發新話題
打印

[轉貼] 陸羽仁 blog (5天更新)(更新至8月7日)


避險與爭勝(11) (2007/9/13)


美股大升後牛皮,昨日道指微跌16點,由而家到下週二,港股和美股進入炒減息的日子,然後睇吓伯南克開大定開細,開大,減夠半厘,如果香港起碼跟到減四分一厘,大市就維持上炒格局;若果開細,只減四分一厘或唔減,後市就有較大回吐壓力。當然港股還要睇睇阿爺會否星期五收市後又出招。

早前打算寫完的「避險與爭勝篇」,因為網友的問題,寫吓續篇,我話美國次按和樓市的問題如海嘯一樣,還有大災難在後頭,如今只是大海嘯前的退潮,你去海灘執蜆執蝦要小心。網友yuki問,海嘯來得咁急咁快,到時有無足夠時俾我地睇到佢來之前的訊息號呢?

  網友benny的回應好好,大家可以睇睇:

Yuki: 呢排我都一路諗緊你講既問題,睇咗陸sirblog同金曹師兄、其他師兄師姐既回應咁耐,我發覺自己有一個好重要既觀念改變,以前成日想揾到好清晰既指標話比自己聽點做,譬如一隻股升到阿媽都唔認得,應該幾時放?點先可以賺到盡?入市價點先可以做到最平?

  但漸漸發覺,呢d諗法太理想化,因爲股票市場入面既種種現象,係唔同人既意願不斷互動所產生出黎,由於人心難測,我認識到"摸住石頭過河"既道理。

應用番去你既問題,從一個中線投資既角度,我都好想知道幾時係呢一輪既浪頂,但我諗絶對無可能會有足夠既signals話比我地聽,我自己會睇散戶情緒(因爲大戶係睇住呢樣黎玩)、資金流向、經濟情況(即大環境同大戶做嘢方向既關係)等,但都好片面,因爲遇上突發事件(往往股災就係黐住突發事件),全部無用。

  咁退一步講,如果唔能夠賺到盡,不如諗吓點樣"盡量賺到盡",我諗方法有好多,其中一樣係大家成日講既分段沽、分注買,我覺得非常有用,因爲如果一嘢買哂或沽哂而最後發覺做錯事,個吓心理壓力好鬼大(仲有一d係側邊睇嘢既人既笑罵聲),分段沽、分注買絶對可以幫到手。

  至於你話有冇足夠時間俾你走,我諗如果套用上面講既分段沽,時間永遠係夠,只不過睇吓你想賺幾多。」

  你地睇陸羽仁的文章長啲時間,就會發現我講投資和其他人好唔同。普通人講單面,我會講雙面;普通人一係講升,一係講跌,我會講升完會跌,或者跌完會升;普通人講買股唔分投資與投機,我會講買股前首先要分清自己想做什麼;普通人講估計贏幾多錢,我話要同時估計贏錢和輸錢;普通人用緊散戶的思維,我嘗試追踪大戶的部署(雖然好多時只係估到六成);普通人靠買中一個方向賺錢,我會講大戶靠人造波動賺錢,你追到佢啲波動搭順風車會賺到啲錢,或者至少唔好輸錢。

  你想像吓一個鏡頭,你好快樂地在海灘執蜆,隻隻又肥又大,的確是一幅好開心的圖畫;若把鏡頭一路拉濶,升上高空,才會看到遠方有一排排海嘯巨浪湧至,又變成好兇險的場面;一件事是好是壞,視乎你在什麼時空,用什麼角度看。你話咁兇險就最好唔買,等海嘯啦。我就話,咁係唔係最好方法,真係兩睇,我講海嘯,的確係覺得佢有機會來,例如有七成機會,但仍有三成機會佢不來,即使佢來,又點知佢幾時來呢?若你停手唔買股,跟住見個市起勢升,會唔會在更高位忍唔住落場呢?人通常是「眼見為真」,當眼見股市雞犬皆升時,又點忍得住唔落場呢?

股市散仔,買股票天天發夢最低位買最高位沽,例如幾年前以1.5元買中石油(0857),問吓目標價,那個時候最樂觀的分析員都係睇3元(他即使睇得好啲,都唔會把目標價講得太高,以防「最後」唔到價跌番落去時你罵他),你見「到價」自然會沽,然後等跌,佢無跌,仲升到無影,你就好揼心。

見到股神巴菲特沽中石油,你地問佢什麼心態。首先,股神買股無定一個目標價,佢會以公司的長線收益,折現成一個現金價值,若股票的市價比估計現金價值低好多時,佢就會買,假設佢當日買中石油時計出來的現金價值係每股4元,當時股票1元多,比估計價值有好大折讓,視為抵買。其次,股神沽股票是覺得基本因素改變,若果係好股,基本因素無變,佢會長揸,所以佢沽中石油係認為基本因素改變了,我地唔知佢認為基本改咗乜,到底是認為中國經濟過熱,會爆,抑或次按好大劑,全球經濟有危機,甚至令油價上升軌終結,唔知,但他應該有他的一套估計。但股神睇得好長線,貨又多,減貨不能減得太快,但佢一定覺得中石油、中國市場、石油市場甚至環球股市有啲問題。

講番散仔,投資唔講,只講投機,有人太貪,有人太細膽,要啱啱好才可以賺到大錢。有蜆唔執,可能是太膽少,假設未來幾個月股市大升,跟住你就會俾人話,聽個乜水陸羽仁講,話有海嘯,浪花都無個,正傻仔,你俾人笑一個月尚可,笑兩三個月就會頂唔順,我又會損失一個讀者。我經常話,預測股災無用,股災最後會來,睇吓幾時,如果股災明年今日到,我今日一年前大講股災,就係講錯,所以有蜆要執,你可能今日執完明日都走咗都話唔定o架。

