投機家索羅斯對銀行作了負面評論，分析員又降低多家美國大型銀行評級，再加上 IBM收購Sun Microsystems可能告吹，美股在金融股和科技股下跌拖累下，昨日借勢調整，結束了連升四日的升勢。杜指開市跳水低開近100點，跌穿8000點大關，之後繼續反覆下滑，跌至全日最低的7862點才見支持。午後有買盤趁低吸納，跌幅逐步收窄，但未能收復8000點大關。

　　杜指先跌後彈，全日微跌42點或0.5%，收報7976點，全日最高8016點，最低7862點，波幅約150點；標普500指數報835點，跌7點或0.8%；納指跌15點或0.9%，報1607點。紐約證交所交投淡靜，成交只有13億股。杜指期貨最新報7920點，比現貨低水56點。

　　索羅斯昨日話，美國放寬了按市價入賬（Mark-to-market）會計規則，將維持有問題的銀行繼續營運，阻礙美國經濟復甦，他認為「我們讓那些‘喪屍’ 銀行繼續生存下去，只會令現狀混淆不清，搾取經濟的能量。」他認為銀行系統已嚴重資不抵債，好多銀行正以維生機器續命，它們被不斷貶值的壞資產侵蝕，壞資產的總額難以估計，但索羅斯相信會超過1.5萬億美元。若各國政府未能共同行動解決這個經濟危機，美國經濟將會有墜入全面衰退的風險。他總結，「只有透過多邊的協作解決銀行的問題，相信我們可以渡過難關。」

　　美股昨日結束了連續四天的升勢，反映了市場憂慮政府拯救銀行的舉措的成效，並且預計借貸引起的虧損會超過30年代「大蕭條」時代的水準。剛由德意志銀行過檔Calyon securities的資深分析員Mike Mayo昨日表示，銀行業問題還會進一步惡化，而政府舉措可能達不到預期效果。他預計因抵押貸款問題持續以及其他領域的問題惡化，銀行業盈利將不斷受壓。銀行業在明年年底前的貸款虧損將由2%增至3.5%。他給予BB&T、Fifth Third Bancorp、KeyCorp、Suntrust Banks和US Bancorp「沽出評級」；美銀、花旗、摩根大通及富國等銀行「跑輸大市」評級。

　　美國銀行股受眾多負面評論影響，昨日明顯走弱，KBW銀行股指數BKX下挫3.8%。摩根大通挫3.7%至28.20美元，富國銀行跌6.7%至15.25美元；花旗集團挫4.6%至2.72美元，成為杜指成份股的跌市冠軍；而標普500跌市冠軍則係SunTrust，下挫8.1%。匯控在美國的ADR股價亦跟隨下跌，收報51.92元，比香港收市價低0.3%；中移動則比香港收市價低1%，收報69.5元。而ADR按比例調整的恒指係14889點，比香港低109點。

昨日高院通過電盈私有化，但證監會咬住唔放，要繼續上訴，但估計成功制止電盈私有化的機會有限。電盈慘劇其實係一個森林規律的活生生教材，散戶無論有無電盈股份，對電盈事件，可以有兩種反應，第一種係鬧，鬧大股東無良，鬧政府無用。第二種反應係自我檢討，總結經驗，研究以後逃避被這些森林大鱷狙擊的方法，研究萬一唔小心俾大鱷咬住時脫身的IQ與EQ。

陸羽仁係第二種人，我唔係唔鬧，都鬧，但係鬧兩句就收工，當我發現大股東食完你仲可以大大聲話俾咗個套現機會你時，你就知道揸佢股票跟住佢有乜下場，佢的確已經俾咗個套現機會俾小股東，佢可以食到你連渣都無。倒過來說，有些人鬧人好精，佢係想達到某些目的，例如製造群眾壓力逼對手就範，但在電盈這個個案中，散戶鬧乜都無用，因為大股東無動於衷。買咗電盈的散戶要自己我檢討，點解會跌入這個困局內，若果當日想炒，就要問點解唔止蝕?若果當日想買公用股收息，點解唔買中電、煤氣，地鐵，要買電盈? 單單係股價跌得多唔係一個長線投資的理由，股價跌得多自有跌得多的原因，要問吓佢有無條件起番。最後一句總結，認住呢個人，以後避開佢啦。

鬧人多數係情緒宣洩，自我檢討向前看係理性行為。我可以話俾大家聽，在股市這個森林中，吃人的大鱷多到數唔哂，電盈大老闆得意的地方，只係佢食完人仲理直氣壯出來講嘢啫，但論其食人的本質，同其他大鱷無分別，你俾呢隻大鱷食得，亦有可能俾其他大鱷食得。

再講番上面提到的兩種人兩種態度，做第一種人，在人生路途上輸咗，會理直氣壯，覺得自己好啱，覺得人地錯哂，鬧完人發洩完，件事固然無改變，自己下次亦都照犯，點解會咁?因為自己無檢討反省囉。我有一句好唔啱聽的說話，散戶自己撞到鱷魚個口，自己都有少少責任，我好殘忍咁講，鬼叫你撞埋去呀?

鬧人鬧得多，對自己的要求就會降低，對自己的要求降低後，就無咗自己反省避免災難的能力。假設一件慘劇發生，害人者有90%的責任，被害者有10%的責任，我就會問自己，我以後可唔可以唔做這10%的錯事，以避免再被衰人害我。我唔會要求呢個世界變成無菌，變成無哂衰人，大家相親相愛，人人為我，我為人人，因為咁要求唔現實嘛。鬧人不如求己，要改變世界困難，要改變自己和自己孩子的EQ，容易少少。這就是我話「待人寬唔寬唔緊要啦，律己一定要嚴」的道理，當你連這10%的錯誤都唔犯時，呢個世界總會有人中招，但中招嗰個人就唔係自己。


網友KFC講到而家的大學生連辭工都要亞媽出手。佢話「舊年有個大學生入咗我嗰部門，老細叫我拍擋負責俾嘢佢做。有一次佢做錯野，我拍檔就話俾佢聽邊度做錯，都唔係鬧佢，但佢就成面都紅晒，滿頭大汗，呼吸好急促咁。我拍檔見唔妥就問佢係咪唔舒服，叫佢唔好理住坐低休息。第二日，佢帶埋佢亞媽，見老細辭職，話唔適合做呢份工，聽老細講佢亞媽話佢承受唔到咁大壓力喎。」

