股市回復少少生氣，令人對樓市前景都睇番好啲啲，週末聽銀行界老友講，呢幾個月豪宅無運行，但中小型單位市道唔太差，都維持到一定的二手成交，唔係一個跌市，你計埋去年第４季本地樓市急升的因素，呢一兩個月樓市微微落，只能算是急升之後的整固而矣。

　　網友elainejeffy問我好唔好賣樓等跌市，佢話：「陸sir，有一個問題我諗咗好耐都唔知點好，希望你可以俾d意見。我而家有一層樓放緊，帳面大概有60-70萬利潤，不過放左之後要租返一層。由於低利息期既關係，租屋會貴過現時供樓，如果每月供款還本金既錢當作儲存既話，租樓一個月就要俾多5千蚊出黎，即係一年會俾多6萬蚊。問題就係...
1)
如果股市現在係熊二期既話，熊三出現既時候我怕會拖低樓市，浪費咗今次高沽遲吓低買既機會。

2)
但係如今上証綜指3千點大陸政府高調救市，如果上証守得住3千點，那恆指破2萬既機率會唔會好細呢?

3)
如今樓市中線前景好似幾樂觀，人工加，租金加，通脹升，低息，負利率，地產商惜貨而賣，建築緊既樓宇又下降緊，即係供應少咗，需求多咗。就咁睇樓市又好似仲有得升吓啵，就算唔升都唔洗咁快賣住啵。期望你既回覆，各位師兄都可以俾d意見，謝謝。」

elainejeffy這種賣樓等跌市的心態，在股民、以至業主心中非常普遍，或者我可以分幾個層次答。

第一，散戶買樓長線賺錢容易過買股。Peter Lynch都講過呢個道理，話佢見過好多美國人買樓賺錢，較少人買股賺錢，買樓者多數隨著收入增加，細樓換大樓，最後到退休時有一間價值極高的大屋，累積大筆財富。我話呢個道理在香港一樣好啱，好多人打一世工，最後剩下來唯一的財產就係一間樓，或者做一種小生意，幾十年後生意好似無乜錢賺，但賺咗間舖，咁都已經好叻，因為出租舖都足夠養老有餘。樓是不動產，較難沽出，逼人做較長線的投資，無咁易在跌市或「疑似跌市」中沽出，揸住間樓守得過低潮，最後大市反覆向上，就有數以倍計的利潤。但若你買了股票，想沽出十分容易，一個電話就搞掂，你好易受貪婪和恐懼所左右，見到少少利潤想走，或者一有跌市即閃，但跌到底時你又未必敢去買番。散戶投資出出入入，住往掌握唔到好時機，不如唔出入好過。另外，普通人比較大駛，賺幾多駛幾多，買樓之後要供，逼你儲錢，逼你死坐，逼你長線投資，對散戶較有利。

　　第二，買樓有槓桿。你買一間２００萬元的樓，放低三成６０萬首期，借１４０萬，即係用６０萬去做２００萬的投資，有非常大的槓桿，你買股票除非借孖展或炒衍生工具（如窩輪），否則沒有這麼大的槓桿；但你買股票用槓桿去炒風險很大，股票一跌，證券行會要求你補倉，你補唔到就斬倉，好易把本金輸清。你買樓遇上跌市，即使變成負資產，只要你定期供樓，銀行不會咁身痕走去斬你倉，所以買樓有一個較「安全」的槓桿。反觀賺錢時，若買股不用槓桿，買樓買股相比，你攞６０萬去買樓，樓價升三成你賺６０萬，但攞６０萬去買股，股票升三成你賺１８萬，條數差好遠。

　　第三，要捕捉最高點出貨、最低點入市好難。你想高價沽樓，低位買番，唔係咁易，歷史上香港樓市最易捉的高位係９７年，我識部份人在那時都沽了樓，但好多係「符碌」所致，係政治上唔睇好香港，想移民調走資產之類，才去沽樓。而有些沽了樓者見９８年跌到咁上下，又去追番，最後都係輸。在一般情況下，樓市的頂部唔係咁易睇到，elainejeffy現在以為是「熊三」要到走去沽樓，衰起上來只是在中間位沽咗，樓市不跌再升，間樓兩三年再升多６０、７０萬，你仲要每月俾多５０００元租樓，一出一入，條數好惡計。買咗樓揸長線唔係唔可以沽，如果你嗰間係自住樓，最好去到你認為好離譜的高價才去沽，「離譜」兩個字，同「升咗」、「賺咗」唔同，而家中小型住宅，好多和９７年高峰價仲低三成以上，未到離譜、升到顛的地步。

　　第四，若非出現elainejeffy講的大熊市，我又未睇到樓價會大跌。利息又低，市民供樓承受力充足，香港政府唔肯定期賣地，地產發展商又怕蝕底唔願放低大筆按金去鈎地，土地供應不足，發展商十分惜貨，咁環境樓市不易大跌，你睇elainejeffy的例子就知，供完每月要貼５０００元去租樓，咁倒掛係吸引人買樓唔係沽樓，雖然低息唔會永遠持續，說不定明年就開始加息，但到美國加息時，經濟環境又改善，人們也未必怕加息了。

　　所以簡單去講，elainejeffy想而家高沽等樓市跌吓去低買，係一種出入的心態，並不是對待長線投資的應有態度，散戶睇市不如大戶，自己以為睇到市場的高低點去出入，好易就放咗好的投資。到發覺睇錯時，更可能用套現的錢去追樓追股，在高位追入風險更大，所以我建議elainejeffy都係坐吓貨啦，「坐看雲起時」吧。
陸羽仁

　　  　期指結算前夕，美股道指略回，跌２０點，收報１２８７１點，睇嚟港股結算上落幅度未必太大。


　　昨日講起「沽樓等跌市」的風險，睇完網友的回應，我恐怕網友誤會我講今年樓市一定升，其實我在講持有樓宇是一個長線投資，要有較長線的看法，起碼也是兩三年的事，主要不是講短炒作的起伏，短線樓市上落的分析，只是作為一個次要的參考。


