美股道指跌２２３點，觸發日圓套息交易拆倉潮，日圓高見１１０．６８，加上內地又加銀行存款準備金，今日港股難免一插，短期更可能試一試２７３００點的５０天線。

　　記得上星期三和經紀張講電話，佢見當日開市開番起３００００點樓上，開３００５４點，就問我係唔係跌完啦。我記起今年８月頭也有類似一幕，股市跌之前經紀張見個市升得太高，一直覺得會跌，但８月初剛開始跌時，經紀張立刻追沽，睇中了一天，但其後大市開始反彈，經紀張立刻覺得大市已跌完，不但平淡倉，仲反手做好，大家都知那個月出現大龍鳯，月中跌到阿媽都唔認得，尤幸經紀張捨得一唔對路就止蝕，無等到８月１７日見底時才打靶，所以只是輸少錢，無輸大錢。

　　所以我今次提一提經紀張，問佢「記唔記得８月初單嘢，那時一開始跌又立刻反彈，之後再深度試底，小心今次又歷史重演噃！」經紀張本來想轉番好倉，見我咁講立刻收手。佢在上星期四多謝咗我一日，因為當天又裂口低開成１０００點，不過到上星期五早上見匯豐減息０．２５厘，大市又升番上２９２００點樓上，佢又信心動搖，問咁減息法，地產股有排炒，大市會唔又升番？當天下午大市差不多打回原型，佢心情又靚番。

　　經紀張身在股市中，跟得太貼，好易受一下子股市上落的行情影響，陸羽仁抽離少少，相信港股早前急升衝３２０００點不破後，要展開一浪調整市，雖然未必如８月那次跌得那樣深，因為初步看外圍暫未有那次咁風聲鶴淚，但係講得叫做調整市，雖然香港咁流行快餐文化，都唔會跌兩日就升番，起碼都跌番半個月啩。若美股繼續唔掂，日圓套息交易又拆吓倉，港股就要試低少少，５０天線係重要關口。

　　你睇美元的弱勢，其實已把日圓推升一個台階，日圓過去一段長時間，都在１１５至１２３之間俳佪，但美元再轉弱後，睇嚟大家要適應日圓走上一個台階，將會在１０５元至１１３圓之間游弋，當日圓在這個區域落腳前，已做落套息盤的對沖基金自然要拆拆倉，這些拆倉潮又會加深金融市場的震動，只要日圓向上，日股都難免再插。

　　網友Henry在高位追了貨，境況不良，佢咁講「睇到今日(11月9日)陸sir係頭條的專欄，終於相信從頭到尾個股市都係大戶玩哂(至少短線絕對是!!!)。所以好多時d專欄推介某某股票短期的目標價係幾多，但結果好多時都達不到...這不是呃鬼食豆腐，佢地真係基礎分析﹑技術分析出哂黎，係客觀分析，但大戶有咁多貨係手，要沽低炒上都無佢辦法la，好像誰錢多就能製造所謂的「客觀」價格咁...咁何況我地這些蝦兵蟹將？有時自己分析d股票，都有時和這些專欄意見相同，但在不適當的時候入貨...由31000點跌落黎，在大約29500點買了1122和3988，確實不是安全的水位...自己之前都估3個月內會跌到25000點，但就是忍不住手入鬼左...雖然現在兩隻野都係跌左5%，但心諗之後升番個5%-10%都好無謂(始終短期內32000點是個頂)。好像多了些怨言tim...不過陸sir都講得幾啱，真係要等有番大調整先入番d紅色股...很後悔8月19000點無入到自己的愛股建行，4個幾的價錢真的無可能復見la....」

　　　Henry的情況好普遍，之前沽了貨，高位唔敢買，但一跌少少即追，結果又套住，自己明明估３月個月以內會跌到２５０００點，但卻在２９５００點買了貨，雖然２５０００點未必會出現，但２９５００點肯定跌唔夠。高追了只有兩個方法，一是止蝕，一是死守，雖然我話應該止蝕，但人人情況唔同，如果你個倉本來一股都無，追咗少少貨，又可以頂吓。但如果你已經揸爆倉，好似網友阿K話佢自己咁情況，將後來買的貴股先止蝕，保留現金，想做老鼠都靈活啲啦。記住人人都要因應自己的情況，控制風險。
陸羽仁

港股過去一星期下跌了４０００多點，又走回１０月初時的狀況，未來一星期走向仍要看外圍，美股顯然未穩，大跌後昨晚道指早段反彈，尾市仍跌５５點，微穿了１３０００點，後市仍要看次按問題及美元走向。

