發新話題
打印

[轉貼] 陸羽仁 blog (5天更新)(更新至8月7日)


避險與爭勝(8)(2007/9/5)


美股道指又升91點,港股開市似會抽一抽,近幾日港股升起上來無乜力,網友唔係好明,其實月頭大戶不發功,所以股市游緊自由式,有北水買吓咪升的,美股好又升吓,不過你見到400點、500點的升市,就是大戶發力的日子,他一發力,又會觸發更多市場的盤路跟風入市,反方向亦然。

有網友轉貼內地報章《第一財經》講中國鋁業(2600)挾淡倉事件,和估計的情況相近,中鋁一隻市值800幾億的股票,在8月27日可以一日升32%,8月28日又一度再升23%,簡直係挾倉挾到阿媽都唔認得,所有淡倉都要計數投降,報道講的勝方之一是一個係私募基金,我估輸錢的應該是對沖基金,多數係一個鬼打鬼的局面。一直有一批對沖基金覺得紅色股太貴,不同基金在沽空不同的H股,今次他們借貨沽空中鋁,俾人數到貨,可能本來也是幾大基金揸重貨,見到不斷有人來借貨沽空,幾個夾一夾數,就知道借咗幾多貨出街,仲有幾多可以沽貨,等對方沽得七七八八,數清可以再沽的街貨不多時,就借北水自由行的利好消息,幾家大戶一起全力掃上,兩日升50%以上,任何唔想跳樓的對手都要投降了。

事後看中鋁挾倉事件,可以當故仔咁睇,但也可以作為一個個案,研究投資的我或投機的我如何應對這種局面。

股市惡毒兇險,高手過招,你走埋去玩,好易被他們的劍風掃兩掃都掃死。散戶見中鋁係咁狂升,第一個問題係好唔好去追貨,事後看來,你唔知背景,貿貿然去追貨,風險真係高得好緊要。

其實可以從不同角度睇這個題,首先要看你是投機者還是投資者,同時要看你手上有貨還是無貨。先假設你當時無貨,究竟好唔好買貨呢?投資者當然諗都唔應該諗,記得在8月27日急升後,陸羽仁在頭條日報專欄提到中鋁,話一日升32%的股份,任何有理性的長線投資者如退休基金,互惠基金都不會買貨。換了投機者的角度,有句話叫「寧買當頭起」,這不正正是要搶貨的時候嗎?不過即使是投機,除非係睇幾個價位就走人的極短線投機者,否則見到咁o既喪升股都好難掂,一兩日升咗咁多,再升水位有限,挾倉味咁濃,正路挾完倉會回,短線炒作的風險都極高,炒唔過。

假設你有貨在手,咁又沽唔沽好呢?同樣要分投資者或投機者,從一個投資者的角度,雖然升得誇張,明顯透支了一段時期的升幅,但忍得的話最好還是不沽,你不明白佢o既升因,或許不是挾倉,而是有真實的利好因素,當時無法判斷,如果貪快錢沽了,或許中鋁真是見了短期高位,但誰知道三個月後的事呢?貨源集中咗,或者佢下一浪更高呢,浪頂好難估,除非你見到市場或個股有重大改變,否則笨笨地揸吓更好。我見好多叻仔叻女揸住A50基金(2823)游水,游游吓隻股游咗出大西洋,唔理你,所以長線投資者要盡量減少出入,即使見自己的股票現價升到唔合理的水平,都可以變得更唔合理,要持有到盡量長的時間。順帶澄清一點,我話要大家習慣大陸式的40倍、50倍市盈率的貴股,並唔係話叫你去買,買唔買你自己諗,但若你選擇去買這些貴股,只能當作投機,萬勿當作投資。

若果係持貨的投機者當時見到中鋁狂升又應該點做呢?策略和投資者完全不同,投機者應該沽貨,可以高位分段減持,見狂升又沽一半,再狂升再沽一半;又或者沽貨至取回成本,有剩才揸長啲睇吓;亦可以定止賺位,跌到止賺位清貨。投機講週轉,唔係鬥命長,同一筆資金,一個月賺10%,好過一年賺50%,投機資金有水位就要食,唔食哂都食一部份,錯過獲利機會,鎖死資金,機會成本好大。而且投機好多是係高買高賣,只能食一段,短炒買得平,都可以睇長少少,愈買得貴,防守的空間有限,就愈加要走得快。

 睇完上面的分析,就知道投資和投機的取態好唔同,買股要避險,首先要搞清楚自己想做乜,最忌方法錯配,你主觀上覺得自己是投資者,但事實上卻專門高追貴股,或者專買雞股,做哂投機者的行為,而且有糊唔識食,結果就會扮蟹。明明係一夜情,卻想與對方長相廝守,你天唔天真啲呀?有些人連自己搞緊一夜情都唔知,就更加糊塗之極矣。

陸羽仁

TOP


避險與爭勝(9) (2007/9/6)


  美股道指跌143點,主要受房屋銷售數據不理想影響,對上月二手樓簽約指數跌12%,比預期跌2%,證明樓市大鑊,令到美國地產股急跌,搞到美股急回。好多朋友問次按有無事,其實次按觸發的金融問題(例如商業票據市場停頓,企業只能用極高息發票據借錢)尚在急救中,估計唔掂可以用減息搞掂,目前減息機會不低,所以股市反彈,但美國樓市大大鑊,還在反覆爆發,減息應該都頂唔住,明年會更大鑊,所以次按和樓市好似樹幹和樹根,而家由樹根爛起,短線而言,執好樹幹又搞到棵樹幾靚仔,但中線而言,救到樹幹救唔到樹根。

