美國三間銀行配股集資兼大削股息，償還政府債務，投資者趁機獲利回吐，金融股昨日首當其衝，全線挨沽，拖累大市向下。杜指開市即插水逾150點，之後在8400點間窄幅橫行至收市，以接近全日最低位收市。

杜指收市報8419點，跌156點或1.8%；標普500指數報909點，跌20點或2.2%；納指挫8點或0.5%，報1731點。紐約證交所交投淡靜，成交只有14.9億股，較上日減少了逾兩成。杜指期貨最新報8360點，跌156點，比現貨低水59點。日股早段跌66點，微跌0.7%，唔係跌得好多。


BB&T、U.S. Bancorp和Capital One Financial趁股市旺勢，昨日齊齊宣佈集資共57.5億美元，以償還早前的政府貸款，銀行還錢脫身，以後可以自由派花紅，但配股有攤薄效應，投資者紛紛以沽貨回應，BB&T跌7.6%，U.S. Bancorp挫9.9%，而Capital One Financial更大跌13.5%0至27.1美元。KBW銀行類指數BKX大跌7.1%，金融股全線向下，Select Sector SPDR-Financial ETF下跌5.8%，摩根大通挫8%至35.83美元，美銀跌8.7%至12.94美元，富國銀行跌5.9%至26.53美元，花旗集團跌4%至3.86美元。

匯控昨日在收市後公布首季業績展望情況唔差，股價在英國市反覆上落，在美國預托證券市場造好，收報66.81元，比香港收市價高1.1%；中移動則收報74.26元，比香港收市價低1.4%。而ADR港比指數為17060點，比香港低28點。

福特汽車昨日亦宣佈計劃出售價值3億美元普通股，並利用其中的一部分建立退休員工衛生保健基金。福特汽車股價下跌2.6%至6.08美元。福特汽車係唯一沒有收到美國聯邦援助的汽車公司。 上個月，福特汽車公佈季度虧損14億美元。

美股交易員話，早前銀行壓力測試公布咗，非農業就業職位的數字又公布埋，呢幾日無大消息公布，市況較靜。上周科技股和零售股先回吐，銀行股和能源股仍強，但如今輪到銀行股都回軟，而油價由2月低位33美元一桶升到58美元，而家油市唔係真好，只係炒緊反彈，論基本因素，油價都要調整番10%以上，所以能源股同樣有回吐壓力。

諾貝爾經濟學獎獲得者克魯明(Paul Krugman)日前去咗北京訪問，從一個美國經濟學家的角度睇中國，值得一書。佢在北京先講吓美國經濟形勢，話美政府現在的措施只用了一半力氣，如果不採取第二輪措施刺激經濟，同時清理銀行體系，包括暫時將花旗，甚至將美銀收歸國有，經濟不能完全復甦，只能跛腳前行，美國以及歐元區國家將存在陷入日本式「失去的十年」經濟衰退的風險。

佢話，「美政府對銀行業的政策也只能幫助它們存活下來，但不能真正達至繁榮。」美國4月失業率達8.9%，創了26年來最高水平，克魯曼預計，美國就業在今明兩年內增長將極小，甚至會出現零增長。克魯明睇美國經濟都睇得幾淡，同而家美國股市由低位反彈30%以上的感覺，大相徑庭，佢認為美國政府唔出猛招國有化銀行，解決唔到問題。

克魯明讚許中國使出有力的措施刺激經濟，但他發現中國政府並未承諾轉向以內需拉動經濟增長模式，以減少其過多的存款，「若中國的貿易順差繼續佔GDP的10%，那麽將難以預料全球經濟將如何完全復甦。」克魯明的假設是中國大力拉動消費，令中國人花多點存款，這樣不止可以帶起中國經濟，並會多買歐美貨，有助歐美國家復甦，可惜中國並沒有這樣做。

佢認為中國保持龐大的貿易順差與美國的高失業率及歐洲的低增長並存，那麽政治摩擦料將隨之而來。佢意思係話美國眼見自己經濟不前，失業率高，就會向中國施加壓力，要中國提高人民幣匯價。

克魯明又話，中國不應急於使人民幣完全可兌換或放寬其資本帳戶，因為處於相似發展階段且放棄外滙管制的國家已面臨困境，他認為「我不確定我們是否在討論有關完全浮動的人民幣，但人民幣升值將有其必要，儘管中國目前不願聽到這一說法。」

       綜合克魯明的預測，中國經濟會回復健康增長，美國和歐洲只出現似有若無的復甦，更壞的情況是出現日本式的10年衰退。美國眼見自己衰到貼地，但中國卻賺大錢貿易盈餘龐大，又會向中國施壓，逼中國提高人民幣的匯價。克魯明的分析，可以作為中長線投資者的參考。

陸羽仁

美國首季房屋價格下滑14%，科技及金融股繼續有獲利回吐壓力，美股早段反覆偏軟，可樂、輝端藥業和油股造好，推動杜指午後止跌回升，標普500指數則以微跌收市。

杜指收市報8469點，升50點或0.6%；標普500指數報908點，微跌不足1點；納指挫15點或0.9%，報1716點。紐約證交所成交16億股，美股一個上落爭持的格局。杜指期貨最新報8436點，比現貨低水33點。

　　NAR（National Association of Realtors）昨日公布全國小型住宅房屋中間價首季下滑了14%至16.9萬美元，遠高過去年第四季的6.2%，據NAR調查的152個城鎮中有134個都呈下滑情況。

BB&T、U.S. Bancorp和Capital One Financial上日齊齊宣佈集資，相關股份繼續被拋售，拖累金融股下挫。BB&T繼上日跌7.6%後，昨日再挫7.8%至22.45美元；SunTrust大跌12.4%至16.21美元；富國銀行跌3.1%至25.7美元；美銀和花旗集團話齊跌逾5%。

匯控在美國預托證券市場偏軟，收報66.43元，比香港收市價低1.3%；中移動則收報75.33元，比香港收市價低1.3%。而ADR港比指數為16970點，比香港低183點。

