在信貸收緊的陰霾下，中國股市昨日暴跌6.7%，創了14個月以來的最大單日跌幅，打擊全球投資者對經濟復蘇的期望。全球較重要的股市，除了英國富時100以外，都跟住腳軟，MSCI亞太區指數下挫0.5%，包括全球23個已發展國家股市的MSCI世界指數下跌0.8%。中國和美國的經濟關係越來越密切，股市亦都互為影響。美股昨晚就受拖累下挫，加上銅價和油價大跌，金屬及能源股領跌，杜指開市即插水108點至全日最低的9436點，其後在9450點附近窄幅橫行，到臨近收市的1小時才發力向上，收窄跌幅。

杜指挫48點或0.5%，收報9496點，全日波幅108點。標普500指數收報1021點，跌8點或0.8%；納指跌20點或1%，收報2009點。紐約證交所成交增至15億股。杜指期貨最新報9490點，比現貨低水6點。以整個8月份計數，杜指和標普500指數有不俗的升幅，杜指升3.5%，而標普升3.4%，跑贏中國和香港。標普500成份股上月表現最好的行業係第二大行業的金融行業，累積升幅達到13%，係工業股的三倍。

受銅價下跌至兩個月低位拖累，金屬資源股成為跌市火車頭，Freeport-McMoRan Copper & Gold Inc. 下挫3.8%，美國鋼業跌1.8%，而美國鋁業挫3.6%，係表現最差的杜指成份股。油價急挫，跌穿每桶70美元，亦拖累油股下跌，艾克森美孚及雪佛龍齊挫逾1%。

AIG連升9日之後，被多名分析員指近期股價上升「不合理」和太貴，昨日勁挫近一成。金融股亦受累挨沽，美銀跌2.2%，花旗集團跌4.4%，美國運通跌1.3%。

港股美國預托證券稍為反彈，港比指數報19895點，比香港收高171點。匯控（005）收報83.58元，比香港收市價高1.7%；中移動（941）收報76.3元，比香港收市價高1.2%；中國鋁業（2600）收報8.23元，比香港收市價高0.2%。

昨天講到投機時要考慮勝出率和賠率，但這並不是投機的全部，投機的另一大學問是控制風險。又以賭博集團買馬為例，一場14隻馬出賽，佢地並唔係買一隻馬，而係買4、5隻有賠率差距的馬，若賭三T，亦係三場每場買4、5隻咁串，這亦等如炒股分散投資，個市有成千隻股票，唔需要將所有注碼瞓身買一隻股票，將全副身家合埋眼買一隻股票，萬一隻股票個老闆俾人拉咗、死咗，隻股無限期停咗牌、執咗咁點算，你唔可以盲目瞓身買一隻股票，最後輸清就怪俾冧巴你的人，你以這種手法去買，同用全副身家賭一場馬其實分別唔大。控制注碼，分散買不同的股票，就減少一隻唔中就輸清的風險。

若果你以一個賭仔心態諗，會覺得買幾隻唔係好化算，一場14隻馬，只有1隻第一，假設佢獨贏1賠5，買一隻中咗賠5，同買3隻落3注亦只係賠5，好似單買一隻好啲，成本輕啲。我就話除非你知道邊隻一定跑出，否則分散一點注碼，增加買中機會，長賭較易贏。雖然股票可以唔止一隻升，可以係隻隻升，但買死一隻風險大啲，好難控制。

除咗分散風險之外，亦要控制注碼，買馬和買股不同，一般人買馬會預咗輸，但買股買輪唔會預咗輸清。你預咗輸清，自然唔會落咁大注碼，這就是我經常講的例子，你買馬唔會一場買10萬，博佢中就中40、50萬，輸就輸哂，你會覺得輸的機會都唔細，所以唔會買咁多。你買窩輪買牛熊證就唔同，好多人買10萬、20萬面不改容，而且一係唔買，一買親就想刀仔鋸大樹，博買中10萬變50萬。唔係話窩輪唔可以升4、5倍，但佢同樣有機會變到零，你用10萬買輪，唔緊要，定好計劃跌到乜位打靶，例如最多輸3萬，就跌夠30%合埋眼就止蝕。但不少人唔定止蝕位，或者定咗止蝕位又唔執行，見到輸3萬時仲會去睇吓價，輸到5萬時無眼睇，唔肯面對，結果10萬元輸清。

所以止蝕係控制注碼的一個方法，控制你每一次投機可能損失的注碼，增加長線的取勝機會。好多人將投機睇成一次一次的割裂的事件，我就看成一個整體，睇一年的投機，睇一個總和，唔係睇一次的成敗。投機10次中6次，輸4次，淨贏兩次，如果每次贏一成輸又係輸一成的話，夾埋就係贏。

所以綜合而言，如果牛腩貓咪問我「如何增加投機的機率」，我覺得起碼要分幾部份，包括透過研究分析下注產品的取勝率，選擇賠率較高的時機，透過分散目標減少一Q中伏的風險，定好止蝕，減少注碼損失，做齊這4件事，就可以長線、整體地增加投機成功的機率。

陸羽仁

美股進入9月就急挫，雖然製造業和待售房屋銷售都有所增長，但市場對從低位已彈升逾120%的金融業的前景的憂慮續漸升溫，金融股受重創，拖累美股第三天走弱，杜指昨日走勢可以講係乏善可陳，朝早升約60點後，即掉頭跳水逾200點，之後繼續偏軟，在低位滑行，以接近全日最低位收市。

杜指勁挫186點點或2%，收報9310點，全日最高9558點，最低9292點。標普500指數跌穿1000點心理關口，收報998點，跌23點或2.2%；納指亦失守2000點關口，跌40點或2%，收報1969點。紐約證交所交投轉趨暢旺，成交大增至17.7億股。杜指期貨最新報9299點，比現貨低水11點。

昨日公佈的經濟數據其實不弱。ISM公佈8月份的工廠生產指數攀升至52.9，好過市場預期的50.5，係19個月以來首次上升。而50係增長與收縮的分水線。此外，美國全國地產經紀商協會(National Association of Realtors) 公佈7月份待售房屋銷售指數上升3.2%。所謂售房屋銷售指的是將於6至8星期內交收的銷售合約。