網友Sun的回應很有意思，值得大家細讀，佢話：「我想回應陸Sir"沽樓等跌市"之看法，我覺得如果自問自已炒股票是敵不過"貪婪和恐懼", 則陸Sir的觀點頗正確, 可是, 如果你能不犯陸Sir所講的兩大錯誤---1」 炒股時的"貪婪和恐懼", 及 2」沒有儲錢的自制力, 要靠供樓強迫---那麼, 我認為套樓等買股是好主意。舉一例子, 我友人最近以$530萬沽了2001年以$330萬買入的一手盤, 升值60%, 似乎比買股好, 但他持貨7年, 實際是每年回報率只有7%, 還是因為去年九月急升才有這每年7%的成績, 如果以07年九月價去計, 算他持貨6年, 根據當時同類盤的成交價, 只有$310萬, 每年回報率只有5%。可是, 假如你在2002年"不幸地"以一個不靚的價, $95元買了飽受次按困擾的匯豐, 現價我算它$130元, 每年回報率也有7%, 而且, 匯豐股息有4-5厘, 是完全入袋的, 而租金回報雖然也可說有4-5厘, 但郤未扣除放租的成本("全包"費用, 維修, 買樓及放租佣金, 稅項), 而風險(租不出, 租霸, 兇案)亦高於買大藍籌股票。我只是以買了表現欠佳的匯豐作例子, 如果你買的是巨型國企如中石油, 中移動, 至今回報數以倍計, 買樓又豈能及? 當然, 如果閣下敵不過陸Sir所說的"貪婪和恐懼", 那麼你持有匯豐, 很可能早已低位憤而沽貨, 而持有樓宇, 則縱使SAR時期都可能會"焗"你持貨。」

陸羽仁在某意義上同意阿Sun的意見，雖然表面看佢無計買樓的槓桿，若計埋槓桿，買３３０萬元的樓只需三成即９９萬元的首期，７年賺２００萬，以本金計回報率是２０２％。但阿Sun講得對，如果唔係計匯豐，係計中移動或中石油，買股票回報又會高好多。

我相信大家都記得，我話自己寫文係從眾，用八二分，社會上有兩成係叻仔，有八成係凡人，叻仔唔使教，只要教凡人，所以我寫文好多時係針對嗰八成凡人，唔係寫俾兩成叻仔睇。而現實上那兩成叻仔中，可能有１０％有超高的心理素質，可以完全戰勝貪婪和恐懼，成為大富大貴之人，這也是小量白手出身靠博起家的富豪發跡歷程。不過股市亦專收叻仔，也有大量叻仔埋骨於股海中，部份人曾一度風光，但結果衰收尾，或許這種大起大落，就係好賭者的人生樂趣。

但其餘八成凡人買股，絕大多數時候敵不過貪婪和恐懼，買股多數騰騰雞雞，貴時追，平時沽，長期埋單計數，買股賺賺蝕蝕得過桔，所以我就話不如買樓啦，主要都唔係睇樓市而家的大勢（以中小型樓計，現時樓價不高不低，以經濟發展和匯價計屬合理水平），而係睇大多數人投資的能力和習慣，持有樓宇係一個笨方法，讓大多數的凡人，可以較易達到彼岸。

　　若果你唔知自己係叻仔定係凡人，例如日前問問題的elainejeffy，可以睇吓自己過去買股的住績，計清楚條數，睇吓咁多年買股賺多定蝕多，累積回報有多少，咪知自己係邊類人。若無買股經驗，或者輸多贏少，或都贏埋平均一年都無１０％平均回報，咁樣就當自係凡人好啦。記住要計過去咁耐「累積」數字，唔好只計贏唔計輸，同埋要將本金鈎出來，你不斷把人工投入去炒股，累積的錢只係本金，唔係贏錢。若計完往績將自己分類成叻仔，就可以多炒作，若是凡人，就多投資，買樓係一個笨笨地的長線投資方法。
這裏想再講講yy太留言，佢話：「你今天之blog道出了好多小生意人(好彩的)的心聲 "經營幾十年,生意賺不了多少, 但買了一店舖出租可以養老."我會好好計劃看時機買入工商單位. 我都好想買地舖,但而家太貴了.因為可能十來年後, 我埋單計數, 可能都是供了物業養老!做生意是三更貧, 五更富的人生呀！而您對樓及股之取捨, 正正是yy生及我放棄了2005買大陸樓, 買了港股但投資方法不好, 而打回原形的景況. 如果早2-3年識您,我地的歷史,會改寫, 但現在都未為晚.。多謝陸sir花這麼多時間寫blog. 您真的幫了好多人. 感謝。」

放一個長線角度看１０年以上，一個地方的股市和樓市，會和當地的經濟發展同步，但短期１、２年看，股市和樓市、特別是股市，就如用狗帶拖著的頑皮小狗一樣，不是跑過籠向前，就是跑太慢落後。大陸經濟未來十年還會每年以７％以上增長，只要不是在太貴時買股買樓，死揸十年會有大收穫，未來的大陸，就如過去９７前２０年的香港那樣，仍處於高增長期。香港現在的經濟已比較成熟，未來增長較慢，每年有３％、４％已不錯了，所以買樓買股要睇啱時機（買紅色股的角度不一樣），但yy太若做生意能自己供得起舖，在香港買舖也不錯，自用無放租的煩惱，而且商舖少折舊，１０、２０年過後，供滿間舖，將來靠收租也可以達到財務自由了，但要靠炒股１０年、２０年達到財務自由，難度大好多。所以對凡人來說，炒股只是小注怡情吧！

陸羽仁

　　美元再開展一輪反彈，令到石油、黃金及各類商品價格急回，亦刺激美股向上，在科技股和銀行股帶動下，道指升１８９點，升幅１．５％，升到１３０１０點，升穿１３０００點的水位，是今年１月以來的高位。反映科技股的納斯特克指數亦大升２．８％，升上２４８０點。

　　美國勞工部昨日公布上週首申領失業救濟金的人數，升至３８００００，高於市場預期，但美股卻因為美元反彈而向上，比較落後的金融股和科技股最被看好，英特爾升４．６％，美國第一大銀行花旗集團升４．２％，美國第三大證券行美林升５．１％，這些大股動輒升４、５％，大追落後。

　　美元急劇反彈，在今早亞洲市歐元兌美元匯價為１．５４６４美元，而美元兌日圓則造１０４．６３圓，美元兌歐元的匯價升上５週的高位。奇就奇在早一日聯儲局議息之後，匯市無大反應，由於聯儲局的聲明比較含糊，市場對美元是否會減息還是意見分歧，債券期貨的交易甚至顯示６月底再減息的機會上升，但一日之後，匯市又好像突然瞓醒一樣，對美國衰退的憂慮開始減少，估計美國減息的週期或會停止，資金又突然湧入去買美元。

　　匯市這種遲一日的反應，的確奇特，中環茶友話，估計有兩個原因，第一，聯儲局的聲明較模糊，唔知佢係唔係想停止減息，但聯儲局咁多個理事，總有人可以向他們探到料，假設儲局諸公傾向唔再減息，消息慢慢泌出街，就有好多人在匯市追美元。第二，美國連續七次減息，無論如何都近尾聲，最多俾佢在６月底減多一次，都應該要停，而美國首季經濟和企業表現都唔算差得驚人，更令人憧憬最壞的情況已經過去，所以美元始終要反覆向上。