但係話說回來,執蜆唔緊要,但每天都要有個防範心,一唔對路就閃,若果一直無出事,高位都要食吓糊,要避險和爭勝心兼備。因為執得兩執,你執到成手蜆,就會覺得自己好叻,係股神,我不能夠不提醒大家,包括我在內,大家都係股蟻,外資大戶才是股神,人地住山頂,我地住山腳,實力太懸殊,我不會定死一個指數目標,但大市升上25000點樓上風險開始增加,愈高愈危,大家自己執生,海嘯唔會一晚發生,只要你有防範心,唔對路時唔好賴死唔走,就OK。記住贏錢好多時講心態,講紀律,順勢而炒,直至可能轉勢時就要走避(其實炒股同股神沽貨的原理一樣,持貨至可能轉勢時),無人可以做到最低位最高位沽,唔好咁傻咁樣要求自己啦!炒股要有膽去炒,同時要知足食吓糊。




陸羽仁

TOP


避險與爭勝(12) (2007/9/14)


  美國最新申領失業救劑人數比預期少,加上大按揭公司取得巨額融資,刺激美股向上,道指升133點。港股正經歷一個炒減息潮,不過本地拆息高企,實際上美國減息都唔知香港減唔減得到,不過大家唔理,跟住大盤一起炒,看來港股這個浪會延續到下週二聯儲局議息。

  這一陣子講到「執蜆」,不妨再講吓執蜆心法。遊客突然見海邊浪退,大呼好嘢,紛紛湧上前執蜆也,但熟水性的漁民覺得唔對路,會離場。你睇股神巴菲特和美國鋁業都沽貨,就知道老行尊都感受到這個廚房的熱度。

  有網友問中鋁(2600)現價買唔買得過,你估睇鋁業公司的價值,有幾多人叻得過美國鋁業,佢對鋁價走向、市場榮枯、甚至中國市場的供需,都瞭如指掌,佢都要沽中鋁,而且要忍受較大的折讓,一手沽清,就知佢唔睇好。所以邊個人話中鋁現價可買入作長線投資,即係話自己睇鋁業股叻過美國鋁業,都係一個笑話。不過在兩三個月的短時間內,你覺得美國鋁業睇錯唔奇,因為佢咁大手貨沽出街,都有人接,亦同樣有大投資者看好(多數係基金),而且大折讓沽貨後反彈絕對唔奇,所以短線中鋁可以升一升,證明美鋁沽貨係「錯」,又係嗰句,啱同錯,係唔同時空睇,好唔同。

  講番執蜆人,你見佢在執蜆的畫面,鏡頭不斷聚焦,直至深入他們的大腦,你會發現不可能有不同的執蜆人可能有不同的想法,大多數人其實無用腦,只是官能反應,有蜆就執,無想過什麼,只覺得很快樂,因為從未試過咁易執到咁多蜆,我相信大多數股民都是如此,見到個嗰市係咁升時,就會把一切擔憂拋諸腦後,你要在海水底下慢慢摸蜆會好驚,隨地有蜆任執時就一啲都唔驚。在21000點、22000點時你會好驚,升到25000點、26000點就唔會再驚。我經常講,人做好多傻事,都係用器官思維,唔係用大腦思維,包二奶、包二公的人,就係俾器官控制咗大腦。

  不過亦有部份執蜆人有用腦,他們明知危險可能在前面,仍然要繼續執,因為現在執一分鐘蜆,可能比以住摸一年蜆還要多,利潤在前,博命都要試一試。這種人明知係賭,但係選擇了同大浪競賽,睇吓浪來得快,還是自己走得快。我想而家入市炒股,應該抱這種心態,千祈唔好盲摸摸咁執蜆,唔知危險。

  你當然可以選擇有蜆唔執,坐上高地做旁觀者,不過旁觀者有旁觀的風險,你初時見到人執蜆,會笑這些人好冒險,不明情況去博命,但過了幾分鐘,見到人一袋袋蜆咁樣執上來,你就開始有少少揼心,再過幾分鐘無事發生,你就會撲下去執埋一份,愈遲落場,風險愈高。你23000點唔入市,到25000點忍唔住才入市,你話風險係唔係高啲?若果堅持唔買,到時又出現阿媽話你唔識炒股的經典局面,你要EQ好好,頂得住俾人笑幾個月,等跌市爭取「最後勝利」,普通人唔易做到。

  股災和海嘯一樣,不可預測,而且住住在你防範心最少,炒得最精彩的日子俏然而至,泠靜執蜆,知足常樂,就是我給大家的錦囊。隨地係蜆任執,執蜆人好快頭腦發熱,要泠靜,知道好境不常。執蜆愈執得多,愈唔知足,愈覺做再執幾執自己就發過李超人,要對抗自己的貪念,要適可而止,到高位分段逐少出貨,落袋才是真錢也。

陸羽仁

TOP


減息一跌 (2007/9/17)