陸羽仁經常講，炒股不在乎冧巴，順勢而炒，逆勢就停，易有所獲，但現實生活中，只能嘆句「問誰能做到」。有些網友的例子值得參考。

網友zzxx這樣講：「我是股市小學生，睇咗陸sir好耐，但買股票只是今年的事。

我知道止蝕和嚴守紀律的重要，我時時刻刻都記住陸sir說話不要犯散戶的錯誤，但要做到的確不易為。

以下是我買358江西銅的經歷:

個市咁勁，港元拆息低，利好。又諗住中國會發展大型基建，做電纜用銅量已不得了，就算第三季業績麻麻地，都覺得買得過，博短線炒一轉。江西銅由高位$32跌到上星期五$26，低咗成19%，應該安全啩，最後$25.3買到1手，預定低1成打靶($22.80)，升就由得佢。諗住好有計劃，ok啦。

點知過兩日，温總講完野，一睇已經$22.3，心諗"唔係呀麻，一買就穿止蝕價"，又諗冇理由咁黑卦，$22.3是高位低30%，應該守得過，唔賣唔止蝕博反彈，點知第日仲跌多D，跌穿$22。嘩，心唔服氣，再買1手溝淡，$21.95買到，平均價$23.60 。

過多兩日，的確有反彈，但都係去到$22.5就回落，心又諗過多兩日可能會上翻來，後來，上上落落，星期五收市是$21.15，兩注都要輸錢。

今天把心一橫，全部打靶計數，$19.90賣，兩星期輸7,400大元。回想轉頭，我犯哂陸SIR講既錯誤：

1. 高價買，買價不便，一買即到止蝕價

2. 自以為是，以為自己好醒，與市場對着幹，跌市不走

3. 到止蝕價不止蝕，還去溝淡

4. 應該在反彈時打靶，但不做，反而諗明日可能會上高D

我覺得炒股EQ比IQ重要得多，EQ不好，好容易做錯野，要嚴守紀律，到價做野，不應手軟。講就容易，做就不易，要多多磨練阿。可能明天即彈，但我不想再冒險了。」

　　網友zzxx所犯的是散戶最典型的錯誤，炒股本有計劃，但受自己心理影響，不去執行，輸咗成日想博番，一買即輸一成時，心諗「無理由咁黑」，唔止蝕，等。點知再跌，覺得股價好便宜，再溝，結果輸得比想像多，輸得比想像深。散戶的性格決定了命運。
再睇吓網友股之國下忍的例子，佢話「 今日埋單計數, 全年利潤下降至4%, 多過定期少少。無唔開心, 假o既! 激氣到想打爆牆? 又無喎(2000年蝕左9成都試過, 之後一直無掂股票, 直至今年6月先開始番). 可能因為睇得陸sir個blog, 金曹兄, 貓兄, 阿K.......等等各位blogmate既post幾個月, 知道今日止蝕認輸, 明日就繼續係一條好漢.

我今日一得閒就諗, 自己係俾早幾個星期大市既"盛況"沖昏左頭腦, 只記得"高處未算高"同埋"股價可以好唔合理咁繼續升", 一味高追; 諗住恆指插水, 有個別股票應該企得穩, 無recall 8月時既"盛況", 結果打靶離場. 究竟呢d散戶通病, 可以點樣根治呢? 有時覺得, 炒股最大既對手就係自己..」

股之國下忍講的是另一個典型，股市初升時大家唔信，升到顛時大家就唔怕，相信網友們都會記得我半個月前答過阿Ray的問題，升穿３００００點時，我當時講唔知邊度係頂，但股市升得咁急，酒斟得咁快，一定會滿瀉，會回，否則一兩個月就升到４００００點了。無人可以準確預測頂部和底部，但要訓練自己有一種感覺，在升得太顛時要識恐懼，在跌得太誇時要克服貪婪。升得太顛時唔識驚，瞓身買，或者一開始回就急於全力撈底，一樣會死。

想做五星級大鼠談何容易，散戶最需要的是EQ，不是IQ，最需要的是心理質素，不是選股能力。共勉之。

陸羽仁

　　美股道指急彈３１９點，彈升２．５％，看來恒指累積大跌４０００多點後，今天應有像樣反彈了。　　


　　美股大升的原因是Wal-Mart的盈利超乎市場估計，另外高盛又話無需再為次按投資作重要撥備。高盛CEO　Lloyd Blankfein在一個銀行研討會上講到，雖然他估計次按資產仍會繼續跌價，但高盛不用再作重大撥備，消息一出，高盛股價狂彈，升１８．３３美元至２３３．０４美元，升幅８．５％，帶動整片金融股上升，Lloyd Blankfein咁講，令市場憧憬次按風暴最壞的日子正慢慢過去。隨著美股回升，日圓亦略回，今早報１１１日圓，離開了１０９的低位。