　　美元一彈，各種商品都急插，油價急跌至１１２美元一桶，金價更跌至８５１美元一安士，從高位１０３０美元跌到而家，３個月已跌了１７％，跌幅驚人。由於過去借美元沽空炒外幣和商品的錢太易賺，每一段都累積了大量倉位，所以美元一反彈，這些殺倉盤都會好勁，所以一係唔跌，跌起上來會好得人驚，若有揸外匯和商品的朋友要執生，最好定好止蝕，希望佢唔到止蝕位，但一到必須嚴格執行去斬倉，不能讓虧損擴大，否則可以蝕你好多錢。

　　我估美元這一個反彈浪未完，這一浪要完結或有一個顯著回吐，係要等好消息真正出現時，假如６月２５日聯儲局議息時決定不再減息，顯示減息週期完結，此消息出現時，美元必再勁升，那時才是美元好友借好消息出貨的時候。
　　美元上升係美股上升的真正基礎，因為美元回升除了對美息的預期外，亦反映市場不再憂累美國經濟大衰退，市場對美元回復信心時，美股亦顯得吸引，因為外資調錢入美國買美股，即使股價升，如果匯價跌，外國投資者都得不償失，但美元若有像樣反彈，美股又向好，買美股便有賺價和賺匯水的雙重好處。估計今次道指有望挑戰一下１３５００點的水平。

　　若然假設美股會反覆向上，港股亦會跟這個大方向，中線也是反覆向上格，雖說近２６０００點向上空間不似太大，但大勢仍然係反覆向上，要逆市而炒做淡友，難度幾高，雖然我估計月頭港股仍然會搵位回吐，但不要期望回吐的幅度太深。可先觀察今天港股跟美股彈幾多，就知道大戶想一路向上炒，還是月頭放軟手腳，中段過後再推上了。
陸羽仁

美國的股市大新聞是微軟終於宣布放棄收購雅虎，令這一個期待以久的科技股世紀併購泡湯，微軟要另覓收購對象去和Google競爭，而雅虎就要面對股價暴跌的命運。

微軟初時提出４４６億美元（３４７９億港元）的收購雅虎計劃，但雅虎並不同意，最後微軟提價到５００億美元（３９００億港元），折合每股收購價３３美元，但雅虎老細楊致遠要價每股３７美元，結果談判失敗收場。市場認為雅虎管理層為保住自己份工，犧牲了股東利益。雅虎股價自微軟在２月１日提出收購後，升了４９％，昨日還急升了７％，升到２８．６７美元，因為市場憧憬微軟會再提價，而家微軟放棄收購，分析員估雅虎股價會暴跌２８％。

早兩日講起old rich（舊有富人）的優勢，之後有不少網友回應了，今天可以再討論一下。

老人家有句話：「大富由天，小富由儉」，聽落相當老土，但細思充滿了old rich的智慧，記住這是智慧，不是聰明。

香港這個社會，聰明仔太多，有智慧的人比較少，我又想起一個過去已講過聰明仔的故事，想再講講，呢個故事發生在十幾年前。有一次同朋友在一間高級餐廳食午飯，聽到鄰桌一個聰明仔在教她女友買股之道，女友問他，「我有匯豐，而家派息可以收股票或收利息，你話收乜嘢好？」聰明仔對呢個問題有研究，講咗一輪匯豐以股代息派的股票的計價方式，結論係匯豐計高咗少少派新股的價錢，所以收現金股息可以收多啲錢，最後佢仲加咗一句，攞番啲股息來炒其他細股，回報仲高啦！

我話佢係聰明仔，因為佢數口幾精，連一般人無乜留意的匯豐以股代息的計價方式都有一番見解，但恐怕只是有小聰明，無大智慧，匯豐股東以股代息，係想直接透過收股票作利息，達到複式增長的目標，因為收息數目唔太，收１０００元幾百元，食餐飯買個手袋就無埋，但唔收現金股息，只收股票，等如強逼自己將股息儲起，咁就有利叠利的作用。好似上述聰明仔咁講，拿股息去炒細股，又係死十個當五雙咋噃。

以同一個角度睇買樓，或者收窄少少去講，好唔好將自己的自住樓賣掉去炒股，從微觀角度睇，未必係最聰明的做法，但從宏觀角度講，對大部份無定力的人而言，買樓揸樓供樓可能是最簡單的儲錢方式。

先講微觀角度，有網友問起，話細心計落，過去幾年買樓年回報約７％，升勢主要在去年第４季才出現，所以ROE（即Return on Equity，資本回報率）唔太高；另外雖說買樓有借貸的槓桿，但上市公司自己亦有借貸，所以買股其實已暗藏槓桿了。網友這兩點完全啱，所以從微觀去講，買樓肯定唔係最高回報的投資。我再湊興加把咀，香港經濟在９７年前有２０年高增長期，現在點講都係成熟經濟，唔會增長得太快，樓市長線同經濟增長同步，亦唔好望樓價有過去那種高速增長。

但從宏觀角度講，對大部份無定力的人而言，買樓供樓可能是最簡單的儲錢方式，雖然笨，但有效，因為後生仔有樓在身，要每月供款，你點食點駛都好，都要搵錢供樓，等如逼自己去儲錢，有一類人係「大駛一族」，若然不用供樓，有錢在身唔覺唔覺會駛多啲，將自己樓賣掉，賺咗１００、幾十萬，更加要玩餐飽、狂買嘢慶祝吓，使１０萬、８萬唔奇，咁就將大量可以錢生錢的本金消耗掉。

另一類人是「爛炒一族」，我經常講，你知道自己在投機，有合理的方法去炒，我絕對唔反對人炒股，我所謂「爛炒一族」，係好喜歡炒股，但又唔識炒者。炒股會成癮，慣咗炒股，一有錢就身痕，想去炒一轉，唔懂得選擇時機，唔懂得選擇對象，唔懂得控制注碼，風險大得驚人。你忽然賣樓有１００、幾十萬現金在手，拿去股市博一舖，風險度其實唔比「過大海」去澳門賭錢低。做乜嘢都講經驗，如果你嗰１００萬係炒股賺番來，雖然唔保證你將來可以成功，但起碼都有一點炒股經驗，贏過又輸過，但如果你個１００、幾十萬現金係買樓賺番來，你炒股無經驗、無住績，你又點擔保唔會一大注炒就輸清呢？