  日圓又升,今朝兌美元升到115日圓邊位,高息貨幣下跌,又一輪套息交易拆倉潮,看來港股要受一受壓了。

  我見好多網友的回應,都和群眾心理有關,所以今日想講講「走快群眾半步」的話題。首是假設投機市場(唔係投資市場)係一個屠場,群眾咩咩聲行入去,隻隻劏哂肚打橫行出來,見到咁情況,結論好似好簡單,做群眾相反之事咪得囉。

  事實當然唔係咁簡單,股市引人入勝之事,通常會延續一段時間,引夠老襯落水,然後才走向反面,正如個市開始升,群眾半信半疑小注落場,你立刻走去沽空佢,輸死你都未天光,因為要引夠大批傻仔落叠,走勢自然要深度發展,你太早走去做相反之事,好易被走勢挾死。

  所以我的理論係要比「群眾走快半步」,個個買股,升到你唔信時,投機的你就要走,唔走哂都走緊一部份。個個沽貨,跌到你唔信時,投機的你亦不妨買啲,小注試盤,試啱有賺價在手才落大注追貨。

  網友非常道話香港人動西方手術,事實上大部份香港人和大陸股民一樣,只會隨波逐流,不動任何手術。要做到一感覺個市唔對路即動手術,十個人中無一個人做到,做得到,手術動得快,比一般散戶保留更多實力,到個市跌到阿媽都唔認得時,就有水頭吸貨。

  估計羊群的情緒極為重要,這就是我經常講的「散戶指數」,網友Panda123話陸羽仁網誌可以做指標,回應數量多時股市就熱,反之就冷,我認為這不是太理想的指標,因為網友的回應和波動有關,大升大跌時問題最多,比股市狂熱時更多,所以頂多只能作半個股市熱度指標。

  群眾情緒是最大的投資陷阱,若果跟住大圍情緒走,唔識抽離,最後的終點站只是屠房,所以不能不跟住群眾行一段,也不能跟住群眾行到尾,行到咁上下就要離隊,跟住人行是爭勝行為,識得落走是避險策略,至於那裏是「尾站」,本來幾難判斷,但又用番我早兩日講的原則,當你揸住成手股票,見佢哋起勢升,升過不停,覺得好過番工好多,認為自己就係股神,那時候就係那一浪的尾站。大家都睇過過年過節燒煙花,你想知道幾時完,唔使睇錶,突然間大量燒花放上天,燒過不完,響聲不絕,就係最後一爆啦,記住我講這個燒煙花效應,唔升到咁,點引到最後一班、也是最大一班老襯接貨呢!

陸羽仁

TOP


避險與爭勝(10) (2007/9/7)


  寫了這麼多篇「避險與爭勝」,是時候來個總結。寫這些文章的緣起,其實源自8月17日Deep V日早上一篇叫「避險與博矇」的文章,當日覺得大市跌到20000幾點時,已到臨界點,如無特大壞消息逼爆大市,應該跌到差不多了,所以寫了這篇文,警示風險之餘,亦提吓大家可以雞仔注博吓矇。

  其後大市果然反彈,但反彈速度亦出乎自己意料之外,原本預計兩個月才發生的事,在十幾日就發生了。再想寫「避險與爭勝」的文章時,其實目標已變為主要想講避險。在跌市之後,又有兩個老生常談的總結,第一,如果炒作的朋友,在跌市之初一跌到一成止蝕位即打靶,保留實力,之後就有機會執到平貨。第二,今次跌市復元得比三月跌市更快,一年已試了兩次,急促調整,急促復元,試得三幾次,散戶對跌市就完全無防備心,即使明知自己做投機的我,見到跌市只是死守,博佢一個月後無事發生,最後出現終極一跌時,就會全軍覆殁。

  陸羽仁覺得,在升市中,順市而炒,各方聽的貼士都信一半,跟炒吓,走一轉,要「爭勝」不難,市旺時冧巴滿天飛,隻隻升幾成,難就難在要「避險」,特別是要求有避險成本下仍能有較可觀的回報。

  股神巴菲特講過,投資第一個原則是要不輸,而第二個原則就是要堅持第一個原則。所以如何令自己不輸,少輸,最最重要。

  為了達成不輸的目標,首先要分開「投資的我」及「投機的我」,兩者不能錯配,錯配了,特別是以投資的心態去投機,必定死人。

  舉個例,網友Cecila讀緊書,第一次買股,買了隻富士康(2038)的窩輪9578,我見她打簡體字,不知是否內地朋友來香港讀大學,要知道買股和讀書一樣要交學費,我有少少擔心你今次要交學費。新手買窩輪的原因好簡單,資金有限,又不滿足於正股一兩成的可能升幅,於是買輪想把升幅擴大,但買的時候好少諗買輪跌幅也同時擴大,買股第一律是「未諗贏先諗輸」,買輪更要預咗輸清。富士康在去年底創了27.7元的高位後,其後大市不斷創新高,但富士康跟唔到大市,未再創過高位,現價20.85元,股價長期在20元至25元的區間走動。

  Cecila買的富士康輪現價0.04元,佢話在8月初買,我估佢買入價0.05元左右,跌幅約兩成。這隻輪年底12月31日到期,行使價30.08元,比起富士康的現價20.85元,是極價外輪,再觀察富士康弱於大市的走勢,年底要到行使價的機會不算高。換言之,Cecila若持貨到尾,窩輪有機會變成廢紙,一毫子都輸清。所以Cecila買輪的原因雖然可以理解,但此行為客觀上已令她變成投機者,投機買輪,要定止蝕,一成止蝕價太窄,定三成止蝕都得,但一定要止蝕,否則正股牛皮向下,時間值耗損,價外輪可以跌價跌得好快。炒輪要快,快來快走,千祈唔好話想「長揸」守吓,一唔對路就打靶,要炒換隻波動大一點的H股輪,仲有得博吓。好多人買輪當投資,心態錯配輸死人。