因率先提醒投資者有關銀行毒債而名噪一時的分析員Meredith Whitney 日前接受 CNBC訪問，詳細闡述她對呢次升市和銀行股現狀的睇法。她開宗明義話，佢而家絕對不會投資銀行股，因為銀行價值被高估，呢次升市主要是政府的造勢交易（momentum trade），政府政策讓銀行獲致不該有的首季度盈利。市場睇基本因素的投資者明白規則何在，只投資於既定的遊戲規則，但政府介入後，遊戲規則中途改變了，變成沒有了規則。」之前市場人士睇基本因素沽空銀行股，政府改變規則令銀行股急升，令沽空者大幅平倉，造就了這個升市。

她說，「作為投資者，規則的不斷改變造成很大的困擾．．．最大的危險係散戶在一段時期內，想睇股票價值，都不知應該要相信誰。」她說這種狀況她一生未見，但睇番銀行業的基本因素，「基本因素並無改善，係零改善！」

佢話美國經濟大環境好差，失業率升幅比預期差，消費情況比預期差，銀行的經營模式已不復往昔，銀行的盈利能力大大削弱，在05、06年的時候，銀行從信用卡業務賺到25%的利潤，按揭業務，抵押證券買賣都能做到可觀的收益，但隨著巨大的消費流的收縮、信貸收緊的速度不斷加速，加上高踞不下的失業率，未來的消費支出將較人們預期的更少，例如美國銀行業今年首季就削減了逾2000億美元的信用卡信用額度，消費者借不到錢，將不會消費。

Meredith Whitney話，摩根大通現價30倍PE，這是很大的倍數，佢話唔係針對摩根大通，但銀行業部份賺錢模式一去不返，很多銀行股都有25倍PE，好難支持，銀行業的收入萎縮，但成本不縮，資產基礎縮細，盈利能力縮細，不能支持高PE。

佢認為銀行在壓力測試後要籌集更多的資金，它們都會引入合資伙伴，和出售資產的方法完成任務，問題係銀行一邊廂仍坐擁大量有毒資產，另一邊廂又要出售資產，太差質素資產將無人問津，變成銀行賣走好資產留下毒資產，銀行的盈利能力將更差，不排除再有集資需要。

CNBC主持人追問Meredith Whitney會唔會沽空銀行股，佢無正面回應，但佢就話會沽空零售股和消費股，Whitney極度看淡銀行股但又唔公然叫人沽空，唔知係唔係擔心在政府干預下，銀行股仲有得彈，但政府唔會干預消費股的遊戲規則，所以唔怕沽。另外佢又建議投資者手持現金，年終的時候將會出現很多有盈利潛質和物超所值的股票，而不應在現時買價值被高估的銀行股。

Whitney是明星級分析員，近期美國消費股比較弱，可能有些投資者聽咗佢建議，已經趁高走去沽消費股了。

陸羽仁

美國4月份零售銷售遠低過市場預期，收樓通知宗數創新高，美股昨日大幅回落，杜指開市即插水近160點，之後反覆向下，在8300點間窄幅橫行至收市。

　　杜指收市報8285點，跌184點或2.2%，全日波幅只有200點；標普500指數連續第三天下跌，報884點，挫點或1.6%；納指跌52點或3%，報1664點。紐約證交所成交17.7億股。杜指期貨最新報8294點，比現貨高水9點。

美國政府公布上月美國零售銷售繼3月份下滑1.3%，4月再跌0.4%，扣除汽車銷售部份，則下跌0.5%，跌幅遠差過市場預期的增長0.5%至1%。原因係職位流失、房屋價格下跌和家庭財富稅減，令消費者的消費能力大降。

銀行削信用卡額度也是消費減少的主因，我的美國朋友話，早一兩個月幾間銀行先後打電話俾佢削信用卡額度，有一間話你有張信用卡有１萬美元額度，但你成年都無用過，不如削咗佢。另一間又話你張信用卡有１萬5000美元額度，但你經常只用到3000美元左右，不如將你個額降到3000美元。我個朋友係公司高層，信用良好，到期就還信用卡數，尚且有咁遭遇，若過去有拖欠信用卡數的美國人就更加會被銀行大削信用額了。美國是一個借貸消費的社會，借貸收縮，消費自然跟住收縮。

零售銷售數據公布後，零售業巨企紛紛挨沽，標普500成份股中28家零售股中，只有一隻逆市上升，平均下挫3.3%。迪斯尼下跌3%、Jim Beam Bourbon 威士忌生產商Fortune Brands Inc. 和Best Buy挫5%；全美第二大的百貨公司連鎖Macy公布季度業績輕微低過預期，首季銷售跌9.5%，業績OK但股價卻下滑6.7%至11.52美元。

令投資者更震驚嘅係Realtrac Inc. 公布，美國4月份收樓通知宗數創新高，有超過34.2萬個住宅在4月份收過一次或以上的收樓通知，按年計大升32%。即係話，374間住宅中就有1間就有被收回的可能，係自2005年開始有記錄以來第二個月最高，3月份係34萬間，所謂市道轉好亦未能減少收樓數字。大城市中，賭城拉斯維加斯情況最差，每56個單位，就有一個接過收樓通知。標普500房地產指數下跌6.6%，係24個行業板塊中，跌幅最大的。房屋建造業股份亦下跌5.7%。

批股潮層出不窮，特別係銀行更係批得就批，北卡羅來納州銀行 BB&T 以每股20美元批7500萬股，集資15億美元。南卡羅來納州銀行SCBT Financial 以每股23元批130萬股，集資3000萬美元。賭業巨企MGM計劃批8100萬股，集資10億美元，另外又會發15億美元的有擔保票據，搵錢去重整債務。

銀行股繼續受壓，集資大戶美銀瀉10%至11.01美元，富國銀行跌5.8%至24.2美元，花旗集團挫6.8%至3.41美元，摩根大通跌3.7%至34.05美元，KBW銀行指數下跌6.5%。匯控亦跟隨美國金融股偏軟，預托證券市場收報62.7元，比香港收市價低3.7%；中移動收報72.44元，比香港收市價低3.3%。而ADR港比指數16460點，比香港收低599點。

