美股昨晚又玩過山車，道指早段在消費數據理想、美元向上，油價回落５美元等消息刺激後，一度升過１８５點，跟住就反覆向下去，下午一度回落到近上日收市位，尾市彈番起少少，道指收市升５７點，收報１２１４１點，升幅０．５％，美股仍處於一個不穩定的尋底階段，而油價後來亦在尼日利亞油田工潮聲中，反彈上去，５美元的跌幅消失無踪，升回原型。
美國退稅支票５月送出，５月零售銷售數字比市場預期多，令到沃爾瑪等消費股上升。摩根士根利發表報告叫人吸納金融股，亦令一眾同行受惠，股價連跌５日後反彈。

美國官員出咗一輪口術，油價仍處於１３６美元，大上大落，仍在高位掙扎向上，但美元已露出一定的強勢，反彈到一個小浪的臨界點，我有個師奶朋友早前買了和日圓掛鈎的ELI（外匯掛鈎票據），行使價１０３日圓，票據年息１０厘，３個月收２．５厘息，下月到期，佢問我點睇日圓，我祝佢好運。我話下月日圓匯價維持在現價１０７．９圓一的都唔奇，弱過１０７．９圓的機會，可能比強的機會大。若以１０７．９圓計，佢要輸４．６％匯價，賺咗２．５厘「息」都補唔番，我計一輪數，師奶朋友好似唔係好明，只係反覆問我好唔好揸日圓收息，佢好似以為揸日圓長期有１０厘息收，搞唔清楚嗰的只係ELI的「利息」，其實那些「利息」，只係佢沽咗一個三個月在１０３價位的認沽期權收取的期權金。

講番日圓，現價１０７．９圓，美元兌日圓已經升番到一個臨界位，若升破此位，就會走番今年１至２月的１０５至１０８圓的密集區頂部，照計美元升到密集區，應該在此區位上落吓，無咁快升穿，但如果咁厲害一次過升穿此密集區，預計會觸發較大量的日圓好倉盤止蝕，就會去番去年８至１０月的交易區域，那時日圓是在１０７至１１７圓之間炒作。

美元兌歐元和日圓一樣，同樣去到一個轉弱的臨界位，現價１．５４，按理應在這些位置上落消化，但同樣道埋，若美元一舉升穿此位，將會去番去年１１月到今年２月的交易區間１．４５至１．５。歐元講緊加息，預計兌美元會比日圓硬少少。

美元兌其他高息貨幣的走勢近似，以紐元為例，由於紐國央行話經濟弱可能要減息，紐幣走勢更弱，現價０．７４９９，若跌穿此位，小心去番舊年１０月前大位０．７２以下。

美元在加息的預期下，有可能進一步反彈，進入一個幾個月的中期趨勢。美元兌各主要貨貨都升近臨界點，不爆發還可，一爆會再衝出一浪行情，外匯投資者或炒家，最好定位止蝕。未到位可以守吓，一到位就要打靶。

你可能會問，點解美元兌主要貨幣已轉強，但推唔低油價，到底兩者有無關係？網友望升石亦問：「前兩日, 美財長保爾森公開講話, 油價高企係由供求導致, 並非投機炒賣所致。點解佢要咁講呢? 上星期唔係話要徹查炒賣行為架咩?仲以為咁樣d油會炒得無咁勁, 點知回咗五蚊之後彈返十蚊。」

雖然好多人話係中國印度的需求令油價大升，但多方數字也顯示全球石油供應大致平衡，油價急升的底因是美元轉弱，以美元計價交易的商品就大幅上升來彌補，慢慢就引發全球商品炒風，所以油價大升，和美元下滑絕對有關。對此美國財長保爾森心知肚明，但佢從來都無承認美國過去一年行緊弱美元政策，唔認美國透過減息隊低美元匯價來救自己，所以在佢口中油價上升有一百個理由，總之唔關美元弱事。佢查唔到有對沖基金炒油，咪唔講炒賣導致油價升，又講番供求，總之呢啲政客o既說詞，你信一成都嫌多啦。

唔好信政客講乜，要睇政客做乜，保爾森見油價急升令美股大瀉有災味，第一時間講不排除干預美元匯價，又叫聯儲局班人出來吹話會加息，就係想挺美元遏油價上升。但原油相對於日圓、歐元，更加強勢，所以更難跌，跌完又急彈，再跌又再急彈，相信要確認美元真正衝破臨界點，進入更明顯的反彈週期時，油價才會回落。若然美元反彈力度不夠，衝不破兌各主要貨幣的臨界點，就更加約束不到油價。在未來一個月，油價、匯價、股價，仍然會大動蕩。美股掂唔掂，關鍵都係要看保爾森的功夫，睇佢導演呢幕美元反攻，成唔成功。

廣告時段：頭條老總來電，請陸羽仁代為宣傳一下，星島新聞集團製作了四川地震悼念集，發起慈善義賣。為籌得更多善款，更獲藝人方力申、成龍、李克勤、容祖兒、陳奕迅和黎明於悼念集上親筆簽名作慈善拍賣，歡迎網友於6月12日至16日期間出價競投。網址係http://www.hkheadline.com/special/ebid/index.asp

陸羽仁

　　八大國的G８峰會，上周末在日本大板召開，會後聲明把矛頭指向商品價格，指油價、糧價上升帶來通脹，是環球經濟增長的「頂頭風」，不過會議無提及美元匯價問題，到底這個八國聲明，又是否美國期望的結果？

八國集團由過去關注次按導致的信貸緊縮，改為關注通脹，的確是一個大轉向，這個轉向有兩個意義，一是次按危機開始消退，二是通脹危機正在升溫。正如我在頭條日報專欄引述前聯儲局主席格林斯潘所講，美國利息相對於倫敦銀行同業拆息的差價，正在下跌，意味風險溢價在下降中，雖然不能說美國金融業已經脫險，卻是離脫險不遠。

