發新話題
打印

[轉貼] 陸羽仁 blog (5天更新)(更新至8月7日)


風險管理(2)(2007/8/3)


  美股道指又升100點,美元兌日圓重上119圓樓上,雖然次按風波仍然在金融機構蔓延,尚幸未有巨大崩潰出現,中重招的暫時只是玩次按的對沖基金及德國的小型銀行,若次按風受控,港股將有一輪反彈。

  股市之波動,應從昨日如過山車的市況可知,下跌的動力就是我所講的餘震,基金在第一日跌市沽唔切貨,為應付贖回要再吐,基金沽壓抵銷了大市昨日「應有」的反彈,不過亦有好友接貨,除了散戶外,應有大戶落場,似是傳統基金對期指大戶的格局。這種股市風高浪急,股市反彈後,亦要小心再試一試低位,才完成這一浪的調整。

  這種市況買要擇優而買,要買強勢股而非弱勢股,因為要捱得往可能再出現的餘震衝擊,才能守住不用止蝕,膽汁少者亦可多觀望一點時間。

  網友DLPasu提到德發集團(0928),昨日是勁跌股,急跌33%,由前日收市1.5元跌到昨日收市價1元,單日唔見33%。 Pasu的個案值得研究,佢話:「我在1.4-1.6928 賺到幾轉, 最後見佢爆上去, 又在1.66 買一半貨(越高買越少)之後見佢連跌幾日, 我諗係大市跌順便震倉, 基金應付贖回清細價股云云. 因為從佢年報黎睇, 928 發展情勢十分好. 一直都check唔到佢出咩新聞etc, 點知佢真係有事。在1.34我再買一注(陸羽仁估應該是昨日的事), 低見1.18出現支持, NAV1.0x, 以製衣股來說, 真係平爆, 一定係沽過龍, 我再買一注. 之後發覺佢可以跌到落1, d基金真係不計價拋貨. 果時已經係15:49, 我開始再check大利市機既新聞, 唔見! 問個broker check, 佢都唔見, 佢淨係同我講要相信價位(佢係走勢派, 價升買升, 價跌信跌cut loss)! 然後我突然諗到應該search港交所, 發現在accounting issue, 已經係15:55既事了。」

  最後Pasu查到德發的通造,係延遲出年報,因為核數師有保留意見,要研究聯營公司Sino Legend的帳目是否符合香港會計準則,Pasu話「跌到1, 33%, 已經係年幾前既價, 嚴重性有如主席俾人捉去ICAC去查咁大鑊. 就當佢冇收購mudd業務齋做製衣, 1蚊都唔會貴(不計出問題的MUDD聯營業務, 經常性業務及GROSS PROFIT也有個位數字進步). 核數師保留意見, 唔代表做假數, 根據公告, 聯營公司數是已根據US GAAP審核了的.

  陸羽仁對德發業務唔多了解,但按昨天德發的通告睇,德發聯營公司Sino Legend的帳目已按美國會計準則經過審核,但德發的核數師要從Sino Legend的美國核數師取得資料,才能確定這個公司的帳目是否符合香港會計準則。

  德發事件睇落好離奇,如果只按德發通造咁講,Sino Legend的帳目已通過美國核數師審核,只是兩地會計標準的問題,按理不會出大件事。不過整件事離奇在於德發早前已公布至07年3月的全年業績,為何核數師不是在全年核數時已發覺問題,要等到做年報才知呢?其次講到「核數師有保留意見」咁大件事,但源於一個技術問題,似乎唔係幾合邏輯,而且如果只是很易解決的技術小事,公司應可叫核數師將就一下,就算要表示延發年數,亦唔使咁快講清楚核數師可能有保留意見,只表示等待子公司核數師提供資料,應可暫時過關,要搞到講核數師可能有保留意見,一係講唔掂核數師,一係講唔掂港交所,所以才要出通告露底。

  更大問題是德發昨晚8點22分才發通告,但隻股昨日已經跌到阿媽都唔認得,究竟邊個咁叻得風氣之先,識得事先沽貨,港交所和證監會應該查一查。德發在今年2月和4月供批了1.8億股,批股價1.09元,當時接貨者見唔對路,自然會急急沽貨止蝕。整件事的發生可能是倒過來的,德發帳目不能過核數師,但消息漏了出街,戲院失火人人爭住沽,到跌了33%,港交所自然會打電話問公司有無任何需要披露的股價敏感資料,這樣才把通告逼出來。

  講番Pasu個案,之前買無得講,昨日見股份無端端急跌,查唔到有通告,不但無止蝕,仲撲入去買,在1.34元和1.18元買了兩注,才是最大敗筆。在股份價格不明原因急跌時,除非你睇清楚門路,否則唔好假設自己叻過沽家,你話「NAV1.0x, 以製衣股來說, 真係平爆, 一定係沽過龍」,基於這種分析加注,其實人人有貨在手,見到隻股跌時,第一個反應係唔想接受現實,唔想認自己錯,想話係市場錯,咁就叫做俾情緒控制理智。

