美股連彈４日後又再插，道指最多跌過２１０點，但尾市彈番少少，最後跌１３４點，跌幅１．１％，跌到１２５０３點，險守１２５００點大關。

美股大跌皆因評級機構標準普爾調低投資銀行美林、雷曼兄弟和摩根士丹利的評級，第二大投行摩根士丹利的評級降一級，由A+ 調低到AA-，第三大投行美林亦降一級，由A +變成A，第四大投行雷曼亦同樣被降級。至於第一大投行高盛就維持 AA-級別不變，四大投行的前景維持「負面」。標普降低三大投行評級，令人覺得次按風波對金融機構的影響未過，對股市有壓力。美股早前是跌後反彈，如今再跌，尚在尋底之中。港股的跌後反彈亦會完結，又再進入尋底期。

　　網友Henry昨日突然問，有乜方法可以在３個月內由２萬元變成２０萬元，他出了點意外，有６０％機會要呢筆錢去結緍。他而家工都無，只得２萬，暪住另一半去儲錢和借錢，佢咁講：「最緊要九月時我要有份工先得...覺得她不想這樣委屈咁樣嫁給我，要體面一些才得．．．２０萬其實是最少la．．．最好應該要有６０萬先得....更加無可能...不能太hea ar....顧不到什麼壓力不壓力，儲不到就死梗．．．或許這就是我的命運。是很沉重，但都要擺上肩頭上承擔，多多都要。」

　　從投資、投機、以至賭博的角度，想在３個月內由２萬變２０萬，都是不現實的想法，由２萬變到２０萬的機會相當細，以賭博論，賭大細，在賭場買中一舖大細的機會約４７％，一舖中就２萬變４萬，二舖中就４萬變８萬，三舖中就８萬變１６萬，雖然唔夠２０萬，都差唔遠囉，但連中三舖機會率係得１０．４％，

１０％機會率係乜嘢意思，即係平均玩十次中一次，你想像吓你玩俄羅斯輪盤，有１０個入子彈位，入咗９粒子彈，你攞住把鎗向自己個頭開一鎗，要咁啱打中唯一一個無子彈的彈孔先至唔使死，你都可以同自己講：「呢次死梗啦！」

　　唔賭錢去投機，炒股炒輪，我估３個月由２萬變２０萬的機會，仲細過賭大細，點解？因為投機講心理質素，你咁心急，咁亂，亂咁博，平時博得到，呢舖都博唔到，財不入急門，就係咁解。

　　昨天講到價值，其實唔止買股買樓，婚姻都有價值，係要追求兩人相愛，可以長相廂守（對唔住，觀念略為老土，但至少情侶結緍那一刻仍然係咁諗啩）。我唔知Herny搞出乜嘢不能控制的意外，但佢工都未有，就急急要姞婚，或許有他的苦衷，但等得就不妨等吓先，唔等得只能以２萬元的預算去結婚。

　　Herny可能話唔等得，而且女友係天人化身，不可以放棄。但我估Herny可能未結過緍，不知兩人相處的難處，一個人住要點就點，兩個人住要互相遷就，連廁所板拉起還是放低，都要互適應，你話：「她不想這樣委屈咁樣嫁給我，要體面一些才得」，這是女仔正常的想法，但如果你無咁大個頭要大戴咁大頂帽，結婚花費咁大，欠落一身債，等如負重磅跑長途，死梗。

　　貧賤夫妻百事哀，這是恒久不變的道理，假設你借到２０萬結緍，但一開始就欠２０萬債，太太和你結婚風光過後，才發現你是空心老倌，叫你去旅行又無錢，叫你買嘢你又無水，你事先無向佢坦白，你估佢會唔會覺得俾你搵咗笨？跟住就日日家嘈屋閉，永無寧日。

　　好多人以為一擁有就是永恒，誰不知很多好東西只是曾經擁有，轉眼又會失去。你充大個頭夾硬去花鉅資結婚，婚後一貧如洗，你只知結婚之難，不知維護婚姻更難。婚前大家談戀愛，各自將自己美好一面示人，男方去女方遷就十足，結婚之後就盡顯男兒本色，女方本來已經覺得好難頂（反而亦然），若再加上你係窮鬼（因為婚前過度借貸），就更加惡頂。花了你能力以外的鉅資去娶一個靚女，就等如貴價買好股一樣，買嗰吓好興奮，但長揸吓去，就發覺好難捱。

　　婚姻的真正價值是兩人的相愛，如果你向對方坦白，告訴她你的財政困難，佢立即頂你唔順，咁樣即使你而家過到骨，女友結婚之後發現真相，佢一樣會頂你唔順。互相坦白，共同解決困難，對長遠相處有莫大幫助。若佢堅持要面子，但你唔使要面子，兩個人性格根本不同，長久相處亦有問題。

　　唔好怪陸羽仁太老土，唔止Henry，其他網友如果想結緍，但又發覺唔夠錢，只能怪自己過去無儲錢，或者係使大咗，或者係賭多咗，總有一個原因，令你儲唔到錢。儲埋個錢，合理投資，應該早早計劃，無得臨急抱佛腳。

陸羽仁

美股微跌，道指跌１２點，跌穿１２４００點關口，收１２３９０點，仍在上下尋底。聯儲局主席伯南克話美國有通脹危險，令人相信聯儲局呢個月尾議息時唔會再減息，年底更有可能加息，美元強番，刺激油價回落，昨日又大跌２美元，跌到每桶１２２美元的水平。