　　網友最關心大市短期見底未，我估有兩個可能，第一個可能是已見底，這類似今年２月至３月的跌市，由２月２３日的高位２０８５９點，跌至３月５日的１８６５９點，跌了１０．５％，雖然當時是一個雙底，反彈完在３月１４日再跌近底部，但沒有跌穿第一次的底部，特點是整個跌市跌幅不深。今次跌市暫時為止由１０月３０日的高位３１９５８點，跌到昨日低位２６９５２點，跌了４９９４點，跌幅１５．６％，顧及早前的急升，港股坡度加大，１５％的跌幅亦不算深。
第二個可能是再要破底，這類似８月的跌市，由７月２６日的高位２３５５７點，先至８月６日的低位２１９１６點，跌了１６００點，跌幅７％時開始反彈，當時市場一度以為已見底，但到８月１７日又深度探底，跌至１９３８６點，最多跌幅１７．７％，然後大奇蹟深V反彈見底。也顧及早前的急升，若要有８月跌市近似的急插，今次要跌２０％或以上，若跌２０％，即要見２５６６４點。

表面看今次跌市雖然受溫總發言和美股急跌雙重影響，但８月跌市美國已有點災味，但如今美國次按風波還相對平靜，所以有機會港股已見底。

作為五星級大鼠，止蝕要快，反手也要快，止蝕快，手上有現金，要買貨也有錢，止蝕不夠快，拖泥帶水，以現時的市況，可能人地反緊手你仲係度止緊蝕，心理上適應不過來，會錯過很多機會。

　　既然不能排除大市已見底的可能，若在高位已沽貨或投機部以現金為主的朋友，今日可以反手買入部份持倉，博大市已見底，在這種速動市，反手買貨亦要快。為什麼是買「部份」，因為仍有可能反彈完再跌，就算不是再大幅探底，也可能再插番少少，所以穩陣者留一留力，但進取者就自己執生了。

陸羽仁

        美股急升後略回，道指跌７６點，港股在急升之後，也可能會調整一下。　　　　　　　　　

　　我們永遠想捕捉一個轉折點，例如在一個跌浪，我們永遠想知道那一個點數是底部，然後想在底部一注買入。低買高沽，始終是散戶的夢想。

　　或者我們應該看看高手如何理解這件事情，曾是摩根士丹利全球策略師的巴頓碧斯（Barton Biggs）講過這樣的話：「在市場轉折點附近，大部份人的感覺永遠是錯的」（《Hedgehogging》、《對沖基金風雲錄》）。

　　碧斯講起他一個老友戴夫的故事，戴夫本來是一個看基本因素的價值投資者，後來轉為趨勢投資者，用我的語言，戴夫由一個「投資的我」變為「投機的我」，以激進投資策略為客戶投資。戴夫的投資哲學是「讓市場告訴自己應該擁有那些股票，而不是自己告訴市場哪些股票值得擁有」。他不會因為股票平就去買，永不嘗試撈底，他覺得買那些無人想要、價值被低估的股票，是傻瓜才會做的事情，他買入正在上漲的股票，賣出或不去踫那些正在下跌的股票。

　　碧斯講起戴夫買北電網絡的故事，在２０００年那個科網股風起雲湧的年代，電訊股北電網絡曾經紅極一時。喜歡追熱股的戴夫也看上了北電網絡，他在１６美元大手掃入北電的股票，持有重倉。２０００年４月碧斯去參觀北電，和公司副總裁面談，發現北電的盈利被誇大１００倍，會計漏洞百出，公司不做研發，卻花鉅資去收購科網公司，北電的副總裁吹水唔抹咀，碧斯估到北電遲早出事。

　　碧斯回到紐約後，趕快打電話給持有北電重倉的戴夫，告訢他北電的壞消息，那時北電的股價已升到６２美元，但戴夫的反應異常平靜，說「你可能是對的，但我要等到市場告訴我。」後來北電股價持續上升，５月已升到７５美元，直到那年秋天，科技股開始下跌，北電跌到６０元。後來北電公布第４季盈利將大幅下滑，那天一開市，北電的股價跌了１２美元，跌到４８美元，戴夫當天把所有北電股票沽出。兩年之後，北電股價跌到３美元。