　　但通脹危機在升溫，油價在６月６日炒上１３９．１２美元一桶的高位，高升的油價和糧價，正大幅侵蝕消費者的購買力，越南是全球第一個國家因此引爆金融風暴，八大國把集點轉到通脹之上，也是一個合理對焦。

　　問題是八大國對高油價沒有提出什麼解決方法，只是沿傳統的口徑，叫產油國增產，和叫用油國、特別是新興國家減少用油。產油國不見得會大力增產，如今只有和美國關係良好的沙地表態話會增產；至於減少用油，八大國叫新興國家減少燃油補貼，亞洲多國最近被逼減少補貼加油價，立刻惹來大量示威，政治不穩，她們大加油價的空間亦十分有限。

　　為何八大國不直接指出美元匯價下跌是油價和商品價格急升的原因？因為美國反對。美元自２００２年起至今，跌了３０％，部份國家認定美元下跌係油價上升的元兇，法國財長Christine Lagarde 及俄羅斯財長Alexei Kudrin 話投資者買入原油和糧食，作為弱美元的對沖，但美國財長保爾森否認這種說法，佢話油價的升幅，遠超了美元的跌幅。意大利財長Giulio Tremonti更認為油價急升有炒作因素，但保爾森和英國財相Darling 就堅持油價上升是供需因素所致，因為新興國家有大量需求，推升油價。你睇只有美國忠實盟友英國認同保爾森的講法，就知道美國的說法有多大說服力了。既然八大國無法就油價急升源於弱美元達成共識，自然無統一立場支持強美元了。

　　這正好達到美國的目標，目前還用不著八大國聲明捍衛美元咁大動作，保爾森在會期間唱吓「強美元」論調，已得到深受通脹困擾的法國財長Christine Lagarde 及俄羅斯財長Alexei Kudrin等人支持，這樣雖然不如八國聯合聲明咁有力，但也達到一定的效果。在八國開會前，匯市期望八國聲明支持強美元，所以美元一直向上，結果並非如此，但保爾森和法俄財長支持強美元的論調，已有一定效果，今早亞洲市美元匯價無大變，兌歐元略回到１．５３９，兌日圓還企在１０８．３８的高位，黃金每安士８７２美元，亦無變動。

　　美國不會一招去盡，一定會慢慢玩，美元弱，利息低，有利美國復甦，但美元太弱令油價升得太快，亦對美國不利，所以到咁上下減定息之後，就唱吓將來會加息，唱到美元強番少少，抑制油價升幅，咁樣就對美國最有利，減息期可以延得幾耐得幾耐，佢自己的通脹並不高，至於其他國家捱高脹，佢就唔理得你咁多了。

陸羽仁

昨日上演一幕油價驚魂，原油在美國市早段受美元及北海油田火警影響供應等消息刺激下，一度升上１３９．８９美元一桶，創了歷史新高，但後段受到沙地將會增產的消息打壓，油價又調頭急落，去番１３４．２６美元，原油期權明天到期結算，或是油價大波動的原因之一，但無論如何，油價在高位掙扎，似現疲態。

　　美股則個別發展，美國第四大證券行雷曼兄弟公布的壞消息唔係太壞，第二季虧損２８億美元，每股唔見５．１４美元，但已在市場預期之內，雷曼股價昨升１．３９美元，升到２７．２美元，連帶快將在本週公布業績的一眾證券股都升。但紐約生產數據差過預期，令市場擔心經濟下滑影響企業盈利，部份大股如通用電器下跌，結果道指跌３８點，跌０．３％，跌到１２２６９點，但標普５００指數就微升０．１１點。

　　網友均兒早兩日留言講到財務自由及她買股的感嘆，值得討論一吓。佢咁講：「陸SIR：見到GIGI問//其實點先算係有財務自由?我一直有疑惑,錢要多到可以唔洗做（才叫財務自由）?//」

　　「均兒我同樣有類似疑問：我想問股市到底有多少價值？如果想投資，係唔係只能在股市才能找到有價值的投資？如果想財務自由，係唔係在股市可以快啲能夠達到財務自由?????」

　　「我最近頻頻奔波，這反而令我開濶視線，令自己反思下，成日瞓身股市係唔係值得，到底股市可以令什麼人賺到錢？？？在這BLOG裡的朋友不妨多想想！我覺得股市是個大大古惑，成日騙唔識的散戶入甕。也令很多人不知不覺得了股市效應症，股市跌時，脾氣狂懆，我覺得我就係得了這種病。」

　　「講個故仔，我有個鄉里，以前住我隔壁單位，因為我們住的居屋係有一條大走廊，因此關係好熟。他做地盤工，以前常聽到他兩公婆為寄錢返鄉下而鬥嘴，男方要寄錢返鄉下，女方也要寄，男方寄幾多，女方也要寄幾多，女方常埋怨男方唔顧家，將辛苦身水身汗賺來的錢寄返鄉下。而家我們又同住一新屋邨，親眼見他們做地盤工做出頭，他這個連簽名都唔識簽，只會畫隻龜的地盤工，這兩年搞了間建築工程公司，依家工人成百人，剛拿到兩單五百幾萬的工程。夜晚出去消費萬幾、二萬元好平常，前晚吃燒烤埋單一萬四仟元，去大陸橫琴消費，一人一個十五，六歲脆卜卜女仔陪枱。佢話如果唔咁樣消費，亦都拿唔到工程來做，消費也可消出頭。你們想得到嗎？依家我都想打佢工咯！想泊個好碼頭，金錢萬歲!錢比體面有價值!　另一個人亦同係鄉里，開咗間清潔公司，買部清潔車幫地盤清潔流動廁所，每月賺錢沒人知，我用掃錢來形容，可能沒人信。佢可一次過買五、六佰萬的樓，二百幾萬部奔馳，呵！」