TVB劇集「師奶股神」用上「鱷口偷金」這句話，講師奶蔣如珠點樣變股神鬥大鱷的故事。我怕大家誤以為師奶好易鬥贏大鱷，唔怕長氣，又再講吓森林規律。

我以前講過，股市如森林，是一個弱肉強食之地，森林中有鱷魚，即係股市中的炒作大戶，包括本地鱷及來路大鱷，佢地係最兇猛的肉食者，殘殺森林中所有弱小生物。森林中有大象，即係股市中的互惠基金和退休基金，佢基本上係素食者，一般唔會食森林中其他小動物，只是食大量植物生存，即係較少炒作，多作中長線投資。森林中另一物種係老鼠，即係股市中的散戶，佢本身草又食肉又食，但佢地本身又係大鱷的主要食物，老鼠自以為好叻，其實無嘢叻，勝在繁殖得快，鼠媽媽一胎生十幾隻，幾個星期又生一胎，所以大鱷食老鼠食極都唔完，食完一批，轉眼又有另一批入場，成為大鱷的美餐。

睇吓投機家Victor Sperandeo的名著《Trader Vic—Method of a Wall Street Master》(譯作叫《專業投機原理》)就有好好的例子，講明在鱷口中不易生還，都唔好講話要偷金了。Victor Sperandeo講到一個「短吻鱷原則」，呢個原則係基於短吻鱷的捕食方法研究出來，佢話當短吻鱷咬住獵物時，獵物掙扎得愈多，短吻鱷吃得愈多。想像一吓有隻短吻鱷咬住你隻腳，你用一隻手去打佢個頭，佢鬆一鬆口再咬，就連你啲手同腳都一齊咬住，你掙扎得多，佢咬得多。所以俾短吻鱷住隻腳時，唯一的逃生方法係犧牲隻腳，切斷隻腳走人，翻譯成股市的語言係：「當你知道自己買錯嘢時，就馬上清倉啦」。Victor Sperandeo話自己買嘢蝕本時，唔好嘗試合理化佢，唔好希望會好番，唔好去祈禱，走啦！唔好將個組合改高改低，對沖吓，或者做啲乜嘢，簡簡單單止蝕走人算啦！（p.15）呢個係散戶係鱷口偷唔到金，仲俾鱷魚咬住隻腳時，最佳的保命方法。


Victor Sperandeo話自己花好多錢才學到這個「短吻鱷原則」。佢話１９７０年代後生時，有一次本來投了小注在INA保險的期權，買了２０張１２月到期、行使價是２５美元的INA認購期權，期權金係１．２５美元（等如１２５美元一張合約），他當時自定買期權的止蝕守則係輸０．２５美元就打靶。佢一買入INA期權後，正股就開始跌，期權金開始先跌０．１２５元，後來跌０．２５元，到咗佢的止蝕價，但佢無執行止蝕，就在反方向「對沖」，見隻股跌，就沽出６０份１２月到期、行使價係３０美元的認購期權，收回每份０．７５美元的期權金，換言之佢買認購期權唔順手，就沽出更大量上方的認購期權，希望執番上方３０美元行使價期權的期權金，來補下方佢買２５美元行使價認購期權之蝕。

做人衰開有條路，到佢沽突INA３０美元的認購期權之後，INA突然傳出併購消息，股價開始調頭急升，佢以每份０．７５美元沽出的認期權，急升到１．６２５美元，你估Victor Sperandeo點做，佢又沽出行使價２５美元的認沽期權，收回每份１．２５美元，博隻股再升。點知INA又走出來否認併購傳聞，隻股又回，認沽期權又抽上。Victor Sperandeo每做一步就錯一次，原本如按止蝕規則行事，只會輸５００美元，結果佢輸足６０００美元，佢輸大１２倍！即使買第一批期輸哂亦只係輸２５００美元，愈做愈錯，愈掙扎愈輸得多。

記唔記得我講的黑社會大佬教個靚去同人開片的故事，佢教個靚仔「一唔對路就閃」，同Victor Sperandeo教的原則係唔係有啲類似呢？呢個就係森林法則，好難作理性分析。你千祈唔好以為Victor Sperandeo無諗基本因素，唔係，INA保險平時係一隻成交唔多，郁動好少的股票，所以沽佢啲期權按道理無錯，只要股票波幅唔大就可以吃盡期權金，點知偏偏分析完都出錯，而Victor Sperandeo最大的錯誤是一次又一次唔守止蝕原則去炒作。

　　我叫大家投機炒股時要止蝕，唔好溝淡，贏就谷，輸要縮，道理亦係一樣。

陸羽仁

　　今天早上見到美股反彈２１４點，有朋友講起，乜美股咁兒戲o架，講幾句嘢，出少少數據，又話升２００幾點？我的反應是：「跌得多咪升囉，股市係咁上上落落啦，唔係人哋點搵錢，美股一日可以升１．７％，但全年升跌可能只有１０％，但中間就有好多起起跌跌啦。」

　　先睇吓啲表面嘢，美股上升的觸發因是石油股和零售股帶動。油價跌到１２２美元之後，昨日因美元回軟而急促反彈，升５．５美元，升番上１２７．８美元一桶。油股急彈，標普５００能源指數因而上升４．４％。

　　沃爾瑪及 Costco Wholesale Corp的銷售係證券分析員預期的高位，令零售股全線做好。美國勞工部公布上周新申領失業救濟人數減少１．８萬人，減至３５．７萬人，是過去一個月以來最低。美國明天公布的５月失業數字，將有更多啟示。彭博調查的經濟學者預計，美國５月就業職位會減少６萬個，失業率會由對上月份的５％，升到５月的５．１％。基金經理認為，若失業數字好過預期，就顯示經濟已趨穩定，而非不斷下滑。

　　在油股和零售股的刺激下，道指升１．７％，升到１２６０４點，打破過去４日的跌市。道指呢一浪尋底，由３月大跌後的反彈浪高位１３１００點跌下來，前一日試穿１２４００點，從高位回落了近５．５％，以一個中期調整來說，幅度已有相當，可能離底不遠，調整了咁多反彈吓唔奇，一彈就彈２１４點，插得急，反彈力度亦較大。

