發新話題
打印

[轉貼] 陸羽仁 blog (5天更新)(更新至8月7日)


有望再減息 (2008/2/15)


    美股升完三日,終於回落,聯儲局主席伯南克到國會講解美國經濟前景,透露美國信貸緊縮仍未改善,暗示下月18日可能再減息,伯南克講話令市場擔心信貸緊縮的影響可能擴散到金融業以外,令上升已久的華爾街股市馬上回吐,特別是金融股跌幅較大,道指跌175點,跌幅1.4%,收報12376點。日股早段跌200點以上,差不多消耗了昨日升幅的一半。 
昨日是伯南克罕有地和財長保爾森和美國證監會主席Christopher Cox三巨頭一起出席參議院銀行委員會的聽證會,這是911事件以來的首次,可見他們亦很重視向國會解說美國面對的經濟問題。我地可以睇睇伯南克講咗乜嘢令美股下跌。

第一.        減息前景。伯南克話,聯儲局會適時採取行動,支持經濟增長,並提供保障,以對抗下跌風險。他更說,金融情況或信貸提供的惡化,肯定是一個警號,令我們需要進一步行動。美國一月損失的就業職位,以及樓價、股價下跌和能源價格上升,都會影響消費,聯儲局因而調低經濟增長的預期。

  解讀:伯南克對短期經濟狀況、特別是信貸情況講得比較負面,令市場相信聯儲局在下月18日有機會再減息0.5厘。
第二.        緊逼感略降。伯南克不再用1月發言時某些用語,例如「重大進一步行動」、「決策者要極之警覺及彈性」,顯露在聯儲局上月急急減息後,他認為危機沒有那麼大。

解讀:伯南克的語氣排除了3月18日會期前再臨時減息的可能性。

第三.        信貸與經濟。伯南克話,提供信貸的利息成本愈來愈貴,信貨供應減少,皆約朿經濟增長。這幾個月經濟前景惡化了,經濟下滑的風險增加。但伯南克相信,上半年美國經濟增長雖弱,但仍是正數,他認為上半年是緩慢增長,但下半年當財政和貨幣政策的刺激顯現後,增長將會加快。

  解讀:伯南克承認早前大減息後,信貨緊縮問題仍然存在,正如我們昨天引述美林的數據,信貸市場仍未舒緩,借錢難的問題未解決,商業債券市場仍然冰泠。但伯南克相信大減息和大救市的措施會有效,可以拉住美國經濟不致陷入衰退。

  聽完伯南克的講話,可以作此總結,美國經濟危機未過,聯儲局會再減息,但伯南克相信可以頂住唔衰退。

  一般而言,聽到伯南克暗示會再減息,美股應該反彈,但美股已經大力彈咗三日,所以今次不是借勢彈,而是借勢回吐。我估伯南克講話對香港有樓一族是好消息,若下月美國再減息半厘,香港應該會跟減0.25厘,既減輕供樓負擔,對樓市亦有少少刺激。而股市就應該跟美股先回一回了。
陸羽仁
本帖最近評分記錄

TOP


莫吃眼前虧 (2008/2/18)


  網友Bigcow問話匯豐(0005)好抵,但會否再低?我估好多人係匯豐粉絲,早前講到匯豐都有好多人有反應,所以不妨再講吓。

  過去一年,有個中環茶友經常提醒我,小心匯豐,佢在美國次按的業務係大炸彈,又脫唔到手,匯豐的英國董事會又唔夠大刀闊斧找管理層開刀,所以鬼佬大行對匯豐幾唔睇好,外資大戶要插大市時實搵匯豐來插,隨傳隨到,永無失拖。

  所以我講匯豐時亦比較小心,對網友問起匯豐時都唔會答得太具體,由於網友的問題多數無講清楚自己係長線或短線,我最怕長線和短線的觀點混淆咗,亂答累死你。不過如今都可以講得具體啲,我認為短線買匯豐唔係幾買得過,你可能即刻有反應,話無理由匯豐無可能反彈,甚至大反彈?我並唔係話匯豐唔可能反彈,如今美國金融股如碧斯所言,有一個10%、20%的大反彈,匯豐一定會彈,但我的問題是如果美股彈,港股又彈,匯豐會唔會係最突出的股份呢?