呢啲辭工都要亞媽一齊講的潺仔大學生，而家愈來愈多，佢地對抗逆境的能力奇低。但我又深信佢地雖然唔識返工，如果亞媽俾埋錢佢，佢地又會識炒股，你話大鱷見到呢啲「赤祼羔羊」，係唔係流哂口水呢？殺呢啲EQ咁低的潺仔大學生，當然易過殺在街頭打滾長大的中學生、小學生啦。大鱷跌少少錢落地，呢班赤祼羔羊就湧哂埋佢度執錢啦，潺仔大學生自細都唔係自己搵食，係俾人餵食到好大個，一聽到有人餵，就會「定哂型」咁走埋去。

所以無論做工又好，炒股又好，點樣強化自己，提升自己的EQ，提升自己的戰鬥力，將自己變成打不死的「小強」，將自己變成少數的倖存者，係永恒的主題，無得鬧人，亦無得靠人。

陸羽仁

　　美國企業今年首季業績公佈潮昨日展開，美企去年第四季業績創下慘淡紀錄後，投資者預期企業受經濟衰退拖累，新一輪的業績報告都會好差，再加上大投機家索羅斯話美股最近的升市只係熊市的反彈，打壓投資氣氛，美股昨日走勢疲弱。

杜指開市插水逾170點，後來跌幅略為收窄至115點，再度走軟，杜指其後在7800點間窄幅橫行至收市。今次係杜指第二天下跌，而且跌幅顯著，收報7790點，下瀉186點或2.3%，全日最高7969點，最低7762點，波幅約207點；標普500指數報816點，跌20點或2.4%；納指跑輸大市，跌45點或2.8%，報1562點。紐約證交所交投淡靜，成交只有縮減至12.6億股。杜指期貨最新報7770點，比現貨低水20點。


　　湯森路透預計標普500指數企業首季盈利將按年大跌約36.9%，若果然是如此的的話，將是標普500指數1998年開始有記錄以來，首次錄得連續七個季度的企業盈利負增長。Hester Capital Management嘅CEO Craig Hester話， 「第一季業績差勁，應該不會令人感到意外。關鍵是看企業對未來經營情況的說法。」問題係企業對未來環境都估得好悲觀。

另一個打壓市場投資氣氛嘅係一個由多家企業的CEO組成的協會公佈其對經濟前景的看法，指標由負50至正150，低過50，表示看法悲觀。該協會對今年首季指標係負5，係七年以來最低的。去年同期係79.5，上季亦有16.5。CEO預計今年美國GDP會倒退1.9%，遠差過3個月前預測的零增長。


　　美國鋁業係打頭炮公布首季業績的杜指巨企，昨日在收市後率先公佈業績。因全球需求下滑和鋁價大跌，美國鋁業錄得連續第二季季度虧損，經營收入下跌37%至41億美元，淨虧損4.97億美元，合每股虧損0.61美元，上年度同期營收為65億美元，淨利潤為3.03億美元或每股盈利0.37美元，美鋁的業績顯示鋁業的經營環境仍然相當惡劣。


美國鋁業話，將推出全面計畫重整資產負債表和營運成本，至2010年將增加至節省20億美元，資本開支將削減50%。美國鋁業先升後回，下跌1.5%至7.79美元。

　　美股表面看是因為企業首季業績而跌，但銀行業的危疾亦重重壓住美股。英國泰晤士報報道，國際貨幣基金會(IMF)最新預測料顯示，環球銀行和保險商持有的有毒債務可能會攀升至4萬億美元，呢個數字遠高於各國投入金融市場消除毒債的資金。消息打壓市場人氣拖累金融股下跌。KBW銀行指數BKX下跌3.5%，摩根大通挫3.4%至27.25美元，富國銀行跌2.6%至14.85美元；美銀跌1.6%至7.36美元；而花旗集團則逆市上升，升1.5%至2.76美元，成為杜指成份股唯一上升的股份。匯控在美國的ADR股價亦跟隨下跌，收報50.01元，比香港收市價低2.3%；中移動則比香港收市價低1.4%，收報68.55元。而ADR按比例調整的恒指係14624點，比香港低305點。


我地昨日講過美國資深銀行業分析師Mike Mayo的最新報告，值得再講講，佢在報告中有嚇人的估計，佢話「美國銀行業的貸款虧損將會增加到超過1930年大蕭條的水平，政府的新救助措施不會如預期那樣有重大作用。」佢話而家銀行只對其貸款帳簿作了2%的撥備，即係借咗1美元出街，只撥備了2美仙，仲有0.98美元在帳上，已作的撥備仍遠低於可能的虧損。


MikeMayo那句「大蕭條水平」可能係吸引眼球的誇張之詞，但銀行業撥備唔夠多又真係事實，現時銀行主要對住宅樓宇按揭做了撥備，但往後工業和商業按揭及信用咭貸款撥備，好快又殺到。


如今美國銀行股的沽空數字係近期低位，這也是銀行股大反彈的必然結果，逼到大量沽空盤平倉，但彈完之後，沽空盤慢慢會多番。而家唯一要睇係金融股回吐後有無後抽，而後抽的水平又會唔會高過上一浪，若後抽高唔過上浪，就確認美國銀行股的反彈浪頂已經見咗，佢地跌得深，彈得勁，估計亦是最快見頂的一類股份。


陸羽仁

        美股跌咗兩日之後反彈，在開市前華爾街日報報道政府的救市計劃會擴展到人壽保險業，令保險股一開市就彈升，另外房產建築公司Pulte Homes Inc. 同意收購Centex Corp.，以建立一間全美國最大的房產建築商，令Centex股價大升19%，亦刺激相關股份造好。

        杜指升47點，收報7837點，升幅0.6%，標普500指數好啲，升咗1.2%，升到825點，每4隻股份上升，只有1隻股份下跌，顯示美股還是上升者居多。

        據報道美國財政部計劃將問題資產救助計劃(Troubled Asset Relief Program)擴展到人壽保險業，令壽險股大升。但大市升到最後兩小時開始回軟，因為聯儲局上次會議的會議紀錄顯示，儲局成員認為經濟有「下跌風險」，令市場的信心軟化。

