聯儲局昨日開始為期兩天的議息會議。投資者預期當局將維持其寬鬆貨幣政策以促進經濟復蘇，刺激金融、科技和工業等對經濟成長敏感的行業的股票上漲，美股造好。杜指朝早反覆靠穩，中午時候攀升至全日最高的9843點。其後在高位窄幅橫行至收市。

杜指收報9830點，升51點或0.5%；標普500指數收報1072點，漲7點或0.7%；納指升8點或0.4%，收報2146點。紐約證交所成交12.7億股。杜指期貨最新報9772點，比現貨低水58點。

市場預計聯儲局將維持利率不變，投資者可能將注意力集中在聯儲局對經濟前景的評估，尤其係主席伯南克在上周發表過「從技術上講，衰退已經結束。」的言論。Macro Risk Advisors的總裁Dean Curnutt表示，「伯南克的研究將令他在較長的一段時間內堅持目前的寬鬆貨幣政策。我認為市場完全相信這一點,並消化了這一預期。 最終，聯儲局將撤出注入市場的資金，我們將留意明天的聲明中是否有更多的內容。」

金融股係表現最好的股份。標普金融類股指數上漲2.3%，跑贏大市，當中美銀升2.1%，花旗集團大漲5%，摩根大通升4.3%，係表現最好的杜指成份股。

美元再度轉弱，兌6種主要貨幣的美匯指數重回77水準下方，最新報76.2。金價升至近日新高，最新報每安士1018美元、石油及大宗商品價格全線上漲。油股及金屬資源股走強。Exxon Mobil升0.4%，Chevron升0.8%；美國鋁業漲2.3%、美國鋼業升4.6%、Freeport-McMoRan Copper & Gold升4.4%。

港股美國預托證券靠穩，ADR港比指數收報21757點，比香港收市高56點。匯控收報91.63元，比香港收市價低0.1%；中移動收報80.81元，比香港收市價高0.6%。

網友flyinthesky引述一個論壇對樓市的分析，可供參考。佢話:「星期日有個論壇, 有講者話現在樓價升得好急, 已脫離短期基本經濟因素~ 當樓價持高企或上升, 經濟或收入唔跟升時, 人們就開始懷疑是否高估樓價, 就會下滑, 反回基本~ 不過, 在場施永青有個point又值得參考~ 以往本港樓價主要同本港經濟掛鈎, 當然好視乎本港經濟~~ 但現在有啲唔同, 因為大陸客雖求好大, 因為香港的特殊背景, 法制, 洗埋啲唔見得光錢都得(呢個我諗ge)~炒起香港樓價, 特別係豪宅~ 情況好似外國, 倫敦, 紐約啲CBD比外國人買起晒, 本土居民就會向外遷移到近郊地方~ 所以, 除咗睇香港經濟, 大陸經濟已可左右香港樓價~~ 你話香港樓市已進入高原期, 但會不會比大陸人/經濟再帶上一層樓呢~ 你點睇呢?」

         香港的股市、樓市有大量內地資金進入，確有其事，所以香港樓市會唔會倫敦化，的確有可能，在1989年鐵幕倒台後，前蘇聯或東歐國家的國有資產短期內流入一些有關係、有手段的富豪手裏，佢地知道自己點發達，為求自保，將資產分散，將風險分散，英國大力向他們招手，他們就到英國買豪宅，買球隊。前東歐富豪將英國乜都炒貴哂，這一幕在香港重演唔係好奇，但有兩個註腳，第一係要升主要升港島豪宅，九龍新界800呎以下的樓炒唔起，或者短期炒起好快會回，因為本地實質購買力唔係咁強。第二係英國政府夠硬淨，頂得住抗議樓價上升的聲音。但香港政府耳仔軟，樓市升到咁上下，反對聲音加強，政府怕事一開放重新定期賣地，土地供應一多，樓市就唔係咁易支持。所以香港樓市，不一定如倫敦可以炒得咁長時間。

         講咗咁耐都係想講吓未上車者的策略:可以買，可以唔買。先講買，現時樓價唔平，未來亦唔似會連升5年升唔停，但好多人買樓係有基本需要，例如結婚想有一個安樂窩，唔想租樓住搬來搬去，所以買樓滿足基本需要亦不為過。另外正如我以往都講過，好多年青人自制力好弱，唔買樓，可能大花筒去買嘢去旅行使哂，也可能亂炒股輸哂，所以買間樓自己住，即使買貴少少，買笨少少，10年後供滿一間樓，有幾百萬淨資產，可能都除笨有精，有時人唔使太聰明，笨笨地都可以到岸。

         不過如果你買樓只為滿足自己基本住樓需要，若非賺好多錢，而且估計長期都有穩定高收入，否則就唔應該住太大太靚太豪的單位，你諗住「一邊住一邊炒」就例外。有本書叫《窮爸爸 富爸爸》，內容主旨簡單到唔簡單，就叫大家減少消費，增加投資，如果你間自住樓唔打算賣，又無租金收入，咁樣似消費多過投資，消費得太貴就唔好啦。好似「苦惱的中產」問起，如果買樓要借到9成，其實都借得幾盡，要估吓自己兩公婆未來收入增加的機會大唔大，收入增加的機會大至好借到咁盡，否則要控制一下自己買樓的樓價，買樓時借得太盡，會將你其他所有投資能力都抽乾，你就只係投資喺間樓上面啦。若果你「半住半炒」又唔同，你明知係博，升咗會沽，咁就唔止係消費。

         若果唔買，租樓住都得，雖然唔係確保樓價一定會大跌，你將來一定有機會買到平樓，但只要你自制力夠，努力儲錢，合理投資，長線一樣會有好回報，唔會差過買樓。若講投資，首選紅色投資，要同大陸這個經濟高增長地區有關，可以買紅色股，一回見佢落就買，甚至好似供樓咁月供; 也可以在大陸大城市買樓，要買入有出租可能的樓，唔怕借錢買，以租金收入抵銷供樓開支，期以10年，大陸大城市的樓價升幅好大機會大過香港樓。買大陸股又好，買大陸樓又好，除了資產增值外，睇5年10年人民幣好有機會升3到5成，買入紅色資產可兼享這種升幅。你可能會問，萬一大陸出現大問題咁會點，我不能排除這種可能性，但你估若果大陸唔掂，你揸住香港樓又會唔會掂呢?