  香港恒指可以分成三大部份,匯豐佔其一,紅色巨股佔其一,地產股佔其一,三分天下,若美股彈,港股彈,匯豐彈,你估恒指彈唔彈,你估紅色巨股彈唔彈,你估地產股彈唔彈?你要我估,我估若匯豐反彈,恒指的反彈幅度唔會少過匯豐,即係買盈富基金(2800)都會差唔多,甚至好啲。點解會好啲?如果紅色股或地產股反彈得仲勁,超越匯豐,咁盈富的升幅就會大過匯豐。從一個短炒的角度,匯豐是弱股,唔係唔會彈,雖然跌得多,但反彈未必會多過人。

  若講短線,我其實睇好紅色巨股多啲,因為大陸A股已跌了一段時間,主要是年頭宏調和法人股解凍所致,雖然宏調措施都未出齊,但消息會慢慢消化,而解凍股唔似會在低位狂沽,所以大陸股市都係近底。唔好忘記仲有個港股直通車,呢個措施未死,要出亦可以好快出,而且多數係喺港股便宜時推出,所以紅色巨股好有條件短線跑贏匯豐,若唔識揀股,買匯豐不如買恒生H股基金(2828),兩隻去跑,我睇好2828多啲。

  匯豐的問題是美國和歐洲業務,中線而言(講一兩年),頭頂有一把懸劍,就係美國次按危機的幅射未完,壞消息未充份反映,如我今天在頭條日報的專欄提到,美股可能有大反彈,但今年下半年怕佢彈完又嚟料,信用卡的壞帳潮又到,匯豐在美國的次按賣唔到,歐洲業務又怕被美國拖累,所以中線匯豐不能睇好,較好的情況是在大波幅內行走,股價在100元至130元間走動,未有條件向上大突破此波幅太多,若較壞的情況出現,不能排除下半年會下穿波幅試底,買佢小心吃眼前虧。

  若問好長線匯豐買唔買得過,我會覺得匯豐的基本管理資素良好,若在低位吸,揸五年以上,當係債券咁收息,或者有得諗,又舉一個例,以長線計,若唔買匯豐買恒生H股指數基金,就係買中國經濟仲有十幾年快速增長,紅色巨股的管理唔好,但高速增長可以填補管理缺陷,所以紅色巨股是高風險、高回報的股份。但如果匯豐賣掉美國次按業務,以其優良管理,則是低風險、中回報的股份,如何選擇要自己決定。

  好多股民愛匯豐,是受佢過去長期高增長所影響,期望這種高增長可以再來,但我要話俾大家知,匯豐下跌前的兩三年的高增長期,主要是收購美國業務而來,但那個收購為她帶來大災難,她在那幾年中國生意(甚至是印度和俄羅斯這些新興地區)還是較便宜時,沒有大手落注,錯過了這個機會,想追都好難追,所以未來匯豐即使醫番好,也不是過去那隻又穩陣又高增長的匯豐了。
陸羽仁

TOP


隧道尾的亮光 (2008/2/19)


昨晚歐洲股普遍造好,倫敦升2.75%,法國升1.9%,德國升2%,但美股本在一個回吐氣氛中,無乜力水,結果道指跌28點收場,收報12348點。

網友mkm早兩日問過一個問題,值得大家參詳吓,佢問:「Luk Sir, 各位師兄師姐,最近在反省﹐究竟是自己EQ問題﹐IQ問題, 定係MQ(mud Q)問題﹐點解自己投資唔掂呢? 自己的組合由+20%變成-10%? 07年底我決定看多點書。首先多謝Luk Sir﹐介紹Hedgehogging。」

其他網友都有類似情況,有少少情緒低落,例如網友阿K話自己止蝕完之後組合輸30%,要諗吓往後係月供、投資抑或投機。

買股票唔順,一定有問題,所以要搵出問題原因,我覺得原因好簡單,就係股市唔升。港股去年大部份時間十分好景,大部份時間走勢向上,自六月更開始抽升,中間雖有回吐,但回吐完好快又急升,簡直有唔買就笨的感覺。這是典型的大牛市型態。

散戶炒股,絕大多數係買股票,即係做好友,好友在一個牛市中,自然係如魚得水,如果炒得狼者,更會覺得自己係股神,全世界都唔及佢炒股咁叻,亦有好多人連工都唔想返,甚至辭埋職去炒股,覺得炒股好揾好多。我哋的網友太喪炒者較少,因為陸羽仁唔喜歡講冧巴,理論上太喪炒者唔會鐘意睇。但即使是投資者比較保守的網友,手揸股票,都會感覺良好。

換一個情況,好友遇上跌市,而且跌完無馬上彈番,你估感覺會點?就好似大家現在的感覺,感覺好差,因為投資開始變成負數,而且好似行入隊道一樣,未見到盡頭,開始有點唔自己在了。手上揸重貨者會心大心細,心上無貨者也不能再投入熱絡的股市炒過,自己心情唔愉快了。

今次跌市和去年3月和8月的跌市有點不同,那兩次跌市一跌完馬上就彈,唔使一兩個月股市已去番跌之前的高位,若頂得住無沽貨,坐完過山車無事又來過。但今次跌市自11月開始,之後雖有反彈,但反彈完一浪比一浪低,而最近上月一浪急插,插完之後大市反彈亦唔太有力,現時更如我在頭條日報所講,營造一個波幅收窄的三角,氣氛沉悶而低壓。