　　 炒復甦買商品都開始唔得，銅價連續6日下跌，另外據中國於4月恢復其140萬公頓的鋁材生產產能，這將導致嚴重的過度供應，令鋁價受壓，美鋁（Alcoa Inc.）昨日大跌8.8%至8.63美元。

        環球股市呢一浪上升，主要炒經濟見底全面復甦，股市升，商品升，美元跌，但而家起碼睇到美國和歐洲情況都唔係咁，英國自己把經濟回復正增長的時期推遲到明年第一季，美國的消費和樓市的情況仍然令人憂慮，相信美股亦要調整一下啦。

陸羽仁

美股跌咗兩日後，投資者見無乜大集資出台，開始追落退，金融、科技和防守性股份造好，大市反覆向上，但就業市場疲弱，壓住升勢。杜指是早段向上，午後見頂回落，升幅逐步收窄，大市缺乏明顯方向，全日波幅只103點。

杜指收市報8331點，升46點或0.6%，全日最多升過92點；標普500指數報893點，升9點或1%；納指升25點或1.5%，報1689點。紐約證交所交投淡靜，成交縮減至15.2億股。杜指期貨最新報8286點，跌8點，比現貨低水45點。


主要金融機構表示不會再發行新股集資，投資者趁機撈底博反彈，金融股成為推動杜指上升嘅最大動力。摩根大通和花旗集團齊升逾4%，係杜指30隻成份股表現最好的兩隻股份，排在第四位嘅係美銀，升2.7%至15.54美元。富國銀行宣佈派發逾3.1億美元季度股息予美國財政部持有的25000股優先股，每股派1.25萬美元，富國股價升6.2%至25.69可8美元。


匯控跟隨美國金融股造好，在預托證券市場收報63.72元，比香港收市價高2.2%；中移動收報73.1元，比香港收市價低0.1%。而ADR港比指數16741點，比香港收高199點。


昨日講到美國的銀行開始斬客戶的信用卡或信用額，網友Fatfat1389報料，話「不只美國, 香港亦如是!! 我有一張Citibank的信用卡, 成年未用過, Citibank打電話來叫我主動cut咗佢!! 這是我第一次、亦係現時唯一一次有銀行打電話來叫我cut卡!!」睇嚟花旗唔止喺美國咁做，還在世界各地都同樣咁做，以控制風險。

美國的經濟動力係國家和人民齊齊好大洗，國家用錢多軍事和外交會強大，直接受惠的是軍事工業以至飛機製造業等重工業，間接受惠的是如電腦軟件和藥業等靠強大國力保護知識產權的工業。國民用錢多則對零售、消費等行業有利。不過使錢使到過籠時，情況就不可控制。

美國總統奧巴馬昨日就叫美國人和政府都唔好使咁多錢，佢在一間高校進行市鎮會堂式,演講，開場時叫一個女士來剖白，個女士話佢俾信用卡公司滾咗，利率突然提高到30厘。奧巴馬發言的主調是民粹式的，想國會盡快同意立法管制信用卡公司一些過份行為，例如隨意提高利息、濫收過期還款罰款和手續費等。不過奧巴馬鬧信用卡公司之餘，亦叫美國人購物時要克制，唔好買多過自己能負擔的東西。佢話「銀行都係一盤生意，佢地有權叫信用卡客戶依時還款。」

不過美國人已經慣咗先使未來錢，使咗幾十年，唔係話改就改。有一個中環茶友兩年前參加一次加勒比海豪華郵輪旅遊，一個人要花10萬、8萬，佢發現同船的美國人10個有9個係借錢來旅遊，最多人係加按間屋借錢旅行。我諗香港人雖然大洗，但加按層樓花20萬兩公婆去一次旅行的人亦都唔係咁多。美國人使慣咗，唔易返轉頭，呢啲叫做「由奢入儉難」。

奧巴馬亦講到國家借錢，話美國現時以發長債支持龐大財政赤字情況是「不能持久的」。若政府繼續向外國借貸，美國消費者將會承擔飛漲的利率。美國債券的持有人最終會對購買債券產生厭棄感，繼而令到所有包括汽車、房屋產貸款利息上升，損害國家經濟。佢話「我們不可以持續向中國借錢，借貸是要付利息的，這等於將我們子女的未來收入做抵押去貸款。」截至今年2月底中國持有美國國債已增至7400億美元以上。

早前，奧巴馬政府修正預算案預測，並提了今年赤字預測至1.84萬億美元的歷史新高，較2月的預測再高出5%。2010年赤字係1.26萬億，高出7.4%，政府的預測明年財政支出更會去到3.59萬億，高過原先估計的3.55萬億。奧巴馬話，最大的開支係健康醫療，因此政府要設法降低成本。

我又聽過一個大陸高官講，美國人經常投訴中國對美國有龐大貿易盈餘，其實好多中國人從事出口加工業，只賺幾百元一個月人工，同時大量使用中國的天然資源，中國出口賺到外滙後，又無可奈何要買美債，等如借錢俾美國人買自己國家的出口貨，邊個著數確實講唔清，人民幣升值三成，持有的美債貶值三成，就等如賣完嘢俾人賺到的錢事後仲要打七折。

美國在70年代初取消金本位制度後，發行貨幣不再需要有黃金支持，亦可以無限量發國債，一下子打開金融制度的約朿，只要有人相信，佢就可以無限制地發債發鈔，造就美國金融業和國力全面崛興。但玩得過份，發鈔發得太濫時，接貨者就出現信心問題，現時奧巴馬的處理方向正確，政府要逐步削赤，問題是現在是否開始削赤的好時機。

正如美國銀行行家協會反對信用卡立法時話，在消費者最需要信貸的時候，推出那些管制信用卡公司的措施，肯定會有反效果。中環茶友問，美國不再洗大咗時，到底係一個乜嘢的世界?大家做生意條數係唔係要重新計過呢?