自己揸住隻股暴跌,第一個反應該先止蝕,唔斬哂斬一半,控制虧損,留番半條人命再睇,佢升番上去最好,最後可能補得到,唔使輸,咁樣俾人打一鑊,唔輸已經偷笑,唔好望贏。最唔好彩沽完再跌,沽咗一半,就輸少一半。退一萬步講,你真係想買,都唔好係情況不明下買,要買等第二日睇完通告才買,假設公司出了事,第二天可能停牌,甚至永久停賽,邊個知?急跌時即日去撈,風險大過賭大細,因為你係同強過你的對手對賭,人地知嘢你唔知,咁賭唔係幾公平。

事到如今,Pasu最好見股份反彈酌情減磅,起碼先把昨日追的貨打靶,才謀後計吧。這個個案其他股民也可借鏡,股份不明原因急跌時,有貨在手,應止蝕而不是追貨,嚴守紀律,絕不溝淡,才是炒股長線生存之道。

陸羽仁

TOP


中線投資 (2007/8/6)


  美股大跌280點,日圓今早又見117.4的高位,來一個雙鬼拍門,港股自然要捱插,如果一插插穿22000點,收市都比上次跌市低很多,這一浪就低過上一浪,市底仍弱,好友無力。反而如果急插後能反彈,收市收在上次低位之上,有壞消息都唔係跌咁多,就顯示大市可能已消化壞消息,渡過短期的低位。

  在這種預期的跌市中,好多人的問題係「沽唔沽」,我認為若入貨價不貴,又未觸及止蝕位者,不用心急出貨,散戶太密出出入入,走在大市之後,好多時買股得個做字,網友阿K便是一個例子。

  亞K咁話:「陸sir,
我估你可以用我的例子,作為散户”食粒糖”的教材.我看完Charlie網誌的"短炒成本高",我真的有很大感觸,不吐不快.原來自己為證券行打工.


「我從9/06開始買賣股票,到今個月為止,交易了70個交易. 06年的0604深圳控股開始,2.82買入,2.9賣出,中石化4.73,4.77,152深圳國際,0.470.55. 工行IPO,在3.54加注,3.58賣出. 222閩信集團, 炒了幾次賺幾毫子,2.6賣出.07,17新世界發展,17.74,18.48,308中旅 ,炒左11,4,54毫仔波幅,902華能6.5,6.71,168青島啤12.5,12.68,694首都機場 ,7.39,7.49.358江銅,9元入,9.24,1898中煤能源,7.6,7.76.1133哈動9.16,9.42, 103首長寶佳0.72,0.73, 116同生生,6.35,6.49, 2088西王糖,3.95,4元出,190香港建設,1.47,1.54.仲有其他,賺的差價多小小,粒糖大小小的,唔打啦.

  「我得出一些總結:

1.
新手開始時選股OK,06年尾,07年頭仍炒H,於是我買H,反而近3個月,開始識小小,扮代表,學人去睇業績,買唔熱炒股,之後走去捉大户動向,買雞股,2,3,好在賺的2cover到輸3,不過6372000,又令我負數.


2.
上半年做緊”密食當3番”


3.
有些交易,股票行賺的錢仲多過我,我而家都唔明,點解當時扣手續費,有百幾元賺都賣.我估可能是以為自己入貨價貴,賺左先算,想游水,再低小小買番,點知買唔番, 唔知股票的真正價值


4.
如果,我求其留番幾隻,我現在的利潤應至小有2,.


5.
原來自己為證券行打工.


  陸羽仁睇完阿K的經驗,又印證我一個睇法,股民學買股,人人的問題都不同,不能一概而論。有人太過狼,所以要教佢認識「貪婪」兩字之害(借到盡炒股就有此問題);有人太細膽,就要教佢「恐懼」同樣有害(阿K或者有咁問題);最慘是有些新入場的散戶,同時有「貪婪」和「恐懼」,平時「贏粒糖」就走,到一些可能令他輸大錢的環境,卻受市場氣氛影響,唔想止蝕,唔識得走,結果就輸間廠。

  阿K還要留意一個背景,這是一個大牛市,佢話如果佢無咁密出入,利潤至少有2倍;換一個角度講,如果唔係咁樣一個大牛市,你咁密出入,結果可能仲要輸錢。

  據阿K自己之總結,佢話可能入貨價貴,可能係想游水,所以才咁密出入。我認為入貨價貴是其中一個關鍵,散戶通常係「跟人買」,特別是騰雞之人,聽人講起某隻股份,初時唔信,要見股票升先信,但隻股隨時短期已到一個小浪頂,例如報紙或雜誌推介一隻股份,即使係好股,但一推介一大批讀者去買,半個交易日可以搶貴哂,只果唔係炒股,搶完過兩日就回吐,你買了見跌幾個巴仙,心裏已經好唔舒服,捱番一兩個月,隻股又開始有番少少升勢,一上番你入貨價樓上,你到岸已經想沽,所以好多時賺少少就想走。如何選擇第一個入市位,都有好深的學問,如果入市位選得好,買股不用捱價,或能改善投資心理,有較大定力長揸。