這種市況有幾個原因,第一,美國次按危機的確好大鑊,股市向下炒易過向上炒,第二,基於炒作因素,以外資為主導的港股,去年8月、9月受港股自由行消息及內地資金沖亂了,升到近32000點的高位,到外資重新做主後,股市修正回復常態,所以先要有大調整。第三,內地宏調,經濟和股市向下,更令港股欲振乏力。

但陸羽仁對未來兩個月大市的看法,和碧斯睇美股的看法接近,大市短期還在尋底,近月尾結算更波動,但正蘊釀一浪較大的反彈,這浪可能由美股反彈帶起,可能因港股直通車這類消息帶起。相反地,短期內再恐慌性下跌的機會,正在逐漸減少中。

陸羽仁

TOP


炒細股 (2008/2/20)


昨晚美股起落不大,道指微跌10點,而亞洲股市低開,主要是憂慮油價重上100美元一桶會影響運成本及壓低公司盈利,但股市未致有太大波動。美元匯價亦回軟,兌日圓落番去108日圓以下,早上報107.8日圓。

  大市好悶,細價股無聲無息炒起,吸引了大家的眼球,市場流傳細價股這次炒作由宏通集團(0931)復牌暴升引發,停牌逾17個月的宏通本週一復牌,一開市股價馬上飆升,最高報0.53元,最多急飆13倍。後來略為回吐,昨日收0.43元,仍然升到好勁。
   細價股炒作唔講基本因素,只講供求,從宏通炒作亦可見一斑,宏通是英特爾授權的主要中港代理之一,已公布的業績就真係唔係幾見得人,06年全年蝕1.8億,核數師德勤對公司帳目有保留,主要針對一筆為數3600萬元的存貨作的撥備是否合理,公司和核數師傾唔掂數,所以核數師有保留意見。而07年上半宏通仍蝕120萬,簡單點講宏通已公布的業績並不賺錢。
宏通公告,停牌期間向主席兼控股股東簡志堅發行3.58億元零息可換股票據,主要用作抵銷債務,換股價僅0.0386元。若悉數兌換,宏通須發行92.8億新股,令簡氏的持股增由76%96.5%,而簡氏已向獨立承配人配售1,600萬股,每股0.388元。另外公司指出,去年下半年透過增聘銷售經理,旗下貿易業務已逐漸改善,對前景樂觀。

宏通炒起起不是因為大家估佢業績好,而係貨源集中,大股東現時持股都有76%,街貨有限。加上配股價高達0.388元,一見佢咁高價配股出街都有人接,就知唔簡單,自然易炒起。

宏通現在發行了23.8億股,若加埋大股東持有的換股債可兌換的股份,未來總股數可能有116.6億股,以現時已發行的股數計,宏通總市值已有23.8億,加埋可能換股的總股數,以現價計潛在市值有50.7億。唔知宏通業績改善到乜地步,可以支持23億、甚至50億市值?

你可以話,大話最怕計數,也可以話,炒股唔睇數睇供求,兩個講法都啱,如果你買一隻炒味濃的股份,我計完一輪數,話佢唔值咁o既價,你無買,第二日再升五成,你第三日就會罷睇我寫的東西。所以我會分成「投機的我」與「投資的我」去講,睇完咁o既數,投資的我自然唔會吼,你地亦唔好問我這類型股票的基本因素,因為睇基本因素就唔應該買。但投機的我唔同,明知有局,落場玩吓,最緊要明白自己係「鱷口偷金」,偷到唔好食咁深,偷唔到唔對路都要閃,嚴守嚴守嚴守止蝕,係炒細價股最重要保命之道。

有些朋友話唔識分邊啲的股票有莊,邊的股票無莊,其實好易分,若價碼細或市值在10億以下的股票,你去銀行睇吓股票機,若果買方和賣方都掛滿牌的話,九成九都有莊家活動,因為香港有千幾隻股票,若無莊家炒作的股票,即使基本因素良好,成交都好靜,買賣雙方的掛牌都有少,4、5倍PE的股票比比皆是,但亦由於無莊,這些股票長期都唔郁,或者一年只是兩次公布業績時會炒吓。但若細價股買賣雙方都掛滿牌,好熱鬧,就多數有莊家在「搭棚」,造出熱鬧的氣氛。炒這些股,自己執生。

陸羽仁

TOP


炒細股(2) (2008/2/21)


昨日港股跟住日股落,以為美國會死,但美股又無事,美股受惠於惠普業績理想及油股因油價大升而抽高,道指升90點,升0.7%,升到12427點。日股早段受美股上升及日圓回軟刺激,亦反彈了200多點。