         所以講短炒和講長揸不同，短炒好難睇，今期香港跑贏，下期大陸跑贏，但係睇5年以上的長線易講啲，香港資產不如大陸，所以香港人要分散投資，細細地買間香港樓住吓唔拘，唔好將香港間樓當做未來10年、20年你的全部投資，否則你會錯失中國未來黃金10年經濟起飛的投資機會，捨快取慢，智者不為。


(我外出公幹，今明兩天暫不能答網友提問，請諒)


陸羽仁

投資者觀望美國聯邦公開市場委員會(FOMC)的利率決定。杜指早段反覆靠穩。福特汽車和General Mills發表樂觀業績預期，股價大漲，杜指逐步走高。午後聯儲局發表會議聲明，維持利率不變，但同時表示將放慢購買債券的速度。杜指在臨近收市的最後一小時，從年內高位戲劇性下滑，由上升80點變成下跌80點。

杜指收報9749點，跌81點或0.8%，全日最高9918點，最低9741點；標普500指數收報1061點，挫11點或1%；納指跌15點或0.7%，收報2131點。紐約證交所成交13.2億股。杜指期貨最新報9703點，比現貨低水46點。

聯儲局在聲明中表示美國經濟已經開始轉暖，但當前經濟形勢仍需要低利率，故維持利率在0%至0.25%之間不變。當局同時表示將收購1.25萬億機構抵押證券以及2000億美元機構債券，但會逐步減輕收購力度來促進市場的平穩過度。財長蓋特納在眾議院金融服務委員會表示，美國消費者最終會恢復量力而出的消費習慣，當前最重要的是在確保經濟復甦後再實行緊縮政策。Stifel Nicolaus市場策略師Kevin Caron表示，政府放慢購買債券速度，市場因此認為利率很快就會上升，結果給股市帶來壓力。

美國能源情報署(EIA)公佈，截至9月18日當周原油庫存增加280萬桶，遠遠高過市場預計的下降150萬桶。資料顯示，上周原油日需求量下降62.8萬桶至1850萬桶，降幅3.3%，日需求量創6月26日以來的最低水準。汽油需求下降21.1萬桶，降幅2.3%。紐約原油價格下挫，能源股走軟，Exxon Mobil下跌1.2%，Chevron跌1.7%，Sunoco Inc.下挫2.3%。

原油需求下降，說明美國經濟疲軟狀況依然存在。金融股亦明顯向下，其中摩根大通、大摩及花旗集團齊齊跌約3%。摩根大通更係表現最差的杜指成份股。

             港股美國預托證券隨大市偏軟，ADR港比指數收報21386點，比香港收市低210點。匯控收報90.02元，比香港收市價低0.9%；中移動收報80.33元，比香港收市價高0.7%。



國藥新股認購熱到開巷，結果認購人多分得股少，花12.8萬去認股才分得一手400股，結果真係食「雞糊」。不過都好過去認中冶，佢今日掛牌，投資者擔心守唔到招股價，希望保薦人出力頂吓，借錢認購中冶衰起上來要損手。呢個故仔講咗投資的一個簡單道理，人太逼的時候，都係避開吓好。

                   呢啲人逼逼唔多棧的情況比比皆是，我有個老友專賣大陸樓投資(唔係短炒)，我經常問吓佢大陸樓市點樣，通常都幾準，佢由年頭買樓買到年中，到兩個月前停手，佢講番停手的情況，當時佢睇中北京CBD一個住宅，百幾平方(即千幾呎)，屬細碼貨色，業主原開價400萬人民幣，佢願意買，但業主反價，加到418萬，佢諗緊之際，經紀不斷Call，叫佢馬上落訂，因為另外有三個買家睇緊，都想買，大有買遲半步就無之勢。

                  老友聽到咁情況，即時縮沙，按佢嘅經驗，咁搶法一定過熱，個市好快會回，因為目標單位的樓價從年初低潮時28000、29000元一平方(約2800元至2900元一呎)，升到當時33000元一平方，半年升咗15%有多，短期內升得過急，要消化。佢一決定唔買，話口未完，阿爺就話要嚴限銀行借錢俾人買第二間樓只能按6成(第一間可按8成)，內地樓市馬上降溫。老友話而家同一間樓只係造400萬左右，跌番5%，而且市場無咁顛，可以慢慢揀。



你可能會問，乜炒股唔係順勢而炒，唔係愈逼人愈好咩 ? 短炒的確要順勢，你睇《股市作手回憶錄》的大炒家主角，也是順勢追貨，但唔好忘記，佢係極度短炒者，可能半個鐘一個鐘就離場，好似你炒期指即日鮮咁，順住勢炒易啲。我以前都講過，期指開市半小時後，已造出日中高位與日中低位，之後若一穿高位或低位就入，多數會走多50點、100點。而家有啲大戶就係用電腦程式勾住期指走勢，一破位就入走幾分鐘，咁都搵到食，佢地咁做亦擴大了期指的波幅。

                  講番人逼逼要有警覺性，特別對中長線的投資者重要， 買股要揸長啲，入貨價較低好重要，咁樣防守性就強啲。相反地，如果要同人搶先至搶到的東西，短線嚟睇個價都唔平，唔係太適合長線。新股都係一樣，而家啲新股適合好多錢存在銀行的人去抽，因為存錢在銀行反正無息，抽新股那怕是第一日升少少都，即沽都可以執少少飲餐茶，但係對有心投資的人來說，抽新股可能係人太逼了。

陸羽仁

美國8月份二手屋銷量較上月下跌2.7%，大出市場所料。美國聯儲局表示會縮減兩項支撐信貸市場的債券拍賣和貸款安排，加上美元升值，原油價格等大宗商品價格回落，美股昨日繼續偏軟。杜指朝早曾一度向上，但觸及9800點已無力再上，掉頭下滑至9700點水平，其後在附近水平徘徊至收市。

杜指收報9707點，挫41點或0.4%；標普500指數收報1051點，跌10點或1%；納指跌24點或1.1%，收報2108點。紐約證交所成交13.5億股，與上日相若。杜指期貨最新報9622點，比現貨低水85點。股市波動性增加，俗稱「恐懼指數」VIX指數上升了近6%，至25點。

美國勞工部公布，上周首次申領失業救濟人數下降2.1萬人至53萬人，好過市場預期的55萬人。首次申領失業救濟人數已經係連續三周下降。

美國全國地產經紀商協會(National Association of Realtors) 公布按年計的8月份二手房銷量從7月的520萬套銳減至510萬套，較7月份下跌了2.7%，遠差過市場預期的增長2.1%，房屋建造股全線下挫。

聯儲局昨日表示由於金融市場「持續改善」，因而收縮它的促進信貸市場流動的安排，回購債券規模將由84天內標售750億美元，縮減為70天內500億美元；定期證券借貸安排(term securities lending facility) 亦由原本的750億美元逐步收縮至250億美元。聯儲局減少插手債市，顯示市場正踏入正軌，如果市場接受到聯儲局撤退的步伐，這是好事而非壞事。