陸羽仁

美股上周五缺乏方向，製造業資料好於預期，但能源股追隨油價下滑，市場擔心原油需求疲弱，杜指先升後跌。早上最多升過60點，之後下跌160點至8250點間徘徊至收市。杜指收市報8269點，跌63點或0.8%；標普500指數報883點，跌10點或1.1%；納指微跌9點，報1680點。紐約證成交縮減至14.8億股。杜指期貨最新報8266點，比現貨低水3點。

銀行股係拖低大市嘅主要元兇。摩根大通跌1.8%，花旗集團和美國運通挫2%。美銀跌5.7%至10.67美元，係表現最差嘅藍籌股。匯控在美國預托證券市場下跌，收報62.94元，比香港收市價低2.1%；中移動收報71.4元，比香港收市價低1.1%。而ADR港比指數係16482點，比香港低308點。

總結美股上星期表現疲弱，銀行股下跌16%，房屋建造股和不動產投資信託基金（REITs）跌13%，零售類股份下跌6%。美國信用卡壞帳創新高，花旗和富國銀行均錄得超過一成嘅壞帳比率。公用股、燃氣股和煤炭股走弱，反映市場對能源的需求仍然疲弱。以拍賣形式銷售能源產品的FirstEnergy報告指顧客出價遠比公司預期的為低，顯示住宅和公業用戶對煤、燃氣、以至核能的需求都低。美國的情況係股市在高位回吐，股價唔低，但實體經濟表現疲弱。

香港經濟亦唔靚仔，睇到香港首季經濟負增長7.8%，真係有點反胃的感覺，情況比看到香港最近最熱門的新聞:風水師攬住富婆合照後將幅相哂上水杯，更嚴重一點，心諗咁o既數連估得最差的經濟師都要跌眼鏡。

　    政府成日話預咗首季經濟會差，但佢自己只係估首季跌2.6%，和實際跌7.8%的數字相去甚遠。咁差的數字主要源於出口，首季香港出口跌22.7%，記得去年第４季我引述過匯豐的報告，話今年第一季香港出口要跌17%以上，結果仲要跌多啲，但政府即使估出口跌17%，應該都唔會估首季GDP跌2.6%咁少啩，實情係政府的經濟顧問睇出口睇經濟睇得太好。

　    中國和外國政府遇上經濟數據好差時，都有針對性的貨幣和財政政策去救經濟，例如大量減息，多印銀紙，大灑金錢搞建設等，但香港屬外向型經濟，政府可以做嘢的空間好有限，唯有派吓糖等市民唔好咁大火氣，跟住等運到等出口好番，查實都好被動。

　    香港經濟主要受歐美和中國兩邊影響，香港市場主要睇歐美，出口大跌，主要是歐美消費市場不振所致。而中國經濟近年愈來愈大，對香港影響加深，例如放自由行旅客下來、在金融業對香港開放、隻眼開隻眼閉放錢出來、讓香港人北上做生意打工等等，都對香港經濟有幫助。不過大家要記住，香港經濟核心還是靠出口到歐美，佢地好似有排未好，不能排除會長期衰退，香港亦唔係咁易話翻身就翻身。若果歐美出現L型衰退，所謂明年開始復甦，增長數字都係似有若無，咁香港和中國又會點呢?

　    香港啲出口好多源於大陸，睇住大陸的出口數字，都可以估到香港一大半，最近內地已開始有議論，若歐美經濟長期都唔好，中國又會點? 網友達摩問起:「明年中國真係可以擺脫歐美經濟的影響，有8至9%的增長噢? 會唔會太過樂觀呢噢?」

    　目前中國經濟中出口還是主要組成部份，內需市場要取代出口市場，無10年、8年不能發展起來，遠未能取代出口。歐美出口市場的前景並不樂觀，西方經濟有可能較長期衰退，衰退得耐就會生起保護主義，國民會話不如唔好入口咁多中國貨，咁先可以保障當地人就業，貿易磨擦必多，更不利中國出口。

　   中國經濟出口急跌無咗的部份，主要由政府投資填補，今年政府新增投入經濟體系內的資金5800億人民幣，加上原本的資金，合共投入9000億以上。今年新投入的5800億，就是所謂4萬億救市計劃，由政府直接分兩年多投入1萬多億，再帶動社會投資，加起來有4萬億，理念是私人市場賺不夠錢，就由政府投資夠。

　   歐美的情況要再觀察，照目前的狀況睇，明年亦唔多樂觀，若佢地消費市場持續下跌唔會大反彈，中國明年要維持8%增長，目前兩年4萬億的救市措施可能唔夠，要再加碼。

     　香港得個睇字，望天打卦，一望歐美消費早日復甦，二望阿爺出招夠快夠狠夠大力保得住8%增長，中間存在不少變數，唔係而家可以肯定講得到。但本地經濟下跌之勢來勢洶洶，再送一單人類豬流感對旅遊、航空、酒店業的影響在加劇中，日本大爆本土感染，香港出口唔掂靠旅遊的方程式隨時受重挫，你都咪話唔擔心也。

陸羽仁

杜指昨日翻版上日走勢，又係衰收尾，油價及金屬等商品價格上升和美銀成功配股集資135億美元，推動美股早市上升，杜指最高曾經升過115點。午後聯儲局會議紀錄顯示它們下調今年經濟增長預測，並預測失業率繼續攀升，明顯睇淡未來經濟前景，壓抑了市場對經濟迅速復甦的樂觀情緒，在金融股下挫帶動下，杜指最後一個小時內下滑逾100點，扭轉全日的升勢。

杜指收市報8422點，跌53點或0.6%，全日波幅187點；標普500指數報903點，跌5點或0.5%；納指繼續跑贏大市，微跌6點或0.4%，報1728點。紐約證成交回升至16.5億股。杜指期貨最新報8390點，比現貨低水32點。

        美國對銀行進行壓力測試後，最大劑的是美銀，但係佢昨日成功以約4.3%的折讓價，即每股10.77美元，發行125億新股，滿足了過半數集資要求。投資人對銀行業愈發樂觀，金融股早段間帶動大市走強。