　　　　這個事例可見，戴夫真是「投機的我」箇中高手，首先他不信價值，只信市場，但從投資北電的事例，他也能吃盡北電大部份升幅。１６美元買貨，４８元才沽貨，剛好是３倍。他在聽到北電基本因素的壞消息時沒有沽，因為那不等如北電的股票不可以再升，他在北電股票升到高位７５美元時也沒有沽，因為他不知道那是高位，誰知道北電不可以升到２００、甚至３００美元。但到科技股走勢轉壞、北電宣布績轉差、再加上北電股價開始大跌時，戴夫立刻清倉離場，因為市場告訴他北電已經唔掂。

　　記得早前網友高追人問起一成止蝕中石油（０８５７）有無做錯時，牛腩貓咪答過話真正專業的投機者不需要一成止蝕，戴夫便是一個好例子，他便不會一成止蝕（不過這是一個高位何處止賺的例子），但他懂得判斷在那個位要斬倉離場。

　　　一個新仔盲跟一成止蝕或高位想沽貨時用一成止賺的方法，當然極不專業，但應可避過持有北電直插到３美元的慘劇。

　　若是「投機的我」，現在首先要對市場走勢形成一個感覺，若你覺得股災已開始，當然是走得快好世界。若覺得大市只是調整，跌到咁上下就要儲吓貨，從「投資的我」的角度，２９０００點當然是貴，若是「投機的我」，就只能「等市場告訴我」了。

陸羽仁

美股道指昨日又跌１２０點，點幅０．９％，皆因美國第二大按揭商Wells Fargo & Co.話美國樓市是大蕭條以來最差，加上投資者懷疑按揭公司房利美在最新業績中隱藏虧損，搞到美股腳軟哂。

港股今日勢必跟美股回吐，究竟這是「投機的我」收集的機會，還是有重大下跌陷阱跟尾，真係要靠自己判斷了。

　　講到判斷，就記起網友自資之明的一段留言：「我買親股都冇錢賺..晤係越行越衰..就係賣完升..今日我又賣股票.結果賣完升10%...好難過..今晚見美股跌,,,我好happy... 哇哈哈哈哈....」

昨日講到前大摩環球策略師碧斯的智慧，今日可以講多一個他在《Hedgehogging》一書提到的故事，他講到一個「外母因素」，就是我們所謂的「明燈」，市場上總有一些人，永遠睇錯市，在股票升得不能再升時追入，在跌得不能再低時出貨，總之永遠在不適當的時候做不適當的事情。

碧斯搞的對沖基金合夥人西里爾的外母，就是這種人，在２００４年１２月的一天，外母大人給西里爾的兩個小孩喂食物時，向西里爾說，「我看美元還會跌，我們再去歐洲玩時怎麼辦？難道我不應買點歐元嗎？」

西里爾問外母為什麼會這樣想，她回答話：「每個人都這麼說嘛！」第二天西里爾對碧斯說起這件事，然後就好靈驗地，歐元在新的一周到頂之後就急速下跌。碧斯其後對西里爾說，「你外母真是最好的反向指針，我們應把她當做市場晴雨表。但如果她這樣準，你就應該珍惜她，告訴你太太不許在母親講話時笑，反向指針很容易失效，要是你外母知道你把她當作反向指針，她的思維受影響，那就不靈了。」


　　我們身邊就存在很多西里爾外母那樣的「明燈」，他們經常做錯事，買股票經常輸，甚至在大牛市都可以輸錢，或者是贏少少輸到突，我好喜歡這類人，我也經常問經紀張他們做了什麼，然後做相反的東西。

　　「明燈」的出現，或許可以有科學的解釋，他們多數比較受大圍情緒影響，而且通常是反應較慢那一種，例如股市已狂炒半個月、一個月，他們才追入，自然好有機會做明燈。明明跌一成應該止蝕，他們住住要跌夠三、四成才斬倉，自然好易在股票已衰到透在短期反彈出現時他們才斬倉。另有一種是堅持己見，唔信市場，覺得大市要跌，一年前已開始做淡。還有一個更人為的原因，大市或個別股票被大戶操控時，造出各種升或跌的指標為事件，「明燈」就會做出大戶最想要的反應，任憑擺佈。