Global Investors Security的基金經理Mark Bronzo話，「房屋銷售數據強差人意，投資者將繼續從經濟數據中尋找聯儲局退出部份刺激經濟計畫的訊號。股市疲態已露，沽售潮可能會持續至本季末。」

不過大摩睇市無咁淡，佢將今年年底標普500指數的目標點位從900調升至1050點(昨收1051點，即係話估未來係上落市)，原因是預計企業界盈利數字將超出預期，而非市場接受較高的市盈率。大摩在研究報告中話，「更高的市盈率將意味著更高的股價目標，但在目前的環境下，除了官方利率處在極低水平之外，我們看不到任何能夠支持市場接受市盈率大幅攀升的有力因素。」

美股轉弱，美元反彈，美元指數重上77點上方，最新報77.115，相對地大宗商品市場走軟。紐約原油跌至最新的每桶65.88美元；黃金亦跌穿1000美元關口至每安士998.2美元。油股偏軟，美鋁（Alcoa）、美國鋼業（US Steel）及弗里波特-麥克莫蘭銅金公司(Freeport-McMoRan Copper & Gold) 齊挫4%。金融股亦偏軟，包含79家金融機構的標普500金融指數下跌1.8%，當中美銀下跌3%，花旗集團跌2%。

港股美國預托證券跟隨美國市向下，ADR港比指數收報20989點，比香港收市低152點。匯控收報88.31元，比香港收市價低0.4%；中移動收報78.11元，比香港收市價低0.9%。

新股潮因為中冶破底而冷郤，屬情理之中，但國藥昨天逆市反彈，認購佢仲有錢賺。其實過去每次新股潮太熱時，都有咁情況，每當出現一隻新股王，吸引大量市民入飛，連帶其他質素無咁好的新股都受惠，新股王因為太多人抽而分得好少股份，借錢認購只食到粒糖，你唔可以話佢完全唔得，但去認購其他無咁好的股份可能破底，認咗要損手。你又唔可以話認新股一定死，因為只要慎擇質素高的股份，即使佢定價較高，結果都可以執少少，但如果好濫咁去認，就隨時中招啦。這又回歸到人逼逼的道理，人太逼的地方，即使買中派彩都唔好，一隻大熱門馬一賠1.5，中咗都無乜肉食。

其實大手認新股的主要風險不在於分到好少股份但股價跌1、兩成，真正危險是分到比想像中多好多的股份再大跌，你用50萬本金，借500萬去認新股，在熱潮當中，通常只會認到價值2、3萬至7、8萬的股份，假設認到8萬元的股份，最後跌破上市價兩成，你都只係輸1.6萬，計埋利息唔夠2萬，尚唔算係大數目。最怕係入咗飛之後突然來一個股災，大市兩三日內跌3、4成，一跌大戶可以在配售部份抽飛，散戶認IPO借哂錢入哂飛想抽都無得抽，焗住接貨，可能接到40、50萬股(如果你太早入飛其他散戶可以臨尾唔入飛，你認到的股票可能更多)，結果一上市跌3、4成，就可以輸到20萬以上(即係輸一半本金)，雖然出現呢種情況機會好細，但不能完全排除。

有一個類似例子可以參考，早幾年有一排炒細股炒得好旺，細股炒到咁上下就批股，當時細股批股例升，升完再批，炒第二轉、第三轉。有一次有隻細股批股，唔知點解批到好散，不只批俾機構投資者，連普通經紀行都問啲大客要唔要，有個股評人經常炒股，心諗認購批股只是「指鼻哥」，唔使現金入飛，唔怕認購，就同經紀行話佢認價值2000萬的股票，心諗咁多人認，最多分到200萬，一復牌升1、2成就沽，搵番3幾十萬就閃。點知第二日經紀打來，話好少人認購，結果佢分到成1000萬股票，佢當堂呆咗，邊有咁多現錢接貨，借孖展俾按金都要俾400、500萬現錢，佢都無。其實批得咁散連大散戶都有機會認購，已經係一個訊息隻股唔得，機構唔要貨(好似中冶只是以中間價而不是上限價定價，已顯示大戶入飛唔積極，而且在競價時只願用較低價接貨)。

講番當日隻細股復牌，一開市就跌3、4成，經紀行見股評人無錢俾孖展按金火，二話不說就將佢大部份股票打靶，就咁唔見咗300、400萬，就係因為經紀一個電話問佢要唔要貨，佢一念之間話要，就發生呢個慘劇。呢個故事教訓我地，大手認購股票，在某些例外情況下有高風險，要量力而為。

陸羽仁

美國8月份耐用品訂單創了7個月以來最大跌幅，同期新屋銷售升幅又差過預期，引發投資者對經濟復蘇再度存疑，黑莓手機生産商RIM更因業績未如理想，股價勁挫17%，美股上週五反覆偏軟，連續第三天下跌。

杜指收報9665點，挫42點或0.4%；標普500指數收報1044點，跌6點或0.6%；納指因RIM勁跌拖累，跑輸大市，跌17點或0.8%，收報2091點。紐約證交所交投淡靜，成交只有12億股。杜指期貨最新報9612點，比現貨低水53點。總結全週，杜指下跌1.6%，標普500指數跌2.2%，納指挫2%。

港股美國預托證券跟隨美國大市向下，ADR港比指數收報20905點，比香港收市低120點。匯控收報87.48元，比香港收市價低0.7%；中移動收報77.66元，比香港收市價低0.8%。

在美國匹茲堡舉行的20國集團(G20)峰會在上週五結束，這是金融海嘯發生以來的第三次會議，市場關注大國的退市步伐。G20會議的第一個結果，是包括中國和印度在內等新興國家在國際經濟事務的發言權提升。G20領袖在會後宣佈，20國集團將取代8國集團(G8) ，成為最主要的國際經濟論壇，讓中國和印度等發展中國家發揮更多影響力。英國首相白高敦話，新集團將會「成為負責全世界經濟管理的主要經濟組織」。美國總統奧巴馬一直負責新舊集團的交接和協調，他說，「我們不能再用20世紀的方式應對21世紀的挑戰。」G20同意將發展中國家和新興市場國家目前在國際貨幣基金組織約43%的投票權份額水準提高至少5個百分點，發展中國家和轉軌經濟體在世界銀行的投票權至少增加3%。不過,美國媒體認為，G20此次取得的成果，與過去多年來G8集團所達成的那些「魚龍混雜」的提議看似大同小異，缺乏具體細節。