延續昨天講細價股的話題,昨日和經紀張傾起細價股,他身在市場,好多人話俾佢聽收到堅料呢隻有得炒,嗰隻有得炒,有些冧巴他也會跟吓,由於經紀張是穩陣之人,買得好少,而且有乜唔對路即走,我問佢賺多定蝕多,佢話成日想買到一隻細股可以升10倍、8倍,可惜從未買中過,好多時賺10%、20%都會走,但有個別輸咗唔忿氣死揸,真係可以跌到得番啲渣。我再追問佢夾埋賺定蝕,佢話無計數,但估計加埋坐艇嗰啲,都係打個和。

經紀張身在市場,自己又識的「幫莊」(即莊家的外圍打手),炒細股炒上炒落,都係打個和,可見炒細股唔係眼睇咁易賺錢,所以你地「聽人講」炒細股賺幾多幾多,一定要過濾,好多散戶賺錢時大大聲認叻請埋親戚朋友食飯,輸錢暗啞底無人知,所以你聽到人炒細股搵到水,信住一半先啦。

我同經紀張講,你炒細股最大的問題,就係希望買中一隻股,賺10倍,甚至100倍,買1萬,賠100萬,帶住呢個發達夢去漫遊股海,過程好開心,但結局可能好痛楚,經紀張勝在買得細,所以輸時亦輸得唔多。正如馬會宣傳今期六合彩頭獎6000萬一樣,結果埋單搵最多錢個嗰係馬會,的確有人中6000萬頭獎,但輸o既夾埋多過6000萬好多。

我有一個搭順風車理論,細價股有如一架「夢想號巴士」,佢個牌寫o既總站通常都好吸引,專引細路仔上車,掛個牌去迪士尼樂園、去海洋公園、去睇金魚之類,總之呢期興玩乜嘢佢就話帶你去玩乜嘢,引到一大班小朋友開心上車,甚至見到小朋友傻得緊要,連終點站去邊都唔駛講,搵個大聲公吹水話「總之係好玩」,就滾到大班「好天真好傻」的小朋友上車(天真同傻就係細路仔的特微嘛)。

你睇潮流興礦業,就有一大堆礦業股,興木材就有好多木材股,再講早啲有賭業股,IT股,網股。當然100件「朱義盛」假貨中,也有一兩件係珠珍,真係可以把生意由細做到大,不過多數人無咁幸運揀中真嘢,甚至真係真貨,但只值1萬元的珍珠鏈用5萬元賣俾你,你買中真貨一樣中招。當然最勁者就連概念都無,齋炒起個價來引你,但股民好天真,以眼見為真,見到成交價就信到十足,飛身撲入。

網友siusiudd話,「我知有好多師奶買細價股,貪細價股平,唔係隻股估值平,而係佢買股票的成本平,呢個真係一個好大o既認知錯誤,但你要解釋俾佢哋聽時,佢地仲要當你''發嗡瘋''。」Siuiudd講得好啱,細路仔上咗o架巴士玩得好高興之時,你要拉佢落車,你係爸爸媽媽佢都要同你死過,有理說不清。

但我話呢架夢想號巴士,最終到總站係要將全班細路拐走去賣。所以我同經紀張講,上唔上車,要考慮自己的定力,一般人定力唔夠,一玩個心就失哂控,唔識落車,就唔上車好過。但你自問定力夠,就當搭順風車,每架車搭一兩個站,幾開心都要落車,明知係賊車,就唔好想搭到尾去迪士尼樂園,我話如果100架車有1架去到迪士尼,你博唔博呀?定係搭一兩個站玩吓就算?玩細價股只能跟一程走一轉,嚴守止蝕,走咗見到人發達,要恭喜佢,祝佢好運坐到去迪士尼呀。

陸羽仁

TOP


炒細股(3) (2008/2/22)


美股又插,皆因油庫存高令人擔經濟會跌衰退,加上一個製造業報告的數字差過預期,令道指大跌142點,跌番落12284點,日股早段亦跌200幾點,看來港股亦要再受壓。

延續細價股的話題,早兩日網友鳯陽花鼓問起,炒細價股會炒到幾時炒完,其實我真係唔識答,可以炒番一頭半個月,可以炒兩日就炒完,完全係好隨意,你買細價股只能自己執生。

你可能追問點解咁隨意呢?或者我可以咁樣去分析。股市內有幾十個莊家,有大有細,佢地幾時做嘢,除咗佢地自己知之外,其他人好難預先知,但通常(記住只是通常,唔係一定)一年都會炒番一轉大大地,炒完派貨搵番的使費,唔係人地今年邊有錢開銷。