  另一個唔好的心態是「游水」,或者陸羽仁有時都會講到「游水」,教壞了網友,其實游水只是炒作者所為,稍有投資心態者,都不應去游水,好多時游水而能買番的股,都不是會大升的股票,真正的大升股,可能一游水就游出大西洋,追唔番。真正可以游水者,可能只是一些Range股,它的價位只是在區間波動,你睇個兩年圖好易睇得到,如果是一隻向上股而不是range股,游水往往會失掉好股。

  我覺得阿K首先要改善自己的心理,發掘好股,分段去吸,務求入貨價不貴,要守有得守,然後揸長一點,平均半年以上,不到止蝕位不出貨,試試有無大一點的收穫。

陸羽仁
本帖最近評分記錄

TOP


中線投資(2) (2007/8/7)


  美股道指大反彈286點,又收復番上周五的失地,真係俾佢玩死,唔知港股又可唔可以收復部份昨日的失地呢?不過日股先升後回,無乜力水。

  講話要揀時候,個市升到火紅火綠時,我講買股時要控制風險,你會聽唔入耳,那時最多人講係「唔知邊個炒雞股發咗達」,到而家跌到甘甘地時,講買股控制風險之法,你會比較啱聽。

  昨日阿K提到買股經常賺少少就要走,今日可以再探討這個話題,今日再講講一個「中線投資」的概念。經常有網友問我一些新股好唔好長揸,在23000點時,我的標準答案是「23000點時買的新股難言長揸,總之唔跌穿買入的上市價就揸吓啦,一穿就打靶」。

  這個「標準答案」背後有些假設,第一,這種市道上市的股票,價錢幾貴,就算係好股,都係貴買好股,有一定風險。第二,既然係貴買股票,就要控制風險,若不幸跌下來就要止蝕。若你誤以為好股可以有理無理去長揸,話得「長揸」,股價跌下當然唔會止蝕,仲可能扮哂股神巴菲特咁愈跌愈買,衰起上來,可以非常PK

  買新股又好,普通股票又好,我就非常關心買入的價位,我買股之後,第一樣要知幾時脫離危險期。乜嘢叫「危險期」?就係新買入股票後可能要止蝕的時期。我話一般買股我會守一成止蝕,只有極少數我好清楚佢底細的好股是例外,更加絕少愈跌愈買,我唔係巴菲特,就算買好股,如果開頭定一個數,例如50萬元,假設不幸地買夠貨後即跌,通常諗o既唔係溝淡,而係駛唔駛止蝕,少數例外的好股,買入即跌,會選擇唔郁,唔買唔賣;多數比較普通的股票,若買入後就跌,跌到一成止蝕位時,唔沽哂都會先沽一半,以減風險。

  所以買股之後,最好隻股無幾耐就升番幾個巴仙,升夠10個巴仙最好,遠離止蝕價,就為之脫離危險,到隻股升到10巴仙以上時,就可以把止蝕價推上購入價,如果唔跌到買入價唔使沽,在一般情況下已經幾安全(大跌市例外),咁樣就叫做脫離危險期,雖然未敢話長線,都可以把這隻股份放入中線投資類別,可以睇長少少。當你的組合買蝕本貨止蝕沽掉,把賺錢貨留下來睇長少少,就慢慢可以形成一個純賺錢的組合,不止可以賺番止蝕貨的成本,組合還可以有正回報,並在調整的市道中有抗跌力。

  舉中移動(0941)為例,兩個月前上一個調整浪時,大市跌到20300點左近,中移動跌近70元,我當時話雨天購物,中移動係選擇之一。你話70元的中移動,雖然唔貴,但唔算好平,假設你在71元買入,一成止蝕64元,有一定的安全度,但係又唔敢話絕對安全,有值博率。假設你當時買入,買入之後無跌穿過70元,升到78元之後,就可以用購入價71元為止蝕位,不到不沽,當中移動升穿78元,你這個投資中線有得守,雖然未敢話一定可以揸長線。

  好啦,後來中移動最高升到90幾元,比購入價有三成以上升幅,你陸羽仁又話唔好游水,咁而家又跌番落來,如今86元,應唔應該走呢?

