美股大跌，港股裂口低開少不免，散戶是沽是揸，自然十五十六，除了要分析大市，也要分析自己的倉位。

　　先講美股道指跌３６７點，但除了企業盈利不如理想和股災２０週年，又睇不到更大的利淡的消息。從一個外人角度看美股，股災２０週年固然不應該是跌市理由，而美國樓市不濟，企業盈利受影響，乜唔係一早知o既咩，點解這些消息令會美國這個成熟股市跌咁多呢？

　　美股在大幅減息後破１４０００點做出雙頂，出現我話經濟唔好股市創新高的「怪現象」（其實一啲都唔怪，減息係可以刺激股市短期上升）。美股後向視乎今個月底聯儲局會唔會再減息。

　　大家都知美國的大行有左右財金政策之能，這幾家大行的業績都唔係幾掂，心情唔好，主要係次按問題令商業票據市場受重傷，上月減息後略為舒緩，但債市並無復元，債市唔得，不單令投資銀行大行已包銷的商業票據要上身，還有連串的負面影響。過去一年美國上市公司併購活動頻繁，做中間人的投資銀行大賺特賺，出手的私募基金，背得就有投行支持，用很大的借貸桿槓去資助收購，債市唔掂，私募基金何來有錢收購，投資銀行邊有生意做，所以投行當然想聯儲局再減息，進一步挽救債市危機和開水喉解決市場資金不足。

　　不過上月聯儲局大減息以後，美股因減息而急抽，表面看次按問題好似已經解決（實情係未解決，未解決），不再有進一步減息的理由，外匯市亦估計美國不會再減息，所以美元一度反彈。簡單點講，美股唔插吓，又點「逼」到聯儲局再減息呢？上週五美股大跌後，市場又開始預期聯儲局要再減息，所以美元又開始散散地，今早歐元升上１．４３的高位，日圓又升到１１３．８點（對沖基金唔知會唔會又玩套息交易拆倉），整個市場開始營造減息的壓力。既然美股要玩跌市谷減息，我地都要奉陪了。

　　美國減唔減息，說不定現在已有腹稿，只是我們不知而矣。目前有兩種可能，第一，美國係一個真跌市，經濟唔好要跌番１０００點、甚至２０００點，港股點叻都好，起碼都有一浪大調整。第二，美國只係一個催谷減息市，美股本週會跌，但唔係崩潰性下跌，而美國在下週三聯儲局議息後有望再減息，那樣跌完之後，就會抽番高。

　　所以在跌市之初，不用太驚，股市升得咁高跌吓好正常，睇住個市點跌，再去判定點做。好多人問股災和大調整點分，股災來到時，一跌跌１０％以上，美股８７年一日更跌２２％，港股現價２９４６５點，跌一成要一日跌２９００點，若跌到２０％，更是一日跌５９００點，見到咁o既跌幅，就要識驚。再者，過去１９７３年，１９８７年，１９８９年，１９９７年，２０００年，咁多次股災，只有１９８９年和１９９７年不是全球性股災，８９年是中國六四事件，９７年是亞洲金融風暴（也是亞洲區的），多數一跌起上來全世界一齊跌，你見咁樣全球性o既大龍鳯，都應該識分，知所走避。

　　不過最後再加一句風險管理，你睇吓自己揸貨多唔多，若果揸得爆哂倉，就要小心，無論如何幾時都要守紀律止蝕，假設你在星期五追了貨，今日遇上跌市，一日就到止蝕位，唔理你點分析，都應該止蝕，等一彈就斬，睇定再玩過。咁唔好彩一買就要認輸，可能係運氣唔好，可能係眼光唔好，但止完蝕又係一條好漢。呢期流行做盲俠，點跌都唔沽，最後就可以賺錢，若你買中紅色大股，過去就係咁（買中細股唔止蝕，就由盲俠變死俠了），不過將來係唔係咁就無人知，盲目買股的人贏一年就得，我又未見過盲目買股的人能在股市長勝噃。