  週末和中環茶友飲茶灌水打牙骹,講到美股和港股,有些話題大家應該有興趣,可以一寫。

  大家講到美國減息,話題一是美國減息可能香港唔減,香港銀行同業拆息高企,細銀行借同業短錢,支持自己貸長錢俾客仔(例如按揭),按揭息率不變,拆息高時細銀行要蝕,所以美國減息會舒緩一下,香港暫時未具備減息條件,除非金融局發功,逼銀行減番少少。不過話說回來,當拆息市場平靜番,拆息低番,香港有機會滯後減息,到時香港有機會出現實質負利率,即定期存款利息低過通脹率(估計今年會升到3%),即係逼人投資,否則放在銀行會蝕水。

    香港股市已經過熱,負利率也逼不到多少錢出來,要炒股的早就炒了。但負利率有利樓市,特別一些保守型市民,見利息低企,買樓收租也不用貼多少供款,會增加買樓意欲,輕微利好樓市。

  為何說「輕微」利好,因為大家都無預樓市會大好,香港樓市,無大炒作唔會好好,只靠用家和投資者,無大量投機者入市,好難大好。而家香港人有錢投機,都去咗炒股,無乜人炒樓,除咗港島豪宅仲叫做有得炒吓,其他物業無炒風,咁就形成「惡性循環」,更吸引唔到資金入市(或者從用家角度,樓市無炒風可以叫「良性循環」)。

  有錢炒股都唔炒樓,似乎已成為炒作界的共識。剛聽到一個護士長講,她手下有幾個大學畢業生護士,做咗無耐,就辭工唔做,全職炒股去也。護士點講都係一門專業,新入行者放棄有穩定收入的專業,全職炒作,既反映股市有景,亦令人擔心好景不常。

  講番近期股市,由於港股近日升得厲害,特別是好耐無郁的地產股借減息浪炒上,股市差不多衝到25000點,令人覺得減完息會回,甚至偷步炒減息的錢,在減息前已出貨。

  升得多回吐唔出奇,問題是回吐還是大跌,中環茶友們似乎無人估本月會大跌,結果鬥估本月恒指收乜嘢價,有茶友估25000點,有人估略低於25000點,賭一餐飯,但賭低於25000點的茶友,也不是估有大跌市,佢話大戶咁辛苦砌上25000點,回番啲唔奇,不過未到期指結算就放手,任佢跌,等如白做,所以唔似咁快玩完噃。

陸羽仁

TOP


X記控投 (2007/9/18)


      昨日港股受歐洲股市拖累下跌,結果英國股市收市跌1.8%,隻北石銀行都跌三成幾,英國金融市場仍然樣衰,不過美股都幾硬淨,害死英國後自己唔郁,美股道指只係微跌39點,牛皮等減息,睇吓港股又可否頂番住。


  好多朋友無論做人和買股都好亂,目標不清,左右飄移,咁樣做一世都上唔到岸,今日可以講吓控制個人理財和投資的基本心法,網友小潘提到把自己當作一間公司咁經營,我過去都用過此方法,所以不妨講講。

小潘叫阿K唔好炒炒吓時咁講:「唔知你有冇當自己係一間上市公司咁經營?我就會每年定下一個目標,呢個目標係用以往賺既錢作為基本,我唔貪心,可能會set 10- 20%增長目標,有本事就set高一d。呢個增長目標,包括透過節流(雖然辛苦d,不過幾有用),搵多d兼職,工作上努力,博年中花紅以及投資。每一方面都要做到,不可以過份依賴某一方面收入來源。其實,長遠最後係做到靠投資既錢退休,不過希望是 50歲後能做到,一d都唔貪心掛。

之後,每3個月檢討一次進度(如果投資及收入不是很多,可以半年至檢討一次),你會知道自己係唔係達標,而增加或保持增加收入既各種方法。(上次因為3個月都冇計數,於是就買錯交行, 沽錯MTR,衰心急)。」

陸羽仁後生時也用過這個方法,我是一個開支永遠追不上收入的人(這是孤寒的代名詞),有一陣子見戶口的錢不斷增加,唔知自己用幾多錢一個月,就專門每次去提款時都記低,月底對數,計出一個月要用多少錢,然後計出每月儲蓄多少(收入減開支)。

  講理財,首先要講收入和支出的管理,把自己當作一間公司,要成為賺到錢的好公司,就要盈利快速增長,方法不外乎是「增加收入,控制支出」(如果不是減少支出的話),好多後生仔開支大過收入,這種是蝕錢公司,靠借貸渡日,水源一斷,立刻玩完,美國佬係典型,無論佢哋賺幾多錢都好,消費永遠大過收入,最近次按風潮起,華爾街開始炒人,好多人做到投資銀行部門主管,住大屋開靚車,一俾人炒三個月內搵唔番工就跌入地獄,因為平時使大哂,住啲屋永遠超乎自己負擔能力,靠未來可能增加的收入來頂,樓價升咗就加按去旅行,有個中環茶友話我聽,一年前佢參加一個加勒比海豪華郵輪之旅,同船差不多有一半美國客話俾佢知,他們是加按物業攞錢去旅行,使咗先至算,所以次按在美國爆起上來咁大鑊,美國人無論窮或富,都無holding power(持貨力),因為借到突哂。

  講完開支大,就要講收入少,我經常講,以後生仔計,自己的事業就是人生的最大投資,若事業做得好,可以產生好穩定而大量的正回報,而且會不斷增加,就算你完全唔識投資,但事業做得好好,都可以致富,這就是最傳統的發達方法,個個阿媽都會咁教仔,你乖乖地讀好書,入大學,做乜師物師就得o架啦,陸羽仁阿媽的年代要求更低,求其搵到份「寫字樓工」,有得涼泠氣開工,已經好好啦。咁o既觀念雖然陳舊,但有其道理,做好自己份工,就是人生最大投資。如果你係後生仔,做多份兼職,都可以增加收入,唔一定要靠哂投資。