  我就話第一睇你係投資定投機,若是投資,我仍然認為可以用購入價為止蝕位,不到位不用沽。第二,睇你對後市的看法,若是全面睇淡,可以考慮定止賺位,到位酌量減貨,若果對後市仍然睇好,唔到止蝕位唔好走。

  以阿K的例子,就係出入太密,若吼中一隻好股,有一定利潤在手,在跌市中走唔走,的確好考工夫。走,可以鎖定利潤,萬一再跌2000點,都唔關自己事。唔走,可以博大市再上高位,經過調整後,大市可以試更高位,再升2000點亦有之,走咗以後的可能升幅就唔關自己事。

  陸羽仁遇到咁o既環境,若買了好股有一定利潤在手,有排未到止蝕位,會選擇唔走,博一博,但會嚴守止蝕位。作中線投資時,若能捱過一個調整浪,往後風光更好,捱唔捱得過除了睇大市,睇你自己的入市位外,亦要睇你的EQ了。




陸羽仁

TOP


中線投資(3)( 2007/8/8 )


  今次雞股來一次小股災,情況和今年三月的跌市相似,不過今次好多雞股升得更高,跌落嚟更恐怖。昨日大市雖然應升不應,十分樣衰,不過單睇指數都仲唔算好嚇人,但近觀細價股的跌幅,一日跌兩三成等閒事,可謂死得人多,若在早幾日一成止蝕,仲有得走,但等到昨日才沽就有少少人踩人,沽得到都好易唔見20%、30%,我成日話一成止蝕和手揸重倉者要減貨,就係怕這樣的一天。

 在雨天講多兩句跌市的問題。阿K「贏粒糖」的故事,還有一個危險版,不能不和大家講講。不少網友對阿K故事的回應,很有共鳴,不少人都是新股民,都是在這幾年加入股市,工夫未練好,遇上大升市,好多人都贏錢,如今的抱怨只是「贏粒糖」,只是贏得唔夠多,唔係輸大錢,但我也必需敬告各位,花無百日好,每天都要小心大跌市最終到來。新手入市未夠兩三年者,小心贏粒糖最後走唔切,遇上大跌市時輸間廠。

  這幾年的升市,不純粹是03年後本地沙士反彈所導致,光是反彈,彈到05年,彈到19000點破高位已差不多,不會大幅升穿20000點。這幾年的大牛市,真正原因是全球資金氾濫,加上中國經濟崛起及國企私有化所致。資金泛濫,在全球尋找投資機會,中國崛起加上把大量龍頭國企上市,吸引大量外資追逐,造就這個前所未有的升市。

  股市有升就有跌,有大升就有暴跌,升得愈多,跌得愈深,似乎是不變的地深吸力定律。股壇老兵見得多,股場新秀未見過,新手在最後一跌來臨時,未必識得走避。

  你可能會問,最後一跌幾時來?陸羽仁只能話,無人知,可能係今年、明年、後年,咁早無謂估。我並唔係話覺得而家就係大跌市開始,但提醒大家每一天都可能係大跌市的前夕(愈係大升市時愈危)。

  你可能話,既然係咁,如今沽清股票,即使是平價買的好股,亦全面出貨,唔買股咪無風險?係,不過若果你選擇了「唔買」,將來不幸股市跌完再升時,千萬不要那時才買,唔買就要唔買到底,等最後一跌,可能要等幾年,都幾考EQ o架。

  我就話唔駛唔買股票,守紀律買賣,一樣可以控制風險。舉個例,你問今浪係唔係大跌市的開始?我可以話目前暫時未係好似,但如果個市真係跌穿21000點,中線投資固然好多到一成止蝕位,到時要打靶,即使長線投資亦要考慮好將仍有利潤的股票部份止賺,因為21000點的確係今年一月上一浪的浪頂,又成為今浪的起步點,若跌穿起步點,恐怕再要深度尋底,隨時係跌市開始,總之睇住大市走勢做人。

  目前跌吓跌吓,不少中線投資都快到止蝕位,好多網友到位會好猶疑,我就建議大家到止蝕位,都係打靶就算,明天升1000點和跌1000點的機會一樣咁大時,最佳決定是按紀律行事,以免咁唔好彩遇到大跌市走唔切。止完蝕預咗佢會升番,到時睇定再買,又當係一個新買賣了。




陸羽仁

TOP


順風車 (2007/8/9)


  股市大起大落,扣人心絃,本週二一場細價股災,昨日又回升628點,左一巴又一巴,殺完好友再殺淡友。


  股市一抽升,已經回到接近上月期指結算時的起步點,指數股逐步收復失地,不過好多細價股急彈後依然重傷,散戶早前高位買細價股仍然輸入肉。

  這裏想起週二細價股災後我與朋友的一段對話。話說當日收市後,朋友甲打電話來講起細價股災,我和他有此對話。

  陸:今日細價股災情嚴重,聽經紀張講,跌得急時,有些散戶不問價出貨,有些人甚至唔知自乜有幾多貨,唔記得乜位入,都係咁叫經紀張去沽,搞到經紀張一褲都係,幫客查貨都查唔切,真係誇張到極。

朋友甲:你咁講即係話散戶止蝕唔啱?