不過市場順住好消息出街，地產股，建築股升咗幾分鐘就跌，而銀行、保險、經紀行及資產管理的金融股整體暴跌5.3%。有分析員指保險股已升得太快、太高，令相關股份的跌勢特別嚴峻，MetLife Inc. 下挫7.4%，而AIG繼上日大跌近10%後，昨日再瀉21%！不過佢上個月升咗245%，這幾天的調整只算溫和。

銀行股方面，RBC Capital Markets的分析員Joe Morford 和David King表示，美國西岸的銀行仍然面對惡化的信貸環境和不斷增加的貸款壞帳。「有很多銀行可能仍然未有足夠的資本和儲備」去應付持續衰退的房地產市場引起的撇帳。美銀下滑6.4%，美國運通跌5.4%，摩根大通挫4.1%，包辦了杜指成份股的跌市三甲。花旗集團更勁跌9.2% ，富國銀行（Wells Fargo）表示該行最近盈利情況良好，將在無需供股集資的情況下償還政府的250億美元債務。不過利好消息仍然敵不過大勢走向，股價仍要挫4.8%。

港股美國預托證券跟隨大市偏軟。港比指數報19393點，比香港收低480點。匯控收報81.14元，比香港收市價低2.7%；中移動收報74.74元，比香港收市價低1.9%。

早兩日我講開投機四部曲，發覺講漏了一樣最重要的東西，就係分開投資與投機，如果連自己投緊機都唔知，以為係投資，咁就死咗都唔知乜事，可以用股神巴菲特入咗股嗰隻比亞迪（01211）做例子。

比亞迪本星期一公布中期業績，業績理想，至6月底半年純利為11.8億元人民幣，按年上升98%，每股盈利57分人民幣，不派中期息。比亞迪公布完業績後，股價已開始抽升，後來主席王傳福更表示，持股9.9%的股神巴菲特旗下公司有意增持，令比亞迪股價再抽上昨日高位51.4元，後來公司澄清未與股神的公司進行詳細磋商，股價回軟，昨日收市價48.6元計，以比亞迪08年盈利計，市盈率85.9倍。

股神投資方法以睇價值聞名，若果入股PE85.9倍的比亞迪，又唔知佢睇乜嘢價值，不過王傳福講到出口又唔似純屬吹水，假設有三個可能，第一係十劃未有一撇，主席只是心急想唱好公司股價。第二，比亞迪以市價大折讓方式批股俾股神，第三係股神知道比亞迪一些神秘增長秘密，股神知我地唔知。最後講多句係股神有平貨在手，如果佢有折讓價入股再加埋將兩批股份合埋咁計，佢的成本同普通股民而家追貨好唔同。

又睇吓大行點睇，大摩對比亞迪係淡友，話佢上半年純利較預期強勁，因汽油車協同效應遠遠抵銷IT相關電池及手機業務盈利惡化，對其盈利預測維持不變。不過，比亞迪股價自去年9月 宣布獲巴菲特入股後大漲460%，龐大估值溢價似乎不單反映盈利增長，亦包含對電動車及汽車電池等新業務有高度期望。但大摩認為，比亞迪的新業務缺乏中央大力支持，短期不會帶來大量盈利，好難成為估值動力，它認為市場忽略比亞迪短期盈利波動，重申「減持」評級，目標價20.2元

不過瑞信就睇好，話比亞迪上半年業績理想，預期比亞迪2009至2012年每股複合盈利增長達43%，將它的評級由「跑輸大市」升至「跑贏大市」，目標價由18.4元，大幅上調至59元。

一間行睇20元，一間行睇59元，你信邊個? 如果大摩中，比亞迪的股價要跌58.4%，如果瑞信中，比亞迪的股價會升21%。以投資計，現價買比亞迪風險太大。即使瑞信睇中，比亞迪由而家至2012年每年盈利以43%複合增長，去到2012年，每股盈利係2.4元，以現價計市盈率都有20.3倍，即係話即使瑞信講的呢張期票兌到現，估計2012年盈利都唔係一個低PE，中間要經過4年折騰，唔知佢每年有無43%增長，咁又點投資得得落手呀?

唔講投資講投機，又係另一回事，我話投機第一項是講取勝率，你在上星期尾買比亞迪，博佢今個星期公布一個好業績，上星期比亞迪股價在44.1至45元間浮沉，估公司業績唔錯，有一定取勝率，都有得博吓。結果唔止業績好，仲送一個股神再入股的憧憬，到昨日高位出貨，可以執到15%，不過好消息耗盡升完要回，往後要再炒，就要等上A股和股神入股的消息。所以話投資投唔落手，唔等如股價一定唔升，記住，炒過籠的股票會愈炒愈過籠。

分辦投資和投機很重要，上佳的投資可以不止蝕，但投機唔控制注碼唔止蝕，風險極大，唔好投機當投資唔識止蝕，假設比亞迪和股神傾再入股，傾緊時股價炒上你唔知點解，傾傾吓傾唔掂股價跌你又唔知點解，但你唔使知理由，定好止蝕位，到價就沽，就你就唔會死得去了。

陸羽仁

美股受多重好消息消刺激，止跌反彈，中國股市猛漲利好投資信心， 8月零售銷售好過预期，令Costco和Gap等零股及金融股強勁反彈，金價急升近每安士1000美元水平，帶動金屬資源股造好，儘管首次申請失業救濟人數報告令投資者失望，美股最終仍能扭轉連跌4日的劣勢。杜指上午走勢呈「M」型狀態，到午飯時候，仍是原地踏步。到午後才打破悶局，逐步攀升，以接近全日最高位收市，但升幅溫和。

杜指收報9345點，升64點或0.7%。標普500指數重上1000點上方，收報1003點，升8點或0.9%；納指漲26點或0.8%，收報1983點。紐約證交所交投清淡，成交縮減至不足13億股。杜指期貨最新報9333點，比現貨低水12點。

大市昨日觀望氣氛濃厚，主要係投資者等待將於今日公佈的8月份非農業就業報告，許多經濟學家認為這一指標更為反映出美國經濟計劃的實際情況，但觀察美股尾市回升，反映投資者預計公佈數據不會太差。