　　美股後向可以咁睇，１２４００點支持力唔錯，如今彈緊，當然可以再彈高，但亦不排除彈完再回，再試１２４００點，呢啲叫築底，如果再回調時不再大力插穿１２４００點，尋底就成功，呢一浪回調的底部就在這些點數。

　　油價亦是影響美股的一個因素，油價插得太急時，油股亦急跌，美股也會回。油價暫時未改向上之勢，但各國的回應行為都走向控制原油需求的方面。正如我在頭條日報專欄所講，亞洲各國紛紛調高零售燃油的價錢，由於多國過去都有津貼油品，但原油價格連番急升，一年升了９４％，亞洲國家開始頂唔順，被逼加價，印度本周已加油價，印尼昨天亦加價，台灣亦傾緊加價。

　　加零售油價自然會加劇通脹，亞洲國家的對應手段是約埋一齊加油價，又約埋一齊加息，加息會推高匯價及增加資金成本，有約束通脹的作用，不過就不利經濟增長。

　　　仲有一條消息同油價有關，八大工業國計劃要求中國和印度一起，控制能源使用，因為日本相信若無這兩個經濟高增長的國家參與，全球節能的努力無法成功。八國在５月２６日開會承諾到２０５０年會減少５０％的廢氣排放，但認為要拉中、印兩國加入。國際壓力要求中國節能，亞洲多國包括印度已加了零售油價，中國加油價的日子看來也為期不遠了。

　　若包括印度、中國在內的亞洲各國加油價，顯然會減少油品需求，長遠會對油價有壓力，看來回應高油價的反作用力，已慢慢在形成中。

後記：下周一端午節網誌休業一天，下周二見。

陸羽仁

　 　上周五油價大升１０美元和美股大跌４００點，惹起美國政府注意，開始出口術救市。

先睇美股，麥當奴的銷售上升，加上油品股上漲，刺激美股早段升過１２０點，但第四大證券行雷曼兄弟宣布第２季有２８億美元虧損（２１８．４億港元），同時集資６０億美元（４６８億港元），由於佢賣出的普通股和優先股比上周五收市價有１３％折讓，令雷曼股價大跌８％，拖低金融股。

再加上紐約儲備銀行主席Timothy Geithner話全球有「非常大而實質的」價格上漲；而達拉斯儲備銀行主席Richard Fisher話決策者慢慢要理解加息的可能性。這些言論令人覺得聯儲局在下半年會加息。利率期貨交易顯示，早前只有２６％的市場人士相信聯儲局在９月中會加息，由昨天則急增至４９％。美股視加息為壞消息，道指一度倒跌１０幾點，最後反彈，道指升７０點收場，升幅０．６％，收報１２２８０點，叫做有少少反彈。

你拉闊少少去睇，就知道兩個儲局成員齊齊出來講美國有可能加息，應該係一個有計劃的合唱。更關鍵的人物係美國財長保爾森，佢接受CNBC訪問，話佢不排除任何支持美元的政策手段，包括入市干預支持美元匯價。

保爾森話，「我永不會將干預匯市、或任何政策，從選擇中剔除．．．．．我不能猜測我們會做或不會做甚麼。」佢又話美國長遠經濟基本因素比起世界其他工業國，甚有優勢，這將會在美元匯價反映出來。保爾森將在本月１４日到日本參加８國會議，在會前咁喊話，更令人聯想８國集團會唔做為弱美元做啲嘢。

布殊任內未曾干預匯市，美國政府上一次入市支持美元要追溯到１９９５年，而克林頓總統任內就曾在２０００年參與多國入市支持歐元的行動。在保爾森講話後，美元應聲彈起，兌歐元升０．９％，升至１．５６３４，兌日圓亦升１．２％，升到１０６．２２，叫做頂番起美元匯價。

不要以為這些官員講話係隨意行動，佢地係出緊口術救市，上星期油價咁急升，美股又大跌４００點以上，已有災味，美國財金官員要急急出來救災。油價急升的近因係美國失業數據唔好令美元急回，觸發油價大升，所以美元弱係油升股跌的主因，要壓住油價頂住股市，亦要從頂高美元做起。

保爾森接受CNBC訪問，隨時係臨急安排，吹吓「干頂匯市」之風，又叫埋兩個儲局理事出來，暗示吓下半年可以加息，又係支持美元匯價的消息。這還不止，仲要叫沙地阿拉伯一齊出來出口術，沙地能源部長納伊米出來講，話油價己升得不合理，暗示會增產。大家都知沙地係美國的馬仔，布殊隨時一個電話打過去，叫沙地派人出來吹吹油價淡風，沙地受美國軍事保護，唔願意講都要講。

美國官員搞到身水身汗，叫做頂番高美元匯價，推番低油價，紐約期油在美國市跌番４．１９美元，但在亞洲市又彈番高近１美元。

港股昨日無市，日股昨日跌３００點，跌幅２．１％，收１４１８１點，今早跟美股反彈，彈番６４點。港股難免一插，匯豐在美國預託證券跌３％，跌到１２８．２８元，中移動在美國則跌３．９％，跌到１１０．９６元。

美股仍處弱勢，美國官員大力救亡，行動頗快，未知能否止住跌勢，港股短期仍積弱，上半個月要反覆尋底。



陸羽仁

老美的口術止咗兩日咳，但頂咗兩日美元又跌，油價回頭急升，美股又面對通脹及加息的壓力，再插２００點，呢吓又要睇老美有無實招出場了。

美股道指上周五跌４００點以上，在美國官員眼中，這種跌幅離股災不遠，所以過去兩日出盡口術頂住美元推低油價，用的方式是吹出美國會加息控制通脹。不過這樣又惹起一個環球加息的憂慮，事實上印度昨日也突然宣布加息對抗通脹。