唔止聯儲局諸公睇淡，美國企業公布業績期開始，企業高層大多數睇淡，以控制分析員對公司全年業績的期望，而家要睇吓美股頂唔頂得住呢個「唱淡潮」。好似貨車製造商Ryder就調低自己第一季的每股盈利預測，由原先估計每股盈利0.4至0.5美元，調低到0.22至0.24美元，一估就估少一半。機械製造商Emerson Electric又話第一季整體經濟環的惡化超乎想像。從公司管理層的角度來說，大市反彈了，如今乘機唱淡，降低分析員對自己公司的期望，而股價已經彈高咗，可以忍得股價跌番啲，唔趁好市唱淡就傻仔囉。

在美國交易的港股預託證券造好，滙豐升到49.76元，升咗2.9%，中移動升到68.03元，升咗1.5%，ADR折合恒指為14771點，比本港收市價高296點。

紐約大學教授羅賓尼(Nouriel Roubini)接受彭博電台訪問值得留意，佢話在美國政府支持下，出了問題的金融機構被併購掉，令本來已經很大的機構變得更大，會令金融危機惡化。

羅賓尼曾成功預估金融海潚到臨，係出名的末日博士，佢睇淡唔奇，關鍵係佢看淡的角度，佢話那些金融機構本身已資不抵債，政府應該將之國有化，然後將之拆散為3、4間國有銀行，而唔係支持佢地併購，變成一隻巨怪，大到不能讓它倒閉。相信羅賓尼角度係金融機構中毒甚深，要將之拆散除毒，而唔係任由佢地變成巨怪，政治上唔能夠忍受佢地倒閉，就將毒資產掩藏，令金融體系問題揮之不去。

在去年金融海嘯深化時，摩根大通在聯儲局支持下，在去年3月率先收購證券行貝爾斯登; 後來美國銀行收購了美林，富國銀行收購了Wachovia Corp; 而PNC Financial Services Group Inc.就收購咗 National City Corp.。金融機構係變大咗，唔係變細咗。

自2007年以來，世界各地的金融機構合共撇了1.29萬億美元，但羅賓尼唔認為已經止了血。標普500指數在2008年跌了38%，在今年3月9日再創新低，但至今已反彈了22%。羅賓尼係大淡友，佢話隨著全球經濟衰退深化，標普500指數今年要跌到600點。以標普500指數昨日收報825點計，還有27%跌幅。

圖表派話美股呢個月守得住唔跌，美股有機會見咗底。但基本因素派就唔係咁樂觀，不少人似羅賓尼那樣，認為美國經濟有排衰，美股未跌完。


(後記:復活節假期休假，到14日才復業)

陸羽仁

　　香港放復節假期間，美股上周連升兩天，到昨日本來回吐最後亦變成只是微跌收場。美股昨日開市早段有投資者獲利回吐，杜指開市跳水逾100點，最低見7964點，跌穿8000點，之後反覆偏軟，在低位窄幅橫行。午後高盛公佈季度業績，盈利好過市場預期，金融股回升，加上又公布總統奧巴馬明天將有一個關於美國經濟的重要講話，推動大市跌幅逐步收窄，8000點失而復得。杜指最高曾倒升30點，但尾市略為回軟。

　　杜指收市報8058點，跌26點或0.3%；標普500指數報859點，升2點或0.3%；納指微升1點0.1%，報1653點。紐約證交所交投活躍，成交上升至億股。杜指期貨最新報7995點，比現貨低水63點。

　　港股在美國ADR的走勢可以預示今日開市的情況，匯控在美國的ADR股價亦造好，收報53.71元，比香港收市價高5.5%；中移動亦有進賬，收報70.7元，比香港收市價高3.3%。而ADR按比例調整的恒指係15542點，比香港高640點。按ADR計國企指數為9176點，比香港收市高344點。

　　美股衝向今年高位，標普500指數差10點就去到今年1月8日的今年高位，而恒指今年高位是1月7日的15763點，唔知今次有無力上試此高位。

　　美股呢幾日的升勢由富國銀行的業績帶動，佢將會喺4月22日正式公佈季度業績，但上週五宣佈預計2009年首季盈利會增長50%至30億美元，勝過市場預期一倍有多；當季的貸款壞賬撥備增加46億美元，亦低過市場的預期54億美元，富國股價上週五飆升32%。

不過，週末期間美國證券行就富國銀行的業績出報告，仍然不太看好，券商KBW的分析員Frederick Cannon 表示，相信富國銀行的盈利增長主要源自與美聯銀行（Wachovia Corporation）合併、會計制度的改變、和按揭延期償付等因素，而非營運環境的改善所致，並預計如果經濟衰退情況繼續深化，富國銀行資金及利潤仍然面臨強大壓力，並將需要籌措500億美元償還政府債務和填補虧損。KBW調低富國評級至「跑輸大市」。

　　市場人士話，今年1月實施的新會計準則(FAS 160)容許富國銀行可就一個與Prudential Financial合資公司有大筆特殊收益入帳，是富國銀行業績出奇地好的主因之一。分析員擔心，富國的好業績亦受惠於貸款撥備低過預期，特別是合併了的美聯銀行未作大撥備，若信貸狀況進一步轉壞，富國銀行是否要作大筆撥備?

　　投資銀行龍頭股高盛昨日公佈首季業績，亦優於預期，截至3月27日為止，季度純利16.6億美元，每股獲利3.39美元，遠遠超過路透社分析員預估的每股獲利1.49美元。高盛同時表示，由於交易及投資損失，2008年12月虧損10億美元，但計及此損失仍有16.6億美元季度純利。高盛係唯一能夠成功避過金融風暴的金融機構，自2007年中以來只有一季錄得虧損，遠勝其他有競爭對手。

此外，高盛將計畫發行普通股籌措50億美元，主要用以償還從政府救市計劃TARP借來的100億美元貸款。高盛昨日收報130.15美元，上升4.7%，帶動其他金融股逆市造好。

美國的銀行股有水就急急還俾政府，以免受政府約朿發唔到花紅，美股市場交易員流傳一個古仔，話而家成日講高盛會批股還錢俾政府，只是美麗的誤會，佢有錢應該先還巴菲特的優先股，因為這批優先股收10厘息，而政府只係收5厘息喎。不過大家講古仔還講古仔，係人都知高盛寧付貴息，都會先還錢俾政府。