個別細股會有自己的炒作計劃,通常係一些剛賣盤的新鮮貨,新老闆要炒番一轉,就比較大動作,又改名,又轉行,搞完炒到好高,總之動作多多。但市場上更多是一大堆半生不死的舊炒股,佢地通常都炒完高位派哂貨,跌到一個地底泥價錢,有些還在一轉、兩轉地供股收貨,也有一些已收夠貨,貨源已歸番邊,等候時機當無事再炒過。

炒細價股的時機,不能太差,也不能太好。股市氣氛太差,炒高都無人夠膽跟,炒來都無用。股市氣氛太好,巨股升得太勁,佢地啲窩輪幾十巴仙咁升,亦無散戶有興趣炒細股,去年8月後就係咁o既環境,傳出港股直通車的消息後,紅色巨股炒個不亦樂乎,亦無人有興趣炒細股,所以去年下半年細股完全無得炒。以如今的市況論,略嫌氣氛太差,不過是否無得炒,就要莊家自己先至知,佢地掃高股價後,好易睇到有無人跟,如果炒極都唔係有好多街外散戶跟,就知道氣候未到,炒來也無用。如何判斷市況,如何估計散戶的熱情,莊家自有睇市的專業知識。

前兩日由宏通暴升帶動細價股炒一炒的氣氛,情況可能係咁,又用夢想號巴士的例子來解釋一下,過去幾十架夢想號巴士都泊埋一邊,因為市面淡靜,細路仔都唔多一個,所以開巴士來都無用,不過突然有架巴士開車,仲大大聲叫細路上車,又唔知點解忽然湧出一班細路來搭車,其他巴士見人地咁好生意,心諗其實市況唔係想像咁差,於是亦唔執輸,也開架車試吓。

你問呢次架車幾時停,我答唔到你,除咗架架巴士都屬唔同公司有唔同開車手法之外,也要睇大圍氣氛如何,假如巴士打幾個圈都上唔到一兩個客,大圍氣氛好弱,巴士司機會覺得開車都無用,咁好快就會停車,唔係玩得好耐。

呢件事情相當吊詭,你以為關鍵時巴士司機點諗,想問佢幾時想停車,其實主角係你自己及一眾細路,停車與開車,主要睇細路多唔多,主要睇細路夠唔夠傻。你要有心理準備,若細路唔夠,每分鐘都可能會停車。

假設架車無停,你下一個問題係架巴士會開幾耐先至拐細路去賣?我亦都話同細路多少及大圍氣氛有關。市場靜的時候,開幾個站接到三幾個細路都收工啦,送去劏咗就算,就好似05、06年時,細股炒高幾成,就已經派貨派唔切,唔會炒得太顛去得太盡,司機怕開得太遠,好多細路叻到玩完就落車,去到尾站得番小貓三兩隻,佢就殺埋細路都唔夠找油錢條數;但去年頭炒到顛時,細價股炒高10倍、8倍亦比比皆是。點解去年頭炒得咁勁,因為大市開始熱度高,細價股就搶先炒,正如有架夢想號巴士愈開上客愈多,唔止吸引到本地細路,亦有好多大陸細路過關來香港搭車,而且大陸細路更大膽,有得玩遠一遠都跟你去,死都唔落車,架夢想號巴士自然有咁遠開咁遠,盡量殺多啲客仔啦。

  你睇得呢啲夢想號巴士多,你會好化,太陽之下無新事,但天真的小朋友卻源源不絕,一批被人拐走,又有另一批湧出來,都幾妙。坐幾個站識落車的細路,其實唔係咁多,否則呢啲夢想號巴士就唔會開到成行成市,而家高通脹,成本咁高,若然無辦法拐走大量細路,你估佢又會唔會開車俾你白玩呢?
陸羽仁

TOP


導遊 (2008/2/25)


講開細價股炒作,網友們就講到股評人作為導遊領隊的問題,阿Sam的評論都幾值得深思。


Sam話,「我又舉一個例,引用陸sir(夢想號巴士),分析員可作為導遊領隊,帶領小朋友上巴士遊玩.在眾多的導遊領隊中,總有一些好的導遊領隊能帶小朋友到總站迪士尼樂園、海洋公園遊玩.問題就是出在這裡.小朋友是天真的,咁好玩必引來另一大群好傻的小朋友上真正的夢想號巴士總站遊覽.既然總站已到達,理應勸他們下車,無謂再冒超高風險,帶他們上月球,火星.結果月球火星就去唔到. 一大群小朋友就送到維修廠房,眼光光看著巴士維修,進退不得。」

Sam呢個例子係講碧桂園(2007),講導遊之前不妨講吓隻股票,碧桂園上市時只有06年業績,純利15.2億元人民幣(下同),若果這間公司未來維持一個溫利增長的業績,即使以20倍市盈率計,市值也只值300億,但碧桂園去年9月股價高峰期時市值超過2000億,製造了一個神話。