　　如果你自己不是「明燈」，就一定要在身邊搵一個，在睇不透大市時問問他，一定可以提供一點有用參考，指出正確的反方向。

　　如果你自己已是「明燈」，也不要失望，那一個散戶唔做過大戶點心就可以成長。我對「自資之明」的建議有兩條，第一，為自己開一個「相反倉」，做吓實驗，自己沽貨時，就在相反倉寫吓同價買貨，反之亦然，睇一兩個月，睇吓自己係唔係一枝咁準o既明燈，如果係，以後跟相反倉做就得啦。

　　第二，搵出自己係「明燈」的原因，我怕你好有意識咁睇吓自己係唔係明燈，到時又唔靈了，所以更正路的方法，就係搵出自己做明燈的原因，睇吓係唔係人云亦云，反應特慢之類，以後就要避免。

　　我真係知道有些人從１９０００點開始一直睇淡，一直斷斷續續沽期指，一直輸到而家。輸咗大半年都唔驚，真係令人佩服，他們期望大跌市在明天來臨，我就話「黑開有條路」，我經常密切留意這些長期淡怪何時開始放棄，那一天他們改絃更張，全線轉好倉時，我就要諗諗好唔好全線清貨離場。
後記：如果「自資之明」真係咁「明燈」，照計上天唔會對佢咁好，今次俾佢一沽完就跌１０００點、２０００點啫？

陸羽仁

　　  　  美股道指周五升番６６點，定番少少，但今期港股不穩定因素唔係美股，係阿爺，阿爺打擊偷渡北水的行動，真係打到有少少恐慌。
　　一向唱好的李四叔也出來警示風險，叫散戶小心市場波動，又唔同意「何賭王」話恒指年底見４萬點之說，不過李四叔仍然估年底恒指有３萬點，明年初見３萬２、３萬３點。李四叔的評論愈來愈貼市，呢一兩日有少少北風吹吓，就叫大家著衫。
　　阿爺呢個不穩定因素如何發展，尚待觀察，正如我在《頭條日報》專欄所講，最近中央台將黑匯天后被捕的舊聞翻炒，都係配合溫總上次叫港股直通車放慢的口徑。咁啱溫總現時又出訪新加坡，香港傳媒自然追到貼，睇吓溫總再有無辣招出籠，不過今早聽新聞，報導溫總講打擊地下錢莊，話只係想控制資金非法流動，以免影響香港股市大幅波動。佢又唔係好讚成深圳銀行限制存戶每日提現金不得超過３萬元，話主要應該教育市民，唔好用這些行政措施。
總的來說，溫總的最新口徑尚算溫和。溫總話唔想搞到港股「大幅波動」，其實和他們睇內地股市的角度一樣，他們想內地股市平穩向上，不要大幅波動，即係話唔好唔升，又唔好升得太顛，但現實中股市好多時都無咁理想。

不過講番港股，從溫總上次講港股直通車開始，己調整了４０００點以上，都算對阿爺都有所交待；話得說回來，如果港股跌得太急，跌８０００點、１萬點，搞到人人鬧溫總，也非阿爺所欲，所以若港股真係太生性跌得過急，我又信阿爺會講番兩句，又話「港股直通車尚在研究中」，出口術幫你頂一頂噃。唯一難搞啲就係阿爺出宏調招數搞內地股市時，港股跟住跌，咁就好難出口術了，不過若大陸股市跌得過急，阿爺一樣痛。

宏觀點看，如果香港的跌市源於美國或大陸的股災，咁香港的牛市亦可能隨即被斬頭；若跌市只源於阿爺的政策陳述，或者行政措施，咁樣就跌極都有個譜，不致失重急墮。

假設今次港股跌市是調整而非股災，咁就有數計，恒指由８月１７日低位１９３８０點，升上１０月３０日高位３１９５８點，合共升了１２５７８點，小調整跌升幅三分之一，跌４１９２點，應跌到２７７６６點，如今已一度低過此點數；若中調整跌升幅一半，跌６２８９點，會跌到２５６６９點，都算幾深的調整。若大調整跌升幅三分之二，要跌８３８５點，要跌到２３５７３點，一般唔會跌到咁深，除非再有重大壞消息配合。