炒股要成功，第一要講性格，第二要講性格，第三要講性格，要克服大量人性的弱點，才可以做到，可謂向高難度挑戰，成功機會百中無一。

網友均兒講起：「我總結自己炒股，次次都係買落就跌，跟住守到升少少就走，之後見到股再爆升就好心痛。」這個現象太典型了，甚至好多無心炒股、只有心投資的朋友，都會陷入這種「買親就跌」、甚至「高買低沽」的困局。有無想過唔係自己特別低能，而係股市根本係一個局，會引到一般人由唔想炒變成去炒，甚至炒咗都唔自知（你３００００萬時去入市想投資，就係炒咗股自己都唔知）。現在大市升到２６０００點，你仍然半信半疑，唔知個市得唔得，過一個月升到２８０００點時，你開始覺得個市幾安全，最後升到３００００點時，你反而覺得個市好得，飛身入市，唔知點解愈買愈多，初時仲好似賺到啲，日日計回報計得好開心，點知個市搞搞吓已走完今年的升浪，跟住就吓插，你高位止到蝕要還神，止唔到蝕又接到成手貨，計計吓唔單止無得贏，更加要輸，你就開始唔想再計數了了，跟住又食幾個月驚風散。風水佬騙你１０年、８年，我而家講o既話啱唔啱，睇幾個月就見功夫。

　　股票好蝦人玩，你計２４０００點入貨，２８０００幾點出貨，一年賺２０％，這更是指數的平均數，買中走得快一點的紅色股，一個月可以升３０％、４０％，以咁o既數字同買樓比，買樓、揸樓，當然回報好低。問題是股市利潤來去如風，股市專修理聰明仔，世事就係咁怪，有時長線來睇，笨方法可能比聰明方法，更能到達彼岸。「有錢儲起，長線投資，複利增長」的威力驚人，就是old rich的智慧。

（後記：對年紀３０以下，不在香港、身在中國其他大城市的網友，有能力供樓的話，記住要買樓自住．揀一些在市中心，交通方便，位置／景觀較佳的單位買入長揸，收入增加後，更可以細樓換大樓，２０年後必有所獲。你可能會問，我點解特別同呢班網友講，因為大陸係高增長的經濟，大陸樓價如香港８０年代中的價錢，長線增值能力好過香港樓，不過在偏遠地區的渡假樓卻是例外。）
陸羽仁

　　美股開始回吐，油價升穿１２０美元一桶，帶來影響消費的恐懼，而微軟宣布放棄收購雅虎，雅虎股價跌１５％，亦影響市場氣氛，道指下跌８８點，跌幅０．８％，跌到１２９６９點，此浪只屬調整，但應該還會回吐得深少少，１２８００點應有支持。
股市升升跌跌，但散戶能否捕捉到這些升跌浪，的確是一大問號，網友均兒的例子十分慘痛，佢話：「 陸sir，我重有更典型你沒留意啫，我在科網股那時就炒股啦，當時90元買左２手和黃，揸到依家，去年沒走到，依家又跌返落來，真系好後悔，都唔知幾時賣股才好，長揸又得個桔。之前買咗光大控股，也係揸咗幾年，6元多賺咗佢幾仟蚊急急走咗，如果揸住光控唔走，而家都有二三佰萬，重使乜炒股，真係沒運。」

「我喺48元買咗中移動，以為佢衰過和黃，跌到27元斬咗佢，去買奧瑪仕，因為前年賭股好好炒，結果做咗接火棒，而家奧瑪仕仲10合１，10合１唔緊要，如果再來個供股，我真係沒眼睇咯~」

「舊年賣咗層樓，賺咗4倍有多，以為樓市點行都夠了啩，千祈唔好再來一次負資產。估個市升完第五波後，都會跌返五浪啩，賣完樓，樓價又再升，而家沒理由又貴價去買返啩?」

「跟住買股票又套死，而家對以前輸過的股票，比如中移動，真係怕怕，明知佢係好股，但我揸佢好幾年，有種恐懼感。股市有時會跌到人神經病，好像大陸A股穿3000點時，有重股係手，日日見住股跌吓又跌，那種見財化水的感覺，好慘哦！」

「你話炒股要成功，第一要講性格，第二要講性格，第三要講性格，我真系好有性格，但係我炒股就好失敗！」

　　網友均兒的個案，令人感嘆，亦正正就是我開始講叫網友唔好而家沽樓買股的原因。散戶炒股經常輸，這叫做「交學費」，問題是交完學費學唔學到嘢，股市這個學堂十分殘酷，如果學唔到嘢，你就永遠不能畢業，永遠都在不斷交學費。
　　如果是爛炒一族，賭到飛到沙走石，輸錢都叫做抵，但均兒又唔太似，起碼佢買好多隻都係大股，只有奧瑪仕一隻細股，佢似投資者多過投機者，但點解又經常輸錢呢？

　　陸羽仁為均兒斷症，佢都係一種典型，叫做「炒咗都唔知型」，第一，佢專買熱門股，表面睇佢有買大股有買細股，但佢買的時候，都係買緊熱門股，在１９９９年、２０００年買電訊股，例如中移動及和黃，在２００６年買豪賭股，例如奧瑪仕，唔理大股或細股，都係在大市炒得熱，而相關股份又係大市焦點時走去買。佢當年買光大控股，或者都在紅籌股追落後炒得熱的時候。

　　熱門股唔係唔買得，但它們如燙手山芋，要貴買貴賣，唔可以揸，一揸就會燒傷手。我經常話「貴買好股等如炒」，你買完大市轉咗勢，你以為自己做緊投資者，跌市唔識止蝕，隨時要坐６、７年，因為好股炒得貴時，已經透支咗４、５年的合理升幅，到大市炒完講番基本因素，睇番PE時，好股跌完都要很多年才會浮番上水面，要等盈利增長追番上當年的股價。均兒在科網潮買了４８元的中移動，２７元沽了，輸了４３％，佢未算在最低沽，０３年沙士時，中移動跌到見過１５元，若在那時沽，更加係輸足６９％！如果均兒買咗電盈（００００８），後果就更悲啦。中移動用咗６年時間，去到０６年才上番４８元以上，而電盈由於盈利能力唔掂，好似永遠都無機會上番高位。

　　記得old rich的智慧嗎？股票又好，樓又好，只能低價買，不要在熱門的市道買（短炒除外），YY太舉的例子，就係話有old rich爸爸媽媽教導的朋友，在０３年沙士時樓市最差時買樓，我相信佢地的爸媽，唔會叫佢地在２０００年買電訊股囉。