陸羽仁

　　美股道指反彈４４點，主要是估蘋果電腦業績會好及受貝爾斯登在大陸投資刺激所致。不過美股在大跌３６０多點之後，只反彈４４點，反彈唔夠有力，怕佢彈完要再尋底，要壓住到月底聯儲局議息日。
　　大跌之後通常會反彈，恒指昨日跌了１１００點，中段跌幅一度收窄到跌７００點左右，但結果因為大陸A股腳軟而跌了下去。如果今日反彈超過６０６點，彈番到１０天線以上，並守得住這個位收市，大市有望脫險；若果反彈力水唔足，先彈後彈幅收窄，後市就唔太樂觀；以美股這種彈力，港股唔易彈番上１０天線樓上，固然也要看看阿爺股市有多大刺激。
　　昨日和中環茶友傾起，跌市時好多人望阿爺股市升上去沖喜一下，但係發覺大陸正計劃發射嫦蛾一號探月衛星，暗呼不妙，因為剛開完十七大選出新領導層，大家希望阿爺發吓功托吓市沖喜一下，怎知它竟然搞射衛星沖喜，唔係搞托股市沖喜，認真濕滯。
　　講開又講，中共九人政治常委中，新星李克強接替黃菊的位置，預料會出任常務副總理，管埋金融，睇吓李克強一副冷面殺手模樣，而且佢係胡總愛將，當會繼承胡總的手硬風格，若要調控金融，將有他的一套。
　　講番港股，我經常講，圖表係人造出來的，若好友佔上風，不用三天圖表就回到比較健康的向上走勢。若然大戶想造淡，就唔會俾指數升上去，如今是淡友暫佔上風，因為圖表走勢甚差，要睇吓好友今日如何反攻。
昨日期指持續低水，經常有過百點以上的差幅，就令人比較擔心。大戶可以買賣現貨，可以買賣期指，期指出現低水，即係話沽期指的人要付百多點的溢價，如果一時間低水，可以解釋為有大倉在手的大戶想沽現貨沽唔切，所以先沽期對沖，但期指持續低水成日，就唔應該係有人沽唔切現貨，而係不斷在大手沽期指。昨日現貨不時反彈，顯示有頗強的購買力在低位買貨，但每當期指出現嚇親人的１５０點以上低水時，又拖番現貨落去，怕只怕係北水買現貨，鬼佬沽期指，等你彈得咁上下，又來一插。所以大市要好轉，期指低水的情況亦要改善，如果今日大市顯著反彈，期指又持續高水，就可能脫離危險期。

美股跌又重燃減息希望，令美元走軟，日圓急升到１１３．８水平，對沖基金的套息交易又開始拆倉，若把日圓扯上１１２、１１１的水平，市場又會起恐慌，小心。

炒股要順勢，如今跌到半天吊，跌得未夠深，要買平股未係時候，反而大市衝番上２９０００點樓上兼企穩，再去追也不遲，雖然貴啲，但從炒作角度亦都安全啲，減少一追就要止蝕的機會，寧願買貴，唔好買錯。

陸羽仁

　大家若不善忘，應會記得大約在一年半載之前，我們看見大陸股市調整，跌不了一兩天，就急促反彈，我叫佢做Deep V調整，那時我們心中還有點笑大陸股市炒得咁顛，跌都唔跌多過兩日，顛得過份，估唔到如今香港也變了這種股市。

　　兩個月前我叫大家適應吓大陸式股市，３０、４０倍PE等閒事，５０、６０倍PE都唔奇，到這種事情真正發生時，我自己都唔係咁適應了，畢竟講是一回事，眼見這種股市又是另一回事。

　　在目前的市況下，大陸人賺錢，散戶賺錢，因為他們逢跌即買；短炒的鬼佬輸錢，機構莊家輸錢，因為他們按傳統規律行事，也因為股市波幅太大；至少目前如此，講幾個月就唔敢包了。中環茶友講起有些炒短線的老外基金最近沽了貨，對港股「牛到唔牛」的走勢大搖其頭。

　　「投資的我」可以有原則，但「投機的我」就唔可以硬頸，只能看風轉舵，順勢而炒，唔好逆勢運作。

　　股市昨日的走勢逆轉了早前的跌勢，首先升穿番早２９０００點的１０日平均線，收市大幅企穩其上，即使這一兩日回吐，如果不再跌穿１０日線，此浪調整話咁快又結朿。另外期指亦已擺脫早一日整天低水的狀況，走番上高水，好友搶攻佔番上風，期指買盤轉強。

　　早兩日頭條日報的專欄用上「土牛遇上洋跌市」的題目，如今初步點算，土牛暫佔上風。港元走勢咁強，大陸水源源而入，陸羽仁特別打幾個電話問吓大陸朋友，攞吓佢地點睇港股的感覺，發覺係睇好居多，好多人唔知幾時都已在香港開咗戶口，買緊港股，實行兩地股市立體聲咁炒，他們認為H股對A股還有差距，有排炒咁話。又話內地錢多得好緊要，正在源源不絕流入香港。

　　陸羽仁唔係想從內地朋友口中攞到港股分析，只係攞一種感覺，得到o既印象係非常睇好港股，從一個側面反映他們看到快有港股直通車政策，個個人都超前過來炒港股，把H股看成為A股互動的市場，聽到陸羽仁都驚驚哋。

　　出現這種鬼佬對北水的局面，股市後向都唔易分析，你知陸羽仁從來覺得鬼佬真係郁起上來好大力，覺得佢地會係最後贏家，但目前情況可能未到最後時刻，亦可以嘗試代入鬼佬角色諗吓嘢。外資大戶在２００００點上下累積了大量好倉，如今升了９０００點，水位充足，本來至少可以玩吓調整，食吓波幅，然後明年再玩過。不過一試吓沽，即刻有北水大軍接貨，唔係點沽得落，硬沽有少少浪費彈藥，最大問題是阿爺的港股直通車政策應出未出，最怕一啟動沽貨，港股直通車政策就殺到，就會中伏。