  知道自己是「投資的我」還是「投機的我」之後,就要選不同對象投資,正如基金都有不同的風險度,退休基金只選穩陣投資,互惠基金一般亦不會太進取,對沖基金和私募基金比較博命,要知道高回報同高風險係同義詞,你買互惠基金,一般不期望佢一年升五成升一倍,但也不希望它大幅輸錢。但買對沖基金你就期望佢有三、四成回報,也要知道佢衰起上來會摺埋。

  按自己的風險胃納,決定投資和投機的比例。投資主要平買好股,揸長線,少進出,只要買入的股票進入上升軌,一般可以唔睇唔理。投機順勢而炒,嚴守止蝕,唔好扮專家,扮睇基本因素,買隻雞股仲講一大輪基本分析,一隻空殼炒到十幾億市值,開始跌市時唔想認輸止蝕,還說它有什麼煤礦鐵礦業務,死守唔走,結果真係會死咗,買咗雞股買咗輪唔對路時沽不足惜,呢隻唔得,炒過第二隻,最緊要週轉快,多贏少輸,而唔係要長揸做人世。

  股市步向高位,高處未算高,唔炒會手痕,亂炒會傷身,遲炒不如早炒,早炒早著,累積番少少本錢,將來跌起上來,還有些利潤可頂,最怕那種又想炒又怕痛的心態,遲遲疑疑,結果就等到股市最熱,最高位時接貨。要時時有避險之心,緊要過你睇啱大市方向。

陸羽仁

TOP


政治性收購 (2007/9/10)


   港府上週五罕有入市,用了24億元,購入1572萬股港交所股份,令港府的持股量由4.4%升至5.88%,平均買入價約155.4元,在港府強力買盤帶動下,港交所當日走勢淩厲,收報158元,而政府入市佔港交所當日成交六成左右。政府大手買入港交所,如何影響港交所後市,深受關注。

  相信有留意港交所股價的股民,見到港交所炒到158元,自然會大嘆走寶,在半個月前8月17日港股deep V試底日,港交所最低見過100元,若當日撈底,現在已有近六成回報,以一隻巨股這麼短時間就有如此大的升幅,除了因為港股波動大之外,亦見港交所的吸引力。

  有一個中環茶友一年多前和老外芬佬談起港交所,茶友認為港交所70、80元已貼近外國交易所股價水平,已經「到價」,不過老外芬佬唔係咁睇,話大陸市場憧憬無限,大陸交易所股份未上市,要買大陸概念的交易所,唯有港交所,所以值得買。茶友話鬼佬買港交所其實係炒概念,唔係具體計盈利計市盈率,所以港交所股價可以升到無譜。

  港府在高位入市買港交所,等如為港交所股價打氣,但也令識計數的中環茶友們嘖嘖稱奇。市民見政府155元還去買港交所,好可能會跟風,話政府知道內幕,155元都去買,自然係睇到好高,所以唔怕跟跟。
  不過據陸羽仁收到的風聲,政府買港交所的行為是政治性而非財經性,即係話政府並不是從買股投資增值的角度買港交所。

  現時《證券及期貨條例》已規定,任何人未得財政司司長批准,不能持有超過5%港交所股份,政府這次增持到5.88%,便成為唯一一個持股超過5%的股東,雞雞地都係單一最大股東。雖然港府持股量細,其他外資合起來肯定多過港府,但金管局發言人講明,希望政府在股東會議上提供意見,並在重大事件中投票。過去政府為表示中立,未必會投票,如今則表明會投票,話明會扮演更積極的股東角色。

  現時港交所董事會中,政府委任包括港交所行政總裁周文耀在內的七名董事,股東選出董事有六名,按道理政府已有足夠控制。不過隨著港交所股價愈升愈高,港交所管理層的利益亦突顯出來,是否會對政府的建議言聽計從,也是一個問題。

  中國證監會研究中心在今年二月發表報告,指港交所有可能被外資收購,香港要未雨綢繆,顯示中央對這個問題也開始關注。雖然法例限了港交所單一股東未得政府批准不能持股5%或以上,但集合十幾個持股5%以下的基金提出收購,邏輯上仍有可能;政府增持股份到5.88%,雖然未能在股權比例上阻止他人收購,但已擺出一個姿態,港府不希望外資控制港交所,如果有意收購者只基於經濟動機,在「取易不取難」的原則下,可以嚇退部份想打港交所主意的人。

  港府高官私下講,港府購入港交所股份的原因,主要想逹成港府《十一五規劃綱領》的三項目標,包括建立中港兩地交易所的交叉買賣平台,建立交易之間戰略性聯繫,以及內地交易所將以港交所作為首選合作夥伴。

  換句話講,香港想同內地交易所合作,想港交所可以買賣A股,上交所、深交所可以買賣港股,但阿爺對香港講,你間交易所唔係太受你控制,隨時會被外資收購埋,大陸交易所同你合作得咁深,若你一夜間被人買起,我咪好煩?所以香港想同內地加強合作,先要搞好自己個後花園。

  從股民角度,唔好見到政府入股,就以為港交所好抵,合埋眼都可以追入作長線投資,香港有機會長線加強和內地交易所合作,對港交所絕對係好事,但一時三刻未能成事,不過港府咁大動作入市,必然會再引到外資買繼續炒吓概念,而且大市續升成交大,港交所可以再炒上,但記住在咁樣o既市道追入港交所,係炒作而非投資也。