陸:(見朋友甲咁大反應,難道他昨天也不問價出貨?都係唔好刺激佢啦)唔係,唔係,我只係要搞清楚自己的成本價,如果唔使輸錢不一定要走,但輸錢止蝕永無唔啱,我只不過話散戶通常輸一成錢時唔沽,等到輸好甘時才「焗沽」啫。

朋友甲:你都無答我,咁今日沽貨止蝕啱唔啱啫?

陸:止蝕無錯o既,你唔止蝕點知佢會唔會再跌多一千點啫,但下次記得早啲執行止蝕啦。

朋友甲言語間露出憤憤不平的語氣,當然是被當日的市勢所逼成,面對這種「沽又死唔沽又死」的困局,的確相當無奈。今日再講番這段對話,只係想再提提大家,今次跌浪係一個活生生教材,有幾點經驗都值得大家記取,輸錢就當交學費。

第一,             投資無投機咁好搵,但亦無投機咁高風險,你買大價股唔買細價股,好難短期發大達,但跌落來無咁傷,買大價股如果不是太高追貨,未到止蝕位,隨時守住唔使郁,大市波動過後,可能根本無事發生。但買了雞股,如今可能仍然好傷,唔見咗三、四成等閒事。所以唔好羨慕「阿媽」炒雞股賺錢多,佢地都係搵命博。大市最深調整比高位都只係跌了1500點左右,濕濕碎,若果咁o既小跌都輸到你好傷,小心將來終極一跌時一舖清袋。炒雞股記住雞咁腳,避完風頭,無事又可以行番埋去。

第二,             執行止蝕好重要,若買雞股在下跌之初執行紀律一成止蝕,可以避過週二那一波,還保留資金有機會執平貨。初時無執行止蝕好被動,到大跌之時,出現人踩人的慘況,正正是沽又死唔沽又死,你問我點辦,我亦唔識答,叫你守怕你輸清,但已跌到咁深,叫你沽又怕一沽又彈。

第三,             大戶依然左右大局,港股此跌,表面是由跟美股下跌開始,但跌到咁上下,美股升200幾點可以唔跟,跟住又可以急彈600點,又係大戶玩哂,炒期指的大戶遇上大力沽貨的傳統基金,期指大戶不但無輸錢,仍然操控大局。

  散戶從來唔係做莊,只係閒家,不能硬頸,只能跟炒,大市露出穩定的勢頭,又到擇優吸納的時候,見人地開車時,咪跟風搭吓順風車囉。




陸羽仁

TOP


歐洲風暴 (2007/8/10)


  港股剛開始穩定,又遇上一場歐洲風暴,昨晚美股愈跌愈多,道指收市跌382點,睇怕香港今日又要落一場雨。

  正如早前所講,今次外圍的衝擊比三月那次日圓套息交易拆倉潮大得多,港股暫時都算跌得少了,歐洲昨日的狀況頗具驚嚇性,BNP三個基金出事,搞到要暫停贖回,觸發外資調走和金融機構恐慌,銀行亦唔敢借錢,歐洲央行的目標利率是4厘,銀行拆息急升到4.7厘,搞到歐洲央行要大量注資入銀行體系,拉低利息,歐洲央行的大動作,令市場擔心背後有大鑊,歐洲央行才會如此行事,自然再觸發市場恐慌。

  BNP早前講過,自己的次按風險有限,話口未完,旗下基金就出問題,令人覺得金融機構的披露並不可靠,所以唯有用腳投票,調走資金,相信歐洲央行一係睇到大規模走資潮,一係睇到銀行大恐慌,或者兩者皆有,銀行怕風險不願借錢出來,這樣銀根就會急促收緊,金融危機即現,所以歐洲央行立即放水救市,注入等值1.02萬億港元的資金,承諾無限量以4厘拆出資金,實行重招救市。

  次按風波雖有危險,但中央銀行可以透過放水或減息來救市,所以理論上比較簡單可以控制風波蔓延,不過美國聯儲局局長伯南克表現較消極,例如放水入銀行體系,遠比歐洲為少,今次嚮應歐洲央行行動,放入等值1872億港元的資金,已經叫做比較手筆。金融界分析伯南克的心態,是非到好必要的時候不想介入,唔好益咗嗰啲大炒特炒的基金佬。

  你看美國金錢泛濫,在伯南克的眼中,無論貪高息大買次按的對沖基金、借日圓做套息交易的對沖基金、以至用好大槓桿借錢收購的私募基金,過去幾年都肥到漏油,伯南克會認為,無理由你借錢大炒作搵了水,出事又要聯儲局埋單,等如幫你繼續搵水。所以伯南克會任由對沖基金爆吓,非要到影響金融體系時才會出手。伯南克上任至今,已顯露其放水幫助市場的積極性,低於上一任的格林斯潘。這樣一來,就會增加次按爆煲的風險(因為聯儲局不積極去救),股市亦會更波動。