　　假如我係外資大戶，沽唔落就會調頭再推上，送你一程，既然你逼我賺錢，逼我食深啲，我都唔同你客氣啦。大市彈番上２９０００點樓上，隨時又再炒過。

　　無貨少貨的網友，面對咁o既局面幾無奈，有網友問：「陸sir, 你好! 其實我已經睇左你個blog好耐o架啦, 但是一直都無留言過, 今次我都真係忍唔住要講番兩句!! 小弟行年廿七, 買股票的日子不多, 從前因為爸爸在金融風暴時一次清袋, 所以對股票一直存有戒心, 所以都係近幾年先開始買, 起初也只是買下d銀行股用作投資, 但是一直唔多升, 直至上年才好似坐火箭一樣, 股價狂升, 升當然好開心, 但是一跌就好驚, 所以一大跌市就閃, 等跌定就再入, 如是者出出入入, 直到上月個市好似痴了線一樣, 我就好驚升得越快跌得越急, 所以就沽曬手上d貨! 點知......結果大家當然知道! 個市繼續"痴線", 而我就繼續"痴呆"! 想入市又入唔到, 等佢跌又唔幸跌! 陸sir, 你話我依家應該點算好?」

　　無貨在手的網友，結果都會再入市。我話而家係大陸式顛牛市，升會升到你唔信，跌起上來又會好傷。按我o既講法，在顛牛市中，「投資的我」沒有太多穩健的投資，集中火力認吓新股就算。「投機的我」就順勢而炒，可以跟風炒熱股，例如炒即將上A股的紅色大股，講明係投機，限注，止蝕，係最重要的兩大原則。

　　上述提問的網友，我唔知佢錢多還是錢少，若錢不多，單是認新股都玩到你唔玩。若是錢多，可以拿兩三成出來炒，叫得做炒，預得個市升到顛隨時大跌，總之輸一半自己都頂得順，就可以去炒，限注係限自己可能輸錢的總數。記住咁o既市，炒股唔可以博命，否則隨時無命。




陸羽仁

　　港股、A股熱炒，外國重量級投資者都以紅色股為焦點，股神巴菲特認為A股過熱買唔過，但商品大王羅傑斯就話睇淡美元，要盡沽美元資產，要買人民幣資產，認為人民幣十年可以變３倍，甚至４倍。

　　巴菲特話A股貴（H股有３至４成折讓，相信在股神眼中亦不便宜），其實是他一貫的價值投資論，佢睇公司的賺錢能力，要買股價比賺錢能力有深度折讓的公司股票，現在當然買唔落A、H股，所以他會沽中石油（０８５７）。這種分析和我話「投資的我」沒有太多好股可買一樣。「投資的我」講求股份價值，最後主要歸結為公司盈利能力一條，公司盈利能力愈好，股價愈低，愈有投資價值。公司盈利能力相對價錢的最簡單量度標尺，是為市盈率（PE），在公司市盈率３０、４０倍比比皆是的年代，的確沒有好多筍貨好執。

　　股票貴，作為「投資的我」可以唔買，可以沽貨，但好難沽空，因為股價偏貴之後，可以更貴，可以貴一段時間，唔買都會好揼心，唔好話沽空了。

　　投資界有好多猛人，都曾經被貴價股票玩死。好似２０００年科網股狂潮，無論講價值的巴菲特，或是愛投機的索羅斯，都唔睇好。巴菲特唔買科技股，他其實是睇淡，卻謙稱自己唔識科技，所以一股科技股都無買，在那個科技股狂升的年代，他無買科技股，投資自然無表現，被很多美國股民罵他唔識嘢，他也只能啞忍。

　　索羅斯仲弊，他眼見科技股不是超高PE，而是無PE，因為絕大部份科網股未曾賺錢，所以他認為有機會，沽空之，於是就大量沽空科技股，結果就中重招，最後索羅斯要半退出江湖，也是科技股一役沽得太早輸大錢所致，結果科技股終於大跌，可惜索羅斯也等不到那一天。

　　喪升股喪升再喪升的例子實在太多，好像八十年代日股狂潮，日股升到３萬幾點（也是３萬幾？）那時候絕大部份股票過１００倍PE，有些更有２００倍PE，如果你在４０、５０倍PE時沽了日股，後來一年得個睇字，已經夠難受。如果你是沽空了日股，沽完之後再狂升，更會給人一Q 清袋。

　　記著股票的價值可以計，平貴可以貴，貴到那一個價錢會大跌，計不出來。正如計數好叻、炒股好差的牛頓咁講，他計數咁叻，都計不出股票會被一班瘋狂的人推升到哪個地步。

　　巴菲特睇股票的內在價值，在現實世界，股票絕大部份偏離內在價值，唔係平就係貴，巴菲特就係搵股票偏離內在價值而特別便宜的時候去投資，佢買中石油，因為當１元多的中石油股價，只反映內在價值三分之一，有深度折讓，所以他入貨，以股神的計法，我當中石油５元反映當時的合理內在價值，加上油價上升和發現新油田的因素，斷估計１０元已完全反映中石油的內在價值，超過這個價，加上股神認為A股過熱遲早要跌，他沽貨亦十分正常。