　　第二，買得貴，好被動。均兒高價接貨，這就是一切被動的來源。和黃的確因為3G投資失利而好呆，但中移動一啲都唔呆，但均兒買中移動的結果更慘，和黃仲有機會見家鄉，但中移動波動更大，已在低位被殺出；均兒高價買股後，有些如呆坐幾年，有些低位出貨，有些是一升到賺番少少就止賺（如光大控股），這三隻股之中至少有兩隻係得o既（中移動及光控），但佢買得貴，唔輸就偷笑，根本無法享受這些股票最後的發力收成期，所以病變根源仍然是買得貴。
　　以後買股記住，投資者唔好買熱門股，唔好在熱門市道買貨；投機者貴買要貴賣。投資者千祈唔好做咗投機者都唔知。

　　第三，投資者出咗貨莫追貨。我見而家樓市好似未到頂，未係升得「好顛」，就叫大家唔好沽「自住樓」，一則費事你身痕攞大筆錢去炒股，最後輸埋，好似均兒的個案，未有買股成功經驗，賣樓有大筆錢係身的確高危。二則過早賣出長線投資，後來見大市未升完，好可能再追，衰起上來一追就摸頂。我有不少朋友在９７年頭沽了樓，在９７年中追番突買多兩間都有，任何市場升到尾段都如爆煙花一樣，好精彩，你見個市一兩個月升兩三成，點忍得住？為免自己沽咗貨再追，就盡量忍住遲啲才沽貨。

　　我所講「炒股要成功，第一要講性格，第二要講性格，第三要講性格」，係指一種「勇於承認錯誤，精於從錯誤中學習」的性格，這是一種「相反性格」，即係和一般人好唔同的性格。從均兒買股票的住績，佢未具備這種性格，太易跟大圍買熱股接火捧，未有炒股成功的性格，都係少炒為妙。最好做投資者，唔好人云亦云，人顛時你唔好跟住去顛，只能在低位入貨，持貨較長，在股市升得太顛時沽貨，或升到咁上下定止賺位，跌穿止賺位就出貨。聽落容易，做起上來一啲都唔易。
陸羽仁

　　美股都算神奇，特別係隻房利美，呢隻美國最大按揭證券公司在美股開市前公布首季業績，虧損２１．９億美元（１７０．８億港元），令道指期貨在場外跌５０幾點。美股開市後，房利美股價早段跌過７．３％，但後來佢宣布會集資６０億美元（４６８億港元）充實資本，加上監管機構話若佢成功集資，會放鬆其監管規定，房利美股價又急彈８．９％。道指一度跌超過１００點，但最後升番５１點收市，收報１３０２０點。

  　我講了幾天Old rich的智慧，有贊成有反對的意見，我基本上兩種意見都同意。你可能會話：「咁都得？咁縮骨？」因為贊成和反對的角度不同，所以可以兩種意見都同意。

例如網友蛋散股友話：「陸Sir:你近日講買樓，我另有看法。萬科王石說四十歲才買樓，雖然極端，但年輕人應將資源放在事業和知識積累上。香港現今樓價，三成首期要六十到九十萬。能夠儲到這筆錢，都是對自我有紀律約束的人。不會亂消費。但買樓，經紀佣金，厘印，裝修，每月管理費，花錢更多。起不到儲錢的目的，如果投資收租，實質回報少於4%。如果望升值，十年能否再升值一倍，我好有保留。你認為還可升多少？只有準備結婚，生仔的一群人，沒有辦法被迫做房奴。過往買樓，買鋪後，香港經濟相對高速發展，人工上漲快，資產跟升。現在香港，單靠金融。未來香港？你有何看法？」

蛋散話「年輕人應將資源放在事業和知識積累上」，這是我一向對年青人講的大原則，但最重要的「資源」是時間和心力，不一定是俾錢上course，好似上網睇陸羽仁的網誌，就係完全免費（只是講笑！）

你睇咗我講幾日買樓，應該知道我長線唔係對香港樓市好睇好，相反地我認為在成熟經濟樓市只有緩慢增長才合理，只計租金收益，一年少於４％實質回報，計埋可能升值，年平均數也不能太多。所以買香港樓只是一個投資的「笨方法」。我講來講去只是一個三段論，凡人炒股出出入入會得個桔，好多人係凡人，所以好多人炒股最後最知點解都係得個桔，由此推論出叫大家唔好將自住樓沽咗去炒股。

而所謂得得個桔的定義，就係炒咗３、５年，中間贏過又輸過，最後唔輸就偷笑。網友yy太講咗佢０５年無買北京樓買咗港股得個桔的經歷，都幾慘情（http://www.hkheadline.com/blog/reply_blog_express.asp?f=8FCBZ8W59K70017&id=105071），我可以肯定咁講，２０年之後，yy太會發覺兩者的差別更大。至於網友均兒的經歷，更有黑色幽默的味道，佢買親股都衰，好股食少少就放咗，壞股如電盈（００００８）就長揸，大家有無覺得這種狀況似曾相識，佢咪叫做「贏粒糖輸間廠」囉，均兒你唔係例外，係典型，好多散戶好似你咁，不過佢地無講啫，市場上有１００種誘惑，會令你做出「贏粒糖輸間廠」的典型行為，如果沒有散戶的層層白骨，又點襯托得起股市中極少數大戶的仗仗功成。

網友牛腩貓咪問起：「陸sir, 剛剛先睇你個blog內容, 原來『勇於承認錯誤,精於從錯誤中學習』的性格,是一種「相反性格」. 我真是不知道呀! 我以為個個人都自自然然, 會從錯誤中學習. 輪到我不明, 大家不是錯誤中學習, 是如何學習呢?」

陸羽仁的答案係：「大部份人都無學習」。我見到小女兒犯錯，同佢講解吓佢犯錯的原因，佢最典型的答案係「知啦！知啦！」即係叫我唔好再講，佢唔想聽，佢覺得錯咗好淤，唔想面對；我會不嫌其煩咁同佢講，阿爸一世人領略人成功的最大秘訣，就係勇於認錯及從錯誤中學習，好多人都知呢個道理，但唔會做，因為大部人都有ego（自我），克服唔到認錯的無面感覺，所以用各種方法迴避面對錯誤。不幸地，股民唔認真面對自己在股市中犯的錯誤，結果係不斷輸錢。