　　「睇這來陸SIR BLOG玩的人，個個都是高學歷高職位人士，但股市俾你們多少成功？？？世界之大，巴菲特只有一個，要學巴菲特那樣成功，要先交幾多學費？？？大家不妨再深入考慮下，哪裡才能找到價值？股市？做生意？什麼樣的人生才有價值。」

   　均兒後來留言再講「我而家就開始明白了，股市舊年來個十年一遇大升市，跟住來個十年一遇大股災，跟住再捱十年價值股票，跟住再見到股票捱到返家鄉了，急急沽咗出去，再眼光光睇住捱咗十年的股票大升，自己無份，重複又重複，重複又重複。唧唧復唧唧,木蘭當戶織，不聞機杼聲，唯聞女歎息，問女何所思，問女何所憶。」

陸羽仁睇完均兒這個留言，感慨良多，慨嘆股市的確是難玩之地，散戶唔易贏到錢。或者都係從財務自由講起，要財務自由，起碼要退休後生活無休，唔好講得太複雜，但起碼要幾百萬少不了，最好仲有持續穩定投資賺錢的能力，否則幾百萬你明日都可能會輸哂。

要有財務自由，第一要識儲蓄，儲蓄才有本金，有本金才可以做生意，才可以投資，你餐搵餐食餐餐清，碌爆咭使突哂，根本無儲蓄，好難投資，永無自由。順帶講句，無儲蓄的人因為本金太少，拿僅有的錢去炒股，愈少錢愈傾向去賭，因為太少錢慢慢投資都無用，不如博一舖，但咁賭法又係多多都唔夠輸。

好啦，你儲到本金，準備投資，到底做生意好定係買樓買股好，我好難答到你，均兒見到兩個鄉里搞生意賺大錢，我都見到好多做生意成功的人，但失敗者更多，做生意要成功，通常由自己做嗰行熟嗰行開始，打開工，摸清門路，慢慢才出來自己搞生意，成功機會較大。你貿貿然搵一行唔熟的生意去做，亦好易輸清。我有個醫生朋友，有一天去茶餐廳食嘢，覺得人地做得好差，忽發奇想，自己搞一間茶餐廳，結果在深水埗租咗間大舖，花２００萬去裝修同買架生，搞一間高檔茶餐廳，開業後生意奇淡，喺嗰區根本只適合做低成本、好低檔的茶餐廳，佢嗰間茶餐廳搞到咁高檔，根本無客（佢係醫生當然鐘意高檔嘢，佢就係俾自己的偏見矇蔽咗），做咗三個月維唔到皮，炒咗啲伙記，仲要自己落去看檔，結果做咗大半年就頂唔順執埋，２００萬唔夠一年就輸清。

所以識得做生意，當然係做生意好，做得成功時，仲可以將公司上市，印「公仔紙」（股票）俾人買，當然好過買人地啲公仔紙啦。

不過唔係人人識搞生意，唔做生意，想投資唯有買股、買樓，均兒對股市毫無好感，但我覺得佢的病因都幾簡單，幾典型，散戶在高位買股，坐艇幾年，到家鄉就沽，跌就有份，升就無份，如此這般出出入入，我恐怕佢睇唔到一個最基本的因素，就係到底點樣分辦股票的價值呢？睇唔到股票的價值，睇唔到５年、１０年係啲股票值幾多錢，人買我買，通常就係最熱時最貴時買，咁就好易接火棒了。




陸羽仁

　　美股三日來首次下跌，道指開市早段上升，美國第一大證券行高盛公布第２季業績，純利２１億美元，比去年同期跌７％，高盛業績不俗本來令人憧憬美國金融業最壞的情況已過，但高盛自己出報告唱衰同行，估計銀行業要再集資６５０億美元新資本去彌補虧損，加上房屋銷售和工業生產都差過預期，道指結果跌１０８點，跌０．９％，跌到１２１６０點。

　　昨日講做生意，惹起大家講述很多不同的例子，這些活生生的例子，就是最好的教訓。

網友BB講的是第一個典型，叫做「靠人實PK」。BB咁話：「看陸 sir 這個 blog , 真是好好, 可看到不同的觀點. 令自己可想多方面的思考, 我以前都開過間菜館. 為什麼會開?
因為當時剛離婚, 心情不好, 想藉著做些事, 去忘記過去. 結果. 找了一個做開潮州菜的朋友, 拍檔, 佢管飲食方面. 我管財務, 應沒問題, 問佢有沒有把握自己做, 佢拍心口,講就天下無敵, 我朋友以前打工, 個人都幾好, 盡責, 才找佢做拍檔,我佔八成. 佢佔二成. 但, 第一天開張, 佢己升了做老闆, 佢就話, 原來做老闆咁過癮, 我聽完都 知什麼事, 人會變,月會圓, 真是對的, 佢己沒心機打理生意, 每天遲來早走, 回去就是駡伙記,水鬼升城隍, 個個都憎佢, 每天都是請人, 生意又不好, 那時候想起, 不熟不做, 靠人的生意不要做, 唉, 結果. 做了一年, 關門大吉, 虧了百多萬,結論是, 做生意,不熟不做, 靠人自己不懂不做, 小股不要做, 否則,做大了給人食理, 跟風的生意不要做, 總之,. 做生意就似買股票, 要做功課, 自己可承受多少風險和資金才可做。」

BB因為一個和做生意無關的理由開始做生意，挑了一個自己無特長的行業去做，結果唯有靠人，我話做生意要靠人實PK，力不到不為財，做生意要出好大的努力，要比打工大１０倍的努力，事事親力親為，再加上超凡的EQ，才會做得好。