午後聯儲局公佈4月份會議記錄，令市勢逆轉。會議紀錄顯示，不少地區儲備銀行行長削減他們對經濟增長的預估，他們估計今年有較大的收縮，明年會有更弱的復甦，而失業率可能到9%甚至更高，並會持續到明年。所以聯儲局認為可能需要購買更多國債，以確保較強的經濟復甦。Hinsdale Associates投資主管Paul Nolte話，這份報告「聽上去好像聯儲局對經濟沒有原本那麽樂觀了。」

        受聯儲局會議紀錄消息影響，投資者趁機獲利回吐，早段升勢不俗的金融股挨沽，KBW銀行股指數BKX收挫2.7%。摩根大通跌3.5%至34.55美元，高盛跌3.3%至136.44美元，富國銀行挫3.9%至24.46元，花旗集團跌2.1%至3.69美元。只有成功集資的美銀股價上升2.1%至11.49美元。另外消費必需品類股和保健股等防禦性股票上漲，市場調升對這類股份的盈利預測，德意志銀行建議「買入」寶潔，寶潔升2%至54.02美元，麥當勞升4.4%，報56.25美元。

匯控在美國預托證券市場偏軟，收報67.68元，比香港收市價高0.4%；中移動則收報72.98元，比香港收市價低2.2%。而ADR港比指數係17340點，比香港低136點。

        今日我在報紙專欄講到三四線股也借呢個浪炒起，意猶未盡，還想再講。我覺得炒細股無所謂，但要有正確的心態。雖然有唔少細股有實質生意支持，但呢啲股票無人炒唔會點升，反而無實質生意支持的細股，卻因為有人炒而大升，才是散戶至愛。我所謂正確的心態係咁，「投資的我」唔好去掂，唔好信這些無端端狂升股有乜基本因素，或者乜嘢概念，因為細股的莊家係睇住市場要乜就做乜，呢期爆人類豬流感興炒藥股，佢就做啲藥股出來炒，你聽佢講一輪基本因素，想睇佢長線前景，走埋去「投資」，死十次都未夠，總之見到那些突轉行股，就要小心，最好咪行埋去。至於一隻股又無生意、又唔賺錢，只係乾炒，更無基本因素可言，更加掂唔過。

        「投機的我」又作別論，我唔會叫投機者唔投機，只會叫佢地用正確的方法去投機。買呢啲賊股，唔可以用正常投資者的心態去買，你要用賊仔的心態去炒。乜嘢叫做正常投資者的心態，就係講吓公司做乜生意，講吓佢點賺錢，講吓隻股點升，例如話「而家佢又踏入乜嘢流行業啦，將來會賺大錢o架，隻股今日1毫子，好快就炒上3毫啦，你唔買就笨啦。」正常投資者聽到呢啲故仔，開頭唔信，點知見佢係咁升，好快升到1.2毫、1.5毫，人以眼見為真，開頭唔信，見到升就信，有5萬元身家，就瞓身去買，心中不斷咁計呀計，計吓隻股如果上到3毫就變10萬，正呀! 你用咁心態去買股仔，你一摸入去，中咗少少，愈買愈多，莊家就派哂貨俾你啦。

既然一切都係假，色即是空，空即是色，就要用賊仔心態去買呢啲股票，你係跟大賊搵食的賊仔，大賊叫你四圍同人講隻神仙股會上3毫，你明知每日咁大成交都係大賊搵幾間經紀行左右交手「搭棚」做出來，係假成交，個價錢又係假價錢，你只能做賊阿爸走一轉，1.2毫買咗，大賊話見3毫，你信佢就怪，升得兩三成好速速食糊閃人，有時快到一兩日就升咁多，眼都唔望就沽之，搭順風車走一轉，你只能食咁多，食完一隻咪回頭，又搵過其他賊車再去搭第二轉順風車。如果你想睇多兩日，就沽貨沽到收回成本，然後將賺回來那部份留低睇，咁就封住蝕本門啦。

萬一上完賊車形勢唔就，一買即跌，唔理佢真跌抑或假跌，到止蝕位即閃，保住條命要緊，有時唔想輸睇多一兩日，莊家就咁去如黃鶴，佢一唔托，啲神仙股好易一沉不起，你想走都無得走。

我唔係鼓勵大家去炒神仙股，我反而覺得散戶好難同莊家鬥，都係小掂神仙股為妙。但好多散戶賊性難改，見到神仙股升就手痕，與其由得佢地亂炒，不如講吓賊仔應該點炒仲好。

陸羽仁

        美國國債和美元下跌，投資者對美國財赤的擔憂揮之不去，上周五美股投資氣氛薄弱，投資者無心戀戰，美股當日先升後跌，杜指大部份時間都在高位徘徊，但臨近收市跳水，以跌市收場。連續第四天以下跌。

美股三大指數跌幅輕微，都係微跌0.2%。杜指收市報8277點，微跌15點，全日波幅只有107點；標普500收報887點，跌1點；納指跌3點，報1692點。紐約證券交易所成交大幅縮減至只有10.6億股，係近期最少嘅。杜指期貨最新報8260點，比現貨低水17點。

當日拖低大市的另一原因係主要係通用汽車的問題。繼佳士拿汽車於上月尾被逼申請破產保護令，通用上周五亦宣布將於今個月31日申請破產保護令，政府將額外撥款300億美元投資於通用汽車，令政府總投資達到450億美元。通用希望能在7月1日向法院提交重組計劃詳情，現時通用的重組計劃令工會成為大贏家，它會成為公司的主要股東，但債券持有人就要大幅削債，所以他們大力反對重組計劃。路透社報導指美國政府於年底將計劃撤銷大部份或全部現有的債務，並會投資於這家破產以後東山再起的「新」通用汽車。通用股價在重組受挫而要申請破產保護的消息影響下，大瀉25%至1.43美元。

美元縮水，投資者降低在美國資產的部位。大型生產商和金融股下跌。卡特彼勒(Caterpillar)收低3.5%，美銀跌3%至11.07美元，摩根大通跌1.4%至34.41美元，花旗集團跌1.3%至3.67美元。