昨日支持大市上升的主要係金融股、金屬資源和零售股。金融股經過連日大跌後，有不錯的反彈，AIG回升10%，美銀、摩根大通及富國銀行齊漲逾3%，花旗集團則升近半成。金融板塊整體上漲了2.3%，其中綜合性銀行股上漲2.7%，綜合性保險股上漲3.5%。

金屬價格全線上升，黃金又逼近每安士1000美元水平，最新報992.5美元，上次最高去到1030美元就急促回頭，今次黃金唔知可唔可以破位而上，抑或延續一個大型上落市格局。黃金上升帶動金屬資源股跑贏大市，McMoRan Copper & Gold Inc. 連跌幾日後昨日反彈，Barrick Gold及McMoRan Copper & Gold Inc升4.3%，而美鋁亦上升4%，係表現最好的杜指成份股。

美國8月零售銷售好過预期，幫助抵消了就業市場令人失望的消息所帶來的影响。Costco及Gap分別勁升8.6%和7.6%。零售板塊上漲了2%。

匯控美國預托證券跟隨大市造好，收報82.33元，比香港收市價高1.6%；中移動收報75.39元，比香港收市價高0.4%。ADR港比指數19910點，比香港高148點。

網友GIGI問起我講「逆市操作的投機」，佢話，「笨笨的我唔係好明，”逆市操作的投機”，同"順勢的投機"、"分段趁低吸納的投資"又有咩唔同呀?」

我講過投機時第一步要研究每場賽事每個投機對象的勝出率，首先要搞清楚　自己買緊短途、中距離、還是長途賽事。好多散戶炒期指即日鮮，是超短途賽事，玩幾個鐘定輸贏。散戶買窩輪亦應是短途賽事，因為窩輪的時間值日日縮，揸長少少發行商一定贏，最多三幾日要定輸贏。炒股揸一段可以係中距離賽事，揸10日、8日，甚至一個月都得，不過如果輸錢唔止蝕，就可能投機變投資，一揸揸幾個月甚至一年。好多大投機家的投機係長途賽，例如索羅斯93年賭英鎊下跌和97年賭港元脫鈎，就係長途賽，賭幾個月至一年。

投機活動若是短途賽，快進快出，順勢較易贏錢。炒期指上晝見到個日中低位，例如係19700點，就定個盤穿19700點順勢沽，若期指真係破位向下，沽家的目標只是食50點、甚至100點，都有較大機會命中，這就是順勢投機。反過來說，若今日玩咗幾個鐘見到大市係一個跌市，你想搵個位揸期指博反彈，希望搵個日中低位去揸，事實上唔係咁易搵到，因為個市一級級向下，你買入博反彈，可能５分鐘後就要止蝕。

你可能會問，唔係呀，我見跌市時買貨，坐佢一排，等佢反彈會贏錢，點解你話逆市投機唔得呢? 的確有人專門做這種事，第一，佢可能係投資者，見好股回落買入長揸，而非投機者，分段吸納好股要事先安排好計劃，以股份價值衡量買入價位，有無長期防守性，而非看短期的走勢。第二，有種人專門買大跌股，見股份大跌就撲入去，唔止蝕，又真係不少時間都搵到水，不過最後遇到一隻股跌兩跌停咗牌死埋，咁就一舖清袋。要做好這種事情，要係專家，佢識分邊種股大跌會死(例如莊家股)，邊種股大跌都唔會死(例如紅色股)，限咗注碼定埋止蝕，然後入市去博，的確有機會搵到錢，但呢種動作有少少似玩雜技，要問吓自己有無咁o既眼光同技術至好去做。第三，有些專業人士專炒上落股，例如隻紫金礦業(02899) 炒味甚濃，由去年12月到今年4月，主要在4元至5元中間浮沉，5月走上一個台階後，又在6至8元中間上落，炒作者見佢跌近6元時去揸，定番5.5元止蝕，佢一般都唔會跌穿6元，買入等佢升近８元就走，你知道呢種股份的「正常」炒法和上落幅度，逆勢去揸風險會細一啲（唔係無風險）。

以中短途投機而言，順勢投機走一轉，個市升緊就買，個市跌緊就沽，順勢食一段就走人，對一般散戶投機者而言，較易操作，較少觸及止蝕位要打靶，取勝率較高。至於逆勢投機，由於好多人唔止蝕，表面睇好似同樣咁易，但其實隱藏了不低的風險。逆勢投機若擺止蝕又會好容易中，有時一買過一日就要止蝕。

陸羽仁

美國失業率再升，但非農就業數據好過預期，美股上周五造好，在工業股上漲帶動下，杜指初段走勢強勁，午飯前已抽升逾80點，但午後略現疲態，升至9450點前已無力再上，之後在窄幅爭持末至收市。杜指收報9441點，升97點或1%；標普500指數升13點或1.3%，收報1016點；納指突破2000點關口，收報2019點，升36點或1.8%。美國本周一是勞工日假期休市，上周五在假期前夕，紐約證交所交投淡靜，成交縮減至11.5億股。杜指期貨最新報9417點，比現貨低水24點。

總結一週，美國三大主要股指全部下跌，市杜指下跌1.1%，標普500下跌1.2%，納指表現最好，只跌0.5%。

上周五最重要的數據是美國勞工部公佈，8月份非農業就業人口減少 21.6萬人，低過經濟學家預測的減少23.3萬人，跌幅為一年來最輕微。今年第一季平均每月有69.1萬人失去工作，第二季已降到42.8萬人，以8月職位減少數字降到21.6萬計，美國勞工市場正趨穩定。

LPL Financial首席市場策略師Jeff Kleintop話，在標普500指數上漲50%後，市場對好消息已經麻木了，缺少上升動能。非農就業人數報告顯示經濟進一步復甦，但市場反應未如預期熱烈，股市只係微升約1%。在一個月前，類似的數據已能帶動股市大幅反彈。

匯控美國預托證券跟隨美國大市造好，收報84元，比香港收市價高2.4%；中移動收報77.85元，比香港收市價高0.4%。ADR港比指數20555點，比香港高236點。

美國的就業職位仍在減少，失業率升至9.7%，是1983年6月以來的高位，高過預測的9.5％；統計顯示，如果加上暫時工，或者放棄現職正在找新工作的所謂「就業不足」者 （underemployment），無工做的比率就高達16.8%，創了1994 年以來的新高。美國自2007年12月經濟開始衰退，就業人口總計至今已減少690萬人，全國失業人口已達1490萬人，創下二次大戰後歷次衰退中最高的紀錄。