　　不過巴菲特睇淡，即使佢睇啱，不等如股票會即跌，股價開始偏離內在價值，愈來愈貴，仲可以貴好多。我昨日和中環茶友傾起股神睇淡A股，我話股神看法超前，經常超前一兩年，所以佢見到股價貴都會忍一陣先至講，忍一陣先至沽，但到他公開睇淡或沽貨時，股價也不即跌，反而會升，因為佢自己都知自己倉位大，唔係在好熱時沽，根本沽唔出，所以股神睇淡後，隨時還可以再炒幾毎個月，甚至更長時間。

　　反而羅傑斯取態較飄忽，他早大半年前曾經講過A股有泡，後來又縮番唔再講。如今睇到美元弱勢，話要將全部資產轉成人民幣，又好似睇番好大陸股市。羅傑斯是炒家出身，講嘢炒味亦濃啲，所以近似「投機的我」，頗有順勢而炒的味道。他的觀點是第一，美元弱勢，而且這是五年十年的長期弱勢，所以要盡沽美元資產。第二，人民幣強勢，也是五年十年的強勢，所以要買人民幣資產。第三，佢無話全部錢去買A股，佢可以只是存人民幣存款，可以買房地產，可以投資實業，可以投資上市前的股票。而炒上市股票的錢，可以只佔少部份。如果你話俾我聽羅傑斯把全部資產買哂而家上市的A股股票，我就唔係好信，我估佢會分散投資，佢雖然長線看好大陸經濟和人民幣，但作為大投資者，佢要估計短期大陸股市或樓市如果大跌，對他的風險有多大，做吓壓力測試，研究如何去，控制、平衡、對沖這些風險。

　　我叫「投機的我」限注去炒，就是散戶控制風險最簡單的方法。你用三成、五成資金去炒，只要唔炒窩輪，研究吓萬一輸一半頂唔頂得順，自己可以決定炒唔炒。炒輪要預輸清，資金只能更少。想做巴菲特或羅傑斯，有得揀噃，甚至精神分裂，一半做巴菲特，一半做羅傑斯都得啫。

陸羽仁

　　

  　在盲俠都會贏的年代，網友Tonton話佢個朋友聽人講叫佢去買1199（中遠太平洋），點知記錯買咗1919（中國遠洋），咁就升左一倍，記性好啲都死。咁o既市唔夠盲就贏唔到大錢。財經專欄作家面對這種市況，即使十分冷靜，也不能勸人不賭，只能勸人賭得精明。　　

如果好似股神巴菲特那樣，就夠資格勸人唔賭錢了，所以他在大陸說：「中國股市表現非常強勁，當有這麼多人愈來愈醉心炒股，他們應注意是用甚麼價錢去購買，不應興奮過度，因為不同國家的股市總有一天會走到極端，就像美國高科技熱潮。我比較謹慎，當很多人對股市趨之若鶩，報章頭版就刊載股市消息，就是該冷靜的時候。」

　　股神這樣的年紀，有這樣的身家，即使佢唱衰完股市再升，佢都唔怕你鬧佢，普通人叫人唔買股，阻人發達，肯定是罪過。而財經專欄作家叫人買股更是職業病，他天天寫作，若果話睇淡叫人清貨，一股都唔好買，以後仲日日寫乜嘢？衰起上來叫完人清貨，個個市天天升，更加無運行。

　　股神舉了科技股的例子，就係話中國股市有泡沫，遲早爆。市場傳聞他買了國壽（２６２８），他更特意澄清，大家應該記得，開始傳他買國壽時，國壽只是２０多元，他在２０多元時不買，現在５１．２元更加不會買了。他在２０幾元時無買國壽，可見國壽不符股神的入股標準，股神的入股標準是股價相對內在價值有深度折讓，他在１元多入股中石油（０８５７）時，中石油相對他計出的內在價值有６成多的折讓，所以才入貨。如果２０多元的國壽不合股神標準，５１．２元的國壽更不合格，更何況百多元的平安保險了。

　　假設股神講的話是對的，大陸股市在３年內爆泡，我們應該如何自處？我估可以總結出幾條意見。第一，有貨在手，即使作長線投資者，若低價入貨，若見股市再抽升得太顛，不妨沽出部份股票，收回成本，剩下的是無本投資，心安理得。第二，長線投資者若非經嚴格挑選價值特佳股份，現在不要盲目跟風買入紅色大股作「長線投資」，因為現在的股價太高，不宜長線。第三，顛牛市升完可以再升，大股炒唔上，亦可以炒細股，你睇這一兩天細股亦開始郁動，所以永遠有股可炒。炒股無問題，問題是要控制自己的心態，要限注，不要股市愈顛，自己更顛，要知道贏錢只是虛幻，只有輸錢才絕對實在。
　
　網友Shirley問起，「我發覺我的友好們(包括我自己)都對後市感到不安, 對於那些已累積極可觀利潤的愛股想高位獲利但又怕恨錯難返, 以下便是我個人仍持有的股票: 平保 /國壽 /中銀香港 /工行 = 招股至今；中海油 @ around $5.7。　現心大心細想全部沽清(在7月中大市在23,000 點前已沽出部份股份, 五隻中除了中海油已全是0成本)然後安安樂樂等大調整時再買回. 我明白知易行難, 但低買不高沽又好像不大妥當, 陸老師有何高見??