好啦,點都講吓投資,投資得好,可以增加收入,收入甚至高過你o既本業,若出現咁o既情況,好多後生仔會想轉行全職做投資,覺得搵到食,甚至可以發大達,咁o既路似易實難,因為收入好可能因為個市好,不是自己特別叻,但股市不可能長期係咁升,到走勢逆轉向下炒兼靜過鬼時,全職炒股也不易搵食。後生仔頭幾年好重要,頭五年做得好,在行業內已可拔尖,你大學畢業去咗全職炒股幾年,若無所成,想返番本業唔係咁易,等如跑步讓賽,人地跑咗半個圈,你先至走入再跑一樣,好難追上。

我覺得在一般情況,特別係後生仔,投資只是配菜,不是主菜,但你食呢味配菜,都要講究策略,最基本的策略,係你嗰間「 X記控投有限公司」究竟是藍籌,還是五、六線公司,究竟要穩陣,還是要博命呢?(明天續談)



陸羽仁

TOP


大放水 (2007/9/19)


  美國聯儲局減息0.5厘,而且係聯邦基金利率(銀行同業隔夜拆借的利率)和貼現率(銀行向央行借錢的利率)同時減,減息力度超乎市場預期,結果美股道指大升335點(升幅2.5%),日股早段升超過500點(3.2%),港股又有一抽。黃金亦急升上723美元,美元兌主要貨幣匯價暫時穩定,商業票據溢價回落,減息初步達到穩定金融市場的效果。

金管局任總今朝講,聯儲局減息半厘,顯示儲局認為次按和樓市問題嚴重,大幅減息有助穩定貨幣市場和樓市,但他認為不能視減息為一種趨勢,因為貨幣市場穩定後,聯儲局不一定要繼續減息,至於香港銀行減唔減息,就由銀行自定。

由於國際貨幣市場緊張,加上香港大量新股上市,近期本地銀行同業拆息抽高,所以香港未必會跟美國減息。不過陸羽仁靠估,銀行公會即時決定跟美國減0.5厘的機會微乎其微,但跟減0.25厘的機會仍然存在,減息有利樓市,銀行可以多做按揭生意,聽聞匯豐、恒生大把水,其他銀行無乜水,所以匯豐、恒生想減息唔奇,因為而家減少少息刺激吓樓市,大量按揭生意湧出來,無水的銀行唔敢太勇去接,就由匯豐恒生食哂。中、小銀行唔想減息住,因為佢地靠在銀行同業市場借番來啲錢放貸,高息令定息的按揭蝕水,如果而家唔減息住,同業市場利率回落,佢地就可以賺番啲錢幫補吓。所以香港減唔減息,睇吓大銀行點玩。

  講番儲局的減息決定,可以用「大放水」來形容,兩種利息一齊減,一減減0.5厘,特別值得注意的是聯儲局8月18日已將貼現率(銀行向央行借錢的利率)下調0.5厘至5.75厘,今次再減0.5厘至5.25厘,即係話一個月內減了1厘貼現率,銀行無水,可以向聯儲局低息借錢應急,這是一個大放水的措施,是一劑重藥。

  睇完聯儲局的減息行動,可以有幾個結論:第一,美國樓市和信貸市場的確大鑊,再加上看到衍生風暴吹到英國按揭銀行北石差不多執笠,災情嚴重,聯儲局要以超常規的手段救市。第二,大減息短期有助回復信貸市場的信心,有助舒緩緊張的銀根,銀行唔夠錢就以5.25厘的利率向央行借,多多都有,照計唔使再搶高各地銀行同業的拆息,而家全球金融一體化,英國銀行唔夠錢,就搵當地分行去美國央行借啦,只要有抵押品就可以借,利息又唔係高。第三,大放水能否長線防止美國衰退的效用成疑。

  有關第三個問題,即美國經濟會否衰退,有幾個可能,第一,最好的情況,伯南克未來連番減息,令美國樓市軟著陸,從根本地解決次按問題,美國經濟避過衰退。第二,最壞的情況,大減息又掀起炒風,善忘的美國佬見股市升番,連自己間樓能否續按的問題也暫時不理,再去大手消費,通脹好急咁升,伯南克想減息都減唔落手,出現最衰的停滯澎脹。第三,中間落墨,把美國樓市頂住,次按危機抖一抖,又暫時緩解商業票據市場的恐慌,等幾個月再爆鑊。

  陸羽仁有少少傾向第三個結論,即係拖吓拖吓,明年再爆,如果是這樣,短期對亞洲市場最有利,因為美國大減息減少了全球金融大爆鑊的危機,而亞洲又是受次按影響最少的地區,會吸引資金入來短炒,長啲唔識講,一兩個月有得炒吓,睇到明年就無眼睇啦。




陸羽仁

TOP


埋住炸彈 (2007/9/20)



美國股市在大減息後一日繼續升,新屋銷售數據不理想,影響地產股,但其他多種股份在未來可能仍會減息的預期下,再有進帳,結果道指升76點,收13815點,美股的狀況相當怪,樓市和信貸市場危機極大,但股市卻在聯儲局大放水下急升,衝向高位,道指有機會破一破14000點大關。

伯南克放水救大行的行為,終於得到證實,陸羽仁一直講,美國幾大投資銀行為私募基金的槓桿收購包銷了3200億美元的商業票據,在9月到期,如果信貸市場再唔掂,這些大行就自己啃,仲要大筆撇帳。