　　在經濟好轉初期，失業率會不跌反升，因為經濟好差時，部份長期失業者根本放棄搵工，他們就不會計入失業人口，但經濟開始走出衰退時，市場就業氣氛改善，這些放棄搵工者會重新求職，再加上裁員情況雖已放緩但仍持續，就會推高失業率，經濟學家預期未來數月會有更多人失業，到2010年，失業率估計突破 10%。

失業率高企、就業市場持續萎縮，民眾審慎消費，意味著佔了美國GDP近七成比重的消費者支出在信心不足下持續疲弱，經濟也無法加快復甦的步伐，依賴做美國出口生意的行業首當其衝，航運業是一個典型，睇吓大陸上市公司半年業績中的虧損大戶，主要係航運公司和金屬鋼鐵公司，上海和深圳兩市1,637隻A股全數公布了今年上半年業績，當中有6間是蝕錢過10億元人民幣的虧蝕大戶，以中國遠洋居首，半年蝕46.2億元人民幣。排第二的是中國鋁業，半年蝕35.2億元。第3大虧損大戶是中海集運，半年損34.2 億元。三大虧損戶中有兩個做航運，可見航運業務之慘烈。

據航運業內人士話，雖然話復甦，佢地的生意未有明顯改善，一則歐美失業率高企令消費持續疲軟，影響入口，二則太多新船下水，屋漏更兼連夜雨。記住這是基本分析，和股份短期炒作上落無關，航運股因為跌得好甘，吸引不少人炒反彈。炒唔緊要，唔好以為有基本因素支持，以中國遠洋(01919) 為例，07年賺194億元人民幣的好日子，相信有排都唔會見得番，炒股要定好止蝕，唔好以為公司未來好好境。

所以要投資(唔係炒)一次經濟復甦，要細心諗吓邊種行業係短週期股，邊種行業係長週期股，若是週期短，意味復甦快，經濟一回復正增長，佢好快可以做番接近以前咁多生意，若加上減咗成本，佢就較快可以去番高峰期咁賺錢，隻股一兩年內會再創高峰。但有啲行業係長週期股，意味佢地多數唔係週期回頭的第一個受惠者，加上行業本身有供過於求又好難收縮供應的特質，要經過好長的汱弱留強，才會復甦，有得揀就唔好揀呢類股份來投資，當然短炒是另一回事了。

陸羽仁

美國勞工節（Labor Day）假期，美股及加拿大股市週一休市。20國財長誓言繼續催谷經濟，有避險作用的日圓下跌，加上美國卡夫食品公司(Kraft Foods)主動提出收購英國的吉百利公司(Cadbury)，讓投資者看到了投機拼購活動再度興起的契機，全球主要股市造好，包含23個發達國家股市的MSCI 世界指數週一上升0.9%，反映歐洲股市的杜指Stoxx 600指數漲1.4%。

朱古力生產商吉百利公司陷入併購戰，吉百利股價大升38%，更推動倫敦富時100指數上漲1.7%，跑贏德國和法國股市。美國卡夫食品公司表示，要以每股745便士，總計102億英鎊(約167億美元，約1302億港元)的價格，以現金加股票方式收購該吉百利。吉百利已經拒絕了卡夫食品公司的收購提議，認為收購價太低，但卡夫食品公司表示將繼續推行上述收購交易，並「保持建設性的對話」。吉百利股價飆升38%，一舉超越卡夫提出的收購價，成為英國股市中表現最突出的公司。

受到收購傭消息刺激，歐洲股市中的食品生產商行業普遍攀升。法國達能(Danone)漲3.9%，聯合利華(Unilever) 升2.2%，瑞士蓮(Lindt & Sprugli) 上揚5.8%，雀巢公司(Nestle) 亦漲了0.5%。

        我地食慣卡夫芝士、Oreo曲奇和吉百利朱古力，所以對這兩間公司雖然無甚了解，卻也久聞大名。卡夫趁這個轉角市出手，充滿著傳統的併購智慧。吉百利係世界生產糖果的大戶，卡夫的如意算盤是吃掉糖果大戶吉百利之後，合併後的新公司佔世界糖果市場的份額急增至15%，和對手Mar Inc.等量齊觀，況且卡夫的基地在美國，吉百利基地在歐洲，兩公司合併，更有跨越兩大洲的地理優勢，所以整個併購有很強的商業邏輯支持。

        如今最大問題是價錢，卡夫一出手，吉百利的股價馬上急升38%，升到每股783便士，一升就遠超收購價745便士，意味著卡夫若不提高收購價，好難成事。倫敦Evolution Securities的分析員Warren Ackerman話，吉百利每股應值1200便士，而不是卡夫提出的745便士。據說吉百利搵咗高盛、大摩和瑞銀三大頂級投行做其財務顧問，打防禦戰，而其他美國食品巨企如雀巢隨時加入搶購行列，所以未知吉百利最後鹿死誰手。

卡夫這個167億美元的併購大計，是今年最大的跨境併購，據彭博的統計，8月整個歐洲的併購活動總計金額亦只是210億美元，可見卡夫計劃之巨。我非常關注併購活動，這是美國股市是否正常化的重大指標，因為美國企業太大、太成熟，要佢地一年有10%以上的盈利增幅，靠自然增長好難做到，所以一定要靠併購，巨企以合理價錢買到好嘢，裁吓人修理吓，夾落自己盤數內，好容易連續幾年都有10幾、20%的盈利增長。況且一次大型併購活動，也是銀行、投行、會計師行和律師行的大生意，愈搞得多，這些行業生意愈旺。所以巨型併購解凍，重新出籠，就係美國金融市場回復「正常」的重要指標，唔好再預計美股好快就頂唔順要急跌。

陸羽仁

大宗商品價格上漲，金價衝破1000美元，能源與原材料類股份造好，杜指開市跳升逾50點，續升至9511點後回順，其後在不足80點上下爭持至收市，連續第三個交易日收高。

杜指收報9497點，升56點或0.6%；標普500指數收報1025點，升9點或0.9%；納指漲19點或0.9%，收報2038點。紐約證交所成交增加至14.5億股。杜指期貨最新報9479點，比現貨低水18點。