在這種氣氛下，美元又回吐，加上美國油品庫存遠比估計低，期油價格又急彈５美元，上番１３６美元一桶的高位，美股一開市就插，特別是受加息和油價影響的銀行股和交通股跌得最厲害。

聯儲局講經濟狀況的「褐皮書」話，美國經濟在４、５月基本疲弱，消費減少，而部份行業的生產者就把高成本轉嫁俾消費者，映照出一幅經濟衰弱的圖畫。在這種氣氛下，美股無運行，道指差不多以全日低位收市，收報１２０８３點，大跌２０５點，跌幅１．７％。

昨日美股走勢，顯示美國官員的口術未能止住油價的升勢，而股市又因擔心加息而下滑，基本上未能止血，相信美國官員又會急謀救市良方，其中一個焦點係月中召開的８國集團峰會，要看能否有支持美元匯價，或者係對抗油價上升的國際行動，可以為環球油價急升、股市下滑止一止血。

　　而家的問題不止是美股跌，而係在高油價影響下，環球出現高通脹，各國被逼要用加息來對抗通脹，咁就吹出一種淡風，據彭博做的一個環球用戶調查，發覺從美國到歐洲到日本的投資者，愈來愈多人相信，由於商品急升侵蝕盈利，逼各地央行加息，未來六個月股市會下跌；只有巴西的投資者仍然相信未來半年股市會升，但樂觀者亦在減少中。彭博這個調查是在６月２日至６日做的，而６日剛是美股大跌４００點的日子。
　　彭博這個全球專業信用指數由５月的２２．７，跌到６月的２１，顯示世界各地的投資者都愈覺悲觀，指數低於５０已顯示負面氣氛。而歐洲三個主要國家的投資者都認為美元兌歐元的跌浪將會終止，因為美國聯儲局將會加息對抗通脹。
　　世界金融吹淡風，美國政府要同時和高油價及滯脹鬥法，倒底佢地行動有效啲，還是滯脹來得快啲，無人知。在這種市道，投資宜審慎，想買都不要太急，太快。港股勢將插穿２３０００點，向２２０００點進發，成手蟹貨者，千祈唔好走去撈，你地已經無本錢買。成手現金者，買貨也不宜急，見大跌，細細注，因為我覺得呢個跌市咁o既走勢，無咁快會完也。而家最緊要有現金，有錢唔驚將來無貨買也。
陸羽仁

　　    　美股昨晚又玩過山車，道指早段在消費數據理想、美元向上，油價回落５美元等消息刺激後，一度升過１８５點，跟住就反覆向下去，下午一度回落到近上日收市位，尾市彈番起少少，道指收市升５７點，收報１２１４１點，升幅０．５％，美股仍處於一個不穩定的尋底階段，而油價後來亦在尼日利亞油田工潮聲中，反彈上去，５美元的跌幅消失無踪，升回原型。
美國退稅支票５月送出，５月零售銷售數字比市場預期多，令到沃爾瑪等消費股上升。摩根士根利發表報告叫人吸納金融股，亦令一眾同行受惠，股價連跌５日後反彈。

美國官員出咗一輪口術，油價仍處於１３６美元，大上大落，仍在高位掙扎向上，但美元已露出一定的強勢，反彈到一個小浪的臨界點，我有個師奶朋友早前買了和日圓掛鈎的ELI（外匯掛鈎票據），行使價１０３日圓，票據年息１０厘，３個月收２．５厘息，下月到期，佢問我點睇日圓，我祝佢好運。我話下月日圓匯價維持在現價１０７．９圓一的都唔奇，弱過１０７．９圓的機會，可能比強的機會大。若以１０７．９圓計，佢要輸４．６％匯價，賺咗２．５厘「息」都補唔番，我計一輪數，師奶朋友好似唔係好明，只係反覆問我好唔好揸日圓收息，佢好似以為揸日圓長期有１０厘息收，搞唔清楚嗰的只係ELI的「利息」，其實那些「利息」，只係佢沽咗一個三個月在１０３價位的認沽期權收取的期權金。

講番日圓，現價１０７．９圓，美元兌日圓已經升番到一個臨界位，若升破此位，就會走番今年１至２月的１０５至１０８圓的密集區頂部，照計美元升到密集區，應該在此區位上落吓，無咁快升穿，但如果咁厲害一次過升穿此密集區，預計會觸發較大量的日圓好倉盤止蝕，就會去番去年８至１０月的交易區域，那時日圓是在１０７至１１７圓之間炒作。

美元兌歐元和日圓一樣，同樣去到一個轉弱的臨界位，現價１．５４，按理應在這些位置上落消化，但同樣道埋，若美元一舉升穿此位，將會去番去年１１月到今年２月的交易區間１．４５至１．５。歐元講緊加息，預計兌美元會比日圓硬少少。

美元兌其他高息貨幣的走勢近似，以紐元為例，由於紐國央行話經濟弱可能要減息，紐幣走勢更弱，現價０．７４９９，若跌穿此位，小心去番舊年１０月前大位０．７２以下。

美元在加息的預期下，有可能進一步反彈，進入一個幾個月的中期趨勢。美元兌各主要貨貨都升近臨界點，不爆發還可，一爆會再衝出一浪行情，外匯投資者或炒家，最好定位止蝕。未到位可以守吓，一到位就要打靶。

你可能會問，點解美元兌主要貨幣已轉強，但推唔低油價，到底兩者有無關係？網友望升石亦問：「前兩日, 美財長保爾森公開講話, 油價高企係由供求導致, 並非投機炒賣所致。點解佢要咁講呢? 上星期唔係話要徹查炒賣行為架咩?仲以為咁樣d油會炒得無咁勁, 點知回咗五蚊之後彈返十蚊。」