講咗咁多只係想話，好多人炒咗好耐股，但仍然唔識炒股，攞住大筆錢去炒股時，就係唔知點解得個桔，如果係咁，可能買港樓一年有７％的回報，都好過「得個桔」吧！如果你自信和凡人不同，有超能的意志，能克服恐懼與貪婪，當然是炒股（不是指長線投資）好過買樓啦，港樓如港男一樣，以１０、２０年的角度看，競爭力開始逐步下降了，而港股就吸納了紅色成份，維持一定的競爭力。所以我話買樓好，或者起碼係唔好隨意沽咗自住樓去炒股，其實主要針對兩類人，第一，係大駛的年青人，買樓可以逼佢儲錢，第二，唔識炒股又好喜歡炒的人，咁樣可以令佢最後執番個橙，唔使得個爛桔。這是笨方法，只啱笨人用。

陸羽仁

　　美股急插，道指跌２０６點，一棍就跌落１２８１４點，險守１２８００關口，呢一浪回吐可能試穿１２８００大關。

　　美股似乎唔係俾大陸和香港的跌市影響，因為美股早段還微升，美國市場跌得最急的是金融股，皆因市場憂慮投資銀行的新披露規定會影響其盈利；另外亦有擔心美國通脹升溫，未來美國要加息而非減息。

　　美元要加息的猜測亦令美元急升，在亞洲市歐元兌美元跌至１．５３４３，美元兌日圓升至１０４．８，但油價仍衝高位，上到１２３美元一桶，令金價唔至於跌得太多，報８６８美元一安士。

　　先講股市，幾個市場都係以「無名腫毒」的形式大幅回吐，港股昨日大跌的原因未明，首先排除的原因是跟A股跌，因為香港H股跌得快過A股；一般相信是中國銀行一名研究員的報告倡議人民幣一次性貶值，令到人民幣不交收遠匯急跌，影響了外資的信心；另一「理由」是市場傳聞有兩名中國證監會的前高層被調查，令人擔心有大量A、H股牽連在內。

　　大陸股市急跌的「原因」被認為是平安保險的１０００億元集資大計將會復活；而美國股市大跌的「原因」就是投行的新披露規定。

　　老實講，聽完這些「原因」，我都覺得理由未夠充份，特別話A股跌因為平保集資復活，更加係攞來講，平保集資要阿爺審批，而家無人信阿爺要隊低個市，又點會俾平保上馬大集資？

　　我認為三地股市急跌，原因好簡單，就係近期升得太多太急，一次調整期待已久（英文講long overdue），你睇大陸A股一個星期左右從低位反彈２５％，港股上個月升咗１０％，美股從上月初低位１２３００點升到１３０００點樓上，亦升了６％，特別是美國金融股在次按風暴最壞時間已過的預期下，升得更急，升得多之後，自然等機會調整一下。

　　若然我估計正確，這些只屬「健康調整」，不至於大插，三地自然是大陸的回調幅度較深，上證綜指若守不住３５００點，就要試３３００點；港股應以中等幅度調整，有機試穿２５０００點，但只要美股唔大插，港股都未必會落得太低。至於美股，１２８００點應有支持，若穿１２８００點，下一關１２６００點會好硬，不易跌破。

　　反而美元的走勢值得注意，美元開始出現減息週期完結、未來會加息的預期，令６月２５日再減息的機會急降，若當日唔再減息，起碼確認減息週期完結。歐洲經濟唔好，看來歐元要減息，匯價可能再落，所以歐元兌美元急插，小心美元有一浪反彈，直至６月底確認不再減息為止。所以這一個月好難炒外幣，買入後升少少唔食糊可能會被套住，亦不能盲目期望人民幣會不斷升值，從中央增加香港人民幣交收這些動作，已顯示他正給香港人訊息，唔好一窩蜂換人民幣博升值，小心人民幣會回吐。
陸羽仁

　　美股跌後反彈，沃爾瑪和新聞集團的業務達到市場預期的上限，加上商品股在金價、油價上升時有支持，美股道指升５２點，升幅０．４％，升到１２８６６點。

　　母親節快到，網友sexyphone一段留言，令我感受殊深，佢話：「政府賣地, 係西貢成8千蚊一呎, 我同亞媽講, 嘩好貴, 不過我都想住呢D地方, 亞媽話, "你有機會o架! 我就冇啦, 想住大D地方都冇機會啦, 你讀到書, 又搵到錢, 咪有機會囉" , 老豆亞媽用哂D錢係我身上, 幾十年仲係一家四口住係細屋.... 食完飯, 我返房關上門, 哭了......我已經好努力, 但係想令屋企人生活好d 都做唔到...亞媽呢一句, 唔知點解對我咁有信心, 但係我就更加唔開心, 出o黎做事先知, "讀到書" (佢眼中係u grad), 唔係一定搵到錢...我都唔知我係亞媽有生之年, 可以俾到幾多o野佢....」

　　網友們見sexyphone咁激動，好言安慰，sexyphone再留言：「 yy太, 袋鼠, soho, flower姐：thx, 我都明白你地意思, 好多嘢都唔駛好多錢都可以令身邊o既人開心, 母親節我地會簡簡單單食個dinner。可能係亞媽簡單咁講一句, 反而令我覺得佢都想生活好d..... 但係無機會啦..... (yy太, 我細個住木屋, 有兩層, 細個試過瞓瞓吓喺二樓碌咗落一樓, 起咗個大瘤, .....細個食飯一家人用一張2x2.5呎細摺枱食, 細佬一手按落張細摺枱, 反起哂d碗碟跌哂落地下, 細佬個人跟住跌落地, 個頭流好多血, 結果連咗5針..... 佢好頑皮,又試個差d俾附近貨車車死.....老豆其實係真正男子漢, 點辛苦都最後供上樓, 又供我同細佬入大學)」

「諗返起, 只係有少少upset，自己做唔到太多...我都想俾心機工作, ....., 我而家份工好stable, 我相信出面o既人都會想做我份工, 人工、 bonus、升職機會都好ok, 但係做o野我就一d興趣都冇, 又發揮唔到.....想轉field, 又冇其他experience, 所以努力進修.....好complicated....takes time and effort。投資, 可能係我唯一興趣同出路, 好一句十年人事幾翻新, 我會努力!」

Sexyphone，你係後生仔，經驗未夠，仲未完全明白老人家的心態，聽阿媽o既話有少少捉錯用神，等我呢個過來人話你知。你阿媽講到你喊嗰句話，講「你有機會o架! 我就冇啦, 想住大D地方都冇機會啦, 你讀到書, 又搵到錢, 咪有機會囉" 」佢唔係真係話佢好想住大屋，係講嚟安慰你，希望你唔好因為暫時住唔到大屋而唔開心啫，同佢想住乜嘢屋，關係唔大。