現時心態 (希望老師在分析時有點幫助吧): 我對這年多所賺取之利潤已很滿意, 亦沒打算賺到盡; 反之想休息一下那個滿載numbers & $$$ 的腦袋。若老師感覺我有點精神分裂(也有一點吧, hee hee)也請多多見諒, thank you!」

Shirley，你現在怕跌市，所以想沽清股票求個安樂，不過若果沽完之後它們又大升，恐怕你同樣不安樂。你有三種方法可揀：一，一注沽清，但你無咁好彩一沽完就股災，你要心境超級平和，才能忍受沽完股價再大升之痛，最大問題是要忍住不重新撲下去買過，手持現金，好易手痕。二，見高位沽一半，再見高位再沽一半（邏輯上總會剩番少少貨在手，享受一下顛牛的魔力）。三，沽清現貨，把所得拿一、兩成出來買H股指數的窩輪，若再大升，可以用窩輪享受這一段的升幅，若不升，這一、兩成再博的資金就當佢輸清。方法好多，自己用腦諗吓邊一種適合自己吧。

陸羽仁

美股道指上周五升１３４點，主要是微軟等公司的盈利預測樂觀。如今環球匯市和商品市場已在大炒美國減息，歐元升到１．４４，油價亦大升，升到內地油站唔想賣油，這種局面對中海油、中石油有利，對中石化不利。

港股升穿３００００點之後，今日又會隨美股抽升，李四叔估恒指聖誕後上３３０００點，股神睇股，愈睇愈高。唔信會升的股民，如果手上無貨，甚至開始想沽，網友「自資之明」留咗段咁樣o既說話：「啲錢係銀行會咬人，我最近想玩期貨...我現有6w....想沽空恆指小期貨．．．．大概有4000點彈藥可以挨價，股市計8000點為底，升到30400點，接近4倍(4x8000點=32000點)，過往記錄2至3倍就爆，加埋市場好似信心受壓，有一觸即發之勢，暴跌1W點之幻想時常出現….啊…」

在牛市中，買跌難炒，在顛牛市中，買跌更是難上加難，唔係唔會跌，係你唔易中。即使我們做一個假設，暴跌必將來臨，但問題是那一天才到呢？會唔會升到沽空者頂唔順才跌呢？股市升得多，大跌唔出奇，可能明天跌，也可能升到４００００點才跌，邊個知？逆市沽空的風險就在這裏。

在大升市當中，我經常問經紀張「散戶指數」，問吓佢愛炒的散戶做緊乜？特別是炒期指的散戶做乜嘢多？過住呢個散戶指數都幾準，由升市之初到中段，如果一早睇錯邊做淡的散戶，沽了期指，不但不會平倉，更加會加注溝淡，希望最後一跌快啲來臨，讓他把早前輸的錢一舉「吹」回來，他們一路沽期指，心中一路大叫跌跌跌。如果我見到散戶淡倉仍多時，就會較放心買貨，因為期指兩邊有對手，散戶沽得多，即係大戶揸得多，大戶係好友，特別是過去期指走勢主導大市，大戶做滿期指好倉，嗰市亦好難跌。最近這個「散戶指數」唔太準，因為流入的北水太多，狂買現貨，倒過來頂住期指，不過無論如何，散戶指數仍有參考價值，當好多散戶認為大市要暴跌，個市反而仲有一段安全期。

「自資之明」講起沽細碼期指，又使我想起年中一段往事，話說６月恒指抽上２２０００點左右時，經紀張有個客想沽細期，問我點睇，我當時話全年仲睇好，沽期指要小心，唔買都唔好沽呀。後來經紀張把意見轉告那個客戶，那個客無理，照沽，沽空一張細期後，大市上過２３０００幾點，但７月尾開始回落，到８月更因次按問題而大跌，經紀張個客當時贏大錢，我問經紀張個客平倉未，經紀張話個客無平倉，話估計大市起碼要見１８０００點，不但無平倉，還在２００００點加了注沽多一張。我之前叫佢唔好沽，結果佢中我唔中，當時更加唔敢俾咁多意見，但心中暗暗為他擔心。

結果大家都知，個市在８月過後好似食咗藥咁，大幅挾番上，經紀張個客見個市升番到２４０００點、２５０００點時「唔信鏡」，又沽多兩張溝淡，前後追加兩次，沽一張變咗沽４張，結果輸到喊，終於在恒指３００００點時打靶，夾埋４張細期指輸足２８０００點。陸羽仁心諗，但經紀張呢個客，在２２０００點時沽第一張細期，結果愈買愈大輸足２８０００點，多過原先第一張的２２０００點總數。