美國金融股在首季業績的好消息下愈炒愈高，慢慢就會脫離現實，令人以為美國銀行業無嘢，高盛應該真係無嘢，但唔等如其他銀行無事，美國政府對銀行做的壓力測試快將結朿，到唔合格的銀行要在如今的反彈高位批股集資時，要睇吓佢地的股票有無人買，就知道大市有無支持力啦。又留意吓呢啲財困銀行，到底可以還水俾政府，還是要借多啲水。

陸羽仁

雖然英特爾首季業績好過預期，但美國政府公佈的3月份零售銷售數字和一系列經濟數據都出奇的疲弱，總統奧巴馬的講話無乜料到，加上高盛批股，金融股受壓，拖累美股走弱，結束了三日的升勢。杜指開市插水117點，失守8000點大關，之後跌幅收窄，杜指重上8000點樓上，但支持乏力，大市再度尋底，下跌至7900點邊緣才喘定。杜指午後在低位反覆爭持，最後以接近全日最低位收市。

杜指收市報7920點，跌138點或1.7%，上日收市位8058點已經係全日最高位，最低7902點；標普500指數報842點，跌17點或2%；納指挫28點或1.7%，報1626點。紐約證交所成交17.5億股。杜指期貨最新報7884點，比現貨低水36點。

拖累大市的元兇係金融類股份。高盛季度業績好過預期，但並唔係客觀經營環境改善所致，令人無甚欣慰，加上高盛以折讓5.5%的123美元批股集資50億美元，投資者紛紛以沽售回應，高盛大跌近一成二，收報115.11美元。高盛批股集資50億美元，係佢從政府的TARP計劃借款100億美元的一半，加上高盛的自有資金，已足夠償還政府的借款，還錢後可以唔受政府限制發花紅，不過奧巴馬政府有少少擔心部份銀行還錢後，能夠還錢的銀行和唔可以還錢的銀行分成兩等，而無力還錢的銀行會受狙擊，所以可能唔會咁輕易接受高盛還錢。

投資者看到高盛集資為還政府貸款的一面，我認為另一面也值得關注，高盛、大摩、美林係美國三大證券行，佢地睇市自有一手，大行批自己的股份出街，值得特別留神，高盛批股是否意味佢認為現在已離頂不遠呢? 若佢認為仲有水位，點解唔等高啲才出貨，而係趁住公布季度業績好消息時就馬上出貨呢?若佢認為一個星期後批股作價可以高10美元一股，我估佢就唔會今日批股。
如果美國政府唔俾高盛即時還款，高盛仍然咁急批股，更顯示佢認為股價已離頂不遠。

高盛股價1年高峰是去年5月時的203美元，去年11月的低位是49美元，之後的跌浪低位未穿去年11月低位，有少少一浪高於一浪的味道，呢一浪反彈咗咗好多，批股價123美元，已比低位升了1倍幾，現價批股並唔失禮，若有一浪回軟，高盛跌番落70、80美元一啲都唔奇，到時即使政府願接受還款，高盛都未必能搵夠客批到股出街。金融界高人睇市，自有一套，想當年私募基金黑石上市，我已經話佢地的主事人全部係高手，佢地沽得貨，個市都差唔多啦，唔知今次高盛批股又係唔係咁呢?

高盛批股拖累其他金融股受累下挫，摩根大通大跌8.9%至30.7美元；美國運通挫9.9%至18.43美元；而美銀亦跌8.4%，收報10.09美元；花旗集團則逆市上升5.5%，收報4.01美元，成為表現最好的杜指成份股。匯控在美國的ADR股價亦受累下跌，收報54.81元，比香港收市價低1.5%；中移動亦下跌，收報69.52元，比香港收市價低0.4%。而ADR按比例調整的恒指係15402點，比香港低178點。

美國數據唔靚，商務部公佈3月零售銷售下跌1.1%，遠低過市場預期的增長0.2%，而上月係增長0.3%，市場本來預計3月零售會繼續改善，但結果卻非如此。按年比則下跌了9.4%。各個環節的銷售都有下跌，其中汽車跌2.3%、電子類下跌5.9%，衣服也下跌1.8%。上周，國際購物中心協會（International Councilof Shopping Centers）公佈的資料則顯示3月的零售較去年下跌了2.1%，低過市場的預期。專營女士服裝的Talbots宣佈今季虧損比上季大一倍，低過市場預期，服價大跌兩成半至3.37美元。

其他數據方面，勞工部公佈3月生產者物價指數（PPI）下跌1.2%，遠差過市場預測的維持不變，按年比下跌了3.5%；係自1950年以來最大的跌幅；能源價格下跌5.5%，而食物價格也下跌了0.7%。Janney Montgomery Scott的首席經濟師Guy Lebas表示，「3月份的數據未足以叫我們重新考慮最壞情況已終結的預期，但這些數字卻提醒我們，衰退以後的路可能比衰退的時候更難捱。」

英特爾的業績卻優於預期，佢宣佈今年首季賺了6.47億美元，每股盈利11美仙，遠勝市場預估的3美仙。但按年比卻下跌55%。營業額達到71億美元，亦較市場預測的多了1億美元，反映公司健康情況的邊際利潤達45.6%，也比預期的43.5%好。英特爾CEO Paul Otellini有參考價值，佢話從去年第四季到今年第一季庫存水準明顯下滑，從庫存修正和需求水準調整角度來看，開始見到正常季節性現象，相信行業已過了最壞時期，但預期市場將持續疲軟一段日子。佢又話由於經濟及市場存在太多不明朗因素，難以準確預測下季的表現，相信第二季業務情況與第一季相近。英特爾昨日收報16.01美元，微升0.2%。


陸羽仁

       英特爾及其它科技股走弱，但聯儲局發表的褐皮書(The Beige Book) 指出房屋銷售和零售業都有復甦跡象，牽動投資者對經濟前景漸露曙光的樂觀情緒，杜指早段跌過50點後即反覆回升，在一浪比一浪高的反覆推進下，杜指以接近全日最高位收市，差不多收復上日的失地，重上8000點上方。

        杜指收市報8030點，漲109點或1.4%，全日最高8041點，最低7870點；標普500指數報852點，升11點或1.3%；納指則微升1點，報1627點。紐約證交所交投轉淡，成交只有14.8億股。杜指期貨最新報7975點，升91點，比現貨低水55點。