陸羽仁

　　港股被中美兩個大隻佬挾住來跌，大陸覺得收夠籌先收口，又到美國嚟玩，美股昨日在高盛調低美國最大銀行花旗銀行預測帶動下，拖低大市，道指跌２１８點，收１２９５８點，正正式式跌穿１３０００點，展開其深度尋底之旅，朝向８月１６日的低位１２８４５點進發。
高盛話花旗銀行未來兩季要為信貸市場虧損作１５０億美元的撥備，大家都知高盛自己都有包銷發債，對信貸市場暸如指掌，佢咁講得花旗，雖不中亦不遠矣。高盛同時調低對大摩和美林的盈利預測，同樣道理，高盛自己做投資銀行，計投行盤數自然好精。高盛的預測一出，花旗就跌至４年低位，亦大幅拖低美股。

美股仲有一個現象值得關注，就係所謂Dow Theory（道氏理論），視道琼斯的運輸平均指數係牛市或熊市的一個指標，如今道琼斯運輸指數已連跌４日到去年１０月的低位，如果道琼斯運輸指數和道琼斯工業平均指數（即係我哋平日講的道指）同時跌穿低位，就係熊市來臨的指標。如今運輸指數先穿，而道指仲有１１３點就要破８月１６日之底，睇嚟都好有機會矣。

美股差我地就諗起利息，早兩日還有一兩個聯儲局理事走出來講１２底聯儲局再議息時不會再減息，但高盛即刻整單調低花旗盈利預測俾你嘆吓，而家市場似乎估計到時會再減息。美元兌日圓跌了１．１％，而美國國債價格亦升到２００５年的新高，預示市場認為美國要再減息，所以美元跌價，亦有不少人搶買定息的國債。

大家都記得，８月１６日美國大跌後，挾住港股跌出一個８月１７日的大跌市，如今美股又試底，亦造就港股再大幅尋底。

港股昨收２７４６０點，隨時一插又插１０００點，去番２６５００點的水位，正式破埋本月早前造出的２６９００點的低位。正如昨日所講，如果跌深少少跌到升幅一半，就會去到２５７００點，咁o既點數跌起上來一兩日就到。

美股步向熊市，美國唯一保命之法是減息再減息，逼住美元走弱，逼住港元走低，逼出香港的負利率、通脹與資產泡沫，對本地樓市特別有利，地產發展商都預計明年係好市，在這大環境下，只要美國股市和大陸股市不出現股災，港股明年利好。若無貨在手者，大跌市試低位，就是「投機性吸納」的時機。

這裏有幾個註腳：

第一，        無貨，少貨，或高位大量減持者可以吸納，唔等如成手貨者可以吸納，我見還有好多網友成手在紅色股高位時買的蟹貨，跌一成無止蝕，問我而家點辦，這些朋友可能還要止蝕，一定不可以吸納，千萬唔好諗去買吓貨溝淡吓，做錯了只能減貨，不能加貨，雖然話港股正在試底，無人擔保唔會睇錯，萬一佢進一步大跌之後就牛皮，你佢溝貨就輸上加輸。

第二，

叫得做「投機性吸納」，即係話睇基本因素好多股仍然貴，唔啱投資者玩。

第三，        買貨要分段買，唔好一注買哂，假如預佢跌到升幅一半去到２５７００點，點知最後竟然跌到升幅三分之二跌到２３０００點，甚至更低，若早前一注買哂，都要食驚風散。所以分注未必買到最平貨，但就會安全少少。

陸羽仁

　　美股道指升５１點，早段曾傳聯儲局會減息，美股升得更高，後來證實所謂聯儲局會議紀錄的「好消息」，原來是儲局上次議息時已感受到樓市下滑和次按引發的金融衝擊的嚴重性，恐怕會影響經濟，這種論調預示聯儲局十二月底議息時可能會再減息。另外聯儲局也調低美國明年經濟增長的預測，又係同一個方向的訊息，既然美國經濟都受樓市和次按影響而放慢，聯儲局都唔駛擔心減息會刺激通脹，應該擔心的係通縮而唔係通脹，再減息的機會增加。

　　不過港股在外圍唔多靚仔，美國ADR匯豐收１３２．２４元，應計及除息結果，而中移動ADR價亦跌１．６％至１３２．８２元，以這些價位睇，港股開市都要先回一回。

　　好多朋友問乜價位入市，如果我話昨日最低價２６４０４點都幾好呀，可以入部份貨o架啦，恐怕你會講句粗口，話「鬼唔知阿媽係女人咩」。

　　我有個老友管理投資組合，係一個炒手，投機技巧高明，今年回報以倍計。呢個炒界高人昨日上午低位都買咗唔少貨，但未一注入哂，留咗少少力以防還有一插。我代大家去訪問吓佢。