由於經濟衰退似有已經結束的跡象，國際貨幣基金會(IMF)在會後預計，全球經濟在2010年將增長3%。IMF曾在7月預測全球經濟在2009年將萎縮1.4%，2010年將增長2.5%。不過，隨著G20峰會在匹茲堡召開，該組織對全球經濟增長顯得更樂觀。IMF更建議應該開始未雨綢繆，敦促各國展開合作，分階段退出刺激政策，認為如果退出進程得當，各國政府救助金融業的最終成本可能不會像之前預計的那麼高。儘管各國都在為「退市」積極做準備，但G20集團亦一致認為，目前開始解除空前的貨幣、財政和金融支援措施還為時過早。這些措施在抑制危機、帶動全球經濟走出衰退方面發揮了重要作用。各國承諾將維持緊急刺激經濟措施，直至復蘇站穩腳步，這是G20會議第二個結果，市場一直擔心各大國政府太早退出市場，會議結果緩解了此一憂慮。

今次G20峰會的另一焦點是如何監管金融機構。法國總統薩爾科齊一直推動嚴限金融業高層的花紅，美國過去態度比較猶豫，但美國總統奧巴馬今次有較明確的表態，他在談及銀行業薪酬時表示，不能容許給銀行業高管濫發獎金，這種行為危及整個金融體系的安全，卻把「爛攤子」留給納稅人來收拾。有消息指，聯儲局理事塔魯洛正帶領官員策劃有關金融機構薪酬機制的新規定，這將成為美聯儲至今最為「激進」的金融業薪酬監管方案，該方案瞄準的不僅僅是銀行高管獎金，還要對金融機構普通風險管理人士的薪酬進行干預。據悉，聯儲局擬議的新規將涉及5000餘家銀行的薪酬。

不過在G20會議上，法國、德國呼籲立法懲罰那些貪婪的銀行家，但這遭到了美國的反對。有分析人士指出，醫療改革和現有的金融改革方案大大增加了奧巴馬的負擔，很難再對銀行業薪酬放太多注碼。

所以G20會議的結果係：雖然有提議呼籲對銀行監管方盡心盡職，但是這並不具備任何約束力。這個結果令很多人大失所望，有媒體更將之稱為「匹茲堡的遺憾」。

全球金融體制改革方面，G20領導人承諾努力實施一致的財政、貨幣、貿易和結構性政策，防止資產和信貸價格出現大起大落。不過最終公報中沒有包含匯率政策問題方面的相關措辭。

與此同時，G20各國在提高資本標準等過去有分歧的問題上達成一致。G20領導人承諾到明年年底前制定銀行資本標準，G20國家的所有主要金融中心到2011年前都將採用新巴塞爾協定標準。所謂新巴塞爾資本協定（Basel II），是由國際清算銀行下的巴塞爾銀行監理委員會（BCBS）所促成，內容針對1988年的舊巴塞爾資本協定（Basel I）做了大幅修改，以期標準化國際上的風險控管制度，提升國際金融服務的風險控管能力。

雖然表面上看20國峰會沒有太厲害的利果，但最為市場關注的退市問題暫時未放上各國議事日程，顯示寬鬆的貨幣環境還會持續一段時間，有利投資市場。

陸羽仁

美股受多家企業的併購消息刺激，美股扭轉連續三日的跌勢，強勁反彈。杜指開市15分鐘內即急抽逾100點，之後逐步升至9800點水平橫行，下午最高上過9824點，升近160點，尾市升幅收窄。

杜指收報9789點，漲124點或1.3%；標普500指數收報1063點，升19點或1.8%；納指創出兩個多月來最大單日的點數和百分比為漲幅，漲40點或1.9%，收報2131點。由於昨日係猶太人贖罪日(Jewish Yom Kippur)假期，紐約證交所交投淡靜，成交不足10億股。杜指期貨最新報9740點，比現貨低水49點。

昨日有多家企業宣佈併購消息。其中施樂(Xerox) 宣佈以每股63.11美元，共64億美元收購企業服務供應商Affiliated Computer Services。施樂表示，預計這筆交易將提高公司在商業外包業務領域的市場份額，但投資者似乎並不睇好施樂這單交易，施樂勁跌14%，而Affiliated Computer則大漲14%至6.61美元。

雅培製藥(Abbott Laboratories)亦表示，將以不超過70億美元收購比利時的蘇威公司(Solvay ) 旗下製藥業務，以擴展其新興市場的份額。雅培股價上升2.6%。另外，強生(Johnson & Johnson) 宣佈以逾3億歐元購得荷蘭生物科技公司Crucell約18%的股權，如果兩公司將要開發的流感疫苗達到目標，強生表示會支付發展進度費用和專利使用費，強生收市升1.1%，Crucell則挫6.6%。

據英國媒體報道，卡夫食品公司(Kraft Foods)提出收購英國朱古力製造商吉百利(Cadbury) 無進展，準備以大約174億美元敵意收購吉百利。卡夫昨日逆市下跌1.4%，係表現第二差的杜指成份股。

        公司併購的消息湧現，顯示市場重現投資的胃納，而銀行亦願意融資支持併購，係市場回復正常的主要徵兆，利好股市。大摩亦上調了金融股評級，預計未來12至18個月，銀行業貸款損失將下降，大型銀行的資本重建也基本完成。金融股係標普500指數中表現最好的股份，其中美銀漲3.7%，美國運通及花旗集團升逾4%。美國運通及美銀係杜指嘅升市亞軍及季軍。而冠軍係思科(Cisco) ，巴克萊(Barclays) 指思科北美地區企業需求增加，歐洲業務亦增強，將其評級從中性上調至增持，思科漲4.4%。
港股美國預托證券跟隨反彈，ADR港比指數收報21064點，比香港收市高476點。匯控收報89.22元，比香港收市價高2.4%；中移動收報77.41元，比香港收市高2.1%。

不少朋友問我好唔好買國債，可以講吓。祖國在60大慶前夕在香港發國債，入場費每手1萬元，期限分別為兩年、三年和五年，其中五年期只向機構投資者發行，票面息率3.3厘。另外，供散戶購買的兩年期國債票面利率為2.25厘，三年期為2.7厘，每半年派息一次。

中環茶友話，國債風險極低，加上人民幣長線有升值空間，雖然在兩三年債期內不一定會升值，但應該不會貶值，所以如今付2厘幾的利息，算做不錯的利，即使利息降到2厘，應該亦去到貨，如今以這個息價在港發第一批國債，有少少益香港人的味道。

但買不買國債，主要睇你的錢做用來做乜，如果啲錢原本打算放在銀行做港元定期存款，或美元定期存款，不會作其他投資，咁就買國債抵啲，因為有2厘幾息，比銀行存款高息，而且人民幣匯價比港元和美元強，匯價上有優勢。