        反映美國經濟大方向的褐皮書(The Beige Book) 劃出一幅略有復甦的圖畫，美國經濟在3月和4月初雖仍疲弱，但收縮的幅度放緩，令人憧憬衰退接近結束。褐皮書總結12個地區的情況，話有5個地區的下跌幅度放緩，部份見到經濟活動開始在低位喘定。另外還有一些類似經濟見底的訊號: 下跌速度放慢、製造業在底部反彈、部份地區的零售有輕微改善、地產成交好過預期。

        其他數據亦有回暖徵象，美國全國住宅建築商協會(National Association of Home Builders) 指建築信心指數已有見底回升的跡象，但講緊嘅指數係由3月時的9升到4月的14，實際上係低得嚇人。而截至4月8日，互惠基金有110億美元的淨流入，遠高過3月11日時的淨流出235億美元，亦較三個星期平均的100億為高，顯示投資者回復一啲信心，夠膽去買基金。另一個好消息係信用卡違約數量在經歷幾個月持續惡化後，有小幅上升，顯示部分消費者帳單支付能力企穩。較差的數據就包括: 製造業卻持續疲弱，生產以年度計算下跌了20%，跌至1998年水準，工業生產比較2007年12月下滑13.3%，係二次世界大戰時的最大跌幅。美國經濟幾似現時的天氣，有點乍暖還寒的感覺。

大市在兩種情緒中拉鋸，睇好派逢低吸納，睇淡派怕在反彈高位摸頂，一見回吐就閃，暫時仍然係睇好派領先，昨日金融股是美股大市提供主要支撐力量，美國運通大漲近12%至20.62美元，摩根大通升6.1%至32.56美元；美銀亦升3.5%至10.44美元；上一日升咗的花旗集團則逆市跌1%，收報3.97美元。港股在美國的ADR上升，滙控升到56.53元，比香港高2.8%，中移動收73.92元，比香港高1%，以ADR計恒指係15901點，比香港高231點。

        若講未來大市的壓力，主要是美國聯儲局和相關監管機構對19家大型銀行進行的「壓力測試」，而家話會先公布壓力測試的規則，這個被稱為「白皮書」的測試規章會於兩周內，在「測試」結果公佈前發放。是項對銀行的「壓力測試」結果將於5月公佈，但公佈結果的程式細節仍在討論中，因為公開銀行資料會曝露弱勢銀行的弱項，同時增強強勢銀行的信心，做成「強者越強、弱者越弱」的問題。美國政府可能會鼓勵19家銀行各自發表自已的「測試」結果。

        調研公司Sandler O’Neill Partners L.P. 的總裁Scott Siefers 話：「在路徑（測試銀行的過程）上有越多的路標和指示牌，有助消除投資者的疑慮。」而家美國政府想先公布測試的規則，就係做緊這種公布指示牌的工作。

        這個由聯儲局、貨幣審計署、聯邦存款保險公司(FDIC) 和儲蓄機構監理局(Office of Thrift Supervision) 共同策劃的銀行「壓力測試」主要係針對本地19家大型銀行在未來兩年內，是否有足夠資本應付經濟收縮、失業率高企和房價持續下跌的惡劣情況。不過，由於公佈推出「壓力測試」之後的經濟環境持續惡化，當局將測試的底線由原來的2009年經濟收縮2%、失業率8.4%；2010年增長2.1%失業率8.8%，降低至一的個較差的預測：2009年經濟收縮3.3%、失業率8.9%；2010年收縮0.5%失業率10.3%。

短期大市仍然玩緊向上炒，遠少少要睇兩樣嘢，第一，美國經濟真係見底抑或只是反彈，第二，股市升得多會調整，要看調整時大市下探到什麼水位。

陸羽仁

美國銀行昨日公佈業績，賺錢好過預期，但實質業務卻明顯疲弱，粉碎了投資者近期對銀行業好轉的憧憬，引發金融股拋售潮，美股昨日重挫，杜指跌幅更係2月10日以來最大，而且走勢異常肉酸，低走低收，杜指開市下插167點，跌穿8000點大關，其後在低位橫行，跌幅逐步擴大，最後以全日最低位收市。
杜指收市報7842點，大跌290點或3.6%，全日最高8131點，最低7840點；標普500指數報832點，跌37點或4.3%；納指下挫65點或3.9%，報1608點。紐約證交所交17.6億股。杜指期貨最新報7810點，比現貨低水32點。
杜指30隻成份股全線下跌，拖累大市的元兇係金融類股份。美國銀行昨日公佈首季業績，雖然賺了42.5億美元，超出分析師的預期，但盈利主要來自一次性的專案收益，包括出售中國建設銀行股權帶來的19億美元收入,以及信用息差走闊帶來的22億美元相關增益。而同期的呆壞賬撥備由上季的85億美元大幅增加至134億美元；貸款違約比率由上年的1.25%和上季的2.36%跳升至2.85%；信用卡貸款損失亦由5.2%大增至8.6%，數據顯示美銀的核心業務有明顯走弱的趨勢，其CEO劉易斯（Kenneth Lewis）亦表示「我們正面對由經濟疲弱和不斷上升的失業率造成的信貸惡化的極端困境。」而美銀的財務長Joe Price昨日更表示，信貸狀況還在惡化，該行在經濟下滑中抗爭了七個季度並「預計還需要抗爭幾個季度」。美銀股價昨日重創，大瀉兩成四至8.02美元。成為杜指的跌市冠軍。其他金融股亦受累下挫，摩根大通下挫10.7%至29.69美元，富國銀行勁跌16%至17美元；分別升2.9%至4.93美元及0.6%至11.88美元；花旗集團亦下插近兩成至2.94美元。另外，奧巴馬的首席經濟顧問撒默欺（Larry Summers）表示政府將加強監管信用卡的濫用，亦令美國運通勁跌13%至18.98美元。


匯控在美國的ADR股價亦跟隨造好受累大跌，收報51.85元，比香港收市價低5.6%7.8%；中移動則收報71.06元，比香港收市低4.4%。而ADR按比例調整的恒指係15005點，比香港低746點。


經過昨日大插，跌幅如此急勁，市場開始考慮大市是否喺上日造的8131點見頂，所以跟著這一兩日的走勢，異常重要，若大市上唔番8131點，證明係近期熊市反彈的頂點，往後將會有頗大幅度的調整。