雖然好多人話係中國印度的需求令油價大升，但多方數字也顯示全球石油供應大致平衡，油價急升的底因是美元轉弱，以美元計價交易的商品就大幅上升來彌補，慢慢就引發全球商品炒風，所以油價大升，和美元下滑絕對有關。對此美國財長保爾森心知肚明，但佢從來都無承認美國過去一年行緊弱美元政策，唔認美國透過減息隊低美元匯價來救自己，所以在佢口中油價上升有一百個理由，總之唔關美元弱事。佢查唔到有對沖基金炒油，咪唔講炒賣導致油價升，又講番供求，總之呢啲政客o既說詞，你信一成都嫌多啦。

唔好信政客講乜，要睇政客做乜，保爾森見油價急升令美股大瀉有災味，第一時間講不排除干預美元匯價，又叫聯儲局班人出來吹話會加息，就係想挺美元遏油價上升。但原油相對於日圓、歐元，更加強勢，所以更難跌，跌完又急彈，再跌又再急彈，相信要確認美元真正衝破臨界點，進入更明顯的反彈週期時，油價才會回落。若然美元反彈力度不夠，衝不破兌各主要貨幣的臨界點，就更加約束不到油價。在未來一個月，油價、匯價、股價，仍然會大動蕩。美股掂唔掂，關鍵都係要看保爾森的功夫，睇佢導演呢幕美元反攻，成唔成功。

廣告時段：頭條老總來電，請陸羽仁代為宣傳一下，星島新聞集團製作了四川地震悼念集，發起慈善義賣。為籌得更多善款，更獲藝人方力申、成龍、李克勤、容祖兒、陳奕迅和黎明於悼念集上親筆簽名作慈善拍賣，歡迎網友於6月12日至16日期間出價競投。網址係http://www.hkheadline.com/special/ebid/index.asp

陸羽仁

　　八大國的G８峰會，上周末在日本大板召開，會後聲明把矛頭指向商品價格，指油價、糧價上升帶來通脹，是環球經濟增長的「頂頭風」，不過會議無提及美元匯價問題，到底這個八國聲明，又是否美國期望的結果？

八國集團由過去關注次按導致的信貸緊縮，改為關注通脹，的確是一個大轉向，這個轉向有兩個意義，一是次按危機開始消退，二是通脹危機正在升溫。正如我在頭條日報專欄引述前聯儲局主席格林斯潘所講，美國利息相對於倫敦銀行同業拆息的差價，正在下跌，意味風險溢價在下降中，雖然不能說美國金融業已經脫險，卻是離脫險不遠。

　　但通脹危機在升溫，油價在６月６日炒上１３９．１２美元一桶的高位，高升的油價和糧價，正大幅侵蝕消費者的購買力，越南是全球第一個國家因此引爆金融風暴，八大國把集點轉到通脹之上，也是一個合理對焦。

　　問題是八大國對高油價沒有提出什麼解決方法，只是沿傳統的口徑，叫產油國增產，和叫用油國、特別是新興國家減少用油。產油國不見得會大力增產，如今只有和美國關係良好的沙地表態話會增產；至於減少用油，八大國叫新興國家減少燃油補貼，亞洲多國最近被逼減少補貼加油價，立刻惹來大量示威，政治不穩，她們大加油價的空間亦十分有限。

　　為何八大國不直接指出美元匯價下跌是油價和商品價格急升的原因？因為美國反對。美元自２００２年起至今，跌了３０％，部份國家認定美元下跌係油價上升的元兇，法國財長Christine Lagarde 及俄羅斯財長Alexei Kudrin 話投資者買入原油和糧食，作為弱美元的對沖，但美國財長保爾森否認這種說法，佢話油價的升幅，遠超了美元的跌幅。意大利財長Giulio Tremonti更認為油價急升有炒作因素，但保爾森和英國財相Darling 就堅持油價上升是供需因素所致，因為新興國家有大量需求，推升油價。你睇只有美國忠實盟友英國認同保爾森的講法，就知道美國的說法有多大說服力了。既然八大國無法就油價急升源於弱美元達成共識，自然無統一立場支持強美元了。

　　這正好達到美國的目標，目前還用不著八大國聲明捍衛美元咁大動作，保爾森在會期間唱吓「強美元」論調，已得到深受通脹困擾的法國財長Christine Lagarde 及俄羅斯財長Alexei Kudrin等人支持，這樣雖然不如八國聯合聲明咁有力，但也達到一定的效果。在八國開會前，匯市期望八國聲明支持強美元，所以美元一直向上，結果並非如此，但保爾森和法俄財長支持強美元的論調，已有一定效果，今早亞洲市美元匯價無大變，兌歐元略回到１．５３９，兌日圓還企在１０８．３８的高位，黃金每安士８７２美元，亦無變動。

　　美國不會一招去盡，一定會慢慢玩，美元弱，利息低，有利美國復甦，但美元太弱令油價升得太快，亦對美國不利，所以到咁上下減定息之後，就唱吓將來會加息，唱到美元強番少少，抑制油價升幅，咁樣就對美國最有利，減息期可以延得幾耐得幾耐，佢自己的通脹並不高，至於其他國家捱高脹，佢就唔理得你咁多了。

陸羽仁

昨日上演一幕油價驚魂，原油在美國市早段受美元及北海油田火警影響供應等消息刺激下，一度升上１３９．８９美元一桶，創了歷史新高，但後段受到沙地將會增產的消息打壓，油價又調頭急落，去番１３４．２６美元，原油期權明天到期結算，或是油價大波動的原因之一，但無論如何，油價在高位掙扎，似現疲態。