但反過來說，如果你資金有限，不買國債會做股票或地產投資，咁就唔好買債券，即使係較好的人民幣國債都唔應該買，因為如今經濟復甦期開始，你拿筆錢去買紅色股，兩三年後回報有三、四成一啲都唔奇，不只6、8%咁少回報，若人民幣升值，紅色股會升得更多。另外又可以拿錢在大陸大城市買樓，租金回報亦比國債息率高，槓桿效應更大，所以國債的條件雖然吸引，但買唔買國債，主要看你的資金本來的投資傾向。

陸羽仁

美國經濟咨商局（Conference Board）公佈9月份美國消費者信心指數下跌，遠差過市場預期，加上Intel、Dell及微軟等多家科技巨股下跌，美股再度偏軟。杜指昨日朝早曾一度向上突破9800點，但好快就打回原型，由升轉跌，其後在低位窄幅徘徊，尾市再跌，以接近全日最低位收市。

杜指收報9742點，跌47點或0.5%；標普500指數收報1061點，微跌2點或0.2%；納指跌7點或0.3%，收報2124點。紐約證交所交投仍然淡靜，成交只有不足12億股。杜指期貨最新報9674點，比現貨低水68點。

9月份消費者信心指數從8月的54.1下降至53.1，遠比市場預期的57低。家居零售股家得寶(Home Depot)下跌1.6%，係昨日表現最差的杜指成份股。

科技股走弱，有技術分析員表示，市場如果調整，科技類股最有可能領跌。認為大型科技類股在長達6個月的大升市中，持續領漲，現在已出現疲態。微軟的CEO Steve Ballmer話，經濟衰退後企業需要調整開支，IT預算將保持在相對較低的水準，這也打壓了科技股的走勢。微軟挫0.3%，Intel跌1.3%，而Dell跌3.2%。

    標準普爾(S&P)/Case-Shiller住房價格指數顯示，美國7月份住房價格較前月上升，在美國20座大城市中，13座城市的房價至少連續3個月較上月上升，只有拉斯維加斯和西雅圖的房價較上月下降。美國20大城市房價比去年同期則下降了13.3%，好過市場平均預期的下降14.2%。

    達拉斯聯邦儲備銀行(Federal Reserve Bank of Dallas)行長Richard Fisher昨日話，一旦經濟出現穩固增長的確鑿跡象，聯儲局就有必要退出極度寬鬆的貨幣政策。他特別提到了聯儲局通過購買長期國債向金融系統注入流動性的定量寬鬆政策，佢仍對聯儲局資產規模擴大所引發的長期通貨膨脹風險保持警惕，房屋價格已出現觸底跡象，但樓市仍在依賴政府的救助措施。現在的問題是，樓市要想真正恢復健康，就必須結束政府的救助措施，這也是聯儲局承諾在明年年初結束購買抵押貸款支持證券政策的原因。只有在市場力量代替政府支持之後，住房市場才能真正恢復活力。

金融股個別發展，美國運通跌1.1%，美銀跌0.4%，富國銀行跌1.9%；高盛升0.6%。巴克萊集團(Barclays)宣佈，同意通過其葡萄牙子公司收購花旗集團在葡萄牙的信用卡業務Sucursal em Portugal，包括400萬個信用卡帳戶，總資產6.44億歐元，該交易還有待反壟斷機構審批，預計將在年底前完成。花旗集團賣資產減債，漲2.8%。

港股美國預托證券靠穩，ADR港比指數收報21104點，比香港收市高90點。匯控收報89.76元，比香港收市價高0.4%；中移動收報76.79元，比香港收市高0.4%。

     昨日有則中央銀行行長評級的新聞，值得一講，美國的《全球金融雜誌》(Global Finance Magazine)公布今年全球央行行長評級，歐洲央行行長特里謝獲最佳央行行長，獲得最高的A評級，而全球兩個最大經濟體的央行行長，美國聯儲局主席伯南克及中國人民銀行行長周小川，同樣只獲C級。

《全球金融雜誌》講述自己評比標準，話全球陷入自30年代以來最嚴重的經濟危機，除了控制通脹、經濟增長及貨幣穩定等評分標準外，今年的評級還特別著重各央行行長在金融危機中的表現。佢將歐洲央行行長特里謝評為A級，原因是特里謝不怕各方要求急降利率的壓力，穩步調降利率，其漸進做法使歐元區經濟免於大起大落，現在面對各方要求收回貨幣供應的責難，同樣不為所動，沒有急急退場。

         一般人可能認為中、美兩大國救市有力，唔知兩國央行行長點解攞C，《全球金融雜誌》指伯南克及周小川在面對世紀金融海嘯時採取的大量寬鬆貨幣政策，令政府產生大量債務，又衍生信用泡沫化等危機，所以周小川的評級由去年的B-級跌至C級，而伯南克則由C-微升至C級。

《全球金融雜誌》話中國為了「保八」，人行大力執行貨幣寬鬆政策，令銀行信貸大增，但因經濟過熱，恐怕會衍生銀行不良債權。雜誌又批評人民幣的匯價，話世界各國多認為，人民幣匯價被嚴重低估，幅度甚至達15至20%，其他國家一再表達期待人民幣升值的立場，但中國現階段為了經濟持續增長，似乎仍無意讓人民幣過度升值。

我無意評價《全球金融雜誌》是否洽當，但認為中、美兩大央行的行長份工好難做。美國聯儲局的政策或有更多伯南克的個人色彩，人民銀行的政策其實是中國的國策，兩國去年面對百年一遇的融化性經濟危機，佢地唔出盡全力放水頂住經濟，全世界就會出現長久的蕭條，《全球金融雜誌》唔止評歐洲央行行長特里謝攞A，澳洲儲備銀行行長史蒂文斯和南韓央行行長李成大同樣攞A，但無論歐洲又好，澳洲、南韓都好，佢地主要睇住美國頭，見到美國已經放咗咁多水，佢地就唔使去到咁盡，唔使同美國鬥多，如果美國咁放水都唔掂，佢地放多啲亦無用，但如果美國掂，佢地的水喉略比美國緊，就可以減低本地出現通脹的風險，所以佢地份工易做好多。

至於中國，去年第4季時睇住佔GDP30%的出口部份恐怖急跌，係跌3、4成咁跌法，將出口的影嚮化入GDP條數，即係單是出口急跌，已經可以令GDP唔見咗10%以上，認真驚人，若果唔出大力去救，GDP唔單止遠唔可以保八，衰起上嚟變負數，由升9%變負數，只是就業問題都可以係大災難，所以中國無得揀，只有發狂放水，浮起個波再算。