好多人想做生意的第一個念頭係打工打到悶，覺得人工加得唔多，朝九晚七好呆，老闆好契弟，所以渴望做老闆，過吓指人做嘢的日子，可以唔定時返工，佢地唔知道好多老闆表面風光，佢最痛苦o既事就係要定期出糧俾一大班夥記，而做夥記最開o既事係無論生意好壞都定期有糧出。你一做咗老闆，無錯係好自由，但即刻無咗穩定收入，仲好可能要貼錢，而且好快就會發覺，唔止夥記，連拍檔都指佢唔郁，重要o既事唯有自己做哂，所有事情要跟到尾。而且人地放假Happy，好多老闆放假仲要開工，無得靠人做。

　　網友小潘講的是另一個典型，叫做「拍檔跣鑊甘」，小潘話：「我有不少朋友，成日都大想頭，自己搞檔野出來，唔想打工，以為做生意實發，誰知眼見朋友做完一間摺一間，以家都打返工算啦。我阿爸舊時都係大陸開酒樓，高峰期都有近百員工，十分風光，可惜佢拍檔原來係大奸狗，呃晒佢錢之餘，仲要欠下一身屁股債。」

　　「有了這些前車，我而家開始搞生意都會十分小心，先從網測試市場反應，唔得都唔駛入肉。而且做生意真係要慢慢黎，唔可以一步登天。其實，我覺得好多人搞生意既人都係過份自信，成日認為人地做得唔好，自己搞一定好過人。點知，好多人都如陸sir呢位茶餐廳朋友，落得閉門大吉下場。搞生意同買股票一樣都應該有謙卑之心。」

小潘爸爸呢個故事，十分普遍，我有個老友的爸爸，和人一齊做生意，佢拍檔話為了方便開支票，叫老友爸爸簽定一本支票薄，點知呢個拍檔非常好賭，輸光就用老友爸爸預先簽好的支票簿，開票提走哂公司啲錢，公司應該找o既數就開空頭支票去頂，最後仲逃之夭夭，老友爸爸因而孭上成身債，好彩生意仲OK，結果都要還幾年才還清呢條債。

　最後想講一個典型係「識講唔識做」，彈人好容易，自己做好難，而家潮流興「彈人文化」，個個人都變專家，乜都嗡得兩咀，左彈右彈，彈政府無能，彈商家無良，彈老闆無料，入到餐廳彈食物唔好，行出街彈條路唔平，落大雨彈條街水浸．．．．．．．（下刪５００字），彈得人多，唔知點解，自我形象會提升，就會覺得自己好叻，所以就諗到自己做生意，開服裝店、花店、開餐廳，都好似係創業的捷徑。問題係人開你又開，啲客個個好似你咁俺尖，點解佢要來幫襯你，以大學Marketing101課程的口吻問你，你盤生意有乜unique selling point（獨特賣點）呀？換句話講，你盤生意o既價值係邊度呀？

好多人都係識講唔識做，呢個毛病有兩個層次，以餐廳為例，第一個層次係根本唔識大批量地做出高水平的食物，第二個層次係不懂經營，根本唔知做餐廳賺錢之道，唔懂控制成本，可能食物水平OK，但點做都賺唔到錢。

即使你在以上兩大問題都側側身過到關，做嘢有專業水準，識得控制成本，還要面對競爭，你開一間四川勁辣菜館做得唔好時，人人睇住你笑，但如果你做得好，生意好，街頭和街尾就馬上開多兩間川菜館來頂你，想創業的人前仆後繼，有橋即抄，而且佢地新創業唔怕蝕，價錢平你兩成，你又頂唔頂得順呢？

網友epearl講得好啱，佢話根據統計，95%的生意都是賠錢的，只有5%繼續生存。你要創業，就要諗自己有無呢５％成功者的條件，其中最關鍵係超凡的努力和EQ。我自己好喜歡創業，滿腦子好多不現實的創業思維，所以講咁多負面嘢絕對唔係想嚇到你地唔敢創業，但的確不是人人都適合搞生意，若你不是創業材料，但你明白搞生意之難後，就明白老闆有幾大壓力，明白佢點解咁變態，你諒解佢多啲，自己打工都會成功啲。

陸羽仁

  　美股繼續插，FedEx和摩根士丹利的業績唔理想，令美股蒙上陰影，道指大跌１３１點，跌幅１．１％，跌到１２０２９點，係三個月以來的低位。

　　美國第二大證券行大摩就無同行高盛咁掂，大摩持續經營業務盈利跌到１０．３億美元，即每股０．９５美仙，比去年同期盈利２３．６億美元，或每股２．２４美元，每股盈利大跌５７．５％，美國證券行好似只有高盛一間繼續搵到大錢，其他都幾傷。

　　美股呢個星期五期指結算，做咗淡倉的大戶繼續插，又加挺油價，唔過埋今個星期，美股難望好景，呢個星期港股亦自生自滅啦。投資者最好望佢插深啲，插深啲有平貨可執。

　　昨日講到創業，不少網友都有佢地創業的辛酸史，如YY太、松花蛋、草帽小子等， 係無創過業的後來者最好的借鏡，例如松花蛋咁講：「陸SIR話創業的努力要比打工多10倍，EQ要超高。我自己就深有體會，原來係大公司打工，做到透明天花板（GLASS CEILING），再上一級可能要等10年，即係話未來10年的事業已經睇得到，好無癮。所以心思思想創業，諗住係番自己熟個行，又有熟悉的客戶支援，自己盤生意會好順利。」

「但實情係：出咗嚟至知會面對很多困難，係打工時無想過的。個D熟悉的客戶只會喺你仲係大公司時會幫你（亦都係幫他自己），要喺呢D時候先至知道邊個係真心幫你的朋友，同埋瞭解到任何事情都只可以靠自己，唔可以靠人地。創業的初期，事事要親力親為，最怕無生意，到有生意就怕資金唔夠，到生意做成又怕收唔到錢；一單生意做完又驚朝不保夕，唔知明天仲有無？總之壓力大得不得了，EQ少D都唔掂。」