陸：你昨日上午入市，你認為大市見咗底呀？
高人：邊個估得到大市幾市見底，但「離底不遠」就可以大約感覺到。我在１３日上周期二穿２７０００點後入咗第一注，昨日再穿２７０００點，在２６５００點入了第二注，下午一開市彈番７００點後，等佢回落追咗第三注。仲有啲錢可以候低再買。在２６０００幾點買貨，我估最衰跌到２３０００點都可以停啩，下跌空間３０００多點，上望中線有６０００點以上升幅，２博１，都有得博o既。

陸：點解唔等低啲先至買？
高人：等低啲好處是平啲，壞處是買唔到貨，有時唔好去到咁盡。我有個老友在０３年沙士後覺得樓市見底，後來見數碼港貝沙灣開售，好想買番間樓，揸車去睇樓，駛入去時突然湧出一班地產代理，老友差點撞親那些代理，老友被嚇咗一嚇，結果就唔買，最後貝沙灣升到成萬元一呎，我老友話呢一嚇累佢唔見咗６００萬、７００萬。我就話佢當時見個市咁差，本來已心大心細，嚇一嚇只係乘機唔買。我話你知，在跌市買嘢，要戰勝恐懼，有「周身中刀」的感覺，記住唔係「周身刀」，係「周身中刀」，跌到咁上下深才考慮入市，買o既時候好多人覺得會跌多２０００點、３０００點，你買都買得好唔舒服，好驚，就差唔多啦，結果就算再跌，一般都唔會跌得咁深。

陸：講衰啲如果買完發現錯咗又點？
高人：第一要知乜嘢叫錯。買齊之後，如今再往下調整，真係跌到２３０００點、２４０００點，都未必叫做錯，可以捱吓，但買完之後，有一天美股一跌跌２０００點，港股必然大瀉，我等佢略彈必定清倉。又或者大陸股市一日跌１５００點，我都會咁做，美股或本地出現股災，香港隨時見災，就證明自己睇錯，沽完仲可以反手造淡。

陸：你認為炒股最緊要係乜？
高人：最緊要係心理質素，要戰勝貪婪和恐懼，我在過３００００點H股升得最顛時，減持了部份股份（沒有沽清，以防睇錯），這是戰勝貪婪，沽了貨跌下來才有錢有機會執平貨。在大跌市時要有技巧買貨，是戰勝恐懼，我炒股二十年，但在那些日子買貨，依然心驚，但低揸當然好過高追啦。


陸羽仁

　　昨晚外圍金融市場繼續混亂，美元弱勢，日圓急升，對沖基金忙於拆倉，美國受次按困擾再急跌，道指跌２１１點，跌到１２７９９點的低位，港股今日開市再會插一插。
　　大摩昨日建議客戶沽售第三大發咭機構美國運通，令運通股價跌至１４個月的低位，而JPMorgan亦指全美第二大電子產品連鎖Circuit City Stores Inc.,難尋業務買家，導致該公司跌至四年低位，美國股市在次按陰霾籠罩。
美國經濟的確係衰，大行亦盡情唱衰，看來旨在叫聯儲局減息。若果經濟好股市高，美國仲邊有得減息，而家係經濟差股市創低位，聯儲局１２月底唔減息唔得。

其實全球金融市場已睇到這個大勢，預期美元會再因美國減息而走弱，預先作出回應，所以油價上升、黃金反彈、日圓及主要貨幣向上，做日圓套息交易者拆倉，因而影響高息貨幣下跌。這個全球大混亂由美國可能減息觸發，按今年３月和８月經驗，照計玩一輪會停，不過玩緊的時候會幾恐怖。

過好少見這種全球金融大混亂，今年已有三次，當然令人擔心，會不會震震吓就崩潰，震震吓美國就股災。不過表面觀之，美股的熊仔雖然已經到來，但係最經典死撐的方式，就是連番減息救市，現在才剛剛開始，到救極都救唔掂時，又或者減息引發惡性通脹時，才會瓜柴，目前還會玩吓。

若美國大崩潰的機會暫時唔係好高，咁香港亦只係調整市而非股災，問題只是幾時才跌完，按過去經驗，這些對沖基金拆倉潮時是高峰，３月試過一次，８月試過２次，呢次在日圓升穿１１０時和昨日見１０８點幾時，拆了兩次，照計日圓若見１０６應該都差唔多，所以未來日圓再升應該試多一次頂部就ok。