　　美股則個別發展，美國第四大證券行雷曼兄弟公布的壞消息唔係太壞，第二季虧損２８億美元，每股唔見５．１４美元，但已在市場預期之內，雷曼股價昨升１．３９美元，升到２７．２美元，連帶快將在本週公布業績的一眾證券股都升。但紐約生產數據差過預期，令市場擔心經濟下滑影響企業盈利，部份大股如通用電器下跌，結果道指跌３８點，跌０．３％，跌到１２２６９點，但標普５００指數就微升０．１１點。

　　網友均兒早兩日留言講到財務自由及她買股的感嘆，值得討論一吓。佢咁講：「陸SIR：見到GIGI問//其實點先算係有財務自由?我一直有疑惑,錢要多到可以唔洗做（才叫財務自由）?//」

　　「均兒我同樣有類似疑問：我想問股市到底有多少價值？如果想投資，係唔係只能在股市才能找到有價值的投資？如果想財務自由，係唔係在股市可以快啲能夠達到財務自由?????」

　　「我最近頻頻奔波，這反而令我開濶視線，令自己反思下，成日瞓身股市係唔係值得，到底股市可以令什麼人賺到錢？？？在這BLOG裡的朋友不妨多想想！我覺得股市是個大大古惑，成日騙唔識的散戶入甕。也令很多人不知不覺得了股市效應症，股市跌時，脾氣狂懆，我覺得我就係得了這種病。」

　　「講個故仔，我有個鄉里，以前住我隔壁單位，因為我們住的居屋係有一條大走廊，因此關係好熟。他做地盤工，以前常聽到他兩公婆為寄錢返鄉下而鬥嘴，男方要寄錢返鄉下，女方也要寄，男方寄幾多，女方也要寄幾多，女方常埋怨男方唔顧家，將辛苦身水身汗賺來的錢寄返鄉下。而家我們又同住一新屋邨，親眼見他們做地盤工做出頭，他這個連簽名都唔識簽，只會畫隻龜的地盤工，這兩年搞了間建築工程公司，依家工人成百人，剛拿到兩單五百幾萬的工程。夜晚出去消費萬幾、二萬元好平常，前晚吃燒烤埋單一萬四仟元，去大陸橫琴消費，一人一個十五，六歲脆卜卜女仔陪枱。佢話如果唔咁樣消費，亦都拿唔到工程來做，消費也可消出頭。你們想得到嗎？依家我都想打佢工咯！想泊個好碼頭，金錢萬歲!錢比體面有價值!　另一個人亦同係鄉里，開咗間清潔公司，買部清潔車幫地盤清潔流動廁所，每月賺錢沒人知，我用掃錢來形容，可能沒人信。佢可一次過買五、六佰萬的樓，二百幾萬部奔馳，呵！」

　　「睇這來陸SIR BLOG玩的人，個個都是高學歷高職位人士，但股市俾你們多少成功？？？世界之大，巴菲特只有一個，要學巴菲特那樣成功，要先交幾多學費？？？大家不妨再深入考慮下，哪裡才能找到價值？股市？做生意？什麼樣的人生才有價值。」

   　均兒後來留言再講「我而家就開始明白了，股市舊年來個十年一遇大升市，跟住來個十年一遇大股災，跟住再捱十年價值股票，跟住再見到股票捱到返家鄉了，急急沽咗出去，再眼光光睇住捱咗十年的股票大升，自己無份，重複又重複，重複又重複。唧唧復唧唧,木蘭當戶織，不聞機杼聲，唯聞女歎息，問女何所思，問女何所憶。」

陸羽仁睇完均兒這個留言，感慨良多，慨嘆股市的確是難玩之地，散戶唔易贏到錢。或者都係從財務自由講起，要財務自由，起碼要退休後生活無休，唔好講得太複雜，但起碼要幾百萬少不了，最好仲有持續穩定投資賺錢的能力，否則幾百萬你明日都可能會輸哂。

要有財務自由，第一要識儲蓄，儲蓄才有本金，有本金才可以做生意，才可以投資，你餐搵餐食餐餐清，碌爆咭使突哂，根本無儲蓄，好難投資，永無自由。順帶講句，無儲蓄的人因為本金太少，拿僅有的錢去炒股，愈少錢愈傾向去賭，因為太少錢慢慢投資都無用，不如博一舖，但咁賭法又係多多都唔夠輸。

好啦，你儲到本金，準備投資，到底做生意好定係買樓買股好，我好難答到你，均兒見到兩個鄉里搞生意賺大錢，我都見到好多做生意成功的人，但失敗者更多，做生意要成功，通常由自己做嗰行熟嗰行開始，打開工，摸清門路，慢慢才出來自己搞生意，成功機會較大。你貿貿然搵一行唔熟的生意去做，亦好易輸清。我有個醫生朋友，有一天去茶餐廳食嘢，覺得人地做得好差，忽發奇想，自己搞一間茶餐廳，結果在深水埗租咗間大舖，花２００萬去裝修同買架生，搞一間高檔茶餐廳，開業後生意奇淡，喺嗰區根本只適合做低成本、好低檔的茶餐廳，佢嗰間茶餐廳搞到咁高檔，根本無客（佢係醫生當然鐘意高檔嘢，佢就係俾自己的偏見矇蔽咗），做咗三個月維唔到皮，炒咗啲伙記，仲要自己落去看檔，結果做咗大半年就頂唔順執埋，２００萬唔夠一年就輸清。