陸羽仁

TOP


政治性收購(2) (2007/9/11)



一隻港交所(0388)玩轉大市,昨日港股受港交所勁升帶動,亦有北水見低吸貨,所以結果無事發生,應跌唔跌。

北水雖多,在外資的眼中,只是散兵遊勇,他們不少是在中銀開了戶排隊等自由行政策落來的資金,其性質如炒業績的游資,估計見好消息在前面,偷步炒一炒,執幾百點、1000點,無大志。不過北水阻住外資做嘢,假如我係鬼佬,就會變招,一係等你吸到無哂力時,隊你一鑊,一係順住你個勢,月中發力做上去,總唔之千萬不要對北水寄望太大,佢地唔係阿爺啲的錢,只係大陸有錢人和國企的私房錢。

講番港交所,政府入市買股,的確惹起好多人媽叉。不少港交所捧場客,見佢升得高沽咗,你政府在155元入市,搞到隻股升到近200元,沽早咗者自然會好慶。又有股民等跌市吸貨,政府入市炒高隻港交所,搞到個市跌唔落,又媽。這些媽叉有其道理,可以理解,最難理解為何外資都走出來媽。

有外資代言人大力批評,話港交所要同內地交易所合作,港府都無需增持,因為港股中國色彩咁重,無人敢得罪大陸。他直指政府增持係想影響交易所6個選舉董事的選舉。又話政府咁多錢應該走去派福利減稅云云。

這番話如果出自一個大學講師之口,大家都會覺好正常合理,但如果出自一個外資代言人之口,就覺得有少少身份錯置,因為若外資只是一個港交所的被動持股人,港府咁傻,咁高位仲去買入港交所股份,推高股價,持股大戶高興都來不及,點會去媽,千萬不要以為他們咁有原則,不義之財不去貪,合理行為應該大聲讚好,叫政府再增持先至係。

小股民無論喜歡政府買港交所也好,不喜歡也好,要明白政府行為的動機,才可避免做錯投資決定。

陸羽仁查探得知,港府公布增持港交所至5.88%,經過一番心理爭持,因為法例沒有規限港府持股5%要公布,所以她可以選擇一直不公布,暗手增持,但最後她決定公布,皆因在這個高透明度的社會,如果增持而不公布,雖然合法,但那一天被人發現了,又會被人媽叉到暈。

好了,政府決定增持過5%就要自行公布,聞說她開始時還是低調地慢慢吸貨,即是話由4.4%增至5%時買的0.6%,即600萬股左右,只係慢慢買。到上週五政府買貨超過5%這個臨界點,政府打算收市後就要公布,最後就急急買多0.88%,這900多萬股就是當日掃貨,就是因為政府掃貨掃得急,港交所當日就被政府掃高10元,政府公布買入平均價155.4元,當日收市是158元,由於政府早前已有較平的貨底,換言之政府當日是買到尾,見高位照掃,才會掃出155.4元這樣高的平均價。

正如我所講,政府是「政治性入市」,並不是以投資回報為主要考慮,所以也不怕買貴貨。牌面看,增持到5.88%,唔咸唔淡,按理應再增持,才有較大的影響力。但陸羽仁觀察股市主要看入市者的行為,政府在上周五「盡買」,超過5%時無停,盡掃到5.88%,這行為顯示,她短期內不會再買,如果想再買,當日過5%之後不用咁急掃貨,所以憧憬港府短期再入市炒起港交所,小心希望落空。

港府入市的背後的假設,是港交所日漸失控,港交所主要由13個董事組成董事局,政府委任6個,股東選出6個,再加政府委任的行政總裁,表面上政府控制7個董事。6個競舉董事每次改選3個,上次選舉外資推舉人選大獲全勝,明年又要改選,結果可想而知。

你話政府者控制7個董事,即使餘數全落入外資之手,都使唔駛咁驚呀?試想一個情況,如果香港同大陸傾掂,香港股市和內地股市深度合作,例如兩地股票交叉買賣,港交所可以買賣A股,上交所可以買賣港股,兩地股市慢慢變成二而為一。

有一天外資選出的董事突然拿來一個建議,話紐約交易所提出和港交所合併,提出現價高一倍的收購條件,你估有股權利益的行政總裁會不會心動,即使他是政府委任,又會否接受對方建議,搞出一個倒轉7比6的局面,同意港交所接受紐交所的收購?如果香港交易所意外地被外國交易所收購,大陸的股份全數在這個港交所上市,阿爺就會十分被動,完全暴露於金融風險之中。

陸羽仁講話天馬行空,但只要上述情況有1%機會出現,香港想和內地加深股市合作,都有極大困難,阿爺無必要冒這種風險,如非必要之事,有風險就唔好做,答案簡單之極。所以香港要和內地股市深度合作,先要掃乾淨自己個後花園。

港府增持後只持有港交所5.88%,照理並不足夠,沒有15%或以上,好難確保選出自己友做董事,所以長線不能排除港府會再增持,但增持不一定要在市場吸納,政府要港交所發新股俾佢都得,總之有好多方法。港府現時的持股量止唔到咳,但已向外資擺出一個姿態,香港唔會被外資控制港交所,若外資的投資「非政治性」,只是為了投資增值,遇上政府擺明車馬做對手,一般不會再搞落去,因為投資搵錢,講求週轉快,若和政府鬥法,曠日持久,入咗股唔上唔落(好似領匯咁),損失好多機會成本,就要選擇打退堂鼓;不過話說回來,如果對手嚇唔走,必有大圖謀,政府就更加要小心了。