  不過話得說回來,美國股市又急跌,有少少燶味,甚至可能影響經濟,又唔到伯南克唔救,除了放水之外,他最簡單的招數就係減息,所以相信聯儲局十月會減息的市場人士愈來愈多。

  在這種局勢下,次按風波仍未完結,相信市場仍會極之波動,升得太急唔好追,跌到殘時不妨買少少好股;若到位止蝕要執行,唔好心存僥倖;低吸時要揀優質股,打靶時先打垃圾股/弱勢股。總之股市風高浪急,會大升大跌,賭性強的可以博,膽汁少者只能量力而為,唔好太博啦。

陸羽仁

TOP


央行拆彈 (2007/8/13)


  上週歐洲中央銀行注萬億巨資入銀行體系救市,各國央行陸續注資,大家都估債市有大鑊跟尾,加州風險管理機構Institutional
Risk
Analytics就估計,有2500億至3000億美元的債務抵押債券(CDO)面臨貶值,即係話有超過2萬億這類型的債券會跌價,難免有續回潮,如果各國央行唔放水,相信個鑊就會爆啦。

  其實當日當BNP宣佈旗下三隻基金唔掂時,都有爆爆地的味道,當時各種投資市場都出現混亂,樣樣都跌,股票跌,黃金跌,商品跌,油價跌,日圓套息交易拆倉,只有美國國庫券一味升,這樣現象道理好簡單,市場預期大風暴來臨,加上銀行短期唔會肯借錢,所以不單揸了CDO債券的基金要沽貨(當時乏人問津),揸股票、揸商品的基金都要先沽貨,因為他們估計市場會大動蕩,到時若有大批客戶要贖回,若基金手上無現金應付贖回,就會爆煲,所以要焗沽,攞到錢就買美國國債避難。

  中環茶友話日圓套息交易照計和次按無關係,按理資金避難入美國國債,美元應該強,日圓唔應該升,但當日日圓套息交易一樣大拆倉,挾到日圓急抽,你可以話這種現象也叫全球化,一樣產品跌,引發投資者恐慌,樣樣產品遭秧,做日圓套息交易的對沖基金都要避險。

  好多朋友問次按係乜,為乜影響咁大。次按係美國的次級樓宇按揭,借錢買樓者還款能力較差者,要付高一點利息借錢買樓,美國的房貸公司借錢後,把按揭債券化,包裝成定質投資產品,賣給投資者,投資者貪高息,就會買入長揸。如果一個基金買入次按,沽出美國國債,就連總體利息升跌的風險都抵銷埋(因為已沽空美國國債),好似可以好穩陣咁賺取次按和國債之間的息差,基金當然不是只賺二、三厘息差,佢把資金借大10倍,就有20%、30%年回報,唔駛用腦,年年收錢。不過美國樓市轉弱,美國次按的業主拋低鎖匙走人不續供愈來愈多,次按爛帳比例愈來愈高,次按債券價格大跌,結果就出現次按危機。

  歷史不斷重覆,今次次按風暴,和美國80年代的垃圾債券危機及1998年對沖基金長期資本爆煲,都有少少類似。80年代美國垃圾債券大王Michael
Milken專門包銷無評級的企業債券,搞出一個垃圾債券的市場,他亦捲入龐大內幕交易案,垃圾債券終於因為炒得太厲害而爆煲(Den
of
Thieves一書對Michael
Milken炒作垃圾債券手法有詳盡描寫)。

  而對沖基金長期資本就因為炒作俄羅斯債券賺取息差,最後俄國在金融風暴中出現不還債風險,就逼死長期資本。

  每逢出現這些危機,必然觸發恐慌,跟住就有沽售潮,市場不問價出貨,銀行亦落雨收遮,不單不再放貸,還要收回貸款,一沽一挾,好大的基金都頂唔順。

  在這種危機中,市場資金緊缺,人人都頂唔順,而且愈來愈恐慌,投資者不問價出貨,好快就有災情。穩定市場最佳方法是央行放水,這是最有效方法,因為大量資金湧入市場,銀行首先不用急著收債,好快就要放錢出街,因為市場穩定後,銀行還不放貸,就要日日蝕息。而市場一穩定,早前不問價沽貨者,因為沽平咗,就有好大動機反手撈貨,買貨人多,市場就會反彈。

  央行要拆彈,先來大放水,唔夠力仲可以進一步減息,通常可以穩定危機,這種行動的副作用反而在經濟方面,假設美聯儲減息,但經濟其實未泠,一減息就觸發投資和消費,結果就引發通脤。

  央行大出手之後,市場雖然仍波動,但大膽的投資者已會入市博大霧,但穩陣的散戶只能量力而為,因為風波未定,隨時還有餘震也。不過央行出手,亦往往是跌市的尾聲,若手上有早期買入的平貨,忍到今天,若不再急跌,就唔好而家驚過籠去沽,小心賤買資產呀!
  