所以識得做生意，當然係做生意好，做得成功時，仲可以將公司上市，印「公仔紙」（股票）俾人買，當然好過買人地啲公仔紙啦。

不過唔係人人識搞生意，唔做生意，想投資唯有買股、買樓，均兒對股市毫無好感，但我覺得佢的病因都幾簡單，幾典型，散戶在高位買股，坐艇幾年，到家鄉就沽，跌就有份，升就無份，如此這般出出入入，我恐怕佢睇唔到一個最基本的因素，就係到底點樣分辦股票的價值呢？睇唔到股票的價值，睇唔到５年、１０年係啲股票值幾多錢，人買我買，通常就係最熱時最貴時買，咁就好易接火棒了。




陸羽仁

　　美股三日來首次下跌，道指開市早段上升，美國第一大證券行高盛公布第２季業績，純利２１億美元，比去年同期跌７％，高盛業績不俗本來令人憧憬美國金融業最壞的情況已過，但高盛自己出報告唱衰同行，估計銀行業要再集資６５０億美元新資本去彌補虧損，加上房屋銷售和工業生產都差過預期，道指結果跌１０８點，跌０．９％，跌到１２１６０點。

　　昨日講做生意，惹起大家講述很多不同的例子，這些活生生的例子，就是最好的教訓。

網友BB講的是第一個典型，叫做「靠人實PK」。BB咁話：「看陸 sir 這個 blog , 真是好好, 可看到不同的觀點. 令自己可想多方面的思考, 我以前都開過間菜館. 為什麼會開?
因為當時剛離婚, 心情不好, 想藉著做些事, 去忘記過去. 結果. 找了一個做開潮州菜的朋友, 拍檔, 佢管飲食方面. 我管財務, 應沒問題, 問佢有沒有把握自己做, 佢拍心口,講就天下無敵, 我朋友以前打工, 個人都幾好, 盡責, 才找佢做拍檔,我佔八成. 佢佔二成. 但, 第一天開張, 佢己升了做老闆, 佢就話, 原來做老闆咁過癮, 我聽完都 知什麼事, 人會變,月會圓, 真是對的, 佢己沒心機打理生意, 每天遲來早走, 回去就是駡伙記,水鬼升城隍, 個個都憎佢, 每天都是請人, 生意又不好, 那時候想起, 不熟不做, 靠人的生意不要做, 唉, 結果. 做了一年, 關門大吉, 虧了百多萬,結論是, 做生意,不熟不做, 靠人自己不懂不做, 小股不要做, 否則,做大了給人食理, 跟風的生意不要做, 總之,. 做生意就似買股票, 要做功課, 自己可承受多少風險和資金才可做。」

BB因為一個和做生意無關的理由開始做生意，挑了一個自己無特長的行業去做，結果唯有靠人，我話做生意要靠人實PK，力不到不為財，做生意要出好大的努力，要比打工大１０倍的努力，事事親力親為，再加上超凡的EQ，才會做得好。

好多人想做生意的第一個念頭係打工打到悶，覺得人工加得唔多，朝九晚七好呆，老闆好契弟，所以渴望做老闆，過吓指人做嘢的日子，可以唔定時返工，佢地唔知道好多老闆表面風光，佢最痛苦o既事就係要定期出糧俾一大班夥記，而做夥記最開o既事係無論生意好壞都定期有糧出。你一做咗老闆，無錯係好自由，但即刻無咗穩定收入，仲好可能要貼錢，而且好快就會發覺，唔止夥記，連拍檔都指佢唔郁，重要o既事唯有自己做哂，所有事情要跟到尾。而且人地放假Happy，好多老闆放假仲要開工，無得靠人做。

　　網友小潘講的是另一個典型，叫做「拍檔跣鑊甘」，小潘話：「我有不少朋友，成日都大想頭，自己搞檔野出來，唔想打工，以為做生意實發，誰知眼見朋友做完一間摺一間，以家都打返工算啦。我阿爸舊時都係大陸開酒樓，高峰期都有近百員工，十分風光，可惜佢拍檔原來係大奸狗，呃晒佢錢之餘，仲要欠下一身屁股債。」

　　「有了這些前車，我而家開始搞生意都會十分小心，先從網測試市場反應，唔得都唔駛入肉。而且做生意真係要慢慢黎，唔可以一步登天。其實，我覺得好多人搞生意既人都係過份自信，成日認為人地做得唔好，自己搞一定好過人。點知，好多人都如陸sir呢位茶餐廳朋友，落得閉門大吉下場。搞生意同買股票一樣都應該有謙卑之心。」

小潘爸爸呢個故事，十分普遍，我有個老友的爸爸，和人一齊做生意，佢拍檔話為了方便開支票，叫老友爸爸簽定一本支票薄，點知呢個拍檔非常好賭，輸光就用老友爸爸預先簽好的支票簿，開票提走哂公司啲錢，公司應該找o既數就開空頭支票去頂，最後仲逃之夭夭，老友爸爸因而孭上成身債，好彩生意仲OK，結果都要還幾年才還清呢條債。

　最後想講一個典型係「識講唔識做」，彈人好容易，自己做好難，而家潮流興「彈人文化」，個個人都變專家，乜都嗡得兩咀，左彈右彈，彈政府無能，彈商家無良，彈老闆無料，入到餐廳彈食物唔好，行出街彈條路唔平，落大雨彈條街水浸．．．．．．．（下刪５００字），彈得人多，唔知點解，自我形象會提升，就會覺得自己好叻，所以就諗到自己做生意，開服裝店、花店、開餐廳，都好似係創業的捷徑。問題係人開你又開，啲客個個好似你咁俺尖，點解佢要來幫襯你，以大學Marketing101課程的口吻問你，你盤生意有乜unique selling point（獨特賣點）呀？換句話講，你盤生意o既價值係邊度呀？

好多人都係識講唔識做，呢個毛病有兩個層次，以餐廳為例，第一個層次係根本唔識大批量地做出高水平的食物，第二個層次係不懂經營，根本唔知做餐廳賺錢之道，唔懂控制成本，可能食物水平OK，但點做都賺唔到錢。