中國咁放水法，一係唔得，一得就激起泡沫，我估中國唔係唔知，但認為有泡好過無泡，有泡後放氣容易，相反個波爆咗就吹唔番大。所以今年6、7月我見大陸個市反彈得咁急一直唔停，帶到香港跟住直上，我話呢個唔係正常的反彈市或康復市，一嚟就係泡沫市，當時有網友唔同意，但你睇中國，佢自己知道有泡，所以急急放氣，口鬆手緊，暗中收水，大陸股市到咗3400幾點就急回，跌番兩成幾，一個小泡沫爆咗，但係避免咗出一個大泡沫。

爆小泡沫唔係壞事，股市係要升升跌跌，反覆向上，才是健康的升市。我地啲新股市場，同樣有個小泡泡爆咗。

陸羽仁

美國聯儲局主席伯南克出口術支持美元，美國9月份製造業與就業市場數據都差過預期，高盛又預計就業報告唔得，打擊投資情緒。美股在第4季第1個交易日大幅下跌，杜指開市即急挫115點，中午後再跌至9560點水平，窄幅徘徊至尾段，最後有投資者憂慮將於今日公佈的非農就業報告會唔掂，杜指臨近收市再度跳水至接近全日最低位收市，錄得3個月以來最大單日跌幅。

杜指收報9509點，跌203點或2.1%；標普500指數收報1030點，跌27點或2.6%；納指跌65點或3.1%，收報2057點。紐約證交所交投活躍，成交逾16億股。杜指期貨最新報9452點，比現貨低水57點。

匯控美國預托證券跟隨美股重創，收報86.52元，比香港收市價低3.8%；中移動收報74.5元，比香港收市低1.4%。ADR港比指數收報20367點，比香港收市低588點。

經濟復甦的速度問題困擾著美國市場，供應管理協會(ISM)9月份製造業指數從8月份的52.9下降至52.6，低過市場預期的54。BTIG首席市場策略師Mike O'Rourke表示，「今晨的ISM資料令人失望，不及預期。隨著上一季結束，許多為了粉飾帳面而持有股票的投資者開始獲利回吐。」

美國勞工部公佈上周首次申請失業救濟人數增加至55.1萬人，高過預期的53.3萬人。花旗集團外匯策略師Michael Hart在給客戶的研究報告中表示，「這些負面經濟數據集中出現在一個敏感時期，使市場開始質疑股市連續6個月上漲的行情是否站得住腳，並且懷疑大範圍的經濟復甦能否持續下去。」

高盛的John Hatzius改變他對非農業就業數據的估計，加速了美股下調，佢估9月美國損失25萬個非農業就業職位，比佢原先估計的20萬個為高，佢話最近各種經濟數據顯示美國的就業市場仍然令人失望。高盛的估計令美股在中午時段再向下探。

但令美股跌咁多的主要原因是聯儲局主席伯南克在國會的講話，伯南克昨日向眾議院金融服務委員會話，如果美國政府不控制預算赤字，美元會有危機。美元匯價因而應聲向上，美匯指數昨日升了0.8%，而股市就急跌。伯南克顯然是一邊維持寬鬆的貨幣政策，一邊就出口術想支持美元，佢能做的事情就是呼籲政府要有更多的財政紀律，由於國會議員大多力推政府增加各種開支，伯南克亦把個波交番俾議員。


伯南克呼籲要有財政紀律，在佢控制到的範圍就意味加息，這樣對美元有利，但不利股市，至少中短期內不利股市，因為若政府和國會聽從呼籲，就等如政府會減少開支，減少刺激經濟的計劃，更少資金從政府手中流入市場，企業賺少啲錢。歐盟的官員亦出口支持美元，歐盟經濟及貨幣事務專員Joaquin Almunia話佢關心歐元升值，歐盟將會在今天討論這個問題，並在週末召開的七大國(G7)會議中提出。

呢一輪美元貶值太多，伯南克率先出口支持美元，唔知佢只係齋講，還是有行動跟尾，例如會否對加息時間作點暗示，例如澳洲本周就率先表露想加息的意願，令市場估計澳洲會在11月加息，澳元早幾日因而一度湧上，若美國聯儲備局對加息時機有何暗示，就係大事件。亦唔知奧巴馬政府對伯南克的呼籲有無回應，美國政府還被醫療改革的問題困擾，若然佢地對伯南克呼籲控制預算赤字的講法有積極回應，預計匯市和股市還有波動。

陸羽仁

美國9月份非農就業人口減少幅度遠大於預期，加上8月份工廠訂單下滑，再度印證了經濟復甦步伐並非如預期般強勁。美股上週五連續第四天走弱，杜指朝早跳水，中午回穩，但至9500點上方已無力再上，午後再度回落，收市報9488點，微跌22點或0.2%；標普500指數收報1025點，跌5點或0.5%；納指跌9點或0.5%，收報2048點。紐約證交所交投普通，成交14億股。杜指期貨最新報9434點，比現貨低水54點。總結上週，杜指和標普500指數齊齊下跌1.8%，納指則下挫2.1%。

勞工部公佈9月份非農就業人口減少26.3萬人，遠高過市場預期的17.5萬人，其中建築業、製造業、零售業和政府部門的就業人數降幅最大。9月份失業率攀升至9.8%，逼近10%大關，為1983年6月以來新高。另外，每週平均工時下降至33小時，平均小時工資則增加0.01美元，至18.67美元。若包括揾唔到長工，轉做兼職及唔去揾工的人，失業率其實去到17%！就業報告出爐後，杜指即跳水至全日最低位。Haverford Trust Co首席投資員Henry Smith表示，「市場對就業數據普遍感到失望，就業係較延時的一項指標，所以大家都預期它將是最後反彈的數據，其走勢大部份都已被市場消化。」

美國8月份工廠訂單下降0.8%，降幅高過市場預期的0.6%。為3月份以來首次下滑。耐用品訂單下降2.6%，不包括飛機的非國防資本品訂單下降0.9%。

非耐用品訂單則上升0.8%，估計係石油價格上漲所致。另外，8月份製造業庫存量下降0.8%，為連續第十二個月下降。波音飛機及Caterpillar均下跌逾1.3%，而通用電氣更挫3.8%，成為表現最差的杜指成份股。

金融股個別發展，而市場焦點係最近陷入困境的貸款機構CIT Group ，上週宣佈了最新重組計畫。股價猛漲14%。另外，標準普爾(Standard & Poor's)表示，First Solar將取代被輝瑞公司(Pfizer)收購的惠氏(Wyeth)而入選標普500指數，First Solar漲4.2%，

港股美國預托證券偏軟，ADR港比指數收報20220點，比香港收市低155點。匯控收報85.27元，比香港收市價低1.5%；中移動靠穩，收報74.02元，與香港收市持平。