碧桂園在去年9月公布中期業績,把公司的股價推上高峰,碧桂園07年上半年實現銷售收入60.3億元,較去年同期增長48%﹔純利達14.2億元,同比大漲164.3%,淨利潤率為23.6%。內地傳媒將碧桂園和大陸地產股王萬科比較,去年上半年同期萬科銷售收入為110.1億元,較06年增長66.4%﹔純利為16.7億元,同比增長31.3%,淨利潤率約為15.2%。從銷售收入計,萬科仍比碧桂園大得多,但去年上半年萬科只比碧桂園賺多2.5億,顯示碧桂園的利錢深很多。

碧桂園公布的07年上半年業績,已近06年全年盈利,令人相信其07年全年盈利將比上年倍增,股價一路急抽,當時有內地傳媒這樣形容,「截至94收盤,碧桂園的市值約為2094億元,萬科的總市值約為2237億元。碧桂園在上市僅4個多月后,與行業標桿企業的差距進一步縮小了。」

我們看碧桂園這樣在四線縣城賣平價樓的公司,股價竟然追得上大陸龍頭地產公司萬科,覺得很不合理,但碧桂園當時既銷概念,又有炒供求的味道,它賣的營運概念是「低價快速銷售」,和萬科這種成熟地產公司的運作模式很不一樣,而碧桂園公布出巨額的中期盈利,令人相信這是大陸地產業高增長的模式。再者,碧桂園上市後,貨源比較集中,要炒起亦相當容易。

但你睇碧桂園股價,在9月21日創了14.18元後,已開始回軟,到10月底股市高峰,佢都上唔番高峰,最高上到11月1日的13.32元,都破唔到高位。

如果講「導遊」的問題,見到隻股有得炒,叫人炒吓,本來無所謂,亦好難話到站就叫你落車,架夢想號巴士到咗海洋公園,都可能再去迪士尼,如果在很開心時叫人落車,佢繼續好開心咁開下去,聽咗你建議落車的細路可能會罵你。但到架巴士司機變臉後,你就真係要提醒啲細路要執生。論股價走勢,碧桂園在11月初後急回,弱勢已成,要斬。其次大陸對地產宏調,特別針對搶了好多土儲的地產公司,碧桂園首當其衝,導遊見到唔對路,都要話一話俾班搭車的細路聽。陸羽仁記得在去年底叫人唔好掂大陸地產股,後來這批股反彈(碧桂園彈番上10元樓上),我仲俾人鬧,覺得我唱衰佢地,但我當時諗,見到有危機,好醜都要提醒一下。

陸羽仁

TOP


債保曙光 (2008/2/26)


  美股昨日出現本月以來最大的反彈,道指急升189點,升上12570點的水平,升幅1.5%,主要受評級公司標準普爾宣布維持最大債券保險公司MBIA Inc AAA評級。消息令 MBIA Inc股價大升20%,亦令一眾金融股急抽。 MBIA Inc及第二大債保公司Ambac Financial Group Inc合共擔保1.2萬億美元的債券,若兩大債保公司被大降評級,佢地擔保的債券大跌價,美國金融隨時陷入融化性的崩潰,如今MBIA Inc保住評級,金融界就有抖一啖大氣的感覺,雖然未到脫險,但都可以鬆一鬆。


  MBIA Inc要保住評級,背後當然做咗大量工夫,大家應該記得,早前我寫的「巴菲特盛宴」,就係講股神巴菲特提出要出資50億美元,吃掉債保公司最安全的市政府債券生意,而股神對和次按有關的CDO債券保險業務卻無興趣,當時股神已經話有一間債保公司拒絕他的建議,現在看來,請股神食檸檬的好可能就是MBIA Inc,因為佢自己如今提出一個類似的重組建議。
MBIA提出一籃子的方案,包括停止派息,並決定在未來六個月不再擔保那些備受質疑的資產扺押證券,又計劃在未來五年內將這些有問題的業務和穩健的市政府債券業務分離,MBIA的行政總裁Jay Brown又話,他對早前已公布的帳目有些問題,暗示資產的貼現價值估得過低。佢又話他們正在盡全力恢復公司的穩定,但估計未來一段日子仍會波動。

MBIA這一輪搞作,事先自然和評級機構標準普爾有緊密溝通,所以標普亦宣布不再檢討MBIAAAA評級,但維持它在「負面觀察」,「不再檢討」意味著短期內標普無意降低 MBIA的評級,「維持負面觀察」意味著將來若再有檢討,郁動評級都是向下而非向上。標普又話第二大債保商Ambac Financial正在研究集資,所以會俾多點時間它避免降級。