匯控美國預托證券，收報65.85元，比香港收市價高0.3%；中移動則收報72.78元，比香港收市價低0.7%。而ADR港比指數係17032點，比香港低30點。

       市場對於美國經濟的前景有兩派意見，復甦派認為已經見底，甚至已開始牛市。衰退派認為大鑊未完，目前只是反彈而矣。紐約野村國際的首席經濟師David Rester 反映了樂觀意見，指「有證據顯示美國這個長達16個月的經濟衰退正接近尾聲，房屋銷售和建造活動似乎已穩定下來，製造業方面的調查亦顯示，減產和縮減職位的情況在降低。」

不過，有經濟學家指出，在未來數月，由於銀行仍然不太願意放貸，加上失業率持續攀升，增長將難以維持，這將打壓聯儲局和分析家對經濟復甦的期望。例如諾貝爾獎得主克魯明就憂累美國人儲蓄率上升的現象，美國過去儲蓄率近乎零，但最近上升到4%，美國人對經濟前景的擔憂加深，所以儲蓄率向上，或許他們也是嚮應了總統奧巴馬的呼籲，使少啲錢以備不時之需。美國人增加了儲蓄率，但不見有將錢用來投資，所以克魯明恐怕咁搞下去美國消費會進一步萎縮。


其實克魯明和另一位諾貝爾獎得主史迪格里茲（Joseph Stiglitz）都係凱恩斯學派的信徒，贊同在不景氣時，要以大量政府投資刺激經濟，所以建議不計成本地貶值貨幣、減息、大搞公共工程，希望用財政政策和貨幣政策谷起經濟，聯儲局主席伯南克及不少美國政府經濟顧問都相信這一套。而克魯明的建議更極端，認為美國政府而家只做了一半，經濟仍然未得，政府要再大力用財政政策刺激經濟，谷起人們對通脹的預期。

不過近期標準普爾把英國的評級展望降低，觸發了對美國評級的憂慮，已經把一個兩難題清楚地擺在眼前，若美國如克魯明所講，還要增大救市的力度，就只能多印鈔票去解決，但此舉卻會進一步削弱市場對美元的信心，弄不好就會出現大崩盤。這是一個微妙的平衡，以美國政府目前救市的力度，到底能否頂住這個百年一遇的金融海嘯，令經濟如樂觀派所言，見底回升呢? 若樂觀的情況不出現，美國要進一步救市，但美元的地位本已岌岌可危，美國再多印銀紙，隨時觸發美元匯價大插，所以美國政府手上的子彈相當有限，只能望天打卦，希望經濟在他們子彈差不多打完前見了底。

陸羽仁

昨日係美國「陣亡將士紀念日」（Memorial Day），美股休市一天；英國則係「春季銀行假日」（Spring Bank holiday），亦無市。

德國智庫Ifo昨日公佈反映經濟狀況的重要領先指標，德國Ifo企業景氣判斷指數為84.2，略低於市場預估的85，但預期指數85.9，高過預估的85.5。Unicredit Group的股市策略師Tammo Greetfeld表示，「Ifo指數中的預期指數已連漲五個月，顯示經濟信心改善的趨勢保持完整。」

泛歐績優股指標FTSEurofirst 300指數連跌兩日之後，昨日收升0.2%，報858點。歐洲股市交投淡靜，德國股市DAX指數微跌不足1點，收報4918點；法國CAC-40指數小幅上升0.25%至3236點。

日本股市今早高開0.2%之後，反覆偏軟，最新報9338點，跌19點。

昨日網友twohitsix問起我對「上一代人剝削下一代人」的看法，我有點不吐不快。講到「剝削」兩個字，非常「馬克斯」，我後生時雖然唔至於係左派，但都係比較同情左派的理論，但那個時候已經有一個疑問，覺得用這些理論來解釋世界發生的事物，似乎幾爽，但靠佢來創造新世界，又似乎未有成功案例，難以盡信。二、三十年過去，我都覺得自己當年的懷疑好合理，而家見到共產國家都係變得唔係咁左時，經濟才開始成功。

所以我聽到「上一代人剝削下一代人」呢個講法，特別係「剝削」兩個字，神經都跳一下，我都要申報利益，如果呢個講法成立，我都係上一代人，有剝削下一代的嫌疑。

無可否認，戰後第二代尾第三代頭的人，即係而家４０、５０歲的人，的確比較容易成功。若你年紀太大，係戰後第一代人，即係而家６０、７０歲的人，年青時香港經濟並未起飛，那時想打份好一點的寫字樓工，要搵個親戚用間舖頭去擔保，因為老細怕打工仔偷錢走路；單從「寫字樓」這個名稱，就知道識寫字已經好叻，係搵一份較舒服工作的前題。但生於那個經濟未起飛的年代，唔使擔唔使抬搵到食都偷笑，無乜人夠膽望發達。

　　    但係第二代尾、第三代頭的人，就有多重幸運，第一，當年香港社會上大學生仍少，若有幸成為大約１％的大學生，成功機會已經好大。第二，香港經濟在７０年代開始起飛，這批人在經濟飛升時開始投身社會，機會自然較多。第三，妙就妙在８０年代開始有香港前途問題，大批社會上中高層人士怕共產黨９７年後管治香港，大舉移民外國，大量各類型管理工作崗位都出現斷層，要全面提升較年青的管理人員去做獨當一面的公司負責人，在８０年代、９０年代，這些人４０出頭就上位，到今天大部份人有排都未退休，這批人年青上位的最大問題是阻斷了下面一代、甚至兩代人的晉升機會。

　　    若非香港經濟起飛加上９７風波，就不會讓第二代尾、第三代頭的人急促上位，若非出現這種罕有的管理人年輕化局面，第三代尾以至第四代就不會覺得那麼失落。

　　    不過我認為經濟發展的因素最重要，無論香港的情況有多特殊，還是經濟發展的普遍性因素最主導，當一個地方經濟發展由高增長變成低增長時，用另一個講法是進入「高原地帶」，經濟發展減慢、會令社會的流動性減慢，的確是搵食容易，發達艱難，日本係咁，歐洲亦係咁，香港的情況唔太特殊。