早前美國網友GNIW講到要買樓的問題，值得一講。佢話:「我係3月左右時受你提點過要止賺止蝕那個NY(紐約)金融新丁. 《RICH DAD, POOR DAD》(窮爸爸富爸爸)作者KIYOSAKI提出一點係我從初中到而家都好記得的: 佢話多數自住樓都係負債, 只有會生現金的才是資產, 佢有成十幾幢物業, 全都係用租金收入支持供款, 連佢自住那幢都係靠其他物業的收入來供款.
呢個理念我就快可以實踐喇! 因為陸SIR之前對我提點緣故, 我而半年內都係股市都有少少少成績. (THX! 陸SIR!!) 我打算呢幾年內會係上海買樓收租. 因為NY啲樓太貴喇. 閒閒地係BROOKLYN ( 坐SUBWAY去WALL ST. 要40分鐘.) 兩層ONE FAMILY HOUSE屋仔都要成55萬美元. 我計過, 就算我可以租一層半出去, 一個月先得1500蚊美金租 (如果租客唔走佬),加埋地稅其他嘢, 我一個月都起碼要俾1500蚊出黎. 好似你咁講, 揸乾哂我啲投資能力. 所以我想係上海樓價仲未喪升前買個黎收租,靠個租金嚟供樓. 我下年5月會參觀上海世博,順路去睇樓.我想請問陸SIR可否喺網誌談談以外國人或香港人身份喺上海置業時應要注意什麼事項呢? 例如稅制, 借按揭, 甚至如何找物業管理. 也希望各位有在上海置業的師兄能夠俾下意見.」

GNIW炒美股有所得，佢多謝我提佢要止賺止蝕，我當時見佢炒反彈股炒得咁高興，所以提吓佢要止賺止蝕，因為大市行得咁快的情況唔常見，有當然要食到盡，但係去到咁上下個市會疲，要抖抖氣，在大市抖氣時唔識止賺止蝕，如果你愈買愈大，好易嘔突俾佢。長線投資未必要止賺止蝕，但炒股唔止賺止蝕，好蝕底。

第二點值得講吓的是在股市賺到快錢搬去買樓，呢點我極之讚同，股市是快進快出的英雄之地，你呢期炒股贏錢，唔等如下期一定贏，你揸住5萬蚊美金，如果每個月升1倍，1年已經有2億美金，你估會唔會?機會唔係絕對無，但只係細到億中無中，絕大部份人贏得一兩個月，原本贏錢條方程式又唔得，唔識止賺好易輸番俾佢。一般人好難有止賺止蝕的自制力，所以贏錢時搬走啲錢去買樓，係好好的方法，咁就逼自己把投機所得，轉去投資。炒開股的人，叫佢長揸股票投資都唔得，因為揸住股票唔郁佢會身痕，所以揸樓好過揸股，揸樓可以揸長幾年，若所買的樓處於經濟增長區，就有長線升值空間，加埋買借錢的槓桿，投入資金可以以倍數升值。

第三，買樓消費費和買樓投資有好大分別，如果買間靚屋只係俾自己住，咁樣不產生任何租金收益，供樓的錢要自己付，這主要是消費而非投資，買入靚屋高於自己當下的賺錢力時，更是很吃力的高消費。不過美國人由於太過大花筒，太唔識儲錢，所以買自住屋是好多人的成功投資(特別是在過去20年樓市上升的長週期中)，佢地後生先買細屋，隨著收入增加，換中屋，換大屋，到仔大女大離開後，賣了大屋，換番間中小型屋，就賺了大筆現金，可能是他們一生人唯一成功的投資，所以自住屋都隱藏一點投資成份，特別在樓價升得快的時代。總括而言，買樓投資可以幫人鎖定較長的投資年期，對坐唔定的年青人較有利。

第四，去高增長地區買樓，不能太慢，因為佢地樓價升得快，你落注時間拖得慢，會買貴好多，例如你想買上海樓，應該今年第4季就買，等明年去睇世博會才買，到時若大陸經濟復甦的勢頭完全確定，樓價會更貴。上海樓價是幾個沿海大城市中最貴的地方，市中心不用提，遠一點的地方，例如上海外部地鐵去市中心30分鐘車程的地區，2000多呎的連排別墅，要300多萬人民幣一間，可能只是紐約BROOKLYN兩層家庭屋的80%價錢，租金回報約4厘幾。外國人買樓都係照樣申請，首次置業最多可借80%，睇稅單睇入息證明，買完搵代理代為放租。

投資愈早愈好，消費愈遲愈佳，年青人早啲儲起人生的第一桶金，就有錢搵錢的機會。

陸羽仁

美國企業即將派發第三季度成績表，投資者普遍認為企業第三季業績應該不會差於上季，樂觀的期望，刺激投資氣氛，加上高盛上調大型銀行股評級，推動金融股上漲，美國服務業自2008年8月以來首次擴張，美股成功扭轉連跌四日嘅弱勢。杜指開市即反覆上揚，逐步攀升，直升至收市最後一小時才回順。

杜指收市報9600點，升112點或1.2%；標普500指數收報1040點，漲15點或1.5%；納指上揚20點或1%，收報2068點。紐約證交所交投偏淡，成交縮減至11億股。杜指期貨最新報9550點，比現貨低水50點。美股近日一直有回吐的勢頭，昨日終於止住跌勢，反彈亦有點力度，而看看反彈完美股會否再試低一點，還是開始穩定向上。跟住好快美股的第3季業績公布期又到，再由美國鋁業打頭陣，美股升沉還看業績，上季美國公司收入唔得，靠減少開支增加純利，市場期望第3季業績看到一點收入增長。在投資者利好的預期下，快將公布業績的美國鋁業勁揚4.7%。

港股美國預托證券跟隨大市收高，ADR港比指數收報20606點，比香港收市高177點。匯控收報86.15元，比香港收市高0.5%；中移動收報75.41元，比香港收市高0.6%。

佔了美國GDP的80%的服務業終於出現擴張的勢頭，美國供應管理協會(ISM)公佈，9月份服務業指數為50.9，高過市場預計的50。係2008年8月來首次高於50，且為去年5月以來最高。

Deutsche Bank Private Wealth Management旗下U.S. Equity Group主管Owen Fitzpatrick表示，「服務業佔經濟的比重很大，終於過了50。這是復甦的頗為利好跡象。本周在該資料的帶動下開了個好頭。」另外，他又認為「業績期整體將為利多，我們可能將聽到企業情況改善，以及看到一些行業營收增加」。