昨日大摩公布第三季業績,持續經營業務利潤跌7%至14.7億美元,每股1.38美元(一年前是1.5美元,業績倒退),比市場預計的每股盈利1.55美元為低。大摩的首席財務官Colm Kelleher更表示,信貸市場的問題會持續一兩季,令該行的定息產品交易收入減少,以及要為借貸撇帳9.4億美元。Kelleher話如今信貸市場仲衰過98年對沖基金長期資本倒閉時的情況。

早一日公布業績的雷曼已為借貸和按揭資產撇帳7億美元。高盛將於一日後公布業績,市傳高盛每股盈利原本有5美元,問題是不知道它要為包銷了的槓桿收購商業票據撇帳多少。

你諗吓,幾間大行把業績拖到伯南克減息之後才公布,伯南克大幅減息,多多錢都願借,舒緩了信貸市場的緊張,這些大行還要作出7億美元、9億美元的撇帳,如果伯南克唔減息,恐怕撇帳額要大幾倍,以大摩季度盈利14.7億美元計,假設要撇多10幾億,隨時要見紅,你話大唔大鑊?相信高盛的情況都唔好得好多了。

伯南克要救美資大行出火海,而且是唱高開低的格局,一路話唔做嘢,結果大力做,正如上次8月18日第一次減貼現率前一日,出身自高盛的美國財長保爾森還出來講,政府不會為企業虧損而行動,其後聯儲局卻開特別會議減了貼現率。伯南克也講過類似的話,說聯儲局不會因為金融機構虧蝕而減息,結果也減了息。

你可以話,伯南克和保爾森不是和大行扯貓尾,只是金融市場惡化才逼到他們採取行動。但亦可以話,大行懂得製造形勢,讓人人都覺得伯南克大幅減息好合理。大行逼伯南克掘一個洞,把炸彈埋入去,炸彈最後爆唔爆唔知,但至少眼前可以頂一頂檔。《華爾街日報》社論大讚伯南克好嘢,話佢終於證明到自己可以果敢行事,走出格林斯潘的陰影。社論寫手咁大聲讚好,唔知佢手上有無要續按的豪宅,又或者有成手股票呢?

正如我在頭條日報專欄所講,如果這一切已在大行掌握之中,他們自然會順手大力炒一炒亞洲股市,反正亞洲無受次按危機影響,更有條件炒高,先發狂炒高,製造更大的泡沫,食一轉先至講。香港人享受減息好處之餘,要明白我們正在吹泡泡。



陸羽仁

TOP


X記控股(2) (2007/9/21)


  聯儲局局長伯南克大力減息救市,揸往成手股、成手樓的美國人拍手讚好之後,慢慢就會發覺好大鑊,因為往後美元轉弱,跟住通脹又來,美國隨時會出現一個停滯脹漲的衰退局面。

  美元兌主要貨幣都下跌,歐元升穿1.4大關,黃金抽升,最新報734美元,同樣升穿了730這個主要關口,美股道指收市微跌跌48點,港股仲有購買力,不過而家唔調整,小心下周結算前回吐。
我們面對這種世界金融劇變的格局,好易無所適從。我叫大家當自己係一間公司,再定投資策略,但最基本的策略,唔係要估啱市況走勢,而係你嗰間「 X記控投有限公司」究竟係屬於藍籌還是二、三線,要穩陣,還是要博命呢?

大家以為買股最怕睇錯市,陸羽仁就話投資策略錯配更大鑊,乜嘢叫做錯配,就是你以為自己係「投資的我」,但實際上郤天天做「投機的我」之事,就叫做錯配,錯配加上睇錯市,就可以把你送上絕路;睇錯市但無錯配,唔會死得去。

  舉一個例,你話你自己係投資者,唔想投機,但你走去買港交所的窩輪,窩輪是衍生工具,是槓桿很大的產品,買窩輪實際是投機行為,再誇張點講,你本來無錢,見個市咁好,見李四叔話大市長升長有,會見三萬點,心諗市旺港交所實掂,之前無入市,而家好後悔,自己又無乜錢,不如用信用咭透支,攞啲錢去買港交所窩輪啦。經過借錢、買輪兩部曲,投機味重到唔重,但好多人還會稱之為「投資」。

  投資揸長線,投機快來快去,投資平價買股計啱數可以唔止蝕,投機一定要止蝕,你用投資心態去買港交所窩輪,諗住長揸,以為政府會不斷增持,或者一跌就會入市,咁就死得啦。港交所升到300元都唔奇,但跌番落100元樓下亦有機會,買認購輪後,若正股低過行使價,一到期就變廢紙,渣都無,若果你借錢買輪,就會欠下週身債,呢種叫做輸上身。你可能唔會借十幾萬過大海入賭場,但可以借十幾萬去炒輪,其實又有什麼分別呢?

  所以首先要搞正自己的心態,諗清楚自己想做乜,自己問公司想慢慢做大,還是想一夜擴張,想慢慢做大的公司,壞處是慢,有時睇住人一朝發達,好唔開心,但好處是風險較細。一夜擴張的公司,壞處是風險高,1元博2元,2元博4元,一直博下去,博到會發達,也可能一舖打回原型。好像占士甸和人鬥揸跑車衝向懸崖,距離崖邊最近者勝,既考技術、膽量,亦考EQ,誰可以在高峰時離場,萬中無一。李四叔在23000點時睇25000點,到25000點時睇30000點,若果有幸到30000點,佢又可以睇35000點,一站比一站風光好,問題是誰可以在爆煲前落車呢?