商品上升營造了市場好景氣氛，RBC資本市場的貴金屬分析員George Gero話，「金價越高波動性也越大，但目前投資者似乎很擔心通脹和美元疲軟下去，使更多投資者成為了黃金的買家。」黃金期貨週二突破了每安士1000美元大關，在亞洲市早段輕微回落到1000美元大關樓下。而鋁、銅、鉑和銀等金屬價格亦齊升。

和商品相關股票左右美股大市Freeport-McMoRan Copper & Gold上漲了3%，美國鋁業上漲了3.5%，油田服務公司斯倫貝謝上漲了4%。卡夫食品(Kraft Foods)提出以價值167億美元收購英國吉百利朱古力的交易膠著，但認為出手太低，一般相信卡夫可能會提高收購價，市場又猜測雀巢可能與好時(Hershey) 提出聯合收購吉百利的建議，吉百利身價猛漲，卡夫則逆市下跌5.9%，係昨日表現最差的杜指成份股。

美股造好，港股美國預托證券卻偏軟，ADR港比指數20942點，比香港收市低128點。匯控收報84.12元，比香港收市價低0.7%；中移動收報79.16元，比香港收市價低0.6%。港股已升近高位，走勢有點超前美股，杜指昨日高位9511點，距離8月28日的高位9630點，還差119點，但美股都有少少再試高的味道。

網友牆頭草問起「瘋股」，佢問:「可否講講怎樣可以捕捉趨勢股 (trending stock),
我叫瘋股那些如比亞迪(01211) , 阿里巴巴(01688) , 騰訊(00700) 等可以連升數月, double and double(倍升再倍升)的，捉到後又策略如何 ??」

首先我地要分開兩種「瘋股」，一種是本地莊家股，一種是有相對實質業務支持的股票，本地莊家股的股價完全由莊家操控，左手交右手，搭住棚咁上，莊家唔係開善堂，係要賺錢，所以炒高股價目啲唔係派錢俾股民，而係引人落疊，最後在高位慢慢派貨，莊家骨水走人。當然亦有莊家股最後變身實業股，我最近聽聞有隻莊家股的大老闆想從良，認認真真搞業務，二老闆雖然想炒高派貨走人，但大老闆不同意，佢都無符，雖然呢隻嘢的大老闆想認真做事，但從股民的角度看，就相當悶，因為無炒高，就好似唔郁咁，呢啲叫做「股票唔毒，股民唔愛」。如果你買的瘋股是本地莊家股，咁就祝你好運，揸住股票升到幾高都無用，能夠落車個嗰才是成功，呢啲先叫做「鱷口偷金」。

另一類瘋股係有實質業務支持的股票，牆頭草問的比亞迪、阿里巴巴、騰訊，全屬此類，比亞迪的電動車，亞里巴巴的網上商貿平台，騰訊的QQ，全部都唔係細生意。比亞迪08年賺10.2億元人民幣，市值463億港元，08年市盈率104倍。阿里巴巴08年賺12億元人民幣，市值1058億港元，08年市盈率77.5倍。騰訊賺27.8億元人民幣，市值2432億港元，08年市盈率76倍。

這幾家公司都係鬼佬基金愛股，近期公布中期業績優於預期，股價再湧上。例如騰訊8月中公布截至今年6月底止中期業績，純利22.28億元人民幣，與去年同期比較，上升89%，較市場一般預期的約75%為佳。騰訊出了業績後，瑞銀發表報告話，騰訊中期業績理想，全年估計市盈率會拉低，若盈利增長續勁，估值更有可能提升多於下跌，因為其QQ用戶基礎有明顯價值，騰訊亦證明其經營策略可以克服困難，將其評級由「中性」升至「買入」，目標價由80元上調至145元。(現價133元)。

我所講的第一件事，係這類瘋股有業績支持，以騰訊為例，若全年可以維持上半年的89%盈利增長率，好粗略咁靠估純利可達52億，09年PE可以由76倍拉低到40倍。鬼佬是以高增長股的角度買這些股票，揸住唔放，直至到業績唔對辦不再高增長才沽。(明天再續)

陸羽仁

美國勞工市場和零售銷售數據好過預期，刺激投資氣氛，迪士尼和寶潔(Procter & Gamble)等巨股上漲推動，美股連續第五天上升。標普500指數更創了自去年10月6日以來新高，杜指亦創了今年高位。杜指開市稍挫，在勞工部公佈首次申領失業救濟金人數好過預期，指數見底回升，升幅逐步擴大，下午曾一度回落，但尾市再上，以接近全日最高位收市。

杜指收報9627點，升80點或0.8%；標普500指數收報1044點，升11點或1%；納指表現最好，漲24點或1.2%，收報2084點。紐約證交所交投轉趨活躍，成交增至接近16億股。杜指期貨最新報9534點，比現貨大幅低水93點。

美國公佈最近一週首次申領失業救濟金人數下跌2.6萬人至55萬人，好過市的場預期，係7月份以來的新低。在USAA Investment Management Co. 管理達900億美元資產的Wasif Latif話，就業數據係經濟可能已經觸底的另一個證明。另一報告亦顯示進口外國產品增幅創紀錄，反映美國消費者支出在加強。Redbook Research公佈的最新全美零售額指標顯示，9月份第一周全美連鎖店銷售額較上月同期上升0.2%，遠高過市場預期的下降0.3%。

寶潔話將會把大約10%的產品降價，加大促銷力度，並預計將推動銷售增長，改善下季營收。寶潔上漲3.7%，係杜指成份股的升市亞軍，而冠軍就係迪士尼，股價大升逾半成。金融股普遍造好。當中美銀和美國運通升約1%，花旗集團升1.9%，高盛升2.7%。

港股美國預托證券造好，ADR港比指數收報21176點，比香港收市高106點。匯控收報85.02元，比香港收市價高1.3%；中移動則下跌，收報78.7元，比香港收市價低1.1%。