股市升得多會跌，暴升之後隨時暴跌，港股這兩個月急升穿３００００點，升得太急應該調整，但經兩浪小調整之後，股市立刻炒上兼破高位，短期走勢是向上而非向下，而家沽空風險極大。最近期指加了按金，每張大期指按金由１２萬幾加到１５萬幾，港交所加按金，好可能是看到好倉或淡倉其中一邊（甚至是兩邊），倉位集中在少數人手裏，倉位集中風險增加，所以加按金。無論倉位集中的是好倉或淡倉，都顯市後市風高浪急，可以暴升亦可暴跌，總之不會平靜。

強如索羅斯，走去沽空科技股，科技股終於暴跌，但大跌前尾段的暴升，已足夠把索羅斯挾到輸大錢。沽空期指，風險無限，散戶若非有超凡功力，真係唔好落水。

陸羽仁

　　昨日聽一個股壇大孖沙講，而家好似地下有錢執咁，隨街都會踢到舊錢，他炒股三十幾年，未曾遇過，７元買新世界，升到２２元沽，一變三，以為好醒，諗住跌完係啲再買番，點知升到２８元，連佢都話自己老襯。


　　咁o既市，只要你肯炒，十個有九個有斬獲，另外一個係例外，網友小羊係其中一個，佢o既經驗咁，「你好我是一個股票市場初哥(以前都是媽咪幫我投資) 之前細價股抄時收到同事仔消息去買隻毫子股, 心想可以賺到幾仟已經好開心, 怎料股價一路跌, 我太驚所以在最低位走了, 因為怕再跌下去, 後來又上番去但我已經賣了, 所以心很想賺回失去的, 於錯誤私決定下高追了維達(3331)上市後幾天在7.1元追了貨, 以後幾日不斷徘徊6.9元, 但我沒有作出止蝕行動, 反而再於5元溝了貨平均價6.4元. 現在維達股價試過跌破4元, 我作出止蝕又會輸很多, 我可以怎麼辦呢？」


　　小羊係比較黑的新手散戶，錯事第一件是買毫子股，細價股上一浪炒完大部份未再郁，所以高位買咗細價股無止蝕者大部份仍坐緊艇。診斷斷係細價股、炒股唔係唔可以買，但買咗一定要止蝕，唔對跌就斬，唔係會好慘。
第二件錯是係追新股穿位唔止蝕，據統計咁旺o既市都有四成新股跌破招股價，所以買新股、即使是買了有質素的股份，都要止蝕。新股有雞股，有好股，新股的雞股唔在講，一跌永遠起唔番，唔止蝕永不翻身。新股的好股，一上市升完都係有收貨期，收乾貨才會郁，例如招金（１８１８），幕後人都收貨收咗大半年，要等一個華資大戶頂唔順沽貨出貨，幕後人才發功炒上。又例如錦江，同一個包銷商，又有概念，股價一直唔郁，到郁就要留意。又例如中信銀行，上市後毫無表現，昨日隨大市抽升，唔知係開車定係彈一彈，亦可注意。總之一句講哂，買咗新股，即使認定係好股，都要止蝕，情願沽咗長期留意，等佢突破再追入。

小羊第三件錯事係溝淡，買股唔順，應該減持唔係溝淡，贏要谷，輸要縮，唔係輸時走去谷。炒股大戶炒落唔順手時，輸不單縮，輸時要反手，好似索羅斯９８年狂沽港股遇上政府入市，沽唔落就反手造好，執番少少，不過此一著太高難度，散戶好難學，總之記住唔對路唔係溝淡買多一倍，唔完全打靶至少都減番一半貨。

　　小羊做足三件錯事，所以在有金執的市況都賺唔到錢。面對咁o既局面，小羊更要小心，你連一般小老鼠的感覺都沒有，旺市賺唔到錢，無利潤墊底，小心下跌時輸入肉。
　　今天講了十中之一輸錢嗰個，明天可以講吓另外嗰九個會點樣賺到笑。
陸羽仁

  　期指狂炒高頂住結算，有點今年６月feel，一路推高，風高浪急，但亦風光無限。美國減息期近，如只減０．２５厘，又無乜好說話講，小心大市先行回吐再炒。


　　　昨日講旺市十個炒九個賺錢，惹起一些回應及問題，不妨講講。早上已有老友講起，陸羽仁你咁講，即係勸人去賭。亦有老友講起另一些旺市輸錢的故事，他有個朋友做醫生，一年前突然同佢講，炒股好順手，想唔行醫轉行全職炒作，老友心諗咁浪費，做醫生頭頭尾尾加埋實習和讀專科差唔多讀咗１０年書，咁就放棄，真係讀書無用囉。不過最近老友再見番呢個醫生朋友，醫生垂頭喪氣咁講，炒細股炒到唔係幾掂，輸咗大錢，好彩無放棄做醫生。老友心諗咁戲劇性都有，又話全職炒股，跟住又縮沙，呢個醫生叻仔一名，讀書時中英數科科都咁勁，估唔到個市咁旺，咁叻仔都話炒股唔掂。