  人有好多個面,可以是正職打工做乖仔乖女,同時可以兼職投資,甚至兼職炒作,公司也可以有好多種業務,可以係搞實業公司,可以係投資公司,也可以係投機公司,當然可以幾種事情一齊做,但都會有一個主要方向,到底你間公司,係投資公司還是投機公司呢?

  千萬不要以為陸羽仁抗拒投機,我只係抗拒唔職投機的人去投機,又或者抗拒唔知自己投機的人去投機。我甚至有少少喜歡投機,鐘意做生意的人,往往要冒風險,看到機會,瞓身一博,以小博大,好多時都和投機類似。

  上次講到後生仔最主要的投資是投資自己的事業,惹起部份以投機為事業的網友反彈。這裏不妨講講以投機為事業的考慮。當你自願或被逼要全職炒股時,自自然然會成為投機者,因為一般人無咁大本金可以全職投資,靠幾個巴仙回報就可以養活自己,你等如被逼上梁山,天天要炒。當投機成為一種事業,一盤生意,又會還原基本步,要諗點樣可以做到這盤生意經常賺錢,甚至穩定賺錢。

投機變成事業後,第一步追求的目標,做到輸少贏多,從而穩定賺錢,個個月埋單計數,都有正盈餘,否則你三更窮五更富,連輸幾個月,好快就頂唔順要執笠,即係唔可以再靠炒作為職業。

  有些外資大行,會在行內吸納炒作人員,例如發現本土證券行有出色經紀,就問佢地想唔想轉做全職炒作者,願意轉行者,大行會打本俾那些人去炒,初期幾百萬,無人工,有得賺分成,做得好就會不斷加本錢,大行唔會理那些人用什麼方法炒,總之賺錢就得啦;唔好以為這種職業好正,雖然有人打本俾你去賭,這是嚴厲的淘汱賽,炒得唔好,三兩個月就出局,留得低的人都有一套炒作心法,經得起時間考驗。大行就咁養住一班專業炒家,這批人又和大行自己的公司炒作盤分開運作。

  所以你想全職炒股,甚至兼職炒股,要先搵到一套方法,這套方法還要經得起時間和不同市況的考驗,而家市旺,你敢盲目做好,多數得,但遇上大跌市又如何?市淡時又如何?若股市大跌後,可能靜一兩年,成交少,股價唔郁,你要諗到方法搵食。全職炒作者會「發明」很多方法,有人追成交,做了電腦軟件,一見股票成交暴升就追入;有人炒業績,找經常公布好業績的公司,在公布前一個星期入,若升了在公布前一天就沽清;有人專炒期權,市旺做揸家,市淡做沽家。

  總之「X記投機控股公司」的炒作方法可以多種多樣,並無成法,但問題只有一個,你的方法賺唔賺到錢,要長期穩定有錢賺,唔係今日賺,聽日蝕。你細心一想,就知道做投資者在平價時買入好股長揸,比做投機者容易得多,唔怕得罪講句,如果無方法就去投機,以後生仔炒炒吓的心態去全職投機,放長雙眼睇佢地三幾年,真係死十個當五雙o架咋。反過來說,如果能生存下來,穩定賺番三幾萬銀一個月,已是百中選一的強者了。




陸羽仁

TOP


X記控股(3) (2007/9/24)


  美股上週五繼續上,道指升53點,衝向14000點高位,有少少做雙頂之勢,若下月再減息,隨時有假穿雙頂的可能,但美國樓市危機難解,中線不能過份看好美股,美國出現經濟差,股市升的怪象。

  上星期講起要把自己看成一盤生意,要有長期有盈利,把公司做大,唔好做一間成日蝕本的公司,還要把僅餘的錢胡亂投機。今日再講營運公司的目標。

  千祈唔好以為定目標好容易,大部份人都無好認真咁為自己這間公司定好目標,只係模模糊糊咁有個想發達的念頭,想做李超人,做李四叔,又唔知點樣可以做得到,唔知點解就在炒作股票,以為這是帶領你發達的捷徑。

  想發達唔緊要,要定好目標,計吓數,睇吓點樣可以發達,唔係漫無目地炒作就可以發達。陸羽仁問你一個簡單問題,全香港有100萬人有買股票,活躍炒作的有30、40萬,如果個個都發達(以有1000萬淨資產為發達的定義),香港過10年、8年隨時勁過美國,你話會唔會?

   但在股市泡沫高漲時,股民好易有一個發達的感覺,因為股市一天天在澎漲,這一刻所有買了藍籌股的人,感覺上都賺了錢,但一日未沽出,這只是帳面財富,只有真係有一賣一買,財富才實質轉移,所以一日未沽貨,一日只是心理作用,當然太早沽了貨,泡沫還在成長中,股價將來更貴,沽了貨的人感覺是蝕了,至於一年之後誰賺誰蝕,現在就說不清了。

  再講番為自己定目標,你想發達,也不妨設定發達的目標,就以搵到1000萬為例,計吓數,要快,當然要全數投機,假設你有本金10萬,想5年內搵到1000萬,你試一年、兩年,如果仲未炒到有200萬、300萬,相信你都唔使諗啦,大部份人好快會發現,想炒股變富翁,只係空想。

  快的方法不成,搵慢一點的方法,記得我講過72律(以投資回報率數字去除72,就知道投資要翻一翻所需的時間),若年回報10%,7年多一點就翻一翻,如果你而家有100萬儲蓄,7年後變200萬,14年後變400萬,21年後變800萬,都好近目標了。如果年回報高一點,速度就快一點。總之20年後有1000萬身家,個心都會定啲啩。用這種慢方法,首先要問怎樣有100萬本金,然後問如何以有穩定的年增長10%,不會中途輸錢,蝕掉本金。