美股和港股的走勢接近，港股更略超前，港股昨日日中已創了今年新高，而美股昨日亦創今年新高，杜指昨日最高9633點，比8月28日的高位9630點還要高，昨日收9627點，係在接近高位收市。雖然美股今次衝高唔係好夠爆發性上升的氣勢，但回吐兩個星期又上高位，顯示股市仍甚強勢，買意較強，沽壓不大。以港股而論，由於內地股市還在回氣階段，未似有回升創新高的氣勢，所以短期港股還是和美國同步，要看這次美股上升，究竟是一雙頂，還是一浪高於一浪的走勢，斷估美股即使略回吐，短期亦有再上衝的可能性，杜指有機會衝上9750點的高位。


網友牆頭草再問「瘋股」的問題，問「呢啲升左兩三倍的有前景、有鬼佬照的瘋股,
跟唔跟吓好呢 ??通常呢D股回都係最多回三成最多又衝過，好似又跟得過。」

瘋股升得咁多，自然有機會回吐，甚至終止升勢。我地首先要關心佢地會唔會終止升勢，我估瘋股終止升勢主要有兩個原因，第一，大市玩完，出現大插水甚至股災，瘋股的升勢多少是由於旺市熱錢買入推動，所以大市玩完佢地亦會大插水，阿里巴巴(01688) 上一浪大跌就係咁。第二，隻股的基本因素起了根本變化，例如高增長不再。以目前形勢判斷，而家的旺市炒多半年一年絕不為奇，暫時不用擔心出現大跌市。其次是內地經濟大環境轉好，這些瘋股半年內業績大轉壞的機會較少，即係話佢地半年後公布全年業績亦多數係一份好業績，所以牌面睇佢地全面終止升勢的機會唔太大。

若然如此，瘋股升得多會回吐，但多數係調整而非大跌，正如牆頭草所講，頂多回三成又衝過，我估好多時佢地消耗咗上升的刺激後，會跟大市回吐，回一、兩成合理啲，以騰訊為例，現價128.7元，回一成係115.8元，還在上升軌之上，回兩成去番103元，跌穿咗上升軌，走勢比較肉酸，但除非佢自己有好壞消息，否則都唔易跌番穿100元。所以要跟呢啲瘋股，等佢回吐時買就安全少少。記住要定止蝕，因為好多朋友其實唔識判斷股份下跌的原因，可能隻股出現咗質變都唔知，所以定一成、甚至兩成止蝕，係保護自己的好方法。

陸羽仁

美國製造業與零售銷售數據好於預期，大宗商品市場與原材料相關股票均強勁上升，美股三大指數都創了年內新高。杜指朝早反覆靠穩，中午開始發力，逐步攀升，直升上9700點上方才回順，尾市升幅收窄。杜指收報9683點，升57點或0.6%；標普500指數收報1052點，漲3點或0.3%；納指升11點或0.5%，收報2103點。紐約證交所交投轉旺，成交增加至15億股。杜指期貨最新報9611點，比現貨低水72點。

早前話見到美股作勢上破高位，杜指果然反覆上穿高位，昨日最高見9713點，圖表上形成一浪高於一浪的走勢。

美國商務部昨日公佈美國8月零售銷售讓上升2.7%，高過市場預期1.9%，為三年以來最高的單月升幅。7月零售銷售係下跌0.2%。增長動力主要來自政府提供的「舊車換新車」的補貼計劃，刺激了汽車的銷售。撇除汽車銷售則上升1.1%，亦好過市場預期。數據紓緩了投資者對美國經濟復甦只靠政開支推動，而沒有消費者參與的憂慮。First Trust Advisors LP的首席經濟師Robert Stein預測零售銷售增長為2.9%的高位，實際數字接近他的預期，佢認為「最值得注意的是銷費增長並不全靠舊車換新車計劃。消費者在復甦，美國在復甦。」若以年度比較，則較去年8月下跌5.3%，係去年10月以來最細的跌幅。

另外，7月份的商業庫存下降1%至1.33萬億美元，高過市場預期，亦係自2006年3月以來最低的。9月份紐約地區製造業活動有所增長，速度更係兩年以來最快。紐約地區聯儲銀行報告，紐約整體經濟指數由8月份的12.1攀升至18.9。

美聯儲主席伯南克在布魯金斯學會演說時表示，美國的經濟衰退已經結束，至少從經濟數據判斷是如此，「從技術角度來說，現在經濟衰退很有可能已結束了。」

一切都走向回復正常的方向，市傳花旗高層一直在商議制定計劃，研究發新股集資數十億美元，回購美國政府所持花旗的股票，以降低政府持有34%花旗股份的比例。批股傳聞令花旗集團勁跌8.9%，加上花旗和美銀的消費貸款壞賬率上升，金融股逆市下跌，明顯拖住大市升勢，美銀跌1.2%，AIG挫5.6%，而摩根大通跌1.3%，係表現最差的杜指成份股。

美國銀行股走勢無影響匯控在美國預托證券的行情，匯控收報86.02元，比香港收市價高1.4%；中移動收報77.08元，比香港收市價高0.8%，ADR港比指數收報21115點，比香港高248點。

昨日美股開市早段，股神巴菲特在加州舉行的一個會議上話，他的公司巴郡(Berkshire Hathaway)正增加投資， 「在我們談話的同時，它正在購進股票。」巴菲特仲話，他正從股票投資中賺了大錢，他的言論令市增加了不少投資氣氛。

股神好識搞氣氛，佢在一個訪問中仲講到一年前佢因為唔識用電話可能害死了雷曼的「慘劇」。佢接受CNBC Becky Quick訪問時，講起一年前金融海嘯高峰時的秘聞。在一年前9月風起雲湧的周五、周六，他的電話嚮過不停，AIG 的行政總裁 BOB Willumstad在周六晚搵佢，叫佢買AIG受重傷的地產業務，作價200至250億美元，股神細心考慮後拒絕，「我對佢講好不幸我不會做這個交易，你不要再在我身上花時間，找其他人吧。」

到周六晚，英國巴克萊銀行的的總裁Bob Diamond打電話俾佢，話佢地想收購雷曼，但英國政府不大支持，要求佢地先得到股東大會批准，這樣就趕不及在下星期三完成交易，所以佢地要找第三者提供一個保險，確保他們在獲得股東大會批准前有資金進行交易，好讓他們可以說服英國政府支持收購。