古人有句話：「樹欲靜而風不息，子欲養而親不在」，你唔好覺得呢兩句話老土，你唔等到你阿爸阿媽過哂身，加埋自己做咗人地阿爸阿媽，你都唔會真正真白呢兩句話的意思。我剛出來做嘢，每次出埠公幹，回港都會打電話俾阿爸阿媽報平安，順便講埋幾時回家食飯。而家無需要再打了，有時公幹回港，在機場經過公共電話旁邊，一絲絲失落感就湧上心頭，才記起當年連手提電話也未有，係用公共電話打番屋企，通訊科技進步了，但和爸媽的距離，已經變成無限咁遠。

如果講到回報爸媽，錢根本唔係關鍵，以為錢可以搞得掂就大錯特錯，錢唔係萬能o既（當然好無錢又真係萬萬不能，你一隻死狗咁，失咗業，日日同爸媽度水，佢地當然唔會開心），你發咗達，買間大屋俾阿爸阿媽，跟住一個月都唔返屋企一次，佢肯定更唔開心。佢地想見到仔女，想同仔女一齊，想見到佢地成功，所以你返去見佢多啲，唔好自怨自艾，令佢覺得你好成功，咁就已經１００分o架啦！百分之九十九爸媽的願望，就是如此簡單，講起上來好易滿足，但偏偏好多仔女就係滿足唔到，返多兩次屋企食飯都唔想，成日想出街同班friend玩。爸媽經常見你唔到，都幾傷心o架。

我阿媽覺得飲湯好重要，次次用大湯碗裝一大碗俾我飲，當時真係唔想飲咁多。不過１０年之後，阿媽變成癡呆老人，將成包毫子倒落去煲湯，那時才驀然驚覺，想飲阿媽一碗湯都唔係咁易啦！

講番Sexyphone你自己，大學畢業，份工又穩定，在爸媽眼中根本就係佢地想像到最理想的結果，真係唔好俾佢覺得你唔鐘意份工，為乜要令老人家擔心？佢地見到你時，你開開心心，佢地好易感染到你的快樂，見到個仔女工作生活愉快，家庭美滿，老人家就別無他求了，大屋？根本唔係佢哋杯茶。

至於你自己想轉行，若立定決心，想轉早轉，工作也好，投資也好，時間係最大的本錢，趁青春打好基礎，否則很難有所成。

對不起，講了太多和投資無關的事，最後都講少少啦。網友ho話：「陸sir:

你答牛腩兄個句："當你自覺睇市好準，天下無敵時，就要小心，短期內和自己看法相反的走勢正撲過來。"真係至理明言。 我昨晚回應yy太的買樓故事時, 好想加一句"塞翁失馬, 焉知非福, 塞翁得馬, 焉知非禍", 不過又驚好似好說教, 經歷愈多, 愈明白這句說話的真諦, 古人真係有智慧! 」

Ho又講：「好似舊年十月尾時，個個以為自已勁過畢菲特, 陸sir的勸告都充耳不聞, 不知熊為何物, 直到股災發生, 終於讓我們這群"股市新生代"知道股票一跌可以好大鑊, 雖然都交唔少學費, 但好慶幸這個預演來得早, 亦去得快, 大家尚有翻身機會。」

正如我早前同sexyphone所講，你地係後生仔，經驗未夠，我講啲嘢，我自己見過試過領過嘢，才知道世界是這樣。１９７３年我１０歲８歲時，就見住股市由１７００點跌落１００幾點，見到阿爸買股中招，知道股票可以變廢紙（係股票，唔係窩輪，窩輪就更易啦），１９７３年頭，香港環頭環尾充滿股神，結果咪．．．我自己買股，都試過中到唔中，連贏８個月，大贏特贏，有天下無敵的感覺，跟住就．．．

呢個世界，好多嘢都不斷循環，老豆養仔、仔養仔；美國發完達，戰後到日本發，後來又到亞洲四小龍，而家又到中國、印度，世界輪流轉，繁榮有時，衰退有時，股市樓市亦係一樣，要睇住大循環，小循環嚟做人，試多幾次，衰多幾次，你地就識o架啦。

陸羽仁

　　今日的股市真係好壞消息大鬥法，好消息係美股升，滙豐（００００５）美國業績優於預期；而壞消息就係大陸４月通脹奇高，人民銀行加存款預備金率，而四川大地震死亡人數８７００人，保險股、川渝股都會受壓。

　　美股昨日大升，皆因零售股有優於預期的業績，而最大債保商MBIA話自己有充足資金無需再集資，利好零售股和金融股，道指升１３０點，升幅１％，升番上１２８７６點。香港假前道指係１２８６６點，後來一日跌一日升番，差不多原地踏步，對香港屬中性。

滙豐的消息較正面，集團旗下的美國滙豐融資首季業績比市場預期為佳，美國滙豐首季只需為次按貸款減值３２億美元（２５０億港元），而滙豐美國仍能保持盈利，不致見紅，好過市場預計，由於滙豐亞太區業務強勁，只要美國唔好太衰，首季整體業績就容易有良好增長。滙豐在美國預託證券收市價折合為１３５．１５元，比香港升２．２％。

若無大陸因素，受滙豐消息刺激，港股今日應有可觀反彈，不過大陸的消息亦唔係幾靚仔，四川大地震，死亡人數近萬，上海交易所以未能聯絡四川和重慶公司負責人為理由，叫４５間川、渝公司停牌，直至它們發通告解釋地震影響為止，但這些公司如有在香港上市，今日仍然繼續買賣，上交所此舉明顯係怕四川重慶股大跌，所以搵個藉口跌佢地牌而矣。估計地震對四川或重慶的公路或廠房受損的公司，影響較大。除了四川和重慶公司外，財險這類保險公司恐會被人插一插，而交通、鐵路建設和水泥股會受惠。

不過地震影響只屬短期，大陸真正利淡的消息是通脹高企和人行加存款預備金，內地４月份通脹高達８．５％，近１２年高位，今年２月雪災高峰時是８．７％，３月輕微回落到８．３％，但４月又再上，去番８．５％，情況有點失控。

奇就奇在內地股市昨天對此數字反應不大，昨日數據公布後，市場反而穩定下來，上證綜指收報３６２６點，微升１３點。不過人行在收市後宣布加存款準備金率０．５％，至１６．５％，這是央行今年第４次加存款準備金率，要求銀行提高存款準備金，即是減少它們能借錢出街的比例，變相收緊銀根，截止今年３月底的數字，單是加準備金已有凍結資金２１００億元人民幣的效果。

高人話，大約兩個月前，阿爺仍然估計到４月時，通脹有機會顯著回落（我估起碼係見到６％或以下，才叫「顯著」），所以溫總理在人大開會期間，才會作出全年通脹４．８％的估計，但現時４月通脹再上高位，未有回落之勢，形勢都幾嚴峻。現在再來一次大地震，災後重建，應會推高水泥等建材價格，亦不利控制通脹。