　　朋友唔係好識炒股，問我點解會咁，我話做醫生一年都有２００萬收入，一年前佢個醫生朋友講得唔行醫去全職炒股，應該都搵到唔少，例如揸住２００、３００萬本金去炒細價股，炒到有８００萬、１０００萬市值o既貨都唔奇。人會把一時的收入，視作永恒，醫生哥哥會諗，我一年炒股賺６００萬、８００萬，咁仲使日日睇症咁辛苦，不如全職炒啦。不過，細價股在今年８月大調整跌了下來後，未上番過去，醫生哥哥原本值１０００萬的細價股組合，隨時得番２００、３００萬，打回原型甚至倒輸，所以咪無得轉行囉。旺市炒唔中邊，或者睇中升或跌但買唔中股票，亦都可能中招。


　　昨日講到要止蝕及唔好溝淡，引發一些問題，網友bonnie問係唔係一定要一成止蝕，佢話假設佢３．６元買了錦江酒店（２００６），認為是好股，打算長揸六個月、一年，但佢股價已跌穿一成止蝕位，又係唔係要止蝕呢？有時好難作決定。
我可以咁講，「投機的我」一定要止蝕，你諗住炒股，勢色唔對唔止蝕好戇居。買股一買就跌，睇錯股，或睇錯入股時機，通常衰開有條路，起碼會衰一段時間，投機唔止蝕好易愈陷愈深，最慘係遇到沽貨對手係大戶，有意裝你，你唔止蝕就中伏。

咁「投資的我」又點呢？我認為主要看你對目標股票有多大認識，若認識好深，知道佢的價值，甚至可以準確估到目標股票的盈利，的確可以唔止蝕，股神巴菲特話睇中超值好股，買完即跌，佢會愈跌愈買。例如中原老細施永青去買對手美聯物業（１２００）的股票，全行兩大地產代理，已經做咗全行七、八成生意，如果施永青睇住自己盤數，上半年賺３億，發過豬頭炳，自然唔怕撲入去買美聯，因為他估到對手條數都唔差太遠，即使買完大市調整美聯股價跌，施生亦唔怕再買，因為佢知道哂對方的底牌（只是舉例假設，並非敍述事實）。

問題是好多人對上市公司的了解只是半桶水，估估吓，所以即使是投資，睇錯亦最好止蝕，即使買入對象是好公司，也可以候低買過，除非買入的注碼好細。

以錦江為例，現在只是尋底股，唔知有無人炒升唔升，想投資可以分注買，若想買１０萬元，先買２萬５，睇吓點，其餘３注見佢升再追入。又或者一注都唔入，日日去齋睇，睇到佢升先至追。以bonnie的例子，如果她把所有注碼在３．６元買入，我係佢如果重注會先止蝕。買股最怕輸，長線投資也要揀啱位入，最好一入即升，脫離止蝕位就有機長揸。

網友T的問題也類似，佢問溝淡，他認為對於弱勢股，這做法故然是上上之策。咁對於比較強勢嘅股又如何？若果唔係摸頂，大市又向好，手頭資金又容許，溝淡會否比減持好？

這樣又回到上面的問題，第一，你要識分「強勢股」，關鍵可能係實力股而非強勢股，強勢股可能只是呢期興炒作的股份的代名詞，我就話可以唔止蝕的股份一定係實力股，盈利升幅較理想，問題是新股民識唔識分盈利好壞的股票呢？如果唔識分，買咗熱炒雞股，愈溝愈死。其次，你話大市向好，又有錢，是否溝淡比減持好？的而且確，大市向好，跌完又升突，令盲目死坐貨的人獲益，咁就要睇吓股市係唔係永遠係咁，若無信心永遠係咁，相信音樂終有一日會停，咁都係唔溝好過溝了。

記住，遵守紀律要付出代價，在大牛市中，要止蝕又唔溝淡的股民，搵錢一定少過盲目死揸兼見低就溝淡的人，但遵守紀律的得著係防範風險，萬一大浪到來時，都唔會一Q俾人打沉。

陸羽仁

　港元脫鈎的傳聞，由市場傳吓傳吓，變成顧問公司的報告，言之鐅鐅話金管局任總向中央的溫總提過，想港元和美元脫鈎，變成和一籃子貨幣掛鈎。消息炒到港元好熱，搞到金管局昨日要向市場沽出七十八億港紙，為港元升值潮降溫。

　　美元弱化的趨勢的確影響深遠，港元和美元掛鈎，美國因為經濟弱財赤高、貿赤高，才令美元轉弱，但香港經濟強勁，本來港元應該升值，香港應該加息唔係減息，但因為要跟住美國，港元跟著美元走，人為地貶了值，香港變成實質負利率，會令香港的資產看起來更便宜，不但會令香港經濟過熱，泡沫升溫，亦會有輸入性通脹。所以有經濟學者和銀行家都叫政府研究吓港元是否應該和美元脫鈎。
　　這些討論每逢在港、美經濟走勢背駞時就會出現，一啲都唔出奇，出奇在今次脫鈎的消息傳得實在，而且港元升到要金管局入市干預，就有少少唔尋常，頗有點炒升值的味道。
　　今次由一間顧問公司爆料話任總上京和溫總談過港元問題，顧問公司叫Medley Global Adivisors(MGA) ，是大炒家索羅斯的前僱員Richard Medley在９７年成立，由於索羅斯名頭太嚮，一聽到佢個大名，即使係佢的徒子徒孫，亦令人生起很多聯想。
MGA出咗這份報告，令外資流入香港更火上加油，搞到金管局昨日要再入市沽港元，我最關心的是有無人炒港元。現實上起碼有兩種可能， MGA所說真有其事，港元升得有道理， 另一個可能是MGA所說並無其事，但卻可掀起一輪炒風。