港股比高位跌幅５５００點，比高位跌１７％，若和美股和日股相比，已經唔錯，特別是日股已見全年低位，而港股要見全年低位要穿２００００點。

在大跌市時，個別優質股日中都會跌到好低的位置，甚至已近全年低位，高位已減貨手上有餘錢的朋友，不妨揀好股定些低價釣吓魚，或者俾你釣到低位也未可知。

陸羽仁

　　   　美國感恩節無市，亞洲股市自由炒，又睇吓今日港股再玩唔玩試底。
　　美國股市熊樣十足，網友Jack有此一問：「陸Sir:有重要問題問啊!!現在大市日日跌,為什麼各大行及大富豪不約而同還看好港股,誇口說大市可重上30000至40000點呢?而事實是美國經濟衰退,影響全世界經濟,開始步入熊市階段矣...而港股反覆向下,陰陰跌,世人皆不信是熊市,然而,熊市是不是已不經不覺地來臨了呢?」

　　這的確是好問題，美國樓市急滑，經濟面臨衰退，美股道指早前因減息而衝破１４０００點的高位，回落後又再上高位，當日我已經估美股係雙頂，跟住會回，原因好簡單，美國樓市崩潰，金融市場又被樓市衍生的次按搞到風聲鶴淚，變咗樓市、金融市場齊香，你話邊度有運行，話佢唔係熊市你都唔好信，所以衝上高位，只是減息的短期刺激，好似個白粉道友打完針咁，突然好興奮咁起身行得走得，仲走去跑步，你千祈唔好以為佢真係得。

　　香港人對樓市、股市齊齊大跌呢家嘢，最有經濟，香港０７年開始金融風暴，衰足７年到０４年，０５年才真係反彈翻身。大家唔好忘記，香港只係一粒米咁細的地方，有阿爺的自由行和紅色巨股上市打救，灌水浮球，所以搞兩三年就翻身。但美國如果出現樓市和金融市場雙雙出事的熊市，無人能夠，只能自己救自己，好可能會反覆向下。

　　炒股要分長中短線，好多人只關心好短線，即係未來一兩日的走勢。從好短線的角度，美國雖然係熊市，但若聯儲局年底再減息，會頂往股市跌完又彈，短線未必會死。美國一彈，香港又炒，這就解釋了為何大孖沙會睇好香港股市未死得。

　　至於中期來說，美國每次減完息聯儲局都可能話下次無得減，結果搞幾搞就再減。由於美國各巨型金融機構都受次按困擾，例如揸到成手債券出唔到貨，聯儲局減息，由於債券早已定息，就會變得吸引，所以減息絕對有利金融機構的債券去貨。美國的金融巨頭話次按問題要明年第一季才解決，所以未來一兩個月仍是逼聯儲局減息的高峰期。

　　減息是服毒汁止渴的行為，美元已弱，再去減息，美元更弱，結果又刺激油價上升，引發通脹，不過只要美國經濟夠差，短期內通脹也可能漲不起來太多。但長遠來說，美元愈走愈弱，油價愈升愈高，終於可能引發危機。

　　以一個十年的長角度看，美國正走入熊市，中國卻在牛市中，雖然兩地股市走勢短期會有類似走勢，長遠卻慢慢背駞。我話大陸係牛市，而且可能係一個十幾年的長牛市，但大家千萬不要誤會，以為我話大陸股市唔會大跌，大陸股市（加上樓市）大跌一啲都唔奇，你抽離一點看，用一個未來十年的角度，大陸股市在圖表好像一條上下波動好大的斜線，由左至右４５度角向上，升升吓會急跌，急跌完又向上，大陸股市已從高位跌了１０００點，跌近５０００點，跌多１０００點去到近４０００點都唔奇，即使出現「股災」，跌番到２０００點、３０００點，也如巴頓碧斯所講的牛市之中的「波動性熊市」，由於下跌無跌番去起步位（大陸股市由９００點起步），所以只是牛市中的回落而矣。

　　我是中國大好友，認為要每逢大跌就吸納，最好中國股市有股災，跌番到３０００點，就是吸納好機會，只要唔怕守，可以愈跌愈買。

　　港股自從引入大量紅色股作恒指成份股之後，大大地紅色化，可以說變成中國股市的衍生工具，中國水咁多，香港食少少都好發。長遠而言，港股應該要跟大陸股市走了。

　　不過講番現在，千萬不要對阿爺主宰香港股市的力量，有太多聯想，未來十年，還是鬼佬大戶的天下，我想要中國培養出左右大局的基金和投行力量，還有很長很長時間。港股跟大陸走向，和香港股市會否由大陸操控，根本是兩回事。
陸羽仁