　　面對內地的高通脹，對內地股市不容太樂觀，估計銀根仍會大力收緊，對內房股不利，至於被控制價格的行業，如成品油和電力等，就要望天打掛，看阿爺有幾多補貼了。


陸羽仁

　　美股昨日上落波動１１次，好壞消息紛呈，商務部公布零售銷售數據，扣除汽車類後有０．５％增長，遠佳於市場預期，美國可能進入停止減息的週期，但沃爾瑪的盈利預測又向下調整，加深市場疑慮，美股道指一度跌穿１２８００點關口，收市跌４４點，收報１２８３２點，看來１２８００點都有頗大支持，一跌穿好快就上番，目前正在１２８００點的上下水平整固。

早幾日講Old rich的投資教誨，網友均兒有一個回應，我好想再討論一下，佢話：「再次多謝陸si教誨，我知我係較蠢那類型，甚至陸sir你教咗我咁耐，我仍然蒙查查，就算你診我的病話係炒熱門股，但我都唔知點改善，係蠢得沒藥醫那種。」

「我13蚊買電盈衰咗，不知悔改，又在48元買中移動，跟住27元斬咗；0.9毫去買奧瑪仕，依家得幾仙，十合一後都沒9毫，輸左9成幾，重輸埋941依家的升幅，嘿嘿!真係一隻蠢極的大蠢豬。」

「其實好似我咁蠢的人，根本就係適合買樓那種，我都唔適合炒股，我好贊成陸sir對買樓的恴見，唔同意蛋散股友的四十歲才買樓理論.，我有朋友好年輕做生意，做做吓生意失敗咗，依家四十幾歲了，學佢話齋，無瓦遮頭，這時他感到好悲哀，成日話以前樓價咁平時唔識得買幾層樓，依家樓價咁貴真係買唔落手。」

「我未結婚時就買咗政府居屋自供，結婚時就想換大屋，結果換吓換吓變成炒樓，當時都好過癮,成日唔返工周圍睇樓，好彩負資產來到時，我只係有一個未賣出的單位係手，出租後幾乎唔使點供，之後享盡樓價升時那種喜悅。因為我炒過樓，喺02、03年又俾我趁勢以好平的價錢買咗一個居屋同一個商舖，依家吃盡升幅，那種滿足感，真係好enjoy。所以要趁後生買樓，人生第一投資就係要為自己建立一個幸福的小窩為首要，唔係老時會覺得好失敗。」

陸羽仁特別想再講均兒的個案，佢話自己買股時係蠢到無藥醫，點解佢「咁蠢o既人」，買樓又唔似買股咁差呢？

　　首先講入市時機。股民買股票會嚴選入市時機，但不幸地，現實中大部份人挑選的時機都唔係好時機，股市愈熱，股民感覺愈好，愈多新股民入市，到股市熱爆時，就係大量平日唔買股的人入市買股的時候，因為佢地「聽人講」買股票賺了大錢（又係「聽人講」），抱著唔買就笨的心態，投入股海；本來已有買股者，更會調動大筆資金入市。大家可能唔覺，股市愈熱，就愈多人買報紙睇股經搵貼士，財經報紙大銷特銷，香港兩份財經報紙，都係喺股災年創刊，信報在１９７３年創刊，經仔日報在１９８７年創刊，結果兩年都有股災，呢個唔係巧合，係有內在原因，股市大旺，對財經報刊需求熱爆，才有財經報紙出世。

　　我同啲中環茶友講笑，幸好去年只是有財經週刊面世，無新財經報紙，否則一定有大股災，所以邊個老闆想搞份財經報紙時，最好忍忍手，先去沽吓期指，一定有斬獲，賺番筆等個市跌到殘才搞財經報都未遲。講番轉頭，好多人平時唔買股，等到股市大熱才去買，無論買好股、壞股，都好易接火捧。Old rich的智慧是，長線投資，等個市靜時才去買，唔好等個市旺時去搶。若均兒不是在旺市買股，至少可以避過在科網潮買電盈，和在濠賭股潮買奧瑪仕。呢個故事教訓我地，散戶揀買股時機，好易揀親都錯。

　　買樓唔同，好多人唔係揀時機，而係睇自己的需要，可能係打工之後開始有個錢，想買間樓同屋企人搬開住，可能係結婚一定要買樓，至少有一半人買樓自住不講時機，咁反而好，咁就唔會在最旺時才入市。

　　再講出貨時機。散戶買樓，特別是買樓自住者，多數長揸不放，咁就可以享受資產長線隨經濟增長而升值的好處。買樓自住者要捕捉市況而放樓，改為租屋住，感覺好煩，大部份人唔會咁做，反而幫咗你，起碼逼你坐貨１０年８載。假設你好似股神巴菲特咁叻，在１元多買了中石油，佢升到３、４元時，絕大部份人會放咗，會覺得升咗兩倍，賺夠仲唔走？沽完大市真係回，隻股真係跌，你更加覺得自己天下無敵，睇市奇準，四圍同人講，結果就無買番。

買樓坐貨１０年好易，買股坐貨１０年好難，升市時會沽，跌市又會沽。好似均兒咁，在科網潮貴買４８元的中移動，跌到２７元斬咗，你唔可以話佢沽得好差，因為中移動後來跌到１０幾元，問題是均兒沒有買番，卻改行去買奧瑪仕，輸上加輸。如果佢在９７年樓市高峰時買咗問太古城海景樓自住，後來樓市急跌，樓價無咗一半有多，但如果佢供得起，好可能會死坐落佢，無咁易在低位沽貨。更加唔會低沽太古城海景樓，走去換間佐敦道縮水商場舖，買樓唔會咁，買股會咁，這裏又涉及第三個問題，好樓壞樓較易分，好股壞股難分。

最後想講炒樓易知，炒股難辨。均兒話自己炒過樓，幸好在跌市前放了大部份，所以唔死得。我估除了她有運外，係因為炒樓者有自知之明，手揸３、４間樓，係人都知道自己係炒樓，所以較易在高位減持，唔會死坐貴貨。但好奇怪，用同樣的錢在旺市買了大批股票，好多人都會話自己係「投資」，唔係「投機」，炒股而不自知，想長揸，咁就死梗。

我唔係想叫大家一定要去買樓，香港經濟已趨成熟，買樓無過去咁好，我只想話俾大家聽，這些例子告訴我們，大部份人買股的手法，係會送佢上路，唔係送佢到彼岸。簡單到在市靜時平買好股長揸，好多人都做唔到。

陸羽仁