兩大債保商仍未脫險,但獲得寶貴的抖氣機會,作出部署避免降級。有金融猛人對陸羽仁講,英國都將北石銀行國有化,但美國卻任由債保公司危機坐大,按理早早應該由國家負擔債保公司條數,就可以防止危機擴大,但執政共和黨內有核心人物極反對企業失敗由政府填數,所以政府遲遲不想行動,才拖出現在的危機,希望債保公司的集資自救及自我拆骨行動,可以重建市場信心。

美股大升,日股早段反應溫和,只升50幾點,升幅0.4%,但大家唔好忘記,日股昨日升了400幾點,所以今日唔升太多亦唔奇。港股昨日人升佢唔升,十分樣衰,其中一個原因是受大陸股市大跌影響,A股怕企業大集資,昨日大跌4%,但管理層出口術反對企業集資集得太狼,上海A股今日早段反彈2%。外圍氣氛改善,照計港股都會彈一彈。

陸羽仁

TOP


導遊(2) (2008/2/27)


美國的消費者信心指數跌至五年低位,兼有信心危機,令美股早段下跌,但IBM公布150億美元的巨型回購股份計劃,顯示佢覺得自己股價跌得過份,消息刺了美股,加上商品價格高企有利商品股,道指收市升了114點,升幅0,9%,升至12684點,美股仍在反彈情緒中,朝向13000點的目標進發,港股近期跟不上美股,到底係大陸股唔掂拖住,還是想壓住令期指低啲結算,睇埋呢兩日就知。

美元又跌,兌歐元跌到1.5的歷史低位,兌日圓是107.2日圓,日圓上升料會壓住日股表現。

近期港股力水唔太夠,搞到大家無心機,好好地討論問題也可以擦出火花,證明大家心情唔好,但市靜也正好是大家溫吓功課的時候,早前講到股評人是股海的「導遊」,網友們批評有些「導遊」不負責任,陸羽仁也可以講講做「導遊」的經驗與困難。

  網友yy太提到以前買東寧輸清光,陸羽仁口痕痕話可惜當年唔識得大家,否則可以令大家輸少啲。就以東寧做一個例子,你當年問我,我要答你亦唔易,假設你在東寧剛起步炒時問我,我對隻股了解不深,多數會答你「隻股有炒味,若買入要嚴守止蝕」,這是我對炒股的標準答案,我唔會叫人唔買,阻人發達的事我唔會做,亦唔想做;你一般咁問我細價股炒唔炒得過,我會答「你無經驗少掂為妙,否則好易輸清」;但當你拿一個冧巴來問我時,我就會答「若買入要嚴守止蝕」這是個標準答案,否則若我叫你唔買,隻股可以由2仙升到2元,升100倍都得,若我叫你唔好買,我會怪足我一兩年(第三年隻股多數散咗啦),俾你鬧兩年都無癮啦。

  但你在細股炒到好高好顛狂時問我,特別你問我好唔好沽,我又會俾另一個答案,我會話「錢賺唔哂o既,唔沽哂都沽一半,收番啲本先啦。」當日東寧不及明珠興業炒得咁喪,記得明珠炒到最高時,成交量高過匯豐(0005),那時匯豐通常是最大成交的股份,我有一陣子見到明珠成交大過匯豐,每日成交有4、5億元時,我記得自己睇住個大利是機同班老友講,明珠搞到成交大過匯豐,搞到咁離譜,又睇吓佢幾時爆煲,結果在半年內就玩完。有個老友本來揸重貨,仲覺得佢咁大成交證明好掂,但聽完我講驚起上來,沽咗三分一,就執番身彩,輸少當贏。

  一隻炒股每日有4、5億成交,當然有90%以上成交係人工造出來,係幕後人左手交右手的交易,佢地將成交造到咁大,無非想人相信,隻股炒到咁高物有所值,不過將一隻炒股作到咁大,就好似一個雜技表演員將十個橙不斷拋上半空,不斷拋不斷接,拋三個橙容易,拋十個橙自然玩唔得耐,遲早玩完。

  我見到佢拋緊十個橙時,被人問起自然有信心叫你沽少少唔怕,我叫你沽一半攞番啲本,再升又沽吓,咁答法最穩陣,因為佢幾時死我講唔清,或者仲有半年玩,而且雞股死亡之前,住住炒到好顛,幾日再抽高一倍都得,引人落搭,殺埋最後一浸,若我今日叫你沽清,後日佢升咗一倍,你嗰種難過心情,不言而喻,忍唔住開口問候我兩句亦唔奇,我俾人問候就無癮啦。所以我好少公開叫人一股沽清,要清貨只能是自己的抉擇,關埋門對老友講話或者會坦白啲。所以如果時光倒流,大家又有緣網上相見,我知yy 太揸了東寧,若炒得顛時起碼會建議佢沽番一半,或許沽得太早,總之會有錢落袋。若果佢係高位摸頂揸,一見佢開始急跌,我一定會叫佢止蝕唔好手軟,過去無論大股細,大如中石油,細如利記,一見急回,我會叫大家立即斬,至少有番啲渣。

股海導遊唔易做,股市壯旺時,夢想號巴士一架架係咁開,傻仔一批批湧出來,當然有導遊食咗人家茶禮,專滾細路上車,但即使導遊係真心誠意,佢自己都未必睇得咁準,分得清好車與賊車,即使睇得準,細路仔又未必咁聽話呢!