陸羽仁

TOP


政治性收購(3) (2007/9/12 )


  美股道指升180點,主要是企業如通用汽車聲稱需求仍然強勁(唱好?),以及市場預期聯儲局下週二會減息,而且一減就減半厘,唔係四分一厘。照計香港紅色股在阿爺調控陰影下仍會軟軟地,但炒減息的浪潮又開始湧至,睇吓邊股力量大,我就估炒減息的力度會愈來愈大。

  美國這個次按危機大大鑊,如果聯儲局唔減息,這個月要推出市場以千億美元計的商業票據,唔知點賣,所以如果唔減息,就真係好壞o既消息。

  再講吓港府增持港交所。陸羽仁暫時唔係覺得政府增持到5.88%好得,因為無番10零個巴仙,都唔可以保證選出一個董事,所以政府增持暫時只是姿態,不能確保有實效。不過西方報紙及其代言人就開始媽到七彩,又媽得過份咗少少。

  好似《華爾街日報》登了一篇名為「香港除牌」的文章,指港交所日漸成為全球主要的金融中心,但港府突然增持港交所,與全球交易所私有化趨勢背道而馳,批評此傷對香港做成傷害,要將香港除牌咁話。

    老外的雙重標準嚴重到咁o既地步,真係忍唔住要講番兩句,紐約交易所、納斯特克交易所私有化呢個大趨勢大得咁緊要,的確值得學習。不過大家想像一下,如果明天工商銀行(1398)提雙倍價錢,全面收購紐交所或納斯特克交易所,你估又買唔買得成呢?當然買唔成啦,到時就會話共產黨想控制美國交易所啦!

  好啦,你話我詭辯,因為工行唔係私人公司。我又改一改,由和黃(0013)提出收購又如何?結果都係一樣,同樣話你和黃等如中國控制的公司,唔可以控制美國的交易所。過去和黃去美國買碼頭,已經被美國議員話過佢係中國控制的公司,結果買唔成。所以西方「私有化」的交易所,只係對有限對象開放。

  所以老外一句「私有化」,講落好好聽,但好似交易所這種重要公司,都係由幾個主要的金融巨頭控制,這些金融資本,最後只是幾大集團,在全球搵食,你一阻住佢,佢就話你干預市場,最好中門大開,任佢提款。

  中國是由專制的政黨控制國家,西方就係由一小撮金融巨頭操控的國家,他們主宰經濟、政治,控制埋政府,佢地投注政治,唔係揀一邊,係買全骰,以美國為例,總統選舉臨近,金融巨頭對共和黨候選人又捐錢,對民主黨又捐,唔止捐俾希拉莉,亦捐埋俾佢對手,你話有錢幾好,買嘢唔使傷腦筋揀一邊,邊邊都買,實中。

  美國政府干預市場之多,在次按一役表露無遺,而且全世界政府都係咁,早就唔做嘢,要搞到好大劑先至有反應(例如港府為何不在港交所上市時先增持至有顯著多數股權,要到今日才搞?)美國監管當局過去任由金融機構把劣質次按包裝成AAA級的「債務抵押證券」(CDO)賣出去,任由評級機構把它們評上最高級別,到如今出事後,炒一兩個CEO或部門主管頂罪就草草了事,這又怎能算是良好監管?如今在次按爆煲之時,更放寬監管準則去救市,讓金融機構可以繼續借錢俾次按業主,還要提醒四大核數師行監管準則已放寬,對金融機構查數時可以鬆手,這種干預不正正損害著美國金融業良好監管的核心價值,為何不見《華爾街日報》對此大張撻伐?

  千萬不要以為上述這些分析,對投資不重要,這些才是最重要的東西,你要搞清楚理念,才知道你炒股、炒大市時,誰是你的對手,這些對手有幾強,這些對手如何行事。明白大概念,投資時無住而不利。




陸羽仁

TOP


避險與爭勝(11) (2007/9/13)


美股大升後牛皮,昨日道指微跌16點,由而家到下週二,港股和美股進入炒減息的日子,然後睇吓伯南克開大定開細,開大,減夠半厘,如果香港起碼跟到減四分一厘,大市就維持上炒格局;若果開細,只減四分一厘或唔減,後市就有較大回吐壓力。當然港股還要睇睇阿爺會否星期五收市後又出招。

早前打算寫完的「避險與爭勝篇」,因為網友的問題,寫吓續篇,我話美國次按和樓市的問題如海嘯一樣,還有大災難在後頭,如今只是大海嘯前的退潮,你去海灘執蜆執蝦要小心。網友yuki問,海嘯來得咁急咁快,到時有無足夠時俾我地睇到佢來之前的訊息號呢?

  網友benny的回應好好,大家可以睇睇:

Yuki: 呢排我都一路諗緊你講既問題,睇咗陸sirblog同金曹師兄、其他師兄師姐既回應咁耐,我發覺自己有一個好重要既觀念改變,以前成日想揾到好清晰既指標話比自己聽點做,譬如一隻股升到阿媽都唔認得,應該幾時放?點先可以賺到盡?入市價點先可以做到最平?