「過了幾年，生意穩定了，信心大了，再回頭睇睇，就覺得打工時遇到D問題實在唔算做問題。抱住呢種心態再黎買股票，就覺得易好多，贏唔到大戶，都起碼贏咗大部分的散戶。」

松花蛋這個故事可以告訴在大公司打工者，他們出來創業，唔好以為啲客一定會跟你走，人在大公司做到某個位，就有權力，權大的人，有人會來巴結你，奉承你，話你叻，但你走出去創業，又是另一回事，因為之前有的權力，只是 Position power（職位權力），你一離開咗個位，呢啲權就無啦，係你無權時，就好容易睇到乜嘢係酒肉朋友，乜嘢係真正朋友，呢個世界真正朋友的數量通常都比較少。

但我今日想講o既係創過業的人去買股票，按道理又會好啲，這又去到一個根本問題，你買一隻股票長線投資，等如做佢長期股東，你一定要識睇佢盤生意掂唔掂，呢個才是一間公司真正價值所在，一切數字都只係幫你睇這盤生意，但你不能只睇數字，不睇生意本身。

　　香港網友都去過大家樂食快餐，但我問你大家樂的股票買唔買得過，又係另一個問題。無做過生意o既人可能睇吓PE，睇吓近期股價走勢，甚至睇吓報紙雜誌推介，就馬上決定下注。做過生意的人，會睇多好多嘢，首先睇吓佢生意好唔好，即使生意好，又好唔好得過舊年呢，好唔過舊年，盈利好難增長噃。再睇吓同行的競爭，究竟係多咗定少咗，如果同行愈開愈多，亦會分薄生意。

　　睇完生意又睇吓成本，人工、舖租加幾多呢？失業率跌通脹高，人工好難唔加；舖頭租金又加幾多？呢個時局，租約一到租金又狂升。還有食品成本又加，米又貴，肉又貴，菜又貴，睇吓佢個餐牌，的確係加咗價，但加價頂到食材的直接成本，又頂唔頂到舖租呢？

　　做過生意的人，腦海裏面好易睇到一盤生意的收入和成本兩大項，腦袋轉一吓，就有一個感覺，到底呢盤生意係好做咗，還是難做咗。數字雖然唔係好準，但那個感覺好重要，有些公司的業績到某一個時候就到頂，善於分析其生意的人士開始睇淡，暗暗沽貨，但業績表面睇仲好好，於是就出現PE回落的現象，通常好公司的PE開始回落（撇除大市的因素），就可能係公司盈利見頂回落的時候。

無做過生意的人，對上市公司的生意難有感覺。對生意無感覺，就好難判斷公司的價值。做生意捱過苦的人，應有這種能力。

後記：祝各位創業朋友可以捱到出頭天，打出一盤穩定的生意。

陸羽仁

   　中國昨天晚上宣布加油價，汽油加１６．７％，柴油加１８．１％，航油加２５．２％，同時調高電費，凍結發電用煤價格。消息震動油市，油價急跌近５美元一桶，今早報１３１．７７美元。

　　美股亦受惠，雖然生產數據不理想，但持續申領失業救濟人數下跌，加上油價急挫，令運輸股和消費股回升，美股回穩，三日來首次反彈，道指收市升３４點，升０．３％，升至１２０６３點樓上，估計明天美國期指結算，美股都係壓在約１２０００點上下的水位。

　　中國一加油價，世界都震動，皆因她已是美國之後，全球第二大用油國，據經濟發展合作組織的數字，估計３０個已發展國家今年平均每日用油４８７１萬桶，下跌２４萬桶，但這個數字不包括中國這些發展中國家。單計中國估計今年每日用油８０２萬桶，上升４４萬桶。印度、馬來西亞、印尼和台灣等有油價補貼的國家近期先後加油價。早前召開的八國會議都有要求中國加油價，相信剛結朿的中美經濟對話亦有討論到這個問題。沙地阿拉伯國王阿卜道拉號召石油出口國和用油國在本月２２日開會商討高油價的問題，中國在會前先加油價，也算是對美國及沙地國王的一個禮物。

陸羽仁在約一個月前已經講過，由於國際油價急升，但內地控制零售油價不加價，鍊油的國企愈蝕愈多，所以計劃加成品油的油價，同時補貼農村及運輸用油，結果真係咁做。國家發展和改革委員會昨晚宣佈，自今天起將汽油每噸提高１０００元人民幣（下同），由零售平均價５９８０元，加到６９８０元，升幅１６．７％，柴油也是每噸加價１０００元，升幅１８．１％，航空煤油價格每噸提高１５００元，等如加價２５．２％。

阿爺加油價的同時，亦嚴防對居民生活的影響，控制加價連鎖反應，採取以下多項配套措施：(一)對種糧農民、漁業、林業實行財政補貼。其中，對種糧農民在今年已增加的農資綜合直接補貼的基礎上，每畝再增加5元補貼；(二)對城市公交、農村道路客運實行財政補貼，運輸價格不提高；(三)從7月份起，城市低收入人口每人每月增加補助15元，農村增加10元；(四)增加對計程車財政補貼，並不允許加價；(五)鐵路客運價格不作調整。

　　近期煤價急升，而電價又唔准加，令五大發電企業經營困難，今年1至5月份，華能、大唐、國電、華電、中電投等中央五大發電集團公司中，除華能集團略有盈利外，其餘四個集團公司都出現了嚴重虧損，發電企業虧損面達到80%以上，部分發電企業出現資金周轉困難、難以維持簡單再生産的局面，令供應愈來愈緊張。發改委決定，自7月1日起，將全國銷售電價平均每千瓦時提高2.5分錢。液化氣、天然氣價格不加，對城鄉居民用電和農業、化肥生産用電價格不作調整，四川、陝西、甘肅三省受地震災害影響嚴重的電價格也不作調整。