我在跌市時講這些癈話,唔係想大家同情股海導遊的困難,而係想大家有一個立體思維,將來股市再炒起,炒到狂熱時,知所進退,這些話在跌市時可以講,在大升市時才講,大家就好難聽得入耳了。

陸羽仁

TOP


派水與股市 (2008/2/28)


  在預算案公布前,和幾個中環茶友傾起,今年預算案大派錢,個市會否因為預算案而狂炒?大家都覺得會炒吓,未至於狂,不能期望有太持續性的影響,即係話炒完一兩日地產股後,即使後市續升,主要都唔係因為預算案而炒;若股市要跌,預算案都托唔住。
網友白穗禮問:「陸羽仁話: "至於股市,不知從那年開始,愈來愈國際化,受預算案的影響較少,不能期望有太持續影響。"影響較少已經升6百幾點, 咁以前(maybe 十幾年前)公佈預算案前咪升得好勁?

白穗禮講得啱,那些年代每年炒兩鑊重要政策文件,一個係財爺的預算案,一個係督爺施政報告,預算案和經濟關係大啲,可炒性亦高,施政報告多數和大政策有關,可以影響一個大行業的盛衰,所以會炒一些行業概念。但炒友主要的著眼點都係睇住樓市。

遠的不說,即使在九十年代,預算案對股市都好重要。當時的大股如匯豐,主要活動仍在香港(雖然已開始投資英國),香港經濟好,匯豐就升,左右大市。另外一大板塊是地產股,地產股本身佔恒指比重已大,加上匯豐和恒生等銀行股生意亦和樓市有很大相關,地產好,股市搶先炒起,地產唔好,股市亦帶頭回落。預算案通常會講到經濟前景,提到土地供應,甚至直接涉及樓市的評述,大家就猜度這些評述的微言大義,估計對樓市利好利淡,然後決定點樣炒。

記得樓價在90年代初升得太顛,政府在93年推出七成按揭等打擊炒樓措施,樓市回一回,但督爺肥彭後來年年大派錢大減稅,經濟好,市民收入多,政府又派水,自然利好樓市,結果樓市在95年又炒過。

如果講到最經典的影響樓市政策,莫過於97年董伯伯第一份施政報告,提出大量增加土地供應的八萬五措施,記得當年9月施政報告公布後,大家都唔信八萬五有效,唔知驚照炒,到10月開始爆金融風暴,才漸漸聞到燶味。

今日預算案對股市的影響今非昔比,不是話股市唔會因為預算案升跌,而係話本地經濟對股市影響較少。如果十幾年前出一個昨天那樣大派400幾億的預算案,股市可以因此炒番一兩個月,升一兩成都可以,因為大派錢利好本地經濟,已經可以成為今年的炒作主題。但如今港股無論恒指的成份或炒作的資金,已十分國際化,大股如匯豐,只有三分一業務在香港,香港好佢普通好;而一系列紅色股,更和本地經濟全無關係,所以預算案好而國企指數升600幾點,按道理有點無厘頭,只是借勢炒作。所以預算案利好本地經濟,對股市的刺激唔係咁廣泛。

港股淡咗一排,預算案是事先張揚的好消息,借勢炒一炒唔出奇,但好難靠預算案長期炒。但不要誤會我話港股一定衰,又唔係咁講,而家港股主要睇外圍,美股仍在反彈中,大陸股市亦跌唔少隨時可以彈,若外圍好,港股亦可以跟彈,但同本地經濟關係唔太大。

陸羽仁

TOP

發新話題
©2001-2009 3Talks.com, All Rights Reserved. 免責聲明及版權聲明

重要聲明:本討論區是以即時上載留言的方式運作,3Talks.com對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,用戶不應信賴內容,並應自行判斷內容之真實性。於有關情形下,用戶應尋求專業意見(如涉及私人、買賣、醫療、法律或投資等問題)。由於討論區是受到「即時留言」運作方式所規限,故不能完全監察所有即時留言,若讀者發現有留言出現問題,請聯絡我們。3Talks.com有權刪除任何留言及拒絕任何人士留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。