昨日講到「投資的我」的策略，大家可能覺得平淡無味，有時投資的確好平淡，好似《神鵰俠侶》中楊過用的玄鐵重劍一樣，鈍劍無鋒，大巧不工，睇落啲招式認真唔好睇。


　　大家或者喜歡睇吓花拳繡腿，我又可以借楊過用過那把君子劍，舞幾招俾大家睇睇。大戶阿Ray提到他的手法，剛可借來一用，佢話每年都希望把組合清貨，新一年又重新開始，我會稱這種手法為「半人半獸」方法，一半投資，一半投機，爭取組合一年之表現優於大市，呢種手法會比純短炒揸長啲，但又會比揸長線短啲，總之一年內了結。


　　阿Ray的做法是在跌到咁上下分三注買入，升到咁上吓分三注沽出，例如升到１４５００點開始沽一注，１５０００點沽第二注，１５５００點沽第三注，平均價１５０００點沽清。如果平均價１３０００點入，１５０００點沽，都有２０００點利潤在手（上述情況純屬創作）。這種分段出入市法，就好似舞起把君子劍，有一定招式，一般股民唔係咁易把握，但如有一定的功力，學到似模似樣，都可以行走江湖啦。試想一年如果走到兩個浪，執番４０００點，作為一個組合管理人，都算唔錯啦。


　　如果你持有一個「半人半獸組合」，清貨後個市再升，問我睇算，我會答除非你好確定個市大轉勢向上，由熊轉牛，否則老大都唔好再入市啦，你在１５７５０點再入市，中線而言，個市升多１０００點和跌２０００點的機會同樣咁大，即係買入值博率唔高，唔值得翻轉頭大舉入市。佢現時唯一可以做的事，除了買賣吓期權之外，就係作一、兩日的短炒，定位止蝕，甚至做即日鮮過下手癮，總之不宜大注，以免大市一回，就連早前賺咗的老本都輸埋。


睇市當然重要，但睇自己的定位更重要，首先定咗自己個位究竟係投機者、投資者、定係「半人半獸」的炒作者，各有唔同策略，搞錯定位，盲目揸沽，進退失據。


如果要沽的話，策略又如何呢？策略可以有兩個。一個係分段沽，將資金分成三注，每升高一級，如15000點，沽一注；15500點，再沽一注，16000點時再沽一注。另一個係以小注試市，例如升見16000點，沽少少試市，輸1000點就走人，咁就確保唔會輸入肉也。

陸羽仁

雖然財長蓋特納日前唱好銀行業，但大摩公佈首季業績蝕咗5.78億美元，係連續第二季虧損並且大幅削減派息，重燃投資者對銀行業和更廣泛經濟的擔憂。好彩有蘋果、Scandisk 波音飛機等重磅股因業績好過預期，頂住大市，杜指早段表現反覆，先跌後升，兩次上破8000點關口，但都未能企穩。金融股在最後一小時沽壓加劇，杜指插水逾160點，收市由升轉跌。

杜指收市報7887點，跌83點或1%，全日最高8045點，最低7868點；標普500指數報844點，挫7點或0.8%；納指則跑贏大市，微升2點，報1646點。紐約證交所成交17.7億股，上漲股和下跌股數比例約為8比7，顯示大市缺乏明顯方向。杜指期貨最新報7810點，比現貨低水77點。

銀行嘅「壓力測試」結果即將揭曉，市場對銀行業動靜，漸趨敏感。蓋特納上日對銀行的正面言論紓緩投資者對銀行前景的憂慮，刺激銀行股強力反彈，帶動大市上升，大摩昨日布出的首季業績差過市場預期，又大幅削股息81%至5美仙，遠低過市場預估的每股9美仙，投資者由喜轉悲，銀行股又再捱沽，拖累大市。KBW銀行股指數BKX跌4.9%。摩根士丹利下挫9%至22.44美元，摩根大通跌1.9%至31.9美元，富國銀行跌3.4%至18.18美元，美銀跌5.7%至8.26美元，係跌幅最大的杜指成份股。花旗集團則逆市上升0.3%至3.25美元，

美國預托證券方面，匯控收報51.46元，比香港收市價高0.4%；中移動收報69.19元，比香港收市價高0.9%。而ADR港比指數14955點，比香港高76點。

最近樓市反彈，好多想買樓的朋友開始忍唔住，不停咁問我好唔好買樓，我想這些朋友本來都覺得係跌市，但最近被樓市和股市反彈的氣氛感染了，就想追價入市買樓。



我經常講，投資除咗睇大市分析之外，亦要睇自己屬於乜嘢人，有兩類人比較適合買樓，第一類人叫做「大花筒型」，佢地賺幾多使幾多，一年去四、五次旅行，去東京多過去深圳，唔夠錢碌卡碌夠，幾萬蚊人工仲要借稅貸，呢類人適宜買樓，即使入市時機不太好，佢都除笨有精；因為買樓後每月要供款，係強逼儲錢的行為，既然呢類人唔供樓啲錢一樣會使哂，不如強逼儲嚇錢，老來至少有間樓。



第二類是「炒炒嚇型」，呢類人啲錢唔係使哂，係輸哂，佢地好鐘意炒股，但經常輸錢，唔知點解賺幾多都經常清袋，佢地亦適宜買樓，理由和上面一樣，買樓強逼儲錢，好過炒股輸清。



好了，如果你唔係上面那兩類人，就可以正常地分析嚇樓市，睇嚇適唔適合入市，我唔講炒樓，只講買樓自住或長線投資。兩個例子可以講講，我有兩個朋友，一個男朋友在９０年代初買咗間九龍地鐵沿線屋村樓，３０００元一呎入市，間樓６００呎多啲，買入價１８０幾萬。９７年升到高峰，造過７０００元呎，間樓值４００幾萬，個朋友無賣。９７年回歸後，是年１０月亞洲金融風暴爆發，香港樓價一下子跌了三、四成，到９８年初樓市反彈，朋友想趁機出貨，問我好唔好，我話唔沽就笨啦，結果佢以５０００元一呎左右作價沽咗，賣咗３００萬多啲，當時好多人唔明佢點解高峰唔沽回落先至沽，不過等多半年大家就明啦，因為佢沽完之後，樓價反彈後好快又大跌兩成，佢都算沽咗個好價。呢個故事教訓我哋，樓市大跌之後第一浸反彈，通常都唔係咁快見咗底。