　　發改委還指出，目前煤炭價格水平較高，爲防止煤、電價格輪番上漲，自即日起至2008年12月31日，對全國發電用煤實施臨時價格干預措施。在臨時價格干預期間，全國煤炭生産企業供發電用煤的出礦價，不得超過2008年6月19日實際結算價格。

內地呢次加油價、加電價、凍結發電用煤價，對中石油和中石化等有下遊業務的公司有利，對華能、大唐等電廠有利，對煤股不利，對航空股、鐵路股不利。

高人話，今次只是內地第一次有油價，加電價，還可能有第二次或更多，所以對上述的股份的影響未完，受累的股份，可能有多於一浪的衝擊，買入要小心。

例如航空股，花旗就發表研究報告，指內地航空業前景嚴峻，分別下調國航(00753)及南航(01055)目標價，國航目標價由4.2元下調至3.4元，南航則由3.45元降至3.2元，並維持賣出評級。不過，該行卻維持東航(00670)持有評級及目標價3.8元。如果怕一買就跌，就要先忍手，等內地加多啲油價才出手，當然你唔怕短期跌價，又作別論。

陸羽仁

呢個週末有啲新聞幾過癮，中國證監會主席尚福林星期日都開黨委會議，除咗講咗一輪八古之外，仲話中國股市要嚴防謠言，到底有乜謠言令尚主席緊張到星期日都開會聲討？端的是耐人尋味。

產油國和用油國在沙地開大會，產油國、用油國同埋油公司都坐在一起，可能「三缺一」的只係油市的炒家，會議的結論係要加強石油期貨市場的透明度，要揭開石油炒家底牌咁話，八大國的代表話下次召開八國會議後，還要再開產油國和用油國的大會。

產油國和用油國之間本有重大分歧，最大用油國美國由於不同意油價高升是弱美元所致，聲言完全由於供求失衡，所以認為阻止油價再升的方法，一是如中國印度等新興用油大國減少補貼抬高油價壓抑需求，一是產油國增產。

不過石油出口國組織的主席Chakib Khelil會後就話，高油價皆因炒作、地緣政治（主要指有關伊朗問題的中東局勢）以及弱美元，而不是供應不足，他更指沙地阿拉伯增產的舉動「不合邏輯」。

但國際油價又的確因為沙地的「不合邏輯」舉動而回調，世界最大的石油出口國沙地在會後承諾下月開始每日再增產２０萬桶石油，並表示如有需要可以再加，她在早前已答應增產３０萬桶一日，如今是第二次增產，這個消息加上尼日利亞的叛軍建議暫時停止襲擊外國油管和油輪，令８月期油最多跌０．８％，跌至１３４．３１美元，今早在新加坡油市，做１３４．９美元，仍比上周五的１３５．３６美元回落，當日油價升了２．７６美元，升了２．１％。

油市對沙地增產而非大會建議增強期油市場透明度有反應，就知那個建議沒有大用。美國和石油輸出國組織對油價上升的成因有這樣大的分歧，表面上看開這些會難有成果，但這些會議是國際施壓的場所，若無美國同意甚至主催，這些大會好難開得成，我估美國的用意是借這些大會不斷施壓，要石油出口國增產，要中國和印度等新興用油國加油價，若加上美國自己估計美國停止加息後美元慢慢會轉強，幾種力量加起來，希望能令油價慢慢回落。

美國暫時指唔掂油組，但她指得掂最大石油生產國沙地，所以即使沙地唔想，也要乖乖聽令增產。其實無論美元幾弱，無論新興國家用油有增長，只要石油輸出國同意不斷增產，油價都好難炒得起。不過從石油出口國的角度，而家泵一桶油，成本和５年前唔差好遠，但當時賣２０美元一桶，而家賣１３４美元，有咁著數o既事，自然想佢繼續，點會自己增產隊低油價。

　　美國玩施壓，暫時未見有重大效果，但牛仔總統和以色列似似地想對伊朗動武，中東戰爭理論上可以令油價大升，但處於咁高位的油價如果再升，升到１５０美元，甚至２００美元，個泡沫大得咁緊要，又的確好難唔爆。如今油價真係好似大炸彈一樣，既造成全球高通脹，佢o既爆破又會幾恐怖。

　　美股週五跌２２０點，日股今日早段跌２５０點，跌幅１．８％，大陸A股開市初段跌幅也接近，股市真有點風高浪急的味道，炒作要特別小心。

陸羽仁

美股唔上唔落，金融股在銀行收益低於預期影響下，紛紛下跌到５年低位，但油價上升令油股向上，道指微跌０．３３點，跌到１１８４２點，反映科技股的納指跌２０點，跌幅０．９％。

看到網友平凡人講起「深圳人的臉真的很胖！！！」引用來大家研究吓，佢話：「我在深圳坐出租車的時候，喜歡與司機聊天。其實，我到任何城市都喜歡跟出租車司機聊天，因爲，他們可以給我關於這個城市的一些信息。我常問司機：爲何深圳的馬路上那麽多貴價的車？（我的潛台詞是，這１０多年來，其實深圳的經濟已經走下坡路，江時代政策傾斜上海，浙江，江蘇，２００７年 ，“好像”蘇州的GDP已經超越深圳）。胡溫時代，重點是在天津，唉．．．．．看來廣東都沒運行阿，更何況深圳這個沒有爹娘認的兒子。難聽點說，現在有點降級到野種。出租車司機答：『深圳人的臉都是胖的。』」

「這幾天深圳的溫度到達34－35度。簡直是熱浪逼人。晚上的室内也起碼有30－31度。因此，今晚我就又做一個調查。（就如2005年晚上我多次從羅湖坐出租車到南山經深南大道，就是深圳從東到西的交通大動脈之一，原途所見的樓盤，只有30%的亮燈率。因此我跟深圳的人說，深圳樓盤必垮，因爲是炒出來的）。我在深圳住的樓盤位于南山，高峰期15000－18000/平方米。現在是8000－9000/平方米。」