  用快方法幾年搵到1000萬的人,百中無一,用慢方法花20年搵到1000萬,百中有十個以上,前者夠精彩,後者相對穩陣,目標和方法,你可以自己揀,亦可以先試試快方法是否成功,若花一兩年發覺自己不是炒作好快發大達的材料,行唔到快線,都最好轉軚行慢線啦,唔係最怕揸任架法拉利碌落山坡渣都無。大家聽落就會發現,我這種講法,與是否全職炒股,一點關係都無,全職炒股可以好博命,亦可以好穩陣,我主要針對又後生,又全職炒,又搵命博的朋友,生命無Take two呀。

  講番累積致富,最近有個老友送女到英國讀中六,我好搞笑咁對個朋友講,2年預科加3年大學,共要5年,英國學費貴到驚人,每年50萬都唔夠,5年共要300萬,又用72律計,若投資年回報10%,300萬7年變600萬,14年變1200萬,我對朋友話,希望你個女讀得成書,將來有成就,否則你唔花錢俾佢讀書,14年後送1200萬俾佢,對佢o既人生幫助更大!若佢讀書唔成,浪費了幾年,回來搵唔到好工,一世人都搵唔到1200萬o架!老友當然媽我媽到七彩,話我市儈。無論如何,這個故事教訓我們,兒女教育是很大的投資(或者係開支),另一方面,識得投資,有穩定的回報,可能比接受專上教育,更令你一生受用不盡。

  網友Altai和牆頭草都是全職炒股者,從他們的回應看,他們的思想十分成熟,而且都是慢慢摸出一條道路,他們視全職炒作是一盤生意,一種職業,並不是發達捷徑,但剛離開學校年青人,若一畢業就全職炒,心態就不一樣,年青人入世未深(唔好意思我要用這種老嘢的口吻講話,但這確實是我的感覺),特別是做事的經驗少,對世情了解太少,炒股只憑直覺,要成功絕唔容易。

陸羽仁

TOP


抽升何太急 (2007/9/25)


  今天在頭條日報講起股市升得太急得人驚,可以再一談。

  好多朋友睇股只睇指數,李股神話睇30000點,陳股神話睇40000點,大家就好似睇到路牌咁,按指示去做。不過陸羽仁認為除了睇點數外,還要睇上升的速度與形式,如今股市的問題是以幾唔健康的速度急升。

  恒指現價26551點,上月30日期指結算日恒指收23484點,升了3067點,上月31日最後一個交易日恒指收23984點,至今也升了2567點,總而言之,一個月升3000點,速度驚人。以這種速度再升,下月就已經可以升到30000點了,接著又如何呢?

  股市上升要時間,時間可以磨平一切生活的傷痕,可以磨平一切非理性的股價。若有半年時間,上市公司報一個新階段的業績,只要盈利大幅增長,就可以把市盈率大幅拉低,把不合理的變回合理。若沒有半年這麼長時間,有兩三個月都好,股市大幅上升之後,回番少少,消化一下,讓無信心要沽貨的人走掉,打好基礎再炒上,升起來就會穩一點,起碼想沽貨的人會少一點,因為後來在高位入市者,沽貨要蝕,多數死抱不沽。若果在一兩個月內急升,上升走勢好急,而且一枝箭咁上,就會有好多獲利貨,一跌下來,獲利深者盲目出貨都有利潤,就會吸引好多基金盤以市價盤掟貨,希望鎖住利潤,所以跌起來會更急。

  舉一個例,港交所(0388),過去長期在70、80元上下浮動,今年7月升上130元的高位後,造成了一個高原,然後在政府入市後急升,現價238.4元,或許再上300元都講唔定,但一跌起上來,70、80元入貨者都可以不問價沽貨,仍有很深利潤,所以急升的股份無險可守,升得太急的股市亦無險可守。

  炒股如煎魚,通常會慢火煎,慢慢上菜。但如今郤似猛火煎魚,香味攻鼻,陸羽仁就想問,咁猛火好易濃,乜趕住開飯咩?目前見到咁急趕的理由,係大陸的港股直通車快開通,有大筆水湧向香港,再加上10月美國再議息,有可能再減息,除時有一鑼好消息會出動,難道想跑在好消息之前先炒高,後派貨?

  大陸股市高,阿爺想靠港股直通行,放走部份資金,輸出一些泡沫,外資大戶睇通你條路,先借你個勢行一段,炒高易過借火,升時食一大轉,跌時又食一大轉,到真正好消息出籠時,就係大戶泌貨的日子了。

後記:明天公眾假期,網誌休業一天,望各位中秋和家人、愛人團聚,忘記金錢,享受佳節。




陸羽仁

TOP


X記控股(4) (2007/9/27)


美股道指又升99點,睇嚟今日期指高位結算無走雞,股市愈升愈高,散戶唔信又升,唔信又再升,升到你信為止。好多人話10月有股災,如果好多散戶相信如此,買股窒住窒住,恐怕又唔係災得咁易,等你以為無災先至急跌都未遲。

講番點樣搞好自己間「公司」,首先要有本金,無10萬、8萬本金,較難開始有系統的投資,至於這10萬、8萬點樣弄回來,當然唔係叫你去借,最好就是從工作收入儲回來。如果工作做得好,恒常有比較大的正現金流流入(即收入減開支還是較大的正數),你呢間投資公司的股本就會不斷擴充。