股神當時趕住去Edmonton出席一個社交活動，加上佢真係聽唔明呢個複雜的交易點做，計唔清楚巴克萊願意付出多少保險金，所以佢就叫呢位Diamond先生俾張傳真佢，寫下交易的細節，好讓他出席活動之後可以詳細考慮。結果他回來後沒有收到傳真，佢假定呢個交易不再進行，所以就無再理會。但一年之後，巴菲特得到熟悉技術的女兒Susan幫助，查番一年前當晚的電話紀錄，竟然發現巴克萊的「鑽石先生」原來晚上曾留言給他，但因為股神唔識睇電話留言，就咁無覆「鑽石先生」，若果股神覆了那個電話，巴克萊買咗雷曼都講唔定。

記者問佢有人話雷曼之死可以拯救整個金融世界，股神似乎唔太同意，佢話除非美國政府大力出手，否則雷曼一定玩完。政府官員話佢地無權力救雷曼，「我的經驗係咁，當政府希望有(權力)的時候，佢地就會搵到權力。如果美林不是在周日賣掉，你估周一股市圖又會跌幾多呢?(意指政府要支持美銀去買美林，就搵到權力去做)。

股神認為雷曼應該能以某種方式有秩序地「轉變」，而不是好像結果那樣突然倒閉，出現一片大混亂，後來雷曼的清盤信託人話，只因雷曼如此失序地清盤，至少有500到750億美元白白地損失掉。

言談間股神對當時佢自己無做的各種交易並不後悔，但對美國政府處理雷曼手法不盡認同。這就是市場風險，當時每一個交易員都「假設」美國政府一定會救雷曼，或許只是由於美國政府不喜歡雷曼行政總裁Dick Fuld太傲慢，而當時的財長保爾森過去是高盛CEO，對 Dick Fuld太了解、太有睇法(甚至偏見)，所以就救貝爾斯登、救AIG、支持美銀收購美林，但偏偏不救雷曼。這個世界充滿偶然，充滿意外，所以買股真係要「Never say never」(永不說永不)，要自己控制風險為上。

陸羽仁

美國9月份費城聯儲指數由上月的4.2跳升至14.1，創了2007底以來的最大升幅。新屋動工和新申領先業救濟人數都有所改善，但巨企如甲骨文 和聯邦快遞的業績卻未能配合，美股大市缺乏明顯方向。杜指走勢反覆，先升後跌，尾市回穩，全日波幅只有106點。

套用Knight Equity Markets總裁 Peter Kenny話，「我們尤如身處於稀薄空氣之中。有好多利好消息，許多股票戲劇性地上漲，我們需要一個唞氣嘅空間。」

杜指收報9784點，微跌8點或不足0.1%，全日最高9855點，最低9749點。標普500指數收報1065點，跌3點或0.3%；納指挫6點或0.3%，收報2127點。紐約證交所成交保持在15億股。杜指期貨最新報9729點，比現貨低水55點。

美國勞工部表示，上周首次申領失業救濟人數從前一周的55.7萬人下降至54.5萬人，為七月初以來最低水平，好過市場預期。不過，上周持續領取失業救濟人數則增加至620萬人，高過經濟學家預期的610萬人。

另外，美國商務部表示，8月份房屋動工數量創9個月新高，公寓式住宅開建數量增加最為明顯，按年計達到59.8萬套，係去年11月以來最高，但略低於經濟學家的60萬套的預期。不過，由於單戶式住宅動工下降了3%和相關的建房許可證沒有增長，房屋建造股份不升反跌。

法國興業銀行策略師Albert Edwards警告稱，儘管最近已經出現了很多好轉的跡象，但全球經濟仍然極易重新滑入衰退，他指出全球信貸緊縮狀況不僅沒有好轉，反而有所加劇。他昨日在其研究報告中表示，全球信貸緊縮狀況加劇的根並不在銀行，也不是建立一個健康的銀行業系統就能解決的。「正如日本經歷過的狀況一樣，問題的根源在於去槓桿化(de-leveraging)。去槓桿化需要很多年才能完成，因此一旦政府實行的極端刺激經濟政策發生逆轉或者暫停，整體經濟將極容易迅速重新滑入經濟衰退的深淵。」

港股美國預托證券跟隨大市靠穩，ADR港比指數收報21735點，比香港收市低33點。匯控繼續造好，收報91.45元，比香港收市價高0.6%；中移動偏軟，收報77.77元，比香港收市價低0.9%。中國鋁業收報9.44元，比香港收市價高2.6%。

昨日隻國泰航空因為出售手持的港機工程股份俾母公司，市場睇好，認為可以減少國泰批股集資的機會，刺激國航股價升咗5.5%，不過同航空業人士傾起，發覺佢地今年生意認真難做。

國際航空運輸協會(IATA)早兩日對業內經營前景的評估，已經將大局講咗出來，國際航空協會話，由於燃料價格上漲，機票價格下跌，逐將全球航空業今年虧損預測由早前90億美元，擴大至110億美元，行業整體蝕大錢。協會將亞太地區航空業虧損預測由33億美元增至36億美元；北美航空業虧損增逾兩倍至26億美元；歐洲航空業虧損更達38億美元，較早前預測增加1.1倍。

航空業朋友講起，經營困難有幾方面原因，第一，雖然話經濟開始復甦，但生意距離正常尚遠，在貨運方面，因為歐美市場仍弱，所以仍相當疲軟。而客運亦唔見好得去邊，以國泰為例，主要靠飛頭等客和商務客賺錢，飛經濟位無得賺，而家頭等和商務客未回頭，所以國泰都研究緊拆啲商務位，加多啲高級經濟位，希望增加收入。而家航空公司最擔心頭等和商務客大幅減少咗，到經濟好番都唔會升番正常，怕公司改變開會的模式，開電話會或視象會議就算，令本來週期性的收縮，變成永久性收縮，會唔會出現咁情況尚要觀察。