這一排港元持續強勁，外界一直以為是資金流入炒股，如今突然增加一個炒港元的可能，若有炒家，到底在炒緊乜冬冬？

現實上港元和美元脫鈎的可能性極低，退一萬步講，即使任總咁身痕向中央提出，中央也不會同意，阿爺正進行金融大改革，改革期間最怕出亂子，香港在中國金融的大前線，是中國金融的對外窗口，中央部份金融改革又在香港作試點，你而家去放開聯系匯率，萬一搞出大混亂，會唔會影響埋中央的金融改革呢？

這個道理我諗得到，炒家也諗得到，既然港元脫鈎的機會好細，咁炒港元又為乜呢？大家應該記得９７、９８年的金融風暴，當時索羅斯的量子基金和外號野狼的另一個對沖基金，以「雙途進攻」的策略狙擊香港，他們既在匯市沽港紙，亦在股市沽期指，金管局要捍衛港元，就要大力挾高利息，以增加借貸沽港元的利息成本，結果把銀行同業拆息最高挾上３００厘，咁高息搞到股市大跌，炒家沽了期指，就食到應一應。

如果而家有炒家放出港元將脫鈎會升值的消息，並大手買入港紙，此舉風險極低，成本有限，因為港元匯價有上下方保證，買「錯」港元升值，跌下來也輸很少，但假如炒家同時大手揸了期指，一犬吠影，百犬吠聲，外國好多投資者會把錢投到香港，大買港股，因為港紙一旦和美元脫鈎，在現今情況，港元升三成都唔奇，在這個預期下，港股變咗打６５折，等如２００００點多一啲，在外國投資者看來又有得博噃。我話港股食哂類固醇，住後唔知可以炒乜，無想到仍然可以炒港元升值，這豈不是當年「雙途進攻」的反轉版，當日炒家沽港紙沽期指，今日揸港紙揸期指，挾高港元炒一轉。

上述只是陸羽仁的臆測，信五成就好了，但如見港元持續被人挾在高位，金管局要不斷入市，港元脫鈎之說又澄而不清，就要小心港股在大炒升值概念，引鬼佬投資者落水了。

陸羽仁

美股道指昨晚狂跌３６２點，跌幅２．６％，主要原因是金融股大跌，因為證券界估計美國最大銀行花旗集團資金短缺，將會減少派息，Credit Suisse 調低花旗的評級，搞到好多金融股出現五年以來最大的跌幅。

聯儲局減息０．２５厘和市場的預期一致，美股在高位本應回吐，但早一日美股不但無回吐，還要升１３７點，不過應該發生的事始終會發生，美股昨日終於大跌，嘔突早一日的升幅，看來美股即使跌完反彈，都會有一浪調整。

美股咁跌，亦應觸發港股有較像樣的調整了，港股在周二期指結算日曾經挾上３１９００點關，人為味道強烈，過完結算就如失去力托的無型之手那樣，自由浮動，昨日遇上美股大升，也是應回吐未回吐，但也是向上乏力，今日開始應被美股觸發一浪較深的調整。

昨日和中環茶友講起陸東哥哥的投資建議，話港股明年合理價是２８０００點，所以調整３０００點、４０００點才合理，有茶友睇得更淡，話今年應該調得更低，起碼去番２５０００點，陸羽仁睇完港元的炒作情況之後，開始有少少保留，認為調整都未必去到咁低。

有網友問起，為什麼一講完炒港元，港元匯價就回，是否資金已經撤走。陸羽仁追查一下那個所謂任總見溫總建議脫釣的事，原來完屬虛構，並無此事，但炒港元的是聰明錢，搞得出咁露骨的炒作，作得出咁具體的古仔，必有所圖，無咁易走。金管局入市沽港元，自然效果是港元匯價回吐，跟住拆息就落，這是預期結果，但唔等如炒港元的錢走咗，真正問題是港元炒作是否自此停止，抑或過一段時間就來，我就估無咁快會停。

投資睇長線，投機睇３個月中期走勢，要確定方向，才可以定短期策略，港股升近３２０００點，中期走勢都唔易睇，到底３１９００點是這幾年升市的浪頂，往後股市要大插一直跌落去，抑或這仍然只是小浪之頂，回吐後還會更上層樓呢？若港元有這種炒作，我估住後還會上高位，這是中期方向。

不過中期方向朝上，唔等如短期股市唔會回吐，港股升咗咁多，回吐也是極合理之事，遇上美股大幅調整，港股調整的排頭也不會弱，應會插深啲，不用太心急一注入貨，若有無型之手操控大市向上，通常在月頭會失重下墮，到月底又會上番，有錢買嘢炒作都不用太心急也。

陸羽仁