即使你在以上兩大問題都側側身過到關，做嘢有專業水準，識得控制成本，還要面對競爭，你開一間四川勁辣菜館做得唔好時，人人睇住你笑，但如果你做得好，生意好，街頭和街尾就馬上開多兩間川菜館來頂你，想創業的人前仆後繼，有橋即抄，而且佢地新創業唔怕蝕，價錢平你兩成，你又頂唔頂得順呢？

網友epearl講得好啱，佢話根據統計，95%的生意都是賠錢的，只有5%繼續生存。你要創業，就要諗自己有無呢５％成功者的條件，其中最關鍵係超凡的努力和EQ。我自己好喜歡創業，滿腦子好多不現實的創業思維，所以講咁多負面嘢絕對唔係想嚇到你地唔敢創業，但的確不是人人都適合搞生意，若你不是創業材料，但你明白搞生意之難後，就明白老闆有幾大壓力，明白佢點解咁變態，你諒解佢多啲，自己打工都會成功啲。

陸羽仁

  　美股繼續插，FedEx和摩根士丹利的業績唔理想，令美股蒙上陰影，道指大跌１３１點，跌幅１．１％，跌到１２０２９點，係三個月以來的低位。

　　美國第二大證券行大摩就無同行高盛咁掂，大摩持續經營業務盈利跌到１０．３億美元，即每股０．９５美仙，比去年同期盈利２３．６億美元，或每股２．２４美元，每股盈利大跌５７．５％，美國證券行好似只有高盛一間繼續搵到大錢，其他都幾傷。

　　美股呢個星期五期指結算，做咗淡倉的大戶繼續插，又加挺油價，唔過埋今個星期，美股難望好景，呢個星期港股亦自生自滅啦。投資者最好望佢插深啲，插深啲有平貨可執。

　　昨日講到創業，不少網友都有佢地創業的辛酸史，如YY太、松花蛋、草帽小子等， 係無創過業的後來者最好的借鏡，例如松花蛋咁講：「陸SIR話創業的努力要比打工多10倍，EQ要超高。我自己就深有體會，原來係大公司打工，做到透明天花板（GLASS CEILING），再上一級可能要等10年，即係話未來10年的事業已經睇得到，好無癮。所以心思思想創業，諗住係番自己熟個行，又有熟悉的客戶支援，自己盤生意會好順利。」

「但實情係：出咗嚟至知會面對很多困難，係打工時無想過的。個D熟悉的客戶只會喺你仲係大公司時會幫你（亦都係幫他自己），要喺呢D時候先至知道邊個係真心幫你的朋友，同埋瞭解到任何事情都只可以靠自己，唔可以靠人地。創業的初期，事事要親力親為，最怕無生意，到有生意就怕資金唔夠，到生意做成又怕收唔到錢；一單生意做完又驚朝不保夕，唔知明天仲有無？總之壓力大得不得了，EQ少D都唔掂。」

「過了幾年，生意穩定了，信心大了，再回頭睇睇，就覺得打工時遇到D問題實在唔算做問題。抱住呢種心態再黎買股票，就覺得易好多，贏唔到大戶，都起碼贏咗大部分的散戶。」

松花蛋這個故事可以告訴在大公司打工者，他們出來創業，唔好以為啲客一定會跟你走，人在大公司做到某個位，就有權力，權大的人，有人會來巴結你，奉承你，話你叻，但你走出去創業，又是另一回事，因為之前有的權力，只是 Position power（職位權力），你一離開咗個位，呢啲權就無啦，係你無權時，就好容易睇到乜嘢係酒肉朋友，乜嘢係真正朋友，呢個世界真正朋友的數量通常都比較少。

但我今日想講o既係創過業的人去買股票，按道理又會好啲，這又去到一個根本問題，你買一隻股票長線投資，等如做佢長期股東，你一定要識睇佢盤生意掂唔掂，呢個才是一間公司真正價值所在，一切數字都只係幫你睇這盤生意，但你不能只睇數字，不睇生意本身。

　　香港網友都去過大家樂食快餐，但我問你大家樂的股票買唔買得過，又係另一個問題。無做過生意o既人可能睇吓PE，睇吓近期股價走勢，甚至睇吓報紙雜誌推介，就馬上決定下注。做過生意的人，會睇多好多嘢，首先睇吓佢生意好唔好，即使生意好，又好唔好得過舊年呢，好唔過舊年，盈利好難增長噃。再睇吓同行的競爭，究竟係多咗定少咗，如果同行愈開愈多，亦會分薄生意。

　　睇完生意又睇吓成本，人工、舖租加幾多呢？失業率跌通脹高，人工好難唔加；舖頭租金又加幾多？呢個時局，租約一到租金又狂升。還有食品成本又加，米又貴，肉又貴，菜又貴，睇吓佢個餐牌，的確係加咗價，但加價頂到食材的直接成本，又頂唔頂到舖租呢？

　　做過生意的人，腦海裏面好易睇到一盤生意的收入和成本兩大項，腦袋轉一吓，就有一個感覺，到底呢盤生意係好做咗，還是難做咗。數字雖然唔係好準，但那個感覺好重要，有些公司的業績到某一個時候就到頂，善於分析其生意的人士開始睇淡，暗暗沽貨，但業績表面睇仲好好，於是就出現PE回落的現象，通常好公司的PE開始回落（撇除大市的因素），就可能係公司盈利見頂回落的時候。

無做過生意的人，對上市公司的生意難有感覺。對生意無感覺，就好難判斷公司的價值。做生意捱過苦的人，應有這種能力。

後記：祝各位創業朋友可以捱到出頭天，打出一盤穩定的生意。

陸羽仁