陸羽仁

TOP


巨鱷、大象與獅子王 (2007/8/14)


       歐、美、日、加、澳五個中央銀行再向市場放水,舒緩銀根,合共再注資近6000億港元的資金,灌水浮球,歐美市場逐步穩定,美股回穩,一度上升,後尾市回落,道指微跌3點收場,美股和港股一樣,處於養傷階段。

網友阿Tom有個問題好有意思,他問:「陸Sir, 早晨,你說:『央行要拆彈,先來大放水,唔夠力仲可以進一步減息,通常可以穩定危機,這種行動的副作用反而在經濟方面,假設美聯儲減息,但經濟其實未泠,一減息就觸發投資和消費,結果就引發通脤。』難道經濟永遠不會衰退?」

  阿Tom咁問,自然隱含不同意見,或者佢懷疑央行干預有無效,或者質疑央行這種事事干預的合理性,總之有啲懷疑。

  先講「難道經濟永不會衰退這個問題」。美國經濟,近年的確沒有經歷較大衰退,遠的不講,近的如98年的亞洲金融風暴,2000年科網泡沫爆破,2001年的911恐怖襲擊,美國股市雖然一度大幅下跌,但好快又回穩,即使2000年科技股爆破令股市受創較深,但實體經濟也只是略為回順,跟著又回復升軌,談不上衰退。這一切和美國聯儲局放水救市有絕大關係。

  美國是「萬水之源」,中東的油元,中國的經濟增長收益,形成全球的遊資,其實這些錢大部份源自美國,你看美國人口佔全球二十分之一,但用電量卻佔全球四分之一,就知道這個國度如何消費,就明白她為何不參加控制廢氣排放的「京都議定書」。美國巨額的消費和投資,支撐著全球經濟,只要美國聯儲局肯放水,美國經濟只會感冒,發燒都唔發吓。美國可以透過聯儲局借錢、減息、和政府增加開支放水。美國政府赤字高企,政府叫聯儲局發鈔,只用美國國債抵押就可以,即係話美國政府只要願意付約5厘利息,就可發鈔應付赤字,但利息也可以發鈔支付,所以美國政府的赤字只是數字遊戲,執政黨經常唔理。

  在格老當聯儲局主席的年代,積極干預市場,延續繁榮,所以美國經濟只會傷風感冒,並無大病,至於咁樣好唔好就唔知啦。你睇美國樓市自94年一直升到而家,才開始回落,就知道美國干預的利害。當然有一個理論話干預得多一直頂住,到真係跌時會跌得好甘,但另一個理論話真係跌時再頂,也只是有調整無大跌,睇吓你信邊個。

  有時市場的大象、鱷魚和獅子王都幾難分,今次次按危機,不少大金融機構都中重招,聞說一間大行的基金客就輸掉3000億美金,有些大行又係大象,亦做鱷魚,但同時和獅子十分老友,你都知美國大行和政府及聯儲局關係有幾深,聞說美國大行上星期就積極遊說聯儲局放水干預,結果真的成事。明白這重關係,就知道政府為何要積極干預,延續繁榮,你知大行都唔想自己蝕太多錢啦。

  不過獅子王入市係唔係永遠止得咳,無人說得清,例如美國樓市,就有人話進入衰退期,減息都好難救得番。又例如經濟,如果聯儲局減息後,通脤加劇,甚至出現滯脤,就真係減息又死唔減息又死了。

陸羽仁

TOP


餘震不絕 (2007/8/15)


  美股略穩定後又再跌,昨日道指跌 207.點,跌幅1.6%,跌到 13,028.點,這是4月以來的低位,隨時穿13000點。今次美股下跌是受沃爾瑪次季業績不理想拖累,亦擔憂次按危機繼續蔓延,沃爾瑪次季賺241億港元,差過預期,要調低全年盈利預測。另外家居修飾零售商家得寶上季盈利亦倒退15%,營業額更是4年來首次下跌,是一個側面反映美國樓市唔掂。市場開始擔心樓市回軟和次按危機影響消費。

  國際投資者目前未完全知道次按危機的深度,所以非常非常審慎,你睇高盛股價就知,高盛昨日就跌了7.75美元,一日跌了4.4%,跌到169.75美元,又跌穿170美元,咁大隻股,一日跌4.4%,都幾厲害。睇完高盛股價,你就會覺得匯豐其實幾硬淨,雖然人地大升時佢無升,但人地大跌時佢亦無大跌。既然美股仲震緊,港股今日又要大力插一插了。

    中環茶友話,外圍現在人心好弱,你睇外匯市場就知,目前是一片亂局,美元兌大部份貨幣都轉強,只有兌日圓轉弱。早前市場睇淡美元,所以有好多美元空倉,但次按風波觸發金融混亂,不少基金沽了各種類型資產,有錢無地方放,就湧入美國買吓最安全的美國國債,所以令美金有支持,短暫迥光反照,變得稍稍強勢。