「樓盤内基本是有電梯的8層小矮樓。8層以上是複式層。樓盤内的車：基本上每家每戶是1－2部車。因此，小區内車位非常緊張，先到先霸位那種情况。

車類：100万左右的10%，40万左右的20%，20万左右的45%，10万左右的5%。

哇！！！如果在香港簡直是豪宅區啊！！！可是，室内30-31度的天氣，在陽台看看各家各戶開窗率，竟然達到85%以上。我的媽呀！難道他們都是從非洲或中東創業賺錢回來的嗎？不怕熱嗎？」

　　陸羽仁看完平凡人的觀察，雖然不能確定深圳人不開冷氣是否一定是為了省點電費，但買靚車擺擺闊也是人之常情。我到一個地方也喜歡向出租車司機探探行情，上海的司機告訴我，過年時上海一個普通人過年封２００、３００塊錢一封的「利是」十分平常，因為上海人愛門面，聽到這句話，的確令我這個封２０元利是的香港人感到汗顏。我唔希望令人覺得我有藉貫歧視，香港也有打腫面孔充胖子的人，但愈多人暴發的地方，充得也愈厲害（香港慘在好令難令人暴發了）。

大陸高檔消費減縮的情況，在香港也感受得到。例如大陸旅客的消費就沒有過去那樣闊，有一隻名錶過去從來唔夠買，錶行想攞貨都攞唔到，但最近就谷貨到錶行去，顯示佢o既限量版名錶由唔夠賣變有貨剩。豪宅市場也呆呆地，仲有大陸客睇樓，但已經唔係見貨就掃咁o既場面。上海的一級百貨店銷售亦有下滑跡象，同店銷售減少。大陸的高檔消費的確在放緩中。

加油價後，好多內地汽車公司都話無影響，部份車廠話自己的銷售對象係高收入階層。單是加油價，的確不似會對汽車銷售有大影響，問題是大陸高檔消費在放緩中，早前四川地震後中央又話政府要嚴控開支撥款救災，主要控制公家買車，有了這些不利因素後，再來一個加油價，對車廠就係雪上加霜了。大陸高檔消費放緩，和宏調令股市、樓市下挫有好大關係，股、樓齊鳴時，步步高升時，炒樓炒股者身家水漲船高，即使只是帳面財富，也感覺良好，消費心情大佳，自然見嘢就買，獎勵吓自己和身邊人。如今大陸股市從高位跌了五成幾，豪宅隨時也跌了一半，闊客身家唔見一大截，有錢都無心機買嘢。

我話睇公司價值，關鍵睇佢o既盈利能力，如今大陸高檔消費有放緩跡象，勢將影響有關行業的盈利，睇住績PE的作用唔大，要從新估算公司盈利，估計公司在新形勢力盈利會跌多少，跌一年跌定未，可唔可以跌一年之後又重上升軌，以新的PE來計算股價的合理值，散戶未必識計這條數，但每當證券行重估公司盈利，調低公司評級，又或者公司發盈警時，公司股價都會有一輪滑落，反彈吓掙扎吓，然後再跌至低位發吓呆，要買最好等佢跌定，反彈埋，再到發呆時才慢慢買，才會買到平貨。

陸羽仁

　　美國消費信心由５月的５８．１，急跌至６月的５０．４，低於市場預期，而４月２０個城市的樓價比去年同期跌１５．３％，是有紀錄以來的最多。美股受到消費信心數字影響，加上UPS話急升的燃料價格會影響盈利，美股早段急跌，後來反彈，道指收報１１８０７點，跌３４點，跌０．３％，跌到３個月以來的收市低位。

　　八號風球股市唔開，可以講吓股票價值。好多朋友話，散戶唔識睇股票，甚至股市的真正價值，平情而論，對一般散戶來說，這個問題的確唔易解決，股神巴菲特提供了一套方法，就係計算公司的內在價值，若果公司現價比內在價值有好大折讓時，為之抵買，可以入市，愈跌愈買。

　　至於內在價值點計，就係未來公司可以經營無限咁長時間的現金流的貼現值，無讀過財務的朋友，好難去計，不過原理大約係咁，一間公司今年估佢賺１億，估佢下年賺１．２億，再下一年賺１，５億，餘此類推，一路估下去，然之後把這個估值總和加上複利收益，再變成貼現值，變的方法是用無風險的利率去把未來盈利總和打折扣，例如美國長債利率係５厘，這就是無風險利率，就用５厘去複式打折，就可以計出貼現到今天的價值，這就是公司的內在價值。

　　未讀過財務的網友，可能睇唔明所謂內在價值點計，我舉一個例子，巴菲特年青時派報紙賺到一筆小錢，後來用呢筆小錢買了一部舊波子機，佢就利用波子機賺錢，巴菲特發現波子機店有一個理髮師沙琪幫人理髮，後來他去沙琪自己的理髮店，發覺店內並無波子機，少年股神靈機一觸，同沙琪講，我把波子機放在你的店內，分兩成收入俾你，沙琪同意，巴菲特的寄生波子機生意就開業了，佢在第一天經營就發現，這部只用３５美元買回來的舊波子機，竟然一天可以賺１０美元，分完２美元俾理髮師沙琪後，佢仲有８美元落袋，真係好生意！

　　假設你看見巴菲特這個絕妙的波子機生意，想把它買走，你估巴菲特會點樣開價，佢會計波子機生意一天賺８美元，一年開足３６５日，一年賺２９２０美元，波子機雖舊，估計仲可以玩１０年，１０年合共賺２９２００美元，但你可以把賺來的錢投資到無風險的債券，年息８％（巴菲特年青的年代比較高息），１０年後盈利加利息共有４４５１６美元。如果這是波子機生意未來的總收益，１０年未來值４４５１６美元，１０年期，利率８％，用計數機都可以計到貼現值是２０６１９美元。這就是波子機生意的內在價值，你用這個價錢向巴菲特收購，就是合理價錢。（見Mary Buffett 及David Clark合著的《Buffettology》）當然，巴菲特自己買嘢時，要市價低於內在價值，即係話若果巴菲特倒過來要買這個波子機生意，就要顯著低於２０６１９美元，巴菲特才會買。