　　    但千萬不要以為一切問題源於社會上出現一個剝削集團，他們壟斷了年青人所有機會，因為若然後生仔咁諗，跟著就會捉錯用神食錯藥，以為和剝削集團對抗，就可以為目前年青人的困境找到答案。若果機會減少主要源於經濟成熟而非有人剝削，問題的答案應該係避開香港這個成熟的彈丸之地，到經濟剛發展的地區尋找機會，我們附近的大陸，就是這種機會之都。（明天再續）

陸羽仁

美國昨日公佈的經濟數據好壞參半，耐用品訂單錄得16個月最大升幅，失業救濟資料亦如預期，但新屋銷售就差過預期，杜指早段明顯缺乏方向，在上日收市水平反覆爭持。但美國十年國債價格反彈，孳息率下跌，緩和了借貸成本增加將拖慢經濟復甦的憂慮，加上油價升穿65美元，在能源股和金融股造好的帶動下，杜指午後發力，抽升逾160點至全日最高位才略為回順，之後橫行至收市。

杜指收市報8404點，升194點或1.3%，全日最高8435點，最低8247點；標普500指數報重上900點關口，收報907點，升14點或1.5%；納指漲21點或1.2%，報1752點。紐約證成所交投溫和，成交13.7億股。杜指期貨最新報8384點，升87點，比現貨低水20點。

周三，美國十年國庫券孳息率由3.5%跳升至接近3.7%，令美股急挫近約170點。而去年12月時的孳息率只有2.24%。由於高孳息率將推高推高按揭利率和消費者借貸成本，防礙經濟增長，難怪市場擔心，奧巴馬政府亦一直致力推低利率，藉此幫助房地產和整體經濟復甦。

周四拍賣的七年期的國庫券孳息率3.3%，符合市場預期，而十年期嘅就由上日的3.695%略降低至3.672%。債價升番啲令孳息率下降，投資者鬆了口氣，剌激股市造好。不過，管理全球最大債券共同基金的格羅斯卻表示，「政府發行非常多的債，市場已開始懷疑誰會去買這些債券。」

杜指30隻成份股有4隻下跌，26隻上升。金融股除了花旗集團逆市下跌0.8%外，美國、運通美銀及摩根大通包辦了升幅最高的頭三位。美銀升3.6%至11.3美元；美國運通升3.4%至24.3美元，摩根大通漲5.7%至36.65美元。富國銀行則升2.9%至24.77元。

匯控美國預托證券收低，收報67.87元，比香港收市價低1.3%；中移動收報75.89元，比香港收市價高1.5%。而ADR港比指數報17891點，比香港收高6點，在香港假期間，美股兩日一升一跌，中和了對港股的影響。

   　 香港的好工主要由大陸人來做的現實，將慢慢在各行各業泌透，但最尖端的、要在大陸生意的行業，將會首當其衝，我同一個前投資銀行家傾起，佢20年前在英資大行做，如今英資投行式微，佢話當年的同事，有一半仍做投資銀行或相關工作，但繼續做的多數係大陸人，即是當年的海歸派，如今這些人多數變咗在港投行的大小主管。

又睇吓其他行業，網友松花蛋話:「現在連外資公司在香港的分公司的管理層位置，也慢慢由國內人來主持，香港人只能限制在本地市場上，你說有多大？很慘！我原來工作的歐洲公司，因為總部在上海，香港公司就降格為辦事處，變成香港的員工都要向駐在上海的國內經理匯報，那些經理可能就是前幾年由香港同事請過來的部下，有些人的自尊心受不了，就辭職。我說的是10年以前的事，當時比較新鮮，現在就常見了。」

網友宜家傢私話:「依陸sir講, 香港無咗獨市生意仲比人掙返轉頭, 小弟做出口真係感受得好深...日日返工都同大陸同事傾, 覺得佢地做嘢效率同我地真係差唔多。我係hku讀parttime master....(兼讀碩士)又成班都係大陸人...」

陸羽仁在大學讀過一科「Marketing101」(市場學101)，覺得市場學的理論相當浮淺，讀完成科只記得一樣嘢，搞Marketing要揾出產品的unigue selling point(獨特賣點)，這又真係幾有用的觀點。香港賣乜嘢，過去香港的獨特賣點係賣開放，成個大陸唔開放香港開放，所以要了解大陸也好，要和大陸做生意也好，都要來香港。有外交官同我講，60、70年代，外國人根本入唔到大陸，想派間諜入去都唔得，唯有搵人來香港，訪問從大陸走出來的人，了解大陸的情況，那時香港離島住咗好多老外007，開著個原子粒收音機，聽完大陸廣播就寫報告番祖家，做間諜唔係睇戲咁棧。而家大陸門戶大開，外國人自由進出，連007都唔來香港啦。

香港人賣乜嘢，過去香港人好好賣，獨特賣點係英文又好、又有國際視野，又有在外企工作的經驗，在大陸人眼中，香港「先進好多」，香港人叻好多，有少少似日本人在香港新一代的形象。人人都做過細佬仔，細佬仔睇嘢由睇電視開始，香港上一代做小朋友時，睇住「咸蛋超人」的片集長大，自然覺得日本係先進文化的代表，過去香港在內地也享受這種地位，港產片都鬼馬好多啦。不過而家大陸人睇戲都睇荷里活大片啦，睇唔到正場，都睇到老翻，或者在網上睇。當香港人在大陸人眼中失去超前形象時，亦代表港人的優勢漸失，講英文，大陸名牌大學畢業的學生，英文未必差過你，講國際視野，大陸精英好過香港人，因為香港人除了國際娛樂新聞之外（多數只是睇日本、韓國明星新聞），對國際大事興趣不濃，但大陸人可能國家觀念較強，對外交大事也比較關心。最後講外企工作驗，而家大量外企直接在大陸開公司，在外企工的第一代大陸管理人已經培訓咗出來，唔使搵香港人。簡單一句，香港人的獨家賣點與日俱減。