  但漸漸發覺,呢d諗法太理想化,因爲股票市場入面既種種現象,係唔同人既意願不斷互動所產生出黎,由於人心難測,我認識到"摸住石頭過河"既道理。

應用番去你既問題,從一個中線投資既角度,我都好想知道幾時係呢一輪既浪頂,但我諗絶對無可能會有足夠既signals話比我地聽,我自己會睇散戶情緒(因爲大戶係睇住呢樣黎玩)、資金流向、經濟情況(即大環境同大戶做嘢方向既關係)等,但都好片面,因爲遇上突發事件(往往股災就係黐住突發事件),全部無用。

  咁退一步講,如果唔能夠賺到盡,不如諗吓點樣"盡量賺到盡",我諗方法有好多,其中一樣係大家成日講既分段沽、分注買,我覺得非常有用,因爲如果一嘢買哂或沽哂而最後發覺做錯事,個吓心理壓力好鬼大(仲有一d係側邊睇嘢既人既笑罵聲),分段沽、分注買絶對可以幫到手。

  至於你話有冇足夠時間俾你走,我諗如果套用上面講既分段沽,時間永遠係夠,只不過睇吓你想賺幾多。」

  你地睇陸羽仁的文章長啲時間,就會發現我講投資和其他人好唔同。普通人講單面,我會講雙面;普通人一係講升,一係講跌,我會講升完會跌,或者跌完會升;普通人講買股唔分投資與投機,我會講買股前首先要分清自己想做什麼;普通人講估計贏幾多錢,我話要同時估計贏錢和輸錢;普通人用緊散戶的思維,我嘗試追踪大戶的部署(雖然好多時只係估到六成);普通人靠買中一個方向賺錢,我會講大戶靠人造波動賺錢,你追到佢啲波動搭順風車會賺到啲錢,或者至少唔好輸錢。

  你想像吓一個鏡頭,你好快樂地在海灘執蜆,隻隻又肥又大,的確是一幅好開心的圖畫;若把鏡頭一路拉濶,升上高空,才會看到遠方有一排排海嘯巨浪湧至,又變成好兇險的場面;一件事是好是壞,視乎你在什麼時空,用什麼角度看。你話咁兇險就最好唔買,等海嘯啦。我就話,咁係唔係最好方法,真係兩睇,我講海嘯,的確係覺得佢有機會來,例如有七成機會,但仍有三成機會佢不來,即使佢來,又點知佢幾時來呢?若你停手唔買股,跟住見個市起勢升,會唔會在更高位忍唔住落場呢?人通常是「眼見為真」,當眼見股市雞犬皆升時,又點忍得住唔落場呢?

股市散仔,買股票天天發夢最低位買最高位沽,例如幾年前以1.5元買中石油(0857),問吓目標價,那個時候最樂觀的分析員都係睇3元(他即使睇得好啲,都唔會把目標價講得太高,以防「最後」唔到價跌番落去時你罵他),你見「到價」自然會沽,然後等跌,佢無跌,仲升到無影,你就好揼心。

見到股神巴菲特沽中石油,你地問佢什麼心態。首先,股神買股無定一個目標價,佢會以公司的長線收益,折現成一個現金價值,若股票的市價比估計現金價值低好多時,佢就會買,假設佢當日買中石油時計出來的現金價值係每股4元,當時股票1元多,比估計價值有好大折讓,視為抵買。其次,股神沽股票是覺得基本因素改變,若果係好股,基本因素無變,佢會長揸,所以佢沽中石油係認為基本因素改變了,我地唔知佢認為基本改咗乜,到底是認為中國經濟過熱,會爆,抑或次按好大劑,全球經濟有危機,甚至令油價上升軌終結,唔知,但他應該有他的一套估計。但股神睇得好長線,貨又多,減貨不能減得太快,但佢一定覺得中石油、中國市場、石油市場甚至環球股市有啲問題。

講番散仔,投資唔講,只講投機,有人太貪,有人太細膽,要啱啱好才可以賺到大錢。有蜆唔執,可能是太膽少,假設未來幾個月股市大升,跟住你就會俾人話,聽個乜水陸羽仁講,話有海嘯,浪花都無個,正傻仔,你俾人笑一個月尚可,笑兩三個月就會頂唔順,我又會損失一個讀者。我經常話,預測股災無用,股災最後會來,睇吓幾時,如果股災明年今日到,我今日一年前大講股災,就係講錯,所以有蜆要執,你可能今日執完明日都走咗都話唔定o架。

但係話說回來,執蜆唔緊要,但每天都要有個防範心,一唔對路就閃,若果一直無出事,高位都要食吓糊,要避險和爭勝心兼備。因為執得兩執,你執到成手蜆,就會覺得自己好叻,係股神,我不能夠不提醒大家,包括我在內,大家都係股蟻,外資大戶才是股神,人地住山頂,我地住山腳,實力太懸殊,我不會定死一個指數目標,但大市升上25000點樓上風險開始增加,愈高愈危,大家自己執生,海嘯唔會一晚發生,只要你有防範心,唔對路時唔好賴死唔走,就OK。記住贏錢好多時講心態,講紀律,順勢而炒,直至可能轉勢時就要走避(其實炒股同股神沽貨的原理一樣,持貨至可能轉勢時),無人可以做到最低位最高位沽,唔好咁傻咁樣要求自己啦!炒股要有膽去炒,同時要知足食吓糊。




陸羽仁

TOP


避險與爭勝(12) (2007/9/14)


  美國最新申領失業救劑人數比預期少,加上大按揭公司取得巨額融資,刺激美股向上,道指升133點。港股正經歷一個炒減息潮,不過本地拆息高企,實際上美國減息都唔知香港減唔減得到,不過大家唔理,跟住大盤一起炒,看來港股這個浪會延續到下週二聯儲局議息。

  這一陣子講到「執蜆」,不妨再講吓執蜆心法。遊客突然見海邊浪退,大呼好嘢,紛紛湧上前執蜆也,但熟水性的漁民覺得唔對路,會離場。你睇股神巴菲特和美國鋁業都沽貨,就知道老行尊都感受到這個廚房的熱度。