　　睇完呢個微型生意的例子，你會明白一些原則：

　　第一，    巴菲特計算公司內在價值的關鍵，係公司未來的賺錢能力，佢要估公司未來的經營期可以賺幾多錢，當中自然有啲假設，波子機生意就簡單，真實的大公司會幾複雜，例如要假設公司合併重組後，生意可以擴大幾多，盈利可以增長幾多，在初階段盈利每年增幅多少，業務成熟後又增加多少。你唔識計數，都要明白佢的基本概念，睇住公司未來的盈利。

　　第二，    這種推算有靠估成份，靠估自然會估錯。推算要做假設，基本的假設有經濟增長率，通脹率，利率，具體的假設有公司的盈利成長率等。以波子機生意為例，會唔會有競爭對手出現，令生意減少呢？又可唔可以用同一模式擴展生意，買多幾部波子機開檔呢？

　　第三，    估唔到咁足，就要靠個信字，所以巴菲特好睇公司管理層，要有能力，唔欺騙股東，佢才會有信心。

　　簡單地講，要計一盤生意的價值，殊不容易，但證券行的分析報告，基本上就係做緊公司來來盈利的估計，不過散戶好似唔係好信大行的報告，背後又有乜原因呢？

陸羽仁

美國聯儲局決定維持利率不變，美股靠穩，美國燃油庫存上升，油價回落。先講聯儲局的決定，聯儲局的公布話影響經濟增長的風險已經減退（risks to economic growth have diminished），亦關注通脹風險，但無任何指示幾時會加息。

聯儲局唔加息的決定並非完全一致，聯儲局公開市場委員會成員、達拉斯儲備銀行的代表投票支持加息，最終儲局決定唔加。儲局聲明無指向何時加息，令市場判斷８月儲局會議決定加息的機會減退，美國利率期貨的走勢顯示，在聯儲局會前，有４８％的市場人士認為８月會加息，但會後已跌到３３％，表示加息的預期減退。

聯儲局的消息對股市利好，因為一則儲局否定了衰退風險，衰退與否是影響股市的主因，另外儲局亦無加息指向，因為加息對投資市場不利，無加息指向等如利好。美股早段表現唔錯，美市下午一度升過約１００點，但尾市調頭回落，主要是高盛的報告大幅調低波音公司的盈利預測，搞到波音股價大跌６．９％，拖低美股。結果道指收報１１８１１點，升４點，升幅０．１％，但標普５００指數好少少，收１３２１點，升０．６％。

美國議息結果對匯市的影響中性，美元匯價無大變動，在亞洲市美元兌日圓造１０７．９圓，歐元兌美元造１．５６６７，黃金一安士８８５美元。原油上升皆因美國上周庫存比預期高，油市擔心高油價影響消費，８月期油在亞洲市造１３４．４３美元昨日在美國市大跌２．４５美元，跌至１３４．５５美元，跌幅１．８％。

昨天講到散戶唔識計數，又無公司詳細消息，好難做具體計出公司的價值評估，跟住提及參考證券行的報告的問題。你唔好睇少證券行報告的威力，好似高盛昨日在美國出報告話波音唔掂，話高油價和經濟衰弱都對波音有影響，將之由「中性」降為「沽售」，並放到確信沽售名單中，波音股價一日跌了６．９％，是２００２年以來最大跌幅，亦帶動了道指急回。一份報告，就有牽動大市的威力。

其實要合理評斷一隻股份的內在價值，仲相對容易，但判定買賣股票的時機，卻遠為困難。一間公司的股價遠低於內在價值時，唔等如佢馬上會升。反之，你判定一隻股份的股價遠高於內在值，亦唔等如會跌。市場如失控的小狗，永遠唔會同主人同步前行，佢唔係發顛咁向前跑，就係呆咗咁墮後。

股神巴菲特研究一輪，吼啱一隻股票，認為佢o既市價遠低於合理的內在價值時，入市買之，唔等如隻股會馬上升。巴菲特就話過，佢試過買入股票短期表現唔理想，拖累組合表現，基金客戶又天天打來問，簡直想躱在枱底唔出來。當然，當年股神名氣無咁大，買完間公司唔會因為佢入股而升，而家佢話入股一間公司，隻股馬上抽高１０％、２０％，咁就容易好多啦。

反之，在股市升到顛時，你話股價超過合理價，沽之，沽完唔係馬上會跌，可能升好多才跌，你睇股神大約在１０元左右沽中石油（００８５７），隻股最高仲升到２０．２５元，升多咗１倍，而家跌番落來仲有１０．４４元。

去年股市升穿３００００點時，大型指數股唔算太離譜，非成份股的紅色股升得仲顛，但當日好多證券行無出聲，只是不斷調高目標價，但調高後的目標價可能仲比市價低幾成，都無乜經紀行叫人沽貨，道理很簡單，證券行唔係唔識計數，甚至出的報告都有把條數計埋俾你，但佢唔敢作出沽貨結論，怕一叫完你沽，股市再大升，佢媽都俾人媽死。

仲加多一樣，股市３００００點，上市、批股、併購的活動好多，大證券行就係做這些生意，梗係唔會倒自己米，若出報告叫人沽貨，又點樣做生意推新股上市呢？

散戶唔係幾信證券行的報告，多數唔係話佢唔識計數，係話佢有證券行的動機，升到顛時唔會叫人沽，跌時才出報告加一腳。我o既建議好簡單，證券行的報告可以睇，特別係對公司的盈利預測，通常有參考價值，但係睇到佢地o既建議，話沽或者話買，就要自己過濾吓囉。

陸羽仁