  但美元兌日圓獨弱,今日又見過117.4日圓低位,日圓上升只有一個理由,就係對沖基金套息交易拆倉,你睇高息貨幣如澳紙、紐紙甚至英鎊都走弱,就知道套息交易在不斷拆倉,要沽高息貨幣買入日圓。中環茶友估澳紙、紐紙仲要試低少少才跌到定。

  今浪次按危機的風眼已過,但後面的風仲好大,要等一些時間才會穩定,市場擔心如Bear Stearn這等受重創的金融機構唔知頂唔頂得順,所以風繼續吹,小心風尾都吹到你頭暈。恒指呢個月已經有三棍插下來,隨時又來多一大棍。

  美股跌得多,港股已經叫做跌得無咁多,皆港股有紅色因素撐住。內地A股還在創新高,上海A股指數已破5000點,上海綜指都衝向5000點,這個紅色因素還頂住港股,所以外資對香港又不致睇得太淡。不過A股破5000點,加上上月內地通脤又上到5.6%的高位,宏調措施又快來,A股可能都要抖抖氣了。




陸羽仁

TOP


執行紀律 (2007/8/16)


   美股道指再挫167點,跌幅1.3%,收報12861點,今年的升幅差不多消耗淨盡,的確是弱過藥煲,今次下跌皆因美林指美國最大的按揭公司Countrywide Financial Corp.處於「無力償債」狀態,即係話佢就嚟破產,皆因它的債主逼它低價賤賣按揭資產,受到Countrywide Financial Corp.可能進入破產保護狀態的消息影響,美股由早段上升變下跌,再插一棍。
  
  次按危機繼續令對沖基金急急為日圓套息交易拆倉,日圓早上曾升上116.2日圓的高位,而紐元亦一度跌穿0.7美仙,外匯市場仍然動蕩。

究竟今次美國的次按危機會否爆至不可收拾,人人看法不同,不過美國聯儲局成員、聖路易斯聯邦儲備銀行主席 William Poole就話,無跡象顯示次按危機影響美國實體經濟,所以無需要因此而考慮緊急減息。他估計事件令金融業虧損1200億美元至1500億美元(9360億至11700億港元),唔算太大件事,暗示聯儲局不應減息救金融界。William Poole是聯儲局放水救市後第一個公開講話的聯儲局成員,睇嚟聯儲局短期內減息的機會不大。

  即使次按風暴只帶來中期調整,美國的大象和大鱷都好傷,全球最賺錢證券行高盛股價昨日再4.85美元,跌到164.9美元,再跌2.8%。高盛旗下的對沖基金Global Equity Opportunities這個月就損失14億美元資產值,即係唔見咗109億港元,搞到要免收手續費,吸引資金投資這隻對沖基金。

  在對沖基金這種大鱷都受重創的年代,你夠唔夠膽跟佢搵食,就要睇你的膽色了。

今日港股難免再插一棍,直撲向21000點這個好淡臨界點,如果認為次按未影響實體經濟,主要是一個信心問題,後市仍可睇好,如果認為次按會爆至一發不可收拾,後市就要轉行睇淡。

  陸羽仁再建議大家執行紀律,到止蝕位的股票要忍痛打靶。這可以有不同情況。第一,早前在23000點樓上高追的股票,如今好多都到一成止蝕,講得叫做高追,打靶不要手軟。第二,在22000點左右博撈底的股票,部份未到止蝕位,可以守一守,到位都係要打靶,執行紀律無辦法,打完靶預咗佢反彈,但你又點知反彈完佢升定跌呢?打了靶保留現金,謀定而後動都無壞。第三種情況最壞,成手蟹貨,仲係雞股,隨時蝕4、5成,打靶又死唔打靶又死。要注意雞股在大跌市多數頂住,等跌定後又會住下放,若雞股跌得不深,應該把握機會止蝕,但跌得好深就無乜嘢好做,唔等錢使唯有同佢鬥命長。

  止蝕永遠無錯,如果股份剛到一成止蝕位,唔沽哂都沽番一半,留番啲現金係手,等個市定啲再算。

陸羽仁
本帖最近評分記錄
  • italyitaly 現金 +20 鼓勵文章 2007-8-17 02:03 AM

TOP

發新話題
©2001-2009 3Talks.com, All Rights Reserved. 免責聲明及版權聲明

重要聲明:本討論區是以即時上載留言的方式運作,3Talks.com對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,用戶不應信賴內容,並應自行判斷內容之真實性。於有關情形下,用戶應尋求專業意見(如涉及私人、買賣、醫療、法律或投資等問題)。由於討論區是受到「即時留言」運作方式所規限,故不能完全監察所有即時留言,若讀者發現有留言出現問題,請聯絡我們。3Talks.com有權刪除任何留言及拒絕任何人士留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。