    第二，行業無整合，本來經濟衰退，如果令航空公司倒閉，就可以減少行業競爭，改善倖存者的經營環境，但睇番去年風暴高潮時都無大航空公司倒閉，經營者無減少，生意仍然好薄。
   第三，油價唔算低，油價最低跌到30美元，而家又上番72美元樓上，以亞洲航空公司計，油價在70美元以下，航空公司尚可負擔，升到80、90美元時，已經好難頂，所以呢次衰退並無令油價長期低企，令航空公司賺錢艱難。油價升穿70美元後，油公司焗住多做對沖，以平衡油價高企的風險，但若油價回落又要蒙受對沖損失。
綜合而言，航空公司經營環境仍然惡劣，日本航空公司因為受到金融海嘯影響，造成旅客大減，不堪虧損，決定動大手術，計劃三年內裁員5千人，又削減航線，更向全球最大的美國達美航空求助，傳聞日航要求達美注資43億港元，同時也和法國航空-荷蘭皇家航空集團交涉，要求提供數十億日圓規模的援助。航空業朋友話，國泰的情況雖然好過日航，但一樣唔係太好景，所以出售港機(00044) 12.5%，套現之餘獲利12.7億元，多啲錢責吓袋。花旗就將國泰的風險評估由「高」降至「中」，評級由「沽售」升至「中性」，目標價由10元升至14元。

航空業朋友老友話，航空業的黃金期係在20、30年前，而家真係唔係咁好景，我問佢咁又點睇內地的航空公司如國航(00753) ，佢話國航的情況會好好多，一則國航業務中空運比例少，客運中頭等和商務位較少，加上內地受海嘯衝擊較細，環境本來好啲。二則國內航空業是近乎壟斷的情況，內地經濟發達，國航又食得比較多。主要負面因素係油價，如果油價失控向上，內地航空公司一樣會中招，佢話今年國航賺得多過國泰，真係唔係好出奇(但由於油價有機會再向上，證券行唔太睇好，例如瑞銀就話國航係要避開的股份之一)。老友如此解讀航空業的前景，可以作為大家投資參考。

陸羽仁

美國領先經濟指標指數連續第5個月上升，但升幅略低過預期，投資者憂慮股市反彈已超過50%，係時候要調整，打擊投資情緒，股市受壓，不過跌幅溫和。杜指朝早急挫近100點，但在9725點已見支持，午飯前已扳回大部份失地，之後在窄幅橫行，臨近收市，再度回軟。戴爾計劃以39億美元收購信息技術公司Perot Systems，這一消息為科技股提供了支撐，納指則小幅度上揚。

杜指收報9779點，跌41點或0.4%；標普500指數收報1065點，挫4點或0.3%；納指升5點或0.2%，收報2138點。紐約證交所成交大幅回落至只有12億股。杜指期貨最新報9718點，比現貨低水61點。

美國經濟咨商局(Conference Board) 昨日公佈，8月份美國領先經濟指標指數因為股市上漲、消費者信心提高以及房地產復甦，連續第五個月上升，較上月漲了0.6%，雖然略低過市場預期的0.7%，但創下該指數自2004年以來最長連續上漲紀錄。經濟咨商局報告稱，美國8月領先經濟指標指數環比上漲，符合預期。7月領先經濟指標指數被向上修正為上漲0.9%，則超出市場預期。

美股從3月初低點反彈已有50%以上，升咗咁多，分析師認為調整十分正常。Edgemoor投資咨詢公司執行董事Jordan Smith話，「市場應該調整，市場需要及將要調整，但這並不意味著股市會大幅下跌。」

拖住杜指後腿的主要係金融股，摩根大通跌0.9%，美銀跌2.2%，美國運通挫2.9%。美國運通及美銀係杜指跌幅榜的冠軍及亞軍。

美元跌得多反彈，反映美元兌6種主要貨幣匯價的美元指數反彈上77水平，為黃金、石油與其它商品期貨帶來壓力。紐約原油價格跌穿每桶70美元，最新報69.66美元，拖累能源股走軟，Exxon Mobil下跌0.6%，Chevron跌0.8%，Sunoco Inc.下挫2.3%。

港股美國預托證券靠穩，ADR港比指數收報21459點，比香港收市低14點。匯控收報90.76元，比香港收市價低0.2%；中移動收報78.5元，比香港收市價高0.1%。

繼續講講樓市，昨日講到各大發展商的「樓神」為咗自己份花紅，將樓價有咁高谷到咁高，有可能令樓價短期內急升，跟住就呆企，出現這個情況的機會唔細，不可不防，故此有幾樣事情要注意。第一，天價新盤只能短炒，不能長揸，例如嗰啲2000萬買800幾呎的尖沙咀盤，聽聞炒家一入貨就即刻以「確認人」方式沽出街，有個別盤嘜高100萬真係出到手，呢個係大傻搵二傻、二傻搵三傻的遊戲，我唔係真係話佢地係傻，只係想講呢個「傳火棒」遊戲的性質，揸住就會燒燶手，人地炒得樓一啲都唔傻，只要在地球毀滅前轉咗俾下一手，咁就關人個關啦。所以後生仔上車就唔好搵啲旺區貴一貴的新盤啦，附近二手盤雖然無咁靚，但係起碼平三、四成。

第二，唔係以為新盤谷高之後呆咗，唔會影響二手樓市，按06年的經驗，一呆成個樓市都滯滯地，雖然唔係大跌，只係炒得勁的新盤蟹咗，其他二手樓唔郁，或者陰陰地回，所以二手樓價都受大市影響。

第三，現行樓價屬中高水平，特別係豪宅已處於高水平。而家港島、西九豪宅價格貴過97年好多，但一般二手樓只有97年樓價7、8成左右，唔算平，但亦未係天價，所以不能排除這些落後地區樓價抖抖氣後會追一追落後，但唔好期望係一個升唔停的樓市，因為香港的基本因素唔係咁支持得到，香港經濟進入高原期，理論上不能支持一個長升不跌的樓市，要明白樓市升得多會跌，升得愈急，回的時候回得愈快。

我同一個中型地產商傾起樓價，佢私下講得好老實，話豪宅30000元一呎(如尖沙咀盤)長線唔知點支持，買國企股5年後升一倍佢會信，但係買30000元一呎樓5年後升一倍佢唔信，佢仲好寸咁講:「跌一半就有機會。」不過佢亦補充一句，短炒再升吓唔奇，個市顛起上來，無人會講得清高位喺邊。佢亦話二手豪宅有價無市，有盤要等客，可能等半年突然有個大陸豪客會接你貨，又可能等兩三年都無客，你睇吓周星馳個山頂盤４間屋仔，開價40000幾元一呎，賣來賣咗幾年只係賣咗一半就知。(明天再續)

陸羽仁