鍵幾票支持救市方案,外界目前尚不清楚哪些項目被縮減。
民主黨議員話,他們7,800億美元的方案主要是針對增加新開支和減稅措施達成協定。不過,白宮官員卻指出,如果加上參議員較早前為刺激房市和汽車銷售量所提供的稅務優惠,以及奧巴馬為每對雙薪夫婦提供的1000美元稅金回扣,整個經濟振興計畫的開支將達到8,270億美元。
據悉, 這項「瘦身版」的計畫最早會在美國時間本週二於參院表決通過,,參、眾兩院將協調兩院方案的內容,然後遞交總統簽署,奧巴馬希望能在2月16日簽署方案。而美國財長蓋特納可能於今晚公佈一攬子金融救援計畫的詳細方案,新方案首要考慮的可能係如何提供擔保銀行的問題資產。
週末看到一班電盈小股東去遊行,覺得有些人的境況的確很淒涼,靠電盈股票退休養老,最後得番雞碎咁多,仲要俾人私有化。呢個故事教訓我地,股海無情,唔好諗住信人,唔好靠人幫助,只能靠自己,要武裝起自己的知識,武裝起自己的分析能力,識得分辨危險,在關鍵時候自己救自己。
陸羽仁係價值投資者,但係唔信「愈跌愈買」,特別認為散戶要分散投資,唔好買咗一隻股份,佢愈跌你愈買得多,集中買死一隻股份,最後佢死你跟埋佢去。我們的網友分享了買電盈後的經驗,值得一看再看。
網友牛腩貓咪講他的「割捨秘笈」,佢話:「陸sir,我戰勝了八號仔電盈啦!哈!哈!哈! 我在2000年高位買八號仔,當時是 19.x 每手約2萬元,曾經升到 28,但我沒有沽出,因為我同自己講我是投資者,高低位同我沒有關係,它不是垃圾股! 將來我有股息、分紅和升值……..經過我不斷努力和讀書,接受各位前輩的教育,我.......深深地明白,投資、投機和賭博的分別,於是我在2008年中,同經紀大聲地說: 我要止蝕! 經紀話:不好意思,你有碎股,碎股賣出是比較低價呀…….我下定決心! 全部都是傻瓜,只有我才對,止蝕!不等啦! 等咗8年! 經紀話: 已成功沽出,價格是5.xx,時至今日, 私有化價格為每股4.5元,我比一群呆等的傻瓜,止蝕得更好!我戰勝了! 止蝕! 止蝕! 止蝕!
是家訓!」
牛腩貓咪的經驗告訴我們,勢色唔對就要考慮止蝕。止蝕完隻股再跌固然「開心」,佢升番上去也不用傷心,一隻可以累你輸大錢的股票,佢反彈完都再有機會令你輸得更甘,一次唔走,最後可能永遠都走唔到。以藍籌計,輸10%唔止蝕,輸到20%要認真考慮隻股的基本因素有無變,若果有變要止蝕。止蝕後若唔想揸現金,可以換馬至一隻指數股,可能會好啲,因為若果累你輸錢隻股票是跟大市跌,將來佢無事升番,指數股一樣升。若隻股本身比指數超跌,跌幅大過大市,可能佢本身出咗大問題,換馬至指數股會安全一啲。
網友myself有另一種經驗,佢話「8號仔,小弟都中左招,佢俾小弟既教訓係:1. 借陸sir之前既比喻,20樓跳下來會死人,5樓跳下來一樣會死人。小弟係最高位既28蚊,下跌70%後既8蚊買入,現價$0.9,28蚊買輸9成幾,8蚊買一樣輸9成!自此學到,股票下跌唔係買入o既唯一理由。
「2. 記得當時有個記者,問袁生電盈值唔值得買,佢答話如果佢有錢都會買,小弟冇做功課,唔了解當時既電盈,已經唔係以前既電盈,但袁生係管理層,冇理由唔知公司既情況,佢咁叻又係前港交所大佬,都話值得買,小弟冇理由唔跟,況且已經跌左咁多,自此對公司管理人所講既野,有好大戒心。
「3. 長線投資唔一定賺,電盈小弟揸咗8年,係最長線既一隻(哈哈~)
「4. 好彩o既係,當時小弟只係出社會做左幾年,可以輸既錢有限,當係交學費,越早學投資越好,因為可以俾你輸既錢少的,以後未做功課,唔識既野都係唔好去掂,第時老左,起碼唔會將份身家去買「迷你債券」啩。」
Myself似乎無斬,佢勝在買咗唔多,佢提到一個好重要的問題,就係5樓跳落來一樣跌死人,「股票下跌唔係買入佢唯一的理由」,而家匯控(00005)股價及相關新聞 下跌,我成日話「短炒唔妨,長揸小心」,亦是同一道理,匯控由20樓跌到7樓,彈番上8樓,要諗吓佢以後係直上唔再跌,還是有8樓再跌落去的風險。美國有太多巨型金融股,也是由8、9樓跌下來累死人,AIG如今跌到1美元邊,花旗3個幾,一年之前,有誰想到這個結局。
所以揸住一隻巨股,見佢由20樓插到8樓,唔好輕言愈跌愈買,要有戒心,要問自己,若佢再由8樓跌落2樓,自己承唔承受得起。在全球化的世界,經濟週期好短,災難迅速蔓延,要預咗應對以前未見過之事,所謂長揸的定義也要從新介定,用番價值投資法,升到好貴時不妨沽貨,因為股價已超逾合理價值;反之跌得好急時要先睇睇,若影響隻股價值的經營環境或其本身條件有重大變化時,應該減持而唔係增持,大跌市時只能買跌到好急但經營環境無重大變化的股票。
陸羽仁