我在《頭條日報》講起匯控和高盛等美資大行的看法不同，惹人憂慮，可以再補白兩筆。匯控CEO紀勤(Michael Geoghegan)在上週末接受《金融時報》採訪時表示，由於擔心未來幾個月內可能再次出現經濟衰退，他正在推遲企業擴張計劃。他認為全球經濟可能會呈「W」形復甦，「如果我的猜測是正確的話，那麼在經濟復甦到來之前，我們必須非常謹慎，不能增加資產負債表上的負債項目，只能在今後將這些計入資產減損。我對增長過快持謹慎態度。」

匯控取態審慎有兩個含意，第一是他在歐美業務好大，佢係知情人士，佢應該睇到歐美業務的反彈不如預期大，所以才有「彈完再跌」的擔憂。股市圖表派交易員好明白呢種感覺，即使日中交易也如是，如果股市一棍插一下來後反彈好有力，個市可能已經見咗底，跟住即使彈完再回，都係反覆向上，但大插後的反彈無乜力，就怕佢再試底。第二，匯控咁講等如預告業績，因為匯控對美國次按業務作了大撥備，如果佢覺得經濟無事，就可以大力回撥，即時會令盈利大升，但紀勤在訪問講明暫時不會為美國業務回撥，所以不能期望匯控純利因為回撥大升。

匯控審慎，不過高盛就取態樂觀，佢認為香港國企股只係調整，昨日對美國大型銀行也作出樂觀預告。高盛分析員昨日話，「市場未能意識到美國大型銀行相對於地區銀行，獲利能力已大幅改善，我們相信這項獲利能力的差異，並未完全反應在股價上。」將大型銀行評級由觀望調高至具吸引力。

個股方面，高盛稱富國銀行（Wells Fargo）「在每股有形資產的變動上，是這一週期的大贏家，由2007年第二季至2009年第二季，增加了70%。理由係富國銀行以低價買進了Wachovia銀行。」逐將富國銀行調高至「買入」。另外，又將Comerica評級調高至觀望。並將Capital One金融、摩根大通銀行及美國銀行加入其「買入」名單。受高盛調高評級刺激，金融股大幅造好。標普金融股指數收高3.3%， KBW銀行股指數漲3.2%，富國銀行勁升6.9%，美銀升3.8%，而摩根大通漲4.6%，係表現第二好嘅杜指成份股。

美國金融業左右股市，高盛睇得咁好，點會估計經濟進入一個W型復甦的困境。有人睇好有人睇淡，有買有賣才成市場，睇吓你信邊個，不過作為投資者，就要假設吓出現兩種不同情況時，你有乜嘢處境。

陸羽仁

澳洲央行意外地提前加息0.25厘至3.25厘，係20國集團(G20)第一個加息的國家，預示全球超低息時代將逐步完結，按傳統智慧加息對澳元係好消息，對澳洲以至西方主要股市都唔係好消息，所以澳洲昨日股市反應都幾正路，昨日人升澳股只能微升0.4%。

不過歐美金融市場反應就唔係幾正路噃，佢地倒轉嚟睇，認為澳洲加息顯示佢經濟開始穩定，話會加強了投資者對經濟復甦的希望，結果金融市場大波動，美元走弱，美元指數跌0.7%創新低，而黃金和大宗商品上升，金、鋁、煤、油全部升2至4%，金價升上52週新高，紐約期金曾見1045美元，現報1038美元，歐美股市亦大幅向上。所以有時同一單消息，可以有兩種相反的詮釋，澳洲股市昨日腳軟完，今日知道歐美市場當佢地加息係好消息，今日早段升番1.5%，叫做補吓數啦。

美股昨日第二日大幅攀升，杜指開市即抽上9700點水平，上午最多升過174點，下午回順約100點後再重拾升軌，杜指收市報9731點，升131點或1.4%；標普500指數收報1055點，漲14點或1.4%；納指上揚35點或1.7%，收報2104點。紐約證交所交投依然偏淡，成交只有12億股。杜指期貨最新報9664點，比現貨低水67點。

美股逼近高位，標普500指數收1055點，距離9月22日的高位1071點，只有1%之遙。今次美股調整只跌了5%左右，其實自3月美股從低位反彈以來，只有6月尾7月初那一次調整幅度較大，跌了9%，其餘每一次調整都只是跌3至5%，呢次唔係跌咁多，係正常而非特殊。美股維持一級級向上的強勢，雖然升得唔算太急，但亦穩定向上。

在美國交易的港股預托證券升幅溫和，ADR港比指數收報20901點，比香港收市高89點。兩隻重磅股個別發展，匯控直頭無得升，收報86.58元，比香港收市低0.1%；中移動收報76.96元，比香港收市高0.3%。

澳洲成為20國集團(G20)成員國中，自金融危機以來首個加息的國家，澳洲央行指經濟已渡過最危險的時候，所以可以開始脫離超低息期。經濟衰退本來是壞事，但政府在衰退期大開水喉，卻成為支持股市的主要動力; 反過來說，經濟復甦本來是好事，但政府在復甦期開始加息和減少放水，卻會令投資市場產生震蕩，因為低資金成本的日子即將過去。所以大家一直關心各地政府開始加息時市場的表現，今次澳洲開了一個好頭，首次加息卻令市場作正面詮釋，出現一個加息而股市不跌的良性循環，政府可以慢慢退場，令經濟回到正常自我運轉的軌道。

不少交易員傾向相信加息預示全球經濟正在復甦。KeyBanc Capital Markets的上市交易部主管Kevin Kruszenski話，「澳洲央行升息，證明經濟狀況正在改善。對南半球的經濟而言，這是一個利好的指標。」美國聯儲加局則暗示，近期不大可能加息。紐約聯邦儲備銀行行長William Dudley在週一晚間表示，利率將在較長一段時間內維持在低水平。

美匯指數下跌0.7%，最新報76.51。杜瓊斯美國國際集團商品指數(Dow Jones-AIG Commodity Index)漲2.5%。美銀美林大宗商品交易分析師布蘭奇(Francisco Blanch)週一出席倫敦的一個會議時估計，到2011年油價重返每桶100美元上方時，金價或會升至每安士1500美元。他表示，全球流動性過剩以及因政策限制而引發的石油短缺都將會推動油價回升，與此同時，多數大宗商品的價格也會隨之上漲。在2011年之前，金價可能仍會從匯率的疲弱走勢中獲得支撐，而且有望升至高點1150美元。

布蘭奇看好銅價走勢，但預計鋁價的上行空間有限。他指儘管全球經濟陷入衰退，但銅的庫存增長速度卻非常慢，未來銅市場將依然吃緊，預計明年銅供應將會出現短缺現象。鋁市場則依然面臨庫存高企以及新增產能問題。布蘭奇對商品價格走勢的估計，可以作為愛炒商品股者的參考。

陸羽仁