講咗咁多困局，有乜解救呢？我認為改變自己比改變世界容易，有三個方向，第一，改變自己的搏殺文化，學吓鬼佬咁，食少啲著少啲輕輕鬆就滿足，呢個係最「雞」的選擇，勝在易做。第二，維持搏殺文化，早早北上搵機會，大陸咁大，地區有差距，在上海、北京、廣州、深圳這些人均產值在10000萬美元上下的城市，競爭開始白熱化，港人唔係咁易爭。在次一級即人均產值5000美元或以下的城市，搵機會會易啲。呢個方法好進取，但係要付出的代價亦好大。第三，安於現狀在香港打工，做嘢交足功課，但唔好望好似上一代咁易升職，但在個人投資、子女教育上下功夫，希望維持自己的理財競爭力，維持仔女搵食的競爭力。下周續談。

陸羽仁

數據顯示美國消費者對經濟復甦的樂觀情緒增強，杜指上周五大部份時間都在上日收市水平徘徊，到最後的半小時，在商品價格大漲帶動下，資源股上揚，推動杜指急抽上逾120點，尾市略為回順。

杜指收市報8500點，升97點或1.2%，全日波幅只有154點；標普500收報919點，升12點或1.4%；納指漲22點或1.3%，報1774點。紐約證成所交投暢旺，成交升至18.6億股。杜指期貨最新報8480點，比現貨低水20點。美股5月份表現不俗，杜指上漲4.1%，標普500指數升5.3%，已經係連續第三個月上升，納指上揚3.3%。

美元弱勢，通縮危機隱現，油價和黃金價格皆升。美國紐約原油上周五，首次突破每桶66美元大關，大漲1.23美元或1.8%,至66.31美元，自去年11月以來新高。美元下滑帶動其他商品價格上揚，8月期金高見982美元，為2月底來最高，今次有機會升破1000美元再創新高。

匯控美國預托證券造好，突破70元關口，收報70.48元，比香港收市價高2.9%；中移動收報76.29元，比香港收市價高0.8%。而ADR港比指數報18535點，比香港收高364點。

上周五我講到香港人與其求人救，不如自救，方法有三，第一是調整自己對生活要求，第二是北上求發展，第三是在投資和子女教育上下工夫。今日想再引申發揮一下。

香港彈丸之地，搞到今日咁發，人均產值30000萬美元以上，和英國這些資本主義大國叮噹馬頭，其實都應該好滿足啦，我記得在90年代初，英國未好番香港發力上時，有一年香港人均產值升到25000美元，英國只得23000美元，我真係有點大開眼界之感，點解一個殖民地可以有錢過殖民主呢?

不過香港咁發，慢慢就走上高原地帶，想再進一大步，唔係咁易。個個地方情況不同，例如加拿大，面積大過美國，人口只有3321萬人，每平方公里面積只有3.3個人，但有豐富石油等天然資源，只要油價不斷向上，加拿大人均產值上升非常容易，去年油價高峰時，加拿大卡加利一個普通石油工人年薪70幾萬美元，由於非常艱苦，所以都唔係咁易請人，所以在人口少自然資產豐富的國家，經濟發展的任務就輕鬆啲，但亦因為人口少，你去做生意會幾困難，就是所謂「搵食容易發達難」。

另一個極端係日本，佢係一個好細的島國，但人口卻有1.27億人，每平方公里面積有367個人，係加拿大10倍以上，佢係僅次於美國的世界第二大經濟體，人均產值40000萬美元，咁細個國家，資源和土地緊缺，咁發達的經濟，想再進一步，真係極度困難，佢和美國唔同，美國有強大軍實力支撐，可以大力發展國防工業、以及要靠保護智識產權的軟件業、藥業，這些行業利潤極深，高壟斷性，不容你仿冒。日本無強大軍力支撐工業，最強勁的汽車工業和消費品輕工業，都係可以仿效的行業，面對新興國家如中國的嚴峻挑戰。

日本進入超高原經濟，已經寸步難行，甚至開始向後行。人人都話東京啲嘢貴，我去到覺得開始唔貴，有人用麥當勞巨無霸比較各地物價，我用吉野家牛肉飯來比，發覺在東京核心區的牛肉飯也是20幾元港紙一碗，甚至比香港賣的略平，有做生意的朋友講，東京的舖租開始平過香港。唔係嘢愈貴愈好，但係物價平意味通縮開始，這是一個拉都拉唔住的向下循環。

日本為什麼有這麼多宅男，這是個人自我期望和實際發展出現落差的產品，個個日本父母都望子成龍(佢地對女兒無大要求)，希望兒子讀名牌大學，出來做最大最好的公司，在那間大公司內平步青雲，但結果大部份人做唔到，而日本經濟日差，大企業都裁員，好工愈來愈少。後生仔的表現和父母和自己的期望差距好大，結果就決定隱蔽在家做宅男，成日關埋房門玩電腦，半夜才出街，完全由阿爸阿媽養，據估計日本的宅男有400、500萬咁多。

東方人、特別是日本人心態非常進取，接受唔到「無成就」呢個現實，頂唔順就只有避世一途。經濟發展唔到，社會機會減少，若用舊心態去看待，就會覺得自己或自己的仔女好失敗。但西方文化較樂天知命，一個建築工人、汽車工人只要有份工，佢地已經好happy，放工去酒吧吹吓水又一day，較習慣無咁刺激之生活，對呆滯的經濟現狀較易適應。

所以當你身處地區的經濟放慢了，你又不是很上進要去冒險博命之人，就要調整一下自己心態，學吓菲賓律人的名句「Don’t worry, be happy」(開心啲，咪擔心)，可能會好過啲。馬克思在《德意志意識型態》講到理想世界，「早晨打獵，下午釣魚，夜晚飼養家畜，晚飯之後討論時事，就像我這個從未當過獵人、漁夫、牧羊人和評論家的人所想像那樣。」如果你提早退休，攞咗一筆，除了在香港不能養雞之之外，不難達到馬克思這個理想世界，只要唔好要求太高就得啦。

無論如何，唔好太執著，千祈唔好搞到自己日日唔開心，逼到個仔變宅男呀。東京的今天，好可能是香港的明天，大家要預備適應。

陸羽仁