講完男朋友，又講個女朋友，佢同樣對嗰個九龍樓村有興趣，在９７年金融風暴時一直忍，忍了一年多，到９８年底、９９年初開始忍唔住，她快要結婚，有實際需要想入市。那個屋村當時的樓價已進一步跌到４０００元一呎，她想買的樓，樓價大約２５０萬，佢問我點睇，我話跌咗咁多，樓價雖然唔算平，但亦唔算貴，不過唔能夠排除有再跌的風險，我問她買咗樓頂唔頂順樓價再跌，佢一口咬定話「頂得順」，又話快要結婚，唔買樓要租樓住，好煩。我就話你頂得順再跌都可以買嘅。

結果佢買完之後，遇上科網潮，樓市炒咗一轉，佢買間樓都一度升過一成，但佢自住當然無賣，但好景不常，科網潮爆煲後樓市再插，到２００３年沙士殺到，佢個屋村樓價跌到３０００元一呎，間樓跌到２００萬邊沿，嗰朋友開始牙痛咁聲，有少少怪我當時唔阻止佢買樓，話「早知係咁我就租樓住啦」。呢個故事教訓咗我，跌市時教人買樓真係要小心，樓市一係唔跌，跌起上來，跌勢又唔係係咁易止得住。(明天續談樓市現況)

陸羽仁

美國多家巨企公布嘅業績都好過預期，3月耐用品訂單和新屋銷售都下跌，但跌幅細過預期，引發投資者對經濟週期可能已觸底的期望，市場情緒樂觀，雖然聯儲局公佈銀行「壓力測試」初步結果唔係咁正面，但未能抑壓美股升勢。杜指上週五開市即重上8000點，之後反覆上升，尾市才略為回順。

杜指收高119點或1.5%，報8076點；標普500指數升14點或1.7%，報866點； 納指大漲42點或2.55%，報1694點。杜指期貨最新報7960點，比現貨低水116點。

美國運通和微軟係推動杜指上漲的最大功臣，兩家巨企都係因為大力削減營運成本，業績優於市場預期而大受追捧。美國運通股價暴升近21%至25.30美元；微軟則上揚10.5%至20.91美元。

聯儲局上週五公佈市場期待已久的19間大型銀行「壓力測試」的初步報告，表示受測試的銀行需要持有較監管要求的資本水準高「很多」的資本, 才能抵禦假設的經濟惡化，但消息並未影響投資者的樂觀情緒。KBW銀行類指數BKX升2.9%，除了花旗集團微跌0.3%至3.19美元外；摩根大通升0.5%至33.38美元，美銀漲3.2%至9.1美元，富國銀行升6.5%至21.4美元。

美國預托證券方面，匯控亦跟隨大市造好，收報54.58元，比香港收市價高3.6%；中移動則重上70元上方，收報70.28元，比香港收市價高1.7%。而ADR港比指數係15616點，比香港高357點。

美國國家經濟顧問委員會主席薩默斯(Lawrence Summers) 昨日在霍士新聞內話，預計今年美國就業率會明顯上升，而經濟仍會維持收縮一段時間。當製造商重建廢置了的庫存，而消費者更換他們的舊車嘅時候，經濟才會重拾升軌。佢話奧巴馬政府正在建造一條通往經濟擴展的路徑，但即使最激進的計劃，見效需時，他預計至少要6個月以上。

上回講樓市的基本因素，話而家好過９８年，但全球經濟的大環境，又差過９７、９８年。

先講香港樓市好的一面，有兩大因素。第一，樓市的泡沫沒有９７年時那麼大，尤記得９７之前，如果從回歸前１０幾年講起，香港人一直擔心大陸收番香港後，香港會失去自由，怕大陸主政後在港拉人封舖，將民主派拉哂去坐監，香港人唔止無得批評政府，甚至連出入境的自由都無埋。但隨著９７臨近，又好似無事發生，所以接近９７年時開始熱炒回歸概念，股市樓市都炒到飛起。當時樓市的泡沫愈吹愈大，還有一個附加的心理因素，那些年頭雖然政治極其動蕩，但樓市卻反覆向上，買樓買貴了，坐一兩年又翻本有利，搞到大家都好大膽，深信樓唔怕炒。我最記得９７年有一日有個朋友來電，話深井青馬大橋景觀的樓，炒到１００００元一呎，我心諗深井的交通唔係咁方便，咁都炒到１００００元一呎，呢個波吹到咁大，都好快爆啦（自此之後即使樓市再升，那裏的二手樓好似都未超過５０００元一呎）。

睇番香港今次個樓市升浪，除了山頂豪宅之外（或者其他港島山腳甚至新界自稱豪宅的新樓盤），其他二手樓唔算太喪炒，普通８００呎以下的市區用家盤，大概最多只去到９７樓價的七成，升市時的熱度都無９７那個大浪那麼厲害，或者香港人在９７年金融風暴成身負資產燒過手指後，買樓始終唔敢去得咁盡。你睇亞洲其他地區，例如經常和香港比較的新加坡，呢一浪樓市泡沫吹到好大，新加坡樓市結構本來和香港不同，新加坡政府起的公屋又大又靚，吃掉了大半私人市場，所以新加坡樓市可以十幾年都無乜得炒，但呢個浪新加坡政府決定開賭場後，掀起了一個投機大泡泡，樓價短時期急升５成有多，出現近年難得一見的炒作潮，但也沒想到泡沫爆得那麼快，升得多，跌得急。所以香港樓市過去幾年炒得唔太喪，負資產沒有９７時那機多，卻同時減少了下跌時的空間。

第二大因素是超低利息減輕了買樓供樓的負擔。９８年亞洲洲金融風暴愈爆愈大，香港政府為捍衛港元匯價，唯有大力抽高利息，增加沽空港元投機者的成本，最高有一日曾把港元隔夜拆息抽高到３００厘，這就如自己食毒藥去毒老虎一樣，食到內傷，供樓者要捱貴息，苦不堪言，若炒家持有三幾間樓，捱幾捱就頂唔順。當年係等到俄羅斯出現債券危機，搞到美國對沖基金「長期資本基金」出事，美國聯儲局急急減息救市，香港才可以抖氣出生天。　　　