  有網友問中鋁(2600)現價買唔買得過,你估睇鋁業公司的價值,有幾多人叻得過美國鋁業,佢對鋁價走向、市場榮枯、甚至中國市場的供需,都瞭如指掌,佢都要沽中鋁,而且要忍受較大的折讓,一手沽清,就知佢唔睇好。所以邊個人話中鋁現價可買入作長線投資,即係話自己睇鋁業股叻過美國鋁業,都係一個笑話。不過在兩三個月的短時間內,你覺得美國鋁業睇錯唔奇,因為佢咁大手貨沽出街,都有人接,亦同樣有大投資者看好(多數係基金),而且大折讓沽貨後反彈絕對唔奇,所以短線中鋁可以升一升,證明美鋁沽貨係「錯」,又係嗰句,啱同錯,係唔同時空睇,好唔同。

  講番執蜆人,你見佢在執蜆的畫面,鏡頭不斷聚焦,直至深入他們的大腦,你會發現不可能有不同的執蜆人可能有不同的想法,大多數人其實無用腦,只是官能反應,有蜆就執,無想過什麼,只覺得很快樂,因為從未試過咁易執到咁多蜆,我相信大多數股民都是如此,見到個嗰市係咁升時,就會把一切擔憂拋諸腦後,你要在海水底下慢慢摸蜆會好驚,隨地有蜆任執時就一啲都唔驚。在21000點、22000點時你會好驚,升到25000點、26000點就唔會再驚。我經常講,人做好多傻事,都係用器官思維,唔係用大腦思維,包二奶、包二公的人,就係俾器官控制咗大腦。

  不過亦有部份執蜆人有用腦,他們明知危險可能在前面,仍然要繼續執,因為現在執一分鐘蜆,可能比以住摸一年蜆還要多,利潤在前,博命都要試一試。這種人明知係賭,但係選擇了同大浪競賽,睇吓浪來得快,還是自己走得快。我想而家入市炒股,應該抱這種心態,千祈唔好盲摸摸咁執蜆,唔知危險。

  你當然可以選擇有蜆唔執,坐上高地做旁觀者,不過旁觀者有旁觀的風險,你初時見到人執蜆,會笑這些人好冒險,不明情況去博命,但過了幾分鐘,見到人一袋袋蜆咁樣執上來,你就開始有少少揼心,再過幾分鐘無事發生,你就會撲下去執埋一份,愈遲落場,風險愈高。你23000點唔入市,到25000點忍唔住才入市,你話風險係唔係高啲?若果堅持唔買,到時又出現阿媽話你唔識炒股的經典局面,你要EQ好好,頂得住俾人笑幾個月,等跌市爭取「最後勝利」,普通人唔易做到。

  股災和海嘯一樣,不可預測,而且住住在你防範心最少,炒得最精彩的日子俏然而至,泠靜執蜆,知足常樂,就是我給大家的錦囊。隨地係蜆任執,執蜆人好快頭腦發熱,要泠靜,知道好境不常。執蜆愈執得多,愈唔知足,愈覺做再執幾執自己就發過李超人,要對抗自己的貪念,要適可而止,到高位分段逐少出貨,落袋才是真錢也。

陸羽仁

TOP


減息一跌 (2007/9/17)


  週末和中環茶友飲茶灌水打牙骹,講到美股和港股,有些話題大家應該有興趣,可以一寫。

  大家講到美國減息,話題一是美國減息可能香港唔減,香港銀行同業拆息高企,細銀行借同業短錢,支持自己貸長錢俾客仔(例如按揭),按揭息率不變,拆息高時細銀行要蝕,所以美國減息會舒緩一下,香港暫時未具備減息條件,除非金融局發功,逼銀行減番少少。不過話說回來,當拆息市場平靜番,拆息低番,香港有機會滯後減息,到時香港有機會出現實質負利率,即定期存款利息低過通脹率(估計今年會升到3%),即係逼人投資,否則放在銀行會蝕水。

    香港股市已經過熱,負利率也逼不到多少錢出來,要炒股的早就炒了。但負利率有利樓市,特別一些保守型市民,見利息低企,買樓收租也不用貼多少供款,會增加買樓意欲,輕微利好樓市。

  為何說「輕微」利好,因為大家都無預樓市會大好,香港樓市,無大炒作唔會好好,只靠用家和投資者,無大量投機者入市,好難大好。而家香港人有錢投機,都去咗炒股,無乜人炒樓,除咗港島豪宅仲叫做有得炒吓,其他物業無炒風,咁就形成「惡性循環」,更吸引唔到資金入市(或者從用家角度,樓市無炒風可以叫「良性循環」)。

  有錢炒股都唔炒樓,似乎已成為炒作界的共識。剛聽到一個護士長講,她手下有幾個大學畢業生護士,做咗無耐,就辭工唔做,全職炒股去也。護士點講都係一門專業,新入行者放棄有穩定收入的專業,全職炒作,既反映股市有景,亦令人擔心好景不常。

  講番近期股市,由於港股近日升得厲害,特別是好耐無郁的地產股借減息浪炒上,股市差不多衝到25000點,令人覺得減完息會回,甚至偷步炒減息的錢,在減息前已出貨。

  升得多回吐唔出奇,問題是回吐還是大跌,中環茶友們似乎無人估本月會大跌,結果鬥估本月恒指收乜嘢價,有茶友估25000點,有人估略低於25000點,賭一餐飯,但賭低於25000點的茶友,也不是估有大跌市,佢話大戶咁辛苦砌上25000點,回番啲唔奇,不過未到期指結算就放手,任佢跌,等如白做,所以唔似咁快玩完噃。