好了,有了本金,開始投資,首先要設定你的目標,要選擇高速增長,抑或穩定增長。選高速增長,好處是快,壞處是風險高,可以發達,也可以清袋,只宜較年青者選擇,試想你30、40歲好辛苦投資加儲蓄搵到200、300萬,想用呢筆錢供條化骨龍去外國讀書,或者靠筆錢將來退休養老,你一晚輸清,頂唔頂得順先?若你選擇穩定增長,好處是穩,壞處是慢,在平靜的股市,所有東西都增長得慢,穩健的壞處不明顯,在速動的股市,好多股份都飛快上升,做穩健的投資就顯得很笨,這就是愈來愈多人想放棄匯豐(0005)的原因。

好多人本來從不去想自己的投資目標,只是隨波逐流,事實上好多應該穩陣、或主觀上只想作穩陣投資的人,走了去做高風險的投資,結果就要付出代價,買電盈(0008)就是好例子,即使一直有買香港電訊的股民,見到李澤楷入主把電盈變成炒股後,若性好穩健,就應該走避,唔識走就遭秧。又例如以如今的市況,買港交所(0388)就一定不能當穩健的投資了。

但如果我強逼你去想清楚投資目標,我估大部份人都唔會選兩個極端,而會話自己係中間派,唔使太穩陣,但又唔想太冒險。呢個答案最易答,問題唔知點去執行,但大部份人其實無執行,只係隨意咁去做。

用一個實例去講吓,網友亞K早幾日有此留言:「 陸SIR,“亞K記控股公司”,勉強都算是一間做乜師物師, 若論本業,都可說是一門穩陣,年年有錢賺的生意,但無奈花費太多,扣除供樓,供養父母,基本消費(之前太大使),交稅,令本金太小. 經過一年炒炒賣賣, 要蝕本,是時間從新檢討業務,可否談談,像我這些高不成低不就的,拉車邊中產,除了減省消費,應怎去投資變成一間藍籌呢,因為印像中在97股災死得最慘的就是這類人,若大跌市會否也是番版呢?

從阿K的留言,會見到她有不俗收入,對股票有一定分析能力,但買股票的手法經常在彎角飄移,浮游在投資與炒作之間,這就是問題的關鍵。

  理清目標好重要,假如你設定自己是一間中度風險公司,市靜時組合目標年回報8至10%,市旺時15至20%,但關鍵想保住不輸錢,希望年年有正回報。你可以把資金分成兩份,投資的部份不少於50%,投機的部份不多於50%。投資部份是資本遊戲,當投資回報不高於10%時,只能靠增大資本,實質上才可以有高點回報,10萬元1年回報1萬,20萬元1年回報就有2萬,資本多回報才多。投資部份首要穩陣,要唔輸,少冒風險,最好少進出,投資買大股,大公司一年一次、兩次的業績期,通常就係只升一轉,升幾個巴仙就收工。

  投機部份不太講究本金,考眼光,捉時機,快人半步,難免要進出,要有合理心態去投機,不要抱「唔認」的心態去投機,咁樣仲弊,鬼鬼祟祟,應炒唔炒,蘇州過後才去追,好易高追衰收尾。

  所以我給阿K開的藥方是鼓勵她去投機,而不是成日話唔做老鼠,但鼠癮難除,做老鼠唔係壞事,問題是你識唔識做。但投機要限注,正常可用3幾成資金去投機(咁高的市況用1至2成資金就夠了),要輸得起,講得投機,就要預這筆錢可以輸清,若頂唔順,再減些注碼。

  比較自己公司投資部門和投機部門的業績,旺市一定係投機部門好,但要看它抵禦跌市的能力。反過來旺市亦是考驗投資部門的時候,旺市也不能有太差的投資業績,過早離場,成手現金,就增加最後忍唔住在市頂重新入市的風險,投資部門如何使用閒置現金,做點安全的區間交易,可是很高的學問。

  假設你間公司年頭設定投資部門回報8%,投機部門回報30%,年尾就要看看能否做到,有時做不到和大市有關,另一個比較基準是和股市同類股份回報比較,看自己會否跑輸大市。目標不是訂得愈高愈好,目標要和自己的風險胃納相適應。如果要參加股神遊戲,就要把所有本金投放在最高風險的類別,例如狂買窩輪,目標係贏幾倍,若果睇錯輸清虛擬本金,亦無所謂,但在現實的人生裏,你能忍受投機部門輸清本金嗎?若果不能,就要想辦法控制風險了。

  若你間公司投資和投機部門年年有15%以上的綜合回報,人生可以無憂,但現實裏不易做到,如今這樣喪升的股市,是變態而非常態。或者好多人盲中中過去兩三年可以做到高回報,要一二十年長期如此,殊非易事,記住股神巴菲特的巴郡,也只有20%左右的年回報而矣。

陸羽仁

TOP

發新話題
©2001-2009 3Talks.com, All Rights Reserved. 免責聲明及版權聲明

重要聲明:本討論區是以即時上載留言的方式運作,3Talks.com對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,用戶不應信賴內容,並應自行判斷內容之真實性。於有關情形下,用戶應尋求專業意見(如涉及私人、買賣、醫療、法律或投資等問題)。由於討論區是受到「即時留言」運作方式所規限,故不能完全監察所有即時留言,若讀者發現有留言出現問題,請聯絡我們。3Talks.com有權刪除任何留言及拒絕任何人士留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。