但今次係全球金融海嘯，一開始就從美國爆起，她不再如上次亞洲金融風暴那樣隔岸觀火，而係一開始就減息放水救市，大家都知在聯系匯率下，港息跟美息，所以香港跟住美國減息，香港未爆大鑊時，卻享受到減息好處，更拖慢了樓市爆破，美國最後減息到零厘，香港亦減到好深。今天銀行利息完全唔高，同９８年有好大差別，如今你用與香港銀行同業拆息掛釣的按揭計劃，供樓利息可以低至１厘以下，炒家要守都易些去守，如果投資者租間樓出去收到４、５厘息，借貸成本２、３厘，供樓仲可以食息差，投資者持有一間有息差可食的樓宇，只要唔等錢使，都唔係好大動機去賣樓。

　　    講了樓市那麼多好的一面，可以解釋到這一兩個月樓市的反彈，問題是樓市見底未呢？我恐怕樓市無咁快見了底，首先，外圍金融海嘯未見底，在這個大環境約朿下，香港經濟和樓市都好難快過外圍見底。其次是樓市是較長週期的投資市場，起動、衰落、轉勢都會慢過股市，樓市升了５、６年，跌番１、２年亦好正常，而家似乎未跌得夠。

陸羽仁

市場擔憂豬流感擴散，進一步打擊經濟, 加上投資者對即將公佈的銀行「壓力測試」結果仍抱有不確定性，抹去了通用汽車重組方案帶來的提振效應。美股昨日走勢反覆偏軟，杜指早段插水近70點，在8000點關口反彈，中午掉頭再跌，午後曾一度跌穿8000點，但馬上被收復。杜指午後在8000點上方爭持至收市。

杜指收市報8025點，跌51點或0.6%，全日最高8123點，最低7987點；標普500指數報858點，跌9點或1%；納指跌15點或0.9%，報1679點。紐約證交所交投淡靜，成交縮減至14億股。杜指期貨最新報7983點，比現貨低水42點。

如果話香港豬流感市跌得少，美國市跌得仲少，例如昨日美股開市前幾大航空股AMR、 Delta、Continental只係跌８％左右，但在美國交易的東航和南航就跌２０％。今次豬流感由墨西哥爆起，對正美國加州，無論旅客或黑工，墨西哥和美國交住頻繁，所以加州都相當恐慌；中國遠在千里，受影響應比美國少，但美國航空股跌得少過大陸航空股，又真係唔係幾對路。夾硬去解釋，可以話中國有爆過沙士的經驗，所以對豬流感特別敏感，又或者美國人對自己有信心，覺得自己乜事都無（又幾似２００２年尾中國剛爆沙士時的反應喎，中國當時亦話「無事，無事」）。

　　    如今世界各國都對豬流感嚴陣以待，世界銀行估計，若爆發一場全球流感潮，可以令全GDP跌５％，損失高達３萬億美元。以２００３年爆發的沙士為例，雖然主要在東南亞爆發，維持時期頗短，但已令區內損失０．６％的GDP。

　　    豬流感的經濟影響在擴散中，主要對旅遊相關行業產生負面影響，若豬流感在美國擴散，美國流入和流出的旅客大受影響時，對本來已弱水的的旅遊、航空業有致命打擊。目前第一波先打擊美國的豬肉出口，６個國家已宣布禁止美國部份地區的豬肉入口，即使目前並無確實證據顯示進食豬肉有可能染病。美國商務部發表聲明反駁，「話外國禁止美國豬肉或其他產品入口，並非建基於科學證據，會無端阻礙了貿易」。在疫症擴散時，各國政府採取一些斷然措施阻止病毒流入自己國家，實在無可厚非，美國現時的反應，亦和２００２年時中國的反應一模一樣，由此可見，無論那個國家，在自己國家出現疫症爆發的苖頭時，都會傾向低調處理，以免影響本國經濟。

　　    在我寫網誌之時，在墨西哥已有１４９個疑似因豬流感死亡的病例，可見病毒已一定程度擴展了，等如香港沙士爆發初、中期情況，若控制得不好，不但當地的死亡病例會急升，還會因為人流而擴散去其他國家。

　　    睇番美股跌咁少，顯示好友相當強，淡友借豬流感都插唔落去。但以當年沙士的情況去估計，疫症爆發不是一兩天就過去，可能搞一兩個月，小心到５月、６月時才來料。

昨日，美國通用汽車（General Motors）公佈最新的重組方案，包括大規模削減債務，裁員、減少品牌和經銷商。通用汽車新任CEO韓德勝（Fritz Henderson）表示，通用計劃在2010年之前剝離皮蒂亞克（Pontiac）品牌，在2009年之前解決薩博、悍馬和土星三個品牌，僅僅保留雪佛萊、凱迪拉克、別克和GMC集中經營。在削減品牌的同時，通用計劃將旗下商標從2008年的48個減少到2010年的34個。

為精簡公司結構削減成本，通用銷售商將從2008年的6246個減少到2010年的3605個，與通用2月17日提交的重組計劃相較，此次計劃削減的數目增加了500個，並將提早4年完成瘦身。

通用將大舉削減產量，預計在2009年第二季度和第三季度的減產規模將達到19萬輛。零配件廠的數目將從2008年的47家裁減至2010年的34家，至2012年零配件廠將僅僅保留31家。關閉工廠的數目達16家。另外，在2010年之前，將員工從2008年的6.1萬人減少為4萬人，並關閉13家零配件工廠。

為減輕債務，通用向其債權人提出以每1000美元債券換取225股普通股的方式減少共270億美元的無擔保債券。根據通用汽車上週五每股1.69美元的收盤價，置換價格為原債券面值的38%。這遠高於二級市場價格水準，網上交易平臺MarketAxcess顯示，通用汽車債券在二級市場的價格占原債券面值的8.5%至12%。此外，通用還與美國工人工會（UAW）的談判，希望削減約200億美元的債務。通用希望可以減少約440億美元的債務，改善其資產負債表的糟糕狀況。

問題係要有90%的債券持有人同意該置換條款，換股才能執行。如果通用汽車未能獲得足夠的債券持有人參與換股，該公司將申請破產保護。消息發佈後，雖有股東認為通用的債換股方式不公平，但股價逆市飆升逾兩成至2.04美元。

美國預托證券方面，匯控收報52.7元，比香港收市價高1.8%；中移動收報67.66元，比香港收市價高0.6%。而ADR港比指數係14997點，比香港高157點。

陸羽仁