陸羽仁

TOP


X記控投 (2007/9/18)


      昨日港股受歐洲股市拖累下跌,結果英國股市收市跌1.8%,隻北石銀行都跌三成幾,英國金融市場仍然樣衰,不過美股都幾硬淨,害死英國後自己唔郁,美股道指只係微跌39點,牛皮等減息,睇吓港股又可否頂番住。


  好多朋友無論做人和買股都好亂,目標不清,左右飄移,咁樣做一世都上唔到岸,今日可以講吓控制個人理財和投資的基本心法,網友小潘提到把自己當作一間公司咁經營,我過去都用過此方法,所以不妨講講。

小潘叫阿K唔好炒炒吓時咁講:「唔知你有冇當自己係一間上市公司咁經營?我就會每年定下一個目標,呢個目標係用以往賺既錢作為基本,我唔貪心,可能會set 10- 20%增長目標,有本事就set高一d。呢個增長目標,包括透過節流(雖然辛苦d,不過幾有用),搵多d兼職,工作上努力,博年中花紅以及投資。每一方面都要做到,不可以過份依賴某一方面收入來源。其實,長遠最後係做到靠投資既錢退休,不過希望是 50歲後能做到,一d都唔貪心掛。

之後,每3個月檢討一次進度(如果投資及收入不是很多,可以半年至檢討一次),你會知道自己係唔係達標,而增加或保持增加收入既各種方法。(上次因為3個月都冇計數,於是就買錯交行, 沽錯MTR,衰心急)。」

陸羽仁後生時也用過這個方法,我是一個開支永遠追不上收入的人(這是孤寒的代名詞),有一陣子見戶口的錢不斷增加,唔知自己用幾多錢一個月,就專門每次去提款時都記低,月底對數,計出一個月要用多少錢,然後計出每月儲蓄多少(收入減開支)。

  講理財,首先要講收入和支出的管理,把自己當作一間公司,要成為賺到錢的好公司,就要盈利快速增長,方法不外乎是「增加收入,控制支出」(如果不是減少支出的話),好多後生仔開支大過收入,這種是蝕錢公司,靠借貸渡日,水源一斷,立刻玩完,美國佬係典型,無論佢哋賺幾多錢都好,消費永遠大過收入,最近次按風潮起,華爾街開始炒人,好多人做到投資銀行部門主管,住大屋開靚車,一俾人炒三個月內搵唔番工就跌入地獄,因為平時使大哂,住啲屋永遠超乎自己負擔能力,靠未來可能增加的收入來頂,樓價升咗就加按去旅行,有個中環茶友話我聽,一年前佢參加一個加勒比海豪華郵輪之旅,同船差不多有一半美國客話俾佢知,他們是加按物業攞錢去旅行,使咗先至算,所以次按在美國爆起上來咁大鑊,美國人無論窮或富,都無holding power(持貨力),因為借到突哂。

  講完開支大,就要講收入少,我經常講,以後生仔計,自己的事業就是人生的最大投資,若事業做得好,可以產生好穩定而大量的正回報,而且會不斷增加,就算你完全唔識投資,但事業做得好好,都可以致富,這就是最傳統的發達方法,個個阿媽都會咁教仔,你乖乖地讀好書,入大學,做乜師物師就得o架啦,陸羽仁阿媽的年代要求更低,求其搵到份「寫字樓工」,有得涼泠氣開工,已經好好啦。咁o既觀念雖然陳舊,但有其道理,做好自己份工,就是人生最大投資。如果你係後生仔,做多份兼職,都可以增加收入,唔一定要靠哂投資。

好啦,點都講吓投資,投資得好,可以增加收入,收入甚至高過你o既本業,若出現咁o既情況,好多後生仔會想轉行全職做投資,覺得搵到食,甚至可以發大達,咁o既路似易實難,因為收入好可能因為個市好,不是自己特別叻,但股市不可能長期係咁升,到走勢逆轉向下炒兼靜過鬼時,全職炒股也不易搵食。後生仔頭幾年好重要,頭五年做得好,在行業內已可拔尖,你大學畢業去咗全職炒股幾年,若無所成,想返番本業唔係咁易,等如跑步讓賽,人地跑咗半個圈,你先至走入再跑一樣,好難追上。

我覺得在一般情況,特別係後生仔,投資只是配菜,不是主菜,但你食呢味配菜,都要講究策略,最基本的策略,係你嗰間「 X記控投有限公司」究竟是藍籌,還是五、六線公司,究竟要穩陣,還是要博命呢?(明天續談)



陸羽仁

TOP

發新話題
©2001-2009 3Talks.com, All Rights Reserved. 免責聲明及版權聲明

重要聲明:本討論區是以即時上載留言的方式運作,3Talks.com對所有留言的真實性、完整性及立場等,不負任何法律責任。而一切留言之言論只代表留言者個人意見,並非本網站之立場,用戶不應信賴內容,並應自行判斷內容之真實性。於有關情形下,用戶應尋求專業意見(如涉及私人、買賣、醫療、法律或投資等問題)。由於討論區是受到「即時留言」運作方式所規限,故不能完全監察所有即時留言,若讀者發現有留言出現問題,請聯絡我們。3Talks.com有權刪除任何留言及拒絕任何人士留言,同時亦有不刪除留言的權利。切勿撰寫粗言穢語、誹謗、渲染色情暴力或人身攻擊的言論,敬請自律。本網站保留一切法律權利。